Sonnette
Denen ehrenvesten vnd vorachtbarn herren Hn. Arnold Dilgern Schöpffenherren in der rechten Stat Dantzig. vnd Hn. Johann Rossawen Hn. Valentin Röselern Hn. Michael Bachmann Seinen insonders großgönstigen herren vnd werthen fördern dedicieret gegenwärtige Lehr-sonnette
M. Johannes Plavius.
1. Sey in der that ein Christe
Wer wil ein Christe seyn/ der muß auch christlich leben;
Wer christlich leben wil/ der folge Christo nach;
Wer Christo folgen wil/ der lieb' auch Christi schmach:
Der ehren vngeacht/ welch' jhm die welt kan geben.
Er lass' jhm Christi tod in seinem hertzen schweben/
Vnd mache sich bereit den herben thränenbach
Zu drincken/ Wenn Gott wil/ vnd alles vngemach
Zu leiden wie er sol/ doch mit gedult darneben.
Es bleibet wol dabey; wer Christum angehört/
Der lässt/ was er verbeut/ vnd thut was er jhn lehrt:
Der creütziget sein fleisch mit samt den bösen lüsten.
Wer nu den Herren liebt/ der lieb' jhn in der that
Er wandel' als er jhn zu einem beyspiel hat/
So führt er recht vnd wol den namen eines Christen.
2. Leg' ab die sünde
Lasst vns die böse sucht/ die vns im hertzen klebet
Die lust-seuch' ohne lust/ die allzu schweere last/
Die vns nur träge macht/ die faule sünden-mast/
Den lebendigen tod/ der durch die wollust lebet/
Die schnöde fleischligkeit/ die häftig wieder strebet/
Dem geiste/ der in vns ein lieber lebens-gast
Durch's wort geworden ist/ der sünde fleucht vnd hasst/
Doch meiden/ weil in vns noch kraft zu meiden schwebet!
Nur eilend abgelegt das alte sünden-kleid
Vnd frölich angelegt den rock der heiligkeit!
Last vns des glaubens schwert mit frewdigkeit zu kämpfen
Wie vns verordnet ist/ recht führen/ als wir sehn/
Daß's vormals ritterlich von Christo selbst gescheh'n.
Er giebet schwerth vnd sieg: er kan die feinde dämpfen.
3. Verlass alles
Was wegert sich ein mensch'/ vmb Christum recht zu fassen/
Sein' eltern/ weib vnd kind/ vergänglich gut vnd geld/
Der leute hold' vnd gonst/ die ehre dieser welt/
Die tumme fleisches-lust mit frewden zuverlassen?
Was wegert sich ein mensch' sein leben selbst zuhassen/
Damit er ewig leb'? ein rechter Christen-held
Achtt dieses leben nicht/ behält er nur das feld.
Die stat/ die droben ist/ mit jhren schönen gassen
Eröbert er damit. Es ist zerbrechlich glas/
Wie köstlich es auch scheint: es ist verwelckend gras
Vnd nur vergänglich ding/ was wir allhier verlassen.
Wie wolten wir denn nicht/ in Christo reich zu seyn/
(Der armuth/ schande/ spott vnd herbe todes pein
Für vns erlitten hat) dies' eitelkeiten hassen?
4. Demütige dich
Was wilt du/ asch' vnd staub/ dich rühmen/ vnnd viel prangen
Mit deines herren gut'/ vnd rühmen deine konst/
Dein wissen vnd verstand? Ist's doch des herren gonst.
Wie kömmest du so stoltz vnd frech einher gegangen
In deiner eitelkeit? die röthe deiner wangen/
Die gläserne gestalt/ die mutter böser brvnst/
Die doch wie laub verfällt/ erweckt dir solchen dvnst
Vnd hast du ja was guts/ so hastu es empfangen.
Darumb stoltziere nicht. Der höchste bleibt gefliessen
Dem/ der die demuth liebt. Der stoltze kriegt zu lohn'/
Als er verdienet hat/ schmach/ schande/ spott vnnd hohn
Vnd neben dem ein bös' vnd sehr verwundt gewissen
Darumb so hoch du bist gewürdiget von Gott/
So niedrig achte dich/ so wirst du nicht zu spott.
5. Liebe
Wer viel geliebet hat/ dem wird auch viel vergeben/
Denn liebe decket auch der sünden menge zu:
Sie füllet das gesetz' vnd gibt dem hertzen ruh:
Lieb' ist des weinstocks saft/ an welchem wir als reben
Voll süsser fruchtbarkeit durch vesten glauben kleben
Vnd bleiben ewiglich/ an dem wir hangen nu:
Welch' vngewitter ist wol das vns schaden thu?
Gott wartet vnser selbst/ vnd gibt vns saft zu leben.
O liebe/ höchstes gut/ du bist das süsse band/
Das vns mit Gott verbindt: du bist des geistes pfand/
Ja selber Gott vnd geist: durch dich kan man erkennen
Wer Christi jünger ist: die ware brüderschafft
Des nähsten ligt an dir: durch dein' vnnd glaubens kraft/
Lässt sich der liebe Gott einn lieben vater nennen!
6. Gleübe
Sol dich Gott reinigen von allen deinen sünden/
Damit du bist beschmutzt; sol er an kindes stat
Dich auf zu nehmen/ seyn/ wie er versprochen hat/
Vnd sol sein guter geist sich in dein hertze finden:
Sol er dein kaltes hertz' in heisser lieb' entzünden/
Sol er dich mit genad' vnd güte machen satt/
Sol er dich/ der du sonst zum streiten träg' vnd matt/
Ermuntern/ daß du die welt mögst überwinden/
So musst du/ wie du solt (durch einen waren glauben/
Dem alles möglich ist/ der alles überwindt/
Der allezeit bey Gott/ was er nur suchet/ findt/)
Mit höchster zuversicht dich jhm allein vertrawen/
Du must jhm nach d' schrift/ ohn' allen falschen schein
Der stoltzen heucheley/ trew' vnd gehorsam seyn.
7. Hoffe:
Wenn vns des Herren hand vnd strafe hat getroffen/
Daß auch die besten freund' vns abgestorben seyn/
Vnd wir in solcher noht nicht wissen aus noch ein/
Dieweil vns aller trost vnd hoffen ist ersoffen
In vnser thränen-see/ vnd nichtes mehr zuhoffen
Von menschen übrig scheint/ als nur der tod allein/
Der vns dem leid' entnimmt vnd tödtet vns der pein/
So steht/ Herr/ deine güt' vns noch zu hoffen offen.
Wer sich auf fleisch verlässt/ vnnd wer auf menschen hofft/
Die sterblich seyn/ wie er/ den treugt sein hoffen oft.
Daß er mit schaden vnd durch harren wird zum narren.
Er hat für das er hofft des höchsten fluch zu lohn'
Vnd von der welt wird jhm zum schaden spott vnd hohn.
Das heisst/ wer hoffen wil/ der sol des herren harren.
8. Dulde:
Wenn Gott vns durch sein wort im geiste wil ernewen/
So schicket er vns zu/ was vns im dulden übt/
Vnd machet vns geschickt zu nemen/ wenn er gibt/
Was vnser hertze kan zu seinem dienste beügen.
Gott wil vns/ wenn er straft/ sein vaterhertze zeigen:
Er liebet/ den er straft/ er strafet/ den er liebt.
Drümb leidet mit gedult. Denn/ wen er hie betrübt
Seyd frölich vnd getrost/ den wird er dort erfrewen.
Was diese welt verwirfft/ das hat in jener stat
Wer hie in dieser welt mit Christo mangel hat/
Den kan vnd wil er dort mit seiner völle weiden.
Wen diese welt erhebt/ ist jener welt ein spott.
Wer hie dem herren dient/ der herschet dort mit Gott/
Wer dort mit herschen wil/ der muss auch hie mit leiden.
9. Faste:
Wird dir das fleisch zu starck/ vnd suchet an zutasten
Den fast-zu schwachen geist: wenn geiler übermuth
Bestreitet vnd bestürmt dein faules fleisch vnd bluth/
Wenn der begierden heer nicht ruhen läst vnd rasten
Dein hertzenloses hertz': als wollust aus dem kasten/
(Den die vernunft bewacht vnd halten sol in hut)
Sich ausgebrochen hat/ so deücht mich/ ist es gut/
Daß du dich männlich weer'st mit beten vnd mit fasten.
Mit fasten nimmet man der lust den proviant/
Der lust/ der bösen lust/ die/ mehr als gut/ bekant.
Mit beten schläget man den feind des geistes nieder:
Die stete mäßigkeit ist dieses feindes grab:
Läst du jhm zeit vnd raum/ er siht den vortheil ab:
Nim deiner schantzen war: wo nicht; er kömmet wieder.
10. Bete:
Wer der mahl eins gedenckt/ für Gottes thron zu treten:
Wem Gott das hertze sol mit gnaden öl' vnd wein/
Erweichen/ welches ist verhärtet als ein stein:
Wer sünd' vnd laster wil/ die tief in jhm durch steten
Brauch eingewürtzelt seyn/ auß seinem hertzen gehten:
Wer für des Satans list wil frey vnd sicher seyn/
Vnd wen nicht treffen sol der höllen schwere pein:
Der muss ohn' vnterlaß im geist' vnd warheit beten.
Drumb wenn du beten wilt/ so sey dein sinn gerichtt
Auf nichts als nur auf Gott: vnd was die zunge spricht
Das red' ein fewrig hertz' es müssen die gedancken
(Wenn du recht beten wilt/ vnd Gott dich hören soll)
Seyn aller bosheit lär/ ja geist vnd glaubens voll/
Mit zuversicht erfüllt/ mit hoffnung/ ohne wancken.
11. Dancke
Der vns geschaffen hat/ von dem wir alles haben
Was wir bedörftig seyn/ der vns erlöset hat/
Durch den man heilig wird; vnd der uns frü vnd spat
Beschirmet/ vnd versorgt/ der hertz' vnd geist zu laben
Vns geist vnd labsal gibt/ der auch die jungen raben
Nicht ungespeiset lässt: nach dessen weisen rath
Vns erde/ luft vnd meer bezeugen in der that
Den milden überfluss vnd reichthum seiner gaben
Der vns/ zu vnserm nutz'/ hat dieses grosse rund
Worauf wir stehn vnd gehn geleget in den grund:
Der alle ding' erhält in jhren ordnungs-schrancken.
Der alles ist vnd kan/ der alles schafft vnd thut:
Der mit der that beweisst/ er sey das höchste gut.
Ach wiltu/ liebe seel'/ ach wilt du dem nicht dancken!
12. Lobsinge
Wiltu dem höchsten Gott' ein lippen opfer bringen
Auf seinen danck-altar (gleich wie du bist verpflichtt)
So siehe/ daß es dir an andacht nicht gebricht/
Wofern' es sol zu Gott hindurch die wolcken dringen.
Wo nu des Herren geist/ ein geistlich lied zu singen/
Dein hertze geistig macht/ vnd es zur andacht richtt/
So ist es recht gestimmt/ vnd gar kein zweifel nicht
Es werde deine stimm' in Gottes ohren klingen.
Drümb wenn du singen wilt/ so bitte Gott zuvor
Vmb seine gnad' vnd geist/ vnd heb' als dann empor
Ein reines hertz' in Gott. Den singen ist nicht schertzen
Wenn's Gott erhören sol. Wer nu an betens stat/
Den herren loben wil/ vnd lust zu singen hat/
Der sing'/ vnd spiele Gott'/ im geist aus reinem hertzen.
