Haribhadrasūri: Nyāyapraveśapravṛtti

Haribhadrasūrikṛtā Nyāyapraveśapravṛttiḥ /

śrīsarvajñāya namaḥ //

samyagjñānasya vaktāraṃ praṇipatya jineśvaram /
nyāyapraveśakavyākhyāṃ sphuṭārthāṃ racayāmyaham //

racitāmapi satprajñairvistareṇa samāsataḥ /
asatprajño 'pi saṃkṣiptaruciḥ sattvānukampayā //

tatra ca-
sādhanaṃ dūṣaṇaṃ caiva sābhāsaṃ parasaṃvide /
pratyakṣamanumānaṃ ca sābhāsaṃ tvātmasaṃvide //

ityādāveva ślokaḥ / āhāsya kimādāvupanyāsa iti / ucyate / iha prekṣāpūrvakāriṇaḥ prayojanādiśūnye na kvacitpravartanta ityato 'dhikṛtaśāstrasya prayojanādipradarśanena prekṣāvatāṃ pravṛttyarthamiti / śāstrārthakathanakālopasthitaparasaṃbhāvyamānānupanyāsahetunirākaraṇārthaṃ ca nyāyapraveśakākhyaṃ śāstramārabhyate ityukte saṃbhavatyevaṃvādī paraḥ- nārabdhavyamidaṃ prayojanarahitatvāt unmattakavākyavat / tathā nirabhidheyatvāt kākadantaparīkṣāvat / tathā asaṃbaddhatvāt daśa dāḍimāni ṣaḍapūpāḥ kuṇḍamajājinaṃ palalapiṇḍaṃ sara kīṭiketyādivākyavat / tadamīṣāṃ hetūnāmasiddhatodbhāvayiṣayā prayojanādipratipādanārthamādau ślokopanyāsa / ayaṃ cābhidheyaprayojane eva darśayati sākṣāt saṃbandhaṃ tu sāmarthyena / yathā caitadevaṃ tathā sukhapratipattyarthamevameva leśato vyākhyāya darśayiṣyāmaḥ // vyākhyā ca padavākyasaṃgateti / uktaṃ ca-

śāsraprakaraṇādīnāṃ yathārthāvagamaḥ kutaḥ /
vyākhyāṃ vihāya tattvajñaiḥ sā coktā padavākyayoḥ //

tatrāpi padasamudāyātmakatvādvākyasyādau padārthagamanikā nyāyyā /

sā ca padavibhāgapūrvetyataḥ padavibhāgaḥ /

sādhanam dūṣaṇam ca eva sābhāsam parasaṃvide pratyakṣam anumānam ca sābhāsam tu ātmasaṃvide iti padāni //

adhunā padārtha ucyate / sādhyate aneneti siddhirvā sādhayatīti vā sādhanam / tacca pakṣādivacanajātam / vakṣyati ca / pakṣādivacanāni sādhanam / viṣayaścāsya dharmaviśiṣṭo dharmī /

tathā dūṣyate 'nena dūṣayatīti vā dūṣaṇam /

tacca sādhanadoṣodbhāvanaṃ vacanajātameva /

vakṣyati ca sādhanadoṣodbhāvanāni dūṣaṇāni / viṣayaścāsya sādhanābhāsaḥ na samyaksādhanam / tasya duṣayitumaśakyatvāt /

nanu vakṣyati sādhanadoṣodbhāvanāni dūṣaṇānīti tadetatkatham / ucyate /

sādhanābhāsa eva kiṃcitsāmyena sādhanopacārādadoṣaḥ ityetacca tatraiva nirloṭhayiṣyāmaḥ / caśabdaḥ samuccaye / evakāro 'vadhāraṇe / sa cānyayogavyavacchedārtha ityetaddarśayiṣyāmaḥ / tathā ābhāsanamābhāsaḥ / saha ābhāsena vartate sābhāsam / sābhāsaśabdaḥ pratyekamabhisaṃbadhyate /

sādhanaṃ sābhāsaṃ dūṣaṇaṃ sābhāsam / tatra sādhanābhāsaṃ pakṣābhāsādi / vakṣyati ca / sādhayitumiṣṭo 'pi pratyakṣādiviruddhaḥ pakṣābhāsa ityādi / dūṣaṇābhāsaṃ cābhūtasādhanadoṣodbhāvanāni /

vakṣyati ca abhūtasādhanadoṣodbhāvanāni dūṣaṇābhāsānīti // parasaṃvide ityatra pare prāśnikāḥ saṃvedanaṃ saṃvid avabodha ityarthaḥ / pareṣāṃ saṃvit parasaṃvit tasyai parasaṃvide parāvabodhāya / iyaṃ tādarthye caturthī / yathā yūpāya dāruḥ / iti padārthaḥ // vākyarthastvayam / sādhanadūṣaṇe eva sābhāse parasaṃvide parāvabodhāya na pratyakṣānumāne /

parasaṃvitphalatvāttayoḥ / yathā pārtha eva dhanurdharaḥ pārthe dhanurdhārayati sati ko 'nyo dhanurdhārayati iti // pratyakṣam ityatra akṣamindriyaṃ tataśca pratigatamakṣaṃ pratyakṣaṃ kāryatvenendriyaṃ prati gatamityarthaḥ / idaṃ ca vakṣyati pratyakṣaṃ kalpanāpoḍham ityādi / tathā mīyate aneneti mānaṃ paricchedyata ityarthaḥ / anuśabdaḥ paścādarthe / paścānmānaṃ anumānam /

pakṣadharmagrahaṇasaṃbandhasmaraṇapūrvakamityarthaḥ / vakṣyati ca trirūpālliṅgālliṅgini jñānamanumānam / caśabdaḥ pūrvavat / sābhāsam ityādi / vakṣyati ca kalpanājñānamarthāntare pratyakṣābhāsam ityādi / tathā hetvābhāsapūrvakaṃ jñānamanumānābhāsam ityādi ca / tu śabdastvevakārārthaḥ / sa cāvadhāraṇa iti darśayiṣyāmaḥ // ātmasaṃvide iti / atatītyātmā jīvaḥ / saṃvedanaṃ saṃvit / ātmanaḥ saṃvit ātmasaṃvit / tasyai ātmasaṃvide ātmāvabodhāya / ātmā ceha cittacaittasaṃtānarūpaḥ parigṛhyate na tu paraparikalpito nittyatvādidharmā /

tatpratipādakapramāṇābhāvāt / iti padārthaḥ // vākyārthastvayam / pratyakṣānumāne eva sābhāse ātmasaṃvide ātmāvabodhāya na sādhanadūṣaṇe ātmasaṃvitphalatvāt tayoḥ / āha nanu sādhanamapi vastuto 'numānameva tataścānumānamityādyukte sādhanābhidhānaṃ na yujyate asminvā prāgukte anumānābhidhānamiti / naiṣa doṣaḥ / svārthaparārthabhedanābhidhānāt / tatra sādhanaṃ parārthamanumānamidaṃ punaḥ svārtham / aparastvāha / ādau sādhanadūṣaṇābhidhānamayuktaṃ pratyakṣānumānapuraḥsarattvāttatprayogasya / ucyate / satyapi tatpuraḥsaratve śāstrārambhasya parasaṃvitpradhānatvātsādhanadūṣaṇayorapi tatphalatvātpratyāsatterādāvupanyāsaḥ / parārthanibandhanaḥ svārtha iti nyāyapradarśanārthamanye //

kṛtaṃ prasaṅgena / prakṛtaṃ prastumaḥ // iha ca sādhanādayo 'ṣṭau padārthāḥ abhidheyatayā uktāḥ / parasaṃvittyātmasaṃvittyoratra prayojanatvena saṃbandhaśca sāmarthyagamya eva / sa ca kāryakāraṇalakṣaṇaḥ / kāraṇaṃ vacanarūpāpannaprakaraṇameva / kāryaṃ tu prakaraṇārthaparijñānam / tathāhīdamasya kāryamiti saṃbandhalakṣaṇā ṣaṣṭhī / āha- yadyevaṃ parasaṃvittyātmasaṃvittyoḥ prakaraṇārthaparijñānena vyavahitatvādaprayojanatvamiti / na / vyavahitasyaiva vivakṣitatvāt / kimarthaṃ vyavahitameva vivakṣitamiti / ucyate / uttarottaraprayojanānāṃ prādhānyakhyāpanārtham / tathā cehānuttaraprayojanaṃ paramagatiprāptireva / tathā coktam /

samyaṅnyāyaparijñānāddheyopādeyavedinaḥ /
upādeyamupādāya gacchanti paramāṃ gatim //

āha- yadyevamihānuttaramevedaṃ kasmānnopanyastamiti / ucyate / avyutpannaṃ vineyagaṇamadhikṛtya tatprathamatayaiva tasyāprayojakatvāt // aparastvāha / idamiha śrotaṇāṃ prayojanamuktaṃ kartustarhi kiṃ prayojanamiti vācyam / ucyate / tasyāpyanantaraparabhedabhinnamidameva / anantaraṃ tāvatsattvānugrahaḥ / paraṃparaṃ tu paramagatiprāptireva / tathā coktam /

samyaṅnyāyopadeśena yaḥ sattvānāmanugraham /
karoti nyāyabāhyānāṃ sa prāpnotyacirācchivam //

alaṃ vistareṇa //

iti śāstrasaṃgrahaḥ / itiśabdaḥ parisamāptivācakaḥ / etāvāneva / śiṣyate 'nena tattvamiti śāstramadhikṛtameva; arya(rthya)ta ityarthaḥ / śāstrasyārthaḥ śāstrārthaḥ / tasya sagrahaḥ śāstrārthasaṃgrahaḥ / saṃgrahaṇaṃ saṃgrahaḥ / etāvānevādhikṛtaśāstrārthasaṃkṣepa ityarthaḥ / śāstrato cāsyālpagranthasyāpi viśvavyāpakanyāyānuśāsanāditi vṛddhavādaḥ //

tatra yathoddeśastathā nirdeśa iti kṛtvā sādhanasvarūpāvadhāraṇāyāha // tatra pakṣādivacanāni sādhanam / tatraśabdo nirdhāraṇārthaḥ / tatra teṣu sādhanādiṣu sādhanaṃ tāvannirdhāryate iti / nirdhāraṇaṃ ca jātiguṇakriyānimittamiti / atra guṇanimittaṃ sādhanatvena guṇena nirdhāryate iti / gomaṇḍalādiva gauḥ kṣīrasaṃpannatvena guṇena // pacyate iti pakṣaḥ / paca vyaktīkaraṇe / pacyate vyaktīkriyate yo 'rthaḥ sa pakṣaḥ / sādhya ityarthaḥ / sa ca dharmaviśiṣṭo dharmī / pakṣa ādiryeṣāṃ te pakṣādayaḥ / ayaṃ bahubrīhiḥ samāsaḥ /

ayaṃ ca tadguṇasaṃvijñānaśca bhavati / tatra tadguṇasaṃvijñāno yathā lambakarṇa ityādi / lambau karṇau yasyāsau lambakarṇaḥ / lambakarṇatvaṃ ca tasyaiva guṇa ityarthaḥ / atadguṇasaṃvijñāno yathā parvatādikaṃ kṣetramityādi / parvata ādiryasya tatparvatādikaṃ kṣetram / na parvataḥ kṣetraguṇaḥ / kiṃ tarhi / upalakṣaṇamātramiti bhāvanā /

