Vn 3
Vādanyāyaḥ
nigrahasthānalakṣaṇam
1. nyāyavādinamapi vādeṣu asadvyavasthopanyāsaiḥ śaṭhā nigṛhṇanti, tanniṣedhārthamidamārabhyate /
asādhanāṅga gavacanamadoṣodbhāvanaṃ dvayoḥ /
nigrahasthānam, anyatu na yuktamiti neṣyate //
iṣṭasyārthasya siddhiḥ sādhanam. tasya nirvartakam aṅgam. tasya avacanaṃ tasyāṅgasyānuccāraṇaṃ vādino nigrahādhikaraṇam: tadabhyupagamya apratibhayā tūṣṇīmbhāvāt / sādhanāṅgasyāsamarthanād vā //
Vn 4
2. [svabhāvahetau sādhanāṅgasamarthanam]
trividhameva hi liṅgamapratyakṣasya siddheraṅgam - svabhāvaḥ, kāryam, anupalambhaśca /
tasya samarthanaṃ sādhyena vyāptiṃ prasādhya dharmiṇi bhāvasādhanam / yathā 'yat sat kṛtakaṃ vā, tat sarvamanityam, yathā ghaṭādiḥ, san kṛtako vā śabdaḥ'; iti /
3. atrāpi na kaścit kramaniyamaḥ, iṣṭārthasiddherubhayatrāviśeṣāt /
yasmād dharmiṇi prāk sattvaṃ prasādhya paścādapi vyāptiḥ prasādhyata eva / yathā - ''san śabdaḥ kṛtako vā, yaścaivaṃ sa sarvo 'nityaḥ, yathā - ghaṭādiḥ'; iti /
Vn 5
4. atra vyāptisādhanaṃ viparyaye bādhakapramāṇopadarśanam /
yadi na sarvaṃ sat kṛtakaṃ vā pratikṣaṇavināśi syād, akṣaṇikasya kramayaugapadyābhyāmarthakriyāyogād arthakriyāsāmarthyalakṣaṇamato vyāvṛttam - ityasadeva syāt /
sarvasāmarthyopākhyāvirahalakṣaṇaṃ hi nirupākhyamiti /
evaṃ sādhanasya sādhyaviparyaye bādhakapramāṇānupadarśane virodhābhāvādasya viparyayavṛtteradarśane san kṛtako vā syāt, nityaśca ityanivṛttireva śaṅkāyāḥ /
Vn 6
5. na ca sarvānupalabdhirbhāvasya bādhikā, tatra sāmarthyaṃ kramākramayogena vyāptaṃ siddham; prakārāntarābhāvāt /
tena vyāpakadharmānupalabdhirakṣaṇike sāmarthyaṃ bādhate /
kramayaugapadyāyogasya sāmarthyābhāvena vyāptisiddhernānavasthāprasaṅgaḥ /
6. atrāpyadarśanamapramāṇam, yataḥkramayaugapdyāyogasyaivāsāmarthyena vyāptyasiddheḥ pūrvakasyāpi hetoravyāptiḥ / ihāpi punaḥ sādhanopagame 'navasthāprasaṅga iti cet / na; abhāvasādhanasyādarśanasyāpratiṣedhāt /
yadadarśanaṃ viparyayaṃ sādhayati hetoḥ sādhyaviparyaye, tadasya viruddhapratyupasthānād bādhakaṃ pramāṇamucyate /
Vn 7
evaṃ hi sa hetuḥ sādhyābhāve 'san sidhyet, yadi tatra pramāṇavatā svaviruddhena bādhyeta / anyathā tatrāsya bādhakāsiddhau saṃśayo durnivāraḥ /
tato vyatirekasya sandehādanaikāntikaḥ syāddhetvābhāsaḥ /
nāpyadarśanamātrād vyāvṛttiḥ; viprakṛṣṭeṣvasarvadarśino 'darśanasyābhāvāsādhanād, arvāgdarśanena satāmapi keṣāñcidarthānāmadarśanāt /
Vn 8
7. bādhakaṃ punaḥ pramāṇam / yatra kramayaugapadyāyogo na tasya kvacit sāmarthyam / asti cākṣaṇike sa iti pravartamānamasāmarthyamasallakṣaṇamākarṣati / teha 'yat sat kṛtakaṃ vā tadanityameva'; iti sidhyati /
tāvatā sādhanadharmamātrānvayaḥ sādhyadharmasya svabhāvahetulakṣaṇaṃ ca siddhaṃ bhavati /
evaṃ svabhāvahetuprayogeṣu samarthitaṃ sādhanāṅgaṃ bhavati / tasyāsamarthanaṃ sādhanāṅgāvacanam / tad vādinaḥ parājayasthānam; prārabdhārthāsādhanāt / vastutaḥ samarthasya hetorupādāne 'pi sāmarthyāpratipādanāt /
Vn 9
8. [kāryahetau sādhanāṅgasamarthanam]
kāryahetāvapi sādhanāṅgasya samarthanam / yat kāryaṃ liṅgaṃ kāraṇasya sādhanāyopādīyate, tasya tena saha kāryakāraṇabhāvaprasādhanaṃ bhāvābhāvaprasādhanapramāṇābhyām / yathā - 'idamasmin sati bhavati', 'satsvapi tadanyeṣu samartheṣu taddhetuṣu tadabhāve na bhavati'; iti /
evaṃ hyasyāsandigdhaṃ tatkāryatvaṃ samarthitaṃ bhavati / anyathā kevalaṃ 'tadabhāve na bhavati'; ityupadarśane anyasyāpi tatrābhāve sandigdhamasya sāmarthyam / anyat / tatra samarthaṃ, tadabhāvāt tanna bhūtam /
etannivṛttau punarnivṛttiryadṛcchāsaṃvādaḥ / mātṛvivāho hi tddeśajanmanaḥ piṇḍakharjūrasya deśāntareṣu mātṛvivāhābhāve 'bhāvavat / evaṃ hi samarthitaṃ tat kāryaṃ sidhyati /
siddhiṃ tat svasambhavena tatsambhavaṃ sādhyati, kāryasya kāraṇāvyabhicārāt /
avyabhicāre ca svakāraṇaiḥ sarvakāryāṇāṃ sadṛśo nyāyaḥ /
Vn 10
evamasamarthanaṃ kāryahetāvapi sādhanāṅgāvacanaṃ tad vādinaḥ parājayasthānam / asamarthite tasmin kāryatvāsiddherarthāntarasya tadbhāvāpratibaddhasvabhāvasya bhāve tadbhāvaniyamābhāvāt, ārabdhārthāsiddhesarvastutaḥ kāryasyāpyupādāne tadapradipādanāt /
Vn 11
9. [anupalabdhāvapi sādhanāṅgasamarthanam]
anupalabdhāvapi pratipatturupalabdhilakṣaṇaprāptasyānupalabdhisādhanaṃ samarthanam; tādṛśyā evānupalabdhe rasadvyavahārasiddheḥ / anupalabdhilakṣaṇaprāptasya pratipattṛpratyakṣopalabdhinivṛttāvapyabhāvāsiddheḥ /
tatropalabdhilakṣaṇaprāptiḥ svabhāvaviśeṣaḥ kāraṇāntarasākalyaṃ ca / svabhāvaviśeṣo yanna tribidhena viprakarṣeṇa viprakṛṣṭam / yadanātmarūpapritibhāsavivekena pratipattṛpratyakṣapratibhāsarūpam / tādṛśaḥ satsvanyeṣūpalambhapratyayeṣu tathānupalabdho 'sadvyavahāraviṣayaḥ, anyathā sati liṅge saṃśayaḥ /
Vn 12
10. atrāpi sarvamevaṃvidhamasadvyavahāraviṣaya iti vyāptiḥ, kasyacidasato 'bhyupagame tallakṣaṇāviśeṣāt /
na hyevaṃvidhasyāsattvānabhyupagame 'nyatra tasya yogaḥ / na hyevaṃvidhasya sataḥ satsvanyeṣūpalambhakāraṇeṣvanupalabdhiḥ / anupalabhyamānaṃ tvīdṛśaṃ nāstītyetā - vanmātranimitto 'yamasadvyavahāraḥ, anyasya tannimittasyābhāvāt /
Vn 13
11. sarvasāmarthyaviveko nimittamiti cet / evametat, tasyaiva sarvasāmarthyavivekina evaṃ pratītiḥ, anyasya tatpratipattyupāyasyābhāvāt / tatpratipattau ca satyāmasadvyavahāra itīdaṃ tannimittamucyate /
Vn 14
12. buddhivyapadeśārthakriyābhyaḥ sadvyavahāro viparyaye cāsadvyavahāra iti cet / bhavati buddheryathoktapratibhāsāyāḥ sadvyavahāraḥ, viparyaye 'sadvyavahāraḥ /
pratyakṣāviṣaye tu syālliṅgajāyā api kutaścit sadvyavahāraḥ /
asadvyavahārastu tadviparyaye 'naikāntikaḥ, viprakṛṣṭe 'rthe pratipattṛpratyakṣasya anyasya vā pramāṇasya nivṛttāvapi saṃśayāt /
13. na ca sarve buddhivyapadeśāstadbhedābhedau vā vastusattāṃ vastubhedābhedasattāṃ vā sādhayanti, astsvapi kathañcidatītānāgatādiṣu nānaikārthakriyākāriṣu vārtheṣu tadbhāvakhyāpanāya nānaikātmatābhāve 'pinānaikarūpāṇāṃ vṛtteḥ - rājā mahāsammataḥ (
Vn 15
) prabhavo rājavaṃśasya, saṅkhaścakravartī mahāsammatanirmitasya yūpasyotthāpayitā, śaśaviṣāṇaṃ, rūpaṃ sanidarśanaṃ sapratighaṃ ghaṭaśceti /
14. nahi sanidarśanādiśabdā nānāvastuviṣayāḥ, ekatropasaṃhārāt /
nānāviṣayatve 'pyekatropasaṃhārastannimittānāṃ tattatsamavāyāditi cet / āyāse batāyaṃ tapasvī padārthe [padarthaḥ?] patito 'nekasambandhinamupakṛtyānekaṃśabdamātmani tebhyaḥ samāśaṃsan ! sa yaiḥ śaktibhedairanekasambandhina mupakaroti tairevānekaṃ śabdaṃ kiṃ notthāpayati ! evaṃ hyanena pramparānusārapariśramaḥ parihṛto bhavati /
Vn 16
nānāśabdotthāpanāsāmarthye nānāsambandhyupakāro 'pi mā bhūt, anupakāre hi teṣāṃ tatsambandhitāpi na sidhyati / ghaṭa ityapi ca rūpādaya eva bahava ekārthakriyākāriṇa ekaśabdavācyā bhavantu, kimarthāntarakalpanayā?
bahavo 'pi hi ekārthakāriṇo bhaveyuḥ, cakṣurādivat / tatsāmarthyakhyāpanāya tatraikaśabdaniyogo 'pi syāditi yuktaṃ paśyāmaḥ /
Vn 17
15. na ca niṣprayojanā lokasyārtheṣu śabdayojanā / tatra ye 'rthāḥ saha pṛthagvā ekaprayojanāḥ teṣāṃ tadbhāvakhyāpanāya hi ekśabdo niyujyeta yadi, kiṃ syāt? tadarthakriyāśaktikhyāpanāya niyuktasya samudāyaśabdasyaikavacanavirodho 'pi nāstyeva; sahitānāṃ sā śaktirekā, na pratyekamiti /
samudāyaśabda ekasmin samudāye vācye ekavacanaṃ ghaṭa iti /
jātiśabdeṣvarthānāṃ pratyekaṃ sahitānāṃ ca śaktirnānaikā ca śaktiriti, nānaikaśaktivivakṣāyāṃ bahuvacanamekavacanaṃ cecchātaḥ, vṛkṣā vṛkṣamiti [? vṛkṣa iti] syāt /
yadyeṣa niyamo bahuṣveva bahuvacanam ekasminnekavacanamiti /
asmākaṃ tu sāṅketikeṣvartheṣu saṅketavaśāt tāvitya bhiniveśa eva /
Vn 18
16. nāneko rūpādirekaśabdotthāpane samartha iti cet / kiṃ vai puruṣavṛtteranapekṣāḥ śabdānarthaḥ svayamutthyāpayanti, āhosvit puruṣaiḥ śabdā vyavahārārthamartheṣu niyujyante? svayamutthāpane hi bhāvaśaktiḥ, āśaktirvā cintyeta / na ca tadyuktam, puruṣaisteṣāṃ niyoge yatheṣṭaṃ niyuñjīranniti kastatropānambhaḥ?
nimittaṃ ca niyogasyoktameva /
api ca - yadi na rūpādīnāmekena śabdena sambandhaḥ, kathamekenaiṣā - māśrayābhimatena dravyeṇa sambandha iti kevalamayamasadbhūtābhiniveśa eva /
Vn 19
na vayamekasambandhavirodhādekaṃ śabdaṃ necchāmaḥ, api tvabhinnānāṃ rūpādīnāṃ ghaṭakambalādiṣu nānārthakriyāśabdavirodhāt te ekarūpāḥ samudāyāntarā - sambhāvinīmarthakriyāmeva na kuryuḥ, tena tatprakāśanāyaikenāpi śabdenocyeran /
bhavatu nāma kasyacidiyaṃ vāñchā - bhaveyurekarūpā rūpādayaḥ sarvasamudāyeṣu iti / kimidaṃ parasparaviviktarūpapratibhāsādhyakṣadarśanamenāmupekṣate?
aniṣṭaṃ cedaṃ rūpādīnā / pratisamudāyaṃ svabhāvabhedopagamāt /
Vn 20
17. yadyanya eva rūpādibhyo ghaṭaḥ syāt kiṃ syāt?
astu, tasya pratyakṣasya sato 'rūpādirūpasya tadvivekena buddhau svarūpeṇa pratibhāsane kimāvaraṇam?
