oṃ namaḥ śivāya |
namaḥ paramanāthāya gaṇanāthāya śūline |
cidpadmāsanasaṃsthāya caturdhābhinnamūrtaye ||
avarṇam asvaraṃ dhyātvā vyāpakaṃ parameśvaram |
vyutthāne yoginām itthaṃ śivatvaṃ jāyate sphuṭam ||
tataḥ śaktimayo yogī nādabindvātmavigrahaḥ |
dvayasampattim āpnoti nirādhārapade sthitaḥ ||
ślokadvayam idaṃ yasmāc chivavaktrāgamoditam |
śuddhaiṣā yogikoṣasya vivṛtyeha pravartate
||
ahaṃkāramayī bhūmir buddhibhūmeḥ parā hi sā |
tayā vyāptam idaṃ sarvaṃ saiva jñātā vimuktidā ||
saṃvidrūpā parā śaktir abhinnā pārameśvarī |
jñānaśaktiḥ punaḥ saiva mantrarūpā prakāśate ||
ahaṃkāraḥ smṛto mantraḥ śivaśaktyātmarūpakaḥ |
yad atrādyam avarṇākyaṃ sa śivaḥ parameśvaraḥ ||
nādabindvātmakaṃ yat tu dvitīyā śaktir aiśvarī |
dvayam etat samākhyātaṃ bījabhūtaṃ carācare ||
anena mudritāḥ sarve varṇā aṅgārarūpiṇā |
śabdabrahma tataḥ prāhur yoginas tattvacintakāḥ ||
aprāṇam asvaraṃ dhyātvā paśyantyā nirvibhāgayā |
cinmātrāmarśayogena vilīnaḥ syāt pare pade ||
tathā hi siddhair ādiṣṭaṃ kvacit siddhāntasaṃgrahe |
nābher ūrdhvaṃ vitastis tu kaṇṭhādhastāt ṣaḍaṅgulam ||
hṛdayaṃ madhyadeśe tu padmaṃ tu hṛdi madhyataḥ |
tatra madhye sthitā sūkṣmā karṇikā tripathopagā ||
tatra madhye hy akāraṃ tu svātmatattvaṃ vyavasthitam |
akārāntaḥ paraṃ sūkṣmaṃ cinmātratattvalakṣaṇam ||
tasyāpy upāsā kathitā vijñāne bhairavena tu |
abindum avisargaṃ ca akāraṃ japato mahān ||
udeti devi sahasāj jñānaughaḥ parameśvaraḥ |
karṇasthāne nirādhārā dvitiyā śaktir aiśvarī ||
bījabhūtā kuṇḍalinī nādabindusvarūpiṇī |
prāṇaśaktir iyaṃ dehe hakārākhyā nadaty alam ||
karṇāntaravivare yogī sthagitvā lakṣayet sphuṭam |
bindurūpā bhruvor madhye viśvasya jananī dhruvā ||
lakṣyate yogibhir nityaṃ bhrājamāna svatejasā |
tasya bimbau tu candrārkau vāmadakṣinanetrayoḥ ||
nirāśrayau tu tau kṛtvā viṣed brahma sanātanam |
vijñānabhairave 'py uktaṃ śastre siddhaniṣevite ||
sampradāyam imaṃ samyak śṛṇu devi vadāmy aham |
kaivalyaṃ jāyate sadyo netrayoḥ stabdhamātrayoḥ ||
saṃkocaṃ karṇayoḥ kṛtvā hy adhodvāre tathaiva ca |
an
-
ac
-
kam a
-
hal
-
aṃ dhyāyan viṣed brahmabilaṃ kṣaṇāt ||
iti siddhamukhodgītaṃ svayam eva udāhṛtam |
mārgenānena saṃsiddhā labhante yoginīpadam ||
jākadeśasamudbhūto mīmāṃsāvanakesarī |
harṣadattetināmā yas tasya sūnor iyaṃ kṛtiḥ ||