Ratnākaraśāntiviracitā āryāṣṭasāhasrikāyāḥ prajñāpāramitāyāḥ sāratamākhyā pañjikā

1. sarvākārajñatācaryāparivarto nāma prathamaḥ //

namaḥ sarvabuddhabodhisattvebhyaḥ /

.............namaḥ śaraṇaṃ daśabalāste vā (?) //

yasyāḥ katipayavarṇā dhṛtāḥ karṇapuṭairapi / bodherbhavanti bījāni jinamātā pyatyasau /

(RSt_2) atha kasmādiyaṃ vyākhyāyate?

sūtraṃ geyaṃ vyākaraṇaṃ gāthā udānaṃ nidānaṃ avadānaṃ itivṛttakaṃ jātakaṃ vaipulyaṃ adbhutā dharmāḥ upadeśāśceti /

tatra sūtraṃ katamat? yatra gambhīrapadairarthasūcanam / geyaṃ katamat? sūtrameva [yadgīyate] / yacca neyārthaṃ sūtraṃ tadapi geyaṃ gamyatvāt / vyākaraṇaṃ [katamat? yatra] śrāvako 'bhyatītaḥ kālagata upapattau vyākriyate / yacca nītārthaṃ sūtraṃ tena hi [sphuṭābhiprāyeṇa] vyākhyānāt / gāthā katamā? yatra [dvipadā tripadā catuṣpadā pañcapadā] ṣaṭpadā ca / udānaṃ katamat? yaduddiśya bhāṣitam / sotpattiśikṣāprajñaptibhāṣitaṃ vā / avadānaṃ katamat? sadṛṣṭāntakabhāṣitam / itivṛttakaṃ katamat? pūrvayogapratisaṃyuktam / [jātakaṃ katamat? bodhisattvacaryāpratisaṃyuktam / vaipulyaṃ katamat?] yadbodhisattvapiṭakapratisaṃyuktam / sarvasattvahitasukhādhiṣṭhānatvāt / adbhūtā dharmāḥ katame? yatra śrāvakabodhisattvabuddhānāmāścaryādbhutā dharmā deśyante / upadeśāḥ katame? yatrāviparītaṃ dharmalakṣaṇamupadiśyate [tatropadeśe 'ntargateyaṃ bhagavatī sūtraratnam /]

paramapuruṣārthasādhanasya paramagambhīrasya dharmasya sarvairākāraiḥ sūcanāt / athaiṣā katibhiḥ padārthairabhidheyairdarśitā? katame vata iti praśne śāstram-

iti / svārthe 'dhā' pratyayaḥ / ime te 'ṣṭāvityarthaḥ / bodhyabhimukhaḥ samyagbodhi' 'bhisambodhaḥ' / ata evā....... / abhisamīyate saptabhiḥ prāpyate yataḥ / mūrdhā prakarṣaḥ / taṃ prāpto 'mūrdhaprāptaḥ' / anupūrvamanukramaḥ / tadyogāt 'anupūrvikaḥ' / ubhayatrāpi 'sambodha' iti vartate /

punaḥ śāstram-

[3] lakṣaṇaṃ [tatprayogastatprakarṣastadanukramaḥ /]

athavā........ṣaḍarthāḥ / yata ādau trividhā sarvajñatā tat 'lakṣaṇaṃ' prajñāpāramitāyāḥ / tataścatvāro 'syāḥ prayogaḥ prayogaprakarṣaḥ prayogānukramaḥ prayoganiṣṭhā ceti / ........ /

punaḥ śāstram-

athavātisaṃkṣepato 'syāṃ trayo 'rthāḥ / tathā hi trividhaḥ prayogaviṣayaḥ sarvajñatātrayaśca[taddhetuḥ] 'viṣayaḥ' / 'prayogaścaturātmaka' / sarvākārā hi sambodhādiḥ / tasya hetoḥ 'phalaṃ dharmakāyaḥ' tat 'karma' ca /

tadevamaṣṭau ṣaṭ trayo vāsya sūtrasyārthāḥ sākalyena / prādhānyena punareka eva vārthaḥ / anyathā ekavākyatāpi na syāt / daśadāḍimādipasamūhavat / avayavārthaiḥ parasparo[para]ktasya svārthena (?) ekatvādupasaṃhārāt / tasmāt sambaddhān(nu)guṇopāyāt / samyaksambodhiratra (RSt_4) prādhānyenocyata ityeke / tadasat / yataḥ samyaksambodhiḥ śrāvakapiṭake 'pyatipratītatvādajijñāsitā / prajñāpāramitā tu tatrāviditatvājjijñāsiteti / saiva [śāstre prādhānyena]abhidhīyate / [duradhimokṣā] gambhīratvāt / bhagavatastu vacanāt [pratilabdhād] adhimucyate.............. / tato 'pīyaṃ prādhānyena bhagavatā vaktavyā / yathā yathā ceyamadhimacyate tathā tathā bodherāsannībhavati / tato 'pīyaṃ prādhānyena vacanīyā / aṣṭāsu cābhisamayeṣu yathā [sāraṃ tatheyaṃ] vistareṇocyamānā kathaṃ prādhānyena nocyate? prajñāpāramitaiva mārgaḥ sambodheḥ / śeṣāṇāmapi tathaiva mārgīkaraṇāt / ityevamiyamucyamānā sutarāṃ prādhānyenocyata ityalamativistareṇa / ata eva prādhānyena vyapadeśādetatsūtraṃ prajñāpāramitā / [na samyaksambodhi]riti / tasmātprajñāpāramitaivaḥ....... /

evaṃ mayetyādi / atha kasyedaṃ vacanam? saṃṅgītikārasya / saṅgītatvena loke saṃpratyayārtham / tatkiṃ ........prakṣepaḥ? naivam / bhagavadājñayaivaṃ tena pāṭhāt / uktaṃ hi bhagavatā [śrutaṃ mayā] iti saṅgītikāraḥ aḍakavatīnivāsī vajrapāṇirmahābodhisattvaḥ / sa hi bhādrakalpikānāṃ tathāgatānāṃ rūpakāyasya dharmakāyasya ca rakṣādhikṛtaḥ pṛṣṭhato 'vagataḥ / evaṃ te (taiḥ?) pratyarpitaśāsanaśca....... / ............. .......... yato 'syāmacyu (?)tasamādhiniśrito mahān dharmāvabhāsastasmāt prabhākarī / yato 'syāṃ bodhipakṣyaiḥ saṃkleśendhanadahanaṃ tasmādarciṣmatī / yato 'syāṃ laukikalokottarayorvidyāsatyajñānayoranyonyavirodhādduṣkaraḥ parijayastasmātsudurjayā / yato 'syāṃ pratītyasamutpādapravicayādabhimukho bhavatyasaṅgamukhākhyaḥ prajñāpāramitāvihārastasmādabhimukhī / yato 'syāṃ bodhipakṣyasatya[pratītya] samutpādālambano nirnimittavihāra ābhogavāhī tasmāddūraṃgamā / yato 'syāṃ sa eva svarasavāhitvādacalaḥ tasmādacalā / yato 'syāṃ pratisaṃvibhdirdhārmakathikatvādbodhisattvaḥ sādhustasmāt sādhumatī / yato 'syāṃ bodhisattvo 'bhiṣicyate yau[va]rājyāya tasmāddharmameghā / ..........etāḥ pratyekaṃ ṣaḍbhiḥ pāramitābhiḥ saṃgṛhītāḥ yathākramam / etāsu daśa pāramitā atiricyate /

katamā daśa?

tatra yatpāramitopacitasya kuśalamūlasyānuttarāyāṃ samyaksambodhau samyakpariṇāmanamupādāya pāramitā tenopāyena tasyākṣayīkaraṇāt / āha ca / "ābodhe kṣayamiti svalpamapi na bodhipariṇataṃ kuśalam / āsamantātpatitaḥ payonidhau salilabidnuriva" iti / bhadracaryādikaṃ praṇidhānapāramitā yayā pratijanma yatpāramitāścarati / bhāvanābalaṃ pratisaṃkhyānabalaṃ ca balapāramitā / yayā pratyahaṃ pratikṣaṇaṃ tāścarati / yathābhiprāyamayathārutaṃ mahāyānasya parijñānaṃ jñānapāramitā /

bhūmīnāṃ vistara āryadaśabhūmakādau / parikarmāṇi punarāsāṃ mahatyorbhagavatyoruddiṣṭāni nirdiṣṭāni ca bhūmīnāṃ parikarmāṇyadhikṛtya śāstre trayoviṃśatiḥ ślokāḥ / tāni yathābhūmi pṛthakkṛtya vakṣyāmaḥ /

'daśadhā' iti daśavidhena / taccāśayādi // 'āśayaḥ' śraddhāchandau / 'hitavastutvaṃ' sarvasattvahitaiṣitā / heturasyāḥ 'sattveṣu praśamacittatā' / 'tyāgo ' dānapāramitā / 'eṣaṇā' paryeṣaṇā / sā ca 'saddharmālambanā' dharmaparyeṣṭirityarthaḥ / gṛhavāsānniṣkramaṇaṃ niṣkramaḥ / svārthe ṣyañ 'naiṣkramyaṃ' taccittatā / 'spṛhā' ityatra sadeti vartate / 'satyaṃ' coktamiti satyavacanaṃ taddaśamam / 'eṣāṃ' ityāśayādīnām //

(RSt_6) 'śīlaṃ' śīlapariśuddhiḥ / 'kṣāntiḥ' kṣāntibalam / pramoda eva 'prāmodyam' 'mahatī' sarvasattvāparityāgitayā / 'gauravaṃ' gauravārheṣu / 'gurūśuśrūṣā' kalyāṇamitreṣa śāstṛsaṃjñā / 'dānādike ' iti pāramitāsu / 'aṣṭama' grahaṇādaṣṭāveva parikarmāṇi dvitīyāyām /

[10] hrīrapatrāpyamityetat pañcadhāmananātmakam /

'śrutaṃ' bāhuśrutyam / 'saṃśuddhiḥ' pariśuddhiḥ / sā tasyāmeva puṇyapariṇāmanāt / 'amananātmakaṃ' tenāmananāt / 'pañcadhā' iti vacanāt pañcaiva parikarmāṇi tṛtīyāyām /

vanasya ('vānāśā) araṇyavāsastatkāryatvāt / 'tuṣṭiḥ' santuṣṭiḥ / 'dhuta' guṇa 'saṃlekhasya' 'sevanaṃ' anutsargaḥ / 'nirvitsarvāstisaṃtyāgau' iti nirvedaḥ sarvasatāṃ tyāgaśca / 'anavalīnatvānapekṣate ' iti / anavalīnacittatā sarvavastunirapekṣatā ca / anavalīnatvaṃ asaṃkucutatvam / daśeti vakṣyamāna(ṇa)manuvartate / tato daśaiva parikarmāṇi caturthyām /

'saṃstavo ' gṛhipravrajitaiḥ / 'kuleṣu' upasaṃ[kra]maṇīyāgṛheṣu 'mātsaryam' / 'saṅgaṇikā' apratirūpakathā / 'utkarṣaṇam' / 'avajñā' (RSt_7) paṃsanam / 'karmamārgāḥ' 'karmapathāḥ' / 'mānaḥ' cittonnatiḥ / 'stambho ' gurūṣvapraṇatakāyatā / 'viparyāso ' viparātārthagrāhaḥ / 'vimatiḥ' vicikitsā / 'kleśamarṣaṇaṃ' rāgadveṣamohādhivāsanam / 'etān' iti saṃstavādīn /

ṣaṇṇāṃ pāramitānāṃ pratyekaṃ pūraka iti ṣaḍdharmāḥ / śrāvakaspṛhāyāḥ pratyekabuddhaspṛhāyāḥ parita(tra)sanacittasya ca parivarjaka iti trayaḥ / yācitasyānabalīnacittatā, sarvasvatyāge 'pyadaurmanasya, daurbalyepi na yācakānāṃ kṣepa iti trayaḥ / ebhirdvādaśabhirdharmaiḥ ṣaṣṭhiṃ bhūmiṃ prāpnoti /

dvitīyāt 'viṃśati' śabdādūrdhvaṃ guṇāḥ......ātmagrahādayo 'viṃśatiḥ' / 'kalaṅkāḥ' doṣāḥ / yasya 'vicchinnāḥ' prahīṇāḥ / trivimokṣamukhajñānādayaśca viṃśatiḥ gunāḥ (ṇāḥ) paripūrṇāḥ sa saptamīṃ bhūmiṃ prāpnotīti samāsato 'rthaḥ /

' graho ''bhiniveṣaḥ(śaḥ) / tasya viśeṣaṇamātmādirāyatanaparyantaḥ / śāśvatoccheda..........................ratnādi (?) dṛṣṭiḥ / tasyāṃ 'abhiniveṣi (śi)tā' niśrayaḥ / 'viṣādaḥ' khedaḥ / 'tadvirodhaḥ' śūnyatāyā bādhanam / 'samaṃ' iti sahetyarthaḥ /

tatra kalaṅkanirdeśānāmā(ma)rthaḥ / ātmagrāhaḥ / sattvagrāhaḥ / jīvagrāhaḥ / pudgalagrāhaḥ / ucchedagrāhaḥ / śāśvatagrāhaḥ / nimittagrāhaḥ / hetugrāhaḥ / skandhagrāhaḥ / [dhātugrāhaḥ / āyatanagrāhaḥ /] traidhātuke adhyavasānam / traidhātuke ālayaḥ / buddhidṛṣṭiniśrayaḥ / dharmadṛṣṭiniśrayaḥ / saṅghadṛṣṭiniśrayaḥ / śīladṛṣṭiniśrayaḥ / śūnyā dharmā iti viṣāḍhaḥ / śanyatāvirodhaśceti /

guṇānirdeśānāmarthaḥ / śūnyatāparipūrtiḥ / ānimittasākṣātkriyā / apraṇihitajñānam / [trimaṇḍalaviśuddhitā / karuṇā / mananā] / sarvadharmasamatādarśanam / bhūtanayaprativedhaḥ / anutpādakṣāntijñānam / ekanayanirdeśaḥ / sarvadharmāṇāṃ kalpanāsamuddhātaḥ / saṃjñādṛṣṭivivartaḥ / kleśavivartaḥ / śamathanidhyaptiḥ / vipaśyanākauśalyam / dātucittatā / anunayasyābhūmiḥ / yathecchakṣetragamanam / tatra cabuddhaparṣanmaṇḍe[svātmabhāva]darśanamiti //

iti / 'śubhā niṣpattiḥ' iti sambandhaḥ / pariśuddhetyarthaḥ / 'aṣṭādhā' iti vacanāt āṣṭaveva parikarmāṇyaṣṭamyām / tadyathā / sarvasattvacittānupraveśaḥ / abhijñācittā [nukriḍanam /] / buddhakṣetraniṣpādanam / buddhānāṃ sevā ca parīkṣaṇaṃ cetyekīkriyate / indriyaparāparajñānam / buddhakṣetrapariśodhanam / (RSt_9) māyopamasya samādherabhīkṣṇaṃ samāpattiḥ sañcitya bhavo[pa]pattiśca / dvividhaṃ buddhakṣetram / ādau bhājanalokaḥ paścāt sattvaloka iti /

aṣṭamānantaraṃ navamī / tasyāḥ parikarmāṇi dvādaśa / anantaṃ praṇidhānam / devādirutajñānam / paripūrṇaṃ pratibhānam / garbhāvakrāntisampat / kulasaṃpat / jātisaṃpat / gotrasaṃpat / parivārasaṃpat / janmasaṃpat / naiṣkramyasaṃpat / bodhivṛkṣasaṃpat / guṇapūrisampacca /

'navabhūmīḥ' iti gotrādibhūmiḥ / tatra gotrabhūmiḥ nirvāṇagotrakāṇam / aṣṭamakabhūmiḥ śrotaāpattiphalapratipannakasya / darśanabhūmiḥ śrotaāpannasya / tanubhūmiḥ sakṛdāgaminaḥ / vītarāgabhūmiranāgāminaḥ / "kṛtaṃ karaṇīyaṃ" iti jñānāt kṛtāvī arhan / tasya bhūmiḥ kṛtāvibhūmiḥ / śrāvakabhūmiḥ śrāvakasya / saiva ṣaḍvidhā pratyekabuddhasya / bodhisattvabhūmiḥ bodhisattvasya / pūrvoktā navabhūmayaḥ / etā navabhūmīratikramya yena jñānena bodhisattvo buddhabhūmau pratiṣṭhito bhavati sā daśami bodhisattvabhūmiḥ / iti bhūmisambharaḥ /

prati[pakṣa]madhikṛtya śāstram-

'abhyāso ' bhāvanā / grāhyo, grāhakaḥ / darśanamārge dvau grāhyavikalpau / vastumātrādhiṣṭhānaḥ pratipakṣadhiṣṭhānaśca / dvau grāhakavikalpau / pudgaladravyādhiṣṭhānaḥ pudgalaprajñaptyadhiṣṭhānaśca / [evaṃ bhāvanāmārge vikalpa]prahāṇāya aṣṭau pratipakṣāḥ / pratipakṣasambhāraḥ //

tatra darśanamārge tathatādīnāṃ rūpādīnāṃ svapnādīnāṃ ca grāhyavastūnāmupalambho vikalpaḥ / taddharmatopalambhalakṣaṇo 'nupalambhaḥ pratipakṣaḥ / dānādīnāṃ buddhadharmaparyantānāṃ pratipakṣavastūnāmupalambho vikalpaḥ / anupalambhaḥ pratipakṣaḥ / a................anupalambhapratipakṣaḥ / nāmasaṃketavyavahārāderupalambho vikalpaḥ / anupalambhaḥ pratipakṣaḥ / bhāvanāmārge tu na sthitā nāsthitāḥ sarvadharmā asthānayogena / dharmadhātuyogenetyarthaḥ / iti grāhyavastūnāmanupalambhaḥ / dānādīnāṃ pratipakṣavastūnāmanupalambhaḥ / śrota āpanna.......pudgalaprajñaptyāśrayāṇāṃ śrotaāpattiphalādīnāmanupalambhaḥ / iti pratipakṣasaṃbhāraḥ / samāptā ca saṃbhārapratipattiḥ //

niryāsyatītyetena niryāṇapratipattiḥ prastāvitā / tāmadhikṛtya śāstram-

etadāha / evamukte ityādinā subhūtiravocaditi / kimavocata? mahāyānamityādi / yasmādanena sadevamānuṣāsuraṃ lokamabhibhūya bodhisattvo niryāsyati / tasmādidaṃ yānaṃ mahāyānamityucyate / abhibhūya niryāsyatīti samānakāle ktvāpratyayaḥ / saṃmīlya hasatītyādivat / kasmādasau sarvalokamabhibhavati? tadalabhyasya māhātmyasya lābhāt / kiṃ punastat? sattvarāśeragratāsaṃpādanam / sattvarāśimahattayā prahāṇamahattayā adhigamamahattayā ca mahat / itīdamuddeśaniryāṇam //

ākāśamahattayā tanmahāyānamiti / tad yānaṃ mahaducyata iti sambandhaḥ / ākāśasamatayeti / kathaṃ samatā? yathākāśaṃ na digbhirbhidyate / avarṇasaṃsthānamapratighamanirdarśanamanantamamadhyanna hīyate na vardhate notpadyate na nirudhyate na kāmadhātuparyāpannaṃ na rūpadhātuparyāpannaṃ nārūpyadhatuparyāpannam / tathaiva mahāyānam / tasmādyathākāśasamatayā mahattadyānam / iti samatāniryāṇam /

yathā ākāśe ityādi / ākāśa avakāśo 'ntarbhāvāt / mahāyāne avakāśaḥ / tena teṣāmarthakaraṇāt / lokadhātubhiḥ saṃkhyābhirdigbhiścāparicchinnatvāt / aprameyā asaṃkhyeyā aparimāṇāḥ / paryāyeṇeti prakāreṇa / kathaṃ ca tāvatāmavakāśaḥ yataḥ sattvāsattayā ākāśāsattā / ākāśāsattayā mahāyānāsattā / mahāyānāsattayā sarvadharmāsattā / iti hi sattvāścākāśaṃ ca mahāyānaṃ ca sarvadharmāścārūpiṇo 'nidarśanā apratighā ekalakṣaṇā yadutālakṣaṇāḥ / evamiyatā sattvānāṃ mahāyāne avakāśaḥ / iti sattvārthaniryāṇam //

naivāsyetyādi / āgamaḥ āgamanam / nirgamaḥ nirgamanam / sthānaṃ gatinivṛttiḥ / trayaṃ mahāyānasya nāsti / acalā hi sarvadharmāḥ / yatasteṣāṃ prakṛtirna kvacidgacchati na kutaścidāgacchati na kvacittiṣṭhati / pariṣyandaścābhogaḥ / iti anābhoganiryāṇam /

evamasyetyādi / evamityākāśasyaiva / asyeti mahāyānasya / pūrvānta ityatīto 'rthaḥ / aparānta ityanāgato 'rthaḥ / madhyaḥ pratyutpannaḥ / trayamapyetanmahāyānasya nopalabhyate / trayadhvasamaṃ tadyānaṃ tasmānmahāyānam / kathaṃ tryadhvasamam? yato 'tīto 'rthotītārthenā (na) śūnyaḥ / anāgato 'rtho 'nāgatārthenā(na) śūnyaḥ / anāgato 'rtho 'nāgatārthenā(na) śūnyaḥ / pratyutpannaḥ pratyutpannena / tryadhvasamatā tryadhvasamatayā / mahāyānaṃ mahāyānena / bodhisattvo bodhisattvena śūnyaḥ / na ca śūnyatā atītā va anāgatā vā pratyutpannā vā / na tasyāṃ saṃkleśa upalabhyate na vyavadānam / na saṃsāro na nirvāṇam / tasmāt trayadhvasamaṃ tadyānam / ityantābhāvādatyantaniryāṇam /

atha khalu bhagavān ityādi / atra bhagavānāha / yānaśabdārthanirdeśe subhūteḥ sādhukāraṃ datvā atra śikṣitvetyādinā prāptiniryāṇaṃ praratauti / atra sarvajñateti sarvākārajñatā / atha khalvityādinā pūrṇasya praśnaḥ / prajñāpāramitādhikāre mahāyānasya pareṣāmaprastutatvāśaṅkānivṛttyarthaḥ / buddhānubhāvād bhagavan ityetatparyantena parihāraḥ / anulomaṃ nirdiśasi iti tvaṃ hi arvadharmān mahāyānaniḥsvabhāvān nirdiśasi / niḥsvabhāvatājñānaṃ ca teṣāṃ prajñāpāramitaiva / tasmādanulomaṃ nirdiśasīti bhāvaḥ / api tu khalu punarityādinā prakṛtameva prāptiniryāṇamadhikṛtya tasyāṃ pāptau dvādaśaviśeṣān dvādaśabhirvākyairāha / ata eva viśeṣadyotanārtho 'pituśabdaḥ / tatra api tu khalvityādi prathamam / tatkasyetyādi dvitīyam / rūpaṃ bodhisattva ityādi tṛtīyam / evaṃ bhagavannityādi caturtham / buddha (RSt_12) ityādi pañcamam / yathā ātmetyādi ṣaṣṭham / evamabhāvasvabhāvāḥ sarvadharmā iti saptamam / katamattadityādyaṣṭamam / evameteṣāmityādi navamam / tatkimityādi daśamam / na cetyādyekādaśam / sa cetyādi dvādaśam / kalpiteṣu anabhiniveśābhyāsaniṣṭhāyāṃ tadabhiniveśajanmanaḥ parantatrasya sarvathā nivṛttau sarvākarajñatā bodhisattvena prāpyata iti samudāyārthaḥ /

avayavārthastūcyate / uktaṃ bhagavatā "atra mahāyāne śikṣitvā atītānāgatapratyutpannā bodhisattva mahāsattvāḥ sarvākārajñatāmanuprāptā anuprāpsyanti anuprāpnuvanti ceti / tatra na pūrvānta upalabhyate nāparānto na madhyaḥ / tato na sattvā na sarvadharmā na bodhisattvaḥ" iti / sattvāśca sarvadharmāśca bodhisattvaśca pūrvāntāparāntamadhyāni ca sarvametadadvaidhīkāram / tasmātpūrvāntādiṣu bodhisattvo nopaitīti prathamasyārthaḥ / tatkasya hetoriti / tatpūrvāntādīnāmasattvaṃ kutaḥ? hetumāha / rūpāparyantatayetyādi / rūpādaya ākāśa(śa)samāḥ / rūpādiśūnyatāmupādāya / ata ete 'paryantāḥ / pūrvāntāparāntamadhyarahitāḥ / evaṃ bodhisattva iti dvitīyasyarthaḥ //

rūpādikaṃ bodhisattva iti nopaiti nāvagacchati / yasmāt idamapi na vidyate nopalabhyate rūpādi śūnyatāmupādāya / na hi śūnyatāyā rūpādikamasti nāpi bodhisattva iti tṛtīyasyārthaḥ //

evamiti pratibhāsamānena rūpeṇa / bodhisattvadharmamiti / bodhisattvākhyarūpādi / sarveṇeti skandhadhātvādivargabhedena / sarveṇa sarvamiti sarvayathā bhavati pūrṇāvayavatvād vargāṇām / punaḥ sarvamiti teṣu vargeṣvekaikam / sarvaṃ sarvatheti svena svena itaretaraiśca sarvairanupalabhamānaḥ / taiḥ śūnyatvāt / sarvajñatāmapīti sarvākārabhūtāmapi / so 'ham ityādi / taṃ dharmamiti bodhisattvākhyam / prakaraṇādgamyate prajñāpāramitāmapi sarvākārajñatāmapīti / dharmamiti bodhisattvākhyam / dharmeṇeti prajñāpāramitākhyena / dharme iti sarvākārajñatākhye prāptasya / avavadiṣyāmi prāptaye / naiva kaścitkenacitkvacidityarthaḥ / evameva vādābhāva anuṣṭhānābhāvānna kascinna kenacinna kvacitprāpnotīti caturthasyārthaḥ //

buddha iti buddhatvaṃ sarvākārajñatetyarthaḥ / nāmadheyamātramiti / arthaśūnyaṃ nāma / tathāhi nārthasya svabhāvo nāma prāksaṅketārthamātradarśanāt / (RSt_13) nāpi nāmnaḥ svabhāvoārthaḥ / aviditārthasya nāmnaḥ kevalasyaiva pratīteḥ / asatyepi cārthe śabdaprayogāt / nirarthakaṃ nāma / ata eva tacca nāmadheyamanabhinivṛttaṃ nāmadheyatvenāsiddham / ato 'nabhinivṛttena bodhisattvanāmnā anabhinirvṛttaṃ sarvākārajñatā nāma na prāpyata iti pañcamasyārthaḥ /

evaṃ tāvatpañcabhirvākyairdharmanairātmyamukhena nāmadheyamukhena ca kalpitasya prāptiḥ pratiṣiddhā / pugalanairātmyamukhenāpi tatpratiṣedhāya ṣaṣṭhaṃ coktam / yathā ātmā ātmeti ca bhagavannucyate ātyantatayā ca bhagavannanabhinirvṛtta ātmeti / atyantatayetyekāntena / anabhinirvṛtta ityasadbhūtaḥ / yathālakṣaṇamasattvāt / yathāśabdāt prakaraṇācca gamyate tatha sarvadharmā bodhisattvaśceti //

paratantrasvabhāvamadhikṛtya saptamaṃ coktam / evamabhāvasvabhāvāḥ sarvadharmaḥ iti / kutaḥ etat? yato mahatyorbhagavatyordvādaśabhirebhirvākyairuddeśaḥ subhūtinā kṛte tata eṣāṃ dvādaśānāmabhidhānakāraṇapraśneṣu śariputreṇa kṛteṣu thavirasubhūtiḥ kāraṇāni krameṇa bruvāṇaḥ saptamasthānakena kāraṇena 'abhāvasvabhāvāḥ sarvadharmā iti' praśnamanudyābhāvasvabhāvatāyāṃ kāraṇamuktvā 'anena paryāyeṇa, śāriputra, abhāvasvabhāvāḥ sarvadharmāḥ' ityupasaṃhāraṃ kṛtavān / tata eṣa pāṭhaḥ pratīyate / subhūteḥ praśnānuvādakāraṇākhyānatadupasaṃhārā iha jñāpakā na tūddeśaḥ / uddeśe 'pi saptamavākyasya prāyeṇa pāṭhabhraṃsā(śā)t / yataḥ saptamavākye trayo viplavāḥ kālena jātāḥ / uttareṇa granthena sahaikavākyatā prathamo viplavaḥ / ekavākyatārthe prathamāṃ vibhaktimapanīya ṣaṣṭhivibhaktiḥ kṛteti dvitīyo viplavaḥ / abhāvasvabhāvatāṃ cāpanīya asvabhāvata paṭhiteti tṛtīyo viplavaḥ / arthaṃ brūmaḥ / evamiti paratantreṇa svabhāvena abhāvasvabhāva eṣāmiti abhāvasvabhāvāḥ sarvadharmāḥ / yadāha / nāsti samyogikaḥ svabhāvaḥ pratītyasamutpannatvāditi / kāraṇasaṃnidhiḥ saṃyogastasmin satyeva bhavatīti saṃyogikaḥ / saṃyogiko yaḥ svabhāvaḥ so 'bhāvaḥ kāraṇaviyoge satyabhāvāt / api ca / yaḥ pratītyasamutpannaḥ so 'nityatvāt paścādabhāvaḥ / na ca vidyamānasya paścādabhāvo ghaṭate virodhāt / tasmādekakṣaṇa eva yo bhāvaḥ sa ekakṣaṇāntareṣvabhāvaḥ / tasmādabhāva eṣāṃ svabhāvaḥ / kiṃ ca, yadanityaṃ tat duḥkhaṃ duḥkhaṃ ca prahātavyam / tato 'pyabhāvasvabhāva eṣām / tasmātparatantreṇāpi svabhāvena bodhisattvo na prāpnotīti saptamasyārthaḥ //

nanviyamabhāvasvabhāvatā kalpitasyāpi rūpādeḥ prāpnoti / yataḥ kulālāda ghaṭaḥ kuvindātpaṭa utpadyamāno dṛśyate / ata āha / katamattadityādi / katamattatkalpitam / rūpādi yat a[na]bhinirdhūttam / naiva kiñcit sarvaṃ kalpitamasaṃskṛtamityarthaḥ / ata eva nirdeśavākye subhūtinā yuktiruktā- asaṃskṛtāḥ sarvadharmāḥ saṃskarturabhāvāditi / kulālakuvindāderapi kalpitasyāsatvādityarthaḥ / tasmātkalpitasyotpādanirodhādipratiṣedho 'ṣṭamasyārthaḥ /

asyāṃ tu bhagavatyāṃ grāhyatāpi kalpitasya pratiṣiddhā / bālagrāhyatvāt tasya / aṣṭamādūrdhvaṃ trīṇī vākyāni pariniṣpannaṃ svabhāvamadhikṛtya evamityādi / evamiti kalpitena svabhāvena eteṣāmiti paratnatrarūpāṇāṃ yā asvabhāvatā śūnyatā sānabhinirvṛttiriti / sa pariniṣpannasvabhāva ityarthaḥ / yadyevaṃ tadā dharmatāyā dharmādavyatirekād bhrāntikṣaye śūnyatāpi kṣīyeta / atha śūnyatā śāśvatī tadā tadavyatirekād bhrāntikṣaye śūnyatāpi kṣīyeta / atha śūnyatā śāśvatī tadā tadavyatirekād bhrāntirapi śāsva(śva)tī bhavedityata āha / yā cetyādi / yatpariniṣpannaṃ rūpaṃ na te bhrāntisvabhāvāḥ paratantrā dharmā ityarthaḥ / tadevaṃ śūnyatāyāḥ paratantrādavyatirekapratiṣedho navamasyārthaḥ //

tatkimityādi / avyatireke niṣiddhe vyatirekaḥ syāt / tatkimiti tadā katham / anabhinirvṛttimiti śūnyatāmātraṃ bodhisattvam / anabhinirvṛttyāmiti śūnyatāmātraṃ prajñāpāramitāyāmavavadiṣyāmi / na kathaṃcit / nahi jāta śakyo 'vavaditum / nāpi jāto 'rthaḥ prajñāpāramiteti vyatirekapratiṣedho daśamasyārthaḥ /

nanu paratantrarūpaṃ bhrāntireva / nirvṛttāyāṃ ca bhrāntau prāptistadā ka āśrayaḥ śūnyatāyāḥ? atha nirāśrayā na tarhi kasyacit dharmatā / ko vā tasyāḥ śaśaviṣāṇādviśeṣa? śaśaviṣāṇakalpasya ca bodhisattvasya kutaḥ prāptirityāha / na cetyādi / sarvadharmā iti jñeyāḥ skandhādayaḥ / buddhadharmā iti prāptavyā daśabalavaiśāradyādayaḥ / bodhisattvadharmā iti pūrvalabdhā guṇāḥ / yo vā bodhāya carediti bodhisattvaḥ / sarva ete prāptikāle 'nabhinrivṛtito 'nyatreti śūnyatāvyatirekeṇa nopalabhyante / suviśuddhajñānāvyatirekiṇī sarvaśūnyataiva tadānīṃ khyātītyarthaḥ / idamapyanena sūcitam / ya eṣa buddhabodhisattvapṛthagjanāvasthānagāmitvāddharmadhātuvadeva śāsva(śva)taprakāśastasyāsau dharmatā / yāvatparatantrastāvatparatantradharmatā ucyate / parato buddhadharmatā / svābhāvikaśca kāyo buddhānāmucyata ityamekadaśasyārthaḥ /

dvādaśaṃ vyaktam / sa cedityata ārabhya tatkasya hetorityataḥ prāk / atra cittaṃ nāvalīyata ityādibhiḥ pañcabhiḥ padaiḥ śamathasya pañcākārā ucyante / na bhagnapṛṣṭhī bhavatīti / ekapadena catvāra ākārāḥ / śamayati vyupaśamayati ekotīkaroti cittaṃ samādadhātīti / eṣāmabhāve samādhaye cittasya paścābhdaṅgaprasaṅgāt / atastaireva caturbhiḥ pṛṣṭhabhaṅgapratiṣedhāt na bhagnapṛṣṭhībhavati mānasam / evaṃ ṣaḍbhiḥ padairnavākāraḥ śamatha uktaḥ / bhūtapratyavekṣaṇālokaḥ udyotaḥ / udyotāt trāsastadakaraṇam / akaraṇe[na] pratiṣedhakaraṇāt / tato nottasyatītyekena padena vipaśyanā / na santrasyati na santrāsamāpadyata iti padadvayena yuganaddho mārgaḥ / tathā hi na saṃtrasyatīti na samādhestrasyati tadatyāgāditi śamathāṅgaḥ / saṃprajñānāt trāsaḥ saṃtrāsaḥ / tannāpadyata iti vipaśyanāṅgaḥ / carati prajñāpāramitāyāmiti uddeśaḥ / śeṣeṇa nirdeśaḥ / bhāvayatīti śamathena / upaparīkṣata iti vipaśyanayā / upanidhyāyatītyupanirīkṣamāṇo nipuṇaṃ dhyāyati yuganaddhena mārgeṇeti / dvādaśasyārthaḥ /

asyopapattaye trayodaśaṃ coktam / tatkasya hetorityata ārabhya prāk sarvākārajñatāniryāṇā(ṇā)t / tatkasya hetoriti praśnaḥ / uttaraṃ yasminhītyādi / imān dharmāniti sarvadharmān prajñāpāramitāyāṃ saṃmukhībhūtāyām / rūpaṃ kalpitaṃ yāvadvijñānaṃ yāvadbuddhadharmān nopaitīti nopalabhate, tadapratibhāsāt / nopagacchati na vikalpayati nirvikalpatvāt prajñāpāramitāyaḥ / iti svabhāvavikalpau pratiṣiddhau / viśeṣavikalpau pratiṣeddhumāhaḥ / na rūpāderutpādanirodhau / pūrvvamutpanno rūpādiridānīṃ niruddha iti na paśyati / kalpitasya hi yathālakṣaṇamasatvādutpādanirodhau na staḥ / tasmādubhau na paśyati / nanu paratantrasyānivṛttau duṣpariharaḥ kalpitasya pratibhāsaḥ / tatkutastannopeti? atha ṣaḍbhirvākyaiḥ kalpiteṣvanabhiniveśābhyāsāttadabhiniveśajanmanaḥ paratantrasya tadānīṃ nirvṛtiriṣyate / apūrvasyānutpadātpūrvasya ca svarasena vyayāt / tau tarhyanutpādavyayau tasya svabhāvau abhāvasvabhāvāḥ sarvadharmā iti paratantraṃ svabhāvamadhikṛtya vacanāt / sarvametaccetasi nidhāya pṛcchati tatkasya hetoriti / uttaraṃ tathā hityādi / yau hi rūpāderanutpādavyayau tau tasyābhāvau / abhāvau ca na bhāvau virodhāt / yatpunaruktamabhāvasvabhāvāḥ paratantrā iti / abhāvadvayavyabhicārastatra svabhāvārtho na punastādātmyaṃ virodhāt / evamabhedaṃ pratiṣidhya bhedapratiṣedhāyāha / ityanutpādavyayau ca rūpādiśca advayametad advaidhīkāramiti / nanu tadānīṃ rūpāderabhāvādadvayībhāvo na yukta ityata (RSt_16) āha / yatpunarityādi / naṭra paratantraṃ rūpādi gṛhyate / kiṃ tarhi? yadadvayamutpādavyayavirahāt pariniṣpannamityarthaḥ / pariniṣpanno hi svabhāvo dharmāṇāṃ kalpitābhāvalakṣaṇaḥ / anutpādavyayāvapi dharmāṇāmabhāvalakṣaṇau / tata ekarasatvādeṣāṃ trayāṇāmadvayībhāva iti bhāvaḥ / iti prāptiniryāṇam //

sarvākārajñātāniryāṇamidānīṃ vaktavyam / tatrādau catvāro dharmā upaparīkṣaṇīyāḥ / katamo bodhisattvaḥ katamā sarvākārajñatā katamā prajñāpāramitā katamā upaparīkṣaṇeti / tatra bodhireva sattvastenocyate bodhisattvaḥ / tayā bodhyā yatsarvadharmāṇāṃ sarvākārajñānaṃ nirabhiniveśaṃ sā tatra sarvākārajñatā / āratā āramitā / grasitaskabhitādivacchāndasa ihāgamaḥ / vikalpādyaḥ (dye)pāntīti pāḥ / vikalpapratipakṣā dharmāḥ / tebhyo 'pyāratā viratā yā prajñā seha prajñāpāramitā / yatsarvadharmānnityasukhātmaśāntaśūnyanimittapraṇihitaviviktānāṃ pratyekaṃ tadviparītānāṃ ca ṣoḍaṣānāmārāṇāṃ pratiṣedhena vyupaparīkṣate / tadatropaparīkṣaṇaṃ mahatyorbhagavatyoruktam / tatrordhvamadharamupaparīkṣaṇaṃ tayoruktam / tadevāsyāṃ darśayitumāha / evaṃ bhagavannityataḥ prabhṛti atha khalvāyuṣmān ityataḥ prāk / arthaḥ pūrvavat / atha khalvāyuṣmānityadi / tena hīti yenādvayasyaiṣā gaṇānā kṛtā / advayaśca dharmadhātuḥ / tena kāraṇena bodhisattvopyanutpādaḥ / utpādavirahāddharmadhāturityarthaḥ / paratantrastu svabhāvo neha gaṇyate / tasya paramārthatvāt / paramārthasya nehādhikārāt / kotra doṣa iti cedāha / yadi cet ityādi / duṣkarasya karmaṇaścārikā caraṇam / tāṃ kiṃ kasmāccarati? prayogavīryeṇa / āsṭāṃ prayogavīryam / yāni duḥkhāni karacaraṇaśiraḥ śarīradānāni satvānāṃ kṛtaśaḥ sattvānāmarthāya tāni vā pratyanubhavituṃ kasmādutsaheta / saṃnāhavīryeṇāpi tadā duṣkaracārikāṃ na carenna vādyavaset / tathā hi kāraṇaparatantratvenāparamārthatvāt / aparamārthasya cānabhyasanīyatvāt / viśeṣato duṣkarasyeti codyam / evamukta ityādinā subhūteḥpariṣkārāḥ / tatrānabhyupagamena prathamo nāhamityādinā / yo hi duṣkaracārikāmicchati tasya sā na syādityaniṣṭāpādanaṃ doṣaḥ syāt / na hīti / kuto necchasīti cet / duṣkarasaṃjñayā duṣkaraṃ carato vipratisāriṇaḥ samyaksambodhervyāvṛttiprasaṅgāt / nāpītyādinā dvitīyaḥ parihāraḥ / na bhavatīti na niṣpadyata ityarthaḥ / api tu ityādinā tṛtīyaḥ / (RSt_17) punaraparamityādinā caturthaḥ / yathā ātmetyādi / sarvaduḥkhāni sarvasāśravāḥ pañcaskandhāḥ / tebhyaḥ sarvebhyaḥ parimocayitavyāḥ / sarveṇeti dhātugatiyonyādibhedena / sarveṇa sarvamiti sarva yathā bhavati tisṛbhirduḥkhātābhiḥ / sarvatheti sarvavyavasāyaiḥ sarvamiti niravaśeṣaṃ mocayitavyāḥ / duḥkhaskandhāditi duḥkharāśeḥ / cittapradoṣaḥ pratighaḥ / yathā ātmā na vidyate sarveṇeti ātmasattvajīvapoṣapuruṣādibhedena / sarveṇa sarva yathā bhavati dṛśyādṛśyabhedāt / sarvatheti skandhadhātvādibhyo bhedena / abhedena ca / kathamabhedena sarvaṃ yathā bhavati? prativargaṃ samastebhyo vyastebhyaśca yathā ātmā tathā sarvadharmā na vidyante / sarveṇeti skandhadhātvādivargabhedena sarveṇa sarva yathā bhavati / vargāṇāṃ paripūrṇāvayavatvāt / punaḥsarva yathā bhavati prativarga te sarva ityarthaḥ / sarvatheti / sarveṣu prabhedeṣu ātmani pareṣu ca samastavyasteṣvityarthaḥ / tadevaṃ duṣkaracārikācaraṇā bhāvaprasaṅga(ṅgāḥ) catvāra uktāḥ / caturthena parihāreṇaitadapi sūcitam / duṣkaracārikāyā apyanutpāda eva tattvaṃ tadeva tattvaṃ paśyatā sā caritavyā yatāsau śaktā ca bhavenmahāphalā ca / anutpāde sarvaduḥkhānāmapratibhāsanāt tattvadarśanācca / sarvākārasarvadharmavikalpaprabiṣedhāya hetuḥ sthaviro yadapyāyuṣmān ityetadārabhya sannihitādevamuktaḥśabdāt prāk / atra sarvajñatāpīti sarvākārajñatāpi buddhopītyarthaḥ / tataḥ prāptivikalpapratiṣedhārthamāha / evamukta ityata ārabhya atyaṃtaṃ pratibhātīti yāvat / sarvajñateti sarvākārajñatā anuprāptaiva bhavatītyādita eva sarveṣāṃ dharmadhātumātratvāt dharmadhātośca prakṛtyaiva sarvathā viśuddhatvāditi bhāvaḥ / evamukta ityādinā subhūteruttaram / anutpannasya dharmasyeti bodhisattvākhyasya dharmadhātoḥ / prāptimiti prāptatvaṃ / nāhamicchāmi nāpyabhisamayamiti nāpi prāptābhisamayam / yadihīccheyaṃ tadānutpādamicchato me prāptiḥ prasajyeta / naiva tvicchāmīti na yuktaḥ prāptiprasaṅgaḥ / yuktimapyāha nāpītyādinā / sarva eva dharmo 'nutpāda ityasmin pakṣe hyeṣaḥ prasaṅgaḥ / tatra anutpannena bodhisattvena anutpannā sarvākārajñatā nāpi prāpyate / ayuktatvāditi bhāvaḥ / ubhayoraṇā[nā]dimattvena prāptyayogāt / āheti śāriputra āha / kiṃ punarityādi / yastūbhayoranutpannatve prāptirayuktā / tatkimanyatarotpattau yuktetyarthaḥ / āheti subhūtiranyatarotpattipakṣaṃ vimocayitumāha kiṃ punarityādi / evakāro bhinnakramatvādantaṃ netavyaḥ / anutpanno dharmaḥ (RSt_18) paścādutpanno vā syāt paścādanutpanna eva vā / tatra dvītīyavikalpe kathamanyatarotpatiḥ? ādye tu vikalpe dharmadhātorutpattivirodha iti bhāvaḥ / tasmādubhayoranutpādāt sādhūktaṃ nāpyanutpannena dharmeṇānutpannā prāptiḥ prāpyata iti yuktaḥ prāptivikalpapratiṣedhaḥ / tasmātsarvadharmāṇāṃ paramārtho dharmadhātuḥ / sa ca prakṛtiprabhāsvaratvādanādinidhanatvācca na prāpyate nāpi prāpnoti, kevalaṃ draṣṭavyaḥ / yattasya darśanaṃ saiva kalpitānāṃ sarvadharmāṇāmanupalabdhiḥ / saiva niratiśayā prajñāpāramitā / tayā parikalpitadharmābhiniveśakṣayāttadabhiniveśahetukāḥ sarvāvaraṇasaṃgrāhiṇaḥ sarvābhūtaparikalpāḥ paratantrākhyāḥ kriyante / pūrveṣāṃ svarasanirodhāt / kāraṇābhāvena pareṣāmanutpādāt / tataḥ prakṛtiprabhāsvaropi bodhisattvākhyo dharmadhāturāgantukairāvaraṇamalairmalinīkṛtaḥ / tena teṣāṃ kṣaye sati tatra kṣayalakṣaṇā viśuddhirapūrvatvāt prāpyate / tadyathā prakṛtyā viśuddhamākāśamāgantukaistuhinarajastamo 'bhradhūmādibhirāvaraṇairmalinīkriyate / paścāttadapāye [kṣaya?]lakṣaṇā viśuddhistena prāpyate / sarvavibhramanivṛttau ca suviśuddhasarvadharmadharmatājñānalakṣaṇā sarvākārajñatā yāpūrvatvāvdodhisattvena labhyate / saiva tasyā viśuddherātmabhūtāyāḥ saṃvedanāprāptyabhisamayaḥ saṃpadyata iti siddhāntaḥ /

