TEXT IN PAUSA
meghaiḥ meduram ambaram vana-bhuvaḥ śyāmāḥ tamāla-drumaiḥ
naktam bhīruḥ ayam tvam eva tat imam rādhe gṛham prāpaya /
ittham nanda-nideśataḥ calitayoḥ prati-adhva-kuñja-drumam
rādhā-mādhavayoḥ jayanti yamunā-kūle rahaḥ-kelayaḥ //
vāk-devatā-carita-citrita-citta-sadmā
padmāvatī-caraṇa-cāraṇa-cakravartī
śrī-vāsudeva-rati-keli-kathā-sametam
etam karoti jayadeva-kaviḥ prabandham //
vācaḥ pallavayati umāpatidharaḥ saṃdarbha-śuddhim girām
jānīte jayadevaḥ eva śaraṇaḥ ślāghyaḥ durūha-drute /
śṛṅgāra-uttara-sat-prameya-racanaiḥ ācāryagovardhana-
spardhī kaḥ api na viśrutaḥ śrutidharaḥ dhoyī kavi-kṣmāpatiḥ //
yadi hari-smaraṇe sarasam manaḥ
yadi vilāsa-kalāsu kutūhalam /
madhura-komala-kānta-pada-āvalīm
śṛṇu tadā jayadeva-sarasvatīm //
pralaya-payodhi-jale dhṛtavān asi vedam/
vihita-vahitra-caritram akhedam //
keśava dhṛta-mīna-śarīra
jaya jagadīśa hare //
kṣitiḥ ativipulatare tava tiṣṭhati pṛṣṭhe /
dharaṇi-dharaṇa-kiṇa-cakra-gariṣṭhe //
keśava dhṛta-kacchapa-rūpa
jaya jagadīśa hare //
vasati daśana-śikhare dharaṇī tava lagnā /
śaśini kalaṅka-kalā iva nimagnā //
keśava dhṛta-śūkara-rūpa
jaya jagadīśa hare //
tava kara-kamala-vare nakham adbhuta-śṛṅgam /
dalita-hiraṇyakaśipu-tanu-bhṛṅgam //
keśava dhṛta-narahari-rūpa
jaya jagadīśa hare //
chalayasi vikramaṇe balim adbhuta-vāmana /
pada-nakha-nīra-janita-jana-pāvana //
keśava dhṛta-vāmana-rūpa
jaya jagadīśa hare //
kṣatriya-rudhira-maye jagat apagata-pāpam /
snapayasi payasi śamita-bhava-tāpam //
keśava dhṛta-bhṛgupati-rūpa
jaya jagadīśa hare //
vitarasi dikṣu raṇe dikpati-kamanīyam /
daśamukha-mauli-balim ramaṇīyam //
keśava dhṛta-rāma-śarīra
jaya jagadīśa hare //
vahasi vapuṣi viśade vasanam jalada-ābham /
hala-hati-bhīti-milita-yamunā-ābham //
keśava dhṛta-haladhara-rūpa
jaya jagadīśa hare //
nindasi yajña-vidheḥ ahaha śruti-jātam /
sadaya-hṛdaya darśita-paśu-ghātam //
keśava dhṛta-buddha-śarīra
jaya jagadīśa hare //
mleccha-nivaha-nidhane kalayasi karavālam /
dhūma-ketum iva kim api karālam //
keśava dhṛta-kalki-śarīra
jaya jagadīśa hare //
śrījayadeva-kaveḥ idam uditam udāram /
śṛṇu sukhadam śubhadam bhava-sāram //
keśava dhṛta-daśa-vidha-rūpa
jaya jagadīśa hare //
vedān uddharate jagat nivahate bhūgolam udbibhrate
daityam dārayate balim chalayate kṣatra-kṣayam kurvate /
paulastyam jayate halam kalayate kāruṇyam ātanvate
mlecchān mūrcchayate daśa-ākṛti-kṛte kṛṣṇāya tubhyam namaḥ //
śrita-kamalā-kuca-maṇḍala dhṛta-kuṇḍala e /
kalita-lalita-vana-māla jaya jayadeva hare //
dina-maṇi-maṇḍala-maṇḍana bhava-khaṇḍana e /
muni-jana-mānasa-haṃsa jaya jayadeva hare //
kāliya-viṣa-dhara-gañjana jana-rañjana e /
yadu-kula-nalina-dineśa jaya jayadeva hare //
madhu-mura-naraka-vināśana garuḍa-āsana e /
sura-kula-keli-nidāna jaya jayadeva hare //
amala-kamala-dala-locana bhava-mocana e /
tribhuvana-bhavana-nidhāna jaya jayadeva hare //
janaka-sutā-kṛta-bhūṣaṇa jita-dūṣaṇa e /
samara-śamita-daśakaṇṭha jaya jayadeva hare //
abhinava-jaladhara-sundara dhṛta-mandara e /
śrī-mukha-candra-cakora jaya jayadeva hare //
śrījayadeva-kaveḥ idam kurute mudam e /
maṅgalam ujjvala-gītam jaya jayadeva hare //
padmā-payodhara-taṭī-parirambha-lagna-kāśmīra-mudritam
uraḥ madhusūdanasya /
vyakta-anurāgam iva khelat-anaṅga-kheda-sveda-ambu-pūram
anupūrayatu priyam vaḥ //
vasante vāsantī-kusuma-sukumāraiḥ avayavaiḥ
bhramantīm kāntāre bahu-vihita-kṛṣṇa-anusaraṇām /
amandam kandarpa-jvara-janita-cintā-ākulatayā
valat-bādhām rādhām sarasam idam ūce sahacarī //
lalita-lavaṅga-latā-pariśīlana-komala-malaya-samīre /
madhukara-nikara-karambita-kokila-kūjita-kuñja-kuṭīre //
viharati hariḥ iha sarasa-vasante
nṛtyati yuvati-janena samam sakhi virahi-janasya durante //
unmada-madana-manoratha-pathika-vadhū-jana-janita-vilāpe /
ali-kula-saṃkula-kusuma-samūha-nirākula-bakula-kalāpe //
viharati hariḥ iha sarasa-vasante
nṛtyati yuvati-janena samam sakhi virahi-janasya durante //
mṛgamada-saurabha-rabhasa-vaśaṃvada-nava-dala-māla-tamāle /
yuva-jana-hṛdaya-vidāraṇa-manasija-nakha-ruci-kiṃśuka-jāle //
viharati hariḥ iha sarasa-vasante
nṛtyati yuvati-janena samam sakhi virahi-janasya durante //
madana-mahīpati-kanaka-daṇḍa-ruci-keśara-kusuma-vikāse /
milita-śilīmukha-pāṭali-paṭala-kṛta-smara-tūṇa-vilāse //
viharati hariḥ iha sarasa-vasante
nṛtyati yuvati-janena samam sakhi virahi-janasya durante //
vigalita-lajjita-jagat-avalokana-taruṇa-karuṇa-kṛta-hāse /
virahi-nikṛntana-kunta-mukha-ākṛti-ketaka-danturita-āśe //
viharati hariḥ iha sarasa-vasante
nṛtyati yuvati-janena samam sakhi virahi-janasya durante //
mādhavikā-parimala-lalite navamālika-jāti-sugandhau /
muni-manasām api mohana-kāriṇi taruṇa-akāraṇa-bandhau //
viharati hariḥ iha sarasa-vasante
nṛtyati yuvati-janena samam sakhi virahi-janasya durante //
sphurat-atimukta-latā-parirambhaṇa-mukulita-pulakita-cūte /
vṛndāvana-vipine parisara-parigata-yamunā-jala-pūte //
viharati hariḥ iha sarasa-vasante
nṛtyati yuvati-janena samam sakhi virahi-janasya durante //
śrījayadeva--bhaṇitam idam udayati hari-caraṇa-smṛti-sāram /
sarasa-vasanta-samaya-vana-varṇanam anugata-madana-vikāram //
viharati hariḥ iha sarasa-vasante
nṛtyati yuvati-janena samam sakhi virahi-janasya durante //
dara-vidalita-mallī-valli-cañcat-parāga-
prakaṭita-paṭa-vāsaiḥ vāsayan kānanāni /
iha hi dahati cetaḥ ketakī-gandha-bandhuḥ
prasarat-asamabāṇa-prāṇavat-gandhavāhaḥ //
unmīlat-madhu-gandha-lubdha-madhupa-vyādhūta-cūta-aṅkura-
krīḍat-kokila-kākalī-kalakalaiḥ udgīrṇa-karṇa-jvarāḥ /
nīyante pathikaiḥ katham katham api dhyāna-avadhāna-kṣaṇa-
