Auff hn. Johann Wincklers vnd fraw Annen Biesings hochzeit:
Nähst als Latonen sohn nach vnser westerseiten
Die roß' ins wilde meer wolt' in die träncke reiten/
Vnd da der silber-mon kam gegen selbe nacht
Mit Mars vnd Orion getreten auff die wacht/
Gieng – ich spatzieren – aus/ daß ich mein schloß der sinnen
(Welchs die Melancholey/ der Musen feind/ hatt' innen/
Mit list ersteigen möcht'/ auff daß die frewd' vnd lust
Drinn' hätten jhr guardier/ die vielen nicht bewust.
Da sah' ich mannich thier voll lust vnd ohne kommer/
Sich weiden mit gewächs' entsprossen diesen sommer/
Pans vnterthanes volck das lag vnd ruhte was
Gestreckt in grünen klee/ gestreckt in 's grüne graß:
Da war ein süsser thon ein frölich tirilieren
Ein lieblich liebe-laut von flaum-bekleidten thieren/
Die süsse nachtigal war über alle wach/
Jhr krauses stimmelein gab – keinem vogel – nach.
Da war kein trawren nicht/ da war ein jeder frölich/
Da war ein jeder froh/ da war ein jeder wählich/
Nur eine durteltaub'/ als mich bedeucht/ verirrt/
Saß auff eim dürren ast' elendiglich vnd girrt.
Sie flog bald hin/ bald her/ sie sucht' an allen enden
Von dem sie war gesucht/ den/ der jhr leid zu wenden
Von jhr entwendet war. Nicht anders/ geht es mir
(Hört' ich vnd sahe nichts) das klag ich jtzt alhier.
Mir sol kein vngefäll/ kein sturm/ kein vngewitter/
Vnd wär' es noch so groß/ vnd wär' es noch so bitter/
Zu groß vnd bitter seyn/ ohn' euch/ der jhr erquickt
Mein hertze/ welches schier durch liebes brand erstickt/
Durch liebesbandt bestrickt/ verknöpffet vnd verbunden/
Voll süsse bitterkeit/ voll fewr/ voll gifft/ voll wunden/
Voll dencken stets an euch/ voll seufftzen vnd voll noth
Voll hoffen vnd voll forcht/ voll kranckheit vnd voll tod/
Voll lassen vnd voll thun/ voll trauren vnd voll heulen
Voll wünschen/ voll beschweer/ voll kuglen vnd voll pfeilen
Voll zweiffel vnd voll angst/ voll vnruh'/ alles voll
Deß/ was man vmb sein lieb aus liebe leiden soll.
Nu tugendsame braut/ seyd jhr es denn gewesen/
Die ich damals erhört/ so seyd jhr nu genesen/
Denn der ist wieder loß/ vnd löst euch aus gefahr
Der euch gefangen hielt'/ als er gefangen war.
Die liebe macht jhn looß/ die euch vnd jhn gebunden
Hat an ein süsses joch. Die jhm entgegen stunden
Die ritterliche kunst/ das glück'/ vnd herrengonst
Acht' er ohn euch zu seyn für lauter wind vnd donst.
Ich wünsch' jhm wegen ewr/ für solche seine trewe/
Daß jhn der trewe Gott mit trewem glück erfrewe/
Ich wünsch' euch wegen sein/ lust/ frölichkeit vnd ruh/
Bis endlich Atropos drückt beider Augen zu.