Wer solch brigel oder bengel wil auffklauben /findet bald ein widt oder seyl voll.
Es ist vnser zuuil vnnd zuwenig auff erden. Loser leut findt man gnůg / aber an verständigen weisen frommen leuten ist allenthalben grosser mangel. Christen seind dünn gesähwet / vnd sitzen weit von einander. Es zündet Socrates zu Athen am marckt vnd grossem volck ein latern an bei hellem tag / da doch ein außbund geleerter leut solte sein / gefragt was er damit meynet / sagt er: Er sůchte menschen / Meynet / der böfel vnn gmeynhauff / der nach der welt lebt / wer nit werdt / dz er ein mensch genant würde / weil er so viehisch nach all seinn affecten lebt. Rechter leut /wie vil vnser ist / ist allenthalb ein abgāg / gleich als sei das land außgestorben. Nur die heffe vnnd wůst der leut / fert / wie das vnkraut wol geradten / allenthalb vmb / Darumb ein fromm Gottweiß mann / ist wie ein Rose vnder den dornen / ein körnlin vnder eim sprewerhauffen / Daniel in Babylone / Moses in Egypten / Naaman in Syria / Loth in Sodoma / vnd wie Noe in der gantzen welt.