Aṣṭāvakragītā

kathaṃ jñānam avāpto 'ti kathaṃ muktir bhaviṣyati
vairāgyaṃ ca kathaṃ prāptam etad brūhi mama prabho // Avg_1.1

kathaṃ jñānam avāpto 'ti kathaṃ muktir bhaviṣyati vairāgyaṃ ca kathaṃ prāptam etad brūhi mama prabho //

muktim icchasi cet tāta viṣayān viṣavat tyaja
kṣamārjavadayātoṣasatyaṃ pīyūṣavad bhaja // Avg_1.2

muktim icchasi cet tāta viṣayān viṣavat tyaja kṣamārjavadayātoṣasatyaṃ pīyūṣavad bhaja //

na pṛthvī na jalaṃ nāgnir na vāyur dyaur na vā bhavān
eṣāṃ sākṣiṇam ātmānaṃ cidrūpaṃ viddhi muktaye // Avg_1.3

na pṛthvī na jalaṃ nāgnir na vāyur dyaur na vā bhavān eṣāṃ sākṣiṇam ātmānaṃ cid-rūpaṃ viddhi muktaye //

yadi dehaṃ pṛthak kṛtya citi viśrāmya tiṣṭhasi
adhunaiva sukhī śānto bandhamukto bhaviṣyasi // Avg_1.4

yadi dehaṃ pṛthak kṛtya citi viśrāmya tiṣṭhasi adhunaiva sukhī śānto bandha-mukto bhaviṣyasi //

na tvaṃ viprādiko varṇo nāśramī nākṣagocaraḥ
asaṅgo 'si nirākāro viśvasākṣī sukhī bhava // Avg_1.5

na tvaṃ viprādiko varṇo nāśramī nākṣa-gocaraḥ asaṅgo 'si nirākāro viśva-sākṣī sukhī bhava //

dharmādharmau sukhaṃ duḥkhaṃ mānasāni na te vibho
na kartāsi na bhoktāsi mukta evāsi sarvadā // Avg_1.6

dharmādharmau sukhaṃ duḥkhaṃ mānasāni na te vibho na kartāsi na bhoktāsi mukta evāsi sarvadā //

eko draṣṭāsi sarvasya muktaprāyo 'si sarvadā
ayam eva hi te bandho draṣṭāraṃ paśyasītaram // Avg_1.7

eko draṣṭāsi sarvasya mukta-prāyo 'si sarvadā ayam eva hi te bandho draṣṭāraṃ paśyasītaram //

ahaṃ kartety ahaṃmānamahākṛṣṇāhidaṃśitaḥ
nāhaṃ karteti viśvāsāmṛtaṃ pītvā sukhī bhava // Avg_1.8

ahaṃ kartety ahaṃ-mānamahā-kṛṣṇāhi-daṃśitaḥ nāhaṃ karteti viśvāsā-mṛtaṃ pītvā sukhī bhava //

eko viśuddhabodho 'ham iti niścayavahninā
prajvālyājñānagahanaṃ vītasokaḥ sukhī bhava // Avg_1.9

eko viśuddha-bodho 'ham iti niścaya-vahninā prajvālyājñāna-gahanaṃ vīta-sokaḥ sukhī bhava //

yatra viśvam idaṃ bhāti kalpitaṃ rajjusarpavat
ānandaparamānandaḥ sa bodhas tvaṃ sukhaṃ cara // Avg_1.10

yatra viśvam idaṃ bhāti kalpitaṃ rajju-sarpavat ānanda-paramānandaḥ sa bodhas tvaṃ sukhaṃ cara //

muktābhimānī mukto hi baddho baddhābhimāny api
kiṃ vadantīha satye 'yaṃ yā matiḥ sā gatir bhavet // Avg_1.11

muktābhimānī mukto hi baddho baddhābhimāny api kiṃ vadantīha satye 'yaṃ yā matiḥ sā gatir bhavet //

ātmā sākṣī vibhuḥ pūrṇa eko muktaś cid akriyaḥ
asaṅgo nispṛhaḥ śānto bhramāt saṃsāravān iva // Avg_1.12

ātmā sākṣī vibhuḥ pūrṇa eko muktaś cid akriyaḥ asaṅgo nispṛhaḥ śānto bhramāt saṃsāravān iva //

kūṭasthaṃ bodham advaitam ātmānaṃ paribhāvaya
ābhāso 'haṃ bhramaṃ muktvā bhāvaṃ bāhyam athāntaraṃ // Avg_1.13

kūṭasthaṃ bodham advaitam ātmānaṃ paribhāvaya ābhāso 'haṃ bhramaṃ muktvā bhāvaṃ bāhyam athāntaraṃ //

dehābhimānapāśena ciraṃ baddho 'si putraka
bodho 'haṃ jñānakhaḍgena tan niṣkṛtya sukhī bhava // Avg_1.14

dehābhimāna-pāśena ciraṃ baddho 'si putraka bodho 'haṃ jñāna-khaḍgena tan niṣkṛtya sukhī bhava //

niḥsaṅgo niṣkriyo 'si tvaṃ svaprakāśo nirañjanaḥ
ayam eva hi te bandhaḥ samādhim anutiṣṭhasi // Avg_1.15

niḥsaṅgo niṣkriyo 'si tvaṃ sva-prakāśo nirañjanaḥ ayam eva hi te bandhaḥ samādhim anutiṣṭhasi //

tvayā vyāptam idaṃ viśvaṃ tvayi protaṃ yathārthataḥ
śudddhabuddhasvarūpas tvaṃ, mā gamaḥ kṣudracittatām // Avg_1.16

tvayā vyāptam idaṃ viśvaṃ tvayi protaṃ yathārthataḥ śudddha-buddha-svarūpas tvaṃ, mā gamaḥ kṣudra-cittatām //

nirapekṣo nirvikāro nirbharaḥ śītalāśayaḥ
agādhabuddhir akṣubdho bhava cinmātravāsanaḥ // Avg_1.17

nirapekṣo nirvikāro nirbharaḥ śītalāśayaḥ agādha-buddhir akṣubdho bhava cin-mātra-vāsanaḥ //

sākāram anṛtaṃ viddhi nirākāraṃ tu niścalam
etattattvopadeśena na punarbhavasambhavaḥ // Avg_1.18

sākāram anṛtaṃ viddhi nirākāraṃ tu niścalam etat-tattvopadeśena na punar-bhava-sambhavaḥ //

yathaivādarśam adhyasthe rūpe 'ntaḥ paritas tu saḥ
tathaivāsmin śarīre 'ntaḥ paritaḥ parameśvaraḥ // Avg_1.19

yathaivādarśam adhyasthe rūpe 'ntaḥ paritas tu saḥ tathaivāsmin śarīre 'ntaḥ paritaḥ parameśvaraḥ //

ekaṃ sarvagataṃ vyoma bahir antar yathā ghaṭe
nityaṃ nirantaraṃ brahma sarvabhūtagaṇe tathā // Avg_1.20

ekaṃ sarva-gataṃ vyoma bahir antar yathā ghaṭe nityaṃ nirantaraṃ brahma sarva-bhūta-gaṇe tathā //

aho nirañjanaḥ śānto bodho 'haṃ prakṛteḥ paraḥ
etāvantam ahaṃ kālaṃ mohenaiva viḍambitaḥ // Avg_2.1

aho nirañjanaḥ śānto bodho 'haṃ prakṛteḥ paraḥ etāvantam ahaṃ kālaṃ mohenaiva viḍambitaḥ //

yathā prakāśayāmy eko deham enaṃ tathā jagat
ato mama jagat sarvam athavā na ca kiṃcana // Avg_2.2

yathā prakāśayāmy eko deham enaṃ tathā jagat ato mama jagat sarvam athavā na ca kiṃcana //

saśarīram aho viśvaṃ parityajya mayādhunā
kutaścit kauśalād eva paramātmā vilokyate // Avg_2.3

saśarīram aho viśvaṃ parityajya mayādhunā kutaścit kauśalād eva paramātmā vilokyate //

yathā na toyato bhinnās taraṅgāḥ phenabudbudāḥ
ātmano na tathā bhinnaṃ viśvam ātmavinirgatam // Avg_2.4

yathā na toyato bhinnās taraṅgāḥ phena-budbudāḥ ātmano na tathā bhinnaṃ viśvam ātma-vinirgatam //

tantumātro bhaved eva paṭo yadvad vicāritaḥ
ātmatanmatram evedaṃ tadvad viśvaṃ vicāritam // Avg_2.5

tantu-mātro bhaved eva paṭo yadvad vicāritaḥ ātma-tanmatram evedaṃ tadvad viśvaṃ vicāritam //

yathaivekṣurase kḷptā tena vyāptaiva śarkarā
tathā viśvaṃ mayi kḷptaṃ mayā vyāptaṃ nirantaram // Avg_2.6

yathaivekṣu-rase kḷptā tena vyāptaiva śarkarā tathā viśvaṃ mayi kḷptaṃ mayā vyāptaṃ nirantaram //

ātmājñānāj jagad bhāti ātmajñānān na bhāsate
rajjvajñānād ahir bhāti tajjñānād bhāsate na hi // Avg_2.7

ātmājñānāj jagad bhāti ātma-jñānān na bhāsate rajjvajñānād ahir bhāti taj-jñānād bhāsate na hi //

prakāśo me nijaṃ rūpaṃ nātirikto 'smy ahaṃ tataḥ
yadā prakāśate viśvaṃ tadāham bhāsa eva hi // Avg_2.8

prakāśo me nijaṃ rūpaṃ nātirikto 'smy ahaṃ tataḥ yadā prakāśate viśvaṃ tadāham bhāsa eva hi //

aho vikalpitaṃ viśvam ajñānān mayi bhāsate
rūpyaṃ śuktau phaṇī rajjau vāri sūryakare yathā // Avg_2.9

aho vikalpitaṃ viśvam ajñānān mayi bhāsate rūpyaṃ śuktau phaṇī rajjau vāri sūryakare yathā //

matto vinirgataṃ viśvaṃ mayy eva layam eṣyati
mṛdi kumbho jale vīciḥ kanake kaṭakaṃ yathā // Avg_2.10

matto vinirgataṃ viśvaṃ mayy eva layam eṣyati mṛdi kumbho jale vīciḥ kanake kaṭakaṃ yathā //

aho ahaṃ namo mahyaṃ, vināśo yasya nāsti me
brahmādistambaparyantaṃ jagannāśe 'pi tiṣṭhataḥ // Avg_2.11

aho ahaṃ namo mahyaṃ, vināśo yasya nāsti me brahmādi-stamba-paryantaṃ jagannāśe 'pi tiṣṭhataḥ //

aho ahaṃ namo mahyaṃ eko 'haṃ dehavān api
kvacin na gantā nāgantā vyāpya viśvam avasthitaḥ // Avg_2.12

aho ahaṃ namo mahyaṃ eko 'haṃ dehavān api kvacin na gantā nāgantā vyāpya viśvam avasthitaḥ //

aho ahaṃ namo mahyaṃ dakṣo nāstīha matsamaḥ
asaṃspṛśya śarīreṇa yena viśvaṃ ciraṃ dhṛtam // Avg_2.13

aho ahaṃ namo mahyaṃ dakṣo nāstīha mat-samaḥ asaṃspṛśya śarīreṇa yena viśvaṃ ciraṃ dhṛtam //

aho ahaṃ namo mahyaṃ yasya me nāsti kiṃcana
athavā yasya me sarvaṃ yad vāṅmanasagocaram // Avg_2.14

aho ahaṃ namo mahyaṃ yasya me nāsti kiṃcana athavā yasya me sarvaṃ yad vāṅ-manasa-gocaram //

jñānaṃ jñeyaṃ tathā jñātā tritayaṃ nāsti vāstavam
ajñānād bhāti yatredaṃ so 'ham asmi nirañjanaḥ // Avg_2.15

jñānaṃ jñeyaṃ tathā jñātā tritayaṃ nāsti vāstavam ajñānād bhāti yatredaṃ so 'ham asmi nirañjanaḥ //

dvaitamūlam aho duḥkhaṃ nānyat tasyāsti bheṣajam
dṛśyam etan mṛṣā sarvaṃ eko 'haṃ cidraso 'malaḥ // Avg_2.16

dvaita-mūlam aho duḥkhaṃ nānyat tasyāsti bheṣajam dṛśyam etan mṛṣā sarvaṃ eko 'haṃ cid-raso 'malaḥ //

bodhamātro 'ham ajñānād upadhiḥ kalpito mayā
evaṃ vimṛśato nityaṃ nirvikalpe sthitir mama // Avg_2.17

bodha-mātro 'ham ajñānād upadhiḥ kalpito mayā evaṃ vimṛśato nityaṃ nirvikalpe sthitir mama //

na me bandho 'sti mokṣo vā bhrāntiḥ śāntā nirāśrayā
aho mayi sthitaṃ viśvaṃ vastuto na mayi sthitam // Avg_2.18

na me bandho 'sti mokṣo vā bhrāntiḥ śāntā nirāśrayā aho mayi sthitaṃ viśvaṃ vastuto na mayi sthitam //

saśarīram idaṃ viśvaṃ na kiṃcid iti niścitam
śuddhacinmātra ātmā ca tat kasmin kalpanādhunā // Avg_2.19

sa-śarīram idaṃ viśvaṃ na kiṃcid iti niścitam śuddha-cin-mātra ātmā ca tat kasmin kalpanādhunā //