pratibhāsamānāśca vivekena pratyakṣārthā dṛśyante 'pṛthagdeśatve 'pigandharasādayaḥ. vātātapasparśādayaścaikendriyagrāhyatve 'pi /
Vn 21
idameva ca pratyakṣasya pratyakṣatvaṃ yadanātmarūpādivivekena svarūpasya buddhau samarpaṇam / ayaṃ punarghaṭādiramūlyadānakrayī yaḥ svarūpaṃ ca nopadarśayati, pratyakṣatāṃ ca svīkartumicchati /
18. etena buddhiśabdādayo 'pi vyākhyātāḥ, yadi taistatsādhanamiṣyate / na ca pratyakṣasyānabhibhave rūpānupalakṣaṇam; yena tatsādhanāya liṅgamucyate / apratyakṣatve 'pyapramāṇasya sattopagamo na yuktaḥ / tanna rūpādibhyo 'nyo ghaṭaḥ evaṃ tāvanna buddhivyapadeśābhyāṃ sattāvyavahāraḥ, sattābhedābhedavyavahāro vā / (
Vn 22
) ata eva na tadviparyayād viparyayaḥ /
19. arthakriyātastu sattāvyavahāraḥ syāt, na sattābhedābhedavyavahāraḥ, ekasyāpyanekārthakriyādarśanāt / yathā pradīpasya vijñānavartivikārajvālāntarotpādanāni / anekasyāpi cakṣurāderekavijñānakriyādarśanāt /
na brūmaḥ - arthakriyābhedamātreṇa sattābheda iti / kiṃ tarhi? adṛṣṭārthakriyābhedena / yā arthakriyā yasminnadṛṣṭā punardṛśyate sā sattābhedaṃ sādhayati / yathā mṛdyadṛṣṭā satyudakadhāraṇādyarthakriyā ghaṭe dṛśyamānā / adṛṣṭā ca tantuṣu prāvaraṇādyarthakriyā paṭe dṛsyate iti sattābhedaḥ /
Vn 23
sidhyatyevamarthāntaraṃ, tathāpyavayavī na sidhyati / yathāpratyayaṃ saṃskārasantatau svabhāvabhedo tpatterarthakriyābhedaḥ / araṇinirmathanāvasthādāvivāgneḥ sthūlakarīṣatṛṇakāṣṭhadahanaśaktibhedaḥ, tathā yathāpratyayaṃ svabhāvabhedotpattestantvādiṣvarthakriyābhedaḥ /
etena buddhivyapadeśabhedābhedau vyākhyātau /
Vn 24
20. tatrayaduktam - 'arthakriyātaḥ sattāvyavahārasiddhiḥ, viparyayād viparyayaḥ'; iti; satyametat / sa eva tu viparyayo 'nupalabdhilakṣaṇaprāpteṣu na sidhyati /
tatra punaridamanicchato 'pyāyātam - 'yasyedaṃ sāmarthyamupalabdhilakṣaṇaprāptaṃ sannopalabhyate, so 'sadvyavahāraviṣayaḥ, sāmarthyalakṣaṇatvāt sattvasya'; iti /
tathāpi ko 'tiśayaḥ pūrvakādasya? na hi svabhāvādarthāntaraṃ sāmarthyam / tasyopalabdhilakṣaṇaprāptasya yo 'nupalambhaḥ sa svabhāvasyaiveti pūrvakaiveyamanupalabdhiḥ /
tasmādanena kvacit keṣāñcidasadvyavahāramabhyupagacchatā ato 'nupalambhādabhyupagantavyaḥ /
so 'nyatrāpi tathāvidhe 'viśiṣṭa iti so 'pi tathāstu iti / na vā kvacid, viśeṣābhāvāt / vyāptiḥ - sarva evaṃvidho 'nupalabdho 'sadvyavahāraviṣaya iti /
Vn 26
21. naiva kaścit kvacit kathañcidanupalabdho 'pyasadvyavahāraviṣaya iti cet / sarvasya sarvarūpāṇāṃ sarvadānivṛtteḥ sarvaṃ sarvatra sarvadā samupayujyeta /
idaṃ ca na syāt - 'idamataḥ', 'nāta idam', 'ihedam', 'iha nedam', 'idānīmidam', 'idānīṃ nedam', 'idamevam'; 'idaṃ naivam'; iti; kasyacidapi rūpasya kathañcit kvacit kadācid viviktahetorabhāvāt / ananvayavyatirekaṃ viśvaṃ syāt, bhedābhāvāt /
avasthānivṛttipravṛttibhedebhyo vyavastheti cet / nanvata eva sarvaviṣayasyāsadvyavahārasyābhāvānna te sambhavanti, yatastebhyo vyavasthā syāt /
kvacid viṣaye 'sadvyavahāropagame sa kuta iti vaktavyam / na hyanupalambhādanyo vyavacchedaheturasti; vidhipratiṣedhābhyaṃ vyavacchede sarvadānupalambhasyaiva sādhanatvāt /
anupalambhādeva tadabhyupagame, sa yatraivāsti sarvo 'sadvyavahāraviṣaya iti vaktavyam, viśeṣābhāvāt /
Vn 28
22. sarvapramāṇanivṛttiranupalabdhiḥ / sā yatra so 'sadviṣaya [? so 'sadvyavahāra- viṣaya] iṣṭa iti cet / sukumāraprajño devānāmpriyo na sahate pramāṇacintā - parikleśaṃ, yena nātrādaraṃ kṛtavān /
na hyanumānādinivṛttirabhāvaṃ gamayati, vyabhicārāt / na sarvapratyakṣanivṛttiḥ, asiddheḥ /
nātmapratyakṣāviśeṣanivṛttirapi viprakṛṣṭeṣu /
tasmāt svabhāvaviśeṣo yataḥ pramāṇānniyamen sadvyavahāraṃ pratipadyate, tannivṛttistasyāsadvyavahāraṃ sādhayati, tatsvabhāvasattāyāḥ tatpramāṇāsattayā iṣṭeḥ /
na copalabdhilakṣaṇaprāptasyārthasyāpraptyakṣādanyopalabdhiḥ, yenānumānādasyopalabdhiḥ syāt / na ca tadrūpānyathābhāvamantareṇāpratyakṣatā, anyathābhāve ca tadeva na syāt /
api ca - kuta idamamantrauṣadhamindrajānaṃ bhāvena śikṣitam, yadayamajātānaṣṭarūpātiśayo 'vyavadhānadūrasthānastasyaiva tadavasthendriyādereva puruṣasya kadācit pratyakṣaḥ, apratyakṣaśca; yena kadācidasyānumānamupalabdhiḥ, kadācit pratyakṣaṃ, kadācidāgamaḥ ! ekasminnevānatiśaye amīṣāṃ prakārāṇāṃ virodhāt /
Vn 30
23. nānatiśayanivṛttyā, [naikātiśayanivṛtyā?] aparātiśayotpattyā ca tairvyavahārabhedopagamāt /
so 'tiśayastasyātmabhūto 'nanvaye [... nanvayaḥ?] nivartamānaḥ pravartamānaśca kathaṃ na svabhāvanānātvamākarṣayati, sukhaduḥkhavat / sānvayatve ca kā kasya pravṛttirnivṛttirvā iti yatkiñcidetat /
athavā yadi ca kasyacitsvabhāvasya pravṛttirnivṛttirveti svayamapyabhyanujñāyate, tadetadeva paro bruvāṇāḥ kimiti nānumanyate?
tasya niranvayopajananavināśopagamāditi cet /
ko 'yamanvayo nāma? bhāvasya janmavināśayoḥ śaktiḥ; sāstyeva prāgapi janmano nirodhādapyūrdhvam / tenāyaṃ nāpūrvaḥ sarvathā jāyate, na pūrvo vinaśyatīti /
yadi sā sarvadānatiśayā, kimidānīmatiśayavad yatkṛto 'yaṃ vyavahāravibhāgaḥ?
Vn 31
tā avasthā atiśayavatya iti cet, tā avasthāḥ sā ca śaktiḥ kimeko bhavaḥ? āhosvit nānā?
ekaścet kathamidānīmidamekatrāvibhaktātmani niṣparyāyaṃ parasparavyāhataṃ yokṣyate - janmājanma, nivṛttiranivṛttiḥ, ekatvaṃ nānātvaṃ, pratyakṣatāpratyakṣatā, arthakriyopayogaḥ anupayogaścetyādi /
Vn 32
24. asti paryāyo 'vasthā śaktiriti, tenāvirodha iti cet / vismaraṇaśīlo devānāmpriyaḥ prakaraṇaṃ na lakṣayati / śaktiravasthetyeko bhāvo 'vibhāga iti yat ko 'yaṃ virodha uktaḥ?
athāpyanayorvibhāgaḥ, nakaścid virodhaḥ, kevalaṃ sānvayau bhāvasya janmavināśau iti na syāt /
tasmād yasyānvayo na tasya janmavināsau, yasya ca tau na tasyānvayaḥ /
Vn 33
tayorabhedādadoṣa iti ced, anuttaraṃ bata doṣasaṅkaṭamatrabhavān dṛṣṭirāgeṇa pravesyamāno 'pi nātmānaṃ / cetayati / abhedo hi nāmaikyam, 'tau'; ityayaṃ ca bhedādhiṣṭhāno bhāviko vyavahāraḥ / nivṛttiprādurbhāvayoḥ anivṛttiprādurbhāvau, sthitāvasthitiḥ ityādikaṃ nānātvalakṣaṇaṃ ca kathaṃ yotsyate?
atha hi bhāvānāṃ bheda etadvirahaścābhedaḥ, yathā - sukhādiṣu śaktyavasthayoccaikātmani / anyathā bhedābhedalakṣaṇābhāvād bhedābhedayoravyavasthā syātsarvatra /
tadātmani prādurbhāvo 'bhedaḥ, viparyaye bhedaḥ, yathā - mṛdātmani prādurbhavato ghaṭasya tasmādabhedaḥ, bhedaśca viparyaye sukhaduḥkhayoriti idaṃ bhedābhedalakṣaṇaṃ, tenāvirodha iti cet /
na vai mṛdātmani ghaṭasya prādurbhāvaḥ / kiṃ tarhi? mṛdātmaiva kaścid ghaṭaḥ, na hyekastrailokye mṛdātmā / prativijñaptipratibhāsabhedaśca dravyasvabhāvabhedāt / evaṃ hyasyāpi sukhādiṣu caitanyeṣu bhedāvagamaḥ samartho bhavati /
yadyeva, bhedaḥ syāt /
satyapyetasmin kasyacidātmano 'nvayā devamiti cet / sukhādiṣvapyayaṃ prasaṅgaḥ caitanyeṣu ca /
na ca ghaṭādiṣvapi sarvātmanānvayaḥ, avaiśvarūpyasahotpattyādiprasaṅgāt /
na ca ghaṭaṃ mṛdātmānaṃ ca kaścid vivekenopalakṣayati, yenaivaṃ syādidamiha prādurbhūtamiti /
na hyadhiṣṭhānādhiṣṭhāninorvivekenānupalakṣaṇe evaṃ bhavati / na ca śakteḥ śaktyātmani prādurbhāvaḥ iti tasyāḥ svātmano 'bhedo na syāt /
Vn 36
25. etenaiva pariṇāmaḥ pratyuktaḥ / yo 'pi hi kalpayed - 'yo yasya pariṇāmaḥ sa tasmādabhinnaḥ'; iti / na hi śaktirātmanaḥ pariṇāma iti /
kiñcedamuktaṃ bhavati - pariṇāma ityavasthitasya dravyasya dharmāntaranivṛttiḥ, dharmāntaraprādurbhavaśca pariṇāmaḥ /
yattaddharmāntaraṃ nivartate prādurbhavati ca, kiṃ tat tadevāvasthitaṃ dravyaṃ syāt, tato 'rthāntaraṃ vā, anyavikalpābhāvat?
yadi tattadeva, tasyāvasthānānna nivṛttiprādurbhāvāviti kasya tāviti vaktavyam /
avasthitasya dharmāntaramiti ca na sidhyati / na hi tadeva tasyānapāśritavyapekṣābhedaṃ dharmāntaraṃ bhavati /
Vn 37
atha dravyādarthāntaraṃ dharmaḥ, tadā tasya nivṛttiprādurbhāvābhyaṃ na dravyasya pariṇatiḥ / na hyarthāntaragatābhyāṃ syāt nivṛttiprādurbhāvābhyāmarthāntarasya pariṇatiḥ, caitanye 'pi prasaṅgāt /
dravyasya dharma iti ca vyapadeśo na sidhyati, sambandhābhāvāt / na hi kāryakāraṇabhāvādanyo vastusambandho 'sti /
na cānayoḥ kāryakāraṇabhāvaḥ, svayamatadātmano 'tatkāraṇatvāt, dharmasya dravyādarthāntarabhūtatvāt /
arthāntaratve 'pi dharmakāraṇatve, arthāntarasya kāryasyotpādanāt dravyasya pariṇāmaḥ itīṣṭaṃ syāt / tadviruddhasyāpi hetuphalasantāne mṛddravyākhye, pūrvakānmṛtpiṇḍadravyāt kāraṇāduttarasya ghaṭadravyasya kāryasyotpattau 'mṛd dravyaṃ pariṇatam'; iti vyavahārasyopagamāt /
na ca dharmasya dravyāt tattvānyatvābhyāmanyo vikalpaḥ sambhavati, ubhayathā yena pariṇāmaḥ /
Vn 39
26. na nirvivekandravyameva dharmaḥ, nāpi dravyādarthāntaram, kiṃ tarhi? dravyasya sanniveśo 'vasthāntaram, yathā aṅgulīnāṃ muṣṭiḥ / na hyaṅulya eva nirvivekā muṣṭiḥ, prasāritānāmamuṣṭitvāt /
nāpyarthāntaraṃ, pṛthaksvabhāvānnopalabdhiriti cet / na, muṣṭeraṅguliviśeṣatvāt / aṅgulya eva hi kāścana muṣṭiḥ, na tu sarvāḥ / na hi prasāritā aṅgulyo nirvivekasvabhāvāḥ muṣṭyaṅgulyaḥ, avasthādvaye 'pi ubhayapratipattiprasaṅgāt /
yatra cahi khalu vivekaḥ svabhābhūtaḥ, sa eava vastubhedalakṣaṇaṃ sukhuduḥkhavat /
parabhūte ca vivekotpāde 'ṅgulyaḥ prasāritā evopalabhyeran / na hi svayaṃ svabhāvādapracyutasyārthāntarotpāde 'nyathopalabdhi ratiprasaṅgāt /
nanūktaṃ, 'dravyameva nirvivekamavasthā, nāpi dravyādarthāntaram'; iti /
uktamidaṃ, na punaryuktam / na hi sato vastunastattvānyatve muktvā anyaḥ prakāraḥ sambhavati, tayorvastuni paraspara parihārasthitilakṣaṇatvenaikatyāgasyāparopādānanāntarīyakatvāt /
aṅgulīṣu punaḥ pratikṣaṇavināśinīṣvanyā eva prasaritaḥ anyā muṣṭiḥ /
tatra muṣṭyādiśabdā viśeṣaviṣayāḥ, aṅgulīśabdaḥ sāmānyaviṣayaḥ, bījāṅkurādiśabdavat, vrīhyādiśabdavacca / tenāṅgulyaḥ prasāritā na muṣṭiḥ /
Vn 41
27. tadyadi prāgasadeva kāraṇe kāryaṃ bhavet, kiṃ na sarvaḥ sarvasmāt bhabvati, na hyasattve kaścid viśeṣa iti?
nanu sarvatra sattve 'pyayaṃ tulyo doṣaḥ - na hi sattve kaścid viśeṣaḥ, viśeṣe vā sa viśeṣa straigunyād bhinnaḥ syāt, tadbhāve viśeṣasyānanvayāt /
sataśca sarvātmanā niḥsvabhāvāvasthāyāmiva kiṃ jāyate? sādhanavaiphalyaṃ ca, sādhyasya kasyacidabhāvāt /
yasya kasyacidatiśayasya tatra kathañcidasata utpattau so 'tiśayastatra asan kathaṃ jāyeta? jāto vā sarvaḥ sarvasmājjāyeta iti tulyaḥ paryanuyogaḥ /
nātiśayastatra sarvathā nāsti, kathañcitsata eva bhāvāditi cet / yathā nāsti sa prakāraḥ, tatra asan kathaṃ jāyeta?
