Hochzeit-liedt Auf Hn. Hanns von Hagen/ vnnd jungfraw Catharinen Niclassen hochzeit vnter der person des hn. bräutigams:
Rosemund mein liebelein
Wenn es könte müglich seyn
Vnnd mein wünsch nicht wär vmbsonst
Wünscht' ich mir Apellis konst.
Daß ich euch/ ihr engel-zier/
Könt' abmahlen nach gebür/
Nach gebür ewr äuglein-klar/
Nach gebür ewr gülden haar.
Haar; damit mich Amor bindt/
Aüglein; so mir fackeln sind/
Fackeln/ so mein mattes hertz'
Angezündt mit süssem schmertz'.
Ewre schöne wängelein
Edler als rubinenstein/
Röter als die Röselein/
Ewre perrel-zänelein/
Ewre stirn/ als helffenbein/
Ewre nas' vnd hälselein/
Die subtilen händelein/
Wolt' ich mahlen/ als sie seyn.
Ach mein wunsch ist nur ein tandt!
Kan auch wol die mahler hand/
Welche zwar den leib entreisst/
Mahlen solch einn hohen geist/
Der mit tugend wol geziert.
Ihren schönen leib regiert?
Edle seele tugend voll/
Die sich billich frewen soll/
Daß sie Gott hat einlosiert
In ein hauß so schön formirt/
In ein hauß so wol geziert
Vnd so zierlich auffgeführt/
Schöner/ als ein Jaspenstein/
Glätter/ als ein helffenbein/
Liechter/ als Carfunckelstein/
Reiner als Crystallen seyn.
Edle seele/ kan es seyn/
Daß ich auff ein stündelein/
Meine seel' in dein losier
Schick' in schwinder post zu dir:
Daß ich dich mein hertzengrund/
Süsser trost/ mein rosemund
Innerhalb auch mag besehn/
Wie wird mir so wol geschehn!
Kan dis aber auch nicht seyn/
Halt' ich mich an augenschein/
Welcher mich mit nichten treugt/
Weil er mir genug bezeugt/
Daß mein leben/ dem ich holdt/
Besser sey als Vngrisch Gold/
Vngrisch gold vnd edelstein/
Vnd das/ was kan tewrer seyn;
Keuscher; als Penelope/
Sittlicher; als Arete/
Schöner; als Cassiope/
Freundlicher; als Galate/
Friedlich; als ein täubelein/
Fleissig; als ein bienelein/
Lustig; als ein säugend lamm/
Süsser; als ein traubenstamm/
Grünend; als ein lentzen-klee/
Lieblich; als ein junges reh'/
Edler; als ein Ametyst/
Süsser; als der zucker ist.