śarīraṃ svarganarakau bandhamokṣau bhayaṃ tathā
kalpanāmātram evaitat kiṃ me kāryaṃ cidātmanaḥ // Avg_2.20

śarīraṃ svarga-narakau bandha-mokṣau bhayaṃ tathā kalpanā-mātram evaitat kiṃ me kāryaṃ cidātmanaḥ //

aho janasamūhe 'pi na dvaitaṃ paśyato mama
araṇyam iva saṃvṛttaṃ kva ratiṃ karavāṇy aham // Avg_2.21

aho jana-samūhe 'pi na dvaitaṃ paśyato mama araṇyam iva saṃvṛttaṃ kva ratiṃ karavāṇy aham //

nāham deho na me deho jīvo nāham, ahaṃ hi cit
ayam eva hi me bandha āsīt yā jīvite spṛhā // Avg_2.22

nāham deho na me deho jīvo nāham, ahaṃ hi cit ayam eva hi me bandha āsīt yā jīvite spṛhā //

aho bhuvanakallolair vicitrair drāk samutthitam
mayy anantamahāmbhodhau cittavāte samudyate // Avg_2.23

aho bhuvana-kallolair vicitrair drāk samutthitam mayy ananta-mahāmbhodhau citta-vāte samudyate //

mayy anantamahāmbhodhau cittavāte praśāmyati
abhāgyāj jīvavaṇijo jagat poto vinaśvaraḥ // Avg_2.24

mayy ananta-mahāmbhodhau citta-vāte praśāmyati abhāgyāj jīva-vaṇijo jagat poto vinaśvaraḥ //

mayy anantamahāmbhodhav āścaryaṃ jīvavīcayaḥ
udyanti ghnanti khelanti praviśanti svabhāvataḥ // Avg_2.25

mayy ananta-mahāmbhodhav āścaryaṃ jīva-vīcayaḥ udyanti ghnanti khelanti praviśanti svabhāvataḥ //

avināśinam ātmānam ekaṃ vijñāya tattvataḥ
tavātmajñasya dhīrasya katham arthārjane ratiḥ // Avg_3.1

avināśinam ātmānam ekaṃ vijñāya tattvataḥ tavātma-jñasya dhīrasya katham arthārjane ratiḥ //

ātmājñānād aho prītir viṣayabhramagocare
śukter ajñānato lobho yathā rajatavibhrame // Avg_3.2

ātmājñānād aho prītir viṣaya-bhrama-gocare śukter ajñānato lobho yathā rajata-vibhrame //

viśvaṃ sphurati yatredaṃ taraṅgā iva sāgare
so 'ham asmīti vijñāya, kiṃ dīna iva dhāvasi // Avg_3.3

viśvaṃ sphurati yatredaṃ taraṅgā iva sāgare so 'ham asmīti vijñāya, kiṃ dīna iva dhāvasi //

śrutvāpi śuddhacaitanyam ātmānam atisundaram
upasthetyantasaṃsakto mālinyam adhigacchati // Avg_3.4

śrutvāpi śuddha-caitanyam ātmānam atisundaram upasthetyanta-saṃsakto mālinyam adhigacchati //

sarvabhūteṣu cātmānaṃ sarvabhūtāni cātmani
muner jānata āścaryaṃ mamatvam anuvartate // Avg_3.5

sarva-bhūteṣu cātmānaṃ sarva-bhūtāni cātmani muner jānata āścaryaṃ mamatvam anuvartate //

āsthitaḥ paramādvaitaṃ mokṣārthe 'pi vyavasthitaḥ
āścaryaṃ kāmavaśago vikalaḥ keliśikṣayā // Avg_3.6

āsthitaḥ paramādvaitaṃ mokṣārthe 'pi vyavasthitaḥ āścaryaṃ kāma-vaśago vikalaḥ keli-śikṣayā //

udbhūtaṃ jñānadurmitram avadhāryātidurbalaḥ
āścaryaṃ kāmam ākāṅkṣet kālam antam anuśritaḥ // Avg_3.7

udbhūtaṃ jñāna-durmitram avadhāryātidurbalaḥ āścaryaṃ kāmam ākāṅkṣet kālam antam anuśritaḥ //

ihāmutra viraktasya nityānityavivekinaḥ
āścaryaṃ mokṣakāmasya mokṣād eva vibhīṣikā // Avg_3.8

ihāmutra viraktasya nityānitya-vivekinaḥ āścaryaṃ mokṣa-kāmasya mokṣād eva vibhīṣikā //

dhīras tu bhojyamāno 'pi pīḍyamāno 'pi sarvadā
ātmānaṃ kevalaṃ paśyan na tuṣyati na kupyati // Avg_3.9

dhīras tu bhojyamāno 'pi pīḍyamāno 'pi sarvadā ātmānaṃ kevalaṃ paśyan na tuṣyati na kupyati //

ceṣṭamānaṃ śarīraṃ svaṃ paśyaty anyaśarīravat
saṃstave cāpi nindāyāṃ kathaṃ kṣubhyet mahāśayaḥ // Avg_3.10

ceṣṭamānaṃ śarīraṃ svaṃ paśyaty anya-śarīravat saṃstave cāpi nindāyāṃ kathaṃ kṣubhyet mahāśayaḥ //

māyāmātram idaṃ viśvaṃ paśyan vigatakautukaḥ
api sannihite mṛtyau kathaṃ trasyati dhīradhīḥ // Avg_3.11

māyā-mātram idaṃ viśvaṃ paśyan vigata-kautukaḥ api sannihite mṛtyau kathaṃ trasyati dhīradhīḥ //

niḥspṛhaṃ mānasaṃ yasya nairāśye 'pi mahātmanaḥ
tasyātmajñānatṛptasya tulanā kena jāyate // Avg_3.12

niḥspṛhaṃ mānasaṃ yasya nairāśye 'pi mahātmanaḥ tasyātma-jñāna-tṛptasya tulanā kena jāyate //

svabhāvād eva jānāno dṛśyam etan na kiṃcana
idaṃ grāhyam idaṃ tyājyaṃ sa kiṃ paśyati dhīradhīḥ // Avg_3.13

svabhāvād eva jānāno dṛśyam etan na kiṃcana idaṃ grāhyam idaṃ tyājyaṃ sa kiṃ paśyati dhīradhīḥ //

antastyaktakaṣāyasya nirdvandvasya nirāśiṣaḥ
yadṛcchayāgato bhogo na duḥkhāya na tuṣṭaye // Avg_3.14

antas-tyakta-kaṣāyasya nirdvandvasya nirāśiṣaḥ yad-ṛcchay-āgato bhogo na duḥkhāya na tuṣṭaye //

hantātmajñasya dhīrasya khelato bhogalīlayā
na hi saṃsāravāhīkair mūḍaiḥ saha samānatā // Avg_4.1

hantātma-jñasya dhīrasya khelato bhoga-līlayā na hi saṃsāra-vāhīkair mūḍaiḥ saha samānatā //

yat padaṃ prepsavo dīnāḥ śakrādyāḥ sarvadevatāḥ
aho tatra sthito yogī na harṣam upagacchati // Avg_4.2

yat padaṃ prepsavo dīnāḥ śakrādyāḥ sarva-devatāḥ aho tatra sthito yogī na harṣam upagacchati //

tajjñasya puṇyapāpābhyāṃ sparśo hy antar na jāyate
na hy ākāśasya dhūmena dṛśyamānāpi saṅgati // Avg_4.3

taj-jñasya puṇya-pāpābhyāṃ sparśo hy antar na jāyate na hy ākāśasya dhūmena dṛśyamānāpi saṅgati //

ātmaivedaṃ jagat sarvaṃ jñātaṃ yena mahātmanā
yadṛcchayā varttamānaṃ taṃ niṣeddhuṃ kṣameta kaḥ // Avg_4.4

ātmaivedaṃ jagat sarvaṃ jñātaṃ yena mahātmanā yad-ṛcchayā varttamānaṃ taṃ niṣeddhuṃ kṣameta kaḥ //

ābrahmastambaparyante bhūtagrāme caturvidhe
vijñasyaiva hi sāmarthyam icchānicchāvivarjane // Avg_4.5

ā-brahma-stamba-paryante bhūta-grāme catur-vidhe vijñasyaiva hi sāmarthyam icchānicchā-vivarjane //

ātmānam advayaṃ kaścij jānāti jagad īśvaraṃ
yad vetti tat sa kurute na bhayaṃ tasya kutracit // Avg_4.6

ātmānam advayaṃ kaścij jānāti jagad īśvaraṃ yad vetti tat sa kurute na bhayaṃ tasya kutracit //

na te saṅgo 'sti kenāpi kiṃ śuddhas tyaktum icchasi
saṅghātavilayaṃ kurvann evam eva layaṃ vraja // Avg_5.1

na te saṅgo 'sti kenāpi kiṃ śuddhas tyaktum icchasi saṅghāta-vilayaṃ kurvann evam eva layaṃ vraja //

udeti bhavato viśvaṃ vāridher iva budbudaḥ
iti jñatvaikam ātmānam evam eva layaṃ vraja // Avg_5.2

udeti bhavato viśvaṃ vāridher iva budbudaḥ iti jñatvaikam ātmānam evam eva layaṃ vraja //

pratyakṣam apy avastutvād viśvaṃ nāsty amale tvayi
rajjusarpa iva vyaktam evam eva layaṃ vraja // Avg_5.3

pratyakṣam apy avastutvād viśvaṃ nāsty amale tvayi rajju-sarpa iva vyaktam evam eva layaṃ vraja //

samaduḥkhasukhaḥ pūrṇa āśānairāśyayoḥ samaḥ
samajīvitamṛtyuḥ sann evam eva layaṃ vraja // Avg_5.4

sama-duḥkha-sukhaḥ pūrṇa āśā-nairāśyayoḥ samaḥ sama-jīvita-mṛtyuḥ sann evam eva layaṃ vraja //

ākāśavad ananto 'haṃ ghaṭavat prakṛtaṃ jagat
iti jñānaṃ tathaitasya na tyāgo na graho layaḥ // Avg_6.1

