Sivamahimnastava
Based on: The Mahimnastava or Praise of Shiva's Greatness. Edited, translated,
and presented in illustrations by W./ Norman Brown. Poona: American
Institute of Indian Studies 1965.
Etext prepared by Harunaga Isaacson, 2002.
% NB Brown's most important source an inscription on the Amaresvara temple
% at Mandhata in the district of Nimad on the northern
% bank of the Narmada river. Dated Samvat 1120 or 1220 (November 21, 1063
% or October 27, 1163 AD).
PLAIN TEXT VERSION
THIS GRETIL TEXT FILE IS FOR REFERENCE PURPOSES ONLY!
COPYRIGHT AND TERMS OF USAGE AS FOR SOURCE FILE.
Text converted to Unicode (UTF-8).
(This file is to be used with a UTF-8 font and your browser's VIEW configuration
set to UTF-8.)
| description: | multibyte sequence: |
| long a | ā |
| long A | Ā |
| long i | ī |
| long I | Ī |
| long u | ū |
| long U | Ū |
| vocalic r | ṛ |
| vocalic R | Ṛ |
| long vocalic r | ṝ |
| vocalic l | ḷ |
| vocalic L | Ḷ |
| long vocalic l | ḹ |
| velar n | ṅ |
| velar N | Ṅ |
| palatal n | ñ |
| palatal N | Ñ |
| retroflex t | ṭ |
| retroflex T | Ṭ |
| retroflex d | ḍ |
| retroflex D | Ḍ |
| retroflex n | ṇ |
| retroflex N | Ṇ |
| palatal s | ś |
| palatal S | Ś |
| retroflex s | ṣ |
| retroflex S | Ṣ |
| anusvara | ṃ |
| visarga | ḥ |
| long e | ē |
| long o | ō |
| l underbar | ḻ |
| r underbar | ṟ |
| n underbar | ṉ |
| k underbar | ḵ |
| t underbar | ṯ |
Unless indicated otherwise, accents have been dropped in order
to facilitate word search.
For a comprehensive list of GRETIL encodings and formats see:
http://gretil.sub.uni-goettingen.de/gretil/gretdiac.pdf
and
http://gretil.sub.uni-goettingen.de/gretil/gretdias.pdf
For further information see:
http://gretil.sub.uni-goettingen.de/gretil.htm
mahimnaḥ pāraṃ te paramaviduṣo yady asadṛśī
stutir brahmādīnām api tadavasannās tvayi giraḥ |
athāvācyaḥ sarvaḥ svamatipariṇāmāvadhi gṛṇan
mamāpy eṣa stotre hara nirapavādaḥ parikaraḥ || Smst_1
atītaḥ panthānaṃ tava ca mahimā vāṅmanasayor
atadvyāvṛttyā yaṃ cakitam abhidhatte śrutir api |
sa kasya stotavyaḥ katividhaguṇaḥ kasya viṣayaḥ
pade tv arvācīne patati na manaḥ kasya na vacaḥ || Smst_2
madhusphītā vācaḥ paramam amṛtaṃ nirmitavatas
tava brahman kiṃ vāg api suraguror vismayapadam |
mama tv etāṃ vāṇīṃ guṇakathanapuṇyena bhavataḥ |
punāmīty arthe 'smin puramathana buddhir vyavasitā || Smst_3
tavaiśvaryaṃ yat taj jagadudayarakṣāpralayakṛt
trayīvastu vyastaṃ tisṛṣu guṇabhinnāsu tanuṣu |
abhavyānām asmin varada ramaṇīyām aramaṇīṃ
vihantuṃ vyākrośīṃ vidadhata ihaike jaḍadhiyaḥ || Smst_4
kimīhaḥ kiṃkāyaḥ sa khalu kimupāyas tribhuvanaṃ
