Khandadeva: Bhattadipika, a commentary on Jaimini's Mimamsasutra,
Adhyaya 3, Adhikarana 1,
with Sambhubhatta's Prabhavali (subcomm.)
Based on the ed. by N.S. Ananta Krishna Sastri
Bombay 1921-1922 (Reprint: Delhi 1987)
(Sri Garib Dass Oriental Series, 50-)


Input by members of the Sansknet project
(www.sansknet.org) [server down!]


This GRETIL version has been converted from a custom Devanagari encoding.
Therefore, word boundaries are usually not marked by blanks.
These and other irregularities cannot be standardized at present.


An attempt to structure the text according to sutras had to be
abandoned for want of an adequate printed edition.


THE TEXT IS NOT PROOF-READ!



THIS GRETIL TEXT FILE IS FOR REFERENCE PURPOSES ONLY!
COPYRIGHT AND TERMS OF USAGE AS FOR SOURCE FILE.

Text converted to Unicode (UTF-8).
(This file is to be used with a UTF-8 font and your browser's VIEW configuration
set to UTF-8.)

description:multibyte sequence:
long a ā
long A Ā
long i ī
long I Ī
long u ū
long U Ū
vocalic r ṛ
vocalic R Ṛ
long vocalic r ṝ
vocalic l ḷ
vocalic L Ḷ
long vocalic l ḹ
velar n ṅ
velar N Ṅ
palatal n ñ
palatal N Ñ
retroflex t ṭ
retroflex T Ṭ
retroflex d ḍ
retroflex D Ḍ
retroflex n ṇ
retroflex N Ṇ
palatal s ś
palatal S Ś
retroflex s ṣ
retroflex S Ṣ
anusvara ṃ
visarga ḥ
long e ē
long o ō
l underbar ḻ
r underbar ṟ
n underbar ṉ
k underbar ḵ
t underbar ṯ

Unless indicated otherwise, accents have been dropped in order
to facilitate word search.

For a comprehensive list of GRETIL encodings and formats see:
http://gretil.sub.uni-goettingen.de/gretil/gretdiac.pdf
and
http://gretil.sub.uni-goettingen.de/gretil/gretdias.pdf

For further information see:
http://gretil.sub.uni-goettingen.de/gretil.htm










<B1> śrīḥ /
bhāṭṭadīpikā /
--- /// --- prabhāvalīvyākhyāsaṃvalitā /
tatra tṛtīyādhyāyasya prathamaḥ pādaḥ /
(1 adhikaraṇam / ) (a.3 pā.1 adhi.1)

athātaḥ śeṣalakṣaṇam / Jaim_3,1.1 /

tadevaṃ ṣaṭpramāṇake karmabhede nirūpite saṃprati śeṣinirūpitaṃ śeṣatvāparaparyāyamaṅgatvaṃ nirūpyate /
bhinnānāṃ hi tat saṃbhavati nābhinnānāmiti tannirūpaṇasya tatra hetutvam /
yadyapi ca dravyakarmaṇormitho 'ṅgāṅgibhāve na pūrvoktanirūpaṇasya hetutā; tathāpiaṅgatvasāmānādhikaraṇyena hetutāmādāyaiva saṅgatyupapattāvavacchedakāvacchedena tadasattve 'pi na kaścidvirodhaḥ /
aṃśa eva hetutvaṃ, aṃśāntare tu tu tatprasaṅgānnirūpaṇamityapi bodhyam /
aṅgatvameva vādhyāyārtho 'ṅgitvaṃ tvarthāt /
tadapi ca śrutyādiṣaṭpramāṇakaṃ, atideśapramāṇakasyehāvicāryatvāt /
taccānekaprakārakaṃ vicāryate /
aṅgatvalakṣaṇam śeṣapadaśakyatvāvacchedakam, aṅgāṅgitayoravacchedakam, śrutyādīni ca ṣaṭ aṅgatve pramāṇāni, tayorvirodhe balābalam, virodhaśca kvāsti kva nāstītyādi // 3 // 1 // iti prathamaṃ pratijñādhikaraṇam //
<B2> ajñānatimiradhvaṃsi satyajñānaprakāśakam /
sarvābhīṣṭapradaṃ naumi śrīrūpaṃ sundaraṃ mahaḥ // 1 // yo vedaśāstrārṇavapāradṛśvā yajñādikarmācaraṇe 'tidakṣaḥ /
sadāśivārādhanaśuddhacittastaṃ bālakṛṣṇaṃ pitaraṃ namāmi // 2 // śrīkhaṇḍadevaṃ praṇipatya sadguruṃ mīmāṃsakasvāntasarojabhāskaram /
atyantasaṃkṣiptapadārthatatkṛtau prabhāvalīṭippaṇamātanobhyaham // 3 // yadyapyatra guroḥ kṛtāvapi mayāpyudbhāvyate kācanā- saṃbhūtistadapi pracāracature naiṣā purobhāgitā /
kintu kṣmātilakāḥ kuśāgradhiṣaṇāḥ siddhāntabaddhādarāḥ madvākyaṃ parihṛtya tatkṛtimalaṅkurvantviyaṃ me matiḥ // 4 // yadyapyathaśabdasya ānantaryapūrvaprakṛtāpekṣitvamadhikāraśceti trayor'thāḥ; tathāpi jijñāsāsūtre śabdena nirdiṣṭasyaiva pūrvaprakṛtaniyame satyadhyayanasya pūrvaṃ śabdena nirdiṣṭatvābhāvena pūrvaprakṛtāpekṣārthatvānupapatteḥ jijñāsāyāśca pramāṇaparatantratvena kṛtisādhyatvābhāvāt śabdavyāpāradvārā adhikārāsaṃbhavāt vicāralakṣaṇāyāṃ pramāṇābhāvācca tadubhayārthatvamanaṅgīkṛtya ānantaryārthatvamevāthaśabdasya svīkṛtam, prakṛte tu śeṣatvanirūpaṇaparaśabdavyāpārasaṃbhavenādhikārārthatvopapatteḥ tasyaca bhedalakṣaṇānantarameva kriyamāṇatvenānantaryasya tadupajīvyatvenaca pūrvaprakṛtāpekṣatvasyārthādeva siddherna tadarthakatvamapyāśrayaṇīyam //
taduktaṃ vārtike ------- "evamarthadvaye tāvadathaśabdasya varṇite /
saṃbandho 'dhyāyayorukto yadvārthāt siddha eva saḥ //
tataścāpunaruktatvādvakṣyamāṇārthagocarā /
adhikārārthatā vaktumathaśabdasya vakṣyate" iti //
evamathaśabdārthaṃ sūcayan sukhagrahaṇāya vṛttavartiṣyamāṇārthaṃ pratijānīte ------- tadevamiti //
"śeṣasyaivādhikāro 'tra yukto nānyasya kasya cit /
śeṣadhīsiddhyapekṣatvādanyalakṣaṇavākdhiyāmi"ti vārtikoktāvasaraṃ sūcayituṃ -------- saṃpratītyuktam /
yadyapyanyonyasaṃbandhāt śeṣaśeṣiṇorubhayorapi jñānāya nirūpaṇamāvaśyakam, pratyuta prādhānyāt śeṣinirūpaṇameva kartuṃ yuktamitisūtre śeṣalakṣaṇamityuktamayuktamityāśaṅkānirāsāya ------- śeṣinirūpitetyādyuktam /
śeṣo 'syāstītimatvarthatayā viśiṣṭaśeṣinirūpaṇe kartavye viśeṣaṇavidhayā śeṣasya nirūpaṇāvaśyakatvāt tannirūpaṇe cārthādeva śeṣinirūpaṇasiddheḥ śrutyādipramāṇānāṃ ca śeṣatva eva vyāpārāt tatsamavāye balābalasya ca śeṣiṇyaviruddhatvena śeṣa eva saṃbhavādāvaśyakaṃ śeṣanirūpaṇameva kartavyamabhipretya sūtre tanmātrapratijñānam /
tatraca vakṣyamāṇalakṣaṇāṅgatvaghaṭakībhūtoddeśyatāśālitvarūpaśeṣitvasyār'thādeva nirūpaṇamiti na virodhaḥ /
etena ------- śeṣitvajñānasya nāntarīyasiddhikatvamupapāditavatopi somanāthasya tannirūpaṇe 'pyadhyāyārthatvoktiḥ vārtikaviruddhatvāt ---------- apāsteti bhāvaḥ //
sūtre śeṣapade bhāvapradhānatvasya anantādhyāhārādyarthaparatvābhāvasyaca sūcanena śeṣatvamaṅgatvaṃ lakṣyate yenādhyāyena taṃ vakṣyāma iti sūtrārthamabhipretyāha --------- śeṣatveti //
sautrātaḥśabdasiddhāṃ pūrvottarādhyāyārthanirūpaṇayoḥ hetuhetumadbhāvasaṃgatiṃ darśayati -------- bhinnānāmiti /
dravyakarmaṇoriti //
dadhyādidravyāṇāṃ tathā karmaṇāṃ lokasiddhabhedavatāṃ dvitīye 'nirūpitabhedānāṃ mithaḥ aṅgāṅgibhāva ityarthaḥ /
karmaṇāmeva mitho 'ṅgāṅgibhāvanirūpaṇasya dvitīyādhyāyasiddhabhedanirūpaṇādhīnatvāt sāmānādhikaraṇyena saṅgatyupapattyā pariharati tathāpīti //
dravyādyaṅgatvanirūpaṇasya asmin pakṣe asaṅgatyāpattiṃ parihartuṃ pakṣāntaramāha ------- aṃśa eveti //
śeṣatvamātranirūpaṇasya adhyāyārthatvenetyādiḥ //
pramāṇanirūpaṇasya kariṣyamāṇasyādhyāyasaṅgatiṃ pariharannāha -------- taccāneketi //
tataśca śeṣatvalakṣaṇapratijñayaiva tatsaṃbandhivicārajātasya kariṣyamāṇasya sarvasya pratijñāyā apyadhyāyārthatvānna tasyāsaṅgatirityarthaḥ //
tatra bhāṣye kaḥ śeṣaḥ kena hetunā śeṣaḥ kathaṃ ca viniyujyate ityādīni ca viniyoge kāraṇānīha vakṣyante /
teṣāṃ ca balāvadabalavattā /
etattātparyeṇānyadapyupodghātādinetyanekaprakāratā darśitā /
tatra ḥśeṣaḥ parārthatvādḥiti uttarasūtre pañcamyantena hetūpādānadvārā lakṣaṇasyoktasya śābdatvapratītestenaiva arthātsiddhasya svarūpasyārthikatvamabhipretya svarūpakathanaparasyāpi bhāṣyasyārthikābhiprāyakatāṃ sūcayan lakṣaṇaparatayā vyākhyānaṃ darśayati ---------- aṅgatvalakṣaṇamiti //
yena pravṛttinimittena hetunā śeṣapadaṃ prayājādiṣu prayujyate, taccheṣapadaśakyatāvacchedakamevetyabhipretya dvitīyapratijñāparabhāṣyārthamāha ------- śeṣapadeti //
avaghātādikaṃ śrutyādibhirviniyujyamānaṃ śrutarūpāvacchinnoddeśyatābādhena sarveṣu viniyujyate uta tadabhāvenetyarthakatṛtīyapratijñāparabhāṣyasya tātparyārthaṃ darśayati --------- aṅgāṅgitayoriti //
etattātparyeṇānyadapyupodghātādineti bhāṣyasūcitaṃ pratijñāntaramāha -------- virodhaśceti //
ādipadena virodhāvirodhavicāraprasaktānuprasaktyā kariṣyamāṇavicārasya saṃgrahaḥ //
iti prathamaṃ pratijñādhikaraṇam //
------------- <B1> (2 adhikaraṇam)(a.3 pā.1 adhi.2)


śeṣaḥ parārthatvāt / Jaim_3,1.2 /


ihādyaṃ prakāradvayaṃ nirūpyate /
yadeva hi aṅgatvalakṣaṇaṃ tadeva śeṣapadaśakyatāvacchedakaṃ nānyat /
tatrāṅgatvaṃ nāma pārārthyam /
tacca yaduddeśapravṛttakṛtikārakatvena vihitaṃ yattatvaṃ tadaṅgatvam /
svargoddeśapravṛttapuruṣakṛtau yāgānukūlāyāṃ kārakatvena vidhyanvayācca yāge lakṣaṇasamanvayaḥ /
pradhānoddeśapravṛttapuruṣakṛtau prayājādyanukūlāyāṃ prayājādeḥ kārakatvena vidhyanvayācca prayājādāvapi saḥ /
dravyaguṇakālakartṛdeśādau ca yāgādyuddeśyayāgānukūlakṛtau karaṇatvakartṛtvādhikaraṇatvādikārakatvena vidheyatvādyāgāṅgatvāvighātaḥ /
ṣaṣṭhīsthale ca saṃbandhasāmānyābhidhāne 'pi kārakatva eva paryavasānānnāvyāptiḥ /
nimittasya ca kriyānvayino 'pi kārakatvābhāvānnāṅgatvāpattiḥ /
nimittasyānuṣṭhāpakatvākhyoddeśyatve 'pi ripsitatvākhyoddeśyatvābhāvācca na yāgasya nimittāṅgatvam /
lakṣaṇe tādṛśyā evoddeśyatāyā vivakṣitatvāt /
uddeśyatāpadenaiva ca karmakārakalābhāt kārakapadaṃ tadatiriktaparam /
kṛṣyāderapi yāgakṛtikārakatvādaṅgatvaprasaktau vidheyatvāntam /
yathācāsya na kvāpyavyāptyativyāptī tathā kaustubhe vistaraḥ /
evaṃ ca yatredaṃ na lakṣaṇaṃ, yathā yāgāderbhāvanādi prati, tatra bhākto 'ṅgatvavyavahāraḥ śāstre /
yadyapi ca nedṛśamaṅgatvaṃ śrutyādipramāṇakaṃ, kārakatvamātrābhidhāyitvāt tṛtīyādeḥ /
tathāpi yatpadārthaḥ svargādipadāt, taduddeśyakatvaṃ saṃsargādinā, kṛtirākhyātāt, kārakatvaṃ tṛtīyādeḥ, vidhyanvayitvaṃ vidhipadasamabhivyāhārāt /
vidhirhi viśiṣṭabhāvanāṃ vidadhadarthādviśeṣaṇānyapi vidhatte iti sarveṣāmuddeśyatvena vidheyatvena vā vidhyanvayaḥ /
ataevāṅgatvaghaṭakībhūtapadārthāntarāṇāṃ pramāṇāntareṇa prasiddhāvapi tadghaṭakakārakatvasya śrutyādigamyatvātteṣāmaṅgatvaprāmāṇyavyavahāraḥ // 3 // 2 //

// iti dvitīyaṃ śeṣalakṣaṇādhikaraṇam //

<B2> prayājādau śeṣapadavācyatānumāne parārthatvasya pañcamyā hetutvābhidhānāt tasyaiva śeṣapadaśakyatāvacchedakatvam, arthācca svarūpaparicāyakatvāt lakṣaṇatvamapītyabhipretyāha ------- yadevahīti //
yattu upakārakatvaṃ śeṣatvaṃ bādariṇocyate, yacca yena vinā yanna bhavati sa bījādiraṅkurādeḥ śeṣa ityevamavinābhāvahetukaṃ śeṣatvaṃ parairucyate, tannirākartuṃ "śeṣaḥ parārthatvādi" tisūtreṇa pārārthyarūpaṃ śeṣatvamuktaṃ jaimininā /
tadvyācaṣṭe --------- tatreti //
paśvaṅgabhūtānāmapi prayājagodohanādīnāṃ puroḍāśapraṇayanādyupakārakatvena tadaṅgatvāpatterayuktamupakārakatvarūpaṃ tallakṣaṇam tathā āgneyādīnāṃ mitho 'vinābhāvena parasparamaṅgatvāpatteravinābhāvalakṣaṇamapyayuktam, kintu pārārthyamevetyarthaḥ //
nanu kimidaṃ parārthatvaṃ nāma? tadyadi paroddeśapravṛttakṛti samavāyitvaṃ tadācetane yāgādāvavyāptiḥ, yaditūktakṛtisādhyatvaṃ tadā deśakālakartrādāvavyāptiḥ /
etena ------ paroddeśapravṛttakṛtivyāpyatvāparaparyāyamaṅgatvaṃ pārārthyamiti nyāyaprakāśoktaṃ -------- apāstam /
yadi tu uktakṛtisaṃbandhitvaṃ tadā nimitte 'tivyāptiḥ /
ataḥ pārārthyasyāpi nirvacanānarhatvānna tallakṣaṇatvaṃ saṃbhavatītyata āha -------- tatreti //
tadaṅgatvamiti //
taduddeśyanirūpitāṅgatvamityarthaḥ /
kārakatvena vidhyanvayāditi /
kṛtau kārakatvena hetunā tadviśiṣṭakṛtau vidhyanvaye satyarthāt viśeṣaṇībhūte yāge vidhyanupraveśena vidhyanvayādvihitatvaṃ yāge iti lakṣaṇasamanvaya ityarthaḥ //
saptamādye svargoddeśena prayājādīnāṃ vidhānāśaṅkānirākaraṇapūrvakaṃ pariplavatvaṃ nirākariṣyate, tadanusaṃdhāya lakṣaṇānvayaṃ darśayati -------- pradhānoddeśeti //
dravyasya kriyānivartakatvena guṇasya dravyaparicchedakatvena kārakatayā vidhānāt karaṇatvenānvayāt tatrāpi tadanvayaṃ darśayati --------- dravyeti //
etacca kramasyāpi padārthaparicchedakatvena kārakatayā vidhānāt tasyāpyupalakṣaṇam //
ṣaṣṭhīti //
yathādhvaryavamiti samākhyākalpitavidhau adhvaryoḥ ṣaṣṭhyā saṃbandhamātrāvagame 'pi tasya kartṛtve paryavasānerna kartṛtayā tattatpadārthāṅgatvamityarthaḥ //
nimittasyānuṣṭhāpakatayā uddeśyatvenānvayāt nimittoddeśapravṛttakṛtikārakatvena vihitatvasya yāge sattvānnimittāṅgatvaṃ nirasitumāha ---------- nimittasyeti //
yathācāsyeti //
atideśena prayājādīnāṃ paśuyāgoddeśapravṛttakṛtikārakatvena vihitatve 'pi paśupuroḍāśe upakāramātrākṣepeṇa padārthāṃśe 'tideśākalpanena taduddeśapravṛttakṛtikārakatvena vidhānābhāvānnātivyāptiḥ /
evaṃ godohanasya praṇayanopakārakasyāpi taduddeśyakakṛtikārakatvābhāvānnātivyāptiḥ //
atraca kṛtikārakatvamityetāvanmātroktau phalasyāpi karmatāsaṃbandhena kṛtikārakatvāt phalāṅgatvāpattiḥ /
ataḥ paroddeśapravṛttetyarthakaṃ yaduddeśapravṛtteti kṛtiviśeṣaṇam /
phalasyaca phalaṃ prati paratvābhāvāt phaloddeśapravṛttapuruṣakṛtau karmatayā phalasya vidhyanvayena bhoktraṅgatve 'pi na phalāṅgatvaprasaktiḥ, etadevābhipretya uddeśyatāpadenaivetyādyuktam /
apūrvasyāpi phaloddeśapravṛttakṛtau karaṇatvenānvayāt phalāṅgatvopapattirityādi kaustubhe draṣṭavyo vistara ityarthaḥ //
yadyapyavaghātādīnāmaṅgatve vrīhyādīnāṃ lokasiddhānāmevopādānānna taduddeśapravṛttakṛtirasti; tathāpi apūrvasādhanatvākāreṇa taduddeśyakṛtisaṃbhavānna kṣatiḥ //
bhāvanādipratītiḥ kṛteḥ kṛtyantarābhāvāt yāgasya bhāvanāṃ prati tasyāśca phalaṃ prati śabdabhāvanāyāśca arthabhāvanāṃ prati paśvādeśca kārakaṃ prati kārakatvasyaca kriyāṃ pratyaṅgatvavyavahāro bhākta ityarthaḥ //
yattu prakāśakāraiḥ ------ bhāvanāyāḥ phalāṅgatvādivyavahārasya mukhyatvasiddhau iṣṭoddeśyapravartanāprayojyatvaṃ svasveṣṭaṃ pratyaṅgatvam, prayojyatvañca kāryatatkāryasādhāraṇam /
pravartanākāryaṃ pravṛttistatkāryañca yāgaphalādi svasveṣṭaṃ pratyaṅgam ------- ityuktam, tat dravyadeśakālakartrāderapi karaṇatvādhikaraṇatvakartṛtvādipravṛttidvārā pravartanājanyatvena tasyāpyaṅgatvāpatteḥ śābdabhāvanāyā ārthabhāvanāṅgatvasyaivamapi durupapādatvāt ayuktamiti vyaktaṃ kaustubhe //
yadapi bhāṭṭālaṅkārakṛtā --------- vidhyanvayinyāṃ kṛtau yadviṣayatvānupapattiryaduddeśyakatvena parihriyate tat tasyāṅgaṃ tadarthamiti ------- uktam, tanna; kālasaṃbandhabodhakavākye kālādivṛttikṛtaviṣayatvānupapattiparihārasya karmoddeśyatvenāpyasaṃbhavādeva kāloddeśena karmaṇa eva kṛtiviṣayatvāṅgīkāreṇa karmaṇaḥ kālāṅgatvāpattyā kālasya karmāṅgatvānāpatteḥ /
asmanmatetu kṛtiviṣayatvarūpopādeyatvasāmānādhikaraṇyena vidheyatvasyaiva autsargikasya sannidhyādipratyabhijñāpakapramāṇasattve bādhenopādeyatvasamānādhikaraṇavidheyatvāsaṃbhave 'pi ajñātatadadhikaraṇatvajñāpanena vidheyatvaṃ nānupapannam //
atraca vyāpārabhedena kārakāṇāṃ bhedāt tadghaṭitāṅgatvasyāpi pratipadārthaṃ bhedāvagamena tattadaṅgatvaṃ prati prayājatvādereva lakṣyatāvacchedakatvaṃ sūcayituṃ lakṣaṇe yattacchabdopādānam /
kṛtikārakatvena vidhyanvayitvarūpapārārthyasya śrutyādipramāṇāni vinā vaktumaśaktestānyapyarthādiha upakṣiptānīti dhyeyam // //
iti dvitīyaṃ śeṣalakṣaṇādhikaraṇam //
-------------- <B1> (3 adhikaraṇam / ) (a.3 pā.1 adhi.3)


dravyaguṇasaṃskāreṣu bādariḥ / Jaim_3,1.3 /


yadyapi pārārthyamaṅgatvaṃ tathāpi na yāgāderlakṣyatā /
samānapadaśrutyā yāgādereva bhāvanābhāvyatvena tasya svargoddeśena vihitatvābhāvāt /
vidheḥ svarūpayogyatvenaiva liṅarthatayā iṣṭasādhanatvānākṣepakatvāt /
ākṣepakatve 'pi bhramapramāsādhāraṇyeneṣṭasādhanatvajñānasyaiva kāraṇatayeṣṭasādhanatvasiddhau pramāṇābhāvācca /
svargakāmapadasya tu strīkāmaḥ prāyaścittaṃ kuryāditivat kartṛparatvādināpyupapatterna bhāvyaparatvāvaśyakatā /
ato na yāgāderlakṣyatvam /
vastutastu ---------- upakārakatvameva śeṣatvam; tadarthe 'pyapakārake śeṣatvavyavahārābhāvāt /
tacca śrutiliṅgavākyarūpapramāṇatrayameva /
ataeva vrīhyāderdravyasyāruṇyāderguṇasyāvaghātādeḥ saṃskārasya copakārakatvadarśanāccheṣatvam /
prokṣaṇādisaṃskārasya tu liṅgenāṅgatvāsaṃbhave 'pi śrutivākyābhyāmaṅgatvapratītestadbalenaiva upakārakalpanayā śeṣatvopapattiriti teṣāmeva lakṣyatvamiti prāpte ----- nopakārakatvaṃ śeṣatvam, godohanadadhyānayanāderapi praṇayanavājinayāgāṅgatvāpatteḥ, api tu pārārthyameva /
apakārakasthale tu tadapakārasyaiveṣṭatvenoddeśyatā na tu tasyeti na tadarthe 'pyapakārake śeṣatvavyavahāraḥ /
tadapi śrutyādiṣaṭpramāṇagamyamiti vakṣyate /
ataśca vākyādyāgo 'pi phalaṃ pratyaṅgam /
tathāhi -------- yadyapi vidheḥ svarūpayogyatayaiva pravṛttyanukūlatvaṃ liṅāvagamyate; tathāpi kadācit pravṛttyabhāve vidhivaiyarthyāpatteravaśyaṃ kadācittayā bhavitavyam /
tadā ceṣṭasādhanatājñānaṃ vinā tadasaṃbhavāttasya ca bādhakābhāve bhramatvāyogādiṣṭasādhanatvaṃ tāvadyāgasyavidhibalādavagamyate, iṣṭaviśeṣasādhanatvaṃ ca svargakāmādipadasamabhivyāhārāditi yāgasya svargāṅgatvasiddhiḥ /
evaṃ phalasyāpi bhoktṛpuruṣāṅgatvam /
bhoktā cotsargato vidhivaśātkāmanāvaśādātmanepadavaśācca kartaiva, pramāṇasattve tvanyaḥ /
atrāṅgatvavyavahāro bhākta iti tu dhyeyam /
puruṣaḥ punaḥ kartṛtvādinā yāgādyuddeśyakakṛtikārakatvādvākyādeva tadaṅgaṃ ityavivādameva // 3 //
// iti tṛtīyaṃ yāgaphalapuruṣāṇāṃ svargapuruṣādyaṅgatādhikaraṇam //