tatredānīmāgantukāvaraṇaviśuddhiḥ sthavirābhyāṃ vaktavyā / tāṃ śāriputra ārabhate / āheti śāriputra āha / kiṃ punarityādi / utpadyata ityutpādaḥ / para[ta]ntraḥ svabhāvaḥ / kiṃ punaḥ paścādanutpādaḥ? kāraṇābhāvādanutpatterityeka pakṣaḥ / utāho 'nutpādaḥ? sarvākārajñatā teṣāṃ dharmaḥ / pūrvamanutpannatvādyaḥ paścādutpadyata iti dvitīyapakṣaḥ / tatrādye pakṣe anutpannāyāḥ sarvākārajñatāyāḥ kutaḥ prāptiḥ? dvitīyapakṣe sarvākārajñatāyāḥ kāraṇaṃ vaktavyam / abhūtaparikalpaśca śāśvato bhavet kṣayābhāvāditi bhāvaḥ / subhūtirāheti parihāramāha / utpāda utpattiḥ dharmaḥ sarvākārajñatāyāḥ / anutpādo 'nutpattiḥ dharmo 'bhūtaparikalpasyeti ya eṣa bhedaḥ / nāsau pratibhāti jalpituṃ na rocate vaktum / sarvadharmaśūnyatālambane cittasantāne yaiva sarvabhrāntīnāṃ nivṛttiḥ saiva sarvākārajñatāyā utpattiḥ / ato 'syā na kāraṇaṃ vaktavyam / nāpyabhūtaparikalpaḥ śāśvato bhavatīti bhāvaḥ / śāriputra āheti / jalpavikalpapratiṣedhāyāha / anutpādopītyādi / anutpādaḥ pramāna(ṇā)siddhatvātpratibhātyeva rocata eva vaktum / kuto na pratibhātīti kāṅkṣā praśnaḥ / āheti subhūtiruttaramāha / anutpāda evetyādi / jalpa iti mānasaḥ śabdaḥ / pratibhātīti jalpābhidheyaṃ vastu / pratibhānamiti sajalpā buddhiḥ / trayametadanutpāda eva sarvākārajñatāyāṃ dharmatāśarīreṇaiva (RSt_19) sarvadharmāṇāṃ tasyāṃ pratibhāsāditi bhāvaḥ / evameva atyantaṃ pratibhātītyupasaṃhāraḥ / iti sarvākārajñatāniryāṇam //

evamukta ityādinā śāriputraḥ prakṛtameva subhūtervacanaṃ praśaṃsanmārganiryāṇaprastāvanāṃ karoti / sthāpayitavyo niḥsaṃśayaṃ gaṇayitavyaḥ / yato yata eveti yatra yatraiva sthāne niḥsarati uttarati na calati na bhraśyati na vi[ro]dhayati na vyākulayati / evamukta iti / evaṃ prastāvanāyāṃ kṛtāyāṃ etad iti mārganiryāṇe / aniśritā anabhiniviṣṭā dharmā yaistathoktāḥ / na vyativartanta iti na bhrasya(śya)nti / evamukta iti sarvadharmāniśritatāyāmuktayām / atreti anantaroktā sarvadharmāniśritā cāsau paramatvātpāramitā ca / katameti ṣaṇṇāṃ pāramitānāṃ madhye katamā / sārvayānikī yānatrayasādhāraṇī / yaścaiṣā prajñāpāramitaiva / na taharyasyetyata āha / sarvadharmetyādi sugamam / iti hīti yata evaṃ tasmāt / avalīnatvaṃ viṣādaḥ kāṃkṣāyitatvaṃ saṃśayālutā / dandhāyitatvamapratipattiḥ / anyathātvaṃ parāṅmukhībhāvaḥ manasikāreṇeti nirvikalpena manasā / kathamāyuṣmannityādi vikalpakaṃ manasikāraṃ matvā śāriputrasyāyaṃ praśno manasikāreṇa viharantīti yāvat /

tata ūrdhvaṃ evamukta ityādinā subhūteḥ sādhukārapūrvakaṃ vacanam / tatra vistareṇa codyakaraṇāt sādhukāraḥ / api tvityādinā parihāraḥ / artha eveti / asmadiṣṭameva / icchālakṣaṇatvādarthasya / bhūtapadābhidhāneneti vikalpamanasikārasya viparyayo bhūtapadaṃ bhūtaṃ vastu / tasyābhidhānena savistareṇa / aniṣṭāpādanaṃ hi / codyam / neṣṭābhidhānamityupālambhaḥ / yuktitaśceyamicchati darśayituṃ svayameva pṛcchati / tatkasyetyādi / tabhdū tapadaṃ kutaḥ? sattva ātmā sa iha dṛṣṭāntaḥ / manasikāro vikalpaḥ / sa dārṣṭāntikaḥ / asvabhāvatādirvaiditavyeti sādhāraṇaṃ hetukaṃ netavyaḥ / tatra asvabhāvatā svalakṣaṇaśūnyatā / lakṣaṇamanayorgrāhakatvam / ataśca yathā ātmano 'svabhāvatā tathā manasikārasyāpi / grāhakatvāyogāditi hetuḥ / śeṣeṣu asvabhāvatvāditi hetuḥ / sabhdāvo bhāvatvaṃ tadviraho 'sadbhāvatā / viviktatā abhāvatā acintyatā tadīyacintāyāṃ nirviṣayatvāt / anabhisaṃbodhanatā samyagjñānāviṣayata / ayathābhūtārthatvena mithyāvastutvenā bhisaṃbodhanaṃ saṃyagjñānamasyeti ayathābhutārthābhisaṃbodhanatā / aneneti (RSt_20) yathoktena / evaṃrūpeṇeti bhūtārthapratyavekṣakeṇa / vihāreṇeti śamatharūpeṇa / itiśabdaḥ parivartaparisamāptyarthaḥ //

sarvākārajñatāyāṃ caryā caraṇam / cittotpādādayo daśārthāḥ / taddyotakaḥ parivartastatparivartaḥ //

[āryāṣṭasāhasrikāyāḥ prajñāpāramitāyāḥ] sāratamānāmni pañjikāyāṃ ratnākaraśāntiviracitāyāṃ prathamaḥ parivartaḥ //

2. śakraparivarto nāma dvitīyaḥ /

uktā sarvākārajñatā / itaḥ prabhṛti mārgajñatā vaktavyā / tasyāmekādaśavastūni / yataḥ śāstram-

'dhyāmīkaraṇatādi' śrāvakamārgaḥ / 'mahānuśaṃso ' bodhisattvasya darśanamārgaḥ / bhāvanāmārgasya 'kāritram' / 'adhimukti'manaskāraḥ / 'stutastobhitasaṃ(śaṃ)sitāḥ' / 'pariṇāmanā'manaskāraḥ / 'anumodanā'manaskāraḥ / 'abhinirhāraḥ' / 'atyantaśuddhiśce 'ti / ekādaśavastūni 'mārgajñatā' sā ca 'bodhisattvānāṃ' ityarthaḥ /

asyāṃ 'yogyatāṃ' cittotpādaḥ dvitīyo (prathamo)'rthaḥ / 'tāṃ prati' tadartham / 'dhyāmīkaraṇatā' mandacchāyīkaraṇaṃ 'devānām' / 'bhābhiḥ' iti bhagavataḥ prakṛtiprabhayā sā dvitīyo 'rthaḥ / 'viṣayo niyataḥ' iti / tasyā eva viṣayapratiniyamastṛtīyo 'rthaḥ / viṣaya'vyāpti'ścaturthaḥ / 'svabhāvaḥ' pañcamaḥ / 'kāritraṃ' ṣaṣṭhaḥ / yadyamī ṣaḍarthāḥ kathametadekaṃ vastu? iha mārgajñatāyā mūlaṃ cittotpādaḥ / tada(d) rahitānāṃ tasyāmayogyatvāt / ata evāsau yogyatocyate / tata evāsau pradhānam / śeṣastasyāḥ paricchedaḥ / pradhānena ca vyapadeśādekavastūcyate /

tatra dhyāmīkaraṇatāmadhikṛtyāha / tena khalu punarityādi / tena samayeneti tasmin kāle / vivakṣātaḥ kārakāṇi bhavantīti karaṇatvam / khalu śabdo vākyālaṅkāre / punaḥ śabdo viśeṣārthaḥ / abhisamayabhedo viśeṣaḥ / sannipatitaḥ samāgamāt / sanniṣaṇṇo niṣadanāt / trayastriṃśānāṃ kāyo nikāyaḥ / tasmin bhavā iti ṭhal / catvāro mahārājā vaiśravaṇadhṛtarāṣṭravirūḍhakavirūpākṣā caturādiṣu dikṣu / teṣāṃ kāyaḥ / tasmin bhavāḥ / eṣa eva trisāhasro lokadhātuḥ sahā / tasyāḥ patiḥ / brahmaṇaḥ kāyastasmin bhavāḥ / iha tūttarapadavṛddhiḥ / caturthasya dhyānasyāśrayaṃ ca śuddhāvāsāḥ / avṛhā atapāḥ sudṛśāḥ sudarśanā akaniṣṭhāśceti / kutaḥ śuddhāvāsāḥ? āryāṇāmeva teṣūtpādāt / teṣāṃ pañcānāṃ nikāyānāṃ pañcaiva sahastrāṇi / etāvanta eta rūpiṇo devanikāyā yathodhvamutkṛṣṭāḥ prabhāprabhāvādibhiḥ / yopītyādi / tepi sanniṣaṇṇāḥ / yopi teṣāṃ avabhāsaḥ sopyabhibhūto dhyāmīkṛto 'bhūt / samakālameveti yopisopi śabdārthaḥ / yogyatā hi cittotpādastadartha dhyāmīkaraṇam / sarvābhibhūrbhagavāniti viditvā tabhdāve spṛhotpādanāt / avabhāsaḥ prabhā / svakarmaṇo vipaktirvipākaḥ / tasmājjātaḥ sahajo nābhisaṃskārika ityarthaḥ / kena kāraṇenābhibhūtaḥ? buddhādhiṣṭhānena buddhasannidhānena / kena kartrā? buddhatejasā buddhasya bhagavataḥ prakṛtiprabhayā / nanu tepi mahānubhāvāḥ kasmānna praticakrurityata āha buddhānubhāveneti / buddhānubhāvena sarvānubhāvaḥ pratihanyataḥ iti bhāvaḥ / dhyāmīkaraṇatā //

atha khalvityādi / antikāditi sakāśāt / prajñāpāramitāmiti bodhisatvānāṃ mahāsatvānāmityanena sambandhaḥ / mārgajñatāmityarthaḥ / (RSt_22) upadiśyata iti upadeśaḥ / tasyā evārthasyāvagamāya vādo 'vavādaḥ tadanubandhāya śāsanī tatsahitā seti samāsaḥ /

sthātavyaṃ śrutamayyā prajñayā / śikṣitavyaṃ cintāmayyā / yogamāpattavyaṃ bhāvanāmayyā /

ānubhāvādayaḥ prabhāvaparyāyāḥ / tadānubhavenetyuddeśaḥ / itarābhyāṃ nirdeśaḥ / tejaseti pratibhānaśakte rodhāya / kena prabhāvena? adhiṣṭhāneneti prabodhakena / iyatā granthena yogyatāyāḥ prastāvanāṃ kṛtāyāṃ tāmāha / yairityādinā utpāditavyāntena iti yogyatā //

yetvityādi / hīnamārgalabhyaṃ nirvāṇaṃ samyaktvam tasmin niyamaḥ samyaktvaniyāmaḥ / taṃ avakrāntāḥ prāptāḥ / baddhasīmāno baddhasetavaḥ / tadyathā śrotaāpannasaptaktabhdavaparamaḥ / dvitrijanmā kulaṃkulaḥ / anuttarā (ra)samyaksaṃbodhinimittaṃ yat punaḥ punaḥ saṃsaraṇaṃ tasmai cittamutpādāyatumabhavyāḥ / iti śamaikayānaiḥ śrāvakairuttamabodheḥ kadācidapyakāmanādyogyatāyā viṣayapratiniyamaḥ //

api tvityādi utpādayerannityetadantena vyāptiḥ / śrāvakairapi bodhipariṇatikaiḥ samyaksambodhau cittasyotpādanāt / te hi svāṃ bodhimadhigamyāpi buddhabodhisattvānāṃ lokottarāṃ vibhūtiṃ dṛṣṭvā vañcitamivātmānaṃ manyamānāstathāgatairadhiṣṭhitāstadvodhau cittamutpādyācalyabhūmikabodhisattvavannirmitābhirupapattibhirbodhicaryāṃ caritvā parāṃ bodhimadhigacchantīti vyāptiḥ //

nāhaṃ kuśalamūlasyāntarāyaṃ karomīti / svabhāvaḥ kuśalarāśiḥ / sarvakuśaladharmasaṃgrāhakatvāccittotpādasyeti kuśalapakṣatvaṃ yogyatāyāḥ svabhāvaḥ / viśiṣṭebhyo hi dharmebhyo viśiṣṭatamā dharmā adhyālambitavyā iti kāritram / viśiṣṭebhya iti bodhicittasaṃgṛhītebhyaḥ / hetau pañcamā / viśiṣṭatamā dharmā iti mahāyānasaṃgṛhītāḥ phalahetubhūtāḥ / adhyālambitavyā iti prāptavyāḥ / tasmānnāntarāyaṃ karomīti śabdārthaḥ / iti dvividhamahāyānaprāpaṇaṃ bodhicittasya kāritram //

tadevaṃ kecidvodhicittotpādanārthamutsāhitāḥ purvamutpāditabodhicittāstu saṃpraharṣitāḥ / evamutpāditabodhicittvatvādubhayepi te bodhisattvā (RSt_23) mahāsattvāḥ santo mārgajñatāyāmutsāhitāḥ / ata āha / atha khalvityādi / sādhustvamiti mahataḥ parārthasya karaṇāt / bhagavataḥ kṛtajñairit / yathā pūrvaṃ jinaputrasya bhagavatastacchrāvakairbahukṛtaṃ tathāsmābhirbhagavataḥ śrāvakairbhagavatputrāṇāṃ bodhisattvānāṃ bahukartavyamiti kṛtajñatārthaḥ / tatkasya hetoriti / tatkṛtajñatvaṃ kena prakāreṇa? pūrvakā eva paurvakāḥ / brahma nirvāṇaṃ tasmai caraṇaṃ brahmacaryam / taccaraṇaṃ bodhāyeti bodhaye / bodhicaryāṃ caratīti yāvat / yairiti vibhaktipratirūpako nipāto yathārthaḥ avodita iti samprasāraṇam / vada vyaktāyāṃ vācityasya yajāditvāt / avavadita iti kvacitpāṭhaḥ / tatra vada sthairya ityayaṃ dhāturanekārthatvāt / anuparigrahītavyā ityavavaditavyāḥ / anuparivārayitavyā iti anuśāsitavyāḥ / uttarayoḥ padayoḥ saṃśabdaḥ samyagarthaḥ / asmābhirapīti śrāvakairapi / ātmasa [jā]tīyeṣvapyātmavyavahārāt / sādhu cetyavahitaśrotratayā / suṣṭhu cetyavahitamanaskatayā / manasikurviti cintābhāvanābhyām / prajñāpāramitāyāṃ sthātavyamiti mārgajñatāyāṃ veditavyam /

tatrādau śrāvakamārgaḥ / tatra darśanamārgamadhikṛtyāha / śūnyatāyāmityādi / aviparītatvāccatvāri satyāni / āryāṇāṃ satyatvena pratibhānti na bālānāṃ tasmāttānyevāryasatyāni / duḥkha samudayo nirodho mārgaśca / tatra duḥkhaṃ saṃsāriṇaḥ skandhāḥ / duḥkhahetuḥ samadayaḥ / duḥkhakṣayo nirodhaḥ / tatprāpakaṃ jñānaṃ mārgaḥ / eṣāṃ caturṇāmāryasatyānāṃ ya ākārāsteṣāṃ śūnyatāyāṃ tiṣṭhatā śūnyatāṃ paśyatā prajñāpāramitāyāmiti śrāvakīye darśanamārge sthātavyaṃ samāhitena cetasā / śūnyatādarśanaṃ cānupalambha eva / tataḥ śāstram-

śrāvakapiṭake ca satyanāṃ ṣoḍaśākārāḥ paṭhayante / duḥkhamanityato duḥkhato 'nātmataḥ śūnyataśca parijñeyam / samadayo hetutaḥ samudayataḥ prabhavataḥ pratyayataśca / nirodho nirodhataḥ śāntataḥ praṇītato niḥśa(sa)raṇataśca / mārgo mārgato nyāyataḥ pratipattito niryāṇikataśceti // amī neha gṛhyante / ye tu mahatyorbhagavatyoḥ paṭhitāsta iha gṛhyante / pratyāsatteḥ śrāvakabodheśca lāghaveneti (RSt_24) prāpaṇāt / tatra duḥkhaṃ caturbhirākārairmanasikaroti pūrvavat / anityato duḥkhato 'nātmataḥ śāntataśca yathākramamudayavyayayogitvāt pratikūlatvāt ātmavilakṣaṇatvāt / ātmaśūnyatvācca / ātmaśūnyo hi śāntaḥ / tadyathā kuṇapaḥ / samudayamekādaśabhirākāraiḥ / tatra caturbhirākāraiḥ prahāṇārhattvajñāpanārtham / rogato gaṇḍataḥ śalyato 'ghataśca duḥkhahetutvāddaḥkhotkarṣahetutvāduruddharatvāt / aihikāmatrikaduḥkhahetutvena pāpasādharmyācca / punaścaturbhiḥ śa(sa)kya(tya)tvaparijñāpanārtham / parataḥ pralobhadharmataścalataḥ prabhaḍgurataśca / ātmā hi hātumaśakto 'yaṃ tu paraḥ / pratikṣaṇavināśitvāt / pralopadharmā ca / arhabhdirunmūlitatvāt / calaśca prakṛtena mārgeṇa bhaṅgitvāt prabhaṅguraśca / ātaptakāritārtha punastribhiḥ / bhayata upadravata upasargataśca / aśanipātādivabhdayahetutvāt / bhūtarākṣasādisādharmyāt durbhikṣaparacakrādisādharmyācceti / pratilomaḥ pratītyasamutpādo avidyānirodhāt saṃskāranirodha ityata ārabhya evamasya kevalasya mahato duḥkhaskandhasya nirodho bhavatīti yāvat / tatra niruddhirnirodha iti nirodhasatyam / nirudhyate 'neneti nirodho mārgasatyaṃ saptabhirākāraiḥ / anātmataḥ śāntato viviktataḥ śūnyata ānimittataḥ apraṇihitato 'nabhisaṃskārataśca / ātmā hi yogino duḥkhātmanaḥ skandhāḥ / ato duḥkhābhāvādanātmā kleśopaśamācchāntaḥ / duḥkhakleśāvaśucī tayorūpaśamādviviktaḥ / śūcirityarthaḥ / ātmātmīyavirahācchūnyaḥ / sarvasaṃskṛtanimittābhāvādānimittaḥ / traidhātuke praṇidhānaṃ praṇihitam / tat kṣayādapraṇihitaḥ / āyatyāṃ karmābhisaṃskārābhāvādanabhisaṃskāraḥ / mārgasatyamapyebhireva saptabhirākāraiḥ / nirodhaprāpako hi mārgaḥ / tato 'nātmaśāntaviviktādiprāpakatvānmārgopyanātmā śānto viviktaḥ śūnya ānimitto 'praṇihito 'nabhisaṃskāraśca / evamekonatriṃśadākāra iha śrāvakamārga āsu tabdodhiprāpaṇāt / sa caiṣāmākārāṇāmanupalambhena mārgajñatāyāṃ praviśati /

tena hītyādi / yena hīnamārgaṃ bhāvayato bodhisattvasyānupāyakuśalasya hīnabodhau pāta āśaṃkyate / tena hi kāraṇenāsyāṃ mārgajñatāyāṃ mahāsannāho mahadupāyakauśalam / sannaddhena taddharmitena bhavitavyamātmarakṣārtham / tatrāyaṃ mahān sannāho yaduta sarvākārajñatāpratisaṃyuktairmanasikārairbhāvanā karttavyā / vyutthitena ca sarvaṃ tatkuśalamūlamanuttarāyāṃ samyaksaṃbodhau pariṇāmayitavyam / taccānupalambhayogeneti / iti śrāvakāṇāṃ darśanamārgaḥ //

ita ūrdhvaṃ nirodhabhāgīyāni / na rūpe sthātavyamityetadārabhyānena manasikāreṇeti yāvat / tatra na buddhatve sthātavyamityetadante ūṣmā / tata ūrdhva iti hi buddhatvamiti na sthātavyamityetadantena mūrdhā / tato vijñānaṃ śūnyamupalabhyate vetyetadantena kṣānti / śeṣāṇyagradharmaḥ / tatra rūpādiṣvasthānama [na] bhiniveśa ūṣmā / rūpādīnāmidantayā svalakṣaṇānupalambho mūrdhā / rūpādīnāṃ dvayānupalambhaḥ kṣāntiḥ / śūnyaṃ ityanupalambha upalabhyata iti upalambhaḥ / tasmāt śūnyamupalabhyatevetyapi dvayam / śrotaāpattiphalādīnāṃ viśeṣeṣvasthānamagradharmaḥ / tasmādasyāṃ bhagavatyāmanyathaiva śāstrapāṭha unneyaḥ-

atra na cakṣuḥ saṃsparśe sthātavyamiti / indriyaviṣayavijñānasannipāte sati yaḥ sukhādivedanotpattyanukūlasyendriyavikārasya paricchedakaḥ sādṛśyamātreṇa sa sukhādivedanājanakaḥcaitasikaḥ sparśa ityucyate / indriyavikāraṃ sādṛśyena spṛśatīti kṛtvā / ata indriyabhedāccakṣuḥsaṃsparśo yāvanmanaḥsaṃsparśaḥ / ukta cābhidharme "trikasannipāte idriyavikāraparicchedaḥ sparśaḥ vedanotpattisanniśrayadānakarmakaḥ" iti / śubhaṃ śuci aśubhamaśuci / asaṃskṛtaprabhāvitaṃ kleśāvidyākṣayasyāsaṃskṛtatvāt / imaṃ lokamitikāmadhātum / tatraiveti akāmini loke / ihaivetyasminneva janmani / anupadhiśeṣa iti upadhayaḥ skandhāḥ / ta eva śeṣāḥ sopadhiṣeśe tadviparyayādanupadhiśeṣaḥ / buddhaparinirvāṇeti / saṃsāranirvāṇayorapratiṣṭhitena / yathākramaṃ sarveṣāṃ kleśikadharmaparikṣayāt, anāśravāṇāṃ ca dharmāṇāmanantānāṃ jagadarthāya yāvadākāśamavasthānāt / na ca tato vyutthita iti prāptāparihāṇitaḥ / na sthito nāsthita ityapratiṣṭhitamānasattvādavyutthānācca / na viṣṭhito naviṣṭhita iti pravāhayogena pūrvavat / śeṣaṃ subodhamityagradharmaḥ / ityuktāni śrāvakamārganirvedhabhāgīyāni //

buddhānubhāvāt khaṅgamārgaprastāvanāya keṣāñciddevaputrāṇāṃ vitarko 'bhūt tamāha / atha khalu tatretyādinā / keṣāñciditi ye śrāvakamārgamapi subhūtinā deśyamānaṃ gaṃbhīraṃ menire / kathaṃ yakṣāṇām? tairuccāraṇāt / kathaṃ yakṣarutādīni? tabhdāṣātvāt / tatra rutānītyuddeśaḥ / śeṣeṇa nirdeśaḥ / mantritāni vākyāni / pravyāhṛtāni vākyasamūhāḥ / bhāṣate padavākyaiḥ / pravyāharati vākyasamūhaiḥ / deśayatītyavavadatī / upadiśatītyanuśāsti / atha khalvāyuṣmānityādi / idamitilabdhāvasaratvāduddiṣṭaṃ khaṅgajñānam parāmṛṣati / na vijñāyate na vijñāyata iti dvirvacanamavadhāraṇārtham / parato na vijñāyate eva caramabhavakhaṅgaiḥkhaṅgajñānam / paropadeśasya teṣu vaiyarthyāt / yataḥ svayaṃbhūtvena teṣāṃ svayameva tatsaṃmukhībhavatīti paropadeśavaiyarthyam //

tathāhīti / īdṛśyeva hi dharmatā dharmāṇām / kīdṛśītyāha nātretyādi / atreti skandhadhātvāyatanādau / na kiñciditi na kaściddharmaḥ sūcyata iti deśyate / śrūyate śrotrā niḥśvabhāvatvātsarvadharmāṇām / tadyathā nirmitabuddhena nirmitānāṃ pariṣadāṃ dharma deśyamāne na kiñciddeśyate na kaściddeśayitā na kaścicchroteti / atha khalu tesāmityādi / uttānamagambhīraharṣādvivecanam / itītyevamasmābhirvitarkite / anāryāṇāmagocaratvena dūrāt / niṣprapañcatvena sūkṣmāt / dukhagāhatvena gambhīrācchrāva (ka) mārgā dūrataraṃ sūkṣmataraṃ gambhīrataraṃ jñānam / praviśati cetasā / deśayati granthataḥ / bhāṣate arthataḥ / tathā hi nātretyādinā / iti jñānagambhīratā / ataḥ śāstram-

atha khalvāyuṣmāniti / nemāṃkṣāntimanāgamyeti / tathāhi nātretyādinoktam / grāhyābhāvajñānaṃ nāprāpya prāpyaivetyarthaḥ / ataśca śrāvakairapi tajjñānaṃ tathāgatairapyupādeyaṃ sutarāṃ khaṅgairadhigantavyāmiti bhāvaḥ / iti khaṅgānāṃ grāhyavikalpaprahāṇam //

atha khalu punarapītyādi / mantrādibalena pratibhāsamāno mithyāpuruṣo māyā / ṛddhisandarśito nirmitaḥ / tābhyāṃ sadṛśāḥ / māyopamāste sattvā na māyeti / mithyātvameva māyātvaṃ manyante / subhūtistu manyate mithyāviśeṣo māyā ca svapnaṃ ca tābhyāṃ sādṛśyaṃ mithyātvameva / tasmānmāyā ca sattvāścetyadvayaṃ mithyātvena nirviśeṣatvāditi / tadevaṃ māyāpuruṣavat puruṣadravyāṇāmasattvamuktam / sarvadharmā apīti / puruṣadharmā api sarve māyopamāḥ / asati puruṣadravye taddharmāṇāmapyabhāvāt / atha khalvāyuṣmān śāriputra ityādi nāsyā āyuṣmanta ityādinā na kaścitpratyeṣako bhaviṣyatyetadantena sthavirasubhūtirdhārmaśravaṇikavat pratyeṣakānāmapyabhāvamāha / pratīkṣantīti pratyeṣakāḥ / teṣāmabhāvaḥ pratyeṣakapuruṣadravyābhāvāt / sūcyata ityasphuṭaṃ bhāṣyate / paridīpyata iti sphuṭam / prajñapyata iti vaktṛśrotṛbhirvyavahriyate / tasmātsarvathā na santi puruṣadravyāṇi / kevalamadhyātmikeṣu ca skandhādiṣu puruṣaprajñaptiḥ / tataḥ puruṣaprajñaptyāśraye skandhādau grāhaka grāhameṣāmastīti khaṅgānāṃ grāhakavikalpāprahāṇam /

atha khalu śakrasyetyādinā na tat puṣpamityetadantena khaṅgānāṃ gotramucyate / atra dharmaparyāyo dharmaprabhedaḥ / khaṅgamārgaḥ / yannuśabdo / vākyālaṅkāre / subhūtimiti / dharmabhāṇakapūjayā dharmapūjanāt / etaditivakṣyamānaṃ(ṇaṃ) vitarkitaṃ abhūt / śakramanu śakraṃ prati vyāharaṇāyeti vitarkaṃ viditvā bhāṣaṇāya / imānīti prakṛtāni / puṣpāṇītyamalatvena puṣpasādharmyāt khaḍgamārgasaṃgṛhītāni kuśalāni / deveṣu pracarantīti avacaranti na dṛṣṭāni, anāśravatvena dhātupatitatvābhāvāditi bhāvaḥ / abhyavakīrṇānīti pariṣadi nirmitapuṣpaiḥ sūcitāni / nirmitāni yathādarśanamasattvāt / kuta ityāha / naitānītyādi / manomayānītyupasaṃhāraḥ / manonirji(rmi) tānītyarthaḥ / śakrastu manomayatvamapi niṣeddhumāha / anirjātānīti / yathā hi grāhyatvādvṛkṣādayo na santīti na tebhyo nirjātāni tāni / tathā manopi nāsti grāhakatvāditi tatopyanirjātāni subhūtirāha / yatkauśikānirjātaṃ na tatpuṣpamiti yattayornityābhisambandhānna tatpuṣpaṃ na sa khaḍmārgaḥ syādityarthaḥ / evaṃ manyate / nirviśeṣaṃ jātaṃ nirjātam / ataḥ sajātīyaṃ kāryamāśritam / kāraṇamāśrayaḥ / khaḍgamārgaśca khaḍgāśritaḥ / na ca khaḍgasya saṃskṛto dharmo mārgasyāśrayo yujyate sāsravasya vijātīyatvāt / anāsravasyāpi saṃskṛtasyādimatvādādita eva nirāśrayasyānutpattiprasaṅgāt / tasmādanāsravatvena sajātīyaḥ khaḍgasya dharmadhātureva khaḍmārgasyāśraya ādhāraḥ pratiṣṭhāgotramiti khaḍgamārgasyādhāraḥ // ataḥ śāstram-

atha khaḍgānāṃ kathaṃ parārthakriyāṃ? icchāmātreṇa tatsiddheḥ / kathaṃ tebhyaḥ śravaṇam? sūśrūṣāmātreṇa / yataḥ śāstram-

'yasya yasya' vineyasya / 'yatra yatrārthe ' iti nirvedhabhāgīyeṣvāryamārge vā / 'yathā yathā' iti yena yenākāreṇa / atha khalu śakretyādi / dvitīyād atha khalu śakraśabdāt prāk nirvedhabhāgīyāni vaktavyāni / tatra buddhadharmeṣu śikṣata ityetadantena ūṣmā / nāmapadaiḥ prajñaptiḥ vyavahāraḥ / tān nirdiśati / na ca virodhayati tāṃ cottānīkaroti / tāmeva copadiśati / tathā hi prajñaptimātraṃ rūpaṃ prajñaptimātrameva dharmatetyupadiśati ityūṣmā /

yo 'prameyeṣvityādinā na parihāṇāyetyetadantena mūrdhā / kathaṃ na śikṣate, anupalambhāditi / iti mūrdhā / yo na rūpasya vivṛddhaya ityādinā atha khalvāyuṣmānityataḥ prāk kṣāntiḥ / atra rūpāderaparigrahayuktirmahatyorbhagavatyoruktā 'adhyātmaśūnyatāṃ yāvadabhāvasvabhāvaśūnyatāmupādāya' iti / iti kṣāntiḥ / atha khalvāyuṣmānityādinā atha khalu śakra ityataḥ prāgagradharmaḥ / evaṃ ceti buddhisthaṃ hetuḥ parāmṛśati / mahatyorbhagavatyorya uktaḥ tathā hi "na sa rūpasyotpādaṃ paśyati na nirodhaṃ nodgrahaṃ notsargaṃ na saṃkleśaṃ nāvadānaṃ na cayaṃ nāpacayaṃ no hānirna vṛddhim" ityagradharmāḥ / ataḥ śāstram-

ityuktaḥ pratyekabuddhamārgaḥ //

bodhisattvasya mārgo vaktavyaḥ / tamadhikṛtya śāstram-

iti saṃkṣepeṇa sūtrārthaḥ / dve kṣāntī dve ca jñāne pratisatyam / duḥkhe dharmajñānakṣāntirduḥkhe dharmajñānam / duḥkhe anvayajñānakṣāntirduḥkhe anvayajñānam / evaṃ samudayanirodhe mārge ca / ebhiḥ pratisatyaṃ caturvidhaiḥ kṣaṇairbodhisattvasya darśanamārgajñatāyāmucyate sahānusaṃ(śaṃ)syaiḥ / eṣāṃ tu kṣaṇānāṃ viśeṣalakṣaṇamadhikṛtya śāstre pañca ślokāḥ-

mārgajñatāyāṃ bodhisattvasya darśanamārgakṣaṇā ityarthaḥ /

imāṃ tu bhagavatīmadhikṛtyādyaṃ pādatrayamanyathā kartavyam / tatrādyaḥ kṣaṇaḥ pādadvayena-

rūpādito dhīrnānanyā na cānyā paramārthataḥ /

dhīḥ prajñāpāramitā sā rūpādibhyo nābhinnā lakṣaṇabhedāt / na ca bhinnā paramārthataḥ / tathā hi / yā prajñāpāramitā yadrūpādi yā rūpāditathatā yā ca gaveṣaṇā sarva ete dharmā na saṃyuktā na visaṃyuktā arūpiṇo 'nidarśanāpratighā ekalakṣaṇā yadutālakṣaṇāḥ, na saṃyuktā na visaṃyuktā iti / nābhinnāḥ na bhinnāḥ kalpitā nāmatvāt / bhedābhedayośca bhāvadharmatvāt / ata eva rūpaskandhābhāvādarūpiṇaḥ / cakṣurvijñānābhāvādanidarśanāḥ / svadeśe parasyotpatteravibandhanādapratighāḥ / bhedapratibhāsānāmastaṅgamādekalakṣaṇāḥ / yadutālakṣaṇā iti tathatāmātralakṣaṇāḥ / ata ādyasya kṣaṇasya prastāvanā / atha khalu śakra ityādinā tatkasya hetorityataḥ prāk / tata urdhvamādyakṣaṇa evamukta ityataḥ prāk / iti duḥkhe dharmajñānakṣāntiḥ /

caturṇāṃ kṣaṇānāṃ viśeṣalakṣaṇaṃ śāstreṇa-

[43a] tasyā [:] catuṣṭayaṃ yattu mahattā sāpramāṇatā / parimāṇāntatābhāvau rūpādeḥ

saha apramāṇatayā 'sā'pramāṇatā' / 'mahattā' apramāṇatā cetyarthaḥ / anta evāntatā / parimāṇaścāntatā / ca tayorabhāvau aparimāṇatā / anantatā cetyarthaḥ / 'tasyāḥ' iti prajñāpāramitāyāstanmahattādi 'catuṣṭayaṃ yat rūpādeḥ' iti sambandhaḥ / rūpādermahattvādinā tadālambanāyāḥ prajñāpāramitāyā mahattvādi / mahāpāramitā / apramāṇapāramitā / aparimāṇapāramitā / anantapāramitā cetyarthaḥ / etacca mahāpāramitāvijñānaṃ nirabhiniveśaṃ draṣṭavyam / evaṃ mahāpāramiteti kauśika nābhiniviśata ityādeḥ sūtrapāṭhāt / ata evamukte śakreṇa teṣāmuddeśaḥ / sthavira ityādikaḥ subhūtinā saślādhānuvādaḥ / tataḥ subhūtinaiva nirdeśaḥ tatkasyetyādi / tatra rūpādīnāṃ mahattā- amuṣmin kāle bhāvo 'muṣminnabhāvaḥ- ityevaṃ kālato 'paricchedāt tadālambanatvāttasya mahattvam / iti duḥkhe dharmajñānam //

ākāso(śo)pamena tathatāśarīreṇa pramāṇato 'paricchedādapramāṇateti / duḥkhe 'nvayajñānakṣāntiḥ //

saṃkhyayā aparicchedādaparimāṇateti duḥkhe 'nvayajñānam //

deśato 'paricchedādanantatā ārambaṇanantatayā ca / ārambaṇaṃ sarvadharmā na ca teṣāmantato(tā)'sti gaṇanātikrāntatvāt / api ca sarvadharmā anantā asattvena teṣāmutpādavināśāntayorabhāvāt / sattvā apyālambanamubhayanairātmyajñāne / te cānantāḥ / śakra āha / tatkathamanantā iti / subhūtirāha / na gaṇanā ayogena gaṇanābahutvena veti / na gaṇanātikrāntatvena / nāpyanantākhyayā saṃkhyayetyarthaḥ / kathaṃ tarhīti tarhi śabdo 'kṣamāyām / na dharmādhivacanamiti dharma ātmadravyaṃ na tasyādhivacanaṃ tasyābhāvāt / dharmatvena svārthābhidhānāt nādharmādhivacanam / prakṣiptamiti sūtraiḥ prayuktam / kutaḥ? yata āgaṃtukaṃ sati vicāre calatvāt / yato 'vastukaṃ ātmadravyābhāvāt / ātmasambandhādapyātmeti kiñciducyate / tadapi nāstyātmano 'tyantamasattvādityanātmīyam / athavā ātmaprajñaptiviṣayaḥ skandhādirātmīyastasyāpyabhāvādanātmīyam / athavā nāma saṃjñā tasyātmīyaḥ saṃjñī / tadabhāvādanātmīyam / ārambaṇaṃ viṣayastadabhāvāt ānārambaṇam / atreti śāstṛśāsane / (RSt_31) etaccāptavacanādapi nairātmyasiddhiṃ darśayitumāha / kā satvānantateti / gaṇanāti krāntatvena na kācitpramāṇasiddhepi nairātmyeāptavacanādapi nātmasiddhiriti darśayitumāha / sacetyādi / svareṇeti vacanena / anantasya lokasya vijñaptirarthajñāpano ghoṣaḥ śabdo 'syeti tathoktena / tathāpyatimāṃsalatvāt gambhīro nirghoṣastūryanirghoṣavadvicitraḥ śabdosyeti tathoktena / avitiṣṭhamāna iti aviśrāmyena / api nviti kinnu / ādiśuddhatvamādita evāsattvapariśuddhatvaṃ sarvatrāsattvam / anenāpi paryāyeṇa prakāreṇa / anantapāramiteyam / katamenetyata āha / evaṃ sattvānantayeti / satvānāmutpādanirodhāntavirahāt sattvānantatayeti / evaṃ cetyevameva / na gaṇānatikrāntatveneti samudaye dharmajñānakṣāntiḥ //

avadhāraṇam //

tasyāṃ sthitasya buddhatve,

'tasyāṃ' prajñāpāramitāyāṃ sthitāyāṃ yad 'buddhatve 'vadhāraṇaṃ' buddha eva sa dṛṣṭavya iti sa ṣaṣṭhaḥ kṣaṇaḥ / tasya prastāvanā / atha khalu sendrakā ityādinā / indra śakraḥ / brahmā sahāpatiḥ / prajāpatayaścatvāro lokapālāḥ / viśiṣṭa dharmaśravaṇapraharṣādaprayatnajaṃ vacanaṃ udānaṃ tat udānayanti sma / udīratavantaḥ / aho ityāścarye / dharma iti deśanādharmaḥ / punaḥ dharma iti dharmaprakāśito darśanamārgaḥ / tasyaiva dharmasya dharmatā prakṛtistathā gatotpādanam / ata evāhuḥ ya ityādi / prādurbhāva utpādo 'nāśravalakṣaṇaḥ sūcyate / tadvacanātkilādau pratīteḥ / tataḥ kramena(ṇa) sphuṭena sphuṭataraṃ sphuṭatamaṃ ca pratīteḥ / deśyate prakāśyate prabhāvyate ca / tathāgatamityādinā tameva ṣaṣṭhaṃ kṣaṇamāhuḥ / adyāgreṇeti / adya prabhṛti dhārayiṣyāmaḥ / avirahito prāptāparihāṇāt / vihariṣyati saṃmukhībhāvāt / tathāgataṃ tu svayamavadhārayiṣyāma iti yaduktaṃ tattathāgatatve niyatamaviśeṣalābhāt / tallābhe ca vyākaraṇam / tata āha yadāhamityādi / alpavayo hi śrotriyo māṇavaka ityucyate / tasyāmantraṇaṃmāṇavaka, bhaviṣyasi buddho bhagavān svayamabhisaṃbodhāt / buddhiratiśayenāsyāstīti buddhaḥ / tādṛśaṃ pratyekabuddhopīti / tadvayavacchedārthaṃ bhagavad grahaṇam / ṣaḍivadhena bhagārthena tasya yogāt / bhagavān bodhisattvopi / tadvayavacchedārthaṃ buddhagrahaṇaṃ tasyānabhisambodhāt / yathā dharmāstathaiva gadanāt tathāgataḥ / gadeḥ pacādyac / nairuktastakāraḥ / arayaḥ kleśāstān hatavāniti arhan / samyagaviparītaṃ samastaṃ buddhamaneneti samyaksaṃbuddhaḥ / etena (RSt_32) śāstṛtvasaṃpaduktā / na hyavaktā viparītavaktā vā śāstā bhavati / viparītavacanaṃ ca kleśavaśādajñānādvā bhavet / taccobhayamasya nāsti yathākramamarhatvāt samyaksambuddhatvācc / saṃsāriṇaḥ kathamī[dṛśī] śaktiriti cedāha sugata iti / gataḥ punarbhavāt muktaḥ / suśabdaḥ prasa (śa)stāpunarāvṛttiniḥśeṣārthaḥ, surūpavat sunaṣṭajvaravat supūrṇaghaṭavacca / bāhyaśaikṣāśaikṣāṇāṃ vyavacchedāya yathākramam / tatra lokottareṇa mārgeṇa gatatvāt praśastaṃ gataḥ / naivaṃ bāhyāḥ / sāvadhikatvena tanmokṣasyāmokṣatvāt /

"punarāvṛttirityuktau janmadoṣasamubhdavau /"

tau ca śaikṣāṇām / aśaikṣastu bhagavāṃstasmādapunarāvṛttyā gataḥ / śeṣamakleśanirjvaraṃ /

"kāyavākbuddhivaiguṇyaṃ mārgākṣapaṭutāpi vā /"

tadaśaikṣāṇāmapi hīnayānarhatāṃ yathāsambhavamasti / na tu bhagavataḥ / tato niḥśeṣagamanāt sugataḥ / kathamekaḥ suśabdastrīnarthānāha? tantreṇa nyāyena / tadyathā śveto dhāvati / alambumāṇāṃ yāteti / śvetaḥ śuklaḥ śvā itaḥ śvetaḥ / alambumā nāma grāmaḥ / tasya yātā gantā bumā api grāmaḥ / tasyālaṅganteti / kathaṃ sugataḥ? yato vidyācaraṇasampannaḥ / vidyā adhiprajñaṃ śikṣā, adhiśīlamadhicittaṃ ca / śikṣācaraṇaṃ vidyā puraścaraṇatvāttayoḥ / ato vidyayā cakṣuṣeva paśyan / itarābhyāṃ caraṇābhyāmiva tathā gamanāt sugataḥ / tadanena padadvayena śāstṛtvasampado heturūktaḥ / lokaviditi lokasya vinayanakālākālādiparijñānāllokavit / puruṣā eva damyā damanīyā vineyatvāt / teṣāṃ sārathiḥ samyagvinetā / tasya sadṛśaḥ sārathirastyeva / tadanyaḥ sugatastatodhikastu / nāstīti anuttaraḥ puruṣadamyasārathiḥ / anena padadvayena śāstṛtvasampado heturuktaḥ / athāsya karmaṇo viṣayaḥ / kiṃ durgatiṃ gatā api? netyāha / śāstā devānāṃ ca manuṣyāṇāṃ ceti / iti samudaye dharmajñānam //

atha khalu ta ityādinā saptamaṃ kṣaṇamāhuḥ / āścaryamāhārikārthe / paramāścaryamanuparigrāhikāthe / yāvacchabdaḥ paryantārthaḥ / dānapāramitāyā śīlapāramitāyā yāvat sarvajñatāyāḥ sarvākārajñatāyā ityarthaḥ / āhāriketyākarṣikā / anuparigrāhiketyanuśabdo 'nvayārthaḥ / anvayo yuktirnyāyaḥ / aparigrahonutsargayogaḥ / aparigrahānutsargayogayoḥ sāhityam / anvayena parigrāhikā yathā na parigṛṇhāti na cotsṛjati tathā parigrāhiketyarthaḥ / atra śāstram-

anugrahātyāgatādayaḥ //

iti / ādānamādiparigrahaḥ / anugraho 'vikalpanam / ayamaparigrahārthaḥ / atyāga eva atyāgatā / ayamanutsargārthaḥ / bodhisattvāḥ parigṛṇhanti / bhagavatī tān parigrāhayatīti samudaye 'nvayajñānakṣāntiḥ //

