Khandadeva: Bhattadipika, a commentary on Jaimini's Mimamsasutra,
Adhyaya 3, Adhikarana 2,
with Sambhubhatta's Prabhavali (subcomm.)
Based on the ed. by N.S. Ananta Krishna Sastri
Bombay 1921-1922 (Reprint: Delhi 1987)
(Sri Garib Dass Oriental Series, 50-)
Input by members of the Sansknet project
(www.sansknet.org) [server down!]
This GRETIL version has been converted from a custom Devanagari encoding.
Therefore, word boundaries are usually not marked by blanks.
These and other irregularities cannot be standardized at present.
An attempt to structure the text according to sutras had to be
abandoned for want of an adequate printed edition.
THE TEXT IS NOT PROOF-READ!
THIS GRETIL TEXT FILE IS FOR REFERENCE PURPOSES ONLY!
COPYRIGHT AND TERMS OF USAGE AS FOR SOURCE FILE.
Text converted to Unicode (UTF-8).
(This file is to be used with a UTF-8 font and your browser's VIEW configuration
set to UTF-8.)
| description: | multibyte sequence: |
| long a | ā |
| long A | Ā |
| long i | ī |
| long I | Ī |
| long u | ū |
| long U | Ū |
| vocalic r | ṛ |
| vocalic R | Ṛ |
| long vocalic r | ṝ |
| vocalic l | ḷ |
| vocalic L | Ḷ |
| long vocalic l | ḹ |
| velar n | ṅ |
| velar N | Ṅ |
| palatal n | ñ |
| palatal N | Ñ |
| retroflex t | ṭ |
| retroflex T | Ṭ |
| retroflex d | ḍ |
| retroflex D | Ḍ |
| retroflex n | ṇ |
| retroflex N | Ṇ |
| palatal s | ś |
| palatal S | Ś |
| retroflex s | ṣ |
| retroflex S | Ṣ |
| anusvara | ṃ |
| visarga | ḥ |
| long e | ē |
| long o | ō |
| l underbar | ḻ |
| r underbar | ṟ |
| n underbar | ṉ |
| k underbar | ḵ |
| t underbar | ṯ |
Unless indicated otherwise, accents have been dropped in order
to facilitate word search.
For a comprehensive list of GRETIL encodings and formats see:
http://gretil.sub.uni-goettingen.de/gretil/gretdiac.pdf
and
http://gretil.sub.uni-goettingen.de/gretil/gretdias.pdf
For further information see:
http://gretil.sub.uni-goettingen.de/gretil.htm
<B1> dvitīyaḥ pādaḥ /
(1 adhikaraṇam / ) (a.3 pā.2 adhi.1) arthābhidhāna //
evaṃ śrutyupayogivicāre vṛtte 'dhunāliṅgopayogivicāraḥ prastūyate /
tatra liṅgaṃ nāmāṅgatvaghaṭakībhūtaparoddeśyatākṛtikārakatvavācakapadakalpanānukūlā kḷptapadapadārthaniṣṭhā yogyatā /
yathā struveṇāvadyatītyatra struvaniṣṭhā dravapadakalpanānukūlā /
evaṃ mantreṣu svārthavṛttyuddeśyatāvācipadakalpanānukūlā svavṛttikārakatvavācipadakalpanānukūlā ca yogyatāliṅgam /
sā ca padarūpaśrutikalpakatvāttaddvārā tadarthaviniyoge pramāṇam /
tatra vastusāmarthyarūpasya liṅgasya viśeṣavicārāsaṃbhavānmantrasāmarthyasya kiṃ śakya evārthe viniyojakatvamuta jaghanyavṛttipratipādye 'pīti saṃdehe ------ kratuprakaraṇāmnātamantrasya "barhirdevasadanaṃ dāmī" tyādermukhya iva jaghanye 'pyulaparājyādau smārakākāṅkṣādirūpasāmagṣaviśeṣāt tatsādhāraṇyenaiva viniyogaḥ /
yaṣṭīḥ praveśayetyādivadākāṅkṣādirūpatātparyagrāhakasattve mukhyārthabādhasyākiñcitkaratvāditiprāpte ------ śakyasaṃbandhagrahasāpekṣatvena jaghanyārthapratītervilambitatvātprathamapratītamukhyaviniyogena caritārthasya mantrāderjaghanyārthaviniyojakatvānupapattiḥ /
ataeva tatsmārakākāṅkṣāyādhyānādyupāyāntareṇaiva nivṛttiḥ /
ataeva yatra prakaraṇe mukhyarthopayogo na kḷptastatra mantrāmnānabalādeva tatkalpanā //
yatra tu virodhiguṇāntarāvarodhaḥ prakaraṇe, tatra sāmānyasaṃbandhabodhakapramāṇasattve utkarṣaḥ /
yathā darśapūrṇamāsaprakaraṇāmnātapūṣānumantraṇamantrādeḥ yāgānumantraṇasamākhyāyāmeva sāmānyasaṃbandhabodhakatvāt, utkarṣasyāpyasaṃbhave prakaraṇa eva jaghanyārthe viniyogaḥ yathā manotādau /
aprayuktalakṣaṇādinā tasyāpyasaṃbhave tadarthābhidhānasyaivādṛṣṭārthatvam /
yathā japādau // 1 // 16 //
iti prathamaṃ mukhyārthe eva mantraviniyogādhikaraṇam //
<B2> yadyapi śabdatvasāmānyācchrutiviniyoganirūpaṇānantaraṃ vākyādiviniyoganirūpaṇaṃ kartuṃ yuktam; tathāpi pūrvapūrvapramāṇakalpanena viniyojakatayā tatsāpekṣatvena liṅgaviniyogopayoginirūpaṇaṃ pūrvamāvaśyakam /
ataeva śrutisāpekṣatvāttannirūpaṇottaramavasaraḥ kramaprāptatvādityavasarasaṅgatiṃ pādāntaratvādanantarasaṅgatyabhāve 'pyakṣatiṃ cābhisaṃdhāya nirūpaṇīyatvena pādārthaṃ pratijānīte ------- evamiti //
yadyapi śruterapyasamarthaviniyojakatvāsaṃbhavātsāmarthyakalpakatvamāvaśyakam; tathāpi "liṅgajñānaṃ purodhāya na śruterviniyoktṛtā /
śrutijñānaṃ purodhāya liṅgaṃ tu viniyojakam" //
iti nyāyena śrutyā kalpitayāsamarthasyāpi viniyogānna sāmarthyāpekṣā atastaduttaramevāsyāvasaro na pūrvamityadhunāpadena sūcitam /
liṅgopayogīti //
liṅgaviniyogopayogītyarthaḥ. /
tena vakṣyamāṇasvarūpaliṅgasya vastusāmarthyamantrasāmarthyobhayavidhasya madhye prathamāntye vastusāmarthyasya pramāṇatvena nirūpitasyaiva prakāraviśeṣacintāyā asaṃbhave 'pi mantrādhikaraṇe mantrasāmarthyasyārthaprakāśanārthatvena viniyojakatayā nirūpitasya prakāraviśeṣacintāsaṃbhavāt mantrasāmarthyakṛtaviniyogopayoginirūpaṇasya padārthatvam /
prasaṅgāttu vastusāmarthyasya nirūpaṇam /
ataeva aindyadhikaraṇe śrutiviniyogavicāre 'pi pūrvādhikaraṇavyutpāditamukhyārthaviniyogāpavādakaraṇāttasyāpavādika- saṅgatyā saṅgatatvānna kṣatiriti bhāvaḥ //
yalliṅgaviniyogopayogivicāraḥ prastūyate, tasya lakṣaṇamāha --------- tatra liṅgamiti //
atraca kvaciduddeśyatākṛtikārakatāvācipadayoranyataravācipadakalpana kvaciccobhayavācipadakalpaneti draṣṭavyam /
tatrādyasthalamudāharati ------- yatheti //
ataeva saṃskāravidhyanyathānupapattikalpitaviniyogasthale saṃskāraniṣṭhobhayavācipadakalpanānukūlā yogyatā jñeyeti bhāvaḥ //
evaṃ mantragataliṅgasthale 'pyubhayavācipadakalpanānukūlatvaṃ darśayati -------- evamiti //
atraca viśvajidvidheḥ svargabhāvyatvavācipadakalpanānukūlayogyatāvattve 'pi viniyojakatvābhāvapradarśanāyāṅgatvapramāṇatvasūcanāya cāṅgatvaghaṭakībhūtetyuktam /
sāceti //
tasyāścānyathānupapattirūpatvādvyatirekavyāptividhayā dvitīyāntādipadarūpaśrutikalpanadvārā tadarthaviniyoge pramāṇatvamityarthaḥ /
tatra darśapūrṇamāsādiprakaraṇe samāmnātānāṃ śrutyaviniyuktānāṃ mantrāṇāmadhikārākhyaprakaraṇātkratusaṃbandhe 'vagate dvāramātraviśeṣe liṅgena viniyogaḥ kriyate /
tatrāpi yogyatārūpasya liṅgasya satyapi devadattasya pākayogyatve ākāṅkṣābhāve pāke viniyogādarśanādākāṅkṣāpi sahakāriṇī /
sāca yathaiva mantraprakaraṇinostathā dvārasyāpi; tadabhāve 'pi saṃbandhānupapatteḥ /
evañca yathaiva mukhyasya kuśacchedanasya smārakākāṅkṣayā tadaṅgatvena "barhirdevasadanami"ti mantro viniyujyata evetyabhipretya pūrvapakṣamāha ------- kratuprakaraṇeti //
nanu mukhyārthānupapattyabhāvātkathaṃ gauṇārthābhidhānena tatra viniyoga ityata āha ------ yaṣṭīriti //
'yaṣṭīḥ praveśaye'tyatra mukhyārthābādhe 'pi tātparyamātreṇa lakṣaṇādarśanādihāpyākāṅkṣādirūpatātparyagrāhakasattve tadupapattirityarthaḥ /
mukhya evārthe mantraprakaraṇadvārā ākāṅkṣāmātrasahakṛtena liṅgena śīghraṃ śrutikalpane vilambitatvāt gauṇārthaniṣṭhākāṅkṣāyāśca mantravatsmṛtikāraṇatayā kḷptatvena viśiṣṭairdhyānādyupāyāntarairapi nivṛttisiddherviniyogo na gauṇe //
naca gauṇamukhyārthaniṣṭhākāṅkṣayormantraniyāmakatve vinigamanāvirahaḥ; gauṇārthaśābdabodhaṃ iti śakyasaṃbandhagrahasya hetutvena śakyopasthityāṃ prāthamikatvāttanniṣṭhākāṅkṣyā viniyuktasya mantrasya nairākāṅkṣye sati anyatarākāṅkṣayā paścātpratīyamānagauṇārthasaṃbandhānupapatterityabhipretya siddhāntamāha ------- śakyasaṃbandheti //
etena ------ mukhyārthapratyāyanadvārā gauṇe 'pi śaktyupapattergauṇasādhāraṇaikaviniyojakaśrutikalpanenāviśeṣādubhayatra viniyoga ityapi -------- apāstam; anuṣṭheyatvenāvagate padārthe smārakāpekṣiṇi liṅgena mantraviniyogādanyonyānapekṣāṇāmeva mantraviniyojakaśrutikalpanāyā āvaśyakatve mukhyer'the punaḥ śrutikalpanāyāḥ prāthamikatvāt tayaiva nairākāṅkṣyātpunaḥ śrutikalpanāyā asaṃbhavāt /
yato mukhyārthasya prāthamikatvena tatraiva śrutikalpanayā nairākāṅkṣyam, ataeva tadanurodhenārthikavidhiṃ prakalpyāpi tatraiva viniyogakalpanā, natu gauṇe /
yathā ------- "aśvinostvā bāhubhyāṃ rādhyāsaṃ" ityatra pratyakṣagrahaṇavidhyabhāve 'pi tadvidhikalpanayā tatraiva mukhyer'the viniyogo vakṣyata ityāha --------- ata eveti //
nanu --------- kathaṃ prakaraṇe pūṣadevatāyā abhāve mukhyārthabādhe sati pūṣānumantraṇamantrādīnāṃ gauṇyā vṛttyāgnirūpārthaparatayā gauṇer'the na viniyoga ityāśaṅkāṃ tatrāviniyogapratipādanena nirasyati -------- yatra tviti //
prakaraṇena durbalena liṅgabādhāyogānna tatra prakaraṇa eva gauṇārthe viniyogaḥ; apitu yatra pūṣā devatā cāturmāsye tatraivotkarṣaḥ; upāṃśuyājīyayājyānāṃ viṣṇvādidevatāyāḥ prakaraṇe abhāve utkarṣāpattiṃ vārayituṃ --- virodhītyuktam /
tatrāgneyādiyāge niveśāsaṃbhave 'pyaśrutadevatopāṃśuyāje devatāvidhikalpanena niveśopapatteḥ /
ataeva vasantādyanumantraṇamantravadupāṃśuyāje pūṣadevatāvidhikalpanānupapatterāgneyādiṣu guṇāntarasattvādutkarṣa evetyarthaḥ /
atraca vastusāmarthyarūpasya liṅgasya sāmānyasaṃbandhabodhakapramāṇanirapekṣasyaiva viniyojakatvam /
yathār'thajñānasya kratvaṅgatve, mantragataliṅgasya tu tatsāpekṣatayā tat /
anyathā kratvaṅgabhūter'the mantraviniyogābhāve karmāpūrvasādhanatvānapekṣāyāṃ devatāyā viniyogāpatternaiṣphalyaprasaṅgeṇa liṅgamātrādaṅgatvānupapatteriti sūcayituṃ liṅgakramasāmākhyānādityadhikaraṇavakṣyamāṇamupajīvyasāmānya- saṃbandhabodhakapramāṇasattve ityuktam /
ata evoktaṃ sāṃpradāyikaiḥ ---- yadantareṇa yanna saṃbhavatyeva tasya tadaṅgatvaṃ tadanapekṣam /
yadantareṇa yatsaṃbhavati tasya tadarthatvaṃ sāmānyasaṃbandhabodhakapramāṇasāpekṣatvamiti //
tataścāsya yadyapi na prakaraṇaṃ sāmānyasaṃbandhabodhakaṃ pramāṇam; tathāpi yāgānumantraṇamiti samākhyāyāstadbodhakapramāṇasya sattvāttayā kratusaṃbandhe sāmānyato 'vagate liṅgena dvāraviśeṣaviniyogaḥ kriyata iti nātrāpi śrutimantareṇa gauṇārthaviniyogaprasaktiḥ /
yadyapi prakaraṇāddurbaleyaṃ samākhyā; tathāpi prabalena liṅgena tasya bādhitatvālliṅgena pūṣadevatāprakāśanārthatve 'vagate tatrānarthakyaprasaktau apūrvasādhanatvalakṣaṇātātparyagrāhakatayā upayujyata iti prabalaliṅgopaṣṭabdhatvātprabaleti bhāvaḥ /
taduktam -------- "yāgānumantraṇānīti samākhyā kratuyāyinī /
tasmācchaktyanusāreṇa prāptistaddevate kratau" //
iti //
utkarṣasyāpīti //
kevalāgniprakāśakasya manotāmantrasya kevalāgnidevatyayāgasaṃbandhabodhakapramāṇāntarasyābhāvālliṅgamātreṇa tatrotkarṣasyāsaṃbhave prakaraṇāvagatakratusaṃbandhanirvāhāya tatraivāgnipadenāgnīṣomalakṣaṇayā jaghanyārthe viniyoga ityarthaḥ /
yadātvānarthakyatadaṅganyāyasahakṛtajyotiṣṭomaprakaraṇameva jyotiṣṭomīyapaśvaṅgameṣa iti sāmānyasaṃbandhabodhakamiti liṅgādāgneyasavanīyapaśāvutkarṣaḥ prāpnotītyālocyeta, tadātu "yadyapyanyadevatyaḥ paśurāgneyyeva manotā kārye"ti vākye tṛtīyādyaśravaṇena śrutitvāsaṃbhavādvākyasyaca liṅgabādhyatvenotkarṣaniṣedhaprāptāvapi evakārasya kāryaivetyevaṃ vyavahitānvayenaivakāraśrutyā, athavā vakṣyamāṇarītyā brāhmaṇavākyatvena prābalyālliṅgabādhopapattyā utkarṣaniṣedhādutkarṣasyāpyasaṃbhava iti vyākhyeyam /
yadyapyasya vākyasya āgneyīpadasamabhivyāhṛtaivakāreṇa vāyavye paśau codakaprāptāgneyamantrasya sthāne āgneyamantraprasaktirūpohaniṣedhakatvopapattyā notkarṣaniṣedhakatvamityabhipretyaiva "manotāyāṃ tu vacanādavikāra" iti dāśamikādhikaraṇapravṛttiḥ; tathāpyasya vākyasyotkarṣaniṣedhakatvena prākaraṇikaphalārthatvasaṃbhave 'prākaraṇikaphalārthatvakalpanāyogādutkarṣaniṣedhakatvameva yuktam /
dāśamikādhikaraṇaṃ jyotiṣṭome āgneyaḥ paśurneti kṛtvācintayā draṣṭavyam /
ataevoktaṃ tantraratne ------- "tathāsatyaprasaktotkarṣaniṣedhāyogāduktavacanasyānūhaparatvamiti /
ato yuktamuktaṃ ------ yathā manotādāviti //
prayojanamulapatṛṇacchedane 'pi barhirdevasadanamiti mantraḥ pūrvapakṣe, siddhānte neti spaṣṭatvānnoktam //
iti prathamaṃ mukhyārtha eva liṅgaviniyogādhikaraṇam //
- - - - - - <B1> (2 adhikaraṇam / ) (a.3 pā.2 adhi.2) vacanāt //
yatra tu gauṇārthe tātparyagrāhakaṃ vacanaṃ vidyate ------ yathā agnau, "kadācanastarīrasītyaindyā gārhapatyamupatiṣṭhata" ityādau, tatra gauṇa eva gārhapatye viniyogaḥ //
athaindyetyupakramastha taddhitaśrutyā mukhyasāmarthyojjīvanājjaghanyadvitīyāyā eva tadanurodhena pratiyogitve lakṣaṇā gārhapatyasamīpe sthitveti, guṇabhūtaprātipadika eva vā yajñasādhanatvasādṛśyādgauṇyā gṛhapatimattvayogena vendraprakāśakatvam /
astu vā rūḍhatvādagnereva dhātuvācyasamīpasthitiṃ prati karmatvam, natu mantrasādhyābhidhānaṃ prati; tasyāśābdatvāt /
naca "upānmantrakaraṇa" iti smṛtyā ātmanepadavidhānena dhātormantrakaraṇārthakatvāvagatestasyābhidhānalakṣakatvāvagatiḥ; ātmanepadabalena samīpasthiterabhidhānaprayojana- katvāvagatermantrasya svasādhyābhidhānāṅgatvasaṃbandhena samīpasthitiviśeṣaṇatvopapatterabhidhānalakṣaṇāyāṃ pramāṇābhāvāt /
ataśca śakyārtha eva samīpasthitau gārhapatyasya karmatvam, indrasya tvārthike 'bhidhāne iti na virodhaḥ /
yathā cāsya dhātoḥ sakarmakatvaṃ tathā kaustubha eva prapañcitam /
ataḥ kathaṃ mantrasya gauṇer'the viniyoga iti cenna; aindyeti taddhitenaikapade viśeṣyatayā pratipādyamānasya mantrasya cayanānupayogīndrāṅgatvabodhakatvānupapatteḥ /
atastasya śakyabodhakālīnendraprakāśakatvānuvādatvenāpyupapatterna dvitīyādau tadbalena lakṣaṇāśrayaṇaṃ rūḍhityāgo vā /
naca samīpasthitiṃ prati agneḥ karmatvam; tathātve tasyābhidhānaṃ pratyapyaṅgatve uddeśyānekatvakṛtavākyabhedāpatterātmanepadavirodhena ca dhātunaiva svaśakyārthaviśiṣṭābhidhānalakṣaṇāvaśyambhāvādviśeṣyabhūte 'bhidhāna eva mantrasya karaṇatvapratītergārhapatyasya ca cayanasaṃskāryasya karmatvapratīterarthācca sāmīpyapratiyogitvena tasyaiva grahaṇopapattestātparyagrāhakabrāhmaṇānurodhena mantrasyaiva gauṇyā vṛttyā gārhapatye viniyoga iti siddham // 2 // 17 //
iti dvitīyaṃ śrutivaśāt gauṇe 'pyarthe mantraviniyogādhikaraṇam //
<B2> pūrvatra gauṇasāmarthyasya viniyojakaśrutikalpanayā viniyojakatvanirākaraṇena liṅgasya mukhyārtha eva viniyojakatve ukte aindyāṃ liṅgasya gauṇer'the viniyojakaśrutisahāyatayāpi prasaktasya viniyojakatvābhāvasyehāpavādakaraṇādāpavādikīmanantarasaṅgatiṃ tathā saṃśayaṃ pūrvādhikaraṇasiddhāntenaiva pūrvapakṣotthānātpārthakyena pūrvapakṣañca spaṣṭatvādanuktvā "vacanāttvi"ti yathāsūtraṃ siddhāntameva pratijānīte ------ yatratviti //
atra bhāṣyakāreṇa "niveśanaḥ saṅgamano vasūnāṃ viśvārūpābhicaṣṭe śacībhiḥ /
deva iva savitā satyadharmendrasya samare vasūnāmityaindyā gārhapatyamupatiṣṭhate" ityudāhṛtam /
tadupamānārthīyena nakāreṇaindrasyopamānatayā nirdeśādindrasyāprādhānyāvagateḥ "dhruvodhvarastathā soma āpaścaivānilo nalaḥ /
pratyūṣaśca prabhāsaśca vasavo 'ṣṭau prakīrtitāḥ /
" ityanalaśabdavācyasyāgneḥ vasutvasmaraṇāduktānāṃ madhye 'gnirnāma vasurindra iva saṃgrāme sthitavānityagnistutipratīteḥ "vasūnāṃ pāvakaścāsmī" ti cāgnereva vasuśreṣṭhatvasmaraṇāt tatsamīpe 'nyeṣāṃ vasūnāṃ saṅgamanādvasusaṃgamanatvenāpyagnereva stutipratīteraindrītvenodāhāryatvānupapatterayukta- mityupekṣya balābalādhikaraṇabhāṣyalikhitaśākhāntarapatitamaindramantramudāharati ------- yathāgnau kadācaneti //
tataśca tasya mantraliṅgasya svarasato gārhapatyamiti dvitīyāśrutyupaṣṭambhakatayā siddhāntaviparītatvānnodāharaṇatvam //
yattu -------- nyāyasudhākṛtā balābalādhikaraṇe śrutyā liṅgabādhasya vakṣyamāṇatvānmantrasya svarasasāmarthyānālocanenaiva devatārthataddhitaśrutyā prādhānyāvagamāt "rāmarāvaṇayoryuddhami"ti vaccānanyacaritatvenendrasyāpi indropamānarūpastutisaṃbhavāttadudāharaṇopapattiḥ ------- ityuktam /
tanmantrasya svarasasāmarthyatyāgena svasyaiva svopamānakatvakalpanayā gauṇasāmarthyamādāya aindrītvopapādane tasya taddhitaśrutyupaṣṭambhakatvena taddhitaśrutyapaṣṭabdhaliṅgena kārakaśrutisaṃkocānupapatteḥ pūrvapakṣāyogānmantrasvarasasā- marthyālocanenāgniprakāśakatvasyaivāpattyā gauṇārthaviniyogarūpasiddhāntaviparītatvādayuktam //
naca kadācaneti pṛthagudāharaṇe balābalādhikaraṇena paunaruktyam; iha śrutisahāyena gauṇārtheviniyoge upapādite tatra kevalaliṅgamātreṇa aindyaṅgatvamapyastu iti śaṅkāyā nirasanīyatvena tatparihāropapatteḥ, ata idamevodāhṛtaṃ yuktamiti bhāvaḥ //
gārhapatya iti //
agnāviti śeṣaḥ /
gārhapatyamiti dvitīyāśrutyā virodhaṃ darśayituṃ pūrvapakṣī pratyavatiṣṭhate -------- atheti //
sthitvetīti //
itiśabdena aindraṃ prakāśayediti śeṣapūraṇaṃ sūcitam /
gṛhapaterayamiti vyutpattyā gārhapatyaśabda indramapyabhivadituṃ samartha ityāha -------- gṛhapatimattvayogeneti //
gṛhapatisaṃbandhitvayogenetyarthaḥ //
nanu ------- vācyasya tiṣṭhatidhātvarthasyākarmakatvātkathaṃ tatra karmatvenāgneranvaya ityata āha -------- yathācāsyeti //
"akarmakācce" tyetaduttarasūtreṇākarmakāttiṣṭhaterātmanepadavidhānenāsminsūtre tiṣṭhativācyasyāpyarthasya sāmīpyarūpaphalāvacchinnatvena sakarmakatvavivakṣaṇena sāmīpyasya pratiyogitāsaṃbandhenāgnyāśrayatvenāgneḥ karmatvenānvayopapattiriti kaustubhe prapañcitamityarthaḥ //
dvitīyāśrutyā gārhapatyārthatvāvagamena na mukhyārthaviniyogasaṃbhavaḥ; yogyatājñānābhāve 'pi pratibandhakībhūtāyogyatāniścayābhāvamātreṇa śabdabodhasya saṃbhavena śrautaviniyogopapattestasyaiva balavatastātparyagrāhakasya sattvena mantragataindraśabde yajñasādhanatvasādṛśyādidhātvarthāyogādvā jaghanyavṛttyāśrayaṇe bādhakābhāvāt /
nahi dvitīyāśrutyā gārhapatyāṅgatvabodhasyeva taddhitaśrutyā mantrasyendrāṅgatvabodhaḥ saṃbhavati /
taddhitoktasya prādhānyena pratipādyatvarūpadevatātvasya viśeṣyatayā pratipādyamantraṃ prati viśeṣaṇatayā pratīyamānatvena viparītaviśeṣaṇaviśeṣyabhāvakalpanāṃ vinā indrāṅgatvasya śīghramapratīterindroddeśena mantravidhāvekaprasaratābhaṅgāpatteśca, indrasya cayane 'nupayogenoddeśyatvānupapatteśca /
atastaddhitaśrutyā dvitīyāśrutibādhāyogādgārhapatyābhidhānārthatvameva yuktamityabhipretya dūṣayati -------- neti //
atastasyeti //
taddhitasyetyarthaḥ /
rūḍhityāga iti //
gārhapatyaśabdasya "saṃjñāyāṃ dhenuṣyā" ityataḥ saṃjñāyāmityanuvṛttau "gṛhapatinā saṃyukteñyaḥ" ityanuśāsanena ñyapratyayāntatvenāgnau rūḍhatvapratīterna tyāga ityarthaḥ //
yattu samīpasthitiṃ prati gārhapatyasya karmatvamabhidhānaṃ prati indrasyetyuktaṃ tadanūdya dūṣayati --------- naceti //
tathātva iti //
asmiṃśca pakṣe mantrasyaupacārikakaraṇatvāpatteḥ samīpasthiteśca gārhapatyasaṃskārārthatve indrābhidhānārthatvāyogānmantrasya taddvārā aupacārikakaraṇatvasyāpyanupapatterātmanepadānurodhena vā indrābhidhānārthatvāṅgīkāre gārhapatyasyāgre upayogenepsitatvāt saktuvadanīpsitakarmatvāṅgīkāre ca uddeśyānekatvanimittavākyabhedāpattestṛtīyāntaṃ dvitīyāntañca padaṃ yathāśrutamaṅgīkṛtya ātmanepadatātparyagrāhakānurodhena dhātunaiva svaśakyārthaviśiṣṭābhidhānalakṣaṇayā tatraiva gārhapatyasya karmatvena mantrasyaca karaṇatvenānvayāṅgīkāro yuktaḥ /