prāpta-prāṇa-samā-samāgama-rasa-ullāsaiḥ amī vāsarāḥ //
aneka-nārī-parirambha-sambhrama-sphurat-manohāri-vilāsa-lālasam /
murārim ārāt upadarśayantī asau sakhī samakṣam punaḥ āha rādhikām //
candana-carcita-nīla-kalevara-pīta-vasana-vanamālī /
keli-calat-maṇi-kuṇḍala-maṇḍita-gaṇḍa-yuga-smita-śālī //
hariḥ iha mugdha-vadhū-nikare vilāsini vilasati kelipare //
pīna-payodhara-bhāreṇa harim parirabhya sarāgam /
gopa-vadhūḥ anugāyati kācit udañcita-pañcama-rāgam //
hariḥ iha mugdha-vadhū-nikare vilāsini vilasati kelipare //
kāpi vilāsa-vilola-vilocana-khelana-janita-manojam /
dhyāyati mugdha-vadhūḥ adhikam madhu-sūdana-vadana-sarojam //
hariḥ iha mugdha-vadhū-nikare vilāsini vilasati kelipare //
kāpi kapola-tale militā lapitum kimapi śruti-mūle /
cāru cucumba nitambavatī dayitam pulakaiḥ anukūle //
hariḥ iha mugdha-vadhū-nikare vilāsini vilasati kelipare //
keli-kalā-kutukena ca kācit amum yamunā-jala-kūle /
mañjula-vañjula-kuñja-gatam vicakarṣa kareṇa dukūle //
hariḥ iha mugdha-vadhū-nikare vilāsini vilasati kelipare //
kara-tala-tāla-tarala-valaya-āvali-kalita-kala-svana-vaṃśe /
rāsa-rase saha-nṛtya-parā hariṇā yuvatiḥ praśaśaṃse //
hariḥ iha mugdha-vadhū-nikare vilāsini vilasati kelipare //
śliṣyati kāmapi cumbati kāmapi kāmapi ramayati rāmām /
paśyati sasmita-cāru-parām aparām anugacchati vāmām //
hariḥ iha mugdha-vadhū-nikare vilāsini vilasati kelipare //
śrījayadeva-kaveḥ idam adbhuta-keśava-keli-rahasyam /
vṛndāvana-vipine lalitam vitanotu śubhāni yaśasyam //
hariḥ iha mugdha-vadhū-nikare vilāsini vilasati kelipare //
viśveṣām anurañjanena janayan ānandam indīvara-
śreṇī-śyāmala-komalaiḥ upanayan aṅôaiḥ anaṅga-utsavam /
svacchandam vraja-sundarībhiḥ abhitaḥ prati-aṅgam āliṅgitaḥ
śṛṅgāraḥ sakhi mūrtimān iva madhau mugdhaḥ hariḥ krīḍati //
adya utsaṅga-vasat-bhujaṅga-kavala-kleśāt iva īśa-acalam
prāleya-plavana-icchayā anusarati śrīkhaṇḍa-śaila-anilaḥ /
kim ca snigdha-rasāla-mauli-mukulāni ālokya harṣa-udayāt
unmīlanti kuhūḥ kuhūḥ iti kala-uttālāḥ pikānām giraḥ //
viharati vane rādhā sādhāraṇa-praṇaye harau
vigalita-nija-utkarṣāt īrṣyā-vaśena gatā anyataḥ /
kvacit api latā-kuñje guñjat-madhuvrata-maṇḍalī-
mukhara-śikhare līnā dīnā api uvāca rahaḥ sakhīm //
saṃcarat-adhara-sudhā-madhura-dhvani-mukharita-mohana-vaṃśam /
calita-dṛk-añcala-cañcala-mauli-kapola-vilola-vataṃsam //
rāse harim iha vihita-vilāsam smarati manaḥ mama kṛta-parihāsam //
candraka-cāru-mayūra-śikhaṇḍaka-maṇḍala-valayita-keśam /
pracura-purandara-dhanuḥ-anurañjita-medura-mudira-suveśam //
rāse harim iha vihita-vilāsam smarati manaḥ mama kṛta-parihāsam //
gopa-kadamba-nitambavatī-mukha-cumbana-lambhita-lobham /
bandhujīva-madhura-adhara-pallavam ullasita-smita-śobham //
rāse harim iha vihita-vilāsam smarati manaḥ mama kṛta-parihāsam //
vipula-pulaka-bhuja-pallava-valayita-ballava-yuvati-sahasram /
kara-caraṇa-urasi maṇi-gaṇa-bhūṣaṇa-kiraṇa-vibhinna-tamisram //
rāse harim iha vihita-vilāsam smarati manaḥ mama kṛta-parihāsam //
jalada-paṭala-valat-indu-vinindaka-candana-tilaka-lalāṭam /
pīna-ghana-stana-maṇḍala-mardana-nirdaya-hṛdaya-kapāṭam //
rāse harim iha vihita-vilāsam smarati manaḥ mama kṛta-parihāsam //
maṇi-maya-makara-manohara-kuṇḍala-maṇḍita-gaṇḍam udāram /
pīta-vasanam anugata-muni-manuja-sura-asura-vara-parivāram //
rāse harim iha vihita-vilāsam smarati manaḥ mama kṛta-parihāsam //
viśada-kadamba-tale militam kali-kaluṣa-bhayaṃ śamayantam /
mām api kimapi taraṅgat-anaṅga-dṛśā manasā ramayantam //
rāse harim iha vihita-vilāsam smarati manaḥ mama kṛta-parihāsam //
śrījayadeva-bhaṇitam atisundara-mohana-madhuripu-rūpam /
hari-caraṇa-smaraṇam prati saṃprati puṇyavatām anurūpam //
rāse harim iha vihita-vilāsam smarati manaḥ mama kṛta-parihāsam //
gaṇayati guṇa-grāmam bhāmam bhramāt api na īhate
vahati ca parītoṣam doṣam vimuñcati dūrataḥ /
yuvatiṣu valat-tṛṣṇe kṛṣṇe vihāriṇi mām vinā
punaḥ api manaḥ vāmam kāmam karoti karomi kim //
nibhṛta-nikuñja-gṛham gatayā niśi rahasi nilīya vasantam /
cakita-vilokita-sakala-diśā rati-rabhasa-rasena hasantam //
sakhi he keśimathanam udāram
ramaya mayā saha madana-manoratha-bhāvitayā savikāram //
prathama-samāgama-lajjitayā paṭu-cāṭu-śataiḥ anukūlam /
mṛdu-madhura-smita-bhāṣitayā śithilī-kṛta-jaghana-dukūlam //
sakhi he keśimathanam udāram
ramaya mayā saha madana-manoratha-bhāvitayā savikāram //
kisalaya-śayana-niveśitayā ciram urasi mama eva śayānam /
kṛta-parirambhaṇa-cumbanayā parirabhya kṛta-adhara-pānam //
sakhi he keśimathanam udāram
ramaya mayā saha madana-manoratha-bhāvitayā savikāram //
alasa-nimīlita-locanayā pulaka-āvali-lalita-kapolam /
śrama-jala-sakala-kalevarayā vara-madana-madāt atilolam //
sakhi he keśimathanam udāram
ramaya mayā saha madana-manoratha-bhāvitayā savikāram //
kokila-kala-rava-kūjitayā jita-manasija-tantra-vicāram /
ślatha-kusuma-ākula-kuntalayā nakha-likhita-ghana-stana-bhāram //
sakhi he keśimathanam udāram
ramaya mayā saha madana-manoratha-bhāvitayā savikāram //
caraṇa-raṇita-maṇi-nūpurayā paripūrita-surata-vitānam /
mukhara-viśṛṅkhala-mekhalayā sa-kacagraha-cumbana-dānam //
sakhi he keśimathanam udāram
ramaya mayā saha madana-manoratha-bhāvitayā savikāram //
rati-sukha-samaya-rasa-ālasayā dara-mukulita-nayana-sarojam /
niḥsaha-nipatita-tanu-latayā madhusūdanam udita-manojam //
sakhi he keśimathanam udāram
ramaya mayā saha madana-manoratha-bhāvitayā savikāram //
śrījayadeva-bhaṇitam idam atiśaya-madhuripu-nidhuvana-śīlam /
sukham utkaṇṭhita-gopa-vadhū-kathitam vitanotu salīlam //
sakhi he keśimathanam udāram