ākāśavad ananto 'haṃ ghaṭavat prakṛtaṃ jagat iti jñānaṃ tathaitasya na tyāgo na graho layaḥ //

mahodadhir ivāhaṃ sa prapañco vīcisaṃnibhaḥ
iti jñānaṃ tathaitasya na tyāgo na graho layaḥ // Avg_6.2

mahodadhir ivāhaṃ sa prapañco vīci-saṃnibhaḥ iti jñānaṃ tathaitasya na tyāgo na graho layaḥ //

ahaṃ sa śuktisaṅkāśo rūpyavad viśvakalpanā
iti jñānaṃ tathaitasya na tyāgo na graho layaḥ // Avg_6.3

ahaṃ sa śukti-saṅkāśo rūpyavad viśva-kalpanā iti jñānaṃ tathaitasya na tyāgo na graho layaḥ //

ahaṃ vā sarvabhūteṣu sarvabhūtāny atho mayi
iti jñānaṃ tathaitasya na tyāgo na graho layaḥ // Avg_6.4

ahaṃ vā sarva-bhūteṣu sarva-bhūtāny atho mayi iti jñānaṃ tathaitasya na tyāgo na graho layaḥ //

mayy anantamahāmbhodhau viśvapota itastataḥ
bhramati svāntavātena na mamāsty asahiṣṇutā // Avg_7.1

mayy ananta-mahāmbhodhau viśva-pota itas-tataḥ bhramati svānta-vātena na mamāsty asahiṣṇutā //

mayy anantamahāmbhodhau jagadvīciḥ svabhāvataḥ
udetu vastam āyātu na me vṛddhir na ca kṣatiḥ // Avg_7.2

mayy ananta-mahāmbhodhau jagad-vīciḥ svabhāvataḥ udetu vastam āyātu na me vṛddhir na ca kṣatiḥ //

mayy anantamahāmbhodhau viśvaṃ nāma vikalpanā
atiśānto nirākāra etad evāham āsthitaḥ // Avg_7.3

mayy ananta-mahāmbhodhau viśvaṃ nāma vikalpanā atiśānto nirākāra etad evāham āsthitaḥ //

nātmā bhāveṣu no bhāvas tatrānante niranjane
ity asakto 'spṛhaḥ śānta etad evāham āstitaḥ // Avg_7.4

nātmā bhāveṣu no bhāvas tatrānante niranjane ity asakto 'spṛhaḥ śānta etad evāham āstitaḥ //

aho cinmātram evāham indrajālopamaṃ jagat
ato mama kathaṃ kutra heyopādeyakalpanā // Avg_7.5

aho cin-mātram evāham indra-jālopamaṃ jagat ato mama kathaṃ kutra heyopādeya-kalpanā //

tadā bandho yadā cittaṃ kiṃcid vāñchati ṣocati
kiṃcin muñcati gṛhṇāti kiṃcid dhṛṣyati kupyati // Avg_8.1

tadā bandho yadā cittaṃ kiṃcid vāñchati ṣocati kiṃcin muñcati gṛhṇāti kiṃcid dhṛṣyati kupyati //

tadā muktir yadā cittaṃ na vāñchati na śocati
na muñcati na gṛhṇāti na hṛṣyati na kupyati // Avg_8.2

tadā muktir yadā cittaṃ na vāñchati na śocati na muñcati na gṛhṇāti na hṛṣyati na kupyati //

tadā bandho yadā cittaṃ saktaṃ kāsv api dṛṣṭiṣu
tadā mokṣo yadā cittam asaktaṃ sarvadṛṣṭiṣu // Avg_8.3

tadā bandho yadā cittaṃ saktaṃ kāsv api dṛṣṭiṣu tadā mokṣo yadā cittam asaktaṃ sarva-dṛṣṭiṣu //

yadā nāhaṃ tadā mokṣo yadāhaṃ bandhanaṃ tadā
matveti helayā kiṃcit mā gṛhāṇa vimuñca mā // Avg_8.4

yadā nāhaṃ tadā mokṣo yadāhaṃ bandhanaṃ tadā matveti helayā kiṃcit mā gṛhāṇa vimuñca mā //

kṛtākṛte ca dvandvāni kadā śāntāni kasya vā
evaṃ jñātveha nirvedād bhava tyāgaparo 'vratī // Avg_9.1

kṛtākṛte ca dvandvāni kadā śāntāni kasya vā evaṃ jñātveha nirvedād bhava tyāga-paro 'vratī //

kasyāpi tāta dhanyasya lokaceṣṭāvalokanāt
jīvitecchā bubhukṣā ca bubhutsopaśamaḥ gatāḥ // Avg_9.2

kasyāpi tāta dhanyasya loka-ceṣṭāvalokanāt jīvitecchā bubhukṣā ca bubhutsopaśamaḥ gatāḥ //

anityaṃ sarvam evedaṃ tāpatritayadūṣitam
asāraṃ ninditaṃ heyam iti niścitya śāmyati // Avg_9.3

anityaṃ sarvam evedaṃ tāpa-tritaya-dūṣitam asāraṃ ninditaṃ heyam iti niścitya śāmyati //

ko 'sau kālo vayaḥ kiṃ vā yatra dvandvāni no nṛṇām
tāny upekṣya yathāprāptavartī siddhim avāpnuyāt // Avg_9.4

ko 'sau kālo vayaḥ kiṃ vā yatra dvandvāni no nṛṇām tāny upekṣya yathā-prāptavartī siddhim avāpnuyāt //

nānā mataṃ maharṣīṣāṃ sādhūnāṃ yogināṃ tathā
dṛṣṭvā nirvedam āpannaḥ ko na śāmyati mānavaḥ // Avg_9.5

nānā mataṃ maharṣīṣāṃ sādhūnāṃ yogināṃ tathā dṛṣṭvā nirvedam āpannaḥ ko na śāmyati mānavaḥ //

kṛtvā mūrtiparijñānaṃ caitanyasya na kiṃ guruḥ
nirvedasamatāyuktyā yas tārayati saṃsṛteḥ // Avg_9.6

kṛtvā mūrti-parijñānaṃ caitanyasya na kiṃ guruḥ nirveda-samatāyuktyā yas tārayati saṃsṛteḥ //

paśya bhūtavikārāṃs tvaṃ bhūtamātrān yathārthataḥ
tatkṣaṇād bandhanirmuktaḥ svarūpastho bhaviṣyasi // Avg_9.7

paśya bhūta-vikārāṃs tvaṃ bhūta-mātrān yathārthataḥ tat-kṣaṇād bandha-nirmuktaḥ sva-rūpa-stho bhaviṣyasi //

vāsanā eva saṃsāra iti sarvā vimuñca tāḥ
tattyāgo vāsanātyāgāt sthitir adya yathā tathā // Avg_9.8

vāsanā eva saṃsāra iti sarvā vimuñca tāḥ tat-tyāgo vāsanā-tyāgāt sthitir adya yathā tathā //

vihāya vairiṇaṃ kāmam arthaṃ cānarthasaṅkulam
dharmam apy etayor hetuṃ sarvatrānādaraṃ kuru // Avg_10.1

vihāya vairiṇaṃ kāmam arthaṃ cānartha-saṅkulam dharmam apy etayor hetuṃ sarvatrānādaraṃ kuru //

svapnendrajālavat paśya dināni trīṇi pañca vā
mitrakṣetradhanāgāradāradāyādisampadaḥ // Avg_10.2

svapnendra-jālavat paśya dināni trīṇi pañca vā mitra-kṣetra-dhanāgāradāra-dāyādi-sampadaḥ //

yatra yatra bhavet tṛṣṇā, saṃsāraṃ viddhi tatra vai
prauḍhavairāgyam āśritya vītatṛṣṇaḥ sukhī bhava // Avg_10.3

yatra yatra bhavet tṛṣṇā, saṃsāraṃ viddhi tatra vai prauḍha-vairāgyam āśritya vīta-tṛṣṇaḥ sukhī bhava //

tṛṣṇāmātrātmako bandhas, tannāśo mokṣa ucyate
bhavāsaṃsaktimātreṇa prāptituṣṭir muhurmuhuḥ // Avg_10.4

tṛṣṇā-mātrātmako bandhas, tan-nāśo mokṣa ucyate bhavāsaṃsakti-mātreṇa prāpti-tuṣṭir muhur-muhuḥ //

tvam ekaś cetanaḥ śuddho jaḍaṃ viśvam asat tathā
avidyāpi na kiṃcit sā kā bubhutsā tathāpi te // Avg_10.5

tvam ekaś cetanaḥ śuddho jaḍaṃ viśvam asat tathā avidyāpi na kiṃcit sā kā bubhutsā tathāpi te //

rājyaṃ sutāḥ kalatrāṇi śarīrāṇi sukhāni ca
saṃsaktasyāpi naṣṭāni tava janmani janmani // Avg_10.6

rājyaṃ sutāḥ kalatrāṇi śarīrāṇi sukhāni ca saṃsaktasyāpi naṣṭāni tava janmani janmani //

alam arthena kāmena sukṛtenāpi karmaṇā
ebhyaḥ saṃsārakāntāre na viśrāntam abhūn manaḥ // Avg_10.7

alam arthena kāmena sukṛtenāpi karmaṇā ebhyaḥ saṃsāra-kāntāre na viśrāntam abhūn manaḥ //

kṛtaṃ na kati janmāni kāyena manasā girā
duḥkham āyāsadaṃ karma tad adyāpy uparamyatām // Avg_10.8

kṛtaṃ na kati janmāni kāyena manasā girā duḥkham āyāsadaṃ karma tad adyāpy uparamyatām //

bhāvābhāvavikāraś ca svabhāvād iti niścayī
nirvikāro gatakleśaḥ sukhenaivopaśāmyati // Avg_11.1

bhāvābhāva-vikāraś ca sva-bhāvād iti niścayī nirvikāro gata-kleśaḥ sukhenaivopaśāmyati //

īśvaraḥ sarvanirmātā nehānya iti niścayī
antargalitasarvāśaḥ śāntaḥ kvāpi na sajjate // Avg_11.2

īśvaraḥ sarva-nirmātā nehānya iti niścayī antar-galita-sarvāśaḥ śāntaḥ kvāpi na sajjate //

āpadaḥ sampadaḥ kāle daivād eveti niścayī
tṛptaḥ svasthendriyo nityaṃ na vāñchati na śocati // Avg_11.3

āpadaḥ sampadaḥ kāle daivād eveti niścayī tṛptaḥ svasthendriyo nityaṃ na vāñchati na śocati //

sukhaduḥkhe janmamṛtyū daivād eveti niścayī
sādhyādarśī nirāyāsaḥ kurvann api na lipyate // Avg_11.4

sukha-duḥkhe janma-mṛtyū daivād eveti niścayī sādhyādarśī nirāyāsaḥ kurvann api na lipyate //

cintayā jāyate duḥkhaṃ nānyatheheti niścayī
tayā hīnaḥ sukhī śāntaḥ sarvatra galitaspṛhaḥ // Avg_11.5

cintayā jāyate duḥkhaṃ nānyatheheti niścayī tayā hīnaḥ sukhī śāntaḥ sarvatra galita-spṛhaḥ //

nāhaṃ deho na me deho bodho 'ham iti niścayī
kaivalyam iva saṃprāpto na smaraty akṛtaṃ kṛtam // Avg_11.6

nāhaṃ deho na me deho bodho 'ham iti niścayī kaivalyam iva saṃprāpto na smaraty akṛtaṃ kṛtam //

ābrahmastambaparyantam aham eveti niścayī
nirvikalpaḥ śuciḥ śāntaḥ prāptāprāptavinirvṛtaḥ // Avg_11.7

ā-brahma-stamba-paryantam aham eveti niścayī nirvikalpaḥ śuciḥ śāntaḥ prāptāprāpta-vinirvṛtaḥ //

nānāścaryam idaṃ viśvaṃ na kiṃcid iti niścayī
nirvāsanaḥ sphūrtimātro na kiṃcid iva śāmyati // Avg_11.8

nānāścaryam idaṃ viśvaṃ na kiṃcid iti niścayī nirvāsanaḥ sphūrti-mātro na kiṃcid iva śāmyati //

kāyakṛtyāsahaḥ pūrvaṃ tato vāgvistarāsahaḥ
atha cintāsahas tasmād evam evāham āsthitaḥ // Avg_12.1

kāya-kṛty-āsahaḥ pūrvaṃ tato vāg-vistarāsahaḥ atha cintāsahas tasmād evam evāham āsthitaḥ //

prītyabhāvena śabdāder adṛśyatvena cātmanaḥ
vikṣepaikāgrahṛdaya evam evāhaṃ āsthitaḥ // Avg_12.2

prīty-abhāvena śabdāder adṛśyatvena cātmanaḥ vikṣepaikāgra-hṛdaya evam evāhaṃ āsthitaḥ //

samādhyāsādivikṣiptau vyavahāraḥ samādhaye
evaṃ vilokya niyamam evam evāham āsthitaḥ // Avg_12.3

sam-ādhyās-ādi-vikṣiptau vyavahāraḥ samādhaye evaṃ vilokya niyamam evam evāham āsthitaḥ //

heyopādeyavirahād evaṃ harṣaviṣādayoḥ
abhāvād adya he brahmann evam evāham āsthitaḥ // Avg_12.4

heyopādeya-virahād evaṃ harṣa-viṣādayoḥ abhāvād adya he brahmann evam evāham āsthitaḥ //

āśramānāśramaṃ dhyānaṃ cittasvīkṛtavarjanam
vikalpaṃ mama vīkṣyaitair evam evāham āsthitaḥ // Avg_12.5

