Yāmuna: Īśvarasiddhi

tatra kasyacid ekasya vaśe viśvaṃ pravartate |
iti sādhayituṃ pūrvaṃ pūrvapakṣaṃ pracakṣmahe || YIs_1

tatra kasyacid ekasya vaśe viśvaṃ pravartate | iti sādhayituṃ pūrvaṃ pūrva-pakṣaṃ pracakṣmahe ||

tatra mīmāṃsakāḥ prāhuḥ -- nāyaṃ sarvārthadarśanaśaktisampannaḥ puruṣo 'bhyupagamam arhati, atipatitasakalasādhakapramāṇasambhāvanābhūmitvāt sphuṭavividhabādhakatvāc ca / tathā hi -- asya pratyakṣam anyad vā sādhakaṃ bhavet ? pratyakṣam api laukikaṃ yaugikaṃ vā ? (YIs_p9388)

tatra mīmāṃsakāḥ prāhuḥ --- na ayaṃ sarva-artha-darśana-śakti-sampannaḥ puruṣo 'bhyupagamam arhati, atipatita-sakala-sādhaka-pramāṇa-sambhāvanā-bhūmitvāt sphuṭa-vividha-bādhakatvāc ca / tathā hi --- asya pratyakṣam anyad vā sādhakaṃ bhavet ? pratyakṣam api laukikaṃ yaugikaṃ vā ?

vyavasthitamitasvārthaṃ na tāvad iha laukikam |
sādhanaṃ tena sarvārthatajjñānāder asiddhitaḥ || YIs_2

vyavasthita-mita-sva-arthaṃ na tāvad iha laukikam | sādhanaṃ tena sarva-artha-taj-jñāna-āder asiddhitaḥ ||

sarvārthadarśanaśaktiśālinam avagamayatā hi deśakālasvabhāvaviprakarṣavyavadhānajuṣaḥ sarva evārthās darśanaṃ śaktiś ca gocarayitavyāni / na ca vidyamānendriyasannikarṣayogyakatipayaviṣayaniyatavṛtter laukikapratyakṣasya niravadhir ayaṃ mahimā saṃbhāvanābhūmir iti katham iva tad iha sādhanam iti manyemahi / (YIs_p9839)

sarva-artha-darśana-śakti-śālinam avagamayatā hi deśa-kāla-svabhāva-viprakarṣa-vyavadhāna-juṣaḥ sarva eva arthās darśanaṃ śaktiś ca gocarayitavyāni / na ca vidyamāna-indriya-sannikarṣa-yogya-katipaya-viṣaya-niyata-vṛtter laukika-pratyakṣasya niravadhir ayaṃ mahimā saṃbhāvanā-bhūmir iti katham iva tad iha sādhanam iti manyemahi /

nāpi yogipratyakṣam asya sādhakam; yataḥ -- (YIs_p10194)

na api yogi-pratyakṣam asya sādhakam; yataḥ ---

pratyakṣatve tad apy evaṃ vidyamānaikagocaram |
bhūtādigocaraṃ naiva pratyakṣaṃ pratibhādivat || YIs_3

pratyakṣatve tad apy evaṃ vidyamāna-eka-gocaram | bhūta-ādi-gocaraṃ na eva pratyakṣaṃ pratibhā-ādivat ||

tat khalu yogivijñānam aindriyakaṃ na vā ? aindriyakam api bahirindriyasambhavam āntarakaraṇajanitaṃ vā ? bahirindriyāṇi tāvat samadhigatanijaviṣayasannikarṣasahakārīṇi tadgocarajñānajananānīti jagati viditam / ato na rasanādibhir ajātātivṛttavyavahitādisakalaviṣayavedanaprasaṅgaḥ / na cāvidyamānair ajātādibhiḥ saṃbhavati sannikarṣaḥ; tasya hy āśrayatvād āśrayābhāve tadasambhavāt / ato 'pekṣito 'rthasannikarṣaḥ / sahakārivirahe katham indriyāṇy atītādiviṣayasākṣātkārāya kalperan ? / bhavati ca -- yad yatsahakāri yatkāryajananam, tat tadabhāve na taj janayati ; yathā kṣitisalilasahakāri aṅkurakāryajananabījaṃ kṣityādyabhāve 'ṅkuram / arthasannikarṣasahakārīṇi bahirindriyāṇi jñānajananānīti tāny api nātīte 'nāgate vārthe jñānaṃ janayantīti na tad upajanitaṃ pratyakṣaṃ yathoktaviṣayaniyamam atikrāmati / (YIs_p10414)

tat khalu yogi-vijñānam aindriyakaṃ na vā ? aindriyakam api bahir-indriya-sambhavam āntara-karaṇa-janitaṃ vā ? bahir-indriyāṇi tāvat samadhigata-nija-viṣaya-sannikarṣa-sahakārīṇi tad-gocara-jñāna-jananāni iti jagati viditam / ato na rasana-ādibhir ajāta-ativṛtta-vyavahita-ādi-sakala-viṣaya-vedana-prasaṅgaḥ / na ca avidyamānair ajāta-ādibhiḥ saṃbhavati sannikarṣaḥ; tasya hy āśrayatvād āśraya-abhāve tad-asambhavāt / ato 'pekṣito 'rtha-sannikarṣaḥ / sahakāri-virahe katham indriyāṇy atīta-ādi-viṣaya-sākṣātkārāya kalperan ? / bhavati ca --- yad yat-sahakāri yat-kārya-jananam, tat tad-abhāve na taj janayati ; yathā kṣiti-salila-sahakāri aṅkura-kārya-janana-bījaṃ kṣity-ādy-abhāve 'ṅkuram / artha-sannikarṣa-sahakārīṇi bahir-indriyāṇi jñāna-jananāni iti tāny api na atīte 'nāgate va ārthe jñānaṃ janayanti iti na tad upajanitaṃ pratyakṣaṃ yathā-ukta-viṣaya-niyamam atikrāmati /