Vn 43
28. na ca sarvathā sataḥ kaścijjanmārtha ityuktam / asato 'pi kāryasya kāraṇādutpāde yo yajjananasvabhāvastata eava tasya janma, nānyasmāditi niyamaḥ /
tasyāpi sa svabhāvaniyamaḥ svahetorityanādisvabhāvaniyamaḥ /
api ca - yadi mṛtpiṇḍe ghaṭo 'sti, kathaṃ tadavasthāyāṃ na paścādvadupalabdhiḥ, tadarthakriyā vā?
vyakteraprādurbhāvāditi cet / tasyā eva tadarthakriyādibhāve ghatvāt tadrūpasya ca prāgasattvāt kathaṃ ghaṭo 'sti? na hi rūpāntarasya sattve rūpāntaramasti /
na ca rūpapratibhāsavede vastvabhedo yuktaḥ, atiprasaṅgāt /
Vn 44
29. tasmād yaḥ upalabdhilakṣaṇaprāptasvabhāvānupalabdhiḥ sa nāstyeva / na hi tasyatatsvabhāvasthitāvanupalabdhitaḥ, asthitiścātattvam, parasparaṃtathāsthitayoreva [tathāsthitayoriva?] sukhaduḥkhayoriti vyāptiḥ, asadvyavahāraniścayena anupalabdhiviśeṣasya / tenānupalabdhyā kasyacid vyavacchedaṃ prasādhayatā tasya yathoktopalabdhilakṣaṇaprāptirūpatā darśanīyā /
upadarśyānupalabdhinirdeśāsamarthanaṃ svabhāvānupalabdhau, vyāpakānupalabdhāvapi dharmayorvyāpyavyāpakabhāvaṃ prasādhya vyāpakasya nivṛttiprasādhanaṃ samarthanam /
kāraṇānupalabdhāvapi kāryakāraṇabhāvaṃ prasādhya kāraṇasya nivṛtti prasādhanaṃ samarthanam /
tadviruddhopalabdhiṣvapi dvayorviruddhayorekasya viruddhasyopararśanaṃ samarthanam /
Vn 45
evamanupalabdhau sādhanāṅgasyāsamarthanaṃ sādhanāṅgāvacanam / tad vādino nigrahasthānasamarthane [? nigrahasthānam, asamarthane] tasmin vyāpyāsiddheḥ /
Vn 46
30. athavā - sādhyate yena pareṣāmapratīto 'rtha iti sādhanaṃ, trirūpahetu- vacanasamudāyaḥ / tasyāṅgaṃ pakṣadharmādivacanam / tasyaika- syāpyavacanamasādhanāṅga- vacanaṃ, tadapi vādino nigrahasthānam / tadavacane heturūpasyaivāvacanam, avacane siddherabhāvāt /
31. [pratijñādīnāmasādhanāṅgatvam]
athavā - tasyaiva sādhanasya yannāṅgaṃ pratijñopanayanigamanādi tasyāsādhanāṅgasya sādhanavākye upādānaṃ vādino nigrahasthānaṃ, vyarthāmidhānāt /
anvayavyatirekavacanayorvā sādharmyavati vaidharmyavati ca sādhanaprayoga ekasyaivābhidhānena siddherbhāvād dvitīyasyāsāmarthyamiti tasyāpyasādhanāṅgasyābhidhānaṃ nigrahasthānaṃ, vyarthābhidhānādeva /
Vn 47
nanu ca viṣayopadarśanāya pratijñāvacanamasādhanāṅgamapyupādeyameva / na, vaiyarthyāt / asatyapi pratijñāvacane yathoktāt sādhanavākyād bhavatyeveṣṭārthasiddhirityapārthakaṃ tasyopādānam /
yadi ca viṣayopadarśanamantareṇa pratīterutpattiḥ, kathaṃ na pratijñā sādhanādayaḥ [sadhanāvayavaḥ?]? na hi pakṣadharmavacanasyāpi pratītihetubhāvādanyaḥ sādhanārthaḥ, sa pratijñāvacane 'pi tulya iti kathaṃ na sādhanam?
kevalasyāsāmarthyādasādhanatvamiti cet / tattulyaṃ pakṣadharmavacanasyāpīti tadapi na sādhanāvayavaḥ syāt /
na hi pakṣadharmavacanāt kevalā [kevalāt?] pratipatterutpattiḥ /
etena saṃśayotpattiḥ pratyuktā, pakṣadharmavacanādapi kevalādapradarśite sambandhe saṃśayotpatteḥ /
tasmād vyarthameva sādhanavākye pratijñāvacanopādānaṃ vādino nigrasthānam /
Vn 49
32. athavā sādhanasya siddheryannāṅgam - asiddhaḥ, viruddhaḥ anaikāntiko vā hetvābhāsaḥ tasyāpi vacanaṃ vādino nigrahasthānam, asamarthopādānāt /
tathā sādhyādivikalasya anvayāpradarśitānvayā tairapi [? ananvayāpradarśitānvayāderapi] dṛṣṭāntābhāsasya sādhanāṅgasya [?asādhanāṅgasya] vacanamapi vādino nigrahasthānam asamarthopādānādeva / na hi tairhetoḥ sambandhaḥ śakyate pradarśayitum / apradarśanādasāmarthyam /
Vn 50
33. athavā - siddhiḥ sādhanaṃ, tadaṅgaṃ dharmo yasyārthasya vivādāśrayasya vādaprastāvahetoḥ sa sādhanāṅgaḥ / tadvayatirekeṇāparasyāpyajijñāsitasya viśeṣasyāśāstrāśrayavyājādibhiḥ prakṣepo moṣaṇaṃ [ghoṣaṇaṃ?] ca paravyāmohanānubhāṣaṇaśaktivighātādihetoḥ, tadapyasādhanāṅgavacanaṃ vādino nigrahasthānam, aprastutābhidhānāt /
ebhiḥ kathāviccheda eva; tathā viśeṣasahitasyārthasya prativādino 'jijñāsitatvāt / jijñāsāyāmadoṣḥ / jijñāsitaṃ punararthasyānyasya prasaṅgaparaṃparayā ye ṣa pannādinā (?) bahiḥ prativādinaḥ, prāśnikānāṃ ca nyāyadarśināmiti /
ebhiḥ kathāviccheda eva karaṇīyaḥ / na hi kaścidarthaḥ kvacit kriyamāṇaprasaṅge na prayujyate, nairātmyavādinastu tatsādhane nṛtyagītyāderapi tatra prasaṅgāt /
yathā - pratijñābhidhānapūrvakaṃ kaścit kuryāt - 'nāstyātmā'; iti vayaṃ bauddhā brūmaḥ / ke bauddhāḥ? ye buddhasya bhagavataḥ śāsanamabhyupagatāḥ / ko buddho bhagavān? yasya śāsane bhadantāśvaghoṣaḥ pravrajitaḥ / ka ḥ punarbhadantāśvaghoṣaḥ? yasya rāṣṭrapālaṃ nāma nāṭakam / kīdṛśaṃ rāṣṭrapālaṃ nāma nāṭakam? iti prasaṅgaṃ kṛtvā 'nāndyante tataḥ praviśati sūtradhāraḥ'; iti paṭhet, nṛtyed, gāyecca / prativādī taṃ ca sarvaprasaṅgaṃ nānukartuṃ samartha iti parājitaḥ syāt / iti sabhyaḥ sādhusammatānāṃ viduṣāṃ tattvacintāprakāraḥ /
Vn 52
34. na caivaṃ prastutasya paryavasānaṃ sa bhavati [? sambhavati], 'aniścaya phalatvādanārambha eva vādasya /
kathaṃ caiva jayaparājayau? prativādino 'pyananubhāṣaṇasyaivamprakārasya prasaṅgasya vistareṇānubhāṣaṇavyājena sambhavād, aniścitatvācca /
tasmāt pratijñāvacanameva tāvanna nyāyyam / kutaḥ punastatrājijñāsitaviśeṣaprasaṅgopanyāsaḥ, tadvyākhyāprasaṅgavitathapralāpaśca?
sarvaścāyaṃprakāro durmatibhiḥ śaṭhairnyāyasāmarthyenārthapratipādane 'samarthaiḥ pravartitaḥ /
yathā - 'puruṣātiśayapūrvakāṇi tanubhuvanakaraṇādīni'; iti pratijñāya tanukaraṇabhuvanavyākhyāvyājena sakalavaiśeṣikaśāstrārthaghoṣaṇam /
'nityaḥ śabdo 'nityo vā'; iti vāde dvādaśalakṣaṇaprapañcaprakāśanaśāstra praṇetṛ- jaiminipratijñātatattvanityatādhikaraṇaśabdaghaṭānyatarasadvitīyo ghaḥṭa iti pratijñāmuparacayya dvādaśalakṣaṇādivyākhyānam /
sarvo 'yaṃ durmatīnāmasāmarthyapracchādanopāyaḥ, na tu satyairastyupetaḥ, tattvaparīkṣāyāṃ phalādipratisaraṇadaṇḍaprayogādīnāmayuktatvāt /
Vn 53
35. bhavatyeva nāṭakādighoṣaṇe 'rthāntaragamanāt parājaya iti cet, anyasyāpyajijñāsitasya kiṃ na bhavati? na hi tasyāpi kācid vivakṣitasādhyadharmasiddhau nāntarīyakatā / yathā hetupratyayapāratantryalakṣaṇasaṃskāraduḥkhatādisiddhimantareṇa nānityatāsiddhiḥ /
Vn 54
tathāvidhastu dharmaḥ pṛthaganukto 'pi sādhyadharme 'ntarbhāvāt pakṣīkṛta eveti na pṛthagasyopanyāsaḥ, vyākhyānaṃ vā / tasmādevaṃvidhasyāpi tadānīṃ prativādino jijñāsitasyārthasya pratijñāyāmanyatraivopanyāso vyākhyānaṃ vā arthāntaragamanānnigrahasthānameva /
tena jijñāsitadharmamātrameva sādhanāṅgaṃ vācyaṃ, na prasaṅga upakṣeptavyaḥ, tadupakṣepe 'tiprasaṅgāt /
evamasādhanāṅgavacanaṃ vādino nigrahasthānaṃ prativādinā tathābhāve pratipādite, anyathā dvayorekasyāpi na jayaparājayāviti /
Vn 55
36. [adoṣodbhāvanaṃ nigrahasthānam]
adoṣodbhāvanaṃ prativādino nigrahasthānam / vādinā sādhane pratyukte 'bhyupagatottarapakṣo yatra viṣaye prativādī yadā na doṣamudbhāvayati, tadā parājito vaktavyaḥ /
sādhanadoṣāḥ punaḥ - nyūnatvam, asiddhiḥ, anaikāntikatā, vādinaḥ sādhayitumiṣṭasyārthasya viparyayasādhanam, aṣṭādaśa dṛṣṭāntābhāsāśca / teṣāmanudbhāvanamapratipādanaṃ prativādinaḥ parājayādhikaraṇam /
Vn 56
tat punaḥ sādhanasya nirdoṣatvāt, sadoṣatve 'pi prativādino 'jñānāt, pratipādanāsāmarthyād vā /
na hi duṣṭa sādhanābhidhāne 'pi vādinaḥ prativādino 'pratipādite doṣe parājayavyavasthāpanā yuktā, tayoreva parasparasāmarthyopaghātāpekṣayā jayaparājayavyavasthāpanāt /
kevalaṃ hetvābhāsād bhūtapratipatterabhāvāda pratipādakasya jayo 'pi nāstyeva / na hi tattvacintāyāṃ kaścicchalavyavahāraḥ /
yadyevaṃ, kiṃnu parājayaḥ, tattvasiddhibhraṃśāt? na anirākaraṇāt / nirākaraṇaṃ hi tasyānyena parājayaḥ, na siddhyabhāvaḥ, pratiyogyapekṣaṇāt / siddhyabhāvasya sādhanābhāve 'satyapi pratiyogini bhāvāt / pratiyoginaśca tannirākaraṇe 'sāmarthyāt parājayasyānutpatteraparājayaḥ /
tasmādayamasamarthasādhanābhidhāyyapi pareṇa tathābhāve 'pratipādite 'parājito vaktavyaḥ /
Vn 58
37. [vāde chalavyavahāraniṣedhaḥ]
chalavyavahāro 'pi vijigīṣuṇaṃ vāda iti cet / na, durjanavipratipattyadhikāre satāṃ śāstrāpravṛtteḥ / na hi parānugrahapravṛttā mithyāpralāpārambhāt sotkarṣaparapaṃsanādīn [svotkarṣaparapaṃsanādīn?] asadvyavahārān upadiśanti / na ca paravipaṃsanena lābhasatkāraślokopārjanaṃ satāmācāraḥ /
nāpi tathāpravṛttebhyaḥ svahastadānena prāṇināmupatāpanaṃ satsammatānāṃ śāstrakāra sabhāsadāṃ yuktam / na ca nyāyaśāstrāṇi sadbhirlābhādyupārjanāya praṇīyante /
tasmānna yogavihitaḥ kaścid vijigīṣuvādo nāma / parānugrahapravṛttāstu santo vipratipannaṃ pratipādayanto nyāyamanusareyuḥ satsādhanābhidhānena, bhūtadoṣodbhāvanena vā /
sākṣipratyakṣaṃ tasyaivānuprabodhāya / tadeva nyāyānusaraṇaṃ satāṃ / vādaḥ - uktanyāye tattvārthī cet pratipadyeta, tadapratipattāvapyanyo na vipratipadyeteti /
tattvarakṣaṇārthaṃ sadbhirupahartavyameva chalādi vijigīṣubhiriti cet / nakhacapeṭaśastraprahārādīpanādibhirapīti vaktavyam! tasmānna jyāyānayaṃ tattvarakṣaṇopāyaḥ /
sādhanaprakhyāpanaṃ satāṃ tattvarakṣaṇopāyaḥ, sādhanābhāsadūṣaṇaṃ ca / tadabhāve mithyāpralāpādatra paropatāpavidhāne 'pi tattvāpratiṣṭāpanāt / anyathāpi nyāyopavarṇane vidvatpratiṣṭhānāt /
Vn 59
tasmāt parānugrahāya tattvakhyāpanaṃ vādino vijayaḥ, bhūtadoṣadarśanena mithyāpratipattinivartanaṃ prativādinaḥ /
Vn 61
38. athavā - yo na doṣaḥ sādhanasya, tadbhāve 'pi vādinā tadasādhayitum [tadā sādhayitum?] iṣṭasyārthasya siddhervighātābhāvāt, tasyodbhāvanaṃ prativādino nigrahādhikaraṇaṃ, mithyottarābhidhānāt / yathā sādhyatayāniṣṭo 'pi vādino dharmaḥ śāstropagamāt sādhya iti tadviparyāsena na virodhodbhāvanam /