ayamiha tadguṇasaṃvijñāno bahuvrīhirveditavyaḥ / yathā parvatādikaṃ kṣetraṃ nadyādikaṃ vanamiti / na punaryathā lambakarṇaḥ brāhmaṇādayo varṇā iti / pakṣādivacanāni sādhanamityādiśabda upalakṣaṇārthaḥ / asya cāyamarthaḥ / ādīyate 'smādityādiḥ yathā parvatādikaṃ kṣetramityādau / na punarādīyate ityādiḥ yathā brāhmaṇādayo varṇā ityadāviti / tataḥ susthitamidaṃ pakṣaḥ ādiryeṣāṃ te pakṣādayaḥ // te ca pakṣopalakṣitā hetudṛṣṭāntāḥ / teṣāṃ vacanānyuktayaḥ // kiṃ sādhanamiti /

iha ca yadā sādhyate 'neneti sādhanaṃ karaṇābhidhānārthaḥ sādhanaśabdastadā pakṣopalakṣitāni hetutvādivacanāni sādhanam / yatastaiḥ karaṇabhūtairvivakṣito 'rthaḥ parasaṃtāne pratipādyate / yadā punarbhāvasādhanaḥ siddhiḥ sādhanamiti tadā pakṣādivacanajanyaṃ pratipādyagataṃ jñānameva sādhanam / tatphalatvātpakṣādivacanānām / kārye kāraṇopacārāt / yathedaṃ me śarīraṃ paurāṇāṃ karmeti / yadā tu kartṛsādhanaḥ sādhayatīti sādhanaṃ tadā pakṣādivacanānyeva kartṛtvena vivakṣyante pratipādyasaṃtāne jñānotpādakatvāt iti / tadevaṃ pakṣādivacanāni sādhanam / tadyathā vṛkṣā vanaṃ hastyādayaḥ senā / āha / ekavacananirdeśaḥ kimarthamucyate / samuditānāmeva pakṣādivacanānāṃ sādhanatvakhyāpanārtham / uktaṃ ca diṅnāgācāryeṇa sādhanamiti caikavacananirdeśaḥ samastasādhanatvakhyāpanārthaḥ / ityalaṃ vistareṇa //

evaṃ tāvatsāmānyena sādhanamuktam / idaṃ ca na jñāyate kiṃ kārakamuta vyañjakam / sādhanasya dvaividhyadarśanāt / tatra kārakaṃ vījādyaṅkurādeḥ / vyañjakaṃ pradīpādi tamasi ghaṭādīnām / ato vyañjakatvapratipādanāyāha / pakṣahetudṛṣṭāntavacanairhi prāśnikānāmapratīto 'rthaḥ pratipādyate iti // asya gamanikā / pacyate iti pakṣaḥ / hinotīti hetuḥ / hi gatau / sarve gatyarthāḥ jñānārthāḥ / tathā dṛṣṭamarthamantaṃ nayatīti dṛṣṭāntaḥ / sa ca dvidhā sādharmyevaidharmyabhedāt / tataścaivaṃ samāsaḥ / dṛṣṭāntaśca dṛṣṭāntaśca dṛṣṭāntau / hetuśca dṛṣṭāntau ca hetudṛṣṭāntāḥ / pakṣasya hetudṛṣṭāntāḥ pakṣahetudṛṣṭāntāḥ / teṣāṃ vacanāni pakṣahetudṛṣṭāntavacanāni / taiḥ pakṣahetudṛṣṭāntavacanaiḥ / hiśabdo yasmādarthe / praśneniyuktāḥ prāśnikā vidvāṃsaḥ / svasamayaparasamayavedinaḥ / uktaṃ ca-

svasamayaparasamayajñāḥ kulajāḥ pakṣadvayasthitāḥ kṣamiṇaḥ / vādapatheṣvabhiyuktāstulāsamāḥ prāśnikāḥ proktāḥ //

teṣāṃ prāśnikānāmapratīto 'navagato 'navabuddho 'rthaḥ pratipādyate / āha / ye yathoktāḥ prāśnikāḥ kathaṃ teṣāṃ kaścidapratīto 'rtha iti / ucyate / na tatparijñānamaṅgīkṛtyāpratītaḥ / kiṃtu vādiprativādipakṣaparigrahasamarthanāsahastadantargata ityato 'pratīto 'rthaḥ pratipādyate / nanu cātra cāturthyā kriyayā ceti vaktavyalakṣaṇayā bhavitavyaṃ tatkimartha ṣaṣṭhyatrocyate / kārakāṇāmavivakṣā śeṣa iti śeṣalakṣaṇā ṣaṣṭhī / keṣāṃ pratipādyate / sāmarthyādyeṣāmapratītaḥ anyeṣāmaśrutatvātteṣāmeva pratipādyate /

itiśabdastasmādarthe / yasmādevaṃ tasmādvyañjakamidaṃ sādhanamapratītārthapratipādakatvāt pradīpavat / vyatireke bījādi // tatra pakṣādivacanāni sādhanam ityuiktam // adhunā yathoddeśaṃ nirdeśa itinyāyamāśritya pakṣalakṣaṇapratipādanāyāha / tatra pakṣaḥ prasiddho dharmī / asya gamanikā / tatraśabdo nirdhāraṇārthaḥ / nirdhāraṇaṃ ca prasiddhadharmitvādiguṇato 'vaseyamiti / pakṣa iti lakṣyanirdeśaḥ / dharmīti / dharmāḥ kṛtakatvādayaste 'sya vidyante iti dharmī śabdādiḥ / kathaṃ prasiddha ityata āha / prasiddhaviśeṣaṇaviśiṣṭatayā svayaṃ sādhyatvenepsitaḥ / tatra prasiddhaṃ vādiprativādibhyāṃ pramāṇabalena pratipannam / viśiṣyate 'neneti viśeṣaṇam / tena viśiṣṭaḥ prasiddhaviśeṣaṇaviśiṣṭaḥ /

tadbhāvaḥ prasiddhaviśeṣaṇaviśiṣṭatatā / tayā prasiddhaviśeṣaṇaviśiṣṭatayā hetubhūtayā prasiddhaḥ / atrāha / iha dharmiṇastāvatprasiddhatā yuktā viśeṣaṇasya tvanityatvāderna yujyate / sādhyatvāt / anyathā vivādābhāvena sādhanaprayogānupapatteḥ / naitadevam / samyagarthānavabodhāt / iha prasiddhatā viśeṣaṇasya na tasminneva dharmiṇi samāśrīyate kiṃtu dharmyantare ghaṭādau / tataśca yathoktadoṣānupapattiḥ / tathā svayamityanenābhyupagamasiddhāntaparigrahaḥ // sādhyatvenepsita iti / sādhanīyaḥ sādhayitavyaḥ sādhanamarhatīti vā sādhyaḥ / tasya bhāvaḥ sādhyatvama / tena sādhyatvena / īpsitaḥ abhimataḥ iṣṭa icchāyā vyāpta ityarthaḥ / iha ca viśeṣaṇasya vyavacchedakatvātprasiddho dharmītyanenāprasiddhaviśeṣaṇasya pakṣābhāsasya vyavacchedo draṣṭavyaḥ / prasiddhaviśepaṇaviśiṣṭayetyanena tvaprasiddhaviśeṣaṇasya ubhayena cāprasiddhobhayasya svayamityanena cābhyupagamasiddhāntaparigraheṇa sarvatantrapratitantrādhikaraṇasiddhāntānāṃ vyavacchedo draṣṭavyaḥ / iha tu śastranirapekṣavādinorlokaprasiddhayordharmadharmiṇoḥ parigrahavacanamabhyupagamasiddhāntastaṃ svayamityanenāha / tataścayadapi svayamiti vādinā yastadā sādhanamāha / etena yadyapi kvacicchāstre sthtiaḥ sādhanamāha tacchāstrakāreṇa tasmindharmiṇyanekadharmābhyupagame 'pi yastadānena vādinā dharmaḥ sādhayitumiṣṭaḥ sa eva sādhyo netara ityuktaṃ bhavatīti yaduktaṃ vādimukhyena tadapi saṃgatameva / sādhyatveneti sādhyatvenaiva na sādhanatvenāpi / anena ca sādhyahetudṛṣṭāntābhāsānāṃ pakṣatvavyudāsaḥ / īpsita ityanena ca noktamātrasyaivetyuktaṃ bhavati / icchayāpi vyāptaḥ pakṣaḥ / ityetacca parārthāścakṣurādaya ityatra darśayiṣyāmaḥ / ityanena dharmaviśiṣṭo dharmī pakṣa ityāveditaṃ bhavati / tataśca na dharmamātraṃ na dharmī kevalaḥ na svatantramubhayaṃ na ca tayoḥ saṃbandhaḥ kiṃtu dharmadharmiṇorviśeṣaṇaviśeṣyabhāva iti bhāvārthaḥ //

iha coktalakṣaṇayoge satyapyaśrāvaṇaḥ śabda ityevamādīnāmapi pratyakṣāviruddhānāṃ pakṣatvaprāptyātivyāptirnāma lakṣaṇadoṣaḥ prāpnotītyastannivṛttyarthamāha / pratyakṣādyaviruddha iti vākyaśeṣaḥ / pratyakṣādibhiraviruddhaḥ / ādiśabdādanuktānumānādiparigrahaḥ / ityayaṃ vākyaśeṣo vākyādhyāhāro draṣṭavya iti / udāharaṇopadarśanāyāha tadyathā / anityaḥ śabdo nityo veti / tadyathetyudāharaṇopanyāsārtham / tatra bauddhāderanityaḥ śabdo vaiyākaraṇādernitya iti / ukta sodāharaṇaḥ pakṣaḥ /

sāṃprataṃ hetumabhidhitsurāha hetustrirūpaḥ / tatra hinoti gamayati jijñāsitadharmaviśiṣṭānarthāniti hetuḥ / sa ca trirūpaḥ / trīṇi rūpāṇi yasyāsau trirūpaḥ trisvabhāva ityarthaḥ / ekasya vastuno nānātvamapaśyan pṛcchaka āha kiṃ punastrirūpyam / kimiti paripraśne / punariti vitarke / trirūpasya bhāvastrairūpyam / evaṃ pṛcchakena pṛṣṭaḥ sannāhācāryaḥ pakṣadharmatvaṃ sapakṣe sattvaṃ vipakṣe cāsattvameva / asya gamanikā / uktalakṣaṇaḥ pakṣatasya dharmaḥ pakṣadharmastadbhāvaḥ pakṣadharmatvam / pakṣaśabdena cātra kevalo dharmyeva 'bhidhīyate / avayave samudāyopacārāt / idamekaṃ rūpam / tathā sapakṣe sattvam / sapakṣo vakṣyamāṇalakṣaṇaḥ / tasminsattvamastitvaṃ sāmānyena bhāva ityarthaḥ / idaṃ dvitīyaṃ rūpam / tathā vipakṣe cāsattvamiti tṛtīyaṃ rūpam / vipakṣo vakṣyamāṇalakṣaṇastasminpunarasattvamevāvidyamānataiva / caśabdaḥ punaḥśabdārthaḥ / sa ca viśeṣārtha iti darśitameva / āha ihaivāvadhāraṇe 'bhidhānaṃ kimartham / ucyate / atraivaikāntāsattvapratipādanārtham /