nāpy antarakaraṇasambhavam, āntaragocara eva sukhādau svāntasvātantryāt / bāhyaviṣayamitiṣu ca manaso niraṅkuśakaraṇatāṅgīkāre hi kṛtaṃ cakṣurādibhiḥ / ataś ca kaścid andho badhiro vā bhavet / bhavati cātra vimatipadaṃ mano bahirindriyanirapekṣaṃ na bāhyapratyakṣagocare pravartate, tatra tattantravṛttitvāt / yady atra yattantravṛtti na tat tannirapekṣaṃ tatra pravartate, yathālokāpekṣapravṛtti cakṣuḥ svagocare 'ndhatamasa iti / na ca siddhāuṣadhamantratapaḥsamādhimahimasamāsāditātiśayānīndriyāṇi kadācid apajahati samadhigataviṣayaniyamam iti sambhavati; sāṃsiddhikasāmārthāvirbhāvaikaphalatvāt teṣām, sāmarthyasya ca pratiniyamāt / na khalu suprayuktabheṣajaśatavihitasaṃskāram api śrotraṃ rūparasavibhāvāvagamāya kalpate / bhavati ca -- vivādādhyāsitabāhyābhyantarakaraṇapāṭavātiśayo 'nullaṅghitasīmā, aindriyakaprakarṣatvāt, dṛśyamānatatprakarṣavad ity aindriyakaṃ jñānaṃ nātītādi gocarayati / (YIs_p11308)

na apy antarakaraṇa-sambhavam, āntaragocara eva sukha-ādau sva-anta-svātantryāt / bāhya-viṣaya-mitiṣu ca manaso niraṅkuśa-karaṇatā-aṅgīkāre hi kṛtaṃ cakṣur-ādibhiḥ / ataś ca kaścid andho badhiro vā bhavet / bhavati ca atra vimati-padaṃ mano bahir-indriya-nirapekṣaṃ na bāhya-pratyakṣa-gocare pravartate, tatra tat-tantra-vṛttitvāt / yady atra yat-tantra-vṛtti na tat tan-nirapekṣaṃ tatra pravartate, yathā āloka-apekṣa-pravṛtti cakṣuḥ sva-gocare 'ndha-tamasa iti / na ca siddha-auṣadha-mantra-tapaḥ-samādhi-mahima-samāsādita-atiśayāni indriyāṇi kadācid apajahati samadhigata-viṣaya-niyamam iti sambhavati; sāṃsiddhika-sāmārtha-āvirbhāva-eka-phalatvāt teṣām, sāmarthyasya ca pratiniyamāt / na khalu suprayukta-bheṣa-ja-śata-vihita-saṃskāram api śrotraṃ rūpa-rasa-vibhāva-avagamāya kalpate / bhavati ca --- vivāda-adhyāsita-bāhya-abhyantara-karaṇa-pāṭava-atiśayo 'nullaṅghita-sīmā, aindriyaka-prakarṣatvāt, dṛśyamāna-tat-prakarṣavad ity aindriyakaṃ jñānaṃ na atīta-ādi gocarayati /

bhāvanāprakarṣaparyantajanmanas tu saty api viśadanirbhāsatve prācyānubhavagocarād anadhikam adhikaṃ vādhyavasyataḥ smṛtivibhramasrotasor anyatarāvartaparivartinaḥ kutaḥ prāmāṇyakūlapratilabhaḥ ? kutastarāṃ ca pratyakṣatayottambhanam ? / pratyakṣasya vā sataḥ katham iva viditaviṣayaniyamavyatikramaḥ ? atikrāmato vā kutaḥ pratyakṣatvam iti na viśvānubhavāiśvaryaśālini pratyakṣaṃ pramāṇam / (YIs_p12299)

bhāvanā-prakarṣa-paryanta-janmanas tu saty api viśada-nirbhāsatve prācya-anubhava-gocarād anadhikam adhikaṃ va ādhyavasyataḥ smṛti-vibhrama-srotasor anyatara-āvarta-parivartinaḥ kutaḥ prāmāṇya-kūla-pratilabhaḥ ? kutastarāṃ ca pratyakṣataya ūttambhanam ? / pratyakṣasya vā sataḥ katham iva vidita-viṣaya-niyama-vyatikramaḥ ? atikrāmato vā kutaḥ pratyakṣatvam iti na viśva-anubhava-aiśvarya-śālini pratyakṣaṃ pramāṇam /

nāpi pramāṇāntaram / tat khalv anumānam āgamo vā ? anumānam api viśeṣato dṛṣṭaṃ sāmānyato dṛṣṭaṃ vā ? tatra sakalapadavīdavīyasi bhavati na tāvat svalakṣaṇasākṣātkārapūrvakāvinābhāvāvadhāraṇādhīnodayatvād idam anumānam udetum alam / na hy anavagatacarahutabhujas tadavinābhāvitayā dhūmam anusandhātum īśate / na ca sarvārthanirmāṇasākṣātkārapaṭīyasi liṅgaṃ sāmānyato dṛṣṭam api kiñcana labhate / (YIs_p12739)

na api pramāṇa-antaram / tat khalv anumānam āgamo vā ? anumānam api viśeṣato dṛṣṭaṃ sāmānyato dṛṣṭaṃ vā ? tatra sakala-padavī-davīyasi bhavati na tāvat sva-lakṣaṇa-sākṣātkāra-pūrvaka-avinābhāva-avadhāraṇa-adhīna-udayatvād idam anumānam udetum alam / na hy anavagata-cara-huta-bhujas tad-avinābhāvitayā dhūmam anusandhātum īśate / na ca sarva-artha-nirmāṇa-sākṣātkāra-paṭīyasi liṅgaṃ sāmānyato dṛṣṭam api kiñcana labhate /

nanv ekacetanādhīnaṃ vivādādhyāsitaṃ jagat |
acetanenānārabdhatvād arogasvaśarīravat || YIs_4

nanv eka-cetana-adhīnaṃ vivāda-adhyāsitaṃ jagat | acetanena anārabdhatvād aroga-sva-śarīravat ||

tathā sarvārthanirmāṇasākṣātkaraṇakauśalam |
kāryatvād eva jagatas tatkartur anumīyatām || YIs_5

tathā sarva-artha-nirmāṇa-sākṣātkaraṇa-kauśalam | kāryatvād eva jagatas tat-kartur anumīyatām ||

sarvaṃ hi kāryam upādānopakaraṇasampradānaprayojanasaṃvedicetanaracitam avagataṃ ghaṭamaṇikagṛhādi / kāryaṃ ca vimatipadam avanigirimahārṇavādīti tad api tathāvidhabuddhimaddhetukam adhyavasīyate / na ca kāryatvam asiddham iti vācyam, avayavasanniveśādibhir hetubhis tatsiddheḥ / iha cānyāvayavibhyaḥ prabhṛti ādvyaṇukam akhilam avayavi kramanihīyamānanānāvayavavyatiṣaṅgaviśeṣajanitam avagatam ity antata upādānaṃ caturvidhāḥ paramāṇavaḥ prapañcasya / teṣām ādiparispandasya tadanuguṇādṛṣṭaviśiṣṭatattatkṣetrajñasaṃyogāsamavāyikāraṇaka iti upakaraṇam api samastakṣetrajñavartini dharmādharmalakṣaṇāny adṛṣṭāni / prayojanaṃ punastadabhinirvartitavicitrārthakriyākāraś cetanopakārapakārabhedo 'payantaḥ / tadupabhujasta eva kṣetrajñāḥ sampradānam / na cāmī svasamavāyināv api dharmādharmāvalam avalokayitum iti tadatirekī nikhilabhuvananirmāṇanipuṇo 'dhikaraṇasiddhāntasamadhigataniratiśayasahajasakalaviṣayasaṃvidaiśvaryaśaktyatiśayaḥ puruṣadhaureyakaḥ kim iti na sāmānyatodṛṣṭaliṅgād anumīyate ? (YIs_p13456)