āśramānāśramaṃ dhyānaṃ cittas-vīkṛta-varjanam vikalpaṃ mama vīkṣyaitair evam evāham āsthitaḥ //

karmānuṣṭhānam ajñānād yathaivoparamas tathā
buddhvā saṃyag idaṃ tattvam evam evāham āsthitaḥ // Avg_12.6

karmānuṣṭhānam ajñānād yathaivoparamas tathā buddhvā saṃyag idaṃ tattvam evam evāham āsthitaḥ //

acintyaṃ cintyamāno 'pi cintārūpaṃ bhajaty asau
tyaktvā tadbhāvanaṃ tasmād evam evāham āsthitaḥ // Avg_12.7

acintyaṃ cintyamāno 'pi cintārūpaṃ bhajaty asau tyaktvā tad-bhāvanaṃ tasmād evam evāham āsthitaḥ //

evam eva kṛtaṃ yena sa kṛtārtho bhaved asau
evam eva svabhāvo yaḥ sa kṛtārtho bhaved asau // Avg_12.8

evam eva kṛtaṃ yena sa kṛtārtho bhaved asau evam eva svabhāvo yaḥ sa kṛtārtho bhaved asau //

akiṃcanabhavaṃ svāsthyaṃ kaupīnatve 'pi durlabham
tyāgādāne vihāyāsmād aham āse yathāsukham // Avg_13.1

akiṃcana-bhavaṃ svāsthyaṃ kaupīnatve 'pi durlabham tyāgādāne vihāyāsmād aham āse yathā-sukham //

kutrāpi khedaḥ kāyasya, jihvā kutrāpi khidyate
manaḥ kutrāpi tat tyaktvā puruṣārthe sthitaḥ sukham // Avg_13.2

kutrāpi khedaḥ kāyasya, jihvā kutrāpi khidyate manaḥ kutrāpi tat tyaktvā puruṣārthe sthitaḥ sukham //

kṛtaṃ kim api naiva syād iti sañcintya tattvataḥ
yadā yat kartum āyāti tat kṛtvāse yathāsukham // Avg_13.3

kṛtaṃ kim api naiva syād iti sañcintya tattvataḥ yadā yat kartum āyāti tat kṛtvāse yathā-sukham //

karmanaiṣkarmyanirbandhabhāvā dehasthayoginaḥ
saṃyogāyogavirahād aham āse yathāsukham // Avg_13.4

karma-naiṣkarmya-nirbandhabhāvā deha-stha-yoginaḥ saṃyogāyoga-virahād aham āse yathā-sukham //

arthānarthau na me sthityā gatyā na śayanena vā
tiṣṭhan gacchan svapan tasmād aham āse yathāsukham // Avg_13.5

arthānarthau na me sthityā gatyā na śayanena vā tiṣṭhan gacchan svapan tasmād aham āse yathā-sukham //

svapato nāsti me hāniḥ siddhir yatnavato na vā
nāśollāsau vihāyāsmād aham āse yathāsukham // Avg_13.6

svapato nāsti me hāniḥ siddhir yatnavato na vā nāśollāsau vihāyāsmād aham āse yathā-sukham //

sukhādirūpā niyamaṃ bhāveṣv ālokya bhūriśaḥ
śubhāśubhe vihāyāsmād aham āse yathāsukham // Avg_13.7

sukhādi-rūpā niyamaṃ bhāveṣv ālokya bhūriśaḥ śubhāśubhe vihāyāsmād aham āse yathā-sukham //

prakṛtyā śūnyacitto yaḥ pramādād bhāvabhāvanaḥ
nidrito bodhita iva kṣīṇasaṃsmaraṇo hi saḥ // Avg_14.1

prakṛtyā śūnya-citto yaḥ pramādād bhāva-bhāvanaḥ nidrito bodhita iva kṣīṇa-saṃsmaraṇo hi saḥ //

kva dhanāni kva mitrāṇi kva me viṣayadasyavaḥ
kva śāstraṃ kva ca vijñānaṃ yadā me galitā spṛhā // Avg_14.2

kva dhanāni kva mitrāṇi kva me viṣaya-dasyavaḥ kva śāstraṃ kva ca vijñānaṃ yadā me galitā spṛhā //

vijñāte sākṣipuruṣe paramātmani ceśvare
nairāśye bandhamokṣe ca na cintā muktaye mama // Avg_14.3

vijñāte sākṣi-puruṣe paramātmani ceśvare nairāśye bandha-mokṣe ca na cintā muktaye mama //

antarvikalpaśūnyasya bahiḥ svacchandacāriṇaḥ
bhrāntasyeva daśās tās tās tādṛśā eva jānate // Avg_14.4

antar-vikalpa-śūnyasya bahiḥ sva-cchanda-cāriṇaḥ bhrāntasyeva daśās tās tās tādṛśā eva jānate //

yathātathopadeśena kṛtārthaḥ sattvabuddhimān
ājīvam api jijñāsuḥ paras tatra vimuhyati // Avg_15.1

yathā-tathopadeśena kṛtārthaḥ sattva-buddhimān ājīvam api jijñāsuḥ paras tatra vimuhyati //

mokṣo viṣayavairasyaṃ bandho vaiṣayiko rasaḥ
etāvad eva vijñānaṃ yathecchasi tathā kuru // Avg_15.2

mokṣo viṣaya-vairasyaṃ bandho vaiṣayiko rasaḥ etāvad eva vijñānaṃ yathecchasi tathā kuru //

vāgmiprājñamahodyogaṃ janaṃ mūkajaḍālasam
karoti tattvabodho 'yam atas tyakto bubhukṣubhiḥ // Avg_15.3

vāgmi-prājña-mahodyogaṃ janaṃ mūka-jaḍālasam karoti tattva-bodho 'yam atas tyakto bubhukṣubhiḥ //

na tvaṃ deho na te deho bhoktā kartā na vā bhavān
cidrūpo 'si sadā sākṣī nirapekṣaḥ sukhaṃ cara // Avg_15.4

na tvaṃ deho na te deho bhoktā kartā na vā bhavān cid-rūpo 'si sadā sākṣī nirapekṣaḥ sukhaṃ cara //

rāgadveṣau manodharmau na manas te kadācana
nirvikalpo 'si bodhātmā nirvikāraḥ sukhaṃ cara // Avg_15.5

rāga-dveṣau mano-dharmau na manas te kadācana nirvikalpo 'si bodhātmā nirvikāraḥ sukhaṃ cara //

sarvabhūteṣu cātmānaṃ sarvabhūtāni cātmani
vijñāya nirahaṃkāro nirmamas tvaṃ sukhī bhava // Avg_15.6

sarva-bhūteṣu cātmānaṃ sarva-bhūtāni cātmani vijñāya nirahaṃ-kāro nirmamas tvaṃ sukhī bhava //

viṣvaṃ sphurati yatredaṃ taraṅgā iva sāgare
tat tvam eva na sandehaś cinmūrte vijvaro bhava // Avg_15.7

viṣvaṃ sphurati yatredaṃ taraṅgā iva sāgare tat tvam eva na sandehaś cin-mūrte vijvaro bhava //

śraddhatsva tāta śraddhatsva nātra mohaṃ kuruṣva bhoḥ
jñānasvarūpo bhagavān ātmā tvaṃ prakṛteḥ paraḥ // Avg_15.8

śraddhatsva tāta śraddhatsva nātra mohaṃ kuruṣva bhoḥ jñāna-svarūpo bhagavān ātmā tvaṃ prakṛteḥ paraḥ //

guṇaiḥ saṃveṣṭito dehas tiṣṭhaty āyāti yāti ca
ātmā na gantā nāgantā kim enam anuśocasi // Avg_15.9

guṇaiḥ saṃveṣṭito dehas tiṣṭhaty āyāti yāti ca ātmā na gantā nāgantā kim enam anuśocasi //

dehas tiṣṭhatu kalpāntaṃ gacchatv adyaiva vā punaḥ
kva vṛddhiḥ kva ca vā hānis tava cinmātrarūpiṇaḥ // Avg_15.10

dehas tiṣṭhatu kalpāntaṃ gacchatv adyaiva vā punaḥ kva vṛddhiḥ kva ca vā hānis tava cin-mātra-rūpiṇaḥ //

tvayy anantamahāmbhodhau viśvavīciḥ svabhāvataḥ
udetu vāstam āyātu na te vṛddhir na vā kṣatiḥ // Avg_15.11

tvayy ananta-mahāmbhodhau viśva-vīciḥ sva-bhāvataḥ udetu vāstam āyātu na te vṛddhir na vā kṣatiḥ //

tāta cinmātrarūpo 'si na te bhinnam idaṃ jagat
ataḥ kasya kathaṃ kutra heyopādeyakalpanā // Avg_15.12

tāta cin-mātra-rūpo 'si na te bhinnam idaṃ jagat ataḥ kasya kathaṃ kutra heyopādeya-kalpanā //

ekasminn avyaye śānte cidākāśe 'male tvayi
kuto janma kutaḥ karma kuto 'haṃkāra eva ca // Avg_15.13

ekasminn avyaye śānte cid-ākāśe 'male tvayi kuto janma kutaḥ karma kuto 'haṃkāra eva ca //

yat tvaṃ paśyasi tatraikas tvam eva pratibhāsase
kiṃ pṛthak bhāsate svarṇāt kaṭakāṅgadanūpuram // Avg_15.14

yat tvaṃ paśyasi tatraikas tvam eva pratibhāsase kiṃ pṛthak bhāsate svarṇāt kaṭakāṅgada-nūpuram //

ayaṃ so 'ham ayam nāhaṃ vibhāgam iti santyaja
sarvam ātmeti niścitya niḥsaṅkalpaḥ sukhī bhava // Avg_15.15

ayaṃ so 'ham ayam nāhaṃ vibhāgam iti santyaja sarvam ātmeti niścitya niḥsaṅkalpaḥ sukhī bhava //

tavaivājñānato viśvaṃ tvam ekaḥ paramārthataḥ
tvatto 'nyo nāsti saṃsārī nāsaṃsārī ca kaścana // Avg_15.16

tavaivājñānato viśvaṃ tvam ekaḥ param-ārthataḥ tvatto 'nyo nāsti saṃsārī nāsaṃsārī ca kaścana //

bhrāntimātram idaṃ viśvaṃ na kiṃcid iti niścayī
nirvāsanaḥ sphūrtimātro na kiṃcid iva śāmyati // Avg_15.17

bhrānti-mātram idaṃ viśvaṃ na kiṃcid iti niścayī nirvāsanaḥ sphūrti-mātro na kiṃcid iva śāmyati //

eka eva bhavāmbhodhāv āsīd asti bhaviṣyati
na te bandho 'sti mokṣo vā kṛtakṛtyaḥ sukhaṃ cara // Avg_15.18

eka eva bhavāmbhodhāv āsīd asti bhaviṣyati na te bandho 'sti mokṣo vā kṛta-kṛtyaḥ sukhaṃ cara //

mā saṅkalpavikalpābhyāṃ cittaṃ kṣobhaya cinmaya
upaśāmya sukhaṃ tiṣṭha svātmany ānandavigrahe // Avg_15.19

mā saṅkalpa-vikalpābhyāṃ cittaṃ kṣobhaya cin-maya upaśāmya sukhaṃ tiṣṭha svātmany ānanda-vigrahe //

tyajaiva dhyānaṃ sarvatra mā kiṃcid dhṛdi dhāraya
ātmā tvaṃ mukta evāsi kiṃ vimṛśya kariṣyasi // Avg_15.20

tyajaiva dhyānaṃ sarvatra mā kiṃcid dhṛdi dhāraya ātmā tvaṃ mukta evāsi kiṃ vimṛśya kariṣyasi //

ācakṣva śṛṇu vā tāta nānāśāstrāṇyanekaśaḥ
tathāpi na tava svāsthyaṃ sarvavismaraṇād ṛte // Avg_16.1

ācakṣva śṛṇu vā tāta nānā-śāstrāṇy-anekaśaḥ tathāpi na tava svāsthyaṃ sarva-vismaraṇād ṛte //

bhogaṃ karma samādhiṃ vā kuru vijña tathāpi te
cittaṃ nirastasarvāśam atyarthaṃ rocayiṣyati // Avg_16.2

bhogaṃ karma samādhiṃ vā kuru vijña tathāpi te cittaṃ nirasta-sarvāśam atyarthaṃ rocayiṣyati //

āyāsāt sakalo duḥkhī nainaṃ jānāti kaścana
anenaivopadeśena dhanyaḥ prāpnoti nirvṛtim // Avg_16.3