13. Höre
Wer sich des teufels wil mit Gottes hülf erwehren/
Vnd wer wil sicher seyn für seinen seelen mordt/
Den er zu tag' vnd nacht/ mit list vnd eifer/ fort-
Zustellen embsig ist; vnd wen Gott sol bekehren/
Wen er des lebens weg/ durch seinen geist sol lehren/
Daß er nach dieser zeit komm' an den frewden ort/
In 's haus der ewigkeit: der muss des lebens wort
Mit lebendiger lust vnd höchster andacht hören/
Wem aber dieses wort die seele sol erneeren/
Durch glauben/ den es gibt/ vnd den es kan vermehren/
Der wiederstrebe nicht des allerhöchsten rath'
Er prüfe mit der schrift/ was er vom lehrer höret/
Er lebe/ wie man jhn aus Gottes worte lehret/
Ein rechter hörer ist ein hörer in der that.
14. Vergib
Wilt du/ wie sichs gebürt/ mit deinem nähsten leben
In ungefärbter lieb'/ vnd ohne falschen schein/
In warer brüderschafft/ wilt du ein Christe seyn/
Wilt du mit zuversicht/ vnd ohne knechtisch beben
Zu Gott in seinen thron dein hertz' vnd stimm' erheben/
Vnd er dich hören sol/ wilt du der höllen pein
Entfliehen/ so must du (wie Christlich ist vnd fein)
Dem nähsten bald vnd gern/ ja schlecht vnd recht vergeben?
Bald; daß dich nicht der tod mit schrecken übereile/
Gern; daß dir auch der Herr vergebe deine feile/
Schlecht; daß sich dein hertz' auch kan geben zu der ruh/
Recht; daß der Herre nicht die falscheit seh' vnd räche/
Drumb/ wilt du/ daß dich Gott von sünden ledig spreche/
So thu dem nähsten/ was du wilt/ das dir Gott thu.
15. Sey nicht rachgierig
Dien'st du dem Herrn alhier in seinen zelten/
Vnd wiederfährt dir schad' vnd vngemach/
So dulde dich/ es ist des herren schmach/
Vnd zörne nicht. Des menschen zorn thut selten/
Was Gott behagt/ wer lästern wil vnd schelten/
Wenn man jhn schmäht/ vnd ist zur rache jach/
Der folget nicht dem herren Christo nach/
Die rach' ist sein/ er kan vnd wil vergelten.
Du wilt/ Gott sol dich quit vnd ledig sprechen/
Du bittest jhn/ er wolle deine schuld
Vnd missethat vertragen mit gedult/
Vnd du begeerst nicht deinen muth zu brechen.
Wer rache sucht/ den hat der zorn verführt.
Rach' ist ein werck/ das Gott allein gebiert.
16. Lass dir genügen
Geitz ist ein schändlich ding: geitz lehrt den menschen lügen:
Geitz ist der dieberey vnd aller schalckheit voll:
Geitz thut nicht/ als ein Christ an Gott vnd menschen sol:
Geitz stiftet zanck vnd mord: geitz heisst die fürsten kriegen:
Geitz macht des näh'sten noth vnd läst jhn drinne liegen:
Geitz macht den menschen stoltz frech/ gottloß/ wild vnd toll/
Vnd thut jm selbst kein gut: geitz ist des teufels zoll:
Darumb wer witzig ist/ der lässet jhm genügen.
Wer jhm genügen läst/ der ist vnd bleibet reich;
Der reichste geitz-hals ist jhm nicht im ringsten gleich
Ihm ist am überfluss' vnd reichtum nicht gelegen:
Der geitz ent-menscht jhn nicht: er wacht vnd schläft mit ruh:
Er bringet seine jahr' in stiller freyheit zu
Er schmäckt bis in den tod den reichen Gottes segen.
17. Gib gerne:
Wilt du dem höchsten Gott' auf wucher etwas geben/
So gib dem dörftigen/ vnd lass jhn nicht in noth/
Wo du jhm helffen kanst: der schlägt den bruder tod/
Des er sich nicht erbarmt. Wer gerne gibt/ ist eben
Als ein gesegnet land; vnd eine von den reben/
Die Gottes hand gepflantzt. Darumb/ so brich dein brodt
Dem/ der da hunger hat/ vnd liegen muss im koth'/
Als denn so wirst du wol von Gottes renten leben.
Was du dem armen thust/ was du dem armen giebst/
Wenn du dem armen hilffst/ wenn du den armen liebst/
Des nimmt sich Christus an/ als wär' es jhm geschehen.
Thu guts vnd fahre fort ohn alle müdigkeit.
Gib reichlich/ wo du kanst mit lust vnd fröligkeit.
Wer reichlich ernden wil/ der mus auch reichlich säen.
18. Liebe den feind:
Fast nichts ist in der schrift/ das mehr vnd schwerer scheint/
Als wenn der Herre wil/ daß man den feind sol lieben/
Daß man den retten sol/ der vns sucht zubetrüben
Daß man den gutes thue/ die vns gehässig seind.
Ein heid' ist nicht so blind/ er liebet seinen freund/
Das hat jhm die natur in 's hertz' hinnein geschrieben.
Bist du mehr als ein heid' vnd wilt den glauben üben
Wie Christus hie befihlt/ so liebe deinen feind.
Wenn er dich nun verflucht/ so wünsch' jhm Gottes segen:
Wenn er dir böses thut/ so sey du ihm hergegen
Geneigt/ vnd bitte Gott für jhn/ doch ohne schein:
Wenn dein feind hunger hat/ so gib jhm deiner speise
Vnd tränck jhn/ wen jhn dürst (das ist der Christen weise)
So wirst du Gott dem Herrn mehr als ein heide seyn.
19. Arbeite fleissig:
Was deines amtes ist/ das thue mit allem fleiß/
Thu was dir möglich ist den abend als den morgen
In steter Gottesforcht/ lass Gott den vater sorgen
Vnd meide müssiggang/ als glat vnd schlipfrig eis/
So wird des Herren mund dir deinen sauren schweiss
Mit segens süssigkeit versüssen/ ohne borgen.
Wem das gestohlne brodt nur schmäckt/ wird dran erworgen
Eh' er sich des versieht. Ehr ist der arbeit preis.
Wer nu mit Gotte wil des mangels sich erwehren
Vnd wil die seinen auch versorgen vnd erneeren
Wie recht vnd christlich ist/ der dencke spat vnd früh
Zu meiden dieberey/ zu brauchen seiner hände/
Vnd sorge weiter nicht. Des Herren güt' ohn' ende/
Sein segen ohne maas macht reich ohn alle müh.
20. Rede die warheit:
Ein Christe sol die warheit nicht verschweigen/
Vnd setzt jhm gleich fleisch/ welt vnd teufel zu/
Ein lügenmaul hat weder rast noch ruh/
Vnd lässet sich mit gut vnd gelde beügen.
Ein Christen-mensch' acht't weder fahr noch drewen
(Der lügen trotz vergeht in einem nu.)
Vnd vngeacht/ was man jhm darümb thu/
Förchtt er doch nicht/ die warheit zu bezeugen.
Drümb/ wer du bist/ befleisse dich der warheit/
Vnd lüge nicht/ denn jhre schön' vnd klarheit
Kömmt doch an'n tag. Gott läst sie nicht in noth.
Wer lügen liebt/ der liebet auch den teufel
Der sie gebiert/ vnd stürtzt sich ohne zweifel
In sein verderb in jammer noth vnd tod.
21. Richte nicht:
Du sagest wol von vielen glaubens früchten/
Vnd lebest doch nicht wie man leben sol:
Du steckest selbst fast aller boßheit voll/
Vnd darfest noch den nähesten vernichten:
Du wilt ja zwar des näh'sten händel schlichten/
Vnd lebest selbst in zwitracht/ zorn vnnd groll.
O heücheley: der leb' erst selber wol
Vnd seh auf sich wer andere wil richten/
Wer jederman nur tadeln wil vnd lehren/
Der muss gar oft sein' eigne mängel höhren:
Wer gerne siebt/ wird wiederumb gesicht.
Wer andere schilt/ wer andre schimpft vnd strigelt/
Wird offtermals/ wie er verdient/ geprügelt
Drümb richte nicht/ so wirst du nicht gerichtt.
22. Verdamme nicht:
Was schlägst du viel durch deinen blinden bann/
Den/ der da nicht/ wie du wohl gleübest/ gleübet/
Den/ der da nicht/ wie du verbleibest/ bleibet/
In deinem wan? ein frommer Christe kan
Wol seelig seyn/ vnd steigen himmel-an/
Wann er schon nicht wie du wol schreibest/ schreibet/
Auch alles nicht/ wie du es treibest/ treibet.
Die that beweist einn rechten Christen-mann.
Was urtheilst du doch deines herren knecht?
Bedencke nur/ wer hat in allem recht/
Was er vermeint. Ein mensche kan wol irren/
Drümb rath' ich dir: verdamme den ja nicht/
Der Christum liebt. Wer weiss/ was dir gebricht?
Des Herren wort wird keinen nicht verwirren.
23. Sey sanftmüthig:
Ein Christe sol auch sanftes muthes seyn.
Ein sanfter muth kan übersehn vnd hören:
Ein sanfter muth kan mit verstande lehren/
Ein sanfter muth kömmt leichtlich überein
Mit jederman: ein sanfter muth steht fein/
Ein sanfter muth wird viel zum besten kehren/
Ein sanfter muth kan lieb' vnd freundschaft mehren/
Ein sanfter muth verhütet falschen schein/
Ein sanfter muth kan seinen herren neeren/
Ein sanfter muth bringt viel zu grossen ehren/
Ein sanfter muth verhütet manche pein/
Ein sanfter muth kan mord vnd krieg erwehren
Drümb bitte Gott er wolle dir bescheeren
Ein sanft gemüth' vnd seine gnade drein.
24. Sey keüsch vnd züchtig
Gott ist ein keüscher geist: Gott ist ein keüsches wesen
Sein zorn ein fressend fewr/ welchs böse lüste frisst
Drumb wer jhm dienen wil/ meid' allen stanck vnd mist
Der faulen hurerey/ eh Gott mit seinem besen
Jhn selbst zur strafe zeücht. Wer vnzucht hat erlesen
Daß sein gantz hertz' vnnd sinn darinn' ersoffen ist/
Reisst jhn der tod hinweg durch vnvermeinte list/
Des seele/ gleube mir/ kan nimmermehr genesen!
Warümb? Denn böse lust läst keinen nicht mit beten
Für Gottes angesicht' in reiner andacht treten.
Vnd hält den menschen ab/ daß er sich nicht bekehrt
Wer keüsch vnd züchtig ist wird Gott den herren schawen
Dort steht-vnd tähtiglich/ vnd hier in warem glauben
Wer reines hertzen ist/ der wird von Gott geehrt.
25. Sey friedlich:
Gott ist ein friede-Gott/ wer sich mit Gott verbinden
Vnd ihm gefallen wil/ der meide hass vnd neid/
Er meide zorn vnd zanck/ er meide krieg vnd streit/
So meidet er gefahr beneben vielen sünden.
Sein hertze wird in Gott viel trost vnd frewd' empfinden
Als der sich gegen jhn gantz väterlich erbeut/
Vnd dem das kind-schaff: recht durch Christum ist bereit.
Wer friedlich friede sucht/ der wird auch friede finden.
Wer derowegen nun ein Gottes kind wil seyn
Der sey ein friedlich schaf vnnd nicht ein hawend schwein.
Er leide was er sol/ vnd werde nimmer müde/
Er suche fried' vnd ruh' vnd jag' ihm stetig nach/
Er sey der lieber litt'/ als daß er friede brach/
Er hab'/ ist's mögelich/ mit allen menschen friede.
