Wohin du kommest / wirstu den wirt daheym finden.
Das ist / An allen orten wirstu leut finden / die es machen wie sie es gelust / vnnd nit wie du wilt / es wirt dir doch nirgent allweg nach deim willen gehn. Also sagen wir zu denen / die nirgent bleibē / niemand leiden / nichts vertragen wöllen noch können / sonder jhre sach verbessern an andern orten: Zeuch hin lieber gesell / wo du hin kompst / da wirt der wirt daheymen sein / du wirst an allen orten finden das dir nit gefellt.
Sonst brauchen wirs auch also / daß sich einer selbs erinnert / wie er sich eingezogen halt / vnd leid an einem ort so mere / als an eim andern / er můß doch leiden / denn wo er hin komme / so ist der wirt daheymen / das ist / müh vnd arbeit vorhanden.