sapakṣe tvekadeśe 'pi sattvamaduṣṭameveti / tathā ca satyekāntato vipakṣavyāvṛttāḥ sapakṣaikadeśavyāpino 'pi prayatnānantarīyakatvādayaḥ samyagghetava evetyāveditaṃ bhavati // sapakṣe sattvamityādi yaduktaṃ tatra sapakṣavipakṣayoḥ svarūpamajānāno vineyaḥ pṛcchati / kaḥ punaḥ sapakṣaḥ ko vā vipakṣa iti / ayaṃ tu praśno nigadasiddha eva / nirvacanaṃ tvidaṃ sādhyadharmetyādi / asya gamanikā / ihopacāravṛttyā dharme sādhyatvamadhikṛtyocyate / sādhyaścāsau dharmaśca sādhyadharmaḥ / anityatvādiḥ / samānaḥ sadṛśastasya bhāvaḥ sāmānyaṃ tulyatā / sādhyadharmasya sādhyadharmeṇa vā sāmānyaṃ sādhyadharmasāmānyam / tena samāno 'rthaḥ sapakṣa iti / samaṃ tulyaṃ mānamasyeti samānaḥ / tulyamānaparicchedya iti bhāvanā / artho ghaṭādiḥ / na tu vacanamātram / samānaḥ pakṣaṃ sapakṣa iti / athavā upacāravṛttyā dharmiṇi sādhyatvamadhikriyate /

tataśca / sādhyasya dharmaḥ sādhyadharmaḥ / śeṣaṃ pūrvavat / anupacaritaṃ tu sādhyam / dharmaviśiṣṭo dharmīti bhāvārthaḥ // sāṃprataṃ sapakṣasyaiva udāharaṇamupadarśayannāha / tadyathā anitye śabde sādhye ityādi / tadyathetyudāharaṇopanyāsārthaḥ / anitye śabde sādhye kim? / ghaṭādiranityaḥ padārthasaṃghātaḥ sapakṣaḥ / sādhyānityātvasamānatvāt // adhunā vipalakṣaṇapratipādanāyāha / vipakṣo yatra sādhyaṃ nāsti / visadṛśaḥ pakṣo vipakṣaḥ / sa kīdṛgiti svarūpato darśayati / yatra yasminnarthe / sādhanīyaṃ sādhyam / nāsti na vidyate / iha ca sādhyapratibandhatvāt sādhanasya tadapi nāstīti gamyate / udāharaṇaṃ darśayati / yathā yannityamityādi / tatra yannityamiti kimuktaṃ bhavati? / yadanityaṃ na bhavati tadakṛtakaṃ dṛṣṭamiti / tatkṛtakamapi na dṛṣṭam yathākāśamiti / tatra hi sādhyabhāvāt sādhanābhāvaḥ / sāṃprataṃ vicitratvādavadhāraṇavidheḥ vipakṣadharmatvādiṣu tamupadarśayannāha / tatra kṛtakatvamityādi / tatreti pūrvavat / kṛtakatvaṃ prayatnānantarīyakatvaṃ vā anityādau heturiti yogaḥ / tatra kriyate iti kṛtakaḥ / apekṣitaparavyāpāro hi bhāvaḥ svabhāvaniṣpattau kṛtaka iti / tadbhāvaḥ kṛtakatvam / prayatnāntarīyakatvaṃ vā iti / prayatnaścetanāvato vyāpāraḥ / tasya prayatnānantaraṃ tatra bhāvo jāta iti vā prayatnānantarīyaḥ / sa eva prayatnānantarīyakaḥ / tadbhāvaḥ prayatnānantarīyakatvam /

vāśabdaḥ caśabdārthaḥ / sa ca samuccaye / dvitīyahetvabhidhānaṃ vipakṣavyāvṛttaḥ / sapakṣaikadeśavṛttirapi samyaggheturyathā / yameveti darśanārthatvādaduṣṭamiti / ayaṃ ca hetuḥ kiṃ pakṣadharma eva na tu pakṣasyaiva dharmaḥ / ayogavyavacchedamātraphalatvādavadhāraṇasya / yathā caitro dhanurdhara eva / anena cāsiddhānāṃ caturṇāmasādhāraṇasya ca vyāvṛttiḥ / tathā saphala evāstvanyayogavyavacchedaḥ yathā pārtha eva dhanurdharaḥ / anena tu sādhāraṇādīnāṃ navānāmapi hetvābhāsānāṃ vyāvṛttiḥ / āha / yadi sapakṣa evāsti tataśca tadvyatirekeṇānyatra pakṣe 'pyabhāvāt dharmatvānupapattiḥ / na anavadhṛtāvadhāraṇāt / pakṣadharmatvasyāvadhāritvāt / āha / yadyevaṃ vipakṣe nāsti eveti tṛtīyamavadhāraṇaṃ kimartham? / ucyate / prayogopadarśanārtham / uktaṃ ca / anvayavyatirekayorekamapi rūpamuktaṃ kathaṃ nu nāma dvitīyasyākṣepakaṃ syāditi / prabhūtamatra vaktavyaṃ tattu nocyate / granthavistarabhayāt / gamanikāmātnametat / anityādau heturityatrādigrahaṇāt duḥkhādiparigrahaḥ / ityukto hetuḥ // sāṃprataṃ dṛṣṭāntamabhidhitsurāha / dṛṣṭānta ityādi / dṛṣṭaṃ tatrārthaṃ antaṃ nayatīti dṛṣṭāntaḥ / pramāṇopalabdhameva vipratipattau saṃvedananiṣṭhāṃ nayatītyarthaḥ / sa ca dvividhaḥ / dve vidhe yasya sa dvividhastadeva dvaividhyam / darśayati sādharmyeṇa vaidharmyeṇa ca / samāno dharmo yasyāsau sadharmā sadharmaṇo bhāvaḥ sādharmyaṃ tena / visadṛśo dharmo yasyāsau vidharmā vidharmaṇo bhāvaḥ vaidharmyaṃ tena / caśabdaḥ samuccaye / tatra sādharmyeṇa tāvaditi / tāvacchabdaḥ kramārthaḥ / yatreti / abhidheyahetoruktalakṣaṇasya sapakṣa evāstitvaṃ khyāpyate / sapakṣa uktalakṣaṇastasmiṃścāstitvaṃ vidyamānatvaṃ khyāpyate pratipādyate vacanena / taccedam / yatkṛtakaṃ tadanityaṃ yathā ghaṭādiḥ iti sugamam / anena sādhanadṛṣṭāntābhāsaḥ / vaidharmyeṇāpi / yatra sādhyābhāve hetorabhāva eva kathyate / yatretyabhidheye / sādhyaṃ anityatvādi tasyābhāve hetoḥ kṛtakatvādeḥ / kim? / abhāva eva kathyate pratipādyate vacanena / taccedamudāharaṇaṃ darśayati / yannityaṃ tadakṛtakaṃ dṛṣṭaṃ yathākāśamiti sugamam / āha / na saugatānāṃ nityaṃ nāma kiṃcidasti / tadabhāvāt kathaṃ vaidharmyadṛṣṭānta ityucyate? / nityaśabdenātranityatvasyābhāva ucyate / atreti prayoge dṛṣṭāntavākye vā / kiṃ nityaśabdena anityasvasyābhāva ucyate? / anityo na bhavatīti nityaḥ / akṛtakaśabdenāpi kṛtakatvasyābhāvaḥ ucyate / iti ca vartate / kṛtakau na bhavatītyakṛtakaḥ / na tu vastu sannityamakṛtakaṃ vāsti / atraivodāharaṇamāha / yathā bhāvābhāvo 'bhāvaḥ / yathetyaupamye / bhāvaḥ sattā tasyābhāvo bhāvābhāvaḥ / asāvabhāva ucyate / na tu bhāvādanyo 'bhāvo nāma vastusvarūpo 'sti evaṃ nityaśabdenātretyādi dārṣṭāntike 'pi bhāvitameva // uktāḥ pakṣādayaḥ //

saha pakṣeṇa viṣayabhūtena hetudṛṣṭāntā ityarthaḥ / eṣāṃ vacanāni / eṣāmiti pakṣopalakṣitānāṃ hetudṛṣṭāntānām / vacanāni ye vācakāḥ śabdāḥ / kim? / parapratyāyanakāle prāsnikapratyāyanakāle sādhanam / yathā prayogato darśayati / yathā anityaḥ śabdaḥ iti pakṣavacanam / kṛtakatvāditi pakṣadharmavacanam / yat kṛtakaṃ tadanityaṃ dṛṣṭaṃ yathā ghaṭādiriti sapakṣānugamavacanam / yannityaṃ tadakṛtakaṃ dṛṣṭaṃ yathākāśamiti vyatirekavacanam / iti nigadasiddham / yāvat etānyeva trayo 'vayavā ityucyante / etānyeva pakṣahetudṛṣṭāntānāṃ vacanāni / traya iti saṃkhyā / avayavā ityucyante / pūrvācāryāṇāṃ saṃjñāntarametat / yathoktaṃ sādhanamavayavāḥ //

uktaṃ sādhanam / adhunā tadābhāsa ucyate / tatrāpi pakṣādivacanāni sādhanamiti pakṣasyopalakṣaṇatvātprathamaṃ pakṣa uktaḥ / ihāpi pakṣābhāsa evocyate sādhayitumityadi / sādhayitumiṣṭo 'pi pakṣādiviruddhaḥ pakṣābhāsaḥ / sisādhayiṣayā vāñchitaḥ apiśabdātprasiddho dharmītyādi tadanyalakṣaṇayukto 'pi / kim? / pratyakṣādiviruddhaḥ / virudhyate sa viruddhaḥ / pratyakṣādayo vakṣyamāṇalakṣaṇāstairviruddho nirākṛtaḥ pratyakṣādiviruddhaḥ / kim? / pakṣābhāsaḥ / tasyātroktalakṣaṇaḥ pakṣaḥ ābhāsanamābhāsaḥ ākāramātram / pakṣasyevābhāso yasyāsau pakṣābhāsaḥ pakṣākāramātram / na tu samyak pakṣa ityarthaḥ / tadyathetyudāharaṇopanyāsārthaḥ / pratyakṣaviruddha ityādi / pratyakṣaṃ vakṣyamāṇalakṣaṇam / iha punaḥ pratyakṣaśabdena tatparicchinno dharmaḥ parigṛhyate śālikuḍavanyāyāt / tataśca prasiddharmadharmaśabdalopāt pratyakṣaprasiddhadharmaviruddhaḥ pratyakṣaviruddhaḥ / evamanumānaviruddhaḥ āgamalokasvavacanaviruddhāśceti bhāvanīyamiti /