śakreṇa prastāvakatvādupalakṣitaḥ parivartaḥ śakraparivartaḥ //

āryāṣṭasāhastrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ dvitīyaḥ parivartaḥ //

3. aprameyaguṇadhāraṇapāramitāstūpasatkāro nāma tṛtīyaḥ /

'maitryādi' iti śāstram / maitrī karuṇāmuditopekṣāścatvāryapramāṇāni maitryādi / tadātmakaṃ darśanamaṣṭamaḥ kṣaṇa ityarthaḥ / taddeśanā nidānam / atha khalu bhagavānityādinā āmantrayate smetyetadantena saṃgītikāra āha / sākṣīkaraṇamaṣṭame kṣaṇe hīnayānapatanapratipakṣagauravātiśayotpādanāya / tameva kṣaṇam / bhagavānāha / yo hītyādinā prajñāpāramitāmiti prakaraṇāddarśanakṣaṇaḥ / prajñā saiva pāraṃgateti pāramitā / kasya pāram? hīnayānapatanabhūmeḥ / kā cāsau? yā catur(rṇāṃ) apramāṇātmakaṃ darśanam / tathāhi tatprāpto bodhisattvaḥ sarvasattveṣvātmasamatādarśī tānaśaraṇān hitvā nātmanaḥ kevalasya hitamīhate yena hīnayāne nipatet / tasmānmaitryādirūpaṃ darśanamatra prajñāpāramitā / saiva cāṣṭamaḥ kṣaṇaḥ / tāṃ yaḥ kaścid grahīṣyati yāvat paryavāpsyati sākṣātkaraṇāt / pravartayiṣyatīti parebhyaḥ prakāśitāyāstasyāstairudgrahaṇāt / yāvatpravartanāt / na tasyetyādiranuśaṃstaḥ (saḥ) pravartayiṣyatīti yāvat / iti samudaye anvayajñānam /

'śūnyatāvyāptiḥ' iti śāstram / ṣoḍaśānāṃ śūnyatānāṃ darśanena yā vyāptiḥ sarvāsāṃ darśanaṃ sa navamaḥ kṣaṇaḥ ityarthaḥ / tamāha / na ca khalvityādinā / (RSt_34) ihāpi darśanakṣaṇaḥ prajñāpāraṃgateti pāramitā / kasya pāram? śūnyatānāṃ ṣoḍaśānāmapi / tāsāṃ darśanāt / atrānuśaṃsaḥ / ādvitīyādatha / khalu śabdāt / acchannaḥ pradeśo avakāśaḥ / nipannaḥ śayitaḥ / bhaviṣyati prabandhena pravakṣyati / rakṣāvaraṇasahitā guptiḥ / tatra śastrādinā rakṣā rakṣaniyogādāvaraṇam / svayamupasaṃkramya tasyādhiṣṭhānāt guptiḥ / athavā śarīrasya sarvasukhopasaṃharaṇaṃ rakṣā / bāhyopakramanivāraṇamāvaraṇam / ādhyātmikarogādinivāraṇaṃ guptiḥ / teṣāṃ saṃvidhānaṃ samyak prayogo vā vā manasā vā / iti nirodhe dharmajñānakṣāntiḥ //

'buddhatvasya parigrahaḥ' iti / buddhasya bhāvo buddhatvam / yena buddho bhavati tasya parigrahalakṣaṇaḥ prabhāsvarasamādhidhāraṇāsampat / abuddhakeṣu ca buddhakṣetreṣu buddharūpasyātmanaḥ saṃdarśanam / tamāha / atha khalu śakra ityādinā / imāṃ prajñāpāramitāmitiṃ darśanakṣaṇam / imān guṇāniti lakṣaṇasampadādīn / iyata ityabhyunnatān / dṛṣṭadhārmikāniti dṛṣṭo dharmaḥ prāptaṃ janma / tatrabhavān / pratilabhata ityuddeśaḥ / parigṛṇhātīti nirdeśaḥ / iti nirodhe dharmajñānam //

'sarvasya vyavadānasya' ityekādaśaḥ / vyavadāyantyaneneti vyavadānam / dānapāramitādi / tasya sarvasya parigrahaḥ / tamāha / kiṃ punarityādinā punaraparamityataḥ prāk / iti nirodhe anvayajñānakṣāntiḥ /

'sarvādhivyādhiśātanaṃ' iti / ādhayo vyasanāni / tīrthikairābhimānikaiśca saha vigrahavivādani(vi)rodhāsteṣāṃ śātanam / tathā ca tacchatanaṃ yathā teṣāṃ paścāttata imāṃ śrutavatāṃ tribhiryānaiḥ kleśadurgatisaṃsārāruyā vyādhayaḥ kṣīyante / tasmāt sarvādhiśātanam / darśanaṃ dvādaśaḥ kṣaṇaḥ / tamāha punaraparamityādinā saṃsthāpyanta ityetadantena / dharmamiti śāsanam / vigrahītavyaṃ tāḍanena / vivaditavyaṃ kalahena / virodhayitavyaṃ parasparadveṣeṇa / te 'bhiprāyā iti vigrahādyabhiprāyāḥ / evaṃ hyetabhdavatīti / eṣaiva hi dharmatetyarthaḥ imāmiti dvādaśakṣaṇalakṣaṇām / [oṣadhī] oṣaḥ prabhāvaḥ / sa dhīyate 'syāmiti dadhāteḥ kvip pratyayaḥ / jātireṣā tata oṣadherajātāvityaṇa bhavati / strīliṅgaścāyaṃ tataḥ kṛdikārādaktiṅ iti dīrghavikalpaḥ / āśīḥ sarpasya daṃṣṭrā / tasyāṃ viṣamasyeti āśīviṣaḥ sarpaḥ / janturdehī / (RSt_35) prāṇakajāta iti tiryagviśeṣaḥ / tejaseti prabhāvena / baleneti bādhakatvena / sthāmata ityabādhyatvena / balādhāneneti tadyogena sāmarthyādhānāt / iti nirodhe anvayajñānam /

'nirvāṇagrāhaśāntatvaṃ' iti / grāho 'bhiniveśaḥ / etadāha tatkasya hetorityādinā / prajñāpāramiteti trayodaśaḥ kṣaṇaḥ / iti mārge dharmajñānakṣāntiḥ //

'buddhebhyo rakṣaṇādikaṃ' iti buddhebhyo rakṣaṇam / ādiśabdāddevādibhyaḥ / etadāha / catvāraścetyādinā bhaviṣyatītyetadantena / prajñāpārami[tāmi]ti caturdaśakṣaṇaḥ / iti mārge dharmajñānam //

'aprāṇivadhamārabhya sarvākārajñatā naye / svayaṃ sthitasya sattvānāṃ sthāpanaṃ'

iti prāṇātipātaviratiraprāṇivadhaḥ / tamādiṃ kṛtvā yatpāramitādau yāvatsarvākārajñatāyāṃ sthitasya tatraiva yatpareṣāṃ sthāpanaṃ sa pañcadaśakṣaṇaḥ / etadāha punaraparamityādinā / prajñāpāramitādīnāṃ parebhya upadeśo vacanam / ādeyaṃ grāhyam / tadasya svayamapi teṣu sthitatvādityādeyavacanaḥ / mṛdu priyaṃ vacanamasyeti mṛduvacanaḥ / dānādīnāṃ teṣu ca sthitānāṃ varṇabhāṣaṇāt / mitavacano hitasyaiva vacanāt / aprakīrṇavacano hitasyāpyahitamiśrasyāvacanāt / iti mārge anvayajñānakṣāntiḥ //

'pariṇāmanaṃ' 'dānādīnāṃ ca sambodhau' iti ṣoḍaśa kṣaṇa / tamāha / na ca krodhābhibhūta ityā[ra]bhya svādhyāsyatītyetadantena / paridamayati krodhāsaṃśamanāt / pariṇāmayati unnatilakṣaṇasya mānasya kṣayanayanāt / upanāho vairam / vyāpādaḥ sattvavidveṣaḥ / anuśayo vairānubandhaḥ / smṛtirmaitrī ceti / tayoḥ smṛtimāha / tasyaivamityādinā / teneti vyāpādena / paribhedo vikāraḥ / dhakṣyata iti daheḥ prayogaḥ / etena saparivāyordveṣamānayoḥ prahāṇamuktam / dveṣeṇa hi pareṣāmanugrahaṃ na kurvīta / tasmāttāvubhau prahāya dānādīnāmātmanaḥ kuśalānāmanuttarāyāṃ samyaksaṃbodhau tribhiryānaiḥ sarvasattvaparinirvāpaṇāya pariṇāmena paraṃ darśanaṃ ṣoḍaśa kṣaṇa ityuktaṃ bhavati / ityukto bodhisattvānāṃ darśanamārgaḥ //

lokottara eva darśa[na]mārgo bhāvanāmārgastu dvidhā laukiko lokottaraśca / tāvubhau yathākramaṃ paścādvaktavyau / ādita eva lokottarasya bhāvanāmārgasya kāritraṃ granthalābhavādabhidheyam / tatra śāstram-

namanaṃ 'nāmaḥ' sarvata iti vartate / 'sarvataḥ' iti pariśubdārthaḥ / paridamanaṃ pariṇamanaṃ cetyarthaḥ / te ubhe yathākramaṃ dveṣamānayoḥ parikṣayāt / te dve / evamukte śakra ityādinā mahāsattvānāmityetadantenāha / eṣu ṣaṭsu kāritreṣu prajñāpāramitāśabdena bodhisattvānāṃ bhāvanāmārga ucyate / yatheyamityarthaḥ / iti paridamanapariṇāmanakāritre /

'sarvataḥ kleśanirjayaḥ' iti / svaparakleśānāmatyantajayāt / tamāha bhagavānityādinā naitat sthānaṃ vidyata ityetadantena / jīvitāntarāyo veti / tatraiva śastrasampāte paropakrameṇa veti / mṛgayādimadhyagatopi parasyaiṣa upakramaḥ / pareṣāṃ tena / svaparakleśārjanayā bhagavatyā tena nirjitāstasyaiṣa niṣyanda iti bhāvaḥ / iti kleśanirjayākāritram //

jīvitāntarāyāya kṛtāḥ parairupakramāstasminna prabhavantīti 'upakramāviṣahyatvam" / tadāha / sacedityādinā nobhayavyābādhāya cetayata ityetadantena / tatreti śarīre / tatkasya hetoriti tadapatanaṃ kutaḥ? uttaraṃ mahāvidyetyādinā / sarvakālaṃ sarvatra deśe sarvavipakṣeṣu vāpratihataprabhāvatvādyathākramaṃ mahatī / apramāṇā aparimāṇā ca / tato 'dhikābhāvād anuttarā / samābhāvād asamā / samena samaḥ samasamaḥ / kiñcidūnajātī[ya]tvāt samasamā / tasyā apyabhāvād asamasamā / ātmano ābādhaḥ / upaghātaḥ / evaṃ pareṣāmubhayasya ca tadartha na cetayate / na cittaṃ vyāpārayati / tasmātparopakramairaviṣahyatvamasyāḥ karmeti / upakramāviṣahyatvakāritram //

'bodhiḥ' iti / anuttarā samyaksaṃbodhiḥ / pañcamaṃ kāritram / tadāha / acaitanyeṣu sarvajñajñānena / vyavalokayiṣyatīti / vinayanādyartham / tatkasya hetoriti tat sarvajñajñānaṃ kutaḥ? na taktiñcidasti yanna prāptamiti / sarve hi buddhadharmāḥ prāptavyāḥ / te ca pratyātmavedyāḥ / tato yadyanena prāptā na syurnāyaṃ sarvavibhdavet / tasmānna tatkiñcidasti yadasya na prāptaṃ syāt / tataḥ prāpyamitaracca sarvaṃ jānātīti na tatkiñcidasti yadasya na jñātaṃ syāt / prakarṣagataṃ ca sākṣātkārijñānamiha gṛhyate / tata āha / na (RSt_37) kiñcidasti yadasākṣātkṛtaṃ syāt? iti vāśabdāḥ parasparāpekṣayā vikalpārthāḥ / tasmādasau sarvajñaḥ / tasya jñānaṃ sarvajñajñānam / saiva samyaksambodhiḥ / tathā hi samyagjñānaṃ sambodhiḥ / samyagiti sākṣāt / saiva bodhivivakṣātaḥ sarvotkarṣagataḥ samyaksambodhiḥ sarvajñānaṃ ceti / vyavahārato bhedo na vastutaḥ / abhisaṃbhotsyata iti pratilapsyate / iti sambodhikāritram //

'ādhārapūjyatā' iti / dvividha ādhāraḥ / eka pustakagatāyāḥ tasyā apara udgṛhyamānāyā yāvaduddiśyamānāyāḥ tasya pūjyatā tadvadeva dvividhā / tatra gatānāṃ sattvānāṃ parairaviheṭhanīyatā / te dve yathākramaṃ punaraparabāhyadvayena parigṛṇhātītyetadantenāha / antaśa iti paramāpacaye / na satkariṣyata iti sthāpanādūrdhvam / avatāro randhramavakāśaḥ / sthāpayitveti bahiṣkṛtya / pūrvajanmano 'paraparyāyavedanīyaṃ niyatavipākamakuśalaṃ pūrvakarma / tasya vipāko 'niṣṭaphalam / imamiti yathoktam / tadyathetyādinā dṛṣṭāntaḥ / evamevetyādinā dārṣṭāntikaḥ / bodhimaṇḍagata iti / maṇḍaḥ sāraḥ / bodhyarthe maṇḍo bodhimaṇḍaḥ / tasminniṣadha bodheradhigamāt / kasya sāraḥ? kāñcanamayyāḥ pṛthivyāḥ / tathāhi vivarti(rta) syādau / kāñcanamayyāṃ pṛthivyāmabhinirvṛttāyāṃ caturatnamaye merau saptasu kāñcanaparvateṣu saptasu sitāsu bāhyamahodadhau, ayameva cakravāte(vṭhe) abhinirvṛtte, kāñcanamayyāḥ pṛthivyāḥ sāro vajramayaḥ samabhyudgataḥ / yo mṛnma (ṇma)yeṣu caturṣu dvīpeṣvaṣṭāsu cāntaradvīpeṣvabhinirvṛtteṣu jambūdvīpasya nābhiḥ saṃvṛttaḥ sa ca vajramayatvādvodhāsanatvācca vajrāsanamityucyate / sa bodhimaṇḍaḥ / taṃ gatāḥ prāptāḥ / samante bhavaḥ sāmantaḥ / veṣṭanaparisāmantaḥ pariveṣṭaḥ / abhyantaraṃ madhyam / bodhāya vṛkṣo bodhivṛkṣaḥ / tanmūle niṣadha bodheradhigamāt / tasya mūlaṃ mūlābhiniveśaparicchinnaḥ pradeśaḥ / tadgataḥ / vāśabdāḥ parasparāpekṣayā vikalpārthāḥ / viheṭhayitumiti vihiṃsitum / vyāpādayitumiti nihaṃtum / āveśayitumiti bhūtapiśācādipraveśanāt / bhayādipratipakṣatvāt / abhayamavairamanuttrāsaṃ mahāmaitrīnāmekamapramāṇam / prabhāvayantīti niṣpādayanti prakāśayantīti sasainyasya mārasya vighnatopi kramaṇāt / caityabhūta iti / cāyṛ pūjāyām / cāyyate devatā asminniti caityam / kṛtyalyuṭo bahulamityadhikaraṇe ṇyat / āya edbhāvaśca stūpa ityarthaḥ / tadbhūtastattādṛśaḥ / nirmālyāderakarṣārhatvāt / apacāyanīyaḥ / yataścaityabhūtastamanye na hiṃsanti / yataḥ śaraṇādistatastatragatā avadhyā bhavanti / tatra sannihitaṃ trāyata iti trāṇam / abhyupagacchato bhayaṃ śṛṇātīti śaraṇam / abhayā līyante asminniti layanam / paramayanaṃ parāyaṇaṃ parā gatiḥ / iti ṣaṣṭhamādhārapūjyatākāritrama //

laukiko bhāvanāmārgaḥ / ādau vaktavya ādyatvāt / sa ca trividhaḥ / adhimuktimanaskāraḥ pariṇāmanāmanaskāro 'numodanāmanaskāraśca / tatrādhimuktimanaskāramadhikṛtya śāstram-

[48] adhimuktistridhā jñeyā svārthā ca svaparārthikā / parārthikaiveti

svasyaiva svaparayoḥ parasyaiva cārthaḥ pradhānamāśayato yasyāṃ sā yathākramaṃ 'svārthā' 'svaparārthā' parārthaiva' ca / tataḥ śāstram-

[49] mṛdvī madhyādhimātrā ca

'eṣā' iti svārthādiḥ / 'trividhā' mṛdvayādibhedena / tataḥ śāstram-

mṛdumadhyādi bhedataḥ / sā punastrividhā

mṛdvayādīnāṃ pratyekaṃ mṛdvayādibhedāt / tadyathā svārthādimṛdumṛdvī mṛdumadhyāmṛdvadhimātrā / madhyamṛdvī madhyamadhyā madhyādhimātrā / adhimātramṛdvī adhimātramadhyā adhimātrādhimātrā ca / evaṃ svaparārthā / evaṃ parārthā ca / tata śāstram-

'ityevaṃ' trīṇi vārāṇi tribhirbhedāt 'saptaviṃśatidhā' iṣyate /

adhimuktiḥ śraddhāchandau saṃpratyayābhilāṣalakṣaṇau kvādhimukti? sūtrasūtrārtharūpāyāṃ bhagavatyāṃ taccaryāyāṃ ca lekhanādikāyāṃ tatpūjāyāṃ ca puṣpādibhirbahuvidhāttābhiḥ / caryāpūjobhdave ca puṇye yathā sūtram / tatra prathamā / evamukte śakra ityādinā yaḥ prajñāpāramitāyai pūjāṃ kariṣyatītyetadantena / likhitveti svayam / pustakagatāṃ vā kṛtveti pareṇa / divyābhiriti viśiṣṭābhiḥ / javānka(?)puṣpādivarjanāt / puṣpāṇi muktakusumāni / mālyāni srajaḥ / gandhā gandhadārūṇi / vilepanāni sa (ta)māla bhavāni / cūrṇā agarucandanādīnām / cīvarāṇi vastrāṇi / pūjābhiriti nivedyādibhiḥ / bahuvidhābhiriti bhakṣyalehyādibhedāt / puṣpādibhiḥ satkuryāditi sambandhaḥ / pūjayedityarthaḥ / gurukuryāditi gauraveṇa / mānayediti (RSt_39) premnā(mṇā) / pūjayediti praṇāmāñjalistutyādibhiḥ / arcayediti dakṣiṇāvartaiḥ / apacāyediti nirmālyādyapanayanaiḥ / śarīrāṇīti dhātūna / stūpeṣviti cetyeṣu pratiṣṭhāpayedavasthāpayet / parigṛṇhīyāt karaṇḍādīn kṛtvā / dhārayedvā karaṇḍādivahanāt / tāṃśceti stūpakaraṇḍādīn / yoyaṃ sarvajñatātmabhāva iti sarvajñataivātmabhāvaḥ / sa nirvartitaḥ / katamasyāṃ pratipadi śikṣamāṇena yāvatsamyaksambuddhena / kā punaḥ sarvajñatetyāha / anuttarāsamyaksambodhiḥ sarvajñateti / abhinirvartitārthaḥ / ka ityāha / asyāpyarthamāha / pratilabdheti / ihaiveti asyāmeva / ātmabhāvaścāsau ātmaprajñapteḥ śarīraṃ ca rūpakāyastathāgato gacchati / kiṃ gacchati tathāgata iti / saṃkhyāṃ gaṇanām / prajñāpāramitā ca upāyakauśalyaṃ ca tābhyāṃ nirjātaḥ san / prabhāvanāntāścatvāro nirdeśāḥ / loke pratītiḥ prabhāvanā / ayamevaiti bhagavatīpūjakaḥ / tatra iti tathāgataśarīrapūjakāt / śeṣaṃ subodham / iti svārthādhimuktiḥ mṛdumṛdvī //

evamukte śakra ityādinā hīnaprajñairityetadantena dvītiyā / likhiṣyanti yāvatparyavāpsyantīti svārthaḥ / tata ūrdhva parārthaḥ / tatra pravartayiṣyantītyuddeśaḥ / tribhirnirdeśaḥ / deśayiṣyantītyarthataḥ / upadekṣyantītityavadiṣyanti / uddekṣyantīti granthataḥ / svādhyāsyantīti svādhyāna(ya)ma(mi)tyabhyāsaḥ / mahārthikā mahāphalā / sā kṛtā satī evaṃ bhaviṣyatīti mahāphalaiva bhaviṣyatīti / na jñāsyantīti na śroṣyanti śabdataḥ / na vetsyantīti pustakaṃ na lapsyante / na vedayiṣyantīti / vedanaṃ vedaḥ arthajñānam / tatkarotītiṇic / arthaṃ na jñāsyantītyarthaḥ / uteti prakārāntaram / avetyeti lokottareṇa jñānena satyān jñātvā / prasādaḥ cittagato dharmaḥ / yena cittamatyantamakaluṣīkriyate / udakamiva dakaprasādena maṇinā / śrotasa āpattiḥ saiva phalam / sakṛdāgāmino 'nāgāminaśca phalam / arhato bhāvo 'rhatvaṃ caturthaphalam / ātmānamekaṃ prati bodhiḥ pratyekabodhiḥ / upavṛṃhayitveti lyap kasmānna bhavati? upabṛhaṃnamupabṛṃhaḥ taṃ kṛtvetyeke / tathāpi prāpnoti / curādau saṃgrāmayatipāṭhasya niyamārthatvāt' saṃgrāmayatereva sopasargāt nānyasmāditi / tasmāt prādipratirūpako yanna prādiḥ pradattādivat / avinivartanāya hitā avinivartanīyā / durabhisambheveti durlabhā / vīryaṃ kuśale karmaṇyutsāhaḥ / kutsitakarmaṇi saktaḥ kusīdaḥ / sīdateḥ sapratyayo 'ravindavat / sattvaṃ dhairyaḥ / cittaṃ samādhiḥ / saṃjñā smṛtiḥ / adhimuktiḥ śraddhā / tattvapravicayaḥ prajñā / śraddhādindriyāṇāṃ daurbalyaṃ hīnavīryādipadairucyate / tatra hīnavīryaḥ kusīdairiti viryendriyasya hīnasattvaiḥ / hīnacittairiti samādhīndriyasya / hīnasaṃjñairiti smṛtīndriyasya / hīnādhimuktikairiti (RSt_40) śraddhendriyasya / hīnaprajñairiti prajñendriyasya / bhagavatyā durabhisambhavatvajñānaṃ sopattikaṃ caryātirekaḥ / puṇyātireka ūhyaḥ / śeṣaṃ pūrvavat / iti svārthādhimuktirmṛdumadhyā //

tasmāttarhītyādinā pratisartavyāntena tṛtīyā / abhīkṣṇaṃ śravaṇādi paripraśnaśca saṃśayacddedārthaḥ / pratisartavyatāyāśca sopattikaṃ jñānamante caryātireka ūhyaḥ / śeṣaṃ pūrvavat / iti svārthādhimuktirmṛdvadhimātrā //

tasmāttarhītyādinā dvitīyaprasavatiparyantena caturthī / saptaratnāni tadyathā suvarṇa rūpyaṃ vaiḍūrya musāragalvaṃ / aśmagarbhaḥ lohitikā muktā karketanaṃ ca / tannidānamiti taddhetukam bhagavatyāṃ śraddhadhimokṣaprasādāḥ / cittotpādo 'dhyāśayataḥ / śravaṇādikaṃ arthavivaraṇaṃ manasā anvavekṣā parimīmāṃsā ca / pustakagatāṃ vā kṛtvā saddharmacirasthiti hetornetrya vaikalyāya ca / avasthāpanaṃ caryātirekaḥ puṇyātirekaḥ / yathāpāṭhaṃ śeṣa purvavat / iti svārthadhimaktirmadhyamṛdvī //

tiṣṭhantu khalvityādinā dvitīya prasavatiparyantena pañcamī / eṣa eva dvitīyo mūrajaphalena mahatā jambuvṛkṣeṇa lakṣitatvāt jambūdvīpaḥ / tato nidānamutpattirasyeti tathoktam / śeṣaṃ subodham / itaḥ prabhṛti yatrānuśaṃsaḥ paṭhyate na caryātirekastatra yadyathoktānuśaṃsa śraddhādikaṃ sa caryātirekaḥ / iti svārthādhimuktirmadhyamadhyā //

tiṣṭhantvityādinā dvitīyaprasavatyantena ṣaṣṭhī / catvāro mahādvīpā āsminniti cāturmahādvīpaḥ / svārthe aṇa / lokadhāraṇāt lokadhātau / śeṣaṃ tathaiva / iti svārthādhimuktirmadhyādhimātrā //

tiṣṭhantvityādi dvitīyaprasavatiparyantā saptamī / caturdvīpakānāṃ sahasraṃ parimāṇamasyeti sāhasraḥ / sa eva paripurṇatvena cūḍāyogāt cūḍikaḥ / iti svārthādhimuktiradhimātramṛdvī //

tathobhayāntā aṣṭamī / dvīḥsāhasraṃ parimāṇamasyeti dvisāhasraḥ sāhasrasahasramityarthaḥ / sa ca madhyamaḥ sāhasramahāsāhasrayormadhyatvāt / iti svārthadhimuktiradhimātramadhyā //

tathaivāntau navamyām / triḥsahasraṃ parimāṇamasyeti trisāhasram / (RSt_41) dvi(tri)sāhasrāṇāṃ sahasramityarthaḥ / sa eva mahāsāhasraḥ / iti svārthādhimuktiradhimātrādhimātrā //

tiṣṭhantvādirbhavatiparyantā daśamī / trisāhasra eva lokadhātuḥ / kintu tasmin sarvasattvā manuṣyā bhaveyuḥ / na pūrvaṃ na caramamasminnityapūrvācaramam sahetyarthaḥ / ato jñāyata iha sattvā eva sattvāḥ pūrvatra manuṣyā eveti / parikalpaḥ kalpanā / yāvajjīvaṃ caityapūjā sarvāsu / iha tu kalpaṃ vā kalpāvaśeṣaṃ vā / asyāṃ ca sarvagītavādyaiḥ sarvapuṣpādibhiścaityapūjātirekaḥ / bhagavatīpūjāpuṇyātirekopapattijñānamante / so 'syāṃ caryāpūjātireka / iti parārthadhimuktirmṛdumṛdvī //

tiṣṭhantvityādinā prajñāpāramitā mahāsamudrādityetadantenaikādaśī / gaṅgānadīvālikopameṣu trisāhasreṣviti stupasatkāre viśeṣaḥ / śeṣaṃ daśamīvat / bhagavatīcaryāpūjāsu sopapattikamanuśaṃsavistara parijñānamatirekaḥ / idṛśatvena cittātikramād acintyā sadṛśābhāvād atulyam / puṇyābhisaṃskāraḥ puṇyakarma / śatatamīmapītyādi / ādāvante ca kalāṃ nopaitīti vacanaṃ madhyepi sambandhārtham / atra ca bhāgaḥ kalā / nopaitīti nārghati / na labhata ityarthaḥ / na kevalaṃ kalāṃ nopaiti tulanārtham / kiṃ tarhi saṃkhyāmapi kalāmapi gaṇanāmapi / apiśabdaiḥ parasparāpekṣayā samuccayaḥ / uktaṃ yathā kalāṃ nopaiti / kathaṃ saṃkhyā? saṃkhyābhirekai [ra] pyatulanāt / pūrvakasya puṇyasya śatamapi sahasramapi yāvatkoṭīśatasahasramapi paścimasya puṇyasya tulanāya na kṣamata iti / gaṇanā gaṇitaṃ pratyutpannādiḥ / tāṃ kathaṃ nopaiti? tadatirekepyatulanāt / pūrvakasya puṇyasya pañcaguṇāpi viṃśatirdaśaguṇamapi sa (śa)taṃ yāvallakṣaguṇāpi koṭī paścimasya puṇyasya tulanāya na kṣamata iti / upamāmapyaupamyapi upaniśāmapi na kṣama [ta] iti pareṇa sambandhaḥ / upamitirūpamā / saiva aupamyam / 'svārthe pyañ / upaniśānamupaniśā / tatrābhinnamupamānamupamā saṃkhyātamupamānamaupamyam / gaṇitamupamānamupaniśā / tadapi trayaṃ tulanāya na kṣamate / tadyathā kalāprasṛtopamenāpi pūrvakeṇa na śakyamuttaraṃ tulayitum / daśaprasṛtopamenāpīti / upaniṣadamapi na kṣamata iti / evamatyantatulanābhāvāt tulanārthayā upaniṣat samīpaniṣadanaṃ pārśvato 'vasthitiḥ, tāmapi nārhatītyarthaḥ / mārṣeti āmantraṇam / āryetyarthaḥ / samudācārā abhiprāyāḥ / samanvāhāraḥ smaraṇam / (RSt_42) svādhyāyo mano jāpaḥ / mahāvidyādipada trayaṃ vyākhyātama / ato 'dhikāyā vidyāyā abhāvānniruttarā / atodhikasya dharmasyābhāvādanuttarā / tulyavidyāntarābhāvā dasamā / asamaistathāgataiḥ samatvādasamasamā / prabhāvyanta iti prakāśante / saptabhirbodhyaṅgaiḥ samprayuktāni taṃ niśrayatvāt / taiḥ parigṛhītā adhiṣṭhitāḥ / buddhānāṃ jñānaṃ svayaṃ bhāvāt svayambhū / cittātikramādacintyam / pūrvaśruteneti pūrvaśrutobhdavena / auṣadhītāra iti auṣadhyaśca tārāśca / avabhāsayantītyavabhāsaṃ kurvanti / dharmo nirvāṇaṃ sarvadharmotkṛṣṭatvāt / sa eva samaḥ yānatrayasya dhāraṇatvāt / sa eva sa (śa)maḥ kleśaduḥkhopasamatvāt / tasmai caryā / kuśalaṃ sucaritaṃ tasya caryā / viṣamo mṛtyuhetuḥ / tasyāparihāro viṣamāparihāraḥ / ayamuddeśaḥ / śeṣo nirdeśaḥ / daṇḍa upavāsanādiḥ / parigṛhītatvaṃ pratyupasthiteti / tatsvabhāvena tathābhāvāt / vyāḍāḥ caṇḍamṛgāḥ / sarīsṛpāḥ sarpāḥ kuṭilaṃ gamanāt / teṣāṃ kāntāraḥ / sthāpayitvetyādi yatpūrvakarmavipākena taṃ bahiṣkṛtya / samanvāhāro manasikaraṇam / pratihatacittā iti sadveṣacitāḥ / vicakṣuḥ vimanāḥ / balakāyo balasamūhaḥ / tasya catvāryaṅgāni gajavājipattirathāḥ / vyūhaḥ sannipātaḥ / bimbisāro magadhādhipaḥ / prasenajit srāvastīpatiḥ / śākyāḥ śākyakulajāḥ kṣatriyāḥ / licchavayo vaiśālakāḥ / pratyu[dā]vṛtto nivṛttaḥ / vihāyasāntarīkṣagatā iti ākāśenākāśaṅgatāḥ / cirasyeti cireṇa / upāvṛtteti punarāyātā / avarakeṇeti alpakena / yathā prajñāpāramitā tathābhāvaṃ tathātvam / prajñāpāramitaiva mahāsamudraḥ / iti svaparārthādhimuktiḥ mṛdumadhyā //

atha khalvityādinā dvitīya pariṇāyikāntena dvādaśī / ṣaṭpāramitānāyikatvādijñānaṃ sopattikaścaryātirekaḥ puṇyātireka uktaḥ / śeṣaṃ pūrvavat / varṇaḥ stotraṃ guṇā vā / pūrvaṅgameti agreśvarī / nāyiketi saṃgrāhikā / pariṇāyiketi saṃvardhikā / prajñāpāramitā hi svayemeva paramatvāt pāramitā / itarāstayaiva sarvajñatāyāṃ pariṇāmitatvena / śeṣaṃ subodham / iti svaparārthadhimuktirmṛdvadhimātrā /

atha khalvityādinā guṇān vadāmītyetadantena trayodaśī / yopyenāṃ pustakagatāṃ saddharmacirasthitihetoḥ sthāpayitvā pūjayet / tasyāpi sarva ete 'nuśaṃsā iti jñānamatra caryadhikyam / iti svaparārthādhimuktirmadhyamṛdvī /

evamukta ityādirdvitīyapunaraparāt prāk caturdaśī / ryātireko yathābhūtam / iti svaparārthādhimuktirmadhyamadhyā /

punaraparamityādinā yatra khalu punarityataḥ prāk pañcadaśī / pratyanuyogaḥ praśnaḥ / iti svaparārthādhimuktirmadhyādhimātrā //

yatra khalvityādinā evamukta ityataḥ prāk ṣoḍaśī / sarvadevopasaṃkramaṇaśraddhā tebhyaśca dharmadānacaryātirekaḥ / iti svaparārthādhimuktiradhimātramṛdvī //

evamukta ityādinā dṛṣṭadhārmikān guṇān parigṛṇhātītyetadantena saptadaśī / devādyāgamanārcanajñānāt praharṣo bhagavatīprabhāvena śraddhādikaṃ caryātirekaḥ / saṃjānīta iti saṃlakṣayati / niṣṭheti niścayaḥ / gantavyeti kartavyā / amānuṣaṃ sattvamiti manuṣyeṣu bhavo mānuṣaḥ / na tathā amānuṣaḥ / aśucyabhāvāt caukṣaḥ / puṣpādiyogāt śuciḥ / apakramaṇamapamaraṇam / klamathaḥ pīḍā / udāro mahān / pratibhotsyata iti budhyateḥ prayogaḥ / gṛddhiḥ abhilāṣaḥ / saṃjñā smṛti / iti svaparārthādhimuktiradhimātramadhyā //

punaraparamityādinā āparivartasamāpteraṣṭādaśī / caryātireko yathāsūtram / iti svaparārthādhimuktiradhimātrādhimātrā //

aprameyetyādi / atra stūpaścaityam / pāramitā prajñāpāramitā / dhāraṇaṃ dvividham / pustakagatāṃ kṛtvā yadasyāḥ saddharmacirasthitaye bahiḥsthāpanam / yaccodgrahaṇadhāraṇādibhiradhyātmameva sthāpanam //

aprameyaguṇadhāraṇaṃ yasyāḥ sā tathoktā / tathoktā ca sā parāmitā ca sā ca stūpaśceti dvandvaḥ / tayoḥ satkāraḥ puṣpādibhiḥ pūjā / tadabhidhāyī parivarto 'prameyaguṇadhāraṇastūpasatkāraparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ tṛtīyaḥ parivartaḥ //

4. guṇaparikīrtanaparivarto nāma caturthaḥ /

adhimuktayo 'dhikṛtāḥ / tatra nava svārthā navaiva ca svaparārthā uktāḥ / asmiṃstu parivarte navaiva parārthā vaktavyāḥ / tatrādau tathāgataśarīreṣvityetadantena ūnaviṃśatitamī / prajñāpāramitaiva dharmakāyatvādatyantapūjyā / tathā rūpakāyaḥ satyakāyatvādityetasminnarthe yau śraddhāprasādau sāmarthyagamyaśca mātrātirekaḥ sa iha caryātirekaḥ / tathāgatānāṃ śarīrāṇi dhātavaḥ / karaṇe ṣaṣṭhī / taiḥ paripūrṇaḥ / kiṃ vyāptimātreṇa? netyāha / cūḍikābaddha iti / dīyeta iti upanyasyeta / ekatareṇa pravāryamāṇa iti / anayorekaṃ gṛhāṇeti nimantryamānaḥ / citrīkāro gauravātiśayaḥ / gurutarā hi bhagavatī tebhyaḥ / etaddhi śarīramiti / yā prajñāpāramitā / bhūtārthastathyārthaḥ / tadyogāt bhūtārthikam / sīdatīti sat / anityaḥ / saccāsau kāyaśceti satkāyo rūpakāyaḥ / dharmakāyapariniṣpattita iti / atrāryamārgo dharmaḥ / sa ca prakarṣa gataḥ prajñāpāramitaiva / nānityaḥ pravāhanityatvāt / bhūtakoṭiprabhāvita iti / bhūtāni tattvāni teṣāṃ koṭiragram / tato 'dhikasya tattvasyābhāvāt / tasyāmeva prabhāvito vyahṛtastādātmyāt / katamaḥ kāya ityāha / yadutetyādi / tathatāmātraparamārthaṃ taddarśanī prajñāpāramitā na tato bhidyata iti bhāvaḥ / tatkiṃ tathāgatadhātuṣvagauravameva? netyāha / na khalvityādi subodham / iti parārthādhimuktirmṛdumṛdvī //

api tvityādinā tiṣṭhatu khalvityataḥ prāgviṃśatitamī / apituśabdo viśeṣārthaḥ / yadyapi teṣu me gauravaṃ tathāpītyarthaḥ / punaḥśabdastu pūrvamapi viśeṣayoktatvāt / nirjātānīti viśeṣaṇatvepi hetutvaṃ gamyate nirjātatvādityarthaḥ / tadyathāpītyādinā dṛṣṭāntaḥ devasabhādhikaraṇatvāt devasabhā mahatī śālā yasyāṃ śakrastrayastriṃśebhyo dharma deśayati / ata eva sā sudharmetyucyate / [a] sya ca sudarśanasya devanagarasya dakṣiṇapaścimadigbhāga iti / īṣo (śo) mahāpuruṣaḥ / tasyākhyā pratibhāso rūciḥ / mahatī śākhā asyeti maheśākhyaḥ / mahānmanā ityarthaḥ / sa ceha jñānātmā samyaksaṃbuddhaḥ / tasya hetupratyayabhūto hetusvabhāvo pratyayasvabhāvo ca / ata evāha / tathāgatasyetyādi / tatra sarvajñajñānaṃ śakravat / tathāgatadhātavo nāsya hetupratyayabhūtāḥ / (RSt_45) śakrasya tadāsanavat / pūrvatra kāyasyādhārabhūto rūpakāya evoktaḥ / iha tu maheśākhyasya jñānakāyasyāsanasthānīyaḥ / ityasminnarthe yau śraddhāprasādau sa caryātirekaḥ / iti parārthādhimuktirmṛdumadhyā //

tiṣṭhatvityādinā tathāgataśarīreṣvityetadantena ekaviṃśatitamī / ihoktabhagavatīmāhātmye yau śraddhāprasādau sa eva caryātirekaḥ / iti parārthādhimuktirmṛdvavadhimātrā //

api tvādi tathāgataśarīrāntāt dvāviṃśatitamī / tathāgato hi sarvalokā (ke) bhyudgatatvāt pūjyataraḥ pūjyatamaḥ sa ca sarvajñajñānam / tato yadi dhātavastadādhāratvāt pūjyāstadā tajjananī tatopi pūjyatamā kā kathā dhātūnāmityasminnarthe śraddhādikaṃ caryātirekaḥ / iti parārthādhimuktirmadhyamṛdvī //

api tvityādinā bhājanabhūtānyabhūvannityetadantena trayoviṃśatitamī / prajñāpāramitāyāḥ sarvajñajñānasya ca guṇā ihoktamaṇiratnānusāreṇa veditavyāḥ / yathā coddhṛtepi tasmiṃ maṇiratnakaraṇḍakaḥ spṛhaṇīyo bhavati / evaṃ buddhastanmātro guṇaiḥ parinirvṛtepi bhagavati dhātavaḥ pūjyā bhavantītyasminnarthe śraddhādikaṃ caryātirekaḥ / iti parārthādhimuktirmadhyamadhyā //

yathā ca bhagavā(va)nityādinā tathāgataśarīreṣvityetadantena caturviśatitamī / yathā prajñāpāramitānirjātatvāddeśanādharmaḥ parairapi nirdeśyamānaḥ pūjyo bhavati / rājapuruṣaśca rājānubhāvādakutobhayaḥ sarvatra pūjyaḥ / evaṃ prajñāpāramitānirjātatvāttadanubhāvācca dhātavaḥ pūjyā ityasminnarthe puṇyātireke ca śraddhādikaṃ caryātirekaḥ / iti parārthādhimuktirmadhyādhimātrā //

api tvityādinā pūjā kṛtā bhavatītyetadantena pañcaviṃśatitamī / bhagavatīpūjayā traiyadhvikatathāgatāḥ pūjitā bhavantītyasminnarthe śraddhādikaṃ caryātirekaḥ / iti parārthādhimuktiradhimātramṛdvī //

punaraparamityādinā dvitīyaṃ paśyatiparyantena ṣaḍviṃśatitamī / traiyadhvikatathāgatānāṃ dharmatayā darśayitrī bhagavatyevetyasminnarthe śraddhādikaṃ caryātirekaḥ / dharmatā dharmakāyaḥ sa ca prajñāpāramitaiveti bhāvaḥ / aparisamāpte eva śakravākye bhagavānāha evametadityādi / ahamapyabhisaṃbuddha iti yāvat / āgamyeti prāpya hetuṃkṛtya / iyatāpi bhagavatyāḥ samyaksaṃbodhikāraṇatvamuktaṃ na tu dharmakāyatvam / tadupasūcanāya punaḥ śakra (RSt_46) āha / mahāpāramitetyādi / samyakprajānātīti niṣprapañcena jñānena vettītyarthaḥ / saṃpaśyatīti sarvākāraṃ paśyatītyarthaḥ / sphuṭīkarttu bhagavānāha / evametadityādi / iti parārthādhimuktiradhimātramadhyā //

atha khalu śakra ityādinā āparivartasamāpteḥ saptaviṃśatitamī / sarva mahāyānaṃ pāramitābhiḥ saṃgṛhītam / tāsu bhagavatī pradhānaṃ pūrvaṅgamatvāt saṃgrāhakatvāccetyasminnarthe śraddhādikaṃ caryātirekaḥ / upāyakauśalyena parigṛhītānāmityuddeśaḥ / prajñāpāramitayā sarvākārajñatāyāṃ pariṇāmitānāmiti nirdeśaḥ / tatra prakṛtipāramitānāṃ dṛṣṭāntā nānāpuṣpādikā vṛkṣāḥ / ekarasā tu chāyā teṣāmupāyakauśalyaparigṛhītānāṃ dṛṣṭāntaḥ / iti parārthādhimuktiradhimātrādhimātrā //

prakṛtatvātprajñāpāramitāyāḥ ye guṇāsteṣāṃ parikīrtanaḥ parivartastathoktaḥ /

āryāṣṭasāhastrikāyāḥ prajñāpāramitāyāḥ sāratamānāmni pañjikāyāṃ ratnākāraśāntiviracitāyāṃ caturthaḥ parivartaḥ //