'nāstyātmā'; iti tava pratijñāpadayorvirodha iti pratijñādoṣodbhāvanaṃ, 'prayatnāntarīyakaḥ śabdo 'nityaḥ, prayatnāntarīyakatvād'; iti hetordharmaviśeṣatvāt pratijñārthaikadeśa ityasiddhodbhāvanaṃ, sarvāṇi sādharmyavaidharmyasamādīni jātyuttarāṇi ityevamāderdoṣasyodbhāvanamadoṣodbhāvanam / tasya vādinā doṣābhāsatve prakhyāpite prativādī parājito vaktavyaḥ, pūrvapakṣe sādhanasya nirdoṣatvāt /
doṣavati punaḥ sādhane na dvayorekasyāpi jayaparājayau, tattvāprakhyāpanāt, adoṣodbhāvanaṃ ca / apratipakṣāyāṃ ca pakṣasiddhau kṛtāyāṃ jetā bhavati /
tasmājjigīṣatā svapakṣaśca sthāpanīyaḥ, parapakṣaśca nirākartavyaḥ /
nirdoṣe sādhanābhidhāne 'pi vādinaḥ prativādinā doṣābhāsa udbhāvite dūṣaṇābhāvatvakhyāpane eva jayaparājayau, nānyathā, bhāvatastattvābhidhāne 'pi pratipakṣanirākaraṇena tattvasya prakhyāpanāsāmarthyāt, na prativādinno 'pyatra, bhāvato mithyāpratipatteriti /
idaṃ nyāyyaṃ nigrahasthānalakṣaṇamuktamasmābhiḥ / nyāyamatakhaṇḍanam
Vn 65
39. anyatu na yuktamiti neṣyate / yatredaṃ yathoktaṃ nigrahasthānalakṣaṇaṃ nāsti, tasya nigrahasthānatvamayuktamiti noktamasmābhiḥ /
[1] 'pratidṛṣṭāntadharmābhyanujñā svadṛṣṭānte pratijñāhāniḥ nigrahasthānam'; [nyā.sū. 5.2..2] ityatra bhāṣyakāramataṃ dūṣayitvā vārtikakāro yaṃ sthitapakṣamāha, tatraivaṃ brūmaḥ - pratidṛṣṭāntasya yo dharmastaṃ yadā svadṛṣṭānte 'bhyanujānāti nigṛhīto veditavyaḥ /
tatra dṛṣṭaścāsāvante ca vyavasthita iti dṛṣṭāntaḥ / svadṛṣṭāntaḥsvapakṣaḥ / pratidṛṣṭāntaḥ pratipakṣaḥ / pratipakṣasya dharmaṃ svapakṣe 'bhyanujānan parājitaḥ / yathā 'anityaḥ śabda aindriyakatvād'; iti bruvan pratipakṣavādini sāmānyena pratyavasthite āha - 'yadi sāmānyamaindriyakaṃ nityaṃ śabdo 'pyevamastu'; ityeṣā pratijñāhāniḥ, prākpratijñātasya śabdānityatvasya tyāgāditi /
Vn 66
40. atropagatapratijñātyāgāt pratijñāhānau viśeṣapratiniyamaḥ kiṃkṛto 'nena prakāreṇa pratijñāṃ tyajataḥ pratijñāhāniriti /
sambhavati hyanenāpi prakāreṇa hetudoṣodbhāvanādinā pratipakṣasādhanābhidhānena ca svapakṣaparityāgaḥ, parapakṣopagamaśca /
Vn 67
idameva ca pratijñāhāneḥ pradhānaṃ nimittam / evaṃ pratipāditena pratijñā hātavyā, hānau ca parājaya iti /
41. idaṃ punarasambhaddhameva - 'sāmānyaṃ nityamaindriyakam'; ityukte 'śabdo 'pyevamastu; iti kaḥ svasthātmāsvayamaindriyakatvādanityaḥ śabdo ghatavaditi bruvan sāmānyenopadarśanamātreṇa nityaṃ śabdaṃ pratipadyeta?
sāmānyasyāpi nityasyaindriyakatve tasyānitye ghaṭe darśanāt saṃśayitaḥ syāt / jātyā pratipadyetāpīti cet / tathapi kiṃ sāmānyopadarśanena?
evameva nityaḥ śabdaḥ iti vaktavyam, jaḍasya pratipattau vicārābhāvāt /
na ca nityasāmānyopadarśanena taddharmaṃ śabde pratipadyamānena pratipakṣadharmo 'bhyanujñāto bhavati / 'anityaḥ śabdaḥ'; iti ca vadato nityaśabda ityāñjasaḥ pratipakṣaḥ syāt, (
Vn 68
) na nityaṃ sāmānyamiti /
tasmādaindriyakatvasya nityānityapakṣavṛttervyabhicārādasādhanāṅgasyopādānānnigrahārhaḥ, na pratipakṣadharmānujñyānena prakāreṇa pratijñāhāneḥ /
Vn 69
42. [2] 'pratijñātārthapratiṣedhe dharmavikalpāt tadarthanirdeśaḥ pratijñāntaram /'; [nyā. sū. 5.2.3] pratijñāto 'rtho 'nityaḥ śabda aindriyakatvādityeva, tasya hetuvyabhicāropadarśanena pratiṣedhe kṛte dharmabhedavikalpāt sāmānyaghaṭayo sarvagatatvāsarvagatatvadharmavikalpena pratijñāntaraṃ karoti - yathā ghaṭo 'sarvagato 'nityaḥ evaṃ śabdo 'pyasarvagato 'nitya iti / etatpratijñāntaraṃ nāma nigrahasthānaṃ sādhanasāmarthye 'pyaparijñānāt / sa hi pūrvasyāḥ 'anityaḥ śabda'; iti pratijñāyāḥ sādhanāttadā yām 'asarvagataḥ śabda'; iti pratijñāmāha, taddarśanāya taddarthanirdeśa ityāha / tadarthaḥ pūrvoktasādhyasiddhyarthaḥ / uttarapratijñānirdeśastadarthanirdeśaḥ / na ca pratijñā pratijñāntarasādhane samarthā, iti nigrahasthānam
Vn 70
43. atrāpi naivaṃ bruvatā pratijñāntaraṃ pūrvapratijñāsādhanāyoktaṃ bhavati / kiṃ tarhi? viśeṣaṇam / aindriyakatvasya hetoḥ sāmānye vṛttyā vyabhicāra udbhāvite 'sarvagatatve satyaindriyakatvasyahetorviśeṣaṇopādāne vyābhicāraṃ pariharati, na punaḥ pratijñāntaramāha; asarvagatatvasya śabde siddhatvāt, pratijñāyāśca sādhyanirdeśalakṣaṇatvāt /
yadapyuktaṃ - 'pūrva pratijñāsādhanāyottarāṃ pratijñāmāha'; iti, tadapyuktam / na hi pratijñā pratijñāsādhanāyocyamānā pratijñāntaraṃ bhavati / kiṃ tarhi? hetvāderanyatamaḥ sādhyasādhanāyopādānāt / sādhananirdeśaḥ sa syāt, na sādhyanirdeśaḥ /
udāharaṇasādharmyādeśca hetulakṣaṇasyāsarvagatatve bhāvāt, pratijñālakṣṇasya cābhāvāt / hetutvamasarvagatatve prayuktaṃ na pratijñāntaram /
Vn 72
44. atyantāsambaddhaṃ cedaṃ - pratijñāṃ pratijñāsādhanāyāheti / yo hi prāk pratijñāmuktvā hetūdāharaṇādikaṃ vaktuṃ jānāti, sa kiñcidanukramaṃ [kañcidanukramaṃ?] sādhanasya jānātyeva hi / jānan kathamavikalāntaḥkaraṇaḥ pratijñāmeva pratijñāsādhanāyopādadīta?
upādadatā cānena pratijñāmātreṇa siddhiriṣṭā bhavati / tataśca na prāgapi hetuṃ brūyāt /
evaṃprakārāṇāmasambaddhānāṃ parisaṃkhyātumaśakyatvāt lakṣaṇaniyamo 'pyasambadaddha eva - pratijñāntarābhidhāne pratijñāntaraṃ nāma nigrahasthānamiti / evamprakārāṇāmekameva lakṣaṇaṃ vācyaṃ syāt /
na caivaṃvidhaḥ kaścid vivādeṣu dṛṣṭapūrvo vyavahāro yena tadarthaṃ yatnaḥ kriyate / na ca bālapralāpānuddiśya śāstraṃ pravartate / pravṛttau ca kā niṣṭā, teṣāmaniṣṭhānāt?
Vn 73
45. dṛśyate ca viduṣāmapi nātinirūpaṇādasiddhābhidhānamiti vyavahāradarśanāt tādṛśaṃ parājayādhikaraṇaṃ vyavasthāpyate / tasmādihāpi yadi nivṛttākaṃkṣe vādini paro 'naikāntikatāmudbhāvayed, asādhanāṅgasyānaikāntikasyābhidhānānnigrahasthānaṃ vādinaḥ /
evaṃ yadi prativādī satsāmānyamaindriyakaṃ nityaṃ ca pramāṇena pratipādayituṃ śaknuyāt anuddiśyāpramāṇakaṃ śāstropagamaṃ, pramāṇenaiṣāmarthānāmapratipādanena bhūtadoṣodbhāvanametat / na kaścitparājayaḥ, abhyupagamamātreṇa vastusiddherabhāvāt, prativādinā doṣasyāpratipāditatvāt /
pramāṇairasamarthitasādhanābhidhānāt tu jetāpi na bhavatīti /
anityākāṃkṣe [? anivṛttākāṃkṣe] punarvādini na kaścad doṣoḥ, viśeṣaṇābhidhānena hetoḥ samarthanopakramāt /
Vn 74
46. [3.] "pratijñāhetvorvirodhaḥ pratijñāvirodhaḥ /" [nyā.sū.5 2. 4.] yathā 'guṇavyatiriktiṃ dravyam; iti pratijñā, 'rūpādibhyo 'rthāntarasyānupalabdheḥ iti hetuḥ, so 'yaṃ pratijñāhetvorvirodhaḥ / etenaiva pratijñāvirodho 'lapyuktaḥ, yatra pratijñā vacanena [svavacanena? virudhyate / yathā - śramaṇā garbhiṇī, nāstyātmeti vā /
hetuvirodho 'pi, yatra pratijñayā heturvirudhyate / yathā - 'sarvaṃ pṛthak, samūhe bhāvaśabdaprayogād'; iti /
etena pratijñayā dṛṣṭāntavirodho vyākhyātaḥ /
Vn 75
47. hetośca dṛṣṭāntādibhirvirodhaḥ, pramāṇavirodhaśca pratijñāhetvorvaktavyaḥ /
yaḥ parapakṣaṃ svasiddhena gotvādinā vyabhicārayati, tad viruddhamuttaraṃ veditavyam /
svapakṣānapekṣaṃ ca / yaṃ ca svapakṣānapekṣaṃ hetuṃ prayuṅkte - 'anityaḥ śabdaḥ aindriyakatvād'; iti, tasya svasiddhasya gotvāderanityavirodhād viruddhaḥ / iti parapakṣeṣvasiddhena gotvādinānaikāntikacodanāviruddhaḥ /
ubhapakṣasampratipannastvanaikāntikaḥ / yadubhayapakṣaṃ [yadubhayapakṣa- ?] pratipannaṃ vastu tenānaikāntikacodanā iti /
Vn 76
48. atrāpi pratijñārthaḥ, sādhanavākye prayogapratiṣedhāt / tadāśrayastatkṛto vā hetudṛśṭāntayorna virodha iti na pratijñāvirodho nāma kiñcinnigrahasthānam /
syādetat / asatyapi pratijñāprayoge gamyamāno 'pi pratijñāhetvorvirodho bhavati / yathā - rūpādibhyo 'rthāntarasyānupalabdhistad guṇavyatiriktam, nopalabhyate ca rūpādibhyo 'rthāntaraṃ dravyam / ityukte 'pi gamyata eva sādhyasādhanayorvirodhaḥ - kathaṃ tato 'rthāntarasyānupalabdhiḥ, tadvyatirekaśceti /
satyaṃ, syādayaṃ virodhaḥ, yadi hetuḥ sādhyadharmaviparyayaṃ sādhayet / yadi hyupalabdhilakṣaṇavyāptatvena [hyupalabdhilakṣaṇaprāptatveva?] upagatasya sato (
Vn 77
) dravyarūpādipratibhāsavivekena svapratibhāsānupalabdhistasya tadvyatireke nāsti [tadvyatirekeṇāsti?] iti iṣṭavyatirekaviparyayasādhanād viruddho heturasmābhirukta eveti / bhavatyevedaṃ nigrahādhikaraṇaṃ, yadyevaṃvidhaḥ pratijñāhetoḥ [? pratijñāhetvoḥ] virodha iṣṭaḥ / atha punarasyopalabdhilakṣaṇaprāptirlupyate, tadā na kaścit pratijñāhetoḥ [? pratijñāhetvoḥ] virodhaḥ, vyatiriktānāmapi bhāvānāṃ kutaścid viprakarṣiṇāṃ tadvyatirekeṇānupalabdhāvapi vyatirekasya bhāvāt /
Vn 78
49. yaduktaṃ - 'svavacanapratijñāyāḥ [? pratijñāyāḥ] svavacanavirodhe pratijñāvirodhaḥ'; iti tatredameva nigrahādhikaraṇam, asādhanāṅgabhūtāyāḥ pratijñāyāḥ sādhanavākye prayogaḥ, na virodhaḥ, tadadhikaraṇatvāt /
yadi pratijñānapekṣoḥ virodhaḥ syāt, syāt parājayāśrayaḥ / pratijñādhikaraṇatve punastatprayogakṛta eva parājayaḥ, asya prastāvopasaṃhārāvasānatvād vyarthaṃ virodhodbhāvanam, parājitaparājayābhāvād bhasmīkṛtānalavat /
ye tu kecid vicāraprasaṅgeṣu ekatra sādhye bahavo hetava ucyante, teṣa / vikalpena tatsādhyasādhanāya vṛtteḥ sāmarthyam, anyathā dvitīyasya vaiyarthyāt /
yadi hi tatrāpyekaprayogamantareṇāparasya prayogo na sambhavet, na tadā dvitīyasya kaścit sādhanārthaḥ, pratītapratipādanābhāvāt /
Vn 79
tasmānna pratijñāyāḥ svavacanavirodho nāma kiñcinnigrahasthānam /
na ca 'nāstyātmā'; ityatra kaścit pratijñāvirodhaḥ nāstyātmaśabdārthasya bhāvopādānatvaniṣedhāt / sabdārthaniṣedhe hi virodhaḥ syāt / na ca svalakṣaṇaṃ śabdārtha iti /
Vn 80
50. yaḥ punaḥ pratijñāyā bādhanāddhetuvirodha uktaḥ, yathā - 'sarvaṃ pṛthak samūhe bhāvaśabdaprayogāt'; iti / nātra pratijñāprayogaḥ, nāpi hetoḥ, yena virodhaḥ syāt / kiṃ tarhi? pratipāditārthopadarśanenopasaṃhāravacanametasmāt [... vacanametatsyāt?] /
anyaireva hetubhiḥ śabdasyaikaviśeṣānabhidhānam, anekārthasāmānyābhidhānaṃ ca pratipādya sarvasya śabdārthasya nānārtharūpatayaikavastuviśeṣasvabhāvatābhāvamupadarśayan śabdārthamadhikṛtya sarvaṃ pṛthagiti brūyāt /