<B2> atroktasya lakṣaṇasya lakṣyapradarśanadvārā kaḥ śeṣa ityayamaṃśo nirūpyata ityabhipretyāha -------- yadyapīti //
nanu liṅaḥ phalopahitapravṛttyanukūlavyāpārarūpapravartanābhidhāyitvāt tayā ca phalopahitapravṛtteriṣṭasādhanatājñānaṃ vinā ajananāt tadākṣepāvaśyaṃbhāve iṣṭoddeśena sādhanatayā vidhānasaṃbhavāt kathaṃ na yāgāderlakṣyatvamityata āha -------- vidheriti //
yogyatayā pravṛttyanukūlavyāpāratvameva liṅarthaḥ, natu phalopahitapravṛttyanukūlatvam, yena pravṛttiviṣayasya yāgāderiṣṭoddeśyakakṛtikārakatvamākṣipet; kāmye karmaṇi kāmanāyāṃ satyāmapi vidhiśataśravaṇe 'pi kadācitpravṛttyajananāt /
ataśca pravṛttijanane yogyamātrasya vidheḥ svaviṣaye iṣṭoddeśyakakṛtikārakatvānākṣepakatvānna yāgādeḥ pārārthyasiddhirityarthaḥ //
nanu svargakāmapadena svargasya uddeśyatvāvagame satyarthādyāgasya bhāvyāṃśopanipātāsaṃbhavāt karaṇatvenaiva vidhānānnānupapattirityata āha -------- svargakāmeti //
evañca yāgasyaiva bhāvyatvāt svargakāmasya kartṛtvenānvayāt phalābhāvānna yāgasya phalāṅgatvam navā phalasya puruṣāṅgatvam, puruṣasya tu kartṛtvenānvayāt yāgāṅgatvamityabhipretyopasaṃharati --------- ata iti //
tadarthe 'pīti //
makṣikānivṛttyartheṣu dhūmeṣu makṣikārtho dhūma iti pratīteḥ parārthatve vidyamāne 'pi makṣikāśeṣatvavyavahārābhāvāt apakārakavyāvṛttamupakārakatvameva śeṣatvam /
tacca yatra pratyakṣādināvagamyate tatraiva saṃbhavatīti na yāgāderlakṣyatvamityarthaḥ /
liṅgeneti //
sāmarthyenāvadhātavat upakārakatvāsaṃbhave 'pītyarthaḥ /
śrutīti //
vrīhīniti dvitīyā śrutiḥ tadantapadasya prokṣatīti samabhivyāhāro vākyaṃ tābhyāmityarthaḥ /
teṣāmeveti //
evakāreṇa yāgasya prayājādervā pratyakṣadvitīyāvākyebhyaḥ upakārakatvādarśanāt alakṣyatvaṃ sūcitam //
ataśca vākyāditi //
karaṇatvabodhakatṛtīyādyabhāvena vākyādityuktam prayājāderaṅgatvasidhyai prakaraṇasyāpyupalakṣaṇam /
iṣṭaviśeṣeti //
ataścāpekṣiteṣṭaviśeṣasamarpakameva svargakāmapadaṃ lakṣaṇayā svargākhyabhāvyaparam, na kartṛparam; āpātataḥ pratīyamānakartṛparatatpadena samarpaṇantu yajaterakarmakatvānurodhādityarthaḥ /
pramāṇasattve tviti //
yathā jāteṣṭau pūta eva tejasvītyupasaṃhāraikavākyatārūpapramāṇasattve putra ityarthaḥ /
bhākta iti //
bhoktuḥ pravṛttapuruṣāpekṣayā paratvābhāvāduddeśyatayā vidhyanvayāśravaṇācca taduddeśapravṛttakṛtikarmatvarūpamukhyāṅgatvāsaṃbhavāt bhākta ityarthaḥ //
kartṛtvādineti //
ādipadena audumbarīsammānādiṣu sādhanatvena karaṇatāsaṃgrahaḥ /
pūrvapakṣe 'pi bādariṇā dravyāṇāṃ śeṣatvasyāṅgīkārāt puruṣasya dravyātvenāṅgatve nobhayorvivāda iti puruṣaśca karmārthatvāditi punaḥ sūtrapraṇayanavaiyarthyamavivādamevetyanena sūcitam //
prayojanaṃ pūrvapakṣe prayājādīnāmaṅgatve prakaraṇādipramāṇābhāvāt arthavādikasya svargasya vā phalatvakalpanayā prādhānyānnātideśaḥ /
siddhāntetu sa iti spaṣṭatvānnoktam //
iti tṛtīyaṃ yāgaphalapuruṣāṇāṃ svargapuruṣādyaṅgatādhikaraṇam //
----------------- <B1> (4 adhikaraṇam / ) (a.3 pā.1 adhi.4)

teṣām //
tadevamaṅgatve nirūpite 'ṅgatve śrutyādīni ṣaṭ pramāṇānītyuktam /
tatra śrutirnāmāṅgatvaghaṭakībhūtoddeśyatā --------- kṛtikārakatvayoranyatarasya prādhānyena vācakaḥ śabdaḥ /
sa ca dvitīyātṛtīyādivibhaktirūpaḥ /
kṛnniṣṭhātṛjādivyāvṛttyarthaṃ prādhānyeneti /
tasya kārakatvaviśiṣṭadravyavācitvena prādhānyena kārakatvavācitvābhāvāt /
ataeva prokṣitābhyāmulūkhalamusalābhyāmavahanti, vāraṇo yajñāvacara ityādau vākyīya eva viniyogo na tu śrautaḥ /
tatra dvitīyā uddeśyatvaparā satī prokṣaṇāderaṅgatve hetuḥ /
vastutastu r-------- ipsitatvākhyāyā uddeśyatāyāḥ sādhyatāmātravācidvitīyāvācyatvābhāvāttatrāpi na mukhyā śrutiḥ, api tu bhakta eva śrutivyavahārarḥ; ipsitatvāṃśe lakṣaṇāṅgīkārāt /
ataścoddeśyatāpadamapi naiva lakṣaṇe deyam /
evaṃ ṣaṣṭhyādāvapi kārakatvaśaktatvābhāvāt śrutitvavyavahāro bhākta eva /
evaṃ yatrāpi vibhaktyā lakṣaṇayaiva kārakāntarapratipādanaṃ, tatrāpi vākyīya eva viniyogo na śrautaḥ /
evaṃ samānapadaśrutyādiṣvapi draṣṭavyam /
tadevaṃ śruterviniyojakatve tadbhūtādhikaraṇenaiva siddhe 'dhunā gauṇamukhyasādhāraṇaśrutiviniyogopayogya- ṅgāṅgitayoravacchedakavicāraḥ kriyate /
darśapūrṇamāsayorvīhīnavahanti, ājyamutpunāti, gāṃ dogdhītyādaya ājyauṣadhasānnāyyasaṃbandhinaḥ saṃskārāḥ śrutāḥ /
teṣu kiṃ sarvasādhāraṇamavaghātavidhāvuddeśyatāvacchedakaṃ utājyādivyāvṛttaṃ, evamanyatrāpīti vicāraḥ /
tatra na tāvacchrutaṃ vrīhitvādikamevoddeśyatāvacchedakam; ānarthakyāpatteḥ, avaghātaprokṣaṇādivyatirekeṇāpi vrīhitvāvacchinnāderjāyamānatvāt, yaveṣvanāpatteśca /
ato navamādhikaraṇanyāyena vrīhitvāvivakṣayāpūrvasādhanatvalakṣaṇāyā āvaśyakatvāttatra phalapratyāsannatvādekatvādārādupakārakeṣu kḷptaprayojakaśaktimattvācca paramāpūrvasya tatsādhanatvameva pradeyaghaṭakatvasaṃbandhena lakṣyate /
asti cāgneyādestat pratyapi sādhanatā /
ataeva na vāṅniyamanyāyo 'pi /
ataścoddeśyatāvacchedakasya sarvasādhāraṇatvādājyādiṣvapyavaghātādeḥ saṅkaraḥ /
naca pratiniyatanirdeśādvyavasthā; tathātve vrīhitvādivivakṣāyā āvaśyakatve nīvārādiṣvanāpatteriti prāpte ---------- yadyapi vidhiraviśeṣapravṛttaḥ syāt; tathāpi dṛṣṭārthatvaniyamavidhilāghavānurodhena viśeṣe vyavasthāpyeta, kimuta yadā so 'pi viśeṣapravṛtta eva /
vrīhyādipade pratyāsattyā āgneyādyutpattyapūrvasādhanatvasyaiva lakṣyatvāt /
tasyāpyanirjñātaprakāratvena dharmaprayojakatvopapatterānarthakyābhāvena tadatikramakāraṇābhāvāt, paraṃparayā phalavattvācca /
ato vrīhipadena vrīhisādhyāni yāni āgneyāgnīṣomīyaindrāgnyutpattyapūrvāṇi tanniṣṭhakāryatānirūpitayāgādiniṣṭhakāraṇatāsamānādhikaraṇakāryatānirūp itapradeyaprakṛtibhūtataṇḍularūpavyāpārakasādhanatāsāmānyāśrayatvasyaiva coddeśyatāvacchedakatvena vivakṣitatvānnājyādiṣu prasaṅgaḥ /
atra cāpūrvatrayasyaikānugamakābhāve 'pi ekapadopādānādavākyabhedaḥ /
tattadvyāpārakasādhanatā eva ca vivakṣyante na tu sādhanatāvacchedakādīnyapi /
tena yāgatvapuroḍāśatvavrīhitvādyabhāve 'pi na kṣatiḥ /
yathā ca vrīhiyavayoḥ kāraṇatābhede 'pi yavasādhāraṇyaṃ, tathā kaustubhe vistaraḥ /
tatra tatra navamādau copapādayiṣyate // 3 // 4 //
// iti caturthaṃ nirvāpādīnāṃ vyavasthitaviṣayatādhikaraṇam //

<B2> atra prāthamikaśrutiviniyogopayoginirūpaṇasya prathamapādārthatvamabhipretya tṛtīyapratijñāviṣayībhūtārtha- nirūpaṇāt prathamataḥ śrutilakṣaṇamāha ------- tatreti //
ata eva prokṣitābhyāmiti /
prokṣitetiniṣṭhāpratyayena karmatvaviśiṣṭolūkhalamusalarūpadravyābhidhānena sākṣāt prādhānyena tadvṛttyuddeśyatāyā abodhanānna śrutyā prokṣaṇasya tadaṅgatvam, apitu vākyāt /
evaṃ vāraṇavākye 'pi avacaryate 'nuṣṭhīyate 'neneti vyutpattyā yajñasādhanatvabodhanādityarthaḥ /
paroddeśapravṛttakṛtikārakatvarūpapārārthyabodhane uddeśyasya prādhānyāt tatpratipādakadvitīyāśrutikṛte pārārthyavyavasthāvyavasthe vicārayituṃ prathamatastasyāḥ pārārthyapramāṇatvamupapādayati ------ tatreti //
tṛtīyādivibhaktiryatparā satī tadarthasya kārakatāpratipādanenānyāṅgatvaṃ bodhayati, dvitīyātu na svaprakṛtyarthasya anyāṅgatvabodhikā kintu svaprakṛtyarthasya uddeśyatābodhanadvārā anyārthasya vidheyatāpādanena karaṇatātātparyeṇānyārthasya svaprakṛtyarthāṅgatvabodhiketi vaiṣamyeṇa tasyāḥ pramāṇatvamupapādayati --------- uddeśyatvaparā satīti //
naiva lakṣaṇe deyamiti //
nanu -------- kṛtikārakaphalasya prādhānyena vācaka ityetāvallakṣaṇakaraṇe 'pi karmatvavācinyā dvitīyāyā mukhyaśrutitvamupapadyata eva, viniyojakatāprakāramātraṃ pūrvoktavaiṣamyeṇāstu iti --------- cet ------ na; aṅgatvalakṣaṇe uddeśyapadopādānena tadatiriktatvenaiva kṛtikārakatvasya vivakṣaṇāt tasyāstatpramāṇatvānupapatteḥ /
ata eva aṅgatvaghaṭakībhūtetyapi niveśitam /
yuktaṃ caitat --------- nahi yasya prokṣaṇādeḥ karaṇatvena vrīhyaṅgatvaṃ bodhyate tatpramāṇaṃ dvitīyā bhavati; tasyāḥ svaprakṛtyarthavṛttyuddeśyatāmātrabodhakatvāt /
atastadantapadasamabhivyāhārarūpavākyagamyameva tatrāṅgatvam /
dvitīyāntānāṃ śrutitvena pūrvoktaviniyojakatāprāmāṇyavyavahārastu satyapi śrutapadasannidhirūpe vākyatve attratvaghaṭakībhūtoddeśyatākṛtikārakatvavācakapadakalpanānukūlatvābhāvasāmyamātreṇa bhāktaḥ /
tatprayojanaṃ ca liṅgaśrutyādyakalpanena liṅgāpekṣayā prābalyasiddhiḥ /
ataeva asminmate "ityaśvābhidhānīmādatte" ityatra satyapi vākyīye viniyoge śrutitvena liṅgabādha upapadyata ityāśayaḥ //
evaṃ yatrāpīti //
yathā prayājaśeṣeṇetyatra dvitīyātṛtīyādivibhaktyoḥ lakṣaṇayā haviṣāmadhikaraṇatvenāṅgatvam, tathā prayājaśeṣāṅgatvamabhighāraṇasya tatretyarthaḥ /
evamiti //
yattu bhāṭṭālaṅkāre -------- śeṣiśeṣatvābhimatayostattadrūpeṇopasthitayoḥ saṃbandhajñānaṃ vyavadhānamanapekṣya yacchabdajñānena janyate sā viniyoktrī śrutiriti śrutilakṣaṇaṃ kṛtvā saṃbandhaścāṅgatvātmanā sādhanatvātmanā saṃbandhātmanā vā pratīyatāṃ na tadviśeṣalakṣaṇāpekṣyate, tena kṛt-tṛtīyā-ṣaṣṭhī-padaśrutyādīnāṃ saṃgraha ityuktaṃ, tatra yadi ṣaṣṭhyarthopasthitivilambakṛtavyavadhānābhāvavivakṣaṇam, tadā yāgasya svargasaṃbandhe apūrvopasthitikṛtavilambakṛtavyavadhānasāpekṣatvāttadviniyojakapadaśrutāvavyāptiḥ /
yaditu śabdāntaropasthitārthapratītivilambakṛtatadabhāvavivakṣaṇam, tadā āruṇyasya ekahāyanīśabdāntaropasthitagorūpārthaparicchedadvāravyavadhānāpekṣatvāt krayāṅgatvaviniyojakaśrutāvavyāptiḥ ityayuktam /
ataeva -------- etādṛśavyavadhānasattve 'pi yatra śaktyā kārakatvam, tatra śrutitvam yatratu na, tatra gauṇaśrutitvaṃ ityaṅgīkāreṇaivāruṇyādīnāṃ krayāṅgatvaṃ mukhyaśrutyā, yāgasya svargārthatvaṃ gauṇaśrutyeti pūjyapādānāmabhipretamiti dik //
tadevaṃ śruteriti //
evaṃ lakṣaṇalakṣitāyā mukhyaśruteḥ gauṇaśruteścetyarthaḥ /
tadbhūteti //
tarkapāde vākyagatakārakavācipadārthānāṃ kriyānvayasya "tadbhūtānāṃ kriyārthatvena samāmnāya" iti sūtreṇa pratipādanāt śrutyā kriyānirūpitakārakatvasyārthādevopapatteḥ śrutiviniyojakatve siddha ityarthaḥ //
aṅgāṅgitayoriti //
yadyapyetatprabhṛtyaṅgitāvacchedakameva vicārayiṣyate, nāṅgatāvacchedakam; tathāpi aṅgitāvacchedake nirūpite tādṛśoddeśyatāvacchedakarūpāvacchinnoddeśyakapravṛttakṛtikārakatvameva tannirūpitāṅgatāvacchedakamityasyārthāt siddhimabhipretyobhayopanyāsaḥ /
ityādaya iti //
ādipadena sānnāyyadharmāṇāṃ dohanātañcanādīnāṃ saṃgrahaḥ //
evamanyatrāpīti //
somaprakaraṇagatābhiṣavādidharmeṣvapītyarthaḥ //
kathañca viniyujyata iti pratijñāyā ājyādivyāvṛttarūpāvacchinnoddeśena viniyujyate iti siddhāntena nirākāṅkṣīkaraṇāt tadvaiparītyena pūrvapakṣamāha -------- tatreti //
nanu phalajanakatayā siddhavaijātyāvacchinnayāgoddeśena dravyādividhānāt tādṛśavaijātyāvacchinnayāgasya taddravyagatasaṃskāraṃ vinotpattau pramāṇābhāvāt vrīhyarthatve 'pi nānarthakyāpattirityata āha -------- ato navameti //
vrīhyādidravyavidhīnāṃ niyamavidhitvopapādakapākṣikaprāptisidhyai vijātīyayāgavyaktīnāmapi vyāpakībhūtayāgatvāvacchinnavyaktyantargatatvāt tadavacchinnaṃ pratica vināpi dravyāntareṇa vijātīyayāgotpatterbādhakābhāvena avaśyāṅgīkāryatvāt tadutpattau sutarāṃ tatsaṃskārāpekṣāyāṃ mānābhāvenānarthakyasya tadavasthatvāt apūrvasādhanatvalakṣaṇā āvaśyakī /
tadāca viśeṣaṇībhūtāpūrvaṃ pratyarthājjanakatvāvagamāt tasya cādṛṣṭarūpasya śrutasaṃskārairvinotpattau mānābhāvādānarthakyaparihārāsaṃbhavāt tādṛśāpūrvasādhanatvasya pradeyaghaṭakatayā lakṣaṇīyasya rūpasya yaveṣvivājyādiṣvapi sattvāt sarvārthaṃ dharmāityarthaḥ //
nanu evamapūrvasādhanatvalakṣaṇāyāmapi vrīhijanyatvena pratyāsattyāgneyāvāntarāpūrvasādhanatvasyaiva lakṣaṇaucityāt tadasādhanājyādiṣu aprāptirityata āha -------- tatra phaleti //
pratyāsatterāgneyavadagnīṣomīyaindrāgnayorapyaviśiṣṭatvena tadapūrvasādhanatvasyāpi lakṣaṇīyatvāt pravṛttyekānugatadharmābhāvenāvāntarāpūrvasādhanatvaviśeṣalakṣaṇānupapatteḥ phalapratyāsannatvāt sarvānugataphalāpūrvasādhanatvenaiva lakṣaṇayā dharmasāṃkaryamanivāryamityarthaḥ /
dīkṣaṇīyoddeśena vihitasya vāṅniyamasya dīkṣaṇīyāyāḥ jyotiṣṭomāpūrvasādhanatvābhāvena dīkṣaṇīyāpadenatasya lakṣayitumaśakyatvāt dīkṣaṇīyāpadena svasādhyāpūrvasādhanatvalakṣaṇayā tatsādhyajyotiṣṭomāpūrvasādhanatvalakṣaṇāyāṃ lakṣitalakṣaṇāpattestadarthatvaṃ nāṅgīkṛtam, apitu dīkṣaṇīyāvāntarāpūrvārthatvameva, prakṛtetu vrīhijanyayāgajanyatvasya paramāpūrve 'pi sattvena vrīhipadena tallakṣaṇāmātropapatteḥ nāvāntarāpūrvārthatvamityabhipretya vaiṣamyamāha -------- ata eveti //
dṛṣṭārthatveti //
avaghātasyāpūrvārthatve 'pi tatsādhanavrīhigatadṛṣṭaprayojanadvāraiva tadarthatvamiti vrīhyarthatve vaituṣyarūpadṛṣṭārthatvamājyādyaṃśe 'dṛṣṭārthatvamiti vairūpyasya tathā vaituṣyārthatve avaghātavidherniyamavidhitvam adṛṣṭārthatvetu apūrvavidhitvamiti vairūpyasya cāpattestatparihārāyaikarūpyāśrayaṇe lāghavāt niyamavidhitvadṛṣṭārthatvānurodhena auṣadhadravyavṛttyapūrvasādhanatvameva lakṣayitvā taddharmatvameva yuktamityarthaḥ //
nanu aviśeṣapravṛttavidhyanurodhena vairūpyāṅgīkaraṇaṃ sarvatraiva vādṛṣṭārthatvāṅgīkaraṇaṃ na doṣa ityata āha ------- kimuteti --------- pratyāsattyeti //
vrīhipadābhidheyārthasya vrīhyādestaṇḍulaniṣpattidvārā prathamataḥ puroḍāśasaṃpādanena utpattyapūrvasādhanatvāt tadatikrame kāraṇābhāvāt yadeva vrīhyādibhiḥ sādhyamapūrvaṃ tatsādhanatvasyaiva pratyāsattyā lakṣyatvādityarthaḥ /
yadi kathamapi tatsādhanatvalakṣaṇāyāmānarthakyaparihāro na bhavet, tadā agatyā tadvihāya paramāpūrvasādhanatvaṃ viprakṛṣṭamapi lakṣyeta,natvetadasti; tasyāpyanirjñātaprakāratvena tadarthatve 'pyānarthakyaparihāropapatterityāha -------- tasyāpīti //
ata eva yatra saptadaśāratnitvādivyatirekeṇa prakṛtau apūrvasiddhiḥ paśvapūrvasiddhirvāvadhāritā tatra tadatikrameṇāpi paraṃparayā vājapeyāpūrvaprayojakatvamiṣyata eva, prakṛtetu tadabhāvāt pratyāsattyāśakyasaṃbandhānurodhena vrīhitvasamānādhikaraṇāgneyotpattyapūrvasādhanasaṃbandhipradeyaghaṭakataṇḍulaniṣpattirūpavyāpārakasādhanatāśrayatvasyaiva lāghavāllakṣaṇeti bhāvaḥ /
āntarālikatattadvyāpārakasādhanatāniveśena lakṣaṇāprakāraṃ darśayati ---------- ata iti //
piṣṭarūpavyāpāravyāvṛttaye pradeyaprakṛtibhūtetyuktam /
tasya pradeyatvena tatprakṛtitvābhāvāt /
yathaiva hyāmikṣā payaso na dravyāntaram, kintu ghanībhāvāpannaṃ paya eva, yathāvā saktava eva saktupiṇḍaḥ, natvarthāntaram, jalasaṃyogādikañca piṇḍabhāve nimittakāraṇamātram, tathaivajalāgnyādisaṃyogasya piṇḍaṃ prati nimittakāraṇatve 'pi na piṣṭādarthāntaraṃ puroḍāśaḥ, kintu piṇḍāvasthāmātram /
ataḥ sa taṇḍulaprakṛtika eveti na piṣṭasya vyāpāramadhye praveśaḥ /
ataeva carau puroḍāśasthānāpanne piṣṭaprakṛtitvābhāve 'pi taṇḍulaprakṛtikatvādeva dharmaprāptyavighātaḥ /
yadyapi yatra piṣṭasyaiva pradeyatā tatra taṇḍulaprakṛtikatvena dharmaprāptirdurnivārā; tathāpi sarvatrānovāsodhikaraṇanyāyena siddhasyaiva puroḍāśādeḥ grahaṇaprasaktau prayogāntaḥ śrapaṇavidhyanyathānupapattyā prayogamadhye saṃpādanāvaśyakatayā tatraiva prakṛtidravyopādāne tanniyamavidhānāt tādṛśaniyamyamānadravyeṣveva dharmāṇāṃ vidhānam /
yatratu piṇḍataṇḍulādau pradeye na śrapaṇaprāptistatra puroḍāśādipadavācyapakvapiṇḍādighaṭakapākaprayojakasya tasyābhāve peṣaṇavat lopaucityena anovāsovallaukikasyaiva piṣṭataṇḍulādeḥ upādānāttaṇḍuleṣviva na piṣṭe 'pi prayogamadhye taṇḍulopādānam na vā vrīhiprakṛtitvaniyama iti na taddharmaprāptiḥ /
ataeva "vrīhibhiryajete"ti vākye svapradeyaprakṛtibhūtataṇḍulavyāpāradvāraiva apūrvasādhanībhūtayāgoddeśenaiva saṃskāravidhaya ityarthaḥ /
itopyadhikaṃ kaustubhe draṣṭavyam //
nanu tattadvyāpārakasādhanatānāṃ āgneyatvavrīhitvāvacchinnānāṃ niveśe sauryādau tattaddharmāvacchinnasādhanatānāmabhāve kathaṃ tadbhinnadharmāvacchinnasādhanatāśrayeṣu dharmaprāptirityata āha ------- tadvyāpāraketi //
yāvatā vinā nānarthakyaparihārastāvanmātrasyāgatyā praveśe /
apīha sādhanatāmātrapraveśena tatparihāropapattau na tadavacchedakānāṃ vrīhitvādīnāṃ praveśaḥ; gauravāt /
nacātiprasaṅgaḥ; vāraṇasyāpi tāvataiva saṃbhavāt /
evañca naivāre carau yaveṣuca dharmaprāptiravikaletyarthaḥ //
nanu vrīhiyavayoḥ śabdāntarāt guṇādvā kāraṇatābhedāt vrīhigatataṇḍulaniṣpattivyāpārakasādhanatāśrayatvābhāve kathaṃ yaveṣu dharmaprāptiḥ? ataeva etādṛśasādhanatāśrayatvābhāve 'pi vikṛtau nīvārakaraṇatāyāḥ prākṛtakāryāpattyā tadavacchinneṣu nīvāreṣu atideśena dharmalābhe 'pi prakṛtau tadabhāve na kathamapi tatprāptirityata āha --------- yathāceti //
yathaiva sādhanatāmātravivakṣayā'narthakyaparihāre sati na sādhanatāvacchedake vivakṣā; gauravāt, evaṃ sādhanatāsāmānyavivakṣayāpi tatparihāropapattestulyatvena śakyasaṃbandhavidhayā praviṣṭasyāpi na sādhanatāviśeṣasya vivakṣayā lakṣyatāvacchedake uddeśyatāvacchedake vā praveśo gauravāditi sādhanatāsāmānyāśrayatvavivakṣayā yuktā yaveṣu dharmaprāptirnājyādiṣviti kaustubhe vistara ityarthaḥ //
iti caturthaṃ nirvāpādīnāṃ vyavasthitaviṣayatādhikaraṇam //
---------------- <B1> (5 adhikaraṇam / ) (a.3 pā.1 adhi.5) dravyam //
darśapūrṇamāsayoḥ, sphyaśca kapālāni ceti daśa dravyāṇyanukramyaitāni vai daśa yajñāyudhānīti śrutena vākyena daśānāpi dravyāṇāṃ yajñasādhanatvena vidhānādutpattiśiṣṭa puroḍāśādyavarodhena ca sākṣādyāgasādhanatvāyogādaṅgeṣvavatārāt prakṛtāpūrvasādhanībhūtadravyasākāṅkṣaśakyakriyātvāvacchinnoddeśena dravyāṇi vidhīyante /
sphyenoddhantītyādiviśeṣaviniyogāstvavayutyānuvādā iti prāpte ---------- tena tena pratyakṣavidhinā tṛtīyāśrutisahakṛtena sphyādīnāṃ viśiṣya viniyogād yajñāyudhavākyamevaikamaśrutavidhikaṃ vai -------- śabdopabaddhamanuvādakam /
bahūnāmanuvādānāṃ vaiyarthyāt /
asya ca yajñāyudhāni saṃbhavantītyetadvidhyarthavādatvena sārthakatvāt /
tasmāduddhananamātrajanyavyāpārakaprakṛtāpūrva- sādhanatvamevoddhananapadena lakṣayitvā taduddeśenaiva sphyādividhiḥ // 3 // 5 // iti pañcamaṃ śrautaviniyogadhikaraṇam //
<B2> pūrvādhikaraṇamārabhya triṣvadhikaraṇeṣu saṃskāradravyaguṇānāmuddeśyatāvacchaidakanirūpaṇena viniyogaprakāre nirūpitavye pārārthyaghaṭakoddeśyatābodhakatvena prādhānyāt dvitīyāśrutikṛtaviniyogaprakāraṃ pūrvādhikaraṇe nirūpya adhunā tṛtīyāśrutivikṛtaviniyogaprakāraṃ dravyaviṣaye nirūpayitumudāharati -------- darśapūrṇamāsayoriti //
prākaraṇikasarvayogyadravyamātre niveśāyāpūrvasādhanatālakṣaṇāyai draśapūrṇamāsayorityuktam /
itikaraṇena prabhṛtyarthakena ca "agnihotrahavaṇīca śūrpañca kṛṣṇājinañca śamyā colūkhalañca musalaṃ ca dṛṣaccopalā ce" tyantasya saṅgrahaḥ /
sphyenoddhantītyādīnāṃ vidhitvena sphyādīnāmuddhananādiṣu viniyoge 'pi pūrvatrātiprasaktalakṣaṇāyāṃ pramāṇābhāvādvrīhimātrajanyavyāpārakasādhanatālakṣaṇāyāmapīha yajñāyudhavākyasya tātparyagrāhakasya sattvāt atiprasaktalakṣaṇāyāṃ na bādhakamiti viśeṣāśaṅkānirāsāya punarārambhamabhipretya pūrvapakṣamāha ------- daśānāmapīti //
vaiśabdopabaddhasyāpyasyāprāptārthakatvāt kartavyatāvācipadādhyāhāreṇa vidhāyakatvamabhipretya vidhānādityuktam /
āyudhaśabdasya yuddhasādhanavācino 'pi yajñapadānurodhāt sādhanamātraparatvalakṣaṇayā sādhanatvenetyuktam /
sphyenoddhantītyādīti ādipedana "kapāleṣu śrapayati agnihotrahavaṇyā havīṃṣi nirvapati śūrpeṇa vivinakti kṛṣṇājinamadhastādulūkhalamavastṛṇāti śamyāṃ dṛṣadyupadadhāti ulūkhalamusalābhyāmavahanti dṛṣadupalābhyāṃ pinaṣṭī" tyantānāṃ saṃgrahaḥ /
itarat spaṣṭārtham /
iha sphyādīnāṃ sarvārthatve nirākṛte caturthe punasteṣāṃ pradeyatvamāśaṅkya nirākriyata iti na virodhaḥ /
ubhayatrāpītyaudumbarādhikaraṇasiddhārthavādatvaṃ yajñāyudhavākyasyābhipretya anuvādoktiriti dhyeyam /
prayojanaṃ spaṣṭatvānnoktam // //
iti pañcamaṃ śrautaviniyogādhikaraṇam //
---------------- <B1> (6 adhikaraṇam / ) (a.3 pā.1 adhi.6) arthaikatve //
jyotiṣṭome aruṇayā ekahāyanyā piṅgākṣyā somaṃ krīṇātīti śrutam /
tatrāruṇaśabdo 'ruṇaguṇavacano 'ruṇatvajātivacano vā na tu viśiṣṭavyaktivacanaḥ /
tṛtīyayā ca śakyasyaiva karaṇatvamucyate, na tu tadarthaṃ dravyalakṣaṇā /
ṭābādyartho 'pi tatraiva sāmānādhikaraṇyenānvīyate, na tu tadarthamapi vyaktilakṣaṇā; avyutpattyāpatteḥ /
yathācaivaṃ sati guṇavacanānāmāśrayato liṅgavacanāni bhavantītyādyanuśāsanopapattistathā kaustubhe draṣṭavyam /
ekahāyanyādipadānāṃ tu bahuvrīhitvādavayavārthaviśiṣṭānyapadārtharūpe dravya eva śaktiriti prāñcaḥ /
anyapadārthe padadvayasya lakṣaṇeti tu bahavaḥ /
naca ------- dravyasyaikenaiva padena vidhisaṃbhave itareṇa vidhyanupapattirvaiyarthyaṃ ceti --------- vācyam; ubhayoryugapatpravṛttervihitavidhānābhāvāt, guṇāntaraparatvena sārthakyācca /
śakyate tvatrāpi āruṇyanyāyena lakṣaṇāpi neti vaktum; samāsānuśāsanasya matubādyanuśāsanavadupapatteḥ /
dravye pārṣṭhakaguṇasaṃbandhopapādanañca pramāṇāntarapramitadravyamādāyopapādanīyamiti na kaścit virodhaḥ /
tadihāruṇyasya yogyatve 'pi kārakatvenāvyutpannasya vākyīyadravyādyanvayasyāyogādvyutpannatve 'pi cāmūrtatvenāyogyasya vākyīyakriyānvayāyogāttatovicchinnasya prakaraṇakalpitaśrutānumitaikadeśaniṣpannena vākyenāruṇayā prakṛtāpūrvasādhanībhūtadravyaparicchedaṃ bhāvayedityākareṇa prākaraṇikasarvadravyāṅgatvamiti prāpte --------- na yogyatājñānaṃ śābdabodhaheturapi tu ayogyatāniścayasya pratibandhakatāmātram /
ataśca pratibandhakatābhāvasattve āruṇyasyāpi kriyānvayabodhopapatteḥ /
paścācca yogyatāgaveṣaṇāyāmāruṇyasya pārṣṭikadravyasaṃbandhopapatterna tato vicchedāśaṅkā /
ataeva prathamataḥ somakrayāruṇyādisakalakārakaviśiṣṭabhāvanāvidhānottaraṃ krayasya somasaṃbandhavelāyāmāruṇyāditrikasya matvarthalakṣaṇayā krayasaṃbandhāvagatau paścādviśeṣaṇavidhitrayakalpanayā teṣāṃ krayāṅgatvāvagame jāte paścātparicchedakībhūtadravyādyapekṣāyāṃ parṣṭiko 'ruṇaikahāyanyoḥ parasparaṃ viśeṣaṇaviśeṣyabhāvamātreṇa saṃbandho dravyaviśeṣasaṃbandhaśceti draṣṭavyam /
tataśca yuktaṃ krayasādhanībhūtaikahāyanyāmeva niveśa āruṇyasya, na tu vāsaḥprabhṛtiṣu krayadravyāntareṣu /
na ca yaveṣviva somaprāptisādhanakrayadravyatvāviśeṣāt prāptyāśaṅkā /
teṣāṃ krayāntaradravyatvāt /
bhinnāhi guṇādatra krayāḥ /
na ca vikretrānativaśādutpattiśiṣṭadravyāvarodhe 'pi dravyāntaraniveśasaṃbhavaḥ; ekadravyānatasyaiva vikretuḥ saṃpādanīyatvāt /
anyathādakṣiṇānāmapi prasaṅgabādhānāpatteḥ /
na ca daśabhiḥ krīṇātīti vacanameva niveśatātparyagrāhakam /
tasya krayasamuccayaparatvenāpyupapattau guṇanyāyasiddhabhedāpavādakatvāyogāt /
na ca krayabhede 'pi ekasomaprāptyarthatvāviśeṣāt krayāntaradravye 'pi āruṇyasya niveśāśaṅkā /
āruṇyaviśiṣṭavijātīyakrayavidhyanyathānupapattikalpitasya viśeṣaṇavidheḥ pārṣṭhikānvayasya vānatiprasaktasyaiva kalpanīyatayā vijātīyakrayajanyānativiśeṣasya vijātīyakrayatvasyaiva vā vivakṣitatvenātiprasaṅgaśaṅkānupapatteḥ /
yathā caivaṃ sati trivatse sarvakrayadravyasthānāpanne niveśastathākaustubhe draṣṭavyam // 3 // 6 //