sarvaṃ hi kāryam upādāna-upakaraṇa-sampradāna-prayojana-saṃvedi-cetana-racitam avagataṃ ghaṭa-maṇika-gṛha-ādi / kāryaṃ ca vimati-padam avani-giri-mahā-arṇava-ādi iti tad api tathā-vidha-buddhimad-dhetukam adhyavasīyate / na ca kāryatvam asiddham iti vācyam, avayava-sanniveśa-ādibhir hetubhis tat-siddheḥ / iha ca anya-avayavibhyaḥ prabhṛti ā-dvyaṇukam akhilam avayavi krama-nihīyamāna-nānā-avayava-vyatiṣaṅga-viśeṣa-janitam avagatam ity antata upādānaṃ catur-vidhāḥ parama-aṇavaḥ prapañcasya / teṣām ādi-parispandasya tad-anuguṇa-adṛṣṭa-viśiṣṭa-tat-tat-kṣetra-jña-saṃyoga-asamavāyikāraṇaka iti upakaraṇam api samasta-kṣetra-jña-vartini dharma-adharma-lakṣaṇāny adṛṣṭāni / prayojanaṃ punas-tad-abhinirvartita-vicitra-artha-kriyā-kāraś cetana-upakāra-pakāra-bhedo 'payantaḥ / tad-upabhujasta eva kṣetra-jñāḥ sampradānam / na ca amī sva-samavāyināv api dharma-adharma-avalam avalokayitum iti tad-atirekī nikhila-bhuvana-nirmāṇa-nipuṇo 'dhikaraṇa-siddhānta-samadhigata-niratiśaya-sahaja-sakala-viṣaya-saṃvid-aiśvarya-śakty-atiśayaḥ puruṣa-dhaureyakaḥ kim iti na sāmānyato-dṛṣṭa-liṅgād anumīyate ?

tad idam aviditānumānavṛttasya svamatiracitataralatarkollasitam iti parihasanti mīmāṃsakāḥ / tathā hi -- kim idam ekacetanādhīnatvaṃ nāmābhipretaṃ tanubhuvanādeḥ ? / tadāyattatvam iti cet; (YIs_p14560)

tad idam avidita-anumāna-vṛttasya sva-mati-racita-tarala-tarka-ullasitam iti parihasanti mīmāṃsakāḥ / tathā hi --- kim idam eka-cetana-adhīnatvaṃ nāma abhipretaṃ tanu-bhuvana-ādeḥ ? / tad-āyattatvam iti cet;

kim asya tasminn āyattaṃ kiṃ nu janmātha vā sthitiḥ |
pravṛttir vādyayos tāvat sādhyahīnaṃ nidarśanam || YIs_6

kim asya tasminn āyattaṃ kiṃ nu janma atha vā sthitiḥ | pravṛttir vā ādyayos tāvat sādhya-hīnaṃ nidarśanam ||

na khalu śarīram ekacetanādhīnotpattisthiti / ye hi yaddehādhīnasukhaduḥkhopabhogabhāginaḥ, bhavati hi taducitādṛṣṭaśālināṃ sarveṣām eva teṣāṃ taddehina iva tadutpattisthitinimittatvam / api ca śarīrāvayavinaḥ svāvayavasamavāyalakṣaṇā sthitir avayavyatiṣaṅgaviśeṣād ṛte na cetayitāraṃ param apekṣate / yā punas tadapekṣiṇī prāṇanalakṣaṇā sthitiḥ, na sā pakṣīkṛte kṣityādau sambhavatīti sthitim api naikarūpāṃ pakṣasapakṣānuyāyinīm udīkṣāmahe / ekacetanādhīnapravṛttitve tu prabalabahujanasarabhasaprayatnapracālyair upalatarurathādibhir vyabhicāraḥ / ārabdhatvād eva caitatsādhyasiddhābadhikam idam upādānaviśeṣavacanam / (YIs_p14941)

na khalu śarīram eka-cetana-adhīna-utpatti-sthiti / ye hi yad-deha-adhīna-sukha-duḥkha-upabhoga-bhāginaḥ, bhavati hi tad-ucita-adṛṣṭa-śālināṃ sarveṣām eva teṣāṃ tad-dehina iva tad-utpatti-sthiti-nimittatvam / api ca śarīra-avayavinaḥ sva-avayava-samavāya-lakṣaṇā sthitir avayavy-atiṣaṅga-viśeṣād ṛte na cetayitāraṃ param apekṣate / yā punas tad-apekṣiṇī prāṇana-lakṣaṇā sthitiḥ, na sā pakṣīkṛte kṣity-ādau sambhavati iti sthitim api na eka-rūpāṃ pakṣa-sapakṣa-anuyāyinīm udīkṣāmahe / eka-cetana-adhīna-pravṛttitve tu prabala-bahu-jana-sarabhasa-prayatna-pracālyair upala-taru-ratha-ādibhir vyabhicāraḥ / ārabdhatvād eva ca etat-sādhya-siddha-abadhikam idam upādāna-viśeṣa-vacanam /

cetanādhīnatāmātrasāhdane siddhasādhyatā |
cetanair bhoktṛbhir bhogyaḥ karmabhir janyate hi naḥ || YIs_7

cetana-adhīnatā-mātra-sāhdane siddha-sādhyatā | cetanair bhoktṛbhir bhogyaḥ karmabhir janyate hi naḥ ||

yuktaṃ caitat -- yadubhayavādisiddhānām eva cetanānāṃ kartṛtvābhyupagamaḥ; lāghavāt / na copādānādyanabhijñatayā tatpratikṣepaḥ / (YIs_p15784)

yuktaṃ ca etat --- yad-ubhaya-vādi-siddhānām eva cetanānāṃ kartṛtva-abhyupagamaḥ; lāghavāt / na ca upādāna-ādy-anabhijñatayā tat-pratikṣepaḥ /

upādānaṃ pṛthivyādi yāgadānādi sādhanam |
sākṣātkartuṃ kṣamante yat sarva eva ca cetanāḥ || YIs_8