aprasiddhiviśeṣaṇādiśabdārthamudāharaṇanirūpaṇāyāmeva vakṣyāmaḥ / sāṃpratamudāharaṇāni darśayati / tatra pratyakṣaviruddhaḥ ityuddeśaḥ / yathā aśrāvaṇaḥ śabdaḥ ityudāharaṇam / atra śabdo dharmī / aśrāvaṇatvaṃ sādhyadharmaḥ / ayaṃ ca sādhyamānastatraiva dharmiṇi pratyakṣaprasiddhena śrāvaṇatvena virudhyate iti pratyakṣaviruddhaḥ / āha / śrāvaṇatvaṃ sāmānyalakṣaṇatvātpratyakṣagamyameva na bhavati kathaṃ pratyakṣaprasiddhadharmaviruddhaḥ? iti / atrocyate / bhāvapratyayena svarūpamātrābhidhānātsāmānyalakṣaṇatvānupapatteradoṣa iti / atra ca bahu vaktavyaṃ tattu nocyate / akṣaragamanikāmāphalatvātprayāsasya // anumānaviruddho yathā / nityo ghaṭa iti / atra ghaṭo dharmī / nityatvaṃ sādhyadharmaḥ / sa cānumānaprasiddhenānityatvena tatraiva dharmiṇi bādhyate / anumānaṃ cedam / anityo ghaṭaḥ kāraṇādhīnātmalābhatvāt pradipavat // āgamaviruddho yathā / vaiśeṣikasya nityaḥ śabda iti sādhayataḥ / vaiśeṣiko 'hamityevaṃ pakṣaparigrahaṃ kṛtvā yadā śabdasya nityatvaṃ pratijānite tadāgamavirūddhaḥ / yatastasyāgame śabdasyānityatvaṃ prasiddham / uktaṃ ca buddhimatpūrvā vākyakṛtirvede tadvacanādāmnāyasya prāmāṇyamityādi // lokaviruddho yathā / śuci naraśiraḥkapālaṃ prāṇyaṅgatvāt śaṅkhaśuktivat iti / atra naraśiraḥkapālaṃ dharmitvenopādayite / śucitvaṃ sādhyadharmaḥ / sa ca sādhyamānastatraiva dharmiṇi lokaprasiddhaśucitvena nirākriyata iti / āha / iha hetudṛṣṭāntopādānaṃ kimarthamucyate? / lokasthiterbalīyastvakhyāpanārtham / nānumānenāpi lokaprasiddhirbādhyata ityarthaḥ // svavacanaviruddho yathā / mātā me vandhyā iti / iha ca mātā sādhyadharmitvenopāttā / vandhyeti ca sādhyadharmaḥ / sa ca sādhyamānastatraiva dharmiṇi svavacanaprasiddhena mātṛtvena viruddhyate / virodhaśca mātṛśabdena prasavadharmiṇī vanitocyate vandhyāśabdena tadviparītā / tataśca yadi mātā kathaṃ vandhyā? vandhyā cetkathaṃ māteti? // tathā aprasiddhaviśeṣaṇo yathā / bauddhasya sāṃkhyaṃ prati vināśī śabde iti / na prasiddhamaprasiddham / viśiṣyate aneneti viśeṣaṇaṃ sādhyadharmalakṣaṇam / tataścāprasiddhaṃ viśeṣaṇaṃ yasmin sa tathāvidhaḥ / evaṃ śeṣepyakṣaragamanikā kāryeti / atra ca śabda iti nirdeśaḥ / vināśīti sādhyadharmaḥ / ayaṃ ca bauddhasya sāṃkhyaṃ prati aprasiddhiviśeṣaṇaḥ / na hi tasya siddhānte kiṃcidvinaśvaramasti / yata uktam- tadetatrailokyaṃ vyakterapaiti nityatvapratiṣedhāt / apetamapyasti vināśapratiṣedhādityādi [yāgasūtra- 3, 13 vyāsabhāṣya] / āha / yadyevaṃ na kaścitpakṣābhāso nāmāsti / tathāhi- vipratipattau iṣṭārthasiddhye 'numānaprayogaḥ / vipratipattireva caitaddoṣakartrīti kṛto 'numānam / atrocyate / na vipratipattimātraṃ taddoṣakartṛ yuktiviruddhatvāt / tathāhi- upapattibhirdṛṣṭāntasādhane kṛte 'numānaprayogaḥ iṣṭārthasiddhaye bhavati / nānyathā / punaḥ sādhanāpekṣatvāt / ato dṛṣṭāntaṃ prasādhya prayogaḥ kartavya iti / aprasādhite tu pakṣābhāsaḥ / iti kṛta prasaṅgena // tathā aprasiddhaviśeṣyo yathā sāṃkhyasya bauddhaṃ prati cetana ātmeti / tatra viśeṣyo dharmītyanarthāntaram / iha cātmā dharmī / cetanatvaṃ sādhyadharmaḥ / iti pakṣaḥ sāṃkhyasya bauddhaṃ prati aprasiddhaviśeṣyaḥ / ātmano 'prasiddhatvāt / sarve dharmā nirātmāna ityabhyupagamāt /

ākṣepaparihārau pūrvavat // tathā aprasiddhobhayo yathā / vaiśeṣikasya bauddhaṃ prati sukhādisamavāyikāraṇamātmā iti / ubhayaṃ dharmadharmiṇau / tatrātmā dharmī / sukhādisamavāyikāraṇatvaṃ sādhyadharmaḥ / vaiśeṣikasya hi kāraṇatrayātkāryaṃ bhavati / tadyathā- samavāyikāraṇāt asamavāyikāraṇāt nimittakāraṇācca / tathāhi- tantavaḥ paṭasya samacāyikāraṇaṃ tantusaṃyogo 'samavāyikāraṇaṃ turīvemādayastu nimittakāraṇam / itthamātmā sukhaduḥkhecchādīnāṃ samavāyikāraṇam / ātmamanaḥsaṃyogo 'samavāyikāraṇam / srakcandanādayo nimittakāraṇam / ityevaṃ vaiśeṣikasya bauddhaṃ prati aprasiddhobhayaḥ / na tasyātmā viśeṣyaḥ siddho nāpi samavāyikāraṇaṃ viśeṣaṇam / sāmagryā eva janakatvābhyupagamāt / ākṣepaparihārau pūrvavat // tathā prasiddhasaṃbandho yathā śrāvaṇaḥ śabda iti / prasiddho vādiprativādinoravipratipattyā sthitaḥ saṃbandho dharmadharmilakṣaṇo yasmin sa tathāvidhaḥ / iha śabdo dharmī śrāvaṇatvaṃ sādhyadharmaḥ / ubhayaṃ caitat vādiprativādinoḥ prasiddham / eṣāṃ vacanāni ityādi / eṣāmiti navānāmapi paramārśaḥ / vacanāni / pratijñādoṣā iti saṃbandhaḥ kāraṇamāha / dharmasvarūpanirākaraṇamukhena pañcānāmādyānām / svaṃ ca tadrūpaṃ ca svarūpamityarthaḥ / nirākriyate 'neneti nirākarotīti vā nirākaraṇam / pratiṣedhanamityarthaḥ / dharmasvarūpasya nirākaraṇaṃ tattathā mukhamiva mukhaṃ dvāramiti bhāvaḥ / dharmasvarūpanirākaraṇameva mukhaṃ tena dharmasvarūpanirākaraṇamukhena dharmayāthātmyapratiṣedhadvāreṇetyarthaḥ / pratiṣidhyate cāśrāvaṇaḥ śabdaḥ / ityevamādiṣu pañcasu pratyakṣādiprasiddhaṃ dharmayāthātmyamiti bhāvanā / tathā pratipādanāsaṃbhavatastrayāṇām / tatra pratipādyate 'nena pratipādayatīti vā pratipādanam / paramapratyāyanamiti hṛdayam / tasyāsaṃbhavaḥ pratipādanāsaṃbhavaḥ tasmāt pratipādanāsaṃbhavataḥ / na ca dṛṣṭāntādyapratipattau pratipādanaṃ saṃbhavati / tathā sādhanavaiphalyataścaikasya / viphalasya bhāvo vaiphalyaṃ sādhanasya vaiphalyaṃ sādhanavaiphalyaṃ tasmātsādhanavaiphalyataḥ / ca samuccaye / tataśca eṣāṃ vacanāni / pratijñādoṣāḥ / pratijñāpakṣa ityanarthāntaram / doṣābhāsa iti ca tulyam / ityabhihitāḥ pakṣābhāsāḥ //

sāṃprataṃ hetvābhāsānabhidhitsurāha / asiddhānaikāntikaviruddhā hetvābhāsāḥ / asiddhaśca anaikāntikaśca viruddhaśca asiddhānaikāntikaviruddhāḥ / hetuvadābhāsante iti hetvābhāsāḥ / yathoddeśaṃ nirdeśa iti nyāyamaṅgīkṛtyāsiddhapratipipādayiṣayāha / tatrāsiddhaścatuḥprakāraḥ / tatra eṣu asiddhādiṣu / asiddhaḥ sidhyati sa siddhaḥ pratītaḥ na siddhaḥ asiddhaḥ apratītaḥ / catuḥprakāraścaturbhedaḥ / prakārāndarśayati / tadyathā / ubhayāsiddha ityādi / tadyatheti pūrvavat / ubhayorvādiprativādinoḥ asiddha ubhayāsiddhaḥ // anyatarasya vādinaḥ prativādino vā asiddha anyatarāsiddhaḥ // saṃdihyate sa saṃdigdhaḥ / saṃdigdhatvādevāsiddhaḥ saṃdigdhasiddhaḥ // āśrayo dharmī so 'siddho yasyāsau āśrayāsiddhaḥ / ca samuccaye / itiśabdaḥ parisamāptyarthaḥ // idānīmudāharaṇānyāha / tatra śabdānityatve ityādi / tatreti pūrvavat / śabdānityatve sādhye anityaḥ śabdaḥ ityetasmin cākṣuṣatvāditi /

cakṣurindriyagrāhyaścākṣuṣastadbhāvaścākṣuṣatvam / tasmādityayaṃ heturubhayāsiddhaḥ / tathāhi- cākṣuṣatvaṃ na vādinaḥ prasiddhaṃ nāpi prativādinaḥ / śrotrendriyagrāhyatvācchabdasya // kṛtakatvāditi śabdābhivyaktivādinaṃ prati anyatarāsiddhaḥ / śabdanityatve sādhye iti / vartate kṛtakatvādityayaṃ hetuḥ śabdābhivyaktivādinaṃ mīmāṃsakaṃ kāpilaṃ vā pratyanyatarāsiddhaḥ / tathāhi- na tasya tālvoṣṭhapuṭādibhiḥ kriyate śabdaḥ kiṃtvabhivyajyata iti // tathā bāṣpādibhāvenetyādi / bāṣpo jalādiprabhavaḥ sa ādiryasya reṇuvartyādeḥ sa bāṣpādistasya bhāvaḥ sattā tena bāṣpādibhāvena / saṃdihyamānaḥ kimayaṃ dhūma uta bāṣpa uta reṇuvartiriti saṃdehamāpadyamānaḥ / bhūtasaṃghātaḥ sūkṣmaḥ kṣityādisamūhaḥ / kim? / agneḥ siddhiragnisiddhistasyāmagnisiddhau / agniratra thūmāditi upadiśyamānaḥ procyamānaḥ saṃdigdhāsiddhaḥ / niścito hi dhūmo dhūmatvena hutavahaṃ gamayati nāniścita iti / tathā dravyamākāśamityādi / ākāśa iti dharminirdeśaḥ / dravyamiti sādhyo dharmaḥ / guṇāścāsya ṣaṭ / tadyathā / saṃkhyā parimāṇaṃ pṛthaktvaṃ saṃyogo vibhāgaḥ śabdeśceti //