5. puṇyaparyāyaparivarto nāma pañcamaḥ /

uktaṃ 'kāritramadhimuktiśca' / 'stutistobhitaśaṃsitāḥ' vaktavyāḥ 'stutaṃ' sutiḥ / 'stobhitaṃ' stotraḥ / subdhātorbhāve ktaḥ / śaṃsanaṃ śaṃsaḥ / so 'syāstīti śaṃsī / tabhdāvaḥ 'śaṃsitā' praśaṃsetyarthaḥ / ataḥ śāstram-

prajñāpāramitāyā yo 'dhimokṣaḥ pūrvamuktaḥ svārthobhayārthaparārthabhedena trayodhimuktinavakā ityarthaḥ / tasya guṇobhdāvanaṃ 'mātrāṇāṃ' prabhedānāṃ 'tribhirnavakaiḥ' yathākramam / 'stutiḥ stobhaḥ praśaṃsā ca' 'iṣyata' ityekavacanaṃ stutyādibhiḥ pratyekamabhisambandhāt / tatra guṇobhdāvanasya mṛdumadhyādhimātrabhedāḥ (RSt_47) stutistobhapraśaṃsāḥ / tāsāmapi mṛdumṛdvādayo 'dhimātrādhimātraparyantāḥ prabhedāstrayo navakā ityarthaḥ / tāsāṃ dvau hetū bodhisattvasya parārthakaraṇaśaktiḥ parārthapradhānatā ca /

tatrādau punaraparamityataḥ prāk prathamā / asyāṃ parārthakaraṇaśaktistriṣu vastuṣvadhimokṣo dṛḍhataraḥ / kartavyopadeśe bhagavatīguṇe svayaṃ ca tasyāḥ kartavyatayādau śakra āha / ya ityādinā adhimuñcedityetadantena / yo bhagavan kulaputro vā kuladuhitā vādhimuñcediti sambandhaḥ / kimadhimuñcedityāha / imāmityādi sarvam / imāṃ prajñāpāramitāmadhyāśayataḥ śṛṇuyādudgṛṇhīyāt / yāvannetryavaikalyeneti / kathamityāha / bodhāya bodhaye cittamutpādya / kīdṛśaḥ prasannacitto 'syāmeva / katham? adhimucya / imāmaviparītatvenātyantamavadhārya / tacca śraddhayeti darśayitumāha / abhiśraddadhadavakalpayan / imāmeva / hetau śatṛpratyayaḥ / asyāmeva śraddhayetyarthaḥ / āse(śe)rate kuśalā dharmā asminnityāśayaḥ / jalāśayavat / sa punaḥ śraddhācchandau / adhikaḥ prakaṣṭa āśayo adhyāśayaḥ / tena śṛṇuyād granthato 'rthataśca / udgṛṇhīyād āvartayet / dhārayediti hṛdaye sthāpayet / vācayet pāṭhayet / paryavāpnuyāditi sarvathā avagaccheta / iyatā svārtho uktaḥ /

pravartayediti pareṣu sañcārayet / ayamuddeśaḥ / paro nirdeśaḥ / deśayedgranthato bhāṣaṇāt / upadiśed arthataḥ / uddiśedityavavadet / iyato parārthaḥ /

svādhyāyediti sutarāmabhyaset / punaḥ punaḥ svārthakaraṇāt / parebhyaśca samprakāśayediti santataṃ prakāśayedgranthataḥ / vistareṇeti bahubhyaḥ prakāśanāt / vivṛṇuyāditi vistareṇeti vartate / manasānvavekṣeteti cittenānubudhya saṃyojya paśyet / sa(śa)mathotpādanāt / parimīmāṃsāmiti vicārāṇāṃ vipaśyanotpādanāt / iyatā caryoktā /

asyā abhāve pakṣāntaramāha / pustaketyādinā / ata eva antaśaḥśabdaḥ / pustakagatāmiti / imāmeva dhārayediti / avinaśvarī kuryāt / sthāpayediti svagṛhādau / tisṛbhirāśaṃsābhiḥ / santa āryāḥ / teṣāṃ dharmamārga iti saddharmaḥ / tasya cirasthitiḥ / taddhetoḥ tadartham / iyaṃ hi sādhāraṇaḥ / saddharma iti prathameyamāśaṃsā sarvāryānadhikṛtya / buddhāśca lokaguravasteṣāṃ ca kṛtajñairasmābhirbhavitavyam / teṣāmiyaṃ netrī bodheḥ prāpikā prajñā / taistrikalpāsaṃkhyeyā pariśrameṇotpādya samyaganāgatajanatārthāya svavaṃśe 'vasthāpitā / (RSt_48) yāvadasmānupagatā / tato mā buddhanetrī samucchedobhūd ityapīmāṃ sthāpayet / iti dvitīyeyamāśaṃsā buddhānadhikṛtya / bodhisattvānāṃ cānugrahopasaṃhāraḥ karaṇīyaḥ / sa ca kṛto bhaviṣyati / anayā sthāyitayā netryavaikalyena / ityapīmāṃ sthāpayediti tṛtīyeyamāśaṃsā bodhisattvānadhikṛtya / iti śabdaḥ pūrvatrāpi sambadhyate mā bhūditi / iyatā dvividhaḥ kartavyopadeśa uktaḥ /

imaṃ nirdeśamiti kartavyopadeśam / evaṃ mahārthiketyādi / mahān arthakāryamasyā iti mahārthikā / ayamuddeśaḥ / paro nirdeśaḥ / mahānuśaṃsā yathoktaraiṇu(nu)śaṃsaḥ / mahāphalā strotaāpannatvena, sakṛdāgāmitvena, anāgāmitvena, arhattvena, pratyekabodhyā, samyaksambodhyā ca / mahāvipākā sarvābhiścaryāvibhūtibhiḥ / bahumahāguṇasamanvāgatetyupasaṃhāraḥ / iyatā bhagavatīguṇa uktaḥ /

aparityajanīyā parigrahādanutsargācca / rakṣitavyā agnimūṣikādibhyaḥ / gopāyitavyā caurādibhyaḥ / yasmāt paramadurlabhā / iyatā svayaṃ kartavyamuktam /

itīti / etadvastutrayamadhimuñcet / evamevetyavadhārayet / asatyāṃ ca pravṛttau nādhimokṣo dṛḍhaḥ syāt / tata iyatā parārthakaraṇaśaktiruktā / tasyāṃ satyāṃ yaḥ parārtha svalpamapi na karoti svalpaṃ vā karoti so 'lpapuṇyaḥ / itarastasmāt bahutarapuṇyaḥ / tasyaitā stutistotrapraśaṃsāḥ / ataḥ svayameva cetyādinā dvitīyaprasavatiparyantena stutiḥ prathamā //

svayameva ceti cakāro ya ityasyānukarṣaṇārthaḥ / na tu parāṃ(raiḥ) pūjāḥ(jāṃ) kārayatītyevakārārthaḥ / saṃpūjyeti sarvapūjāḥ kṛtvā / arthanamarthaḥ / pūjāyāmicchā tadyogādarthikāya / atiśayena tadyogācchandikāya / yācamānāyeti pūjayituṃ bhagavatīṃ prārthayamānāya / dadyādityabhyupagacchet / upanāmayet sannipātayet / niryātayet grāhayet / parityajed avipratisārāt / antaśaḥ iti yāvadityarthaḥ / pustakagatāmapi kṛtveti svayaṃ likhitvā tena vā likhitvā tanmūlyena vā svamūlyena vā lekhayitvā parityāgo dānaṃ tasmai buddhiricchā asyeti tadbuddhiḥ / saṃprakāśayediti guṇataḥ svarūpataśca / dadyāt pūjanāya / saṃvibhajediti spharatāmadhikānāṃ vā dānāt / vistāro vaipulyam / tena caratīti vaistārikī / pratyātmamityātmanaiva / śeṣaṃ subodham / iti mṛdumṛdvī stutiḥ /

punaraparādiḥ prāk punaraparāt dvitīyā / tat iti prathamastutāt / iti mṛdumadhyā stutiḥ //

punaraparādi tiṣṭhantuśabdāt prāk tṛtīyā / samādāpayediti samyak grāhayet / pratiṣṭhāyet anatikramāt / abhiśraddadhaditi bhagavatīguṇān / anyathā na samyak dātā syāt / abhiśraddadhata iti / anyathā na sa dānapātraṃ syāt / evamuttareṣvapi veditavyam / kilāsitā kusīdaḥ / akilāsitā vīryam / tayā sampādayed yathoktaṃ kāryam / udyukto 'bhiyuktaḥ sannamuṃ bodhisattvaṃ bhagavatīṃ grāhayet / bodhisādhanatvena pratipādayedvācā / tathaiva sandarśayed yuktibhiḥ / tataḥ samādāpayed vācanārcanādiṣu pravṛtteḥ / pravṛttaṃ samuttejayed utsāhayet / vīryakausīdyayorguṇadoṣākhyānāt / ārabdhavīrya stutibhiḥ saṃpraharṣayet / viparyasto lokastato nedaṃ śakyamiti cedāha / vācetyādi / trividho lokaḥ śrāddho vimukha udāsīnaśca / tatra śrāddhaṃ vācaiva neṣyati / sa hi saṃbhāvitasya vācaiva gacchati / vimukhaṃ vineśyati / kudṛṣṭīnāṃ yuktibhirbādhanāt udāsīnamanuneṣyati / anurañjayiṣyati bhagavatyā tadguṇākhyānāt / evaṃ pātrīkṛto ya arthamasyā asmai saṃprakāśayiṣyati / evaṃ ceti prakāśite vārthe 'syacittaṃ śodhayiṣyati / kuddaṣṭīnāṃ bādhanāt / tathāpi saṃśayinaṃ nirvicikitsaṃ kariṣyati yuktyantaraiḥ / śikṣasvatisṛbhiḥ śikṣābhiḥ / atra hītyādinā ta evāha / śikṣamāṇaḥ cintayā / caraṇa(na) samarthena (śamathena) vyāyacchamāno vipaśyamānayā / sattvadhātuḥ sattvarāśiḥ / ātyantikatvād anuttare / upadhayaḥ skandhāḥ sāsravāḥ sāsravānāsravā vā / teṣāṃ saṃkṣayaḥ samastakṣayaḥ / tannimittam / abhivineśyasi sarvāvaraṇakṣayāt / bhūtakoṭiprabhāvanatā tanmātraśeṣatā / parityāgabuddhyeti sarvākārayā tyāgabuddhayā / tata iti dvītīyāyāṃ stutāt daśakuśalapratiṣṭhāpakācca / iti mṛddhadhimātrā stutiḥ //

ita ūrdhva pañcānāṃ stutīnāṃ tiṣṭhantvādiḥ pratiṣṭhāpayedantaḥ pūrvo bhāgaḥ / tata ūrdhva tatkiṃ manyasa ityādi punaparāt prāk paścimo bhāgaḥ / āsu ca sūtrokte puṇyātirekaiḥ śraddhādikaṃ sāmarthyagamyaśca mātrātirekaścaryātirekaḥ / etena paryāyeṇeti prakāreṇa vastutrayādhimokṣe sthitvetyarthaḥ / iti yathākramaṃ madhyamṛddhī madhyamadhyā madhyādhimātrā adhimātramṛdvī adhimātramadhyā ca stutiḥ //

punaraparādi punaraparātprāk pañca tiṣṭhantukā navamī / ekasyā eva navamyāḥ krameṇābhidhānāt / tathāpyaṣṭamīto mahadantaramiti cet / nāyaṃ doṣaḥ / ekalokadhātukāto gaṃgāvālukopamāt lokadhātuvat / sūtroktapuṇyātirekaiḥ śraddhādikaṃ caryātirekaḥ / ūnapāṭhāḥ pūrvāparaiḥ pūraṇiyāḥ /

caturṣu dhyāneṣviti / atra sūtram- 'viviktaṃ kāmairviviktaṃ pāpakaraikuśalairdharmaiḥ savitarkaṃ savicāraṃ vivekajaṃ prītisukhaṃ prathamaṃ dhyānamupasampadya viharati / sa vitarkavicāraṇāṃ vyupaśamādadhyātmaṃ saṃprasādāccetasa ekotībhāvādavitarkamavicāraṃ samādhijaṃ prītisukhaṃ dvitīyaṃ dhyānamupasampadya viharati / sa prīte virāgādupekṣako viharati smṛtimān saṃprajānan sukhaṃ ca kāyena pratisaṃvedayate / yattadāryā ācakṣate upekṣakaḥ smṛtimān sukhavihārīti niṣprītikaṃ tṛtīyaṃ dhyānamupasampadya viharati / sa sukhasya ca prahāṇāt duḥkhasya ca pūrvameva prahāṇāt saumanasyadaurmanasyayorastaṅgamādaduḥkhāsukhamupekṣāsmṛtipariśuddhaṃ caturthaṃ dhyānamupasampadya viharati" iti //

viviktaṃ kāmairiti / kleśakāmasyāsaṃprayogāt / vastukāmānāmanālambanāt / viviktaṃ pāpakairakuśalairdhamairiti / kleśakāmahetukaiḥ kāmavāṅmanoduścaritaiḥ / savitarka savicāramiti / kāmapratipakṣābhyāṃ vitakavicārābhyāṃ saṃprayogāt / vivekajamiti / kāmavivekājjātam / prītisukhamiti / īpsitārthasiddhitaḥ kāyacittapraśrabdhitaśca prītisukhasahagatam / prathamaṃ dhyānamupasaṃpadyeti samāpadya / viharatīti pratyanubhavati / sa iti / sa eva yogī / vitarkavicāreṣu cittakṣobhakaratvadoṣadarśanāttebhyaścittaṃ vyāvartya samādadhānaḥ / vitarkavicārāṇāṃ vyupaśamāditi samādhibalena / cetasa ekotībhāvāditi vitarkavicārāṇāṃ nirantaramapravṛtteḥ / avitarkamavicāramiti teṣāṃ sarveṇa sarva prahāṇāt / prītervirāgāditi / audārikāttasyāḥ / upekṣaka iti / vitarkavicāraprītināmupekṣaṇāt / smṛtimān saṃprajānanniti / prīteranakavakāśadānāya prajñābahulīkārāt / sukhamiti / veditasukhaṃ praśrabdhisukhaṃ ca / kāyeneti / rūpakāyena manaḥkāyena ca / āryā iti / śrāvakā buddhāśca / yāvatsukhavihārīti / eṣa evāsau dhyāyīti śeṣaḥ /

tatra sukhasya prahāṇaṃ caturthena dhyānena / duḥkhasya prathamena / ata evāha / pūrvameveti / saumanasyasya tṛtīyena / daurmanasyasya dvitīyena / pūrvamevetyanuvṛtteḥ / upekṣaivātra vedanā / tata āha / aduḥkhāsukhamiti / tayorihātyantaṃ viśuddhilābhāt //

tatra prathamasya dhyānasya pañcāṅgāni / vitarkavicārau pratipakṣāṅgaḥ(ṅgam) / prītisukhe anuśaṃsāṅgaḥ(ṅgam) / citaikāgratā tadubhayasanniśrayāṅgaḥ(ṅgam) // dvitīyasya catvāryaṅgāni / adhyātmaṃ saṃprasādaḥ pratipakṣāṅgam / śeṣe aṅgepūrvavat // tṛtīyasya pañcāṅgāni / upekṣāsmṛtiḥ saṃprajanyaṃ ca pratipakṣāṅgam / (RSt_51) sakhamanuśaṃsāṅgam / niśrayāṅgaḥ(ṅgaṃ) pūrvavat // caturthasya catvāryaṅgāni / upekṣāpariśuddhiḥ pratipakṣāṅgaḥ(ṅgam) / aduḥkhāsukhā vedanā anuśaṃsāṅgaḥ(ṅgam) / niśrayāṅgaḥ(ṅgaṃ) pūrvavat //

eteṣu caturṣu dhyāneṣu pratiṣṭhāpayet / śeṣaṃ pūrvavat / ityadhimātrādhimātrā stutiḥ //

punaraparādiḥ prabhavanatāntaḥ prathamaḥ stobhaḥ / ūnapūraṇaṃ pūrvavat / caturṣu dhyāneṣu caturṣvapramāṇeṣu caturṣvārūpyasamāpattiṣu pañcasvabhijñāsu yāvatsamastāsu dhyānāpramāṇārūpyasamāpatyabhijñāsu pratiṣṭhāpayediti /

uktāni dhyānāni / maitryādayaḥ kāmāvacarāḥ sattvālambanāścatvāro brahmavihārāḥ / apramāṇasattvālambanāścatvāryapramāṇāni / maitrī karūṇā muditā upekṣā ca / aho vata sarvasattvāḥ sukhena yujyeran duḥkhena viyujyeran sukhena mā viyujyeran saṃkleśānmuñcerannityebhirākāraiḥ sukhasaṃyogāśayo duḥkhaviyogāśayaḥ sukhāviyogāśayo 'saṃkleśāśayaśca / adhimukticaryābhūmau catastropi sattvālambanāḥ / pramuditāsu saptasu tathatālambanāḥ / acalādiṣvanālambanāḥ /

apramāṇeṣu sūtram- "maitrīsahagatena cittena vipulena mahadgatenādvayenāpramāṇenāvaireṇāsampannenānāvaraṇenāvyābādhena sarvatrānugatena subhāvitena dharmadhātuparame loke ākāśadhātuparyavasāne sarvāvantaṃ lokamekaṃ diśaṃ spharitvopasaṃpadya viharati / yāvaddaśadiśaḥ spharitvopasaṃpadya viharati / evaṃ karuṇāsahagatena / evaṃ muditāsahagatena / evamupekṣasahagatena" iti //

tatra maitrīsahagatena citteneti guṇino nirdeśaḥ / śeṣeṇa guṇānām / vipulenetyāśayato mahattvam / mahadgateneti vardhanataḥ / apramāṇenetyālambanataḥ / advayeneti ekātmakena nirvikalpatvāt / avaireṇeti vipakṣaprahāṇāt / tatra maitryādīnāṃ vipakṣo yathākramaṃ / vyāpādo vihiṃsā aratiḥ, anunayapratighau ca / asaṃpanneneti styānamiddhopaśamāt / anāvaraṇenetyauddhatyakaukṛtyopaśamāt / avyābādhenetyebhireva tribhiścetaso akāluṣyāt / sarvatrānugateneti mitrodāsīnaśatruṣu triṣvapi pravṛttatvāt / subhāviteneti triṣvapi samapravṛttatvāt / uktena prakāreṇa spharitveti vyāpya / lokamiti sattvalokam / sarvāvantamiti devanāgayakṣādibhedaiḥ sarvairyuktam / ekaṃ diśamiti ekadiggatam / kvetyāha / loka iti bhājanaloke dharmadhātuparama iti / dharmadhātuvadanante (RSt_52) ākāśadhātoriva paryavasānamasyeti tathokte / upasaṃpadya viharatīti cittaṃ samādhāya viharatyāryavihāreṇa / daśadiśa iti daśadiggatān / śeṣaṃ subodham //

ārūpyasamāpattayaścatvāra ārūpyāḥ / teṣu sūtram "sarvaśo rūpasaṃjñānāṃ samatikramātpratighasaṃjñānāmastaṅgamāt nānātvasaṃjñānāmamanasikārāt anantamākāśamiti ākāśānantyāyatanaṃ upasampadya viharati / sa sarvaśa ākāśānantyāyatanasaṃjñāsamatikramādanantaṃ vijñānamiti vijñānānantyāyatanamupasaṃpadya viharati / sa sarvaśa vijñānānantyāyatanasaṃjñāsamtikramāt nāsti kiñcidityākiñcanyāyatanamupasaṃpadya viharati / sa sarvaśa ākiñcanyāyatanasaṃjñāsamatikramāt naivasaṃjñā nāsaṃjñāyatanamupasampadya viharati" iti //

rūpasaṃjñā nīlapītādisaṃjñāḥ / tāsu viraktasya sarvatrākāśasaṃjñā bhāvanāt / tāsāmatikramāt apratibhāsāt / pratighasaṃjñānāmiti bhittiprākārādyāvaraṇasaṃjñānām / nānātvasaṃjñānāmiti prāsādodyānagirisariccandrasūryādisaṃjñānām / anantamākāśamityevamākāśānantyāyatanamālamvanamasyeti tathoktam / kathamākāśānantyāyatanasamatikramaḥ? sa yena jñānenākāśānantyāyatanamadhimuktavāṃstadevānantamadhimucya sarvatrākāśasaṃjñāvyāvartanāt / vijñānānantyāyatanasamatikramāditi / sa tasmāduccalito na kiñcidālambanaṃ paśyati nārthaṃ na vijñānam / so 'kiñcanatāmevālambanīkṛtya samāpadyate / ākiñcanyāyatanasamatikramāditi / sa ākiñcanyasaṃjñāyāmapi viraktastāmapi vyāvartayati / kiñcanasaṃjñā tu prāgeva nivṛttā / tato naiva saṃjñā / sūkṣmā tu saṃjñā pravartata eva tato nāsaṃjñā / naiva saṃjñā nāsaṃjñā yasminnāyatane samādhāne tattathoktam /

pañcābhijñāḥ / ṛddhividhijñānam / divyaśrotram / paracittajñānam / pūrvenivāsānusmṛtijñānam / divyacakṣuśceti / atra sūtram- "so 'nekavidhamṛddhividhaṃ pratyanubhavati / pṛthivīmapi kampayati / eko bhūtvā bahudhā bhavati / bahudhāpi bhūtvā eko bhavati / āvirbhātraṃ tirobhāvamapi pratyanubhavati / tiraḥ kuḍyaṃ tiraḥ prākāraṃ tiraḥparvatamapyasakto gacchati / ākāśamapi krāmati / pṛthivyāmapi unmajjananimajjanaṃ karoti / udakepi pṛthivyāmiva gacchati / dhūmāyatyapi prajvalatyapi" iti vistāraḥ // "sa divyena śrotradhātunā atikrāntamānuṣyakena śabdān śṛṇoti divyān mānuṣakāṃśca / sa parasattvānāmapi parapudgalānāṃ cetasaiva cittaṃ yathābhūtaṃ prajānāti / evaṃ [sarāgaṃ] vigatarāgaṃ sadoṣaṃ vītadoṣaṃ samohaṃ vītamohaṃ cittamiti yathābhūtaṃ (RSt_53) prajānāti yāvadanuttaraṃ cittamiti yathābhūtaṃ prajānāti / sa ekāṃ jātimanu smarati / dve tiśro (sro) yāvajjātikoṭīniyutaśatasahasrāṇyapyanusmarati / ekaṃ divasaṃ dve trīṇi yāvatkalpakoṭīniyutaśatasahasrāṇyapyanusmarati / amutrāha māsamevaṃ nāmā evaṃ gotra evaṃ jātirevamāhāra evaṃ cirasthitika evamāyuṣyaparyantaḥ / sohaṃ tataścyutaḥ sannamutropapanno yāvattataścyuta ihopapanna iti yāvat sākāraṃ soddeśaṃ sanimittamanekavidhaṃ pūrvenivāsamanusmarati // sa divyena cakṣuṣā viśuddhenātikrāntamānuṣyakena sattvān paśyati / cyavamānānupapannānapi suvarṇān durvarṇān hīnān praṇītān sugatau durgatau yathākarmopagān sattvān prajānāti / amī bhavantaḥ sattvāḥ kāyasucaritena vāksucaritena manaḥsucaritena samanvāgatā āryāṇāmanapavādakāḥ samyagdṛṣṭayaḥ / tena kāyavāṅmanaḥsucaritahetunā kāyasya bhedāt sugatau svargaloke deveṣūpapadyante / ime punarbhavantaḥ sattvāḥ kāyaduścaritena vāgduścaritena manoduścaritena samanvāgatā āryāṇāmapavādakā mithyādṛṣṭayaśca mithyādṛṣṭikarmasamādānahetoḥ kāyasya bhedātparaṃmaraṇādapāyadurgativinipātaṃ narakeṣūpapadyante / iuti hi divyena cakṣuṣā atikrāntamānuṣyakena daśadiśi loke sarvalokadhātuṣu dharmadhātuparame ākāśadhātuparyavasāne ṣaṅgatikānāṃ satvānāṃ cyutopapādaṃ yathābhūtaṃ prajānāti" iti //

etāsu dhyānāpramāṇārūpyasamāpattyabhijñāsu vyastasamastāsu pratiṣṭhāpayediti sambandhaḥ / śeṣaṃ subodhamiti prathamaḥ stobhaḥ //

ita ūrdhaṃ tiṣṭhatvādayaḥ pratiṣṭhāpayedantāḥ pratyekaṃ pareṇa tatkiṃ manyasa ityādinā prabhāvanatāntena sahitā yathākramaṃ dvitīyatṛtīyacaturtha pañcamaṣaṣṭhaḥ stobhaḥ /

iti mṛdumadhyo mṛdvadhimātraḥ madhyamṛdu madhyamadhyo madhyādhimātraśca stobhaḥ //

punaraparādi punaraparāt prāk saptamaḥ / bhagavatyoḥ parebhyo dānaṃ pūrvakeṣvapyasti / iha tu svayaṃ ca vācanaṃ parebhyaśca likhitvā dānaṃ caryātireka ityadhimātramṛdustobhaḥ //

punaraparādi punaraparāt prāgaṣṭamaḥ / arthamasyā vivṛṇuyāditi yatpūrvamuktaṃ tatpāramitādīnāmaudārikaṃ rūpaṃ pratihatānāṃ prasādakaramabhipretya / iha tu koṭitrayānupālambhādikaṃ paramārthamabhipretyāha / arthakuśalādityādi / tatrārthakuśalasya vācanaṃ tamevārthaṃ manasikṛtya vācanāt / sārthāmiti tenaivārthena (RSt_54) sahitām / savyañjanāmiti tasyaivārthasya vācakā vyañjanā / upadiśet tasyārthasya sūtreṇa saṃsyandanāt / paridīnīpayed yuktibhiḥ / ayamaṣṭame caryātirekaḥ / ayaṃ ityaṣṭame vartamānaḥ / tata iti saptame vṛttāt / iyamapyupadeṣṭavyeti kākvā śiraḥkāyena vā praśnaḥ / naivopadeṣṭavyā parisphuṭāditi bhāvaḥ / abudhyamānasyeti jaḍadhiyaḥ / tasya yuktyāgamābhyāṃ samyaggrāhitasya paravācā calanāt / kaḥ punarenaṃ cālayiṣyatīti / etadāha tatkasya hetoriti / atrottaram / utpatsyate hityādi / bhagavatīdeśakenaiva yā tasyā viparītārthavarṇanā sā tasyāḥ prativarṇikā / tayaiva jaḍasya śraddhālorvañcanāt / utpattau ṇvuc paryāyārharṇotpattiṣu ṇvujiti vacanāt / tatreti tathā sati / mā praṇaṃkṣīditi saṃbodhimārgāt praṇaṣṭo bhraṣṭo mā bhūdityarthaḥ / ṇasa (śa) adarśane radhādiḥ / puṣādiśca / tasmā [ta].......ayaṃ prayogaḥ / tathāpyaṅvṛddhī na bhavataḥ / parasmaipadeṣu tayorvidhānāt / saṃjñāpūrvakasya ca vidheranityatvāt / yathā cāsyāḥ prativarṇikā bhavati yathā ca na bhavati tadubhayaṃ mahatyorbhagavatyorvistareṇoktaṃ- "yo rūpaṃ vedanāṃ yāvatsarvākārajñatāmanityaduḥkhanātmaśūnyāśubhākārairnimittayogena upalambhayogena bhāvayati sa prajñāpāramitāṃ bhāvayati / sa prathamāṃ bodhisattvabhūmiṃ yāvaddaśamīṃ yāvadanuttarāṃ samyaksambodhimadhigamiṣyatīti / ya evamupadekṣyati sa prativarṇikāmupadekṣyati // kathaṃ nopadekṣyati? rūpaṃ svabhāvena śūnyam / yaśca rūpasya svabhāvaḥ so 'bhāvaḥ / yaścābhāvaḥ sā prajñāpāramitā / tasyāṃ rūpameva nāsti kuto nityamanityaṃ vā bhaviṣyatītyevamādi / ya evamupadekṣyati nāsau prativarṇikāmupadekṣyati" iti // ata ihāpi kathaṃ bhagavannityādinā prativarṇikāparijñānāya śakrasya praśnaḥ / bhaviṣyanti kauśiketyādinā bhagavata uttaram / rūpīṇī pañcendriyāṇi kāyasaṃgṛhītatvāt paramāṇusañcayatvādvā kāyāḥ / te abhāvitā anabhyastasaṃvaratvādyeṣāṃ te tathoktāḥ / asaṃvṛtendriyatvāt abhāvitaśilāḥ / tato 'bhāvitacittā anabhyastasamādhayaḥ / tato abhāvitaprajñāḥ samāhitacittasyaiva yathābhūtaprajñānāt / tato duṣprajñā viparītadṛṣṭayaḥ / tata eḍamūkāḥ sūktīnāmaśravaṇāt / ......prajñāparihīṇāḥ samyagdṛṣṭibhaṅgāt rūpānityatetyupalakṣaṇam / duḥkhatādayopi draṣṭavyāḥ / nityaṃ na bhavatītyanityatā mahāyāne / tadvyavacchedārtha vināśagrahaṇam / vināśalakṣaṇā anityatetyarthaḥ / na hi satāṃ vināśo nāpyanupa(tpa)nnānām / tasmādvināśadarśī tānvastudharmānupalabheta / sattā(tā)mutpādavināśau ca / tadevaṃ (RSt_55) nityatādicaturviparyāsapratipakṣeṇa hinayānasaṃgṛhītāyāḥ samyagdṛṣṭeḥ prajñāpāramitātvena yā deśanā sā tasyāḥ prativarṇiketyuktaṃ bhavati /

athaiṣāṃ rūpādīnāmanityatāduḥkhādibhāvanā bodhisattvena bhāvayitavyā na cetyata āha / na khalu punarityādi / draṣṭavyeti bhāvayitavyetyarthaḥ / yadi bhāvayetko doṣaḥ syādata āha / sa cedityādi / prativarṇikāyāmiti hīnayāna ityarthaḥ / evamasyāṃ bhagavatyāṃ samāsataḥ prativarṇikāṃ darśayitvā tasyā caryā pratiṣiddhā / yathā tu prativarṇikā na bhavati tatprathamata eva sūcitaṃ arthakuśalo vācayedityādinā / yaḥ punaḥ śūnyatāniḥsvabhāvatādipadeṣu māhāyānikammanyānāṃ viparyāsastatpratipakṣeṇa dharmakāyakāritraprakaraṇe 'viparyāsakāritraṃ mahatyorbhagavatyoruktam / asyāmapi bhagavatyā madhye 'viparyāsaḥ prāptinirvāṇe sarvākārajñatāniryāṇe 'ṣṭavidhe ca gāmbhīrye parisphuṭamuktaḥ / tasmāttata evāvadhāraṇīyaḥ // ityadhimātramadhyastobhaḥ //

punaraparādiḥ punaraparātprāk pañcatiṣṭhaturnavamaḥ / strotaāpattiphala evaṃ prabhāvyata iti tāvatsattveṣu niṣpādyate / ityadhimātrastobhaḥ /

punaraparādiḥ punaraparāt prāk pañcatiṣṭhatuḥ prathamā / sakṛdāgāminaḥ phalam / iti mṛdumṛdvī praśaṃsā //

punaraparādiḥ punaraparāt prāk pañcatiṣṭhatudvitīyā / anāgāminaḥ phalama / iti mṛdumadhyā praśaṃsā //

punaraparādiḥ punaraparāt prāk pañcatiṣṭhatustṛtīyā / arhatvamarhato bhāvaḥ / iti mṛddhadhimātrā praśaṃsā //

punaraparādistiṣṭhatoḥ prāk caturthī / svayamabhisaṃbodhābduddhaḥ, ekamātmānaṃ pratibuddhaḥ pratyekabuddhaḥ / itimadhyamṛdvī praśaṃsā //

tiṣṭhatvādipañcakena pañcamī / iti madhyamadhyā praśaṃsā //

punaraparādistiṣṭhatoḥ prāk ṣaṣṭhī / kaścideveti prathamaḥ / yaśceti dvitīyaḥ / yo veti tṛtīyaḥ / upanāmayediti dadyāt / kenāśayanetyāha / atraivetyādi / vṛddhyādikaṃ gataḥ prāptaḥ / ayamiti tṛtīyaḥ / tasmāditi prathamād dvitīyācca / iti madhyādhimātrā praśaṃsā //

tiṣṭhatvādipañcamena saptamī / ityadhimātramṛddhī praśaṃsā //

punaraparādistiṣṭhato prāgaṣṭamī / saṃkhyāpi bhagavannityādi / tatra saṃkhyā pūrvakātpuṇyāduttaraṃ puṇyaṃ śataguṇaṃ sahasraguṇaṃ ityādi / gaṇanā daśaguṇitaśataguṇamityādi / upamā gaṅgānadīvālukāguṇamityādi / aupamyaṃ daśagaṅgānadīvālukāguṇamityādi / upaniśā daśaguṇitaśatagaṅgānadīvālukāguṇamityādi / parimāṇasyātyantamasambhavāttadartha yā upaniṣat samīpe niṣadanam / sāpi na sukarā kartum / ityadhimātramadhyā praśaṃsā //

tiṣṭhatvādipañcakena navamī / yathāyathetyādinā kauśikaḥ puṇyātirekopapattimāha / sādhu sādhvityādinā taṃ subhūtiḥ sopapattikaṃ protsāhayati / ityadhimātrādhimātrā praśaṃsā //

puṇyasya paryāyā bhedāstad dyotakaḥ parivartastatparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ pañcamaḥ parivartaḥ //

6. anumodanāparimāṇamanāparivarto nāma ṣaṣṭhaḥ /

uktāḥ stutistobhapraśaṃsāḥ / pariṇāmanāmanaskāro vaktavyaḥ / tamadhikṛtya śāstram-

[51] viśeṣapariṇāmastu tasya kāritramuttamam //

sarvasattvānāṃ dānaśīlabhāvanāmayāt puṇyaugho viśiṣyate prakṛṣyate 'neneti 'viśeṣaḥ' / sa punarasyāḥ sarvasattvānāmagratāyai samyaksaṃbodhikaraṇatā / (RSt_57) "sarvasattvasādhāraṇaṃ kṛtvā anuttarāyai samyaksaṃbodhaye pariṇāmayati taccānupalambhayogena" iti mahatyoḥ pāṭhāt / tena viśeṣeṇa 'pariṇāmaḥ' //

tamāha / atha khalu maitreya ityādinā / bodhisattvasyeti / utpāditabodhisacittasya / yathoktaviśeṣaviśiṣṭatvānmahāsattvaḥ, pariṇāmanā vyavasāyo 'syeti mahāsattvasya / anumodanāsahagataṃ kuśalaṃ anumodanā / sā cānupalambhapariṇāmasyādau vistareṇa vakṣyate / tasyāḥ pariṇāmanā / tayā sahagatam / idameva ityasya pareṇa puṇyakriyāvastuśabdena sambandhaḥ / tata iti sarvasattvānāṃ dānādimayāt puṇyāt sakāśāt / agramākhyāyate yāvad asamasamamākhyāyate / tasmādagrādi / agrādiphalahetutvāt / tadapi kutaḥ? yathākramaṃ pramuditādyekādaśabhūmisaṃgṛhītasvaparārthasaṃpattihetutvāt / paryāyatvepi sarveṣāmupādānasāmarthyāt / asamābuddhāsteṣāṃ sādhāraṇo viśeṣo 'samasamaḥ / samantaprabhāsāyāṃ bhūmau / kathaṃ dharmameghāyāmasamaḥ? asamasādharmyāt / "daśabhūmīśvarastu bodhisattvo buddha eva draṣṭavyo na tu samyaksaṃbuddhaḥ" iti vacanāt / tadevamagrādipadebhyaḥ pūrveṇa granthena viśeṣapariṇāma uktaḥ / agrādipadaistasyaiva 'kāritramuttamaṃ' iti viśeṣapariṇāmaḥ sakāritraḥ //

evamukta ityādinā anupalambhapariṇāmamāha / daśadiśo 'sminniti daśadiśi loke, ākāśaparimāṇe bhājanaloke / sarvata iti tāsu sarvāsu dikṣu / sarvatragatayeti vyāpitayā ghanatayetyarthaḥ / aprameyādiṣu vīpsā digbhiḥ pratyekamabhisambandhārtham / anantāparyanteṣvityanantānanteṣu / tadiyamarthato dviruktirna śabdataḥ / tatra digdeśyānāmaparicchedāt aprameyāḥ / saṃkhyāyā aparicchedāt asaṃkhyeyāḥ / digvaipulyenāparicchedāt aparimāṇāḥ / pratyekaṃ cintayitumaśakyatvāt acintyāḥ / tāsveva cintāsvantagamanāt anantāḥ / evaṃ sākalyena pratidiśamananteṣu trisāhasreṣu pratidiśaṃ ya ekaikastrisāhasraḥ / tasmin aprameyāprameyāṇāṃ yāvat anantāparyantānāṃ tathāgatānāmiti sambandhaḥ / ihāpyekaikena trisāhasreṇa sambandhārtha vīpsā / nanvekasmiṃstrisāhasre eka eva tathāgato nāprameyādiriti cedāha / atīte 'dhvani iti / ekadā traikastathāgato na sarvadā / atītaḥ punaradhvā anāditvāt aprameyaḥ tata ekasminnapi lokadhātāvatīte 'dhvani aprameyāstathāgatāḥ kāladairdhyeṇāparicchedāt / tāvantaśca te saṃkhyayā aparicchedāt asaṃkhyeyāḥ / manasā tiryaksaṃniveśya vaipulyenāparicchedāt aparimāṇāḥ / ekaikacintayā acintyāḥ / ekaikacintāyāmantāgamanāt anantāḥ / īdṛśānāṃ tathāgatānāṃ parinirvṛtānāmiti na tu tiṣṭhatām / arayaḥ kleśāstān hatavanta iti arhatām / aviparītasarvadharmajñānāt samyaksambuddhānām / anena padadvayena prahāṇajñānasampadāvukte /

bhavapathatvāddharme asmimāṇo(no) [vartmaniḥ] / vṛteranipratyayaḥ / saraṇidharaṇivat / muḍāgamaśca / vartmanistṛṣṇā bhavapadavītvāt / yathoktaṃ- "asmimānaḥ pitā ukto mātā tṛṣṇeti cocyate" iti / tayorūnmūlanāt chinnavartmanāṃ chinnavartmanīnāṃ ca / prapañco dvayakalpanā, bhavaḥ saṃsāraḥ / tayornetryau nāyike yathākramaṃ dharmadṛṣṭiḥ pudgaladṛṣṭiśca / tayoḥ parikṣayāt chinnaprapañcabhavanetrīkānāṃ paryāttabāṣpāṇāmiti / punarbhavābhāve na punarbandhano na śoko nāśru / tataḥ parikṣīṇabāṣpāṇām / kaṇṭakasādharmyāt kaṇṭakāḥ kudṛṣṭayaḥ / teṣāṃ kṣodanāt marditakaṇṭakāḥ / śeṣaṃ nidāna eva vyākhyātam / prathamacittotpādo yaḥ pṛthivīsamaḥ / tamupādāya tata ārabhya / etasminnantara ityetāvatyavakāśe / śīlādiskandhaḥ śīlādirāśiḥ / bodhisattvānāmapi balādayaḥ santi / na tu te pāraṅgatāḥ / tatastadvyavacchedāya pāramitāgrahaṇam / anāśravo mārgaḥ parijñaḥ / sarvajñajñānaṃ samyaksambodhiḥ / pūrvaṃ buddhaguṇādibhiḥ saṃprayuktāni / ye cetyādinā buddhaguṇādinapyāha / samyaksambodhireva sukhamupaśamasukhatvāt / sarvadharmeṣu aiśvarya vaśitā / ṛddherabhisaṃskāra kriyā / anāvaraṇaṃ śuddhatvāt / asaṅgamanapekṣatvāt / apratihataṃ sarvasmin sarvākārajñeyapravṛtteḥ / anupama tasyānumānāya viśeṣadṛṣṭāntabhāvāt / parito 'vacchedaḥ parimāna(ṇam) / aśeṣaviśeṣāntarāyāt rūpagrāhi pratyakṣam / tasya tasmin pareṣāmabhāvādaparimeyam / tathāgatānāṃ yathābhūtajñānasamyagjñānam / tadeva balaṃ sarvābhibhūtatvāt / yadbuddhajñānabalamiti / buddhajñānasya balaṃ śaktirniravadhisarvākāraviśvārthakriyāyai / balānāṃ yadbuddhaiḥ jñānadarśanaṃ prāptisākṣātkaraṇam / caturvaiśāradyena suparipūrṇo 'dhigamaḥ svadharmāṇāṃ yaśca dharmādhigama iti sambandhaḥ / sa katham? sarvadharmāṇāṃ paramārthasya samyagjñānasyābhinirhāreṇa niṣpādanena / triparivarta dvādaśākāraṃ lokottaraṃ jñānaṃ dharmaḥ / sa eva cakraṃ devamanuṣyeṣu caṃkramaṇāt / tasya pravartanaṃ daśasu dikṣu / ayamuddeśaḥ / asya nirdeśo navabhiraṅgaiḥ / tasyaiva dharmasya dyotanī vāg dharmoktā / tasyāḥ pragrahaṇaṃ manasā vyavasthāpanam / saiva vāg dharmabherī / tasyāḥ saṃpratāḍanaṃ vineyajayaśrāvaṇam / saiva vā dharmaśaṅkhaḥ / tasya pūraṇaṃ vineyaireva jñānam / tasya dharmaśaṅkhasya pravyāharaṇam / tamevālambya tadarthākāreṇa manasi kurvatāṃ cintābhāvanayoḥ pariniṣpattiḥ / bhāvānābalādutpannaṃ tadeva lokottaraṃ jñānaṃ dharmakhaṅgaḥ / tena praharaṇaṃ kleśānāṃ vidhvaṃsanam / tasyaiva bhūyasi jane pravṛttiḥ dharmavṛṣṭiḥ / tasyāḥ pravarṣaṇam / sa eva yajño nirargaḍatvāt / tasya yajanam / tasya dharmasya dānena sarvasattvānāṃ santapaṇaṃ saṃpravāraṇaṃ ca pariveṣanaṃ(ṇam) / vinītāḥ smṛtyupasthānaiḥ (RSt_59) satyeṣvavatāraṇāt / śikṣitāḥ samyakprahāṇarddhipādaiḥ / adhimuktā indriyabalairekāntaniścayāt / niyatā avinivṛtteḥ / buddhānāṃ pariṣadāmiti vyadhikaraṇe ṣaṣṭhi / parinirvā[pa]yatāmiti okhai śoṣaṇe / buddhānāmasyeti kṣetrīkṛtya mānaso bhāvanaṃ rañjanam / tasmai hitā manobhāvanīyāḥ prasādakarā ityarthaḥ / niravaśeṣamabhisaṃkṣipya anavaśeṣamanumodeteti sambandhaḥ / aikadhyamityaikarāśyena / abhisaṃkṣipyetyasya vivaraṇaṃ piṇḍayitveti tulayitveti / samāhiteneti manasā nirūpya / anumodeteti prītyālambanaṃ kuryāt / anumodanayeti prītyotpādanayā / agrayeti prakṛṣṭayā / kathaṃ tarhi ekādaśapadāni? ekādaśavidhepyālambane tasyāḥ prakarṣāt / tat kutaḥ? madhye daśasu ca dikṣu ye tathāgatāḥ teṣāṃ saparicchadena yāni kuśalamūlāni tadālambanatvāttasyāḥ / kathaṃ pariuṇāmayatītyata āha / bodherāhārakaṃ ākarṣakaṃ bhavatviti /

tadevamukta ityādinā vistareṇa sthavirasubhūtiryathānumodya yathā bodhisattvaḥ pariṇāmayati taduktavān / yathā tu tatrānupalambhayogaḥ kartavyastadupadarśanāyāryamaitreyaṃ tatretyādinā pṛcchati / yairvastubhiriti daśadik tathāgatādibhiḥ / yerālambanairiti tadīyaiḥ kuśalamūlaiḥ / yerākāreriti śīlasamādhiskandhādibhiḥ / taccittamityanumodanācittam / api tviti kintu / upalabhyeranniti śaktau liṅga / upalabdhuṃ śakyata iti praśnaḥ / nimittīkarotīti vikalpayati / anyathā anumodanāpariṇāmanayorayogāt //