ramaya mayā saha madana-manoratha-bhāvitayā savikāram //
hasta-srasta-vilāsa-vaṃśam anṛju-bhrū-vallimat ballavī-
vṛnda-utsāri-dṛk-anta-vīkṣitam atisveda-ārdra-gaṇḍa-sthalam /
mām udvīkṣya vilakṣitam smita-sudhā-mugdha-ānanam kānane
govindam vraja-sundarī-gaṇa-vṛtam paśyāmi hṛṣyāmi ca //
durāloka-stoka-stabaka-navaka-aśoka-latikā-
vikāsaḥ kāsāra-upavana-pavanaḥ'pi vyathayati /
api bhrāmyat-bhṛṅgī-raṇita-ramaṇīyā na mukula-
prasūtiḥ cūtānām sakhi śikhariṇī iyam sukhayati //
kaṃsāriḥ api saṃsāra-vāsanā-bandha-śṛṅkhalām /
rādhām ādhāya hṛdaye tatyāja vraja-sundarīḥ //
itaḥ tataḥ tām anusṛtya rādhikām anaṅga-bāṇa-vraṇa-khinna-mānasaḥ /
kṛta-ānutāpaḥ sa kalinda-nandinī-taṭa-anta-kuñje viṣasāda mādhavaḥ //
mām iyam calitā vilokya vṛtam vadhū-nicayena /
sa-aparādhatayā mām api na vārita-atibhayena //
harihari hata-ādaratayā gatā sā kupitā iva //
kim kariṣyati kim vadiṣyati sā ciram viraheṇa /
kim dhanena janena kim mama jīvitena gṛheṇa //
harihari hata-ādaratayā gatā sā kupitā iva //
cintayāmi tat-ānanam kuṭila-bhru kopa-bhareṇa /
śoṇa-padmam iva upari bhramatā ākulam bhramareṇa //
harihari hata-ādaratayā gatā sā kupitā iva //
tām aham hṛdi saṃgatām aniśam bhṛśam ramayāmi /
kim vane anusarāmi tām iha kim vṛthā vilapāmi //
harihari hata-ādaratayā gatā sā kupitā iva //
tanvi khinnam asūyayā hṛdayam tava ākalayāmi /
tat na vedmi kutaḥ gatā asi na tena te anunayāmi //
harihari hata-ādaratayā gatā sā kupitā iva //
dṛśyase purataḥ gata-āgatam eva me vidadhāsi /
kim purā iva sasaṃbhramaṃ parirambhaṇam na dadāsi //
harihari hata-ādaratayā gatā sā kupitā iva //
kṣamyatām aparam kadāpi tava īdṛśam na karomi /
dehi sundari darśanam mama manmathena dunomi //
harihari hata-ādaratayā gatā sā kupitā iva //
varṇitam jayadevakena hareḥ idam pravaṇena /
kindubilva-samudra-sambhava-rohiṇī-ramaṇena //
harihari hata-ādaratayā gatā sā kupitā iva //
hṛdi bisa-latā-hāraḥ na ayam bhujaṅgama-nāyakaḥ
kuvalaya-dala-śreṇī kaṇṭhe na sā garala-dyutiḥ /
malayaja-rajaḥ na idam bhasma prihāra-hite mayi
prahara na hara-bhrāntyā anaṅga krudhā kim u dhāvasi //
pāṇau mā kuru cūta-sāyakam amum mā cāpam āropaya
krīḍā-nirjita-viśva mūrcchita-jana-āghātena kim pauruṣam /
tasyāḥ eva mṛgī-dṛśaḥ manasija-preṅkhat-kaṭākṣa-āśuga-
śreṇī-jarjaritam manāk api manaḥ na adya api saṃdhukṣate //
bhrū-cāpe nihitaḥ kaṭākṣa-viśikhaḥ nirmātu marma-vyathām
śyāma-ātmā kuṭilaḥ karotu kabarī-bhāraḥ api māra-udyamam /
moham tāvat ayam ca tanvi tanutām bimba-adharaḥ rāgavān
sat-vṛtta-stana-maṇḍalaḥ tava katham prāṇaiḥ mama krīḍati //
tāni sparśa-sukhāni te ca taralāḥ snigdhāḥ dṛśoḥ vibhramāḥ
tat-vaktra-ambuja-saurabham saḥ ca sudhā-syandī girām vakrimā /
sā bimba-adhara-mādhurī iti viṣaya-āsaṅge api cet mānasam
tasyām lagna-samādhi hanta viraha-vyādhiḥ katham vardhate //
bhrū-pallavam dhanuḥ apāṅga-taraṅgitāni
bāṇāḥ guṇaḥ śravaṇa-pāliḥ iti smareṇa /
tasyām anaṅga-jaya-jaṅgama-devatāyām
astrāṇi nirjita-jaganti kim arpitāni //
yamunā-tīra-vānīra-nikuñje mandam-āsthitam /
prāha prema-bhara-udbhrāntam mādhavam rādhikā-sakhī //
nindati candanam indukaraṇam anu vindati khedam adhīram /
vyāla-nilaya-milanena garalam iva kalayati malaya-samīram //
sā virahe tava dīnā
mādhava manasija-viśikha-bhayāt iva bhāvanayā tvayi līnā //
avirala-nipatita-madana-śarāt iva bhavat-avanāya viśālam /
sva-hṛdaya-marmaṇi varma karoti sajala-nalinī-dala-jālam //
sā virahe tava dīnā
mādhava manasija-viśikha-bhayāt iva bhāvanayā tvayi līnā //
kusuma-viśikha-śara-talpam analpa-vilāsa-kalā-kamanīyam /
vratam iva tava parirambha-sukhāya karoti kusuma-śayanīyam //
sā virahe tava dīnā
mādhava manasija-viśikha-bhayāt iva bhāvanayā tvayi līnā //
vahati ca galita-vilocana-jala-bharam ānana-kamalam udāram /
vidhum iva vikaṭa-vidhuntuda-danta-dalana-galita-amṛta-dhāram //
sā virahe tava dīnā
mādhava manasija-viśikha-bhayāt iva bhāvanayā tvayi līnā //
vilikhati rahasi kuraṅga-madena bhavantam asamaśara-bhūtam /
praṇamati makaram adhaḥ vinidhāya kare ca śaram nava-cūtam //
sā virahe tava dīnā
mādhava manasija-viśikha-bhayāt iva bhāvanayā tvayi līnā //
prati-padam idam api nigadati mādhava tava caraṇe patitā aham /
tvayi vimukhe mayi sapadi sudhā-nidhiḥ api tanute tanu-dāham //
sā virahe tava dīnā
mādhava manasija-viśikha-bhayāt iva bhāvanayā tvayi līnā //
dhyāna-layena puraḥ parikalpya bhavantam atīva durāpam /
vilapati hasati viṣīdati roditi cañcati muñcati tāpam //
sā virahe tava dīnā
mādhava manasija-viśikha-bhayāt iva bhāvanayā tvayi līnā //
śrījayadeva-bhaṇitam idam adhikam yadi manasā naṭanīyam /
hari-viraha-ākula-ballava-yuvati-sakhī-vacanam paṭhanīyam //
sā virahe tava dīnā
mādhava manasija-viśikha-bhayāt iva bhāvanayā tvayi līnā //
āvāsaḥ vipināyate priya-sakhī-mālā api jālāyate
tāpaḥ api śvasitena dāva-dahana-jvālā-kalāpāyate /
sā api tvat-viraheṇa hanta hariṇīrūpāyate hā katham
kandarpaḥ api yamāyate viracayan śārdūla-vikrīḍitam //
stana-vinihitam api hāram udāram /
sā manute kṛśa-tanuḥ atibhāram //
rādhikā virahe tava keśava //
sarasa-masṛṇam api malayaja-paṅkam /
paśyati viṣam iva vapuṣi saśaṅkam //
rādhikā virahe tava keśava //
śvasita-pavanam anupama-pariṇāham /
madana-dahanam iva vahati sadāham //
rādhikā virahe tava keśava //
diśi diśi kirati sajala-kaṇa-jālam /
nayana-nalinam iva vigalita-nālam //
rādhikā virahe tava keśava //
nayana-viṣayam api kisalaya-talpam /
kalayati vihita-hutāśa-vikalpam //
rādhikā virahe tava keśava //
tyajati na pāṇi-talena kapolam /
bāla-śaśinam iva sāyam alolam //
rādhikā virahe tava keśava //
hariḥ iti hariḥ iti japati sakāmam /
