Ein schwerdt helt das ander in der scheyd.
Man spricht / vnd ist war / Es sein eben so gůt katzen / die die meuß verjagen / als die sie fahen. Erschreckter feind ist auch geschlagen. Mann hat die sieg für ehrlich vnd herrlich / die on blůt erobert / dero exempel vil in Israel. Mann braucht offt mancherlei kriegslist / Bawet pasteien / anschütten / bollwerck / geußt büchsen / bestellt puluer vnnd büchsenmeyster etc. die mann nimmermehr zubrauchen begert / vnd den vnkosten nit gern anwendt / Nur daß mann den feindt erschrecke / vnd mit dem gbott abtreib. Dann so die statt wehrloß vnd bloß were / so geb mann dem feind ein vrsach zukommen / Aber diß schwerdt behelt jhenes in der scheyd.
Dahin magstu deuten der Hertzogen von Sachsen wapen / da ein blůtig schwerdt das ander auffhelt /vnd ins ander fellt / daß keins seinn streych volbringt.