Laß hund sorgen / die bedörffen vier schůch.
Eben wie mann findet einn frölichen menschen / also findet mann jhr zehen / die voller sorg vnnd betrübniß stecken / vnnd haben jmmer sorg der himel falle auff sie / oder sie werden hungers sterben / so doch Gott übernacht beschert / vnnd schůff allen vorrath / ehe dann er den menschen schůff / daß er daran lernen solte / er solt erneret werden. Christus sagt im Euãgelio: Die vögel des himels sähwē / schneiden / erndten nicht / füren auch nichts in jre scheuren / noch stirbt keiner hungers / Got neret sie / wie solte er dann einn menschen nit erneren? Ein hund hat vier füß / vnnd wann er schůch trůge / müste er zwey par schůch haben / noch sorgt er nicht. Warumb sorget dann ein mensch / der nur ein par schůch bedarff / vnnd ist vil besser: Gott hat auch mehr acht auff jn / dann auff einen hund.
Es ist diß Sprichwort nit alleyn ein weise rede /sonder auch ein Christlicher / ja des heiligen Geysts trost / wider die bauchsorg / Laß einen hundt sorgen /der bedarff zwey par schůch / du bedarffest nur ein par. Es ist aber einem menschen ein grosse schande /daß ein hund Gott mehr vertrawet dann er / Wie auch die schrifft den menschen schmähet mit den vögelin /vnd den Omeyssen.