Er weyß es wol / aber er thůts nit.
Wer allein seinem lust vnd begirde nachfolgt / vnd veracht trewen rath / vnn was jm nutzlich vnd ehrlich ist / der ist gleich einem krancken / der wol erkennt was jm gsund ist zu essen / oder was jm schadet / vnd laßt sich doch seine lüst betriegen / vnd gneußt der speiß die jm schadet.
Wer güts weyß / der sol dardurch gereytze werden /gůts zuthůn / vnnd böses zulassen.
Dann vmb des willen erkündet man sich der zucht vnd aller kunst / daß man schliesse vnnd setz / Das ist recht / diß vnrecht / Diß sol mann thůn / jhenes lassen. Wer nun ein ding weyß / vnd thůt nit darnach /dem ists fährlicher dann besserlicher. Es wirt auch der wissend billicher gestrafft / denn der es nit gewüßt hat. Im Euangelio entschuldiget Christus Pilatum /vnd spricht: Die da mich dir geben haben / haben mehr sünd dann du. Item Weh dir Capernaum / weh dir Bethsaida / dann wo solche zeychen geschehen weren zu Sodoma vnn Gomorrha / als in dir / so würden sie fürwar bůß gethon habē / Fürwar sag ich dir /es wirt am gerichts tag Sodoma vnd Gomorrha träglicher ergehn dann dir. Die Heyden haben gesagt:
Virtus consistit in actione,
Tugēt steht im werck vnnd brauch / nit allein daß mans wisse / sonder thůe. Ein weiser mann sol nit allein ander leuten wissen zurathē / was sie thůn sollen / sonder er soll es selbs thůn. Sanct Paul sagt zu Tito: Sie sagen / sie kennen Got /vnd mit der that verleugnen sie Got / darumb seind sie ein grewel vor Gott.