26. Sey barmhertzig:
Wilt du/ daß sich deiner seele
Der getrewe fromme Gott
Soll' erbarmen/ die der tod
Naget/ in des leibes höhle:
Daß er deine sach' erwehle/
Wenn du hier/ in fahr vnd noth/
Essen must dein thränen brodt/
Daß er deine tritte zähle/
Sol dein hertze sich des armen/
Auch in seiner noth erbarmen/
Wenn jhm hülf' vnd trost gebricht/
Wenn er noth vnd mangel leidet/
Wenn er sich mit thränen weidet/
Wie du jhm denn bist verpflichtt.
27. Zörne nicht:
Weil menschliche natur durch sünde thun geschwächt ist/
Vnd jhr die sünden lust/ vnd wesen dieser welt/
Mehr als des Herren weg' vnd was er wil/ gefällt/
So lange noch ein mensch durch sünd' ein sünden knecht ist/
So lange thut sein zorn auch nicht was für Gott recht ist.
So lang' ein mensche noch von eitelkeiten hält/
So lang' er die vernunft nach den begierden stellt
So lange hasst sein zorn/ was für Gott recht vnd schlecht ist.
Drümb hüte dich/ der zorn beraubet die vernunft:
Zerrüttet vns den witz; verwüstet das gemüthe;
Verheeret den verstand; verderbet das geblüthe;
Entmenscht den menschen gantz; verstöst jhn in die zunft
Der wilden thiere hin: er macht des menschen willen
Des Satans willen gleich/ vnd läst sich nichtes stillen.
28. Schweere nicht leichtfertig/ viel weniger fälschlich
Wer Christum liebt/ der sol nicht leichtlich schweeren
Vnd muss er ja/ so denck' er allezeit/
Der alles hört/ der hör' auch seinen eid.
Drümb sol er sich an keinen menschen kehren/
Wenn man jhn dringt (der vnwahrheit zu wehren)
Einn eyd zu thun: jhn mache weder neid/
Noch hass/ noch gonst der warheit vnbereit:
Er schweere nicht zu wieder Gottes ehren.
Wer leichtlich schweert/ dem ist nicht viel zu trawen:
Wer fälschlich schweert/ verleugnet seinen glauben/
Vnd ist nicht werth/ daß er ein Christe heisst.
Wer sich nu nicht mit schweeren wil beschweren/
Der richte nur den eid zu Gottes ehren/
Den er zustewr der warheit thut vnd leistt.
29. Hüte dich für fressen vnd sauffen:
Wo man den ohne grund/ den faulen hund/ den bauch/
Den lebendigen tod mit sauffen vnd mit fressen/
Mit leckerey vnd mast/ mit stopfen vnd mit pressen/
Als einen abgott/ ehrt: wo man des magens schlauch/
Zu füllen tag vnd nacht/ hält für einn steten brauch/
Vnd wo hertz' hirn vnd geist vom sauf-geist' ist besessen/
Da ist der heilge geist vnd gottes forcht vergessen/
Da ist vernunft/ verstand vnd ehrbarkeit nur rauch.
Die tumme drunckenheit ist aller laster zunder;
Der schlimsten lüste fewr; der ärgsten sünden plunder;
Ja aller ehren gift/ vnd aller tugend tod.
Daß nu/ mit drunckenheit dich nicht die alte schlange/
Wenn du dich's nicht versiehst/ gantz hinterlistig fange/
So hüte dich mit fleiß/ sonst stürtzt sie dich in noth.
30. Hüte dich für sorge der narunge:
Wie deucht dich/ solte Gott das liegen vnd nicht schlafen/
Das wachen ohne ruh/ das haben ohne brauch/
Das brauchen ohne nutz/ den schädelichen rauch/
Den abschewlichen grind vnd räud' an seinen schafen
Das tödten ohne hand/ das morden ohne wafen
Das sterben ohne tod/ die todesfurcht/ vnd auch
Die lebensforcht zugleich/ das sorgen für den bauch
Die gross' abgötterey zu seiner zeit nicht strafen?
Was thut der arme mensch? jhn plagen ferne sorgen
Vnd ist doch vngewiß/ ob er den näh'sten morgen
In seiner schlaverey erlebet oder nicht?
Gott der die vögel speist/ die blumen schmückt vnd zieret/
Verlässt den menschen nicht. Thu nur/ was dir gebüret/
Traw' jhm/ vnd sorge nicht/ er weiß/ was dir gebricht.
31. Vertrawe Gott:
Verhoffst du dermaleins des Herren gut zu schawen
Im lande/ da man nichts vom tod vnnb sterben weiss/
Im lande/ da Gott selbst der lebendigen preiss
In ewigkeit verbleibt/ so must du durch den glauben/
Der vest' vnd thätig ist/ auf Gott allein vertrawen.
Wer auf sich selber bawt/ der bawet nur auf eis:
Wer aber Gott vertrawt vnd bawt auf jhn mit fleiss/
Der kan das himmelreich noch hier auf erden bawen.
Vnd warumb woltest du nicht gäntzlich dich verlassen/
Auf den/ der diese welt mit einer hand vmbfassen
Vnd dich erretten kan/ auf den/ den alles ehrt/
Der dich alleine kan erhalten vnnd erneeren/
Der deine seeligkeit/ zu seines namen ehren/
Von hertzen sucht/ vnd der vmb deinet willen schweert.
32. Wirff die perlen nicht für die säwen:
Wie mancher hund hat vns/ Herr Christ'/ vmbgeben?
Wie manche rott' ist vmb die deinen her?
Wie ist man doch den deinen so gefähr?
Wie trachtet vns nach seele leib vnd leben
Der böse feind? wer kan jhm wiederstreben/
Als du allein? er wütet als ein bär/
Nach vnserm bluth' ist alle sein begehr.
Wie manches schwein verwüstet deine reben?
Deswegen/ wer ein solcher hund wil seyn/
Vnd schaden thun wie solch ein lasterschwein/
Wer lüste liebt/ wer hawen wil vnd beissen/
Vnd weltzet sich durch allen sünden koth/
Der dencke nicht/ daß jhm des lebens brodt
Zu theile wird/ er lasse denn sein reissen.
33. Meid' abgötterey:
Nicht der allein der sich für götzen beuget/
Der einen gott (nach menschen wahn erdichtt/
Den menschen hand gemacht vnd aufgerichtt)
Zum gotte macht/ der sich für bildern neiget/
Vnd jhnen noch mit andacht ehr' erzeiget/
Ist abgöttisch. Wer zu dem gelde spricht:
Du bist mein Gott; wer seine zuversicht
Auf menschen stellt: wer seinen lüsten fräwet.
Wer seinen bauch als einen abgott ehrt/
Vnd wie der bauch befielet gleübt vnd lehrt
Der/ gläube mir/ ist auch ein götzengrüsser.
Wer ein geschöpff' als seinen schöpffer liebt/
Vnd jhme das/ was Gott gebieret/ giebt/
Ist albereit ein grober bilderküsser.
34. Förchte Gott:
Der alles sieht/ was hie die menschen treiben/
Der alles hört/ was menschen-zunge spricht/
Der was ein mensch gedencket weiss vnd richtt/
Vor deme nichts kan vnentdecket bleiben/
Der alles läst in sein gedenck-buch schreiben/
Der wenn er wil/ der menschen hertze bricht/
Der schrecklich straft/ die jenen die sich nicht
Mit gottesforcht bey zeit' jhm einverleiben.
Den förcht' o mensch'/ vnd lass dich nicht verblenden
Des Satans donst/ hör' jhn nicht/ wenn er spricht:
Thu was du wilt/ der herre siht es nicht.
Solt' er nicht sehn/ der doch an allen enden
Sich spüren läst/ vnd selber ist das liecht.
Drümb förchte Gott/ wie du ihm bist verpflichtt.
35. Sey der Obrigkeit vnterthan:
Ein Christe sol ohn' alles wiederstreben
Gehorsam seyn der lieben Obrigkeit/
Vnd alles thun was Gott durch sie gebeut/
Auch ohne zwang/ was jhr gebüret geben.
Der Obrigkeit sol man mit leib vnd leben
Mit gut vnd bluth' im nothfall seyn bereit/
Doch weiter nicht. Die seel' ist allezeit
Des der sie gab/ vnd keinem mehr daneben.
Drumb rath' ich dir/ daß du zuwiederstreben
Nur vnterlässt: es kostet dich dein leben/
Sie führt das schwert vnd ist an Gottes statt:
Gib ehr' vnd forcht/ wem ehr' vnd forcht gebüret/
Doch sey die forcht mit lieb' vnd gonst gezieret/
Auß dessen forcht/ der sie geordnet hat.
36. Ehre vater vnd mutter:
Die dich von jugend auf/ nicht ohne schweiss zu neeren
Von hertzen willig seyn/ vnd die von denen du
Nähst Gott das leben hast/ vnd die da noch dazu
Seyn tag vnd nacht bedacht das gute dich zu lehren/
Die nimmermehr verdreust das böse dir zuwehren/
Die/ welche wegen dein nicht achteten der ruh
Vnd schliefen ohne schlaf/ die jederzeit auch nu
Für dich in sorgen stehn/ ach wilt du die nicht ehren?
Der fewer-heisse zorn des Herrn wird die verzehren/
Die eltern leides thun vnd sich nicht wollen kehren/
(Welchs doch Gott haben wil) an jhrer eltern wort:
Wer aber hört vnd folgt/ den wil der Herr' erhören/
Wenn er nur zu jhm schreyt er wil jhm auch verehren/
Ein langes leben hier vnd grosse frewden dort.
37. Lerne was gutes:
Wer seine junge zeit nicht läst vorüber traben/
Vnd ist darauf bedacht/ was jhm begegnen kan/
Der legt die zarten jahr' in ehr' vnd tugend an.
Es ist ein edel ding an einem jungen knaben
Vnd vieles lobens werth/ was guts gelernet haben.
Konst bringet vnverhofft oft manchen dahin an/
Dahin noch neid noch gonst hintreffen kan die ban.
In wachem fleiss' vnnd konst liegt mancher schatz begraben.
Wer derowegen lust zu ehr' vnd tugend hat/
Weil noch die jugend blüht/ vnd dencket früh vnd spat/
Wie er/ wenn er erwächst mit Gott sich mög' erneeren/
Der meide müssiggang/ vnd liebe steten fleiß/
Er hasse süssen schlaf/ vnd liebe sauren schweiß
Vnd lasse sich mit fleiss' in seiner jugend lehren.
38. Sey ehrerbietig:
Wer jederman gebürend' ehr' erzeiget/
Wie billich ist/ den liebet jedermann/
Man lobet jhn als einen biedermann/
Man bleibet jhm gewogen vnd geneiget.
Wen aber noch die demut nicht gebeüget/
Der hält von sich/ vnd siehet keinen an/
Darumb/ wer nicht einandern ehren kan/
Der ist noch nicht der tugend eingeweihet.
Er ist ein holtz/ zwar stoltz/ doch ungehobelt/
Vnd wär' er auch beluchset vnd bezobelt/
So gucken doch die langen ohren aus.
Drumb bist du klug/ so folge meiner lehre/
Gib jederman/ wie dir gebühret/ ehre.
Ein Christen hertz' ist aller tugend haus.
39. Sey freundlich:
Ein freündlich wort mit freundlichen gebärden
Erweichet offt des harten feindes sinn/
Ein freundlich hertz' hat seinen anbeginn
Vom himmel her/ vnd wird geliebt auf erden.
Ein mensche/ der den ungezämten pferden
Sich ähnlich stellt/ hat alle gonst schon hin/
Man wil sein nicht/ das hat er zu gewinn.