āyāsāt sakalo duḥkhī nainaṃ jānāti kaścana anenaivopadeśena dhanyaḥ prāpnoti nirvṛtim //

vyāpāre khidyate yas tu nimeṣonmeṣayor api
tasyālasyadhurīṇasya sukhaṃ nānyasya kasyacit // Avg_16.4

vyāpāre khidyate yas tu nimeṣonmeṣayor api tasyālasyadhurīṇasya sukhaṃ nānyasya kasyacit //

idaṃ kṛtam idaṃ neti dvandvair muktaṃ yadā manaḥ
dharmārthakāmamokṣeṣu nirapekṣaṃ tadā bhavet // Avg_16.5

idaṃ kṛtam idaṃ neti dvandvair muktaṃ yadā manaḥ dharmārtha-kāma-mokṣeṣu nirapekṣaṃ tadā bhavet //

virakto viṣayadveṣṭā rāgī viṣayalolupaḥ
grahamokṣavihīnas tu na virakto na rāgavān // Avg_16.6

virakto viṣaya-dveṣṭā rāgī viṣaya-lolupaḥ graha-mokṣa-vihīnas tu na virakto na rāgavān //

heyopādeyatā tāvat saṃsāraviṭapāṅkuraḥ
spṛhā jīvati yāvad vai nirvicāradaśāspadam // Avg_16.7

heyopādeyatā tāvat saṃsāra-viṭapāṅkuraḥ spṛhā jīvati yāvad vai nirvicāradaśāspadam //

pravṛttau jāyate rāgo nirvṛttau dveṣa eva hi
nirdvandvo bālavad dhīmān evam eva vyavasthitaḥ // Avg_16.8

pravṛttau jāyate rāgo nirvṛttau dveṣa eva hi nirdvandvo bālavad dhīmān evam eva vyava-sthitaḥ //

hātum icchati saṃsāraṃ rāgī duḥkhajihāsayā
vītarāgo hi nirduḥkhas tasminn api na khidyati // Avg_16.9

hātum icchati saṃsāraṃ rāgī duḥkha-jihāsayā vīta-rāgo hi nirduḥkhas tasminn api na khidyati //

yasyābhimāno mokṣe 'pi dehe 'pi mamatā tathā
na ca jñānī na vā yogī kevalaṃ duḥkhabhāg asau // Avg_16.10

yasyābhimāno mokṣe 'pi dehe 'pi mamatā tathā na ca jñānī na vā yogī kevalaṃ duḥkhabhāg asau //

haro yady upadeṣṭā te hariḥ kamalajo 'pi vā
tathāpi na tava svāsthyaṃ sarvavismaraṇād ṛte // Avg_16.11

haro yady upadeṣṭā te hariḥ kamala-jo 'pi vā tathāpi na tava svāsthyaṃ sarva-vismaraṇād ṛte //

tena jñānaphalaṃ prāptaṃ yogābhyāsaphalaṃ tathā
tṛptaḥ svacchendriyo nityam ekākī ramate tu yaḥ // Avg_17.1

tena jñāna-phalaṃ prāptaṃ yogābhyāsa-phalaṃ tathā tṛptaḥ svacchendriyo nityam ekākī ramate tu yaḥ //

na kadācij jagaty asmiṃs tattvajño hanta khidyati
yata ekena tenedaṃ pūrṇaṃ brahmāṇḍamaṇḍalam // Avg_17.2

na kadācij jagaty asmiṃs tattva-jño hanta khidyati yata ekena tenedaṃ pūrṇaṃ brahmāṇḍa-maṇḍalam //

na jātu viṣayāḥ ke 'pi svārāmaṃ harṣayanty amī
sallakīpallavaprītam ivebhaṃ nimbapallavāḥ // Avg_17.3

na jātu viṣayāḥ ke 'pi svārāmaṃ harṣayanty amī sallakī-pallava-prītam ivebhaṃ nimba-pallavāḥ //

yas tu bhogeṣu bhukteṣu na bhavaty adhivāsitaḥ
abhukteṣu nirākāṅkṣī tādṛśo bhavadurlabhaḥ // Avg_17.4

yas tu bhogeṣu bhukteṣu na bhavaty adhivāsitaḥ abhukteṣu nirākāṅkṣī tādṛśo bhava-durlabhaḥ //

bubhukṣur iha saṃsāre mumukṣur api dṛśyate
bhogamokṣanirākāṅkṣī viralo hi mahāśāyaḥ // Avg_17.5

bubhukṣur iha saṃsāre mumukṣur api dṛśyate bhoga-mokṣa-nirākāṅkṣī viralo hi mahāśāyaḥ //

dharmārthakāmamokṣeṣu jīvite maraṇe tathā
kasyāpy udāracittasya heyopādeyatā na hi // Avg_17.6

dharmārtha-kāma-mokṣeṣu jīvite maraṇe tathā kasyāpy udāra-cittasya heyopādeyatā na hi //

vāñchā na viśvavilaye na dveṣas tasya ca sthitau
yathā jīvikayā tasmād dhanya āste yathā sukhaṃ // Avg_17.7

vāñchā na viśva-vilaye na dveṣas tasya ca sthitau yathā jīvikayā tasmād dhanya āste yathā sukhaṃ //

kṛtārtho 'nena jñānenety evaṃ galitadhīḥ kṛtī
paśyan śṛṇvan spṛśan jighrann aśnann aste yathā sukhaṃ // Avg_17.8

kṛtārtho 'nena jñānenety evaṃ galita-dhīḥ kṛtī paśyan śṛṇvan spṛśan jighrann aśnann aste yathā sukhaṃ //

śūnyā dṛṣṭir vṛthā ceṣṭā vikalānīndriyāṇi ca
na spṛhā na viraktir vā kṣīṇasaṃsārasāgare // Avg_17.9

śūnyā dṛṣṭir vṛthā ceṣṭā vikalānīndriyāṇi ca na spṛhā na viraktir vā kṣīṇa-saṃsāra-sāgare //

na jagarti na nidrāti nonmīlati na mīlati
aho paradaśā kvāpi vartate muktacetasaḥ // Avg_17.10

na jagarti na nidrāti nonmīlati na mīlati aho para-daśā kvāpi vartate mukta-cetasaḥ //

sarvatra dṛśyate svasthaḥ sarvatra vimalāśayaḥ
samastavāsanā mukto muktaḥ sarvatra rājate // Avg_17.11

sarvatra dṛśyate sva-sthaḥ sarvatra vimalāśayaḥ samasta-vāsanā mukto muktaḥ sarvatra rājate //

paśyan śṛṇvan spṛśan jighrann aśnan gṛhṇan vadanvrajan
īhitānīhitair mukto mukta eva mahāśayaḥ // Avg_17.12

paśyan śṛṇvan spṛśan jighrann aśnan gṛhṇan vadanvrajan īhitānīhitair mukto mukta eva mahāśayaḥ //

na nindati na ca stauti na hṛṣyati na kupyati
na dadāti na gṛhṇāti muktaḥ sarvatra nīrasaḥ // Avg_17.13

na nindati na ca stauti na hṛṣyati na kupyati na dadāti na gṛhṇāti muktaḥ sarvatra nīrasaḥ //

sānurāgāṃ striyaṃ dṛṣṭvā mṛtyuṃ vā samupasthitam
avihvalamanāḥ svastho mukta eva mahāśayaḥ // Avg_17.14

sānurāgāṃ striyaṃ dṛṣṭvā mṛtyuṃ vā samupasthitam avihvala-manāḥ sva-stho mukta eva mahāśayaḥ //

sukhe duḥkhe nare nāryāṃ saṃpatsu ca vipatsu ca
viśeṣo naiva dhīrasya sarvatra samadarśinaḥ // Avg_17.15

sukhe duḥkhe nare nāryāṃ saṃpatsu ca vipatsu ca viśeṣo naiva dhīrasya sarvatra sama-darśinaḥ //

na hiṃsā naiva kāruṇyaṃ nauddhatyaṃ na ca dīnatā
nāścaryaṃ naiva ca kṣobhaḥ kṣīṇasaṃsaraṇe nare // Avg_17.16

na hiṃsā naiva kāruṇyaṃ nauddhatyaṃ na ca dīnatā nāścaryaṃ naiva ca kṣobhaḥ kṣīṇa-saṃsaraṇe nare //

na mukto viṣayadveṣṭā na vā viṣayalolupaḥ
asaṃsaktamanā nityaṃ prāptāprāptam upāśnute // Avg_17.17

na mukto viṣaya-dveṣṭā na vā viṣaya-lolupaḥ asaṃsakta-manā nityaṃ prāptāprāptam upāśnute //

samādhānāsamādhānahitāhitavikalpanāḥ
śūnyacitto na jānāti kaivalyam iva saṃsthitaḥ // Avg_17.18

samādhānāsamādhānahitāhita-vikalpanāḥ śūnya-citto na jānāti kaivalyam iva saṃsthitaḥ //

nirmamo nirahaṃkāro na kiṃcid iti niścitaḥ
antargalitasarvāśaḥ kurvann api karoti na // Avg_17.19

nirmamo nirahaṃkāro na kiṃcid iti niścitaḥ antar-galita-sarvāśaḥ kurvann api karoti na //

manaḥprakāśasammohasvapnajāḍyavivarjitaḥ
daśāṃ kām api saṃprāpto bhaved galitamānasaḥ // Avg_17.20

manaḥ-prakāśa-sammohasvapna-jāḍya-vivarjitaḥ daśāṃ kām api saṃprāpto bhaved galita-mānasaḥ //

yasya bodhodaye tāvat svapnavad bhavati bhramaḥ
tasmai sukhaikarūpāya namaḥ śāntāya tejase // Avg_18.1

yasya bodhodaye tāvat svapnavad bhavati bhramaḥ tasmai sukhaika-rūpāya namaḥ śāntāya tejase //

arjayitvākhilān arthān bhogān āpnoti puṣkalān
na hi sarvaparityāgam antareṇa sukhī bhavet // Avg_18.2

arjayitvākhilān arthān bhogān āpnoti puṣkalān na hi sarva-parityāgam antareṇa sukhī bhavet //

kartavyaduḥkhamārtaṇḍajvālād agdhāntarātmanaḥ
kutaḥ praśamapīyūṣadhārāsāram ṛte sukham // Avg_18.3

kartavya-duḥkha-mārtaṇḍajvālād agdhāntarātmanaḥ kutaḥ praśama-pīyūṣadhārāsāram ṛte sukham //

bhavo 'yaṃ bhāvanāmātro na kiṃcit paramarthataḥ
nāsty abhāvaḥ svabhāvanāṃ bhāvābhāvavibhāvinām // Avg_18.4

bhavo 'yaṃ bhāvanā-mātro na kiṃcit param-arthataḥ nāsty abhāvaḥ sva-bhāvanāṃ bhāvābhāva-vibhāvinām //

na dūraṃ na ca saṅkocāl labdham evātmanaḥ padam
nirvikalpaṃ nirāyāsaṃ nirvikāraṃ nirañjanam // Avg_18.5

na dūraṃ na ca saṅkocāl labdham evātmanaḥ padam nirvikalpaṃ nirāyāsaṃ nirvikāraṃ nirañjanam //

vyāmohamātraviratau svarūpādānamātrataḥ
vītaśokā virājante nirāvaraṇadṛṣṭayaḥ // Avg_18.6

vyāmoha-mātra-viratau svarūpādāna-mātrataḥ vītaśokā virājante nirāvaraṇa-dṛṣṭayaḥ //

samastaṃ kalpanāmātram ātmā muktaḥ sanātanaḥ
iti vijñāya dhīro hi kim abhyasyati bālavat // Avg_18.7

samastaṃ kalpanā-mātram ātmā muktaḥ sanātanaḥ iti vijñāya dhīro hi kim abhyasyati bālavat //

ātmā brahmeti niścitya bhāvābhāvau ca kalpitau
niṣkāmaḥ kiṃ vijānāti kiṃ brūte ca karoti kiṃ // Avg_18.8