viraha-vihita-maraṇā iva nikāmam //
rādhikā virahe tava keśava //
śrījayadeva-bhaṇitam iti gītam /
sukhayatu keśava-padam upanītam //
rādhikā virahe tava keśava //
sā romāñcati sītkaroti vilapati utkampate tāmyati
dhyāyati udbhramati pramīlati patati udyāti mūrcchati api /
etāvati atanu-jvare vara-tanuḥ jīvet na kim te rasāt
svaḥ-vaidya-pratima prasīdasi yadi tyaktaḥ anyathā na antakaḥ //
smara-āturām daivata-vaidya-hṛdya tvat-aṅga-saṅga-amṛta-mātra-sādhyām /
vimukta-bādhām kuruṣe na rādhām upendra vajrāt api dāruṇaḥ asi //
kandarpa-jvara-saṃjvara-ātura-tanoḥ āścaryam asyāḥ ciram
cetaḥ candana-candramaḥ-kamalinī-cintāsu saṃtāmyati /
kiṃtu klānti-vaśena śītala-tanum tvām ekam eva priyam
dhyāyantī rahasi sthitā katham api kṣīṇā kṣaṇam prāṇiti //
kṣaṇam api virahaḥ purā na sehe
nayana-nimīlana-khinnayā yayā te /
śvasiti katham asau rasāla-śākhām
cira-viraheṇa vilokya puṣpita-agrām //
aham iha nivasāmi yāhi rādhām anunaya mat-vacanena ca ānayethāḥ /
iti madhuripuṇā sakhī niyuktā svayam idam etya punaḥ jagāda rādhām //
vahati malaya-samīre madanam upanidhāya /
sphuṭati kusuma-nikare virahi-hṛdaya-dalanāya //
tava virahe vanamālī sakhi sīdati //
dahati śiśira-mayūkhe maraṇam anukaroti /
patati madana-viśikhe vilapati vikalataraḥ ati //
tava virahe vanamālī sakhi sīdati //
dhvanati madhupa-samūhe śravaṇam apidadhāti /
manasi valita-virahe niśi niśi rujam upayāti //
tava virahe vanamālī sakhi sīdati //
vasati vipina-vitāne tyajati lalita-dhāma /
luṭhati dharaṇi-śayane bahu vilapati tava nāma //
tava virahe vanamālī sakhi sīdati //
bhaṇati kavi-jayadeve virahi-vilasitena /
manasi rabhasa-vibhave hariḥ udayatu sukṛtena //
tava virahe vanamālī sakhi sīdati //
pūrvam yatra samam tvayā ratipateḥ āsāditāḥ siddhayaḥ
tasmin eva nikuñja-manmatha-mahā-tīrthe punaḥ mādhavaḥ /
dhyāyan tvām aniśam japan api tava eva ālāpa-mantra-āvalīm
bhūyaḥ tvat-kuca-kumbha-nirbhara-parīrambha-amṛtam vāñchati //
rati-sukha-sāre gatam abhisāre madana-manohara-veśam /
na kuru nitambini gamana-vilambanam anusara tam hṛdaya-īśam //
dhīra-samīre yamunā-tīre vasati vane vanamālī //
nāma-sametam kṛta-saṅketam vādayate mṛdu-veṇum /
bahu manute nanu te tanu-saṃgata-pavana-calitam api reṇum //
dhīra-samīre yamunā-tīre vasati vane vanamālī //
patati patatre vicalati patre śaṅkita-bhavat-upayānam /
racayati śayanam sacakita-nayanam paśyati tava panthānam //
dhīra-samīre yamunā-tīre vasati vane vanamālī //
mukharam adhīram tyaja mañjīram ripum iva keli-sulolam /
cala sakhi kuñjam satimira-puñjam śīlaya nīla-nicolam //
dhīra-samīre yamunā-tīre vasati vane vanamālī //
urasi murāreḥ upahita-hāre ghane iva tarala-balāke /
taḍit iva pīte rati-viparīte rājasi sukṛta-vipāke //
dhīra-samīre yamunā-tīre vasati vane vanamālī //
vigalita-vasanam parihṛta-rasanam ghaṭaya jaghanam apidhānam /
kisalaya-śayane paṅkaja-nayane nidhim iva harṣa-nidānam //
dhīra-samīre yamunā-tīre vasati vane vanamālī //
hariḥ abhimānī rajaniḥ idānīm iyam api yāti virāmam /
kuru mama vacanam satvara-racanam pūraya madhuripu-kāmam //
dhīra-samīre yamunā-tīre vasati vane vanamālī //
śrījayadeve kṛta-hari-seve bhaṇati parama-ramaṇīyam /
pramudita-hṛdayam harim atisadayam namata sukṛta-kamanīyam //
dhīra-samīre yamunā-tīre vasati vane vanamālī //
vikirati muhuḥ śvāsān āśāḥ puraḥ muhuḥ īkṣate
praviśati muhuḥ kuñjam guñjan muhuḥ bahu tāmyati /
racayati muhuḥ śayyām paryākulam muhuḥ īkṣate
madana-kadana-klāntaḥ kānte priyaḥ tava vartate //
tvat-vāmyena samam samagram adhunā tigmāṃśuḥ astam gataḥ
govindasya manorathena ca samam prāptam tamaḥ sāndratām /
kokānām karuṇa-svanena sadṛśī dīrghā mat-abhyarthanā
tat mugdhe viphalam vialambanam asau ramyaḥ abhisāra-kṣaṇaḥ //
āśleṣāt anu cumbanāt anu nakha-ullekhāt anu svāntaja-
prodbodhāt anu saṃbhramāt anu rata-ārambhāt anu prītayoḥ /
anya-artham gatayoḥ bhramāt militayoḥ saṃbhāṣaṇaiḥ jānatoḥ
dampatyoḥ iha kaḥ na kaḥ na tamasi vrīḍā-vimiśraḥ rasaḥ //
sabhaya-cakitam vinyasyantīm dṛśam timire pathi
pratitaru muhuḥ sthitvā mandam padāni vitanvatīm /
katham api rahaḥ prāptām aṅgaiḥ anaṅga-taraṅgibhiḥ
sumukhi subhagaḥ paśyan saḥ tvām upaitu kṛta-arthatām //
atha tām gantum aśaktām ciram anuraktām latā-gṛhe dṛṣṭvā /
tat-caritam govinde manasija-mande sakhī prāha //
paśyati diśi diśi rahasi bhavantam /
tat-adhara-madhura-madhūni pibantam //
nātha hare sīdati rādhā vāsa-gṛhe //
tvat-abhisaraṇa-rabhasena valantī /
patati padāni kiyanti calantī //
nātha hare sīdati rādhā vāsa-gṛhe //
vihita-viśada-bisa-kisalaya-valayā /
jīvati param iha tava rati-kalayā //
nātha hare sīdati rādhā vāsa-gṛhe //
muhuḥ avalokita-maṇḍana-līlā /
madhuripuḥ aham iti bhāvana-śīlā //
nātha hare sīdati rādhā vāsa-gṛhe //
tvaritam upaiti na katham abhisāram /
hariḥ iti vadati sakhīm anuvāram //
nātha hare sīdati rādhā vāsa-gṛhe //
śliṣyati cumbati jaladhara-kalpam /
hariḥ upagataḥ iti timiram analpam //
nātha hare sīdati rādhā vāsa-gṛhe //
bhavati vilambini vigalita-lajjā /
vilapati roditi vāsaka-sajjā //
nātha hare sīdati rādhā vāsa-gṛhe //
śrījayadeva-kaveḥ idam uditam /
rasika-janam tanutām atimuditam //
nātha hare sīdati rādhā vāsa-gṛhe //
vipula-pulaka-pāliḥ sphīta-sītkāram antar-
janita-jaḍima-kāku-vyākulam vyāharantī /
tava kitava vidhāya amanda-kandarpa-cintām
rasa-jaladhi-nimagnā dhyāna-lagnā mṛgākṣī //
aṅgeṣu ābharaṇam karoti bahuśaḥ patre api saṃcāriṇi
prāptam tvām pariśaṅkate vitanute śayyām ciram dhyāyati /
iti ākalpa-vikalpa-talpa-racanā-saṃkalpa-līlā-śata-
vyāsaktā api vinā tvayā vara-tanuḥ naiṣā niśām neṣyati //
atra antare ca kulaṭā-kula-vartma-pāta-