āryamaitreya āha / na tānītyādi sthavira āha / evantarhi viparyāsāḥ syuriti / asata eva nimittodgrahāt grahaṇāt santīraṇācca yathokramaṃ saṃjñāyāścittasya dṛṣṭeśca viparyāsaḥ / eṣāṃ sādhanārtha rāgo dṛṣṭāntaḥ athāpīti paramatamāśaṅkate / yādṛśo yakṣastādṛśo baliriti bhāvaḥ / cittamiti pariṇāmanācittam / sarvadharmā ityuddeśaḥ / sarvadhātava iti nirdeśaḥ /

yadi cetyādinā doṣamāha / katamairvastvādibhiriti / anumodanācittasambandhibhiḥ / cittamiti pariṇāmanācittam / tasyāpi niḥsvabhāavatvāt / kveti kasyām / pariṇāmanaiva na syāditi bhāvaḥ //

ata evāryamaitreya āha / nedamityādi / yadapi hi syād bhavet / kva? anumodanāpariṇāmanādau / mātragrahaṇamanuṣṭhānavyavacchedārtham / śraddhā saṃpratyayaḥ / prema prītiḥ / prasādo manasaḥ kāluṣyavigamaḥ / gauravaṃ bhaktiḥ / (RSt_60) upastabdhaḥ sthirīkṛtaḥ / avalayaścittasyāva[na]tiḥ / saṃlayaḥ sannatiḥ / viṣādaḥ khedaḥ / vi[ṣā]dāpattiḥ khedapravāhaḥ / trāsodyama uttrāsaḥ / samagrastrāsaḥ saṃtrāsaḥ / tatpravāhaḥ saṃtrāsāpattiḥ / evaṃ ceti / avalayādyabhāve / yenetyādi / yadityanumodakaṃ cittam / kṣīṇamityuddeśaḥ / niruddhaṃ vinaṣṭatvāt / vigatamasthitatvāt / vipariṇataṃ taditi na kiñcinniḥsvabhāvatvāt /

samavadhānaṃ tulyakālatā / cittaṃ niruddhaṃ cittadharmatā śāśvatī cedāha / na cetyādi / tasyā asaṃskṛtatvena pariṇāmāyogāt / sugṛhītavacanaṃ durguhītasya supariṇāmitatvāyogāt / ārabhyetyadhikṛtya / kathamityāha / adhiṣṭhānaṃ praśnādhikaraṇaṃ kṛtveti / tatkatham? iha maitreyeti vacanāt / āmantrayate smeti brūte sma / iha maitreyetyata ārabhya kathaṃ saṃjñādiviparyāso na bhavatīti yāvat / evaṃ āryamaitreya uttaramāha / sa cedityādi / yena cittena yatpariṇāmayatīti yaccittaṃ pariṇāmayati / tasminnityubhyasmin / evamiti sugṛhītatvāt / pariṇāmitamiti supariṇāmitam / sphuṭīkarttumāha / yathetyādi / evamityādinopasaṃhāraḥ / kadā tarhi viparyāsaḥ syādityata āha / athetyādi / iyatā viparyāsaprasaṃge codyaṃ parihṛya prakṛtānupalambhakhyāpanāyāha / sa cedityādi / evaṃ sañjānīta ityuddeśaḥ / evaṃ samanvāharatīti nirdeśaḥ / aviparyāsena manasikarotītyarthaḥ / tadityādi / tat cittamevaṃ samanvāhriyamāṇamiti sambandhaḥ / kṣoṇamityādibhiḥ paryāyairmanasi karoti / na tacchakyamiti / asattvācchaśaviṣāṇavat / sava dharmateti niḥsvabhāvataiva / dharmeṣviti buddhadharmeṣu / sa ce dityādinopasaṃhāraḥ / evamityanupalambhena / sarvatra śūnyataikarasena manasikāreṇetyarthaḥ / itīdamāryamaitreyo 'tītān buddhānadhikṛtyoktavān / anāgatānadhikṛtyāha punaraparamityādi / pratyutpannānadhikṛtyāha punaraparamityādibhiḥ / anupalambhapariṇāmo dvitīyaḥ //

punaraparamityādi / atra saṃkṣepeṇa tryaiyadhvikabuddhādīnāṃ puṇyānumodanā / agrāditvaṃ purvavat / atrāviparyāsaṃ darśayitumāha / tasya kathamityādi / evaṃ samanvāharatīti samanvāhāraḥ samyagmanasikāraḥ / te dharmā iti ye pariṇāmayitavyāḥ / sa ca dharmo 'kṣaya iti / anuttarā samyaksambodhiḥ suviśuddhadharmatālakṣaṇā / evaṃ pariṇāmitaṃ bhavatītyaviparyāsāditi bhāvaḥ / na dharmo dharma pariṇāmayatīti niḥsvabhāvatvāt sarvadharmāṇām / ityapīti / evamapi pūrvavat / ata evāha / evaṃ bhadantetyādi / sa cedityādinā prakārāntaramāha / ayamityādinopasaṃhāraḥ / ityaviparyāsapariṇāmastṛtīyaḥ //

sa cedityādi / puṇyābhisaṃskāraḥ puṇyakarma / saṃjñānamabhiniveśaḥ / kathaṃ tarhi pariṇāmayatītyāha / sa cedityādi / viviktaḥ śāntaśca yathākramaṃ svaparaiḥ svaparalakṣaṇaiśca śūnyatvāt / punaḥ sa cedityādinaitadāha / viviktaśāntatvajñānepi yadi tabhdāvābhiniveśaḥ syāt tadā na samyakpariṇāmayati / evamityādinopasaṃhāraḥ / prajñāpāramiteti vacanam / tayaiva samyakpariṇāmanāditi viviktapariṇāmaścaturthaḥ //

yadapītyādinā smaraṇam / yādṛśa evetyādinā nirūpaṇam / yādṛśa eva sa pariṇāma ityanuttarā samyaksaṃbodhirdharmadhatusvabhāvā tādṛśameva taditi labhyate nityābhisambandhāt / dharmadhātusvabhāvameva tadityarthaḥ / tādṛśameva tatkuśalamūlamiti yadanumodanāsahagatam / yenāpīti pariṇāmanācittena / tadapīti tadapyubhayam / tajjātikamiti saiva jātiḥ sāmānyaṃ yasya / tallakṣaṇamiti tadeva sāmānyalakṣaṇaṃ yasya / tannikāyamiti tadrāsi(śi)kam / tatsvabhāvamiti tatprakṛtikam / sa cedevaṃ saṃjānīta iti / yadyanenāpi tādṛśatvādinā tattvenābhiniviśate tadā na samyakpariṇāmayati /

yaccātītamityādinā aparaṃ tattvavikalpamāha / asaṃprāptamanutpannam / sthitirnāstīti prakṛtyaiva naśvaratvāt / tasmāt trayamapi nopalabhyate tato 'sat / tato naiva nimittamakāraṇatvāt / nākāraṇaṃ viṣayaḥ / sa cedityādi / evamiti kṣīṇatvādinā tattvena / nimittīkarotītyupalabhate / tadā na samanvāharati na samyagmanasikaroti / tadā na samyak pariṇāmayati /

yadā tarhyanavabodhādasmaraṇādvā na nimittīkaroti tadā samyakpariṇāmaḥ syāditi cedāha / athetyādi / evamapīti / evamanimittīkaraṇepi na pariṇāmayati / pariṇāmanāmātrasyāpyabhāvāditi bhāvaḥ / kadā tarhi samyakpariṇāmitaṃ bhavatyata āha / athetyādi / ya(a)thaśabdo yadyarthaḥ / taditi tādṛśatvādikam / animittaṃ saviṣayatvañca / nimittamiti samyagjñānālambanam / samanvāharatīti samyagmanasikaroti / na ca nimittīkarotīti na sañjānāti nābhiniviśate / evamatretyādinopasaṃhāraḥ / evaṃ bauddhapuṇyaughasya yaḥ svabhāvo dharmatā tayā anusmaraṇam / anumodyādīnāmiti bauddhapuṇyaughasvabhāvānusmṛtipariṇāmaḥ pañcamaḥ //

idaṃ tadityādi / ivamiti yadenadubha[yaṃ] tattvasya manasikāro na ca nimittīkaraṇam / tacchabdaḥ prasiddhau / upāyakauśalaṃ yatprasiddhamidaṃ tat / ya ityādinā anuśaṃsamāha / athāsmin upāyakauśale ka upāya ityata (RSt_62) āha / atra cetyādi / iyameveti / sūtrātmikaiva / aśrutavateti imāmasyāṃ veti śeṣaḥ / prajñāpāramitāyā yā pariṇāmanā saiva puṇyakriyā / seyaṃ praveṣṭumavagāhituṃ na hi śakyeti sambandhaḥ / tatreti tathā sati / sa maivaṃ vocaditi syādvacanīya / kosāvityāha / ya ityādi / iti sopāyapariṇāmaḥ ṣaṣṭhaḥ //

tatkasyetyādi / idaṃ taditi yaduktaṃ tatkuta ityarthaḥ / ātmabhāvāḥ kāyāḥ / saṃskāraḥ kuśalamūlāni / ataśca te śāntā viviktāḥ niḥsvabhāvā ityarthaḥ / ataśca virahitā upalabdhyā nopalabhyanta ityarthaḥ /

api tviti / yadyapi nopalabhyante tathāpi yathābhūtamaviparītaṃ niruddhatvādikam / nimittīkṛtyetyudgrahataḥ / vikalpya cetyabhiniveśataḥ / ayathābhūte vikalpapratibhāse yathābhūtaniruddhādisaṃjñī / upalambhaṃ ātmīyaṃ anupalambhe samyaksaṃbodhau pariṇāmayet / tataḥ kimityāha / tasyetyādi / parinirvāṇamapīti / apiśabdo 'tiśayārthaḥ / tasyātyantaṃ nimittīkaraṇādyayogāt / saviṣaḥ saśalyaśca tāddharmyāt / ityanimittapariṇāmaḥ saptamaḥ //

tadyathāpītyādi / praṇītaṃ varṇādiprakarṣāt / kiṃ cāpīti yadyapītyarthaḥ / api tviti tathāpītyarthaḥ / khalu punariti vākyālaṃkāro manyeteti varṇādilābhāt / svādanaṃ svādaḥ paribhogaḥ / pariṇāme ceti avasāne ca / vipākaphalam / durgahīteneti mithyāśrutena / durupa [la]kṣiteneti durvitarkitena / duḥsvādhyāteneti durabhyāsena / subhāṣitam / iti karaṇasamāptyarthaḥ / evaṃ sa iti yoyamuktaḥ / saviṣatvāditi / anarthakaraṇaśaktiratra viṣam / tasmād ityupasaṃhāraḥ /

kathamityādinā praśnāḥ / ihetyādikamuttaram / abhyākhyānaṃ nindā / abhūtavāditayā khyāpanāt / parigrahītavyādipadeṣu parigraheṇānumodanā lakṣyate / nāntarīyakatvāt / buddhajñānena jñā(jā)nanti buddhacakṣuṣā paśyantīti sambandhaḥ / evaṃ cāsyetyupasaṃhāraḥ / nirviṣatvādikaṃ sarva kuta ityāha adhyāśayenetyādi / iti buddhānujñātapariṇāmo 'ṣṭamaḥ //

punaraparamityādi / śīlādīti tathāgataḥ śīlādiskandhaḥ / aparyāpannamanantarbhūtaṃ / tryadhvatraidhātukāparyāpannatvāditi / adhvatraye dhātutraye cānantargatatvādityarthaḥ / dharmadhātumātratvāt teṣāṃ śīlādīnāmiti bhāvaḥ / pariṇāmopīti pariṇāmanāpi / yatrāpi dharma iti samyaksambodhau / avinaṣṭa ityaduṣṭa / aparyāpannaḥ / buddhānujñātapariṇāmayordharmadhātupariṇāmatvena samatāṃ (RSt_63) darśayitumāha / tatretyādi / atra dvitīyādiśabdātpareṇa vārtho gamyate / yoyaṃ dharmadhātupariṇāmanayā pariṇāmaḥ / ayaṃ samyakpariṇāma iti sambandhaḥ / katamayetyāha / anayetyanantaroktayā / aparyāpannapariṇāmanayetyarthaḥ / yathā buddhā bhagavanta ityādikayā buddhānujñātapariṇāmanayevetyarthaḥ / evaṃ cetyupasaṃhāraḥ / itya paryāpannapariṇāmo navamaḥ /

atha khalvityādi / yo hyayamiti yohyaparyāpannākhyaḥ / asyāmevetyādinā pariṇāmayatītyetatparyantena buddhānujñātapariṇāmasya nirdeśaḥ / atretyanayordharmadhatupariṇāmanayoḥ / agrāditvaṃ pramu[di]tādyekādaśabhūmigataprakarṣahetutvāt / śeṣaṃ subodham / yāvatpañcānāmabhijñānāṃ lābhino bhaveyuriti / ihokte mahāpuṇyodaye yacchaddhādikaṃ sa pūrvakādviśeṣaheturiti mṛdurmahāpuṇyodayapariṇāmo daśamaḥ //

tiṣṭhatvityādi subodhaṃ yāvatpratyekabuddhā bhaveyuriti / ihoktapuṇyātireke śraddhādikaṃ pūrvakādviśeṣaheturiti madhyo mahāpuṇyodayapariṇāma ekādaśaḥ //

tiṣṭhatvityādi / ye subhūta ityādinā dadyurityetadantenoddeśaḥ / etena paryāyeṇetyādinā dadyurityetadantena nirdeśaḥ / eteneti vakṣyamāṇena / glānaṃ glāniḥ / tatpratyayāni taddhetukāni bhaiṣajyāni / pariṣkārāḥ pariśrāvaṇādayaḥ / sukhahetavaḥ sukhāḥ / teṣāṃ upadhānaiḥ ḍhokanaiḥ / sukhasparśaḥ sukhānubhavaḥ / tena ye vihārāḥ caṃkramādayaḥ / tān sarvasattvānekakaṃ parikalpyeti / upastheyatvena pṛthagavasthāpya / tāṃśca sarvabodhisattvāniti / ekaikaṃ parikalpyeti vartate / upasthāpakatvena pṛthagavasthāpya / ekaṃko bodhisattva iti / upatiṣṭhaditi sambandhaḥ / kimupatiṣṭhet? prakṛtatvāttāneva sarvasattvān / ekaṃkasteṣāṃ sarvabodhisattvānāmiti nirdhāraṇe ṣaṣṭhī / teṣāṃ madhye ekaikaḥ dānaṃ dadyāditi / tebhya eva sarvasattvebhyaḥ / tāvaccirarātrasañcitamiti / tāvatā dīrghakālena sañcitam / tathā mahāvistarasamudānītamiti / tāvanmahāvistareṇotpāditam / tiṣṭhatu khalu punarityādi / pūrvatra gaṃgānadībālukopamalokadhātuvīryāḥ sarvabodhisattvā upasthāpakāḥ pratyekaṃ gaṃgānadībālukopamalokadhātuvīryānāṃ sattvānām / tatra yāvanta upastheyāḥ sattvā iha tāvanta upasthāpakā bodhisattvāḥ pratyekaṃ gaṅgānadīvālukopamā lokadhātuvīryānāṃ sattvānāmiti viśeṣaḥ / tānsarvasattvān (RSt_64) ekaikaṃ parikalpitāṃśca sarvabodhisattvāniti pūrvavat / śeṣaṃ subodham / ityadhimātro mahāpuṇyodayapariṇāmo dvādaśaḥ //

samāptaśca pariṇāmanāmanaskāraḥ //

anumodanāmanaskāro vaktavyaḥ / tamadhikṛtya śāstram-

etadāha / atha khalvāyuṣmānityādinā / niravaśeṣyeti niravaśeṣīkṛtya / agratvādīni caturdaśoktāḥ / kiyatā agratā bhavatīti praśnaḥ / iyatā bhavatītyuttaram / kotrābhiprāyaḥ? agratvameva daśadigmadhyatryadhvakuśalālambanatvāccaturdaśavidhaṃ bhavatīti / yatra tarhi trayodaśapadāni tatrāpi daśadiktryadhvabhedāt trayodaśavidham / tatra kathaṃ madhyamalokadhātoḥ saṃgrahaḥ? tanmadhye sūkṣmamavadhiṃ kṛtvā diśāṃ grahaṇāt / lokadhātvekadeśeṣvapi lokadhātuvyapadeśāt / tadyathā aṣṭānāṃ vā navānāṃ vā māsānāmatyayāt prasūteti / yadā hi triṃśadrātrā māsāstadāṣṭau / yadā māsaikadeśopi māsastadā nava / na gṛṇhīte grāhyatvenāpratibhāsāt / na manyate vastutvenāpratibhāsāt / nopalabhate svarūpato apratibhāsāt / na kalpayati sāmānyalakṣaṇena / na vikalpayati viśeṣalakṣaṇaiḥ / na paśyati dṛṣṭyā anabhiniveśāt / na samanupaśyati santatamanabhiniveśāt / kalpanā abhūtaparikalpaḥ / tathā viṭhapitāḥ saṃdarśitāḥ / ajātā nirbījatvāt / anirjātā aniṣpatteḥ / anāgatikā anāgatādadhvanaḥpūrvalokādvā / agatikā atītādhvani paraloke vā / evaṃ yāvat nāpi nirudhyata iti / niḥsvabhāvatvātparikalpatatvādveti hetuḥ / evamiti parikalpitena svabhāvena / itthaṃ bhūtān etān dharmāniti paratantrarūpān kuśalān / dharmateti bālabuddhigocaraiḥ svabhāvaiḥ śūnyatā / anumodanādhikārepi tathā anumodya tathaiva pariṇāmayatīti vacanamavaśyapariṇāmanīyatvāt / śeṣaṃ vyākhyatameva yāvat na kṣamata iti / ityanupalambhānumodanā prathamā //

punaraparamityādi / vimuktirnirvāṇam / tacca dharmadhātoḥ sarvāvaraṇaviśuddhitā paramārthatastathaiva sarvaṃ dānādītyarthaḥ / saṅgastṛṣṇā / tadabhāvād (RSt_65) asaktānāṃ tṛṣṇāhetukasya janmano 'bhāvād abaddhānām / tato amuktānām / apariṇāmanāyoge tasyāpyanupalambhāt / sa kathamityāha / asaṃkrāntito avināśata iti / tathāhyavasthāntarasaṃkrāntiḥ pariṇāmaḥ pūrvavināśāparotpattī vā / na ca dharmadhātoravasthā / na ca saṃkramo nāpi vināśa iti /

samādāyoti gācarataḥ (?) sāvadhikamādāya / ākruṣṭaḥ śaptaḥ / abhihatastāḍitaḥ / paribhāṣito bhūtābhūtadoṣasthānaiḥ / samān iti sannityarthaḥ / styānaṃ ca middhaṃ ca tenābhibhūtā iti sambandhaḥ / tatra styānaṃ cittasyākarmaṇyatā staimityam / staimityalakṣaṇā yā cittasyākarmaṇyatā svālambanapratītaye tat khalu styānam / middhamasvatantravṛttiścetaso 'bhisaṃkṣepaḥ / cetaso 'bhisaṃkṣepaścakṣurādīndriyadvāreṇāpravṛtiḥ / sa cedasvādhīnā / cetaso vṛttistanmiddham / śeṣaṃ subodhamāparivartasamāpteḥ / upāyo vimuktisādṛśyam / teneyaṃ dharmadhātoranumodanānupalambhenetyupāyānumodanā dvitīyā //

anumodanā ca pariṇāmanā ca tasyāḥ / tayorabhidhāyakaḥ parivarto anumodanāpariṇāmanāparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākāraśāntiviracitāyāṃ ṣaṣṭhaḥ parivartaḥ //

7. nirayaparivarto nāma saptamaḥ

laukiko bhāvanāmārgastrayo manaskārāḥ / taduktaḥ / lokottarastu bhāvanāmārgo 'nirhāraḥ śuddhiratyantaṃ' iti pūrvamuddiṣṭaḥ / tatra nirhāramadhikṛtya śāstram-

pañcāṅgāni nirhārasya / 'tasya' iti bhāvanāmārgasya prajñāpāramitāviśeṣasya 'svabhāvaḥ' sarvajñajñānapariniṣpādakatvādidharmacakrapravartakatvaparyantaḥ / 'śreṣṭhatā' ṣaṭ pāramitāsu / abhinirhāraḥ sarvadharmāṇāṃ 'anabhisaṃskāraḥ' / anupalambhena sarvadharmānarpayatīti 'arpaṇā' / sarvadharmānupalambhenaiva bodheḥ prāpaṇāt 'mahārthatā' iti / ata āha / atha khalvityādi / asya hi bhāvanāmārgasya svabhāvaḥ prajñāpāramitā / kīdṛśītyāha / sarvajñajñānasya (RSt_66) pariniṣpattiḥ yataḥ sā tathoktā / sarvajñatvamiti sarvāvaraṇavāsanānusandhiprahīṇaṃ jñānam / prahāṇasampatsahitā jñānasampadityarthaḥ / tadapi sarvajñatvameva / atropapattiravabhāsakaroti / sarvāvaraṇatamaḥprahāṇamavabhāsaḥ / tatkareti prahāṇasampat / sarvadharmaparamārthapratibhāso vā avabhāsaḥ / tatkareti jñānasampat / ataścaināṃ namaskaromi sāṃpratam / namaskaraṇīyeti / āyatyāṃ pratikṣaṇam / ekena padena dve sampadāvukte / idānīṃ padadvayena prahāṇamāha / anupalipteti sarvāvaraṇamalakṣayāt / sarvalokanirupalepeti triadhātukamalakṣayāt / idānīṃ padatrayeṇa jñānamāha / sarvadharmaparamārthapratibhāsa ālokaḥ / tatkarā / atra dvau hetū padadvayenāha / timiramajñānam / tadviparyayo vitimiraṃ jñānamityarthaḥ / sarva samagraṃ traidhātuka traidhātukaparamārthaḥ / tasminvitimiram / tatkarā / ityālambanavyāptiḥ / kleśāśca dṛṣṭayaśca tā evāndhakārāḥ / sarve ca te te ca teṣāṃ apanetrīti sarvavipakṣakṣayaḥ / iyatā sarveṇa svārthasampattiruktā / parārthasampattimadhikṛtyāha / āśrayaṇīyetyādi / āśrayaṇīyā sarvapadaprepsubhiḥ / agrāṇi padāni strota āpattiḥ sakṛdāgāmitvaṃ yāvatpratyekabodhiḥ / tatkarā / teṣāmupāyaḥ saptatriṃśad bodhipakṣyāḥ / teṣāṃ kṣamakarī vighnaharaṇāt / yāvanna lokottarajñānaṃ tāvad andhāḥ / teṣāṃ tadutpādanād ālokakarī / sarvabhayopadravaiḥ prahīṇa āloko lokottara eva bhāvanāmārgaḥ / tatkarā / iyatā hīnayānikānāmartha uktaḥ /

bodhisattvārthamadhikṛtyāha / pañcacakṣurityādi / te hi parārthapradhānāḥ / tasya saiva sādhanamālambanabhedena pañcacakṣuḥparivārā / abhedena saiva cakṣu sarvadharmaparamārthadarśanāt / vyāpino darśanasya trayo vibandhāḥ / mohatamaritamirāṇi / tatra moho ajñānam / tamondhakāram / timiraṃ cakṣurogaḥ / teṣāṃ vikaraṇī vidhvaṃsanī / saṃkṣepato vitimirakaraṇī timirasāmānyāt / kimutpādayatītyata āha / sarvadharmāṇāmakaraṇīti / sarvadharmāḥ skandhadhātvāyatanāni / teṣāṃ trayaḥ svabhāvāḥ / kalpitaḥ paratantraḥ pariniṣpannaśca / tatra kalpitaṃ na karoti tasya yathālakṣaṇamasattvāt / paratantro abhūtaparikalpaḥ / tatra karoti tatpratipakṣatvāt / pariniṣpanno dharmadhātuḥ / tamapi na karotyanādinidhanatvāt / samyagjñānaṃ karotīti cet? na / anādinidhanacittasantānabhrāntinivṛtyaiva samyagjñānasiddhe / kiṃ tarhi karotītyata āha / utpathetyādi / utpatho dharmāṇāṃ parikalpanā tena prayātānām / mārge dharmanairātmyajñāne avatāraṇī / kasya mārge? sarvajñatāyāḥ / iyatā sarvajñajñānapariniṣpattiriti yaduktaṃ tatparārthepi darśitam / yaduktaṃ sarvajñatvamiti tatparārthepyāha / sarvajñataivetyādinā / yadā hi vāsanānusandhiprahīṇatā tasyāstadāsau sarvajñatetyarthaḥ / sā tarhi prajñāpāramitā utpādikā (RSt_67) nirodhikā utpannā niruddhā ca / netyāha / anutpādiketyādi / anutpādikā sarvadharmāṇāmiti vaiyavadānikānām / anirodhikā sarvadharmāṇāmiti sāṃkleśikānām / anutpannāniruddheti svayam / paramārthato yathāpratibhāsaṃ ceti bhāvaḥ / paramārtho hyeṣāṃ dharmadhātuḥ / tenaiṣāmanādinidhanatvādvālapratibhāsinā rūpeṇātyanta- / samatvānnaiṣāmutpādanirodhau / ata evāha / svalakṣaṇaśūnyatāyāmupādāyeti pratītyasamutpannaṃ punareṣāṃ tṛtīyaṃ svabhāvamupādāyāha / mātetyādi / mātā jananī / kutaḥ? sarvabuddhadharmā eva ratnāni teṣāṃ dātrītvāt / tānyeva hi samagrāṇi hetvavasthāni bodhisatvānāṃ śarīram tata iyaṃ taddānātteṣāṃ jananī / buddhagrahaṇābduddhajananītvamarthādgamyate / na punastāvatā buddhānāmatiśayo gamyate / ato viśiṣṭairguṇaiḥ punastadāha daśabaletyādinā /

daśa tathāgatabalāni / tatkarā / katamāni daśa? "sthānāsthānajñānabalam / karmavipākajñānabalam / nānādhātujñānabalam / nānādhimuktijñānabalam / indriyaparāparajñānabalam / sarvatragāminīpratipajjñānabalam / dhyānavimokṣasamādhisamāpattisaṃkleśavyavadānavyutthānajñānabalam / pūrvenivāsānusmṛtijñānabalam / cyutopapādajñānabalam / āśravakṣayajñānabalaṃ ca" iti / lakṣaṇameṣāṃ yathoktaṃ mahatyo rbhagavatyoḥ / tatra sambhavāsambhavau sthānāsthāne / tadyathā duścaritānāmaniṣṭo vipāka [:] sthānamiṣṭo 'sthānamiti / karma ca vipākaśca / nānādhātuḥ puṇyāpuṇyādijanako 'dhyāśayaḥ / nānādhimuktistadyathā rāgadveṣādau sthitānāṃ dveṣarāgādau ruciḥ / indriyāṇi śraddhāvīryasmṛtisamādhiprajñāḥ / teṣāṃ parāparatvaṃ vimātratā / ayaṃ mṛdvindriyo 'yaṃ madhyendriya ityādi / sarvatragāminīpratipat / rāgasya pratipakṣa iyaṃ pratipat / iyaṃ dveṣasyetyādi / caturṇā dhyānānāṃ aṣṭānāṃ vimokṣāṇāṃ trayāṇāṃ samādhīnāṃ savitarkasavicārādīnāṃ catasṛṇāmārūpyasamāpattīnāṃ navānāṃ cānupūrvavihārasamāpattīnām saṃkleśādikam / tatra saṃkleśa āsvādanādinā / vyavadānamanupalambhādinā / vyutthānaṃ siṃhavijṛmbhitena vā avaskandakena vā / pūrve nivāsaḥ pūrvajanma / tasminnanusmṛtiḥ smaraṇam / cyu[tyu]papādau sattvānāṃ maraṇotpattī / āśravāḥ kleśāsteṣāṃ yaḥ kṣayo yena ca mārgeṇa kṣayastadubhayamāśravakṣayaḥ / sattvānām / eṣāṃ sthānāsthānādīnāṃ sarvathā sarvadā samyagjñānaṃ tadiha sthānāsthānādijñānam / tadeva balamitarairaghṛṣyatvāt, teṣāṃ vābhibhavanāt /

anavamardanīyetyabhibhavitumaśakyā / kuta ityāha / caturvaiśāradyakarītvāditi / siṃhavadatyantaniḥśaṃko yuktavādī viśāradaḥ / tasya bhāvo vaiśāradyam / (RSt_68) catvāri vaiśāradyāni / abhisaṃbodhivaiśāradyam / āśravakṣayavaiśāradyam / āntarāyikadha[rma]vaiśāradyam / nairyāṇikadharmavaiśāradyaṃ ca / abhisambodhistathāgatasya jñānasampat / āśravakṣayaḥ prahāṇasampat / tadubhayaṃ svārthaḥ / āntarāyikā dharmā nirvāṇasya vibandhakāḥ nairyāṇikā dharmā nirvāṇasya prāpakāḥ / etadubhayaṃ parārthaḥ / parebhyastadākhyānāt / teṣu vaiśāradyam / tatpratijñāpratiṣṭhāpaneṣvityarthaḥ / tatkarā / anāthāḥ sattvā anādau duḥkhasāgare bhramatāmeṣāmadyāpi trāturabhāvāt / teṣāṃ nāthastrātā bhagavān buddhaḥ / tatkarā / iyatā sarvajñajñānapariniṣpattireṣeti samarthitaḥ / eṣaiva sarvajñatvamiti samarthayitumāha / saṃsāretyādi / saṃsāraḥ sāśravāḥ skandhāḥ / tasya pratipakṣā hantrī / dharmadhātureva tasya hanteti cedāha / akūṭasthatāmupādāyeti / dharmadhāturhi kūṭastho anādinidhanaikarūpatvāt / sa cetpratipakṣaḥ syāt tadā ādita eva saṃsāro na syāt / prajñāpāramitā punarādimatī, uttarottaragāminī ceti saiva tasya pratipakṣaḥ / anena prahāṇasampaduktā / jñānasampadamāha sarvetyādinā / sarvadharmāṇāṃ svabhāvaḥ paramārthaḥ / tasya vidarśanī tatpratibhāsatvāt / svasya pareṣāñca parārthamadhikṛtyāha / paripūrṇetyādi / paripūrṇamekenāpyanūnatvāt / triparivartadvādaśākāraṃ ca yaddharmacakram / dharmaḥ śāsanam / tadeva cakraṃ vineyasantāneṣu caṃkramaṇāt / tasya pravartano pravartayitrī / buddhānāṃ tathaiva tasya pravartanāt /

tatra dharmacakraṃ satyacatuṣṭayam / tasya trayaḥ parivartāḥ / idaṃ duḥkham / ayaṃ duḥkhasamudayaḥ / ayaṃ duḥkhanirodhaḥ / iyaṃ duḥkhanirodhagāminī pratipaditi / satyacatuṣṭayasya svabhāvaparicchedaḥ prathamaḥ parivartaḥ / tasyaiva yathākramaṃ parijñeyapraheyasākṣātkartavyabhāvayitavyatvaparicchedo dvitīyaḥ parivartaḥ / tasyaivātmanā parijñātaprahīna(ṇa)sākṣātkṛtabhāvitatvaparicchedastṛtīyaḥ / tasmāt triparivartaṃ tat / duḥkhasatyasya duḥkhasvabhāvaḥ parijñeyatvaṃ parijñātatvaṃ ceti traya ākārāḥ / samudayasatyasya tatsvabhāvaḥ praheyatvaṃ prahīṇatvaṃ cetiṃ traya ākārāḥ / nirodhasatyasya tat svabhāvaḥ sākṣātkartavyatvaṃ sākṣātkṛtatvaṃ ceti traya ākārāḥ / mārgasatyasya tat svabhāvo bhāvayitavyatvaṃ bhāvitatvaṃ ceti traya ākārāḥ / tasmāt dvādaśākāraṃ tat /

nanu pratītyasamutpannenāpi svabhāveneyaṃ [na] nirodhikā śāṃ(sāṃ)kleśikānāṃ vināśahetūnāmakiñcitkaratvāt / nāpyutpādikā vaiyavadānikānāṃ mithyājñānanivṛttau cittamātrādeva samyagjñānotpatteḥ / naitadasti / bandhyakṣaṇotpādanasyaiva santānanirodhatvāt / agninā śītanirodhavat / prajñāpāramitayaiva mithyājñānanirodhe (RSt_69) sati bhagavataḥ prāgabhūtasya samyagjñānasya taddhetukatvāt / nirodhasya cāvastuno hetutvāyogāt / cittasyaiva ca niruddhavipakṣasya samyagjñānatvāt / anyathā hi sarvabhrāntinivṛttikālepi vyāpi samyagjñānaṃ na syāditi bhāvanāmārgasya svabhāvaḥ //

kathamityādinā sarvajñatānuprāptaya ityetadantena śreṣṭhatā / sthātavyamiti vartitavyam / pūjābhiḥ manasikartavyā guṇānusmaraṇaiḥ / namaskartavyā kāyavākcittaiḥ / nidānaṃ prastāvaḥ pṛcchāyāḥ / hetustu bhagavatyāḥ śreṣṭhatā / prajñāpāramitāyā yatkauśalyaparigṛhītasya bodhisattvasyānumodanāsahagataṃ puṇyamaupalambhikānāṃ pañca pāramitāmayāt puṇyādviśiṣyata itīdaṃ nidānamanantaroktatvāt / yata iyaṃ tāsāṃ pariṇāyikā tataḥ śreṣṭheti hetuḥ / apariṇāyakamiti pariṇāyakarahitam / abhavyamayogyam / jātyandhabhūtaṃ jātyandhasadṛśam / śeṣaṃ subodham / iti śreṣṭhatā //

atha khalvāyuṣmānityādinā abhinirhāro dvitīyāt evamuktāt prāk / prajñāpāramiteti bhāvanāmārgaḥ / yaḥ pañcānāṃ skandhānāṃ yāvatsarvadharmāṇāmanabhisaṃskāro 'nupalambhaḥ so 'sya abhinirhāraḥ pariniṣpādanam / avayavārthaḥ subodhaḥ / ityabhinirhāraḥ //

evamukta ityādi yāvata saṃkhyāṃ gacchatīti / katamaṃ dharmamityanāśravaḥ / na kaściddharmamiti / dharmāṇāmarpaṇāyāścānupalambhādityarpaṇā //

atha khalu śakra ityādi śāriputravacanāt prāk / yadi na kañciddharmamarpayati na tarhi sarvajñatāmapīti matvā śakra āha / kimiyamityādi / arpayatyeva kenacitparyāyeṇa / yathā tu nārpayati tadbhagavānāha na yathetyādi / upalambho bālagrāheṇa rūpeṇa / nāma saṃjñā / saṃskāraḥ kalpanā / yathā tvarpayati tatpṛcchati / kathaṃ tarhītyādinā / uttaraṃ yathetyādinā / yathā nārpayatīti dharmāṇāmarpaṇāyāścāvikalpanāt / tatheti / avikalpanayā / na kañcidityādi / dharmāṇāmutpādādīnāṃ cāvikalpanāditi bhāvaḥ / anutpādāyānirodhāyeti notpādāya na nirodhāyetyarthaḥ / asamarthasamāsattvāt / ataśca anupasthitetyakiñcitkaratvāt / evamapīti sarvajñatārpakatvenāpi / dūrīkariṣyatītyasaṃmukhībhāvāt / riktīkariṣyatīti saṃmukhībhūtasya jñānasya tallakṣaṇābhāvāt / tucchīkariṣyatīti tat phalābhāvāt / na kariṣyatīti notpādayiṣyati / astyeṣa paryāya iti yathā tvayoktaḥ / tatkasya hetoriti taddūrīkaraṇādikaṃ kutaḥ? paridīpitāyāmiti nirdiṣṭāyām / na rūpaṃ yāvanna buddhatvamiti na kiñciddharma (RSt_70) ityarthaḥ / tasmāt kañciddharma paśyan dūrīkariṣyatīti / yāvanna kariṣyatīmām / katamena paryāyeṇeti / kiṃ mahārthatayeti bhāvaḥ //

subhūtirāha netyādi / niḥsvabhāveṣu sarvadharmeṣu dvayābhāvāditi bhāvaḥ / asaṃkṣiptā vikṣipteti / advayatvāt / evamapīti mahārthatayāpi / kimpunaḥ śabdādatiśayārthaḥ / evamityuktvā / tadevāha / evamahamityādinā / niḥṣyanda iti tatpṛṣṭhabhāvī niścayaḥ / yaḥ sattvopalambha iti sambandhaḥ / sattvaḥ pudgaladravyaṃ tadvad asvabhāvajātikāsvabhāvalakṣaṇam / jātirutpattiḥ / tābhyāṃ rahitā / asyaiva nirdeśaḥ sattvāsvabhāvatayetyādinā / pariśeṣādgamyate sattvājātikatayā ajātikateti / viviktatā śūnyatā / acintyatā cittānālambanatā / abhisaṃbodhanaṃ sākṣātkriyā / tadabhāvād anabhisaṃbodhanatā / yathābha / sadbhuto arthaḥ / tasyānabhisaṃbodhanamagrahaṇaṃ sattvaḥ / tadvatprajñāpāramitā / yathā sattvasya balasamudāgamanaṃ balaniṣpādanaṃ na kiñcit tathā tathāgatasya prajñāpāramitayeti mahārthatā //

abhinirhārasya pañcāṅgānyuktāni / ṣaṣṭhasaptamepi staḥ / adhimokṣahetuḥ pratipakṣahetuśca / te 'dhikṛtya śāstram-

atrādhimuktihetavastraya uktāḥ pādatrayeṇa / dharmavyasanaṃ pratikṣepaḥ / tasya catvāro hetava itaraiḥ pañcabhiḥ pādaiḥ / 'anadhimuktatā' anadhimuktiḥ / tatrādhimokṣo 'sminneva bhāvanāmārge 'dhimuktiḥ / tamāha / atha khalvityādinā na dhandhayiṣyatītyetadantena / adhimokṣayiṣyatīti niścite vastunyevameva nānyathetyavadhāraṇamadhimokṣaḥ / taṃ kariṣyatītyarthaḥ / tatkarotīti curādau pāṭhāṇṇic / tasyādhimokṣasya lakṣaṇaṃ tribhiḥ padairgatyantarapratiṣedhāyāha / tatra kāṃkṣā bādhā / abādhyabādhanasya kāṃkṣāmātratvāt / vicikitsā saṃśaya eva / dhandhāyanamapratipattiriti trīṇi gatyantarāṇi / dhandho 'pratipattau / dhandho bhaviṣyatīti dhandhāyiṣyati / lohitāderākṛtigaṇatvāt kyaṣ / ityadhimokṣaḥ //

adhimokṣasya trayo hetavaḥ / tatra dvau pṛcchati / kutaścyutvehopannaḥ kiyacciracaritāvī ceti / sa iti yo 'dhimoktā / adhimukto 'dhimuktikāritreṇa (RSt_71) lakṣyate / atastadāha / ya ityādinā / arthata ityaṣṭābhirabhisamayaiḥ / arthanayata iti yathāsvaṃ teṣāmeva vastubhiḥ / dharmata ityebhireva nāmapadavyañjanaiḥ / dharmanayata iti samāsavyāsādibhiḥ / anugamiṣyaṃtyanusaraṇāt / anubhotsyate tathā jñānāt / anubodhayiṣyati tathaiva parān /

tatkasya hetoriti kuto liṅgāt / yaḥ kaścidityādinā liṅgamāha / me dṛṣṭa iti mayā dṛṣṭaḥ / sambandhavivakṣāyāṃ ṣaṣṭhī / tadyathā subhāṣitasya śikṣate, nāgnistṛpyati kāṣṭhānāmiti / avadadhāti sāvadhānaṃ karoti / satkṛtyeti bhaktito rucito vā / nopacchinatti vicchedākaraṇāt /

ciretyādinopasaṃhāraḥ / ciracaritāḥ pāramitā avituṃ śīlamasyeti ciracaritāvī / bahavo buddhāḥ paryupāsitā yena sa tathoktaḥ / iti buddhasevādānādicaryā //

tṛtīyo 'dhimokṣaheturupāyakauśalyam / tadāha / atha khalvityādinā sthaviraḥ subhūtirityataḥ prāk / śakyā punariti kāṃkṣā praśnaḥ / śrotuṃ śabdataḥ / upalakṣayitumarthataḥ / samanvāhartuṃ kālāntare smartum / upapādayituṃ cintākāle / upadhārayituṃ bhāvanākāle cetasi sthirīkaraṇāt / iyamiti pratibhāsamānā / ihāmutra veti pratibhāsamānā dhārā / aneneti pratibhāsamānena / ākāreṇeti lakṣaṇena / tadyathā gauḥ sāsnādimatvena / liṅgeneti kṛtrimeṇa cinhena / tadyathā gaurghaṇṭādinā / nimitteneti svābhāvikena cinhena / tadyathā gauḥśuklatvādinā / nirdeṣṭuṃ parasmaiḥ / śrotuṃ parasmāt /

bhagavānāha / uttaraṃ no hītyādi / skandhādiśa iti skandhādibhiḥ / rūpaskandha iti vā yāvaddharmāyatanamiti vetyarthaḥ / kuta ityāha / sarvadharmaistaireva viviktatvādasyāḥ / tadapi kutaḥ? niḥsvabhāvatvātteṣām / parikalpitena dharmasvabhāveneti bhāvaḥ / na cānyatreti / na cānyā tatparamārthatvāditi bhāvaḥ / ata eva tadityādinā praśnaḥ / skandhetyādinottaram / vijñaptirūpaṃ skandhādikameva / śūnyaṃ parikalpitena skandhādisvabhāvena / sā tasya tena śūnyatā vijñaptimātratā prajñāpāramitā / tasmādadvayametaddvaṃvīkāram / nanu śūnyatāyā idaṃ lakṣaṇaṃ na prajñāpāramitāyā ityata āha / śūnyatvādityādi / nopalabhyate skandhādi yathālakṣaṇam / yonupalambhaḥ sarvadharmāṇāmiti tadviviktaprakāśamātropalambhalakṣaṇaḥ / na tūpalambhanivṛttimātram / "nābhāvaḥ kasyacitpratipattiḥ pratipattiheturvā" iti vacanāt / yo 'nupalambhaḥ sā prajñāpāramitā prakṛṣṭajñānatvāt pāragatvācca / tathāpi nāsau prajñāpāramitā / syādyadi skandhādiśūnyatāmanubhūya (RSt_72) skandhādyavasīyeta / rajatādyavasāye śuktidarśanavat / etaddarśayitumāha / yadetyādi / yadā tu yathānubhūtaniścayaṃ janayati na skandhā na dhāturnāyatanamiti tadā prajñāpāramitaiva / tannisyandatvāt skandhādyabhāvaniścayasya / śuktiniścaye śuktidarśanavat / prāmāṇyāt / tadyevaṃ yadyathāsti yathā ca nāsti yathā ca prajñāpāramitā syānna syādvā tasya sarvasya samyagbodha upāyakauśalaṃ tṛtīyo 'dhimokṣahetuḥ /

dharmavyasanaṃ vaktavyam / sa ca saddharmapratikṣayaḥ / kutaḥ? dharmavyasanahetutvāt / dharmasya vyasanaṃ vipat / dīrghadurgativāsena tasya śravaṇādyabhāvaḥ / durgaticiravāsahetutvāddharmavyasanahetutvam / tasmāddharmavyasanam / tadeva dharmavyasanasaṃvartanīyaṃ karma / tatsaṃvartate 'smāditi kṛtvā / tadeva prastauti sthavira ityādinā / prajñāpāramitā / eṣa eva bhāvanāmārgaḥ / tasyāṃ yogāpattiḥ samādhānaprāptiḥ /

vibhajyeti / kathaṃ vibhajya? keṣāñci[cci]racaritāvinā(tā) bhavati keṣāñcinneti / tatkutaḥ? indriyāṇāṃ śraddhādīnāṃ vimātratayā nānātvena / tāmāha syādityādinā / asyāmagauravatā teṣāmabhūditi sambandhaḥ / buddhānāmantikāditi / antike dūrāntikārthebhya iti pañcamī / tatsannidhāvityarthaḥ / agauravatā aśu(su)śūṣaṇatā aśraddadhānatā ca / bhagavatyāṃ aparyupāsanatā aparipṛcchanatā ca buddheṣu / tata iti śraddhāviyogāt / dharmavyasanasaṃvartanīyaṃ karma saddharmapratikṣepaḥ / kṛtaṃ sakṛtkaraṇāt / sañcitaṃ punaḥ punaḥ karaṇāt / ācitaṃ paripūrṇam / upacitaṃ vipākadanaśaktilābhāt / kāyena sāmagrī śrotumāgamanam / cittena nirvikṣepatā / vācā aprastutānabhidhānam / evaṃ sāmagrimadadānā iti samyagaśṛṇvantaḥ / na jānanti granthataḥ / na paśyanti arthataḥ / na budhyante svabhāvatrayabhedena / tato na vedayante viparītabodhāt / aśraddadhānā ityādi tūktam / tasyopasaṃhāra evaṃ ta ityādinā / pratyākhyānaṃ manasā parityāgaḥ / pratikṣepo vācā / pratikrośanaṃ nindā / upahatyeti dūṣayitvā / dagdheti kuśalamūladāhāt / chando vaśībhāvaḥ / viparyayādvicchandaḥ śithilaḥ / ato vicchandayiṣyantīti śithilīkaraṇāt / vivecayiṣyantīti manasā tyājanāt / vivartayiṣyantīti punaragrahaṇāt / iyatā pratyākhyānamuktam //

pratikṣepamāha nātretyādinā / pratikroṣaṇamāha naitadityādinā / apakrāntāḥ parimuktāḥ paribāhyā ityeko 'rthaḥ / sarva yathā bhavanti tathā sarveṇa aṅgena / sarva yathā bhavati tathā sarvaḥ prakāraḥ / karmābhisaṃskāraḥ karma kriyā / upasthāpiteneti kṛtena / samutthāpitenetyupacitena / saṃvartanī (RSt_73) pralayaḥ / āavīcitalādā ca brahmalokādyasyāmagninā kṣīyate sā tejaḥsaṃvartanī / kṣepsyante antarābhavaśarīreṇa / upapatsyante upapattibhavaśarīreṇa / samānā santaḥ / bahu vata duḥkhaṃ ca tadvedanīyaṃ yasmāttathoktam /

prativarṇikādipadatrayaṃ samānārtham / 'lābhasatkāraṃ tebhya eva / yadartha te dṛśyeraṇ (dūṣyeran) / tatkasya hetoriti / tatteṣāmadarśanādikaṃ kuta ityarthaḥ / kasambakaṃ pūtipūrṇam / tadatyaktamanyānyapi parṇāni nāśayati / jātirjātam / kasambakavajjātameṣāmiti kasambakajātāḥ / kṛṣṇā tṛṇaviśeṣaḥ / prākṛtabhāṣayā kaṇḍā / sāpi kṣetrādanapanītā kṣetraṃ nāśayati / nirjātirniṣpattiḥ / kṛṣṇāvannirjātireṣāmiti kṛṣṇānirjātikāḥ / kṛṣṇo hi kṛṣṇasarpaḥ saviṣaḥ saṃśrṛ(sṛ)ṣṭān daṣṭo saviṣīkaroti / anayeneti tebhyaḥ śrutaśraddhādināmārgeṇa / vyasanaṃ nirayādiduḥkham / āgāḍhamābādhamiti mahatīṃ pīḍām / nigacchet spṛśediti prāpnuyādityarthaḥ / ālokaḥ prakṛtasya karmaṇo vipākajñānam / śuklāṃśaḥ kuśalabhāgaḥ / tadyogāt śuklāṃśikaḥ / samavadhānaṃ yogaḥ / śeṣaṃ subodham / iti dharmavyasanam //

evamukta ityādi / atra mārādhiṣṭhita ityādinā mārādhiṣṭhānamuktam / gambhīreṣu dharmeṣvanadhimuktisteṣu śraddhāprasādābhāvenoktā //

punaraparamityādinā caturo hetūnāha / ātmotkarṣī parapaṃsako doṣāntaraprekṣītyeko rāśiḥ / ata evāha / ebhirapi caturbhirityādi / tadatra dharmavyasanahetavaḥ ṣaḍuktāḥ / śāstre tu saṃkṣepataścatvāraḥ / śeṣāṇāṃ skandhādyabhiniveśe 'ntarbhāvāt / ātmotkarṣaṇādināṃ skandhādyabhiniveśe /

nirhāraparivarto 'yaṃ saptāṅgasya nirhārasya dyotanāt / tathāpi nirayagranthasya bahutvānnirayaparivarta ityucyate //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ saptamaḥ parivartaḥ //