tatra guṇānāmāśrayaḥ guṇāśrayastadbhāvastattvaṃ tasmāt guṇāśrayatvāditi / ayaṃ heturākāśāsattvavādinaṃ bauddhaṃ pratyāśrayāsiddhaḥ / dharmiṇa evāsiddhatvāt / tathā ca tasyāyaṃ siddhāntaḥ / pañca imāni bhikṣavaḥ saṃjñāmātraṃ saṃvṛtimātraṃ pratijñāmātraṃ vyavahāramātraṃ kalpanāmātram / katamāni pañca / atītaḥ addhā anāgataḥ addhā pratisaṃkhyānirodhaḥ ākāśaṃ pugdala iti / nanu cānyo 'pyasti asiddhaḥ sa ca dvidhā / pratijñārthaikadeśāsiddhaḥ / yathā anityaḥ śabdo 'nityatvāt / avyāpakāsiddhaśceti / yathā sacetanāstaravaḥ svāpāt / sa kasmānnoktaḥ / ācārya āha / antarbhāvāt / kva punarantarbhāva iti cait ubhayāsiddhe / tasmādadoṣaḥ / āha / yadyevamasiddhabhedadvayamevāstu ubhayāsiddho 'nyatarāsiddhaśceti / śeṣadvayasyātraivāntarbhāvāt / tathā cānyairapyuktam-

asiddhabhedau dvāveva dvayoranyatarasya vā //

ityādi / naitadevam / dharmyasiddhihetusaṃdehopādhidvāreṇa bhedaviśeṣasya siddheḥ / vineyavyutpattiphalatvācca śastrārambhasya / paryāptaṃ vistareṇokto 'siddhaḥ // sāṃpratam anaikāntikaḥ ucyate / sa ca ṣaṭprakāraḥ ṣaḍvidhaḥ / ekānte bhava aikāntikaḥ / na aikāntikau 'naikāntikaḥ / ṣaṭ prakārā asyeti ṣaṭprakāraḥ ṣaḍ vidhaityarthaḥ // bhedānevāha / sādhāraṇa ityādi / anvartham / ityudāharaṇameva vakṣyāmaḥ / tatra sādhāraṇaḥ prabheyatvānnitya iti / tatreti pūrvavat / dvayorbahūnāṃ vā yaḥ sāmānyaḥ sa sādhāraṇaḥ / pramīyate iti prameyo jñeya ityarthaḥ tadbhāvaḥ prameyatvaṃ tasmātprameyatvāt pramāṇaparicchedyatvāt / nitya ityatra śabdākhyo dharmī gamyate / idaṃ ca sapakṣetarākāśaghaṭādibhāvena sādhāraṇatvāt saṃśayanimittamiti / āha ca / taddhi nityānityetyādi / tat prameyatvaṃ dharmaḥ / hi rūpapradarśane / nityaścānityaśca nityānityau nityānityau ca tau pakṣau ca nityānityapakṣau / tayornityānityapakṣayorityarthaḥ / kim? / sādhāraṇatvāt tulyavṛttitvādanaikāntikam / prayoga eva darśayati / kiṃ ghaṭavat prameyatvādanityaḥ śabdaḥ āhosvidākāśavat prameyatvānnitya iti prakaṭārthaṃ darśayati / aho nāyaṃ saṃśayahetuḥ / etatprayogamantareṇa prāgeva saṃśayasya bhāvāt / tadbhāvabhāvitvānupapatteḥ / uktaṃ ca /

anaikāntikabhedāśca naiva saṃśītikāraṇam /
saṃdehe sati hetūkte sadbhāvasyāviśeṣataḥ //

ityādi / naitadevam / saṃśayasyāvivakṣitatvāt / tamantareṇāpi prayogopapatteśca / kriyate ca viparyastamatiprabhṛtipratipattyarthamapi prayogaḥ / tatrāpi saṃśayahetutvādanaikāntikāmiti // asādhāraṇaḥ śrāvaṇatvānnitya ityādi / sādhāraṇavilakṣaṇaḥ asādhāraṇaḥ asāmānyaḥ pakṣadharmaḥ san sapakṣavipakṣābhyāṃ vyāvṛtta ityarthaḥ / udāharaṇamāha / śrāvaṇatvānnitya iti / śravaṇendriyagrāhyaḥ śrāvaṇastadbhāvaḥ śrāvaṇatvaṃ tasmāt / nityaḥ avināśī / śabda iti gamyate / tatredaṃ śrāvaṇatvaṃ svadharmiṇaṃ vihāya na sapakṣe ākāśādau nāpi vipakṣe ghaṭādau vartata iti saṃśayanimittam / ata evāha / taddhītyādi / tat śrāvaṇatvam / hi rūpapradarśane nityānityapakṣābhyāṃ vyāvṛttatvāt / saṃśayaheturiti yogaḥ / anyatra vartiṣyata itīdamapi nirākurvannāha / nityānityavinirmuktasya cānyasya cāsaṃbhavāt / yadasti tena nityena vā bhavitavyamanityena vā nānyathā / virodhādatiprasaṃgācca / ataḥ saṃśayahetuḥ saṃśayakāraṇam / kathamityāha / kiṃbhūtasyetyādi / kiṃprakārasya kiṃ nityasyāhosvidanityasyāsyeti / prastutasya śabdasya śrāvaṇatvamityetaduktaṃ bhavati / yadi tadanyatra nitye vānitye vopalabdhaṃ bhavati tatastabdalenetaratrāpi niścayo yujyate nānyathā / viparyakalpanāyā apyanyanivāritaprasaratvāt / ityatra bahu vaktavyam / alaṃ prasaṅgena / ākṣepaparihārau pūrvavat / evaṃ śeṣeṣvapi bhāvanīyamiti // sapakṣaikadeśavṛttirityādi / samānaḥ pakṣaḥ sapakṣaḥ tasyaikadeśaḥ sapakṣaikadeśaḥ tasminvṛttirasyeti sapakṣaikadeśavṛttiḥ / tathā visadṛśaḥ pakṣo vipakṣastaṃ vyāptuṃ śīlamasyeti vipakṣavyāpī / udāharaṇamāha / yathā / aprayatnānantarīyakaḥ śabdo nityatvāditi / śabdo dharmī / aprayatnānantarīyakatvaṃ sādhyo dharmaḥ / anityatvāditi hetuḥ / tatra aprayatnānantarīyakaḥ pakṣaḥ / aprayatnānantarīyako 'rthaḥ / asya sādhyavidyudākāśādipadārthasaṃghātaḥ kim? / sapakṣaḥ / tatraikadeśe vidyudādau vartate 'nityatvaṃ nākāśādau / nityatvāttasya / tathā aprayatnānantarīyakaḥ pakṣo 'sya ghaṭādirvipakṣaḥ / tatra sarvatra ghaṭādau vidyate 'nityatvam / prayatnāntarīyakasyānityatvāt / yasmādevaṃ tasmādetadapi anityatvaṃ vidyudghatasādharmyeṇa vidyudghatulyatayānikāntikam / bhāvanikāmāha / kiṃ ghaṭavat anityatvāt prayatnānantarīyakaḥ / śabdaḥ āhosvidvidyudādivadanityatvādaprayatnānantarīyaka iti /

prakaṭārtham // vipakṣaikadeśavṛtiḥ sapakṣavyāpī / samāsaḥ sukara eva / udāharaṇamāha / yathā prayatnānantarīyakaḥ śabdo 'nityatvāt / prayatnānantarīyakaḥ pakṣo 'sya ghaṭādiḥ sapakṣaḥ / tatra sarvatra ghaṭādau vidyate 'nityatvam / prayatnānantarīyakaḥ pakṣo 'sya vidyudākāśādirvipakṣaḥ / tatraikadeśe vidyudādau vidyate 'nityatvam / nākāśādau / tasmādetadapi vidyudghaṭasādharmyeṇa pūrvavadanaikāntikam iti sūtrārthaḥ / uktavaiparītyena svadhiyā bhāvanīyamiti // ubhayapakṣaikadeśavṛttiḥ / ubhayapakṣayoḥ sapakṣavipakṣayorekadeśavṛttirasyeti ubhayapakṣaikadeśavṛttiḥ / udāharaṇamāha / yathā nityaḥ śabdo 'mūrtatvāditi // nityaḥ pakṣo 'syākāśaparamāṇvādiḥ sapakṣaḥ / tatraikadeśa ākāśārdo vidyate 'mūrtatvaṃ na paramāṇvādau / anityaḥ pakṣo 'sya ghaṭasukhādirvipakṣaḥ / tatraikadeśe sukhādau vidyate 'mūrtatvaṃ na ghaṭādau / tasmādetadapi sukhākāśasādharmyeṇānaikāntikam / etadapi sūtraṃ nigadasiddham / tathā viruddhāvyabhicārī / adhikṛtahetvanumeyaviruddhārthasādhako viruddhaḥ / viruddhaṃ na vyabhicaratīti viruddhāvyabhicārī / upanyastaḥ san tathāvidhārthānirākṛteḥ pratiyoginaṃ na vyabhicaratīti bhāvaḥ / tataścānena pratiyogisādhyamapākṛtya hetuprayogaḥ kartavya ityetadāha / anye tu viruddhaścāsāvavyabhicārī ca viruddhāvyabhicārīti vyācakṣate / idaṃ punarayuktameva / virodhādanekāntavādāpatteśca / udāharaṇamāha / yathānityaḥ śabdaḥ kṛtakatvād ghaṭavat / nityaḥ śabdaḥ śrāvaṇatvāt śabdatvavat / ubhayoḥ saṃśayahetutvāt dvāvapyetāveko 'naikāntikaḥ samuditāveva / anityaḥ śabdaḥ kṛtakatvādghaṭavaditi vaiśeṣikeṇokte mīmāṃsaka āha / nityaḥ śabdaḥ śrāvaṇatvāt śabdatvavat / śabdatvaṃ hi nāma veṇuvīṇāmṛdaṅgapaṇavādibhedabhinneṣu sarvaśabdeṣu śabda ityabhinnābhidhānapratyayanibandhanaṃ sāmānyaviśeṣasaṃjñitaṃ nityamiti / ubhayoḥ saṃśayahetutvāditi / ekatra dharmiṇi ubhayoḥ kṛtakatvaśrāvaṇatvayoḥ saṃśayahetutvāt saṃdehahetutvā / tathā caikatra dharmiṇi kṛtakatvaśrāvaṇatvākhyau hetu saṃdehaṃ kurutaḥ kiṃ kṛtakatvādghaṭavadanityaḥ āhosvicchrāvaṇatvācchabdatvavannityaḥ iti / evaṃ saṃdehahetutve pratipādite paraścodayati kiṃ samastayoḥ saṃdehahetutvam uta vyastayoḥ /

