advayasiddhi yoginī lakṣmīṅkarā viracitā
oṃ namaḥ śrīvajrasattvāya
prakṛtiprabhāsvaraṃ nāthaṃ sarvajñaṃ tribhavodbhavam /
praṇamya śirasā vajram īpsitārthaphalapradam //
deśakālatithivāranakṣatrair maṇḍalair vinā /
vakṣye haṃ vajrasattvasya saṃkṣepāt sādhanaṃ param //
niyamavratopavāsair akṣaroccāraṇabhāvanaiḥ /
atattvayogo
atattvayogī
na siddhyet kalpakoṭiśatair api //
viḍvajrodakabījādyair nāsikābhyantarodbhavaiḥ /
pūjayed satataṃ mantrī ātmānaṃ tattvabhāvanaiḥ //
jananīṃ bhaginīś caiva duhitṛbhāgineyikān /
prajñnopāyavidhānena pūjayed yogavit sadā //
ekāṅgavikalāṃ hīnāṃ śilpanīṃ śvapacīṃ tathā /
yoṣitāṃ pūjayen nityaṃ jñānavajraprabhāvanaiḥ //
tatremāni bījapadāni – o
ṁ
āḥ hū
ṁ
yena yena hi baddhyante jantavo raudrakarmaṇā /
sopāyena tu tenaiva mucyante bhavabandhanāt //
samayān aharahaḥ kuryād divyān pañcakulodbhavān /
pūjayec ca pradīpādyaiḥ sakṣīrair viśvasambhavaiḥ //
protphullanayano mantrī nityaṃ prahasitānanaḥ /
cittam āropya saṃbodhau bhāvayej jñānasāgaram //
yāvat sthiracalā bhāvā santy atra tribhavālaye /
sarve te tattvayogena draṣṭavyā vajradhṛg yathā //
paravādinaś ca kecil lingabhedair vyavastitāḥ /
te 'py atra nāvamantavyā vajrasattvavikurvitaiḥ //
sarvān samarasīkrtya bhāvān nairātmyaniḥsṛtān /
bhāvayet satataṃ mantrī dehaṃ prakṛtinirmalam //
gandhamālyādibhir vastrair dhūpanaivedyakais tathā /
gītavādyais tathā nṛtyaiḥ sopāyair bhajate vibhuḥ //
na kaṣṭakalpanāṃ kuryān nopavāsaṃ na ca kriyām /
snānaṃ śaucaṃ na caivātra grāmadharmavivarjanaṃ //
na cāpi vandayed devān kāṣṭhapāṣāṇamṛṇmayān /
pūjām asyaiva kāyasya kurvān nityaṃ smāhitaḥ //
makṣikācchardisaṃmiśrair viṇmūtrādyaiś ca bhāvitaiḥ /
pañcapradīpasaṃyuktaiḥ pūjayed vajradhāriṇam //
abalā svayambhukusumaiḥ sakṣīrair viśvasambhavaiḥ /
pūjayed devatāṃ tena dehasthāṃ tattvabhāvanaiḥ //
parasvaharaṇaṃ kuryāt paradāraniṣevanam /
vaktavyaṃ ca mṛṣāvākyaṃ sarvabuddhāṃś ca ghātayet //
śailamṛṇmayacaityādīn na kuryāt pustake ratim /
na maṇḍalāni svapne 'pi kāyavākcittakarmaṇā //
jugupsāṃ naiva kurvīta sarvavastuṣu mantravit /
vajrasattvaḥ svayaṃ tatra sākṣād rūpeṇa saṃsthitaḥ //
gamyāgamyavikalpaṃ tu bhakṣyābhakṣyaṃ tathaiva ca /
peyāpeyaṃ tathā mantrī kuryān naiva samāhitaḥ //
vairocanasamudbhūtān sarvaprāṇyaṅgasambhavān /
prāṇakān guhyatattvajño bhakṣayet siddhihetunā //
sarvavarṇasamudbhūtā jugupsyā naiva yoṣitaḥ /
saiva bhagavatī prajñā saṃvṛtyā rūpam āśrityā //
na tithir na ca nakṣatraṃ nopavāso vidhīyate /
advayajñānayuktasya siddhir bhavati saugatī //
bahunātra kim uktena yad bhaved upalabdhikam /
tat sarvaṃ tattvayogena draṣṭavyaṃ tattvavedinā //
hastyaśvakharagāvoṣṭrapradīpaṃ śvānasambhavam /
mahāpradīpasaṃmiśraṃ bhakṣayed yogavit sadā //
na cādhyāsaktiṃ kurvīta ekasminn api yogavit /
samatācittayogena bhāvanīyo bhavārṇavaḥ //
utpattisthitinirodhaṃ cāsampṛktaṃ pṛthagjanaiḥ /
tasya bhāve tu saṃsāro nānyatra pralayodbhavaḥ //
dinaṃ tu bhagavān vajrī naktaṃ prajñā vidhīyate /
evaṃ tu bhāvayed yogī laghu siddhim avāpnuyāt //
yat tad avyaktarūpaṃ tu sarvasattveṣu saṃsthitam /
guruvaktrāt paraṃ tattvaṃ prāpyate nātra samśayaḥ //
apratiṣṭhitanirvāṇaṃ nirnimittaṃ nirālayam /
vyāpakaṃ sarvasattveṣu saṃbodhiḥ paramaṃ padam //
evaṃ matvā tu vai yogī yo 'bhyased buddhimān sadā /
sa siddhyati na sandeho mandapuṇyo 'pi mānavaḥ //
ācāryāt parataraṃ nāsti trailokye sacarācare /
yasya prasādāt prāpyante siddhayo 'nekadhā budhaiḥ //
vajrasattvaḥ sa vai jñeyaḥ sarvabuddhair namaskṛtaḥ /
ācāryaḥ paramo devaḥ pūjanīyaḥ prayatnataḥ //
sa eva tathatārūpī lokānugrahahetunā /
rūpam āśritya saṃvṛtyā saṃsthito yogapīṭhake //
mṛtyur eṣa vikalpo yaṃ na bhāvaḥ sarvavastuṣu /
hanyate svavikalpena pṛthagjanavijṛmbhitaiḥ //
śrīmadoḍīyānavinirgatā mahāyogapīṭhāgatā 'khilayogatantratattvagarbhā śrīlakṣmīmukhakamalād viniḥsṛtā svādhiṣṭhānakramodayā advayasiddhir nāma sādhanopāyikā samāpteti