iti ṣaṣṭhamaruṇādhikaraṇam //
<B2> pūrvaṃ dravyaviṣaye viniyogaprakāraṃ nirūpyādhunā guṇaviṣaye tannirūpayitumudāharati ---- jyotiṣṭoma iti //
pūrvavat pūrvapakṣasiddhyaupayikatayā jyotiṣṭoma ityuktam /
aruṇāśabdasya dravyaparatve dravyasya krīṇātyanvayopapatteḥ pūrvapakṣāsaṃbhavaṃ nirasituṃ guṇavacanatvaṃ sādhayati ------ tatreti //
tatrāruṇavyaktinānātvapakṣe aruṇaguṇavacana ityarthaḥ /
natu viśiṣṭavyaktivacana ityākṛtyadhikaraṇanyāyapravṛttipradarśanārtham //
atra prācīnairaruṇādiśabdānāṃ kevalaṃ guṇavācitve śuklo devadatta itivat aruṇo ghaṭa iti sāmānādhikaraṇyānupapatteḥ rūpavān ghaṭa ityatreva matvarthīyenaiva sāmānādhikaraṇyāpatterākṛtyadhikaraṇanyāyena guṇavācakānāmapyaruṇādiśabdānāṃ nirūḍhalakṣaṇayā dravyaparatvamapi /
ata eva "guṇavacanebhyo matupo lugiṣṭa" iti na tatprayogāpattiḥ ityuktam, tanna; prayogābhāvena sāṃpratikalakṣaṇāyā anupapattau nirūḍhalakṣaṇāyāḥ sutarāmanupapatteḥ /
taduktaṃ vārtike ---------- nirūḍhalakṣaṇāḥ kāścitsāmarthyādabhidhānavat /
kriyante sāṃprataṃ kāścitkāścinnaiva tvaśaktitaḥ /
" iti //
ataśca viśiṣṭadravyavācitve yathaiva śuklādipadānāmeva tadvācitvaṃ, na rūpādiśabdānāṃ aprayogāt, evaṃ guṇamātravācitve 'pi teṣveva dravyalakṣaṇā nānyatreti niyamopapatterdravye lakṣaṇayā sāmānādhikaraṇyopapattirnavātiprasaṅgaḥ /
ata eva guṇavacanatve puṃlliṅgatā /
dravyavacanatve āśrayaliṅgavacanatetyarthakaṃ "guṇavacanānāmāśrayato liṅgavacanāni bhavantī" tyanuśāsanāntaramupapadyate /
guṇavacanatvamapi viśeṣaṇatvena guṇaśakyatvaparaṃ draṣṭavyam /
itthamaruṇāpadasya dravyaparatvamuktamayuktamiti sūcayan tasyāṅgīkāre niṣprayojanatāndarśayati -------- tṛtīyayeti //
ayamarthaḥ ------- kiṃ dravyalakṣaṇā karaṇatvānvayānupapattyā, uta liṅgasaṅkhyānvayānupapattyā vā /
nādyaḥ; jāteriva guṇasyāpi dravyaparicchedadvārā tadupapatteranupapattyabhāvāt /
ataeva yatra kriyājanyaphalaśālitvarūpakarmatvasya taduddeśyatvarūpasaṃpradānatvasyaca odanavipravṛttitvāsaṃbhavaḥ; tatraiva tallakṣaṇā, natu tṛtīyāntādisthala ityuktamākṛtyadhikaraṇe /
nāntyaḥ; tasya pāśādhikaraṇanyāyena sādhutvamātreṇāśrayaniṣṭhatayā vopapattau prātipadike lakṣaṇāyāṃ pramāṇābhāvāt /
ata eva sāmānādhikaraṇyasaṃbandhena tayoḥ karaṇatve prātipadikārthevānvaye saṃsargavidhayā pārṣṭhikabhāvena vā dravyabodhopapatternaiva lakṣaṇāyāstatra prayojanam; dvitīyādisthale tadāvaśyakatve 'pīha tṛtīyānte tatprayojanābhāvāt /
yadyetādṛśasthale 'pi tallakṣaṇāṅgīkriyate, tadā viśeṣye dravye guṇasyānvayāpattyā tadviśiṣṭadravyasya mūrtatayaikahāyanyādivat pārṣṭhikānvayalabhyābhedasaṃbandhena kraya eva niveśopapatteḥ pratyuta samasyamānānekapadatatsāmānādhikaraṇyālocanāpekṣādhikyena vilambitatvāt tena dravyavidhyanāpatterguṇaśabdenaiva dravyavidhyāpatteḥ krayasādhanadravyaniveśasyaivopapattāvamūrtatayā kraye tanniveśāsaṃbhavena prākaraṇikayogyakārakamātraniveśapūrvapakṣāsaṃbhave tatsamādhānārthādhikaraṇārambhasya siddhānte guṇasyaiva dravyaparicchedadvārā karaṇatvapratipādanasyaca vaiyarthyāpattiḥ, tathā caturādiśabdānāmapi saṅkhyāviśiṣṭamuṣṭiparatvāpattau jaghanyāyā api muṣṭeḥ pradhānatvena tadanurodhasyaivāpattau mukhyatvena saptadaśaśarāve carau saṅkhyānugrahasya vakṣyamāṇasyānāpattiścetyato guṇamātraparatvameveti //
avyutpattyāpatteriti //
liṅgasaṅkhyādīnāṃ viśeṣye kārake sāmānādhikaraṇyasaṃbandhena karaṇatvevānvayasya vyutpannasya tyāgena dravye 'nvayāṅgīkāreṇa dravyalakṣaṇāyāṃ vyutpattyantarakalpanāpatterityarthaḥ //
nanu kevalaguṇavācitve kathaṃ guṇavacanebhyo matupo lugiṣṭo guṇavacanānāmāśrayata ityanuśāsanadvayasyopapattiḥ? tatra guṇinamuktvā guṇavācakā ye teṣāmeva śuklādiśabdānāṃ guṇavacanapadena grahaṇena guṇiparatvāvaśyakatvādityata āha ------- yathācaivamiti //
ādyānuśāsanasya yatra lakṣaṇāprasaktiḥ tatparatvam, dvitīye svaśakyārthaviśiṣṭavyaktiviṣayakalakṣaṇāvṛttiyogye yatprakāratayā vyakteranvayastadarthakaṃ guṇapadamiti tasyaiva guṇavacanaśabdenopādānamiti dvayoranuśāsanayorupapattiḥ /
atra yogyāntamātravivakṣāyāṃ ajāyāḥ śukla ityādāvapi ṭābādyāpattiḥ; tasyatadā lakṣakatvābhāve 'pi araṇyasthadaṇḍavadyogyatvasya sattvāt, atastadvyāvṛttyarthamanvaya iti /
ataeva tatrāśrayagataliṅgābhāve 'gaṇe śuklādayaḥ puṃsī' tyanena sādhutvārthaṃ puṃlliṅgameva niyamyate /
rūpamastītyādau prakāratayā dravyānanvayādādyam /
tatra tādṛśayogyatāyā abhāvāt /
ataśca vyaktilakṣaṇābhāvepi yalliṅgadravyaparicchedadvārā guṇasya karaṇatvaṃ, tadgatastrītvenaiva ṭābādyutpatteḥ aruṇāśabdasyātra guṇaparatvameveti kaustubhe draṣṭavyamityarthaḥ /
etacca aruṇaikahāyanīśabdayoḥ prācīnoktavailakṣaṇyanirāsatātparyamātreṇa draṣṭavyam //
vastutastu --------- pacatītyatra ekatvasya sāmānādhikaraṇyasaṃbandhena bhāvanānvane saṃsargavidhayā bhātasya kartuḥ pacatītyasmāt eko naveti saṃśayavyudāsasiddhadharmitāvacchedakaviśiṣṭadharmijñānāvaśyakatvāya lakṣaṇā tatra pūjyapādairuktā, tathehāpyaruṇāpadāt jāyamānasaṃśayavyudāsāya dravyalakṣaṇāvaśyakyeva; tāvatāpi dravyasya karaṇatayā prāpterviśeṣaṇāṃśasya guṇasyaiva karaṇatvāvaśyakatve tatrāmūrtatvādinā kriyānanvayamāpādya pūrvapakṣaḥ tathā ekahāyanyādipadayorapyaviśiṣṭa eva sa iti dhyeyam //
yattu -------- aruṇatvajātiparatve tayā saha guṇe samavāyasaṃbandhasaṃbhavena lakṣaṇayā guṇaparatvasaṃbhave 'pi dravye tadabhāve vyaktilakṣaṇānupapattyā dravyaparasāmānādhikaraṇyānupapattiriti somanāthīye uktam, tat na manoharam; nīlo ghaṭa ityādisāmānādhikaraṇyapratītau nīlapadasya nīlarūpāśrayadravyasaṃyuktatvasaṃbandhena nīlapadavyaktilakṣaṇāvat ihāpi svāśrayasamavāyasaṃbandhena jātiparasyāpi lakṣaṇayā tadupapatteḥ samānatvāt /
ata eva nīlaṃ rūpamiti pratīternīlarūpatvajāteḥ samavāyena vidyamānāyāḥ pravṛttinimittatvāśrayaṇaṃ tathaiva tasyā eva jāteḥ paraṃparāsaṃbandhena ghaṭādāvapyaṅgīkāre bādhakābhāvena muṅkhyayaiva vṛttyā prayoga upapādito nakṣatravādāvalyāṃ mīmāṃsakamūrdhanyena /
tadā ko doṣaḥ paraṃparāsaṃbandhena lakṣaṇāśrayaṇa iti dik //
atra sūtre dravyaguṇayoraikakarmyādityupādānādāvaśyakaṃ piṅgākṣyādiśabdānāṃ dravyaparatvamupapādayituṃ matvartheneva bahuvrīheḥ dravyābhidhānenaiva āntarālikasaṃbandhabhānasiddheranyalabhyatvena tatra śaktiṃ kalpayitvā dravyaparatvameva matupa iva bahuvrīherapyāśrīyate /
taduktaṃ vārtike ------ "sarvatra yaugikaiḥ śabdairdravyamevābhidhīyate /
nahi saṃbandhavācyatvaṃ saṃbhavatyatigauravāt" iti /
tatrāpi citragurityevamādiṣu citragośabdayoratyantavyatiriktārthābhidhāyitvāt devadattādipadaiḥ sāmānādhikaraṇyāyogāt prāgapi devadattādipadādanyapadārthapratītervākyārthatvāsaṃbhavenānyapadārthe śaktireva /
lakṣaṇāpakṣe bahuvrīheraruṇaśabdasya caikāntaritadravyalakṣakatvāṃśāviśeṣe hi kiṃ vinigamakam yadbahuvrīhereva dravyābhidhāyitā nāruṇapadasyeti, ato 'nyapadārthe śaktiḥ /
naca ------- indrapītaśabde pūrvapakṣe bahuvrīhāvanyapadārthalakṣaṇāpattidūṣaṇāprasakteḥ ṣaṣṭhītatpuruṣāpekṣayā daurbalyāsaṃbhavena kathaṃ pūrvapakṣotthānaṃ? iti ------- vācyam; ṣaṣṭhītatpuruṣe bahuvrīhauca ekasyaivottarapadārthe anyavākyārthe cānvayasāmye 'pi ṣaṣṭhītatpuruṣe ekasyaiva tyāgaḥ, bahuvrīhau tu ubhayoriti vaiṣamyeṇa tadapekṣayā tasya daurbalyasiddheḥ //
etena -------- bahuvrīdāvanyapadārthasya śakyatve vidyāprayuktyabhāvakṛtalāghavāt niṣādasthapatiśabde karmadhārayatyāgena bahuvrīhyāśrayaṇāpattirityapi --------- apāstam; karmadhāraye śrutapadārthānāṃ sarveṣāmeva vākyārthānvayaḥ, bahuvrīhāvekaikasyānvaya iti vaiṣamyamātreṇa daurbalyopapatteḥ /
ato yadyapi citrāḥ gāvo yasyeti vigraho loke prasiddhaḥ; tathāpi rājapuruṣa iti ṣaṣṭhītatpuruṣe ṣaṣṭhyantapratipādye upasarjanatvasya prathamāntapratipādyārthe pradhānatvasyeva prathamāntanirdiṣṭānāṃ citragavīṇāmeva prādhānyāpattyānyapadārthadravyaprādhānyapratītibhaṅgāpatteḥ citrāṇāṃ gavāmayamityevaṃ vigraheṇa anyapadārthaśakterekahāyanyādiśabdānāṃ bahuvrīhitvāt dravyaparatvamiti prācāṃ matamāha ----- ekahāyanyādīti //
kṛttaddhitādisthale ekenaiva itarasyākṣepasiddheranekaśaktikalpanāparihārāya pradhānenaiva guṇabhūtasya loke ākṣepadarśanāt liṅgasaṅkhyānvayayogyadravyasyaiva sattvapadavācyatvena prādhānyena tatraiva śaktirna viśeṣaṇībhūtasaṃbandhe tasyākṣepādeva bhānasiddheḥ //
ataeva tṛtīyāntejāterdvitīyāntādisthaleca vyakteśca prādhānyadarśanāt niyāmakābhāve ākṛtyadhikaraṇanyāyapravṛttyā jātereva vācyatvaṃ vyakterākṣepalabhyatvameva /
evañca kṛdantādestu na viśeṣaṇe śaktiḥ, apitu dravya eva //
ataeva sarvatreti vārtikamapyetādṛśaviṣaya eva viśeṣaṇībhūtasaṃbandhādiśaktinirākaraṇaparaṃ sat yatra yaugakasthale kṛdādivācakāntarasattvaṃ tadviṣayameva //
yatratu bahuvrīhyādau navācakāntarasattvaṃ tatra yaṣṭīḥ praveśayetyādāviva padadvayasyaiva svārthaviśiṣṭānyapadārthe anyapadārthamātre vā nirūḍhalakṣaṇopapattau atiriktaśaktikalpane mānābhāvaḥ; ananyalabhyasya śabdārthatvāt //
ataeva yatra kṛdādāvapi prakṛtipratyayārthe lopo yathodbhidadhunetyādau tatrāvaśiṣṭabhāgasya tallakṣakatvamiṣṭameva, na tvatiriktā śaktiḥ //
naca bahuvrīheranyapadārthaśaktatvābhāve aruṇāpadādaviśeṣāpattyā sūtre dravyaguṇayoriti nirdeśānupapattiḥ; asmanmate nirūḍhalakṣaṇātadabhāvābhyāmeva viśeṣasiddheḥ /
evañca padadvaye lakṣaṇāṅgīkārādeva tatpuruṣāpekṣayā sutarāṃ karmadhārayāpekṣayā daurbalyaṃ siddhaṃ bhavati /
ataevaindrapītādhikaraṇe pūrvapakṣaprasādhanāya bahuvrīhāvanyapadārthalakṣaṇāpattiḥ siddhānte darśitā, siddhāntepica śaktyā parihāramanabhidhāya hutāhutasamudāyavācinaḥ indrapītaśabdasya tadavayave lakṣaṇāpattimātrameva pūrvapakṣadūṣaṇatvena darśitamiti //
naiyāyikādibahusaṃmataṃ pakṣāntaramāha -------- anyapadārtha iti yattu prakāśakāraiḥ -------- bahuvrīhāvanyapadārthalakṣaṇāyāṃ paṃṅkajādipadeṣvapi tadāpattau yogarūḍhyucchedaprasaṅgāt tadvadihāpi śaktirevetyuktaṃ taddūṣaṇaṃ kaustubhe draṣṭavyam //
vastutastu -------- aruṇāpadavadeva ekahāyanyādipadānāmapi ākṛtyadhikaraṇanyāyena ekahāyanādirūpaviśeṣaṇavācitvameva; tasyāpyāruṇyavat dravyaparicchedadvārā karaṇatvopapatteḥ /
ataeva yatra dvitīyāntādisthale tadasaṃbhavastatparameva matuppratyayānuśāsanavat bahuvrīhyanuśāsanamiti nadravye śaktirlakṣaṇā vā svīkāryā /
sautraṃ dravyapadañca pramāṇāntarapramitadravyapārṣṭhikasaṃbandhapratipādanatayāpyupapatt imadityabhipretya svasaṃmataṃ pakṣāntaramāha -------- śakyatetviti /
pramāṇāntarapramiteti //
gavā te krīṇātītimantraliṅgāvagatagorūpadravyamādāyetyarthaḥ //
asmiṃśca pakṣe amūrtatvāviśeṣāt sarveṣāmeva vicāraviṣayiteti bhāvaḥ //
evaṃ prakṛtavicāropayuktaṃ prasādhya śābdabodhatvāvacchinnaṃ prati yogyatājñānasya hetutvāt amūrtasyāruṇyasya krayabhāvanānvayāyogyatvāt tatrāniveśena vākyīyānvayaṃ bādhitvā "vihitastu sarvadharmaḥ syāt saṃyogato viśeṣāt prakaraṇāviśeṣā" diti teṣāmarthādhikaraṇapūrvapakṣasūtratvena āśritya prākaraṇikasarvadravyārthatvapūrvapakṣaṃ sādhayituṃ yogyatayā vākyīyadravyānvayasaṃbhavaṃ nirasyati -------- tadiheti //
yatra agnihotrahavaṇyeti vākye lyuḍuktakaraṇībhūtasya dravyasya svavākyopāttanirvāpaṃ prati yogyatā tatra tasyā nirvāpāṅgatvasaṃbhave 'pi iha kārakatvena dravye amūrtatvena krayabhāvanāyāṃ vā anvayāsaṃbhavāt na tadaṅgatvam, apitu śrutivākyayoraudāsīnye satyadhikārākhyaprakaraṇena jyotiṣṭomopasthitau yogyatayā tadīyadravyaparicchedakatvena vidhivākyaṃ dravyavācakapadañca prakalpya tadvidhānāt sarvayogyakārakatvamiti na kevalaṃ prākaraṇikakaraṇakārakāṅgatvamātram, kintu tatsādhāraṇyena kartrādikārakāṅgatvamityarthaḥ //
yattu vārtike --------- siddhasyāruṇyasya prakaraṇāgrahaṇamāśaṅkya aruṇayeti tṛtīyayā prākaraṇikāni jyotiṣṭomāpūrvasādhanāni somaprabhṛtīnyanūdya aruṇaprātipadikārtho vidhīyate /
"ataśca padamevaitadvākyenaivaṃ vibhajyate /
yā vyaktiḥ karaṇatvena coditāpūrvasādhanam /
tayā tatsādhayennityamaruṇatvaviśiṣṭayā /
evañcedaruṇaṃ kāryakaraṇaṃ yadgṛhādyapi /
yatpunaryajamānādivihitaṃ kārakāntaram /
na tasyāyaṃ guṇaḥ śeṣaḥ sarvārthopyavadhāritaḥ" /
ityuktam; tat tṛtīyayā lakṣaṇayā dravyopādāne ekahāyanyā eva lakṣaṇāpatteḥ paraṃparāsaṃbandhena svavākyopāttakrayānvayasaṃbhavādekaprasaratābhaṅgāpatteścāyuktami ti vyaktaṃ kaustubhe //
etena --------- ekahāyanyādipadānāṃ dravyaparatvāt śrautatadavaruddhe kraye aruṇāpadalakṣyadravyavidhyasaṃbhava iti śāstradīpikoktaṃ -------- apāstam; balābale satyapi vastuta ekatvena virodhābhāvāt /
ataḥ pūrvoktarītyā yogyasarvakārakāṅgatvamityarthaḥ //
na śābdabodhatvāvacchinnaṃ prati yogyatājñānasya kāraṇatvam; tadabhāve 'pyayogyatāniścayābhāvadaśāyāṃ gṛhītapadapadārthasaṃketasya śābdabodhodayāt /
anyathā yāgasyāpi svargānvayaśābdabodhānudayena apūrvakalpanānāpatteḥ, kintvayogyatāviścayaḥ pratibandhakaḥ iti tadabhāvasya kāraṇatvena prakṛte 'pi tāvanmātreṇa krayabhāvanāyāmapūrvasyāpyanvayopapatteḥ tadīyadravyāṅgatvamevetyabhipretya siddhāntamāha ---------- na yogyateti /
paścācceti //
āruṇyasya kriyānvayāt pūrvaṃ dravyānvaye kārakatvavyāghātāpatteḥ prathamato dravyaparicchedarūpavyāpārānavagame 'pi uktasāmagrīvaśādekahāyanīkrayasomādikārakāntaravadeva bhāvanayā saṃbandhe sati viśiṣṭavidhānena vidheyānekatvakṛtavākyabhedaparihāreṇa paścāt krayasya somanirūpitakaraṇatvabodhadaśāyāṃ bhāvanāpratyāsannatvādekahāyanīvanmatvarthalakṣaṇayā krayasaṃbandhena dravyasaṃbandhābhāve 'pi guṇasya dravyaparicchedakatvarūpavyāpāramantareṇa karaṇatvānirvāhāt yogyatayā tasminnavagate dravyaviśeṣāpekṣāyāṃ sāmānādhikaraṇyāt ekahāyanīyadravyaviśeṣapratītisiddhiḥ /
astica dvayorapi dravyaguṇayoḥ parasparākāṅkṣeti parasparasāhityāttayorniyamaḥ /
yadyapi kevalaguṇavācitvapakṣe bhinnapravṛttinimittānāṃ śabdānāmekasminnarthe pravṛttyasaṃbhavāt naikahāyanīpadasāmānādhikaraṇyaṃ saṃbhavati; tathāpi mukhyasyāsaṃbhave 'pi dravyaparicchedadvārā guṇasya karaṇatvenānvaye tasya guṇiniṣṭhatvāvagamāt guṇaguṇinorabhedopacāreṇa tatsaṃbhavādubhayorekakriyānvaye parasparākāṅkṣayā tatkrayasādhanaikahāyanīrūpadravyaparicchedakatvaṃ nānupapannam /
ataeva pārṣṭhikānvayasamarthanānantaram "evañca vākyagatamapi sāmānādhikaraṇyaṃ samarthitaṃ bhavatī" tyuktaṃ vārtike /
ataeva ṭābantatayā dravyapadasāmānādhikaraṇyamapi viśeṣaṇatayā, natvaṅgatayā /
tattu viśeṣaṇavidhikalpanayā krayaṃ pratyevetyevamekavākyatvasaṃbhave na vākyabhedamaṅgīkṛtya adhyāhārādinā prākaraṇikasarvadravyāṅgatvakalpanaṃ yuktam /
nacaitāvatā dravyopakāritayā dravyāṅgatvam; dravyasyāpi paricchedyatayā guṇopakārakatvena vaiparītyasyāpyāpatteḥ /
ataḥ śrutyātra vākyabādhenaṃ krayāṅgatvameveti bhāvaḥ /
evañca ekahāyanīpadasāmānādhikaraṇyādekahāyanīdravyaparicchedadvāraniyame sati na krayadravyāntareṣu tasya niveśa ityāha ---------- ataśceti //
nanu yanmate krayaikatvaṃ tanmate apūrvasādhanībhūtadravyaprāptyanukūlavyāpārasādhanatvāviśeṣāt vāsaḥprabhṛtiṣvapi āruṇya prāptyāpattirityāśaṅkāṃ nirasyati --------- naceti //
bhinnā hīti //
"ajayā krīṇātī"ti vākyavihitakrayoddeśenāruṇāvākye anekaguṇavidhāne vākyabhedāpattestatra viśiṣṭavidhyaṅgīkāreṇa krayotpattāvāvaśyikāyāṃ tatraikahāyanyavaruddhe kraye ajādiniveśāyogāt guṇāt yāvaddravyaṃ bhinnakrayaḥ, natu bhaṭṭasomeśvaroktarītyā ekaḥ kraya iti tattadvyāpārakasādhanatānāṃ naikahāyanīdharmatvaprāptirityarthaḥ //
utpattiśiṣṭānāmapi guṇānāmekavikretānativaśātsamuccayopapattau virodhābhāvānna bhedakateti taduktopapattimāśaṅkya nirākaroti -------- naceti /
anyatheti //
vaikṛtadakṣiṇābhiḥ prākṛtadakṣiṇānāṃ prasaṅgabādhau vakṣyete /
tatrāpi ṛtvigānativaśāt samuccayopapattau tadanupapattyāpattirityarthaḥ //
naca guṇātkrayabhede 'pi dravyāṇāṃ dharmigrāhakapramāṇena svasvabhedakakrayavyavasthayā niveśe 'pi āruṇyasyāviruddhadharmāntarabahuprayojakasattvāt dravyāntare niveśo 'nirvārya ityāśaṅkya pariharati -------- naca krayabhede 'pīti //
aviruddhadharmāntarāṇāṃ tu vākyāntarīyatvāt avāntaraprakaraṇena sarvakrayāṅgatvamiti śeṣa ityarthaḥ //
nanu sarvakrayadravyasthānāpanne trivatse ekahāyanīrūpadvārābhāvādāruṇyaprāptyanāpattiḥ; prakṛtāvekahāyanīdvārakatvasya vivakṣitatvāt /
nahi tatraikahāyanyuddeśyā yena tatsvarūpamānarthakyabhiyā na vivakṣyate /
tṛtīyayā krayaṃ prati aṅgatvena tasyāḥ dvāramātratvāt /
nahi dvārasvarūpe ānarthakyam; dvārābhāve uddeśyasadbhāvamātreṇa dharmaprāptau kṛṣṇaleṣvavaghātāpattirityata āha ---------- yathācaivamiti //
ayamarthaḥ ------- dvārabhūtāyā apyekahāyanyā naikahāyanītvena dvāratā, adṛṣṭārthatāpatteḥ /
kintu kriyāsādhanadravyatvenaiva /
ataeva puroḍāśābhāve 'pi yāgāṅgabhūtavrīhīṇāṃ caruprakṛtitvasiddhiḥ /
kiñca dvārasyāpyāruṇyasya na tattvenāvacchedakatā, apitu prakṛtakrayasādhanaguṇatvena /
ataeva śvetādiguṇāntarasādhyakrayasthalepyekahāyanīparicchedakatvāvirodhastatra kimu vaktavyam dvārasya tattvena dvārateti yuktā tatra dharmaprāptiriti kaustubhe draṣṭavyamiti /
prayojanaṃ spaṣṭatvānnoktam // // / iti ṣaṣṭhamaruṇādhikaraṇam //
-------------- <B1> (7 adhikaraṇam / ) (a.3 pā.1 adhi.7) ekatvayuktam //
jyotiṣṭomādiṣu grahaṃ saṃmārṣṭītyādi śrutam /
tatra saṃmārgādi prati grahatvavadekatvasyāpi uddeśyatāvacchedakatā, uta tasyaiva sā, ekatvaṃ tu kathamapi vidhyanvayāsaṃbhavādavivakṣitamiti /
cintāyām /
paśvekatvavad grahaikatvasyāpi avivakṣākaraṇābhāvāduddeśyatāvacchedakatā /
ataścaikasyaiva grahasya saṃmārga iti prāpte -------- yatra hi samāsādau parasparānvayo vyutpanno yathāśvābhidhānīṃ yatkiñcitsomaliptamityādau, tatra bhavatyeva viśiṣṭoddeśaḥ /
yatra tu sa na vyutpannastatra parasparānvayena viśiṣṭoddeśe avyutpannānvayanibandhanavākyabhedāpatterna viśiṣṭoddeśaḥ /
yathā yasyobhayaṃ havirārttimārcched grahamiti ca /
dvayoḥ subantayorbhāvanānvayasyaiva vyutpannatvena parasparānvayasyāvyutpannatvāt /
anyathā pañcadaśānyājyānītyatrāpi viśiṣṭavidhānāpattiḥ /
ekavacanādyupāttasaṅkhyādestu samānābhidhānaśrutyā karaṇatvakarmatvādirūpe pratyayārtha evānvitasya padaśrutyā prātipadikārthānvayo naiva vyutpannaḥ /