kimādhāro dhātā sṛjati kimupādāna iti ca |
atarkyaiśvarye tvayy anavasaraduḥstho hatadhiyaḥ
kutarko 'yaṃ kāṃścin mukharayati mohāya jagataḥ || Smst_5
ajanmāno lokāḥ kim avayavavanto 'pi jagatām
adhiṣṭhātāraṃ kiṃ bhavavidhir anādṛtya bhavati |
anīśo vā kuryād bhuvanajanane kaḥ parikaro
yato mandās tvāṃ praty amaravara saṃśerata ime || Smst_6
trayī sāṃkhyaṃ yogaḥ paśupatimataṃ vaiṣṇavam iti
prabhinne prasthāne param idam adaḥ pathyam iti ca |
rucīnāṃ vaicitryād ṛjukuṭilanānāpathajuṣāṃ
nṛṇām eko gamyas tvam asi payasām arṇava iva || Smst_7
mahokṣaḥ khaṭvāṅgaṃ paraśur ajinaṃ bhasma phaṇinaḥ
kapālaṃ cetīyat tava varada tantropakaraṇam |
surās tāṃ tām ṛddhiṃ dadhati tu bhavadbhrūpraṇihitāṃ
na hi svātmārāmaṃ viṣayamṛgatṛṣṇā bhramayati || Smst_8
dhruvaṃ kaścit sarvaṃ sakalam aparas tv adhruvam idaṃ
paro dhrauvyādhrauvye jagati gadati vyastaviṣaye |
samaste 'py etasmin puramathana tair vismita iva
stuvañ jihremi tvāṃ na khalu nanu dhṛṣṭā mukharatā || Smst_9
tavaiśvaryaṃ yatnād yad upari viriñco harir adhaḥ
paricchettuṃ yātāv analam analaskandhavapuṣaḥ |
tato bhaktiśraddhābharagurugṛṇadbhyāṃ giriśa yat
svayaṃ tasthe tābhyāṃ tava kim anuvṛttir na phalati || Smst_10
ayatnād āpādya tribhuvanam avairavyatikaraṃ
daśāsyo yad bāhūn abhṛta raṇakaṇḍūparavaśān |
śiraḥpadmaśreṇīracitacaraṇāmbhoruhabaleḥ
sthirāyās tvadbhaktes tripurahara visphūrjitam idam || Smst_11
amuṣya tvatsevāsamadhigatasāraṃ bhujavanaṃ
balāt kailāse 'pi tvadadhivasatau vikramayataḥ |
alabhyā pātāle 'py alasacalitāṅguṣṭhaśirasi
pratiṣṭhā tvayy āsīd dhruvam upacito muhyati khalaḥ || Smst_12
yadṛddhiṃ sutrāmṇo varada paramoccair api satīm
adhaś cakre bāṇaḥ parijanavidheyatribhuvanaḥ |
na tac citraṃ tasmin varivasitari tvaccaraṇayor
na kasyā unnatyai bhavati śirasas tvayy avanatiḥ || Smst_13
akāṇḍabrahmāṇḍakṣayacakitadevāsurakṛpā
vidheyasyāsīd yas trinayana viṣaṃ saṃhṛtavataḥ |
na kalmāṣaḥ kaṇṭhe tava na kurute na śriyam aho
vikāro 'pi ślāghyo bhuvananbhayabhaṅgavyasaninaḥ || Smst_14
asiddhārthā naiva kvacid api sadevāsuranare
nivartante nityaṃ jagati jayino yasya viśikhāḥ |
sa paśyan īśa tvām itarasurasādhāraṇam abhūt
smaraḥ smartavyātmā na hi vaśiṣu pathyaḥ paribhavaḥ || Smst_15
mahī pādāghātād vrajati sahasā saṃśayapadaṃ
padaṃ viṣṇor bhrāmyadbhujaparigharugṇagrahagaṇam |
muhur dyaur dauḥsthyaṃ yāty anibhṛtajaṭātāḍitataṭā
jagadrakṣāyai tvaṃ naṭasi nanu vāmaiva vibhutā || Smst_16
viyadvyāpī tārāgaṇaguṇitaphenodgamaruciḥ
pravāho vārāṃ yaḥ pṛṣ.atalaghudṛṣṭaḥ śirasi te |
jagad dvīpākāraṃ jaladhivalayaṃ tena kṛtam ity
anenaivonneyaṃ dhṛtamahima divyaṃ tava vapuḥ || Smst_17