Wer freundlich ist/ wird reich an freunden werden.
Die freundlichkeit sol jeder an sich haben
Wer Christi ist/ als eine von den gaben
Die Gottes geist den gläubigen ertheilt.
Wer freundlich ist/ kan freund' aus feinden machen.
Mit freundlichkeit verträgt man schweere sachen
Mit freundlichkeit wird alter hass geheilt.
40. Liebe gerechtigkeit:
Wer Christo dient/ vnd sein getrewer knecht ist/
Der liebt vnd thut/ was jhn der herre heist/
Er hasst vnd läst was jhm 's gesetz verweist
So viel er kan: er macht nicht krum/ was schlecht ist.
Er bilget nichts/ als nur was gut vnd recht ist/
Er lobet nichts/ als was die warheit preist/
Siht er/ daß wer des vnrechts sich befleisst/
So redt er drümb/ vnd weist/ wo 's recht geschwächt ist.
Drümb lobst du recht so-lieb' vnd thue es auch
Gerechtigkeit bestehet durch gebrauch
Vnd in der that/ sie führt einn Christen wandel/
Gerechtigkeit läst jederman in ruh:
Gerechtigkeit theilt jedem sein theil zu:
Gerechtigkeit vervortheilt nicht im handel.
41. Treibe nicht schinderey:
Wie kanst du dich der vnthat vnterwinden/
Daß du mit list (welchs doch kein Jude thut/
Kein Türck' auch nicht/ auß forcht der höllen gluth)
Dich vnternimmst den nähesten zu schinden?
Du kömmest fort/ dein näh'ster bleibt dahinden/
Du raubest jhm/ wenn du jhm leihst sein gut/
Dein wucher frisst jhm ehre fleisch vnd bluth/
Du bluthund du! Gott wird dich wieder finden.
Du führest zwar den nahmen eines Christen
Vnd prangst damit/ vnd läst dich doch gelüsten
O heucheler/ des nähesten sauren schweiss.
Ein Christe gibt vnd leiht dem andern gerne/
In seiner noth/ solch schinden bleibet ferne
Von deme/ der da was ein Christ' ist weiss.
42. Halt dich nicht selbst für klug:
Was bildest du dir ein/ du habst die konst gefressen/
Vnd was nur weißheit ist/ du lärer wasserkrug/
Vnd bist nach deinem wan/ sehr weis' vnnd trefflich klug/
Vnd hast doch wol von konst/ so viel als nichts vergessen
Der näheste weiss nichts/ dich hat die konst besessen/
Der stoltze geist/ mein' ich: konst ist dein' eg' vnd pflug/
Auf konst verlässt du dich/ die mag doch wohl mit fug
Nur donst genennet seyn. Wie bist du so vermessen?
Dein wissen ist nur wind/ vnd alle deine könste/
Wenn du nicht Christum hast/ seyn lauter blawe dönste/
Denn ohne seinen geist ist klug seyn nur betrug.
Was hilft dich dein verstand/ wenn du bey deinen wissen
(Woran fast alles ligt) nicht hast ein rein gewissen?
Wer Christum wol gelernt/ der ist gelehrt genug.
43. Lass' dich nicht einen jeden wind wiegen:
Läst du dich jeden wind/ der dich nur anweht/ wiegen
Vnd wirst fast jeden tag new' in religion/
Vnd singst all augenblick fast einen newen thon/
So wird der Satan leicht deinn leichten sinn betriegen.
Wer immer über leuft/ wenn er mit Christo kriegen
Sol wieder diese welt/ vnd ist gleich wie der mon
In vnbeständigkeit/ der krieget bösen lohn.
Er muss in schanden stehn/ wenn/ die in Christo siegen
Gott mit genaden krönt/ denn/ nicht ein jeder geist
Der andre lehren wil/ dir Gottes wege weist/
Drumb trawe nicht zu leicht/ so wirst du nicht betrogen.
Doch forsche gleichwol nach/ prüf' alles mit der schrifft/
Die zeiget also bald dir allen seelen gifft/
Im fall du (wie man sol) sie recht hast angezogen.
44. Wiederstrebe nicht der warheit:
Wenn man aus Gottes wort dir etwas anders weiset
Als du von jugend auf falsch vnterrichtet bist/
Vnd dein hertz über dis schon vberzeuget ist/
So gib der warheit raum/ das wird an dir gepreiset/
Wenn aber jemand ist/ der dich mit worten speiset
Doch ohne wort vnd geist/ so ist 's betrug vnd list.
Drumb hüte dich mit fleiss/ des teufels stanck vnd mist
Ist dem nicht offenbar/ der schläfft/ vnd wie verreiset
In menschen träumen ist. der warheit wiederstreben
Ist eine schweere sünd'/ vnd der sich nicht ergeben
Heisst Gott zu wieder seyn/ der vnser bestes sucht.
Drumb siehe/ was du thust. der teufel hasst die warheit
Die er doch wol versteht/ vnd lästert jhre klarheit/
Drumb bleibt er auch von Gott verstossen vnd verflucht.
45. Meide böse gesellschaft:
Wer einen lamen leitt/ der lernet von jhm hincken/
Vnd wen ein blinder führt/ der tappet auch wie er/
Vnd was man auch nicht wil das lernt man vngefähr/
Wer einen drincker liebt/ der lernet von jhm drincken:
Wer einen stinckbock streicht/ dem muss die hand wol stincken:
Mist macht zu mist vnd koth/ stanck kömmt vom stincken her:
Was erst gesellschaft war/ wird bald her nach begehr:
Ein fauler wiedehopf macht manchen losen fincken.
Drumb seh' ein jeder zu/ zu wem er sich geselle/
Auf wen er seine gonst vnd stete kundschafft stelle/
Vnd mache nicht alsbald mit jedem brüderschafft.
Drumb wer gesellisch ist/ geselle sich zur tugend
So wird er nicht verderbt. Denn was man in der jugend
Sich angewehnet hat/ das bleibet vest vnd hafft.
46. Sey mit Gott zu frieden:
Wer sich mit seel' vnd leib/ dem Herren hat ergeben/
Der nimmet-was Gott giebt für gut vnd willig-an/
Er weiss wol/ was Gott thut ist gut vnd wolgethan.
Gefällt es Gott/ daß er sol an der erden kleben
Vnd bleiben klein vnd ring' in diesem kurtzen leben/
So stillet er sein hertz': im fall' jhn Gott die bahn
Der sterne treten heisst/ so thue er's ohne wahn.
Gott mach' es wie er wil/ er wird nicht wiederstreben:
Bist du nu Gottes kind/ so lass dir auch gefallen/
Was Gott wil/ vnd du must: er weist den seinen allen/
Ein frommes vaterhertz/ er meint es immer gut.
Drümb/ wenn dir 's glücklich geht/ so dancke Gott mit frewden;
Wo nicht/ so dulde dich/ vnd bet in deinem leiden.
Wer weiss/ was Gott an dir zu seiner zeit noch thut.
47. Sey nicht misgönstig:
Was Gott den menschen gönnt/ das wird jhm neid nicht nehmen:
Wem Gottes Segen nützt/ dem schadet misgonst nicht:
Wen Gott alhier erhebt vnd auß dem staube richtt/
Dem muss sich auch der neid/ so frech er ist/ bequämen:
Des frommen glücke kan auch seinen neider zämen
Vnd brechen jhm den muth. Wer andere versprichtt
Aus neid/ der hört mit spott vnd schmach/ was jhm gebricht.
Wen neid verführet hat/ den wird die zeit beschämen.
Gott theilet/ wie er wil/ die gaben seiner güte/
Dem zieret er den leib/ eim andern das gemüthe/
Den dritten macht er groß/ den vierden macht er reich/
Ein jeder hat das sein'/ ein jeder hat zu dancken/
Ein jeder halte sich in seiner gaben schrancken
Vnd sey vergnügt. Ist er schon nicht dem näh'sten gleich.
48. Sey nicht zänckisch:
Regiert dich Gottes Geist/ vnd du wilt ohne wancken/
Wie dir befohlen ist/ durch tägelichen schweiss/
Durch arbeit spat vnd früh/ durch stetig-wachen fleiß/
Nicht aufgehalten seyn in deines amtes schrancken.
Wilt du zu tag' vnd nacht für eitelen gedancken
Frey vnd gesichert seyn/ sol dich des zanckes eis
Nicht fällen/ bleib davon/ so hast du dessen preis/
Zanck ist des fleisches frucht. Ein Christe sol nicht zancken:
Zanck frisset gut vnd blut; zanck bringt in angst vnd not:
Zanck setzt die seel in fahr: zanck stiftet mord vnd tod:
Zanck ist des teufels danck: zanck macht einn bösen namen:
Zanck ist ein schädlich fewr: zanck ist der kirchen gift:
Zanck richtet spaltung an: zanck achtet keiner schrift:
Zanck dämpft in vns dz wort: zanck ist des teufels samen.
49. Deut' alles zum besten
Ach lieber mensch/ wer ist/ dem nicht zu zeiten
Ein böses wort ohn seinen danck entfährt?
Wer hört so wol/ daß er sich nicht verhört?
Wer strauchelt nicht? wem kan der fuß nicht gleiten?
Es redt sich viel. Man muss nicht alles streiten.
Der hat verstand/ vnd der ist wolgelehrt/
Der alle ding' auf 's beste lenckt vnd kehrt.
Man sol nicht bald' ein ding so übel deuten.
Wer in der welt vnd vnter frembden leuten
Fort kommen wil/ der mag sich vorbereiten/
Damit jhn nicht ein jedes wort beschweert.
Er trifft es nicht. Drümb irren die bey weiten/
Die umb ein wort bald für den richter schreiten.
Ein sanfter geist wird nicht so bald verseert.
50. Halt maasse
Maass' ist der tugend ziel/ wer das wil vberschreiten/
Der thut nicht/ was er sol/ er ist der tugend feind/
Er sol nicht/ was er thut/ vnd ist der laster freund/
Zu wenig vnd zuviel steht tugend an der seiten.
Wer nu der laster heer wil ritterlich bestreiten
Der thu nicht alle das/ was recht zu seyn nur scheint/
Er halte mittelmaass' vnd wer zu stehn vermeint/
Dem sey die maass' ein stab/ so wird er nimmer gleiten.
Maass' ist der tugend seel'/ vnd auch der tugend mutter/
Maass' ist die tugend selbst/ maass' ist der tugend futter/
Maass' irret nimmermehr sie thut auch was sie thut.
Darumb wer maasse liebt/ der liebet auch die tugend/
Maass 'ist der alten sporn/ maass' ist der zaum der jugend/
Maass' ist der ehren steig'/ maass' ist zu allem gut.
51. Frewe dich mit den frölichen:
Ein Christe mag sich wol in seinem Gott' erfrewen/
Wenn er/ was jhm der Herr in gnaden hat beweist/
Mit danckbarkeit bedenckt: wenn man den höchsten preist/
Daß er/ sich seiner kirch' in güte zubezeigen/
Ist eingedenck gewest: wenn er der seinen schreyen
Genädig hat erhört: wenn jeder sich befleisst
(Der Gott vnd Christum liebt) der frewde/ die der geist
Im hertzen-tempel macht/ denselben einzuweyhen.
Drümb/ wo man sich im Herrn erfrewt vnd fröhlich ist
Vnd du zu solcher frewd auch eingeladen bist/
So thu/ so viel du kanst/ die frewde zuvermehren.
Vnd bist du gleich betrübt/ weil es dir übel geht/
So halt dennoch an dich/ dieweil es übel steht
Mit eigner trawrigkeit/ gemeine frewde stöhren.