evaṃ sarvebhyo darśapūrṇamāsāvityādau ekapadādyatrānekārthapratītyuttaraṃ lakṣaṇayā prātipadikādeva sāhityapratītistatrāpi sāhityasya pratyayārtha evānvayo na prātipadikārtha iti kaustubhe spaṣṭam /
ataśca naitādṛśasthale viśiṣṭoddeśasaṃbhavaḥ //
atha ------- viśiṣṭoddeśāsaṃbhave 'pi ubhayorapi prātipadikavacanārthayoḥ pratyayārthe karmatvādāvanvayena taddvārā bhāvanānvayopapatteḥ saṃmārgasya pārṣṭhikoddeśyadvayasaṃbandhe bādhakābhāvaḥ /
nacoddeśyānekatve vākyabhedaḥ; bhāvanāyāmanekakārakasaṃbandhavadanekoddeśyasaṃbandhe bādhakābhāvāt /
naca tasyāmekoddeśyatācchedakaniyamaḥ; sarvebhyo darśapūrṇamāsāvityādau putratvapaśutvāderanekasyāpi tasya darśanāt /
vidhestvanekoddeśyakatvenaiva kācit kṣatiḥ /
nacaikatvāvacchinnasya viniyogābhāvādasaṃskāryatā; paśutvena viniyuktasyāpi lohitādeḥ saṃskāryatvavad bahutvāvacchedena viniyuktasyāpi grahasyaikatvāvacchedena saṃskāryatvopapatteḥ /
naca -------- evamapi dvayoruddeśyayoreka pradhānakriyāvaśīkārābhāvātkathaṃ parasparānvayaniyama iti -------- vācyam; vaikṛtāṅgavadguṇānurodhenāpi padaśrutyaiva vā pradhānayorapyākāṅkṣāṃ prakalpya tadupapatteḥ /
iṣyate ca yatra bhinnavākyasthale āgneyaṃ caturdhā karoti, puroḍāśaṃ caturdhā karotītyādau guṇānurodhena pradhānayorabhedānvayastatraikavākyasthale sutarāṃ śābdabodhe mukhyaviśeṣyabhūtakriyayā vaśīkāraḥ /
ekatvāvivakṣāpekṣayā ca vaśīkārakalpanāyāṃ na ko 'pi doṣaḥ /
ata ekatvāderapi svātantryeṇoddeśyatāvacchedakatvopapattiriti cet, na; bhāvanāyāḥ karotiparyāyatvenaikakarmatvāvasāyāduddeśyānekatve tadbhaṅganibandhanavākyabhedāpatteḥ /
ekakarmakatvañcaikabodhaviṣayakarmatvaparyāptyadhikaraṇatāvacchedakadharmavattvam /
atra sarvebhyo darśapūrṇamāsāvityādau satyapi putratvapaśutvādīnāṃ karmatvaparyāptyadhikaraṇatāvacchedakānāṃ dharmāṇāṃ bhede ekenaiva sarvapadena yugapad bodhānnaikakarmakatvahānirityādyaṃ viṣayetyantam /
paryāptipadakṛtyaṃ tu kaustubhe draṣṭavyam /
ataśca phaladvaye saṃskāryadvaye phalasaṃskāryadvaye vā tāvadvākyabhedāpattiḥ spaṣṭā /
nimittadvayasthale 'pi yāvajjīvādhikaraṇanyāyena nimittadvayasya phaladvayākṣepakatvādvākyabhedāpattirdraṣṭavyā /
yathā ca na nimittadvayenaikasyaiva phalasya ākṣepastathā kaustubhe spaṣṭam /
ata eva nimittaphalasthale nimittasaṃskāryasthale vā ekakarmakatvabhaṅgābhāvānna vākyabhedaḥ /
na vā kāladeśādyuddeśyānekatve saḥ /
yathā ca phalādisāhityasya naikabodhaviṣayatā tathā kaustubhe spaṣṭam /
ataśca tatsāhityavivakṣāyāṃ vākyabhedo duṣparihara evetyādyanyatra vistaraḥ //
nanu -------- tathāpi naikatvādīnāmavivakṣā; saṃmārgabhāvanāyāṃ guṇatvenavivakṣopapatteḥ /
na ca ----- evamekatvāṃśe dvitīyayā karaṇatvalakṣaṇād grahāṃśe ca prādhānyābhidhānādvairūpyāpattiḥ yugapadvṛttidvayavirodhāpattiśceti ------- vācyam; ripsitānīpsitasādhāraṇakarmatvamātre dvitīyāyāḥ śaktatvena pramāṇāntarādviśeṣāvagame 'pi aikarūpyeṇobhayorapyanvayopapatteḥ /
na caivamapi saṃmārgāṅgabhūtasyaikatvasya tadanaṅgabhūtagrahadvārakatvāsaṃbhavaḥ; aṅgatvādyabhāve 'pi saṃbandhitāmātreṇāganmeti mantre svargasyeva grahasyāpi dvāratvopapatteḥ /
ataśca vivakṣitamekatvamiti ------- cet, guṇabhūtaikavacanādyanurodhena pratyaye karaṇatvalakṣaṇāṅgīkārasya yugapad vṛttidvayavirodhavairūpyādeścānyāyyatvāt /
tadvaramanuvādake tasminneva pāśādhikaraṇanyāyena lakṣaṇāmātram /
na cepsitānīpsitasādhāraṇakarmatvamātrābhidhānānnoktadoṣaprasaṅgaḥ /
tathātve niruktaikakarmakatvabhaṅgaprasaṅgena vākyabhedāpatteḥ /
ataśca guṇatvasiddhyarthaṃ lakṣaṇāśrayaṇe pūrvoktadoṣāpatterekavacanaṃ bahutvalakṣaṇārthaṃ satsādhutvārthamanuvādo 'vivakṣitam /
yathācaivaṃ satya "ṣṭavarṣaṃ brāhmaṇamupanayīte" tyādau aṣṭavarṣatvādervivakṣā, tathā kaustubha evopapāditam // 3 // 7 // iti saptamaṃ grahaikatvādhikaraṇam //
<B2> (ekatvayuktam) evaṃ tāvat tribhiradhikaraṇaiḥ krameṇa kriyādravyaguṇānāṃ śrutyā viniyogaprakāre nirūpite śrutihetukasaṃskāracintātvasāmyātteṣāmarthādhikaraṇānantaraṃ kartuṃ yuktāmapyagrimacintāyā viśeṣacintātvena sāmānyāpekṣatvāt sāmānyacintānantarameva viśeṣacintā yuktetyabhiprāyeṇopekṣya avasarasattvādadhunā karaṇaucityamabhisaṃdhāya agrimacintāviṣayavākyamudāharati ---------- jyotiṣṭometi //
ubhayatrādipadābhyāmagnihotraprakaraṇagatasyāgre tṛṇānyapacinotītyasya tathā darśapūrṇamāsaprakaraṇagatānāṃ "puroḍāśaṃ paryagnikarotī" tyevamādīnāṃ yathā saṃgrahastathā sūtre ekatvagrahaṇasyopalakṣaṇatvamaṅgīkṛtya "yasya puroḍāśau kṣayato yasya sarvāṇi havīṃṣi naśyeyuri" tyādidvivacanabahuvacanāntapadasamarpitoddeśyaghaṭitavākyānāmapi saṃgrahaḥ sūcitaḥ //
yattu vārtike -------- "prayājaśeṣeṇa havīṃṣyabhighārayatī"tyetadudāhṛtam, taccaturthe 'bhighāraṇasya prayājaśeṣapratipattyarthatāyā vakṣyamāṇatvāt prayājaśeṣasyoddeśyatvena haviṣāmanuddeśyatvādayuktamiva, tathāpi matabhedena tadupapādanaprakārastatraivopapādayiṣyate /
"grahaṃ saṃmārṣṭī" tyasmātpūrvaṃ daśāpavitreṇeti bhāṣye dhṛtasyāpi daśāpavitraśabdasya vāsaḥ kambalo vārthastatra jñeyaḥ //
atra grahaśabdena karmavyutpattyā somarasābhidhānāt grahaṇakāle bahirlagnavipruṣāṃ pracchannarūpastatsaṃskāra iti nyāyasudhākāraḥ /
uttarādhikaraṇabhāṣyasvarasādadhikaraṇavyutpattyā tadāghārapātraparatvena tatsaṃskāra iti pārthasārathyanusāriṇaḥ prakāśakārāḥ //
uddeśyatāvacchedakatveti //
saṃmārgaviniyogaḥ siddho 'pi kimekatvādiviśiṣṭe uta grahamātre veti viśeṣato viniyogaprakāro vaktavyaḥ /
tatra yadyapi apūrvasādhanatvenaiva rūpeṇa viniyogastathāpi tallakṣaṇopayogiśakyasaṃbandhaghaṭakatāmātramevoddeśyatāvacchedakatadanavacchedakatādvāreṇa cintyata ityarthaḥ //
vede vaktrabhāvāt vacanecchānicchārūpatayā pramāṇībhūtavedapramitasya tyāgāyogāt cikīrṣācikīrṣārūpatayā vā vivakṣāvivakṣayorasaṃbhavāt pratītyapratītirūpatayā tadabhyupagame śrutasyaikatvādeḥ pratītatvena tyāgāyogādasaṃbhavaṃ nirasituṃ vivakṣāvivakṣāsaṃbhavahetumanvayavyatirekābhyāṃ sūcayituṃ ca vidhyanvayāsaṃbhavādityuktam /
tataścānuṣṭhānānanuṣṭhānarūpaphalahetukavidhitsitāvidhitsitāparaparyāyau vidhisaṃsparśāsaṃsparśāveveha vivakṣitāvivakṣitapadābhyāṃ vivakṣitau kṛtvā vicāra ityarthaḥ //
tatra grahaprātipadikasya grahatvamartho vacanasya ekatvaṃ dvitīyāyāḥ karmatvaṃ ca /
tatra karmatve jāteḥ sākṣādanvayāyogāt pūrvoktarītyā vyaktilakṣaṇāyā āvaśyakatvena tasyāḥ karmatvenoddeśyatve 'pi svatvasamākhyāsahakṛtapadaśrutyaikatvasya grahavyaktāvanvayādekatvaviśiṣṭasyaiva grahādeḥ karmatve anvayādyathā grahatvānavacchinne na saṃmārgastathaikatvānavacchinne 'pi na saḥ /
yadyapi samānābhidhānaśrutyā ekatvasya karmatvānvayasaṃbhavaḥ; tathāpi tatrāyogyatvādananvaye prātipadikārtha eva yukto 'nvayaḥ //
naca kārakaviśeṣaṇasya vidhyanvayāsaṃbhavaḥ /
evaṃ yatrāpi yasyobhayamityādau saṅkhyāvācakapadāntaraśravaṇam, tatrāpi kriyānvayātpūrvaṃ sāmānādhikaraṇyādupapadārtha evānvayāt viśiṣṭasyoddeśyatvopapattirityabhipretya pūrvapakṣamāha -------- paśvaikatvavaditi //
vidhyanvayābhāvāt naikatvaṃ vivakṣitaṃ vidhyanvayo hi kimuddeśyatvena athavā guṇatvena /
tatrāpyādye viśiṣṭoddeśenotasvatantroddeśena vā /
natāvadādyaḥ; kriyānvayāt pūrvaṃ vaiśiṣṭyasyāvyutpannatvādityabhipretya siddhāntamāha ------ yatra hīti /
naiva vyutpanna iti //
nanu ekavacanādyupāttasaṅkhyādeḥ prakṛtyarthānvayābhāvena viśiṣṭatvābhāvāt viśiṣṭoddeśāsaṃbhave yatra sarvasyaivetyatra prātipadikādeva sāhityapratītistatra sāhityāvacchinnasya ekapadopādānāvagataparasparavaiśiṣṭyasaṃbhavādavivakṣānāpattiḥ /
ataeva dvivacanādipratītasāhityasya pratyayārthe 'nvayāvivakṣāyāmapi na doṣa ityata āha -------- evamiti //
prātipadikena svavācyabodhajananottaraṃ lakṣaṇayā sāhityapratīteryugapat bodhānupapatteḥ paścātpratīyamānasya samastaprātipadikārthatvāt pradhānānvayasyābhyarhitatvācca śakyārthavatkāraka eva anvayavyutpatteḥ prātipadikārthe vaiśiṣṭyāyogena viśiṣṭoddeśāsaṃbhava iti kaustubhe spaṣṭamityarthaḥ //
dvitīyamāśaṅkate -------- atheti /
saṃmārgasyeti //
grahatvalakṣitavyakterivaikatvalakṣitavyakterapi karmatvena bhāvanānvaye saṃmārgasyāpi pārṣṭhikaviniyogavidhidvayakalpanenoddeśyadvayasaṃbandhonānupapanna ityarthaḥ /
na kācitkṣatiriti //
vidheyānekatve 'pi vidhiphalasyājñātajñāpanasyaikaviṣayatvasvabhāvabhaṅgāpatteryukto vidhivākyabhedaḥ, uddeśyānekatvetu śrutabhāvanāyāṃ teṣāmanvayāt vidheścaikaviśiṣṭabhāvanāvidhāyitvenānekavidhāyitvābhāvāt ārthikaiśca vidhibhirekakriyoddeśena anekaviśeṣaṇavidhivat anekoddeśenaikasaṃmārgaviṣayānekavidhikalpanasaṃbhavāt vākyabhedāprasakteḥ na kācitkṣatirityarthaḥ //
saṃskāryatvopapatteriti //
tataśca noddeśyatāvacchedakāvacchinnatvarūpeṇa viniyogasya saṃskāryatāprayojakatvaṃ apitu tatsamānādhikaraṇadharmāvacchedādināpītyarthaḥ //
vaśīkārābhāvāditi //
kriyāyāṃ hi guṇatvenānvaye tadīyākāṅkṣayā saṃbandhādyathāpekṣamanyonyaniyamaḥ sidhyati /
prakṛtetu kriyāyā evoddeśyaṃ prati guṇatvāduddeśyayośca svataḥ pradhānatvena parasparākāṅkṣabhāvāt kriyāyāśca tadanurodhavṛttitvāt kathaṃ parasparaṃ yo grahatvāvacchinnaḥ sa ekatvāvacchinnaḥ paśutvāvacchinnaḥ ekatvāvacchinnaḥ ityevaṃ niyamaḥ sidhyatītyarthaḥ /
guṇānurodheneti //
guṇasyāvṛttyāpattyanurodhenetyarthaḥ /
guṇānurodheneti //
bhinnavidhividheyacaturdhākaraṇarūpaguṇāvṛttyanurodhenetyarthaḥ //
samādhatte ---- bhāvanāyā iti //
'ghaṭaṃ paṭaṃ ca karotī' tyādau cakāraṃ vinā ghaṭapaṭayorubhayoḥ karmatvena karotyarthe 'nvayādarśanāt karoterekakarmatvaniyamena tatparyāyabhāvanāyā api tanniyamāt karmadvaye sati bhāvanāpratipādakapratyayāvṛttervākyabheda ityarthaḥ //
nanu kimidamekakarmatvam? na tāvadekakarmakatvamekakarmatvāśrayatvaṃ vā; "sarvebhyo darśapūrṇamāsau" "ghaṭānānaye" tyādau tadanāpatteḥ; tatra putrādivṛttikarmatvānāṃ karmatvāśrayaputrādīnāṃ ca bhedāt, nāpyekakarmatāvacchedakatvam; "sarvebhya" ityatraiva paśutvaputratvādīnāṃ bhedenaikakarmatvānāpatterityata āha -------- ekakarmatvaṃ ceti //
ekabodhaviṣayeti dharmaviśeṣaṇam /
ekenaiveti //
ekenaiva sarvapadena tena tena rūpeṇa tattacchaktibhiḥ sarveṣāṃ phalānāṃ yugapadbodhādityarthaḥ //
paryāptapadakṛtyaṃ tviti //
"adhvaryuyajamānau vācaṃ yacchata" ityatra adhvaryuyajamānatvayoḥ karmatvādhikaraṇatāvacchedakayorekabodhaviṣayatvābhāvāt dvikarmatvaprāptāvapi dvandvottaravibhaktyā devatātvāderiva karmatvāderapi vyāsajyavṛttitvāvasāyāt tatparyāptyadhikaraṇatāvacchedakasyādhvaryuyajamānobhayatvasya dvandvajanyaikabodhaviṣayatvāt ekakarmatvopapattyarthaṃ paryāptipadam //
nacaivaṃ samāsopāttasāhityavivakṣāpatteḥ daivādanyatarapadārthabādhe anyatarasya vā niyamānāpattiḥ; sāhityaviśiṣṭayoruddeśyatve 'pyapūrvasādhanatvalakṣaṇāyāṃ pratyekavṛttyapūrvasādhanatvasyaiva lakṣaṇīyatvena tadanāpatteḥ /
nahi tayoḥ sahitayorekakāryajanakatvamasti /
ataḥ pratyekavṛttitayā avagatenaiva rūpeṇa lakṣaṇānna doṣa iti kaustubhe draṣyavyamityarthaḥ //
yāvajjīvādhikaraṇeti //
nimittayorbhedenānuṣṭhāpakatayā bhedena bhāvyākṣepakatvāt tadākṣiptabhāvyārūpānekakarmatvaprasaṅgasya tulyatvamityarthaḥ //
nanu nimittadvayasthale sahitayoreva nimittatvāṅgīkāreṇa na phaladvayākṣepakatvamityata āha -------- yathāceti //
sāhityasyāpi pakṣakoṭipraviṣṭatvena pūrvavadeva nimittaviśeṣaṇatvānupapattāvarthāt svātantryeṇa nimittatvāpattau bhedenānekakarmākṣepakatvāt tatprasakteryasyobhayamityādau ubhayātterhavirārteśca pṛthaknimittatvāśrayaṇe syādeva vākyabheda iti kaustubhe spaṣṭamityarthaḥ /
ataeva na yatra phaladvayākṣepakatvaprasaṅgastatra bhāvyasyaikatvānnimittasyaca nimittatvenaivānvayānna vākyabhedaḥ /
yatrāpya "māvāsyāyāmaparāhṇa" ityādau kāladvayasyoddeśyatve 'pi karmanānātvānākṣepakatvam tatrāpi na vākyabheda ityāha ------------ ataeveti //
yathāca phalādītyayaṃ grantho vyākhyātacaraḥ //
tṛtīyaṃ pakṣamāśaṅkate --------- nanviti /
svargasyeveti //
mantreṇahi prakaraṇe pāṭhāddarśapūrṇamāsāpūrvaṃ pratyupakartavyam kenaciddvāreṇeti niścite yadeva darśapūrṇamāsāpūrve upayujyate tadeva dvāraṃ bhavati /
nahi phalaṃ tadapūrve tajjanakakarmaṇi vopayuktam /
atastadabhāve 'pi yathā darśapūrṇamāsasaṃbandhastadvadekatvasya saṃmārgabhāvanāyāṃ karaṇatvenānvayenāṅgabhūtasyāpi grahasya saṃmārgasaṃbandhitāmātreṇa dvāratvopapatteḥ tatsaṃbandhigrahaparicchedakatvena tatsvīkārādekatvena grahaṃ saṃmṛjyādityanvayopapattirityarthaḥ //
tathātva iti //
dvitīyayā tantreṇābhidhāne 'pi karmatvaparyāptyadhikaraṇatāvacchedakasya dharmasyaikatvagrahatvāderekabodhaviṣayatvābhāvenaikakarmatvabhaṅgāpattyā vākyabhedāpatterityarthaḥ /
anuvāda iti //
jātyabhiprāyeṇa pratyekaikatvamādāya vā prāptatvena śakyārtho 'nuvādaḥ /
paśvaikatvādestu karaṇatve 'nvitasya taddvārā kriyāsaṃbandhena vidhyanvaye vākyabhedādidoṣānāpatteḥ yuktā vivakṣeti vaiṣamyamityarthaḥ //
nanu "aṣṭavarṣaṃ brāhmaṇamupanayīta" ityatra saṃskāryaviśeṣaṇasya aṣṭavarṣatvāderavivakṣāpattau aniyatavarṣasyāpyupanayanāpattiriti śaṅkānirāsāyāha --------- yathācaivamiti //
yadyapyaṣṭavarṣatvamuddeśyaviśeṣaṇam; tathāpi tasyopayogāpekṣāyāṃ so 'dhīyītetyevaṃ vipariṇatena "tamadhyāpayīte" tividhinā viniyogakalpane tacchbdena parāmṛṣṭasyopādeyatvena tadvivakṣopapattiḥ /
yadyapi prathamataḥ saṃskārānvaye tadavivakṣāyāṃ paścāttanaviniyogavidhāvapi tacchabdenāvivakṣitaviśeṣaṇasyaiva parāmarśāpattiḥ; tathāpi prāthamikasaṃskārānvaye 'pyaṣṭavarṣatvasya grahaikatvavat kathamapi prāptyabhāvenānuvādāyogādardhamantarvedītivat lakṣaṇayā viśiṣṭoddeśasaṃbhavena vivakṣopapattiḥ /
yatrahi grahamityādau dvayorapi prāptisaṃbhavaḥ /
ekavacanasyaiva bahutvādilakṣaṇāyāṃ pāśanyāyādirūpaṃ niyāmakamasti, tatra nobhayatra lakṣaṇayā viśiṣṭoddeśaḥ, prakṛtetu dvayorapyaprāptatvāttadaṅgīkāre na kācitkṣatiriti kaustubhe upapāditamityarthaḥ /
eva "magneḥ tṛṇānyapacinotī" tyatra yadyapyagneḥ ṣaṣṭhyā tṛṇadvārāpacaye guṇabhāvaḥ pratīyate; tathāpi saṃbandhasāmānyasya viśeṣato jijñāsāyāṃ viśeṣaṇāntarāyogenāṅgāṅgitvalakṣaṇānvayaviśeṣaniṣṭhatvāvasāyāt ko 'trāṅgītyapekṣāyāṃ cāgneḥ prayojanavattvenāṅgitvāvasāyāt upayokṣyamāṇasaṃskārasya garīyastvāttasyāpi tṛṇasaṃsparśanimittotpatsyamānolmukabahiḥ pātaparihārārthatayā dṛṣṭārthatālābhāt svasvāmibhāvaviṣayāyāśca ṣaṣṭhyāḥ svāminiprayogadarśanena prādhānyārthatvāvasāyāt agneḥ prādhānyāvagateruddeśyatvāt tadviśeṣaṇaikatvāvivakṣopapattiḥ tataścāgnisaṃskāratvāt yasyāgneragre me upayogaḥ tasyaivāyaṃ tṛṇavibhāgarūpāpacayaḥ saṃskāravidhiriti na sabhyāvasathyayoḥ tṛṇāpacayaḥ, paristaraṇaṃ tu "agnīnparistṛṇātī" tyaviśeṣaśravaṇāttayorbhavatyeva /
astuvā tayorapi saḥ /
yadyapīyaṃ pañcamī bhavet; tathāpi "madhyāt pūrvārdhāccāvadyatī" tivadagneḥ prayojanavattvāllakṣaṇayā prādhānyapareti na doṣa iti vārtikakāraḥ /
asmiṃśca pakṣe 'pacayasya dṛṣṭārthatālābhāya citaistṛṇaireva punaḥ punaḥ paristaraṇamuktamāpastambasūtre //
pūjyapādaistu dvitīyayā tṛṇānāṃ prādhānyāvagatau viniyogabhaṅge pramāṇābhāvāt tṛṇapratipattitvameva /
anyathā tṛṇagatabahutvavivakṣāpatteḥ kapiñjalādhikaraṇanyāyena trayāṇāmeva tṛṇānāmapacayāpatteravaśiṣṭatṛṇasaṃsarganimittotpatsyamānolmukabah iḥ pātasyāparihāryatayāgnestṛṇāpacaya- saṃskāryatvānupapatteḥ /
ato bahutvāvivakṣāyāstṛṇasaṃskāryatvaṃ vinā durupapādatvātparistaraṇopayuktatṛṇapratipattikarmatvamevāpacayasya yuktam /
naca tavāpyekasyaivāgnestṛṇāpacayāpattiḥ /
pañcamyāpādanatvena guṇatve 'pi pratipādyatṛṇānurodhena pratyekaikatvānuvādāvagatervivakṣāprasaṅgāt /
atastṛṇapratipattitvamevetyuktaṃ kaustubhe //
yattu -------- asminpakṣe pūrvaprayogārthāgniparistaraṇopayuktānāmapi tṛṇānāṃ prayogāntarakālīnāpacayena pratipādanāt pratipattitvāyoga iti --------- nyāyasudhākṛtoktam, tadu "pasthāya tṛṇānyapacinotī"ti āpastambasūtre agnyupasthāpanasamāpanakartṛtvānurodhenayajamānakartṛkopasthāpanottarakālīnatvokterayuktatvāda- yuktamityupekṣitaṃ pūjyapādaiḥ /
ataeva pratipattyā tṛṇānāmagre 'nupayuktatvāduttaraprayogeṣu anyairanyaireva tṛṇaiḥ paristaraṇamuktaṃ dhūrtasvāmyādibhirityalaṃ vistareṇa /
yathācādhānavākye 'gnisāhityavivakṣā tathā kaustubhe draṣṭavyam /
prayojanaṃ spaṣṭatvānnoktam //
iti saptamaṃ grahaikatvādhikaraṇam //
---------------- <B1> (8 adhikaraṇam / ) (a.3 pā.1 adhi.8) saṃskārādvā //
ekatvavad grahatvasyāpi avivakṣā; liṅgādeva saṃmārgasya somāvasekanirharaṇaprayojanatvāvagamena somapātramātrasya saṃskāryatvāvagateḥ /
ubhayorapi grahacamasayorekajyotiṣṭomāpūrvasādhanatvena yaveṣviva camaseṣvapi saṃmārgāpatteśceti prāpte ---------- grahatvavivakṣāyāṃ vākyabhedādyabhāvātsatyapi jyotiṣṭomaikye tattadabhyāsāpūrvāṇāṃ bhedāt payasā maitrāvaruṇaṃ śrīṇātītivad grahajanyāpūrvasādhanatvasyaiva lakṣaṇopapatterna camaseṣu saṃmārgaḥ // 3 // 8 //
// ityaṣṭamaṃ grahatvavivakṣādhikaraṇam //
<B2> spaṣṭārthametat // //
ityaṣṭamaṃ grahatvavivakṣādhikaraṇam //
------------- <B1> (9 adhikaraṇam / ) (a.3 pā.1 adhi.9) ānarthakyāt //
"saptadaśāratnirvājapeyasya yūpa" ityatrāvyavahitatvāt pradhānatvāt prakaraṇānugrahācca saptadaśāratnitvaṃ vājapeyoddeśena ṣaṣṭhīśrutyā vidhīyate /
na yūpoddeśena; atiprasaṅgāpatteḥ, vājapeyena viśeṣaṇe viśiṣṭoddeśācca /
ataḥ saptadaśāratnitvaṃvājapeyoddeśena vidhīyamānaṃ tadīyordhvapātradvāreṇa niviśate /
yūpapadaṃ sādṛśyādgauṇaṃ iti prāpte ---------- yūpapadasya gauṇatve pramāṇābhāvādyupapadena svakāryaṃ lakṣayitvā taduddeśena saptadaśāratnidravyaṃ vidhīyate /
yadyapi ca dravyaṃ aratniparimāṇaṃ cātideśataḥ saṃbhavatprāptikaṃ, tathāpi tadanuvādena saṅkhyāvidhāne ekaprasaratābhaṅgāpattestataḥ pūrvapravṛttyaṅgīkāreṇa viśiṣṭaṃ dravyameva saṅkhyāvidhiphalakaṃ lohitoṣṇīṣā ityādivadvidhīyate /
yūpakāryasvarūpe cānarthakyāt prakaraṇāt vājapeyāpūrvasādhanatvalakṣaṇayā vājapeyāpūrvasaṃbandhiyūpalābhāt vājapeyasyetyanuvādaḥ /
ṣaṣṭhī ca paraṃparāsaṃbandhe 'pyupapannā naptari devadattasyāyamitivat /
vyavahitatvādi ca gauṇatvāpekṣayā na doṣaḥ // 3 // 9 //