8. viśuddhiparivarto nāmāṣṭamaḥ /

lokottarasya bhāvanāmārgasya nirhāraḥ saptamaparivartenoktaḥ / śuddhiraṣṭamasyādau vaktavyā / tasyāḥ śuddherduradhimocatāṃ tāvadāha / atha khalvityādinā / anarthikeneti mandacchandena / upastabdho vismitaḥ / aśuśrūṣaṇā-aparipacchakajātīyeneti kalyāṇamitreṣu subhūteḥ praśnaḥ / kiyadagambhīretyādi / kiyatā gambhīrā yato duradhimocetyarthaḥ / bhagavata uttaraṃ rūpaṃ subhūta ityādinā / rūpādayo rūpādīnāṃ ca pūrvāparamadhyāntā abaddhā amuktāḥ svabhāvenādhvatrayeṇa ca niḥsvabhāvatvādityarthaḥ / paramaduradhimoceti paramagambhīratvāditi bhāvaḥ / prākpravṛtto hi bandhaḥ prāgaśuddhiḥ paścāttannivṛttilakṣaṇo mokṣaḥ śuddhiriti prasiddham / iha tu bandhamokṣayoratyantābhāvaḥ śuddhiriti paramagambhīraṃ viśuddhilakṣaṇaṃ śāstre-

'phalaśuddhiḥ' sādhyā / sā ca 'rūpādiśuddhireva' / yasmāt 'tayoḥ' 'abhinnācchinnatā' 'iti śuddhirudīritā' / śuddherlakṣaṇamuktaṃ sutre / katamasyāḥ śuddheḥ? yasyāduradhimocatvamuktam / tatkasya hetorityādi / tadasyā duradhimocatvaṃ kuta ityarthaḥ / uttaraṃ yetyādinā / yata idaṃ tasyā lakṣaṇamiti bhāvaḥ / advayaṃ tādātmyāt / advaidhīkāramavyabhicārāt / anayoreva nirdeśo abhinnamacchinnamiti / yetyanuvādaḥ seti vidhiḥ / anūdyamānaśca dharmo vidhīyamāne niyata iti khyāpitaḥ / ataḥ sāmānyādhikaraṇādabhinnamubhayam / anyonyaniyamādanyonyāvyabhicāraḥ / tasmādacchinnamubhayam / tadevaṃ yaiva skandhānāmekaśo viśuddhiḥ saiva phalaviśuddhiḥ / yaiva phalaviśuddhiḥ saivetarā / anyonyāvyabhicārāt / anyonyaliṅgatā / sa cāvyabhicārastādātmyāt / ata āha / phalaviśuddhita ityādi punaraparamityataḥ prāk iti viśuddhilakṣaṇam /

viśuddhibhedāśvatvāro mahatyorbhagavatyoruktāḥ sarvasaṃgrahārtham / asyāṃ tu noktā bodhisattvamārgādhikārāt / mārgasya viśuddhirucyate / sa ca bhūmau bhūmau navavidho mṛdumṛdvādibhedādadhimātrādhimātrādibhedāt / navavidhasyaiva doṣasya pratipakṣeṇa (RSt_75) bhūmayastu śuddhestāścaiva nava / kāmadhāturaṣṭau ca rūpārūpyāḥ / ataḥ śāstram-

ato navavidhaṃ mārgamāha / punaraparamityādinā atyantānupapattirityataḥ prāk / sarvajñateti sarvākārajñatā / tasyā viśuddhirdvividhā / yā skandhānāmekaśo viśuddhiḥ pāramitānāṃ ca sā sarvākārajñatāviśuddhiḥ / yā ca tasyāḥ sā teṣāmityekā sarvākārajñatāviśuddhiḥ / adhyātmaśūnyatādīnāṃ skandhādīnāṃ ca yāvadāveṇikabuddhadharmāṇamekaśo yā viśuddhiryā ca prajñāpāramitāyā yā ca sarvākārajñatāyāḥ sarvametadabhinnamacchinnamiti dvitīyā sarvākārajñatāviśuddhiḥ / tadasyāṃ na paṭhyate upalakṣaṇatvāttadgrāhyam / iti mṛdumṛdumārgo mṛdumadhyaśca //

atha khalvityādi / itaḥ prabhṛti prajñāpāramiteti prajñāpāramitāviśuddhirityarthaḥ / sā gambhīrā duravagāhā sarvadharmāṇāṃ viśuddhatvādatyantaśūnyatvāditi mṛdvadhimārgaḥ //

sāvabhāsakarī tamopahā viśuddhatvātsarvadharmāṇāmiti madhyamṛdumārgaḥ //

sā āloko darśanaṃ viśuddhatvāditi madhyamadhyo mārgaḥ //

sā apratisandhirasaṃkrāntirbhavāntare viśuddhatvāditi madhyādhimātro mārgaḥ //

sā asaṃkleśo viśuddhitvāt prakṛtyasaṃkliṣṭatvātsarvadharmāṇāmityadhimātramṛdumārgaḥ //

sā aprāptiranabhisamayo viśuddhatvāt sarvadharmāṇāmaprāpteranabhisamayāccetyadhimātramadhyo mārgaḥ //

sā anabhinirvṛttirviśuddhatvāt anabhinirvṛttatvāt sarvadharmāṇāmityadhimātrādhimātro mārgaḥ //

āha / atyantānupapattirityādikamāmārgajñatāparisamāpteḥ / ataḥ śāstram-

tasyāṃ 'tridhātupratipakṣatvaṃ' yadāha / atyantānupapattiḥ prajñāpāramitā / kāmadhātvādiṣu viśuddhatvāt / kāmadhātvādiṣvabhāvānupapatteḥ iti tridhātupratipakṣatvam /

atra ca 'samatā mānameyayoḥ' / yadāha / āhetyādi / na jāna tīti na gṛṇhāti / na saṃjānīta iti na vikalpayati / sphuṭīkartu praśnaḥ kiṃ punarityādi / uttaraṃ rūpamityādi / viśuddhatyādityatyantasamatvāt / tadevaṃ yathā syājjñeyaṃ grāhyaṃ na bhavati tathaiṣāpi tasya grāhikā na bhavatīti jñeyamānasamatā /

yoyaṃ viśuddhilakṣaṇo bhāvanāmārga ukto na sa yuktaḥ / yato 'sminnaṣṭau doṣā ityata āha / 'mārgaḥ sa ceṣyate tasya codyasya parihārataḥ / ' cakāro 'vadhāraṇe / bhinnakramaśca / codyasyeti jātāvekavacanam / bhāvanāmārga eva sa iṣyate tadīyacodyānāmita ūrdhvaṃ parihārādityarthaḥ / atra ca siddhānta eva kākvā kuta etaditi hetusāpekṣāścodyasūcanādyāni / siddhāntahetavaḥ parihārāḥ / tatra dve codye śāriputrasya ṣaṭ subhūteḥ /

nāpakāraṃ karoti na copakāramiti siddhāntaḥ / sa kutaḥ? yadi hyakiṃcitkarī kathaṃ sā mārga iti codyam / viśuddhitvāditi parihāraḥ / sarvajñatā hi dharmadhātuviśuddhiḥ sa ca viśuddhaḥ prakṛtiśuddhaḥ / tataḥ sā asyākiñcitkarī / kevalamāgantukāvaraṇakṣayaṃ [prati] vyāpriyate / na gṛṇhāti na tyajatīti siddhāntaḥ / sa kutaḥ? yadi hyasau gṛṇhāti vikalpaḥ syāt / atha na gṝṇhāti prajñaiva na syāditi codyam / viśuddhatvādi parihāraḥ / yathā hi yata evāsau dharmān dharmalakṣaṇairna paśyatyata eva dharmatayā paśyati / ata eva viśuddhaḥ / viśuddhatvāt na gṛṇhāti na ca tyajatīti / skandhaviśuddhitaḥ phalaviśuddhiḥ sarvajñatāviśuddhiścoktā / sā ca teṣāṃ viśuddhirātmaviśuddhyā / yathā hyātmano viśuddhiratyantamasattā tathā teṣāmapīti siddhāntaḥ / sa kutaḥ? yadi hi skandhaphalasarvajñatānāmatyantamasattā tadaitā(te)na kiñciditi codyam / atyantaviśuddhitvāditi parihāraḥ / atyantamasanta eva dharmāḥ svalakṣaṇaiḥ / ata eva tacchūnyatālakṣaṇayā dharmatayā santītyarthaḥ / ātmaviśuddhito na prāptirnābhisamaya iti siddhāntaḥ / codyaṃ purvavat / atyantaviśuddhatvāditi parihāraḥ / yata eva dharmalakṣaṇairdharmā atyantamasantaḥ tata eva dharmatayā santaḥ / sā ca prakṛtyaiva śuddhā tacchuddhireva ca sarvajñateti na tasyāḥ prāptirnābhisamaya ityarthaḥ / ātmāparyantatayā rūpavedanā dīnāmaparyantateti siddhāntaḥ / sa kutaḥ / dṛśyate (RSt_77) hi skandhādīnāṃ paryantastatkathamaparyantā iti codyam / atyantaviśuddhatvāditi parihāraḥ / yathā hyātmano 'tyantamasattā tathā rūpādīnāmapi svalakṣaṇaiḥ / tato 'satāṃ teṣāṃ kaḥ paryantaḥ? dharmatayā santīti cet .............paryantaḥ / sarvadharmasāmānyalakṣaṇatvāt rūpādikasya / na, bhedasyāparamārthatvāt / tasmādyaiva rūpādiviśuddhiḥ saiva phalaviśuddhiḥ sarvajñatāviśuddhiḥ prajñāpāramitāviśuddhiścetyarthaḥ //

ya evamatyantāsattayā sarvadharmāṇāṃ avabodhaḥ sa prajñāpāramiteti siddhāntaḥ / sa kutaḥ?....................bodho na tarhi sātyantaviśuddhiriti codyam / atyantaviśuddhitvāditi parihāraḥ /

evaṃ samāptā aṣṭāvatyantabhāvanāmārgamārgajñatādhikārāḥ //

prathamaparivartena sarvākārajñatoktā / ito 'rdhasaptamaiḥ parivartairmārjñatā / aṣṭamanavamayoḥ parivartayorardhābhyāṃ sarvajñatā vaktavyā / tasya aṣṭau vastūni / yathoktaṃ prāk

iti / atra śāstram-

'prajñāpāramitā' iti sarvajñatā / 'nāpare tīre ' iti saṃsāre / 'na pare tīre ' iti nirvāṇe / nāpi tayorantarāle sthitā' / trayaṃ nopalabhyata ityarthaḥ / kuta ityāha / 'adhvānāṃ samatāyogād' iti / dharmatayāpyadhvasamatvāt / dharmāṇāṃ ca yathālakṣaṇamanupalambhat / etadāha / āyuṣmān ityādinā / seti samādhānaṃ pūrvamuktatvāt / iyamiti sarvajñatākhyena viśeṣeṇa vaktavyatvāt / ata evāha / viprakṛteti / viśeṣeṇa prakṛtatvāt vartamānatvādvā / athavā kuto na sthitā? yato viprakṛtā trayānupalambhena bādhitā / bhagavān hetumāha / atyantaviśuddhatvāditi / svairlakṣaṇairasatāṃ dharmāṇāṃ dharmatālakṣaṇena nityaviśuddhatvādityarthaḥ / śrāvakāstu (RSt_78) svaduḥkhakṣayamātraiṣiṇaḥ saṃsāraṃ parikalpya tenātyantamudvignā nirvāṇaṃ parikalpya tasminnatīvotkaṇṭhitā laghu ladhveva parinirvānti / naivaṃ bodhisatvāḥ, sarvasattvārthaṃ niruttarabodhikāmā iti saṃsāranirvāṇāpratiṣṭhatā //

śāstram-

[64] anupāyena dūraṃ sā sanimittopalambhataḥ /

'sanimittaṃ upalambho 'nupāyaḥ' / tena sā dūrībhavati / tadāha / āyuṣmānityādi / evamapīti nāmatopi nimittatopi / riñciṣyati tyakṣyati nāmataḥ / dūrīkariṣyati nimittataḥ / iti dūrībhāvaḥ /

niḥsaṅgā vṛttiḥ samyagupāyakauśalam / tenāsannībhavati / tadāha / evamukta ityādinā / saṅgaḥ saktirabhūtaparikalpaḥ / sā nāmato syānnimittatopi / tayorapi bhūte 'rthe 'bhāvāt / ākhyātā ṣoḍaśabhirdṛṣṭimārgalakṣaṇaiḥ / sunirdiṣṭā dvādaśabhiḥ prayogaiḥ / supariniṣṭhitā saṃsāranirvāṇayorapratiṣṭhānāt / supariśuddhā saṅgakoṭīnāṃ vivarjanāt / yatra hīti vākyālaṅkāre / nāmetyāścarye / imepi saṅgā iti saṅgāpi vakṣyamāṇāḥ / ataḥ saṅgavarjanamupāyakauśalamityā sannībhāvatā /

te punaḥ saṅgāḥ sāmānyenoktāḥ / viśeṣato vaktavyāḥ / ataḥ śāstram-

rūpādīnāṃ sarvadharmāṇāṃ skandho rāśiḥ / tasya śūnyatāyāṃ traiyadhvike paradharmesu pāramitā bodhipakṣyaviṣayāyāṃ ca caryāyāṃ yā 'saṃjñā' nāmato nimittato vā sā 'vipakṣatā' / svārthe tal devatāvat / sa vipakṣaḥ sa saṅga ityarthaḥ /

etadāha / atha khalvityādinā / asyāṃ bhagavatyāṃ 'caryāsaṃjñā' na paṭhyate / sā paṭhitānāmupalakṣaṇatvānnocyate / dānapāramitāṃ yāvatprajñāpāramitāṃ smṛtyupasthānāni yāvadāryāṣṭaṅgamārga carāmīti sañjānīte saṅga iti / asyāmadhikasaṅgamāha / iyantamityādinā / ye saṅgāsta uktāḥ / yathā te saṅgāstannoktam / tataḥ śakrasya praśno 'tha khalvityādinā / paryāyeṇeti prakāreṇa / idaṃ tu prathamaṃ bodhicittamiti / eṣa vikalpaḥ prathamaḥ saṅgaḥ / bodhau pariṇāmayāmīti / (RSt_79) evaṃ vikalpya pariṇāmanā dvitīyaḥ / kathamimau saṅgau? tasya cittasyātītatvenāsattvāt / bodheścānāgatatvena / cittaprakṛtiḥ sadāstīti cedāha / na cetyādi / na śakyā iti nityasya pariṇāmāyogāt / tasmādubhau vikalpau / abhūtakalpanāt / śeṣāstu yathā saṅgāstathā purvamevoktam /

saṅgāḥ teṣāṃ varjanamarvāguktaṃ bhavati / ataḥ śāstram-

[66] dānādiṣvanahaṅkāraḥ pareṣāṃ tanniyojanam / saṅgaḥ koṭī niṣedho 'yaṃ

'dānādiṣvanahaṃkāraḥ' sāmarthyāt / pūrvamuktaḥ / 'pareṣāṃ tanniyojanaṃ' āha tasmāttarhītyādinā / tasmāditi svayaṃ saṅgavivarjanāt kāraṇāt / tarhīti pareṣāṃ sandarśanādikāle / sandarśayateti pūrvamaśrutavataḥ rocayatā / samādāpayateti / anuṣṭhānāya samyag grāhayatā / samprahaṣayateti mantharān protsāhayatā / sampraharṣayateti / ārabdhavīryān sādhukāraiḥ / bhutānugamaḥ saṅgatyāgāt / evaṃ samādāya teṣvaparāddhaṃ (?) darśayitumāha / evamityādi / na kṣiṇotīti buddheṣvaparāddhaṃ na karoti / svayambhūtānugame 'nuśaṃsamāha / imāścetyādinā / tadevaṃ yanna 'dānādiṣvanahaṅkāro ' yanna'pareṣāṃ tatra niyojanaṃ', eṣa dvividhaḥ saṅgakoṭīnāṃ sthūlānāṃ niṣedhaḥ /

śāstram /

buddhādau yaḥ saṅgaḥ sa sūkṣmaḥ / tamāha atha khalu bhagavānityādinā / na sā śakyā pariṇāmayitumiti tryadhvaprasaṅgāt / na nimittīkartuṃ nārambaṇīkartumiti / apūrvatvenākāraṇatvāt / durbodhatvācca / yato na sā dṛṣṭaśrutamatavijñāta cakṣuṣā śrotreṇa ghrāṇajivhākāyairmanasā vāpratītatvāt yathā kramam / gambhīrā prajñāpāramitā viviktatvāt / prakṛtigambhīrā prakṛtiviviktatvāt / ataśca namaskaraṇiyā / sarvadharmā api prakṛtiviviktāḥ / yā teṣāṃ prakṛtiviviktatā sā prajñāpāramitā / yato 'kṛtāste bhagavatābhisambuddhāḥ / yataste prakṛtyaiva na kiñcit / yā caiṣāṃ prakṛtiḥ sābhāvaḥ / yaścābhāvaḥ saiṣāṃ prakṛtiḥ / ekalakṣaṇatvāt yadutālakṣaṇatvāt / evamaśeṣāḥ saṅgakoṭayo vivirjitā bhavanti / acintyā cintātītatvāt / nahi sā rūpaṃ na vedanā yāvanna buddhadharmāḥ / śeṣaṃ subodham /

nāpi sā dṛṣṭaśrutamatavijñātetyādinā yaduktaṃ / atra śāstram

'vivekād' iti viviktatvāt / 'dharmapaddhatiḥ' dharmarāśiḥ / dharmāṇāṃ jñānamiti sambandhaḥ / ekā teṣāṃ prakṛtiḥ khyātiryasmiṃstathoktam / tanna vipakṣapratipakṣau vaktavyau / saṅgāsaṅgau kasmāduktau? ataḥ śāstram-

'evaṃ kṛtvā' iti saṅgāsaṅgavyapadeśaṃ kṛtvā / 'yathoktaṃ' iti / yathokto vibhāgaḥ 'sarvajñatānaye ' / sarvo 'yaṃ 'vipakṣapratipakṣayoḥ' veditavyaḥ / tathā hi / saṅga upalambho vikalpaḥ / asaṅgo 'nupalambhaḥ prajñāpāramitā / tasmātsaṅgo vipakṣo 'saṅgaḥ pratipakṣaḥ iti vipakṣapratipakṣau //

prayogastatsamatā ca vaktavyā / ataḥ śāstram-

[72] aparapratyayo yaśca saptadhā khyātivedakaḥ /

'tadanityādau' iti / rūpāderanityatvanityatvādau / iṭ radhādibhya iti iñcāparipuriḥ / pariprapūreḥ bhāva iti pariprapūraḥ asaṅgaḥ / vivakṣāvaśāt tacchabdena saṅgo gṛhyate / samāhāradvandvaḥ / saṅgāsaṅgatvayorityarthaḥ / ekaśeṣastu na bhavatyana(?)bhidhānāt / 'rūpādau' rūpāderanityatvanityatvādau / rūpāderaparipūrṇatvaparipūrṇatvayoḥ / rūpādeḥ saṅgāsaṅgayośca / yā 'caryā' caraṇaṃ tatpratiṣedhena prajñāpāramitāyāṃ caraṇaṃ 'prayogo ' rūpādyādiṣu / amī ca catvāraḥ / uttare cāṣṭau / 'avikāro 'kartā' / [uddeśa] duṣkaraḥ kāritraduṣkaro 'bandhyo 'parapratyayaḥ saptadhākhyātivedakaśceti dvādaśavidhaḥ prayogaḥ / atastaṃ pṛcchati / āha / tena hītyādinā kathaṃ caritavyamiti / kathaṃ prayogaḥ kartavyaḥ? atra rūpādayaḥ sarvadharmāḥ / skandhāstūpalakṣaṇam / rūpe yāvadvijñāne na caratīti rūpādīnna sañjānīta ityarthaḥ / tadā carati prajñāpāramitāyāmiti rūpādiprayogaḥ //

sa cedrūpamanityaṃ yāvadvijñānamanityamiti na carati / tathā nityamiti sukhamiti śūnyamityaśūnyamiti ātmeti anātmeti śubhamiti aśubhamiti na carati tadā carati prajñapāramitāyāmiti rūpādyanityatvādiprayogaḥ //

sa cedrūpaṃ yāvadvijñānaṃ aparipūrṇa paripūrṇa vā / tadeva rūpāderaparipūrṇatvaṃ paripūrṇatvaṃ tadeva rūpādi iti na carati / tadā caratyasyāmityaparipuriparipūriprayogaḥ //

evamukta ityādinā caturthaṃ prastauti / bhagavāṃstamāha / rūpaṃ sasaṅgamityādinā caritavyāntena / atraiva evaṃ carannityādinānuśaṃsamāha / asaktetyādi / sarvasaṅgābhāvādasaktā / tato na baddhā kleśaistraidhātuke / tato na muktā kleśaiḥ / na samatikrāntā traidhātukam / evaṃ hītyādinopasaṃhāraḥ / iti rūpādisaṅgāsaṅgaprayogaḥ //

subhūtirāhetyādinā parihāṇirbhavedityedantena pañcamaḥ / hānivṛddhayorabhāvādavikāratā / ākāśavat / varṇo guṇaḥ / ityavikāraprayogaḥ //

tadyathāpītyādinā sthaviraśabdāt prāk ṣaṣṭhaḥ / saṃkliśyate śabdasyārthaḥ pratihanyata(?) iti / dvitīyasyānunīyata iti / deśanayā hānivṛddhayorakaraṇādakartṛprayogaḥ //

sthavira ityādinābhisamboddhakāmāntena saptamaḥ / trividhāṃ duṣkaratāṃ vaktuṃ bhagavatī bhāvanāduṣkaratāmanuṣaṅgādāha / tasyāmeva sthitānāmuddeśāderduṣkaratvāt / caranniti śamathena / na saṃsīdati layena / notplavate auddhatyena / na pratyudāvartate nivartate / ākāśabhāvanā / ekalakṣaṇatāpratibhāsāt / ayaṃ sannāha iti yaḥ sarvasattvārthāya samyaksambodhau / ākāśeneti / ākāśanibhena yogena tadatyāgāt / tato duṣkaratā sattvānāmanupalambhādanantācca / viśvārthamuddiśya bodheḥ / sa coddeśaḥ sannāha ityuddeśaduṣkaratāprayogaḥ //

ākāśamityādinā sannahyata ityetadantenāṣṭamaḥ / uccairgatirvibandhapātanaṃ(?) parimocanam / uccairnayanamutkṣepaḥ / etāvānsattvārthāya prayogaḥ / sa ca duṣkaraḥ / ākāśavatsattvarāśeranantatvādarūpitvādadravyatrvācceti prayogaduṣkaratāprayogaḥ //

atha khalvityādinātha khalvityataḥ prāṅnavamaḥ / prayogasya phalaṃ kāritram / sāṃkleśikadharmaprahāṇaṃ vaiyavadānikadharmotpādanaṃ ca / tadubhayaṃ duṣkaraṃ bhagavatyā tayorakaraṇāditi kāritraduṣkaratāprayogaḥ //

atha khalvityādinātha khalvityataḥ prāgdaśamaḥ / ya evaṃ yogamāpatsyata iti hetvavasthāyām / kva sa iti phalāvasthāyām / ākāśa iti ākāśaṃ tārāpatham / iha tu tatsādharmyādanuttarā bodhiḥ / abhyavakāśaṃ bhūmerūpariṣṭhādacchannamarūpiṣṭhānam / iha tu tatsādharmyāddhīnabodhiḥ / tadubhayaṃ phalam / tasya yathābhavyaṃ prāpteravandhyaprayogaḥ //

atha khalvityādinā avatāramityetadantamekādaśaḥ / śakrastasya bodhisattvasya rakṣāvaraṇaguptiṃ kartukāmaḥ / rakṣāvaraṇābhyāṃ sahitā guptistathoktā / taṃ subhūtirāha / kimenaṃ prāpsyasīti / sa āha neti / tataḥ kimityāha evamityādi / evamiti / sarvadharmānupalambhena / śeṣaṃ sugamam / evamanvayavyatirekābhyāṃ prajñāpāramitādhīnaiva tasya rakṣā na parādhīnetyaparapratyayaprayogaḥ //

api cetyādinā parijānātītyetadantena dvādaśaḥ / mahatyorbhagavatyoḥ saptadhā khyātiḥ paṭhyate / "māyāmarīcisvapnapratiśrutkāpratibhāsapratibimbagandharvanagaropamāḥ sarvadharmāḥ" iti / yā ca saptadhā khyātiḥ sā sarvāpyanvākhyātiḥ / dvayaśūnyena sthitānāṃ sarvadhārmāṇāṃ paratantrasvabhāvānāṃ dvayena khyātiḥ / sā ekenāpi dṛṣṭāntena śakyā darśayitum / yathā hi śabde 'sati pratiśabdo 'samprakhyāti / tathā sati dvayaśūnye svabhāve dharmā asatā dvayarūpeṇa prakhyāntīti / tasmādasyāṃ bhagavatyāṃ pratiśrutkopamataiva paṭhyate / ata enāṃ prati śāstrapāṭho 'nyathā kartavyaḥ / 'yo 'paro khyātivedakaḥ' iti / dvividhā prajñāpāramitā lokottarā śuddhā laukikī ca / yathoktaṃ drumavikalpapraveśāyāṃ dhāraṇyāma avikalpadhātupratiṣṭhito bodhisattvo jñeyanirviśiṣṭena jñānena ākāśasamatalānsarvadharmān paśyati / tatpṛṣṭhalabdhena māyāmarīcisvapnapratibhāsapratiśrutkāpratibimbodakacandranirmitasamānsarvadharmānpaśyati" iti / ato lokottaramadhikṛtyāha / ākāśasyetyādi /

śuddhalaukikīmadhikṛtyāha / tatkimityādi / parijānātīti / tataḥ kiṃ tasya rakṣaṇīyaṃ pratibhāsānāmalīkatvāditi bhāvaḥ / ityanyathākhyātivedakaprayogaḥ //

uktāḥ prayogāḥ / prayogasamatā vaktavyā / tāmadhikṛtya śāstram-

rūpādyadhiṣṭhānaṃ caturvidhamamananaṃ prayogasamatetyarthaḥ / yathoktaṃ mahatyoḥ / "rūpaṃ na manyate / rūpeṇa na manyate / rūpaṃ mameti na manyate / rūpepi na manyate / evaṃ vedanādiṣu" iti / imāṃ tu bhagavatīṃ prati śāstrapāṭho 'nyathā kartavyaḥ-

aṣṭadhāmananaṃ tasya rūpādau samatā mata /

caturdhā grāhakasya caturdhā ca grāhyasyākalpanaṃ prayogasamatetyarthaḥ / tadāha ataścetyādinā atha khalvityataḥ prāk / ataśceti yataḥ pratiśrutkopamāḥ sarvadharmāḥ / ataśca tāniti sarvadharmān na manyate bhāvābhiniveśena / na samanupaśyati dṛṣṭyā / na jānāti grahaṇena / na sañjānīte kalpanayā / iti caturvidhaṃ grāhakakalpanam / tathaiva grāhyavikalpanamāha te cetyādinā / na vedyanta iti sattvena na manyante / na saṃdṛśyanta iti na dṛśyante / na saṃvidyanta iti na gṛhyante / nopalabhyanta iti na vikalpyante / ityevamaṣṭadhā grāhyagrāhakayorakalpanena viharatīti sarvadharmeṣu carati / tataḥ kiṃ syādityāha sa cedityādi subodham / iti prayogasamatā /

prayogasamatānusaṅgāddeśanāsamatāyāmapyasyāṃ deśanāyāmabhisampratyayārthamāha / atha khalvityādinā āparivartasamāpteḥ / lokadhātāviti.......... /

[viśuddhiparivarto nāmāṣṭamaḥ parivartaḥ //]

9. stutiparivarto nāma navamaḥ /

samatā Note: RSt_84

ākārāḥ, prayogāḥ, guṇāḥ, doṣāḥ, lakṣaṇāni, mokṣabhāgīyaṃ, nirvedhabhāgīya, avaivartikasaṃghaḥ, saṃsāranirvāṇasamatā, buddhakṣetrapariśuddhiḥ, upāyakauśalaṃ cetyekādaśavastūni sarvākārābhisambodhaḥ / yathoddeśaṃ nirdeśāt prathamata ākārāṇāṃ nirdeśaḥ /

'vastu' ālambanaṃ catuḥsatyādi / tasya 'jñānam' / tasya 'prakārāḥ' / yaiḥ prakāraistatparikṣepaḥ teṣāṃ 'ākārā' iti lakṣaṇatvāt / 'sarvajñatānāṃ' iti jātau vahuvacanam / sarvajñatāyā ityarthaḥ / kathaṃ tasyāstraividhyam? sarvajñatā mārgajñatā sarvākārajñatā ceti / tatrādau sarvajñatākārāḥ saptaviṃśatiḥ / śāstram-

asatpāramiteyamiti asadākārāmārabhya yāvadacalapāramiteyamityacalākārāḥ / teṣu catvāraścatvāro duḥkhasamudayanirodhasatyeṣu pariviṣṭāḥ / pañcadaśa mārgasatye / asadākārapāramitā / asatpāramitā / evamuttarā api sarvāḥ / tatra duḥkhe catvāraḥasatsamatāvivikta-anavamṛdya /

ākāśasamatāmiti / ākāśavadrūpāderasattām / yathā hyākāśasya rūpidravyābhāvo lakṣaṇaṃ tathā rūpādīnāṃ svalakṣaṇābhāvaḥ / sarvadharmānupalabdhisamatāmiti / sarvadharmānupalabdhireva sukhaduḥkhayoḥ samatā / atyantaśūnyatāmiti / pudgalena svabhāvena ca śūnyatāmityarthaḥ / bādhakaṃ duḥkhaṃ bādhyatvādavamṛdya ātmā / anavamṛdyānātmā / tadākāratvāt anavamṛdyapāramitā / sarvadharmāṇāṃ bādhyabādhakānāmanupalabdhitāṃ nirūpalambhatāṃ [upādāya] /

samudaye catvāraḥ / tathā hi- padaṃ hetuḥ prāktanāḥ skandhāḥ / svabhāva ātmano bhāvaḥ / kāyakarma / vacanaṃ vākkarma / nāma manaskarma kleśāśca / eṣāmabhāvo yathākramaṃ.....asvabhāvaḥ / ......tadākāratvāttatpāramitā / anāmāśaroratāmiti / nāma arūpiṇaḥ skandhāḥ / śarīraṃ rūpaskandhaḥ / tayorabhāvo 'nāmaśarīratā / gatyāgatī kāyakarma / tadabhāvo 'nāgatiragatiśca / vācāṃ heturvikalpaḥ / tadabhāvo 'vikalpatā /

nirodhe catvāraḥ / tathā hyasau gamanaṃ vā syāt grāhyaṃ vā kṣayo vā utpattirvā / eṣāmabhāvo yathākramaṃ agamanaṃ, asaṃhāryaṃ, akṣayaḥ, anupapattiḥ / tadākāratvāttatpāramitā / sarvadharmāṇāmagamanatā gatyabhāvaḥ / sarvadharmāṇāmagrāhyatā / na hi dharmo dharmaṃ gṛṇhātīti / kṣaya eva dharmaḥ / tena yogaḥ / tadabhāvādakṣayadharmayogatā / abhinirvṛttirutpattiḥ / tadabhāvādanirvṛttitā /

mārge pañcadaśa- akāraka-ajānaka-apaśyaka-asaṃkrānti-avinaya-svapna-pratiśrutka-pratibhāsa-marīci-māyā-asaṃkleśa-avyavadāna-anupalepa-aprapañca amananā-acalā / akārakādyākāratvāttatpāramitā / akārako mārgastena kārakānupalabdheḥ / ajānakāpaśyako mārgastena jānakapaśyakānupalabdheḥ / asaṃkrāntirmārgastena cyutyupapattyorayogadarśanāt / avinayo mārgastena tryadhvasamāyā dharmaprakṛteravinayāt / svapnāditulyatvāt svapno mārgaḥ vinaiva draṣṭāramandhaḥkārāt (?) / pratiśrutko mārgaḥ / asati śabde śabdopalambhāt / pratibhāsaḥ pratibimbaṃ sa mārgaḥ / asatyarthe 'rthadarśanāt / marīcirmārgaḥ / tajjalaskandhavadasato lokadhātoḥ pratibhāsāt / māyā mārgo nimittāpratibhāsāt / anutpādavijñāpanatāmiti / yataḥ pañcabhirapyebhiranutpādo mārga ādīpyate / pratibhāsahetumantareṇa tathā tathā pratibhāsāt / asaṃkleśo mārgastena rāgādyanupalabdheḥ / avyavadānaṃ mārgastena kliṣṭasattvānupalabdheḥ / anupalepo mārgaḥ / ākāśavannirupalepasya dharmadhātostena darśanāt / aprapañco mārgaḥ prapañcapratipakṣatvāt / amananā mārgaḥ / sarvamananāsamuddhātitvāt / acalo mārgaḥ / dharmadhātuśarīratvena śāśvatatvāt / iti sarvajñatākārāḥ //

atha mārgajñatākārāḥ ṣaṭtriṃśat /

hetuḥ samudayaḥ / ataḥ samudayamārgau prathamata uktau phalopāyatvāt / duḥkhanirodhau paścāduktau phalatvāt teṣvākārā yathākramam / 'aṣṭau sapta pañca ṣoḍaśeti ca kīrtītāḥ' sūtre tatra samudaye 'ṣṭau-virāga-asamutthāna-śāntanirdoṣa-niṣkleśa-niḥsattva / kathaṃ tadaṣṭau? yato nirdoṣe tritayaḥ-arāga-adveṣa-amoha / prāktanā hi pañcaskandhāḥ samudayaḥ / rajyante 'sminniti rāgaḥ / parikalpitaḥ svabhāvo dharmāṇām / vigato rāgo 'smāditi virāgaḥ samudayaḥ / sarvadharmāṇāmavitathatāmiti / vitathena kalpitena svabhāvena śūnyatām / samutthānaṃ kleśaheturvikalpaḥ / tasyāsminnabhāvādasamutthānaḥ samudayaḥ / sarvadharmāṇāṃ nirvikalpatāmiti / agrāhakatvāt / śāntaḥ samudayaḥ / nirodha ityarthaḥ / tatkutaḥ? sarveṣāṃ (RSt_86) dharmanimittānāṃ dharmapratibhāsānāṃ paramārthapratibhāse 'nupalabdheḥ / ata eva arāgapāramitā adoṣapāramitā amohapāramitā ca / guṇapāramitāmiti rāgadoṣamohakṣayapāramitām / sarvakleśābhāvānniṣkleśaḥ samudayaḥ / parikalpāsattāmiti grāhakāsattām / api ca sarvatra kliṣṭaḥ syād duḥkhī ca (?) / tadabhāvānniḥsattvaḥ samudayaḥ / bhūtakoṭitāmiti dharmapudgalaśūnyatām /

mārge sapteti- apramāṇa-antadvayānanugama-asambhinna-aparamṛṣṭa-avikalpa-aprameya-asaṅga / apramāṇo mārgaḥ / sarvadharmāṇāṃ samutthānasyāsamutthānatāmalokatvamupādāya / antadvayānanugamo mārgaḥ / sarvadharmeṣvanabhiniveśatāmiti / yathāpratibhāsaṃ bhāvasya tacchūnyatayā vā bhāvasyānanugamaḥ / asambhinno mārgaḥ / asambhedanatāmiti bhedānupalabdhim / aparāmṛṣṭo mārgastena hīnayānāspṛhaṇāt / avikalpo mārgaḥ / vikalpasamatāmiti vikalpānāmanupalabdhim / aprameyo mārgaḥ / apramāṇadharmatāmupādāyeti / apramāṇadharmatālambanatvāt / asaṅgo mārgaḥ / sarvadharmeṣvasaṅgatāmiti nirupalambhatām /

duḥkhe pañca- anitya-duḥkha śūnya-anātma-lakṣaṇa / sāsravāḥ pañcaskandhā duḥkham / tadatrānityaṃ bhavatyeveti (?) / sarvadharmāṇāmasaṃskṛtatāmiti yathāpratibhāsamanutpannatām / duḥkhaṃ duḥkhaṃ sukhavilakṣaṇatvādākāśavat / śūnyaṃ duḥkhaṃ sarvadharmānupalabdheḥ / anātmā duḥkhaṃ yathāpratibhāsaṃ sarvadharmeṣvabhiniveśāyogāt / trīṇi saṃskṛtalakṣaṇāni / jātirjarānityatā ca / tadabhāvādalakṣaṇaṃ duḥkham / anabhinivṛttitāmiti yathāpratibhāsaṃ yathā paramārthaṃ cāsaṃskṛtatām //

nirodhe ṣoḍaśa / tathā hi nirodhaḥ śūnyataiva viśuddhā / na ca śūnyatā bhidyate bhedakānāmanupalabdheḥ / tasmādākāśavadanantāparyanto nirodhaḥ / anukrameṇa vistāreṇa vā paricchedādyathākramaṃ tataḥ ṣoḍaśa śūnyatāḥ santyekarasāḥ / ata āha / sarvaśūnyatāpāramiteyamanantāparyantatāmupādāyeti / adhyātmaśūnyatāpāramiteyaṃ bahirdhāśūnyatāpāramiteyaṃ yāvadabhāvasvabhāvaśūnyatāpāramitetyādi / ataśca nirodhasatye ṣoḍaśākārāḥ / iti mārgajñatākārāḥ /

sarvākārajñatākārāḥ daśottaraṃ śatam / yataḥ śāstram-

tānadhikṛtya smṛtyupasthānādītyādikaṃ āparivartasamāpteḥ / smṛtyupasthānādibodhipakṣyadharmapāramiteyamiti / smṛtyupasthānādayaḥ saptavargā anekaśo vibhaktāḥ saptatriṃśabdodhipakṣyā dharmā bhavanti / pratyekaṃ teṣāmanupalambhāttadākārāḥ pāramitāḥ............ [stutiparivarto nāma navamaḥ //]

10. dhāraṇaguṇaparikīrtanaparivarto nāma daśamaḥ /

......bodhirdharmacakrapravartanaparyantā nāhetutvāditi phalaratnapradātāprayogaḥ //

śuddharāśirityādi pragāścaryāt / teṣāmeva phalānāmākāśavadviśuddhidarśanāditi śuddhakaḥ prayogaḥ //

āścaryamityādi / atha khalvāyuṣmānityataḥ prāk / likhyeteti likhituṃ śakyate / likhitarvyaiveti tāvataiva kālena likhitavyā bhavet / dṛḍhasamādānasya vighnābhāvāditi bhāvaḥ / tatkasya hetoriti kuta idamāsaṃ (śaṃ)kitamityarthaḥ / evaṃ hītyādinottaram / dharmateyamiti bhāvaḥ /

kiñcāpīti yadyapi / na prasahiṣyata iti na prabhaviṣyati / acchidrasamādānasyatyakhaṇḍasamādānasya ityavadheraṇa(na)tikramāt sāvadhiḥ prayogaḥ //

uktāḥ prayogāḥ / guṇā vaktavyāḥ / tānadhikṛtya śāstram-

[80] mārāṇāṃ śaktihānyādiścaturdaśavidho guṇaḥ /

guṇāḥ prayogānuśaṃsāḥ māraśaktivyāghātādayaścaturdaśa / tatrādau atha khalvityādi na hi śāriputretyataḥ prāk / buddhānāṃ ānubhāveneti / tena māraśaktivyāghātāditi bhāvaḥ / prasatteḥ(?)adarśanāt pṛcchati / tatkasya hetoriti / samanvāhariṣyantīti smariṣyanti / parigrahīṣyantītyānukūlye cāvasthānāditi māraśaktivyāghātaguṇaḥ //

na hi śāriputretyādi / evamukta ityataḥ prāk / iti buddhasamanvāhārajñānaguṇaḥ //

evamukta ityādi buddhacakṣuṣeti yāvat / anubhāvaḥ prabhāvaḥ / adhiṣṭhānamadhikaśaktyādhānam / parigrahaḥ svīkāraḥ / kutasteṣāṃ buddhādhiṣṭhānaṃ buddhaparigraho vetyata āha jñātāsta ityādi / jñātāḥ samanvāhṛtāḥ / adhiṣṭhitāḥ svīkṛtāḥ / dṛṣṭā māṃsacakṣuṣā / vyavalokitā buddhacakṣuṣā / iti buddhāvalokitatvaguṇaḥ //

ye te bodhisattvā ityādi yepītyataḥ prāk / tathatvāyeti samyaksambodhyāsannībhāvaguṇaḥ //

yepītyādi / ime khalviyataḥ prāk / mahārthika āyatyāṃ bodhisattvabhūmibhiḥ / mahānuśaṃso bodhisattvasampattibhiḥ / mahāphalaḥ paścādanuttarāyā bodhyāḥ / mahādipākaḥ caramabhavabhāvinībhiḥ kulagotralakṣaṇādisampattibhiḥ / pariśramaḥ klamathaḥ / pariṣpa(spa)ndo vyāpāraḥ / iti mahārthatādiguṇaḥ //

ime khalvityādi na santrāsamāpadyanta iti yāvat / sūtrāntā iti prajñāpāramitāprabhṛtayaḥ / atyayeneti parinirvāṇena / vartanyāmiti pūrvadeśe / nanu madhyadeśe ṣoḍaśeṣu mahānagareṣu bhagavatā dharmo deśitaḥ / tasya kathaṃ tato 'nyatra pracāra ityata āha / navamaṇḍa ityādi / navamaṇḍo 'bhinavaḥ sāraḥ / sa prāpto vineyairasyeti tathokte dharmavinaye / dharmaścāsau deśanādharmatvādvinayaśca kleśavinayāditi dharmavinayaḥ / bhagavati parinirvṛte saddharmasya loke 'vasthānaṃ pañcavarṣasahasrāṇi tato 'ntardhānakālaḥ / tatsamaye sannidhāne / tataḥ kimityāha / samanvāhṛtā ityādi / uttarasyāṃ diśīti digantarāṇāṃ vyavacchedaḥ / uttare digbhāga iti / tasyā api bhāgāntarāṇāṃ vistāreṇa caratīti vaistārikī / uttarāpatha iti vacanaṃ dakṣiṇāpathādervyavacchedāya /

bahava ityalpakapakṣyasya subahava iti bahutvaprakarṣāya / kiñcāpīti yadyapi / śeṣaṃ subodham / atra caturbhiḥ kāraṇaiḥ śāsanāpacaya uktaḥ / bhagavato 'tyayena / navamaṇḍaprāptatvena / antardhānakālasannipātena / pravartakālyatvena ca / tathāpi śāsanaṃ tānabalaṃbya pravartiṣyata iti śāsanāvalambatvaguṇaḥ //

cirayānetyādi yāvatsambodhimārabhyeti / praśnaḥ pṛcchā / tatkaraṇāt paripṛṣṭāḥ parijñātapṛcchāḥ paripṛcchāḥ / tathā karaṇāt paripṛcchitāḥ / (RSt_89) parihatapraśnāḥ kṛtāḥ paripuripraśnokṛtāḥ / śīleṣviti bahuvacanamādyarthaṃ śīlādiṣvityarthaḥ / śeṣaṃ subodham / iti śukladharmaparipūraṇaguṇaḥ //

tatkasyetyādi samyaksambodhimārabhyeti yāvat / jātivyativṛttānāmapīti tāṃ taduttarāṃ ca jātimatikrāntānāmapi samudācārāḥ prayogāḥ / abhinandanamabhilāṣaḥ śeṣaṃ sugamam / iti kathāpuruṣatāguṇaḥ //

teṣu cetyādi yāvatsamyaksambodhāviti / chandato mantrato veti / abhiprāyeṇa vyavacāreṇa vā / śeṣaṃ subodham / iti abhedyatāguṇaḥ //

tāṃ cetyādinā samyaksambodhāvityetadantena bahujanakuśalamūlotpādanaguṇaḥ //

tatkasyetyādi evaṃ cetyataḥ prāk prasthāpayiṣyāma iti prasthānamātreṇa / samprabhāvayiṣyāma iti bhāvanāprakarṣasaṃpādanāt / pratiṣṭhāpayiṣyāma iti sthirīkariṣyāmaḥ / śeṣaṃ subodham / iti pratijñātaparārthasaṃpādanaguṇaḥ //

evaṃ cetyādi bhaviṣyantīti yāvat / evaṃ ceti yathokte parārthasaṃpādane sati / udārādhimuktikā bhaviṣyantīti / yathoktaṃ mahatyostadeva saṃkṣipya brūmaḥ / "te khalu udārādhimuktikā bhaviṣyanti / rūpaśabdagandharasasparśadharmeṣu ta udārāṇi dānāni datvā udārāṇi kuśalamūlānyabhisaṃskṛtya udāraṃ vipākaṃ parigṛhya sattvānāmarthāya vipākādvipākaṃ parigṛhīṣyanti" iti udāraphalaparigrahaguṇaḥ //

yadityādi evamukta ityataḥ prāk / yaditi yasmādudārādhimuktikatvāt / adhyālambitavyānīti saṃkramitavyāni / śeṣaṃ subodham / iti vaistarikaparārthasaṃpādanaguṇaḥ //

evamukta ityādyāparivartasamāpteḥ / pāramitānāṃ kṛtaśa iti tadartham / tāsāṃ pariśuddhaye / arthāyeti hitāya / anveṣiṣyante prajñāpāramitā kvaiṣā labhyatāmiti / paryeṣiṣyanta itastato gatvā gaveṣiṣyante / iha lapsyata iti śrutvā / abhivadanī (ntī) ti samyagvadanti / upagamiṣyanti sannidhānataḥ / upapatsyante prayatne sati lābhāt / upanaṃsyante ayatnenaiva lābhāt / śeṣaṃ subodham / iti ṣaṭpāramitāniyatalābhaguṇaḥ //

ityukto guṇaḥ //

yathokteṣu prayogeṣu cetasaḥ sthāpanaṃ dhāraṇam / tasya guṇā anuśaṃsāścaturdaśa / teṣāṃ parikīrtanaścāsau parivartaśca /