etena tadvirodhaḥ pratyuktaḥ /
Vn 81
51. dṛṣṭāntopadarśanaṃ caitad - 'anityaḥ śabdaḥ kṛtakānityatvād'; /
yathā kvacid arthe vipratipattau prasiddhamanekārthasāmānye śabdaprayogamupadarśya pratipāditavipratipattisthānaḥ sāmānyenopasaṃharati - sarvaṃ pṛthagiti /
yadi dṛṣṭāntaprayogaḥ, kimṛjunaivatatprayogakrameṇa na prayuktaḥ, vipratipattiviṣayaśca kiṃ na darśita iti cet /
na, samāsanirdeśāt / evamapi prayogadarśanād, asādhanavākyatvācca /
ata eva na pratijñayā hetorbādhanam / na caikameva kiñcinnāstīti bruvāṇaḥ kaścit tatsamuccayarūpamekaṃ ca samūhamicchati, yena virodhaḥ syāt /
yo 'pi 'yugapat kaṅkena yogād'; ityādinā paramāṇorbhedamāha, na tasyāpyekaḥ samuccayarūpaḥ sādhayitumiṣṭaḥ / kiṃ tarhi? abhāva eva, ekānekapratiṣedhāt / ataḥ so 'pi na samūhastasyeṣṭo na tatra śabda iti na virodhaḥ /
Vn 82
52. na viruddho 'yaṃ pūrvakāt pratijñāhetuvirodhāt bhidyate, yena pṛthagucyeta /
tatra hetupratijñayorbādhanam, iha pritijñayā hetorityasti bheda iti cet / arthavirodhe hi hetupratijñayorbādhyabādhakabhāvaḥ syāt / 'sarvārthavirodho dviṣu'; iti yamapi (
Vn 83
) [yadapi?] parasparaṃ bbādhakam, ekārthasannidhāvaparārthāsambhavāt, tatra hetupratijñayoḥ sahapṛthagvā bādhodāharaṇayorna kaścidarthabhedaḥ /
53. api cāyaṃ viruddho vā sati hetuprayoge vyadhikaraṇatvādasiddha ityasiddhatā hetornigrahasthānam / sa khalūcyamāna evātaddharmatayā pratīto vaktuḥ parājayamānayati / parājite tasmiṃstadarthavirodhacintayā na kiñcit /
api ca - sarvatrāyaṃ pratijñāhetvorvirodhaḥ sambhavan dvayīṃ doṣajātimabhipatati viruddhatāmasiddhatāṃ ceti /
Vn 84
viruddhatā siddhe hetordharmiṇi bhāve sādhyadharmaviparyaya eva, bhāva pratijñāvirodhāt /
asiddhatāpunardharrmiṇi pratijñātārthasiddhau, viruddhayoḥ svabhāvayoḥ ekatrāsambhavāt, na cānyathā virodhaḥ /
asiddhe dharmasvabhāve 'bhihitayorhetupratijñātārthayorvirodhād virodhasambhava iti cet /
apramāṇayoge tūbhayordharmiṇi saṃśayaḥ / tathā sati hetordharmiṇi bhāvasaṃśaye 'siddhataiva hetudoṣa ityasiddhaviruddhābhyāmanyo na pratijñayā virodho nāma parājayahetuḥ /
asiddhaviruddhe ca hetvābhāsavacanādevokte iti na pṛthak pratijñāvirodho vaktavya iti /
Vn 85
54. ubhayāśrayatvād virodhasya vivakṣāto 'nyataranirdeśa iti cet / syādetat / pratijñāhetvorvirodha iti pratijñāhetū āśrityobhayāśrayo bhavati / tatra yadā (
Vn 86
) pratijñāvirodho vivakṣitastadā pratijñāvirodha ityucyate, yadā pratijñāyā hetorvā virodhastadā viruddho heturiti / ataḥ pratijñāvirodhaḥ, hetuvirodho vā ityadoṣoḥ /
tatra hetorudāharaṇam - nityaḥ śabdaḥ utpattidharmakatvāditi / pratijñāvirodhasya - nāstyātmeti / pratijñāhetvoḥ parasparaviruddhodāharaṇam - guṇavyatiriktamityādi / pratijñayā hetuvirodhodāharaṇam 'nāstyeko bhava'; ityādikam iti / na, sarvahetvapekṣasya virodhahetvābhāsānatikramāt, yathoktaṃ prāk /
anapekṣe ca kevale svataḥ prativirodhe [pratijñāvirodhe?] vivakṣite pratijñāhetvorvirodha iti hetugrahaṇamasambaddham /
na cotpattidharmatvānnityamityatrāpi hetuvirodho yuktaḥ / pratijñayā hi hetorbādhane hetuvirodhaḥ, iha tu hetunā pratijñā bādhyate iti pratijñāvirodho yuktaḥ /
ubhayāśraye 'pi virodhe bādhyamānavivakṣayā tadvirodhavyavasthāpanāt /
Vn 87
55. yadapyuktam - etena pratijñayā dṛṣṭāntavirodhādayo 'pi vaktavyā bhaṇḍālekhyanyāyeneti, tatrāpi pakṣīkṛtadharmaviparyavati dṛṣṭānte virodhaḥ syāt / viruddhe ca dṛṣṭānte yadi pakṣadharmasya vṛttirananyasādhāraṇā prasādhyate viruddhastadā hetvābhāsaḥ /
Vn 88
sādhāraṇāyāmaprasādhite vā tadvṛttiniyame 'naikāntikaḥ / avṛttau vāsādhāraṇaḥ /
viruddhadṛṣṭāntāvṛttau viparyayavṛttau ca na kaścid hetudoṣaḥ, dṛṣṭāntavirodhaśca pratijñāyā iti cet /
na, tadāpi saṃśayahetutvānativṛtteḥ / dṛṣṭāntavirodho hi pratijñāyāḥ sādharmye doṣo na vaidharmye, abhimatatvāt /
sādharmyadṛṣṭānte ca viparītadharmavati vastutaḥ sādhyāvyabhicāre 'pi hetornāvyabhicāradharmatā śakyā darśayitumiti nāpradarśitāvinābhāvasambandhāt hetorniścayaḥ / tanna pratijñayā dṛṣṭāntavirodho hetvābhāsānativartate /
Vn 89
56. ubhayathāpi doṣo 'stviti cet / na / na hetudoṣasya prāk prasaṅgena parājitasya doṣāntarānpekṣaṇāt /
viśeṣeṇa sādhanāvayavānukramaniyamavādinaḥ / udāharaṇasādharnyaṃ hetulakṣaṇaṃ viruddhe dṛṣṭānte na sambhavatīti prākprayuktasya hetordoṣeṇa parājaya iti nottaradṛṣṭāntāpekṣayā virodhaścintāmarhati /
hetorapi dṛṣṭāntavirodhe 'sādhāraṇatvaṃ viruddhatvaṃ vā, vaidharmye yadi vṛttiḥ syāt /
Vn 90
pramāṇavirodhe tu hetoryathā - 'na dahano 'gniḥ saityāt'; ityādi hyasiddho hetvābhāsaḥ /
pratijñāyā pramāṇavirodhaḥ svavacanavirodhena vyākhyātaḥ iti sarve evaite sādhanavirodhe hetvābhāseṣvantarbhavantīti hetvābhāsavacanenaivoktāḥ /
Vn 91
57. yattu viruddhamuttaraṃ parapakṣe svasiddhena gotvādinānaikāntikacodaneti, tadasambaddhameva / yadi hi svasiddhena gotvādinā parasya vyabhicārasiddhimākāṅkṣeta, tasya tatsvapakṣaviruddhaṃ nābhimatamiti virodho yujyeta / sa hi svayaṃ pratipanne gotve hetuvṛtteḥ saṃśayāno 'pratipattimātmanastathā khyāpayati /
sa ca hetuḥ satyasati gotve 'prasādhitasādhanasāmarthyaḥ saṃśaye hetutvādanaikāntika eva /
prasādhite tu sāmarthye gotve 'vṛttyā hetau na saṃśaya eva, sarvasaṃśayaprakārāṇāṃ parihāreṇa samarthanāt /
etena svapakṣānapekṣahetuprayogasyānaikāntikatā vyākhyātā / so 'pi svābhimatanityagotvavṛttihetumanityatve bruvāṇo 'samarthatayāsādhanāṅgatayā saṃśayahetumevāheti /
yatpunaruktam - ubhayapakṣasampratipannena vastunānaikāntikacodaneti, tatrāpyavaśyaṃ saṃśayahetutvamukhenaivānaikāntiko vaktavyaḥ / tadasamarthite 'nyatrāpi tulyamiti nobhayasiddhetarayoranaikāntikatvaviśeṣaḥ /
Vn 93
58. yadapyuktaṃ - 'dṛṣṭāntābhāsā hetvābhāsapūrvakatvāt tadabhidhānenaivoktā iti na pṛthag nigrahasthāneṣūktāḥ'; iti tadapyavayavāntaravādino 'yuktam / yo 'vayavāntaraṃ dṛṣṭāntahetoḥ [dṛṣṭāntaṃ hetoḥ?] āha tasya na hetvābhāsoktyā dṛṣṭāntābhāsoktirvyāpyā, tadvacanena gamyamānsya tasmāt sādhanāntarābhāvaprasaṅgāt /
dṛṣṭāntābhāsānāṃ hetvābhāse 'pyantarbhāvād dṛṣṭāntasyāpi hetāvantarbhāva iṣṭo bhavati / tathā ca na dṛṣṭāntaḥ pṛthaksādhanāvayavaḥ syād, apṛthagvṛtteḥ /
yo dṛṣṭāntasādhyo 'rthastasya hetāvantarbhāvāddhetunaiva sādhita iti na dṛṣṭāntasya pṛthak kiñcitsāmarthyam /
api ca - na kiñcit pūrvapakṣavādino hetvābhāsāsaṃsparśe nyāyyaṃ nigrahasthānamastīti tatsambhandhīni sarvāṇyeva hetvābhāsatāvacanenaiva uktānīti na pṛthagvācyāni syuḥ /
arthāntaragamanāderapi hetoraśāmarthye eva sambhavāt / na hi samarthe hetau sādhye ca siddhe 'rthāntaragamanaṃ kañcidārabhate, asamarthasya mithyāpravṛtteriti /
Vn 94
59. [4] "pakṣapratiṣedhe pratijñātārthāpanayanaṃ pratijñāsaṃnyāsaḥ /" [nyā. sū.5.2.5] yaṃ pratijñātamartham 'anityaḥ śabdaḥ eindriyakatvād'; iti sāmānyavṛttyā hetorvyabhicārapradarśanena saḥ pratiṣedhe kṛte, 'ka evamāha- anityaḥ śabdaḥ'; iti parityajati, tasya pratijñāsaṃnyāso nāma nigrahasthānamiti /
atrāpi yadyudbhāvite 'pi hetorvyabhicāre na sapakṣaṃ [svapakṣaṃ parityajati?[, kiṃ na gṛhyeta? anigṛha ta [?anigṛhīta] eva hetvābhāsābhidhānāditi cet /
kimidānīmuttarapratijñāsaṃnyāsāpekṣayā tasya tadevādyaṃ nigrahasthānamiti kimanyairaśaktaparicchedaiḥ klībapralāpapraceṣṭitairupanyastaiḥ? evaṃ hi atiprasaṅgaḥ (
Vn 95
) syāt / pakṣapratiṣedhe tūṣṇīmbhavatastūṣṇīmbhāvo nāma nigrahasthānam, prapalāyamānasya prapalāyitaṃ nāmeti evamādyapi vācyaṃ syāt / tasmādetadapi asambaddhamiti /
Vn 96
60. [5.] 'aviśeṣokte hetau pratiṣiddhe viśeṣamicchato hetvantaram / "[nya.sū.5.2.6.] nidarśanam - 'ekaprakṛtīdaṃ vyaktaṃ, parimāṇāt, mṛtpūrvakāṇāṃ śarāvaprabhṛtīnaṃ dṛṣṭaṃ parimāṇam'; iti /
asya vyabhicāreṇa pratyavasthānam - nānāprakṛtīnāmekaprakṛtīnāṃ ca dṛṣṭaṃ parimāṇamiti /
evaṃ pratyavasthita āha - ekaprakṛtisamanvayaprakārāṇāṃ pariṇāmadarśanāt [parimāṇadarśanāt?] sukhaḥduḥkhamohasamanvitaṃ hīdaṃ sarvaṃ vyaktaṃ parigṛhyate [parimitaṃ gṛhyate?] / tasya prakṛtyantararūpasamanvayābhāvo 'sati [? prakṛtyantararūpasamanvayābhāve sati] ekaprakṛtikatvamiti tadaviśeṣokte hetau pratiṣedhaṃ bruvato hetvantaraṃ bhavati / sati hetvantarabhāve pūrvasya hetorasādhakatvānnigrahasthānam /
atrāpi pūrvasyaiva hetoranaikāntikasyābhidhānānnigṛhīte hetvantaracintā kvopayujyate? yadi prāksādhanavādī hetumanaikāntikamuktvā dattottarāvasaraḥ tenaiva nigṛhyate / adattottarāvasaro hetvantarābhidhāne 'pi na nigrahamarhati, avirāmāt /
Vn 97
61. [6.] "prakṛtādarthādapratibaddhārthamarthāntaram" [nyā.sū. 5.2.7.] yathoktalakṣaṇe pakṣapratipakṣaparigrahe hetutaḥ sādhyasiddhau prakṛtāyāṃ kuryāt- nityaḥ śabdo 'sparśatvāditi hetuḥ / hetuśca nāma hinoterdhātostuśabde pratyaye kṛdantaṃ padam / padaṃ ca nāmākhyhātopasarganipātā iti prastutya nāmādīni vyācaṣṭe / idamarthānantaraṃ nāma nigrahasthānam, abhyupagatārthāsaṅgatatvāditi /
nyāyyametannigrahasthānaṃ, pūrvottarapakṣavādinoḥ pratipādite doṣa prakṛtaṃ parityajyāsādhanāṅgavacanamadoṣodbhāvanaṃ ca / sādhanavādinā hyupanyastasādhanasya samarthane (
Vn 98
) kartavye tadakṛtvā parasya prasaṅgenāprasaṅgena vātannāntarīyakasyābhidhānamuttaravādino 'pi doṣodbhāvanamātrādaparasyopakṣepa iti /
Vn 99
62. [7.] "varṇakramanirdeśavannirarthakam / "[nyā. sū.5.2.8] yathā 'nityaḥśabdo jabagaḍatvāt jhabhaghaḍhavad'; iti / sādhanānupādānāt nigṛhyate iti /
idamapyasambaddham / na hi varṇakramanirdeśasiddhāvānarthakyaṃ yadeva kiñcidasādhanāṅgasya vacanaṃ tadevānarthakaṃ; sādhyasiddhyupayogino 'bhidheyasyābhāvāt, niṣprayojanatvācveti / prakāraviśeṣopādānamasambaddham /