52. Trawre mit den trawrigen
Wenn jeder trawrig ist/ so wil sich 's nicht gebühren/
Daß du dich lustig machst: dein süsser lautenklang/
Ist doch zu solcher zeit nichts denn ein ohren-stanck:
Wenn jederman den leib mit kleidern aus zu zieren
Für leid vergessen hat/ so stell' auch dein stoltzieren
Vnd jubilieren ein: dein lieblicher gesang
Erjagt bey trawrigen dir weder lob noch danck:
Des nähsten schmertz vnnd leid sol auch dein hertze rühren.
Der Herr'/ eh denn er noch des Vaters reich empfieng
So bald er jemand sah'/ dem 's etwan übelgieng/
Des nam er sich bald an vnd klaget' jhn mit schmertzen.
Bist du nu Christi glied/ vnd liebest seine schmach/
So folg' auch deinem Herrn in diesem stücke nach/
Vnd nim des näh'sten leid vnd vngemach zu hertzen.
53. Ließ die Bibel
Wer Gott nit recht erkennt/ der kan jhn auch nit ehren/
Der kennt jhn aber nicht/ der sich nicht selber kennt
Der kennt sich selber nicht/ der sich aufs böse wendt/
Vnd der vom bösen sich zum guten nicht wil kehren.
Wer nu den Gottes geist/ durch lesen vnd durch höhren/
Sich strafen lassen wil/ in dem/ gleich wie verblendt/
Die sünden-tumme welt in jhr verdamnis rennt/
Der komm' vnd lasse sich/ durch 's wort im geiste lehren.
Er neme Gottes buch/ die Bibel vor die hand/
Er forsche fleissig nach/ vnd lese mit verstand/
Es ist kein zweifel nicht/ er wird darinne finden
Was mancher Gottes mensch darinne funden hat/
Den weg zum himmel zu/ den rechten lebens pfadt/
Die ware seelen ruh vnd artzeney der sünden.
54. Beweise den glauben durch die wercke der liebe:
Wer Gott in Christo liebt/ der liebet auch zu üben
Das lebendige wort: er thut was Gott gebeut/
Vnd läst/ was er verbeut: er ist vnd bleibt bereit
Zuleiden vnd zuthun/ zu leben vnd zu lieben/
Wie Gott wil/ vnd er sol: er läst sich nicht betrüben/
Ob jhn die welt drumb hasst: er achtet weder neid/
Noch menschen gonst/ noch ehr': erweiss es kömmt die zeit/
Da Gott gnädig lohnt/ dem/ wem erlieb verblieben.
Lieb' ist des glaubens liecht/ lieb' ist des glaubens seele/
Durch den man Gott gefällt. Drümb liebe seel'/ erwehle
Am glauben reich zu seyn durch lieb' vnd lebe wol/
So stirbst du nimmermehr. Denn der wird ewig leben/
Wenn er gestorben ist/ dem Gott alhier gegeben
Wie er jhn/ nach der schrift/ in Christo lieben sol.
55. Siehe/ daß du niemand ärgerst
Ein Christe sol mit bösen leben/
Durch meiden allen bösen schein!
(Damit er meide höllen pein)
Dem näh'sten kein exempel geben.
Er sol viel mehr durch tugend streben
An guten wercken reich zu seyn/
So nimmt er auch den näh'sten ein/
Dem Herren vester anzukleben.
Wer aber nu des Herren tempel
Verstöret durch ein bös' exempel
Derselb' entgeht der strafe nicht.
Die sich an keine strafe kehren/
Vnd die nicht Christi stimme hören/
Die seind auch seiner schafe nicht.
56. Hüte dich für aberglauben
Wilt du auf Gottes grüner awen/
In Gottes forcht vnd heiligkeit:
Dich weiden mit gerechtigkeit:
Wilt du des Herren güte schawen:
Wilt du allhie den himmel bawen/
Vnd wircken deine seeligkeit/
Die dir durch Christum ist bereitt:
So hüte dich für aberglauben.
Wer zu Gott kommen wil/ mus gleuben
Drumb gleüb' vnd gleube nicht zuviel.
Die Schrift sey deines glaubens ziel/
So wirst du vnverführet bleiben.
Denn/ alles gleüben stürtzt in noth/
Vnd nichtes gleuben ist der todt.
57. Hüte dich für ruchlosigkeit
Der thore spricht in seinem hertzen
Gotts-lästerlich: es ist kein Gott:
Der Gottesdienst ist jhm ein spott:
All' andacht achtet er für schertzen.
Das macht/ des bösen geistes kertzen
Verblenden jhn mit rauch vnd koth/
Bis daß er in der todesnoth/
Es sey ein Gott/ erfährt mit schmertzen.
O grosse blindheit/ kan die welt/
Mit allem was sie in sich hält/
Auch vngefähr wol seyn entstanden?
Darumb du vnmensch' ohne Gott/
Gott/ den du hältest für ein spott/
Wird sich erweisen dir zu schanden.
58. Rede nicht garstig
Bist du ein Christ' vnd bist aus Gott geboren/
So rede nicht/ was ehrbarkeit vnd zucht
Zu wieder ist/ der ist von Gott verflucht/
Der vnzucht liebt/ vnd letzet züchtig' ohren.
Ein fauler mund der ehrbarkeit verschworen
Der ist vnd bleibt in seinem wust verrucht/
Der aber ehr' aus zucht durch ehren sucht/
Der redet nichts/ er wegt es denn zuvoren.
Drumb liebst du zucht/ so sey darauf bedacht/
Daß nicht dein mund/ den näh'sten ärger macht/
Die jugend wird auch durch ein wort verführet.
Vnd weil dein hertz' ein tempel Gottes ist
So sey der mund/ der dessen thor/ von mist
Der vnzucht rein/ gleich wie sich das gebüret.
59. Frewe dich nicht eines andern vnglücks:
Des nähsten vngelücks hast du dich nicht zu frewen
Er sey freünd oder feind (Gott schicket es also)
Gleich wie man täglich sieht/ dz solch ein schaden froh'
Ob er gleich immer wil/ doch nimmer kan gedewen.
Was frewest du dich doch/ daß dich noch muss gerewen
Dein liebe-kaltes hertz ist gleich wie dürres stroh/
Welchs auch die loh verzeert/ wer weis/ wenn/ wie vnd wo/
Dir Gott dein vngelück im zorn noch ab wird meyen
Das glücke/ welches nicht dem glück' ist zu zuschreiben/
Welchs nur der glaub' erlangt/ das rechte seelen heil/
Wird keinem schaden fro/ nach dieser zeit zutheil.
Wer derowegen sich des Herren geist läst treiben
Vnd folgt dem Herren nach/ ja wer im glauben steht/
Der frewt sich dessen nicht/ wenn 's andern übel geht.
60. Rede den leuten nicht übel nach
Wer seines näh'sten glimpff vnd ehren abzuschneiden.
Bereit vnd fertig ist/ dem sey für dismal kund/
Daß jhn das fromme lamm/ als einen bösen hund/
Nach dieser sterblichkeit im himmel nicht wird weiden.
Der alle lästerung auf erden konte leiden/
Der leidt im himmel nicht einn schänd'- vnnd lästermund
Wer lästern wil/ gehört hin in der höllen schlund.
Das heisst/ wer lästern wil/ der sol den himmel meiden.
Ein solcher ehrendieb ist mehr/ als henckens werth/
Sein reden ist betrug/ die zung' ein scharffes schwerth:
Sein lügen-rachen ist des teufels mörder-grube.
Wer nu den näh'sten schmäht vnd läst davon nicht ab/
Der bringet der mal eins einn höllebrand ins grab/
Erlebet als ein dieb/ vnd stirbet als ein bube.
61. Gläube nicht den mehrleinträgern:
Hüte dich/ der mehrlein-träger
Bringet dir doch nimmer guts:
Er sucht seinen eigennutz
Als ein rechter beutelfeger:
Er dient in der lügen läger/
Vnd ist aller warheit trutz:
Er ist deiner feinde schutz:
Ja er ist des Satans jäger.
Darumb neige deine ohren
Thore nicht der wäscherey/
(Wäscherey ist keine trew)
Mancher würde nicht zum thoren/
Mancher käme nicht in noth/
Gäb' er nicht dem wäscher brodt.
62. Lüge nicht
Die lügen ist des Satans kind.
Wer Christum liebet/ wird nicht liegen/
Wer leuget wird sich selbst betriegen.
Denn lügen ist nur donst vnd wind.
Wenn warheit jhre feinde bindt/
Vnd wenn die/ so sie lieben/ siegen/
So muss die lügen unterliegen:
Vnd oftmals eh sie recht beginnt.
Die lügen drückt die warheit zwar/
Doch wird sie sie mit jhren tücken/
In ewigkeit nicht unterdrücken.
Ein lügner bringt sich in gefahr:
Ein lügner kan des teufels stricken
Sein' arme seele nicht entrücken.
63. Stiel nicht:
Wer hie nach ehren trachtt/ der muss nach tugend streben/
Vnd wer nach tugend strebt/ der höret/ liebt vnd thut
Was jhn die tugend lehrt/ er fasst jhm einen muth/
Mit aller ehrbarkeit/ wie sich 's gebiert zu leben.
Wer ehrlich leben wil/ läst nicht die hände kleben/
Er bringt auch nicht mit list/ des näh'sten schweiß vnd blut/
Wie mancher thut/ an sich/ sein arbeit thut jhm gut/
Vnd gibt jhm/ daß er auch dem dörftigen kan geben.
Nichts wird in aller welt so tewr' erkauft als eben
Daß was gestohlen wird. Es kostet leib vnd leben
Es kostet seel' vnd geist/ es kostet ehr' vnd gut.
Drumb nim/ was dir Gott gibt/ vnd lass der welt/ was jhr ist
Gott lässt die seinen nicht/ thu nur/ soviel an dir ist/
Als einer/ der mit lust/ nach Gottes willen thut.
64. Sey nicht falsch:
Wo warer glaube lebt/ da läst sich liebe schawen/
Wo lieb im hertzen ist/ da ist kein falscher schein/
Wo schein vnd falscheit ist/ da kan nicht liebe seyn.
Wo keine lieb' erscheint/ da mangelt 's auch am glauben
Wie kan ein falsches hertz' auf seinen schöpfer bawen
Den es verlassen hat? mir wil es nicht wol ein/
Daß einig falsches hertz' entgeh' der höllen pein:
Die falscheit kan ja nicht der warheit sich vertrawen.
Wo seele/ hertz' vnd mund nicht stimmet überein/
Da ist der glaube todt/ da kan nicht trewe seyn:
Da lebt die sünde noch/ da lebt das fleisch der sünde/
Wo 's fleisch der sünde lebt/ da ist der geist schon todt/
Wo der getödtet ist/ da steht die seel in noth.
Drumb sihe/ daß dich nicht der Herr in falscheit finde.
65. Lobe dich selber nicht:
Ein weiser sieht auf lob/ bey lobwürdigen leuten/
Ein narr auf jederman/ vnd lobt jhn niemand nicht/
So lobet er sich selbst/ vnd hat's wol ausgerichtt/
Er macht mit falschem ruhm jhm frembdes lob zur beuten
Er darf wol/ gleübt man 's nicht/ mit macht da wider streiten/
Er meint ein jederman sey jhm als wie verpflichtt/
Zu sagen/ was er wil/ vnd nicht; was jhm gebricht.
Das eigne lob ist nichts/ man wird es übel deuten.