gārhapatyasyaca sādhanatvenopayogābhāve 'pi saṃskāryatvena tatsattvādabhidhānakarmatvopapattyā tadanurodhena mantragatendrapadasya gārhapatyaparatvaṃ kathañcidāśritya siddhaḥ śrutibalādgauṇārthaviniyoga ityarthaḥ /
prayojanaṃ spaṣṭatvānnoktam //
iti dvitīyaṃ liṅgasya śrutibalādgauṇārthe 'pi viniyojakatvādhikaraṇam //
(aindyadhikaraṇam) - - - - - - - <B1> (3 adhikaraṇam / ) (a.3 pā.2 adhi.3) tathā //
darśapūrṇamāsayoḥ haviṣkṛdehītitriravaghnannāhvayati iti śrutam /
tatra nāyaṃ mantra āhvānāṅgam; tasya "patnyeva haviṣkṛdupottiṣṭhati sā devānabhidrutyāvahantī"ti vacanānusāreṇābhāvapratīteḥ /
ata iti karaṇenāvaghātāṅgameva /
ataścāsminvākye trirabhyāsapuṃstvamantraviśiṣṭāvaghātavidhireva /
patnīvākye ca guṇādeva karmāntaravidhiḥ /
tayoścāvaghātayorvrīhīnavahantītyanena saṃskāryasaṃbandhe 'pi dṛṣṭārthatvādvikalpaḥ /
patnīkartṛke 'vaghāte cāvarakṣodiva iti mantraḥ /
ataścānena vākyenāvaghāte gauṇa evāyaṃ mantro viniyujyate /
gauṇatvopapādanaṃ kaustubhe draṣṭavyam /
āhvayatiśca tadācaṣṭe ityevaṃ śakyārthabodhakālīnāhvānaprakāśanānuvāda iti prāpte -------- mukhya evāhvāne viniyogasaṃbhave mantrasyāhvayatipadasya ca gauṇatvakalpanāyāṃ pramāṇābhāvāt /
māntravarṇikaviniyogavidhikalpanayā sadhyāsamityādinā grahaṇāderivāhvānasyāpi niyamena prāptatvāt /
patnyevetyasya tu nāyamartho yatsvayamevottiṣṭhati na tvāhūteti, apitu patnyeva nānyeti /
ato nedamapi tadabhāvabodhakam /
ataścāhvāne mantrasya liṅgādeva prāptatvādāhvānasya ca sahāyārthatvenāvaghātakāla eva prāpteravaghnannityasyāpyanuvādakatvāt kevalaṃ trirabhyāsamātraṃ vidhīyate, trirabhyāsapuṃstvaviśiṣṭāvaghātasamānakālataiva vāhvānoddeśena vidhīyata iti na gauṇe 'vaghāte viniyogaḥ // 3 // 18 // iti tṛtīyaṃ haviṣkṛdadhikaraṇam //
<B2> darśapūrṇamāsayoriti //
siddhānte mantrasya liṅgādāhvānāṅgatve sāmānyasaṃbandhabodhakapramāṇapradarśanāya darśapūrṇamāsayorityuktam /
haviṣkṛdehīti //
devānāmarthe yā haviḥ saṃpādayati sā patnī haviṣkṛttāmenāṃ saṃbodhya adhvaryurehīti brūte /
tamimaṃ mantramadhvaryustriruccāryāvaghātaṃ kurvannāhvayatītyarthaḥ /
atraca yathā śrutyā pūrvādhikaraṇe gauṇārthaviniyogo mantrasyoktaḥ, tadvadeva vākyenāpi tatra prasaktasya viniyogasyohāpavādakaraṇādāpavādakīmanantarasaṅgatiñca spaṣṭatvādanuktvā pūrvasiddhāntahetuparasūtragataṃ tathāśabdaṃ vyākhyāsyan pūrvapakṣamāha ------- tatreti //
"patnyeva haviṣkṛdupottiṣṭhati devān ṛṣīn pitṝn sābhidrutyā'vahantī''ti vākyāntare patnī svayamevottiṣṭhati nāhūtetyarthakaivakāreṇa pakṣaprāptāhvānaniyamābhāvapratīterāhvānavidhyantarasyānyathāsiddhasyādarśanādavihitāhvānasmārakatayā mantrasyāṅgatvena vidhānānupapattiṃ tāvaddarśayati --------- tasya patnyeveti //
etena ------- mantre trirabhyāsavidheḥ sahāyārthatvāt tasya prāptāvaghātakālānuvāda ityapi --------- apāstam; āhvānāṅgatayā mantrasyāprāptestatra trirabhyāsavṛttyanupapatteḥ kālalakṣaṇāpatteśca /
ataḥ pariśeṣāt "lakṣaṇahetvoḥ kriyāyā" iti sūtreṇa prayojakatvāparaparyāyahetāvapi śatṛpratyayasmṛterabhicaranyajatītivanmantrasyāvaghātabhāvanāṅgatvameva; kṛdupāttabhāvanāyāmapi kārakānvayasya vyutpannatve sutarāmitikaraṇaparāmṛṣṭamantrasya karaṇatayānvayopapatterityabhipretyāha -------- ata iti //
prāptāvaghātoddeśena trirabhyāsamantrayorvidhāne vākyabhedāpattiṃ pariharati --------- ataśceti //
avaghātasya vituṣībhāvaparyantamanuṣṭhānāvaśyakatvena tatra trirabhyāsavidhyanupapattāvapi tatra mantradvārā puṃstvasyeva kriyānvayopapatteḥ śākhābhedena kvacintrirabhyāsayuktamantrapāṭhena trirabhyāsaprāptāvapi śākhāntare sakṛtpāṭhenāpyāmnānānniyamavidhayā trirabhyāsādiviśiṣṭāvaghātavidhireva /
nahyatra patnīvākyenāvaghātaḥ prāpyate; tatra samākhyāprāptādhvaryukartṛkatvasya patnīkartṛkatvena bādhenāvaghnanniti puṃstvānuvādānupapatteḥ /
ato viśiṣṭavidhānānna vākyabheda ityarthaḥ /
ataeva guṇāt patnīvākye 'vaghātāntaravidhirityāha --------- patnīvākye ceti //
atraca "vidhikopaścopadeśe syā" diti siddhāntaguṇasūtreṇa mantrasyāvaghātāṅgatve "ava rakṣo divaḥ sapatna" miti mantrāntarasyāpi pariharati -------- patnīkartṛketi //
evañca āhvayatiparaliṅgaviśiṣṭāvaghātavidhiḥ, dhāturākhyātāṃśaścānuvāda ityabhipretyopasaṃharati --------- ataśceti //
nanu avaghātasyācetanasya haviṣkṛttvānupapatteḥ sutarāñceti śabdārthānvayānupapatteravaghāte mantrasyāsāmarthyātkathaṃ viniyoga ityata āha ------- gauṇa evāyamiti //
gauṇatvopapādanamiti //
acetane svātantryalakṣaṇakartṛtvāsaṃbhave 'pi sthālīpacatītivadvaivakṣikeṇa svātantryeṇa kartṛtvopapattyā haviṣkṛttvasaṃbhavāttatraiva cetanatvamāropya avaghāta tvamehi saṃpanno bhavetyarthena haviṣkṛtsthālīsaṃbandhihaviḥsaṃpattihetulakṣaṇayogena haviṣkṛdehītyanenāvaghātaprakāśanopapattiriti kaustubhe draṣṭavyamityarthaḥ /
mantrasyāhvānānaṅgatve āhvayatyanvayāyogaśaṅkāparihārāyāha -------- āhvayatiśceti //
haviṣkṛdehīti mantreṇaihītiśabdoccāraṇādadhvaryurāhvānamācaṣṭa ityarthe "tatkaroti tadācaṣṭe" iti smṛtyā ṇicaṃ vyutpādyāhvayatiprayogopapatteḥ śakyārthabodhakālīnāhvānaprakāśanānuvādādāhvayatyanvayopapattirityarthaḥ //
vacanasya mukhyāhvānasaṃbandhenāpyupapatteḥ mukhyaviśeṣyabhūtāhvānabhāvanāsaṃbandhasyābhyarhitatvāt trirityasyāvaghāte 'nvayānupapattyā aśrutamantrapāṭhakriyāviṣayatvāpatteḥ dhātoḥ sādhutvapārārthyaviśiṣṭavidhigauravādyāpatteḥ vinā kāraṇamākhyātasyācaṣṭa ityarthalakṣaṇāpatternāvaghāte gauṇe viniyoga; kintu āhvāna evetyabhipretya siddhāntamāha ------- mukhya eveti //
āhvānasyāvihitatvānna tadaṅgatvena mantravidhiḥ saṃbhavatītyāśaṅkāmapākaroti ------- māntravarṇiketi //
yathā somapātramagṛhītvāpi somabhakṣaṇaprāpte "raśvinostvā bāhubhyāṃ sadhyāsa" miti mantravarṇaprakāśyatvānupapattyā grahaṇaniyamavidhiṃ prakalpya tatra mantraviniyogaḥ kalpyate, evamihāpi tatprakāśyatvānupapattyā āhvānaniyamavidhikalpanayā āhvānasya vidheyatvāvagamāttadaṅgatvena mantravidhānopapattirityarthaḥ /
etena ------ nityaprāptatve 'pi prathanādivadadhvaryukartṛkatvasiddhyarthamāhvānasyāpyatra vidhiriti nyāyasudhākāroktaṃ -------- apāstam; vidheyāntarasattve saṃbhavatprāptikāyāḥ kriyāyā vidhau gauravāt, mantrapāṭhasyādhvaryukartṛkatve pṛthakprayatnānāpādye āhvāne 'dhvaryukartṛkatvasyāpyarthataḥ prāpteśca /
prathanasyatu prakāśarūpamantravyāpārato 'tyantabhinnatvātkriyāntara- rūpatvenamantrasyādhvaryavasamākhyayādhvaryukartṛtvaniyame 'pi na tatkaraṇatvenādhvaryavaniyamaḥ sidhyati /
āhvānasyatu parāgamanānukūlasvābhiprāyaprakāśanarūpatvāt tasya ceha mantravyāpārarūpatvena mantroccārayitṛ- vyatiriktenānuṣṭhātumevāśakyatvānmantrasyādhvaryukartṛkatvenaiva āhvānasya tatkartṛkatvasiddhiriti vaiṣamyānna tatsidhdyarthamapi vidhirāvaśyaka ityarthaḥ //
patnyevetyevakāreṇāhvānaniyamanivṛttipratītyāśaṅkāṃ nirasyati -------- patnyeveti //
nānyeti //
etena -------- patnyā vākyāntareṇa kartṛtvena vidhānātsamākhyāprāptādhvaryukartṛkatvasya bādhāvagateradhvaryorulūkhalakṛṣṇājinānutsargavidhānāttaddvārānvārambhakatrṛtve 'pi kartṛtvopacāreṇa tatkartṛkatvaṃ -------- sūcitam /
sahāyārthatveneti //
patnyā bahupadārthānuṣṭhānena śrāntasyādhvaryoravasaradānena sahāyatvādanyapadārthakāle 'pi tatprāpnoti, tathāpi haviṣkṛttvena tadāhvānasya haviṣkaraṇārthatvapratītestasya cāvaghātamārabhya pravṛtteravaghātakāla eva prāptatvādanuvāda ityarthaḥ /
yadyapyavaghnannityatra kālalakṣaṇā'patati, tathāpi "lakṣaṇahetvoḥ kriyāyāḥ" iti sūtreṇa śatuḥ 'śayānā bhuñjate yavanāḥ' ityatreva lakṣaṇārthatvapratīteḥ avaghātakartṛtvāvasthāpannasyāhvānakartṛtvāvagateranvārambhadvārā adhvaryukartṛkavartamānāvaghātasya kālikasaṃbandhenāhvānacihnatvapratīteravaghātakāle āhvayatītyarthātkālalakṣaṇā śatṛpratyayopāttalakṣaṇatva- ghaṭakatayānuśāsanaśiṣṭatvānna doṣāvahā //
vastutastu --------- anutsargamātreṇāvaghātakartṛtvāsaṃbhavādanvārambhadvārā tadāśrayaṇe 'vahantau lakṣaṇāpatternāyaṃ lakṣaṇe śatṛpratyayaḥ, kintu hetāveva /
tataścāvaghātārthamāhvayatītyarthādāhvānakartṛtvasamānādhikaraṇāvaghātakartṛtvaṃ prayojakatvarūpamevāśrayituṃ yuktamityavaghātaphalāhvānasyāvaghātakāla eva prāptervinaiva lakṣaṇāmavaghātaṃ kārayannāhvayatītyarthe na kaściddoṣa iti bhāvaḥ //
yattu ---------- prakāśakārāṇāmanvārambhavidhānenāvaghāte 'dhvaryukartṛtvopapādanaṃ --------- tat, kasmiṃścidapi sūtre patnyānvārambhavidhyadarśanādayuktamityupekṣitaṃ pūjyapādaiḥ //
mama tu pratibhāti ---------- triravaghnanniti siddhānuvādenāvaghāte adhvaryoḥ kartṛtvābhyanujñānādavaghātaṃ kurvataivāhūtayā patnyā dvitīyāvaghātānuṣṭhānopapatterevakārasya sahāyamātraniṣedhakatvenobhayakartṛtvāvirodha eva kātyāyanasūtrasaṃvādī yuktaḥ /
tāvatāpi gauṇe 'vaghāte namantraviniyoga iti mīmāṃsakasiddhāntasyākṣatiḥ /
ataeva kātīyānāṃ pūrvamadhvaryukartṛkamavahananamaparaṃ cāhvānottaraṃ patnīkartṛkaṃ cetyanuṣṭhānaṃ dṛśyate /
evañca śatṛpratyayasya lakṣaṇatvārthādikalpanamapi nāśritaṃ bhavatīti /
āvituṣībhāvamavaghātānuṣṭhāne madhye sahāyārthamāhvānaṃ dṛṣṭārthamapi bhavatīti //
trirabhyāsamātramiti //
so 'pica kriyābhyāvṛttigaṇanārthakakṛtvasucpratyayāntatriśabdabalādāhvāna- kriyāyāmeva vidhīyate /
tatraca mantrasya vediprokṣaṇamantranyāyena sahakṛtpāṭhe prāpte 'pi prokṣaṇavadāhvānasya mantrapāṭhātiriktaprayatnānāpādyatvenārthānmantrasyaiva trirāvṛttiḥ phalati /
etena ------- yat nyāyasudhākṛtā vyavahitasaṃbandhamādāya mantrasyaiva trirāvṛttividhānamuktaṃ tat -------- apāstam; trirabhyāsasya śabdato vyavahitasyāpi sucpratyayaśrutyaiva kārakavibhaktiśrutyevāhvānakriyāsaṃbandhalābhādavyavahitenāpi mantreṇa saṃbandhānupapatteḥ /
ata āhvānasya dṛṣṭārthatvāllokavadeva dviḥ triścaturvāpi prāptau trirabhyāsāṃśe 'pi niyamavidhitvalābhāntrirabhyāsa āhvāne vidhīyata ityarthaḥ //
siddhāntamupasaṃharati ------- itīti //
evañca gauṇārthaviniyogasya vākyakṛtasya liṅgena bādhānmukhya evārthe viniyogaḥ /
aindyāṃ tu śrutyā liṅgabādhādgauṇārthe viniyoga iti siddhamityarthaḥ /
prayojanaṃ pūrvapakṣe patnīkartṛkasyādhvaryukartṛkāvaghātasyaca vikalpe sati haviṣkṛnmantro 'dhvaryukartṛkāvaghāte "ava rakṣo diva" iti patnīkartṛka iti vyavasthā, siddhānte tvekasminneva patnīkartṛkāvaghāte "ava rakṣo diva" iti mantraḥ, haviṣkṛnmantrastvāhvāne iti spaṣṭatvānnoktam //
iti tṛtīyaṃ haviṣkṛdadhikaraṇam //
<B1> (4 adhikaraṇam / ) (a.3 pā.2 adhi.4) tathotthāna //
som.e, "uttiṣṭhannanvāhāgnīdagnīnvihare"ti /
tathā "vrataṃ kṛṇuteti vācaṃ visṛjati /
" darśapūrṇamāsayoḥ, "praṇītāḥ praṇeṣyanvācaṃ yacchati tāṃ sa ------ haviṣkṛtāvisṛjatī"ti śrutam /
tatrāpi pūrvavadeva mantrāṇāṃ mukhyer'the viniyogo natu gauṇayorutthānavāgvisargayoḥ /
prabalasyāpi brāhmaṇavākyasya kālavidhāyitvenāpyupapattau gauṇatvatātparyagrāhakatvābhāvāt /
naca lakṣaṇā; śatṛpratyayasya kālikasaṃbandhena lakṣaṇārthatvamaṅgīkṛtya śrutyaivānvayopapatteḥ /
ataścotthānakāle viharaṇamantraḥ paṭhanīya iti kālavidhirevāyam /
vrataṃ vṛṇutetyatretikaraṇasyāpi mantrasvarūpamātraparatvātkālikasaṃbandhasyaiva saṃsargavidhayā bhānopapatterna lakṣaṇā /
haviṣkṛdvākye tṛtīyāyāstu vāgyamāpekṣitāvadhisamarpakatvena tadekavākyatopapattau vākyabhede pramāṇābhāvāditthaṃbhūtalakṣaṇārthatāvāṅgīkṛtya kālavidhiparatvam /
ataśca tadvākyayoḥ pāṭhakramāvagatatattanmantrapāṭhakāle vāgvisargaḥ kartavya iti so 'pi tatra kālavidhireva // 4 // 19 // iti caturthamutthānādhikaraṇam //
<B2> uttiṣṭhanniti //
bahiṣpavamānadeśāduttiṣṭhannityarthaḥ /
sāmānyasaṃbandhakāripramāṇasattvasūcanāya soma ityuktam /
vihareti //
itikaraṇena prabhṛtyarthakena "barhiḥ stṛṇāhi, puroḍāśānalaṅkuru, paśuṃ no dehī" tyantasya saṃgrahaḥ /
"vrataṃ kṛṇutetī" tiśabdo mantrasvarūpaparaḥ /
sautravisargaśabdena "vācaṃ visṛjatī"tivadanyasyāpi visargasyopādānasaṃbhavādekādaśe bhāṣye "vāgvisargo haviṣkṛtā bījabhede tathā syā" dityadhikaraṇe haviṣkṛdgrahaṇaṃ ca kālalakṣaṇārthamityuktam /
tathā "āhvānamapīti cet na kālavidhiścoditatvādi" tyuktvā sūcitatvāccātrabhāṣye 'nudāhṛtamapyanyadudāharati ------- darśapūrṇamāsayoriti //
tāṃ niyamitāṃ vācaṃ haviṣkṛdehīti mantrapāṭhakāle visṛjatītyarthaḥ /
tatra kimanayorvacanayoruttiṣṭhanniti vācaṃ visṛjatīti coddiśyānayormantrayorvidhānādanayormantrayorgauṇotthānavāgvisargayorvini yogaḥ, uta mantrayorliṅgādagniviharaṇavratakaraṇarūpamukhyārthe viniyogaḥ utthānavratamantrayoḥ kālārthatvenopādānamiti saṃśayaṃ vakṣyamāṇatvenātideśikīṃ saṅgatiṃ pūrvādhikaraṇapūrvapakṣatvātpūrvapakṣañca spaṣṭatvādanullikhyā'tideśikasūtrānurodhātsiddhāntamevāha -------- tatrāpīti //
pūrvavadevetyanena sautratathāśabdasūcitā ātideśikī saṅgatirdarśitā /
tatra pūrvatra mukhyakriyāntarasattvāttasyāśca sādhutvamātrārthatve pramāṇābhāvādavaghnannityasya lakṣaṇāṃ vināpi hetutvādyarthatayopapattestrirabhyāsasyaca vidheyāntarasattvena prabalasyāpi brāhmaṇavākyasyānyathopapattisaṃbhavādyukto laiṅgiko viniyogaḥ, prakṛtetu vidheyāntarābhāve uttiṣṭhannitiśatṛpratyayasya lakṣaṇārthatvamaṅgīkṛtya kālasyaiva tava mate vidheyatvādvidhau lakṣaṇāpatterutthānasyaca sāmarthyātkariṣyamāṇadeśāntaravihitakāryārthatvena kṛtārthasya mantrapāṭhārthatvāyogena śatṛpratyayasya kāraṇatvarūpahetutvārthakatvāsaṃbhavādagatyā phalatvarūpahetutvārthakatvamaṅgīkṛtya mantrapāṭhasyaiva gauṇasāmarthyenotthānāṅgatvaṃ yuktam /
saṃbhavaticānutthitenāgnīnāmedhituṃ vihartuṃ vā śakyatvādutthānasyāgnīndhanaviharaṇādihetoḥ svātantryavivakṣayā mukhyatatkartṛtvopapatteragnīcchabdenābhidhānam //
nacādhvaryūtthānasyāgnīdhrakartṛkāgnīndhanādisādhanatvāyogāttannimitta kartṛtvavivakṣānupapattiḥ; viharetyasya praiṣatve sati "praiṣeṣu parādhikārā" diti nyāyenādhvaryukartṛkatāyā bādhe 'pīha pūrvapakṣa itikaraṇarūpavākyāvagatotthānāṅgatvena praiṣatvābhāvena āgnīdhrakartṛtvāprāptyā samākhyāprāptādhvaryukartṛkatvasyaiva prāpterbādhakābhāvāt /
ataeva --------- agniviharaṇādisādhyābhāvālloṭaḥ prāptakālatārthatāmaṅgīkṛtyāgniviharaṇasya prāptaḥ kāla ityarthakatayā "agnīnvihare" tyasyāpyupapattiḥ //
vratavākyetu śatṛpratyayasyāpyabhāvāditikaraṇasya vākyatvena liṅgāpekṣayā durbalasyāpi brāhmaṇavākyatvena prābalyādyuktameva vāgvisargāṅgatvam /
tatrāpi yathā bhakṣānuvāke "vāgjuṣāṇā somasya tṛpyatvi"ti bhakṣayitṛgataṃ tṛptikartṛtvaṃ tṛptihetvāsyagatāyāṃ vācyupacaritaṃ tathā "kṛvi hiṃsāyāṃ" iti kṛvidhātorvācyahiṃsāgatanāśakatvasāmyādgauṇyā bhakṣaṇāvagateḥ yajamānapuruṣagataṃ vrataśabdavācyakaṣṭavṛttyarthapayoyavāgvādibhakṣaṇakartṛtvaṃ bhakṣaṇahetvāsyagatāyāṃ vāci śakyamupacaritum /
bahuvacanañca vācaḥ śabdātmakatvācchabdasyaca tālvādipṛṣṭhasthāneṣvabhivyaktestālvādyadhiṣṭhānabhedābhiprāyeṇāpi śakyaṃ yojayitum /
loṭaśca vāco 'preṣyatvena praiṣārthatvāsaṃbhave 'pi pūrvavadeva prāptakālatārthatāṅgīkārāt he vāk vrataṃ bhakṣayituṃ tava prāptaḥ kāla ityarthena saṃbhavatyeva gauṇārthe vāgvisarge viniyoga iti viśeṣāśaṅkayā saṃbhāvyamānaṃ pūrvapakṣaṃ nirākartumāha -------- natu gauṇayoriti //
itikaraṇasyeti //
tasyāvyayatvena luptavibhaktikatvācchaktyā karaṇatvānukteḥ lakṣaṇāyāñca kālikasaṃbandhāvacchinnasaptamyarthalakṣaṇāyā eva yuktatvānnānapekṣitāṅgāṅgibhāvaparatvāśrayaṇaṃ yuktamityetanmantrapāṭhakāle vācaṃ visṛjatītyartha evetyarthaḥ /
etena -------- itikaraṇasya śrutitvamaṅgīkṛtya pūrvapakṣe śrutyā gauṇe mantraviniyoga iti nyāyasudhoktaṃ --------- apāstam /
itthaṃbhūtalakṣaṇeti //
haviṣkṛnmantrapāṭhajñāpyatvasyaiva visarge upapatterna svātantryeṇa tatra karaṇatayā mantravidhānaṃ yuktamityarthaḥ /
etacca itthaṃbhūtalakṣaṇārthatvāṅgīkaraṇaṃ sahaśabdābhāve 'pi siddhāntopapattipradarśanamātrārtham, vastutastu --------- sahaśabdaśravaṇena tadyoga eva tṛtīyopapattermantrapāṭhasamakālīnatvarūpasāhityasyaiva pratīteḥ na mantrakaraṇatvāśaṅkāpīti dhyeyam /
ataścottarapadārthavidhipāṭhakrameṇa yathotthānasya kālo nirjñātastathaiva mantrapāṭhakrameṇa vratahaviṣkṛnmantrayorapi nirjñāta iti tatra tatrāprāptakālavidhānamevetyupasaṃharati ------ ataśceti //
yadyapi cāhvānasya mantrapāṭhātiriktapṛthakprayatnānāpādyatvenānyathānupapattyā tattyāgārthaṃ vāgvisargaḥ prāpnotyevetyanuvādatvameva yuktam, natu kālavidhitvam; tathāpi tanmātrāṃśe vāgyamabādhe 'pi taduttaramapi prasaktasya nivṛttyarthamavadhirūpakālavidhitvamāvaśyakam /
yadyapica pūrvatra kālānuvādādihaca vidheyatvāttatra pūrvādhikaraṇatātideśārthatā tathāśabdoktā yujyate; tathāpi gauṇe na viniyogaḥ kintu mukhye ityetāvatā sāmyena tadupapattiriti jñeyam //
prayojanaṃ pūrvapakṣe agnīnmantra utthānātpūrvaṃ prayojyaḥ /
evaṃ vratahaviṣkṛnmantrāvapi vāgvisargātpūrvaṃ prayojyau; karaṇatvāt, siddhānte tu utthānakāle agnīnmantraḥ, vratahaviṣkṛnmantrapāṭhasamakālaṃ vāgvisarga ityādi spaṣṭatvānnoktam //.// / iti caturthamutthānādhikaraṇam //
- - - - - - <B1> (5 adhikaraṇam / ) (a.3 pā.2 adhi.5) sūktavāke //
darśapūrṇamāsayoḥ "sūktavākena prastaraṃ praharatī"ti śrutam /
tatra sūktavākapadavācyasya mantrasya iṣṭadevatāprakāśanena kṛtārthatvāt prastarapraharaṇasya copayuktaprastarapratipattitvena kṛtārthatvāt "darśapūrṇamāsābhyāmiṣṭvā somena yajete"tivatkālārthaḥ saṃbandhaḥ /
tṛtīyā cetthaṃbhūtalakṣaṇaparā satī sūktavākasya kālikasaṃbandhena praharaṇopalakṣaṇatvenānvayaṃ bodhayantī nānupapannā /
na caivaṃ lakṣaṇā; tasyā api ānuśāsanikatvena śakyatvāt /
ataścānuyājottaraṃ sūktavākapāṭhāttatkālaviśiṣṭaṃ prastaroddeśena praharaṇameva vidhīyate, na tu sūktavākasya praharaṇāṅgatvamiti prāpte -------- pracuraprayogāllāghavācca karaṇatva eva tṛtīyāyāḥ śaktirnatu itthaṃbhūtalakṣaṇe; tasyānuśāsanikatve 'pi lākṣaṇikatvenāpyupapatteḥ /
ataśca śrutyā praharaṇāṅgatvasyāpyavagateḥ praharatirmāntravarṇikadevatākalpanayā āśrayikarmarūpahomalakṣako na virudhyate /
ata eva sūktavākaeva yājyeti yāgaliṅgamapi saṅgacchate /
yadyapi ca nāsya mantratvādivadabhiyuktaprasiddhiviṣayatvākhyaṃ mukhyaṃ yājyātvaṃ saṃbhavati, evakāropabaddhatvenaiva liṅgasya yājyātvāsādhakatvāt; tathāpi yāgasādhanatvamātreṇa yājyātvavyapadeśādyāgaliṅgatvam /
ataśca śrutyā mantrasya praharaṇāṅgatve 'pi mukhyasāmarthyasya nātra bādhaḥ; praharaṇe 'pi tadupapatteḥ // 5 // 20 //.// / iti pañcamaṃ sūktavākāṅgatādhikaraṇam //
<B2> darśapūrṇamāsayoriti //
mantrasya sāmānyasaṃbandhabodhakapramāṇapradarśanārthametaduktam /
"idaṃ dyāvāpṛthivī madramabhū"dityādi "namo devebhya" ityanto nigadarūpo mantraḥ sūktavākastasyaca sūktavākatvamagre vyaktīkariṣyate /
tena mantreṇa prastaraṃ darbhamuṣṭimagnau prakṣipatīti vākyasyārthaḥ //
tatra gauṇasāmarthyasya śrutisahāyatayā viniyojakatve 'bhihite mukhyasāmarthyasyāpi tatsahāyatānirūpaṇena pūrvoktasya kālārthasaṃyogasyehāpavādakaraṇenaca pādādhyāyāsaṅgatī tathā sūktavākasya kālopalakṣaṇatayānvayena kālārthaḥ saṃbandhaḥ hotrāsminmantre paṭhyamāne tatpāṭhakāle prastaraṃ praharediti, athavā sūktavākasya karaṇatayānvayena praharaṇāṅgamiti saṃśayaṃ ca spaṣṭatvādanuktvā pūrvapakṣamevāha -------- tatreti //