// iti navamamānarthakyatadaṅgādhikaraṇam //

<B2> atra ṣaṣṭhyāḥ prācīnamate mukhyaśrutitvāt svamate gauṇatvāt gauṇamukhyasādhāraṇaśrutiviniyogopayogicintanāt pādādhyāyasaṃgatī spaṣṭatvādapradarśya vājapeyaprakaraṇagataviṣayapradarśanapūrvakaṃ pūrvapakṣamevāha -------- saptadaśeti //
anantarasaṅgatistu pūrvatra prātipadikārthavivakṣā vacanārthasyāvivakṣeti cintite yatra tarhi prātipadikārthadvayaṃ tatra kasyāvivakṣeti jijñāsodaye avasarasattvādanyataravivakṣāvivakṣe vicāryete ityevamavasararūpā //
yattu atra prakāśakāraiḥ ----- pūrvatra graheṣu saṃmārgaḥ na camaseṣvityukte saptadaśāratnitvaṃ ṣoḍaśipātre niviśate yūpe veti cintāyāḥ prāsaṅgikatvaṃ nyāyasudhākāroktaṃ mukhyasākṣātsaṃgatisaṃbhave prasaṅgasaṅgatyabhidhānasyāyuktatvāt pradūṣya sākṣātsaṅgatyupapādanaṃ kṛtam ------- saṃskāradravyaguṇeṣu vidhiṃ pratyantaraṅgabahiraṅgabhāvakrameṇa yathāsaṃyogaṃ vyavasthoktau ekatvāderaruṇādhikaraṇoktakriyānvayatadīyadravyaniveśāpavādadvārā saṃskāre yathāsaṃyogaṃ vyavasthāvyavasthāviśeṣacintāmadhikaraṇadvayena kṛtvā dravye viśeṣacintāsaṃbhavāt guṇe saptadaśāratnitve āruṇyādhikaraṇanyāyena sāmānyataḥ siddhayoḥ kriyāṅgatvatadīyadravyaniveśayostadviśeṣacintā ------- kiṃ vājapeyāṅgaṃ sat tadaṅge ṣoḍaśipātre niviśate, uta paśuyāgāṅgaṃ sat tadaṅgayūpa iveti ------ iti /
tadekahāyanyādipadavat bahuvrīhitvena saptadaśāratnipadasya dravyaparatvādāruṇyavatkriyāṅgatvāyogena tatsāmānyacintāviṣayatvāsaṃbhavāt iha viśeṣacintātvāsaṃbhavena sākṣātsaṅgatyasaṃbhavādayuktamityupekṣitaṃ pūjyapādaiḥ /
yathācāsya dravyaparatvaṃ tathā nirūpayiṣyate /
ataeva prasaṅgasaṅgatimiva sākṣātsaṃgatimapi vihāya kaustubhe 'vasarasaṅgatireva darśitā //
tatra yūpoddeśena saptadaśāratnividhāne na tāvadbahuvrīhyupāttānyapadārthatvena yūpasyoddeśyatvasaṃbhavaḥ; ekaprasaratābhaṅgāpatteḥ /
nāpi yūpapadārthatvena; tathātve 'nyapadārthānanvayena samāsānupapatteḥ, aratnīnāṃ prāptatvena vidhyanupapatteśca /
aratnyanuvādena saṅkhyāvidhāne 'tiprasaṅganirākaraṇāya yūpīyatvaviśeṣaṇe vākyabheda ekaprasaratābhaṅgāpattiśca /
ataḥ saptadaśāratnidravyaṃ svāmitvārthakaṣaṣṭhyā pratipāditaprādhānyavājapeyoddeśena vidhīyate /
evañcāvyavahitapradhānānvayāt ṣaṣṭhīśrutiḥ kathaṃbhāvānugrahādikaṃ labhate /
anyathā dīkṣaṇīyavāṅniyamanyāyena paśvapūrvārthatvasya yūpamātrārthatvasya vā'pattyā vājapeyānaṅgatvāt tadbādhāpattiḥ //
kiñca viśiṣṭoddeśe vākyabhedāpatterekatarāvivakṣāyāṃ mukhyatvāt vājapeyapadārthavivakṣāmaṅgīkṛtya yūpāvivakṣaiva yuktā; anyathā prakaraṇādeva vājapeyasaṃbandhitvaprāpteḥ vājapeyapadānarthakyāpatteḥ /
ataeva saptadaśāratnitvaviśiṣṭayūpasyaiva vidhānaṃ parāstamityabhipretya pūrvapakṣamupapādayati -------- avyavahitatvāditi //
dravyavidhāne 'pi lohitoṣṇīṣādivadvidhiśakterviśeṣaṇe saṃkrāntyabhiprāyeṇa saptadaśāratnitvamityuktam /
vājapeye bādhāt kathaṃ tasyāṅgatvamityāśaṅkāṃ nirasyati ------ tadīyeti //
rasādhārabhūtasyāpi ṣoḍaśipātrasya grahairjuhotītyanena yāgāntargataprakṣepāṅgatvena vājapeyaṃ prati sākṣādaṅgatvāt taddvārā niveśastatretyarthaḥ /
anyagrahapātrāṇāṃ sādhāraṇatvādasādhāraṇyena vājapeyasaṃbandhitvena tatraiva niveśaṃ sūcayituṃ tadīyetyuktam /
ūrdhvapātraṃ ṣoḍaśigraha ityarthaḥ /
sādṛśyāditi //
tasyaca pātrasya khādiratvādūrdhvatvācca yūpasādṛśyamādāya yūpapadaṃ gauṇam /
ataeva -------- ūrdhvapātravācakapadasāmānādhikaraṇyābhāve 'pi saptadaśāratniyūpasadṛśamityevaṃ gauṇasāmānādhikaraṇyamādāyordhvapātraviṣayatvasiddhirityarthaḥ //
yattu somanāthena ------ yūpe khādiratvasya vaikalpikatvāttasya niyatopasthityabhāvāt yūpapadena niyatopasthitordhvatvasādṛśyamātrasyaiva grahaṇena sarvordhvapātramātre niveśa ityuktam, tat pakṣe upasthitasyāpi tasyetaraniyamanārthatvopapatterayuktam /
ataeva aindrāgne ekādaśadvādaśakapālatvayorvikalpe 'pi dvādaśakapālānāṃ vikṛtau vikalpitadvādaśakapālaindrāgnavikāratvamiṣyata evetyupekṣitaṃ pūjyapādaiḥ //
yadyapi dvayormadhye jaghanyasyāvivakṣā yuktā; tathāpi jaghanyasyāpi yūpapadasya svārthatyāgāpekṣayā mukhyasyānuvādatvameva yuktamiti tadanurodhenāvyavahitapradhānānvayaṣaṣṭhīśrutiviniyogaparityāgamapyaṅgīkṛtya yūpoddeśenaiva tadvidhānam /
tatra samāsārthānyapadārthadravyasya yūpe vidhānāsaṃbhavāt yūpapade yūpakāryalakṣaṇayā yūpakārye saptadaśāratnidravyavidhāne yadyapi tatkārye anyadeva dravyamāpatet tathāpi prakṛtiprāptayūpatvāvirodhenāpi saptadaśāratnidravyaniveśopapatteḥ yūpākhyadravyavidhānasiddhirityabhipretya siddhāntamāha -------- yūpapadasyeti //
parapadasāmānādhikaraṇyaṃ vinā gauṇatvāyogādyūpapadasya gauṇatāśrayaṇenordhvapātraviṣayatve 'nyonyāśrayāpatternordhvapātraviṣayatāsiddhirityarthaḥ /
yastu prakaraṇānugrahaḥ sa mamāpyaviśiṣṭa ityāha --------- yūpakāryeti //
yūpasya tatsādhyaniyojanasya tatsādhyapaśvapūrvasyavā saptadaśāratnitvaṃ vināpi prakṛtau siddhidarśanāt tatsvarūpe 'pyānarthakyāpatterdīkṣaṇīyāvāṅniyamanyāyabādhena lakṣitalakṣaṇayā adhikārākhyaprakaraṇasahakṛtena yūpapadena vājapeyasyetyanuvāda ityarthaḥ /
etena --------- vājapeyasaṃbandhitvalābhāya vājapeyapadasya yūpaviśeṣaṇatvāṅgīkaraṇaṃ bhavadevādīnāṃ yacca viśiṣṭoddeśavākyabhedāpādanena taddūṣaṇaṃ prakāśakārāṇāṃ tadubhayamapi -------- apāstam; tadviśeṣaṇavaiyarthyāt, ṣaṣṭhīsthale parasparānvayasya prācāṃ mate vyutpannatvena vākyabhedānāpatteśca /
etena ----------- yūpāṅgasaptadaśāratnitāyā vājapeye kathaṃbhāvākāṅkṣālakṣaṇaprakaraṇenāgrahaṇānna vājapeyāpūrvaprayuktatvaṃ, apitu vāṅniyamanyāyena paśvapūrvaprayuktatvameveti somanāthoktaṃ --------- apāstam; kathaṃbhāvākāṅkṣālakṣaṇaprakaraṇāgrāhyatve 'pyānarthakyāpattisahakṛtayūpapadaśrutyaiva tadaṅgatvabodhanena vājapeyāpūrvaprayuktatvasyaivāpatteḥ //
nanu vājapeyāṅgatvena yūpāprasiddhiḥ kathaṃ vājapeyasaṃbandhitvaprāptyānuvāda ityata āha --------- ṣaṣṭhī ceti //
atraca prācāṃ rītyā yūpamātrasyoddeśyatve samāsārthavidhānasya tasminnasaṃbhavāt kāryalakṣaṇāyāñca lakṣaṇāpatterniyamena yūpatvāvirodhenaiva dravyavidhānasyāpi kliṣṭatvāpatteḥ dravyaviśeṣānupādānāpatteśca na taduddeśena dravyavidhiḥ, apitu yūpapadasya tātparyagrāhakatvamaṅgīkṛtya saptadaśāratnipadena viśiṣṭayūpavidhiḥ vājapeyoddeśena, tasyacāprākṛtakāryakaratvāpatteḥ vājapeye sādhanatvādinā niveśāyogāt ṣaṣṭhyāḥ paraṃparāsaṃbandhe 'pyupapatteḥ tadīyapaśvaṅganiyojanadvāreṇa niveśānna kaścana doṣa iti mama pratibhāti /
prayojanaṃ spaṣṭatvānnoktam //
iti navamamānarthakyatadaṅgādhikaraṇam //
- - - - - - - <B1> (10 adhikaraṇam / ) (a.3 pā.1 adhi.10) kartṛguṇe //
darśapūrṇamāsayoḥ prayājasamīpe śrutama "bhikrāmaṃ juhotī"ti /
tatrābhikramaṇasyāmūrtatvājjuhotyupātte prayājahome 'nvayānupapatterāruṇyavacceha kartṛrūpasya dravyasyānupāttatvāttaddvārāpyanvayānupapattestato vicchinnasya prākaraṇikasarvahaimāṅgatvaṃ tadīyakarturāhavanīyapratyāsāttirūpadṛṣṭakāryadvāreti prāpte ---------- anupāttasyāpi ākhyātagamyasya sadbhāvāttaddvāraiva juhotyanvayopapatteḥ prayājahomāṅgatvameveti bhāṣyakāreṇa siddhāntitam //
tat ṇamulantasya pūrvakālatādisaṃbandhena juhotyanvaye naivākāṅkṣyābhāvāt juhoteśca prayājahomamātravācitve pramāṇābhāvādaruṇādhikaraṇena gataprāyatvācca vārtikakāreṇānyathā vyākhyātam /
satyapi vākyīgrahomasaṃbandhe saṅkoce pramāṇābhāvādvedyāṃ havīṃṣītivatprākaraṇikasarvahomāṅgatvam; vācanikāṅgasandaṃśarūpāvāntarādhikārasya vākyasaṅkocakatvānupapatteḥ /
yadi hi tādṛśasandaṃśamadhye abhikrāmatītyeva śrūyeta, tato 'vāntaraprakaraṇena syādapi prayājāṅgatvam /
vastutastu nāṅgeṣvitikartavyatā'kāṅkṣālakṣaṇaṃ prakaraṇaṃ, phalābhāvāt, anyathā prayājābhikramaṇādīnāmapyanuyājādyaṅgatvāpatteḥ /
vācanikāṅgasaṃbandhasiddhyarthañca kalpitāyā ākāṅkṣāyāstanmātragrāhakatvenābhikramaṇagrāhakatvānupapatteriti prāpte ------- bhāvanāsvābhāvyenāṅgabhavanāsvapi kratūpakārabhāvyakāsvitikartavyatākāṅkṣopapatteraṅgānāmapyastyeva sā /
sā paraṃ pradhānagataphalavattvena pratibadhyate sannidhyāmnātaviṣaye /
ato na parasparāṅgatvaprasaṅgaḥ /
tadā tannivṛttiratideśenākṣepalabhyasvasaṃpādanena sādhāraṇairvā ācamanādibhiḥ //
yatra tu vācanikāṅgasandaṃśastatrā'dyenāṅgākāṅkṣojjīvanaṃ antimena ca tannāśaḥ, na tu maṇyādāviva vācanikāṅgānāṃ pratyekamuttejakatā; tāvadabhāvakūṭapraveśe gauravāt, tadvadiha vyabhicārābhāvācca /
ato vācanikasandaṃśe śrutānāmavāntaraprakaraṇena balavatāṅgāṅgatvameva /
prakṛte tu homānuvādena vihite 'bhikramaṇe homasvarūpe ānarthakyaprasaktau apūrvasādhanatvalakṣaṇātātparyagrāhakatayā vācanikāṅgasandaṃśarūpāvāntarādhikāra eva tattvenāśrīyate, na tu pradhānādhikāro 'ṅgapradhānādhikāro vā vedyāmiva /
asti cātra "samānayate juhvāmaupabhṛta mi"tyādyupakramya madhye 'bhikramaṇaṃ vidhāya "prayājaśeṣeṇa havīṃṣyabhighārayati" iti śravaṇāt saḥ /
ato 'bhikramaṇaṃ prayājahomāṅgameva /
na ca prayājeṣu homābhāvaḥ; prakṣepāṅgakasyaiva tyāgasya vṛddhavyavahāreṇa yajipadārthatvāvasāyādākṣepeṇa śrūyamāṇayajimātre homaprāptyupapatteḥ // 3 // 10 //
// iti daśamaṃ saṃdaṃśādhikaraṇam //

