Die můtter gibt so gůten kauff als die tochter. Mit rechten leuten gehts eim recht. Es ist besser bei dem schmid / dann bei dē schmidlin zubeschlagen. Mann kaufft lieber dem herrn dann dem knecht ab. Hungerige mucken beissen übel / darumb zert mann bei wirten baß / dann bei wirtlin. Darzů wissen die alten mehr bescheydt dann die jungen / darumm ist besser mit jn zuhandeln / haben auch mehr macht /vnnd mögen mehr übersich nemen. Oder brauchs wenn du wilt sagen / Es sei eben gurr als gaul / můtter als tochter / was du an einer fleuchst / wirstu bei der andern finden. Die můtter gibt thewer / vnnd die tochter nicht wolfeyl. Es ist krot als Edex.