iṣṭadevateti //
ājyabhāgānūyājānteṣu karmasūddiṣṭā agnyādayo devatā ityarthaḥ /
upayukteti //
"prastarejuhūmāsādayati sarvā vā struca" iti vākyena strugdhāraṇe upayuktaprastarapratipattitvenetyarthaḥ /
kṛtārthatvameva hyākāṅkṣāvirahasaṃpādanenāṅgāṅgisaṃbandhavighaṭaka- mityatastameva sūtropāttatayā hetumāha ------- kṛtārthatvāditi //
evañca cāturthikanyāyena kālārthasaṃbandhaṃ dṛṣṭāntavyājena sādhayati -------- darśapūrṇamāsābhyāmiti //
yadyapyatra dṛṣṭānta iva kālārthasaṃbandhabodhakaḥ ktvāpratyayo nāsti; tathāpi kṛtārthataiva pūrvoktarītyā kālārthatāpādane hetuḥ, ktvāpratyayastu kālaviśeṣe paurvāparyarūpe niyāmakamātramiti na doṣaḥ /
kathaṃ tarhi karaṇatvaparatṛtīyopapattirityata āha -------- tṛtīyā ceti /
"itthaṃbhūtalakṣaṇe tṛtīye" tyanuśāsanena gamakatvarūpalakṣaṇārthatvena sūktavākavṛttigamakatvābhidhānāttasyaca tatkālīnatvasaṃpādanena saṃbhavāttṛtīyopapattirityarthaḥ //
lakṣaṇatvārthatve lakṣaṇāpattiṃ nirasyati ---------- nacaivamiti //
etena ------- yat jñānajanakatvarūpalakṣaṇatvābhidhānenaiva jñānakriyāyā upāttatvādanupāttajñānarūpakriyādvārā kriyāsaṃbandhasyopāttabhāvanānirūpitakaraṇatvāpekṣayā vilambitatvena kārakavibhaktyapekṣayā itthaṃbhūtatṛtīyāyā daurbalyaṃ pārthasārathyādibhiruktaṃ tat -------- apāstam; nāpi gamakatvasyākārakatvāt dhātvarthānvayapratīteḥ pradhānabhūtabhāvanānirūpitakārakatvāpekṣayā daurbalyam; akārakasyāpi nimittāderanuṣṭhāpyatvasaṃbandhena bhāvanānvayavadgamakatvasyāpyekakāryakāraṇabhāvakalpanālāghavānurodhena svajanyabhāvanājñānaviṣayatāsaṃbandhena bhāvanānvayopapattestatkalpyatvāditi bhāvaḥ //
evañca pūrvoktapraiṣamantravadiha prakaraṇe mantrasyānvayānupapatterna tadaṅgatvaṃ mantrasya, nahi "idaṃ havirajuṣatāvīvṛdhata maho jyāyo 'kṛte"ti mantrabhāgasya puroḍāśasevayā vṛddho 'gniḥ svasminyajamāne tejobāhulyaṃ kṛtavānityarthaḥ praharaṇe saṃbhavati; bhūtanirdeśānupapatteḥ, pratipatteḥ devatānapekṣaṇācca, ataḥ kālārthaḥ saṃbandha ityabhipretya pūrvapakṣamupasaṃharati --------- ataśceti //
prastarapraharaṇasya barhiṣi prastarasādanānantaraṃ snugdhāraṇakāryārthatayā viniyuktaprastarapratipattirūpatayā vihitasya strugdhāraṇakāryāniṣpatteranirjñātakālatvaṃ vyatirekeṇa sūcayitumasya nirjñātakālatvopapattyarthamanūyājottaramityuktam /
ata evāha ---------- tatkālaviśiṣṭamiti //
yadyapi gamakatve 'pi tṛtīyāyāḥ śaktiḥ, tathāpi praharati bhāvanāyā yathā kārakākāṅkṣā na tathā gamakāpekṣayā, ata ākāṅkṣitānvayasiddhyarthaṃ karaṇatvenaiva kṛtārthasyāpi nāsti vacanasyātibhāra iti nyāyenānvayāśravaṇaṃ yuktam /
kimuta tatrāpi śaktikalpane pramāṇābhāvāllakṣaṇaiveti vinā karaṇaṃ tadāśrayaṇaṃ na yuktamiti cābhipretya siddhāntamāha -------- pracureti //
yattu -------- praharaṇabhāvanāyāmanvayāyogyatvamuktam, tat ajuṣatetyasya puroḍāśādiviṣayatve 'pyagnyādiḥ puroḍāśādi sevitavān tena vṛddho 'gnistejobāhulyaṃ na kṛtavān //
yattu yajamāna āyurādyāśāste tadanena pratyakṣanirdiṣṭena prastarākhyena haviṣetyevamagrimeṇaikavākyatayā, athavā idaṃśabdena puroḍāśāderhutasya vyapadeśānupapattyā pratyakṣanirdiṣṭaprastarasyaiva parāmarśopapatterajuṣateti bhūtanirdeśasya "āśaṃsāyāṃ bhūtavacce" tyanuśāsanātsevanaṃ kurvityarthatayopapādanasaṃbhavādakiñcitkaramityabhipretyāha -------- ataśceti //
evamubhayavidhaliṅgasaṃbhave śrutisahāyasya prābalyaṃ sūcayituṃ śrutyetyuktam /
nanu praharaṇasya pratipattirūpatayā devatānapekṣaṇānmāntravarṇikadevatākalpanayāpi tatprakāśanāsaṃbhavātkathaṃ mantrasyāṅgatvasaṃbhava ityata āha ------- praharatiriti //
mantrasya kriyāprakāśanena tatsaṃbandhiprakāśanena vā karaṇatvāttadabhāve mantragatakaraṇatvānyathānupapattyā tadarthasyāṅgatvakalpanasyāvaśyakatvena prakṛte 'pi śrutyavagatāṅgatānirvāhāya māntravarṇikadevatākalpanayā dravyadevatāsabandhātpraharatau devatoddeśapūrvakadravyatyāgāṃśasyāpyajahatsvārthalakṣaṇā phalamukhatvānna virudhyata ityarthaḥ /
tyāgāṃśaṃ prati dravyasya karaṇatvāt prastaramiti dvitīyānupapattiṃ parihartuṃ āśrayikarmarūpetyuktam /
yathaiva sviṣṭakṛdyāgasya prakṣepāṃśenopayuktadravyasaṃskārakatvaṃ tyāgāṃśenādṛṣṭārthatvamevamihāpi tyāgāṃśenādṛṣṭārthatve 'pi prakṣepāṃśena tatpratipattitvāttadupapattirityarthaḥ //
ayañcātra viśeṣaḥ ------- sviṣṭakṛti yajipadārthāntargatoddeśāṃśasyānupayuktāgnisviṣṭakṛddevatāviṣayatvāt tadaṃśepyārādupakārakatvameva, tadīyamantrāntargatoddeśāṃśena tviṣṭadevatāsmārakatvena saṃskārakatvam, prakṛtetu mantrāṃśeneva tyāgāṃśāntargatoddeśenāpīṣṭānāmeva devatātvātsaṃskārakatvameveti //
yathāca yajamānakartṛkatyāgaviśiṣṭoddeśasya na yajivācyatvam, apitu mantreṇa kriyamāṇasyaiveti nyāyasudhākārādīnāṃ lekhanam; tathā taddūṣaṇapuraḥ saraṃ yajamānakartṛkasyaiva tasya tadvācyatvaṃ caturthe vyaktīkariṣyate //
atraca sūktavākasya karaṇamantratvānmantrāntena karmādiḥ sannipātya iti vacanāt sūktavākapāṭhānantaramekaprastaradravyakahomānuṣṭhāne arthāttadānantaryarūpakālalābhātkālārthatāpica prasaṅgādbhaviṣyatītyatra bhaṭṭapādānāṃ siddhānte uktiriti sthite yannyāyasudhākṛto yājyāvatsūktavākasyāpi homakālaprayojyatvena āhutyākhyahūyamānāvasthadravyasaṃbandhalakṣaṇaguṇayogādyājyātvena stutiryukteti granthena prastarapraharaṇasya sūktavākapāṭhayaugapadyābhidhānaṃ, tadayuktameva; āgneyādiyāgeṣu pratyekaṃ devatātvenānvitānāmihāpi tathaiva devatātvāṅgīkāreṇa samuccayena jyotiṣṭomavadāvṛttyāpattāvapi "agniridaṃhavirajuṣate" tyādi tattaddevatāvācipadoccāraṇe satyeva tattaddevatoddeśena dravyatyāgānuṣṭhānāsaṃbhavena yaugapadyāsaṃbhavāt /
nahi tadāvayavamātrapāṭhenāntyāvayavapadapāṭhābhāve samastasūktavākajanyaprakāśanaṃ sidhdyati //
vastutastu ---------- agnyādidevatāvidhikalpanāyāṃ pratyekamāgneyādiṣu devatātvenānvitānāmapyagnyādīnāṃ samuccitānāmeva lāghavāddevatātvakalpanasya yuktatvāt tāvatāpyanantaritatattaddevatāprakāśanarūpaprayojanasiddherna yuktaṃ pratyekaṃ tatkalpanamiti paraprayuktaprastarākhyadravyāntarānākṣepeṇaikasyaiva prastarasya tāvaduddeśena mantrapāṭhānantaraṃ sakṛttyāgānuṣṭhānapūrvakaṃ pūrvapakṣopapatterāvṛttau pramāṇābhāvādyaugapadyamasaṃbhavyannyāyaṃ ca /
ataeva sūktavākapāṭhasamasamayameva "agnaye ida" miti tyāgenāṃśataḥ prastarasyāhutasya dāhānuṣṭhānaṃ yājñikānāmapyapāstamiti prakāśakāraireva parākrāntatvāt neha vistarabhayāt prapañcyate //
prakṛtamanusarāmaḥ ------- mantratvavaditi //
etena -------- yājñikaprasiddheravayavayogācca hotṛpravacanavihitatyajyamānadravyasaṃbandhoddeśāṅgabhūtadevatāprakāśakatvarūpamantratvasyākhaṇḍasya yājyātvasya kvācitkādhvaryavavihitamṛgāreṣṭidarśapūrṇamāsīyayājyāsvavyāpakatvāttatraca yājyāpadaprayogasya gauṇatvakalpane pramāṇābhāvānnirāsaḥ sūcitaḥ //
nanu atraiva yājyāpadaprayogātprasiddhiviṣayatvasaṃbhava ityata āha -------- evakāropabaddhatveneti //
evakārasyāprasaktayājyāntaraniṣedhakatvāyogātsūktavāka eva yājyāvatpraśasta ityarthapratīteraupacārikayājyātvakathanādasya nigadarūpatvena yājyā vai nigadā ityanyatra teṣāṃ yājyatvaniṣedhācca vihitayājyātvānupapattiḥ /
ataeva "anavānaṃ yajatī" tyādimukhyayājyādharmāṇāmihāprāptirityarthaḥ /
evañca yadi laiṅgikaṃ devatāprakāśanārthatvamanapekṣya śrutyā sūktavākasya praharaṇāṅgatā, śrautañca praharaṇāṅgatvamanapekṣya liṅgena devatāprakāśanāṅgatā bodhyeta tato virodhācchrutyā liṅgabādhe śrutiviniyojyasya kathamapi praharaṇaśaktyabhāvācchrutereva viniyojakatvāyogādubhayānugrahāyeṣṭadevatākīrtanamātreṇa kṛtārthatvaṃ sūktavākasyāṅgīkṛtya kālārthapraharaṇānvayo 'bhyupagamyeta, natvedasti; kintu śrutyanugrahārthaṃ liṅgena praharaṇāṅgabhūtadevatākīrtanadvārā śrutyavagatapraharaṇāṅgatvāpekṣaṇātsūktavākasya ca praharaṇaśaktisidhdyai śrutyāliṅgāvagatadevatāṅgatvāpekṣaṇācchrutiliṅgayostulyārthatvena virodhaparihāropapatterna virodhaparihārāyeṣṭadevatākīrtanamātreṇa kṛtārthatvamaṅgīkṛtyānyatra viniyogānarhatvātkālārthatābhyupagantavyetyabhipretya siddhāntamupasaṃharati -------- ataśceti //
prayojanaṃ pūrvapakṣe praharaṇamātrānuṣṭhānam /
siddhānte tviṣṭadevatoddeśena tyāgasyāpītyādi spaṣṭatvānnoktam //
iti pañcamaṃ sūktavākāṅgatādhikaraṇam //
- - - - - - - <B1> (6 adhikaraṇam / ) (a.3 pā.2 adhi.6) kṛtsnopadeśāt //
śruty.ā liṅgopaṣṭabdhayā praharaṇāṅgatvāvagamānna liṅgamātreṇa sūktavākasyeṣṭadevatāsmaraṇārthatvam /
na cātrāvirodho 'pi; adhyetṛprasiddhyā samastānuvāke sūktavākaśabdasya rūḍhatvenāvayavaśo vibhajya viniyoge 'vayavalakṣaṇāpattyā śrutivirodhāpatteḥ /
nacāsau suṣṭūktaṃ vaktīti vyutpattyeṣṭadevatāvācipadasamudāye yaugikaḥ; pārāyaṇādhyayanādau katipayapadaprayogeṇāpi sūktavākapadārthasampattiprasaṅgena samastānuvāke rūḍheravaśyaṃbhāvāt /
astuveṣṭadevatāprakāśanamānuṣaṅgikaṃ phalam, praharaṇameva tu śrutiviniyogāt sarvānuvākaprayojakaṃ iti darśe paurṇamāse ca sarvaḥ prayoktavya iti prāpte -------- prabalayāpi śrutyā liṅgasya bādhe praharatilakṣyahomāntargatadevatoddeśasyārādupakārakatvāpatteḥ dṛṣṭavidhayā sannipattyopakārakatvalābhārthaṃ śrutireva laiṅgikeṣṭadevatāprakāśanārthatvaṃ mantrasyānumanyate /
ataeva śrutibalīyastvātpraharaṇaprayuktaḥ sūktavākaḥ praharaṇābhāve ananuṣṭhīyamāno 'pi vibhajya viniyogāṃśe iṣṭadevatāprakāśanarūpalaiṅgikakāryasyaiva prayojakatvamanumanyate /
nacaivaṃ sūktavākaśabdasyāvayavalakṣaṇārthatvāpattiḥ; sūktavākapadasya suṣṭhu uktaṃ vaktīti vyutpattyā iṣṭadevatāprakāśakamantraviśeṣe yogarūḍhatvāt /
tena yatra yāvatyo devatā iṣṭāḥ prākṛtyo vaikṛtyo vā tatra tāvāneva sūktavākaḥ /
ataśca sūktavākaprātipadikaśrutyanurodhenāpi liṅgābādhaḥ /
nacādhyayanādau yogabādhāt rūḍhimātrakalpanā; tatra tadānīntanavaidikaprasiddhyanurodhena dārśapūrṇamāsikadevatāpadasamudāyayukta eva mantre nirūḍhalakṣaṇāṅgīkārāt, aśvakarṇādau tu śakyasaṃbandhapratītyabhāvāt kḷptāvayavaśaktibādhenātiriktaśakti- kalpanamitiviśeṣaḥ /
prayojanaṃ vibhajya viniyogaḥ // 6 // 21 //
iti ṣaṣṭhaṃ sūktavākabibhajyaviniyogādhikaraṇam //
<B2> pūrvādhikaraṇe śrutiliṅgāvirodhenaindrīvacchrutiviniyojyatve 'pi mukhyārthe viniyogasya sādhitasyeha keṣāñcitpadānāmasamavetārthatvādasaṃbhavenākṣipya samādhānādākṣepikīmanantarasaṅgatimutsargādhikaraṇaprasakta- mukhyārthaviniyogasya sthāpanātpādasaṅgatiṃ, tathā paurṇamāsyāmamāvāsyāyāṃ ca praharaṇānuṣṭhāne sati paurṇamāsyāmapyamāvāsyādevatāvācipadayuktasya sarvasya sūktavākasya pāṭha uta tattatkālīnaprayoge tattaddevatāvācipadānāmaprayogeṇa pāṭha iti saṃśayaṃ, ataeva pūrvodāhṛtā eva vicārādviṣayavākyaṃ ca spaṣṭatvādanuktvā pūrvapakṣamevāha --------- śrutyeti //
prabalapramāṇena praharaṇāṅgatvenaiva nirākāṅkṣasya sūktavākasyeṣṭadevatāprakāśanaviṣaye liṅgena śrutikalpanānupapatternāvirodhena devatāprakāśakatve 'pīṣṭadevatāprakāśanāṅgatvam, yena tattaddevatāprakāśanarūpaprayojakābhāvāttatattaddevatāvāci- padalopena kālavyavasthayāmantrapāṭhaḥ prāpnuyādityarthaḥ /
ataeva uttamaprayājasviṣṭakṛnmantrayorniṣkṛṣya yathāliṅgaṃ prayogasiddherihatya siddhāntanyāyenaiva prasādhanīyatve 'pi śrutivirodhahetukapūrvapakṣasya tatrāsaṃbhavādanudāharaṇatvamiti dhyeyam //
vastutastu --------- virodha evāstītyāha -------- naceti //
praharaṇameva tviti //
viniyojakapramāṇadvayasattve prabalapramāṇapramitasyaiva śeṣiṇaḥ prayojanakalpanaucityaṃ tuśabdena sūcitam /
tataścāyurādivadiṣṭadevatāprakāśanasyānuṣaṅgikatve 'pi praharaṇasyeṣṭadevatāpadasāmānādhi- karaṇyena sūktavākaṃ prati prayojakatvāttatsattve saṃpūrṇasūktavākapāṭho 'vikala ityarthaḥ //
yadanena haviṣeti mantre pratyakṣanirdiṣṭasya prastarahaviṣa āyurādiphalasyaca nirdeśenaikadeśapāṭhasya sākāṅkṣatvenāyuktatvācca tadaṃśe homasya prayojakatve 'pīṣṭadevatāprakāśanasyāpi mantraliṅgādhīnatvātsannipattyopakārakatvakalpanābhūlatvāt vibhajya viniyogāṃśamātre prayojakatvamātraṃ kalpyate, natu homābhāve 'pi sūktavākapāṭhaviṣaye ityabhipretyāha -------- ata eveti /
ataeva apūrve avabhṛthe praharaṇābhāve ājyabhāgādyaṅgeṣṭadevatāprakāśanārthatayā na sūktavākapāṭha iti bhāvaḥ /
etena ------- "paramārthatastu praharaṇāṅgatvopadeśātprakriyamāṇaprastaraprakāśanaprādhānyāvagaternārthato 'pi vākyabheda" iti nyāyasudhoktau "tathā sati prastaraprakāśanatātparyakatvena praharaṇaprayuktatāpattestasya ca sūktavākaśabdena puroḍāśakapālavaddevatāprakāśanatātparyakatvena tatprayuktasyaiva sato viniyogena siddhānte 'niṣṭatvādi"tiprakāśakārairdūṣaṇamāpādya idamāyuktaprastarajoṣaṇakartṛtayā prādhānyena sakalaprayogasamaveteṣṭadevatāprakāśana eva tātparyaṃ tadavighātenaiva praharaṇe 'pi viniyogāt devatākalpakatvamityuktaṃ ------- parāstam; tuṣopavāpānuṣṭhānāt kālāntarīṇakapālopādānaprayojakatvasya puroḍāśa ivehāpi tadāpattivāraṇāya iṣṭadevatāprakāśanaprayuktasya sūktavākasya praharaṇaprayojyatvāvaśyakatayā praharaṇasaṃbandhidravyaprakāśakatvena praharaṇaprayojakatvasyākāmenāpatteḥ /
anyathā yathāśakti prayoge prastarahomābhāve 'pi anūyājottaramiṣṭadevatāprakāśanānurodhena sūktavākapāṭhāpatteḥ /
ato yathaiva darśapūrṇamāsāprayuktasyāpi bhedanahomasya bhedanaprayojyatvānnaikatareṇa vinā tadanuṣṭhānamevaṃ praharaṇaprayuktasūktavākāntargatakatipayapadajanyeṣṭadevatāprakāśanasyaiva prayojakatvamādāya sūktavākaśabdanirdeśyatvopapatteḥ praharaṇasyāpi ceṣṭadevatāprakāśanaprayuktereva prayojanatvamityaṅgīkārāt anyonyaniyamasiddhiḥ /
puroḍāśakapāletu tuṣopavāpakālīnapuroḍāśopādānaprayuktatvāsaṃbhavāt puroḍāśakapālapade siddhavannirdeśapratīteḥ tuṣopavāpaṃ vināpi prayuktatvasiddhiriti vaiṣamyam /
ataeva yadaṃśe prayojakatvaṃ anyataḥ sidhyati na tadaṃśe anyatarasyāpi prayojakatvaṃ kalpyate, gauravādato vibhajyaviniyogāṃśe iṣṭadevatāprakāśanasya prayojakatvam anuṣṭhānāṃśe praharaṇasyeti na ko 'pi virodhaḥ /
evaṃsthite "ataśceṣṭadevatāprakāśanopajīvitvādaprayojakaṃ praharaṇami"ti vārtikamapi iṣṭadevatāprakāśanopajīvitvāditi hetūpādānādvibhajyaviniyogāṃśa eva prayojakatvābhāvābhiprāyeṇa vyākhyeyam /
nahi sūktavākaśabdāt pratīyamānamiṣṭadevatāprakāśanaprayuktatvamapahnotuṃ śakyam; śrutyaiva pūrvoktarītyā anumatatvādityāśayaḥ //
atraca "prakaraṇāvibhāgādubhe prati kṛtsnaśabda" iti sūtrasvārasyena sūktavākapadasya rūḍhyabhyupagamena prayogadvayavartipraharaṇadvayoddeśena kṛtsnasūktavākavidhāne 'pi 'ekaikapraharaṇe avayavaśaḥ prayogasiddhiri'ti śrutivirodhaparihāramāśaṅkya 'yājyādipade lakṣaṇāpatteḥ samudāyasya phalasādhanatvāyogāt samudāyināmeva phalaṃ pratyupādeyatayā vivakṣitasāhityānāṃ sādhanatve 'pītikartavyatāṃśe uddeśyatvenāvivakṣitasāhityānāmanvayāt pratyekamevetikartavyatayā prayājādīnāmiva praharaṇasyānvaye sūktavākasyāpi tadaṅgasya pratyekameva anvayaprāptau kālaikyāt trayāṇāmarthe praharaṇatantratayā tantreṇaivānuṣṭhānaprāpteravayavaśaḥ prayogāsiddhe'riti bhāṣyakāreṇa pradūṣya, devatāpadānāṃ parasparānvayābhāvenaikārthapratipādakatvāsaṃbhavātnaikaḥ sūktavāko 'pi tvadabhitastantrapadāpetā ekaikadevatāpadabhinnāḥ bahavaḥ sūktavākāḥ, ataśca vibhaktasyaiva sūktavākasya tṛtīyayā praharaṇāṅgatvāt prātipadikatṛtīyāśrutyoravirodhe sati ekavacanasya sūktavākasāmānyābhiprāyeṇopapattiriti tasmin kāle yāvadapekṣā tasminkāle tāvaddevatāvācipadayuktasyaiva sūktavākatvāt tāvanmātreṇa praharaṇānuṣṭhāne vaiguṇyāprasakteriṣṭadevatāprakāśanarūpalaiṅgikakāryānurodhenaikapraharaṇaprayogatantrapadānāṃ sakṛtpāṭhe 'pi sūktavākatrayapāṭhopapattiriti kṛtaṃ virodhaparihāraṃ vārtikakāro adūṣayat /
yadyapi pratyekapadānāṃ naikārthyābhidhāyakatvam; tathāpi "yadanena haviṣāśāste" ityekavākyatayaikaprayojanakatvenaikārthatvam /
tatra ceṣṭadevatāprakāśanasyaiva prayojakatvādarthataḥ prādhānyam /
tathāpi pūrvoktarītyā praharaṇasyāpi aṅgitvena śabdator'thataśca prādhānyasattvādekaprayojanatvopapattiḥ /
yadica tattaddevatāprakāśanānāmeva śabdataḥ prādhānyamaṅgīkṛtya nānāvākyatvamiṣyeta, tato "yā te aṅgna" ityādivadabhitaḥ tantrapadānāmapyanuṣaṅgeṇa pṛthakpāṭhāpattiḥ /
sūktavākenetyekavacanabalāt aniyamenaikasyaiva sūktavākasya śrutyā viniyogāpatteḥ tadaṃśa eva sannipatyopakārakatvalābhārthamiṣṭadevatāprakāśanārthatvopapatteḥ; sūktavākatrayapāṭhe pramāṇābhāvāt yāvat pradhānatrayadevatākatvānupapattiśca /
ato vaiśvānaravākyavat upakramopasaṃhāraikyenaikavākyatvānnānāvākyatvena sūktavākabahutvāsiddheḥ samudāya eva sūktavākatvāt prātipadikaśrutivirodhe avayavaśaḥ prayogo durnnivāra iti /
evañca ------- "vidhauca samudāye ca toyaśabdo yatheṣyate /
saṃsargidravyarūpatvāt sūktavākapade tathā" //
iti vārtikatātparyamanusaṃdhāya śrutivirodhaṃ pariharati --------- sūktavākapadasyeti //
uktamiti //
ājyabhāgādīṣṭadevatāmityarthaḥ /
etena -------- ardhendrāṇi juhotītivat agnisaṃbodhyatvaṃ sūktavāgasītyabhidhānāt sūktavākapadaghaṭitatvena sūktavākatvasya mantre saṃbhave 'pīha mantrāntargatapadaprakāśyārthamādāya yogasyāntaraṅgatayā saṃbhavatastyāgena padaghaṭitayogasyābahiraṅgasyāśrayaṇaṃ na yuktamiti ------- sūcitam; ataśceṣṭadevatāprakāśanarūpakāryānurodhena iṣṭadevatāprakāśakapadamātroccāraṇenāniṣṭadevatāvācipadānuccāraṇe sūktavākatvānupapattyā siddhesūktavākatvānapāyānna sūktavākapadaśrutivirodhaḥ, pratyutānapekṣitāniṣṭadevatāpadoccāraṇe ajuṣatetyuddiṣṭarūpoktavacanasyānṛtatayā duruktavākyatvāpattirityarthaḥ /
teneti //
yathā "āśāste 'yaṃ yajamāno 'sā" vityādeḥ sarvanāmātideśadvārā āmnātadevadattādināmapūritasyamantrasya yathāyuktisahitapāṭhena kārtsnyāvadhāraṇā, tathehāpi yuktisahitapāṭhena kṛtsnasūktavākāvadhāraṇayā tāvāneva sūktavākaḥ paṭhanīya ityarthaḥ /
taduktaṃ vārtike -------- "tena tridhaiva mantavyaḥ sūktavākaḥ pratiṣṭhitaḥ /
svādhyāye karmakāleca prakṛtau vikṛtāvapi /
sarvaprākṛtadaivatyaḥ svādhyāye tāvadiṣyate /
niṣkṛṣṭadevatāmadhyaḥ prakṛtau samudāyayoḥ /
sūryādipadamadhyaśca vikṛtāvavadhāryate" iti //
yogabādhāditi //
adhyayanādikāle iṣṭatvābhāvena phalopahiteṣṭadevatāprakāśakamantratvābhāvena yogabādhāttadarthaṃ svarūpayogyatāmātreṇa śaktyaṅgīkāre cāniṣṭadevatāprakāśakapadānāmapi yogyatāmātreṇa prayogopapatteradhyayanādikāle sarvasūktavāka eva tatprasiddheḥ rūḍhikalpanamāvaśyakamityāśaṅkārthaḥ /
aśvakarṇādāviti //
aśvakarṇādiśabda ityarthaḥ //
tasmāt śrutivirodhābhāvāt upajīvyatvena mukhyasāmarthyasyāpi yuktaṃ viniyojakatvamabhipretya prayojanamāha -------- prayojanamiti //
tattatkālīnapradhānāṅgatayā praharaṇānuṣṭhāne tatkālīnapradhānasaṃbandhidevatāvācakapadayuktaḥ sūktavākaḥ tadbhinnakālīnapradhānasaṃbandhidevatāvācipadoddhāreṇa paṭhanīya ityarthaḥ /
siddhāntaprayojanoktyā pūrvapakṣe vyatirekeṇa paurṇamāsyāmamāvāsyāyāṃ vā kṛtsnasya prayojanamiti prayojanamarthāt sūcitam //