<B2> ānarthakyāpattyā śrutakriyānvayāyogena tadaṅgāvatāre sthite tadviśeṣacintātvenottarādhikaraṇadvayasyānantarasaṅgatau spaṣṭāyāṃ yadyapyabhikramaṇopavyānayostadaṅgāvatāre sati saṃskāratvāpatteḥ saṃmārgākhyasaṃskāracintānantarameveyaṃ cintā kartuṃ yuktā; tathāpi kriyāyāḥ sākṣāt kriyānvayāyogāt guṇavatkriyāsādhanadravyadvārā kriyānvayenārthāt dravyasaṃskāratvāvagame guṇacintānantaramapyasau yukteti saṅgatimabhipretya viṣayapradarśanapūrvakaṃ pūrvapakṣamāha --------- darśeti //
anvayānupapatteriti //
kārakatvābhāvenānvayānupapatterityarthaḥ /
dravyaparicchedadvārā kriyāyā api kārakatvenānvayopapattiṃ nirasyati --------- āruṇyavacceti //
"avyayakṛto bhāve bhavantī"tyanuśāsanena avyayatvāṇṇamulo bhāvamātravācitvāvagamena samānādhikaraṇakartṛrūpadravyānupādānāt dravyaviṣayaniyamecopapattibhūtasya sādhyakriyāsaṃbandhasya ṇamuluktasamānakartṛtvapūrvakālatvānyathānupapattisādhyatvena kartṛbhūtadravyānvayāt prāganavasaterdravyaniyamopapattintvāyogādaparicchedakatvenaca kriyāyā guṇavat kriyāsādhanadravyopādānānaupayikatvāt adhvaryākhyasya ca dravyasya dvāratvenābhimatasyānekakriyāsādhāraṇyenaikahāyanīvat vyavasthitakriyādvārakatvāyogācca na vākyīyakriyānvaya āruṇyavadityarthaḥ /
etena -------- aruṇādhikaraṇena gatārthatvamapi --------- nirastam /
nanu prākaraṇikasarvahomāṅgatve 'pi ārādupakārakatayaivāṅgatvāpattirityata āha --------- tadīyeti //
"ābhīkṣṇye ṇamulce"ti smṛtervīpsārthasyāvṛttirūpasyābhīkṣṇyasya ṇamulopādānādārādupakārakatveca tantratvādāvṛttyanupapatteḥ saṃskārasyatu kāryayogyatādhānārthatvāt pratikāryamāvṛttyanupapatteḥ kartṛsaṃskāratvameva; so 'pi ca dṛṣṭarūpa evetyarthaḥ //
anupāttasyāpīti //
ṇamulo bhāvārthakatvāt samānakartṛkayorityanuśāsanasya saṃmārgānuśāsanamātraparatvena ṇamulastadapratītimabhipretyākhyātagamyasyetyuktam /
ataeva -------- pūrvakālatādisaṃbandhenetyatrādipadena samānakartṛtvasaṃbandhasaṃgrahaḥ //
vākyīyajuhotyanvayavicchedena bhāṣye kṛtasya pūrvapakṣasyātitucchatvenāyuktatāṃ darśayitvā vārtikakāroktarītyā vicāraṃ darśayati ------- taditi //
pūrvapakṣamāha ------- satyapīti //
yadyapi ṇamulaḥ kārakatvānabhidhāyakatvena mukhyaśrutitvāsaṃbhavāt dhātusaṃbandhasyāpyaṅgatvarūpasya saṃsargavidhayā bhānena ṣaṣṭhīvat gauṇaśrutitvasyāpyanupapatterdvārībhūtakartraṅgatvasya liṅgagamyatvānna śrutiviniyogopayogivicāratvena pādārthatayāyaṃ vicāraḥ saṅgatastathāpi ṇamulabhāve vākyenāṅgatvāyogāt ṇamulśrutyunneyatvena śrautatvopacārātsaṅgatiḥ satyapītyapiśabdena sūcitā /
anantarā tu sākṣātpradhānāṅge homāṅgatvaśravaṇena bādhite tadviśeṣacintātvādavasararūpā spaṣṭaiva /
tatra homāṅgatve pramite 'pi tatsvarūpe ānarthakyaprasaktau pradhānādhikārākhyaprakaraṇena kartṛsaṃskāradvārā pradhānāpūrvasaṃbandhihomatvasyoddeśyatāvacchedakatvāvagateḥ kartuścāṅgapradhānasādhāraṇasya dvāratvena pradhānasaṃbandhitvasyāpi sākṣātparamparāsādhāraṇyenaiva vivakṣitatvātprakṛtasarvahomāṅgatvam, athavā -------- vākyasaṃkoce pramāṇābhāvāt aṅgādhikārasyāpi pradhānādhikāravat apūrvasādhanatvalakṣaṇātātparyagrāhakatvāt prakṛtasarvahomārthatvamityabhipretya pūrvapakṣamāha ---------- saṃkoca iti /
yadi hīti //
yadyabhikrāmatītyeva śrūyate, tadā vākyavyāpārābhāvāt tena prayājamātrāṅgameva śrūyate, tadā vākyavyāpārābhāvāt tena prayājamātrāṅgameva syādityarthaḥ /
yadi pradhānetikartavyatākāṅkṣāyā prayājānāmaṅgatvena grahaṇe tena kratūpakārabhāvyakatvāvagatesteṣāmitikartavyatākāṅkṣā kalpyeta, tadā prathamapravṛttayā pradhānākāṅkṣyā prayājānāmivābhikramaṇasyāpi pradhānamātrāṅgatvāpattiḥ /
evaṃ satyapi tadākāṅkṣyā gṛhyeta, tadā bādhakamāha -------- anyatheti //
nanu bhāvanāsvābhāvyena utpadyamānaprayājādīnāmaṅgākāṅkṣā upajīvyena prathamapravattena pradhānakathaṃbhāvena pratibaddheti na tayā parasparāṅgatvam /
āvaśyakaśrutyāditrayaviniyuktenāṅgenaca pratibandhakanirodhe satyujjīvitayā tayābhikramaṇasyāpi tatsaṃdaṃśapatitasya grahaṇopapattirityata āha -------- vācaniketi //
vācanikāṅgasaṃbandhasidhyarthaṃ kalpyasya pratibandhakanirodhasya dharmigrāhakapramāṇena pratyekameva kalpayitumucitatvāt abhikramaṇasya tannirodhakalpane pramāṇābhāvenānujjīvitayā prayājākāṅkṣyā grahaṇānupapattirityarthaḥ //
atideśeneti //
dīkṣaṇīyāvaimṛthādiṣvityarthaḥ //
svasaṃpādaneneti //
yāgasvarūpasaṃpādakadravyadevatādinetyarthaḥ //
tadvadiheti //
loke uttejakena uttejanākaraṇe 'pi vahnimātreṇa dāhadarśanāt prathamatṛtīyakṣaṇayoḥ uttejakasattve dvitīyakṣaṇe maṇimātreṇa pratibandhadarśanācca vyabhicāreṇottejakasya na uttejanaṃ kāryam, apitu uttejakavirahaviśiṣṭamaṇeḥ pratibandhakatvam /
tadabhāvaścāgneḥ sahakārīti kalpyate, prakṛte tvādyākāṅkṣāyā abhāve pradhānagataphalavattvapratibaddhaprayājākāṅkṣyā vācanikādyāṅgagrahaṇadarśanāt vyabhicārābhāvāt pratibaddhākāṅkṣottejanamevojjīvanāparaparyāyaṃ kāryaṃ kalpyate, natu tasya tasya uttejakatā prakalpyate /
tattaduttejakakūṭābhāvakūṭasya pratibandhakatāvacchedake praveśe gauravāpatteḥ, apitu ādyottejakasya uttejanajanakatvamantimena ca taduttejananāśastadvirahaviśiṣṭasyaiva mahāprakaraṇasya pratibandhakatvam /
tadabhāvasya sahakārikāraṇatvamiti kalpanānmadhyatanāṅgākāṅkṣāṇāṃ pratyekamuttejakatvakalpane pramāṇābhāvāt uttejitākāṅkṣālakṣaṇāvāntaraprakaraṇapatitasyābhikramaṇasyāpi tadaṅgatvam /
ataeva ------- uttejitāṅgādhikārasyaivāpūrvasādhanatvalakṣaṇātātpayargrāhakatvādaprat ibaddhaparotpattyā pūrvapravṛttapradhānādhikārabādhena tasya tallakṣaṇātātparyagrāhakatvāsaṃbhavāt dīkṣaṇīyāvāṅniyamanyāyena prayājārthatvasiddhirityarthaḥ /
asticātreti //
iḍākhyatṛtīyaprayājānantaraṃ bahirākhyacaturthaprayājaṃ prati upabhṛtaḥ sakāśāt juhvāmaupabhṛdājyasya prayājānūyājārthatvāt tatraca prayājārthasyaiva samāneyatvāt prayājāṅgakīrtanasiddhirityavirodhaḥ //
nanu prayājeṣu pratyakṣato juhoteraśravaṇāt "caturgṛhītaṃ juhotī" tyanārabhyavākyena home caturgṛhītasya sādhanatvena vidhānāddhomatvābhāvāt kathaṃ tadanuvādena vidhīyamānābhikramaṇasya tadaṅgatvam? ataeva "caturavattaṃ juhotī" tyanena pradhāneṣu caturavattasaṃskārakatayā haimavidhānāttadaṅgatvameva yuktamityāśaṅkya pariharati ------- naceti /
prakṣepāṅgaketi //
vistareṇa caitadagre tṛtīye pratipādayiṣyate //
prayojanaṃ pratihomaṃ kartṛsaṃskārakatvādabhikramaṇānuṣṭhānamaprayājavikṛtiṣvapi atideśaśca pūrvapakṣe /
siddhāntetu prayājārthameva tadanatideśaśceti spaṣṭatvānnoktam //
iti daśamaṃ abhikramaṇaprayājāṅgatādhikaraṇam //
- - - - - - - <B1> (11 adhikaraṇam / ) (a.3 pā.1 adhi.11) sandigdhe tu //
darśapūrṇamāsayoḥ "pañcadaśa sāmidhenīranubrūyā" dityanena sāmidhenīrvidhāya tāsāṃ vācanikā guṇā vihitāḥ /
tato nivido nāma mantrā "devaiddha" ityādayaḥ /
tata "ekaviṃśatiranubrūyāt pratiṣṭhākāmasye" tyādayaḥ kāmyāḥ sāmidhenīkalpāḥ /
tataḥ "upavītaṃ upavyayate devalakṣmameva tatkuruta" iti /
tataḥ punaḥ sāmidhenīguṇā "antarānūcyaṃ sadevatvāye" tyādayaḥ /
tatropavītaṃ sāmidhenyaṅgam; tadavāntaraprakaraṇāt /
na ca tadavāntaraprakaraṇasya kāmyakalpairnivinmatrairvā vicchedaḥ, godohanādīnāṃ darśapūrṇamāsaprakaraṇāvicchedakatvavat kāmyānāmapi tadvicchedakatvānupapatteḥ, pūṣānumantraṇamantravannivinmatrasyāpi tadanupapatteśca /
vastutastu --------- liṅgādagnisamiddhatvarūpasāmidhenīphalaprakāśakānāmapi avāntaraprakaraṇāt sāmidhenyaṅgatvopapatterna vicchedaśaṅkā /
iṣyata eva aganmeti mantrasya yāgajanyaphalaprakāśakatvena yāgāṅgatvamiti prāpte -------- nividbhirvyavadhānānnopavītasya sāmidhenyaṅgatā /
naca pūṣānumantraṇamantranyāyaḥ; yatra hyuttarakālaṃ bahūni vācanikānyaṅgāni tatraivaikasya pūṣānumantraṇamantrādeḥ paraprakaraṇasthatvakalpanā /
yatra tu vicchedakāni bahūni uttarakalañca vācanikāṅgaṃ svalpaṃ, tatra vācanikāṅgasyaivānārabhyādhītanyāyenāṅgatvopapatterna prakaraṇānuvṛttikalpanā; anyathā viśvajidāderapi darśāṅgatvāpatteḥ /
prakṛte ca nivinmantrāṇāṃ bahutvādvācanikottarāṅgānāṃ svalpatvena na prakaraṇānuvṛttikalpanā /
vastutastu ---------- nāntarānūcyamityādīnāṃ sāmidhenīmātroddeśena vidhānaṃ pramāṇābhāvādapi tvanuvacanasāmānyoddeśena /
ataśca sāmidhenīnāṃ viśiṣyopasthityabhāvānna prakaraṇānuvṛttiḥ /
yattvante "devā vai sāmidhenīranūcye" tyādisaṃkīrtanam, tadāghārārthavādatvādasādhakam /
ata evānte vācanikāṅgābhāvādeva na nividāṃ sābhidhenyaṅgatvaśaṅkā /
saṃnidhimātreṇa tadaṅgatvaśaṅkā tu parasparāṅgatvānupapatteḥ prakaraṇena bādhāccāyuktā /
nacaivaṃ āśrayābhāvātkāmyeṣu guṇaphalasaṃbandhānupapattiḥ; tatrānuvacanāntarasyaiva phaloddeśena vihitatvāt, tasya ca saṅkhyāyuktānuvatvanasāmānyātpañcadaśasaṅkhyākanityānuvacanaprakṛtikatvāvagatestadīya- dharmāṇāṃ trirabhyāsādīnāṃ tadīyarcāṃ ca prāpternādharmakatvam /
nacarcāmanuvacanaṃ prati prādhānyātkathamatideśaḥ; prakṛtau trirabhyāsayuktapāṭhādeva tāvatsaṅkhyākarcāmarthāccānuvacanasya ca prāptyupapatteḥ "pañcadaśa sāmidhenīranubrūyādi"ti vacanavaiyarthyāpatteragatyā saktunyāyena viniyogabhaṅgaṃ prakalpya mantraviśiṣṭānuvacanasyaiva vidheyatvena tadaṅgabhūtānāmṛcāṃ prāptyupapatteḥ /
guṇatvamapi carcāṃ nānuvacanaphalaprakāśakatayaiva, apitvanuvacanajanakatayā; lāghavāt /
ataśca na dvāralopādbādha ūho vā /
anuśabdena darśapūrṇamāsāṅgabhūtapadārthānantaryasyoktatvāttasya ca paraprayuktatvena bahiḥkratu prayoge 'nuṣṭhātumaśakteḥ kratumadhyaprayogasiddhiḥ /
vaikṛtānuvacanenaiva ca prasaṅgātprākṛtānuvacanakāryasiddherna tasya pṛthaganuṣṭhānam /
atasteṣvapi na sāmidhenīprakaraṇānuvṛttiḥ /
naca tarhi tadaṅgatvamevopavītasya kiṃ na syāt? teṣāṃ vikṛtitvena prākṛtāṅgairnirākāṅkṣāṇāṃ prakaraṇābhāvāt, vācanikāṅgasandaṃśābhāvācca /
ato mahāprakaraṇāddarśapūrṇamāsāṅgamupavītaṃ tatkartṛsaṃskārakatayā tatkartṛbhiḥ sarvapayogārambhe kāryamiti siddham // 11 // ityekādaśaṃ upavītasāmidhenyanaṅgatādhikaraṇam //
<B2> (sandaśanyāyaḥ) atra sāmidhenyaṅgatvapūrvapakṣadarśapūrṇamāsāṅgatvasiddhāntopapattimūlāvāntaraprakaraṇasadbhāvatadvicchedopa- pādakatayā vicārānupayuktamapi viṣayavākyena sahodāharati --------- darśapūrṇamāsayoriti //
siddhāntakoṭihetutayā darśapūrṇamāsayorityuktam /
vācanikā guṇā iti //
triḥ prathamāmanvāha triruttamāmityādaya ityarthaḥ //
antarānūcyamiti //
"yat krauñcamanvāhāsuraṃ tadyanmandraṃ mānuṣaṃ tadyadantarā tatsadeva mi"ti pūrvaṃ ninditakrauñcamandrayoḥ ya antarā madhyavartī madhyamaḥ svarastenānūcyamityarthaḥ /
tataśca "viśvarūpo vai tvāṣṭraiti prapāṭhake saptamāṣṭamānuvākayoḥ sāmidhenībrāhmaṇamāmnātam, navame deva iddho manviddha ṛṣiṣṭuto viprānumaditaḥ kaviśasto brahmaśaṃsitaḥ" ityādinivinmantrāṇām, daśame kāmyānāṃ sāmidhenīkalpānām, ekādaśe upavītatadantarālaguṇavidhīnāṃ ca brāhmaṇamāmnātamityavāntaraprakaraṇatadvicchedasaṃśayādvicāra ityarthaḥ /
sautrasaṃdigdhapadavyākhyārthamavaśyamupanyasanīyamapyavāntaraprakaraṇasadbhāvavicchedasaṃśayaṃ tathā kartṛsaṃskārasāmānyādbuddhisthasyopavītasya bhāṣyakāramate sannihitānvayāpavādāya vārtikamate avāntaraprakaraṇāpavādādāpavādikīmanantarasaṅgatiṃ ca spaṣṭatvādanullikhya ataeva śrautaviniyogopayogivicārābhāvena pādasaṃgatyabhāve 'pyakṣatiṃ cābhisaṃdhāya pūrvapakṣamāha ------- tatropavītamiti //
atropavītaṃ nāma brahmasūtraṃ navatantukaṃ yajñopavītāparaparyāyaṃ grāhyam, athavā vāsovinyāso veti saṃdehe nirṇayastṛtīye kariṣyate /
tadavāntaraprakaraṇāditi //
naca ---- adṛṣṭārthasya prokṣaṇādisaṃskārasya avāntaraprakaraṇasadbhāve 'pi sāmidhenīnāmagnisamindhanarūpadṛṣṭakāryārthatvāt dṛṣṭarūpetikartavyatayaiva tadākāṅkṣānivṛttyupapatteritikartavyatāyā anapekṣaṇāt satyapi vācanikānāṃ vacanādevāṅgatve avāntaraprakaraṇasyaivābhāvekathaṃ tena tadaṅgatvaṃ ------ iti ----- vācyam; agnisamindhanasyāpi apūrvasādhanatvopahitatvena bhāvyatvāt sāmidhenīnāṃ niyamādṛṣṭajanakatvācca vaidhetikartavyatākāṅkṣopapatteravāntaraprakaraṇopapattirityarthaḥ //
nivanmantrairveti //
nivinmantrāṇāṃ mahāprakaraṇasahakṛtaliṅgena sāmidhenīvadevāgnisamindhanaprakāśakatvenāgnisamindhanārthasāmidhenyaṅgatvāyogāt anupajīvyanyāyena vyavadhānātsāmidhenīprakaraṇavicchedopapattirityarthaḥ /
godohanādīnāmiti //
darśapūrṇamāsāṅgapraṇayanāśrayatvena prakaraṇānuvṛtteḥ sattvena prakaraṇāvicchedakatvavat ihāpi avicchedakatvopapattirityarthaḥ //
nivinmantraiḥ vicchedaṃ prakārāntareṇāpi pariharati --------- vastutastviti //
sāmidhenīvannividāmapyagnisaṃmindhanaprakāśanārthatve 'pi sāmidhenīnāmagnisamindhanārthe kāṣṭhaprakṣepaprakāśanārthatvāt nividāmiddha iti bhūtāniṣṭhayedhmaprakṣepaphalāgnisamindhananiṣpattiprakāśanārthatvādaganma iti mantrasya darśapūrṇamāsaphalaniṣpattiprakāśanārthasya darśapūrṇamāsāṅgatvavat sāmidhenīprakāśyedhmaprakṣepaphalaniṣpattiprakāśanādanupajīvyāṅgatvābhāvena vicchedakatvānupapattirityarthaḥ //
darśapūrṇamāsādiphalasya adṛṣṭadvārasādhyatvena śraddhāpekṣatvāt śraddhājananāt phalaniṣpattiprakāśanasyāṅgatvasaṃbhave 'pīha idhmaprakṣepaphalasyāgneḥ samiddhatvasya dṛṣṭadvārā sādhyatvena śraddhānapekṣatvāt phalaniṣpattiprakāśanasya aṅgatvāyogena nivitprakāśyaphalasādhanedhmaprakṣepaprakāśanārthatvena sāmidhenīnāmeva tadaṅgatvasya nivārayitumaśakyatvāt vinigamanāviraheṇa ca tairvicchada iti vastutastu ityādyuktaprakārāntaradūṣaṇaṃ spaṣṭatvādupekṣya pūṣānumantraṇamantravadavicchedakatvamuktaṃ pariharan siddhāntamāha ------ nividbhiriti /
anyatheti //
viśvajidādividhyuttaraṃ vācanikadarśāṅgasattvena darśapūrṇamāsaprakaraṇānuvṛttikalpanayā darśāṅgatvāpatterityarthaḥ /
prakaraṇānuvṛttikalpaneti //
ataścottarāṅgāṇāṃ prakaraṇena tadaṅgatvāyogena anārabhyādhītānāṃ prakṛtau niveśa iti nyāyena prakṛtasāmidhenyaṅgatvopapattirityarthaḥ /
ataścopavītasya sandaṃśapatitatvamamabhyupetyoktam //
vastutastu ------- sandaṃśa eva nāstītyāha ------- vastutastviti //
viśiṣyopasthityabhāvāditi //
tataścāvicchede sati prakaraṇānuvṛtteranūcyamiti sāmānyaśabdo viśeṣaparaḥ syāt viśeṣaparatveca saṃdaśātprakaraṇānuvṛttirityanyonyāśrayāpatterna viśeṣaparatvena sāmidhenyupasthitirityarthaḥ /
āghārārthavādatvāditi //
sāmidhenyanuvādasya tadguṇavidhyarthatvābhāvātstutyarthamupādānānna tadākāṅkṣānuvṛttikalpanāsaṃbhava ityarthaḥ //
nanu -------- indriyakāmādhikaraṇanyāyena ekaviṃśatyādiguṇānāṃ phalānvayāvaśyaṃbhāvena tatraca vākyena āśrayasamarpaṇe vākyabhedāpatteḥ prakaraṇenaivāśrayasamarpaṇaṃ kartavyamiti kāmyakalpaiḥ prakaraṇasyojjīvanāt sāmidhenyaṅgatvaṃ durvāram, prakaraṇojjīvanābhāveca kathaṃ guṇaphalasaṃbandhasiddhirityabhipretyāśaṅkate -------- nacaivamiti //
ataeva āśrayālābhānna guṇaphalasaṃbandhaḥ, kintu aniviśamānaikaviṃśatyādiguṇāt bhinnasyānuvacanasyaiva vidhiriti na tadanurodhena prakaraṇojjīvanamiti pariharati -------- tatreti /
saṅkhyāyukteti //
anuvākyāsādhāraṇasādṛśyavyāvṛttaye saṅkhyāyukteyuktam //
nanu "pañcadaśa sāmidhenī" riti prakṛtivākye prakaraṇāvagatāṅgabhāvānāṃ sāmidhenīnāmṛcāṃ dvitīyayā saṃskāryatvāt phalasya cāṣṭame atideśanirākaraṇāt kathamatideśaḥ?thae naca sāmidhenīnāmuddeśyatve tadviśeṣaṇapañcadaśatvāvivakṣāprasaṅgaḥ; tasya trirabhyāsavidhānasahitapāṭhādeva prāptatveneṣṭāpatteḥ ityāśayenāśaṅkate -------- nacarcāmiti /
trirabhyāsayukteti //
triḥ prathamāmanvāheti trirabhyāsavidhānasahitaikādaśarcāṃ pāṭhādevetyarthaḥ /
arthācceti //
anuvacanaṃ hyuccāraṇarūpam /
taccārthaprakāśanasya uccāraṇakriyāvacchedenaiva saṃbhavādarthataḥ prāptamityarthaḥ /
