Je böser mensch / je besser glück.
Fortuna fouet ignauos.
Der feulesten saw gehört allweg der gröst dreck. Der teufel scheißt nur auff den grösten hauffen. Er hat sich dem Teufel ergeben / Schlüge er das glück vornen auß / es lieff hinden wider hinein. Würff er einn creutzer auff ein tach / es fiel jm ein batz wider herab. Er gewint sein ding schlaffend. Er hat mehr glücks dann rechts. Das glück vnd die weiber haben die narren hold. Heyloß leut haben allweg mehr glücks dann andere leut. Dionysium malet mann wie er schlieff /vnnd land vnd leut fielen jm schlaffend in sein netz /Das wolten jhm etlich zu vnehrn deuten / als were es eitel glück / vnd nit sein rath / stercke / anschlag /mannliche that / etc. da sagt er: Wie wann ich erwachen würde: Wolt zuuerstehn geben das hett er alles schlaffend thon / so er erwachet / solten sie sich erst hüten.