saṃjāta-pātakaḥ iva sphuṭa-lāñchana-śrīḥ /
vṛndāvana-antaram adīpayat aṃśu-jālaiḥ
diksundarī-vadana-candana-binduḥ induḥ //
prasarati śaśa-dhara-bimbe vihita-vilambe ca mādhave vidhurā /
viracita-vividha-vilāpam sā paritāpam cakāra uccaiḥ //
kathita-samaye api hariḥ ahaha na yayau vanam /
mama viphalam idam amala-rūpam api yauvanam //
yāmi he kam iha śaraṇam sakhī-jana-vacana-vañcitā //
yat anugamanāya niśi gahanam api śīlitam /
tena mama hṛdayam idam asamaśara-kīlitam //
yāmi he kam iha śaraṇam sakhī-jana-vacana-vañcitā //
mama maraṇam eva varam ativitatha-ketanā /
kim iha viṣahāmi viraha-analam acetanā //
yāmi he kam iha śaraṇam sakhī-jana-vacana-vañcitā //
mām ahaha vidhurayati madhura-madhu-yāminī /
kāpi harim anubhavati kṛta-sukṛta-kāminī //
yāmi he kam iha śaraṇam sakhī-jana-vacana-vañcitā //
ahaha kalayāmi valaya-ādi-maṇi-bhūṣaṇam /
hari-viraha-dahana-vahanena bahu-dūṣaṇam //
yāmi he kam iha śaraṇam sakhī-jana-vacana-vañcitā //
kusuma-sukumāra-tanum atanu-śara-līlayā /
srak api hṛdi hanti mām ativiṣama-śilayā //
yāmi he kam iha śaraṇam sakhī-jana-vacana-vañcitā //
aham iha nivasāmi nagaṇita-vana-vetasā /
smarati madhusūdanaḥ mām api na cetasā //
yāmi he kam iha śaraṇam sakhī-jana-vacana-vañcitā //
hari-caraṇa-śaraṇa-jayadeva-kavi-bhāratī /
vasatu hṛdi yuvatiḥ iva komala-kalāvatī //
yāmi he kam iha śaraṇam sakhī-jana-vacana-vañcitā //
tat kim kāmapi kāminīm abhisṛtaḥ kim vā kalā-kelibhiḥ
baddhaḥ bandhubhiḥ andhakāriṇi vana-upānte kim u bhrāmyati /
kāntaḥ klānta-manāḥ manāk api pathi prasthātum eva akṣamaḥ
saṃketī-kṛta-mañju-vañjula-latā-kuñje api yat na āgataḥ //
atha āgatām mādhavam antareṇa sakhīm iyam vīkṣya viṣāda-mūkām /
viśaṅkamānā ramitam kayāpi janārdanam dṛṣṭavat etat āha //
smara-samara-ucita-viracita-veśā /
galita-kusuma-dara-vilulita-keśā //
kāpi madhuripuṇā vilasati yuvatiḥ adhika-guṇā //
hari-parirambhaṇa-valita-vikārā /
kuca-kalaśa-upari taralita-hārā //
kāpi madhuripuṇā vilasati yuvatiḥ adhika-guṇā //
vicalat-alaka-lalita-ānana-candrā /
tat-adhara-pāna-rabhasa-kṛta-tandrā //
kāpi madhuripuṇā vilasati yuvatiḥ adhika-guṇā //
cañcala-kuṇḍala-dalita-kapolā /
mukharita-rasana-jaghana-gati-lolā //
kāpi madhuripuṇā vilasati yuvatiḥ adhika-guṇā //
dayita-vilokita-lajjita-hasitā /
bahu-vidha-kūjita-rati-rasa-rasitā //
kāpi madhuripuṇā vilasati yuvatiḥ adhika-guṇā //
vipula-pulaka-pṛthu-vepathu-bhaṅgā /
śvasita-nimīlita-vikasat-anaṅgā //
kāpi madhuripuṇā vilasati yuvatiḥ adhika-guṇā //
śramajala-kaṇa-bhara-subhaga-śarīrā /
paripatitā urasi rati-raṇa-dhīrā //
kāpi madhuripuṇā vilasati yuvatiḥ adhika-guṇā //
śrījayadeva-bhaṇita-hari-ramitam /
kali-kaluṣam janayatu pariśamitam //
kāpi madhuripuṇā vilasati yuvatiḥ adhika-guṇā //
viraha-pāṇḍu-murāri-mukha-ambuja-dyutiḥ iyam tirayan api cetanām /
vidhuḥ atīva tanoti manobhuvaḥ sahṛdaye hṛdaye madana-vyathām //
samudita-madane ramaṇī-vadane cumbana-valita-adhare /
mṛgamada-tilakam likhati sapulakam mṛgam iva rajanī-kare //
ramate yamunā-pulina-vane vijayī murāriḥ adhunā //
ghana-caya-rucire racayati cikure taralita-taruṇa-ānane /
kurabaka-kusumam capalā-suṣamam rati-pati-mṛga-kānane //
ramate yamunā-pulina-vane vijayī murāriḥ adhunā //
ghaṭayati sughane kuca-yuga-gagane mṛgamada-ruci-rūṣite /
maṇi-saram amalam tāraka-paṭalam nakha-pada-śaśi-bhūṣite //
ramate yamunā-pulina-vane vijayī murāriḥ adhunā //
jita-bisa-śakale mṛdu-bhuja-yugale kara-tala-nalinī-dale /
marakata-valayam madhu-kara-nicayam vitarati hima-śītale //
ramate yamunā-pulina-vane vijayī murāriḥ adhunā //
rati-gṛha-jaghane vipula-apaghane manasija-kanaka-āsane /
maṇi-maya-rasanam toraṇa-hasanam vikirati kṛta-vāsane //
ramate yamunā-pulina-vane vijayī murāriḥ adhunā //
caraṇa-kisalaye kamalā-nilaye nakha-maṇi-gaṇa-pūjite /
bahiḥ-apavaraṇam yāvaka-bharaṇam janayati hṛdi yojite //
ramate yamunā-pulina-vane vijayī murāriḥ adhunā //
ramayati sudṛśam kāmapi subhṛśam khala-haladhara-sodare /
kim aphalam avasam ciram iha virasam vada sakhi viṭapa-udare //
ramate yamunā-pulina-vane vijayī murāriḥ adhunā //
iha rasa-bhaṇane kṛta-hari-guṇane madhuripu-pada-sevake /
kaliyuga-caritam na vasatu duritam kavi-nṛpa-jayadevake //
ramate yamunā-pulina-vane vijayī murāriḥ adhunā //
na āyātaḥ sakhi nirdayaḥ yadi śaṭhaḥ tvam dūti kim dūyase
svacchandam bahu-vallabhaḥ saḥ ramate kim tatra te dūṣaṇam /
paśya adya priya-saṃgamāya dayitasya ākṛṣyamāṇam guṇaiḥ
utkaṇṭha-ārti-bharāt iva sphuṭat idam cetaḥ svayam yāsyāmi //
anila-tarala-kuvalaya-nayanena /
tapati na sā kisalaya-śayanena //
sakhi yā ramitā vanamālinā //
vikasita-sarasija-lalita-mukhena /
sphuṭati na sā manasija-viśikhena //
sakhi yā ramitā vanamālinā //
amṛta-madhura-mṛdutara-vacanena /
jvalati na sā malayaja-pavanena //
sakhi yā ramitā vanamālinā //
sthala-jala-ruha-rucikara-caraṇena /
luṭhati na sā himakara-kiraṇena //
sakhi yā ramitā vanamālinā //
sajala-jalada-samudaya-rucireṇa /
dalati na sā hṛdi cira-viraheṇa //
sakhi yā ramitā vanamālinā //
kanaka-nikaṣa-ruci-śuci-vasanena /
śvasiti na sā parijana-hasanena //
sakhi yā ramitā vanamālinā //
sakala-bhuvana-jana-vara-taruṇena /
vahati na sā rujam atikaruṇena //
sakhi yā ramitā vanamālinā //
śrījayadeva-bhaṇita-vacanena /
praviśatu hariḥ api hṛdayam anena //
sakhi yā ramitā vanamālinā //
manobhava-ānandana candana-anila
prasīda re dakṣiṇa muñca vāmatām /
kṣaṇam jagat-prāṇa vidhāya mādhavam
puraḥ mama prāṇa-haraḥ bhaviṣyasi //
ripuḥ iva sakhī-saṃvāsaḥ ayam śikhī iva hima-anilaḥ
viṣam iva sudhā-raśmiḥ yasmin dunoti manaḥ-gate /