ātmā brahmeti niścitya bhāvābhāvau ca kalpitau niṣkāmaḥ kiṃ vijānāti kiṃ brūte ca karoti kiṃ //

ayaṃ so 'ham ayaṃ nāham iti kṣīṇā vikalpanāḥ
sarvam ātmeti niścitya tūṣṇībhūtasya yoginaḥ // Avg_18.9

ayaṃ so 'ham ayaṃ nāham iti kṣīṇā vikalpanāḥ sarvam ātmeti niścitya tūṣṇī-bhūtasya yoginaḥ //

na vikṣepo na caikāgryaṃ nātibodho na mūḍhatā
na sukhaṃ na ca vā duḥkham upaśāntasya yoginaḥ // Avg_18.10

na vikṣepo na caikāgryaṃ nātibodho na mūḍhatā na sukhaṃ na ca vā duḥkham upaśāntasya yoginaḥ //

svārājye bhaikṣavṛttau ca lābhālābhe jane vane
nirvikalpasvabhāvasya na viṣeso 'sti yoginaḥ // Avg_18.11

svārājye bhaikṣa-vṛttau ca lābhālābhe jane vane nirvikalpa-svabhāvasya na viṣeso 'sti yoginaḥ //

kva dharmaḥ kva ca vā kāmaḥ kva cārthaḥ kva vivekitā
idaṃ kṛtam idaṃ neti dvandvair muktasya yoginaḥ // Avg_18.12

kva dharmaḥ kva ca vā kāmaḥ kva cārthaḥ kva vivekitā idaṃ kṛtam idaṃ neti dvandvair muktasya yoginaḥ //

kṛtyaṃ kim api naivāsti na kāpi hṛdi rañjanā
yathājīvanam eveha jīvanmuktasya yoginaḥ // Avg_18.13

kṛtyaṃ kim api naivāsti na kāpi hṛdi rañjanā yathā-jīvanam eveha jīvan-muktasya yoginaḥ //

kva mohaḥ kva ca vā viśvaṃ kva tad dhyānaṃ kva muktatā
sarvasaṅkalpasīmāyāṃ viśrāntasya mahātmanaḥ // Avg_18.14

kva mohaḥ kva ca vā viśvaṃ kva tad dhyānaṃ kva muktatā sarva-saṅkalpa-sīmāyāṃ viśrāntasya mahātmanaḥ //

yena viśvam idaṃ dṛṣṭaṃ sa nāstīti karotu vai
nirvāsanaḥ kiṃ kurute paśyann api na paśyati // Avg_18.15

yena viśvam idaṃ dṛṣṭaṃ sa nāstīti karotu vai nirvāsanaḥ kiṃ kurute paśyann api na paśyati //

yena dṛṣṭaṃ paraṃ brahma so 'haṃ brahmeti cintayet
kiṃ cintayati niścinto dvitīyaṃ yo na paśyati // Avg_18.16

yena dṛṣṭaṃ paraṃ brahma so 'haṃ brahmeti cintayet kiṃ cintayati niścinto dvitīyaṃ yo na paśyati //

dṛṣṭo yenātmavikṣepo nirodhaṃ kurute tv asau
udāras tu na vikṣiptaḥ sādhyābhāvāt karoti kim // Avg_18.17

dṛṣṭo yenātma-vikṣepo nirodhaṃ kurute tv asau udāras tu na vikṣiptaḥ sādhyābhāvāt karoti kim //

dhīro lokaviparyasto varttamāno 'pi lokavat
na samādhiṃ na vikṣepaṃ na lepaṃ svasya paśyati // Avg_18.18

dhīro loka-viparyasto varttamāno 'pi lokavat na samādhiṃ na vikṣepaṃ na lepaṃ svasya paśyati //

bhāvābhāvavihīno yas tṛpto nirvāsano budhaḥ
naiva kiṃcit kṛtaṃ tena lokadṛṣṭyā vikurvatā // Avg_18.19

bhāvābhāva-vihīno yas tṛpto nirvāsano budhaḥ naiva kiṃcit kṛtaṃ tena loka-dṛṣṭyā vikurvatā //

pravṛttau vā nirvṛttau vā naiva dhīrasya durgrahaḥ
yadā yat kartum āyāti tatkṛtvā tiṣṭhataḥ sukham // Avg_18.20

pravṛttau vā nirvṛttau vā naiva dhīrasya durgrahaḥ yadā yat kartum āyāti tatkṛtvā tiṣṭhataḥ sukham //

nirvāsano nirālambaḥ svacchando muktabandhanaḥ
kṣiptaḥ saṃskāravātena ceṣṭate śuṣkaparṇavat // Avg_18.21

nirvāsano nirālambaḥ svacchando mukta-bandhanaḥ kṣiptaḥ saṃskāra-vātena ceṣṭate śuṣka-parṇavat //

asaṃsārasya tu kvāpi na harṣo na viṣāditā
sa śītalamanā nityaṃ videha iva rājate // Avg_18.22

asaṃsārasya tu kvāpi na harṣo na viṣāditā sa śītala-manā nityaṃ videha iva rājate //

kutrāpi na jihāsāsti nāśo vāpi na kutracit
ātmārāmasya dhīrasya śītalācchatarātmanaḥ // Avg_18.23

kutrāpi na jihāsāsti nāśo vāpi na kutracit ātmārāmasya dhīrasya śītalācchatarātmanaḥ //

prakṛtyā śūnyacittasya kurvato 'sya yadṛcchayā
prākṛtasyeva dhīrasya na māno nāvamānatā // Avg_18.24

prakṛtyā śūnya-cittasya kurvato 'sya yad-ṛcchayā prākṛtasyeva dhīrasya na māno nāvamānatā //

kṛtaṃ dehena karmedaṃ na mayā śuddharūpiṇā
iti cintānurodhī yaḥ kurvann api karoti na // Avg_18.25

kṛtaṃ dehena karmedaṃ na mayā śuddha-rūpiṇā iti cintānurodhī yaḥ kurvann api karoti na //

atadvādīva kurute na bhaved api bāliśaḥ
jīvanmuktaḥ sukhī śrīmān saṃsarann api śobhate // Avg_18.26

atad-vādīva kurute na bhaved api bāliśaḥ jīvan-muktaḥ sukhī śrīmān saṃsarann api śobhate //

nānāvicārasuśrānto dhīro viśrāntim āgataḥ
na kalpate na jānāti na śṛṇoti na paśyati // Avg_18.27

nānā-vicāra-suśrānto dhīro viśrāntim āgataḥ na kalpate na jānāti na śṛṇoti na paśyati //

asamādher avikṣepān na mumukṣur na cetaraḥ
niścitya kalpitaṃ paśyan brahmaivāste mahāśayaḥ // Avg_18.28

asamādher avikṣepān na mumukṣur na cetaraḥ niścitya kalpitaṃ paśyan brahmaivāste mahāśayaḥ //

yasyāntaḥ syād ahaṅkāro na karoti karoti saḥ
nirahaṅkāradhīreṇa na kiṃcid akṛtaṃ kṛtam // Avg_18.29

yasyāntaḥ syād ahaṅkāro na karoti karoti saḥ nirahaṅkāra-dhīreṇa na kiṃcid akṛtaṃ kṛtam //

nodvignaṃ na ca santuṣṭam akartṛ spandavarjitam
nirāśaṃ gatasandehaṃ cittaṃ muktasya rājate // Avg_18.30

nodvignaṃ na ca santuṣṭam akartṛ spanda-varjitam nirāśaṃ gata-sandehaṃ cittaṃ muktasya rājate //

nirdhyātuṃ ceṣṭituṃ vāpi yac cittaṃ na pravarttate
nirnimittam idaṃ kin tu nirdhyāyati viceṣṭate // Avg_18.31

nirdhyātuṃ ceṣṭituṃ vāpi yac cittaṃ na pravarttate nirnimittam idaṃ kin tu nirdhyāyati viceṣṭate //

tattvaṃ yathārtham ākarṇya mandaḥ prāpnoti mūḍhatām
atha vāyāti saṅkocam amūḍhaḥ ko 'pi mūḍhavat // Avg_18.32

tattvaṃ yathārtham ākarṇya mandaḥ prāpnoti mūḍhatām atha vāyāti saṅkocam amūḍhaḥ ko 'pi mūḍhavat //

ekāgratā nirodho vā mūḍhair abhyasyate bhṛśam
dhīrāḥ kṛtyaṃ na paśyanti suptavat svapade sthitāḥ // Avg_18.33

ekāgratā nirodho vā mūḍhair abhyasyate bhṛśam dhīrāḥ kṛtyaṃ na paśyanti suptavat sva-pade sthitāḥ //

aprayatnāt prayatnād vā mūḍho nāpnoti nirvṛtim
tattvaniścayamātreṇa prājño bhavati nirvṛtaḥ // Avg_18.34

aprayatnāt prayatnād vā mūḍho nāpnoti nirvṛtim tattva-niścaya-mātreṇa prājño bhavati nirvṛtaḥ //

śuddhaṃ buddhaṃ priyaṃ pūrṇaṃ niṣprapañcaṃ nirāmayam
ātmānaṃ taṃ na jānanti tatrābhyāsaparā janāḥ // Avg_18.35

śuddhaṃ buddhaṃ priyaṃ pūrṇaṃ niṣprapañcaṃ nirāmayam ātmānaṃ taṃ na jānanti tatrābhyāsa-parā janāḥ //

nāpnoti karmaṇā mokṣaṃ vimūḍho 'bhyāsarūpiṇā
dhanyo vijñānamātreṇa muktas tiṣṭhaty avikriyaḥ // Avg_18.36

nāpnoti karmaṇā mokṣaṃ vimūḍho 'bhyāsa-rūpiṇā dhanyo vijñāna-mātreṇa muktas tiṣṭhaty avikriyaḥ //

mūḍho nāpnoti tad brahma yato bhavitum icchati
anicchann api dhīro hi parabrahmasvarūpabhāk // Avg_18.37

mūḍho nāpnoti tad brahma yato bhavitum icchati anicchann api dhīro hi para-brahma-svarūpa-bhāk //

nirādhārā grahavyagrā mūḍhāḥ saṃsārapoṣakāḥ
etasyānarthamūlasya mūlacchedaḥ kṛto budhaiḥ // Avg_18.38

nirādhārā grahavya-grā mūḍhāḥ saṃsāra-poṣakāḥ etasyānartha-mūlasya mūla-cchedaḥ kṛto budhaiḥ //

na śāntiṃ labhate mūḍho yataḥ śamitum icchati
dhīras tattvaṃ viniścitya sarvadā śāntamānasaḥ // Avg_18.39

na śāntiṃ labhate mūḍho yataḥ śamitum icchati dhīras tattvaṃ viniścitya sarvadā śānta-mānasaḥ //

kvātmano darśanaṃ tasya yad dṛṣṭam avalambate
dhīrās taṃ taṃ na paśyanti paśyanty ātmānam avyayam // Avg_18.40

kvātmano darśanaṃ tasya yad dṛṣṭam avalambate dhīrās taṃ taṃ na paśyanti paśyanty ātmānam avyayam //

kva nirodho vimūḍhasya yo nirbandhaṃ karoti vai
svārāmasyaiva dhīrasya sarvadāsāv akṛtrimaḥ // Avg_18.41

kva nirodho vimūḍhasya yo nirbandhaṃ karoti vai svārāmasyaiva dhīrasya sarvadāsāv akṛtrimaḥ //

bhāvasya bhāvakaḥ kaścin na kiṃcid bhāvako 'paraḥ
ubhayābhāvakaḥ kaścid evam eva nirākulaḥ // Avg_18.42

bhāvasya bhāvakaḥ kaścin na kiṃcid bhāvako 'paraḥ ubhayābhāvakaḥ kaścid evam eva nirākulaḥ //

śuddham advayam ātmānaṃ bhāvayanti kubuddhayaḥ
na tu jānanti saṃmohād yāvajjīvam anirvṛtāḥ // Avg_18.43

śuddham advayam ātmānaṃ bhāvayanti ku-buddhayaḥ na tu jānanti saṃmohād yāvaj-jīvam anirvṛtāḥ //

mumukṣor buddhir ālambam antareṇa na vidyate
nirālambaiva niṣkāmā buddhir muktasya sarvadā // Avg_18.44

mumukṣor buddhir ālambam antareṇa na vidyate nirālambaiva niṣkāmā buddhir muktasya sarvadā //

viṣayadvīpino vīkṣya cakitāḥ śaraṇārthinaḥ
viśanti jhaṭiti kroḍaṃ nirodhaikāgryasiddhaye // Avg_18.45

viṣaya-dvīpino vīkṣya cakitāḥ śaraṇārthinaḥ viśanti jhaṭiti kroḍaṃ nirodhaikāgrya-siddhaye //

nirvāsanaṃ hariṃ dṛṣṭvā tūṣṇīṃ viṣayadantinaḥ
palāyante na śaktās te sevante kṛtacāṭavaḥ // Avg_18.46

nirvāsanaṃ hariṃ dṛṣṭvā tūṣṇīṃ viṣaya-dantinaḥ palāyante na śaktās te sevante kṛta-cāṭavaḥ //

na muktikārikāṃ dhatte niḥśaṅko yuktamānasaḥ
paśyañ chṛṇvan spṛśañ jighrann aśnann āste yathāsukham // Avg_18.47

na mukti-kārikāṃ dhatte niḥśaṅko yukta-mānasaḥ paśyañ chṛṇvan spṛśañ jighrann aśnann āste yathā-sukham //

vastuśravaṇamātreṇa śuddhabuddhir nirākulaḥ
naivācāramanācāram audāsyaṃ vā prapaśyati // Avg_18.48

vastu-śravaṇa-mātreṇa śuddha-buddhir nirākulaḥ naivācāram-anācāram audāsyaṃ vā prapaśyati //

yadā yat kartum āyāti tadā tatkurute ṛjuḥ
śubhaṃ vāpy aśubhaṃ vāpi tasya ceṣṭā hi bālavat // Avg_18.49

yadā yat kartum āyāti tadā tat-kurute ṛjuḥ śubhaṃ vāpy aśubhaṃ vāpi tasya ceṣṭā hi bālavat //

svātantryāt sukham āpnoti svātantryāl labhate param
svātantryān nirvṛtiṃ gacchet svātantryāt paramaṃ padam // Avg_18.50

svā-tantryāt sukham āpnoti svā-tantryāl labhate param svā-tantryān nirvṛtiṃ gacchet svā-tantryāt paramaṃ padam //

akartṛtvam abhoktṛtvaṃ svātmano manyate yadā
tadā kṣīṇā bhavanty eva samastāś cittavṛttayaḥ // Avg_18.51

akartṛtvam abhoktṛtvaṃ svātmano manyate yadā tadā kṣīṇā bhavanty eva samastāś citta-vṛttayaḥ //

ucchṛṅkhalāpy akṛtikā sthitir dhīrasya rājate
na tu saspṛhacittasya śāntir mūḍhasya kṛtrimā // Avg_18.52

ucchṛṅkhalāpy akṛtikā sthitir dhīrasya rājate na tu saspṛha-cittasya śāntir mūḍhasya kṛtrimā //

vilasanti mahābhogair viśanti girigahvarān
nirastakalpanā dhīrā abaddhā muktabuddhayaḥ // Avg_18.53

vilasanti mahābhogair viśanti giri-gahvarān nirasta-kalpanā dhīrā abaddhā mukta-buddhayaḥ //