upādānaṃ pṛthivy-ādi yāga-dāna-ādi sādhanam | sākṣātkartuṃ kṣamante yat sarva eva ca cetanāḥ ||

adyavad eva viśvambharādayaḥ kramaprāptāgantukopacayāpacayaikadeśaśālino na yugapad eva niravaśeṣavilayajananabhāgina ityantimaparamāṇusākṣātkāro na kartṛbhāvopayogī / (YIs_p16089)

adyavad eva viśvambhara-ādayaḥ krama-prāpta-āgantuka-upacaya-apacaya-eka-deśa-śālino na yugapad eva niravaśeṣa-vilaya-janana-bhāgina ity-antima-parama-aṇu-sākṣātkāro na kartṛ-bhāva-upayogī /

karmaṇaḥ śaktirūpaṃ yadpūrvādipadāspadam |
mā bhūt pratyakṣatā tasya śaktimad dhy akṣagocaraḥ || YIs_9

karmaṇaḥ śakti-rūpaṃ yad-pūrva-ādi-pada-āspadam | mā bhūt pratyakṣatā tasya śaktimad dhy akṣa-gocaraḥ ||

na khalu kulālādayaḥ kumbhādikāryam ārabhamāṇās tadupādānopakaraṇabhūtamṛddaṇḍacakrādikāryotpādanaśaktiṃ sākṣātkṛtya tat tad ārabhante / yadi paraṃ śaktim aviduṣām abhilaṣitasādhane tadupādānādivyavahāro 'nupapannaḥ, iha tu -- (YIs_p16447)

na khalu kulāla-ādayaḥ kumbha-ādi-kāryam ārabhamāṇās tad-upādāna-upakaraṇa-bhūta-mṛd-daṇḍa-cakra-ādi-kārya-utpādana-śaktiṃ sākṣātkṛtya tat tad ārabhante / yadi paraṃ śaktim aviduṣām abhilaṣita-sādhane tad-upādāna-ādi-vyavahāro 'nupapannaḥ, iha tu ---

āgamād avagamyante vicitrāḥ karmaśaktayaḥ |
tena karmabhir ātmānaḥ sarvaṃ nirmimatāṃ pṛthak || YIs_10

āgamād avagamyante vicitrāḥ karma-śaktayaḥ | tena karmabhir ātmānaḥ sarvaṃ nirmimatāṃ pṛthak ||

api ca tad eva cetanakarṭrkaṃ jagati paridṛśyate, yad eva śakyakriyaṃ śakyajñānopādānādi ca / na ca tathā mahīmahīśvaramahārṇavādīti katham iva tattatkāryatvam ? kathantarāṃ ca tadupādānopakaraṇādeḥ sākṣātkāragocaratā ? yādṛśaṃ hi kāryam upādānādyabhijñapūrvakam avagataṃ ghaṭamaṇikādi, tādṛśam eva hi tathāvidhabuddhimaddhetukatvānumānāya prabhavati / (YIs_p16859)

api ca tad eva cetana-karṭrkaṃ jagati paridṛśyate, yad eva śakya-kriyaṃ śakya-jñāna-upādāna-ādi ca / na ca tathā mahī-mahīśvara-mahārṇava-ādi iti katham iva tat-tat-kāryatvam ? kathantarāṃ ca tad-upādāna-upakaraṇa-ādeḥ sākṣātkāra-gocaratā ? yādṛśaṃ hi kāryam upādāna-ādy-abhijña-pūrvakam avagataṃ ghaṭa-maṇika-ādi, tādṛśam eva hi tathā-vidha-buddhimad-dhetukatva-anumānāya prabhavati /

api cānīśvareṇa parimitaśaktijñānena vigrahavatānavāptakāmena kṛtam avagataṃ ghaṭādikāryam iti tathāvidhaṃ boddhāram upasthāpayan hetur abhimatapuruṣasārvajñyasarvāiśvaryādiviparyayasādhanādiviruddhaḥ syāt / na caivaṃ sati sarvānumānavyavahārocchedaprasaṅgaḥ śaṅkitavyaḥ / pramāṇāntaragocare hi liṅgini liṅgabalād āpatato viparītaviśeṣāṃs tatpramāṇam eva pratiruṇaddhi / iha punar atipatitasakalamānāntarakarmabhāve sarvanirmāṇanipuṇe siṣādhayiṣite yāvanto 'nvayavyatirekāvadhāritāvinābhāvabhājo dharmās tān apy aviśeṣeṇopasthāpayati / (YIs_p17264)

api ca anīśvareṇa parimita-śakti-jñānena vigrahavata ānavāpta-kāmena kṛtam avagataṃ ghaṭa-ādi-kāryam iti tathā-vidhaṃ boddhāram upasthāpayan hetur abhimata-puruṣa-sārvajñya-sarva-aiśvarya-ādi-viparyaya-sādhana-ādi-viruddhaḥ syāt / na ca evaṃ sati sarva-anumāna-vyavahāra-uccheda-prasaṅgaḥ śaṅkitavyaḥ / pramāṇa-antara-gocare hi liṅgini liṅga-balād āpatato viparīta-viśeṣāṃs tat-pramāṇam eva pratiruṇaddhi / iha punar atipatita-sakala-māna-antara-karma-bhāve sarva-nirmāṇa-nipuṇe siṣādhayiṣite yāvanto 'nvaya-vyatireka-avadhāritā-avinā-bhāva-bhājo dharmās tān apy aviśeṣeṇa upasthāpayati /

api ca -- (YIs_p17868)

api ca ---

svārthakāruṇyabhāvena vyāptāḥ prekṣāvataḥ kriyāḥ |
īśvarasyobhayābhāvāj jagatsargo na yujyate || YIs_11

svārtha-kāruṇya-bhāvena vyāptāḥ prekṣāvataḥ kriyāḥ | īśvarasya ubhaya-abhāvāj jagat-sargo na yujyate ||

avāptakāmatvān na tāvad ātmārthe sṛjati; pralayasamaye pralīnasakalakaraṇakalevarādibhogopakaraṇatayā ca cetanānāṃ duḥkhābhāvād duḥkhidarśanajanitakṛpāprayuktir api nāstīti vyāpakabhūtasvārthakāruṇyanivṛtter vyāpyabhūtayā prekṣāvatpravṛttyāpi nivartitavyam / (YIs_p18052)

