Die liebe geht vndersich / nit übersich.
GOtt ist die liebe / sagt Sanct Joannes / darumb hat er auch sein milte gůte vnn liebe außgegossen / vnn in der ersten schöpffung / ehe er den menschen beschůffe / schaffet er vorradt in himel vnd erden / an laub /graß / fischen / vögeln / vnd allerley thieren / auff daß der mēsch erfüre die liebe Gots gegē jm. In fünff tagen seind alle ding geschaffen / am sechsten tag ist der mensch geschaffen / daß iemandt were der solcher güter gebrauchen möchte / Gott zu ehren / vnd jm selbs zu nutz. Droben ist gesagt / daß grüß sollen von hof kommen / das ist / ie grösser die leut seind / ie mehr sie liebe vnd gunst andern geringern leuten beweisen sollen.
Samson gab seinn gesellen ein retzel auff / vnnd sprach: Auß dem mund des starcken gieng süssigkeyt / vnd auß dem halse des fressers honigseym / das ist /Die grossen vnd starcken fresser auff erden / sollen freundtlich vnd gütlich mit aller welt gebaren vnnd reden. Christus heyßt die König der Heyden /
Benesicos,
gnädige herrn / von jrem ampt / Dann sie sollen iederman gnad vnd gunst erzeygen.
Augustinus in dem bůch / wie man die jungen Christen im glauben berichten soll / sagt: Daß man jnen zwo liebe predigen soll / Eine / Gottes zů vns /dardurch der glaub vnn Gots forcht geborn wirt / Die ander / vnsere zů dem nächsten. Sanct Joannes sagt: Mit daß wir jhn geliebt hetten / sonder daß er vns geliebet hat zuuor. Sanct Paul sagt: Gott hat darinn sein gnad vnnd liebe gepreiset / daß Christus für vns gestorben ist / da wir seine feind warē. Item: Also sehr hat Gott die welt geliebet / daß er seinen eynigen Son gegeben hat / auff das / wer an jn glaubet / nicht verloren werde / sonder das ewig leben habe. Hierauß wirt beweiset / daß grůß von hof kompt / vnd die liebe geht vndersich. Die ältern / wann sie schon vil kinder haben / so ist doch keins lieber dann das kleinest / vnd das am schwächesten ist. Dann Gott hat also der ältern hertz genaturt / daß sie auff die allein achtung haben / die es bedörffen / Der leib vnn all seine glider / erzeygen ehr dem vnehrlichsten glid /das decken sie / vnnd heylens zů.