Man sagt selten etwas / es ist ein wenig dran. Man heyßt kein kůh bläßlin / sie hab dann ein sternlin. Das gmeyn geschrey ist gemeynlich grösser dann die sach an jhr selbs / doch ists auch selten gar fehl /Das geschell ist nit gar fehl / Das geblerr laufft nit gar lehr. Doch seind allweg der frösch vil vnd groß im bach / vnnd die Immen wie die schaaff / das ist zuuil / aber nicht gar fehl / es seind dennoch schaaff im land /vnnd ist etwas an der sach. Es ist auch nichts schnellers dann diß geschell /dann es fleugt von eim zum andern / bald durch die gantz welt / Darumb seind ehrdieb grösser dann andere / dann er stilts nit / noch behalt den diebstal heymlich / sonder wirfft auch die gstolen ehr andern zum raub für / vnn macht daß an disem leumut auch wol zehē tausent ander dieb werden / die dem nach an jrs nechsten ehr sich vergreiffen / vnnd zu dieben werden.