yattu ------- prakāśakāraiḥ pūrvapakṣe sūktavākasya praharaṇaprayuktatvāt prastarasya nāśadoṣāpahāreṣvaprayogaḥ, siddhāntetu iṣṭadevatāprakāśanaprayuktatvāt prayoga iti prayojanāntaramuktam /
tatprastaranāśādiṣu ājyena homānuṣṭhānasya siddhānta iva pūrvapakṣe 'pi tulyatvena prayojakahomasattvāt prayogopapatteḥ prastarahomābhāve avabhṛthe iṣṭadevatāprakāśanamātrānurodhena tadanuṣṭhānasya siddhānte 'pyadarśanāt ayuktamiti kaustubhe, atrāpica homābhāve 'pi iṣṭadevatāprakāśanasya sūktavākapāṭhaviṣaye prayojakatvanirāsopapādanavyājenaiva sūcitam //
iti ṣaṣṭhaṃ sūktavākavibhajyaviniyogādhikaraṇam //
- - - - - - - <B1> (7 adhikaraṇam / ) (a.3 pā.2 adhi.7) liṅga //
kāmyeṣṭikāṇḍe indrāgnyādidevatyāḥ kāmyeṣṭayaḥ samāmnātāḥ, tenaiva krameṇa mantrakāṇḍe tattalliṅgā eva kāmyayājyānuvākyākāṇḍamityevaṃ samākhyātā yājyānuvākyāmantrāḥ samāmnātāḥ /
te liṅgādindrāgnyādidevatyakarmamātrāṅgaṃ, natu durbalakramasamākhyānurodhena kāmyeṣṭimātrāṅgam /
naca sāmānyasaṃbandhabodhakapramāṇābhāve liṅgamātreṇa viniyogāyogaḥ; mantragataprayojanākāṅkṣāsahakṛtaliṅgena sāmānyasaṃbandhabodhakapramāṇābhāve 'pi indrāgnyādidevatāprakāśane mantraviniyogopapatteḥ /
naca ------ indrāgnisvarūpe ānarthakyādapūrvasādhanatvalakṣaṇārthaṃ kramādyapekṣeti ----- vācyam; indrāgnyādidevatānāṃ juhūvatkratvavyabhicaritatvena lakṣaṇopapatteḥ, vyabhicāritve 'pi vā laukikasyāgnyādervaiyarthyādeva vāraṇopapattau pariśeṣādevāpūrvīyatvopasthiteḥ /
ato liṅgamātreṇa kramasamākhyayorbādhātsarvārthatvamiti prāpte -------- ākāṅkṣābhāve yogyatārūpasya liṅgasya viniyojakatvānupapattermantragataprayojanākāṅkṣāyāśca sarvamantrāṇāṃ vācastome viniyogena nirākāṅkṣatayā abhāvānna liṅgamātrāt sarvārthatvopapattiḥ /
ataśca vākyaprakaraṇādinā sāmānyasaṃbandhabodhakapramāṇena tattadākāṅkṣotthāpanāttattatkratusaṃbandhe 'vagate dvāraviśeṣa eva liṅgādavagamyate /
naca vācastomīyavākyena prakaraṇādibādhaḥ; mantraviśeṣaviṣayāṇāṃ teṣāṃ mantrapāṭhakālotpannamantraprayojanākāṅkṣāvelāyāmanupasthitena tena vākyena bādhāyogāt /
nacaivaṃ prabalena viniyuktasyāpi durbalena viniyoge utkṛṣṭasyāpi pūṣānumantraṇamantrasya prakaraṇena gauṇer'the viniyogāpattiḥ; pramāṇadvayasyāpyekaviṣayatvānmantraprayojanākāṅkṣāvelāyāṃ prabalapramāṇasyopasthitatvācca bādhakatvopapatteḥ /
ataśca prakṛte bādhāyogātkramasamākhyānurodhāt kāmyeṣṭiviṣayatvameva mantrāṇām /
nacānyatrākāṅkṣotthāpakaṃ kiñcidasti; avyabhicaritakratusaṃbandhāderākāṅkṣotthāpakatve pramāṇābhāvāt /
vastutastu nātrāvyabhicāro 'pi; juhvādīnāṃ hi na tattvenānyatra kāraṇateti tasyā yuktaḥ kratunāvyabhicāritaḥ saṃbandhaḥ, devatārūpasyāgnyādiśabdasya tu ānupūrvīviśiṣṭavarṇatvena kratuṃ pratīva svārthapratipādanaṃ pratyapi kāraṇatvānnāvyabhicaritakratusaṃbandha iti vaiṣamyam /
ataśca vyabhicārāt avyabhicāre 'pi vā'kāṅkṣotthāpakatvānupapatternānyatra viniyogaḥ /
ataeva svārasikī ākāṅkṣā yatra na nivartate yathār'thajñāne upaniṣajjanyātmajñāne vā, tatra ākāṅkṣotthāpanaprayojanābhāvāt sāmānyasaṃbandhabodhakapramāṇaṃ vināpi bhavatyeva liṅgamātrādviniyogaḥ, prakṛte tu svārasikākāṅkṣānivṛtterākāṅkṣotthāpakasāmānya- saṃbandhabodhakapramāṇāpekṣeti vaiṣamyam /
nacaivaṃ prabalakramamātreṇaiva tadupapatteḥ samākhyāvaiyarthyam; yatra sāptadaśyavadagnidevatyakarmakrame āgneyamantradvayāmnānaṃ tatra prathamātikrame kāraṇābhāvātkramāvirodhācca sāmidhenīṣu niveśe prāpte samākhyayā yājyānuvākyākārye niveśaḥ, sāmidhenīṣu tvanyāsāmāgamaḥ /
nacaivaṃ kramopanyāsavaiyarthyam; yatrānyadevatyapūrveṣṭiyājyāmnānānantaramuttareṣṭiyājyātaḥ pūrvamāgneyya ṛcaḥ paṭhitāstatra talliṅgakamantreṇa yājyākārye niveśāsaṃbhavāt samākhyābādhe 'pi kramamātreṇottareṣṭisāmidhenīkārye viniveśaḥ, tatsāmidhenīsthānapaṭhitatvāt /
ataḥ siddhaṃ kāmyeṣṭiṣveva viniyoga iti // 7 // 22 // //
iti saptamaṃ liṅgakramasamākhyānādhikaraṇam //
<B2> kāmyeṣṭaya iti //
"aindrāgnamekādaśakapālaṃ nirvapet yasya sajātā vīyuḥ" /
"agnaye vaiśvānarāya dvādaśakapālaṃ nirvapet rukkāma" ityādivākyavihitā ityarthaḥ /
sajātā jñātayo vipratipannā bhaveyuritivīyurityasyārthaḥ /
tattalliṅgā eveti //
yadeveṣṭiṣu cihnamindrāgnyādidevatāśabdastadeva cihnaṃ yeṣu tādṛśya ityarthaḥ /
yājyānuvākyāmantrā iti //
indrāgnī rocanādiva ityādaya ityarthaḥ //
vakṣyamāṇaniyatavyavasthopapādakatayā kramasamākhyāśabdayorupādānam /
tatra liṅgaviniyogavicārāt pādādhyāyasaṅgatī pūrvatra śruteḥ liṅgasāpekṣatve ukte prasaṅgādiha liṅgasyāpyanyapramāṇasāpekṣatvapratipādanāt prāsaṅgikīmanantarasaṅgatiñca tathā kimetā liṅgādindrāgnidevatyanityakāmyakarmamātrāṅgamuta pūrvoktakāmyeṣṭimātrāṅgam kramasamākhyābhyāmiti saṃśayaṃ ca spaṣṭatvādanuktvā pūrvapakṣamāha ------- tatheti //
svādhyāyavidhyadhyāpitasya mantrajātasya prayojanākāṅkṣatvāt ākāṅkṣāsahakṛtena yogyatārūpeṇa liṅgena mantrasyendrāgniprakāśanārthatvopapatteḥ liṅgasya sāmānyasaṃbandhabodhakapramāṇāpekṣābhāvena kramasamākhyābhyāṃ niyatavyavasthā sidhyet /
nahi liṅgaṃ sāmānyataḥ kratusaṃbandhe 'vagata eva dvāraviśeṣe viniyojakamityatra kiñcinniyāmakamasti /
śrutivadeva pūrvaṃ kratusaṃbandhānavagame 'pi ākāṅkṣāsahakṛtaliṅgamātreṇa viniyogopapatterityarthaḥ /
devatātvasya yāgaikanirūpitatvāt vihitatvaghaṭitatvena alaukikatvādavyabhicaritakratusaṃbandhamupapādayati --------- indrāgnyādīti //
devatātvasya alaukikatve 'pi tena rūpeṇa mantre 'prakāśanādadhiṣṭhānamātrasya cendrāgnyādeḥ mantrārthavādādau yāgaṃ vinā svargalekādisthatvena pratipādanāllaukikatvāvagateḥ nāvyabhicaritatvamityabhipretyāha --------- vyabhicāritve 'pi veti //
mantrārthavādānāmanyaparatvenaindrādīnāṃ svargādisthatve pramāṇābhāvo 'pivetyanena sūcitaḥ /
pariśeṣādeveti //
indrādipadāttaddhitena kratvavyabhicāritvenaiva devatātvapratīteḥ smārakavidhayā kratūpasthityāpūrvasādhanatvopasthitirityarthaḥ //
evamapūrvasādhanatvopasthityarthaṃ sāmānyasaṃbandhabodhakapramāṇasāpekṣatvaṃ liṅge prācīnopapāditaṃ vyarthaṃ sūcayitvā mantrāṇāmākāṅkṣotthāpakatvena tadapekṣatvaṃ svayaṃ darśayan siddhāntamāha ------- ākāṅkṣābhāva iti //
vahanayogyasyāpi puṃso nairākāṅkṣye sati vahane viniyogādarśanādyogyatāmātrasya ākāṅkṣābhāve viniyojakatvānupapatterityarthaḥ /
vācastomapadaṃ brahmayajñāderapyupalakṣaṇam /
vākyaprakaraṇādineti //
tatra vaṣaṭkārādimantrāṇām "eṣa vai saptadaśa" iti vākyam lavanamantrāṇāṃ prakaraṇaṃ prakṛte kramasamākhyobhayaṃ pūṣānumantraṇādausamākhyāmātramiti vivekaḥ /
idameva sāmānyasaṃbandhabodhakapramāṇasāpekṣatvaṃ liṅgasya, śrutestu svata eva tadutthāpakatvāt tadanapekṣetyarthaḥ /
mantraviśeṣeti //
sāmānyaviśeṣabhāvanyāyenāpi viparītabādhakatāsūcanāya viśeṣapadopādānam /
durbaleneti //
ākāṅkṣotthāpaneneti śeṣaḥ /
pramāṇadvayeti //
vācastomaviniyojakavākyasya mantraprayojanākāṅkṣāvelāyāmanupasthitatvena bādha eva, natu tena durbalayorapi bādhaḥ, iha tadānīmeva upasthitapramāṇadvayasamāveśe prabalena durbalasya bādha eveti na tadākāṅkṣotthāpakatvasaṃbhava iti viśeṣa iti bhāvaḥ /
nacānyatreti //
kramaprāptakāmyeṣṭivyatiriktakarmaṇītyarthaḥ //
pramāṇābhāvāditi //
prakaraṇapāṭhādau prakaraṇapaṭhitena mayā kathamasyopakartavyamityapekṣotpattyāpi avyabhicaritakratusaṃbandhasya vyāptirūpatayā tasyānaiyatyabādhakatve 'pi ākāṅkṣotthāpakatve pramāṇābhāvaḥ /
nahi vahniviṣaye nirākāṅkṣasya vahnyanumitau jātāyāṃ tadviṣaye vyāptimātreṇākāṅkṣā upajāyate /
ato na tasyākāṅkṣotpādakatvasaṃbhava ityarthaḥ /
avyabhicaritakratusaṃbandhasvarūpasyānyathā durupapādatvāt apūrvamātranirūpitasādhanatāvacchedakībhūtadharmāvacchinnasyāpūrvāvyabhicaritatvarūpatayaivāvaśyanirvacanīyasyāpi ihāsaṃbhava ityāha -------- vastutastviti //
svārthapratipādanaṃ pratyapīti //
tasya taṃ pratyakāraṇatve arthapratipādakatvābhāvena prātipadikasaṃjñānupapattiḥ /
juhūśabdasya tatra kāraṇatve 'pi kratuṃ pratyākāraviśeṣaviśiṣṭārthasyaiva niyamena kāraṇatvamiti vaiṣamyam /
ata evātrārthasya apūrvasādhanatvakalpane pramāṇābhāvānna taddvārāpi padasya apūrvāvyabhicāra ityarthaḥ /
svārasikīti //
svata eva sākāṅkṣasya nākāṅkṣotthāpakapramāṇāpekṣetyarthaḥ //
upaniṣaditi //
atraca ----- "avināśī vā are 'yamātmānucchittidharmā mātrāsaṃsargastvasya bhavatī" tyupaniṣajjanyaṃ mātrāśabdavācyadharmādharmavikāraśarīrasaṃbandharahitasāṃsārikakartṛbhoktṛnityātmajñānamekam /
tathā "apahatapāpmā vijaro vimṛtyuḥ viśoko vijighnannasaṃpipāsaḥ satyakāmaḥ satyasaṃkalpa" ityādyupaniṣatkṛtapāpādidoṣarāhityakāmyamānaphalaprāptiprayatnānapekṣasaṃkalpamātrādhīnasiddhirūpaguṇaviśiṣṭātma pratipādanapūrvikayā "so 'nveṣṭavyaḥ sa vijijñāsitavya" iti śrutyā vihitaṃ vedāntavākyāvadhāraṇātmakajijñāsopetaṃ tadavadhāritātmasvarūpānucintanākhyānveṣaṇātmakamapahatapāpmatvādi- guṇaviśiṣṭātmajñānaṃ dvitīyam /
tathā ātmānamupāsītetyādi vidhivihitaṃ nirguṇātmaviṣayamaparokṣasākṣātkāraparyantamātmajñānaṃ tṛtīyamiti yadyapyātmajñānaṃ trividham; tathāpi dvitīyatṛtīyayorupāsanārūpātmajñānayoḥ karmaṇi puruṣe vā dṛṣṭaprayojanābhāvādadṛṣṭāpekṣāyāṃ śrutyādyabhāvena kratvaṅgatvānupapatteḥ "sa sarvāṃśca lokānāpnoti sarvāṃśca kāmānavāpnoti tarati śokamātmavidi" tyādivākyaśeṣasamarpitaṃ dvitīyātmajñānasya phalam, tathā "sa khalvevaṃ vartayan yāvadāyuṣaṃ brahmalokamabhisaṃbadhyate naca punarāvartate" iti vākyaśeṣasasarpitaṃ phalaṃ tṛtīyātmajñānasyeti vyākaraṇādhikaraṇe ācāryaiḥ puruṣārthatvasya pratipādanādiha prathamamevātmajñānaṃ grāhyam /
tasya kratvaṅgatvaṃ kevalaliṅgādeva /
yadyapyatrāpi vākyaśeṣasamarpitaṃ phalaṃ saṃbhāvyate, tathāpi tasya parṇamayīnyāyenārthavādatvāt aṅgatvamevetyarthaḥ /
viniyoga iti //
naca ------- arthajñānasya sākṣātkarmasu sāmarthyādavyabhicāridvārānapekṣaṇāt liṅgamātreṇa karmaṇi viniyogasaṃbhave 'pi ātmajñānasya sākṣātkarmaviṣayatvābhāvena tatrāsāmarthyāt jñeyātmarūpasya dvārasya lokavedasādhāraṇyena kratvavyabhicārābhāvāt kathaṃ tanmātreṇa kratvaṅgatvam iti ------- vācyam; laukikakarmapravṛtteḥ dehādivyatiriktātmajñānaṃ vināpi siddheḥ tadvyāvṛttaye avyabhicaritadvārānapekṣaṇāt pāralaukikaphalasādhanakarmaṇāmevākāṅkṣitatvena sāmarthyamātreṇa tadupapatterityarthaḥ /
vistareṇa caitadviśvajidadhikaraṇe caturthe upapādayiṣyate /
atraca yathānuṣṭheyakarmānuṣṭhānaupayikatvena ātmajñānasya karmāṅgatā tathā na niṣiddhakarmāṅgatvam; tathātve anātmajñānavatā kṛtabrahmahananapratyavāyajanakatvānāpatteḥ, kintu tatphalībhūtanivṛttyaṅgatvameva /
taduktaṃ vārtike -------- "ātmajñānaṃ hi saṃyogapṛthaktvāt kratvarthapuruṣārthatvena jñāyate /
tena vinā paralokaphaleṣu karmasu pravṛttinivṛttyasaṃbhavāt /
" iti //
etāvāṃstu viśeṣaḥ ------- niṣedhaparipālanarūpanivṛtterapūrvajanakatvābhāvena tatropaniṣanniyamajanyāpūrvānupayogānnityatvādiprakārakātmajñānasya nivṛttau svarūpopayogitayaivopayogaḥ, upaniṣanniyamastu nāpekṣyate, vihitakarmasu tu so 'pīti jñeyam /
athavā ------- yathā niṣedhādhyayananiyamo niṣedheṣvanupayujyamāno 'pinimittaniścayadvārā prāyaścitteṣu upayujyate, tathoktātmajñānaniyamo niṣedhe anupayukto 'pi prāyaścittādhikārahetubhūtāmanutāpahetukāṃ nivṛttiṃ saṃpādayan prāyaścitteṣu upayujyata iti draṣṭavyam //
etacca sāmānyasaṃbandhabodhakapramāṇaṃ vinā kvāpi liṅgamātrasya viniyojakatvāyogāt "yadeva vidyayā karoti śraddhayopaniṣadā tadeva vīryavattaraṃ bhavatī"ti "omityudgīthamupāsīte"ti udgīthopāsanāprakaraṇe chāndogye paṭhitābhyāmapi vākyābhyāmeva prakaraṇabādhena tayoḥ kratvaṅgatvaṃ na liṅgamātreṇeti nyāyasudhākṛto 'bhimatamapi prakaraṇabādhenaitadvākyābhyāṃ sarvakratvaṅgatvāyogādayuktamiti pārthasārathyabhisaṃhitadūṣaṇamabhipretyoktam /
nyāyasudhākṛnmatopanyāsapūrvakaṃ taddūṣaṇopanyāseca prakāśakāraireva parākrāntamiti neha tat prapañcyate //
paramārthatastu --------- yadi kṛṣyādivannityaprāptasya vidhikalpane pramāṇābhāvena vidheyatvānupapatteḥ janyatāmātrabodhe 'pi aṅgatvāsaṃbhavāt aṅgatābodhakatvena "yadeve"tyetadvākyadvayameva svīkartavyamiti kaustubhe pūjyapādoktamanusandhīyate, tadā karotītyasya leṭtvaṃ prakalpya kathañcit nyāyasudhoktameva sādhviti jñeyam //
samākhyāvaiyarthyamiti //
yājyānuvākyākāṇḍamiti samākhyāvaiyarthyaṃ sūtre ca tadupādānaṃ vyarthamityarthaḥ /
sāptadaśyavaditi //
sāmidhenyaṅgabhūtasāptadaśyaṃ yasmin karmaṇi agnidevatye pāthikṛtīyeṣṭirūpe ātideśikamantraprāptyā na pradhāne yājyāpekṣā; vācanikasāptadaśyāmnānāt, sāmidhenīṣvāgneyaṛgdvayāpekṣā, tatra tattadiṣṭikramāmnātāgneyamantradvayasya prathamātikrame kāraṇābhāvena sāmidhenīṣu kramāvirodhena ca niveśaprasaktau yājyākārye tanniveśasya samākhyayaiva vaktavyatvāt tadāvaśyakatvamityarthaḥ /
ataeva etādṛśasthale apekṣitavidhānarūpanyāyasyaiva samākhyayā bādhaḥ, natu kramasya kaścana visaṃkoca iti //
sāmidhenīṣvanyayorāgamamāha -------- sāmidhenīṣviti //
evaṃ tarhi kāmyayājyānuvākyākāṇḍamiti samākhyayaiveṣṭasiddheḥ kramopanyāsavaiyarthyamāśaṅkya pariharati --------- nacaivamiti //
yatreti //
agnivāruṇeṣṭikrame taddevatyayājyānuvākye paṭhitvā somāraudreṣṭikramāmnātatattaddevatyayājyānuvākyāpāṭhāt āgneyya ṛcaḥ pṛthupājavatyaśca samāmnātāḥ, tatra tāsāṃ liṅgaviniyuktamantrāntareṇa bādhāduttareṣṭiyājyakārye samākhyāmātreṇa viniyogānupapatteḥ liṅgasahakṛtasamākhyayānyatra viniyogaprasaktau krameṇa tāṃ bādhitvā uttareṣṭisāmidhenīniveśalābhāya kramopādānamityarthaḥ //
nanu kramaḥ pūrvasyāmapīṣṭau sādharaṇa ityata āha -------- tatsāmidhenīti //
pūrveṣṭisāmidhenīsthānasya tadīyayājyādipāṭhena vyavadhānāduttareṣṭisāmidhenīsthāna eva paṭhitatvamityarthaḥ /
siddhāntamupasaṃharati -------- ata iti //
prayojanaṃ pūrvottarapakṣapratipādanena tathā "manotāyāntu vacanādavikāra" iti dāśamikādhikaraṇapūrvottarapakṣaprayojanena ca spaṣṭatvānnoktam //
iti saptamaṃ liṅgasāmānyasaṃbandhabodhakapramāṇāpekṣatvādhikaraṇam (liṅgakramasamākhyānādhikaraṇam //)//
- - - - - - - <B1> (8 adhikaraṇam / ) (a.3 pā.2 adhi.8) adhikāre //
jyotiṣṭome "āgneyyā'gnīdhramupatiṣṭhata" ityatra kiṃ aprakṛtasādhāraṇyena ṛṅmātramāgnīdhropasthānāṅgam, uta prakṛtā eva yāḥ stotrādāvapi viniyuktāstā eveti cintāyām --------- āgneyīpadasyāviśeṣeṇa sarvaparatvātprakaraṇasya tatsaṃkocakatvānupapatteragnidevatyaṛṅmātrasyaiva viśiṣṭavidhyuttarakālīnaviśeṣaṇavidhinā āgnīdhropasthānāṅgatvena vidhānam, natvatrāgneyī uddeśyā, yenānarthakyabhiyā vrīhivatprakaraṇena saṃkocyeta; tṛtīyayopādeyatvāvagamāt /
yatra copasthānasvarūpe ānarthakyāśaṅkā, tatra prakaraṇānupraveśe 'pi nāgneyīpadasya prakṛtaparatvāpattiḥ /
nacāgneyīpadasya yaugikatvāttaddhitāntatvādvā saṃnihitaparatvam; yaugikānāmavayavārthaviśiṣṭavyaktimātravācitvena saṃnihitavācitve pramāṇābhāvāt, taddhitasya tadvācitve 'pi prakṛtānāmṛcāmekaprakaraṇasthatve 'pi pradeśāntarasthatvena saṃnihitatvābhāvāt /
astu vā prakaraṇasaṃnihitasyaiva taddhitena grahaṇam, tathāpi yatra na taddhitaśravaṇaṃ yathā brahmaudanaprāśanādau caturo brāhmaṇān bhojayedityādau, tatra prakṛtartviggrahaṇe pramāṇābhāvaḥ /
naca ------ prakṛtānāmapūrvārthatvasya kḷptatvātkekavalaṃ dvārarūpāgnīdhropasthāpanasaṃbandhakaraṇe lāghavādaprakṛtānāñcobhayakaraṇe gauravāpatteḥ prakṛtaniyama iti ------- vācyam; prakṛtagrahaṇe 'pyupasthānasvarūpasya dvāratve tatkāryāpanne ūhādyanāpatterapūrvasādhanatvalakṣaṇāyā āvaśyakatvāt /
nahi prakṛtaviṣaye 'pi prakaraṇena vākyāntarakalpanayā apūrvārthatvabodhaḥ; tathātve vrīhīṇāṃ svarūpeṇa dvāratvāpattau yavānāṃ tadanāpatteḥ /
ato lāghavādapūrvasādhanībhūtastotratvenaivoddeśyatā /
tāvatā cāpūrvasādhanībhūtopasthānārthatvasyālābhāt /
astyeva prakṛtagrahaṇe 'pi tadvidhāvapūrvasādhanatvalakṣaṇā /
apica stotrāpūrvasādhanatvakḷptāvapi nopasthānajanyajyotiṣṭomāpūrvasādhanatvalābhaḥ prakṛtānām, ataḥ sarvāsāmeva grahaṇam /
aprakṛtānāmeva vā, kāryasākāṅkṣatvāditi prāpte --------- aprakṛtagrahaṇe tāsāmapūrvasādhanībhūtopasthānārthatvānyathānupapattyā apūrvārthatvasyāpi 1vrīhyādivatkalpanīyatvāpatteḥ prakṛtānāṃ ca kāryāntarasaṃbandhabodhakavidhāvevāpūrvārthatvasya kḷptatvāllāghavopajīvinā prakṛtaniyamaḥ /
saṃbhavatica prakṛtānāmapyāgneyīnāṃ vāṅniyamanyāyena stotradvārā jyotiṣṭomāpūrvasaṃbandhāsaṃbhave 'pi kāryāntaradvārā saḥ /
āgneyīnāṃ stotrādau viniyoge 'pi pārthakyena jyotiṣṭamaprakaraṇe pāṭhādeva vā tadapūrvasaṃbandhāvagamaḥ /
ayameva ca brahmaudanaprāśane ṛtviktvaniyāmakanyāyaḥ /
nacaivaṃ "ātreyāya hiraṇyaṃ dadāti" ityatrāpi tanniyamāpattiḥ; ṛtvikṣu ātreyatvasya niyamenāprāpteḥ /
ataeva cāgnimupanidhāya stuvītetyādāvākṣepaṇīyastotrāpūrvasaṃbandhasyāhavanīyādāvaprāptatvānna tanniyamo 'pitu vinā vacanaṃ āyatanabahirbhāvāyogāllaukikasyaiveti vakṣyate /
ataḥ siddhaṃ lāghavānurodhena prakṛtasyaiva grahaṇam //
8 //
23 //
ityaṣṭamamāgneyīprakṛtaniyamādhikaraṇam //
<B2> jyotiṣṭoma iti //
sāmānyasaṃbandhabodhakapramāṇasūcanāya jyotiṣṭoma ityuktam /
āgneyyeti //
āgneyyā ṛcā āgnīdhramaṇḍapamupatiṣṭhate iti vacanasyārthaḥ /
etacca aindyā sado vaiṣṇavyā havirdhānamiti vākyadvayasyāpyupalakṣaṇam /
atra yadyapi śruterviniyojakatvam; tathāpi liṅgena sāmānyasaṃbandhakāripramāṇasāpekṣatvena viniyoge pūrvādhikaraṇe cintite tatprasaṅgādupasthitāyāḥ śruterapi tadapekṣatvena viniyojakatvasyābhidhānāt prāsaṅgikīṃ pādasaṅgatimataeva tathaivānantarasaṅgatiñca spaṣṭatvādanullikhyāprakṛtamātragrahaṇakoṭiṃ kaiścit bhrameṇoktāṃ nirasitumavaśyavaktavyaṃ saṃśayaṃ darśayati ------ kimiti //
aprakṛtamātragrahaṇapakṣo hi prakṛtānāṃ yātayāmatvāt viniyuktaviniyogāt vā grahaṇāsaṃbhave saṃbhavet, naca tadubhayamatrāsti; kuśā darvyādaya iti vacanenādoṣatvasmaraṇāt, puroḍāśakapālavat viniyuktaviniyogasyāpi saṃbhavācca /
ato 'prakṛtamātragrahaṇapakṣasyāyuktatvaṃ prakṛtāprakṛtasādhāraṇyoktyā sūcitam //
tā eveti //
yadyapyāgneyyā upādeyatvāt tadgataikatvavivakṣayā na bahvīnāṃ karaṇatvaprasaktiḥ; tathāpi prakṛtāgneyībahutvamādāya athavā aindrī vaiṣṇavīti ṛgantarābhiprāyeṇa vā tā iti bahuvacanaṃ neyam /
tathāca yāḥ prakaraṇe paṭhitāḥ viśiṣya stotrāntare viniyuktā "agna āyāhi vītaya" ityādayaḥ tā evetyarthaḥ //
pūrvapakṣopapattimāha -------- āgneyīpadasyeti //
tṛtīyāyāḥ prakṛtagrahaṇe 'virodhe 'pi prātipadikaśruteraviśeṣapravṛttāyāḥ saṃkocarūpabādhāpattisūcanāya āgneyīpadasyetyuktam /
āgneyyā kariṣyamāṇoddeśyatvāśaṅkānirāsopodbalanāya prāptopasthānavidhisūcanāyaca viśiṣṭavidhyanyathānupapattiprasūtaviśeṣaṇavidhividheyatoktyā upādeyatvaṃ sūcitam //
taddhitāntatvādveti //
āgneyīśabdasya taddhitāntatvāt tasyaca sarvanāmārthavṛttitvena sannihitavyaktivācitvāt nāprakṛtagrahaṇamityarthaḥ /
atra nyāyasudhākārādibhiḥ agnidevatyatvaṛktvasannihitatvādīnāṃ mantraviśeṣopalakṣaṇatvādekena copalakṣaṇena prākṛtakāryasiddhāvupalakṣaṇāntarānapekṣaṇādagnidevatyaṛktvayoḥ śrutatvāviśeṣeṇa ubhayorapyupalakṣaṇatvepi vigrahavākyasthasarvanāmagamyatvena vilambitapratītikatvādavivakṣāvagateḥ sarvagrahaṇamiti samāhitam, tatsannihitatvopalakṣitavyaktiviśeṣasyāpi guṇādhikaraṇe taddhitavācyatvaprasādhanādṛktve'pi strītvānumeyatayā vilambitapratītikatvasya tulyatayā sannihitatvasyopalakṣaṇatvopapatteriti kaustubhadarśitarītyā ayuktaṃ matvā tadaṅgīkṛtyāpi pariharati -------- taddhitasyeti //