vaterupādānādadoṣa iti cet / syādetat varṇakramanirdeśavaditi vatiratropāttaḥ so 'nyadāpi [so 'nyadapi?] ananurūpaṃ gṛṇhāti ityadoṣaḥ iti /
na / arthāntārādernigrahasthānasyāvacanaprasaṅgāt / evaṃ hi tā nirarthakā vācyā nirarthakenaivābhidhānāhitam [nirarthakenaivābhidhānāt?] /
na sādhyasiddhau anarthakaṃ nirarthakaṃ, yasya naiva kaścidarthastannirarthakamiṣṭamiti cet /
yasya kasyacidavādino 'pi hi nirarthakābhidhāne kiṃ na nigrahaḥ? nigrahanimittāviśeṣāt / na; tasyehāprastāvāditi cet /
āyātamiha - yo nirarthakaṃ bravīti, tasya tenaiva nigraha iti / tattunyaṃ sarvasyāsādhanāṅgavādina iti / sa sarvo nirarthakābhidhāno 'pyanenaiva nigrahasthānena nigrahārhaḥ /
na ca varṇakramanirdeśaḥ sarvatra nirarthakaḥ; kvacitprakaraṇe tasyāpyarthavattvāt / tasmādatraivāsyānarthakyāt nigrahasthānatvam / api cānyadidamucyate - 'varṇakramanirdeśo nigrahasthānam'; iti; kapolavāditakaṃkṣyaghaṭṭitakamityevamādīnāmapi vācyatvāt /
Vn 101
63. [8.] "parṣatprativādibhyāṃ trirabhihitamapyavijñātārtham / "[nya. sū. 5.2.9] yadvākyaṃ parṣadā prativādinā ca trirabhihitaṃ na vijñāyate kliṣṭaśabdamapratīta - prayogamatidrutoccāritamityevamādinā kāraṇena tadavijñātārthamasāmarthyasaṃvaraṇāya prayuktaṃ nigrahasthānamiti /
nedaṃ nirarthakād bhidyate; sapadiprakṛtārthasambaddhaṃ gamakamevakuryāt, nāsyāsāmarthyaṃ, na ca jāḍyāt parṣadādayo na pratipadyante iti na vidvānnigrahamarhati /
Vn 102
parṣatpratibhāsaparikalpyārhavacanāt nigrahārha eveti cet / nyāyavādino jāḍyāduktamajānan kiṃ na prativādī nigṛhyate? jāḍyāt parṣadādeḥ avijñātapratipādanasāmarthya iti vijetā na syānna nigrahārhaḥ / asambaddhābhidhāne nirarthakameveti na pṛthak vivakṣitārthaṃ [vivakṣitam avijñātārthaṃ?] nāma nigrahasthānamiti /
Vn 103
64. [9.] "paurvāparyāyogādapratibaddhārthamapārthakam /" [nyā. sū. 5.2.10] yatrānekasya padasya vākyasya vā paurvāparyeṇa yogo nāstītyasambaddhārthatā gṛhyate, tatsamudāyārthāpāyād apārthakaṃ daśadāḍimādivākyavat / idaṃ kila padānām asambaddhāt [asambandhāt?] asambaddhavarṇāt nirarthakāt pṛthaguktam /
nanvevamasambaddhavākyamapi pṛthag vācyam; nobhayasaṅgrahādapārthakaṃ yuktam; nirarthakasya saṃgrahaprasaṅgāt /
evaṃvidhācca viśeṣasamāśrayāt pṛthag nigrahasthānalakṣaṇapralapane 'tiprasaṅgo 'pyuktaḥ / na ca saṅgrahanirdeśe kañciddoṣaṃ paśyāmaḥ / prabhede vā guṇāntaramiti yatkiñcidetat /
Vn 104
65. [10] "avayavaviparyāsavacanamaprāptakālam /" [nyā.sū. 5.2.11] pratijñādīnāṃ yathālakṣaṇamarthavaśāt kramaḥ, tatrāvayavānāṃ viparyayeṇābhidhānaṃ nigrahasthānam /
na; evamapi siddheriti cet / na; prayogāpetaśabdatulyatvāt / yathā- gaurityasya padasyārthe goṇīti prayujyamānaṃ padaṃ kakudādimantamarthaṃ pratipādayatīti na śabdārthākhyānaṃ vyartham / anena ca padena gośabdameva pratipadyate, gośabdat (
Vn 105
) kakudādimantamartham, tathā pratijñādyavayavaviparyayeṇānupūrvīṃ pratipadyate, ānupūrvyā cārthamiti / tathā hi pūrvaṃ karmopādīyate mṛtpiṇḍādikaṃ loke, tataḥ karaṇam iti /
Vn 106
66. tadetadunmattakasyonmattakasaṃvarṇanamiva prayogāpetaśabdavadetaditi / yadi goṇīśabdāt kakudādimatyarthe pratītiśabdānvākhyānaprayatnena [? pratītiḥ, śabdānvākhyānaprayatne na] arthaṃ paśyāmaḥ /
goṇīśabdasyārthapratipādane 'sāmarthyāt / satyaṃ dṛṣṭā, na tu sākṣādityuktam /
nanu goṇīśabdādapi loke pratītirdṛṣṭā / satyaṃ dṛṣṭā, na tu sakṣādityuktam /
uktametanna punaryuktaṃ; strīśūdrāṇāmubhayapratīterabhāvāt / yaḥ khalu ubhayaṃ vetti, śabdamapaśabdaṃ ca, sa eva pratipadyate / yastu nakkaśabdaṃ mukkaśabdameva vā vetti, na nāsāśabdaṃ, sa kathamapaśabdācchabdaṃ pratipadetat, tato 'rthaṃ pratipadyeta?
dṛṣṭā cānubhayavedino 'pi pratītiriti /
na paramparayā pratītiḥ, arthe 'samarthasya śabdo 'pi pratītijananāsāmarthyācca /
na hyarthe 'pi vācakatvaṃ nāmānyadeva, anyatra tadviṣayapratītijananāt /
apaśabdaścecchabde pratītiṃ janayed, artha eva kiṃ na janayati? na hyetasyārthāt kañcid bhedaṃ paśyāmaḥ, yena taṃ pariharet /
akṛtasamayasya śabde 'pyapratītijananācca /
na hyayamapaśabdaḥ śabde 'pi svabhāvataḥ pratītiṃ janayati, adarśanāt samaya eva tu janayet / samayavaśāt pravartate /
evaṃ hi pratipattiparamparāpariśramaḥ parihṛto bhavati /
Vn 108
67. viparyayadarśanācca / śabdādarthamapratipadyamānā apaśabdaireva jñānaṃ vyutpadyamānā loke dṛsyante iti vyarthaṃ śabdānuśāsanam /
na vyarthaṃ, saṃskṛtaśabdavyutpattyarthamiti cet / ko 'yaṃ śabdānāṃ saṃskāraḥ? na hyeṣāṃ prajñābāhuśrutyādikaṃ saṃskāraṃ pasyāmaḥ /
nāpyeṣāmekāntena śravyatā / nāpyarthapratyāyane kaścidatiśayaḥ /
na dharmasādhanatā, mithyāvṛtticodanebhyaḥ saṃskṛtebhyo 'pyadharmotpatteḥ /
anyebhyo 'pi viparyayeṇa dharmotpatteḥ / śabddsya suprayogādeva svargamodanaghoṣaṇā vacanamātram / na caivaṃvidhānāgamānādriyante yuktijñāḥ /
na ca dānādidharmasādhanacodanāśūnyakevalaśabdasuprayogāt nagapātam iti bruvāṇasya kasyacinmukhaṃ vakrī bhavati / tasmānna saṃskṛto nāma kaścicchabdaḥ /
Vn 109
śiṣṭaprayogaḥ saṃskāra iti cet / ke śiṣṭāḥ? ye viditavedyādiguṇayuktāḥ / kaḥ punareṣāṃ guṇotkarṣānapekṣo 'līkanirbandho yatte 'mūneva śabdān prayuñjate nāparān? na cātra kaścicchabde 'parokṣaḥ sākṣī, yata idameva prayuñjate nāparān śiṣṭā iti niścinumaḥ /
nanvevaṃ [na tvevaṃ?] vayaṃ guṇātiśayamapasyantaḥ saṃskāraṃ keṣāñcicchabdānāmanumanyāmahe, tadanvākhyānaṃ [tadanvākhyāne?] yatnaṃ vā; guṇātiśayābhāvāt / vedarakṣādikaṃ cāprayojanameva atatsamayasthāyinaḥ / satyapi guṇātiśaye na karaṇīya evānvākhyāne yatnaḥ, tatsvabhāvasyānyato 'pi siddheḥ / prākṛtāpabhraṃśadramiḍāndhrādibhāṣāvat / na hi pratideśaṃ bhāṣāṇāṃ kiñcillakṣaṇamasti / atha ca sampradāyasāmyāllokastathaiva pratipadyate, tāsāṃ ca prayogabhraṃśaṃ, tathā saṃskṛtānāṃ śabdānāṃ pratītirbhaviṣyati / iti jaḍapratipattirevaiṣā, yā śabdānāṃ lakṣaṇe pravṛttiḥ /
Vn 111
68. avayavaviparyaye 'pi yadi teṣāṃ vacanānāṃ sambandhapratītiḥ, na viparyayaḥ nāpi arthāpratītiḥ; sāmarthyāt / na hyatra kaścit samayaḥ pratyāyānāviśeṣe 'pi evameva avayavāḥ prayoktavyā iti /
sa eva teṣāṃ kramo yathāvastitebhyo 'rthapratītirbhavati / iti na viparyayāt pratītiḥ, tata ānupūrvīpratipattyā pratītiriti cet / nāpratīyamānasambandhebhyaḥ ānupūrvīpratipattiḥ /
yeṣāṃ śabdānāṃ kaścit sambandho jāyate [jñāyate?] 'idamiha sambadhyate'; iti, teṣu viditasambandheṣu kaḥ kasya pūrvo 'paro vā kramaḥ, yo yathāvasthitānāṃ sambandhaḥ pratīyate / na hi vākyeṣu padānāṃ kramaniyamaḥ kaścit, yathā rājñaḥ puruṣaḥ, puruṣo rajña iti /
yāvadbhiḥ padairarthaparisamāptistadekaṃ vākyaṃ, yathā- 'devadatta gāmānaya kṛṣṇām'; iti / atra padānāṃ yathākāmaṃ prayoge 'pi nārthapratītau viśeṣa iti kaścit kramābhiniveśaḥ /
Vn 112
pratipāditaṃ ca pratijñāvacanāntareṇāpi yathā pratītirbhaviṣyatīti / pratīyamānārthasya śabdasya prayoge 'tiprasaṅgaḥ / pariśiṣṭeṣu ca sambandhaṃ pradarśya dharmiṇi bhāvaḥ pradarśyeta, dharmiṇi bhāvaṃ pradarśya sambandhaḥ pradarśyeta iti na niyamaḥ kaścid; ubhayathāpi pratītyutpatteḥ ityuktam / apratīyamānasambandheṣu ca padeṣu na tebhya ānupūrvyā api pratīteriti nedamapārthakād bhidyate iti nāprāptakālaṃ pṛthag vācyaṃ syāditi /
Vn 114
69. [11.] "hīnamanyatamenāpyavayavena nyūnam /" [nyā.sū. 5.2.12.] yasmin vākye pratijñādīnāmanyatamo 'vayavo na bhavati, tadvākyaṃ hīnaṃ; sādhanābhāve sādhyāsiddheḥ /
na pratijñānyūnaṃ hīnaṃ; tadabhāve pratītibhāvāditi pratipāditam /
hīnameva tat; nyūnatāyāmapi nigrahādityaparaḥ /
yaḥ pratīyamānārthamanarthakaṃ śabdaṃ prayuṅkte, sa nigrahamarhet, nārthopasaṃhitasyābhidhāteti asamīkṣitābhidānametat / ata eva pratijñāyā na sādhanāṅgabhāva iti /
Vn 115
70. [12] "hetūdāharaṇādhikamadhikam /" [nyā.sū.5.2.13.] ekena kṛtakatvād itarasya ānarthakyamiti tadetanniyamābhyupagame veditavyam / yatraikasādhanavākyaprayogapūrvako vicārastatrādhikābhidhānamanarthakamiti nigrahasthānam /
prapañcakathāyāṃ tu na kaścidoṣaḥ, niyamābhāvāditi /
Vn 116
71. [13.] "śabdārthayoḥ punarvacanaṃ punaruktamanyatrānuvādāt /" [nyā.sū. 5.2.14] śabdapunaruktam - anityaḥ śabdo 'nityaḥ śabda iti / arthapunaruktam anityaḥ śabdo nirodhadharmako dhvāna iti /
atra na śabdapunaruktaṃ pṛthagvācyam: arthapunaruktavacanenaiva gatatvāt / na hyarthabhede śabdasāmye 'pi kaścid doṣaḥ / yathā-
hasati hasati svāminyuccai rudatyabhiroditi /
kṛtiparikaraṃ svedo 'ṅgāraṃ [svedodgāraṃ?] pūrdhāvati [pradhāvati?] dhāvati //
guṇasamuditaṃ doṣāpetaṃ praṇindati nindati /
dhanalavaparikrītaṃ yantraṃ pranṛtyati nṛtyati //
yathā vā- yadyasmin sati bhavati bhavati, na bhavati na bhavati tattasya kāryamitarat kāraṇamiti /
Vn 117
72. gamyamānārthaṃ punarvacanamapi punaruktam; niyatapradaprayoge sādhanavākye yathā pratijñāvacanamiti arthapunaruktenaiva gatārthatvānna pṛthagvācyam /
ayamapi niyatasādhanavākye eva doṣo vaktavyaḥ; na vistarakathāyām / vyācakṣāṇo hi kadācidasamyak śravaṇapratipattiśaṅkayā sākṣiprabhṛtīnāṃ punaḥ punarbrūyāditi na tatra kiñcicchalam /
nāviṣayatvāditi cet; nāyaṃ gururna śiṣya iti na yatnataḥ pratipādanīyaḥ, yena punaḥ punarucyate, iti punarvacane nigraha eveti cet / na; sākṣiṇāṃ yatnena pratipādyatvāt, tadpratipādane doṣābhidhānāt, pratipādyasya śiṣyatvāt, vijigīśuvādapratiṣedhatvāt, trirabhidhānavacanāt, punarvacanaprasaṅge samayaniyamābhāvācca /
Vn 118
73. na cedamadhikād bhidyate iti na pṛthagvācyam / viniyatapradaprayoge hi sādhanavākye ādhikyadoṣa iti punarvacane 'pi gatārthasyādhikyameva padasyeti /
