1127. Da Liab-Fraua-Summa.
Von
J.A.
Pangkofer.
– Sage aus dem Altmühlthal, auch um Passau zu Hause, aber mit der Abweichung, daß hier statt der elftausend Jungfrauen die heidnischen Elben Begleiterinnen der Madonna sind.
Wann koa Bloama mehr blüaht,
Und koa Grasel schiaßt mehr,
Wann da Wind voar eahms Laubat
Treibt rauschat daher;
Nach den duslinga Tag'n
Voll Trüabnuß und Reg'n,
Wann ma wochalang d' Sunna
Kaam blinkatzen seg'n.
An an Samsta af oamal
Dees G'wölkat vofliagt,
Und d' Sunna 's erst Schneebel
Wecklekt und afziagt.
Daß en Samsta voar Abend
Da liaben Frau z' Ehr'n
Dee Sunna muaß scheina,
Kannst alle Tag hör'n.
Daß aba füarn Spaathiargst
Eh's en Schneesack ausschütt
Si an exteran Summa
Vom Herrgotl dabitt, –
Da Unglauben halt's
Füar a daamische Mähr,
I aba woaß bessa
Vom Weitasag'n her.
Mit da Christenlehr hat si
Im freundlinga Gloat
Füar dee heili Liabfrau
Aa d' Vorehrung vobroat,
Vobroat duarch dee Lända,
Wo Hiargst und Auswiarts
A langweiliga Winta
Oft weit übar Miarz
Vonanda thuat halten,
Daß en Summa, meim Oad!
Kaam hundat Täg bleibn,
Daß a reifa kann 's Troad.
Doh kunnt sa si schicka,
Daß ma tausat kunnt zähl'n
Von Wallfahrten-Kirchen
Und kloane Kapell'n
Af Bergnan, in Gründen
Schö baut, wia bekannt,
Da liaben Frau z' Liab
Duarch dee winterli Land.
Dee Liab und d' Vorehrung
Dee hab'n sie scho g'freut,
Net aba dee grausli
Und lang Wintazeit.
Mal wia da Gott Vata
Im besten Hamor,
Da tragt si sei Klag
Und schia woanerli vor.
Dear schmunzelt und sagt:
I kann net vokeahren
Dee uaralt Weltordnung
Da liaben Frau z' Eahr'n.
Sched oamal da Sunna
Hab' i 's ghoaßen, daß si steht;
An sellan Wirrwarri
Han' i sidi vorredt.
Noh, i will mi b'rathen
Mit en Geist und en Herrn,
Und laßt si was macha,
So thuan i 's ja gern.
Dee Liabfrau in ihra Demuat
Koa Wörtel mehr sagt,
Nua diamal beim Suh
A kloan's Anmiarkerl wagt:
Es is net weg'n meina
Zuaraundelt s' eahm still,
D' Uarahndel und d' Kinda
Dabarma ma z' viel.
Der Alten, wer woaß 's,
Ob s' en Auswiarts deleb'n
Und dee Kloana thaats wohl,
Dee erst 's Wurln anheb'n.
Da Liabherr sagt nixen,
Doh sei Muata anschaug'n
Thuat a herzli und laachlat
Mit zwoa feuchte Aug'n.
Es kimmt drüba ge'augat
Schon Allaseel'n schiar,
Und d' Laubagiß genga,
Und 's Gras vobrennt d' G'friar.
An en Samsta voneh
Is 's zon erstenmal z' scheg'n,
Daß a waachlata Sunnschei
Kimmt af Nebel und Reg'n.
Und warm, wiar' um Pfingsten,
Und hell wiar' im Mai
Sieb'n summerli Taag
Genga prächti vobei.
Viel Veigerl im Laubat
Wagn 's Blüaha nohmal,
Viel voblüffte Vögerl
Hell singa duarch's Thal.
Und was sie vokrocha
Wia 's g'wen so naßkalt,
Dees schliaft wida füara,
Dees Jung und dees Alt.
Es schreia dee Kinda
Und tubeln und kraah'n,
Und dee Alten im laablaten
Sunnstrahl si baah'n.
Dee Liabfrau vowoaß si
Vor Dank net und Lust,
Hat hundatmal d' Händ
Dem Gott Vata abkußt.
Vom Monta am Jarta
In a mondhellen Nacht
Da hat dee Liabfrau
A schön's Wunda vollbracht.
Mit dee elftausat Jungfern,
Mit Engerln grad gnua
Ziagt s' duarch alle Land
Ueba Berg, üba Flua.
Vor jedana Jungfer
Fliagt an Engerl voran,
An an güldana Rocka
Hat 's Silbaseid'n dran.
Dee Jungfern unmüaßi
Draahn d' Spindel mit Kunst,
Und All's übaweban s'
Mit silbana G'spunst.
Dee aufgehat Sunna
Trifft Wiesen und Hoad,
Und Felda und Wälda
In an seidana Pfoad.
Es schimmat und flimmat,
Kannst schaug'n kaam hin,
'S hellliacht Thau, gell, roth, blau,
Lauta Edelg'stoa drin.
Z' Mittag'n kimmt a Winderl
In Schloar eini waaht's,
Und glanzate Strehn af
In d' Sunnstrahlen daaht's.
'S fliag'n hin und s' fliag'n wida,
Und hättst rechte Aug'n,
Kunnst d' Heiling und d' Engerl
Aa mitfliagat schaug'n.
Dee hängan an Jadem
A Fahnerl an Huat,
Und haspeln eahm's umi,
Schau, voll Uebamuat.
So hat dee Liabfrau
Mit en prächtinga G'wand
Zon Dank füarn Nachsumma
Voziart ihra Land.
Und alle Jahr wida
Voziart si 's seither,
Und wer si dran freut,
Dazählt weita mei Mähr.