avāpta-kāmatvān na tāvad ātma-arthe sṛjati; pralaya-samaye pralīna-sakala-karaṇa-kalevara-ādi-bhoga-upakaraṇatayā ca cetanānāṃ duḥkha-abhāvād duḥkhi-darśana-janita-kṛpā-prayuktir api na asti iti vyāpaka-bhūta-sva-artha-kāruṇya-nivṛtter vyāpya-bhūtayā prekṣāvat-pravṛttya āpi nivartitavyam /

sukhaikatānaṃ janayej jagatkaruṇayā sṛjan |
tatkarmānuvidhāyitve hīyetāsya svatantratā || YIs_12

sukha-ekatānaṃ janayej jagat-karuṇayā sṛjan | tat-karma-anuvidhāyitve hīyeta asya sva-tantratā ||

na copādānādisākṣātkāriṇi eva kartṛtvam ity api niyamaḥ; upādānam upakaraṇaṃ cāviduṣa evātmano jñānādiṣu kartṛtvāt / (YIs_p18502)

na ca upādāna-ādi-sākṣātkāriṇi eva kartṛtvam ity api niyamaḥ; upādānam upakaraṇaṃ ca aviduṣa evā atmano jñāna-ādiṣu kartṛtvāt /

ataḥ -- (YIs_p18653)

ataḥ ---

asiddhatvād viruddhatvād anaikāntyāc ca varṇitāt |
kāryatvahetor jagato na yathoditakartṛtā || YIs_13

asiddhatvād viruddhatvād anaikāntyāc ca varṇitāt | kāryatva-hetor jagato na yathā-udita-kartṛtā ||

prayogaś ca bhavati -- mahīmahīdharādi kāryaṃ na bhavati, prasiddhakāryavilakṣaṇatvāt, gaganavat; aśakyadarśanopādānopakaraṇatvād vā, vyatirekeṇa ghaṭādivat / paramāṇavo na pratyakṣāḥ niratiśayasūkṣmadravyatvāt, tathaiva ghaṭādivat / vimativiṣayaḥ kāle na lokaśūnyaḥ, kālatvād idānīntanakālavat / tanubhuvanādīśvarakartṛkaṃ na bhavati kāryatvāt tadvad eva / īśvaraḥ kartā na bhavati prayojanarahitatvād aśarīratvād vā muktātmavad iti / (YIs_p18831)

prayogaś ca bhavati --- mahī-mahīdhara-ādi kāryaṃ na bhavati, prasiddha-kārya-vilakṣaṇatvāt, gaganavat; aśakya-darśana-upādāna-upakaraṇatvād vā, vyatirekeṇa ghaṭa-ādivat / parama-aṇavo na pratyakṣāḥ niratiśaya-sūkṣma-dravyatvāt, tatha aiva ghaṭa-ādivat / vimati-viṣayaḥ kāle na loka-śūnyaḥ, kālatvād idānīntana-kālavat / tanu-bhuvana-ādi-īśvara-kartṛkaṃ na bhavati kāryatvāt tadvad eva / īśvaraḥ kartā na bhavati prayojana-rahitatvād aśarīratvād vā mukta-ātmavad iti /

atra brūmo na kāryatvaṃ kṣityādau śakyanihnavam |
sabhāgatvāt kriyāvattvān mahattvena viśeṣitāt || YIs_14

atra brūmo na kāryatvaṃ kṣity-ādau śakya-nihnavam | sabhāgatvāt kriyāvattvān mahattvena viśeṣitāt ||

tādṛśād eva mūrtatvād bāhyapratyakṣatānvitāt |
sasāmānyaviśeṣatvād ityādibhyo ghaṭādivat || YIs_15

tādṛśād eva mūrtatvād bāhya-pratyakṣatā-anvitāt | sa-sāmānya-viśeṣatvād ity-ādibhyo ghaṭa-ādivat ||

na cedṛśa eva sanniveśaḥ kāryaḥ, netara ity avayavasanniveśaviśeṣapratiniyataṃ rūpabhedam udīkṣāmahe / yat tu śakyakriyaṃ śakyajñānopādānopakaraṇaṃ ca kriyata iti, tad astu nāma / kin tu te kriyājñānaśaktī kriyājñānābhyām eva samadhigamanīye / te ca kṣityādiṣu yathoktasādhanabalasamupasthāpite iti na viśeṣaḥ prasiddhaprākāragopurādikāryebhyas tanubhuvanādeḥ / na caitāvān eva kriyāgocara iti viṣayaniyamaḥ kaścit kriyāyā dṛṣṭaḥ; yenedam aśakyakriyam adhyavasyema / siddhe ca kāryatve tadupādānādisakṣātkaraṇatadadhiṣṭhānatatpreraṇanipuṇaḥ puruṣaviśeṣaḥ sidhyaty eva / (YIs_p19603)

na cā idṛśa eva sanniveśaḥ kāryaḥ, na itara ity avayava-sanniveśa-viśeṣa-pratiniyataṃ rūpa-bhedam udīkṣāmahe / yat tu śakya-kriyaṃ śakya-jñāna-upādāna-upakaraṇaṃ ca kriyata iti, tad astu nāma / kin tu te kriyā-jñāna-śaktī kriyā-jñānābhyām eva samadhigamanīye / te ca kṣity-ādiṣu yathā-ukta-sādhana-bala-samupasthāpite iti na viśeṣaḥ prasiddha-prākāra-gopura-ādi-kāryebhyas tanu-bhuvana-ādeḥ / na ca etāvān eva kriyā-gocara iti viṣaya-niyamaḥ kaścit kriyāyā dṛṣṭaḥ; yena idam aśakya-kriyam adhyavasyema / siddhe ca kāryatve tad-upādāna-ādi-sakṣātkaraṇa-tad-adhiṣṭhāna-tat-preraṇa-nipuṇaḥ puruṣa-viśeṣaḥ sidhyaty eva /

adhiṣṭhānaṃ ca tatpravṛttyanuguṇasaṅkalpavadīśvarasannikarṣaḥ, kṣetrajñeneva svaśarīrādau / sa ca dravyaiḥ saṃyogalakṣaṇaḥ, tadguṇais tu saṃyuktasamavāyarūpaḥ / pravṛttiś ca paramāṇūnāṃ parispandalakṣaṇā; dharmādharmayos tu phalodayānukūlatādṛśadeśakālādisahakārisahitatā / tābhyāṃ dharmādharmābhyām eva phalam, cetanānadhiṣṭhitānāṃ sarveṣām eteṣām acaitanyenākiñcitkaratvāt / na hi cetanena vardhakinānadhiṣṭhitā vāsī deśakālādisahakāriśatasamadhigame 'pi yūpādīny upādayitum alam / bījāṅkurādayas tu pakṣāntarbhūtā iti tair vyabhicāravacanam anabhijñatayaiva śrotriyāṇām / etena sukhādibhir vyabhicāro 'pi pratyuktaḥ / na cobhayavādisiddhatāmātreṇa kṣetrajñānām evedṛśādhiṣṭhātṛtvakalpanam ucitam; teṣāṃ sūkṣmavyavahitādidarśanāśakter niścitatvāt / dṛṣṭānusāriṇī hi sarvatra kalpanā; na dṛṣṭavirodhinī / na caivam īśvarasyāśaktir niścitā; pramāṇāntaratas tatsiddheḥ / yathoditapramāṇabalena sidhyan sāṃsiddhikasarvārthadarśanatatpreraṇaśaktisampanna eva sidhyati; kāryatvasya samarthakartṛpūrvakatvena pratibandhāt / (YIs_p20239)