Lob ist der liebe leib/ lob ist der thorheit laub/
Lob ist des geistes geist/ lob ist tugend raub/
Lieb' ist des lobes leib/ der tugend lob bleibt oben
Vnd was von tugend kömmt. Drumb wer die tugend liebt/
Dem bleibet wol sein lob/ ob er's jhm schon nicht gibt.
Wer löblich leben liebt/ den übt ein lieblich loben.
66. Tadele nicht alles
Du tadelst alle ding' vnd suchst dich zubeweisen/
Mit deiner klügeley: dir ist nichts gut genug/
Vnd wär' es noch so gut/ vnd wer ist wol so klug/
Der deinen grossen witz nicht billich müsse preisen?
Denn was das rohte gold ist gegen rostig eisen/
Das ist dein weises hirn für anderen mit fug.
Du trifst die sache wol/ du weisest den betrug/
Dein junger frülings-bart ist weiser als die greisen.
Dir gelten alle nichts/ jhr witz kan nicht bestehn/
Sie möchten noch zu dir wol in die schule gehn/
Sie geben groß ding vor/ vnd ist doch nichts zursachen.
Du soltest/ woltest du/ mit deiner klügeley/
Bereden männiglich/ das kühmist butter sey.
Du schellen-weiser mensch! was sol man aus dir machen?
67. Besuche die krancken:
Der Christ' ist glaubens-kranck/ der Christum/ wenn er kranck ist
(An denen die alhier sein' arme glieder seyn)
Aus stoltz vnd faulheit nit besucht: er ist ein harter stein/
Den nichts bewegen kan/ in dem noch witz noch danck ist.
Wem Christus dieser weis' alhie nur mist vnd stanck ist/
Den achtt er dort für stanck/ wie recht. Denn solch ein schwein
Gehört nicht in die stat/ die droben ist/ mit ein
Da Christus ewiglich der seinen speis' vnd tranck ist.
Drumb weh dem/ der allhie/ den Gott besucht/ versucht
Sein hertz' ist glaubens lär/ drumb wird er dort verflucht
Er wird an jenem tag' ein schweeres vrtheil hören.
Vnd wol dem der alhier einn armen krancken pflegt.
Gott hört jhn/ wenn er ruft/ vnb wird alsbald bewegt
Sein freundlich angesicht' vnd güt' jhm zuzukehren.
68. Tröste die elenden:
Wenn Gott dich hat getröstt/ so tröst' einn andern wieder/
Mit solchem trost'/ als du von Gott getröstet bist/
So thust du/ was Gott wil/ so thust du als ein Christ'
An dem der trosts bedarf. Wir seind in Christo brüder.
Drumb ist es wolgethan/ daß vnter vns ein jeder
Des andern schwachheit trägt/ so viel jhm möglich ist/
Auf daß des trawrens last mit samt des Satans list
Vns hertze seel' vnd muth nit dämpf' vnd drücke nieder.
Wer andre gerne tröstt/ dem wird in seiner noth
Gott wieder tröstlich seyn/ vnd jhm das thränenbrodt
Mit seines geistes trost' entherben vnd versüssen.
Gott lässt nichts vnbelohnt. Was man dem nähsten thut/
Des nimmet er sich an/ vnd lässt von seinem gut'
Vns solches wiederumb mit frewd' vnd trost geniessen.
69. Kleide die nackenden
Wie kanst du dich so vberflüßig kleiden
Vnd treiben pracht/ du fauler erdenklooß?
Da vnterdes der arme nackt vnnd bloß/
Als wie ein wurm/ muss frost vnd kälte leiden.
Wie bist du doch so schrecklich vnbescheiden?
Wie denckst du nicht an den genaden schooß/
Den Lazarus (nach dem er frey vnnd looß
Den leib quittiert) besitzt mit trost vnd frewden:
Was schadt es jhm hie nackt gewesen seyn?
Was hilffet dort den reichen in der pein
Sein purpurkleid sein prangen pracht vnd pralen?
Drumb kleidst du dich/ so kleide Christum auch/
Bist du ein Christ. Das ist der Christen brauch.
Er wird es dir mit gnad' vnd danck bezahlen.
70. Speise die hungrigen
Ist denn dein wildes hertz' auß hartem stahl vnd eisen/
Daß du den hungrigen/ der dich in seiner noth
Mit krancker stimm' ersucht/ nur vmb einn bissen brodt
Mit vngestümme dich nicht schämest abzuweisen.
Da doch der fromme Gott dich mildiglich zu speisen
Nit vnterlassen hat. Wer nun in hungers noth/
Den näh'sten nicht verlässt/ den wird/ nach dem der tod
Ihn hingerissen hat/ das lebens-brod selbst preisen.
Wer nu das himmel-brod/ im himmel zugeniessen
Auf erden sich befleisst/ vnd lässet sich verdriessen
Daß brodt der sterblichkeit zu brechen/ wem er sol/
Der hat gar weit gefehlt. Ihm sol der Herre speisen
Vnd geben himmelbrodt/ vnd er wil nicht beweisen
Durch irrdisch brodt/ was Gott befielet recht vnd wol.
71. Träncke die dürstigen:
Sol Gott mit seinem geist dein dürres hertze lencken/
Dahin/ wo öl vnd milch fast überflüßig seyn;
Sol er dein trawrend' hertz' in seinem frewden wein
Gleich wie mit einem strom in warer wollust träncken.
Sol Gott im tode dir vom lebenswasser schencken;
Sol der/ der nicht ein trunck lässt vnbelohnet seyn/
Vnd wenn 's gleich wasser wär' in dein matt hertz hinnein
Sich/ wie du denn begehrst/ mit seinem geiste sencken.
Wilt du mit frewdigkeit für das gerichte gehn/
Wenn Christus richten wird? wilt du zur rechten stehn?
Sol dich zur selben zeit nicht dein gewissen kräncken/
Sol dir des Herren lob; sol dir sein kommet her
Auch mit erfrewlich seyn/ vnd füllen dein begehr/
So must du/ den da durst zu träncken auch gedencken.
72. Herberge die frembden:
Wilt du/ wenn Christus dort wird lohnen/
Das hauß der frewd' vnd seeligkeit/
Welchs er den seinen hat bereitt/
Mit jhm in ewigkeit bewohnen:
Wilt du den preiß der ehren-kronen/
Wenn Gott in 's hauß der sterblichkeit
Verstösset die verderblichkeit:
Wilt du daß Gott sol deiner schonen:
Vnd siehest die/ so Gott vertrawen/
Daß elend' in der frembde bawen/
So lass sie bey dir ein vnd aus.
Ein hauß/ das armen offen stehet/
Ein hauß/ da der vertriebn' ein gehet/
Das ist ein recht gesegnet hauß.
73. Vergrabe dein pfund nicht:
Hat dich der milde Gott mit seines geistes gaben
Für anderen begabt: hat dich des geistes gonst
Durch Gottes wort gelehrt die grosse Christen-konst/
Dadurch ein mensche kan den weg zum himmel haben.
So must du darumb nicht mit stoltz hereinher traben/
Die konst/ so himmlisch ist erregt nicht stoltzen donst.
Viel weniger solt du/ was dir von Gott vmbsonst
Gegeben ist/ aus neid verbergen vnd vergraben.
Wer seinen schatz vergräbt/ den jhm der herre gab
Vnd nimmt jhn ohne nutz vnd wucher mit in's grab/
Der hindert Gottes werck zu seinem eignen leide.
Drumb frewdig angelegt/ das dir vertrawte pfundt/
Damit du dermaleins hör'st durch des herren mund:
Du trewer knecht geh' ein in deines herren frewde.
74. Hüte dich für vnnötiger trawrigkeit:
O weh dem/ welcher ist mit trawrigkeit geplaget!
Er schläfet ohne schlaf/ er ruhet ohne ruh/
Er wachet mit verdruß/ vnd eilt zum grabe zu/
Er frisst sich selbst/ vnd weiss doch oft nicht/ was jhn naget.
O wol dem der in Gott nach frewd' vnd wonne jaget!
Er lebt in höchster lust/ jhm ist vor nichtes bang'/
Im spinnet Lachesis den Faden noch so lang.
Er ist an Gott vergnügt/ auf den er alles waget.
Drumb fass' ein frölich hertz'/ vnnd sey eins frischen muthes/
Treib' angst vnd trawren auß/ vnd thu dir selber gutes/
Frewd' ist des hertzens hertz' vnd stellet es zur ruh.
Was ist Melancholey? ein brunnenquell des zweifels
An Gottes gütigkeit: ein bett' vnd bad des teufels.
Sie stürtzt viel leut' in's grab vnnd dient doch nirgend zu.
75. Förchte dich nicht für der peste:
Was förchtst du doch die pest' in diesem sünden-neste
Des leibes/ der da nichts als erden ist vnd koth.
Forcht ist der peste bests vnd schmackhaftigstes-brodt
Forcht öffnet thor vnd thür der dir gefürchtten peste.
Wir feind in dieser welt nur wandersleüt' vnd gäste
Vnd müssen endlich fort. Forcht mehrt gefahr vnnd noth/
Wer nun in forchten lebt/ ist lebendig schon todt/
Ein Christe förchtt sich nicht. Der glaube ist seine veste.
Der pestilentzen gift/ des todes pfeil vnd wüten/
Wird dem kein schaden thun/ den Christus wil behüten/
Der höllen pestilentz des todes tod vnd gift.
Wer seinem Gotte lebt/ den wird kein tod verderben.
Drumb sey viel mehr getrost/ vnd schicke dich zum sterben.
Es bleibe/ wer da bleibt/ es treffe/ wen es trift.
76. Ehre die alten:
Wer ehr' vnd lob jhm suchet zu vermehren
Mit ehre vnd lob: wer seine junge jahr'
Vnd wolfart nicht wil setzen in gefahr:
Der lasse sich die alten tugend lehren.
Von alten kan die jugend gutes hören/
Erfahrung' ist die grund-vest' jhrer lahr.
Die weißheit liebt ein tugend-grawes har.
Drumb sol man sie für andern billich ehren.
Ein alter hat die wege schon gegangen
Vor welchen jhr die jugend noch lässt bangen.
Das alter ist was jugend werden kan.
Drumb/ wer verhofft (so Gott wil) alt zu werden/
Der sey nicht gleich den vnzämten pferden.
Er liebe zucht/ so wird aus jhm ein mann.
77. Gib der jugend gut exempel:
Die/ deren engel stets für Gottes throne stehen/
Vnd preisen jhren herrn/ als deren lob gerichtt
Auf nichts/ als nur auf Gott/ des heilges angesicht
Ohn' alle gnüge sie doch nach genüge sehen:
Die/ derer zunge sol des höchsten lob erhöhen
Die/ denen Christus selbst das himmelreich verspricht/
Vnd den man gleich sol seyn/ den noch die bosheit nicht
Wie vns/ den weg verlegt in 's himmelreich zu gehen.
Die zwar von leibe schwach doch starck genug im geist'/
Als der jhn durch das wort den weg des lebens weist
Vnd deren hertzen seyn des heilgen geistes tempel.
Die vns der Herre hat zu lehren anvertrawt/
Durch die das himmelreich auf erden wird gebawt/
Den hüte dich mit fleiss zu geben bös' exempel.
78. Rede niemand übel nach
Wilt du lang' im friede leben/
Wilt du/ daß sich allgemach
Dein vnglücke/ wie ein bach
Mag verlauffen/ so merck' eben:
Lass den mund nach friede streben/
Rede keinem übel nach/
Rede keinem nichts zur schmach/
Rede was kan friede geben.
Lass einn jeden seyn vnd bleiben/
Wilt du grünen vnd bekleiben/
Jedem ist sein ehre lieb.