pūrvoktanyāyasudhākṛdabhihitasamādhidūṣaṇaṃ tadvācitve 'pītyapinā sūcitam //
yatheti //
atraca sarvanāmaśravaṇābhāvāt brāhmaudanikāgnisaṃskārakahomaśeṣaudanapratipattyarthatayā ṛtviksaṃskārārthatvābhāvena tannāśe punarbhojanānuṣṭhānādarśanenaca teṣāmuddeśyatvānupapattyā prakṛtagrahaṇe pramāṇābhāva ityarthaḥ //
nanu evaṃ prakṛtagrahaṇe niyāmakāntarābhāve 'pi aprakṛtagrahaṇe tasyā āgnīdhropasthānasvarūpārthatvenā'narthakyāpatterapūrvārthatvakalpanasyāpyāvaśyakatvāt kṛptāpūrvārthatāyāḥ prakṛtāyā evāgnīdhropasthāpanarūpadvārāntarasaṃbandhamātrakaraṇena lāghavāt tadupajīvividhiśrutyāca prātipadikaśruterapi saṃkocopapatteḥ prakṛtagrahaṇopapattirityabhipretya śaṅkate ------- naceti //
prakaraṇena svatantravākyāntarakalpanayā prakṛtāyā apūrvārthatvabodhāsaṃbhave kena tarhi tasyāstadbodha ityapekṣāyāṃ yatra yaduddeśena viniyogaḥ tatra apūrvasādhanatvalakṣaṇāyā uddeśyavācakapadāṅgīkāreṇa ityuttaramaprakṛtāyāmapi samānamityāśayenāha --------- ato lāghavāditi //
evaṃ tāvat prakṛtāprakṛtānāṃ grahaṇaṃ prasādhyādhunā kaiściduktamaprakṛtamātragrahaṇamapi yuktyā pūrvapakṣe sādhayati --------- aprakṛtānāmeva veti //
puroḍāśakapālasya ananyathāsiddhavācanikaviniyogabalāt nirākāṅkṣasya viniyuktasyāpi viniyogo 'gatyā āśritaḥ, prakṛtetutena rūpeṇa viniyogābhāvādanyathānupapatteśca kṣīṇatvānna yuktaṃ viniyuktanirākāṅkṣaviniyogāśrayaṇamiti ubhayākāṅkṣyā dāśatayīto 'prakṛtagrahaṇameva nyāyyam //
vastutastu -------- tasyā api vācastomādau viniyogena kāryasākāṅkṣatvābhāvāt ākāṅkṣotthāpakakramasamākhyādirūpasāmānyasaṃbandhabodhakapramāṇena yasyāḥ sāmānyataḥ kratusaṃbandho 'vagataḥ tasyā yāvalliṅgena viniyogakalpanam tataḥ pūrvamevānayā śrutyā viniyogenāprakṛtamātragrahaṇamupapādanīyam /
yadyapi tathābhūtāstotrāṅgabhūtāpi āgneyī bhavati; tathāpi tasyāṃ stotra eva nirākāṅkṣatvānna grahaṇamityāśayaḥ //
siddhāntamāha --------- aprakṛteti //
yadyapi upasthānāṅgatvena mantrasya vidhānāt tatsvarūpecānarthakyaprasaktāvapūrvasādhanatvalakṣaṇā; tathāpi sarvatrāpūrvasādhanībhūtāṅgoddeśenāṅgavidhāvarthādapūrvārthatvenāpi tadvidhānamanyathānupapattyā vidhikalpanayā āvaśyakam, tadetadavaghātavidhāvagatyā aṅgīkṛtam, prakṛtetu aprakṛtagrahaṇe cāpūrvasaṃbandhasya tatsādhanasaṃbandhasyaca ubhayasyāpi śrūyamāṇena vidhinā śrutyarthābhyāṃ karaṇe gauravāpatteḥ prakṛtagrahaṇecāpūrvasaṃbandhasya kḷptatvāt kevalamapūrvasādhanībhūtasaṃbandhamātrakaraṇena lāghavopapatteḥ tadgrahaṇasyaivalāghavopajīvinā vidhinānumatatvāt pradhānabhūtavidhiśrutyanurodhena prātipadikaśruteḥ saṃkoce 'pi bādhakābhāvena prakṛtamātragrahaṇasiddhirityarthaḥ //
nanu upasthānāṅgabhūtāyāḥ prakṛtāyāḥ kathaṃ jyotiṣṭomāpūrvasaṃbandhasaṃbhavaḥ? tasyāḥ stotradvārā tatsaṃbandhādato 'syāstadapūrvasaṃbandhavidhikalpanamāvaśyakamityata āha --------- saṃbhavati ceti //
stotradvāreha tadasaṃbhave 'pi upasthānarūpakāryāntaradvārā jyotiṣṭomāpūrvasaṃbandhasaṃbhavānna tadapūrvasaṃbandhāyogyatvam /
ataeva ------- yadyapyapūrvasaṃbandhaḥ svakalpakena viśiṣyopasthitena ca kāryāntarasaṃbandhena nirākāṅkṣaḥ; tathāpi tadā'kāṅkṣayaiva tadupajīvanaṃ nānupapannaṃ iti bhāvaḥ //
nanu prakṛtāgneyīmantrasya stotrāpūrvasaṃbandhakḷptāvapi upasthānajanyāpūrvasaṃbandhasya dvāratayā kalpanāvaśyakatvena gauravaṃ siddhānte 'pyaviśiṣṭamevetyākṣepaṇīyāpūrvasaṃbandhasya kāryāntarārthamapyanyatra niyamena kḷptau tanmātropajīvanenānyatra kāryāntarasaṃbandhamātrakaraṇamityetadadhikaraṇanyāyasya kathamāgneyīvākye pravṛttyā prakṛtaniyamasiddhirityata āha -------- āgneyīnāmiti //
upasthānajanyāpūrvasaṃbandhakalpanāvaśyakatve 'pi na taddvārā jyotiṣṭomasaṃbandho 'pi kalpyaḥ prakṛtagrahaṇe āpatati; stotraṃ vināpi tatsaṃbandhasya pāṭhādeva siddheḥ; ataḥ stotrāpūrvadvārakatvamātrakalpanavadihāpi upasthānajanyāpūrvadvārakatvamātrasyaiva kalpanādaprakṛtagrahaṇetu tasyāpi kalpanāpatteḥ gauravamityevamākṣepaṇīyāpūrvasaṃbandhasya kḷptatvamupapādanīyamityarthaḥ //
brahmodanaprāśanavākye 'pi brahmodanaprāśanāṅgabhūtabrāhmaṇavidhau prāśanasya pratipattitvena dṛṣṭārthatvādādhānādyapūrvasādhanalakṣaṇayā tatra tadapūrvasaṃbandhasya dṛṣṭārthatvādādhānādyapūrvasādhanalakṣaṇayā tatra tadapūrvasaṃbandhasya ṛtvijāṃ prayogāṅgatvena nityaprāptatvāt prakṛtagrahaṇopapattirityabhipretyāha ------ ayameva ceti //
niyamenāprāpteriti //
tatra niyamataḥ prāptyabhāvena vidhiśruterapūrvasaṃbandhākṣepakatvasyāvaśyakatvānna kadācit prakṛtasattve 'pi tanniyama ityarthaḥ //
āyataneti //
"vinā eṣa indriyeṇa vīryeṇa vyṛdhyate yasyāhitāgneragnirapakṣāyati taṃ saṃbharedidanta ekami"ti vacanena yajamānīyendriyavīryanāśarūpadoṣāpādakāyatanabahirbhāvarūpāpakṣaye prāyaścittavidhānāt bahirbhāvasyāyoga ityarthaḥ /
siddhāntamupasaṃharati --------- ata iti //
prayojanaṃ spaṣṭatvānnoktam //
yājñikāstu --------- āgneyakṛṣṇargrīvapaśukramāmrātena agne yanasupathetyāgneyīmantreṇābhimarśanamācaranti nopasthānam, tatrāgneyyarcāgnīdhramabhimṛśediti taittirīyaśrutireva pramāṇaṃ draṣṭavyam //
ityaṣṭamamagneyīprakṛtaniyamādhikaraṇam //
(adhikārādhikaraṇam) <B3> (1) saptamyantādvatiḥ /
<B1> (9 adhikaraṇam / ) (a.3 pā.2 adhi.9) liṅgasamākhyānābhyām //
some ------ "bhakṣe hi māviśetyā" dirbhakṣānuvāka ityevaṃ samākhyāto mantraḥ śrutaḥ /
tatra yastāvadasyāṃśo bhakṣaṇameva pratipādayati sa tatraiva viniyujyate, grahaṇāvekṣaṇasamyagjaraṇapratipādakānāṃ tvaṃśānāṃ kiṃ grahaṇādāveva viniyogo 'thavā bhakṣaṇamantraikavākyatayā bhakṣaṇa eveti cintāyām -------- grahaṇāderavihitatvenāpūrvaṃ pratyaṅgatvavajjanakatvasyāpyabhāvādgrahaṇasyārthādbhakṣaṇajanakatvena pakṣaprāptāvapi bāhubhyāṃ sadhyāsamityanenoktasya bāhudvayakaraṇakasya grahaṇasya kathamapyaprāpteravekṣaṇasya ca bhakṣājanakatvenaivāprāpteḥ samyagjaraṇasya tadanukūlavyāpārasya vā bhakṣottarabhāvitayā bhakṣājanakatvena teṣāmapūrvaprayojakatvasyāpyabhāvādgrahaṇādyarthatve ānarthakyāpatteḥ bhakṣaṇamantraikavākyatayā bhakṣaṇārthatvamevaiṣām /
ataeva samākhyāpyupapannā bhavatīti prāpte --------- grahaṇādipratyakṣavidhyabhāve 'pi samākhyāsahakṛtāvāntaraprakaraṇena bhakṣasaṃbandhe tattanmantrāṇāmavagate liṅgabalena māntravarṇikagrahaṇādividhikalpanayā tatprāptyupapattestadarthatvenaiva mantraviniyogopapattau na svato nirākāṅkṣayordvayorākhyātapadayoḥ kathañcidekavākyatāṃ parikalpya gauṇyā bhakṣārthatvakalpanam śaktyaiva vā bhakṣaviśeṣaṇatvena grahaṇādiprakāśakatvakalpanamupapattimat /
nacaivamapi samyagjaraṇasya kṛtyasādhyatvānna vidhisaṃbhavaḥ; samyagjaraṇānukūlavyāpārasyāsanaviśeṣasyaivānuṣṭheyasya vidheyatvāt /
vamanavirekanimittaprāyaścittāmnānācca samyagjaraṇaparyantameva bhakṣaṇaṃ pratipattiriti tasya bhakṣopayogitā // 24 // 9 // iti navamaṃ liṅgasamākhyānādhikaraṇam //
<B2> ityādiriti //
ādiśabdena vicāraviṣayatayā āvaśyakasya "dīrghāyutvāya śantanutvāya rāyaspoṣāya varcase suprajāstvāyehi vaso purovaso priyo me hṛdosyāśvinostvā bāhubhyāṃsadhyāsaṃ nṛcakṣasaṃ tvā deva soma sucakṣā avakhyeṣam /
hinva me gātrā harivo gaṇānme mā vitītṛṣaḥ /
śivo me saptarṣīnupatiṣṭhasva yā me vāṅmābhimatigāḥ /
mandrābhibhūtiḥ keturyajñānāṃ vāgjuṣāṇā somasya tṛpyatu ------- vasumadgaṇasya rudravadgaṇasyādityavadgaṇasya somadevate matividaḥ prātaḥsavanasya mādhyandinasya savanasya gāyatrachandasaḥ triṣṭup chandaso jagacchandaso 'gnihuta indrapītasya narāśaṃsapītasya pitṛpītasya madhumata upahūtasyopahūto bhakṣayāmi" ityantasya bhāgasyopādānam /
etacca bhāṣyalikhitakrameṇa likhitam /
taittirīyaśākhāyāntu avakhyeṣamityasyāgre mandrābhibhūtirityādi bhakṣayāmītyantaṃ paṭhitvā hinva me iti paṭhitam /
pūrvapakṣopayogitayā ityevaṃ samākhyāta ityuktam /
tatra sarvasyāpyudāharaṇatāśaṅkānirāsāya viṣayaṃ vivinakti ------ tatreti //
mandrābhibhūtirityādi juṣāṇetyantasya tṛptyā asya phalaprakāśanapūrvakaṃ bhakṣaṇaprakāśanārthatvasya spaṣṭatvāt tṛpyatvityantasya bhakṣaṇaprakāśakatvasya uttarādhikaraṇe sādhayiṣyamāṇatvācca vasumadādeśca liṅgasamākhyābhyāṃ nirvivādameva "abhiṣutyāhavanīye hutvā pratyañcaḥ paretya sadasi bhakṣān bhakṣayatī"ti vihitabhakṣaṇāṅgatvam /
tadgatānāñca prātaḥsavanādiśabdānāṃ tathā indrapītādiśabdānāṃ ca sūktavākavibhāgādhikaraṇanyāyena tadvadeva yathāsavanaṃ viniyogasya spaṣṭatvamiti nodāharaṇatvamityarthaḥ /
aṃśānāmiti //
"bhakṣehime" tyādeḥ "sadhyāsami" tyantasya grahaṇe "nṛcakṣasami"tyādera "vakhyeṣami" tyantasya avekṣaṇe "hinva me"tyādeḥ "atigā" ityantasya samyagjaraṇe ityevamaṃśānāṃ viniyoga ityarthaḥ /
tatra siddhānte yathāliṅgaṃ viniyogāt tadupayogyuddeśyatāvacchedakanirūpaṇāt pādādhyāyasaṅgatī tathā pūrvādhikaraṇe kratusaṃbandharahitadvārasaṃbandhānupapatteḥ prakṛtagrahaṇe ukte prakṛte sarvathāvihitagrahaṇāderapūrvasaṃbandhābhāve dvāratvābhāva ityevaṃ pūrvapakṣotthānāt pratyudāharaṇarūpāṃ anantarasaṅgatiñca spaṣṭatvādanuktvā pādādhyāyasaṅgatyoratispaṣṭatvaṃ prathamataḥ siddhāntakoṭyupanyāsena sūcayan sandehaṃ darśayati ------- kimiti //
grahaṇādyarthatve liṅgamātrasattve 'pi grahaṇādisvarūpārthatve mantraniyamasyānarthakyāpatteḥ teṣāmavihitatvenāpūrvaṃ pratyaṅgatvasya janakasya vābhāve tadapūrvasādhanatvalakṣaṇayā ānarthakyaparihārānupapatterna tadaṅgatvena mantraviniyogo yuktaḥ, apitu vihitabhakṣaṇāṅgatayaivetyabhipretya pūrvapakṣamāha ------- grahaṇāderiti //
bhakṣājanakatvenaiveti //
grahaṇaṃ vinā bhakṣaṇāsaṃbhavena tasya pakṣaprāptasaṃbhāvanāyāmapi avekṣaṇasya loke niyamatastajjanakatvāvikḷpteḥ sarvathaivāprāptirityarthaḥ //
bhakṣottarabhāvitayeti //
naca ------- bhakṣottarabhāvibhakṣaṇajanyaphalaprakāśanadvārā aganmetyādimantrasya darśapūrṇamāsāṅgatvamiva bhakṣaṇāṅgatvamiti ------- vācyam; kavalasaṃyogarūpabhakṣaṇasya bhakṣyamāṇapratipattirūpatayā samyagjaraṇaphalakatvābhāvāditi bhāvaḥ //
bhakṣamantraikavākyatayeti //
satyapyākhyātabhede upakramopasaṃhāraikye satyekavākyatāprayojakībhūtākāṅkṣāsattvasya vaiśvānaravākye darśanādatrāpi bhakṣehītyādinā bhakṣaṇasyaivopakramāt bhakṣayāmītyantena tasyaivopasaṃhārādupakramopasaṃhāraikyapratīterekavākyatāprayojakībhūtākāṅkṣārūpaliṅgāt grahaṇāvekṣaṇasamyagjaraṇaviśiṣṭatvena athavā bhakṣaṇalakṣaṇayāvā bhakṣārthatvamityarthaḥ /
evaṃ laukikaviniyogāsaṃbhave pūrvoktaikavākyatārūpaliṅgopaṣṭabdhayā durbalayāpi samākhyayā viniyoge virodhābhāva ityāha --------- ataeveti //
yadyapīyaṃ laukikī; tathāpi anāditvāt bhakṣasaṃbandhabodhe niyāmakatayā yogyatvādaṅgatvaṃ gamayantyupapannā bhavati /
itarathā bhakṣābhakṣasamudāyāśrayeṣu liṅgasamavāyena gauṇīvṛttirāśrayaṇīyā bhavedityarthaḥ /
ato yadyapi "bhakṣehītyādriyamāṇaṃ pratīkṣya" " aśvinostvā bāhubhyāṃsadhyāsamiti" pratigṛhyetyāpastambasūtre pratīkṣaṇe bhakṣehītyayamaṃśo viniyuktaḥ; tathāpi pratīkṣaṇaliṅgakatvāpratīterayuktaṃ taditi matvā sarvasyāpyanuvākasya bhakṣāṅgatvamabhipretya pūrvapakṣamupasaṃharati -------- iti prāpta iti //
yadyapi cātra upakramopasaṃhāraikyādekavākyatopagamanarūpaṃ kḷptaṃ bhavet; tathāpi grahaṇādiprakāśakamantrabhāgasya bhakṣaṇāṅgatvaṃ vākyenaiveti tasya prabalena liṅgena bādhopapattiḥ /
vastutastu ------- upakramasya sādhāraṇatvāt pratyuta mukhyasāmarthyānurodhena grahaṇādiviṣaya evopapatternātrākhyātabhede satyekavākyatvamapi /
naca dīrghāyutvāyetyasya bhakṣaṇaphalapratipādakasya grahaṇe 'nanvaya eva bhakṣaṇārthatvatātparyagrāhakaḥ; tasya grahaṇaphalībhūtabhakṣaṇaphalapratipādanena stāvakatayānvayopapatteḥ, ato liṅgenaikavākyatābhaṅgāt grahaṇādyaṅgatvamevetyabhipretya siddhāntaṃ pratipādayan ānarthakyaparihārāya prathamato grahaṇādividhiṃ sādhayati ------ grahaṇādīti //
kalpakamantrasya bhakṣāṅgatvāt tatkalpyavidhivihitagrahaṇādīnāmapi bhakṣāṅgatvasiddhirityarthaḥ /
tadarthatvenaiveti //
yadyapi sadherhiṃsārthatvāccakṣiṇau bhāṣaṇārthatvāddhinotergatyarthatvānna grahaṇāvekṣaṇasamyagjaraṇaprakāśanaliṅgataiṣāṃ saṃbhavati; tathāpi bījatantusantānārthanirvapatineva bāhudbayakaraṇakahiṃsāvinābhāvāt bāhukaraṇatvārhatayā ca lakṣaṇayā grahaṇapratipādakatvam /
cakṣiṅaḥ khyāñityanena vihitasya khyāñādeśasyāniṭtvena khyeṣamiti rūpāsiddhāvapi chandasi dṛṣṭānuvidhitvena khyeñityupasaṅkhyānakaraṇāt sic bahulaṃ leṭīti sickaraṇāśrayaṇāt vāgviṣayavyaktatākhyaprakāśanavācināpyavakhyeṣamityanena loke khyāta ityādau vede ca nṛṣu khyāyata iti nṛcakṣā ityevamihaiva sarvajñātatvarūpaprasiddhyākhyaprakāśanamātre prayogāttatpareṇa satā sucakṣuṣṭvācisucakṣuḥ padaikavākyatāvaśāt cākṣuṣajñānākhyāvekṣaṇarūpaprakāśanapratipādanamaviruddham /
hinoteśca prīṇane 'pi prayogāddhinvetyanena he haritavarṇa soma me gātrāṇi prīṇaya gaṇānindriyagaṇān vedabhāṣyakāralekhanāt putrādīn vā somapānaviṣayatṛṣṇārahitān mā kuru śivaḥ san me saptarṣīn āsyasaptamacakṣurnāsāśrotrākhyadvandvadvayarūpaśīrṣa ṇyacchidrasañcārisaptaprāṇākhyānupatiṣṭhasva vāknābhimatikramya mukhavāyumārgeṇa mā gā ityarthāvagamāt samyagjaraṇaṃ vinā tadanupapatteḥ gātraprīṇanaphalībhūtasamyagjaraṇapratipādakatvañca saṃbhavatīti tadarthatvenaiva viniyoga ityarthaḥ /
yadyapyagnaye juṣṭamiti mantrasya devatānirvāpaprakāśakatvavadasyāpi grahaṇādiviśiṣṭabhakṣaṇaprakāśakatvāṅgīkāreṇa mantraikatvamabhyupagamyāpi grahaṇānaṅgatvaṃ śakyate vaktum; tathāpi upakramopasaṃhāraikyādirūpaikavākyatopagamanasāmarthyābhāve svarasataḥ pratīyamānatattadākhyātagatamukhyaviśeṣyārthakatvabādha eva pramāṇābhāvo mantrabhedāṅgīkāre kathaṃ cicchabdena sūcitaḥ /
vamanavireketi //
"somaindraṃ caruṃ nirvapet śyāmākaṃ somavāmina" iti samyagjaraṇābhāvanimittavyaṅgatāsamādhitsayā vamane prāyaścittasya vireke 'pi kvacit prāyaścittasya cāmnānāt bhakṣaṇasya udasthāpanarūpapratipattyarthatvāvagamena tasya samyagjaraṇaṃ vinānupapatteḥ tadanukūlāsanaviśeṣasya vidheyasya bhakṣopayogitetyarthaḥ /
etena -------- tṛptivadānuṣaṅgikatayā ananuṣṭheyatvānna mantrāpekṣā iti ------- apāstam; grahaṇādivat pṛthakprayatnānuṣṭheyatvena tadapekṣopapatteḥ /
evañca bhakṣānuvākasamākhyā sākṣāt paraṃparayā ca neyeti bhāvaḥ //
prayojanaṃ pūrvapakṣe grahaṇādeḥ na niyamaḥ /
mantrapāṭhakrameṇa pāṭhānte bhakṣaṇaṃ siddham /
siddhānte grahaṇādeḥ naiyatyena pūrvoktatattanmantrānte anuṣṭhānam /
bhāṣyalikhitamantrapāṭhakramasya arthakrameṇa bādhāt mandrābhibhūtirityasyānantaraṃ hinva ma iti mantrapāṭhaśceti spaṣṭatvānnoktam //
iti navamaṃ bhakṣamantrasya grahaṇādyaṅgatādhikaraṇam (liṅgasamākhyānādhikaraṇam) //
<B1> (10 adhikaraṇam / ) (a.3 pā.2 adhi.10) guṇābhidhānāt //
tasminnevānuvāke mandrābhibhūtirityādistṛpyatvityantastṛptau viniyoktavyo grahaṇādāviveti prāpte ---------- grahaṇādivadanuṣṭheyatvābhāvāttṛpteraprakāśyatvam /
naca samyagjaraṇavattṛptyanukūlavyāpārarūpabhakṣaṇa- bāhulyākṣepakatvam; alpaṃ bhakṣayatīti vacanavirodhena tatkalpanānupapatteḥ /
ataeva tṛpterbhakṣaṇenājananānna tasyāḥ svargavajjanyatvamātreṇa prakāśyatvopapattiḥ /
ataśca liṅgaviniyogāsaṃbhavātsatyapi ākhyātadvayasya svato nirākāṅkṣatve itikaraṇādhyāhāreṇa tṛpyatvityetadarthaṃ bhakṣayāmītyevaṃ bhakṣamantraikavākyatāṃ prakalpya svārthaviśiṣṭabhakṣaṇaprakāśakatvamevāṅgīkartavyam /
svārthaśca śrutyā tṛptireva /
tatprakāśanāṃśe cādṛṣṭārthatvam /
athavā lakṣaṇayā bhakṣaṇastutiḥ /
sarvathā na liṅgādviniyogaḥ // 10 // 25 //
iti daśamaṃ guṇābhidhānādhikaraṇam //
<B2> pūrvavat pādādhyāyasaṅgatī āpavādakīmanantarasaṅgatiñca spaṣṭatvādanuktvā pūrvoktānuvākagataikadeśaviṣayatvaṃ darśayan pūrvapakṣamāha --------- tasminneveti //
prāyaḥ spaṣṭārthamadhikaraṇāntam //
prayojanaṃ tu pūrvapakṣe vasumadgaṇasyetyādi bhakṣayāmītyantena bhakṣaṇaṃ kṛtvā pāṭhakramabādhenopariṣṭāt mandrābhibhūtirityādi tṛpyatvityantamantrasya pāṭhaḥ /
siddhāntetu yathā'mrānamiti spaṣṭam //
iti daśamaṃ mandrābhibhūtergrahaṇānaṅgatādhikaraṇam guṇābhidhānādhikaraṇam //
- - - - - - - <B1> (11 adhikaraṇam / ) (a.3 pā.2 adhi.11) liṅgaviśeṣanirdeśāt //
bhakṣamantraḥ kiṃ indradevatyābhyāsa evāṅgaṃ tadbhinnābhyāseṣvamantrakaṃ bhakṣaṇaṃ uta teṣūhenotānūhena veti cintāyām /
prakaraṇādbhakṣamantrasya sarvapradānārthatvāvagame 'pi indrapītasyeti liṅgenendradevatyapradānamātrāṅgatvam /
naca ------- indreṇa yasminsavane pīta iti bahuvrīhisvīkāreṇa somasambandhisavanaviśeṣaṇatvāṅgīkārālliṅgāvirodha iti ------ vācyam; padadvayalakṣaṇāpādaka -------- lakṣaṇānanugata -------- vyadhikaraṇabahuvrīhyapekṣayā pūrvapada eva saṃbandhilakṣaṇāpādakasya lakṣaṇānugatasyendreṇa pītaḥ svīkṛta ityevaṃ tatpuruṣasyaiva laghubhūtatvāt /
vidyante ca devatāyāḥ pratigrahābhāve 'pi devasvaṃ na gṛhṇīyādityādivacanabalena saṃbandhaviśeṣarūpaḥ svīkāraḥ /
naca sthūlapṛṣatīpadavatsvarādeva bahuvrīhitvanirṇayaḥ; tadvadiha samāsasya lakṣaṇānugatatvābhāvena svarasyaiva bādhyamānatvāt /
yathāca tatpuruṣapakṣe 'pi svarāvirodhastathā kaustubha evopapāditam /
ataśca liṅgādindradevatyapradāna eva mantrasyāṅgatvāvagamādanaindrāṇāṃ ca, karmaṇa ekatvena prakṛtivikārabhāvābhāvādūhānupapattervrīhīṇāṃ medhaiti vadanaindrāṇāmamantrakaṃ, bhakṣaṇamityādyaḥ pakṣaḥ /
dvitīyastu satyapi karmaikatve pradānānāṃ bhinnatvādaviruddhaḥ prakṛtivikārabhāvaḥ /
indrāya tvā vasumata ityādimānagrahaṇamantrāṇāṃ ca liṅgādindramātraviṣayatvāttadanurodhena ca tatprakāśyayormānagrahaṇayostatsaṃskāryasya somasya tatsaṃskārāṇāṃ cābhiṣavādīnāṃ tanmiśrāṇāṃ cāṅgāntarāṇāmaindramātraviṣayatvapratīteritareṣāmadharmakāṇāṃ yukto 'tideśaḥ /
bhavati cāṅgavaśenāpi pradhānasaṃkocaḥ; agnyādyanurodhena kratūnāmāhitāgniviṣayatvāt /
ataśca prakṛtāpūrvīyadevatāprakāśakasya bhakṣamantrasya kāryamukhena vikṛtāvāgatasya bhavatyeva yathādevatamūha iti /
evaṃ sthite 'ntarā cintā // 11 // 26 //
ityekādaśaṃ liṅgaviśeṣanirdeśādhikaraṇam /
(indrapītādhikaraṇam) <B2> atracānaindrapradāneṣu liṅgapramāṇakamantraviniyogasya siddhānte pratipādyasya pūrvapakṣadvaye 'pyanaṅgīkārāt pādādhyāyasaṅgatī prāsaṅgikīṃ cānantarasaṅgatiṃ spaṣṭatvādanuktvā tanmantrameva viṣayatvena darśayan saṃśayamāha -------- bhakṣamantra iti //
teṣūheneti //
etena -------- ūhapakṣasya pādalakṣaṇāsaṅgatatvānna svatantrakoṭitvam, apitvādyakoṭiphalībhūtasyānaindrāṇāṃ amantrakatvasyā'kṣepamātramiti nyāyasudhoktaṃ --------- apāstam; pūrvoktarītyā siddhāntyabhipretasya pakṣasya pratipakṣatayohopanyāsena saṅgatyupapatterasthāyipūrvapakṣaphalākṣepasya niṣprayojanatvācca /
ataḥ tasyāpi svatantrakoṭitvamityarthaḥ //
liṅgāvirodha iti //
anyadevatyasyāpi somasyoktavidhasavanasaṃbandhitvena prakāśanopapattestadavirodha ityarthaḥ /
