Fleugt ein Gans über meer / so kompt ein gagag herwider.
Cœlum, non animum, mutant qui trans mare currunt.
Fert ein katz in Ehgelland / so wirt sie doch mawen. Wer einn narren weit sendet / dem kompt ein thor herwider. Ampt / stand / zeit / statt / speiß / Hleyd / so eussere ding seind / wenden oder bessern nichts innwendigs. Darūb thůnd alle eussere ding allein / vnd an jn selbs / nichts zur frombkeyt / als zeit / statt /person / stand. Adam sündet im Paradeiß / Lucifer im himel. Loth ist mitten in Sodoma vnder eitel Sodomitern fromm vnd auffrecht. Auff dem berg / inn der wüste / allein / oder nur selbdrit / sünder er. Darumb thůt der ding so ausser vns seind / keins zur frombkeyt oder rechter weißheyt / es můß von innen herauß quellen / vnd in vns sein. Ihenseit Meers findt mans nicht / sonder das wort Gottes / weißheyt / sinn /liecht vnn leben / ist vnd můß sein in vnserm mund vnd hertzen / vnd den innern grund berüren vnd erleuchten. Darumb der einn narren über Meer tregt /wirt jn an einn thorn tauschen. Der ein schalck / in ein kutt oder closter kreucht / wirt einn büben herauß tragen. Welcher nit in sich selbs geht / od' sich selbs zeucht / vnnd ein rechnung macht bei sich selbs / was / vnd wie er ein ding thůn / reden / leren / vnd an greiffen wöll / schick jn gen Pariß / biß er wirt greiß /so kompt doch der jung narr auß zogē / alt herwider /vnnd thůt weder zeit noch die statt etwas zur sach / er sůche dann / erfar / vnd übe sich. Der fleiß thůts /dem stehet nichts vor. Fleiß bricht alle eiß. Das kleyd macht nit den mann. Der mann soll den stand zieren.