Es můß ein ding einen anfang haben.
Alle ding haben einen anfang / vnnd der ist gemeynlich gering. Der Römer gewaltigs Reich hůb gar schlecht an. Wann sie außzogen zukriegen / so steckten sie an einen zaunstecken ein büschlein häw zum panier / wie Ouidius schreibt / vnd wurden hernach so mächtig / daß sie die welt innen hetten / biß an Persien vnd Indien. Wann aber nun etwas angefangen ist /so schickt es sich selbs / vnnd wechßt / vnd nimpt zů von tag zu tage / biß es übersich steiget. Dann es můß ein ding einn anfang haben. Es laßt sich offt etwas ansehen / also schlecht vnd geringe / daß mans verachtet / Aber weise leute verachtens nit / sond sprechen: Es můß ein anhebē sein eins dings.