rathaḥ kṣoṇī yantā śatadhṛtir agendro dhanur atho
rathāṅge candrārkau rathacaraṇapāṇiḥ śara iti |
didhakṣos te ko 'yaṃ tripuratṛṇam āḍambaravidhir
vidheyaiḥ krīḍantyo na khalu paratantrāḥ prabhudhiyaḥ || Smst_18
haris te sāhasraṃ kamalabalim ādhāya padayor
yad ekone tasmin nijam udaharan netrakamalam |
gato bhaktyudrekaḥ pariṇatim asau cakravapuṣā
trayāṇāṃ rakṣāyai tripurahara jāgarti jagatām || Smst_19
kratau supte jāgrat tvam asi phalayoge kratumatāṃ
kva karma pradhvastaṃ palati puruṣārādhanam ṛte |
atas tvāṃ samprekṣya tratuṣu phaladānapratibhuvaṃ
śrutau śraddhāṃ baddhvā dṛḍhaparikaraḥ karmasu janaḥ || Smst_20
kriyādakṣo dakṣaḥ kratupatir adhīśas tanubhṛtām
ṛṣīṇām ārtvijyaṃ śaraṇada sadasyāḥ suragaṇāḥ |
kratubhraṃśas tvattaḥ kratuphalavidhānavyasanino
dhruvaṃ kartuḥ śraddhāvidhuram abhicārāya hi makhāḥ || Smst_21
prajānāthaṃ prasabham abhikaṃ svāṃ duhitaraṃ
gataṃ rohidbhūtāṃ riramayiṣum ṛśyasya vapuṣā |
dhanuṣpāṇer yātaṃ divam api sapatrākṛtam amuṃ
trasantaṃ te 'dyāpi tyajati na mṛgavyādharabhasaḥ || Smst_22
svalāvaṇyāśaṃsādhṛtadhanuṣam ahnāya tṛṇavat
puraḥ pluṣṭaṃ dṛṣṭvā puramathana puṣpāyudham api |
yadi straiṇaṃ yamanirata dehārdhaghaṭanād
avaiti tvām addhā bata varada mugdhā yuvatayaḥ || Smst_23
śmaśāneṣv ākrīḍā smarahara piśācāḥ sahacarāś
citābhasmālepaḥ srag api nṛkaroṭīparikaraḥ |
amāṅgalyaṃ śīlaṃ tava bhavatu nāmaivam akhilaṃ
tathāpi smart.Rṇāṃ varada paramaṃ maṅgalam asi || Smst_24
manaḥ pratyakcitte savidham avadhāyāttamarutaḥ
prahṛṣyadromāṇaḥ pramadasalilotsaṅgitadṛśaḥ |
yad ālokyāhlādaṃ hrada iva nimajyāmṛtamaye
dadhaty antas tattvaṃ kim api yaminas tat kila bhavān || Smst_25
tvam arkas tvaṃ somas tvam asi pavanas tvaṃ hutavahas
tvam āpas tvaṃ vyoma tvam u dharaṇir ātmā tvam iti ca |
paricchinnām evaṃ tvayi pariṇatā bibhrati giraṃ
na vidmas tat tattvaṃ vayam iha tu yat tvaṃ na bhavasi || Smst_26
trayīṃ tisro vṛttīs tribhuvanam atho trīn api surān
nakārādyair varṇais tribhir abhidadhat tīrṇavikṛti |
turīyaṃ te dhāma dhvanibhir avarundhānam aṇubhiḥ
samastaṃ vyastaṃ tvāṃ śaraṇada gṛṇātīm iti padam || Smst_27
bhavaḥ śarvo rudraḥ paśupatir athograḥ sahamahāṃs
tathā bhīmeśānāv iti yad abhidhānāṣṭakam idam |
amuṣmin pratyekaṃ pravicarati deva śrutir api
priyāyāsmai dhāmne praṇihitanamasyo 'smi bhavate || Smst_28
namo nediṣṭhāya priyadava daviṣṭhāya ca namo
namaḥ kṣodiṣṭhāya smarahara mahiṣṭhāya ca namaḥ |
namo varṣiṣṭhāya trinayana yaviṣṭhāya ca namo
namaḥ sarvasmai te tad idam iti sarvāya ca namaḥ || Smst_29
bahularajase viśvotpattau bhavāya namo namaḥ
prabalatamase tatsaṃhāre harāya namo namaḥ |