adhiṣṭhānaṃ ca tat-pravṛtty-anuguṇa-saṅkalpavad-īśvara-sannikarṣaḥ, kṣetra-jñena iva sva-śarīra-ādau / sa ca dravyaiḥ saṃyoga-lakṣaṇaḥ, tad-guṇais tu saṃyukta-samavāya-rūpaḥ / pravṛttiś ca parama-aṇūnāṃ parispanda-lakṣaṇā; dharma-adharmayos tu phala-udaya-anukūla-tādṛśa-deśa-kāla-ādi-sahakāri-sahitatā / tābhyāṃ dharma-adharmābhyām eva phalam, cetana-anadhiṣṭhitānāṃ sarveṣām eteṣām acaitanyena akiñcitkaratvāt / na hi cetanena vardhakina ānadhiṣṭhitā vāsī deśa-kāla-ādi-sahakāri-śata-samadhigame 'pi yūpa-ādīny upādayitum alam / bīja-aṅkura-ādayas tu pakṣa-antarbhūtā iti tair vyabhicāra-vacanam anabhijñataya aiva śrotriyāṇām / etena sukha-ādibhir vyabhicāro 'pi pratyuktaḥ / na ca ubhaya-vādi-siddhatā-mātreṇa kṣetra-jñānām evā idṛśa-adhiṣṭhātṛtva-kalpanam ucitam; teṣāṃ sūkṣma-vyavahita-ādi-darśana-aśakter niścitatvāt / dṛṣṭa-anusāriṇī hi sarvatra kalpanā; na dṛṣṭa-virodhinī / na ca evam īśvarasya aśaktir niścitā; pramāṇa-antaratas tat-siddheḥ / yathā-udita-pramāṇa-balena sidhyan sāṃsiddhika-sarva-artha-darśana-tat-preraṇa-śakti-sampanna eva sidhyati; kāryatvasya samartha-kartṛ-pūrvakatvena pratibandhāt /

yat tu parimitaśaktijñānānaiśvaryādyāpādanād dharmaviśeṣaviparītasādhanatvam udbhāvitam, tad atisthavīyaḥ, aprayojakatvāt teṣām / na hi kiñcit kriyamāṇaṃ kartur arthāntaraviṣayam asāmarthyam ajñānaṃ vā svotpattaye 'pekṣate; svasampādanasamarthakartṛmātrākṣepāt kevalavyatirekāsiddheḥ / tāvataivopapadyamāne kāryodaye sambandhino 'kiñcitkarasyārthāntaraviṣayasyābhāvasya hetutvakalpanānupapatteḥ / api ca kiṃ taditarasamastavastuviṣayam ajñānādi vyāpakam, uta katipayagocaram iti vivecanīyam / na tāvad aśeṣaviṣayam, anupalabdheḥ / na khalu kumbhakāraḥ kumbhātireki kim api na vijānāti / atha katipayaviṣayam ? tad api na, aniyataviṣayatayā tasya tasya vyabhicāradarśanāt / na cāsti kiñcidvyavasthitam, yad avidyādimān eva kartṛtām anubhavati / (YIs_p21356)

yat tu parimita-śakti-jñāna-anaiśvarya-ādy-āpādanād dharma-viśeṣa-viparīta-sādhanatvam udbhāvitam, tad atisthavīyaḥ, aprayojakatvāt teṣām / na hi kiñcit kriyamāṇaṃ kartur artha-antara-viṣayam asāmarthyam ajñānaṃ vā sva-utpattaye 'pekṣate; sva-sampādana-samartha-kartṛ-mātra-ākṣepāt kevala-vyatireka-asiddheḥ / tāvata aiva upapadyamāne kārya-udaye sambandhino 'kiñcitkarasya artha-antara-viṣayasya abhāvasya hetutva-kalpanā-anupapatteḥ / api ca kiṃ tad-itara-samasta-vastu-viṣayam ajñāna-ādi vyāpakam, uta katipaya-gocaram iti vivecanīyam / na tāvad aśeṣa-viṣayam, anupalabdheḥ / na khalu kumbha-kāraḥ kumbha-atireki kim api na vijānāti / atha katipaya-viṣayam ? tad api na, aniyata-viṣayatayā tasya tasya vyabhicāra-darśanāt / na ca asti kiñcid-vyavasthitam, yad avidyā-ādimān eva kartṛtām anubhavati /

na ca śarīriṇaiva kartrā bhāvyam, śarīragrahaṇenaivānaikāntyāt / na khalu śarīraviśiṣṭas sann evāyam ātmā śarīram upādatte, ayogino yugapadanekaśarīragrahaṇāyogāt / pūrvadehaparityāgena dehāntaraprāpakakarmapreritaprāṇasahāya eva dehāntaraṃ praviśatīty upapāditam ātmacintāyām / (YIs_p22170)

na ca śarīriṇa aiva kartrā bhāvyam, śarīra-grahaṇena eva anaikāntyāt / na khalu śarīra-viśiṣṭas sann eva ayam ātmā śarīram upādatte, ayogino yugapad-aneka-śarīra-grahaṇa-ayogāt / pūrva-deha-parityāgena deha-antara-prāpaka-karma-prerita-prāṇa-sahāya eva deha-antaraṃ praviśati ity upapāditam ātma-cintāyām /

kiñcid ātmā śarīram adhitiṣṭhato 'dhiṣṭhānakriyākarmabhūtasya dehasyādhiṣṭhātṛdaśa(deha?)anupraveśo 'nupapannaḥ, yugapad ekakriyāyām ekasya karmakartṛtvavirodhāt / adhitiṣṭhāsitadehasaṃyogavata eva tatpravṛttyanuguṇaprayatnayogalakṣaṇam adhiṣṭhānaṃ dṛṣṭam iti cet; astv ekatattva(stva)sambaddhasyādhiṣṭhānānupapatteḥ preryavastusambandhinā prerakeṇa bhavitavyam iti; na yato 'nyad apy adhiṣṭhīyamānaṃ mānadaṇḍādi svasambandhinaivādhiṣṭhīyate / tenādhiṣṭhānakriyāpekṣitādhiṣṭheyapadārthasambandhamātrātirekeṇa dehasambandho nāmāparo nādartavyaḥ / asti ceśvarasyāpi jagadupādānopakaraṇais sambandha ity uktam eva / (YIs_p22498)