vidheyatveneti //
sāmarthyaparikalpitāgnisamindhanārthatayā vidheyatvenetyarthaḥ //
yattu atra prakāśakārai :------ sāmidhenīgataliṅgāvirodhāyānuvacanaphalībhūtāgnisamindhanaprakāśakatayā sāmidhenīnāmanuvacanaṃ prati guṇatvaṃ pratipāditam, tatpratiṣṭhādiphalārthānuvacane dvāralopātsāmidhenīnāṃ prāptyabhāvāpatteḥ kathañcidvā prāptau pratiṣṭhādipadohāpatteḥ kāmyena nityasya prasaṅgasidhyanāpatteścāyuktamiti sūcayitumanyathā guṇatvamupapādayati ------- guṇatvamapiceti //
nanu -------- anuvacanāntarāṇāṃ darśapūrṇamāsāgṛhītānāṃ bahiḥkratu prayogāpattiḥ ityata āha ----- anuśabdena ceti //
atra cāgnaye samidhyamānāyānubrūhīti praiṣānantaryameva anubrūyādityupasargasyānorarthamaṅgīkṛtya praiṣasyaca kratvarthāgnisamindhanārthatvena bahiḥkratu prayogaprāpteḥ anuvacanatvavyāghātāpatterna bahiḥ kratvanuṣṭhānamiti nyāyasudhākāraḥ /
praiṣānantaraṃ namaḥ pravaktra iti nigadapāṭhāttadanantaraṃ sāmidhenīnāṃ pāṭhānnigadānantaryamanorarthamaṅgīkṛtya tasyāpi paraprayuktāgnisamindhanārthasya bahiḥ kratvaprāpteranuvacanatvabādhāpattyā na bahiḥ prayoga iti pārthasārathiḥ /
evañcānyataraniṣkarṣaṃ vināpi sarvathā bahiḥkratvananuṣṭhānaphalasiddhestamakṛtvaiva matabhedaṃ sūcayituṃ sāmāgyataḥ pūrvapadārthānantaryasyoktatvādityuktam //
vastutastu ------- praiṣānantaryasya praiṣārthe sāmarthyādeva prāpteranuvacanavidhivaiyarthyāpatteḥ bhinnakartṛkayoḥ kriyayoḥ kramānapekṣaṇenānapekṣitavidhitvāpatteścāpekṣitavidhitvalābhāya praiṣānantaryeṇa bādhitaṃ hautranigadānantaryameva pratiprasavavidhayā vidhātuṃ yuktam /
nigadānāṃ ca sāmidhenīvat svātantryeṇāgnisamindhanārthatvena sāmidhenyaṅgatvena prāpterabhāvāttadanurodhenāntaḥ prayoga iti jñeyam //
nanu -------- yadyapi namaḥ pravaktra ityādinigadānantaryamanuvacanasya; tathāpi tasya "pañcajanā mama hautraṃ juṣadhvaṃ tadadya vācaḥ prathamaṃ maśīye" tyādivākyaparyālocanayā kariṣyamāṇasarvakarmārthatvena sāmidhenīmātrārthatvenavā pravaktrādiprārthanāparatvāvasāyāt sāmidhenyaṅgatvasyāpi sattvena bahiḥkratu prayojyatvopapatteḥ tadānantaryaṃ saṃbhavatyeva /
yadāpi praiṣārthānantaryaṃ tadāpi svaphalārthamanujñājñāpanarūpasyāṅgasya vikṛtāvūhena prayogopapatteḥ bahiḥ prayogepyākṣepeṇa tadānantaryasaṃbhavāt bahiḥkratu prayogo durnivāra iti -------- cet, na; anuśabdenottarakālavācinā sāṅgasāmidhenībhāvanāyāṃ tadanaṅgabhūtapūrvapadārthāntarakālatvasya vihitatvātpūrvapadārthasyaca paraprayuktasyākṣeptuṃ aśakyatvena taduttarakālatvāsaṃbhavāt, ato na bahiḥkratu prayogāpattiriti kaustubhe draṣṭavyam //
yattu vārtike --------- pṛthakprayoge satyekaviṃśatisaṅkhyāparicchedyatvena atideśaprāptānāmapi "pravo vāje" tyādyṛcāmagnisamindhanāprakāśakatvena sāmidhenītvābhāvāpatteḥ aprayogamadhyasthasya cāgnerniṣphalatvenāsamindhanīyatvena ṛcāmagnisamindhanaprakāśakatvānupapatteḥ sāmidhenīnāmekaviṃśatyādisaṅkhyāparicchedyatā atideśaprāptā vihanyetetyuktam, tatsāmidhenīnāmanuvacanāntare janakatvamātrārthatvenānuṣaṅgikāgnisamindhanasya prayojanakalpanāt paraprayuktāgnisamindhanābhāve 'pi pratiṣṭhāphalakānuvacanasya prayojakasya sattvena tatprāptyupapatteḥ kādācitkāgnisamindhanārthatvenāpi sāmidhenītvāvighātānna bahiḥkratu prayogabādhakamityupekṣitaṃ pūjyapādaiḥ /
evamantaḥkratvanuṣṭhānasya sādhitasya phalamāha -------- vaikṛteti //
ataḥ kāmyaphaleṣvāvaśyākāśrayalābhāya na sāmidhenīprakaraṇojjīvanāpekṣetyupasaṃharati -------- atasteṣvapīti /
tatkartṛsaṃskārakatayeti //
anena ca sāmidhenyaṅgatvapakṣe tadāraṃbha eva kartrā avaiyagṣāpādakatayā upavītaṃ pūrvapakṣe kāryam /
siddhāntetu darśapūrṇamāsaprayogāraṃbha iti prayojanaṃ darśitam //
ityekādaśaṃ upavītasya sāmidhenyanaṅgatādhikaraṇam //
- - - - - - <B1> (12 adhikaraṇam / ) (a.3 pā.1 adhi.12) guṇānām //
ādhāne pavamāneṣṭitaḥ pradeśāntare "vāraṇo yajñāvacaro vaikaṅkato yajñāvacara" iti śrutam /
tatra yajñasādhanatvena śrutānāṃ vāraṇādīnāṃ sākṣādayajñarūpādhāne niveśāsaṃbhavādānarthakyatadaṅganyāyena pavamāneṣṭirūpe yajña eva niveśa iti prāpte -------- bhāṣyakāreṇa tāvadevaṃ siddhāntitam ------- ādhānaprakaraṇe paṭhitena "yadāhavanīye juhotī" tivākyena pavamānahaviṣāmagnyaṅgatvāvagaterādhānāṅgatvābhāvenānarthakyatadaṅganyāyāsaṃbhavātsvarūpeṇa ca pavamāneṣṭīnāma- sannihitatvādvāraṇavaikaṅkatādīnāṃ sarvaprakṛtiyajñāṅgatvaṃ sarvayajñāṅgatvaṃ veti //
vārtikakārastu na tāvadanārabhyavākyena pavamānahaviṣāmagnyaṅgatvam; tena sarvahomānuvādenāhavanīyavidhānāt, pavamāneṣṭīnāmeva viśiṣyopasthityabhāve saptamyā prādhānyalakṣaṇāyāṃ pramāṇābhāvāt /
nāpi pavamāneṣṭiprakaraṇe vākyāntarakalpanā; tadabhāve 'pi vāraṇādīnāṃ sarvayajñārthatvopapatteḥ /
astu vā ādhānaprakaraṇe tattathāpi tenādhānāṅgabhūtahomānāmāhavanīyādhikaraṇatvasiddhireva natvagnyaṅgatvasiddhiḥ; saptamyā lākṣaṇikatvāpatteḥ /
ata eva tatratyamāhavanīyapadaṃ ādhānajanyotpattyapūrvaviśiṣṭāgnilakṣakameva; paramāpūrvaviśiṣṭāgnirūpamukhyāhavanīyasya tadānīmasattvāt /
nacaivaṃ pavamāneṣṭihaviḥ śravaṇādau gārhapatyādiprāpakābhāvaḥ; tatra mukhyagārhapatyādibādhe pramāṇābhāvāt /
ataśca satyapi vacanāntare pavamāneṣṭīnāmagnyaṅgatve pramāṇābhāvādādhānāṅgatve 'pi vāraṇādīnāṃ sarvayajñārthataivamupapādanīyā //
sarvatra svoddeśyasyāpūrvavyabhicāre 'pūrvasādhanatvalakṣaṇārthaṃ prakaraṇānupraveśo yathā vrīhīnityādau /
ataeva tādṛśasthale ānarthakyatadaṅganyāyaḥ, prakṛte tu yajñapadenaivāvyabhicāritāpūrvasādhanatvopasthitau tadarthaṃ prakaraṇānupraveśābhāvātpradhānasaṃbandhasyaivāprasaktau kva tadaṅgāvatāraḥ /
evaṃ satyapi yadi pavamāneṣṭisaṃnidhau pātrāṇi śrūyeran, tadānuvādasya sati saṃbhave saṃnihitagāmitvādvrīhibhiryajetetyādivadbhavetprakṛtamātraviṣayatvam /
natvetadapi; pavamāneṣṭīnāṃ pradeśāntarasthatvāt /
ato vāraṇādīnāṃ sarvayajñārthatvameva //
prayojanaṃ pavamāneṣṭyanantaraṃ pātrāṇāṃ nāśe darśādyarthaṃ aniyatānāmutpattiḥ /
siddhānte vāraṇādīnāmeveti // 3 // 12 //
// iti dvādaśaṃ vāraṇasarvayajñārthatvādhikaraṇam //
<B2> viṣayavākyamudāharati ------- ādhāna iti //
yajñe avacaryate anuṣṭhīyate 'nenetivyutpattyā yajñānuṣṭhānasādhanaṃ yajñāvacaraśabdasyārthaḥ /
atraca yena yajñe anuṣṭhīyate sa vāraṇa ityabhedapratīteryajñoddeśena tatsādhanapātraparicchedadvārā vāraṇatvavaikaṅkatatvajātyorvidhānena yatra juhvādau jātyantaravidhānaṃ tatrāniveśe 'pi ulūkhalamusalādiṣu tadvidhyavirodhaḥ, tatrāpi natvetena juhuyāditi vākyaśeṣabhūtaparyudāsavaśādyajñāṅgaprakṣepākhyahomavyatiriktasādhanapātradvārā vāraṇasya tathā juhuyādevaitenetyadhikaraṇamālālikhitavākyaśeṣabalāt yajñāṅgaprakṣepahomasādhanapātradvārā vaikaṅkatasya niveśa iti kaustubhe pūjyapādāḥ /
nyāyasudhāyāṃ tu vaikaṅkatasya sarvapātrakāryārthatvamuktamiti viśeṣaḥ pradeśāntara ityasya kṛtyaṃ svayameva vyaktīkariṣyati /
tatra vājapeyāṅgatvenāvagatasya saptadaśāratnitvasya tatrāsaṃbhavāt tadaṅgapaśuyāgāvatāre abhihite tenaiva nyāyena abhikramaṇopavyānayoḥ karmāṅgabhūtakartravatāre siddhe tatraiva karmaviśeṣāṅgakartṛsaṃskāradvāraviśeṣavicārāt pūrvaparyavasitasya ānarthakyatadaṅganyāyasya pavamāneṣṭīnāṃ vārtikakāramate ādhānāṅgatve 'pi yajñatvābhāvānnādhānaprakaraṇapaṭhitānāṃ pātrāṇāṃ tāsvavatāra ityāpavādikīṃ bhāṣyakāramatetu prāsaṅgikīmanantarasaṅgatiṃ ca tathā gauṇaśrutiviniyogopayogivicāreṇa pādasaṅgatiṃ tathā saṃśayañca spaṣṭatvādapradarśya pūrvapakṣamevāha --------- tatreti //
yajñasvarūpe ānarthakyaprasaktāvapūrvasādhanatvalakṣaṇārthaṃ prakaraṇānupraveśe prasakte prakṛtāpūrvasādhanasyādhānasya yajñātvābhāvādādhāne niveśāsaṃbhavāttasminnapyānarthakyaprasaktau tadaṅgabhūtānāṃ pavamāneṣṭīnāmaṅgatvāt tā eva prakṛtāpūrvopakārakatvasaṃbandhena yajñapadena uddiśya vāraṇādividhānam /
yadyapi pavamāneṣṭīnāṃ pradeśāntare paṭhitatvānna viśiṣyādhikāro 'styupasthāpakastathāpi pradhānādhikāreṇaiva pradhānāṃśe bādhitena tatsaṃbandhipavamāneṣṭyupasthāpanānnānarthakyatadaṅganyāyena tadarthatāyāṃ virodha ityarthaḥ //
yadāhavanīye juhotīti anārabhyādhītavākyena āhavanīyasyādhikaraṇatvena vidhānātsaptamyā dvitīyārthalakṣaṇāyāṃ pramāṇābhāvāt kathañcitprādhānyakalpanayā pavamānahaviṣāṃ tadaṅgatvakalpane viśvajidādikratvantarāṇāmapi tadaṅgatvāpattau niṣphalatvāpatteryadyapi na tena agnyaṅgatvaṃ tāsāṃ sidhyati; tathāpi ādhānaprakaraṇe bhāṣyakāralekhanādvākyāntarasattāmanumāya tadīyasiddhāntamupapādayati --------- ādhānaprakaraṇa iti //
tenaca kalpitavākyena nādhikaraṇatayā homāṅgatvenāhavanīyavidhiḥ; āhavanīyasyādyāpyasiddhatvāt, atastatrāgāre gāvo 'pāsyantāmityatreva saptamyā prādhānyaparatvamaṅgīkṛtya pūrṇāhutyādihomasādhāraṇyenāgnyaṅgatvapratītervākyena prakaraṇabādhādatra ādhānāṅgatvamityādhānasamapradhānatayā nānarthakyatadaṅganyāyapravṛttirityarthaḥ /
etena -------- śrautādhānāvaruddhe agnau aṅgatvena pavamānahaviṣāṃ kathaṃ tadaṅgatayā niveśa iti -------- apāstam; ānarthakyapratihatanyāyena asyāpi tatprāpakatvopapatteḥ /
sarvaprakṛtīti //
ekādaśe "pañcabhiḥ yunakti pāṅkto yajña" iti yajñapadaśravaṇāda "gniṃ yunajmi śavasā ghṛtene"ti yunaktītyetadvākyavihitasyāgniyogasya pradhānapātrārthatvaṃ bhāṣyakāreṇa siddhāntayiṣyate, tadanurudhya nyāyasudhākṛtehāpi yajñapadasya pradhānayāgamātravācitvasya prasādhanāttadabhiprāyeṇa pradhānabhūtasarvaprakṛtiyajñāṅgatvamuktvā yajñapadasya yajatiparyāyasyātiriktaśaktikalpane pramāṇābhāvāt sarvasyaiveti vākye "eṣa vai saptadaśaprajāpatiryajñe 'nvāyatte" tivākye ca yajñapadasyeva yajñapadasaṃkocasyāyuktatvādaṅgapradhānasādhāraṇayajñamātrārthatvameva yuktamiti kaustubhoktarītyā sarvayajñāṅgatvaṃ veti pakṣāntaramuktaṃ draṣṭavyam //
tadabhāve 'pīti //
vāraṇādīnāṃ pavamānahaviraṅgatvanivāraṇamātrārthatvena tatkalpanamayuktam; tatkalpanāmantareṇāpi tannivāraṇena vakṣyamāṇavidhayā anyayajñārthatvāpatteḥ ityarthaḥ /
siddhireveti //
nahyanyathā āhavanīyasiddhāvanārabhyādhītavākyenāhavanīyādhikaraṇatvaṃ prāpyata iti sūcanāyaivakāraḥ /
yadyapi pavamāneṣṭyaṅgabhūtānāṃ prākṛtānāṃ homānāmatideśaprāptamukhyāhavanīyādhikaraṇakatvabādhe 'pi sati saṃbhave prakṛtidṛṣṭasyādhānaviśeṣaprayojyatvaviśiṣṭāgnyadhikaraṇakatvasya bādhe pramāṇābhāvāduktavidhāhavanīyādhikaraṇakatvaprāptiḥ saṃbhavati /
evameva pavamāneṣṭyaṅgabhūtānāṃ haviḥśrapaṇapiṣṭalepaphalīkaraṇahomādīnāmuktavidhagārhapatyānvāhāryapacanādhikaraṇatvaprāptirupapādanīyeti tadanurodhenāhavanīyādhikaraṇatvavidhānāvaśyakatvābhāvasūcanārthamādhānāṅgabhūtānāmevetyuktam /
eteṣāṃ cāprākṛtatvāduktavidhayā tadadhikaraṇatvāprāptestatprāptyarthamidameva śaraṇīkaraṇīyamiti bhāvaḥ //
evañca ------- prakaraṇātpavamāneṣṭīnāmādhānāṅgatve siddhe kathaṃ nānarthakyatadaṅganyāyāvatāra ityāśaṅkāyāḥ pradhānayajñeṣveva yajñapadapravṛtteraṅgabhūtapavamāneṣṭiṣu yajñatvābhāvānna taduddeśena vihitavāraṇādestatra niveśa iti nyāyasudhopapāditāśayavārtikoktarītyā saṃbhavantamapi parihāraṃ pūrvopapāditakaustubhoktarītyā ayuktaṃ matvopekṣya parihārāntaraṃ pratijānīte -------- ādhānāṅgatve 'pi vāraṇādīnāmiti //
sarvayajñārthatvameveti //
"eṣa vai saptadaśaprajāpatiryajñe 'nvāyate"ni vihitaprajāpatisaṃjñakasaptadaśākṣarāṇāṃ yajñamātroddeśena vidhānāt sarvayajñārthatvavat asyāpi tena rūpeṇa vidhānāt sarvayajñārthatvam, natu prakṛtimātrārthatvamityarthaḥ //
evañca ānarthakyatadaṅganyāyapravṛttyā pūrvapakṣasyāsaṃbhavena tatparihārārthaṃ adhikaraṇabhedena siddhāntakathanasyāyuktatvāt prakaraṇe 'sanniveśe utkarṣasya pūṣānumantraṇamantravadanyataḥ siddhatveneha tatprasādhane vaiyarthyācca punaḥ sūtrārambhavaiyarthyāśaṅkāyāḥ nividāṃ sāmidhenyaṅgatvānna taiḥ sāmidhenīprakaraṇaviccheda ityāśaṅkottaratvena pūrvādhikaraṇaśeṣatayā yojanātsārthakyena parihāramabhipretya avaśiṣṭaṃ prayojanamāha -------- prayojanamiti //
pavamānahavirarthānāmapi pātrāṇāṃ dāhapratipattyarthamāntaṃ dhāraṇāt tairevopādānalāghavāt antarā darśapūrṇamāsādyanuṣṭhānasaṃbhave 'pi teṣāṃ daivānnāśe darśādyarthamaniyatavṛkṣaprakṛtikānāmupādānaṃ pūrvapakṣe /
siddhānte tu vāraṇādiprakṛtīnāmeveti prayojanamityarthaḥ //
iti dvādaśaṃ vāraṇādisarvayajñārthatvādhikaraṇam //
- - - - - - - <B1> (13 adhikaraṇam / ) (a.3 pā.1 adhi.13) mithaśca //
ājyabhāgakrame śrutānāṃ vārtraghnīvṛdhanvatīmantrāṇāṃ liṅgakramau bādhitvā "vārtraghnī paurṇamāsyāmanūcyete vṛdhanvatī amāvāsyāyāmi"ti vākyābhyāṃ pradhānāṅgatvam /
iṣyate ca liṅgasyāpi mantragatasya vākyenāpi brāhmaṇagatena bādho "yadyapyanyadevatya" ityādineti prāpte --------- abādhenopapattau bādhāyogānna pradhānāṅgatvam /
nahi somadevatyasya mantrasya liṅgāvirodhaḥ saṃbhavati, somasya devatātvābhāvāt, amāvāsyāyāmadhiṣṭhānatvasyāpyasaṃbhavācca /
vastutastu --------- vākyasyāsya vyavasthāmātrakaraṇe lāghavānna pradhānāṅgatābodhakatvam /
vyavasthā capaurṇamāsyāṃ yau ājyabhāgau tatra vārtraghnītyādirūpeṇa kālakṛtā vetyādi viśeṣaḥ kaustubhe draṣṭavyaḥ // 3 // 13 // iti trayodaśaṃ vārtraghnīpaurṇamāsyaṅgatādhikaraṇam //
<B1> pūrvaṃ vākyāt prakaraṇabādhe ukte tatprasaṅgādāpatitasya kramabādhasyeha apavādādanantarasaṅgatiṃ pūrvapakṣe saptamyā dvitīyārthalakṣaṇādgauṇaśrutiviniyogopayogicintanena pādasaṅgatiṃ saṃśayañca spaṣṭatvādanuktvā viṣayapradarśanapūrvakaṃ pūrvapakṣamāha ------ ājyabhāgakrama iti //
"agnirvṛtrāṇi jaṅghana"diti prathamā vārtraghnī /
"tvaṃ somāsi satpatiri"ti saumyā dvitīyā vārtraghnī /
"agniḥ pratnena manmanā" ityāgneyī prathamā vṛdhanvatī /
"soma gīrbhiṣṭvā vayami"ti saumyā dvitīyā vṛdhanvatītyevaṃ āgneyasaumyājyabhāgayoḥ hautrakāṇḍe prayājamantrānantarakrameṇa mantracatuṣṭayamanuvākyātvena śrutamityarthaḥ /
tatra pūrvayorvṛtrahanpadayuktatvādvārtraghnītvamuttarayorvṛdhidhātuyuktatvādvṛdhanvatītvamiti vivekaḥ //
vidvadvākye karmāntaratvāvedakapramāṇābhāvāt tatraiva etadvākyayormantraviniyojakatvāsaṃbhave 'pyāgneyādi- pradhāneṣu tadupapatternānayorvyavasthārthatvamityadhikāśaṅkotthānātpaurṇamāsyadhikaraṇenāpaunaruktyamabhipretya pūrvapakṣamupapādayati ------- liṅgakramāviti //
tatrājyabhāgayoḥ pratipadyanuṣṭhānena kālakṛtavyavasthayā kramabādhāyogāt paurṇamāsyamāvāsyākālīnapradhānāṅgabhūtājyabhāgalakṣaṇayā vyavasthā vācyā /
sāca lakṣaṇāpatterevāyuktā /
ataḥ paurṇamāsyamāvāsyāpadayoḥ śaktyā nirūḍhalakṣaṇayā vā āgneyādiparatvasyānyatrāpi darśanādihāpi saptamyāḥ prādhānyaparatvaṃ kathañcidāśritya tadaṅgatvameva yuktamityarthaḥ //
nanu vākyena durbalakramabādhaucitye 'pi na prabalaliṅgabādho yukta ityataāha ----- iṣyate ceti //
balābalādhikaraṇavakṣyamāṇarītyā manotāmantrasyāgnidevatyatvaliṅgena savanīyāṅgatvaprāptāvapi "yadyapyanyadevatyaḥ paśuri"tyagnīṣomīyāṅgatābodhakavākyena brāhmaṇagatena brāhmaṇagatena vakṣyamāṇabādhavadihāpyupapadyate bādha ityarthaḥ //
devatātvābhāvāditi //
paurṇamāsyāmagnīṣomayordevatātve 'pyekasya somasya devatātvābhāvādityarthaḥ /
nahyatra paurṇamāsyāṃ somasya devatātvābhāve 'pyagniprakāśakasomaprakāśakamantrayoḥ samuccayamaṅgīkṛtyāgnīṣomadevatāprakāśakatvopapatteḥ liṅgāvirodhaḥ saṃbhavati; "puronuvākyāmanvāhe" tyatra dvitīyāyāstṛtīyārthalakṣaṇayā upādeyānuvākyāgataikatvasya vivakṣitatvāt pitryeṣṭivat "dve dve anuvākye bhavata" iti vidhyabhāvādekasminkarmaṇyanuvākyādvayānupapattiriti bhāvaḥ //
atraca prakāśakāraiḥ nyāyasudhākṛdupapāditāṃ kālakṛtavyavasthākhaṇḍanapūrvikāṃ karmakṛtavyavasthaiva śāstradīpikoktadvitīyapakṣāvalambanena samarthitā, tasyā ayuktatāṃ sūcayituṃ vyavasthādvaye 'pyanāsthāṃ darśayati ------ vyavasthā ceti //
