49.
An die Welt
Mein offt besturmbtes Schiff der grimmen winde spiell/
Der frechen wellen baall/ das schier die flutt getrennet/
Das vber klip auff klip'/ vndt schaum/ vndt sandt gerennet;
Kombt vor der zeit an port/ den meine Seele will.
Offt wen vns schwartze nacht im mittag vberfiell:
Hatt der geschwinde plitz die Seegel schier verbrennet!
Wie offt hab ich den Windt/ vndt Nord' vndt Sudt verkennet!
Wie schadthafft ist der Mast/ Stewr-ruder/ Schwerdt vnd Kiell.
Steig aus du müder Geist! steig aus! wir sindt am Lande!
Was grawt dir für dem portt/ itzt wirstu aller bande
Vndt angst/ vndt herber pein/ vndt schwerer schmertzen los.
[61]Ade/ verfluchte welt: du see voll rawer stürme:
Glück zu mein vaterlandt/ das stätte ruh' im schirme
Vnd schutz vndt friden hält/ du ewiglichtes schlos.