Das gewiß findet mann im vngewissen.
Verbrennts kind förchts fewr.
Dise Sprichwörter sol die nachuolgend fabel außlegen.
Ein Flieg saget zu einer Spinnen: Was verschlegstu der natur die frei gemeyn landstraß? Die Spinn antwort: Die natur hat mir des gewalt geben / vnd mich gemacht zur leermeysterin aller menschen / darumb schlage ich die prob meiner kunst offentlich auff /vnnd wib in meiner offnen schůl zuleren alle menschen. Die Flieg sprach: Was? Sie antwort: Zumersten lerne an mir / daß ein mensch eben so wol eines rechten gesichts / als eines rechten hertzens bedarff. Derhalb nicht weniger deine augen dann dein hertz beware / sonst wirstu leichtlich in mein garn fallen /vnd mir zum raube. Zum andern / daß deine füß dich nit fürlauffen / sonder deinn augen nach / vnd nit vorgehen. Salomon spricht: Der weise hat sein füß in seinem gewalt / aber der narr gehet seinn füssen nach /vnnd ist in seiner füß gewalt / daß er hingeht wohin sie wöllen. Es solten aber die fůß der vernunfft augen nachgehen / vnd nimmer der fůß das aug füren / Wo das jhr sichere fliegen theten / fielt jhr nit also hauffend in mein netz. Aber weil jhr blindt / ewern flügeln nachfliegt / werdet jr in mein garn gefangen. Zum dritten lere ich / daß man in sicherheit die gröst sorg haben sol / dann das gwiß findt man nirgent dann im vngwissen / das ist / gwisse růh findstu in d' forcht /sorg / zweifel vnn vngwissen. Lerne in gewissen dingē zweifeln / so bistu sicher vnn gwiß in vngewissen zweifeligen dingen. Der weise förche sich vnd zweifelt / also entrinnt er gewisser gefahr. Der thor aber besorget sich sicher nicht / darumb fellt er in gewisse irrthumb. Forcht des schiffbruchs / fürkompt den schiffbruch.
Ich werffe für die thorn mein netz / darein sie sicher faren / die vnsichern weisen fürsehens mit forcht / daß sie nicht drein faren. Die flieg sagt: Es seind gůte leere / Antwort die spinn: Gůt seind sie wann du darnach thůst. In dem vergaß sie der bald / vnd schnurrt in die wepp vnsürsichtig vnnd sicher. Sie klagt den trug der Spinnen / die Spinn sagt: Es were gerechtigkeyt vnd kein trug / daß der gewarnet vogel über alle warnung vnfürsichtig inns garn fiele. Zů dem so were sie dem gmeynen nutz ein schädlich ding / hett vor lang den todt verdient.
Die natur ein solche weibheyt den thieren eingibt /daß ein iedes sein gfahr weyß zumeiden. Ein esel meidet die strassen / darauff er ein mal einn blossen legt. Der Wolff fleucht die Wolffsgrůb. Greifft ein kindt einmal in ein feur / es förcht gebrennt / das feur. Allein der alber mēsch geht auch nach dem schiffbruch wider zu schiff / vnd eilt inn krieg / als er im nechsten schwerlich daruon kame / drumb ist weniger witz in eim vnweisen menschen / dann inn allen vnuernünfftigen thieren.