prapañcakathāyām anirūpitai kārthasādhanādhikaraṇāyāṃ nānārthasādhanepsāyāṃ nānāsādhanepsāyāṃ vā śrotuḥ hetvādi bāhulyasya punarvacanasya doṣatvāt / pratītapratyayābhāvād hetvādibāhulyaṃ vacanabāhulyaṃ ca sādhanadoṣa iti /
Vn 119
ādhikyapunarvacanayostulyadoṣa iti saṃgrahavacanaṃ nyāyyam; doṣābhāvādeva guṇābhāvāt, evamprakārāṇāṃ bhedānāṃ vacane cātiprasaṅgādityuktam /
paryāyaśabdakalpo hyaparo hetuḥ pratipādite viṣaye pravartamānaḥ '; pratipādyasya viśeṣābhāvāt /
arthaḥ punaḥ pratipādanānna bhidyate /
Vn 120
74. yatpunaruktam- "anuvāde tvapunaruktaṃ; śabdābhyāsādarthaviśeṣopapatteḥ" / yathā "hetvapadeśāt pratijñāyāḥ punarvacanaṃ nigamanam" [nya. sū. 1.1.39] iti / pratijñāyā evaṃ [eva?] gamyamānārthāyā vacanaṃ punarvacanaṃ. kiṃ punarasyāḥ punarvacanam ityuyuktaṃ nigamanam / 75. [14.] "vijñātasya parṣadā trirabhihitasyāpratyuccāraṇamananubhāṣaṇam /" [nyā.sū. 5.2.17] vijñātavākyārthasya parṣadā trirabhihitasya yadapratyuccāraṇaṃ tadananubhāṣaṇaṃ nāma nigrahasthānamapratyuccārayan kimāśrayaṃ parapakṣapratiṣedha kuryāditi /
Vn 121
uttareṇāvasānānnedaṃ nigrahasthānamiti cet / syādetat / uttareṇa guṇadoṣavatā mūḍhāmūḍhatvaṃ gamyate iti kimuccāritena? asti hi kaścid uttareṇa samartho na pratyuccāraṇena, nāsau tāvatā nigrahamarhediti / na: uttaraviṣayāparijñānāt / yadyayaṃ na pratyuccārayati, nirviṣayamuttaraṃ prasajyeta / athottaraṃ bravīti, kathaṃ noccārayati? tadidaṃ vyāhatamucyate- 'noccārayati, uttaraṃ ca bravīti'; iti / apratijñānācca / na cedaṃ na [? na cedaṃ] parijñāyate- pūrvaṃ sarvamuccārayitavyaṃ paścāduttaramabhidhātavyamiti / apitu yathākathañciduttaraṃ vācyam uttaraṃ cāśrayābhāve 'yuktamiti yuktamapratyuccāraṇaṃ nigrahasthānamiti /
Vn 122
76. yadi nāma vādī svas ādhanārthavivaraṇavyājena prasaṅgādaparaṃ ghoṣayed, vivādāspadaṃ ca jijñāsitamarthamātramukttvā pratijñādiṣvarthaviśeṣaparamparayā aparānarthānupakṣipya kathāṃ vistārayet, tacca sarvaṃ yadā nānuvaktuṃ śaknuyāt, kastasya vivādāśrayārthamātrottaravacane sāmarthyavighātaḥ yena vādivacanānubhāṣaṇaṃ nigrahasthānamucyate / tasmānna sarvaṃ vādikathāmananubhāṣamāṇo nottare samarthaḥ /
yadvacanāntarīyakā jijñāsitārthasiddhiḥ, yathā pakṣadharmatāvyāptiprasādhanamātraṃ, na tatrāpi prasaṅgāntaropakṣepaḥ, tadavaśyaṃ sādhanāṅgaviṣayatvād dūṣaṇasya upadarśyata eva / tatrāpi na sarvaṃ prāganukrameṇoccārayitavyaṃ, paścād dūṣaṇaṃ vācyaṃ; dviruccāraṇaprasaṅgāt / dūṣaṇaviṣayopadarśanārthe 'nubhāṣaṇe vādivacanānukramaghoṣaṇaṃ vyarthamiti na kāryameva dūṣayatā / 'asyāyaṃ doṣoḥ'; iti nāntarīyatvāt pratidoṣavacanaṃ viṣayopadarśanaṃ kriyate eva /
Vn 123
77. na hi sarvaviṣayopadarśanaṃ kṛtvā yugapad doṣaḥ śakyate 'bhidhātum; pratyarthaṃ doṣabhedāt / tasmād yaṃ padārthaṃ dūṣayati, sa eva taddūṣaṇaviṣayastadā pradarśanīyaḥ / (
Vn 124
) nāparastuḥ; dūṣṇe 'paropadarśanasyāsambhavāt / tasmin dūṣite punaranyo 'rtho 'paradoṣaviṣaya ityayamanubhāṣaṇe dūṣaṇe ca nyāyaḥ /
sakṛt sarvānubhāṣaṇe 'pi doṣavacanakāle punarviṣayaḥ pradarśanīya eva; apradarśite doṣasya vaktumaśakyatvāt / tathā ca dviranubhāṣaṇaṃ kṛtaṃ syāt / tatra prathamaṃ sarvānukramānubhāṣaṇaṃ niṣprayojanam / dūṣaṇavādinā dūṣaṇe vaktavye yanna tatropayujyate tasyābhidānamadoṣodbhāvanam / dviruktiśca / iti sakṛt sarvānubhāṣaṇaṃ parājayādhikaraṇaṃ vācyam /
tathāstviti cet / syādetat / uktametadarthāntaraṃ nigrahasthānamiti / tatra sādhane yataḥ kutaścit prasaṅgādinā nāntarīyakābhidhāna / ['nāntarīyakābhidhānaṃ?] vādino 'rthāntaragamanameveti sa nigrahārhaḥ / na kaścit kvacit kriyamāṇaprasaṅgo na prayujyate, nāpi tat tasyānubhāṣaṇīyam / na cedamapyasmābhiranujñāyate- sarvaṃ prāk sakṛdvaktavyaṃ, paścāddūṣaṇamiti / kintu dūṣayatāvaśyaṃ viṣayo darśanīyaḥ, anyathā dūṣaṇāvṛtteriti /
Vn 125
78. evaṃ tarhi nānanubhāṣaṇaṃ pṛthag nigrahasthānaṃ vācyam, apratibhayā gatatvāt / uttarasya hyapratipattirapratibhā [nyā.sū. 5.2.18] / na cottaraviṣayamapradarśayan uttaraṃ pratipattuṃ sararthaḥ / na hyanākṣiptānuttarapratipattikamananubhāṣaṇam / tenānanubhāṣaṇasya vyāpikāyāmapratibhāyāṃ vihitaṃ nigrahasthānatvam ananubhāṣaṇam [ananubhāṣaṇe?] / gavyaparāmṛṣṭatadbhedāyāṃ vihitamiva sāsnādimattvaṃ bāhuleye 'pi / tasmādpratibhaiva nigrahādhikaraṇatvena vā [vācyā?] nānanubhāṣaṇam /
Vn 126
kaścāyaṃsamayaniyamastrirabhihitasyānanubhāṣaṇamiti? yadi tāvat parapratyāyanārthā pravṛttiḥ, kiṃ trirabhidhīyeta? tathā tathā sa grāhaṇīyo yathāsya pratipattirbhavati / atha paropatāpanārthā tadāpi kiṃ trirabhidhīyate? sākṣiṇāṃ karṇe nivedya prativādī kaṣṭāpratītadrutasaṃkṣisādibhirupadrotavyaḥ, yathottarapratipattivimūḍhastūṣṇīmbhavati / na hi paropatāpanakrame kaścinnyāyaḥ, yena kaṣṭāpratītaprayogadrutoccāritā nivāryante, trirabhidhānaṃ vā vidhīyate / na ca paropatāpāya santaḥ pravartante, śāstrāṇi vā praṇīyante ityado vakttavyam ! tasmāttāvadvaktavyaṃ, yāvadanena na gṛhītam / na trireva /
agrahaṇasāmarthye prāgeva vā paricchinnasāmarthye parihartavyaḥ punaranupratibodhyeti /
Vn 127
79. [15.] "avijñātamajñānam /" [nyā.sū. 5.2.17] vijñātaṃ parṣadā prativādinā yadavijñātaṃ tadajñānaṃ nāma nigrahasthānam / arthe khalvavijñāte na tasya pratiṣedhaṃ brūyāditi /
etadapyananubhāṣaṇavadatreti tatraiva gamyatvādavācyam / yathānanubhāṣaṇe 'pradarśitaviṣayatvāduttarapratipattiraśakyeti anuttarapratipattyaiva nigrahasthānatvam; uttaraviṣayapradarśanaprasaṅgamantareṇānubhāṣaṇasya vaiyarthyāt /
tathājñāne 'pyuttarāpratipattyaiva nigrahasthānatvam / ajānānaḥ kathamuttaram uttaraviṣayaṃ ca brūyāt? iti viṣayājñānamuttarājñānaṃ ca nigrahasthānam / anyathā evaṃ sati apratibhayā [? apratibhāyā] nirviṣayatvāt /
Vn 128
anavadhāritārtho hi nānubhāṣate, ananubhāṣamāṇo viṣayamupadarśyottaraṃ pratipattuṃ na śaknuyādityuttaraṃ na pratipadyeta; jñātottaratadviṣayasyottarāpratipatterasambhavāt / ubhayametaduttarāpratipatteḥ kāraṇamiti /
tadabhāve pratipattirbhavatyeveti tayoḥ pṛthagvacane 'pratibhāyāḥ ko viṣaya iti vaktavyam ! nirviṣayatvādavācyaiva syāt /
Vn 129
80. nottarajñānam [? nottarājñānam] ajñānam / kiṃ tarhi? viṣayājñānam / jñāte hi viṣaye uttarājñānāt tanna pratipadyeteti asti viṣayo 'pratibhāyā iti cet / evaṃ tarhi ananubhāṣaṇaṃ nirviṣayam; ajñānenākṣepāt / na hi viṣayaṃ samyak pratipadyamānaḥ kaścinnānubhāṣeteti nānanubhāṣaṇaṃ pṛthag vācyam /
uttarājñānasya cākṣepāt / viṣayājñānenottarājñānamapyākṣiptameva na hi viṣayamajānannuttaraṃ jānātīti naivāpratibhāyā viṣayo 'sti /
jñāte 'pi viṣaye punaruttarājñānamapratibhāyā viṣaya iti cet / evaṃ tarhi viṣayottarājñānayorapi prabhedāt nigrahasthānāntarālavācyāni [nigrahasthānāntarāṇi vācyāni?] / yathājñānasya viṣayo jñānam [? viṣayājñānam] uttarājñānamiti prabhedādasatyapi guṇātiśaye nigrahasthānāntaravyavasthā kriyate, tathājñānayorapi sarvottarājñānamityādi prabhedānnigrahasthānāntarāṇi kiṃ nocyante? na cobhayasyāpyajñānasya (
Vn 130
) saṃgrahavacane doṣaḥ, guṇastu lāghavasaṃjñaḥ syāditi saṃgrahavacanaṃ nyāyyam / tasmādananubhāṣaṇājñānayorapratibhāviṣayatvānna pṛthagvacanam /
api ca - na pūrvottarapakṣavādino hetvābhāsāpratibhābhyāmanyat nigrahasthānaṃ nyāyyamasti, tadubhayavacanenaiva sarvamuktamiti / tadubhayākṣiseṣu prabhedeṣu guṇātiśayamantareṇa vacanādare 'tiprasaṅgāt vyarthaḥ prapañca iti /
Vn 131
81. [16.] "uttarasyāpratipattirapratibhā /" [nyā.sū. 5.2.18] parapakṣapratiṣedhe uttaraṃ yadā na pratipadyate, tadā nigṛhīto vaktavyaḥ /
Vn 132
sādhanavacanānantaraṃ prativiṣayamuttare vyarthaṃ tadajñānakramaghoṣaṇaślokapāṭhādinā kālaṃ gamayan kartavyāpratipattyā nigrahārha iti nyāyyaṃ nigrahasthānamiti /
82. [17.] "kāryavyāsaṅgāt kathāvicchedo vikṣepaḥ /" [nyā. sū. 5.2.20] yatkiñcit kartavyaṃ vyāsajya kathāṃ vicchinatti / 'idaṃ me karaṇīyaṃ prahīyate, asminnavasite paścāt kariṣyāmi / pratiśyākalāme kaṇṭhaṃ kṣiṇoti'; - ityevamādinā kathāṃ vicchinatti / sa vikṣepo nāma nigrahasthānamekataranigrahāntāyāṃ kathāyāṃ svayameva kathāntaṃ pratipadyate iti /
idamapi yadi pūrvapakṣavādī kuryād vyājopakṣepamātreṇa, na punarbhūtasya tathāvidhakathoparodhinaḥ karyasya bhāve, tasya svasādhanāsāmarthyaparicchedādeva vikṣepaḥ syāt / tathā cedamarthāntaragamane evāntarbhavet; asamarthasādhanābhidhānāt (
Vn 133
) hetvābhāseṣu vā / prakṛtasādhanāsambaddhapratipatteśca nirarthakāpārthakābhyāṃ ca na bhidyate / atiprasaṅgaścaivamprakārāṇāmasambaddhasādhanavākyapratipattibhedānāṃ pṛthag nigrahasthānavyavasthāpane proktaḥ /
athottaravādī evaṃ vikṣipet, sādhanānantaram uttare pratipattavye tadapratipattyā vikṣepapratipattirapratibhāyāmarthāntare vāntarbhavati /
Vn 134
83. nanu nāvaśyaṃ sādhanadūṣaṇābhyāmeva sarvasya pratipattiḥ, yena sarvā vādiprativādinorna samyak pratipatterhetvābhāse 'rthe pratibhāyāṃ vāntarbhavāt / bhavati hi anibaddhenāpi kathāprapañcena vivāda iti / na; asambhavāt / ekatrādhikaraṇe viruddhābhyupagamayorvivādaḥ syāt; aviruddhābhyupagamayoranabhyupagamayorvā virodhābhāvāt / tatrāvaśyamekasya vāgvacanapravṛttiḥ; yugapatpravṛttau parasparavacanagrahaṇāvadhāraṇottarāṇāmasambhavena pravṛttivaiphalyāt svasthātmanāmapravṛtteḥ / tena ca svopagamopanyāse 'vaśyaṃ sādhanaṃ vaktavyaṃ; anyathā pareṣāmaprattipatteḥ / apareṇa ca tatsambandhi dūṣaṇam / ubhayorasamyakpratipattau hetvābhāsāpratibhayoḥ prasaṅga iti sarvo nyāyapravṛttaḥ pūrvottarapakṣopanyāso dvayaṃ nātipatati /
etenaiva vitaṇḍā pratyuktā; abhyupagamābhāve vivādābhāvāt /
Vn 136
84. yadā tarhyabhyupagamya vādaṃ viphalatayā na kiñcid vakti, anyadvā yatkiñcit pralapati, tadā kathaṃ hetvābhāsāntarbhāvaḥ?