kiñcid ātmā śarīram adhitiṣṭhato 'dhiṣṭhāna-kriyā-karma-bhūtasya dehasya adhiṣṭhātṛ-daśa(deha?)-anupraveśo 'nupapannaḥ, yugapad eka-kriyāyām ekasya karma-kartṛtva-virodhāt / adhitiṣṭhāsita-deha-saṃyogavata eva tat-pravṛtty-anuguṇa-prayatna-yoga-lakṣaṇam adhiṣṭhānaṃ dṛṣṭam iti cet; astv eka-tattva(stva)-sambaddhasya adhiṣṭhāna-anupapatteḥ prerya-vastu-sambandhinā prerakeṇa bhavitavyam iti; na yato 'nyad apy adhiṣṭhīyamānaṃ māna-daṇḍa-ādi sva-sambandhina aiva adhiṣṭhīyate / tena adhiṣṭhāna-kriyā-apekṣita-adhiṣṭheya-pada-artha-sambandha-mātra-atirekeṇa deha-sambandho nāma aparo nā adartavyaḥ / asti cā iśvarasya api jagad-upādāna-upakaraṇais sambandha ity uktam eva /

atha svadehavyatirikte vastuni pravṛttiviśeṣakaratvaṃ dehadvāreṇaiva / dṛṣṭaṃ hi daṇḍacakrādiṣu karasaṃyogādinā kulālādeḥ pravartayitṛtvam ity ucyeta; tad api na; abhidhyānamātreṇaiva paraśarīragatagaranirasanac(v?)isāraṇadarśanāt / katham asati śarīre parapreraṇātmakaḥ saṅkalpa iti cet; kiṃ śarīraṃ saṅkalpayati, yena tadabhāve na bhavet ? / karaṇam iti cen na; manasaḥ karaṇatvāt / kim asatīśvarasya manaḥ ? bāḍham / nanv evaṃ vigrahadharmādharmānāśvaryādayaḥ sādhāraṇadharmāḥ prāduḥṣyuḥ / maivam; kāryatvākṣiptasamarthakartṛmattvād(ttvārtha?) draḍhimnaivāpāsatvāt / manaso nityendriyatayā dehāpagame 'pi sambandhābhyupagamād anaikāntikaś ca / yāvad dhi dṛṣṭānuguṇaṃ vyāptayupayogi, tāvad anujñāyate / na cāsmadāder manasāpy acintyaracanasyāparyantavistārasya mahābhūtabhautikaprapañcasya prādeśikaśarīrakaḥ kiñcijjñaḥ puṇyapāpaparavaśagatir alaṃ nirmāṇāyety aparimitajñānāiśvaryaśaktiḥ śarīrādyanapekṣaḥ saṅkalpād eva sakalabhuvananirmāṇakṣamaḥ kartā siddhaḥ / (YIs_p23182)

atha sva-deha-vyatirikte vastuni pravṛtti-viśeṣa-karatvaṃ deha-dvāreṇa eva / dṛṣṭaṃ hi daṇḍa-cakra-ādiṣu kara-saṃyoga-ādinā kulāla-ādeḥ pravartayitṛtvam ity ucyeta; tad api na; abhidhyāna-mātreṇa eva para-śarīra-gata-gara-nirasana-c(v?)isāraṇa-darśanāt / katham asati śarīre para-preraṇa-ātmakaḥ saṅkalpa iti cet; kiṃ śarīraṃ saṅkalpayati, yena tad-abhāve na bhavet ? / karaṇam iti cen na; manasaḥ karaṇatvāt / kim asatī iśvarasya manaḥ ? bāḍham / nanv evaṃ vigraha-dharma-adharma-anāśvarya-ādayaḥ sādhāraṇa-dharmāḥ prāduḥṣyuḥ / ma aivam; kāryatva-ākṣipta-samartha-kartṛmattvād(-ttva-artha?) draḍhimna aiva apāsatvāt / manaso nitya-indriyatayā deha-apagame 'pi sambandha-abhyupagamād anaikāntikaś ca / yāvad dhi dṛṣṭa-anuguṇaṃ vyāptay-upayogi, tāvad anujñāyate / na ca asmad-āder manasa āpy acintya-racanasya aparyanta-vistārasya mahābhūta-bhautika-prapañcasya prādeśika-śarīrakaḥ kiñcij-jñaḥ puṇya-pāpa-paravaśa-gatir alaṃ nirmāṇāya ity aparimita-jñāna-aiśvarya-śaktiḥ śarīra-ādy-anapekṣaḥ saṅkalpād eva sakala-bhuvana-nirmāṇa-kṣamaḥ kartā siddhaḥ /

īdṛśena kartrā ghaṭādiṣu kāryatvasya sambandho na dṛṣṭa iti cet; atigahanagiritaṭādhiṣṭhānenātiprakṛṣṭādṛṣṭacarendhananivahasambandhinā hutavahaviśeṣeṇa mahānasādau dhūmasya vā kiṃ sambandho dṛṣṭaḥ ? yena dhūmaviśeṣadarśanād giriśikhare tathāvidhāgnir anumīyate / yādṛśo dhūmo yatrāvagataḥ tatraiva tādṛśas tatsampādanasamartho dṛṣtāntabhūmāv aparidṛṣṭo 'pi sāmānyavyāptibalena pakṣadharmatāvaśāt sidhyatīti cet; tad idam asmābhir abhidhīyamānaṃ kim iti na hṛdayam adhirohati bhavatām / ihāpi kāryatvaṃ samarthakartṛpūrvakatvena ghaṭādiṣu viditasambandhaniyamaṃ kṣtityādiṣu dṛśyamānaṃ svasampādanasamartham adṛṣṭapūrvam eva buddhimatkartāram upasthāpayati / yathaiva hi deśakālendhanaparimāṇādiviśeṣānādareṇa dhūmasya svodayānuguṇahutavahamātreṇa sambandhaniyamaḥ, tathaivānīśvaratvākiñcijjñatvaśarīritvapuṇyapāpaparavaśatvam anuṣyatvādiviśeṣaprahāṇena kāryasya svanirmāṇasamarthabuddhimatkartṛmātreṇa sambandhaniyamaniścaya iti na kaścidviśeṣaḥ / (YIs_p24238)