yadi samastayoḥ saṃdehahetutvaṃ tadāsādhāraṇānna bhidyate / śrāvaṇatvaṃ cāsādhāraṇatvenoktam / atha vyastayostadapi na / vyastayoḥ samyagdhetutvāt / atrocyate / samastayoreva saṃdehahetutvam / nanūktam asādhāraṇānna bhidyate / tanna / yato bhidyata eva / parasparasāpekṣo viruddhāvyabhicārī ceti / ekakaḥ asahāyo 'sādhāraṇaḥ / sa cānenāṃśenācāryeṇa bhinna upātta iti tasmādadoṣaḥ / uktaṃ ca mūlagranthe dvāvapyetāveko 'naikāntikaḥ samuditāveva / anudbhāvite tu tadabhāva iti / atra bahu vaktavyam / tattu nocyate / saṃkṣeparucisattvānugrahārtho 'yamārambhaḥ / ityukto 'naikāntikaḥ // sāṃprataṃ viruddhamāhaḥ viruddhaścatuḥprakāra ityādi / virudhyate sa viruddhaḥ / tathā hyayaṃ dharmasvarūpādiviparītasādhanārddharmeṇa dharmiṇā vā virudhyata eveti catuḥprakāraścaturbhedaḥ / tadyathā / dharmasvarūpaviparītasādhana ityādi / tadyatheti bhedopanyāsārthaḥ / śabdārthamudāharaṇādhikāra eva vakṣyāmaḥ / tatra dharmetyādi / tatra dharmasvarūpaviparītasādhano yathā nityeti pūrvavat / dharmaḥ paryāya ityanarthāntaram / tasya svarūpamasādhāraṇāmātmalakṣaṇa dharmasvarūpaṃ tasya viparītasādhana iti samāsaḥ / evaṃ śeṣeṣvapi draṣṭavyamiti / adhunodāharaṇamāha / yathā nitya śabdaḥ kṛtakatvāt prayatnānantarīyakatvādvā ityayaṃ heturvipakṣa eva bhāvadviruddhaḥ / atra dharmasvarūpanityatvam / ayaṃ ca hetuviparītamanityatvaṃ sādhayati / tenaivāvinābhūtatvāt / tathā cāha / vipakṣa eva bhāvādviruddhaḥ / āha ayamapakṣadharmatvādasiddhānna viśiṣyate kathaṃ viruddha iti? / atrocyate / nāvaśyaṃ pakṣadharma eva viruddhatā anyathāpyācāryapravṛtteḥ / adhikṛtayogajñāpakāt / na cāyamasiddhānna viśiṣyate iti /

viparyayasādhakatvenāsiddheḥ / etatpradhānatvāccopanyāsasya / anyathānaikāntikasyāpyasiddhatvaprasaṅgaḥ / nityatvādisādhanatvena prameyatvādīnāmapi asiddhatvāt / ityalaṃ prasaṅgena / gamanikāmātrametat / dharmaviśeṣaviparītasādhana ityasyodāharaṇaṃ yathā parārthāścakṣurādayaḥ saṃghātatvāt śayanāsanādyaṅgavat iti / kaḥ punarevamāha? / sāṃkhyo bauddhaṃ prati / iha cakṣurādayo dharmiṇaḥ / ādiśabdāt śeṣendiyamahadahaṃṅkārādiparigrahaḥ / pārārthyaṃ sādhyadharma / asya ca viśeṣo 'saṃhataparārthatvamiṣṭam / anyathā siddhasādhyatāpattyā prayogavaikalyaprasaṅgaḥ / saṃghātatvāditi hetuḥ / tatra dvayorbahūnāṃ vā melakaḥ saṃghātastasya bhāvaḥ saṃghātatvaṃ tasmātsaṃghātatvāt / śayanāsanādyaṅgavaditi dṛṣṭāntaḥ / śayanaṃ palyaṅkādi / āsanamāsandakādi / tadaṅgāni pratītānyeva / yathaitadaṅgāni saṃghātatvāddevadattādiparārthāni vartante evaṃ cakṣurādayo 'pīti bhāvārthaḥ / adhunā viruddhamāha /

ayamityādi / ayaṃ hetuḥ saṃghātatvalakṣano yathā yena prakāreṇa pārārthyaṃ parārthabhāvaṃ cakṣurādīnāṃ sādhayati tathā tenaiva prakāreṇa saṃhatatvamapi sāvayavatvamapi parasyātmanaḥ sādhayati / tenāpyavinābhūtatvāt / tathā cāha / ubhayatrāvyabhicārāt / ubhayatreti parārthe saṃhatatve ca avyabhicārād gamakatvādityarthaḥ / tathā caivamapi vaktuṃ śakyata eva saṃhataparārthāścakṣurādayaḥ saṃghātatvāt śayanāsanādyaṅgavaditi / śayanāsaṇādyaṅgāni hi saṃhatasya karacaraṇorugrīvādimata evārthaṃ kurvanti nānyasya / tathopalabdheriti / āha vipakṣa eva bhāvādviruddha iti sāmānyaṃ viruddhalakṣaṇaṃ tatkathamihopapadyate? iti / ucyate / asaṃhataparavipakṣo hi saṃhata iti tatraiva vṛttidarśanāt / kiṃ nopapadyate? / ākṣepaparihārau pūrvavat // dharmisvarūpaviparītetyādi / dharmā asya vidyante iti dharmī / udāharaṇaṃ tu yathā na dravyamityādi / kaḥ punarevamāha? / vaiśeṣiko bauddhānprati / kena punaḥ saṃbandhena? iti / ucyate / tasya siddhānto dravyaguṇakarmasāmānyaviśeṣasamavāyāḥ ṣaṭpadārthāḥ /

tataḥ pṛthvyāpastejovāyurākāśaṃ kālo digātmā mana iti dravyāṇi / guṇāścaturviśatiḥ / rūparasagandhasparśasaṃkhyāparimāṇāni pṛthaktvaṃ saṃyogavibhāgau paratvāparatve buddhiḥ sukhaduḥkhecchādveṣāḥ prayatnaśceti sūtroktāḥ / caśabdāt dravatvaṃ gurutvaṃ saṃskāraḥ sneho dharmādharmau śabdaśceti / evaṃ caturviśati rguṇāḥ / pañca karmāṇi / tadyathā utkṣepaṇamavakṣepaṇamākuñcanaṃ prasāraṇaṃ gamanamiti karmāṇi / gamanagrahaṇābdhramaṇarecanaspandanādyavarodhaḥ / sāmānyaṃ dvividhaṃ paramaparaṃ ceti / tatra paraṃ sattā bhāvo mahāsāmānyamiti cocyate / aparaṃ dravyatvādi / tatra sattā dravyaguṇakarmabhyo 'rthāntaram / kathāpunaryuktyā? ityatrāha / na dravyaṃ bhāvaḥ ekadravyavattvāditi hetuḥ / sāmānyaviśeṣavaditi dṛṣṭāntaḥ / adhunā bhāvārtha ucyate / na dravyaṃ bhāvaḥ / dravyādanya ityarthaḥ / ekadravyavattvādityatra ekaṃ ca taddravyaṃ ca ekadravyamasyāstīti āśrayabhūtamiti ekadravyavān /

samānādhikaraṇābdahuvrīhiḥ kadācitkarmadhārayaḥ sarvadhanādyartha iti vacanāt / tadbhāvastattvaṃ tasmādekadravyavattvāt / ekasmindravye vartamānatvādityarthaḥ / vaiśeṣikasya hi adravyaṃ dravyaṃ anekadravyaṃ ca dravyam / tatrādravyaṃ dravyamākāśakāladigātmanaḥ paramāṇavaḥ / anekadravyaṃ tu dvayaṇukādiskandhāḥ / ekadravyaṃ tu dravyameva nāsti / ekadravyavāṃśca bhāvaḥ / ityato dravyalakṣaṇavilakṣaṇatvāt na dravyaṃ bhāva iti / dṛṣṭāntaḥ sāmānyaviśeṣaḥ / sa ca dravyatvaguṇatvakarmatvalakṣaṇaḥ / dravyatvaṃ hi navasu dravyeṣu vartamānatvātsāmānyaṃ guṇakarmabhyo vyāvartamānatvādviśeṣaḥ / evaṃ guṇatvakarmatvayorapi bhāvanā kāryeti / tataśca sāmānyaṃ ca tadviśeṣaśca sa iti sāmānyaviśeṣastena tulyaṃ vartata iti sāmānyaviśeṣavat / dravyatvavadityarthaḥ / tataścaitadukte bhavati / yathā navasu dravyeṣu pratyekaṃ vartamānaṃ dravyaṃ na bhavati kiṃtu sāmānyaviśeṣalakṣaṇaṃ dravyatvameva evaṃ bhāvo 'pītyabhiprāyaḥ / āha yadi nāma dravyaṃ na bhavati tathāpi guṇobhaviṣyati karma ca ityetadapi nirācikīrṣurāha / guṇakarmasu ca bhāvāt / tataśca na guṇo bhāvaḥ guṇeṣu bhāvād guṇatvavat / yadi ca bhāvo guṇaḥ syānna tarhi guṇeṣu varteta nirguṇatvād guṇānām / vartate ca guṇeṣu bhāvaḥ / san guṇa iti pratīteḥ / tathā na karma bhāvaḥ karmasu bhāvātkarmatvavat / yadi ca bhāvaḥ karma syāt na tarhi karmasu varteta niṣkarmakatvātkarmaṇām / vartate ca karmasu bhāvaḥ / satkarmeti pratīteḥ / vyatyayopanyāsastu pratijñāhetvorvicitranyāyapradarśanārtham / ityevaṃ vaiśeṣikeṇokte bauddha āha / ayaṃ ca hetustriprakāro 'pi yathā dravyādipratiṣedhaṃ sādhayati tathā bhāvasya dharmiṇo 'bhāvatvamapi sādhayati /

tenāpyavinābhūtatvāt / tathā cāha / ubhayatrāvyabhicārāt / ubhayatra dravyādipratiṣedhe bhāvābhāve ca gamakatvāt / tathā ca / yatathaidbaktuṃ śakyate na dravyaṃ bhāvaḥ ekadravyatvāt dravyatvavat evamidamapi śakyate bhāvo bhāva eva na bhavati ekadravyatvāt dravyatvavat / na ca dravyatvaṃ bhāvaḥ sāmānyaviśeṣatvāt / evaṃ na guṇaḥ guṇeṣu bhāvāt guṇatvavat / atrāpi bhāvo bhāva eva na bhavati guṇeṣu bhāvāt guṇatvavat / na ca guṇatvaṃ bhāvaḥ sāmānyaviśeṣatvādeva / evaṃ na karma bhāvaḥ karmasu bhāvāt karmatvavat atrāpi bhāvo bhāva eva na bhavati karmasu bhāvāt karmatvavat / na ca karmatvaṃ bhāvaḥ sāmānyaviśeṣatvāt / sāmānyaviruddhalakṣaṇayojanā tu bhāvavipakṣatvātsāmānyaviśeṣasya sukaraiva / āha ayamasiddhānna viśiṣyate iti kathaṃ viruddhaḥ? / tathāhi / na bhāvo nāma dravyādivyatiriktaḥ kaścidasti saugatānām / tadabhāvāccaśrayāsiddha eva heturiti / atrocyate satyametat / kiṃtu paraprasiddho 'pi vipakṣamātravyāpī viruddha iti nidarśanārthatvāt / ekasminnapi cānekadoṣajātyupanipātanāt tadbhedadarśanārthatvānna doṣa iti / āha evamaviruddhabhāvaḥ sarvatra viśeṣaviruddhabhāvāditi / na / virodhino 'dhikṛtahetvanvitadṛṣṭāntabalenaiva nivṛteḥ / tathāpyanityaḥ śabdaḥ pākyatvādghatavat pākyaḥ śabda iti viruddhapreraṇāyāṃ kṛtakatvānvitāpākyapaṭādidṛṣṭāntāntarasāmarthyāttannivṛttyā na viruddhatā / anivṛttau cābhyupagamyata eva /

