Folgen andere schertz- vnd frewden gedichte neben etlichen vberschriften vnd erstlich etliche bindebriflein
Auf seines herrn schwagers Johannis Georgen Moeresii namens tag:
Multos multa ligant: celerî venus alma sagittâ
Conjungit duro mollia colla jugo:
Dulcia vina ligant, faciunt qui sacra Lyæo
Grata: viget dulci bellica turba mero:
Sunt, quos fœdus idem; sunt, quos honor omnibus idem
Conjungit; sunt quos indubitata fides:
Docta Minerva alios; alios Caducifer ales
Consociat; sunt, quos Martia ferra juvant.
Hos lepidi mores capiunt; hos læta juventus:
Nos mutûs jungit sanguine sanctus amor.
Sonnet:
Könt' ich/ herr schwager/ nur itzt in der eile finden/
Welchs ich von hertzen such'/ ein recht demanten-band/
Ein band von solchem werth/ das ewre werthe hand
An mein getrewes hertz' aufs beste könte binden
Ich vnterließ' es nicht. Ein ander mag jhm winden
Ein bändlein/ wie er wil/ nach seinem sinn' vnd tandt/
Mein bindeband muss seyn ein rechtes freundschafft-pfand/
Wer solch ein band nicht hat/ der bleibe nur dahinden.
Die zeiten seind sonst los'/ ist gleich des bindens viel/
Der bande noch vielmehr/ der binder gar kein ziel/
Der bindet nur zum schein/ vnd dieser nur zum schertzen
Der suchet durch sein band jhm vnverdiente gonst/
Ein ander sucht vnd findt geschminckter freundschaft-donst/
So binde/ wer da wil/ ich binde mit dem hertzen.