padadvayeti //
tatpuruṣe pūrvapada eva saṃbandhini lakṣaṇā /
bahuvrīhau tu padadvaye 'pyanyapadārthalakṣaṇetipadadvayalakṣaṇāpādakatvam /
bahuvrīhāvekasminneva pade viśiṣṭārthalakṣaṇetarattātparyagrāhakamityaṅgīkāre 'pi lakṣyatāvacchedakagauravam; itarasya tātparyagrāhakasya vākyārthānvaye 'pi arthāt pratipadikatvamiti doṣaḥ /
yadyapi bahuvrīhāvanyapadārthe śaktiḥ; tathāpyavayavārthopasthitisāpekṣatvādanyapadārthopasthitestatra gauravam /
sarvathā tatpuruṣo laghubhūta evetyarthaḥ //
lakṣaṇānanugatatvamapi doṣamāha --------- ananugateti //
samānādhikaraṇānāṃ bahuvrīhiriṣyata iti kātyāyanasmaraṇāt vyadhikaraṇapadānāṃ tadanupapatteḥ "saptamīviśeṣaṇe bahuvrīhā" viti jñāpakabalāt kaṇṭhekāla ityādau saptamyantabahuvrīhyāśrayaṇe 'pīha tathā'śrayaṇe pramāṇābhāvātlakṣaṇānanugatatvam, tatpuruṣetu "kartṛkaraṇe kṛtā bahulami"ti anuśāsanaśiṣṭatvam //
kiñca mantrasya bhakṣaṇāṅgatānirvāhāya avaśyāpekṣite bhakṣaṇasya tatsaṃbandhinaḥ karmakārakasya somasya vā prakāśane prayojane tatpuruṣapakṣe saṃbhavati na bahuvrīhyāśrayaṇenāpradhānānākāṅkṣitasavanaprakāśanaparatvaṃ yuktamityarthaḥ //
nanu śabdasya devatātvāt kathaṃ svīkṛta ityarthopapattirityāśaṅkāṃ bahuvrīhāvapyavaśyāpekṣitaprakāreṇa pariharati ---------- vidyate ceti //
nanu nāyaṃ tatpuruṣaḥ; tathātve samāsasyeti sūtreṇāntodāttatvāpatteḥ, ādyudāttaṃ caitatpītapadam, indrapratipādakantu svata eva ādyudāttam, tathā sati bahuvrīhau prakṛtyā pūrvapadamiti sūtreṇa pūrvapadaprakṛtisvaravidhānāt samastameva padamādyudāttaṃ saṃpadyate /
ataḥ sthūlapṛṣatītyatreva svarāt bahuvrīhinirṇaye sati savanaparatvopapattirityabhipretyāśaṅkate -------- naceti //
bahuvrīherapi sāmānādhikaraṇyasaṃbhavena lakṣaṇānugatatvābhāvāt samāsasvarayoranyatarasyāgatikatve kalpanīye aṅgadharmatvāt svarasyaiva bādhyatvena tasyaiva chāndasatvakalpanayā nirvāho yuktaḥ, natu pradhānabhūtasvārthatyāga ityarthaḥ /
yathāceti //
"tṛtīyā karmaṇī"ti sūtreṇa karmaṇi ktānte upapade pare tṛtīyāntaṃ pūrvapadaṃ prakṛtisvaraṃ bhavatīti vidhānāt tathā "ktece" ti sūtreṇāpi tatsvaravidhānāt tatpuruṣapakṣe 'pi svarāvirodhaḥ kaustubhe upapādita ityarthaḥ /
ādyaṃ pūrvapakṣamupasaṃharati --------- ataśceti //
vrīhīṇāṃ medha itivaditi //
vrīhīṇāṃ medha ityasya yavaprayoga ivehānupapatterityarthaḥ /
anaindrāṇāmiti //
sāmānyoktyā camasapradhānaśeṣāṇāmiva grahapradānaśeṣāṇāmapyamantrakatvoktisūcanena mitrāvaruṇādidevatyahutaśeṣāṇāmamantrakam, tatrāpi pitṛpītasyetyādipadānāṃ taddevatyapradāneṣu prāptāvapi taditarapadānāṃ vibhajya viniyoge 'pi savanatrayepyaindrapradānānāmindrapītapadaprayogeṇa samantrakaṃ bhakṣaṇaṃ natvanyeṣāṃ pradānānāmityarthaḥ //
tatraindrapradānānāṃ prakṛtitvaṃ sādhayitumāha -------- indrāya tveti //
"indrāya tvā vasumate minomī"ti mānamantrasyādipadopāttasya "indrāya tvā vasumate gṛhṇāmī"ti grahaṇamantrasya ca indrapradānāṅgatvaṃ liṅgāt pratīyate ityaviśeṣapravṛttasomavākyamapi tanmātraviṣayamevetyarthaḥ /
aṅgavaśenāpīti //
mantrarūpāṅgavaśena mānagrahaṇādeḥ pradhānasya saṃkoca ityarthaḥ /
yathādevatamiti //
mitrāvaruṇapītasyetyādyūhitamantrapāṭhena samantrakaṃ teṣāmapi bhakṣaṇamityarthaḥ /
ūhapūrvapakṣanirāse sati tadviṣayottaravicārāsaṃbhavādanirasta eva ūhapakṣe avasaralābhāt pañcabhiradhikaraṇaistadviṣayaṃ viśeṣavicāraiḥ kartumantarāgarbhiṇīṃ kṛtvā cintāmārabhate ------- evamiti //
iti ekādaśaṃ liṅgaviśeṣanirdeśādhikaraṇam //
- - - - - - - <B1> (12 adhikaraṇam / ) (a.3 pā.2 adhi.12) punarabhyunnīteṣu //
savanamukhīyeṣu camaseṣvaindreṣu sarveṣu huteṣu ye hotṛkāṇāṃ maitrāvaruṇādīnāṃ camasāsteṣvabhakṣiteṣveva punaḥ somo 'bhyunnīya devatāntarebhyo mitrāvaruṇādibhyo hutvā bhakṣyate /
tatra pūrvapradānadevatābhūta indro 'pyupalakṣaṇīyo na veti cintāyām -------- unnayanakāle na devatāntaroddeśaḥ, yenonnītasyaiva tatsaṃbandhāt pūrvaśeṣasya pūrvadevatāsaṃbandho nāpeyāt, pradānakāle tu saṃsṛṣṭasyaiva devatāntarasaṃbandhātpūrvadevatāsaṃbandhāpanayapratīternopalakṣaṇamiti prāpte -------- unnayanakāle devatāsaṃkalpābhāve 'pi sāmarthyādevonnayanasya kariṣyamāṇakarmārthatvapratīteḥ pūrvaśeṣasya saṃsṛṣṭatve 'pyetadarthatve pramāṇābhāvādanapanītasaṃbandhā pūrvadevatāpyupalakṣaṇīyā // 12 // 27 // iti dvādaśamabhyunnītādhikaraṇam //
<B2> atra bhakṣamantrasya liṅgādaindrapradānāṅgatvasya pūrvādhikaraṇapūrvapakṣoktasyākṣipya samādhānāt pādādhyāyānantarasaṅgatīḥ spaṣṭatvādanuktvā viṣayamāha --------- savanamukhīyeṣviti //
trayāṇāṃ prātaḥsavanādisavanānāṃ mukhe camasapradānāntarāpekṣayā ādau bhavāḥ savanamukhīyasaṃjñakāścamasapātrasthitasomarasaviśeṣāḥ teṣāṃ prātaḥsavane mādhyandinasavaneca śukrāmanthigrahottaraṃ pracāraḥ tṛtīyasavanetvādityagrahottaraṃ pracārastecānuṣṭhīyamānā hotṛbrahmodgātṛyajamānamaitrāvaruṇabrāhmaṇācchaṃsipotṛ- neṣṭrāgnīdhrācchāvākacamasā ityākhyāyante //
tatrahotrādīnāṃ caturṇāmṛtvijāṃ madhyataḥ kāriṇa ityākhyā /
avaśiṣṭānāṃ ṣaṇṇāṃ maitrāvaruṇaprabhṛtīnāṃ hotṛkā ityākhyā /
tatrācchāvākacamasena na navabhiḥ camasaiḥ saha prātaḥsavane homaḥ, kintu kālāntara iti taṃ vihāya navacamasān prathamamindrāya sakṛddhutvā tadanantaraṃ ye hotṛkāṇāṃ camasāsteṣu pūrvavaṣaṭkāre hutābhakṣitaśeṣasahiteṣveva droṇakalaśāt somāntaramabhyunnīya mitrāvaruṇādidevatāntarebhyo hutvā bhakṣyata ityanuṣṭhānakrame sati ye madhyataḥkāriṇāṃ camasāḥ teṣāmaindratvenohasyaivābhāvādviśeṣataśca punarabhyunnayanābhāvāt /
ataeva acchāvākacamasasyānaindratvenohaviṣayatve satyapi punarabhyunnayanābhāvānna vicāraviṣayatvaṃ prātaḥsavane /
uttarayostu savanayorabhyunnayanasattve 'pi mādhyandinasavane sarveṣāṃ pradānānāmindradevatākatvāt vakṣyamāṇarītyā ūhāviṣayatvānna tadviṣayatvam //
tṛtīyasavanetvindrāviṣṇudevatārthamabhyunnayanena devatābhedenaca tatsaṃbhavāt vicāraviṣayatvamastyeva /
ataeva prātaḥsavane 'pi brāhmaṇācchaṃsicamase punarabhyunnayane 'pi aindratvena pradānadvayasyāpi sānnāyyavatsaṃpratipannadevatākatvāt tantroccāritendrapītapadena devatādvayopalakṣitasomaprakāśanasiddherūhasyaivā- saṃbhavānna cintāviṣayatvam /
maitrāvaruṇapotṛneṣṭrāgnīdhrāṇāmeva caturṇāṃ ye camasāḥ yeṣu krameṇa mitrāvaruṇau marutastvaṣṭṭapatnyau agniriti devatāḥ teṣu saṃsṛṣṭaśeṣavatsu unnayanasyohasyaca saṃbhavādvicāra ityarthaḥ //
vicārasvarūpaṃ darśayati ---------- tatreti //
indro 'pīti //
pūrvoktacatasṛṇāṃ devatānāṃ vācakapadohena upalakṣaṇasattve 'pi indramitrāvaruṇādipītasyetyevaṃ prākṛtendrapadasahitapadohena upalakṣaṇīyo navetyarthaḥ //
saṃsargepi vāyavyaindravāyavasome grahaṇakālīnavivekamātreṇaiva budhdyā niṣkarṣopapattiṃ pūrvapakṣapratikūlāṃ nirasyati --------- unnayanakāla iti //
grahaṇakāle devatāsaṃyogasattvena niṣkarṣasaṃbhavepyunnayane tatsaṃbandhavidhānādarśanāt abhyunnītamātrasya devatāntarasaṃbandhe pramāṇābhāvena pūrvadevatāpanayopapatteḥ unnayanakāle na devatāntarasaṃbandha iti pūrvapakṣiṇaḥ pratijñā /
yena devatāntarasaṃbandhenetimūlārthaḥ /
tadevopapādayati --------- pradānakāle tviti //
tyāgakālīnasya yājyāmantravarṇakakalpyadevatāsaṃbandhasya saṃsṛṣṭaviṣayatvena niṣkarṣāyogāt devatāntarasaṃbandhena pūrvadevatāsaṃbandhāpanayānnopalakṣaṇīyaḥ //
naca --------- unnayanakāle devatāvidhyabhāve yājyāmantravarṇaiḥ yāgaśeṣatayaiva devatāprāpteravyaktatvabhaṅga iti ------- vācyam; uktavidhāvyaktatvāsaṃbhave 'pi utpattivākye avihitadevatākeṣṭibhinnayāgarūpasyaiva tasyāṅgīkāreṇa bādhakābhāvāt //
naca śeṣasyottaradevatoddeśena tyāge 'pi pūrvadevatāsaṃbandhasyāpi sattvāttadupalakṣaṇatvopapattiḥ; akṛte 'pi yāge yājñikānāṃ nirvāpaprabhṛti pratipattiparyantaṃ devatāntarasaṃbandhi haviriti vyavahārāt dravye devatāsaṃbandhasya pratipattināśyasyāvaśyakalpanīyasya dharmigrāhakapramāṇena devatāntarasaṃbandhavirodhitvāvagamāt tadatyantābhāvasamānādhikaraṇasyatatsāmānādhikaraṇyānupapatteravaśyaṃ śeṣasyottaradevatāsaṃbandhe pūrvadevatāsaṃbandhāpanayapratīternopalakṣaṇīya ityarthaḥ //
tyāgavelāyāṃ saṃsṛṣṭatvena vivekāpratītāvapi satyapicābhyunnayanakāle prakṛtau vikṛtau vā devatāsaṃbandhābhāve prakṛtāvunnayanasya dṛṣṭārthatvāt yāgīyadravyasaṃskārakatvāvagatervikṛtāvapi prākṛtonnayanānuvādena droṇakalaśāpādanakatvamātravidhānena prākṛtakāryavannayanāntaravidhānena vā punarabhyunnītasyaiva phalacamasahṛdayādivat yāgīyatvapratīteḥ pūrvaśeṣasyaca yāgīyadravyādhārapātrolakṣaṇatayā 'payasā maitrāvaruṇaṃ śrīṇātī"ti vihitapayasa iva abhyunnītasaṃskāramātratvāvagateruttarayāgārthatve pramāṇābhāvāt pūrvayāgīyahaviḥśeṣabhakṣaṇasya tantreṇānuṣṭhānānurodhādanapanītadevatāsaṃbandhādupalakṣaṇīyaiva pūrvadevatetyabhipretya siddhāntamāha ------- unnayanakāla iti //
atraca rikteṣu pātreṣu yena somapūraṇaṃ kriyate sa unnayanapadasyārthaḥ /
somaśeṣasahiteṣveva teṣu somāntarapūraṇaṃ yena kriyate sa abhyunnayanapadasyārthaḥ /
yadyapi ūhasyaindrapradānamātrasaṃbandhitvasya vā sthāyitvābhāvādetadvicārasyāsthāyinaḥ sthāyinā prayojanena na prayojanam /
ataeva uktamabhiyuktaiḥ ------- 'ākṣepe cāpavādeca prāptyāṃ lakṣaṇakarmaṇi /
prayojanaṃ na vaktavyaṃ yacca kṛtvā pravartate /
' iti; tathāpi etadvicārahetubhūtasya pūrvaśeṣavṛttyuttarayāgāṅgatvasadasadbhāvarūpavicārasya sthāyina udāharaṇāntare phalībhūtatvena uttarayāgakāle abhyunnītamātrasyaiva devatāsaṃbandhānusandhānānanusandhānarūpamavaśyavaktavyaṃ prayojanaṃ spaṣṭatvāt noktam //
iti dvādaśaṃ abhyunnītādhikaraṇam //
(abhyunnītapūrvadevatopalakṣaṇādhikaraṇam) - - - - - - - <B1> (13 adhikaraṇam / ) (a.3 pā.2 adhi.13) pātnīvate tu //
dvidevatyānāmaindravāyavādīnāṃ śeṣā ādityasthālyāmāgatya tato 'pyāgrayaṇasthālīmāgacchanti /
pātnīvataścāgrayaṇāt gṛhyate, tasminbhakṣyamāṇe dvidevatyā api upalakṣaṇīyāḥ /
pūrvavadāgrayaṇasyaiva patnīvaddevatāsaṃbandhāditi prāpte --------- pātnīvatamāgrayaṇādgṛhṇātītyapādānatvaśravaṇāt tasmādapetasya pātnīvatatvaṃ na tvāgrayaṇasyaiva; āgrayaṇavaccānāgrayaṇamapi saṃsṛṣṭatvāt tasmādapetamiti dvidevatyasyāpi devatāntarasaṃbandhena pūrvadevatāsaṃbandhāpāyāt /
bhūtapūrvagatyā ca prakṛtāvanupalakṣaṇānnopalakṣaṇīyāḥ // 13 // 28 //
iti trayodaśaṃ pātnīvate daivatyānupalakṣaṇādhikaraṇam //
<B2> atrāyamanuṣṭhānakramaḥ ----- prathamaṃ prātaḥsavane aindravāyavamaitrāvaruṇaśukrāmanthigrahapātreṣu dhārātaḥ somagrahaṇaṃ kṛtvā mahatyā dhārāyāstathāntaryāmapātragataśeṣadhārāyāścetyevaṃ dhārādvayenāgrayaṇasthālyā grahaṇaṃ kṛtvā khare (?) sarve te grahāḥ sthālīca āsādyate /
tataḥ kiyatā kālena bahiṣpavamānastotrottaramāśvinagrahaṇaṃ tataḥ prātaḥsavane pravṛtte pradānakāle aindravāyavamaitrāvaruṇāśvinapradānaśeṣasaṃpātamādityasthālyāṃ "riktāyāmeva ādityasthālyāṃ saṃpātamapanayatī"ti vacanāt savanīyādityasaṃjñakadārupātreṇa pidhāya sthāpyate /
tataḥ tṛtīyasavane grahaṇakāle ādityasthālīsthasya āgrayaṇasthasya āgrayaṇasthālyāṃ dhārayā grahaṇam /
tata ādityadārupātreṇa ādityasthālyā dvidevatyaśeṣasaṃpātaṃ gṛhītvā ādityebhyaḥ sa śeṣo hūyate /
tadīyaśeṣasyāgrayaṇasthālyāmapanayasya "ādityagrahasaṃpātāccaturthī" mitivacanāt caturthyā dhārāyā vidhānena śeṣābhāvānna bhakṣaṇam /
tata "upāṃśupātreṇa pātnīvatamāgrayaṇāt gṛhṇātī"ti vacanāt āgrayaṇasthālyāṃśeṣaṃ saṃsthāpya avaśiṣṭaṃ gṛhītvā sa śeṣaḥ patnīvate agnaye pradīyate /
tadāca etaccheṣasyānyatra viniyogābhāvāt bhakṣaṇaṃ samantrakam /
tamimamanuṣṭhānakramamabhisaṃdhāya viṣayaṃ darśayati ------- dvidevatyānāmiti //
aindravāyavādīnāmityādipadena maitrāvaruṇāśvinadevatānāṃ grahaṇavadindravāyupūrvatanavāyudevatāyā api grahaṇam; tathaivoddeśena yāgānuṣṭhānāt /
tatra pūrvādhikaraṇe savanamukhīyeṣu camaseṣu aindrapradānānāṃ prakṛtitvenetareṣāṃ anaindrāṇāṃ vikṛtitvaṃ kṛtvohacintāyāṃ prākṛtadevatāvācakapadaprayogasyāpi kartavyatayā sādhitasya idānīṃ samānanyāyāt graheṣvapyaindrānaindrapradānānāṃ prakṛtivikṛtibhāvāt patnīvadagnipītasyetyūhe devatāntarapadaprayogasyāpi prāptasyehāpavādakaraṇādāpavādikīmanantarasaṅgatimapādānabhūtāgrayaṇāpetatvarūpādvastusāmarthyādanāgrayaṇa- rūpasyāpi pūrvaśeṣasya prasaṅgataḥ pātnīvatayāgāṅgatvavicārāt pādādhyāyasaṅgatīca spaṣṭatvādanuktvā pūrvapakṣamāha ------- tasminniti //
dvidevatyapadaṃ vāyorapyupalakṣaṇam /
apinā patnīvadagnipītasyetyūhavidyamānatā sūcitā /
upalakṣaṇīyā iti //
vāyvindravāyumitrāvaruṇāśvinapatnīvadagnipītasyetyeva indramitrāvaruṇapītasyetivadūhenopalakṣaṇīyā ityarthaḥ /
atra cādityapātragataśeṣasyāpi pūrvoktarītyā'grayaṇasthālyāṃ sattvādādityo 'pyupalakṣaṇīya iti viśeṣaḥ prācīnairnavīnaiścānukto 'pi somanāthenoktaḥ //
atracāgrayaṇasthālyāṃ prātaḥsavane dhārādvayena gṛhītvā sāditāyāṃ yaḥ somaḥ sa "ye devāso divyekādaśasthe"ti mantreṇa gṛhītatvāt "te devā yajñamimaṃ juṣadhvami"ti mantraliṅgādyajñasaṃbandhitvenāvagatatvācca samastadevarūpadevatāsaṃbandhena tādṛgdevatyavaiśvadevagrahe śeṣatayā anvita iti tatra homaśeṣasyāgre viniyogābhāvena bhakṣaṇasyaiva prāptestaddevatāsaṃbandhāpanayasya spaṣṭatvānna pātnīvatabhakṣaṇe upalakṣaṇatayā prasaktiḥ /
yathāca vaiśvadevagrahe aṅgapradhānadevatānāṃ sarvāsāmeva devatātvaṃ tathā sūtrabhāṣyakārādibhiḥ dvādaśe prapañcitam /
saṃbhavati vā kṣīranīravivekavatībhiḥ viśvadevadevatābhiḥ sarvadevatāliṅgakamantragṛhītameva sarvasaṃbandhinaṃ somaṃ śeṣāntare satyapi svabhāgatvena svīkartum /
ataeva sādane "eṣa te yoniḥ viśvebhyastvā devebhya" iti mantragataṃ viśvadevārthasādanaliṅgam; tathāpi "viśve devāḥ śrṛṇutemaṃ havaṃ me ye antarikṣe ya upadyaviṣṭha /
ye agnijihvā uta vā yajatrā āsadyāsmin barhiṣi mādayadhvaṃ" iti yājyāmantreca grahaṇasamānadevatākamantraliṅgaṃ copapadyate /
nitarāṃ ca "avijñāto vā eṣa yadāgrayaṇa" ityarthavāde viśeṣato devatayā avijñātatvakalpanañca /
yadyapyāgrayaṇasthālyā na viśvebhyo devebhyaḥ pradīyate; tathāpi pātnīvatagṛhītāvaśiṣṭadevatyaśeṣasthāpanārthaṃ vyāpṛtatvāt tasyāścāgre droṇakalaśena gṛhītvā hāriyojanagrahapracārānuṣṭhānāt tatpātrāpradāne 'pi vacanāt pātrāntareṇa pradāne na ko 'pi doṣaḥ /
ato vaiśvadevahutaśeṣabhakṣaṇe savitrāderupalakṣaṇatvaprasaktāvapi pātnīvate tadīyaśeṣābhāvāt taddevatāsaṃbandhāpanayāt nopalakṣaṇīyā viśvadevadevatā iti nyāyasudhākāraḥ /
etadeva sarvamabhisaṃdhāya āgrayaṇadevatābhūtānāṃ viśveṣāṃ devānāmupalakṣaṇaṃ kasmānna cintyata ityāśaṅkya tadapanayasya niḥsandigdhatvādityeva parihārasūcanārthaṃ tata iti bhāṣyaṃ vyācaṣṭa ityuktaṃ nyāyasudhāyām //
evaṃ sthite yat prakāśakāraiḥ etadanūdya āgrayaṇasthālyā na kvāpi śākhāyāṃ viśvadevebhyo hūyate yatastasya viśvadevapītatvāt tataḥ pātnīvate 'pyānītasya viśvadevapītasyetyūhenopalakṣaṇāśaṅkodiyāt "ato 'nuṣṭhānamanālocya bahubhāṣī yadūcivān /
āśaṅkā ca samādhānamubhayaṃ tadasaṅgatami"ti dūṣitam, tadāgrayaṇasya sarvadevarūpadevatāsaṃbandhābhāve "te devā yajñamimañjuṣadhvami"ti mantraliṅgavirodhasya pracārāntare sarvadevatāsaṃbandhābhāvena duṣpariharatvāt tanmate 'pi anuṣṭhānavirodhaprasakteśca anavaratānucintya- mānadveṣyāropitabahubhāṣitvaguṇāveśādeveti viśvadevadevatāsaṃbandhāpanayanaspaṣṭatvahetukopekṣāvyājena pūjyapādaiḥ sūcitam /
pātnīvatasya pūrvamasiddheḥ karmatvenānvayāyogāt gṛhṇāteḥ karmākāṅkṣāyāṃ prasiddhāgrayaṇasyaiva pañcamyā karmatvalakṣaṇayā karmatvenānvaye sati āgrayaṇakarmakagrahaṇena pātnīvantaṃ kuryādityarthena āgrayaṇasthitamātrasyaiva abhyunnītamātre uttaradevatāsaṃbandhasyeva pātnīvaddevatāsaṃbandhapratīteḥ anāgrayaṇastharūpadvidevatyaśeṣasya saṃsṛṣṭasyāpi patnīvaddevatāsaṃbandhābhāvena pūrvadevatāsaṃbandhāpanayābhāva ityupapattimabhipretyāha ------- pūrvavaditi //
yadyapi karma na śrūyate; tathāpi apādānatvena śrutasya tattvenānvayāsaṃbhavāt lakṣaṇāyāñca pramāṇābhāvāt āgrayaṇādapetasyaiva upasthitatvāt pātnīvatamiti taddhitena parāmṛṣṭasya karmatvenānvayādapetatvasyaca saṃsṛṣṭamātre saṃbhavāt sarvasyaivottaradevatāsaṃbandhapratītestasya copapāditarītyā pūrvadevatāsaṃbandhāpanayaṃ vinānupapatteḥ tadāvaśyakatvāt nopalakṣaṇamityabhipretya siddhāntamāha --------- pātnīvatamiti //
nanu saṃbandhāpanayane 'pi bhūtapūrvagatyopalakṣaṇaṃ bhavatvityāśaṅkāṃ parihartumāha ------- bhūtapūrvagatyā ceti //
indrapīta iti bhūtārthakaktapratyayena vidyamānasaṃbandharūpaphalasamānakālīnavyāpārātītatvasyābhidhānāt tasyaca saṃbandhavidyamānatayaiva prakṛtāvupalakṣaṇādiha vidyamānasaṃbandhadevatayopalakṣaṇe aprākṛtakāryakāritvāpatterna tādṛśasyopalakṣaṇatvasaṃbhava ityarthaḥ //
//
iti trayodaśaṃ pātnīvate dvidaivatyānupalakṣaṇādhikaraṇam //
- - - - - - - <B1> (14 adhikaraṇam / ) (a.3 pā.2 adhi.14) tvaṣṭāram //
pātnīvata eva "agnā i patnīvāḥ sajūrdevena tvaṣṭrā somaṃ pibe"ti mantrāt tvaṣṭurapi devatātvam /
ataḥ so 'pyagnivadupalakṣaṇīya iti prāpte ---------- yuktamagnau patnīvacchabdasya yaugikatvena viśeṣyasākāṅkṣasya sāmānādhikaraṇyena viśeṣyagrāhakatvam, tvaṣṭustu tṛtīyayā sahabhāvamātraṃ pratīyate /
nacāsau pānakriyānvayāvyabhicārī; 'sahaiva daśabhiḥ putrairbhāraṃ vahati gardabhī' tyādau vyabhicārāt, satyapi pāne devatātvasyāprāmāṇikatvācca /
ataḥ pātnīvatamiti nirapekṣataddhitena patnīvato 'gnereva devatātvamiti sa evopalakṣaṇīyo na tvaṣṭā // 14 // 28 //
iti caturdaśaṃ pātnīvate tvaṣṭuradevatātvādhikaraṇam //
<B2> viṣayaṃ pradarśayati -------- pātnīvata eveti //
anenaca pātnīvatayāge tvaṣṭurdevatātvenāṅgatvavicārāt pādādhyāyasaṅgatī tathā tasmin pūrvaṃ dravye vicārite tatprasaṅgāt devatā vicāryata iti prāsaṅgikyanantarasaṅgatistvaṣṭurupalakṣaṇatvavicārāt ūhaprakaraṇasaṅgatiśca sūcitā /
prakṛtapūrvapakṣahetutvena anudāharaṇasyāpi mantravarṇasyoktiḥ /
agnā iti //
agne iti saṃbudhdyekārasya 'ecopragṛhyaḥ syāt dūrāddhūte pūrvasyārdhaḥ syāt uttarasyedutā' viti sūtreṇa pūrvārdhasya pluta ākāre uttarārdhasyacar ikāre ardhamātrike sati nirdeśaḥ /
ataeva ------- āgnā ityuttaraṃ trimātraplutatvābhivyañjakastṛtīyāṅko 'pi kvacit likhyate /
evañcāgna āri iti kvacit pustake pāṭho 'papāṭhaḥ /
yadyapi āpastambānāṃ pātnīvāḥ sajūrdeveti pāṭhamanusṛtya kaustubhe mantro likhitaḥ; tathāpīha vājasaneyināṃ pāṭhānurodhena pātnīvatsajūriti lekhane 'pi arthaikyānna kaścana doṣaḥ //
mantrāditi //
yadyapi patnīvanmātrasya devatātvaṃ taddhitenoktam; tathāpi patnīvacchabdasya yaugikasya nityaṃ viśeṣyasākāṅkṣatvādavaśyaṃ viśeṣyasamarpakamantravarṇe agneriva tvaṣṭurapisajūḥśabdena sāhityapratīteḥ pānasyaca devatātvaṃ vinānupapatteḥ devatātvenāvagatasya viśeṣyatvenānvayāt sopi upalakṣaṇīyaḥ /
tatraca dvayī gatiḥ /
bhinnapadopādānāt agnitvaṣṭrovyāsajyaviśeṣyatāyā asaṃbhavāt pratyekameva samuccayena viśeṣyatvāt yathā patnīvate agnaye tvaṣṭra idaṃ na mameti tyāgaḥ tathaiva bhakṣamantre 'pyūhena patnīvadagnitvaṣṭṛpītasyetyevaṃ athavā ------- mantre tvaṣṭṛsāhityaviśiṣṭasya agnerupādānādvidhāvapi tādṛśasyaiva viśeṣyatākalpanāt tathaiva tyāgāt patnīvattvaṣṭṛsahitāgnipītasyetyevamupalakṣaṇīya ityarthaḥ //