hṛdayam adaye tasmin evam punaḥ valate balāt
kuvalaya-dṛśām vāmaḥ kāmaḥ nikāma-niraṅkuśaḥ //
bādhām vidhehi malaya-anila pañcabāṇa
prāṇān gṛhāṇa na gṛham punaḥ āśrayiṣye /
kim te kṛta-anta-bhagini kṣamayā taraṅgaiḥ
aṅgāni siñca mama śāmyatu deha-dāhaḥ //
atha katham api yāminīm vinīya smara-śara-jarjaritā api sā prabhāte /
anunaya-vacanam vadantam agre praṇatam api priyam āha sābhyasūyam //
rajani-janita-guru-jāgara-rāga-kaṣāyitam alasa-niveśam /
vahati nayanam anurāgam iva sphuṭam udita-rasa-abhiniveśam //
harihari yāhi mādhava yāhi keśava mā vada kaitava-vādam
tām anusara sarasīruha-locana yā tava harati viṣādam //
kajjala-malina-vilocana-cumbana-viracita-nīlima-rūpam /
daśana-vasanam aruṇam tava kṛṣṇa tanoti tanoḥ anurūpam //
harihari yāhi mādhava yāhi keśava mā vada kaitava-vādam
tām anusara sarasīruha-locana yā tava harati viṣādam //
vapuḥ anuharati tava smara-saṅgara-khara-nakhara-kṣata-rekham /
marakata-śakala-kalita-kaladhauta-lipeḥ iva rati-jaya-lekham //
harihari yāhi mādhava yāhi keśava mā vada kaitava-vādam
tām anusara sarasīruha-locana yā tava harati viṣādam //
caraṇa-kamala-galat-alaktaka-siktam idam tava hṛdayam udāram /
darśayati iva bahiḥ madana-druma-nava-kisalaya-parivāram //
harihari yāhi mādhava yāhi keśava mā vada kaitava-vādam
tām anusara sarasīruha-locana yā tava harati viṣādam //
daśana-padam bhavat-adhara-gatam mama janayati cetasi khedam /
kathayati katham adhunā api mayā saha tava vapuḥ etat abhedam //
harihari yāhi mādhava yāhi keśava mā vada kaitava-vādam
tām anusara sarasīruha-locana yā tava harati viṣādam //
bahiḥ iva malinataram tava kṛṣṇa manaḥ api bhaviṣyati nūnam /
katham atha vañcayase janam anugatam asamaśara-jvara-dūnam //
harihari yāhi mādhava yāhi keśava mā vada kaitava-vādam
tām anusara sarasīruha-locana yā tava harati viṣādam //
bhramati bhavān abalā-kavalāya vaneṣu kim atra vicitram /
prathayati pūtanikā eva vadhū-vadha-nirdaya-bāla-caritram //
harihari yāhi mādhava yāhi keśava mā vada kaitava-vādam
tām anusara sarasīruha-locana yā tava harati viṣādam //
śrījayadeva-bhaṇita-rati-vañcita-khaṇḍita-yuvati-vilāpam /
śṛṇuta sudhā-madhuram vibudhāḥ vibudha-ālayataḥ api durāpam //
harihari yāhi mādhava yāhi keśava mā vada kaitava-vādam
tām anusara sarasīruha-locana yā tava harati viṣādam //
tava idam paśyantyāḥ prasarat anurāgam bahiḥ iva
priyā-pāda-alakta-churitam aruṇa-chāya-hṛdayam /
mama adya prakhyāta-praṇaya-bhara-bhaṅgena kitava
tvat-ālokaḥ śokāt api kim api lajjām janayati //
tām atha manmatha-khinnām rati-rasa-bhinnām viṣāda-sampannām /
anucintita-hari-caritām kalaha-antar-itām uvāca sakhī //
hariḥ abhisarati vahati madhu-pavane /
kim aparam adhika-sukham sakhi bhavane //
mādhave mā kuru mānini mānam aye //
tāla-phalāt api gurum atisarasam /
kim viphalīkuruṣe kuca-kalaśam //
mādhave mā kuru mānini mānam aye //
kati na kathitam idam anupadam aciram /
mā parihara harim atiśaya-ruciram //
mādhave mā kuru mānini mānam aye //
kim iti viṣīdasi rodiṣi vikalā /
vihasati yuvati-sabhā tava sakalā //
mādhave mā kuru mānini mānam aye //
sajala-nalinī-dala-śītala-śayane /
harim avalokaya saphalaya nayane //
mādhave mā kuru mānini mānam aye //
janayasi manasi kim iti guru-khedam /
śṛṇu mama vacanam anīhita-bhedam //
mādhave mā kuru mānini mānam aye //
hariḥ upayātu vadatu bahu-madhuram /
kim iti karoṣi hṛdayam atividhuram //
mādhave mā kuru mānini mānam aye //
śrījayadeva-bhaṇitam atilalitam /
sukhayatu rasika-janam hari-caritam //
mādhave mā kuru mānini mānam aye //
snigdhe yat paruṣā asi yat praṇamati stabdhā asi yat rāgiṇi
dveṣa-sthā asi yat unmukhe vimukhatām yātā asi tasmin priye /
yuktam tat viparīta-kāriṇi tava śrīkhaṇḍa-carcā viṣam
śītāṃśuḥ tapanaḥ himam hutavahaḥ krīḍā-mudaḥ yātanāḥ //
atra antare masṛṇa-roṣa-vaśām asīma-
niḥśvāsa-niḥsaha-mukhīm sumukhīm upetya /
savrīḍam īkṣita-sakhī-vadanām dinānte
sānanda-gadgada-padam hariḥ iti uvāca //
vadasi yadi kiṃcit api danta-ruci-kaumudī
harati dara-timiram atighoram /
sphurat-adhara-sīdhave tava vadana-candramāḥ
rocayatu locana-cakoram //
priye cāru-śīle muñca mayi mānam anidānam
sapadi madana-analaḥ dahati mama mānasam
dehi mukha-kamala-madhu-pānam //
satyam eva asi yadi sudati mayi kopinī
dehi khara-nakhara-śara-ghātam /
ghaṭaya bhuja-bandhanam janaya rada-khaṇḍanam
yena vā bhavati sukha-jātam //
priye cāru-śīle muñca mayi mānam anidānam
sapadi madana-analaḥ dahati mama mānasam
dehi mukha-kamala-madhu-pānam //
tvam asi mama bhūṣaṇam tvam asi mama jīvanam
tvam asi mama bhava-jaladhi-ratnam /
bhavatu bhavatī iha mayi satatam anurodhinī
tatra mama hṛdayam atiyatnam //
priye cāru-śīle muñca mayi mānam anidānam
sapadi madana-analaḥ dahati mama mānasam
dehi mukha-kamala-madhu-pānam //
nīla-nalina-ābham api tanvi tava locanam
dhārayati koka-nada-rūpam /
kusumaśara-bāṇa-bhāvena yadi rañjayasi
kṛṣṇam idam etat anurūpam //
priye cāru-śīle muñca mayi mānam anidānam
sapadi madana-analaḥ dahati mama mānasam
dehi mukha-kamala-madhu-pānam //
sphuratu kuca-kumbhayoḥ upari maṇi-mañjarī
rañjayatu tava hṛdaya-deśam /
rasatu raśanā api tava ghana-jaghana-maṇḍale
ghoṣayatu manmatha-nideśam //
priye cāru-śīle muñca mayi mānam anidānam
sapadi madana-analaḥ dahati mama mānasam
dehi mukha-kamala-madhu-pānam //
sthala-kamala-gañjanam mama hṛdaya-rañjanam
janita-rati-raṅga-parabhāgam /
bhaṇa masṛṇa-vāṇi karavāṇi pada-paṅkajam
sarasa-lasat-alaktaka-rāgam //
priye cāru-śīle muñca mayi mānam anidānam
sapadi madana-analaḥ dahati mama mānasam
dehi mukha-kamala-madhu-pānam //
smara-garala-khaṇḍanam mama śirasi maṇḍanam
