44.
An H. Caspar Dietzel. Vber die Abschrifft vnd verlag Leonis Armenii
Der hochverhaßte Fürst/ den zwar die grosse Stadt
Deß
Bosphers
hat gekrönt: Auf den sich doch verbunden
Erd/ Himmel/ Freund vnd Feind/ der durch gehäuffte wundẽ
Von diesem Thron gestürtzt/ den er mit macht betratt/
Der Fürst der sterbend lehrt/ wie bald das schnelle Radt
Deß Glücks/ werd' vmbgekehrt/ hat/ nun er gantz verschwunden
Durch zuthun meiner faust/ sein Leben wider funden/
Daß jhm der Mörder Schwerdt/ so schnell verkürtzet hatt.
Ich jrt'/ Er fiel vorhin alß Bizantz jhn entleibet/
Er fällt nun durch die Hand/ die seinen Todt beschreibet
Er fällt nun/ weil man nicht mein schreiben/ lesen kan.
Doch der/ der dreymal starb/ Muß dreyfach durch Euch lebẽ/
Herr Dietzel dessen Hand/ vnd druck jhm dis kan geben/
Was Bizantz/ mein gedicht; vnd schrifft jhm abgewan.