saṃbudhyantapatnīvacchabdasāmānādhikaraṇyena agnipadasyaiva viśeṣyasamarpakatvapratīteḥ tasyaiva devatātvamityabhipretya siddhāntamāha ------- yuktamiti //
agnāviti padottaraṃ devatātvamityanuṣaṅgaḥ //
naca ------ tyāgakālīnoccāraṇaviṣayatvarūpadevatātvasya taddhitārthatvāt tadanurodhenārthaparasyāpi prātipadikasya lakṣaṇayā śabdaparatvamaṅgīkṛtya śabdasya devatātvāt tyāgakāle arthānusandhānaṃ vināpi patnīvacchabdamātraprayogeṇa śāstrārthopapatteścaturthīprayoge pramāṇābhāve viśeṣyavācakapadaprayogasya kvopayoga iti -------- vācyam; arthapratyayānukūlacaturthyantapadoccāraṇasyaiva uddeśasya vṛddhavyavahāreṇa yāgaghaṭakatvāvagamena caturthyantapadoccāraṇavat śabdasyārthapratyayasyāpi āvaśyakatvena tatra viśeṣyāpekṣāyāṃ tadvācakacaturthyantaśabdoccāraṇasyāpi āvaśyakatvāt //
ataeva tyāgasya mānasatve 'pi uktavidhoddeśasya nirākāṅkṣatvasidhyarthaṃ tadvācakapadaprayogo 'pi saṃgacchata iti //
vyabhicārāditi //
putrāṇāṃ voḍhṛtvābhāve 'pi sāhityadarśanāt kriyānvayivyabhicāritvamityarthaḥ /
pātnīvatamityutpattivākye taddhitena prabalena patnīvanmātrasya devatātvapratītestasya viśeṣyāpekṣāyāṃ samānādhikaraṇapadaśrutyā agneḥ viśeṣyatvenānvaye sati sahabhāvaśrutyanyathānupapattikalpyasya devatātvasya daurbalyena kalpanānupapatteḥ tvaṣṭurdevatātvamaprāmāṇikamityāha ------- satyapīti //
siddhāntamupasaṃharat -------- ati iti //
agnirūpaviśeṣyasāpekṣatve 'pi nityasāpekṣatvāt taddhitotpattāvapi tvaṣṭṛsāpekṣatve pātnīvatamiti taddhitotpattyasaṃbhavāt nirapekṣasya patnīvata eva devatātvam /
tvaṣṭṛsāhityasyāgnistutyarthamupādānānna tvaṣṭopalakṣaṇīya ityarthaḥ /
sthāyivicāraprayojanaṃ spaṣṭatvānoktam //
iti caturdaśaṃ pātnīvate tvaṣṭuradevatātvādhikaraṇam //
(tvaṣṭradhikaraṇam) - - - - - - - <B1> (15 adhikaraṇam / ) (a.3 pā.2 adhi.15) triṃśacca //
tasminneva yājyāmantre, "aibhiragne sarathaṃ yāhyarvāṅ nānārathaṃ vā vibhavo hyaśvāḥ /
patnīvatastriṃśataṃ trīṃśca devānanuṣvadhamāvaha mādayasve" tyatra trayastriṃśatāṃ devatānāṃ patnīvacchabdasāmānādhikaraṇyādagnivadviśeṣyatvopapattermadaśravaṇācca pānopapatterdevatātvāvagamātteṣāmapyupalakṣaṇaṃ manyate /
agnermādayitṛtvaśravaṇātte 'gnidattena kāmaṃ bhādyantu yajamānastvagnaya eva dadātītyavagamāttasyaiva devatātvaṃ na trayastriṃśatām /
evaṃ ca pātnīvatamiti taddhito 'pyasati bahuvacanagrāhakapramāṇe ekavacanenaiva vigṛhīto bhavatītyapi lāghavam /
ato nopalakṣaṇīyāste // 15 // 29 //
iti pañcadaśaṃ trayastriṃśaddevāpatnīvattvādhikaraṇam //
<B2> pūrvavadeva pādādhyāyaprakaraṇasaṅgatī tathātideśikīmanantarasaṅgatiñca spaṣṭatvādanuktvā pātnīvatayāga eva adhikāśaṅkayā vicāraṃ darśayati ------- tasminneveti //
tāmevādhikāśaṅkāmāha ------ yājyāmantra iti //
he agne tvaṃ samānavarṇaṃ rathamāruhya ebhiḥ vakṣyamāṇaiḥ devaiḥ saha athavā ------- nānārathaṃ vā'ruhya yāhi //
vibhavo bahavo 'śvāstava santi /
tataścārvāṅ āgatyaca patnīvataḥ trīṃśca daivatānanuṣvadhaṃ somarūpānnapradānamanu āvaha tenānnena mādayasvetyagnītprayojyayājyāmantrasyārthaḥ /
aibhirityatra ā ebhiriti padacchedena ā ityupasargasya yāhītyanena vyavahitena anvayaḥ /
tataśca yathaivādhvaryavamantraiḥ viśeṣyatayā upādānāttasyaiva devatātvam, na tvaṣṭuḥ, tathaiveha agnivatrayastriṃśaddevatānāṃ sāmānādhikaraṇyādviśeṣyatvapratītestvaṣṭṛvailakṣaṇyāt devatātvasaṃbhavena pūrvapakṣaḥ /
tatra yadyapi tattanmantre ubhayorapi nairapekṣyeṇa patnīvacchabdasāmānādhikaraṇyāvagamānnairapekṣyeṇaiva viśeṣyatvāvagamastathāpi vidhāvubhayostātparyagrāhakasahakṛtapatnīvacchabdena yugapadabhidhānādupādeyasāhityasya vivakṣitatvādubhayoḥ samuccayopapattiḥ /
athavā ------ yājyāmantre agneḥ patnīvatpadasāmānādhikaraṇyābhāve viśeṣyamātrasyāgneḥ śravaṇādekavākyopādānena trayastriṃśaddevaiḥ saha samuccayopapattiḥ /
yadyapi yājyāmantrotarārdharce trayastriṃśaddevatānāmeva āvāhanapūrvasomadravyasaṃbandho 'vagamyate, agnestu pūrvārdharce āvāhanamādanakartṛtvena pariveṣṭṛtvamātrāvagaterna haviḥsaṃbandhaḥ; tathāpi ādhvaryavamantre tasyāpi tatsaṃbandhāvagamāt pākṣikamagnerapi viśeṣyatvamastu natvetāvatā trayastriṃśaddevānāṃ viśeṣyatve vivādaḥ, teṣāṃ yājyāmantre nityameva haviḥsaṃbandhāvagamādityarthaḥ /
trayastṛṃśitāṃ devatānāmiti //
te cāṣṭau vasavaḥ ekādaśa rudrāḥ dvādaśādityāḥ indraḥ prajāpatiśceti havirbhujo devā jñeyāḥ //
agneḥ mādayitṛtvaśravaṇādeva mantravarṇe agneḥ devatātvam, anyathā yajamānadravyasyānīśenāgninānyeṣāmādānāsaṃbhavāt /
ato yajamāno 'gnaye dadyāt sa cānyān mādayatītyarthenāgnistutyarthatvena mādayitṛtvakathanopapatterna teṣāṃ devatātvamityabhipretya siddhāntamāha------ agneriti //
siddhāntamupasaṃharati -------- ata iti //
atraca pūrvapakṣe ūhasattve 'pi patnīvadagnipatnīvattriṃśaddevapītasyetyevaṃprayogo natu nyāyasudhoktarītyāgnitrayastriṃśaddevapatnīvatpītasyeti; patnīvacchabdagataviśeṣyākāṅkṣayā paścāt kalpyamānadevatātvādagnyādyarthānāṃ viśeṣyabhūtatvena paścādeva padaprayojanasya yuktatvāt /
yadyapi cāgnā iti mantre viśeṣyasyāgneḥ pūrvaṃ prayogāt tadanurodhenehāpi tasya pūrvaṃ sa āpādyeta; tathāpi trayastriṃśaddevānāṃ tadabhāvādayuktaṃ teṣāṃ pūrvamabhidhānam //
vastutastu ------- utpattigatadevatāsamarpakapatnīvatpadākāṅkṣayāgneḥ paścādeva tatkalpanāt avagatadevatātvānurodhenaiva yuktaḥ prayogaḥ /
ataeva ------- agnaye patnīvata idamiti yājñikānāṃ tyāgānuṣṭhānamapi ------ nirastam /
evañca ------- patnīvatpītasyetyevaṃ siddhāntāviśeṣeṇaiva pūrvapakṣe prayogopapādanaṃ somanāthenoktaṃ ------- apāstam; satyapyutpattivākye patnīvattvena devatātve pūrvoktarītyā uddeśāṃśasya viśeṣyavācakapadaprayogaṃ vinā nirākāṅkṣatvābhāvāt yāgakāle avaśyoccāraṇīyasya patnīvadagnaya iti prayogasyevehāpi patnīvadagnipītasyetyevaṃvidhaprayogasyaivāpatteḥ /
ataeva patnīvabhdya idaṃ na mameti prayogaviśeṣasya pūrvapakṣe siddhānte ca patnīvata idaṃ na mameti prayogaviśeṣasyaca prayojanatvoktirapi tadīyā parāsteti nirāsasūcanapūrvakaṃ kṛtvācintāsthāyivicārayoḥ svābhimataṃ prayojanaṃ te iti bahuvacanaprayogeṇa tanniṣedhena ca sūcitam //
iti pañcadaśaṃ trayastriṃśaddevāpatnīvattvādhikaraṇam //
(triṃśadadhikaraṇam) - - - - - - - <B1> (16 adhikaraṇam / ) (a.3 pā.2 adhi.16) vaṣaṭkāraśca //
anuvaṣaṭkārayāgadevatāyā agnerdevatātvasya niḥsandigdhatvādupalakṣaṇam /
prakṛtau tvasau vidyamānāpi nopalakṣitā; anuvaṣaṭkārayāgasya somayāgātkarmāntararūpasya pūrvayāgīyasomapratipattibhūtasya kṛtsnavidhānatvenātideśākalpanāt, upadeśena kathañcidbhakṣaṇaprāptāvapi vrīhīṇāṃ medha iti vadaindramantrasya prāptyanupapatteśca /
ataśca vikṛtāvapi pradhānadevataiva tatkāryāpannopalakṣaṇīyā nānuvaṣaṭkāradevatā // 16 // 30 // iti ṣoḍaśamanuvaṣaṭkāradevatānupalakṣaṇādhikaraṇam //
<B2> anuvaṣaṭkārayāgo hi "agnaye anuyajatī"ti vacanena tantrasāradhṛtena jyotiṣṭomayāgābhyāsarūpavaṣaṭkārayāge agnidevatāyā anuśabdoktataduttaratvasyaca vidhāne vākyabhedāpatteḥ guṇāt karmāntarūpo vihitaḥ /
tatra "somasyāgne vīhītyanuyajatī"ti vacanāntareṇa mantravidhinā māntravarṇikasomadravye samarpite dharmāntarākāṅkṣāyāṃ prakaraṇāt jyotiṣṭomāṅgabhūte 'pi asmin vaimṛdhavat somadravyakatvasādṛśyāt tadīyavidhyantaprāpteratideśena somabhakṣaṇe tanmantreca prāpte vicāra ityabhipretyāha -------- anuvaṣaṭkārayāgeti //
atraca bhakṣaṇamantrasya aṅgatvānaṅgatvavicārāt ūhavicārācca pādādhyāyaprakaraṇasaṅgatayaḥ spaṣṭāḥ /
anantarātu māntravarṇikadevatāyā niḥsandigdhatvāt pūrvādhikaraṇavyutpāditādevatātvarūpānupalakṣaṇanyāya- pratyudāharaṇarūpeṇātra pūrvapakṣotthānāt pratyudāharaṇasaṅgatiriti nyāyasudhākāraḥ //
yattu ------ pūrvanyāyātyayena yatra pūrvasādhyābhāvaḥ siddhāntatayocyate tatraiva pratyudāharaṇasaṅgatiḥ; yatratu pūrvanyāyātyayena pūrvapakṣamātraṃ pūrvasādhyameva ca siddhāntaḥ tatrātideśikīti vyavasthāṃ tanmatadūṣaṇapūrvakaṃ mahatā prayatnena prasādhya pūrvasādhyasyaivasiddhāntitatvāt ātideśikīṃ saṅgatiṃ prakāśakārā āhuḥ, tat svayameva tatprakhyatadvyapadeśādhikaraṇādiṣu pūrvapakṣotthānamātreṇa sādhyaikye 'pi pratyudāharaṇasaṅgaterabhidhānena pūrvoktavyavasthāyāḥ pūrvāparaviruddhatvādetādṛśe viṣaye saṅgatidvayasāṅkarye 'pi bādhakābhāvāt vedāntādhikaraṇeṣvapyetādṛśavidhayā pratyudāharaṇasaṅgatyabhidhānameva yat kaustubhe, tatsiddhāntamādāyāpi saṅgatisaṃbhavābhiprāyeṇa jñeyam //
niḥsandigdhatvādityanena trayastriṃśaddevānāṃ devatātvasyāspaṣṭatvānnopalakṣaṇatvamiti pūrvanyāyavailakṣaṇyaṃ sūcitam /
upalakṣaṇamityasyānantaraṃ manyata ityadhyāhāraḥ /
evañca sati yadyapyetasyānuvaṣaṭkārayāgasya karmāntaratve 'pi pṛthaksomagrahaṇavidhyabhāvāt kathañcidatideśena tatprāptisaṃbhave 'pi vā "yaddhavirvahati tena śeṣeṇa saṃyojayati devatā" mityarthavādena vaṣaṭkāradevatāyai yaddhaviḥ vahati taccheṣeṇānuvaṣaṭkāre devatāṃ saṃyojayatītyarthakeṇa vaṣaṭkārayāgīyasomaśeṣadravyatvapratīteḥ tayā cottamādivat pratipattilakṣaṇasattvenānuvaṣaṭkārayāgasya pratipattitvāvasāyāt "yadvāvasomasyāgnevīhītyanuvaṣaṭkaroti tenaiṣa saṃsthitān somān bhakṣayanti sa eva somasya sviṣṭakṛdi"ti dravyapratipattyarthasviṣṭakṛdyāgarūpatvasaṃstavādapi ca tanniścayācca pratipattikarmatvaṃ nirvivādam /
ataeva saṃkarṣe anuvaṣaṭkārayāgasya sviṣṭakṛdvattantreṇānuṣṭhānaṃ pūrvapakṣayitvā vaṣaṭkārayāgānantaryarūpakramapṛthaktvāt dvidevatyeṣvanuvaṣaṭkāraniṣedharūpaliṅgācca siddhāntatvena sādhitāyā āvṛtteḥ pratipattikarmatva evopapattiḥ, anyathā arthakarmatve tantrānuṣṭhānāpattestadasaṃbhavāt /
ataśca pratipattikarmabhūte 'smin yāge nārthakarmabhūtasomayāgātideśaḥ saṃbhavati; tathāpi niṣkāsāvabhṛthavājinayāganyāyenetikartavyatākāṅkṣāyāṃ somajanyayāgatvasāmānyāt atideśopapattyā vaṣaṭkārānuvaṣaṭkārayāgāṅgabhūtayoḥ somabhakṣaṇayoḥ tantreṇānuṣṭhāne 'pi tatraiva devatādvayopalakṣaṇaṃ kartavyamityarthaḥ //
aindrapradānānāṃ prakṛtitvamanaindrapradānānāṃ vikṛtitvamiti pakṣe anaindrapradāneṣvatideśena prāptasyāpyanuvaṣaṭkārayāgasya tāvadyognirdevatā sā na prakṛtibhūtaindrapradānasaṃbandhīndrasthānāpannā, yena tatsthānāpannatvena mantraprāptyā tasyāpyupalakṣaṇaṃ syāt /
prakṛtau aindrapradāne hotṛkacamaseṣu "madhyataḥ kāriṇāṃ camasādhvaryavo vaṣaṭkṛte anuvaṣaṭkṛte juhuta hotṛkāṇāṃ camasādhvaryavaḥ sakṛddhutvā śukrasyābhyunnīyopāvartadhvami" tyadhvaryukartṛkapraiṣasakṛddhomāmnānena anuvaṣaṭkārasyaivābhāvāt madhyataḥ kāricamaseṣu tatsattve 'pi tadaṅgabhūtānuvaṣaṭkārayāgasya prayājādivat kṛtsnavidhānatvenetikartavyatānapekṣaṇādatideśānupapatterbhakṣaṇasya tanmantrasya cāprāptau nopalakṣaṇasaṃbhāvanāpītyabhipretya siddhāntamāha --------- prakṛtautviti //
nanu ------- prakṛtau somaṃ bhakṣayatīti bhakṣaṇasya vedibarhinyāyenāṅgapradhānasādhāraṇasomoddeśena vidhānādupadeśenaiva bhakṣaṇaprāptestanmantraprāptirityata āha ------- upadeśeneti //
yavaprayoge "vrīhīṇāṃ medha" iti mantrasyāsāmarthyena prakṛtāvūhābhāvena ca lopavadihāpi tasya lopasyaiva prāpterityarthaḥ /
ataeva upadeśena bhakṣaprāptāvindrapītādhikaraṇasiddhānte savanasaṃbandhitvāviśeṣāt mantraviniyoge 'pi na tadīyadevatopalakṣaṇaprasaktiḥ /
siddhāntamupasaṃharati --------- ataśceti //
svayāgāṅgabhūtadravyapātṛtvasattve 'pi tatrātideśābhāvena prākṛtadevatākāryāpattyabhāvāt yathā adhvaryuṇā pāne kriyamāṇe tataḥ pūrvaṃ hotrā pītopi na hotṛpītasyetyevamupalakṣayet, tathaivānuvaṣaṭkāradevatā nopalakṣaṇīyetyarthaḥ /
sūtre vaṣaṭkāraśabdena vaṣaṭkārasaṃbaddhānuvaṣaṭkārasaṃbandhāt lakṣitalakṣaṇayānuvaṣaṭkārayāgīyadevatocyate iti jñeyam /
atra nyāyasudhākṛtā anuvaṣaṭkārayāgasya pratipattikarmatvaṃ sādhitam, taddūṣaṇena arthakarmatvaṃ prakāśakārairuktamapi kaustubhe nirasya pratipattikarmatvameva aṅgīkṛtamitīhāpi tadeva pratipattibhūtasyetyanena darśitamiti //
iti ṣoḍaśamanuvaṣaṭkārādhikaraṇam //
(anuvaṣaṭkāradevatānupalakṣaṇādhikaraṇam) - - - - - - <B1> (17 adhikaraṇam / ) (a.3 pā.2 adhi.17) chandaḥ //
evamūhaṃ vicāryādhunā'dyapūrvapakṣavādī punastaṃ dūṣayati /
nohaḥ; karmaṇa ekatvāt, abhyāsānāmapi phalacamasavadasamānavidhānatve pramāṇābhāvācca /
nahi mānagrahaṇamantrānurodhena taduddeśyānāṃ saṅkoco yuktaḥ, agnividyayostu svasvavidhiprayuktatvena kratuvidhiprayuktatvābhāvādyuktaḥ paraprayuktāgnividyopajīvakatayā kratvadhikārasaṅkocaḥ /
ato mānagrahaṇamantrāveva kāmaṃ aindramātrapradānaviṣayau bhavetāṃ na tu mānādyapi /
vastutastu vasumata ityanena devatāntarasyāpyabhidhānāttayorapi sarvārthatvameva /
ato bhakṣamantrasyaivaindrapradānaviṣayatvādanaindrāṇāmamantrakaṃ bhakṣaṇam // 17 // 31 //
iti saptadaśaṃ anaindrāṇāmamantrakabhakṣaṇādhikaraṇam //
<B2> evamindrapītādhikaraṇadvitīyohapūrvapakṣamupajīvya pañca kṛtvācintāḥ pradarśyādhunā vartiṣyamāṇakṛtvācintādvayārthaṃ dvitīyapūrvapakṣopapāditohaniṣedhamukhenendrapītādhikaraṇaprathamapūrvapakṣavādī svaprayojanasādhanāya pratyavatiṣṭhata ityāha ---------- evamiti //
dūṣaṇaprakāramevāha --------- noha iti //
yāgākhyakarmaṇaḥ phalavattvāt prādhānyācca somādyaṅgagrāhitvasaṃbhave 'pi pradānānāmabhyāsarūpatvenāphalavattvāt guṇatvācca "guṇānāṃ ca parārthatvādi" ti nyāyenāṅgagrāhitvānupapattervikṛtitvāsaṃbhavāt yāgasyaca pratyabhyāsamapyekatvāt svasmin svato 'bhyāsānupapatteḥ nohena samantrakaṃ bhakṣaṇamanaindrāṇām /
nahi pradānāntarāṇyanyayāgasaṃbandhīni, yena teṣāṃ karmāntaratvāt bhedāpekṣaḥ prakṛtivikṛtibhāvaḥ saṃbhavet /
ekasyaiva somena yajeteti pratyakṣaśrutyā vihitasya yāgasya upapādakatvasaṃbhaveyāgāntarāṇāṃ tatkalpane prāmāṇābhāvāt ekajyotiṣṭomayāgāṅgatve dharmāṇāṃ satyapi liṅgāt mantravyavasthopapatteḥ aindrapradānasomaśeṣabhakṣaṇameva samantrakamityarthaḥ /
astuvā abhyāsānāṃ guṇatve 'pi paraṃparayā phalavattvam, tāvatāpi na somaphalacamasābhyāsānāmiva vyavasthayādharmagrāhitvamityāha -------- abhyāsānāmapīti //
phalacamase nityānityasaṃyogavirodharūpahetorasāmānavidhyepīha tadabhāve tatkalpane naiva kiñcit pramāṇam /
nāpi payasā maitrāvaruṇaṃ śrīṇātītivadaindrapradānābhyāsārthatvena vidhiśravaṇamato nāsāmānavidhyamityarthaḥ //
nanu -------- ihāpi mānagrahaṇamantrayoraindrapradānamātraviṣayatvāt tadanurodhena mānagrahaṇayoḥ tatsaṃskāryasya somasya tatsaṃskārāṇāṃ cābhiṣavādīnāṃ tatsaṃvalitānāṃ dīkṣaṇīyādīnāmapi aindrapradānamātraviṣayatvāvagateḥ sāmānavidhyabhāvasaṃbhava ityata āha ---------- nahīti //
yuktaiti //
prakṛte tu mānagrahaṇamantrayoḥ taduddeśyānāñca paraprayuktatvābhāvena kratuvidhiprayuktatvakalpanāvaśyaṃbhāvāt sarvābhyāsānāñca prakaraṇāviśeṣeṇa viniyogaprayogavidhikalpakatvopapatterna yuktaḥ saṃkoca ityarthaḥ /
ataeva -------- mānagrahaṇamantrayoḥ vrīhimantrasya vrīhiviṣayatvavat liṅgādaindrapradānamātraviṣayatvepi mānādīnāṃ puroḍāśapratiṣṭhāpanasyeva sarvaviṣayatvāt tadīyamānagrahaṇayoramantrakatve 'pyakṣatirityāha ------- ata iti //
yadyapica latāvasthāyāmeva anuṣṭhīyamānayoḥ mantragrahaṇayoḥ tantreṇaivānuṣṭhānāt athavā -------- aindrapradānārthamevānuṣṭhānena prasaṅgato 'nyeṣāmapyupakārakatvāt pṛthaganuṣṭhānābhāvena samantrakatvāmantrakatvakṛto nānuṣṭhāne kaścana viśeṣaḥ; tathāpi aindrapradānottaraṃ sarvasomanāśe pradānāntarāṇāmarthe some mīyamāne gṛhyamāṇe cāmantrakatvasiddhirityarthaḥ /
ataeva ---------- indrapītādhikaraṇasiddhāntasya anaindeṣu mantraprāptirūpasya bahuvrīhita eva saṃbhavāt siddhānte 'pyasya sāmānavidhyasyānirākaraṇenābhyupagatatvāvagame 'pi siddhānte anupayuktasya tasya kṛtvācintāmiṣeṇātrābhidhāne kiṃ prayojanamityāśaṅkottaraṃ bhakṣamantre viśeṣābhāve 'pi "indrāya tvā vasumate" ityanayoḥ mānagrahaṇamantrayoḥ anaindreṣūhena prayogaḥ prakṛtivikṛtibhāve syāt, sāmānavidhyetu tadasaṃbhavāt yathāvasthitayośca tatrāsāmarthyādaprayoga eveti bhaṭṭasomeśvareṇa kvacit likhitamapi sarvasomanāśāpāditapunaḥpradānāntarārthasomagrahaṇamānānuṣṭhāne mantrasyātideśataḥ prāptasyohaprayogaparameva jñeyam /
evaṃ sthite etaduttaraṃ nyāyasudhāyāmalikhitamapi tallikhitabhrameṇānūdya anaindrapradāneṣu pṛthaṅmānagrahaṇayorevānuṣṭhānāt kutaḥ tatrānayormantrayoḥ prakṛtivikṛtibhāve 'pyūhaprasaṅgaḥ kutastarāṃ sāmānavidhyādaprayoga iti prakāśakāraiḥ dūṣitam, tat kaustubhe pūrvoktānuṣṭhānaviśeṣopapādanavyājena pūjyapādaireva ayuktamiti sūcitam /
vastutastviti //
vidhivākye vasumattvaguṇasyāśravaṇādindragatavasumattvaprakāśanasyavyarthatvāpatteḥ vārtikoktarītyā devatāvācivasumacchabdenaindrātiriktānaindrapradānasaṃbandhidevatābhidhānopapatteritara- devatāyuktāyendrāyetyarthena samantrakamanyatrāpi mānagrahaṇādityarthaḥ /
bhakṣamantre tvanaindrapradānasaṃbandhidevatābhidhānābhāvāt pradānānāṃ bhedena tattaccheṣasyeva bhakṣaṇānāmapi pṛthakpṛthaganuṣṭhānāt aindraśeṣabhakṣaṇe prayujyamānasya karaṇatvenāpi prākaraṇikaviniyogopapatteraindraśeṣabhakṣaṇa eva liṅgāt prayogaḥ, anaindraśeṣabhakṣaṇetu sarvathā prāptyabhāva iti vaiṣamyamabhipretyopasaṃharati --------- ata iti //
yattu -------- atra prakāśakāraiḥ "yaṃ kāmayeta pāpīyān syāditi nīcaistarāṃ tasya yājyayā vaṣaṭkuryādi"tyādiyājyāśritaguṇakāmaprāptiranaindreṣvapi sāmānavidhye, vikṛtitve tu neti prayojanaṃ sāmānavidhyasyoktam; tanna; abhyāsānāṃ vikṛtitve 'pi karmaṇa ekatvena vikṛtibhūtābhyāsasādhyasyāpi tasyaiva jyotiṣṭomatvena phalasaṃbandhāt jyotiṣṭomāpūrvasādhanībhūtayājyārūpāśrayasya teṣvapyavaśiṣṭatvena guṇakāmaprāptyupapatteḥ /
nahi aindrapradānasaṃbandhiyājyātvena tatrāśrayatā; pramāṇābhāvāt, nāpyanaindrapradānānāmaindrapradānāṅgatvaṃ phalāntaraṃ vā, yena tatsādhyayāgasya jyotiṣṭomāt karmāntaratayā jyotiṣṭomatvaṃ na saṃbhavet, ato 'yuktametat prayojanamiti pūjyapādairupekṣitam //
iti saptadaśaṃ anaindrāṇāmamantrakabhakṣaṇādhikaraṇam //
- - - - - - - <B1> (18 adhikaraṇam / ) (a.3 pā.2 adhi.18) aindrāgne //
evaṃ sthite punaścintā /
aindrāgne 'pyabhyāse indrapītasyetyeva samantrakaṃ bhakṣaṇam; tyāgasya vyāsajyavṛttitve 'pi pānasya pītapadalakṣitasvīkārasya vā pratyekavṛttitvena ḍitthamātṛvadekena vyapadeṣṭuṃ śakyatvāt tyāgasya ca hutāhutasamudāyaviṣayatvena bhakṣyamāṇahutāvayavamātraviṣayatvābhāvānna pītapadena tyaktatvalakṣaṇā /
ataścaturdhākaraṇādhikaraṇaviṣayatvābhāvāttasyāpi samantrakaṃ bhakṣaṇamiti prāpte --------- satyaṃ pītapadena svīkāralakṣaṇā; pānasya navame niṣedhyamānatvāt, tyāgasya tvaduktarītyā lakṣayitumaśakyatvācca /
svīkārasya tu devasvādipadālambanatayā kalpyamānasya hutāvaśiṣṭa eva kalpanīyatvādyuktā lakṣaṇā; tathāpi tasya lāghavena vyāsajyavṛttereva kalpane pratyekavṛttitve pramāṇābhāvāccaturdhākaraṇādhikaraṇaviṣayatvopapatterna tasya samantrakabhakṣaṇam // 18 // 32 // it.yaṣṭādaśaṃ aindrāgnabhakṣasyāmantrakatādhikaraṇam //