śrotriyaṃ devatāṃ tīrtham aṅganāṃ bhūpatiṃ priyam
dṛṣṭvā sampūjya dhīrasya na kāpi hṛdi vāsanā // Avg_18.54

śrotriyaṃ devatāṃ tīrtham aṅganāṃ bhūpatiṃ priyam dṛṣṭvā sampūjya dhīrasya na kāpi hṛdi vāsanā //

bhṛtyaiḥ putraiḥ kalatraiś ca dauhitraiś cāpi gotrajaiḥ
vihasya dhikkṛto yogī na yāti vikṛtiṃ manāk // Avg_18.55

bhṛtyaiḥ putraiḥ kalatraiś ca dauhitraiś cāpi gotrajaiḥ vihasya dhik-kṛto yogī na yāti vikṛtiṃ manāk //

santuṣṭo 'pi na santuṣṭaḥ khinno 'pi na ca khidyate
tasyāścaryadaśāṃ tāṃ tāṃ tādṛśā eva jānate // Avg_18.56

santuṣṭo 'pi na santuṣṭaḥ khinno 'pi na ca khidyate tasyāścarya-daśāṃ tāṃ tāṃ tādṛśā eva jānate //

kartavyataiva saṃsāro na tāṃ paśyanti sūrayaḥ
śūnyākārā nirākārā nirvikārā nirāmayāḥ // Avg_18.57

kartavyataiva saṃsāro na tāṃ paśyanti sūrayaḥ śūnyākārā nirākārā nirvikārā nirāmayāḥ //

akurvann api saṃkṣobhād vyagraḥ sarvatra mūḍhadhīḥ
kurvann api tu kṛtyāni kuśalo hi nirākulaḥ // Avg_18.58

akurvann api saṃkṣobhād vyagraḥ sarvatra mūḍhadhīḥ kurvann api tu kṛtyāni kuśalo hi nirākulaḥ //

sukham āste sukhaṃ śete sukham āyāti yāti ca
sukhaṃ vakti sukhaṃ bhuṅkte vyavahāre 'pi śāntadhīḥ // Avg_18.59

sukham āste sukhaṃ śete sukham āyāti yāti ca sukhaṃ vakti sukhaṃ bhuṅkte vyavahāre 'pi śāntadhīḥ //

svabhāvād yasya naivārtir lokavad vyavahāriṇaḥ
mahāhrada ivākṣobhyo gatakleśaḥ suśobhate // Avg_18.60

svabhāvād yasya naivārtir lokavad vyavahāriṇaḥ mahā-hrada ivākṣobhyo gata-kleśaḥ suśobhate //

nivṛttir api mūḍhasya pravṛttir upajāyate
pravṛttir api dhīrasya nivṛttiphalabhāginī // Avg_18.61

nivṛttir api mūḍhasya pravṛttir upajāyate pravṛttir api dhīrasya nivṛtti-phalabhāginī //

parigraheṣu vairāgyaṃ prāyo mūḍhasya dṛśyate
dehe vigalitāśasya kva rāgaḥ kva virāgatā // Avg_18.62

parigraheṣu vairāgyaṃ prāyo mūḍhasya dṛśyate dehe vigalitāśasya kva rāgaḥ kva virāgatā //

bhāvanābhāvanāsaktā dṛṣṭir mūḍhasya sarvadā
bhāvyabhāvanayā sā tu svasthasyādṛṣṭirūpiṇī // Avg_18.63

bhāvanābhāvanā-saktā dṛṣṭir mūḍhasya sarvadā bhāvya-bhāvanayā sā tu svasthasyādṛṣṭi-rūpiṇī //

sarvārambheṣu niṣkāmo yaś cared bālavan muniḥ
na lepas tasya śuddhasya kriyamāṇe 'pi karmaṇi // Avg_18.64

sarvārambheṣu niṣkāmo yaś cared bālavan muniḥ na lepas tasya śuddhasya kriyamāṇe 'pi karmaṇi //

sa eva dhanya ātmajñaḥ sarvabhāveṣu yaḥ samaḥ
paśyan śṛṇvan spṛśan jighrann aśnan nistarṣamānasaḥ // Avg_18.65

sa eva dhanya ātma-jñaḥ sarva-bhāveṣu yaḥ samaḥ paśyan śṛṇvan spṛśan jighrann aśnan nistarṣa-mānasaḥ //

kva saṃsāraḥ kva cābhāsaḥ kva sādhyaṃ kva ca sādhanam
ākāśasyeva dhīrasya nirvikalpasya sarvadā // Avg_18.66

kva saṃsāraḥ kva cābhāsaḥ kva sādhyaṃ kva ca sādhanam ākāśasyeva dhīrasya nirvikalpasya sarvadā //

sa jayaty arthasaṃnyāsī pūrṇasvarasavigrahaḥ
akṛtrimo 'navacchinne samādhir yasya vartate // Avg_18.67

sa jayaty artha-saṃnyāsī pūrṇa-svarasa-vigrahaḥ akṛtrimo 'navacchinne samādhir yasya vartate //

bahunātra kim uktena jñātatattvo mahāśayaḥ
bhogamokṣanirākāṅkṣī sadā sarvatra nīrasaḥ // Avg_18.68

bahunātra kim uktena jñāta-tattvo mahāśayaḥ bhoga-mokṣa-nirākāṅkṣī sadā sarvatra nīrasaḥ //

mahadādi jagaddvaitaṃ nāmamātravijṛmbhitam
vihāya śuddhabodhasya kiṃ kṛtyam avaśiṣyate // Avg_18.69

mahad-ādi jagad-dvaitaṃ nāma-mātra-vijṛmbhitam vihāya śuddha-bodhasya kiṃ kṛtyam avaśiṣyate //

bhramabhūtam idaṃ sarvaṃ kiṃcin nāstīti niścayī
alakṣyasphuraṇaḥ śuddhaḥ svabhāvenaiva śāmyati // Avg_18.70

bhrama-bhūtam idaṃ sarvaṃ kiṃcin nāstīti niścayī alakṣya-sphuraṇaḥ śuddhaḥ svabhāvenaiva śāmyati //

śuddhasphuraṇarūpasya dṛśyabhāvam apaśyataḥ
kva vidhiḥ kva ca vairāgyaṃ kva tyāgaḥ kva śamo 'pi vā // Avg_18.71

śuddha-sphuraṇa-rūpasya dṛśya-bhāvam apaśyataḥ kva vidhiḥ kva ca vairāgyaṃ kva tyāgaḥ kva śamo 'pi vā //

sphurato 'nantarūpeṇa prakṛtiṃ ca na paśyataḥ
kva bandhaḥ kva ca vā mokṣaḥ kva harṣaḥ kva viṣāditā // Avg_18.72

sphurato 'nanta-rūpeṇa prakṛtiṃ ca na paśyataḥ kva bandhaḥ kva ca vā mokṣaḥ kva harṣaḥ kva viṣāditā //

buddhiparyantasaṃsāre māyāmātraṃ vivartate
nirmamo nirahaṅkāro niṣkāmaḥ śobhate budhaḥ // Avg_18.73

buddhi-paryanta-saṃsāre māyā-mātraṃ vivartate nirmamo nirahaṅkāro niṣkāmaḥ śobhate budhaḥ //

akṣayaṃ gatasantāpam ātmānaṃ paśyato muneḥ
kva vidyā ca kva vā viśvaṃ kva deho 'haṃ mameti vā // Avg_18.74

akṣayaṃ gata-santāpam ātmānaṃ paśyato muneḥ kva vidyā ca kva vā viśvaṃ kva deho 'haṃ mameti vā //

nirodhādīni karmāṇi jahāti jaḍadhīr yadi
manorathān pralāpāṃś ca kartum āpnoty atatkṣaṇāt // Avg_18.75

nirodhādīni karmāṇi jahāti jaḍadhīr yadi mano-rathān pralāpāṃś ca kartum āpnoty atatkṣaṇāt //

mandaḥ śrutvāpi tadvastu na jahāti vimūḍhatām
nirvikalpo bahiryatnād antarviṣayalālasaḥ // Avg_18.76

mandaḥ śrutvāpi tad-vastu na jahāti vimūḍhatām nirvikalpo bahir-yatnād antar-viṣaya-lālasaḥ //

jñānād galitakarmā yo lokadṛṣṭyāpi karmakṛt
nāpnoty avasaraṃ kartuṃ vaktum eva na kiṃcana // Avg_18.77

jñānād galita-karmā yo loka-dṛṣṭyāpi karma-kṛt nāpnoty avasaraṃ kartuṃ vaktum eva na kiṃcana //

kva tamaḥ kva prakāśo vā hānaṃ kva ca na kiṃcana
nirvikārasya dhīrasya nirātaṅkasya sarvadā // Avg_18.78

kva tamaḥ kva prakāśo vā hānaṃ kva ca na kiṃcana nirvikārasya dhīrasya nirātaṅkasya sarvadā //

kva dhairyaṃ kva vivekitvaṃ kva nirātaṅkatāpi vā
anirvācyasvabhāvasya niḥsvabhāvasya yoginaḥ // Avg_18.79

kva dhairyaṃ kva vivekitvaṃ kva nirātaṅkatāpi vā anirvācya-svabhāvasya niḥsvabhāvasya yoginaḥ //

na svargo naiva narako jīvanmuktir na caiva hi
bahunātra kim uktena yogadṛṣṭyā na kiṃcana // Avg_18.80

na svargo naiva narako jīvan-muktir na caiva hi bahunātra kim uktena yoga-dṛṣṭyā na kiṃcana //

naiva prārthayate lābhaṃ nālābhenānuśocati
dhīrasya śītalaṃ cittam amṛtenaiva pūritam // Avg_18.81

naiva prārthayate lābhaṃ nālābhenānuśocati dhīrasya śītalaṃ cittam amṛtenaiva pūritam //

na śāntaṃ stauti niṣkāmo na duṣṭam api nindati
samaduḥkhasukhas tṛptaḥ kiṃcit kṛtyaṃ na paśyati // Avg_18.82

na śāntaṃ stauti niṣkāmo na duṣṭam api nindati sama-duḥkha-sukhas tṛptaḥ kiṃcit kṛtyaṃ na paśyati //

dhīro na dveṣṭi saṃsāram ātmānaṃ na didṛkṣati
harṣāmarṣavinirmukto na mṛto na ca jīvati // Avg_18.83

dhīro na dveṣṭi saṃsāram ātmānaṃ na didṛkṣati harṣāmarṣa-vinirmukto na mṛto na ca jīvati //

niḥsnehaḥ putradārādau niṣkāmo viṣayeṣu ca
niścintaḥ svaśarīre 'pi nirāśaḥ śobhate budhaḥ // Avg_18.84

niḥsnehaḥ putra-dārādau niṣkāmo viṣayeṣu ca niścintaḥ svaśarīre 'pi nirāśaḥ śobhate budhaḥ //

tuṣṭiḥ sarvatra dhīrasya yathāpatitavartinaḥ
svacchandaṃ carato deśān yatrāstamitaśāyinaḥ // Avg_18.85

tuṣṭiḥ sarvatra dhīrasya yathā-patita-vartinaḥ svacchandaṃ carato deśān yatrāstamita-śāyinaḥ //

patatūdetu vā deho nāsya cintā mahātmanaḥ
svabhāvabhūmiviśrāntivismṛtāśeṣasaṃsṛteḥ // Avg_18.86