aśakyā ceha tannivṛttirekadravyavatvasya tadvyatirekeṇānyatrāvṛtteriti / atra bahu vaktavyam / alaṃ prasaṅgena // dharmiviśeṣaviparītasādhano yathā / dharmī bhāva eva tadviśeṣaḥ satpratyayakartṛtvam / yata uktaṃ saditi yato dravyaguṇakarmasu sā sattā / tadviparītasādhano yathā / ayameva heturekadravyavattvākhyaḥ asminneva pūrvapakṣe na dravyaṃ bhāva ityādilakṣaṇe asyaiva dharmiṇo bhāvākhyasya yo viśeṣo dharmaḥ satpratyayakartṛtvaṃ nāma tadviparitamasatpratyayakartṛtvamapi sādhayati / tenāpi vyāpyatvāt / tathā hyetadapi vaktuṃ śakyata eva bhāvaḥ satpratyayakartā na bhavati ekadravyavattvādravyatvat / na ca dravyatvaṃ satpratyayakartṛ dravyapratyayakartṛtvāt / evaṃ guṇakarmabhāvahetvorapi vācyam / ata evamuktam- ubhayatrāvyabhicārāditi / bhāvitārthameva / ākṣepaparihārau pūrvavat //

uktā hetvābhāsāḥ / sāṃprataṃ dṛṣṭāntābhāsānāmavasaraḥ / te ucyante / tatra yathā dṛṣṭānto dvividhaḥ evaṃ mūlabhedavyapekṣayā tadābhāso 'pi tathā / āha / dṛṣṭāntābhaso dvividhaḥ / sādharmyeṇa vaidharmyeṇa ca / dṛṣṭānta uktalakṣaṇaḥ / dṛṣṭāntavadābhāsa iti dṛṣṭāntābhāsaḥ / dṛṣṭāntapratirūpaka ityarthaḥ / tatra sādharmyeṇa tāvaddṛṣṭāntābhāsaḥ pañcaprakāraḥ pañcabhedaḥ tadyathā / sādhanadharmāsiddha ityādi / tadyatheti bhedopadarśanārthaḥ / sādhanadharmo heturasiddho nāstītyucyate / tataśca sādhanadharmo 'siddho 'smin so 'yaṃ sādhanadharmāsiddhaḥ / na tu bahubrīhau niṣṭhāntaṃ pūrvaṃ nipatatīti kṛtvāsiddhasādhanadharmā iti / na vāhitāgnyādiṣu vacanāt / āhitāgnyādeścākṛtigaṇatvādvikalpavṛtteriti / anye tu sādhanadharmeṇa rahitatvādasiddhaḥ sādhanadharmāsiddhaḥ iti vyācakṣate / na caitadatiśobhanam / evaṃ sādhyobhayadharmāsiddhayorapi bhāvanīyam / anvayādiśabdārthaṃ tūdāharaṇādhikāre vakṣyāmaḥ / sa cāvasaraḥ prāpta eveti yathākramaṃ nirdiśyate / tatra sādhanadharmāsiddho yathā / nityaḥ śabdo 'mūrtatvāt / yathetyudāharaṇopanyasārthaḥ / nityaḥ śabda iti pratijñā pakṣaḥ / amūrtatvāditi hetuḥ / anvayamāha /

yadamūrtaṃ vastu tannityaṃ dṛṣṭaṃ yathā paramāṇuriti sādharmyadṛṣṭāntatvam / etadābhāsānāmeva prakrāntatvāt / nārtho vaidharmyeṇeti na pradarśitaḥ / ayaṃ ca sādhyasādhanadharmānugata iṣyate / iha tu sādhyadharmo 'sti na sādhanadharmaḥ / tathā cāha / paramāṇau hi sādhyaṃ nityatvamasti / antyakāraṇatvena nityatvāt / sādhanadharmo 'mūrtatvaṃ nāsti / kutaḥ / mūrtatvāt paramāṇunām / mūrtatvaṃ ca mūrtimatkāryaghaṭādyupalabdheḥ siddhamiti // sādhyadharmāsiddho yathā / nityaḥ śabdo 'mūrtatvād buddhivaditi / yadamūrtaṃ vastu tannityaṃ dṛṣṭaṃ yathā buddhiḥ / buddhau hi sādhanadharmo 'mūrtatvasti sādhyadharmo nityatvaṃ nāsti anityatvādbuddhoriti sūtraprayogaḥ sugama eva / vyāptiṃ darśayati / yadamūrtaṃ vastu tannityaṃ dṛṣṭaṃ yathā buddhiḥ / āha kathamayaṃ sādhyadharmāsiddha? iti / atrāha / buddhau hi sādhanadharmo 'mūrtatvamasti / tadamūrtatvapratīteḥ / sādhyadharmo nityatvaṃ nāsti / kutaḥ? / anityatvādbuddheriti // ubhayāsiddho dvividhaḥ / katham? ityatrāha / sannasaṃśceti / sanniti vidyamānobhayāsiddhaḥ / tataśca asanniti avidyamānobhayāsiddhaḥ / prayogo maula eva draṣṭavyaḥ / yata āha / tatra ghaṭavadīti vidyamānobhayāsiddhaḥ / tataśca nityaḥ śabdo 'mūrtatvādghaṭavadityatra na sādhyadharmo nityatvalakṣaṇaḥ nāpi sādhanadharmo 'mūrtatvalakṣaṇo 'sti anityatvānmūrtatvādghaṭasyeti / tathāākāśavadityavidyamānobhayāsiddhaḥ / tataśca nityaḥ śabdo 'mūrtatvādākāśavaditi /

nanvayamubhayasabdhāvātkathamubhayāsiddha ityāśaṅkayāha / tadasattvavādinaṃ prati / ākāśāsattvavādinaṃ bauddhaṃ prati / sāṃkhyasyetyarthaḥ / sati hi tasminnityatvādidharmacintā nānyatheti // ananvaya ityādi / avidyamāno 'nvayo 'nanvayaḥ / apradarśitānvaya ityarthaḥ / anvayo 'nugamo vyāptiriti anarthāntaram / lakṣaṇamāha / yatretyādi / yatretyabhidheyamāha / vinānvayena vinā vyāptidarśanena sādhyasādhanayoḥ sādhyahetvorityarthaḥ / sahabhāva ekavṛttimātram / pradarśyate kathyate ākhyāyate / na vīpsayā sādhyānugateṣu heturiti / udāharaṇamāha / yathā ghaṭe kṛtakatvamanityaṃ ca dṛṣṭamiti / ghaṭaḥ kṛtakatvānityatvayorāśraya iti / evaṃ sati āśrayāśrayibhāvamātrābhidhānādanyatra vyabhicārasaṃbhavādiṣṭārthasādhakatvānupapattiḥ / viparītānvaya ityādi / viparīto viparyayavṛttiranvayo 'nugamo yasmin tathāvidhaḥ / udāharaṇamāha / yatkṛtakaṃ tadanityaṃ dṛṣṭamiti vaktavye yadanityaṃ tatkṛtakaṃ dṛṣṭamiti bravīti / evaṃ prāksādhanadharmamanuccārya sādhyadharmamuccārayati / āha / evamapi ko doṣaḥ? iti / ucyate / nyāyamudrāvyatikramaḥ / anyatra vyāptivyabhicārāt / yathā hyanityaḥ śabdaḥ prayatnāntarīyakatvādiyatra yadyadanityaṃ tattatprayatnāntarīyakam / anityānāmapi vidyudādīnāmaprayatnānantarīyakatvāt / ityalaṃ prasaṅgena / ayaṃ sādharmyadṛṣṭāntābhāsaḥ samāptaḥ // vaidharmyeṇāpi / na kevalaṃ sādharmyeṇaiva / kim? / dṛṣṭāntābhāsaḥ / prāṅnirūpitaśabdārthaḥ / pañcaprakāraḥ / tadyathā sādhyāvyāvṛtta ityādi / tatra sādhyaṃ pratītaṃ tadavyāvṛttasmāditi sādhyāvyāvṛttaḥ / ākṣepaparihārau pūrvavat / evaṃ sādhanobhayāvyāvṛttayorapi vaktavyam / avyatirekādiśabdārthaṃ tūdāharaṇādhikāra eva vakṣyāmaḥ / sa cāvasaraḥ prāpta eva // tatra sādhyāvyāvṛttaḥ yathā nityaḥ śabdo 'mūrtatvātparamāṇuvat / yathetyudāharaṇopanyāsārthaḥ / nityaḥ śabda iti pratijñā / amūrtatvāditi hetuḥ / vaidharmyadṛṣṭāntābhāsasya prakrāntatvātsādharmyadṛṣṭānto noktaḥ / abhyūhyaścākāśādiḥ /

vaidharmyadṛṣṭāntastu paramāṇuḥ / ayaṃ ca sādhyasādhanobhayadharmavikalaḥ samyagiṣyate / yata uktam / sādhyābhāve hetorabhāva eva kathyate ityādi / na cāyaṃ tathetyāha ca / paramāṇorhi sakāśāt / sādhanadharmo hetuḥ / tameva darśayati amūrtatvamiti / vyāvṛttaṃ nivṛttam / kutaḥ? / mūrtatvātparamāṇunām / sādhyadharmo nityatvaṃ tanna vyāvṛttam / kutaḥ? / nityatvātparamāṇūnām / āha / sādharmyadṛṣṭāntābhāseṣvādau sādhanadharmāsiddha uktaḥ iha sādhyāvyāvṛtta iti kimarthamucyate? / tasyānvayapradhānatvāt / anvayasya ca sādhanadharmapuraḥsarasādhyadharmoccāraṇarūpatvāt / vyatirekastu ubhayavyāvṛttirūpaḥ sādhyābhāve ca hetorabhāva iti / ataḥ sādhyāvyāvṛttaḥ // tathā sādhanāvyāvṛttaḥ karmavat / prayogaḥ pūrvavadeva /

vaidharmyadṛṣṭāntastu karma / tacca utkṣepaṇādi gṛhyate / tatra karmaṇaḥ sādhyaṃ nityatvaṃ vyāvṛttam / anityatvātkarmaṇaḥ / sādhanadharmo hetuḥ / tameva darśayati amūrtatvamiti / tanna vyāvṛttam / amūrtatvātkarmaṇa iti // ubhayāvyāvṛttaḥākāśavaditi / nityatvasādhakaḥ prayogaḥ paramāṇvādisādharmyadṛṣṭāntayuktaḥ pūrvavat / vaidharmyadṛṣṭāntastvākāśamiti / tato hi ākāśāt / na nityatvaṃ vyāvṛttaṃ nāpyamūrtatvam / kutaḥ? / nityatvādamūrtatvādākāśasyeti // avyatireka ityādi / avidyamānavyātirekaḥ avyatirekaḥ anidarśitavyatireka ityarthaḥ / lakṣaṇamāha / yatra vinā sādhyasādhananivṛttyā tadvipakṣabhāvo nidarśyate / yatretyabhidheyamāha / vinā sādhyasādhananivṛttyā prastutaprayoge yadanityaṃ tanmūrtaṃ dṛṣṭamityādilakṣaṇayā / tadvipakṣabhāvaḥ sādhyasādhanavipakṣabhāvamātram / nidarśyate pratipādyate iti yāvat / dṛṣṭāntamāha / yathā ghaṭe 'nityatvaṃ ca murtatvaṃ ca dṛṣṭamiti / itthaṃ hyekatrābhidheyamātrābhidhānādvaidharmyāpratipādanādarthāpattyāpi gamyate