īdṛśena kartrā ghaṭa-ādiṣu kāryatvasya sambandho na dṛṣṭa iti cet; atigahana-giri-taṭa-adhiṣṭhānena atiprakṛṣṭa-adṛṣṭa-cara-indhana-nivaha-sambandhinā hutavaha-viśeṣeṇa mahānasa-ādau dhūmasya vā kiṃ sambandho dṛṣṭaḥ ? yena dhūma-viśeṣa-darśanād giri-śikhare tathā-vidha-agnir anumīyate / yādṛśo dhūmo yatra avagataḥ tatra eva tādṛśas tat-sampādana-samartho dṛṣtānta-bhūmāv aparidṛṣṭo 'pi sāmānya-vyāpti-balena pakṣa-dharmatā-vaśāt sidhyati iti cet; tad idam asmābhir abhidhīyamānaṃ kim iti na hṛdayam adhirohati bhavatām / iha api kāryatvaṃ samartha-kartṛ-pūrvakatvena ghaṭa-ādiṣu vidita-sambandha-niyamaṃ kṣtity-ādiṣu dṛśyamānaṃ sva-sampādana-samartham adṛṣṭa-pūrvam eva buddhimat-kartāram upasthāpayati / yatha aiva hi deśa-kāla-indhana-parimāṇa-ādi-viśeṣa-anādareṇa dhūmasya sva-udaya-anuguṇa-hutavaha-mātreṇa sambandha-niyamaḥ, tatha aiva anīśvaratva-akiñcij-jñatva-śarīritva-puṇya-pāpa-para-vaśatvam anuṣyatva-ādi-viśeṣa-prahāṇena kāryasya sva-nirmāṇa-samartha-buddhimat-kartṛ-mātreṇa sambandha-niyama-niścaya iti na kaścid-viśeṣaḥ /

api ca vibhudravyasaṃyoginaḥ parispandavataś ca sarvatra sparśavattvāvyabhicāre 'pi jñānasukhādinityadravyaviśeṣaguṇānumitātmasaṃyogino manasaḥ katham iva sparśarahitatatvam ? kathaṃ ca vāyavīyadravyasya mahimaguṇaśālino niyatādhiṣṭhānasparśanatvaniyamadarśane 'pi tvagindriye tadviparyayaḥ ? taijasasya vā rūpasparśayor anyattarasya vā prākaṭyaniyame 'pi rūpopalambhasādhanatānumitataijasabhāvasya cakṣuṣo niyamena tadubhayānudbhavābhyupagamaḥ ? / atha kāryadarśanānumitasadbhāvānāṃ taijasādibhāve 'pi tattadviśeṣaṇāṃ yogyānupalabdhibādhitatvāt tadabhyupagame 'nekaniyamabhaṅgaprasaṅgāc ca tathābhyupagamaḥ, hanta tarhi prakṛtaviṣaye 'pi prasañjitadharmaviśeṣāṇām anupalambhabādhāviśeṣād anekaniyamadarśanavighātaprasaṅgāc ca tathābhyupagama iti sarvaṃ samānam anyatrābhiniveśāt / (YIs_p25284)

api ca vibhu-dravya-saṃyoginaḥ parispandavataś ca sarvatra sparśavattva-avyabhicāre 'pi jñāna-sukha-ādi-nitya-dravya-viśeṣa-guṇa-anumita-ātma-saṃyogino manasaḥ katham iva sparśa-rahitatatvam ? kathaṃ ca vāyavīya-dravyasya mahima-guṇa-śālino niyata-adhiṣṭhāna-sparśanatva-niyama-darśane 'pi tvag-indriye tad-viparyayaḥ ? taijasasya vā rūpa-sparśayor anyattarasya vā prākaṭya-niyame 'pi rūpa-upalambha-sādhanata ānumita-taijasa-bhāvasya cakṣuṣo niyamena tad-ubhaya-anudbhava-abhyupagamaḥ ? / atha kārya-darśana-anumita-sad-bhāvānāṃ taijasa-ādi-bhāve 'pi tat-tad-viśeṣaṇāṃ yogya-anupalabdhi-bādhitatvāt tad-abhyupagame 'neka-niyama-bhaṅga-prasaṅgāc ca tatha ābhyupagamaḥ, hanta tarhi prakṛta-viṣaye 'pi prasañjita-dharma-viśeṣāṇām anupalambha-bādhā-viśeṣād aneka-niyama-darśana-vighāta-prasaṅgāc ca tatha ābhyupagama iti sarvaṃ samānam anyatra abhiniveśāt /

dṛśyante hi nītayaḥ / yathā vivādāspadaṃ paramāṇvādi prekṣāvatpreritaṃ ceṣṭate, acetanatvāt; yad acetanaṃ tat tathā, yathā tathāvidhaṃ kandukādi / tathā vivādādhyāsitā bāhyābhyantarapravṛttayaḥ prakṛtyupakaraṇapratyakṣapūrvikāḥ kāryatvāt tadvad eva | (YIs_p26152)

dṛśyante hi nītayaḥ / yathā vivāda-āspadaṃ parama-aṇv-ādi prekṣāvat-preritaṃ ca iṣṭate, acetanatvāt; yad acetanaṃ tat tathā, yathā tathā-vidhaṃ kanduka-ādi / tathā vivāda-adhyāsitā bāhya-abhyantara-pravṛttayaḥ prakṛty-upa-karaṇa-pratyakṣa-pūrvikāḥ kāryatvāt tadvad eva |

pratyakṣaṃ tat prameyatvāt padārthatvād ghaṭādivat/
ekecchānuvidhāyīdam acaitanyāt svadehavat || YIs_16

pratyakṣaṃ tat prameyatvāt padārthatvād ghaṭa-ādivat/ eka-icchā-anuvidhāyi idam acaitanyāt sva-dehavat ||

ekenābhiṣṭhitāḥ kāryaṃ kurvate sarvacetanāḥ |
dehasambandhasāpekṣakāryakṛttvāt tvagādivat || YIs_17

ekena abhiṣṭhitāḥ kāryaṃ kurvate sarva-cetanāḥ | deha-sambandha-sāpekṣa-kārya-kṛttvāt tvag-ādivat ||

ekapradhānapuruṣaṃ vivādādhyāsitaṃ jagat |
cetanācetanātmatvād ekarājakadeśavat || YIs_18

eka-pradhāna-puruṣaṃ vivāda-adhyāsitaṃ jagat | cetana-acetana-ātmatvād eka-rājaka-deśavat ||