dehi pada-pallavam udāram /
jvalati mayi dāruṇaḥ madana-kadana-aruṇaḥ
haratu tat-upāhita-vikāram //
priye cāru-śīle muñca mayi mānam anidānam
sapadi madana-analaḥ dahati mama mānasam
dehi mukha-kamala-madhu-pānam //
iti caṭula-cāṭu-paṭu-cāru muravairiṇaḥ
rādhikām adhi vacana-jātam /
jayati padmāvatī-ramaṇa-jayadeva-kavi-
bhāratī-bhaṇitam atiśātam //
priye cāru-śīle muñca mayi mānam anidānam
sapadi madana-analaḥ dahati mama mānasam
dehi mukha-kamala-madhu-pānam //
parihara kṛta-ātaṅke śaṅkām tvayā satatam ghana-
stana-jaghanayā ākrānte svānte para-anavakāśini /
viśati vitanoḥ anyaḥ dhanyaḥ na kaḥ api mama-antaram
stana-bhara-parīrambha-ārambhe vidhehi vidheyatām //
mugdhe vidhehi mayi nirdaya-danta-daṃśa-
doḥ-valli-bandha-nibiḍa-stana-pīḍanāni /
caṇḍi tvam eva mudam añca na pañcabāṇa-
caṇḍāla-kāṇḍa-dalanāt asavaḥ prayāntu //
vyathayati vṛthā maunam tanvi prapañcaya pañcamam
taruṇi madhura-ālāpaiḥ tāpam vinodaya dṛṣṭibhiḥ /
sumukhi vimukhī-bhāvam tāvat vimuñca na muñca mām
svayam atiśaya-snigdhaḥ mugdhe priyaḥ aham upasthitaḥ //
bandhūka-dyuti-bāndhavaḥ ayam adharaḥ snigdhaḥ madhūka-chaviḥ
gaṇḍaḥ caṇḍi cakāsti nīla-nalina-śrī-mocanam locanam /
nāsā abhyeti tila-prasūna-padavīm kunda-ābha-danti priye
prāyaḥ tvat-mukha-sevayā vijayate viśvam saḥ puṣpāyudhaḥ //
dṛśau tava mada-ālase vadanam indu-saṃdīpakam
gatiḥ jana-manoramā vidhuta-rambham ūru-dvayam /
ratiḥ tava kalāvatī rucira-citra-lekhe bhruvau
aho vibudha-yauvatam vahasi tanvi pṛthvī-gatā //
suciram anunayena prīṇayitvā mṛga-akṣīm
gatavati kṛta-veśe keśave kuñja-śayyām /
racita-rucira-bhūṣām dṛṣṭi-moṣe pradoṣe
sphurati niravasādām kāpi rādhām jagāda //
viracita-cāṭu-vacana-racanam caraṇe racita-praṇipātam /
saṃprati mañjula-vañjula-sīmani keli-śayanam anuyātam //
mugdhe madhumathanam anugatam anusara rādhike //
ghana-jaghana-stana-bhāra-bhare dara-manthara-caraṇa-vihāram /
mukharita-maṇi-mañjīram upaihi vidhehi marāla-vikāram //
mugdhe madhumathanam anugatam anusara rādhike //
śṛṇu ramaṇīyataram taruṇī-jana-mohana-madhupa-virāvam /
kusumaśarāsana-śāsana-bandini pika-nikare bhaja bhāvam //
mugdhe madhumathanam anugatam anusara rādhike //
anila-tarala-kisalaya-nikareṇa kareṇa latā-nikurambam /
preraṇam iva karabha-ūru karoti gatim pratimuñca vilambam //
mugdhe madhumathanam anugatam anusara rādhike //
sphuritam anaṅga-taraṅga-vaśāt iva sūcita-hari-parirambham /
pṛccha manohara-hāra-vimala-jala-dhāram amum kuca-kumbham //
mugdhe madhumathanam anugatam anusara rādhike //
adhigatam akhila-sakhībhiḥ idam tava vapuḥ api rati-raṇa-sajjam /
caṇḍi rasita-raśanā-rava-ḍiṇḍimam abhisara sarasam alajjam //
mugdhe madhumathanam anugatam anusara rādhike //
smara-śara-subhaga-nakhena kareṇa sakhīm avalambya salīlam /
cala valaya-kvaṇitaiḥ avabodhaya harim api nijagati-śīlam //
mugdhe madhumathanam anugatam anusara rādhike //
śrījayadeva-bhaṇitam adharīkṛta-hāram udāsita-vāmam /
hari-vinihita-manasām adhitiṣṭhatu kaṇṭha-taṭīm avirāmam //
mugdhe madhumathanam anugatam anusara rādhike //
sā mām drakṣyati vakṣyati smara-kathām prati-aṅgam āliṅganaiḥ
prītim yāsyati raṃsyate sakhi samāgatya iti cintā-ākulaḥ /
saḥ tvām paśyati vepate pulakayati ānandati svidyati
pratyudgacchati mūrcchati sthira-tamaḥ-puñje nikuñje priyaḥ //
akṣṇoḥ nikṣipat-añjanam śravaṇayoḥ tāpiccha-guccha-āvalīm
mūrdhni śyāma-saroja-dāma kucayoḥ kastūrikā-patrakam /
dhūrtānām abhisāra-satvara-hṛdām viṣvak-nikuñje sakhi
dhvāntam nīla-nicola-cāru sudṛśām prati-aṅgam āliṅgati //
kāśmīra-gaura-vapuṣām abhisārikāṇām
ābaddha-rekham abhitaḥ ruci-mañjarībhiḥ /
etat tamāla-dala-nīla-tamam tamisram
tat-prema-hema-nikaṣa-upalatām tanoti //
hāra-āvalī-tarala-kāñci-dāma-
keyūra-kaṅkaṇa-maṇi-dyuti-dīpitasya /
dvāre nikuñja-nilayasya harim nirīkṣya
vrīḍāvatīm atha sakhī nijagāda rādhām //
mañjutara-kuñja-tala-keli-sadane /
vilasa rati-rabhasa-hasita-vadane //
praviśa rādhe mādhava-samīpam iha //
nava-bhavat-aśoka-dala-śayana-sāre /
vilasa kuca-kalaśa-tarala-hāre //
praviśa rādhe mādhava-samīpam iha //
kusuma-caya-racita-śuci-vāsa-gehe /
vilasa kusuma-sukumāra-dehe //
praviśa rādhe mādhava-samīpam iha //
cala-malaya-vana-pavana-surabhi-śīte /
vilasa rasa-valita-lalita-gīte //
praviśa rādhe mādhava-samīpam iha //
madhu-mudita-madhupa-kula-kalita-rāve /
vilasa madana-rasa-sarasa-bhāve //
praviśa rādhe mādhava-samīpam iha //
madhuratara-pika-nikara-ninada-mukhare /
vilasa daśana-ruci-rucira-śikhare //
praviśa rādhe mādhava-samīpam iha //
vitata-bahu-valli-nava-pallava-ghane /
vilasa ciram alasa-pīna-jaghane //
praviśa rādhe mādhava-samīpam iha //
vihita-padmāvatī-sukha-samāje /
kuru murāre maṅgala-śatāni
bhaṇati jayadeva-kavi-rāje //
praviśa rādhe mādhava-samīpam iha //
tvām cittena ciram vahan ayam atiśrāntaḥ bhṛśam tāpitaḥ
kandarpeṇa tu pātum icchati sudhā-saṃbādha-bimba-adharam /
asya aṅgam tat alaṃkuru kṣaṇam iha bhrū-kṣepa-lakṣmī-lava-
krīte dāse iva upasevita-pada-ambhoje kutaḥ sambhramaḥ //
sā sasādhvasa-sānandam govinde lola-locanā /
siñjāna-mañju-mañjīram praviveśa niveśanam //
rādhā-vadana-vilokana-vikasita-vividha-vikāra-vibhaṅgam /
jalanidhim iva vidhu-maṇḍala-darśana-taralita-tuṅga-taraṅgam //
harim eka-rasam ciram abhilaṣita-vilāsam
sā dadarśa guru-harṣa-vaśaṃvada-vadanam anaṅga-nivāsam //
hāram amalatara-tāram urasi dadhatam parirabhya vidūram /
sphuṭatara-phena-kadamba-karambitam iva yamunā-jala-pūram //
harim eka-rasam ciram abhilaṣita-vilāsam
sā dadarśa guru-harṣa-vaśaṃvada-vadanam anaṅga-nivāsam //
śyāmala-mṛdula-kalevara-maṇḍalam adhigata-gaura-dukūlam /