pratipattigauravādiṣṭārthasādhakatvamiti // viparitavyatireka ityādi / viparīto viparyasto vyatireka uktalakṣaṇo yasmin sa tathāvidhaḥ / tameva darśayati / yadanityamityādi / prastutaprayoga eva tathāvidhasādharmyadṛṣṭāntayukte vyatirekamupadeśayan yadanityaṃ tanmūrtaṃ dṛṣṭa miti vaktavye yanmūrta tadanityaṃ dṛṣṭamiti bravīti / āha / evamapi ko doṣaḥ? iti / ucyate / anyatra vyabhicāraḥ / tathā hyanityaḥ śabdaḥ prayatnānantarīyakatvādityatra yadaprayatnānantarīyakaṃ tannityamiti / vyatireko vidyutā vyabhicāraḥ // nigamayannāha / eṣāmityādi / yathoktarūpāṇāṃ pakṣahetudṛṣṭāntābhāsānāṃ vacanāni / kiṃ na sādhanam? / ābhāsatvādeva / kiṃ tarhi? / sādhanābhāsamiti // uktaṃ sādhanābhāsam //

adhunā dūṣaṇasyāvasaraḥ / taccātikramya bahutaravaktavyatvātpratyakṣānumāne tāvadāha / ātmapratyāyanārthaṃ punaḥ pratyakṣamanumānaṃ ca dve eva pramāṇe / pratyakṣaṃ vakṣyamāṇalakṣaṇaṃ anumānaṃ ca / asamāsakaraṇaṃ vibhinnaviṣayajñāpanārtham / svalakṣaṇaviṣayameva pratyakṣam / sāmānyalakṣaṇaviṣayamevānumānam / ca samuccaye / dve eva pramāṇe ityanena saṃkhyāniyamamāha / tathāhi bauddhānāṃ dve eva pramāṇe pratyakṣānumāne / śeṣapramāṇānāmatraivāntarbhāvāt / antarbhāvaśca pramāṇasamuccayādiṣu carcitatvānneha pratanyate / adhunā pratyakṣaṇirūpaṇāyāha / tatra pratyakṣamityādi / tatreti nirdhāraṇārthaḥ / pratyakṣamiti lakṣyanirdeśaḥ / kalpanāpoḍhamiti lakṣaṇam / ayaṃ lakṣyalakṣaṇapravibhāgaḥ / tatra pratigatamakṣaṃ pratyakṣam / kalpanāpoḍhamiti / kalpanā vakṣyamāṇalakṣaṇā sā apoḍhā apetā yasmāt tat kalpanāpoḍham / samāsākṣepaparihārau pūrvavat / kalpanayāpoḍhaṃ kalpanāyā vāpoḍhaṃ kalpanāpoḍham / yat iti tatsvarūpanirdeśaḥ / evaṃbhūtaṃ cārthe svalakṣaṇamapi bhavati / āha / jñānaṃ saṃvedanam / tacca nirviṣayamapi bhavati ata āha arthe viṣaye / sa ca dvidhā svalakṣaṇasāmānyalakṣaṇabhedāt / ata āha / rūpādau svalakṣaṇe ityarthaḥ / iha yaduktaṃ kalpanāpoḍhamiti tatsvarūpābhidhānata eva vyācaṣṭe nāmajātyādikalpanārahitam / tadakṣamakṣaṃ prati vartate iti pratyakṣam / tatra nāmakalpanā yathā ḍitthā iti / jātikalpanā yathā gauriti / ādiśabdena guṇakriyādravyaparigrahaḥ / tatra guṇakalpanā śukla iti / kriyākalpanā pācaka iti / dravyakalpanā daṇḍīti / ābhiḥ kalpanābhī rahitaṃ śabdarahitam / svalakṣaṇahetutvāt / uktaṃ ca / na hyarthe śabdāḥ anti tadātmāno vā yena tasminpratibhāsamāne te 'pi pratibhāserannityādi / tadakṣamityādi / tadityanena yannirdiṣṭasya parāmarśaḥ / akṣāṇīndriyāṇi /

tataścākṣamakṣaṃ pratīndriyamindriyaṃ prativartata iti pratyakṣam / āha / yathendriyasāmarthyājjñānamutpadyate tathā viṣayasāmarthyādapi tatkasmādindriyeṇaiva vyapadeśo na viṣayeṇeti? / atrocyate / asādhāraṇatvādindriyasya sādharaṇatvāccārthasyeti / tathā hi / indriyamindriyavijñānasyaiva heturityasādharaṇam / arthastu manovijñānasyāpīti sādhāraṇaḥ / asādhāraṇena ca loke vyapadeśapravṛttiryathā bherīśabdo yavāṅkura iti / uktaṃ ca bhadantena /

asādhāraṇahetutvādakṣaistadyapariśyate ityādi / āha / manovijñānādyapi pratyakṣamityuktaṃ na ca tadanena saṃgṛhītamiti kathaṃ vyāpitā lakṣaṇasya / ucyate / kalpanāpoḍhaṃ yattajjñānarthe rūpādau ityanenārthasākṣātkāritvagrahaṇānmanovijñānaderapi tadavyabhicārātsaṃgṛhītameva tanmānasam / laukikaṃ tu pratyakṣamadhikṛtyāvyayībhāvaḥ / iti kṛtaṃ prasaṅgeṇa / gamanikāmātrametat // anumānamityādi / anumitiramumānam / tacca liṅgādarthadarśanamāliṅgaṃ punastrirūpamuktam / pakṣadharmatvādi / tasmātrirūpālliṅgādyadanumeye 'rthe dharmaviśiṣṭe dharmiṇi jñānamutpadyate kiṃviśiṣṭam? agniratra dhūmāt anityaḥ śabdaḥ kṛtakatvāt tadanumānamiti / udāharaṇadvayaṃ tu vastusādhanakāryasvabhāvākhyahetudvayakhyāpanārtham / adhunā phalamāha / ubhayatretyādi / ubhatra pratyekṣe 'numāne ca / tadeva jñānaṃ pratyakṣanumānalakṣaṇam / phalaṃ kāryam / kutaḥ? / adhigamarūpatvāt / adhigamaḥ paricchedastadrūpatvāt / tathāhi paricchedarūpameva jñānamutpadyate / na ca paricchedādṛte anyajjñānaṃ phalam / bhinnādhikaraṇatvāt / ityatra bahu vaktavyam alaṃ prasaṅgena / sarvathā na pratyakṣānumānābhyāmanyadvibhinnaṃ phalamastīti / āha / yadyevaṃ pramāṇābhāvaprasaṅgaḥ / tabdhāvābhimatayoḥ pratyakṣānumānayoḥ phalatvāt / pramāṇābhāve ca tatphalasyāpyabhāvaḥ iti /

tatra pramāṇābhāvanirācikīrṣayāha / savyāpāravatkhyāteḥ pramāṇatvamiti saha vyāpāreṇa viṣayagrahaṇalakṣaṇena vartate iti savyāpāram / pramāṇamiti gamyate / savyāpāramasyā vidyata iti savyāpāravatī / khyātiriti gamyate / savyāpāravatī cāsau khyātiśca savyāpāravatkhyātiḥ pratītiḥ / tasyāḥ savyāpāravattyāḥ khyāteḥ pramāṇatvamiti / etaduktaṃ bhavati / viṣayākāraṃ jñānamutpadyamānaṃ viṣayaṃ gṛṇhadevotpadyate iti pratīteḥ grāhakākārasya pramāṇateti / anye tu saṃścāsau vyāpāraḥ sadvyāpāraḥ pramāṇavyavasthākāritvātsannityucyate / so 'syā vidyata iti sadyāpāravatī śeṣaṃ pūrvavat vyācakṣate / ityukte pratyakṣānumāne // adhunā pratyekṣābhāsamāha / kalpanājñānamarthāntare pratyakṣābhāsam / etadeva grahaṇavākyaṃ vyācikhyāsurāha / yajjñānaṃ ghaṭaḥ paṭa iti vā vikalpayataḥ śabdāropitamutpadyate / arthāntare sāmānyalakṣaṇe / tadarthasvalakṣaṇāviṣayatvāt / sāmānyalakṣaṇaviṣayatvādityarthaḥ / uktaṃ pratyakṣābhāsam //

sāṃpratamanumānābhāsamāha / hetvābhāsapūrvakaṃ hetvābhāsanimittaṃ jñānamanumānābhāsam / vyabhicārāt / etadeva vyācaṣṭe / hetvābhāso hi bahuprakāra uktaḥ asti vādibhedena / tasmāt hetvābhāsāt yadanumeye 'rthe dharmaviśiṣṭe dharmiṇi jñānam avyutpannasya asiddhādisvarūpānabhijñasya bhavati tadanumānābhāsam / ityuktaṃ pratyakṣādicatuṣṭayam // idānīmuktaśeṣaṃ duṣaṇamabhidhātukāma āha / sādhanadoṣodbhāvanāni dūṣaṇāni / pramāṇadoṣaprakaṭanānītyarthaḥ / bahuvacananirdeśaḥ pratyekamapi pratijñādidoṣāṇāṃ dūṣaṇatvāt / etānyeva daśayīrta / sādhanadoṣo nyūnatvam / sāmānyena viśeṣamāha / pakṣadoṣaḥ pratyakṣadiviruddhatvam / pratyakṣādiviruddhā pratijñetyevamādi / hetudoṣaḥ asiddhānaikāntikaviruddhatvam / asiddho heturityevamādi / evaṃ dṛṣṭāntadoṣāḥ sādhanadharmādyasiddhatvam / tasyodbhāvanamiti / tasya pratyakṣaviruddhahetvādeḥ prakāśanaṃ prāśnikapratyāyanaṃ na tudbhāvanamātrameva / dūṣaṇamiti sāmānyena dūṣaṇajātyanatikramādekavacanamiti / uktaṃ dūṣaṇam // adhunā dūṣāṇābhāsamāha / abhūtasādhanadoṣodbhāvanāni dūṣaṇābhāsāni / abhūtamavidyamānameva tadyataḥ sādhanadoṣaṃ sāmānyanodbhāvayanti prakāśayanti yāni tāni jātidūṣaṇābhāsāni / etadeva darśayati / saṃpūrṇe sādhane avayave nyūnatvavacanam / nyūnamidamityevaṃbhūtam / aduṣṭapakṣe pakṣa doṣavacanam ityādi nigadasiddham / yāvad etāni duṣaṇābhāsāni kim? / ityata āha / nahyebhiḥ parapakṣo dūṣyate / kutaḥ? / niravadyatvātparapakṣasya / ityuparamyate śāstrakaraṇāt //

śāstraparisamāptau tatsvarūpapratipādanāyaivāha / padārthamātramityādi / padārthamātramiti sādhanādipadoddeśamātrama / ākhyātaṃ kathitam / ādau prathamam / diṅmātrasiddhaye nyāyadiṅmātrasiddhayartham / yātra yuktiranvayavyatirekalakṣaṇā / ayuktirvā asiddhādibhedā / sānyatra pramāṇasamuccayādau / suvicāritā prapañcena nirūpitetyarthaḥ //

nyāyapraveśakaṃ yadyākhyāyāvāptamiha mayā puṇyam /
nyāyādigamasukhadaṃ saṃlabhatā bhavyo janastena //

samāptā ceyaṃ śiṣyahitā nāma nyāyapraveśakaṭīkā //

kṛtiriyaṃ haribhadrasūreḥ //