Das liebe-schiff Auf den hochzeitlichen ehrentag Hn: Johann Heins/ vnd jungfraw Elisabeth Cölmersch angekommen vnd vberantwortet:
Ob wohl/ zu dieser zeit/ da man nichts thut/ als krieget/
Die schiffahrt vnd mit jhr fast aller handel lieget/
Rüstt doch des vngeacht Cupido täglich aus
Sein schiff/ vnd reiset jtzt/ fast mehr als sonst/ von haus'.
Er hat ein seltsam schiff/ dran freundlichkeit das ruder/
Der bord ist wanckelmuth/ die wände; mues vnd luder/
Der boden; wunsch vnd wahn/ die stücke; ruhm vnd gonst/
Der proviant darauff ist ehrbarkeit vnnd konst/
Das förderschiff ist lust/ vnd vnlust ist der spiegel/
Die jugend ist d' mast/ die tugend; fahn vnd fliegel/
Das segel; lieblickkeit/ die augen; der compaß/
Die hoffnung vnd geduld; der ancker vnd das glaß.
Der schiffer ist er selbst vnd hat die oberstelle/
Der stewrman ohne stewr ist Hymen sein geselle/
Die bootsmanschafft bedient manch tieff-verliebter gast/
Die waar' ist ware lieb'/ vnd falcher schein; ballast.
Das meer ist stete müh/ vnd seine wilde wogen
Seind neid vnd wäscherey. (weh dem der wird betrogen
durch der Sirenen schaar/ daß er die klippen rührt/
Des schiffbruch ist gewiss/ er ist vnd bleibt verführt)
Die klippen die man hat in dieser fahrt zu meiden/
Seind/ vnzucht/ schande/ spott/ zu spate rew'/ vnd leiden/
Der wind ist trew vnd ernst/ vnd treibet's schifflein fort
Bis an die eh' hinnan/ die ist der rechte port.
Sie ist der rechte port/ sie ist der rechte haven/
In welchem frey erklärt Cupido seine schlaven.
Das ist der rechte port/ der euch herr bräutigam/
Vnd auch der jungfraw braut zu stewre glücklich kam/
An diesem port möcht jhr die segel künlich streichen/
Vnd durch die nütze lieb' einn liebe-nutz erreichen/
Geht schaffet ewren nutz/ nemt ewrer waaren war/
Der handel ist vergönnt/ vnd ausser der gefahr/
Das ist der rechte port/ da werdt jhr unverdrossen
Die tewre jungfrawschafft wol wissen aus zu lossen/
Geht losset nun das schiff/ legt ewre waaren an/
Vnd zeiget mit that/ das jhr profit gethan.