asamarthitasādhanābhidhāne evamuktam / anabhidhānānyābhidhānayorapi parājaya evetyuktam; abhyupagamya vādamasādhanāṅgavacanāt /
etenādhikasya punaruktasya ca pratijñādervacanasya na nigrahasthānatvaṃ vyākhyātam / tadapi hi pratipāditārthaviparyayatvātsādhanasāmarthyavidhānamapratītapratyayatayā na lakṣaṇāt sādhanasya / asādhanāṅgavacanamiti nigrahasthānamiti /
Vn 137
85 [18.] : "svapakṣadoṣābhyupagamāt parapakṣe doṣaprasaṅgo matānujñā /" [nyā. sū. 5.2.21] yaḥ pareṇa coditaṃ doṣamanuddhṛtya bhavato 'pyayaṃ doṣa iti bravīti, yathā - 'bhavāṃścauraḥ puruṣatvāt'; ityukte sa taṃ prati brūyād- bhavānapīti / sa svapakṣe doṣābhyupagamāt parapakṣe taṃ doṣaṃ prasañjayan paramatamanujānātīti matānujñā nigrahasthānamiti /
atrāpi yadi puruṣatvāccauro bhavānapi syāt, na ca bhavatātmaivamiṣṭaḥ, tasmānnāyaṃ cauryaheturiti yadyayamabhiprāyaḥ, tadā na kaściddoṣaḥ, anabhimate tadātmani cauratvena hetudarśane dūṣaṇāt /
prasaṅgamantareṇaivamṛjunaiva krameṇa kiṃ na vyabhicārita iti cet / yatkiñcidetat / santi hyevamprakārā api vyavahārā loka iti /
atha tadupakṣepamabhyupagacchati, etadapi uttarāpratipattyaiva tatsādhane nigrahārhaḥ / nāparatra; svadoṣopakṣepāt / tatsādhananirdoṣatāyāṃ hi tadabhyupagama evottarāpratipattiriti tāvataiva pūrvamāpannanigrahasya paradoṣopakṣepasyānapekṣaṇīyatvāditi /
Vn 139
86. [19.] "nigrahaprāptasyānigrahaḥ paryanuyojyopakṣaṇam /" [nyā.sū. 5.2.22]paryanuyojyo gāma nigrahopapattyā codanīyaḥ / tasyopekṣaṇaṃ nigrahaprāptau satyananuyogaḥ / etacca 'kasya parājayaḥ'; ityanuyuktayā parṣadā vaktavyaṃ, na khalu nigrahaprāptaḥ svakaupīnaṃ vivṛṇuyāditi /
atrāpi yadi sādhanavādinaṃ nigrahaprāptamuttaravādī na paryanuyuṅkte, aprati- bhaivāsyottarāpratipatteriti na paryanuyojyopekṣaṇaṃ pṛthag nigrahasthānam / nyāyacintāyāṃ punarna dvayorekasyāpyatra jayaparajājayau; sādhanābhāsenārthāpratipādanāt, bhūtadoṣānabhidhānācca /
Vn 140
87. atha kañciddoṣamudbhāvayati, kañcinna, na tadā nigrahamarhati; uttarapratipatteḥ /
arhatyeva, sato doṣasyānudbhāvanāditi cet / na santa iti kṛtvā sarve doṣā avaśyaṃ vaktavyāḥ /
avacane vā nigrahaḥ; ekenāpi tatsādhanavighātādekasādhanavacanavat /
yathaikasyārthasyānekasādhanasadbhāve 'pyekenaiva sādhanena tatsiddherna sarvopādānam iti na doṣamudbhāvayannevāparasyānudbhāvanānnigrahārhaḥ pūrvavat /
atha pūrvapakṣavādī uttarapakṣavādinaṃ nigrahaprāptaṃ na nigṛṇhāti, tadā tayornyāye naikasyāpi pūrvavat jayaparājayau; doṣābhāsaṃ bruvāṇamuttaravādinaṃ svasādhanādanutsārayato 'samarthitasādhanatvānna jayo vādinaḥ; sarvadoṣāsambhavapradarśanena sādhanāṅgāsamarthanāt / nāpyuttaravādinaḥ, ubhayadoṣāpratipādanāt /
tasmādevamapi na paryanuyojyopekṣaṇaṃ nāma parājayādhikaraṇamiti /
Vn 141
88. [20.] "anigrahasthāne nigrahasthānānuyogo niranuyojyānuyogaḥ /" [nyā. sū. 5.2.23] nigrahasthānalakṣaṇasya mithyāvyavasāyādanigrahasthāne nigṛhīto 'sīti paraṃ bruvan niranuyojyānuyogānnigṛhīto vaktavyaḥ /
Vn 142
atrāpi yadi tatsādhanavādinamabhūtaistaddoṣairuttaravādyabhiyuñjīta, so 'sthāne nirdoṣe nigrahasthānasya niyoktodbhāvayitā na bhavati tathā / bhūtadoṣodbhāvanalakṣaṇasyottarasyā- pratipatteritareṇottarābhāsatve pratipādite 'pratibhayaiva nigṛhīta iti nedamato nigrahasthānāntaram /
athottaravādinaṃ sādhanadoṣamudbhāvayantamaparo doṣābhāsavacanenābhiyuñjīta, tasya tena bhūtadoṣatve pratipādite sādhanābhāsavacanenaiva nigṛhīta iti /
evamapi nedaṃ hetvābhāsebhyo bhidyate / avaśyaṃ hi viṣayāntaraprāptyarthaṃ hetvābhāsā nigrahasthānatvena vaktavyāḥ, taduktāvaparoktiranarthiketi /
Vn 143
89. [21.] "siddhāntamabhyupetyāniyamāt kathāprasaṅgo 'pasiddhāntaḥ /" [nyā. sū. 5.2.24] kasyacidarthasya tathābhāvaṃ pratijñāya pratijñātārthaviparyayāt kathāprasaṅgaṃ kurvato 'pasiddhānto vijñeyaḥ / tathā 'na sato vināśaḥ, nāsadutpadyate'; iti siddhāntamabhyupetya pakṣamavasthāpayati - 'ekāntā prakṛtiḥ vyaktasya avyaktalakṣaṇā; vikārāṇām anvayadarśanāt / mṛdanvayānāṃ śarāvādīnāṃ dṛṣṭamekaprakṛtikatvam / tathā cāyaṃ vyaktabhedaḥ sukhaduḥkhamohasamanvito gṛhyate, tatsukhādibhirekaprakṛtiḥ'; iti /
sa evamuktavān paryanuyujyate - atha prakṛtirvikāra iti kathaṃ lakṣayitavyam? yasyāvasthitasya dharmāntaranivṛttau dharmāntaraṃ pravartate sā prakṛtiḥ, yat tad dharmāntaraṃ sa vikāra iti / so 'yaṃ prakṛtārthaviparyayādaniyamāt kathāṃ prasañjayati / pratijñātaṃ cānena - 'nāsadāvirbhavati, na sat tirobhavati'; iti /
Vn 145
90. sadasatośca tirobhāvāvirbhāvāvantaraṇa na kasyacit pravṛttyuparamaḥ, pravṛttirvā- ityevaṃ pratyavasthite yadi sa sata ātmahānamasataścātmalābhamabhyupaiti, apasiddhānto bhavati / atha nābhyupaiti, pakṣo 'sya na sidhyatīti /
ito 'pi na kaścidaniyamāt kathāprasaṅgo yattenopagataṃ nāsadutpadyate na sadvinaśyati'; iti tasya samarthanāyedamuktam 'ekaprakṛtikamidaṃ vyaktamanvayadarśanād'; iti / tatraikā prakṛtiḥ sukhaduḥkhamohāstadavibhaktayonikam idaṃ vyaktaṃ, tadanvayadarśanāt / vyaktasya tatsvabhāvatābhedopalabdheriti /
sukhādīnāmutpattivināśābhyupagamābhāvāt sarvasya tadātmakasya notpatti- vināśāviti siddhaṃ bhavati /
Vn 146
91. atra taduktasya hetordoṣamanudbhāvya vikāraprakṛtilakṣaṇaṃ pṛcchan svayamayaṃ prakṛtāsambandhena aniyamāt kathāṃ pravartayati / tatredaṃ syād vācyaṃ - vyaktaṃ nāma pravṛttinivṛttidharmakaṃ, na tathā sukhādayaḥ, vyaktasya sukhādyanvaye sukhādisvabhāvatā pravṛttinivṛttidharmatālakṣaṇamavahīyata iti / na tadrahitasukhādisvabhāvatā, vyaktalakṣaṇavirodhāditi, sukhādyanvayadarśanādityasiddho heturiti /
evaṃ hi tasya sādhanadoṣodbhāvanena pakṣo dūṣito bhavati / so 'nupasaṃhṛtya sādhanadoṣaṃ, kathāṃ pratānayan svadoṣaṃ paratropakṣipati /
ayameva doṣo 'nena prakāreṇocyate iti cet /
eṣa naimittikānāṃ viṣayaḥ, na lokaḥ śabdairapratipāditamarthaṃ pratipattuṃ samartha iti, sa evāyaṃ bhaṇḍālekhyanyāyo 'trāpi /
yathoktena nyāyena pūrvakasyāsādhanāṅgasyāsiddhasya hetorabhidhānādeva nigrahaḥ, nāpi niyamāt [aniyamāt?] kathāprasaṅgāt iti idamapi hetvābhāseṣvantarbhāvāt na pṛthagvācyam /
Vn 148
92. [22.] "hetvābhāsāścayathoktāḥ /" [nyā.sū. 5.2.25] hetvābhāsāśca nitrahasthānāni / kiṃ punarlakṣaṇāntarayogād hetvābhāsā nigrahasthānatvamāpadyante, yathā pramāṇāni prameyatvam? ityata āha yathoktahetvābhāsalakṣaṇenaiva nigrahasthānabhāva iti /
atrāpi yathoktatvāccintyemeva - kiṃ te yathā lakṣitaprabhedāstathaiva, āhosvidanyathaiveti? tattu cintyamānamihātiprasajyate iti na pratanyate / hetvābhāsāśca yathānyāyaṃ nigrahasthānamiti, etāvanmātramiṣṭamiti /
Vn 149
93. loke 'vidyātimirapaṭalollekhanastattvadṛṣṭer
vādanyāyaḥ parahitarataireṣa sadbhiḥ praṇītaḥ /
tattvālokaṃ timirayati taṃ durvidagdho jano 'yaṃ,
tasmādyatnaḥ kṛta iha mayā tatsamujjvālanāya //
vādanyāyo nāma prakaraṇaṃ samāptam / [kṛtiriyamācāryadharmakīrticaraṇānām]