[Es führt drey König Gottes hand]
Es führt drey König Gottes hand/
Mit einem Stern auß Morgenlandt/
Zum Christkind/ durch Jerusalem/
Jn einen Stall nach Bethlehem/
Gott führ vns auch zu diesem Kind/
Vnd mach auß vns sein Hoffgesind.
Die König waren Weißheit vol/
Jm Himmelslauff erfahren wol/
Vnd gleich als brüder alle drey/
Sich gaben in ein Compagney/
Gott samble Cölln/ durch deine krafft/
Jn diese jhre Brůderschafft.
2.
Der Stern war groß/ vnn wunder schon/
Jm Stern ein Kind mit einer Kron/
Ein gülden Creutz sein Scepter war/
Vnd alles wie die Sonne klar/
O Gott erleucht vom Himmel fern
Die gantze Welt mit diesem Stern.
3.
Auß Morgenlandt in aller eyl/
Kaum dreyzehn Tag viel hundert Meyl/
Berg auff/ Berg ab/ durch Reiff vnnd Schnee
Gott suchten sie durch Meer vnd See.
Zu dir o Gott kein Pilgerfahrt/
Noch Weg noch Steg laß werden hart.
4.
Herodes sie kein Vhr/ noch Stundt/
Jn seinem Hoff auffhalten kundt/
Deß Königs Hoff sie lassen stehn/
Geschwind/ geschwind zur Krippē gehn.
Gott laß vns auch nit halten ab
Vō guten Weg bis zu dem Grab.
5.
So bald sie kamen zu dem Stall/
Auff jhre Knie sie fielen all/
Dem Kind sie brachten alle drey/
Gold: Weyrauch: Myrrhen/ Specerey.
O Gott nimm auch von vns für gut/
Hertz/ Leib vnd Seel/ Gut/ Ehr vnn Blut.
6.
Mit Weyrauch/ vnd gebognem Knie/
Erkanten sie die Gottheit hie:
Mit Myrrhen seine Menschheit bloß/
Vnd mit dem Gold ein König groß.
O Gott halt vns bey dieser Lehr/
Kein Ketzerey laß wachsen mehr.
7.
Maria hieß sie wilkom sein/
Legt jhn jhr Kind ins Hertz hinein/
Das war jhr Zehrung auff dem Weg/
Vnd frey Geleit durch Weg vnd Steg.
Gott geb vns auch das Himmelbrod/
Am letsten Zug/ zur letsten Noth.
Mit solchem Zehrgelt wol versehn/
Zum Vatterland sie frölich gehn/
Jhr zehrung daß süß Kindle war/
Jhr frey geleit ein Engelschar/
Gott geb vns auch am letzten zug/
Die zehrung/ vnn solch Schützen gnůg.
Danck Gott O Cölln/ du edle Stadt/
Der dir die König geben hat/
Dich krönen sie vnd zieren fein/
Vnd werden dein Patronen seyn/
Gott/ dir sey danck/ lob/ preiß vnd ehr/
Durch sie steht Cölln in wahrer lehr.