<B2> bhakṣamantrasyaindrāgnadevatyahutaśeṣabhakṣaṇāṅgatvānaṅgatvavicārāt pādādhyāyasaṅgatī tathā pūrvādhikaraṇe aindrapradānavyatiriktapradānahutaśeṣabhakṣaṇe amantrakatvasyādyapūrvapakṣavādinā sādhitasyehākṣipya samādhānādākṣepikīmanantarasaṅgatiṃ ca spaṣṭatvādanuktvā sthita evādyapūrvapakṣe kṛtvācintātvena vicāraṃ darśayati ------- evamiti //
pūrvapakṣamāha --------- aindrāgnepīti //
tyāgasyeti //
yadyapi caturdhākaraṇādhikaraṇanyāyenendrāgnyoḥ vyāsajyavṛttitvāt nendrapītapadena indrāya tyakta iti vyutpattyā indrāgnyantargatendro devatā śakyā vyapadeṣṭum; tathāpi pītapadasya tyaktatvalakṣaṇāyāṃ pramāṇābhāvāccaturthīsamāsasyānanuśiṣṭatvenānyāyyatvāt kathañcidanuśāsane 'pi vā hutāhutasamudāyasyaiva pūrvaṃ tyaktasya homena nāśādahutasya bhakṣaṇayogyasyātyaktatvena indrapītapadavyapadeśyatvāsaṃbhavāt pānameva rasāsvādanarūpadevatāniṣṭhaṃ athavā tasya navame niṣetsyamānatvāt āhavanīyamukhaprakṣeparūpaṃ vā athavā hutasyaiva tatpadavyapadeśyatvāpattyāhutabhakṣyamāṇe tatpadavyapadeśāsaṃbhavādapītāvayavasaṃgrahāya samudāye lakṣaṇāpatteḥ devasvādipadālambanatayāvaśyakaḥ svīkāro vā saṃbandharūpaḥ pītaśabdārtho lakṣaṇayā vaktavyaḥ /
tathāca tṛtīyāsamāsopyanuśāsanaśiṣṭo labhyate /
evañca svīkārasyāvayavāvayavisādhāraṇyena kalpitasya pratidevatādhiṣṭhānaṃ bhedena kalpanopapattervyāsajyatyāge 'pi ardhasyendreṇa svīkṛtatvāt tatpadavyapadeśyatvopapattirityarthaḥ /
ḍitthamātṛvaditi //
ḍitthaḍabitthayormātari mātṛpadārthāntarnītajanyajanakabhāvarūpasaṃbandhasya pratyekaṃ vidyamānatayā ekenāpi saṃbhavati ḍitthamāteti vyapadeśaḥ, tadvadihāpi upapadyata ityarthaḥ //
caturdhākaraṇetu taddhitena devatātvasyaiva uktatvānna vyāsajyavṛttidevatākasya grahaṇam /
ataeva apaunaruktyaṃ cetyabhipretya vaiṣamyamāha -------- ataścaturdheti //
lāghaveneti //
vyāsajyavṛttidevatāsthale vyāsajyavartina ekasyaiva svīkārasya kalpane saṃbhavati na tatra nānātvakalpanā; gauravādityarthaḥ //
yattu vārtikādau tyaktatvalakṣaṇayā siddhāntopapādanaṃ, tatprauḍhipradarśanārthamityuktaṃ kaustubhe tatraiva draṣṭavyam //
amantrakatvapūrvapakṣasya sthāyitve 'pi sthāyivicāraprayojanaṃ aindrāgnabhakṣaṇe 'pi savanaviśeṣaṇatayā prayojye mantre tadarthānusandhānavelāyāṃ pūrvapakṣe bhinnasvīkāratvāt aindrāgnāntargatendrapītatvenāpi indrapītapadārthānusandhānam /
siddhāntetu tasyaikatvādindrapītapadārthatvābhāvānnānusandhānamiti spaṣṭatvānnoktam //
ityaṣṭādaśaṃ aindrāgnabhakṣasyāmantrakatādhikaraṇam //
<B1> (19 adhikaraṇam / ) (a.3 pā.2 adhi.19) chandasaśca //
tatraiva mantre gāyatrachandasa ityādi śrutam /
taccedaṃ somaviśeṣaṇamevāsminpūrvapakṣe /
ataśca kevalameva yatraindrapradāne gāyatraṃ chando yathā bṛhaspatisavādau 'gāyatrametadaharbhavatī'ti śruteḥ, tatraivāsyotkarṣo, natu jyotiṣṭomeniveśaḥ; kevalagāyatracchandaskapradānābhāvāt /
naca sāmānyasaṃbandhabodhakapramāṇābhāvaḥ; indradevatyatvaprātaḥsavanādīnāmanyatra lokādāvabhāvena pāriśeṣyādeva bṛhaspatisavopasthitisaṃbhavāditi prāpte --------- bṛhaspatisave 'pi savanamukhīye ṛgantarasya paṭhitatvādgāyatrametadityādeśca bhūmnāpi vyākhyānopapatteḥ prakṛtau vikṛtau vā kevalagāyatrachandaskatvābhāvānnityasāpekṣatvena samāsopapatteḥ prakṛtāveva niveśaḥ /
vastutastu gāyatryāḥ pratyekameva sādhanatvāt satyapi ṛgāntare na samāsabhaṅgāśaṅkāpi // 19 // 33 //
ityekonaviṃśaṃ mantraviśeṣāṇāmanekachandaske viniyogādhikaraṇam //
<B2> aindrapradānaśeṣabhakṣaṇe evāyaṃ mantra iti pūrvapakṣamupajīvya kṛtācintātvena kariṣyamāṇasya sadontarasahitagāyatrachandaskaindrapradānepyayaṃ mantro 'ṅgamuta tannirapekṣagāyatrachandaskaindrapradāna eveti vicārasya mantragatāṅgatvavicārarūpatayā pādādhyāyasaṅgatī tathāpavādikīmanantarasaṅgatiṃ ca spaṣṭatvādanuktvā tasminneva mantre ekadeśaviṣayatāpradarśanapūrvakaṃ pūrvapakṣamāha -------- tatraiveti //
yadi gāyatrachandasa itipadaṃ siddhānta iva savanaviśeṣaṇaṃ bhavet, tadā kevalagāyatrachandaskaindrapradānamātrārthatāpūrvapakṣo na sidhyedityato yadyapīndrapītapada iva tatpuruṣakṛtaṃ somaparatvaṃ na saṃbhavati; pakṣadvayepi bahuvrīherāvaśyakatvāt; tathāpyanantaropanyastendrapītapadasya tatpuruṣeṇa somaparatve sādhite sati tatsamabhivyāhārāt gāyatracchandasa ityādipadānāmapi tatparatvameva yuktam, natu pūrvapadopasthāpitaprātaḥsavanādiparatvam; tathātve viśeṣyaparaprātaḥsavanādipadānāmetaduttaraṃ prayogāpatterato 'smin mahādhikaraṇapūrvapakṣe somaviśeṣaṇamevetyabhipretyāha --------- taccedamiti //
yathā indrapītapadena kevalendra eva prakāśyate, natvanyasahitaḥ; samāsavighātāpatterata aindrāgnādau mantrāprayogaḥ pūrvatra sādhitaḥ, tathehāpi gāyatracchanda ādipadaiḥ kevalameva gāyatryādyanyayogavyāvṛttyā viśeṣaṇatvena chandaḥ prakāśyate natu chandontarasāpekṣam; samāsavighātāpatteḥ, ato 'trāpi chandontarasāpekṣagāyatrachandaskatvasya jyautiṣṭomikaindrapradāne sattvena mantraliṅgavirodhādyatra tannirapekṣagāyatrachandaskatā tatra utkarṣa ityabhipretyāha --------- ataśceti //
gāyatrametaditi //
anenātideśaprāptanānāchandaskatābādhena dāśatayīgatautpattigāyatrīchandaskarcāṃ vidhānamaṣṭamacaturthapāde vakṣyate /
ataeva -------- trivṛdbahiṣpavamānādau kvacit prāptagāyatrachandaskānuvādatvaṃ pakṣāntareṇa prakāśakāroktaṃ ------- apāstam /
yadyapi anyachandaskarga bādhenotpattigāyatrīvidhānābhidhānena kevalagāyatrachandaskatvamādāyātra pūrvapakṣa upatiṣṭhati; tathāpyutpattigāyatrīvidhānenaiva viśeṣarūpeṇānyachandaskarcāṃ bādhamabhipretya kevalagāyatrachandaskatvasaṃbhava ityarthaḥ //
nanu ------- manotāmantrasya sāmānyasaṃbandhabodhakapramāṇābhāvena vikṛtāvanutkarṣavadihāpi tadabhāvāt kathaṃ bṛhaspatisavopasthitirityāśaṅkate -------- naceti //
atra prakāśakāraiḥ bhakṣānuvāka iti samākhyayaiva sāmānyasaṃbandhabodhakapramāṇamityuktam, talloke 'pi rāgataḥ prāptasomabhakṣasattvena samākhyāyāstatsādhāraṇatayā niyamataḥ sāmānyayāgopasthāpakatvābhāve viśeṣato bṛhaspatisavayāgopasthāpakatve pramāṇābhāvādayuktamityupekṣya svayamanyathā pariharati --------- indradevatyatveti //
laukikasomabhakṣe kevalagāyatrachandaskatvaprātaḥsavanasaṃbandhitvendrapītatvādīnāmasaṃbhavena tadvyāvṛttyā pariśeṣādeva viśeṣeṇa sāmarthyāt bṛhaspatisavīyasomapratītyupapatteḥ sāmānyasaṃbandhabodhakapramāṇābhāve 'pi kṣativiraha ityarthaḥ //
ṛgantarasya paṭhitatvāditi //
yathāpāṭhamanyachandaskarcāmatideśataḥ prāptatvādityarthaḥ /
etaccopalakṣaṇaṃ ṛgantarāmnānāntarasyāpi /
yathā mādhyandinasavane maruttvatīye tathā niṣkaivalyeca śastre krameṇa prakṛtau janiṣṭhā ugra ityasya sūktasya mukhe yastastaṃbhetyṛcastathā indrasya nu vīryāṇīti sūktamukhe dhunena yaḥ supraketaṃ madanta ityṛcaśca triṣṭup chandaskāyā āmnānasya yastastaṃbha dhuneta yaḥ itisūktamukhīye ityāśvalāyanasūtragatavacanena kṛtatvāt /
gāyatrametadityādeśceti //
yato bṛhaspatisave ṛgantarāṇāmanyachandaskānāṃ vidhānāt gāyatratvaṃ vidhīyamānaṃ nyāyasudhādarśitarītyā atideśaprāptaprātaranuvākādigatasaptachandaskatvābādhenāvihitachandovi śeṣa- yājyādiviṣayaṃ, athavā prakāśakāroktarītyā viśeṣavihitatrivṛtstomakeṣvājyādistotreṣu vā, athavā somanāthenoktarītyā pradhānamātre vā niviśate /
ato jyotiṣṭoma ivabṛhaspatisave 'pi na kevalagāyatrachandaskatvam /
gāyatrametadahariti sāmānādhikaraṇyañca bhūmaguṇayogāt gauṇamityarthaḥ /
ataeva yathā gurutvasya śiṣyatvānapekṣasya kadācidapyabhāvāt nityasāpekṣatayā asmākaṃ gurukulamityatrāsmadarthaśiṣyasāpekṣeṇāpi gurupadena kulapadasya samāsaḥ, evamihāpi nityachandontarasāpekṣasya gāyatrapadasyānyayogavyāvṛttyā viśeṣaṇatayā anvayāyoge 'pyayogavyāvṛttyā viśeṣaṇatvopapatteḥ nityasāpekṣatayā chandaḥpadena samāsopapattirityāha --------- prakṛtāviti //
yadyapi tatra gurvādiśabdaḥ saṃbandhiśabdo naivaṃ gāyatrachandaḥ; tathāpi śiṣyādinirapekṣagurvādyarthāsaṃbhavopapattyā yathā nityasāpekṣatvaṃ tathā ihāpi gāyatrachandaskasyāsaṃbandhiśabdatvepi tadarthasya chandontaranirapekṣasyābhāvānnityasāpekṣatvamityabhāvāditi hetūktyā sūcitam /
evamayogavyāvṛttyā viśeṣaṇatāṅgīkāreṇa nityatvena ca samāsopapattiṃ pradarśya adhunā anyayogavyāvṛttyāpi saṃbhavativiśeṣaṇatvamityāha -------- vastutastviti //
gāyatraṃ chando 'syeti samāsārthāntarnītasaṃbandhasāmānyasya viśeṣaṃ vinā aparyavasānādṛgavāntarakāryadvāraiva tadviśeṣāvagateḥ satyapi stotrādau chando 'ntare sarvachandasāṃ vyāsajya sādhanatvābhāvāt tasmiṃśca svāvāntarakārye itaranirapekṣatayaiva tattacchandaskarcāṃ sādhanatvādanyayogavyāvṛttyāpi viśeṣaṇatvaṃ samāsaścopapadyata ityarthaḥ /
evaṃ sthite etādṛśanirapekṣasādhanatvamādāya kevalaṃ gāyatrachandaskatvasya jyotiṣṭome 'pi "idaṃ saumyaṃ madhvadhukṣannadribhaḥ niro juṣāṇaṃ indratatpibe" tyaindrapradānayājyāyā gāyatrīchandaskāyā nirapekṣasādhanatvena kevalagāyatrachandaskatvopapatteḥ taccheṣabhakṣaṇa eva mantro natvanyachandaskayājyaindrapradānaśeṣabhakṣaṇa ityāpādanasya pūrvapakṣe 'pi saṃbhavādvikṛtāvutkarṣaparyantāpādanam tādṛśayājyābhāve kṛtvācintayaiva jñeyamiti vastutastvityanena sūcitam /
prayojanaṃspaṣṭatvānnoktam //.// / ityekonaviṃśaṃ mantraviśeṣaṇāmanekachandaske viniyogādhikaraṇam //
- - - - - - <B1> (20 adhikaraṇam / ) (a.3 pā.2 adhi.20) sarveṣāṃ //
sthitāduttaram /
nendrapītapade tatpuruṣo 'pi tu bahuvrīhīreva /
tatpuruṣe 'pi pūrvapade tāvadekā saṃbandhilakṣaṇā pītapade ca svīkṛtāvayavalakṣaṇā /
yadyapi ceyaṃ siddhāntino 'pi tulyā; tathāpi avayavasvīkārasyāvayavisvīkārasāpekṣatvena vilambopasthitikatvānna tulyatvam /
tataśca pītapade arśaādyacpratyayaṃ matvarthīyaṃ pādhātunā cāvayavigatameva tatsaṃbandhisvīkāraṃ lakṣayitvā indraḥ pītaḥ svīkārakarttā yasminsavana iti vyutpattyā samānādhikaraṇabahuvrīhiraṅgīkriyate /
prakaraṇaviśeṣācca nirṇayaḥ /
ataḥ sarvasyaiva somasyoktavidhaprātaḥ savanādisaṃbandhitvādanaindrāṇāmapi samantrakamevāvikāreṇa bhakṣaṇam /
yadi tu pītapadasya pūrvanipātāpattirāśaṅkyate, tadāstu indre pītaṃ pānamasminniti saptamībahuvrīhiḥ /
yadi tvatrāpi niṣṭhāntatvena pūrvanipātāpattiraviśiṣṭeti vibhāvyate, tadā pītapadasyākṛtigaṇatvenāhitāgnyādigaṇāntaḥ pātamaṅgīkṛtya "vāhitāgnyādiṣu" iti sūtreṇendrapadasya pūrvanipātaḥ /
atha vāstvayaṃ tatpuruṣa eva /
tadāpi tu lakṣaṇayā somasaṃbandhisavanaparatvam /
naca tasyāṃ pramāṇābhāvaḥ; taittirīyaśākhāyāṃ prātaḥsavanādibhedena indrapīta- narāśaṃsapīta - pitṛpītānāṃ trivāraṃ pāṭhasyaiva pramāṇatvāt /
somamātraparatve hi tattatpradāneṣu liṅgādevendrapītādipadānāṃ sakṛtpaṭhitānāmeva pāṭhopapattau tatra yogyatayaiva prātaḥsavanādipadānāṃ vibhāgena viśeṣaṇatvopapattiḥ /
atasteṣāṃ prātaḥsavanādibhedena trivāraṃ pāṭha eva vaiyarthyabhiyā savanaparatvalakṣaṇātātparyagrāhakaḥ /
ataścendrapītādiviśeṣaṇatrayayuktasya tattatsavanasya saṃbandhinaṃ somaṃ anyadevatyamapi bhakṣayāmīti mantrārthāvagateḥ sarvatraikamantryam /
vibhāgo 'pi taittirīyaśākhāmnātakrameṇaiva bodhyaḥ /
kalpasūtrakārāstūhamevāmananti // 20 // 34 //
iti viṃśaṃ ekādaśādhikaraṇopasaṃhārādhikaraṇam //
iti śrīkhaṇḍadevaviracitāyāṃ bhāṭṭadīpikāyāṃ tṛtīyādhyāyasya dvitīyaḥ pādaḥ // 2 //
<B2> idānīmindrapītādhikaraṇakṛtadvitīyohapūrvapakṣasyādyapūrvapakṣavādinaiva nirastatvādavaśiṣṭādyapūrvapakṣanirāsena siddhāntamupapādayitumanekacintāvyavahitatvādādyaṃ pūrvapakṣaṃ smārayati -------- sthitāditi //
sthitāditilyablope pañcamī /
anirāsāt sthitaṃ pūrvapakṣamapekṣyāvaśiṣṭamuttaramucyata ityarthaḥ //
bahuvrīhāvubhayapadārthatyāgāpekṣayā ekapadārthatyāgena lāghavāt tatpakṣamaṅgīkṛtya indrapītapadasya somaparatvaṃ yadvadet, tattatrāpi lakṣaṇādvayāpattyā ubhayapadārthatyāgasya samatvādayuktam, ato bahuvrīhimeva gāyatraṃ prātaḥsavanamityāditātparyānugṛhītasavanaikaviśeṣaṇatayār'thapratipādakagāyatrachandaḥpadaprāyapāṭhāt prātaḥsavanādipadasāmānādhikaraṇyācca indrapītapade aṅgīkṛtya savanaparatvameva yuktamityabhipretyāha -------- nendrapītapada iti //
tāmeva lakṣaṇāpattiṃ darśayati --- pītapade ceti //
pītapade svīkāralakṣaṇāyāmapi hutāhutasamudāyasyaiva tyāgena svīkārāt indrapītapadena vivakṣitasyendrakartṛkasvīkārasya samudāya eva sattvāt tadekadeśasya homena naṣṭasya someti saṃbodhanārthatvāt pratyakṣavacanena te iti śabdena vyapadeṣṭumaśakyatvāt pītapadena pātrasthahutaśeṣarūpasvīkṛtāvayavasya pītapade lakṣaṇāntarasya tatpuruṣe āpattiḥ, bahuvrīhautu hutāhutasamudāyasya pītapadenoktāvapi yasmin savane indreṇa samudāyarūpatayā somaḥ svīkṛtaḥ tatsavanasaṃbandhitvasya hutaśeṣāvayave 'pi sattvāt tatsaṃbandhipātrasthaśeṣasya saṃbodhanopapatteḥ taṃ yatkiñciddevatyaṃ bhakṣayāmītyarthopapatterna doṣaḥ /
yadyapi prātaḥsavanamabhiṣavo yasyeti bahuvrīhiṇā prātaḥsavanapadasya somaparatvamapi, na savanaparatvaniścayaḥ; tathāpi rūḍhyā kratubhāgavācitvenāvagatatvādavayavavyutpattyasaṃbhavāt savanaparatvopapattiḥ /
yadyapi vāgjuṣāṇā somasya tṛpyatviti ṣaṣṭhyantasomaśabdasāmānādhikaraṇyasidhyai prātaḥsavanaśabdasyāvayavavyutpattyā somavācitvaṃ bhavet; tathāpi ādyakratubhāgagatasya kṛtsnasya somasya prātarabhiṣavāt prātaḥsavanaśabdasya kratubhāgagatakṛtsnasomavācitvāpatteḥ somaśabdasya hutaśeṣamātravācitvāt prātaḥ savanasaṃbandhivavācinaṃ śabdaṃ vinā sāmānādhikaraṇyānupapatteḥ prātaḥsavanaśabdasya chapratyayāntatvāpatterna somaparatvam /
ato deva somayastvamindrapītasya prātaḥsavanasya saṃbandhī tasya te 'vayavaṃ bhakṣayāmītyevaṃ ṣaṣṭhī yojyā /
natu yasya prātaḥsavanasya somasya saṃbandhī indrapītastasyetyevaṃ sā yojyeti ubhayapadārthatyāgāpattisāmye prātaḥsavanapadaprāyapāṭhāt bahuvrīhireva yukta ityāśayaḥ /
nanu devatāyāḥ pātṛtvaniṣedhāt pītapade svīkāralakṣaṇā bahuvrīhipakṣe ubhayapadārthatyāgāpattidoṣāpekṣayā adhikā samastyeva, pratyuta aindrāgnādhikaraṇopapāditaprakāreṇa pādhātunaiva lakṣyasya svīkārasyāvayavāvayavisādhāraṇatvāt bhakṣyamāṇāvayavaniṣṭhasyaiva svīkārasya pādhātunā lakṣaṇānna tatpuruṣe svīkṛtāvayavalakṣaṇāntarāpattidoṣa ityāśaṅkya pariharati -------- yadyapi ceti //
yadyapi pādhātunā svīkāralakṣaṇā tulyā; tathāpi atrāvayavagatasvīkārabodhanamavayavigatasvīkāropasthitisāpekṣami ti vilambopasthitisāpekṣam, naivaṃ bahuvrīhau sarvasyāvayavina eva svīkārādato 'tulyatvamityarthaḥ /
vyadhikaraṇabahuvrīherananuśiṣṭatvāśaṅkāṃ kaṇṭhekāla ityādivat "saptamīviśeṣaṇe bahuvrīhāvi"tyanena vyadhikaraṇabahuvrīhisaṃbhavāt prācīnaiḥ parihṛtāmapi saptamībahuvrīhiviṣaya eva tasya jñāpakatāṅgīkārādanyatrāpravṛtteḥ tatrāparituṣya prakārāntareṇa samānādhikaraṇabahuvrīhyāśrayaṇena pariharati ----- ataśceti //
prathamataḥ pītapratibaddhavatsāmityatreva pītapadaṃ bhāve niṣṭhāntaṃ pānavācakamaṅgīkṛtya pītamasyāstītyarthe arśāādyacaṃ kṛtvā indraḥ pānavān yasmin savane ityevaṃ samānādhikaraṇabahuvrīhirevetyarthaḥ /
evañcāpūrvasaṃyogādabhyāsānāṃ prakaraṇāviśeṣāt sarvatra pradhānabhūtabhakṣayāmipadasāmarthyācca sarvapradānāṅgatvena prāptasya mantrasya guṇabhūtendrapītapadāśaktyā saṃkoco na yuktastasyāpi savanaviṣayatvena śaktyupapādanānna saṃkocakatā yukteti sarvapradānāṅgatvanirṇaya ityāha -------- prakaraṇāviśeṣāditi //
svaraviśeṣeṇa bahuvrīhitvanirṇayaḥ prācīnairukto 'pi svarasya tatpuruṣe 'pi pūrvapakṣe upapāditatvāt upekṣitaḥ /
ataśca "vasumadgaṇasya gāyatrachandasa indrapītasye" tyāditrikatrayaṃ prātaḥsavanādiviśeṣaṇam, tacca somasyasaca avayavadvārā bhakṣaṇasyetyevaṃ viśeṣaṇayuktasya savanasya saṃbandhī yaḥ somaḥ tasyāvayavaṃ bhakṣayāmītyarthāt mantraliṅgasya sarvapradānaśeṣabhakṣaṇaprakāśane 'pyaviruddhatvāt sarvabhakṣāṅgatvamityabhipretya ūhapakṣanirāsena saha siddhāntamupasaṃharati ------- ata iti //
yeṣāntu tattatsavanaviśeṣaṇatayopāttānāṃ padānāṃ liṅgaṃ tattatsavane virudhyate, teṣāntu sāmarthyādeva sūktavākamantragatapadānāmiva vibhajya viniyoge 'pyavaśiṣṭāviruddhamantragatapadānāmavirodhe sati tattatsavanasaṃbandhisarvabhakṣāṅgatvamevetyarthaḥ //
evaṃ samānādhikaraṇabahuvrīhiṇopapāditasiddhāntopasaṃhāre kṛte punaḥ siṃhāvalokananyāyena tatra dūṣaṇamupanyasya tatparihāreṇa siddhāntamupapādayati -------- yadi tviti //
pītapratibaddhavatsāmitivadupasarjanaṃ pūrvamityanuśiṣṭasya pūrvanipātasyāpattau pītendretiprayogāpattirityarthaḥ /
jñāpakasya saptamībahuvrīhiviṣayatvamabhipretya prācīnoktatṛtīyāvyadhikaraṇabahuvrīhyanaṅgīkāreṇāpi vyadhikaraṇasaptamībahuvrīhyaṅgīkāreṇa pariharati -------- tadāstviti //
niṣṭhāntatveneti //
niṣṭheti sūtreṇa kṛtakṛtyaḥ pītodakaḥ ityādiṣviva niṣṭhāntasya pūrvanipātāpattirastyevetyarthaḥ /
agatikagatyā samādhatte -------- tadeti //
agatikatvenaivātrāparituṣya niṣkṛṣṭasamādhānena siddhāntayati -------- athaveti //
taittirīyaśākhāyāmiti //
tasyāṃ hi mandrābhibhūtirityārabhya varcasa ityantaṃ paṭhitvā "vasumadgaṇasya somadevate matividaḥ prātaḥsavanasya gāyatrachandasa indrapītasya narāśaṃsapītasya pitṛpītasya madhumata upahatasyopahūto bhakṣayāmi rudravadgaṇasya somadevate mativido mādhyandinasya savanasya triṣṭupchandasa indrapītasya narāśaṃsapītasya pitṛpītasya madhumata upahūtasyopahūto bhakṣayāmyādityavadgaṇasya somadevate matividastṛtīyasya savanasya jagatīchandasa indrapītasya narāśaṃsapītasya pitṛpitasya madhumata upahūtasyopahūto bhakṣayāmi" itimīmāṃsābhāṣyakāralikhitaśākhāntarīyamantrapāṭhavailakṣaṇyena pāṭhaḥ /
tatrendrapītādipadānāṃ trayāṇāṃ somamātraparatve tattaddevatyapradānaśeṣabhakṣaṇe liṅgādeva tantrapadatayā tattatpadānāṃ prāptestrivāraṃ pāṭho 'narthakaḥ prāpnoti, savanaparatvetu savanānāṃ bhedena tattadrūpeṇa tattaddevatāpītasomasaṃbandhisavanasaṃbandhyavayavaprakāśanāya sa pāṭhaḥ sārthaka iti pītapade lakṣaṇāyāḥ somasavanasaṃbandhiparatve 'syāṃ śākhāyāṃ nirṇīte upasaṃhāranyāyena bhāṣyodāhṛtamantre 'pi tathaiva nirṇayo yuktaḥ /
etāvāṃstu viśeṣaḥ ------- vasumadgaṇādipadānāṃ asiddhavibhāgakaraṇapūrvako vyavasthayā tattatsavane viniyogo bhāṣyodāhṛtaḥ /
taittirīyetu yathāsavanaṃ vibhāgasya svata eva siddhatvādyathāliṅgaṃ vyavasthāmātramiti tatpuruṣeṇaivātra siddhānta iti bhāvaḥ //
atraca "sarveṣāṃ vaikamantryamaitiśāyanasya bhaktipānatvāt savanādhikāro hī"ti siddhāntasūtre aitiśāyanagrahaṇādanyarṣeraikamantramiti mataṃ na jaimineḥ, tasyatu yathādevataṃ vā tatprakṛtitvaṃ hi darśayatītyādyapūrvapakṣanirākaraṇāyottarasūtrapratipāditohapakṣa eveti bhramaṃ nirākartumāha -------- kalpasūtreti //
yohyuttarasūtreṇa jaimininā ūhapakṣa uktaḥ, sa kalpasūtrakāramatatvenoktaḥ, paramatatvenokto 'pyaikamantryapakṣaḥ svasiddhānta eva yuktisiddhatvādato mīmāṃsānyāyavirodhe pūrvapakṣamūlatvāt kalpasūtrakāravacanasyānanuṣṭhānalakṣaṇamaprāmāṇyamityarthaḥ /
ataeva --------- atrānte uktaṃ bhāṣyakāreṇa evamaitiśāyana ācāryo manyate sma /
asmākamapyetadeva matam /
ācāryagrahaṇaṃ tasmādāgatamiti saṃkīrtyarthamiti /
prayojanaṃ spaṣṭatvāt noktam //
iti viṃśaṃ ekādaśādhikaraṇopasaṃhārādhikaraṇam // - - - - - - //
iti śrīkhaṇḍadevāntevāsikavimaṇḍanaśaṃbhubhaṭṭakṛtāyāṃ bhāṭṭadīpikāprabhāvalyāṃ tṛtīyādhyāyasya dvitīyaḥ pādaḥ // //