janasukhakṛte sattvotpattau mṛdāya namo namaḥ
pramahasi pade nistraiguṇye śivāya namo namaḥ || Smst_30
kṛśapariṇati cetaḥ kleśavaśyaṃ kva cedaṃ
kva ca tava guṇasīmollaṅghinī śāśvadṛddhiḥ |
iti cakitam anandīkṛtya māṃ bhaktir ādhād
varaca caraṇayos te vākyapuṣpopahāram || Smst_31
% pariśiṣṭam: Additional verses in all MSS (!!) but not in the inscription
asitagirisamaṃ syāt kajjalaṃ sindhupātre
surataruvaraśākhā lekhanī patram urvī |
likhati yadi gṛhītvā śāradā sarvakālaṃ
tad api tava guṇānām īśa pāraṃ na yāti || Smst_Add_1
asurasuramunīndrair arcitasyendumauleḥ
prathitaguṇamahimno nirguṇasyeśvarasya |
sakalaguṇavariṣṭhaḥ puṣpadantābhidhāno
ruciram alaghuvṛttaiḥ stotram etac cakāra || Smst_Add_2
aharāhar anavadyaṃ dhūrjaṭe stotram etat
paṭhati paramabhaktyā śuddhacittaḥ pumān yaḥ |
sa bhavati śivaloke rudratulyaḥ sadātmā
pracurataradhanāyuḥ putravān kīrtimāṃś ca || Smst_Add_3
maheśān nāparo devo mahimno nāparā stutiḥ |
aghorān nāparo mantro nāsti tattvaṃ guroḥ param || Smst_Add_4
dīkṣā dānaṃ tapas tīrthaṃ jñānaṃ yāgādikāḥ kriyāḥ |
mahimnas tava pāṭhasya kalāṃ nārhanti ṣoḍaśīm || Smst_Add_5
āsamāptam idaṃ stotraṃ puṇyaṃ gandharvabhāṣitam |
anaupamyaṃ manohāri śivam īśvaravarṇanam || Smst_Add_6
kusumadaśananāmā sarvagandharvarājaḥ
śiśuśaśadharamauler devadevasya dāsaḥ |
sa khalu nijamahimno bhraṣṭa evāsya roṣāt
stavanam idam akārṣīd divyadivyaṃ mahimnaḥ || Smst_Add_7
suragurum abhipūjya svargamokṣaikahetuṃ
paṭhati yadi manuṣyaḥ prāñjalir nānyacetāḥ |
vrajati śivasamīpaṃ kinnaraiḥ stūyamānaḥ
stavanam idam amoghaṃ puṣpadantapraṇītam || Smst_Add_8
śrīpuṣpadantamukhapaṅkajanirgatena stotreṇa kilbiṣahareṇa harapriyeṇa |
kaṇṭhasthitena paṭhitena gṛhasthitena samprīṇito bhavati bhūtapatir maheśaḥ || Smst_Add_9
apūrvaṃ lāvaṇyaṃ vivasanatanos te vimṛṣatāṃ
munīnāṃ dārāṇāṃ samajani sa ko 'py avyatikaraḥ |
yato bhagne guhye sakṛd api saparyāṃ vidadhatāṃ
dhruvaṃ mokṣaṃ līlāṃ kim api puruṣārthaṃ prasavite || Smst_Add_10
vapuḥprādurbhāvād anumitam idaṃ janmani purā
purāre naivāhaṃ kvacid api bhavantaṃ praṇatavān |
naman muktaḥ sampraty atanur aham agre 'py anatimān
maheśa kṣantavyaṃ tad idam aparādhadvayam api || Smst_Add_11
ity eṣā vāṅmayī pūjā śrīmacchaṃkarapādayoḥ |
arpitā tena deveśaḥ prīyatāṃ me sadāśivaḥ || Smst_Add_12
tava tattvaṃ na jānāmi kīdṛśo 'si maheśvara |
yādṛśo 'si mahādeva tādṛśāya namo namaḥ || Smst_Add_13
ekakālaṃ dvikālaṃ vā trikālaṃ yaḥ paṭhen naraḥ |
lambapāśavinirmuktaḥ śivalokaṃ sa gacchati || Smst_Add_14
kīrtanena hi rudrasya pāpaṃ yāti sahasradhā |
pracaṇḍapavanenaiva dhanaṃ jaladamaṇḍalam || Smst_Add_15