anekoddeśena vidhyabhāve anekasya vidheyasyāniyamenoddeśe prasaṃjite 'nyatarasyānyataratra vidhirvyavasthāpadasyārthaḥ /
karmakṛtavyavasthāpakṣasyānāsthāyāmapyantelekhanāttasyā eva yuktatvaṃ sūcitam /
paurṇamāsyadhikaraṇe kaustubhe draṣṭavyamupapāditaṃ ca mayā tatraiveti vistarabhayānneha prapañcyate //
yattu atra prakāśakārāṇāṃ ------- ājyabhāgayoḥ sākṣātkālānvayābhāvāt paurṇamāsyāṃ kāle yāvājyabhāgau tayorvārtrandhyāvamāvāsyākāle yāvājyabhāgau tayorvṛdhanvatyāviti vyavasthānupapatteḥ kāladvārāca vyavasthāyāṃ ya iṣṭyeti vākyāt paurṇamāsyāṃ darśavikṛtyanuṣṭhāne vārtraghnīprasakteramāvāsyāyāñca pūrṇamāsavikṛtyanuṣṭhāne vṛdhanvatīprasakteḥ prakṛtivadbhāve vairūpyaprasaṅgāt vārtike siddhāntakoṭau kāloktiḥ pradhāne lakṣitakālagatatadanvayitārūpaparā na paurṇamāsyamāvāsyātvarūpapareti nyāyasudhākṛdāpāditakālakṛtavyavasthādūṣaṇe vaikṛtakālasya prākṛtakālakārye vidhānādyathaivāgnīṣomīye tadaṅgeṣuca paurṇamāsītvena kālavidhānena tadvikṛtau ca vihite amāvāsyākāle paurṇamāsīsthānāpanne prākṛtānāṃ paurṇamāsīkālīnāṅgānāṃ bhavati prāptiḥ, tathaiva vārtradhnyā api saṃbhavatyeva prāptiḥ /
vṛdhanvatyāstu na tatropadeśatastasya prakṛtau kṛtārthatvānnāpyatideśataḥ tasyāgnīṣomīyavidhyatatvābhāvāt //
kiñca --------- ājyabhāgayoḥ sākṣātkālānvayāt śrutāvapyārthikādhārādheyabhāvarūpasākṣātsaṃbandhasattvātkālānvayopapattir iti parihārakaraṇam, tadayuktam; kālakṛtavyavasthāpakṣe paurṇamāsyamāvāsyākālayornimittatvena athavā tattatkālīnājyabhāgalakṣaṇayoddeśyatvenānvayasyāvaśyāṅgīkārāttādṛśavikṛtaucobhayavidhasyāpi prayojakasyābhāvena vārtraghnyādiprāpterdurupapādatvāt /
ataeva yeṣvaṅgeṣu paurṇamāsyādikālasyāṅgatvena prāptistatra tadanuṣṭhāpakatāyā vaikṛtakālavidhyantareṇa bādhāttadabhāve 'pyaṅgabhūtakālānurodhena pradhānalopasyānnyāyyatvāt tatsthānāpannakālāntareṣvanuṣṭhānaṃ teṣāṃ nāsulabham /
nahi bhedanavaddarśapūrṇamāsābhāve bhedanahomasya prāptiḥ saṃbhavati /
yadapi kiñcetyādyuktāṃ tadapi pratipadi kriyamāṇājyabhāgayorārthikasyāpi tadādhārādheyabhāvasyāsaṃbhavādayuktam /
ataeva pradhānānāṃ pratipadyanuṣṭhāne 'pitadīyaprayogārambhadvārāpi tat kathañcidupapādya tadādhāratvaṃ saṃbhavedapi /
natvihājyabhāgayostadapi saṃbhāvyate /
ataeva aṅgeṣu paurṇamāsīkālatvaṃ sākṣādanupapannam svapradhānaprayogārambhadvārakameva jñeyam //
naca tādṛśapaurṇamāsīkālakatvenaiva kālakṛtavyavasthā yuktā; tathātve paurṇamāsīkālīnapradhānāṅgabhūtājyabhāgayorevoddeśyatvāpattau kālakṛtavyavasthāyā anuktisahatvādityayuktametatparihārakaraṇam /
yadapi somanāthena anayorvyavasthāvidhitvāt tasyacāvyavasthāprāptimūlakatvena tadālocane ājyabhāgadvārakatvasiddheḥ kāloddeśena mantravidhāne lakṣaṇā viśiṣṭoddeśayoraprasaktyā kālakṛtavyavasthā yuktaivetyuktam; tadapyuddeśyatāvacchedakāvacchinne avyavasthāprāptyabhāve vyavasthāvidhitvanirṇayasyaiva prathamato 'saṃbhavenājyabhāgadvārakatvālābhāt lakṣaṇāyā āvaśyakatvāt pūrvoktadūṣaṇāparihārāccāyuktataramityupekṣitaṃ pūjyapādairityalam //
iti trayodaśaṃ vātraghnyādidarśapūrṇamāsāṅgatvādhikaraṇam //
- - - - - - - <B1> (14 adhikaraṇam / ) (a.3 pā.1 adhi.14) ānantaryam //
darśapūrṇamāsayoḥ "hastāvavanenikte ulaparājīṃ stṛṇātī"ti, tathā jyotiṣṭome "muṣṭīkaroti vācaṃ yacchati dīkṣitamāvedayatī" ti śrutam /
tatra hastāvanejanaṃ hastasaṃskārārthaṃ, muṣṭīkaraṇavāgyamau ca manaḥpraṇidhānārthau /
atastattrayamapi tāvatkariṣyamāṇakarmārthamityasaṃdigdham /
tatra kariṣyamāṇaṃ karmānantaryādekavākyatvādvā ulaparājistaraṇadīkṣitāvedanarūpameveti prāpte -------- ānantaryasyāvarjanīyatvādaṅgatāgrāhakatvānupapattergrāhakatve 'pi vā prakaraṇena bādhāt 'paśya mṛgo dhāvatī'ti vadākāṅkṣāviraheṇa cākhyātadvayasya yacchabdādyupabandhābhāve ekavākyatvānupapatteḥ kartṛsaṃskārasyāsya prakaraṇādaṅgapradhānasādhāraṇasvottarapadārthāṅgatvaṃ hastāvanejane /
muṣṭīkaraṇavāgyamayostu aṅgulivāgvisargaprākkālīnapadārthamātrāṅgatvam // 14 // iti caturdaśaṃ hastāvanejanādīnāṃ prākaraṇikasarvāṅgatvādhikaraṇam //
<B2> pradhānānvaye anuvākyānāmānarthakyāpattestadaṅgabhūtayorājyabhāgayoḥ kramānusāreṇa vyavasthoktyā vāraṇādhikaraṇāpoditānarthakyatadaṅganyāyojjīvane kṛte ihāpi kramānusārāt prāptāyā vyavasthāyā apavādakaraṇādāpavādikīmanantarasaṃṅgatiṃ tathā dvitīyayā hastamuṣṭivāksaṃskārārthatvenāvagatānāṃ sannidhānāt ulaparājyādidvārakatvenāpūrvasādhanatvalakṣaṇāt athavā ------- sarvapadārthadvārāvā tallakṣaṇāt tattadaṅgatvamiti vicāreṇa śrutiviniyogopayogicintanena pādasaṅgatiñca spaṣṭatvādanabhidhāya viṣayavākyamudāharati --------- darśapūrṇamāsayoriti //
hastaprakṣālanarūpaṃ hastāvanejanaṃ dvitīyayā malāpakarṣaṇarūpadṛṣṭadvārā hastasaṃskārārthaṃ sat kartṛtvāṃśena kartṛsaṃskārakam /
yadyapi pūrvameva śudhyantaramasti; tathāpi mantrānekatve smṛtidārḍhyavacchudhyantarasyāpyavakāśe na kaścana virodhaḥ /
ataeva upayokṣyamāṇasaṃskārasya garīyastvānnārthakrameṇa pāṭhakramaṃ bādhitvā pūrvapadārthāṅgatayāpyapekṣitatvena sarvādāvanuṣṭhānamityapi jñeyam //
etena ---------- hastāvanejanasyādṛṣṭavidhayopakārakatvamuktaṃ prakāśakārāṇāṃ -------- apāstam; dṛṣṭasaṃbhave tatkalpanasyānyāyyatvāt //
ulapeti //
ūrdhvalavanārhaṃ sugandhādikaṭhinatṛṇamuśīramulapaśabdārtha iti dhūrtasvāmyanusārī nyāyasudhākāraḥ /
"ulapā balvajāḥ proktā" iti halāyudhāt ulapā balbajā iti tu prakāśakārāḥ /
ubhayathāpi teṣāṃ rekhāparaparyāyarājyākāratayā varhirāstaraṇātpūrvavedeḥ kriyamāṇamāstaraṇamulaparājistaraṇam /
muṣṭīti //
yajamānakartṛke muṣṭīkaraṇavāgyame "adīkṣiṣṭāyaṃ yajamāna" iti trirupāṃśukathanamadhvaryukartṛkaṃ dīkṣitāvedanam /
tataścāvanejanādisaṃskṛtānāmeṣāmuttarakālabhāvipadārthasādhanatve nirvivāde 'pi kimuttarapadārthā anantarapaṭhitā eva sannidhānāt uta sarva iti vicāra ityarthaḥ //
āvedanarūpameveti //
yadyapi bhinnakartṛkatvānnāṅgāṅgibhāvasaṃbhavastathāpi ādhvaryave 'pi yajamānasya prayojakatvena kartṛtvāt athavā tatphale dīkṣitatvajñāne yajamānaniṣṭhe tadupayogakalpanāttatsaṃbhava ityarthaḥ //
svottarapadārthāṅgatvamiti //
etena --------- hastāvanejanasya malāpakarṣaṇārthatvaliṅgāddhastalepāpādakapiṇḍakaraṇottarapadārtheṣvayogyatvena tatpūrvabhāvipadārthamātrāṅgatvaṃ nyāyasudhākṛduktaṃ ---------- apāstam; hastāvanejanaprāgbhāvimalāpakarṣaṇārthasyāsya piṣṭalepasaṃbandhimalanivartakatvābhāve 'pi sarvadā padārthabhūtaitanmalābhāvasaṃpādakatayā sarvārthatvopapatteḥ /
sarvārthatvopapattyai kartṛsaṃskārasyetyupādānam /
tataśca kartṛsaṃskārakatvāt kartuśca sāṅgapradhānārthatvāt upavyānavatsarvārthamityarthaḥ //
yattu atra prakāśakārai :------ hastāvanejanavanmuṣṭīkaraṇavāgyamayorapi manaḥpraṇisamādhānārthatvena kartṛsaṃskārakatvāt yathā pūrvāvagatatatkālīnapadārthapratyākalanena teṣūpayogastathaiva pūrvāvagatakariṣyamāṇasakalāṅgapradhānapratyākalanena taddvārā upayoga iti vāgvisargāṅgulivisargottarakālakariṣyamāṇāṅgopetapradhāne 'pyupayogaḥ, natu tatpūrvabhāvitvena; anyathā pradhānāṅgatvābhāvena prakaraṇena viniyogānāpatterityuktam, tadayuktamiti sūcayitumāha ------- muṣṭīkaraṇeti //
visargaprāgbhāvimuṣṭīkaraṇavāgyamayorhastajihvācāpalanivṛttidvārā manaḥpraṇidhānārthayoryogyatāvaśena tāvadadhikapadārthākalanārthatvapratītyā taduttarabhāvipadārthākalanasya prayatnāntarajanyamanaḥ praṇidhānajanyatvapratīteḥ satyapi kartṛsaṃskārakatve yogyatārūpaliṅgāt visargapūrvabhāvipadārthamātrāṅgatvaṃ nyāyasudhoktameva yuktam /
satyapica taduttarabhāvipradhānārthatvābhāve ānarthakyatadaṅganyāyenāṅgeṣvavatārasiddheraṅgārthatve prakaraṇavyāpārābhāve 'pi na kṣatirityarthaḥ /
etena -------- vārtike muṣṭīkaraṇādīnāṃ sāṅgapradhānārthatvasya prakaraṇācca viniyogasyābhidhānaṃ prauḍhavādamātramiti bhāvaḥ //
prayojanaṃ svakāle vismṛtaṃ hastāvanejanamulaparājistaraṇānantaraṃ pūrvapakṣe na kāryam /
tathā gṛhamedhīye ulaparājistaraṇasyārādupakārakasya lope hastāvanejanasya lopaśca, siddhāntetu uttareṣvaṅgatvāt gṛhamedhīye cājyabhāgāṅgatvāt kāryameveti spaṣṭatvānnoktam //
iti caturdaśaṃ hastāvanejanādīnāṃ prākaraṇikasarvāṅgatvādhikaraṇam //
- - - - - - - <B1> (15 adhikaraṇam / ) (a.3 pā.1 adhi.15) śeṣastu //
darśapūrṇamāsayor "āgneyaṃ caturdhā karotī" tyatra nāgnidevatākahaviṣṭvamuddeśyatāvacchedakaṃ; viśiṣṭoddeśe vākyabhedāpatteḥ, apitu taddhitopāttahaviṣṭvameva /
kathañcidvāgnisaṃbandhihaviṣṭvaṃ tathā /
asti cāgnisaṃbandho 'gnīṣomīyādāvapi /
apivā "puroḍāśaṃ caturdhākarotī" tyanenopasaṃhārādagnisaṃbandhipuroḍāśasyaiva tat, natvājyasyāpīti /
astu vā devatātvasyāpi kathañcidvivakṣā, tathāpi dvidevatye 'pyagnerastyeva devatātvam; dvandvānte śrūyamāṇasya taddhitasya pratyekamabhisaṃbandhāt /
ataḥ sarveṣāṃ caturdhākaraṇamiti prāpte -------- pracuraprayogāttaddhitasya devatātva eva śaktasya saṃbandhamātralakṣakatvānupapatterna tāvadagnisaṃbandhitvasya vivakṣā /
naca devatātvaṃ dvidevatye pratyekavṛtti /
itaretarayogarūpa ------- cārthavihitadvandvena sāhityasya vivakṣitatvāt sahitayoreva vyāsajyavṛttyakhaṇḍopādhirūpadevatātvasvīkārāt /
ataeva dvandvānta ityādipravādastu yatroddeśyatvena sāhityāvivakṣā tatreti dhyeyam /
ataḥ kevalāgnipadādutpannastaddhito nānyasāpekṣasya devatātvamabhivadituṃ kṣamaḥ; sāmarthyavighātāpatteḥ /
yattu agnidevatākatvamavivakṣitamiti, tanna; tathātve na tāvatprakṛtadravyatvamātraṃ apūrvasādhanalakṣakam; tasya devatātaddhitenānukteḥ /
nāpi haviṣṭvam; tatparatvasya devatāvācitvapratītiṃ vinānupapatteḥ /
nahi haviṣi vācye devatātaddhita eveti smṛtyā niyamyate; tadvācitve 'pi saṃbandhasāmānyataddhitasya sattvāt /
ataḥ prathamāvagatasya devatātvasyaivoddeśyatāvacchedakatvam /
tasya cānuyogipratiyogisāpekṣatvāt havirārtinyāyenār "dhamantarvedī" tivadagnidevatākahaviṣṭvasyaiva lakṣaṇayoddeśyatāvacchedakatvasiddhiḥ /
tena ca puroḍāśaṃ caturdhā karotī"ti sāmānyavacanasyopasaṃhāraḥ /
tasmādāgneyasyaiva puroḍāśasya caturdhākaraṇam // 15 // iti pañcadaśamupasaṃhārādhikaraṇam //
iti śrīkhaṇḍadevakṛtau bhāṭṭadīpikāyāṃ tṛtīyādhyāyasya prathamaḥ pādaḥ // 1 // <B2> pūrvādhikaraṇoktasarvārthatvāpavādādāpavādikīmanantarasaṅgatiṃ saṃśayaṃ ca spaṣṭatvādanullikhya viṣayapradarśanapūrvakaṃ pūrvapakṣamāha --------- darśeti /
vākyabhedāpatteriti //
paurṇamāsyadhikaraṇoktarītyā agnidevatātvasya kārakatāsaṃbandhena bhāvanāyāmanvayasya vyutpannatvāt dravye 'nvaye 'vyutpannānvayanibandhanavākyabhedāpattirityarthaḥ /
ato 'tra dvitīyayā taddhitārthasyoddeśyatāpratītestasyaca sarvanāmārthakatvāt svavākyopāttābhāve prākaraṇikaparāmarśitvāt prakṛtahavirmātroddeśāvagateragnisaṃbandhitvarūpaviśeṣaṇasyāvivakṣitatvāt haviṣṭvamuddeśyatāvacchedakam, athavā -------- dravyasaṃkocaparihārāya taddhitasya saṃbandhasāmānyarthatvāṅgīkāreṇāgnaḥ kārakatvābhāvena dravye 'pyanvayavyutpatteḥ viśeṣaṇasyāpi vivakṣopapattyā agnisaṃbandhihaviṣṭvaṃ voddeśyatāvacchedakaṃ vaktavyam /
tādṛśoddeśyatāvacchedakarūpākrāntatvasya sarvatrāviśeṣāt prathame pakṣe aṅgapradhānasādhāraṇahavirmātre dvitīye agnisaṃbandhimātrājyasādhāraṇyena caturdhākaraṇasiddhirityabhipretya pūrvapakṣamupapādayati -------- apitviti /
asticeti //
agnisaṃbandhasya havirnirūpitadevatātvādhiṣṭhānakatvarūpasyaivāśrayaṇāt tasya cāgnīṣomīyaindrāgnādiṣvapi sattvamityarthaḥ //
dravyaparatvavivakṣāyāṃ pracuraprayogādanuśāsanācca devatātvaviśiṣṭadravya eva śaktikalpanāt saṃbandhasāmānyārthakatve lakṣaṇāpattestatparihārāyāgnidevatākahaviṣṭvasyoddeśyatāvacchedakatvāṅgīkāre 'pi prakārāntareṇa pūrvapakṣasiddhimāha ------- astuveti /
pratyekamabhisaṃbandhāditi //
yathaiva 'ghaṭapaṭāvānaye' tyatra karmatvaṃ dvandvānte vibhakteḥ śrūyamāṇatvāt pratyekaṃ bhavati /
evaṃ taddhitasyāpyante śravaṇāt tadarthadeyatātvasyāpi tyajyamānadevatoddeśakarmatvarūpasya vyāsaktatvāsaṃbhavācca pratyekameva devatātvāṅgīkārāt dvidevatye'pi tatsadbhāvāt caturdhākaraṇaṃ prāpyetaivetyarthaḥ //
akhaṇḍopādhīti //
tena dampatyoḥ kartṛtvasyeva devatātvasyāpyakhaṇḍopādhirūpasya vyāsaktatvāvirodha ityarthaḥ /
ghaṭapaṭāvityatra tu tayoruddeśyatvena tatsāhityasyāvivakṣitatvāt tatra pratyekameva karmatvaṃ yuktamiti vaiṣamyopapādanāyāha ---------- ata eveti /
tasyeti //
"sūktahaviṣoriṣṭi"riti smaraṇena dravyamātrasya taddhitenānukterityarthaḥ //
niyamyata iti //
yena haviḥparatvaṃ prathamata evāvabudhyetetyarthaḥ /
ato devatātaddhitasya sūktahavirvācyatvaniyamakaraṇādupajīvyasya prathamāvagatasya devatātvasyaivāpūrvasādhanatvalakṣakatvopapattyā prātītikoddeśyatāvacchedakatvamityāha -------- ata iti //
nanu evamapi vakṣyamāṇaśātapathaśrutimūlena "ubhau vā aviśeṣādi"ti kātyāyanavacanena agnīṣomīye 'pi tatprāpteḥ kathaṃ tasya āgneyamātraviṣayatāsiddhirityato niyāmakamāha ---------- tenaceti //
"taṃ caturdhākṛtvā puroḍāśaṃ barhiṣadaṃ karotī"ti śatapathagataṃ vākyaṃ tacchabdena puroḍāśaparāmarśena puroḍāśamātrasya caturdhākaraṇavidhāyakamevārthato dhṛtam /
etādṛśopasaṃhārānaṅgīkāre śākhāntarīyatve 'pi pratyakṣavākyavihitasya puroḍāśamātracaturdhākaraṇasya sarvathā bādhāyogāt vikalpāpattiḥ, āgneyapadasyaiva puroḍāśasāmānyalakṣaṇayā tena sahopasaṃhārakalpane śakyatāvacchedakānavacchinnapadārthalakṣaṇāpattiśca, ataḥ puroḍāśapadasyaiva śakyatāvacchedakāvacchinnāgneyamātraparatvalakṣaṇayā upasaṃhāraḥ //
ataevoktam ------- "sāmānyavidhiraspaṣṭaḥ saṃhriyeta viśeṣataḥ" //
iti //
ataśca sāmānyaśāstrasya prathamapravṛttikatvābhāvāt phalataḥ parisaṅkhyāvāntarabhedastanmātre saṃkocarūpopasaṃhāraḥ sāmānyavākyasyeti śruterapyāgneyamātraviṣayatvāt kātyāyanavacanaṃ hetūpanyāsādapramāṇamityarthaḥ //
naca ------- śātapathavākye caturdhākaraṇottarakālatvaviśiṣṭabarhiṣatkaraṇabhāvanāyā bhakṣāṅgatvena vidhānāt kramaviśeṣaṇatayānūdyamānasya caturdhākaraṇasya vidhyabhāve kathaṃ tasya tadviṣaye sāmānyavidhitvaṃ iti ------- vācyam; śākhāntarīyatvena tacchākhīyānpratītyabhyudayaśiraskatvaphalakalpanayā viśiṣṭavidhyaṅgīkāreṇa tasyāpi vidhānopapatteḥ /
etena ------ parasparopasaṃhāre sāmānyavidhisārthakyasaṃbhave 'pi anyataropasaṃhāre sāmānyavidhivaiyarthyamapi ------- parihṛtam; abhyudayaśiraskatvaphalakatayā sārthakyāt /
evamevaikaśākhīyavākyadvayopasaṃhāre 'pi draṣṭavyam /
etena -------- anuṣṭhānaviśeṣāpekṣitatvarūpāspaṣṭatvasya puroḍāśavākye 'saṃbhave 'pi iha barhiṣatkaraṇasya vidhānena caturdhākaraṇāṃśe 'nuvādatvapratītestasyaca yathāprāptyapekṣatvāt tasyāśca āgneyavākyena viśeṣaviṣayatvāt sāmānyavākyasya viśeṣaparyavasāyitvenopasaṃhāratvopapādanaṃ somanāthakṛtaṃ -------- apāstam; //
viśeṣataḥ prāptatve 'pi sarvapuroḍāśapratipattitvena vidhitvasaṃbhave anuvādatvāyogāt tena viśeṣaparyavasāyitvānupapatteḥ /
ato yadaivānena vidhānamārabhyate, tadaiva sarvasādhāraṇapratibandhaphalamupasaṃhāratvaṃ vaktavyam /
tatracānirdhāritaviśeṣatayā viśeṣānvayayogyatvarūpāspaṣṭatvasya sāmānyavākye tadabhāvarūpaspaṣṭatvasyaca viśeṣavākye saṃbhavo 'styevetyabhipretyaivoddeśyatāvacchedakānavacchinne lakṣaṇāpattyā sāmānyavākyasya na viśeṣopasaṃhārakatvamityuktaṃ pūjyapādairiti bhāvaḥ //
siddhāntamupasaṃharati --------- tasmāditi //
prayojanaṃ spaṣṭatvāt noktam //
iti pañcadaśamupasaṃhārādhikaraṇam //
- - - - - - -

// iti śrīkhaṇḍadevāntevāsikavimaṇḍanaśaṃbhubhaṭṭakṛtāyāṃ bhāṭṭadīpikāprabhāvalyāṃ tṛtīyādhyāyasya prathamaḥ pādaḥ //