Der best haußrath / ein fromm weib.
Vxor bona optima posseßio.
Ein gůter freund ist über silbern vnd gold.
Vnder vil freunden hab wenig zu geheymen räthen.
Newer freund / newer wein.
Wie kein theure wilpret auff erdē ist / dann ein new fromm geboren mensch / also sind warlich fromme weiber vnd gůte freund gar dünn gesehwet / Wer ein fromm weib / vnd einn gůten freund funden hat / mag wol sagen: Er hab einn schatz vnd gůten fundt thon /soll den selben nit leicht achten / sonder wol bewaren. Man sol auch fürsichtig / eben auffsehen / weil die vögel so seltzam seind / daß wir nit conterfey vnd abentheur / für silber vnnd gold erwischen / dann es sihet offt heuchlerei der freuntschafft im schein gar gleich. Hie gilts augen auff setzen / daß wir wol iederman zu freund vnnd mit aller welt frid halten / doch wenigen vnder allen freunden / ja keinem on die prob trawen. Derhalb wenig geheyme räth vnder allen menschen haben / vnd nit iederman vnsere geheym eröffnen / daß wir nicht veruntrewet / zuletst den spott zum schaden haben müssen.
Wie man nun nit weyß wie newer wein / so er vnuerjaren / geratē wirt / Also weyß man nicht von einem new angenommenen freund zu vrtheylen / wie er sein freundtschafft meynen oder ändern wirt / Darumb spricht man: New freund / new wein / vnnd wie alter in allen dingē abnimpt / allein dem wein ein krafft gibt / daß je älter wein / je besser wein / Also je älter freund / je besser freund.
Ein fromm man ist iederman ein getrewer freundt /aber wenigen innerlich vnd ein geheymer rath. Welcher aber ein freundt diser welt / iederman geheym ist / vnnd ein Zacheus auff allen kirch weihen / durch süsse wort sich in eines ieden freundtschafft flicket /der hat gewiß niemand lieb / vnd ist gewiß niemande freundt / dann so vil er eines an lust oder nutz geneußt.