Ich wil dirs wol vergeben / aber gleichwol gedencken.
Wo leut einander feind gewesen seind / vnn werden wider freund / da bleibet doch das gedencken / ob schon die that vergeben ist / vnnd mag sich leicht etwas begeben / dardurch die feindschafft wider ernewert wirt.
Es ist aber diß wort nicht Christlich / sonder Heydnisch / Dann soll vns Gott das vnser verzeihen / wann wir so offt übel vor jm thůn / so wil folgen / wir müssen auch denen vergeben von hertzen / die wider vns irgent mit einem geringen wort oder werck / ein mal handeln / vnd wie wir vnserm nächsten thůn / also wil vns Gott widerumb thůn. Dann es soll die Sonn nit vndergehn über vnsern zorn / sagt die schrifft.