7.
Gedencket an Loths Weib
Luc. 17. V. 32
Eh' als der ernste Gott mitt plitz vnd schwefell regen
Mitt fewer pech vnd sturm hatt Sodom vmbgekehrt
Eh' erd vnd Himmel kracht vor seines eyvers schwerdt/
Eh' als er Zeboim lies in die asche legen;
Eh' als die heisse lufft erklang von donnerschlägen;
Eh' er auff Adama sein rüsthaus außgelert
Eh' als Gomorrha noch von flammen auffgezehrt;
Mus Loth mitt Weib vnd Kind von dannen sich bewegen.
In dem der brandt entsteht/ vnd sein besturtzt gemahl
Mitt vmb gekehrten aug erblickt wie vber all
Mitt loh' vnd lichter glutt die häuser sind gekrönet;
Fühlt sie das threnen saltz aus ihren augen rint/
Vnd sie/ sie selbst wirdt saltz. Vnd ehr sie sich besinnt/
Ist durch die weise straff ihr vorwitz ausgesöhnet.