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ daśamaḥ parivartaḥ //

11. mārakarmaparivarto nāmaikādaśamaḥ /

doṣāḥ prayogāntarāyakarāḥ / te vaktavyāḥ / tamadhikṛtya śāstram-

doṣāḥ ṣaṭcatvāriṃśadityarthaḥ / ata āha / atha khalvityādi / keciditi praśnaḥ / kāṅkṣākimarthagateḥ / athavā cicchabdo na paṭhitavyaḥ / bahūnīti sāmānyenokte viśeṣajijñāsayā praśnaḥ / kiyadrūpāṇoti / teṣāmityādyuttaram / vakṣyamāṇāni ṣaṭcatvāriṃśaditi bhāvaḥ / bhāṣamāṇādipadāni sarvacaryāṇāmupalakṣaṇāni / cireṇa pratibhānamutpatsyata iti cireṇa pāramitānāṃ pūraṇam / tataścireṇaiva bodhiḥ syāt / iti cirapratibhānadoṣaḥ //

tadapi cetyādi / vikṣepsyata iti / uddhataṃ bhaviṣyati / anupāyakuśalasya kṣiprataraṃ tadutpattau mānotpatteḥ / tato 'nyān bodhisattvānavamanyamānasya nīcakuleṣūtpattyā cireṇaiva bodhiḥ syādityāśupratibhānadoṣaḥ //

jṛmbhamāṇā iti sadarpakāyaprasārāḥ / hasanta iti aṭṭahāsān kurvantaḥ / uccavagghayanta iti darpāduttiṣṭhantaḥ / iti kāyakarmavaiguṇyam //

vikṣiptacittā ityasamāhitā / anyonyavijñānasamaṅgina iti paraiḥ smarayitavyāḥ / svayaṃ tu smṛtiṃ na pratilapsyante / bhinneṣvapīryāpatheṣūddeśavismaraṇādveti cittavaiguṇyadoṣaḥ //

parasparamityādi / uccagghamānā iti parasparamuccagghayantaḥ / vikṣiptacakṣuṣa itastataḥ / visāmagrīti yāvatāmāgamane pustakamākṛṣyate tāvatāmasamagratetyayogavihitasvādhyāyāditā doṣaḥ //

na vayamityādi punaraparamityataḥ prāk / cittotpādaistathā tatheti pūrvoktam / na nirjāyante na niṣpadyante / iti vaimukhyanimittagrāhitā doṣaḥ //

punaraparamityādi tadyathāpītyataḥ prāk / vivarjya cetasā / utsṛjya kāyavāgbhyām / niryāṇaṃ śikṣāparyantagamanam / iti hetubhraṃśadoṣaḥ //

tadyathāpītyādi tadyathāpītyataḥ prāk / piṇḍamāhāraḥ / chorayitvā tyaktvā / kavaḍaṃ grāsam / patraḥ palyasampatsamūhaḥ / palāśopamapratipanna iti palāśopameṣu sūtrānteṣvabhiyuktāḥ / damayiṣyāmaḥ pañcendriyadamanāt / śamayiṣyāmaḥ cetaso damanāt / parinirvāpayiṣyāmaḥ punarbhavakṣayāt / kuśalamūlānāmabhisaṃskāro niṣpādanāni tadarthāḥ prayogavyāpārāḥ / na ca tairmantavyamiti / teṣāmātmanaścānupalambhāditi praṇītāsvādabhraṃśadoṣaḥ //

tadyathāpītyādi tadyathāpītyataḥ prāk / prakāśamiti sālokam / upanidhyāyediti paśyet / varṇasaṃsthāna iti varṇākārau / ityuttamayānabhraṃśadoṣaḥ //

tadyathāpītyādi tadyathāpītyataḥ prāk / kevalamātmadamaśamathameveti / saṃvarṇata iti vartate / ityapītyādi / pratisaṃlayanaṃ samādhiḥ / tadapi ityevam / ātmadamaśamathārthameva saṃvarṇyate / ita ūrdhvaṃ itītyādi sugamam / iti dṛṣṭa evetyādi / dṛṣṭe dharme prāpte janmani / anupādāyeti na kiñcitparigahya / nityakālamityābodheḥ / satataṃ caitat pratijanmabhāvāt / samitaṃ ca pratyahaṃ bhāvāditi satatasamitam / śeṣaṃ subodham / ityuddeśabhraṃśadoṣaḥ //

iti prathamaṃ daśakam //

tadyathāpītyādi tadyathāpityataḥ prāk / palagaṇḍaḥ sūtradhāraḥ / merupṛṣṭhe sudarśanaṃ nāma śakrasya sauvarṇa nagaram / tanmadhye śakrasya vaijayanto nāma prāsādaḥ / pratipārśvaṃ yojanaśatadvayaṃ sārdham / ekatvena yojanasahasram / sūryācandramasostu merorarddhādvahirākāśagāmisphāṭikaṃ vartulaṃ vimānam / yathākramamekapañcaśatpañcāśacca yojanāni madhyasūtreṇa / tanmadhye yastayoḥ prāsādo bahubhūmestadiha tayorvimānaṃ vaktavyam / tacca vaijayantādatīvālpapramāṇam / nirmāṇaṃ viśeṣavatī kriyā / upanayanti prāpayantītyupā[ya]saṃmohadoṣaḥ //

tadyathāpītyādi / bhagavānāha / tadyathāpītyataḥ prāk / loke cakrasya pravartanāt cakravartī / tatpunaścakramapauruṣamākāśagāmi sahasrāraṃ sanābhikaṃ sanemikaṃ āyasaṃ tāmraṃ raupyaṃ sauvarṇa vā yathāyogam / varṇo jāmbunadanibhaḥ / saṃsthānaṃ dvātriṃśanmahāpuruṣalakṣaṇopetam / tejaḥ sarvamabhibhūḥ prabhāvaḥ prabhāmaṇḍalaśca / ṛddhiḥ sampattiḥ / viśeṣataḥ saptaratnāni- cakraratnaṃ hastiratnaṃ (RSt_92) aśvaratnaṃ pariṇāyakaratnaṃ gṛhapatiratnaṃ maṇiratnaṃ ceti / dhandhayati mohayatyaparisphuṭatvādalpatvācceti dhandhakaḥ / yasmāddhetorbodhisattvaḥ samudeti sa bodhisattvasamudāgamaḥ / avāpya lābhamātreṇa / samāsādya śravaṇādibhiḥ / vivarjya tyaktvā / vivartya parāṅmukhībhūya / iti cakravartisādharmyānnirmāṇakāyabhraṃśadoṣaḥ //

bhagavānāha / tadyathāpītyādi tadyathāpītyataḥ prāk / rasāḥ ṣaṭ / dravyabhedāt parasparasāṃkaryācca śataṃ bhavati / tataḥ śatarasaṃ bhojanam / ṣaṣṭikāḥ ṣaṣṭirātreṇa pacyante teṣāmodānaḥ ṣaṣṭikodanaḥ / śakandhvādiṣu darśanātpararūpam / utsṛjya cetasā / vivarjya kāyena / iti śatarasabhojasādharmyāt sambhogakāyabhraṃśadoṣaḥ //

tadyathāpītyādi prāk punaraparaśabdāt / gambhīraṃ paramārthaśekharatvāt / prabhāsvaraṃ paramanirmalālokatvāt / ityanardhyamaṇiratnasya dharmāddharmakāyabhraṃśadoṣaḥ //

ita ūrdhvaṃ gadyadvayena bhagavatyāṃ pañca viparyāsāḥ pratiśe(ṣe)dhyāḥ (?) / punaraparamityādyevamukte ityataḥ prāk / bahūni pratibhānānīti rūpādīnāṃ sarvākārajñatāparyantānāṃ pratibhānāni / bhagavatyāmasaṃvidyamānatvāccittavikṣepakarāṇīti tattabhdāvapratibhānadoṣaḥ //

evamukta ityādi punaraparāt prāk / ye kecit prajñāpāramitā likhiteti, asatīti, akṣarāṇīti, anakṣareti vā manyante sarvaṃ tanmārakarma / tathā hi na sā likhitā apagandhādivirahāt / nāsatī paramārthasattvāt / nākṣarāṇi sarvadharmāṇāmanakṣaratvāt / nānakṣarā tanniṣyandatvādeṣāmakṣarāṇām / ebhireva ca tasyāḥ sūcanāt / etānyeva ca tenārthenālambya tasyā adhigamāt / tadevaṃ likhanābhiniveśo 'sattvābhiniveśo 'kṣarābhiniveśo 'nakṣarābhiniveśaśceti catvāro doṣāḥ //

punaraparamityādi / deśo mālavādiḥ / śatena sahasreṇa vā saṃkhyātagṛho 'nāḍhyānāṃ nivāso grāmaḥ / sahasreṇa lakṣeṇa vā saṃkhyātagṛha āḍhyānāṃ nivāso nagaram / nagarameva ca vastubhūyiṣṭhaṃ nigamaḥ / maṇḍalaṃ kāśyādi janapadaḥ / tatsamūho rāṣṭram / rājādhyuṣitaṃ nagaraṃ rājadhānī / ākhyānaṃ gadyakāvyam / gulmo ghahāḥ(ṭṭaḥ?) / viśikhā rathyā / śivikā yāpyayānam / jīvitārthāḥ pariṣkārāḥ jīvitapariṣkārāḥ / itihāsaḥ purāvṛttam / śeṣaṃ subodham / iti gantavyādinānārthamanasikāravikṣepadoṣaḥ /

iti dvitīyaṃ daśakam //

punaraparamityādinā draṣṭavyarājādimanasikāravikṣepadoṣaḥ //

punaraparamityādinā prāptavyāgnyādimanasikāravikṣepadoṣaḥ //

punaraparamityādi prāk punaraparāt / antarāyā vighātāḥ / lābhaścīvarādiprāptiḥ / satkāra ādaraḥ / śloko yaśaḥ / tairāsvāda uddharṣaḥ / cittotpīḍā cīvarādivighātaiḥ / ityutpīḍāsvādadauṣau //

punaraparamityādi prāk punaraparāt / kiñcāpīti yadyapi / upāyakauśalyamiti yena hīnabodhau na patediti / upāyakauśalyarahitasya gambhīrasūtrānte atanmārgaṇadoṣaḥ //

iti ūrdhvaṃ vaidhuryāṇi bāhulyena vaktavyāni / tāni dharmabhāṇakena saha dhārmaśravaṇikānāṃ visāmagrī / dharmasya bhāna(ṇa)ko vaktā guruḥ / dharmaśravaṇaṃ prayojanameṣāmiti dhārmaśravaṇikaḥ śiṣyaḥ / samagrabhāvaḥ sāmagrī / viparyāsāt visāmagrī / tatrādau punaraparavākyadvayam / kilāsaṃ kausīdyam / bahukṛtyatā gṛhiṇām / sapi kausīdyamiti cchandakilāsavaidhuryam /

tataḥ punaraparavākyadvayam / antaśa ityadhikameva likhitukāmaḥ / gatimān śabdajñānāt / matimān arthajñānāt / smṛtimān ubhayordhāraṇāt / kṣepsyata iti karme karttariprayogaḥ / gamiṣyatītyarthaḥ / udaghaṭitajñaḥ sāmānyokte viśeṣajñānāt / vipañcitajñaḥ kiñcidapyuktau viśeṣaparijñānāt / anabhijñaḥ padaparamaḥ / sa hi yaducyate tadeva jānāti nādhikam //

imāni catvāri vaidhuryāṇi / cchandadeśāntaragamanavaidhuryam / udghāṭitajñatetaratāvaidhuryam / abhijñatetaratāvaidhuryam //

tṛtīyaṃ daśakam //

punaraparamityādi āmiṣaṃ dravyam / tadgurukabahumānādasyeti āmiṣagurukaḥ / evaṃ lobhādigurukaḥ / yāvatā svayaṃ vartate tāvadicchatīti alpecchaḥ / santuṣṭo adhikāniṣṭeḥ / pravivikto gṛhasthairasaṃstutatvāt / iyatā pravrajitasya dānāśaktiruktā / arthavā na dātukāma iti santamapyartha gṛhīmātsaryāt / ityāmiṣārthitādānānārthitāvaidhuryam //

punaraparamityādi punaraparāt prāk / śrāddho bhaviṣyati / tataḥ śrotukāmaḥ śabdataḥ / avabodhu(ddha)kāmo 'rthataḥ / artha dātukāmaḥ parityaktukāma iti nirakṣepadānāt / dharmabhāṇakastu na vakṣyati / aśrāddhatvāt, dhanairaṇa(na)rthikatvāt, (RSt_94) dharmamātsaryādvā / imāni trīṇi vaidhuryāṇi / śrāddhetaratāvaidhurya dānārthitāgrahaṇānarthitāvaidhurya śrotukāmatādharmamātsaryavaidhurya ca //

punaraparamityādi / tāni sūtrāṇīti yāni śrotukāmaḥ / dharmāntarāyo dharmavyasanam / tadasyāsti pūrvajanmasaddharmapratikṣepāditi dharmāntarāyikaḥ / tattayā tabhdāvena na sambhaviṣyanti na bhaviṣyanti / nāvatariṣyanti nānyata āgamiṣyanti / aprāptadharmabhāṇina ityaprāptadharmabhāṇakasya / prativāṇī pratyākhyānam / iti sūtrāntarā[ya]sambhavatadarthitāvaidhuryam //

punaraparamityādi / na śrotukāmo bhaviṣyatīti dharmāntaravyagratayā / ata idaṃ cchandakilāsavaidhuryādanyacchandavaidhuryam //

tataḥ punaraparavākyadvayena middhagurukacchandikatāvaidhuryam //

punaraparavākyena durgatiduḥkhabhayābhdavavaimukhyadoṣaḥ //

punaraparavākyena sugatisukhānāmapi duḥkhatvābhdavavaimukhyadoṣaḥ //

tataḥ punaraparavākyena ekākitā parṣadgurukatāvaidhuryam / anubandhukāmatā anavakāśadānavaidhuryam / durbhikṣādidiggamanāgamanavaidhuryaṃ ca / tatraikākitāparṣadgurukatāvaidhuryāntaṃ caturthaṃ daśakam //

ekena punaraparavākyena sabhayadiggamanāgamanavaidhurye //

punaraparamityādi kulāvalokanabahukṛtyatayā dhārmaśravaṇikānāṃ pratyākhyānadoṣaḥ //

iti hītyādinā mārakarmaṇāṃ bāhulyaṃ buddhāvivarjanīyatāṃ mārasya ca teṣvabhiyogakāraṇamāha / punaraparamityādi / śramaṇaveśāgatena māreṇa saṃśayaprakṣepadoṣaḥ //

punaraparamityādi / nirmitabhikṣusaṅghena svayaṃ buddhaveṣeṇa māreṇa gambhīradharmacāriṇāṃ hīnabodhivyākaraṇadoṣaḥ //

evaṃ subhūta ityādinā āparivartāntāccaturo 'rthānāha / māramarmaṇāṃ bāhulyaṃ tatkāraṇaṃ tebhyaśca vinā tāmalpabuddhitvādikam / yathā ca mārasya teṣvabhiyogastathā sarvabuddhānāṃ bodhisattvaparigraheṣviti ṣaṭcatvāriṃśadantarāyāḥ //

mārakarmāṇyate evāntarāyāḥ / taddyotakaḥ parivartastatparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañcikāyāṃ ratnākaraśāntiviracitāyāmekādaśaḥ parivartaḥ //

12. lokasaṃdarśanaparivarto nāma dvādaśaḥ /

uktā doṣāḥ / lakṣaṇaṃ vaktavyam / tadadhikṛtya śāstram-

'yena lakṣyate ' tallakṣaṇamiti jñeyam / karaṇe lyuṭ / tacca vividhaṃ 'jñānaṃ viśeṣaḥ kāritraṃ' ceti / yaśca lakṣyate tadapi lakṣaṇam / karmaṇi lyuṭ / sa ca 'svabhāva' eveti caturvidhaṃ lakṣaṇam / tatrādau jñānaṃ vaktavyam / tatra sarvajñatākāreṇa tāvat /

jñānagrahaṇaṃ saptamyantaiḥ sahaḥ saṃbadhyate / 'tathāgatasya nirvṛttau' iti bhagavatyāḥ sakāśāttathāgatasya niṣpattau jñānam tadāha / atha khalvityādinā atha khalvityataḥ prāk / tatrādau dṛṣṭāntaḥ / evamevetyataḥ prāk / māturglānāyā iti mātari glānāyām / sparśavihāra iti sparśapracāraḥ / amanaāpa iti amanojñaḥ duḥkhahetutvāt / sudhṛtā dhārayeyuriti supuṣṭāṃ puṣṭīyuḥ / tathā puṣṭīyuḥ yathā supuṣṭā syāt / gopāyanaṃ rakṣaṇam / kelāyanaṃ sodhanaṃ vyādhiharaṇāt kelāśabdaḥ / kaṇḍvādiduḥkho vā sparśa iti / viṣayendriyavijñānasannipātajaścaita[si]kaḥ sparśaḥ / sa ca duḥkhaheturduḥkha / cakṣuṣa iti pañcamī / āpāto 'manuṣyāṇām / utpāto vidyudādiḥ / mamakāreṇa mamā [ye]yuḥ / samanvāharantītyetat kuta ityāha / yepi te likhantīti tāmeva / tathāgatasyeti śākyamuneḥ / (RSt_96) yepīti na kevalaṃ śākyamuniḥ / tiṣṭhantīti santi / dhriyanta iti avatiṣṭhante / yāpayantīti yāvadāyuravatiṣṭhante / autsukyamāpadyante / kathamityāha / kimitītyādi / kidṛśī mātetyata āha / janayitrīti / asyāḥ sarvajñatāyāḥ / darśayitrīti prāpikā / evamiti janakatvenaiva / iti tathāgatasya nirvṛttau jñānaṃ prathamam //

lokasya sandarśayitrītyuktam / ataḥ pṛcchatyatha khalvityādinā / evamukta ityādi uttaram / loka ityākhyātā iti lujo vināśe / lujyante pralujyante kṣaṇikatvāt santānanirodhācceti lokāḥ / kartturyuc / nairukto varṇavyatyayaḥ / kathaṃ loka iti darśitā iti / yadi luñjanta iti lokāḥ / tadāsyāḥ ko 'tiśaya iti bhāvaḥ / viśvādarśitamiti(?)lujatvādanyat(?) / yato 'tiśayaḥ syādityarthaḥ / na lujyanta ityādi / nanu tathāpi vyāhatame[ta]t na lujyante na pralujyante tasmālloka iti? nāsti vyāghātaḥ / yasyāyamatra sambandhaḥ / loka iti pañcaskandhāḥ / te bhagavatyā prajñāpāra[mi]tayā na lujyante na pralujyanta iti darśitāḥ / tatkasya hetorityādinā praśnaḥ / śūnyatetyādinottaram / yathā śūnyatā evamanimittādaya ityāha na cetyādinā / kathamiti pṛṣṭam / ata evaṃ ityādinopasaṃhāraḥ / iti lokajñānaṃ dvitīyam //

sattvānāṃ cittacaryāsvityanenāprameyāṇāṃ sattvānāṃ cittacaritajñānaṃ nirdiṣṭam / tacca na vināśatvāprameyatājñānena / tataḥ punaraparamityādinā sattvāprameyatājñānamuktvā yopītyādinā taccittacaritajñānamāha / tatra kathaṃ sattvānāmaprameyatājñānam? yatasteṣāṃ niḥsvabhāvatayā na pramāṇaṃ na saṃkhyā / kathaṃ taccittacaritānāṃ jñānam? sattvāsattayā teṣāmapyasattvāt / lokasya sandarśayitrīti sattvānāmapi lokatvāt / ityaprameyasattvacittacaritajñānaṃ tṛtīyam //

'tatsaṃkṣepe bahirgatau' iti / bahirgatirvikṣepaḥ / tasya cittasya saṃkṣepasahitā bahirgatistatsaṃkṣepabahirgatiḥ / ataścittasya saṃkṣepavikṣepajñānaṃ punaraparagadyadvayenāha / sa saṃkṣepaṃ kṣayataḥ kṣayaṃ cākṣayato yathābhūtaṃ prajānātīti / saṃkṣepo hi cittasya prakṛtau sthānam / taccāsya kṣaya eva / sa cākṣayaścittaprakṛterakṣayatvāt / tasmātsa tathāgataḥ saṃkṣepaṃ kṣayataḥ kṣayaṃ cākṣayato yathābhūtaṃ prajānāti / dharmatāta ityādi / lyablope pañcamī / cittadharmatāmapekṣya tāni vikṣiptāni bahirmukhatvāt prajānāti / svalakṣaṇāpekṣayā kīdṛśānītyāha / akṣīṇānītyādi / (RSt_97) na kṣīṇāni nāpyaṃśataḥ kṣīṇāni tato na saṃkṣiptāni / avikṣiptānīti nāpi vikṣiptāni / kuta ityāha / alakṣaṇāni hīti / yasmātsvalakṣaṇaiḥ śūnyānītyarthaḥ / iti cittasaṃkṣepavikṣepajñānaṃ caturtham //

'akṣayākāratāyāṃ ca' iti kṣayapāṭho mahatyau prati / imāṃ tu prati 'ameyākṣayatāyāṃ ca' iti pāṭhaḥ / asyāṃ hi paṭhyate aprameyākṣayāni cittānīti / tadāha / punaraparamityādinā / kathaṃ ceti praśnaḥ / uttaraṃ tasyetyādinā / adhiṣṭhitamiti na kadācinna sthitamanādinidhanamityarthaḥ / dharmatayeti bhāvaḥ / ata eva saṃskṛtalakṣaṇābhāvād anirodhamanutpādamasthitam / anāśrayaṃ ṣaṇṇāmapīndriyāṇāṃ tasminnavyāpārāt / pramāṇābhāvād aprameyam / kṣayābhāvād akṣayam / yeneti yenādhiṣṭhitatvādinā / ākāśetyādi / yathā ākāśasyāprameyatākṣatayā tathā cittasya / evamityādinopasaṃhāraḥ / iti aprameyākṣayatājñānaṃ pañcamam //

aprameyākṣayatāyāṃ ceti cakāro 'nuktasamuccayārthaḥ / tena saṃkliṣṭāsaṃkliṣṭajñānaṃ līnapragṛhītajñānaṃ sāśravānāśravajñānaṃ ca parigṛhyate / tatrādyaṃ punaraparagadyadvayenāha / asaṃkleśasaṃkliṣṭānīti saṃkliṣṭiḥ saṃkleśaḥ kleśopakleśairmalinīkaraṇam / na saṃkleśo 'saṃkleśaḥ / tena saṃkliṣṭāni / yato 'saṃketāni / kit nivāse / cittadharmatā(ta)yā na samyaksthānaṃ teṣāmāgantukatvāt / prakṛtītyādi / cittadharmatā hi prakṛtyaiva prabhāsvarā nirmalā nityamasaṃkliṣṭeti saṃkliṣṭāsaṃkliṣṭacittajñānaṃ ṣaṣṭham //

dvitīyaṃ punaraparagadyadvayenāha / anālayalīnānīti / anālayo 'layanam / alayanenaiva līnāni / cittaṃ hi līnaṃ na cittaprakṛtiḥ / na hi cittaprakṛtirna mahyaṃ na meti vā / agrāhyāṇi tāni cittāni na pragrahītavyānīti / agrahaṇaṃ pragrahaḥ / praśabdasya pratiṣedhārthatvāt / prasthānavat pravāsavacceti bhāvaḥ / iti līnapragṛhītacittajñānaṃ saptamam //

punaraparagadyadvayena tṛtīyamāha / asvabhāvānītyādi / ātmanyeva bhāvaḥ svabhāvaḥ / tadabhāvādasvabhāvāni / visaratyebhiścittamityāsravā asaṃkalpāḥ / tadyogātsāsravāṇi / kutaḥ? yato 'satsaṃkalpāni / asatāṃ kāmarūpārūpyabhavānāṃ kalpanāt / abhāvagatikānītyādi / abhāvaḥ śūnyatā / sā gatireṣāmiti tathoktāni / tasmād anābhogāni kāmarūpārūpyabhaveṣu visaraṇāt / tato 'nāsravāṇītyarthaḥ / iti sāsravānāsravacittajñānamaṣṭamam //

'sarāgādau' iti / sarāgavītarāgajñānaṃ sadoṣavītadoṣajñānaṃ samohavītamohajñānaṃ ca / tatrādau punaraparagadyadvayenāha / yā cittasya sarāgatetyādi / cittasya sarāgatā na cittaprakṛteḥ / tasmādvinaiva rāgaṃ sarāgāṇītyarthaḥ / yaścittasya vigama ityādi / vigamaḥ śūnyatā / na sā sarāgateti saiva vītarāgatetyarthaḥ / iti sarāgavītarāgacittajñānaṃ navamam //

punaraparagadyadvayena dvitīyam / tatsubodham / iti sadoṣavītadoṣacittajñānaṃ daśamam //

tataḥ punaraparagadyadvayena tṝtīyam / iti samohavītamohacittajñānamekādaśam //

"pravistṛte mahadgate 'pramāṇe ca" iti śāstram / pravistṛtaṃ vipulamanantaṃ kāmadhātvālambanaṃ brahmavihārādi / mahadgataṃ rūpadhātvālambanam / kāmādrūpasya prakṛṣṭatvādārūpyadhātvālambanam / tridhātvālambanamanālambanaṃ cāpramāṇam / atastrīṇi jñānāni mahatyoḥ / vipulacittajñānaṃ mahadgatacittajñānamapramāṇacittajñānaṃ ca / imāṃ tu bhagavatīṃ prati 'apramāṇe ca' iti cakāro 'nuktasamuccayārthaścādyayorabhisambadhyate / vipule 'vipule ca / mahadgate 'mahadgate ca / apramāṇe ceti / tasmādasyāṃ trīṇī jñānāni / avipulavipulajñānam, amahadgatamahadgatajñānam, apramāṇajñānaṃ ceti / tatrādyaṃ punaraparagadyadvayenāha / asamutthānetyādi samutthānaṃ vistāraḥ / tadyogapratiṣedhād asamutthānayogāni / atiprasārapratiṣedhād asamutthānaparyāpannāni dharmatayā / tasmād avipulāni / na hīyanta ityādi / na hīyante nāpacīyante tasmānnāvipulāni / na vivardhante tasmānna vipulāni na vigacchantīti na viśeṣaṃ gacchanti / tasmānna vipulāni nāvipulāni / avigamatvādeveti nirvikāratvādeva cittānāmiti cittadharmatāyāḥ iti vipulāvipulacittajñānaṃ dvādaśaḥ //

punaraparagadyadvayena dvitīyamāha / anāgatikānītyādi / dūrādantike gatirāgatiḥ / antikāddūragatirgatiḥ / parito gatiḥ paryāpanna

[lokasandarśanaparivarto nāma dvādaśaḥ //]

[acintyaparivarto nāma trayodaśaḥ //] This chapter is missing in original text

[aupamyaparivarto nāma caturdaśaḥ //] This chapter is missing in original text

15. devaparivarto nāma pañcadaśaḥ

...........tyāha / yānyenamityādi / kāni punarasya kalyāṇamitrāṇītyata āha tānyevetyādi / tānyasmai kathamarthamupadekṣyantītyata āha evaṃ cetyādi / evamanenākāreṇa / ehi tvamityādinā kārṣīrityetadantena / yogamiti prayogamabhiyogaṃ vā / mā parāmṛkṣa iti tabhdāvena mā grahīḥ / aparāmṛṣṭeti sarvadharmairavikalpitā / parijayo 'bhyāsaḥ / evaṃ hītyādinā upasaṃhāraḥ / samyaksambodhī samyakpariṇāmanamanāsvādaḥ / ityanāsvādanāviśeṣeṇa mārge caturthaḥ kṣaṇaḥ //

ukto viśeṣaḥ ṣoḍaśavidhaḥ / kāritraṃ daśavidhaṃ vaktavyam / tatra śāstram-

etadāha subhūtirityādinā / tacca duṣkaretyādinā subhūtiḥ prastauti / evametadityādinā bhagavānācaṣṭe / ye lokahitāya samprasthitā iti bodhimabhisambudhya pañcabhyo gatibhyaḥ sattvān parimocya teṣāmabhaye nirvāṇe pratiṣṭhāpanāditi hitakāritram //

lokasukhāya lokānukampāyai samprasthitā iti bodhimabhisambudhya sattvān duḥkhadaurmanasyopāyāsebhyaḥ parimocya teṣāṃ sukhe nirvāṇe pratiṣṭhāpanamiti sukhakāritram //

lokasya trāṇaṃ bhaviṣyāma ityādinā trāṇādikāritrāṇāmuddeśaḥ / ityevaṃrūpaṃ vīryamārabhanta iti sambandhaḥ / yathoddeśamaṣṭābhiḥ kathañcavākyairnirdeśaḥ / tata iti tebhyo duḥkhebhyaḥ / enamiti lokam / vyāyacchanta iti saṃrakṣanti / vīryamiti prayogam / trāṇaṃ bhavanti trāṇakaraṇāditi trāṇakāritram //

ityādireva........... ..........(RSt_100) [avidyā]ṇḍajamasminniti kṛtvā / sa eva paṭalaṃ dṛṣṭirodhakatvāt / avidyaivāṇḍakośapaṭalaṃ tena paryavanaddhā avaguṇṭhitāḥ / tamo mohaḥ / tenābhibhūtā andhīkṛtāḥ / avabhāsayantaḥ ālokaṃ kurvantaḥ / vidhunvanti apanayanti / evamālokakaraṇādālokā bhavantītyālokakāritram //

anutpādaścānirodhaśceti samāhāradvandvaḥ / prakṛtiḥ sarvadharmāṇāṃ dharmatā / tayā teṣāmanutpādānirodhāya dharmadeśanāt pariṇāyakāḥ parito netāraḥ paramārthabodhakā iti pariṇāyakakāritram //

iti tribhiryānairanābhogataḥ phalasākṣātkriyātmakaṃ gatikāritramityarthaḥ /

grāmasya (?) hi gatiḥ prāptireva / yadābhogena gamanena yānatrayaphalasyāpi gatiḥ prāptireva sā tu nirābhogā / na hi pumān kāyena cetasā vā gantvā tatprāpnoti kintvābhogata eva / tathā hyākāśagatikāḥ sarvadharmāḥ / na hyākāśasya gatirāgatirvā / svabhāva evāsya gatiḥ / tasmādākāśagatikā ityākāśasamāḥ / kuta ityāha / yathā hītyādi / akṛtamanutpāditatvāt / avikṛtamavasthāntarānutpādanāt / anabhisaṃskṛtaṃ hetupratyayaiḥ sambhūya tasyākaraṇāt / sthitamutpadya vṛtteḥ / saṃsthitaṃ samantataḥ sthiteḥ / vyavasthitaṃ kvacideva sthiteḥ / eṣāṃ viparyāsādāsthitamasaṃsthitamavyavasthitam / ākāśakalpatvādavikalpā nirābhogāḥ / dharmatāmātratvāddharmāṇāmiti bhāvaḥ /

yathā vākāśagatikā evaṃ śūnyatādigatikāḥ / tadevamagatigatikāḥ sarvadharmā iti........gatikāritram //

uktaṃ daśavidhaṃ kāritram /

..........śāstram-

yaḥ svabhāvaścaturthaṃ lakṣaṇamiṣṭaṃ sa ṣoḍaśavidhaḥ / sarvakarmasādhanaṃ lakṣaṇam / lakṣyata iti kṛtvā / ata evāha 'lakṣyate ceti' / lakṣaṇāntaramapyāha 'lakṣmīva' iti / lakṣmayogāllakṣmī lakṣaṇayogāllakṣaṇamityarthaḥ / kathaṃ 'ṣoḍaśātmakaḥ'? ityata āha'kleśaliṅge 'tyādi / ato 'sya prastāvanā subhūtirāhetyādinā bhagavānāhetyataḥ prāk / caritāḥ ṣaṭpāramitā rakṣantīti caritāvinaḥ / katame ta ityāha / ya imāmityādi / kiṃsvabhāvā ityanena padena svabhāvapraśnaḥ / uttaraṃ bhagavānāhetyādinā / vinayo 'panayaḥ / tamarhantīti vainayikāḥ / tairviviktaḥ svabhāva eṣāmiti tathoktāḥ / iyatā catvāraḥ svabhāvā uktāḥ / kleśavivekaḥ / kleśaliṅgavivekaḥ / kleśanimittavivekaḥ / vipakṣapratipakṣavivekaśca / tatra kleśo rāgādiḥ / kleśaliṅgaṃ kleśakṛtaṃ kāyādidauṣṭhulyam / kleśanimittamayoniśo manasikārādi / vivakṣapratipakṣau rāgārāgau dveṣādveṣo mohāmohau ca / subhūtirāhetyādinā subhūtirāhetyataḥ prāk / etadāha / eṣa eva svabhāvo gatiḥ yāmabhisambudhya deśayiṣyantaḥ sattvānāṃ gatirbhaviṣyantīti //

subhūtirāhetyādi buddhabhūmirveti yāvat / atra na rūpādisambaddha iti na rūpādisvabhāvāyai(ya) svabodhaye / na rūpāderarthāyeti na rūpādisvabhāvānāṃ sattvānāmarthāya / evaṃ na bhūmitraya svabhāvānāṃ (?) / svabodhaye / nāpi / nāpi bodhitrayasvabhāvānāṃ sattvānāmarthāya / tadityādinā praśnaḥ / uttaraṃ sarvetyādi / na pratikāṃkṣitavyānīti na labhyatvena draṣṭavyāni / atra trīṇi na draṣṭavyānītyekameva sthānaṃ draṣṭavyamiti bhāvaḥ / iti duṣkarasvabhāvaḥ //

duṣkarasahita ekānto 'duṣkaraikāntaḥ' / evamukta ityādi yenāyamityataḥ prāk / abhimato 'rtho 'rthavaśaḥ / taṃ ca svayameva bhagavānāha / asthānaṃ hītyādinā buddhabhūmirvetyekāntaḥ / ityaikāntikasvabhāvaḥ //

yenāyaṃ sarvasattvānāṃ kṛtaśaḥ sannāhaḥ sannaddha ityuddeśasvabhāvaḥ //

subhūtirāhetyādi kaccidityataḥ prāk / gambhīreti pratijñā / catvāro hetavaḥ pare bhāvanānupalabdheḥ / adhvatrayepi bhāvakānupalabdheḥ / bhāvyasya prajñāpāramitāvastuno 'nupalabdheḥ / tadālambanānāṃ cānupalabdheriti / asiddhatvaparihārāya tatkasyetyādinā praśnaḥ / na hītyādinottaram / pariniṣpanno vastubhūtaḥ / ataścākāśabhāvanaiṣā sarvadharmabhāvanā ca dharmatāmātradarśanāddharmāṇāṃ cānupalabdheḥ / ata evāsaṅgabhāvanaiṣānantabhāvanā ca sarvadharmeṣvanupalabdheravyāghātāddharmāṇāṃ (RSt_102) cānantyāt / asato bhāvanāsadbhāvanā grāhyānupalambhāt / aparigrahabhāvanā grāhakānupalambhāt / upaparīkṣitavyo veditavyaḥ / ityanupalambhakasvabhāvaḥ //

kaccidityādinā subhūtirāhetyataḥ prāk / anabhiniveśasvabhāvaḥ //

subhūtirāha / yo bhagavannityādi atha khalu śakra ityataḥ prāk / vyavacāritetyālambitā / nimnaprāgbhāvapravaṇaśabdā ādhārārthāḥ / taiḥ saha bahuvrīhiḥ / santatiścittasantānaḥ / ākāśanimnayeti ākāśopamatvāt sarvajñatāyāḥ / iyaṃ sā vyavacāraṇeti prajñāpāramitāyā iti śeṣaḥ / tadityākāśopamatvaṃ tasyāḥ kutaḥ? uttaram / aprameyā hītyādinā / deśataḥ kālataśca pramātumaśaktyatvādaprameyā / tathaiva pramāṇavirahād apramāṇā / na tadrūpaṃ yāvannāpi kvacitpradeśe sthitamiti / sarveṣāmeṣāṃ deśakālavyāpitvena pramāṇāviṣayatvādaprameyasya tādrūpyāyogāt / api tvityādi / taditi vartate / kenaciditi / kenacidrūpādinā svabhāvena / rūpādīnāṃ pramāṇāvattvāditi bhāvaḥ / tatkasyeti praśnaḥ / uttaraṃ rūpameva hītyādi / rūpādiśabdairatra rūpādidharmatocyate / tasmādavirodhaḥ / na ca rūpādibhedepi dharmatāyā bhedo rūpādīnāmalīkatvenābhedakatvāttadānīmastaṅgamāccetyālambanasvabhāvaḥ //

atha khalu śakra ityādyāparivartasamāpteḥ / gambhīrā duradhimocatvāt / duravagāhā cintāmayyā prajñayā durdṛśā laukikabhāvanāmayyā / duranubodhā lokottarāyā / cikīrṣitasyākaraṇamalpotsukatā / avanatamāvarjitam / yatra na kaścidityādinā traiyadhvikakriyāniṣedhaḥ / ākāśetyādinā karmaniṣedhaḥ / ātmetyādinā kartṛniṣedhaḥ / sarvadharmāṇāṃ labhyānāmanāgamanatayā heyānāmagamanatayā ca gambhīraḥ / vipratyanīko viparītaḥ / yato 'nugrahāyāvikalpanāyaiṣa dharma udgrahe ca lokaścarati / lokaviparītā pratītirvipratyayaḥ / iti vipratyayasvabhāvaḥ //

devaiḥ śakrādibhirupalakṣitaḥ parivarto devaparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ pañcadaśaḥ parivartaḥ //