patatūdetu vā deho nāsya cintā mahātmanaḥ svabhāva-bhūmi-viśrāntivismṛtāśeṣa-saṃsṛteḥ //

akiṃcanaḥ kāmacāro nirdvandvaś chinnasaṃśayaḥ
asaktaḥ sarvabhāveṣu kevalo ramate budhaḥ // Avg_18.87

akiṃcanaḥ kāma-cāro nirdvandvaś chinna-saṃśayaḥ asaktaḥ sarva-bhāveṣu kevalo ramate budhaḥ //

nirmamaḥ śobhate dhīraḥ samaloṣṭāśmakāñcanaḥ
subhinnahṛdayagranthir vinirdhūtarajastamaḥ // Avg_18.88

nirmamaḥ śobhate dhīraḥ sama-loṣṭāśma-kāñcanaḥ subhinna-hṛdaya-granthir vinirdhūta-rajas-tamaḥ //

sarvatrānavadhānasya na kiṃcid vāsanā hṛdi
muktātmano vitṛptasya tulanā kena jāyate // Avg_18.89

sarvatrānavadhānasya na kiṃcid vāsanā hṛdi muktātmano vitṛptasya tulanā kena jāyate //

jānann api na jānāti paśyann api na paśyati
bruvann api na ca brūte ko 'nyo nirvāsanād ṛte // Avg_18.90

jānann api na jānāti paśyann api na paśyati bruvann api na ca brūte ko 'nyo nirvāsanād ṛte //

bhikṣur vā bhūpatir vāpi yo niṣkāmaḥ sa śobhate
bhāveṣu galitā yasya śobhanāśobhanā matiḥ // Avg_18.91

bhikṣur vā bhūpatir vāpi yo niṣkāmaḥ sa śobhate bhāveṣu galitā yasya śobhanāśobhanā matiḥ //

kva svācchandyaṃ kva saṅkocaḥ kva vā tattvaviniścayaḥ
nirvyājārjavabhūtasya caritārthasya yoginaḥ // Avg_18.92

kva svācchandyaṃ kva saṅkocaḥ kva vā tattva-viniścayaḥ nirvyājārjava-bhūtasya caritārthasya yoginaḥ //

ātmaviśrāntitṛptena nirāśena gatārtinā
antar yad anubhūyeta tat kathaṃ kasya kathyate // Avg_18.93

ātma-viśrānti-tṛptena nirāśena gatārtinā antar yad anubhūyeta tat kathaṃ kasya kathyate //

supto 'pi na suṣuptau ca svapne 'pi śayito na ca
jāgare 'pi na jāgarti dhīras tṛptaḥ pade pade // Avg_18.94

supto 'pi na suṣuptau ca svapne 'pi śayito na ca jāgare 'pi na jāgarti dhīras tṛptaḥ pade pade //

jñaḥ sacinto 'pi niścintaḥ sendriyo 'pi nirindriyaḥ
sabuddhir api nirbuddhiḥ sāhaṅkāro 'nahaṃkṛtiḥ // Avg_18.95

jñaḥ sacinto 'pi niścintaḥ sendriyo 'pi nirindriyaḥ sabuddhir api nirbuddhiḥ sāhaṅkāro 'nahaṃkṛtiḥ //

na sukhī na ca vā duḥkhī na virakto na saṅgavān
na mumukṣur na vā mukto na kiṃcin na ca kiṃcana // Avg_18.96

na sukhī na ca vā duḥkhī na virakto na saṅgavān na mumukṣur na vā mukto na kiṃcin na ca kiṃcana //

vikṣepe 'pi na vikṣiptaḥ samādhau na samādhimān
jāḍye 'pi na jaḍo dhanyaḥ pāṇḍitye 'pi na paṇḍitaḥ // Avg_18.97

vikṣepe 'pi na vikṣiptaḥ samādhau na samādhimān jāḍye 'pi na jaḍo dhanyaḥ pāṇḍitye 'pi na paṇḍitaḥ //

mukto yathāsthitisvasthaḥ kṛtakartavyanirvṛtaḥ
samaḥ sarvatra vaitṛṣṇyān na smaraty akṛtaṃ kṛtam // Avg_18.98

mukto yathā-sthiti-svasthaḥ kṛta-kartavya-nirvṛtaḥ samaḥ sarvatra vaitṛṣṇyān na smaraty akṛtaṃ kṛtam //

na prīyate vandyamāno nindyamāno na kupyati
naivodvijati maraṇe jīvane nābhinandati // Avg_18.99

na prīyate vandyamāno nindyamāno na kupyati naivodvijati maraṇe jīvane nābhinandati //

na dhāvati janākīrṇaṃ nāraṇyam upaśāntadhīḥ
yathātathā yatratatra sama evāvatiṣṭhate // Avg_18.100

na dhāvati janākīrṇaṃ nāraṇyam upaśānta-dhīḥ yathā-tathā yatra-tatra sama evāvatiṣṭhate //

tattvavijñānasandaṃśam ādāya hṛdayodarāt
nānāvidhaparāmarśaśalyoddhāraḥ kṛto mayā // Avg_19.1

tattva-vijñāna-sandaṃśam ādāya hṛdayodarāt nānā-vidha-parāmarśaśalyoddhāraḥ kṛto mayā //

kva dharmaḥ kva ca vā kāmaḥ kva cārthaḥ kva vivekitā
kva dvaitaṃ kva ca vādvaitaṃ svamahimni sthitasya me // Avg_19.2

kva dharmaḥ kva ca vā kāmaḥ kva cārthaḥ kva vivekitā kva dvaitaṃ kva ca vādvaitaṃ svamahimni sthitasya me //

kva bhūtaṃ kva bhaviṣyad vā vartamānam api kva vā
kva deśaḥ kva ca vā nityaṃ svamahimni sthitasya me // Avg_19.3

kva bhūtaṃ kva bhaviṣyad vā vartamānam api kva vā kva deśaḥ kva ca vā nityaṃ svamahimni sthitasya me //

kva cātmā kva ca vānātmā kva śubhaṃ kvāsubhaṃ yathā
kva cintā kva ca vācintā svamahimni sthitasya me // Avg_19.4

kva cātmā kva ca vānātmā kva śubhaṃ kvāsubhaṃ yathā kva cintā kva ca vācintā svamahimni sthitasya me //

kva svapnaḥ kva suṣuptir vā kva ca jāgaraṇaṃ tathā
kva turiyaṃ bhayaṃ vāpi svamahimni sthitasya me // Avg_19.5

kva svapnaḥ kva suṣuptir vā kva ca jāgaraṇaṃ tathā kva turiyaṃ bhayaṃ vāpi svamahimni sthitasya me //

kva dūraṃ kva samīpaṃ vā bahyaṃ kvābhyantaraṃ kva vā
kva sthūlaṃ kva ca vā sūkṣmaṃ svamahimni sthitasya me // Avg_19.6

kva dūraṃ kva samīpaṃ vā bahyaṃ kvābhyantaraṃ kva vā kva sthūlaṃ kva ca vā sūkṣmaṃ svamahimni sthitasya me //

kva mṛtyurjīvitaṃ vā kva lokāḥ kvāsya kva laukikam
kva layaḥ kva samādhir vā svamahimni sthitasya me // Avg_19.7

kva mṛtyur-jīvitaṃ vā kva lokāḥ kvāsya kva laukikam kva layaḥ kva samādhir vā svamahimni sthitasya me //

alaṃ trivargakathayā yogasya kathayāpy alam
alaṃ vijñānakathayā viśrāntasya mamātmani // Avg_19.8

alaṃ tri-varga-kathayā yogasya kathayāpy alam alaṃ vijñāna-kathayā viśrāntasya mamātmani //

kva bhūtāni kva deho vā kvendriyāṇi kva vā manaḥ
kva śūnyaṃ kva ca nairāśyaṃ matsvarūpe nirañjane // Avg_20.1

kva bhūtāni kva deho vā kvendriyāṇi kva vā manaḥ kva śūnyaṃ kva ca nairāśyaṃ mat-svarūpe nirañjane //

kva śāstraṃ kvātmavijñānaṃ kva vā nirviṣayaṃ manaḥ
kva tṛptiḥ kva vitṛṣṇatvaṃ gatadvandvasya me sadā // Avg_20.2

kva śāstraṃ kvātma-vijñānaṃ kva vā nirviṣayaṃ manaḥ kva tṛptiḥ kva vitṛṣṇatvaṃ gata-dvandvasya me sadā //

kva vidyā kva ca vāvidyā kvāhaṃ kvedaṃ mama kva vā
kva bandhaḥ kva ca vā mokṣaḥ svarūpasya kva rūpitā // Avg_20.3

kva vidyā kva ca vāvidyā kvāhaṃ kvedaṃ mama kva vā kva bandhaḥ kva ca vā mokṣaḥ svarūpasya kva rūpitā //

kva prārabdhāni karmāṇi jīvanmuktir api kva vā
kva tad videhakaivalyaṃ nirviśeṣasya sarvadā // Avg_20.4

kva prārabdhāni karmāṇi jīvan-muktir api kva vā kva tad videha-kaivalyaṃ nirviśeṣasya sarvadā //

kva kartā kva ca vā bhoktā niṣkriyaṃ sphuraṇaṃ kva vā
kvāparokṣaṃ phalaṃ vā kva niḥsvabhāvasya me sadā // Avg_20.5

kva kartā kva ca vā bhoktā niṣkriyaṃ sphuraṇaṃ kva vā kvāparokṣaṃ phalaṃ vā kva niḥsvabhāvasya me sadā //

kva lokaḥ kva mumukṣur vā kva yogī jñānavān kva vā
kva baddhaḥ kva ca vā muktaḥ svasvarūpe 'ham advaye // Avg_20.6

kva lokaḥ kva mumukṣur vā kva yogī jñānavān kva vā kva baddhaḥ kva ca vā muktaḥ sva-svarūpe 'ham advaye //

kva sṛṣṭiḥ kva ca saṃhāraḥ kva sādhyaṃ kva ca sādhanam
kva sādhakaḥ kva siddhir vā svasvarūpe 'ham advaye // Avg_20.7

kva sṛṣṭiḥ kva ca saṃhāraḥ kva sādhyaṃ kva ca sādhanam kva sādhakaḥ kva siddhir vā svasvarūpe 'ham advaye //

kva pramātā pramāṇaṃ vā kva prameyaṃ kva ca pramā
kva kiṃcit kva na kiṃcid vā sarvadā vimalasya me // Avg_20.8

kva pramātā pramāṇaṃ vā kva prameyaṃ kva ca pramā kva kiṃcit kva na kiṃcid vā sarvadā vimalasya me //

kva vikṣepaḥ kva caikagryaṃ kva nirbodhaḥ kva mūḍhatā
kva harṣaḥ kva viṣādo vā sarvadā niṣkriyasya me // Avg_20.9

kva vikṣepaḥ kva caikagryaṃ kva nirbodhaḥ kva mūḍhatā kva harṣaḥ kva viṣādo vā sarvadā niṣkriyasya me //

kva caiṣa vyavahāro vā kva ca sā paramārthatā
kva sukhaṃ kva ca vā dukhaṃ nirvimarśasya me sadā // Avg_20.10

kva caiṣa vyavahāro vā kva ca sā paramārthatā kva sukhaṃ kva ca vā dukhaṃ nirvimarśasya me sadā //

kva māyā kva ca saṃsāraḥ kva prītir viratiḥ kva vā
kva jīvaḥ kva ca tadbrahma sarvadā vimalasya me // Avg_20.11

kva māyā kva ca saṃsāraḥ kva prītir viratiḥ kva vā kva jīvaḥ kva ca tad-brahma sarvadā vimalasya me //

kva pravṛttir nirvṛttir vā kva muktiḥ kva ca bandhanam
kūṭasthanirvibhāgasya svasthasya mama sarvadā // Avg_20.12

kva pravṛttir nirvṛttir vā kva muktiḥ kva ca bandhanam kūṭastha-nirvibhāgasya svasthasya mama sarvadā //

kvopadeśaḥ kva vā śāstraṃ kva śiṣyaḥ kva ca vā guruḥ
kva cāsti puruṣārtho vā nirupādheḥ śivasya me // Avg_20.13

kvopadeśaḥ kva vā śāstraṃ kva śiṣyaḥ kva ca vā guruḥ kva cāsti puruṣārtho vā nirupādheḥ śivasya me //

kva cāsti kva ca vā nāsti kvāsti caikaṃ kva ca dvayam
bahunātra kim uktena kiṃcin nottiṣṭhate mama // Avg_20.14

kva cāsti kva ca vā nāsti kvāsti caikaṃ kva ca dvayam bahunātra kim uktena kiṃcin nottiṣṭhate mama //