Lieder aus »Alte Catholische Geistliche Kyrchengesäng«
Alte Catholische
Geistliche Kyrchen=
gesäng/ auff die fürnemmste
Feste/ Auch in Processionen/
Creutzgängen vnd Kyrchenfährten:
bey der H. Meß/ Predig/ in Häusern/
vnd auff dem Feld zugebrauchen/
sehr nützlich/ sampt einem
Catechismo.
Auß Befelch
Des Hochwürdigen Für=
sten vnd Herrn/ Herrn Eberhar=
ten Bischoffen zu Speir/ vnn Prob=
sten zu Weissenburg/ etc. in diese
ordnung gestellt.
Gedruckt zu Cölln/
Durch Arnold Quentel.
–
Anno M. DC. XXI.
Mit Röm. Keys. May. G. vnd Freyheit.
Gesang von der gnadenreichen zeit der Geburt Christi/ auff die Melodey/ Puer natus in Bethlehem, wie am 36. blat
Djß ist das wahre gülden Jar/
Jn dem Maria Gott gebar/
Lætamini in Domino,
In hoc anno aureo.
Jn diesem Jar jhr Menschen find/
Ein Himmlisch Gold/ ein Göttlich Kind/
Lætamini in Domino,
In hoc anno aureo.
Die Goldgrůb ist ein alter Stall/
Gold/ Gottes Sohn/ das best Metall/
Lætamini in Domino,
In hoc anno aureo.
O gülden Stall/ O Goldgrůb thewr/
O Goldreich/ Gottreich/ güldne schewr/
Lætamini in Domino,
In hoc anno aureo.
Diß Jarzeit bringt den Sonnenschein/
Die Sonn Mariæ Söhnelein/
Lætamini in Domino,
In hoc anno aureo.
Gott ist nit von der Erden weit/
Gleich wie die Sonn vmb Weynachtzeit/
Lætamini in Domino,
In hoc anno aureo.
Die Sonn jhr Liecht nach Christag mehrt/
Wann Gott vns selbst erleucht vnn lehrt/
Lætamini in Domino,
In hoc anno aureo.
O güldē Sonn/ Mensch Gottes Sohn/
Wie Gold/ dein Gnad/ glantzt herrlich schon/
Lætamini in Domino,
In hoc anno aureo.
Christmonat/ da Gott Christum send/
Wird Güldenmonat recht genent/
Lætamini in Domino,
In hoc anno aureo.
Diß Monats fünff vnn zwentzigst tag/
Wol gülden Christag heissen mag/
Lætamini in Domino,
In hoc anno aureo.
Vnd Christnacht ist ein gülden nacht/
Die vns daß gülden Christkind bracht/
Lætamini in Domino,
In hoc anno aureo.
O gülden Jar/ O Gold im Stall/
Daß gülden Kind/ macht gülden all/
Lætamini in Domino,
In hoc anno aureo.
Ein Kripp stund da/ ein hartes bret/
Daß war sein Wieg vnd Kinderbeth/
Lætamini in Domino,
In hoc anno aureo.
Die Kripp war vol stro/ mist vnn wůst/
Da Gottes Sohn auff schlaffen můst/
Lætamini in Domino,
In hoc anno aureo.
Daß hew vnd stro war voller spiß/
Daß stro das stoch/ daß hew das biß/
Lætamini in Domino,
In hoc anno aureo.
Daß Kind so kalt vnd bärmlich arm/
Ein Ochß vnd Esel hauchten warm/
Lætamini in Domino,
In hoc anno aureo.
Der Athem gab ein solchen stanck/
Daß Kind wurd warm/ doch halber kranck/
Lætamini in Domino,
In hoc anno aureo.
So bald daß Vieh den Athem spart/
Schwartz wurd von kält daß kindle zart/
Lætamini in Domino,
In hoc anno aureo.