Wer dem näh'sten vnbescheiden
Wil sein ehr' vnd glimpf abschneiden/
Der ist ärger als ein dieb.
79. Mische dich nicht in frembde händel
Du siehest wol/ wie sich die mücken sengen
Wie sie mit sturm sich wagen in die noth/
Vnd wie sie doch/ zu fliegen in den tod/
Bey abendzeit/ sich nach dem liechte drängen.
Wer seim beruff' vnd sachen nach wil hengen/
Daß er dadurch erlangt sein täglich brodt/
Der muss sich nicht (wie sich der mäusekoht
In'n pfeffer mischt) in frembde händel mengen.
Er stürtzt sich sonst in allerley gefahr.
Ein kluger nimmt das/ was jhm obliegt/ war
Vnd lässet das was ihm nicht ist befohlen.
Wer nicht mit fleiß in seinen grentzen bleibt/
Vnd das/ was nicht sein's amtes ist/ betreibt/
Der wird/ für lob/ spott schad' vnd schand' erhohlen.
80. Sey verschwiegen
Man lobt beredsamkeit/ man rühmet schöne worte/
Vnd warumb lobet man nicht auch die schweige-konst?
Da doch beredtsamkeit ist ohne sie vmbsonst/
Verschwiegenheit erhält der freundschaft beste sorte.
Der jugend schöne zier/ der tugend ehrenpforte/
Ist die verschwiegenheit/ sie bringet ruhm vnd gonst?
Wer nicht wol schweigen kan/ dem ist wol reden donst.
Man achtet seiner nicht/ er bleibt an keinem orte.
Ein wäschhaftiges maul richtt manches vnglück' an/
Vnd bringt sich selbst in noth/ ein mund der schweigen kan
Ist vieles lobens werth vnd keine schlechte gabe.
Darumb gewehne dich zu schweigen wenn du solt/
Zu reden wenn du must/ so bleibt dir jeder holdt.
Wol schweigen ist fürwar nicht eine schlechte habe.
81. Wende dein' augen von vnzucht ab:
Schawt deiner augen liecht zu sehr' auf dieser erden
Auf das/ was fleischlich ist/ vnd was den geist verstört/
So solt du (bist du der/ so Christum angehört)
Ja deines leibes liecht nicht finster lassen werden.
Welchs denn gewiss geschieht/ wo garstigen gebärden
Dein' aug' ergeben ist. Darumb/ wie Christus lehrt/
Reiss solch ein aug' heraus/ so wirst du nicht verseert.
Vnd bleibest onverrückt ein schaf aus Christi herden.
Wer nu die vnzucht wil aus seinem hertzen wehren/
Der sol sein auge bald von solchen dingen kehren/
Dadurch man böses thut/ vnd giebet bösen schein/
Wer anders thut verräht sein' augen bösen thaten/
Vnd wird hinwiederumb hernach durch die verrahten/
Die seines hertzen schutz vnd wächter solten sein.
82. Verstopfe die ohren für vnflätigen reden
Wer zucht vnd ehrbarkeit mit Gottes forcht erkohren/
Der leyet seyn gehör' eim faulen schwätzer nicht.
Wer aber sein gehör' auf faul geschwetze richt/
Der hat schon gute zucht vnd ehrbarkeit verlohren/
Er hat der bösen brunst vnd vnzucht schon geschworen/
Er ist der geilheit schon ergeben vnd verpflicht.
Sein innerlicher mensch liegt todt-kranck an der gicht/
Ihm ist in böser brunst schon glaub' vnd lieb' erfroren.
Bist du ein Gottesmensch'/ vnd liebest seine zucht/
Hat dich sein werther geist im worte new geboren/
So hast du garstigkeit vnd vnzucht schon zuvoren/
Wie billich/ abgelegt/ dir ist die böse lust/
Mit aller schandbarkeit ein gräwel in den ohren/
Ein keusch gemüte läst ein faules maul den thoren.
83. Sey nicht leckerhaftig:
Wie wässert dir der mund nach leckerhafter speise/
Die doch der seelen nicht für jhren hunger gilt/
Ein Christe sey vergnügt/ wenn er denn hunger stillt
In dieser wanderschaft vnd arbeitsamen reise.
Ein leckeriges maul hat auf der wollust eise
Der seelen heil gestellt. wer seinen leib nur füllt/
Vnd läst die seele lär/ der wirfft das ebenbild
Des herren hinter sich/ welchs nicht der christen weise.
Der beste dranck ist stanck/ die beste speis' ist eis/
Dem der von Christo nicht (der seelen speise) weiss.
Die seele nagt der tod/ den leib die würm vnd maden.
Gott speist die seinen offt alhie nur gerstenbrodt
Wol dem/ der nimmt für lieb/ jhn wird der ander todt
(Wo Christus in jhm lebt) in ewigkeit nicht schaden.
84. Sey reinlich:
Wer rein in worten ist/ der sey auch rein im hertzen/
Wer rein' im hertzen ist/ der sey in worten rein/
Wer rein in worten ist/ sol rein in wercken seyn:
Wer nur zum schein rein' ist/ dem ist die tugend schertzen/
Die reinigkeit entzündt der reinen liebe kertzen/
Sie ist ein schönes kleid vnd steht eim jeden fein/
Sie ist des kleides kleid/ vnd giebet jhm den schein/
Des leibes reinigkeit entgehet manchen schmertzen.
O werthe reinigkeit/ du trewe freundschaft-amme/
Du meiste sitten-zier/ du tewre liebesflamme/
Wol dem der dich beliebt/ vnd nach gebür dich ehrt;
Du bist die schönste pracht/ der schönste schmuck der jugend/
Der schönheit höchster preis/ die pflegerin der tugend/
Der wollust reine lust/ die niemand nicht verkeert.
85. Schaube nicht auf/ was du gutes vorhast
Wilt du zum Herren dich mit warer busse kehren:
Wilt du den sünder-weg (von sünden abzustehn)
Verlassen vnd hinfort des Herren wege gehn:
Wilt du das wort des Herrn mit hertzen-andacht hören:
Wilt du mit frömmigkeit des Herren nahmen ehren:
Wilt du in deinem lauf nach seinen stapfen sehn:
Wilt du/ dz durch dich sol dem näh'sten guts geschehn:
So lass den teufel dich durch aufschub nicht verstören.
Wer guts verrichten wil/ der lasse sein verweilen/
Damit des Satans list/ jhn ja nicht mög' ereilen/
Daß er hernach nicht kan/ was er an itzo wil.
Ist guts thun morgen gut/ warumb denn auch nicht heute?
Heut' ist der tag des heils. Gott weiss jhr blinden leute/
Wer etwa morgen lebt. Kein mensche weiss sein ziel.
86. Lache die leute nicht aus
Sieh dich selbst an vnd warte deiner sachen/
Wie Christlich- ab/ lass deinen nähsten seyn
Den/ wer er ist/ meid' allen bösen schein/
Vnd lache nicht/ was andre leüte machen/
Was sperrest du doch deinen falschen rachen
Mit lachen auf: es steht fürwar nicht fein/
Ein sprichwort ist/ vnd trift gemeinlich ein:
Was kluge thun/ des müssen narren lachen.
Weh euch/ die jhr hie lacht/ vnd aber weh/
Ewr lachen ist nur donst vnd Mertzenschnee/
Ihr werdet noch für solches lachen weinen.
Man lieset nicht/ das Christus je gelacht/
Ob er vns gleich hat himmel-freude bracht.
Drumb lache nicht/ du must für Gott erscheinen.
87. Halt/ was du zu gesaget
Du sagest wol viel zu/ wenn du dich hast besoffen/
Vnd hältst hernachmal nichts/ viel worte gibst du zwar/
Die lädig seyn an that/ daß macht dein hertz' ist gar
Verschlossen durch den geitz/ vnd keiner tugend offen.
Wer zusagt vnd nicht hält/ der hat noch nie getroffen/
Worauf er fälschlich zielt/ man gläubt jhm nit ein haar.
Denn/ was ein solcher spricht/ das wird doch selten waar.
Er sagt gewisse zu vnd läst vergeblich hoffen.
Wer ehr' vnd tugend liebt/ sagt lieber nichtes zu/
Was er nicht halten kan/ so läst man jhn mit ruh'
Als einen biederman in seinen sachen walten.
Drumb/ hast du zugesagt/ so halt auch als ein mann
Vnd siehe weder nutz: noch schaden hierinn' an.
Was ehrlich zugesagt/ das sol man redlich halten.
88. Sey danckbar
Hat man dir guts gethan/ so lass dich nicht verdriessen
Dein danckbares gemüth' in worten/ in der that/
In aller freundlichkeit zuzeigen früh vnd spat/
So wirst du mit der zeit der gutthat mehr geniessen.
Der vndanckbare stoltz muss oftmals schweerlich büssen/
Sein vnerkäntlichkeit/ man springt mit that vnd rath/
Eim solchen nicht mehr bey/ der vnerkäntlich bat.
Man wird ein andermal für jhm das hertze schliessen.
Wilt du nu/ daß man dir in deiner noth vnd zwang
Hinfort mög' hülflich seyn/ so gib nicht stanck für danck/
Dem der dir gutes thut/ du thust dir selber schaden.
Wo man ein dankbar hertz' an wort-vnnd werck-en spürt/
Da thut ein Christe gern wz sich zu thun gebürt/
In summa danckbarkeit ist mancher last entladen.
89. Diene dem näh'sten wo du kanst
Wir seind nicht vns allein' auf diese welt gebohren/
Drumb müssen wir auch nicht auf vnsern nutz nur sehn/
Sol vns nicht der verlust/ der ewig ist/ bestehn.
Gott hat vns hie zum dienst des nähesten erkoren.
Doch geht des Herren dienst dem allen weit zuvoren
Was dienst genennet wird. Wir seind in Gottes lehn
Drumb sol zu seinem dienst' all vnser thun geschehn/
Was man dem näh'sten dient ist/ ohne Gott/ verlohren.
Wo ware gottesforcht in deinem hertzen ist/
Vnd du dem nähesten mit fleiß zu dienste bist/
So wirst du/ wie ein palm' im hause Gottes grünen.
Dein gottesdienst ist falsch/ wo du dem näh'sten nicht
Beweisest/ wie Gott wil/ der trewen liebe pflicht.
Denn/ wer Gott dienen wil/ sol auch dem näh'sten dienen/
90. Wende dem nähesten gefahr vnnd schaden ab:
Wer Gott vnd Christum liebt/ wird auch den bruder lieben
Wer den von hertzen grund/ vnd wie sich selber/ liebt/
Der frewet sich mit jhm/ vnd ist mit jhm betrübt/
Wenn jhn des glückes fall mit fahr vnd noth wil üben.
Was jhn verletzen kan/ vnd was jhn kan betrüben/
Was jhm verweislich ist/ vnd was jhm schaden gibt/
Das wendt er willig ab/ vnd weil er lieben übt/
Als ist jhm auch bey Gott die lebenskrone blieben.
Für den man gut vnd blut/ für den leib vnd leben/
Auch ohne wegerung' ist schuldig hin zugeben/
Im fall' es Gottes ehr' erfordert/ vnd die noth/
Wie solt' ein Christe dem doch nicht gefahr vnd schaden/
Verhüten/ wo er kan/ da doch auf sich zu laden
Sich Christus nicht entzog/ den vnverdienten tod.