nīla-nalinam iva pīta-parāga-paṭala-bhara-valayita-mūlam //
harim eka-rasam ciram abhilaṣita-vilāsam
sā dadarśa guru-harṣa-vaśaṃvada-vadanam anaṅga-nivāsam //
tarala-dṛk-añcala-calana-manohara-vadana-janita-rati-rāgam /
sphuṭa-kamala-udara-khelita-khañjana-yugam iva śaradi taḍāgam //
harim eka-rasam ciram abhilaṣita-vilāsam
sā dadarśa guru-harṣa-vaśaṃvada-vadanam anaṅga-nivāsam //
vadana-kamala-pariśīlana-milita-mihira-sama-kuṇḍala-śobham /
smita-ruci-rucira-samullasita-adhara-pallava-kṛta-rati-lobham //
harim eka-rasam ciram abhilaṣita-vilāsam
sā dadarśa guru-harṣa-vaśaṃvada-vadanam anaṅga-nivāsam //
śaśi-kiraṇa-churita-udara-jaladhara-sundara-sakusuma-kośam /
timira-udita-vidhu-maṇḍala-nirmala-malayaja-tilaka-niveśam //
harim eka-rasam ciram abhilaṣita-vilāsam
sā dadarśa guru-harṣa-vaśaṃvada-vadanam anaṅga-nivāsam //
vipula-pulaka-bhara-danturitam rati-keli-kalābhiḥ adhīram /
maṇi-gaṇa-kiraṇa-samūha-samujjvala-bhūṣaṇa-subhaga-śarīram //
harim eka-rasam ciram abhilaṣita-vilāsam
sā dadarśa guru-harṣa-vaśaṃvada-vadanam anaṅga-nivāsam //
śrījayadeva-bhaṇita-vibhava-dviguṇīkṛta-bhūṣaṇa-bhāram /
praṇamata hṛdi suciram vinidhāya harim sukṛta-udaya-sāram //
harim eka-rasam ciram abhilaṣita-vilāsam
sā dadarśa guru-harṣa-vaśaṃvada-vadanam anaṅga-nivāsam //
atikramya apāṅgam śravaṇa-patha-paryanta-gamana-
prayāsena iva akṣṇoḥ taralatara-tāram patitayoḥ /
idānīm rādhāyāḥ priyatama-samāloka-samaye
papāta sveda-ambu-prasara iva harṣa-aśru-nikaraḥ //
bhajantyāḥ talpa-antam kṛta-kapaṭa-kaṇḍūti-pihita-
smitam yāte gehāt bahiḥ avahita-ālī-parijane /
priya-āsyam paśyantyāḥ smara-śara-samākūta-subhagam
salajjā lajjā api vyagamat iva dūram mṛga-dṛśaḥ //
gatavati sakhī-vṛnde amanda-trapā-bhara-nirbhara-
smara-para-vaśa-ākūta-sphīta-smita-snapita-adharām /
sarasa-manasam dṛṣṭvā rādhām muhuḥ nava-pallava-
prasava-śayane nikṣipta-akṣīm uvāca hariḥ priyām //
kisalaya-śayana-tale kuru kāmini caraṇa-nalina-viniveśam /
tava pada-pallava-vairi-parābhavam idam anubhavatu suveśam //
kṣaṇam adhunā nārāyaṇam anugatam anusara rādhike //
kara-kamalena karomi caraṇamaham āgamitā asi vidūram /
kṣaṇam upakuru śayana-upari mām iva nūpuram anugata-śūram //
kṣaṇam adhunā nārāyaṇam anugatam anusara rādhike //
vadana-sudhā-nidhi-galitam amṛtamiva racaya vacanam anukūlam /
viraham iva apanayāmi payodhara-rodhakam urasi dukūlam //
kṣaṇam adhunā nārāyaṇam anugatam anusara rādhike //
priya-parirambhaṇa-rabhasa-valitam iva pulakitam atiduravāpam /
mat-urasi kuca-kalaśam viniveśaya śoṣaya manasija-tāpam //
kṣaṇam adhunā nārāyaṇam anugatam anusara rādhike //
adhara-sudhā-rasam upanaya bhāvini jīvaya mṛtam iva dāsam /
tvayi vinihita-manasam viraha-anala-dagdha-vapuṣam avilāsam //
kṣaṇam adhunā nārāyaṇam anugatam anusara rādhike //
śaśi-mukhi mukharaya maṇi-raśanā-guṇam anuguṇa-kaṇṭha-ninādam /
śruti-yugale pika-ruta-vikale mama śamaya cirāt avasādam //
kṣaṇam adhunā nārāyaṇam anugatam anusara rādhike //
mām ativiphala-ruṣā vikalīkṛtam avalokitum adhunā idam /
mīlita-lajjitam iva nayanam tava virama visṛja rati-khedam //
kṣaṇam adhunā nārāyaṇam anugatam anusara rādhike //
śrījayadeva-bhaṇitam idam anupada-nigadita-madhuripu-modam /
janayatu rasika-janeṣu manorama-rati-sabhāva-vinodam //
kṣaṇam adhunā nārāyaṇam anugatam anusara rādhike //
māra-aṅke rati-keli-saṃkula-raṇa-ārambhe tayā sāhasa-
prāyam kānta-jayāya kiṃcit upari prārambhi yat-sambhramāt /
niṣpandā jaghana-sthalī śithilā doḥ-valliḥ utkampitam
vakṣaḥ mīlitam akṣi pauruṣa-rasaḥ strīṇām kutaḥ sidhyati //
atha kāntam rati-klāntam api maṇḍana-vāñchayā /
nijagāda nirābādhā rādhā svādhīna-bhartṛkā //
kuru yadu-nandana candana-śiśiratareṇa kareṇa payodhare /
mṛgamada-patrakam atra manobhava-maṅgala-kalaśa-sahodare //
nijagāda sā yadu-nandane krīḍati hṛdaya-ānandane //
ali-kula-gañjanam añjanakam rati-nāyaka-sāyaka-mocane /
tvat-adhara-cumbana-lambita-kajjalam ujjvalaya priya locane //
nijagāda sā yadu-nandane krīḍati hṛdaya-ānandane //
nayana-kuraṅga-taraṅga-vikāsa-nirāsa-kare śruti-maṇḍale /
manaasija-pāśa-vilāsa-dhare śubha-veśa niveśaya kuṇḍale //
nijagāda sā yadu-nandane krīḍati hṛdaya-ānandane //
bhramara-cayam racayantam upari ruciram suciram mama saṃmukhe /
jita-kamale vimale parikarmaya narma-janakam alakam mukhe //
nijagāda sā yadu-nandane krīḍati hṛdaya-ānandane //
mṛgamada-rasa-valitam lalitam kuru tilakam alika-rajanīkare /
vihita-kalaṅka-kalam kamala-ānana viśramita-śrama-śīkare //
nijagāda sā yadu-nandane krīḍati hṛdaya-ānandane //
mama rucire cikure kuru mānada mānasaja-dhvaja-cāmare /
rati-galite lalite kusumāni śikhaṇḍi-śikhaṇḍaka-ḍāmare //
nijagāda sā yadu-nandane krīḍati hṛdaya-ānandane //
sarasa-ghane jaghane mama śambara-dāraṇa-vāraṇa-kandare /
maṇi-raśanā-vasana-ābharaṇāni śubha-āśaya vāsaya sundare //
nijagāda sā yadu-nandane krīḍati hṛdaya-ānandane //
śrījayadeva-vacasi rucire hṛdayam sadayam kuru maṇḍane /
hari-caraṇa-smaraṇa-amṛta-kṛta-kali-kaluṣa-bhava-jvara-khaṇḍane //
nijagāda sā yadu-nandane krīḍati hṛdaya-ānandane //
racaya kucayoḥ patram citram kuruṣva kapolayoḥ
ghaṭaya jaghane kāñcīm añca srajā kabarī-bharam /
kalaya valaya-śreṇīm pāṇau pade kuru nūpurau
iti nigaditaḥ prītaḥ pītāmbaraḥ api tathā akarot //
yat gāndharva-kalāsu kauśalam anudhyānam ca yat vaiṣṇavam
yat śṛṅgāra-viveka-tattvam api yat kāvyeṣu līlāyitam /
tat sarvam jayadeva-paṇḍita-kaveḥ kṛṣṇa-eka-tāna-ātmanaḥ
sānandāḥ pariśodhayantu sudhiyaḥ śrīgītagovindataḥ //
śrībhojadeva-prabhavasya rāmādevī-suta-śrījayadevakasya /
parāśara-ādi-priya-varga-kaṇṭhe śrīgītagovinda-kavitvam astu //