91. Stelle deine sache Gott heim:
O Mensch/ bedencke dis/ dein lieb/ dein leib vnd leben/
Dein laub dein lauf dein kauf/ dein ümb vnd an/
Dein gut/ dein bluth/ dein muth/ vnd was dir Gott hie gann/
Dein seelen-heil/ dein theil/ vnd dein nach ehren streben/
Was dir der tod entnimmt/ vnd was dir ist gegeben/
Was dir geschieht/ vnd was dir wiederfahren kan/
Dein meiden vnd dein thun/ dein leiden/ deine ban/
Dein vnglück' vnd dein glücke lencket Gott gar eben.
Nach dem es jhm gefällt/ nach dem so geht's dir auch/
Drumb lass dich gantz auf jhn/ dz ist d' Christen brauch.
Befiel jhm seel' vnd leib/ befiel jhm deine sachen.
Er ist der alles schaft/ er ist der alles thut
Was gut ist/ er ist Gott vnd selbst das höchste gut/
Dem stelle dich anheim. Er kan vnd wird 's wol machen.
92. Bleib in deinem beruff:
Was dir befohlen ist/ was Gott dir anvertrawet/
Dz thu/ vnd sonst nichts mehr/ lass frembde hände seyn/
Vnd mache dich ja nicht aus vorwitz zugemein/
Denn wer nicht was er sol/ thut/ dem gehts/ dz eim grawet.
Wol dem/ der auf den Herrn in seinen wegen bawet/
Vnd lässt sich gantz auf jhn/ er bleibt in dem allein/
Was seines amtes ist/ jhn trifft nicht frembde pein.
Er ist/ auf den der Herr' in gonst vnd gnaden schawet.
Wen aber wanckelmuth vnd vorwitz hat verführt/
Der thut/ was er nicht sol/ vnd lässt/ was jhm gebürt/
Vnd kömmet endlich noch mit schand' vnd spott zuschaden/
Drumb wo du witzig bist/ so laß dein vorwitz seyn/
Vnd mische dich ja nicht in frembde sachen ein/
So bleibest du in ruh mit vnruh vnbeladen.
93. Bedencke deine lebens gefahr:
Ach Gott/ wie mancher feind tracht vns hie nach dem leben!
Der wurff/ der schlag/ der stoß/ der schoss/ der stich/ der hieb/
Der brand/ der fall/ der gift/ des mörders hand/ d' dieb/
Die hungersnoht/ der durst/ die hitz' vnd frost daneben.
Wie mancher kranckheit ist ein mensch' hier übergeben?
Wie manches hertzeleid fällt – vns aus angetrieb/
Des bösen geistes – an? wir müssen durch das sieb
Des todes schwind hindurch/ da hilft kein wiederstreben.
Wer ist/ wenn Gott der Herr wil über jhn gebieten/
Der sich für todes-fahr ein augenblick zu hüten/
Sich wol vermessen kan/ wie witzig er auch ist?
Welch stäublein ist so klein/ welch würmlein kreucht auf erden/
Dz nicht/ wenn Gott verhengt/ kan vnser mörder werden?
In summa/ nichtes hilft für 's grimmen todes list.
94. Bedencke die kürtze dieses lebens
Wie mancher mensche muss aus diesem leben scheiden/
Der noch nicht hat gewust/ was tod vnd leben ist!
Wie mancher muss/ der sich auf lange zeit vermisst/
Eh' er sich des versieht/ den todes rachen weiden!
Dis leben hie ist kurtz vnd hat sehr kurtze frewden/
Die man/ eh man sie recht genossen hat vergisst/
Ist gleich/ (in dieser zeit/ die vns verzeert vnd frisst/)
Das leid nicht kurtz/ das wir in solcher kürtze leiden.
Dis leben ist ein trawm ein wasser-schaum ein plitz/
Dis leben ist ein schall/ ein wasserfall/ ein sitz
Des todes/ der in vns/ weil wir noch leben/ lebet.
Wer denn nu leben wil/ wenn er gestorben ist/
Der dencke stets an die sehr-kurtze lebens frist/
Durch diesen tod/ dem man vergebens wieder strebet.
95. Stirb deinen sünden ab:
Der stirbt einn doppeln tod/ der an der erden klebet/
Gleich wie das tumme vieh/ vnd nicht eins recht bedenckt/
Wo durch/ wenn hie sein leib in d' erde wird versenckt/
Sein' arme seele dort mit Gott im himmel lebet.
Der aber lebet wol/ des geist im himmel schwebet/
Weil er auf erden ist: der sich gen himmel lenckt/
Wenn er der sünd' abstirbt/ so lang' jhn sünde kränckt/
Der nach der seelen heil durch leibes vnfall strebet.
Drümb mensche/ lebe dem/ der dir zum leben gab
Sein leben in den tod/ vnd seinen leib in 's grab/
So lange du noch hier im todes leben schwebest/
Vergiss des todes nicht/ denck' immer an das grab
Vnd stirb/ eh du noch stirbst/ den eitelkeiten ab/
Daß du nach diesem tod' in jenem leben lebest.
96. Sey bereit zu sterben/ wenn Gott wil
Wer seinen Gottesdienst nach Gottes wort bestellt
Vnd wer mit höchstem fleiß nach jenem leben strebet/
Wer/ wie ein Christe sol/ nach Gottes willen lebet/
Vnd wer so lang' er lebt/ des Herren wege hält/
Der liebt/ was göttlich ist vnd hasset diese welt/
Vnd weil sein hertze nicht an eitelkeiten klebet/
Als welchs am himmel schon durch waren glauben schwebet/
So macht er sich bereit zu gehn/ wenn 's Gott gefällt
Den weg der ewigkeit. Er weiss wol daß sein leben
In seiner macht nicht ist. Vnd weil 's jhm Gott gegeben/
So weiss er auch/ das er 's jhm selbst nicht nehmen sol.
Drumb/ so du durch den tod das leben wilt ererben
So lebe/ wie du solt/ vnd warte mit dem sterben.
Bis daß es Gott gefällt/ so stirbst du recht vnd wol.
97. Tröste dich der auferstehung d' todten
Daß wir wieder auferstehen/
Daß dis vnser fleisch vnd bein
Der maleins sol geistlich seyn/
Vnd des Herren frewde sehen/
Macht/ daß man (welchs oft geschehen)
Auf des Herren wort allein/
Vngeachtet aller pein/
Sich nicht schewt in'n tod zu gehen/
Eben dis kan deinem hertzen/
(Wo du Gottes worten gleubst)
Lindern seine todes-schmertzen.
Wozu grawt dir doch für sterben/
Wenn du nicht im grabe bleibst/
Wer wol stirbt/ kan nicht verderben.
98. Gedenck' ans jüngste gerichte:
Wenn du des herren rath wilt wider dich vernichten/
Wenn du/ nach deinem wahn die eitelkeiten liebst/
Vnd dich mit übermuth in schand' vnd lastern übst/
Was deucht dich/ wie wilt du dort deine sache schlichten?
Wie wilt du dort bestehn/ mit deinen faulen früchten/
Der du hie Gottes geist mit sündethun betrübst/
Der du hie deinen herrn zu lästern anlaß giebst/
Wenn er nu kommen wird den erdenkreiß zurichten?
Er ist die weisheit selbst du kanst jhn nicht betriegen:
Er ist die warheit selbst/ bey jhm gilt keine lügen:
Er herrscht gewaltiglich du kanst jhm nicht entgehn.
Er ist der reichtum selbst/ er nimmet kein geschencke.
Er ist ein sünden feind/ hieran/ o mensch/ gedencke/
Wer hie in sünden stirbt/ der kan dort nicht bestehn.
99. Suche was droben im himmel ist
Das leben ohne tod/ die frewd' ohn alles leiden/
Die lust ohn' alle last/ die freundschafft ohne list/
Die ehr' ohn' eitelkeit/ die weisheit ohne zwist/
Die schönheit ohne brunst/ das lieben ohne scheiden/
Der reichtumb ohne ziel/ die wolfart ohne neiden/
Die höchste ergötzlichkeit/ die in Gott selber ist/
Der ort/ wo man der sünd' in ewigkeit vergisst/
Der port der seeligkeit/ der ort der stäten frewden
Entzieh' der welt dein hertz' vnd mache dich bereit/
Daß du mit höchstem fleiss in dieser sterblichkeit/
Der vnsterblichen kron' im himmel mögest finden.
Wen aber dieses nicht den herrn zu lieben zwingt/
Daß er im Geist hinauf zu Gott in'n himmel dringt/
Weil er auf erden ist/ der bleibt in seinen sünden.
100. Gedenck an die hölle:
In ewigkeit mit schand' vnd spott sich kleiden/
In ewigkeit nicht wissen aus noch ein/
In ewigkeit vermeiden liechtes schein/
In ewigkeit den wurm des hertzens weiden/
In ewigkeit des Herren antlitz meiden/
In ewigkeit erfahren höllen pein/
In ewigkeit von Gott verstossen seyn/
In ewigkeit die gröste marter leiden
Ist mehr als daß es menschen können fassen.
Drumb wilt du nicht daß dich Gott sol verlassen/
So lass jhn nicht/ sonst ist es bald geschehn/
Bitt jhn vielmehr/ daß er dir wolle geben/
Durch seinen geist mit fleiß darnach zustreben/
Wo durch man kan der höllen pein entgehn.
Daß der mensch nicht diese welt oder auch sein eigen fleisch/ sondern vielmehr Gott lieben solle:
1.
Diese welt mit jhrer lust
Ist nur lauter koth vnd wust
Gegen das was ewig ist.
Ihr lust ist falsche list/
Ihre list ist seelen last/
Ihre lust ist fleisches mast.
Diese welt mit jhren lüsten
Wird vergehen/ liebe Christen.
2.
Ihre nur geschminckte pracht/
Ihre nur entlehnte macht/
Ihre falsch-vermeinte gunst/
Ihre weißheit/ jhre kunst
Ist nur nebel/ wind vnd donst/
Ist vergebens vnd vmbsonst.
Denn sie muß mit jhren lüsten
Doch vergehen/ liebe Christen.
3.
Ihre schönheit/ vnd jhr gut/
Ihre lieb'/ jhr frecher muht/
Ihre leibsergötzlichkeit/
Ihrer seelen süssigkeit/
Ihre frewd' vnd sinnlichkeit/
Wäret eine kleine zeit.
Denn sie sol mit jhren lüsten
Bald vergehen/ liebe Christen.
4.
Ihre zierd' jhr stoltzer leib/
Ihr geschwätz'/ jhr zeit- vertreib/
Ihre lieder/ jhr gesang/
Ihre speisen/ jhr getranck/
Ihr spatzieren/ jhre mueß'/
Ist ein weg zur schwerer buß'/
Als sie mit jhren lüsten/
Gantz vergehen/ liebe Christen.
5.
Was sie lobet/ was sie liebt/
Was sie wünschet/ was sie giebt/
Was sie hoffet/ was sie schewt/
Was sie zusagt/ was sie dräwt/
Was sie macht/ vnd zubereit
Ist nur lauter eytelkeit/
Wenn sie nu mit jhren lüsten/
Muß vergehen/ liebe Christen.
6.
Darumb liebet nicht die welt/
(Wollt jhr lieben) noch jhr geld/
Noch jhr' ehre/ noch jhr gut/
Noch das/ was sie redt vnd thut.
Liebet das/ was wieder liebt
Vnd die seele nicht betrübt/
Diese welt mit jhren lüsten/
Wird vergehen/ liebe Christen.
7.
Liebet den/ den alles ehrt/
Liebet den/ der alles hört/
Alles sieht/ vnd alles richt/
Alles merckt/ vnd alles schlicht;
Alles hält/ vnd alles schafft.
Liebet Gott/ aus dessen krafft
Diese welt mit jhren lüsten/
Muß vergehen/ liebe Christen.
Ende