16. tathatāparivarto nāma ṣoḍaśaḥ /

atha khalvityādi / nāyaṃ kvacitpratihanyata iti sarvatrāsya bādhakābhāvāt / ataśca apratihatalakṣaṇo 'pratihatasvabhāvaḥ / (RSt_103) ākāśasamatayeti / yata ākāśasamaṃ tatastadvadevāpratigham / kutaḥ samatetyata āha / sarvapadānāṃ sarvavastūnāṃ anupalabdhitaḥ / apratimo nirupamaḥ advitīyatvāditi sadṛśābhāvāt / pratibodhakaṃ lakṣaṇamasyeti pratilakṣaṇaḥ / tadabhāvād apratilakṣaṇaḥ / niṣpratyarthikatvāditi virodharahitatvāt / ityapratihatasvabhāvaḥ /

padaṃ pratiṣṭhā sugatidurgatinirvāṇāni / tadabhāvād apadaḥ / anabhinirvṛttatvāditi / na khalvanabhinirvṛttasya kvacitpratiṣṭhā / kuto 'nabhinirvṛttaḥ? yato 'nutpāda utpādarahitaḥ / kuto 'nutpādaḥ? sarvotpattīnāmanutpattitvāt / na hi satāmutpattirutpattilakṣaṇāyogāt / nāpyasatām / asattvādeva kharaviṣāṇavat / durgatipathaḥ sugatipatho nirvāṇapathaśceti panthānaḥ / tadabhāvād apathaḥ / ata evāha / sarvapathānupalabdhitvāt / ityapadasvabhāvaḥ //

atha khalvityādi / anujāta iti / anupūrvo janiḥ sakarmakaḥ / karmāsya janakaḥ / kartā janyaḥ / anuḥ sādṛśye / tasmādiha kartari ktaḥ / karmaṇi ṣaṣṭhi / sambandhavivakṣayā bhagavato 'nujātaḥ subhūtiḥ / tatkasyetyādi tattasyānujātatvaṃ? uttaraṃ tathā hītyādinā / bhagavata eṣa putraḥ sadṛśaśca śūnyatāvāditvāditi bhāvaḥ / atha khalvityādi / ajātatvādityanujātatve hetumāha / ajātatvena pitāputrayoḥ sādṛśyāditi bhāvaḥ / yadyajātaḥ tau kathaṃ pitāputrau? saṃvṛtyeti bhāvaḥ / anupā(jā)ta ityādinā hetvantaramāha / anupā(jā)to 'nugatastathāgatasya tathatām / tatopyanujātastathāgatasya / anugamya jāto 'nujāta iti bhāvaḥ / asiddho heturiti cedāha / yathetyādi / anāgatetyanutpannā / agatetyavinaṣṭā / kiṃ punaḥ prāpte 'rhattve 'nupā(jā)taḥ kiṃ vā pūrvamevetyata āha / ādita ityādi / atathateti / tathatāśabdānābhidheyatvāt / evaṃ hītyādinopasaṃhāraḥ / gatyagatī(?) gatiḥ / tatpratiṣedhādagatisvabhāvaḥ //

anujātatve hetvantaramāha tathāgatasyetyādinā / tathatā hi dharmāṇāṃ sthitiḥ / anatikramaṇīyatvāttathāvasthitā / hetvantaramāha / yathetyādinā / pūrvasvabhāvānuvṛtteḥ avikārā / svabhāvāntarānutpatteḥ nirvikārā / vikalpasvabhāvābhāvād avikalpā / vikalpāviṣayatvāt nirvikalpā / hetvantaramāha / yathācetyādinā / na kvacitpratihanyata iti sarvagatatvāt / tatkasya hetoriti / tadapratihatatvaṃ kutaḥ? tathā hi yasya yā tathatā tatraiva sāsti tato 'nyatra pratihanyata eva / vastvabhāvāt / uttaraṃ yā cetyādinā evaṃ hītyataḥ prāk / ekaivaiṣeti pratijñā / tatkimekajātīyatvādekā? netyāha / advayeti / dvayaṃ bhedastadabhāvādadvayetyeko (RSt_104) śabdasyārthaḥ / ekamapi sambandhibhedābhdidyate / tadyathā pūrvākāśamaparākāśamiti / tadvadrūpatathatā vedanātathatā saṃjñātathatetyeṣa bhedo bhavatīti cedāha / advaidhīkāreti / ataśca advayatathatā / nityaṃ tathaiveti tathatā / advayā ca svayamabhedāttathatā ca paratopyabhedādityadvayatathatā / hetumāha / na kvacidityādinā / tatkhalu tasya bhavati yadyadādhāraṃ taddhetukaṃ vā / tadyathā kūpodakaṃ yavāṅkura iti / tathatā tu na kvacit nāpi kutaścit / tasmātkeṣucidapratibaddhatvānna sā kasyacit / yataḥ sā na kasyacittataḥ sādvayādvaidhīkārādvayatathatā / tato na kvacitpratihanyate / tasmādanujātaḥ subhūtistathāgatasyeti siddham /

hetvantaramāha / evaṃ hītyādinā / evaṃ hīti evamapi / tadevāha / akṛtatathatayeti / akṛtā cāsau nityatvāttathatā ca / na sā kadācinna tathateti nityaṃ tathaiva bhāvāt / tataḥ sādvayeti kālabhedenāsyābhedāt / tathāgatamiti karmaṇi dvitīyā /

hetvantaramāha yathetyādinā / sarvatreti sarvalokadhātuṣu / sarvadharmaṣviti sarvavastuṣu / avikalpā teṣāmavikalpanāt / nirvikalpā tathaiva sarvavikalpānāṃ prahāṇām / evameva ceti sarvatrāvikalpanirvikalpatayā / aluptamityacchinnam / evaṃ hītyādinopasaṃhāraḥ //

hetvantaramāha yathetyādinā nānyatreti nānyā bhedakatvānupalabdheḥ / dvitīyābhāvādananyā cāsau tathatā ceti ananyatathatā / tasyā anugamaḥ / tenopagatastathatāṃ saṃvṛtyā / paramārthamāha / na cetyādinā / atretyasminnupagame / na kaścitsubhūtiranyo vā / na kvaciditi tathāgate 'nyasmin vānugatimupagataḥ / dharmapubhdalanairātmyadarśanāditi bhāvaḥ / evaṃ hītyādinopasaṃhāraḥ /

hetvantaramāha yathetyādinā / evaṃ hītyādinopasaṃhāraḥ / ityajātasvabhāvaḥ //

tathāgatatathatayāpītyādi iyaṃ setyataḥ prāk / atra sarvatathāprabhedānāmabhedaṃ darśayan bhedaṃ pratiṣedhatīti sarvāsāṃ rūpāditathatānāmanupalambhāttathatānupalalambhaḥ ṣoḍaśaḥ svabhāvaḥ //

asyāstathatāyā māhātmyamāha / iyaṃ setyādinā / gamirjñānārthaḥ tathatāgatānena tasmāttathāgata iti bhāvaḥ /

asyāṃ deśyamānāyāṃ yadabhdutamabhūttadāha / asyāmityādinā / ṣaḍavikāramaṣṭādaśamahānimittaṃ yathā bhavati tathā akampata yāvat saṃprāgarjat / atra trayo dhātavaścalanārthāḥ / trayaḥ śabdārthāḥ / mṛdumadhyādhimātrakriyābhedādaṣṭādaśamahānimittāni (RSt_105) bhavanti / tatra calanamaṅgataḥ / kampanaṃ sākalyena / sākalyenātyantaṃ kampanaṃ kṣobhaḥ / vedhaḥ śabdaḥ / raṇitaṃ daṇḍāhatakāṃsīvat / garjanaṃ navamahāmeghavat / ṣaḍvikārāstadyathā- "pṛthivyāḥ pūrvā digunnamati paścimāvanamati / paścimā digunnamati pūrvāvanamati / uttarāvanamati uttarā digunnamati / dakṣiṇāvanamati / madhye unnamati / ante 'vanamati / ante unnamati madhye 'vanamati" iti / kiṃvadityāha / tathāgatasya cetyādi / evaṃ hīti / tathāgatābhisambodhāvivasubhūtestathatānirdeśe mahānimittaprādurbhāvasamatayā /

prakārāntaramapyāha / punaraparamityādinā jāyerannityetatparyantena / na saṃvidyanta iti pratijñā / nopalabhyanta iti hetuḥ / yairiti svadharmaiḥ / anujāyeteti kartari liṅ / ye ceti tāthāgatā dharmāḥ / anujāyeranniti karmaṇi liṅ / evaṃ hītyupasaṃhāraḥ / tathatā kathaṃ caryā? tanmātre 'vasthānāt / asmin khalu punarityādi sugamam /

kiñcāpīti yadyapi trayastriṃśata ityapādāne tasiḥ / jātyā pakṣiṇaḥ mahākāyatvācchakuneḥ / antarā cittasyeti dyāvāpṛthivyormadhyasaṃjñinaḥ / evaṃ bhavatīti eṣa vitarko bhavati / śeṣaṃ subodhaṃ virahito bhavatīti yāvat ! iha jñānaviśeṣakāritrasvabhāvalakṣaṇe ukte /

bodhisattvānāṃ mokṣabhāgīyaṃ vaktavyam / tacca tadvirahiṇāṃ bodhisattvānāmarhattvaprāptikāraṇanirdeśena sūcitaṃ vyaktikartuṃ śāriputra āha / yathāhaṃ bhagavannityādi / prajñāpāramitā bhāvayitavyeti sarvadharmaparamārthajñānāya / caryamāṇasya ca dānapāramitāderanimittīkaraṇārtham / upāyakuśalenetyupāye kuśalena / tatropāyaḥ sarvākārajñatācittasya nityamatyāgaḥ / sarvapuṇyānāṃ ca bodhau samyakpariṇāmanā / samyakpariṇāmanānumodane ca tatparivartokte ataḥ śāstroktalakṣaṇamuktaṃ bhavati /

tesya pañcaprabhedā mahatyorbhagavatyoḥ / tathā ca śāstram-

[93] dharmeṣu sarvairākāraiḥ jñānaṃ prajñeti pañcadhā /

etadeva bhagavānāha / evamukta ityādinā / atha śāstram-

etadeva atha khalvityādinā prastuvanti / kṛcchreṇa sambhavo 'syā iti durabhisambhavā / etaddevairaviśeṣeṇoktam / atha khalvityādinā bhagavān pudgalaviśeṣeṇāha / duṣprajñairityādi / duṣpra jñādipadaiḥ sūcito viśeṣo mṛdūni mokṣabhāgīyāni / tīkṣṇaistu mokṣabhāgīyaiḥ svabhisambhavā samyaksambodhiḥ / atastāni darśayitukāmaḥ subhūtirāha / yabhdagavānityādi / evamukta ityādinā bhagavata uttaram / sarvadharmāṇāmasattayā bodheḥ svabhisambhavatvamuktaṃ subhūtinā tadayuktam / yato yadyetāvata svabhisambhavā syāttadā sarvasattvānāmādita eva tathā syāt / tasmātpratipattitaḥ prāptiḥ / sā ca na teṣāmasti yeṣāṃ mṛdūni mokṣabhāgīyāni / ato 'sambhavatvādaprāpterdurabhisambhaveti brūmaḥ / nanvabhijñāste śrutacintādibalena samyaksambodhau tatteṣāṃ kuto 'prāptirityata āha / asadbhūtatvādadurabhisambhaveti / te hi bālagrāhyamevārtha bodhiṃ manyante / sa cāsadbhūtatvādalīkatvānna prāpyata iti bhāvaḥ / tathā hi / vikalpaṃ vā bodhi manyeran / vikalpanirmitaṃ vārtham / pakṣadvayamapyayuktam / avikalpatvādvikalpāviṭhapitatvācca bodheḥ / etaddarśayitumāha / avikalpatvādityādi /

atha khalvityādinā sthaviraśāriputrasyottaram / sa hi manyate śūnyatvātsvabhisambhavetyayaṃ viruddho heturiti / evaṃ ceti / ākāśasamatayā ca / ākāśasamā hīti hetuḥ / yattatvaṃ yeṣāṃ tenaiva teṣāmabhisambodhāditi bhāvaḥ / evaṃ viruddhatvamuktvā anumāne bādhāṃ vivakṣuḥ prasaṅgaṃ karoti yadi cetyādinā / na tveveti naiva / yasmādityādinā viparyayamāha / athavā parasya hetau dūṣite svapakṣasādhanamevedam / evamukta ityādinā vistareṇa subhūtiḥ prasaṅgaṃ vighaṭayati / vivartituḥ samboddhuḥ samboddhavyasya ca vikalpane / katamaḥ sa dharmo yo vivartata ityuktvā avivartanameva sādhayitumāha yastasyāmevetyādi / sarvadharmāsthānayogeneti / sarvadharmaṣvasthānameva yogo nyāyaḥ / tena dharmatāyāṃ sthitaḥ / dharmataiva śuddhā bodhiḥ / sā ca prakṛtyaiva śuddheti bhāvaḥ / evamukta ityādi śāriputrasya vacanam / dharmanayajātiḥ dharmāṇāṃ tattvaprakāraḥ / ye cetyādinā viśeṣamāha / ca śabdastuśabdasyārthe / atha khalvityādinā pūrṇaḥ subhūtiṃ smārayati / śeṣaṃ subodhamāsiddhāntasthāpanāgraṃthāt anuttarayā bodhyāniryāsyatyayaṃ bodhisattvo mahāsattva ityasmāt / ata iyatā vistareṇa (RSt_107) samanvitam / tīkṣṇairmokṣabhāgīyaiḥ svabhisambhavā samyaksambodhiriti / uktāni mokṣabhāgīyāni //

mokṣasya bhāgo bhajanaṃ prāptiḥ tasmai hitāni mokṣabhāgīyāni tadapyuktāni / nirvedhabhāgīyāni vaktavyāni / nirvedhaḥ prativedho darśanamārgaḥ / tasya bhāgaḥ prāptiḥ / tasmai hitāni nirvedhabhāgīyāni / tāni catvāri / ūṣmamūrdhākṣāntiragradharmāśceti / tatrādyamadhikṛtya śāstram-

ata āha / atha khalvityādi yāvadahaṃ nātha iti / sthātavyamiti spṛhaṇataḥ / śikṣitavyamabhyāsataḥ / samaṃ sthātavyamityādinā daśacittānyuktani / samacittaṃ maitracittaṃ niḥśāṭhyacittaṃ nihatamānacittaṃ mātāpitrādicittaṃ putraduhitādicittaṃ ceti / nāthaḥ sānāthyaṃ kartum / ūṣmagatam //

[96] mūrdhagaṃ

etadāha svayaṃ cetyādinā / pāpāni daśakuśalāni / pāpebhyo nivṛttau viratau / parijayo 'bhyāsaḥ / avidyāpratyayāḥ saṃskārāḥ saṃskārapratyayaṃ vijñānamityādiranulomaḥ pratītyasamutpādaḥ / avidyānirodhāt saṃskāranirodha ityādiḥ pratilomaḥ / anyeṣāmiti pareṣāṃ samādāpakaḥ samyaggrāhakaḥ / varṇavādī guṇavādī samanujño 'nukūla iti mūrdhagatam //

svayaṃ sa satyānāṃ jñānaṃ pareṣāṃ ca tasmin samādāpanaṃ 'varṇavādānukūlatā' iti ca kṣāntigatam / svayaṃ ca sattvānāṃ paripācanabuddhakṣetrapariśodhanādi pareṣāṃ ca tatsamādāpanaṃ varṇavādānukūla[te]ti cāgradharmagatam / etadubhayamāha / evaṃ satyeṣvityādinā / satyeṣviti duḥkhādisatyaviṣayeṣu yathākramaṃ parijñānaprahāṇasākṣātkriyābhāvanāsu strotaāpattyādipañcaphalajñānasākṣātkriyāyāṃ yāvadbodhisattvanyāmāvakrāntau / tathā sattvaparimācanādau ca sthitvā (RSt_108) anyeṣāmapi tatra samādāpane tadvarṇavādinā tatsamanujñena bhavitavyamiti kṣāntigatāgradharmagate //

tasyaivamityādinā nirvedhabhāgīyānāṃ phalamāha / anāvaraṇaṃ rūpaṃ vedanā saṃjñā yāvat saddharmasthitiranāvaraṇā bhaviṣyatīti //

tathatāpradhānaḥ parivartastathatāparivartaḥ //

āryāṣṭasāhasrikāyāḥ prajñāpāramitāyāḥ sāratarā(mā)nāmni pañjikāyāṃ ratnākaraśāntiviracitāyāṃ ṣoḍaśaḥ parivartaḥ //

17. avinirvatanīyākāraliṅganimittaparivarto nāma saptadaśaḥ /

'mokṣanirvedhabhāgīye śaikṣo 'vaivartiko gaṇaḥ / ' iti pūrvamuddiṣṭam / tatra dve ukte / tṛtīyo vaktavyaḥ / ataḥ śāstram-

'atra' iti mahāyāne / 'avaivartikagaṇaḥ' / tallakṣaṇam / vivartāya prabhavati vaivartikaḥ / na tathetyavaivarktiko 'vinivartanīyaḥ / athāsya nirvedhabhāgīyeṣu sthitasya kati liṅgānītyata āha /

avaivartikatvaparijñānamityarthaḥ / atha katame rūpādinivṛttyādayaḥ?

ata āha / atha khalvityādi / ākriyante vyajyanta ebhiriti ākārāḥ / liṅgyante gamyanta ebhiriti liṅgāni / nimīyante nirūpyanta ebhiriti nimittāni / ekārthatvepi trayāṇāmupādāna(naṃ) sattvāntaraśaṅkāyā vyavacchedārtham / paryāyaskandhaṃ (vacanaṃ) athavā aparaḥ paryāyaḥ / kathamityādi / ata eva vāśabdaḥ / kathaṃ ve ti kena prakāreṇa jānīyāma iti sambandhaḥ /

atibahūni liṅgāni tatrādyaṃ tāvadāha yā cetyādinā / caturdhā bhūmiḥ / pṛthagjanaśrāvakapratyekabuddhabuddhasambandhāt / iyaṃ caturvidhāpi tathatābhūmirityucyate / kuta ityāha / sarvāśca ityādi / caśabdo hetau / yasmātsarvā etāstathatayādvayāḥ / rūpādīnāṃ sarvadharmāṇāṃ yathālakṣaṇamasattvāt tathataivaitāḥ / tathatā caikaiva na dve na bahavyaḥ / tasmāttathatayādvayā abhinnāḥ advaidhīkārādacchinnāḥ vikalpasvabhāvavirahāt avikalpāḥ / vikalpāgocaratvāt nirvikralpāḥ / itīti / evaṃ lakṣaṇā yā tathatā tāṃ tathatāṃ dharmatāmavatarati / kathamavataratītyāha tathatāyāmityādi / sthitastanmātradarśanāt / na kalpayati samyak na vikalpayati vitatham / evamavataratītyevaṃ satyavatarati / ..........tyāha / evamavatīrṇa ityādi / uktena krameṇāvatīrṇaḥ san / yatheti yayā mātrayā śrutvāpīti śravaṇānantaramapi / tatopi vātikramyeti tata uttarakālamapi / na kāṅkṣatīti na bādhate / naivamitīti sambandhaḥ / vividhā matiḥ vimatiḥ / tanna karoti evaṃ vā na veti / ata evāha na vicikitsatoti / na dhandhāyatītyapratipatteḥ pratiṣedhaḥ / kiṃ tarhi karotītyāha / api tvityādi / tathataiva sarvaṃ na santi rūpādaya ityadhimuñcati śraddhayā / avagāhate prajñayā / etadeva jñānaṃ mukhyaṃ liṅgam / asya paricchedamāha / na cetyādinā / (RSt_110) paricchedāpekṣayā bahuvacanaṃ ebhirliṅgairiti / tathataiva sarvamiti jñānāt 'rūpādibhyo nivṛttiḥ' nirvedhāṅgeṣvavaivartikaliṅgaṃ prathamam //

punaraparamityādi / anyeṣāmiti / ito dharmādvāhyānām / śramaṇānāmiti pravrajitānām / mukhamullokayati praṇataḥ paśyati / kimitītyāha / ime ityādi / jānanti laukikena jñānena / paśyanti lokottareṇa / dātavyamiti bhaktito deyam / vyapāśrayata iti sevate śaraṇaṃ vā gacchati / satyeṣu ratneṣu ca vimatirvicikitsā / tasyāḥ kṣaye sati sarvametanna karotīti 'vikitsākṣayo ' dvitīyaṃ teṣu talliṅgam //

sa khalvityādi / apāyā narakapretatiryañcaḥ / svībhāvaḥ strītvam / sa cāvaśiṣṭānāmakṣaṇānāmupalakṣaṇamiti 'akṣaṇakṣayaḥ' tṛtīyaṃ teṣu talliṅgam //

punaraparamityādi / daśasu kuśaleṣu svayaṃ sthitvā 'pareṣāṃ' teṣu 'samādāpanaṃ' dṛḍhīkaraṇaṃ ceti caturthaṃ teṣu talliṅgam //

punaraparamityādi / yaṃ yaṃ dharmamiti sūtrageyādikam / dadāti ca parasmai hitāya sukhāya caṣa bhavatviti teṣāmeva hitasukhāya / iti anenākāreṇa sādhāraṇaṃ karoti / yathā ca dharmadānaṃ tathānyadapi dānaśīlādikamiti 'parādhāraṃ dānādi' pañcamaṃ teṣu talliṅgam //

punaraparamityādinā na dhandhāyatītyetadantena 'gambhīre 'rthepyakāṅkṣaṇaṃ' ṣaṣṭhaṃ teṣveva talliṅgam //

'maitraṃ kāyādi' iti kāyādi karma / tadāha hitavacanaścetyādinā / upalakṣaṇatvāditi 'maitraṃ kāyādi' saptamaṃ teṣu talliṅgam //

'asaṃvāsaḥ pañcadhāvaraṇena vā' iti / pañca nivaraṇāni / kāmacchando vyāpādastyānamiddhamauddhatyakaukṛtyaṃ vicikitsā ceti / ebhirasaṃvāso 'samanvāgamaḥ / tamāha / alpastyānamiddhaśca bhavatītyupalakṣaṇatvāt / iti pañcabhirnivaraṇaisaṃvāso 'ṣṭamaṃ teṣu talliṅgam //

sarva yathā bhavati tathānuśayasya dveṣānubandhasya hānaṃ 'sarvānuśayahāanam' / tadāha niranuśayaśca bhavatīti / navamaṃ teṣu talliṅgam //

'smṛtisaṃprajñatā' itismṛtisahitaṃ saṃprajanyam / tadāha sobhikrāmanvetyādinā / abhikramo gamanam / apratikrama āgamanam / bhrāntaṃ vikṣiptam / na vilambitamiti vilambe vikṣepāt / sahaseti asamīkṣya bhūmim / upalakṣaṇaṃ caitaccaṃkramasthānaniṣadyāśayaneṣu vikṣepasyeti smṛtisaṃprajanyaṃ daśamaṃ teṣu talliṅgam //

tasya khalvityādi yānītyataḥ prāk / yūkāyogād yūkilaḥ / picchāditvādilac / caukṣaḥ śuciḥ / ābādhaḥ pīḍā / ādīnava upadrava iti 'śucicīvarāditā' ekādaśaṃ teṣu talliṅgam //

yānītyādi subhūtirāhetyataḥ prāk / sambhavanti jāyante kāyasya bhakṣaṇāya / abhyudgatānīti prativiśiṣṭāni / iti 'śarīre kri(kṛ)mīṇāmasamubhdavo ' dvādaśaṃ teṣu talliṅgam //

subhūtirāhetyādi punaraparāt prāk / cittālpakṛtyatā alpatvādavikṣepācca / cittasya kauṭilyaṃ kuṭilatā / yattu svadoṣapracchādanopāyastacchāṭhyam yatparavañcanāya sa vaṅkaḥ / paravañcanārthamabhūtasvaguṇasaṃdarśanaṃ māyā / ebhirvirahādyathākramaṃ cittākauṭilyaṃ cittāśāṭhyatā cittāvaṅkatā cittāmāyāvitā ca / śeṣaṃ subodham / iti 'cittakauṭilyaṃ' trayodaśaṃ teṣu talliṅgam //

punaraparamityādi / atra lābhādigurūkatāpratiṣedhena dhutagrahotpyupalabhyate / iti 'dhutaguṇasamādanaṃ' caturdaśaṃ teṣu talliṅgam //

nerṣyāmātmasaryabahulo bhavatīti mātsaryagrahaṇena ṣaṭpāramitāvipakṣā upalakṣyante / iti 'amatsarāditā' pañcadaśaṃ teṣu talliṅgam //

na ca gambhīreṣvityādi punaraparāt prāk / saṃsyandanaṃ saṃyojanam / dharmatayā yuktaṃ sarvamavagacchatīti 'dharmatāyuktagāmitvaṃ' ṣoḍaśaṃ teṣu talliṅgam //

punaraparamityādi dhārayitavyāntaram / pratideśayetyeayamatyayato deśaya / pratiniḥsajeti pratiniyamenātyantikatvena parityaja / evamiti bodhicittatyāge sati / evamapīti / īdṛśepi māyeṇoktai / śeṣaṃ subodham / iti lokānāmartho 'smāditi 'lokārthaṃ narakaiṣaṇā' narakasvīkāraḥ / saptadaśaṃ teṣu talliṅgam //

punaraparādi dhārayitavyāntam / yacchrutaṃ prajñāpāramitādi tatpratideśaya pratyācakṣva / yad gṛhītaṃ badhicittapāramitācaryādi tatparityaja / abhūtavicitravādī kaviḥ / tasya karma kāvyam / avinivartanīyasya dhātuḥ prakṛtiḥ / apratyudāvartanīyadharmeti pareṇa sambadhyate / śeṣaṃ subodham / iti 'parairaneyatā' 'ṣṭādaśaṃ teṣu talliṅgam //

punaraparādi dhārayitavyāntam / saṃsāre cāriketyādinā bodhisattvamārgaṃ dūṣayati / ihaiva tvamityādinā śrāvakādimārgaṃ grāhayati / abhinirvṛtta iti kṣīṇāyuḥ / vāśabdo vikalpe / ihaivetyādikaṃ vā vakṣyati / (RSt_112) aho vatetyādikaṃ vā / cittaṃ na kupyati na calatīti mārabhāṣitasya hīnamārgasya mārabhāṣitatvena jñānāt / ata idaṃ mārasyānyamārgopadeśino 'māra ityavabodhaḥ' ūnaviṃśatitamaṃ teṣu talliṅgam //

sā cedityādi dhārayitavyāntam / viveko mahāyānatyāgaḥ / tadarthāni vacanāni vivekapadāni / tāni parato mārāditaḥ śrutvā cittaṃ na parihīyate iti sambandhaḥ / na calatītyarthaḥ / kuta ityāha / dharmatāyā iti dharma eva dharmatā mahāyānacaryā tataḥ / na pratyudāvartata iti na vimukhībhavati / nānyathābhāva iti na viparyayaḥ / na hīnayāne bahumāna ityarthaḥ / tānīti vivekapadāni / caśabdo hetau / yasmānmārakarmāṇi jānāti / asthānamiti pareṇa sambadhyate / tatheti yathā buddhānuvarṇitam / śeṣaṃ subodham / iti 'caryābuddhānumoditā' viṃśatitama teṣu talliṅgam //

ayamupasaṃhāraḥ / ūṣmādiṣu nirvedhabhāgīyeṣu sthite ya ebhirviśatyā liṅgairlakṣitaḥ sa sambodherna nivartate / so 'vinivartanīya ityarthaḥ //

darśanamārge sthitamadhikṛtya śāstram-

darśanamārge sthitasya bodhisattvasyāvaivartikaṃ liṅgaṃ veditavyam / kiṃ tat? 'kṣāntijñānalakṣaṇāḥ' kṣāntikṣaṇāḥ jñānakṣaṇāśca / 'ṣaṭ ca pañca pañca ca' iti ṣoḍaśetyarthaḥ / katame ṣoḍaśa?

tatrādyamāha / punaraparamityādinā dhārayitavyāntena / abhisaṃskarotīti utpādayatītyarthaḥ / tamapi dharmamiti rūpādikaṃ nopalabhata ityādi / atra upalambha evābhisaṃskāraḥ / sa evotpādanam / anutpādajñāne kṣāntirasyeti bahuvrīhiḥ / iti 'rūpādisaṃjñāvyāvṛttiḥ' duḥkhe dharmajñānakṣāntiḥ / sā dṛṅmārge prathamaṃ talliṅgam //

punaraparamityādi dhārayitavyāntam / vicchankyisyatīti vigatacchandaṃ kariṣyati / ājñāsyati lokottareṇa jñānena / vihanyase kliṣyase / vivecanatā bodhicittatyājanam / tatreti samyaksambodhau / dṛḍhacittena iti samyaksambodhau 'cittadārḍhyaya' duḥkhe dharmajñānam / tad dṛṅmārge dvitīyaṃ talliṅgam //

punaraparādi bhavatyantam / iti 'hīnayānavinivṛttiḥ' duḥkhe 'nvayajñānakṣānti / sā dṛṅmārge tṛtīyaṃ liṅgam //

sa ākāṅkṣannityādi veditavyāntam / iti 'dhyānādīnāmaṅgaparikṣayaḥ' kāmotpattivibandhe daurbalyaṃ duḥkhe 'nvayajñānam / tad dṛṅmārge caturthaṃ talliṅgam //

punaraparādi sa cedityataḥ prāk / atra na nāmaguruka ityādikaṃ 'cetolaghutvam' / so 'bhikrāmanvetyādikaṃ 'kāyalaghutvam' / tadubhayaṃ samudaye dharmajñānakṣāntiḥ / sā dṛṅmārge pañcamaṃ talliṅgam //

sa cedityādi prāganarthikāt / yathoktaiva saṃjñābhyupāyaḥ tena nirvṛttā 'kāmasevābhyupāyikī' / sā samudaye dharmajñānam / tad dṛṅmārge ṣaṣṭhaṃ tallīṅgam //

anarthikā eva cetyādi dhārayitavyāntam / atyarthaṃ saumanasyajananāt priyarūpaiḥ / atyarthaṃ sukhajananāt sātarūpaiḥ / praśaṃsāyāṃ rūpap vā / anarthikā eveti nityamanarthikāḥ / na samaviṣameṇeti na yuktāyuktena / kathamityāha / dharmeṇaivetyādi / apamardanaṃ pīḍā / pañcabhirmokṣabhāgīyaiścaturbhirnirvedhabhāgīyaiḥ saptabhiśca darśanakṣaṇairyogāt satpuruṣairityādini ṣoḍaśapadāni / iti 'sadaiva brahmacāritvaṃ samudaye 'nvayajñānakṣāntiḥ / sā dṛṅmārge saptamaṃ talliṅgam //

punaraparādi dhārayitavyāntam / mantrajātirmantrāviśeṣaḥ grahadevatāyāḥ / auṣadhiḥ pā(pha)lapākāntā / strīdevatāyā mantro vidyā / (RSt_114) bhaiṣajyamauṣadham / ādiśabdena yantramantrādiparigrahaḥ / vigrahaḥ kāyena kalaho vivādastu vācā / iti 'ājīvapariśuddhiḥ' samudaye 'nvayajñānam / dṛṅmārge 'ṣṭamaṃ tāliṅgam //

navamāt prabhṛti pañcakṣaṇānadhikṛtya śāstram-

vihāre pratiṣedhaśca'

iti / 'yogaḥ' sābhiniveśā vṛttiḥ / 'anuyogo ' nirabhiniveśā vṛttiḥ / tābhyāṃ vihārastayorvihārastadvānsamādhiḥ / tasya 'pratiṣedhaḥ' / 'neti' iti naño sambandhādityarthaḥ / sa punarvihāraḥ 'skandhādau' prathamaḥ / 'antarāyeṣu' dvitīyaḥ / 'sambhāre ' tṛtīyaḥ / 'sendriyādike samare ' caturthaḥ / 'matsarādau' pañcamaḥ / tatra caturaṃ tāvadāha punaraparamityādinā na ca te kalahetyataḥ prāk / na te skandhāyatanetyādi / yogāścānuyogaśca yogānuyogaṃ tadanuiyuktāstena saha yuktāḥ / sahārthe 'nuśabdaḥ / na viharantīti sambandhaḥ / atropapattirmahatyobhaṃgavatyoruktā- "tathā hi sa śūnyatāyāṃ sthito na kasyaciddharmasya hīnatvaṃ vā utkṛṣṭatvaṃ vā samanupaśyati" iti / enāmasyāṃ vākyadvayenāha / saṃkleśapakṣo niḥsāratvena saṅgaṇikārāmatāviṣayatvāt saṅgaṇikārāmatā / saivāsattvena kathāmātratvāt kathā / śeṣaṃ pūrvavat / utkṛṣṭatvādrājasaṃkleśanirodhaḥ / sa eva kathā asākṣātkṛtatvena kathāmātratvāt kathā / etāveva kathe dve / yathāyogamuttaratrāpīti skandhādiyogānuyogavihāraviraho nirodhe dharmajñānakṣāntiḥ / sā dṛṅmārge navamaṃ talliṅgam //

pañca nivaraṇāni caurāḥ kuśaladravyaharatvāt / śeṣaṃ pūrvavat / iti nirodhe dharmajñānam / tad dṛṅmārge daśamaṃ talliṅgam //

kuśaladharmasambhāraḥ senā / śeṣaṃ pūrvavat / iti nirodhe 'nvayajñānakṣāntiḥ / sā dṛṅmārge ekādaśaṃ talliṅgam //

tayā senayā vipakṣāṇāṃ bādhanaṃ yuddham / śeṣaṃ pūrvavat / yuddhe sati nirodhaḥ prāpyate / nirodho nirvāṇaṃ vimuktiḥ / kaścāsau? dehapratiṣṭhābogapratibhāsānāṃ vijñaptīnāṃ parāvṛttiḥ / tasmāddehādīnāmavikalpanāt na grāmanagaranigamajanapadarāṣṭrarājadhānīkathāyogānuyogamanuyuktā viharanti / tatra cakṣurādi pañcakaṃ (RSt_115) dehaḥ / sa hi grāma indriyagrāmatvāt / dehānāmādhāratvāt pratiṣṭhā nagaram / niyatendriyagamyatvāt nigamo bhogaḥ pañcaviṣayāḥ / janapadādayaḥ pratiṣṭhāviśeṣāḥ / ātmātmīyavikalpakṣaye sati mokṣaḥ / tata ātmavikalpānadhikṛtyāha / nātmakathetyādi / ātmīyavikalpānadhikṛtyāha / nāmātyetyādi / ita urdhvarūpāḥ kathāste yathāyogamātmīyavikalpā bhogavikalpāḥ pratiṣṭhāvikalpā vā veditavyāḥ / yadi tathā tathā na viharanti kathaṃ tarhi viharantītyāha / api nvityādi / prajñāpāramitaiva katha pratyavekṣā / śeṣaṃ purvavat / sarvatra dharmatayā samatāyogānuyogamanuyuktā eva viharantītyarthaḥ / sarvajñatāpratisaṃyuktairiti bodhicittapratisaṃyuktaiḥ / yuddhendriyādikathāyogānuyogavihāraviraho nirodhe 'nvayajñānam / tad dṛṅmārge dvādaśaṃ talliṅgam //

'matsarādau ca' iti śāstram / yadāha mahatyoḥ / "sa dānapāramitāyāṃ caranna mātsaryakathāyogamanuyukto viharati yāvat prajñāpāramitāyāṃ caranna dauṣṭhulyakathāyogamanuyukto viharati" iti / tadasyāmāha / na ca te kalahabhaṇḍanavigrahavivādakathāyogānuyogamanuyuktā viharantīti / vipakṣatvātkalahā mātsaryādayaḥ / pratipakṣatvātkalahā mātsaryādayaḥ / pratipakṣatvābhdaṇḍanādayaḥ / yadobhayeṣāṃ cetasi cārastulyabalatā ca tadā vigrahaḥ / yadā tu pratipakṣairvipakṣā durbalīkriyante tadā vivādaḥ / tāveva vigrahavivādau kathā vikalpatvāt / tasyāṃ yogānuyogamanuyuktā na viharanti / abhedaḥ samatājñānam / bhedo nānātvavikalpaḥ / mitrakāmāścetyādi dhārayitavyāntaṃ sugamam / iti mārge dharmajñānakṣāntiḥ / sā dṛṅmārge trayodaśaṃ talliṅgam //

punaraparādi sa cedityataḥ prāk / anetaitadāha /

'dharmasyāṇoralabdhatā / niścitatvaṃ svabhūmau ca' iti / so 'ṇumapi dharma na samanupaśyati yo vivarte, bhavān vā vivartena / tathāpi svasyāmavinivartanīyabhūmau niḥsaṃśayo bhavati / vicikitsā saṃśayaḥ / saṃsīdanaṃ mandotsāhatā / ānantaryacitteneti / anantaryapaścāttāpena / prativinodanaṃ sarvathātyāgaḥ / viṣkambhaṇaṃ mandākaraṇam / avinivartanīyacittamātmano 'vinivartanīyatvaniścayaḥ / asaṃhāryamapratyāneyam / ityavaivartikabhūmau 'sthiraniścayatva' mārge dharmajñānam / tad dṛṅmārge caturdaśaṃ talliṅgam //

'bhūmitritayasaṃsthitiḥ / ' mārakarma tathāgatabhāṣitasyānyathātvaṃ bhāvinī cātmanaḥ samyaksambodhiriti trīṇi sthānāni 'bhūmitritayam' / tasmin 'saṃsthitiḥ' (RSt_116) ātyantiko niścayaḥ / tāmāha / sa cetkhalvityādinā dhārayitavyāntena / ihaivetyasminneva janmani / nāyaṃ tathāgata ityasmātpūrva iti śabdaḥ paro draṣṭavyaḥ / tathā tannānyathetyukte 'rthādgamyate bhaviṣyatyeva me 'nuttarā samyaksambodhiriti / buddhādhiṣṭhānaṃ buddhanirmāṇam / addheti tattvata ityarthaḥ / iti bhūmitrayasaṃsthitimārge 'nvayajñānakṣāntiḥ / sā dṛṅmārge pañcadaśaṃ talliṅgam //

punaraparamityādi āparivartāntāt / ātmanaḥ parityāgo vikrayādi / jīvitasya parityāgo maraṇam / buddhairbhagavabhdirdeśito dharmaḥ sarvadharmāḥ śūnyā iti / tameva mohapuruṣāḥ pratikṣipanti / tasya svayaṃ paraiśca parigrahāya jīvitamapi tyajati / sa hi buddheṣu yatpremagauravaṃ taddharme karoti / dharmakāyāstathāgatā iti jñānāt / ātmanaśca bhāvibuddhatvadarśanāt / śrāvakasyāpītyupalakṣaṇam / bodhisattvasyāpi devāderapi / śeṣaṃ subodhamiti / 'dharmārthaṃ jīvitatyāgaḥ' mārge 'nvayajñānam / tad dṛṅmārge ṣoḍaśaṃ talliṅgam //

'ityamī ṣoḍaśa kṣaṇāḥ / avaivartikaliṅgāni dṛṅmārgasthasya dhīmataḥ' // ityupasaṃhāraḥ //

avinivartanīyasya yānyākāraliṅganimittāni taddyotakaḥ parivartastatparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ saptadaśaḥ parivartaḥ //

18. śūnyatāparivarto nāmāṣṭādaśaḥ /

nirvedhāṅgadṛṅmārgayoravaivartikaliṅgāni saṃkhyayā viśeṣataścoktani / bhāvanāmārgastu gambhīraḥ / tato tānyubhayathāpi vaktumaśakyāni / ataḥ śāstram-

[111] gambhīro bhāvanāmārgaḥ

etadāha / atha khalvityādinā pratyekabuddhairityetadantena / āścaryaṃ bhagavannityekaṃ codyam / kimāścaryamityata āha / mahāguṇetyādi / (RSt_117) mahān guṇasambhāraḥ paramagambhīratayā kalpāsaṃkhyeyadvayanirantaraprayatnalabhyatayā ca / ata eva viśeṣato jñātumaśakyatvādapramāṇāḥ saṃkhyātumaśakyatvādaparimitāḥ / bodhisattvo mahāsattva iti bhāvanāmārgastho 'vaivartikaḥ / avinivartanīyeneti bhāvanāmārgasthena / saṃkhyātikramād anantam / paramodāratvād aparyantam / asaṃhārya samyagagrādyaṃ samyagjñātumaśakyaṃ śrāvakapratyekabuddhairapīti bhāvanāmārgasya gāmbhīryam //

subhūtirāhetyādi pratibalaḥ śakto nirdeṣṭum / kintu sattvā(rvā)rtho na syāditi bhāvaḥ / tataḥ kimityāha / ata evetyādi / evakāro bhinnakramaḥ / sthānānītyataḥ pareṇa draṣṭavyaḥ / sarvāṇi gambhīrāṇīti vīpsārthaḥ / sthānānīti bhāvanāmārgālambanāni / prajñāpāramitāyāṃ pratisaṃyuktāni tadādhāraṇītyarthaḥ / sūcayitavyānīti sūcyantāmityarthaḥ / iti subhūteradhyeṣaṇā //

evamukta ityādi / ārabhyeti / ādau nirdiśya / nigamayitukāma iti bhāvanārge yojayitukāmaḥ / iti bhagavato 'bhyupagamaḥ /

atha śāstram-

'gambhīro bhāvanāmārgaḥ' ityuktam / tasya 'gāmbhīryaṃ' gambhīrabhāvaḥ / yataḥ sa gambhīro bhavati tacca śūnyatānimittādikam / mārgasya gambhīryamālambanagāmbhīryāditi bhāvaḥ / taccālambanaṃ 'śūnyatādi' / śūnyatāderapi kā gāmbhīryatā? yāsya samāropāntenāpavādāntena cārahitatā / bhagavānabhyupagataṃ sūcayitumāha / gambhīramitītyādi / sarvadharmāṇāṃ yathāpratibhāsabhāvo yathātattvaṃ ca bhāvaḥ śūnyatā / saivānimittaṃtadvedane nimittanirodhāt / saivāpraṇihitaṃ tadvidāṃ traidhātuke 'praṇidhānāt / saivānabhisaṃskārasteṣāṃ punarbhavāya karmākaraṇāt / saivānutpādasteṣāṃ tena karmaṇānutpādāt / saivājātisteṣāṃ prakṛtyajātatājñānāt / saivābhāvo 'dravyatvāt / saiva virāgaśuddhiḥ kleśānuśayasamudghātāt / saiva nirodhasteṣāṃ punarbhavavi(ni)rodhāt / saiva nirvāṇaṃ teṣāṃ vāsanāsamudghātāt / saiva vigamasteṣāṃ sāśravaskandhoparamāt // iti śūnyatādikam //

subhūtirāheti kākvā pṛcchatītyarthaḥ / dharmāṇāmiti śūnyatādinām / sarvadharmāṇāmiti skandhadhātvādīnām / bālagrāhyā rūpādayaste kathaṃ gambhīrāḥ? ataḥ svayameva pṛcchati kathaṃ cetyādi / uttaraṃ yathā tathatetyādi / (RSt_118) kasya tathateti cedāha tatretyādi / sphuṭīkartumāha yathetyādi / yatreti yasyāṃ rūpāditathatāyāṃ vedyamānāyāṃ kalpitaṃ rūpādi na prakhyāti iyaṃ rūpādīnāṃ gambhīratā / paramārthasatā rūpeṇa teṣāṃ prakhyānāt / samyagdeśanayā toṣitaḥ subhūtirāha / āścaryamityādi / sūkṣmeṇeti nipuna(ṇa)vedyena / nirvāṇaṃ ca sūcitam / bhāvanāmārgasthasyāvaivartikasya sarveṣāṃ parikalpitānāmaprakhyānāt / rūpādibhyaśca nivāritaḥ / teṣāṃ paramārthasya prakhyānāt / tatra nirvāṇena rūpādisamāropāntamutkatā / iti śūnyatādigambhīratā //

atha śāstram-

'abhīkṣṇaṃ' iti prabandhena / ataḥ prābandhikāni 'cintātulananidhyānāni' svabhāvo bhāvanāmārgasya alambanaṃ śūnyatādi / śūnyatāderādhāro nirvedhabhāgīyadṛṅmārgabhāvanāmārgāḥ(rgaḥ) kathaṃ bhāvanāmārgasyā(ścā)syaiva viṣaya iti cedāha-

[113] prābandhikatvādiṣṭo 'sau

'prābandhiko ' hi bhāvanāmārgaḥ / tataḥ prākṛto viṣayaḥ paścāttamo viṣayīti nāsti virodhaḥ / atra sūtraṃ bhagavānāhetyādi / imānīti yathoktāni śūnyatādīni / prajñāpāramitāpratisaṃyuktānīti / vikalpapāramittaiva prajñā prajñāpāramitā darśanamārgo bhāvanāmārgaśca / nirvedhabhāgīyāni tu tādarthyātprajñāpāramitā / tasyāṃ trividhāyāṃ pratisaṃyuktāni sambaddhāni tadādhārāṇītyarthaḥ / ya imānio cintayiṣyati tulayiṣyati upanidhāsyatīti sambandhaḥ / kathamityata āha / evaṃ mayetyādi / sthātavyamiti cintayaikāntaniścayāt / śikṣitavyamiti tulanena śamathotpādanāt / pratipattavyamityupanidhyānena vipaśyanotpādanāt / ājñaptaṃ granthaśravaṇāt / ākhyātamarthajñāpanāt / upadiṣṭaṃ rahasyakīrtanāt catasro yuktayaḥ / apekṣāyuktiḥ sarvahetūnapekṣya kāryotpatteḥ / kāryakāraṇayuktiḥ tebhyaḥ pratyekaṃ kāryaviśeṣotpatteḥ / upapattiḥ sādhanayuktiḥ / yena pramāṇena yo 'rthaḥ sidhyati / dharmatāyuktiḥ svabhāvaniyamodharmāṇām / agni eva dahatyāpa eva kledayantītyādi / ābhiḥ samādhyālambanasya rahasi paryaṅkamāruhya satkṛtya sātatyena nirūpaṇaṃ cintā / tatraiva navākāreṇa śamathena cetasaḥ samīkaraṇaṃ tulanam / dharmānvicinoti pravicinoti parivitarkayati parimīmāṃsāmāpadyata iti caturākārā vipaśyanā upanidhyānam // tatra yathāvabhdāvikatājñānaṃ vicayaḥ / (RSt_119) pañcaiva skandhā ityādi yathāvabhdāvikatājñānaṃ pravicayaḥ / sarva ete śūnyā ityādi nirvikalpena manasā prajñāsahagatena nimittīkaraṇaṃ parivitarkaḥ / santīraṇaṃ parimīmāṃsā / iti bhāvanāmārgasya svabhāvaḥ //

navadhā ca prakārataḥ /

sa bhāvanāmārgaḥ prakārabhedena navadhā bhavati / cakārādvipakṣo navadhā / kathamityāha-

mṛdumṛduḥ / mṛdumadhyaḥ / mṛdvadhimātraḥ / madhyamṛduḥ / madhyamadhyaḥ / madhyadhimātraḥ / adhimātramṛduḥ / adhimātramadhyaḥ / adhimātrādhimātraśceti / vipakṣāṇāmapyeta eva nava prakārāḥ / tatraite mārgasya prakārā anulomamutpadyante / taiḥ pratilomaṃ vipakṣaprakārāḥ kṣīyante / adhimātrādhimātro 'dhimātramadhyo yāvanmṛdumṛduḥ / sa ca vipakṣo bhāvanāheyaḥ kleśavikalpā yathāyogām / audāriko hi malaścelātpurva niṣpīḍyate paścāsūkṣmaḥ / tadvaccittādapi /

tatrādyaḥ tathetyādinā / dvitīya evamityādinā / tataḥ yathā punaraparādibhīḥ prasavatyantaiḥ tataḥ dvāvekena punaraparādinā subhūtirāhetyataḥ prāk / tathetyādi / tatheti yathoktena krameṇa sampādayamānaḥ śamathena / upanidhyāyana vipaśyanayā / upaparīkṣamāṇa ubhābhyām / prayujyamānaḥ śamathavīryeṇa / ghaṭamāno vipaśyanāvīryeṇa / vyāyacchamāna ubhayavīryeṇa / svayameva bhagavān pṛcchati kiyatkarma karotīti / uttaraṃ svayamevāha tadyathāpītyādinā / prasādā prabhavantīti prāsādikā guṇāḥ / matvarthīyo 'c / paraparigṛhīteti parakīyā na vaśayen na śaknuyāt / saṃsārādityāgāmino janmaprabandhāt / chorayatīti tyajati / vipṛṣṭhīkaroti / āgāmino 'nāgamanāt / vyantīkarotītyaparāntataḥ pūrvāntanayanāt / yathājñaptamityādi pūrvavat / yathoddiṣṭaṃ yathā nirdiṣṭamityuddeśanāt / tiṣṭhati cintayā saṃśayacchedāt / śikṣate śamathena / pratipadyate vipaśyanayā / upanidhyāyatītyubhābhyām / evaṃ yogaṃ bhāvanāmāpadyate / iyatā ekaṃ karmoktam /

dvitīyamāha tāṃścetyādinā samyaksambodherityetadantena / iti bhāvanāmārgo mṛdumṛduḥ //

evamityādi evamityanantaroktavat / tāvatkarmeti bahutarakalpavyantīkaraṇam / samyaksambodhivinivartakadoṣavivarjanaṃ ca / adhikamāha (RSt_120) yathetyādinā prāk punaraparāt / tata iti dāyakāt / ayameva viśiṣyate bahutarapuṇyatayā prakṛṣyate / ityata āha / yoyamityādi / iti bhāvanāmārgo mṛdumadhyaḥ //

punarityādi / dadyādarpaṇataḥ / pratiṣṭhāpayedavipratisārataḥ / iti bhāvanāmārgo mṛddhadhimātraḥ //

punarityādi / manasikāro vihāraḥ / iti bhāvanāmārgo madhyamṛduḥ //

punarityādinā bhāvanāmārgo madhyamadhyaḥ //

punarityādi / vyutthāya dharma deśayet tacca bodhau pariṇāmayediti bhāvanāmārgo madhyādhimātraḥ //

punaraparetyādi / tacca dharmadānaṃ / prajñāpāramitoktena pariṇāmena pariṇāmayediti bhāvanāmārgo 'dhimātramṛduḥ //

punarityādi / taddharmadānaṃ prajñāpāramitoktapariṇāmena pariṇamayya punaḥ pratisaṃlayane yogamāpadyate / iti bhāvanāmārgo 'dhimātramadhyaḥ //

yaḥ punastat pratisaṃlayanamavirahitaṃ karoti prajñāpāramitayā sa tasya bhāvanāmārgo 'dhimātrādhimātraḥ //

subhūtirāhetyādi / iha bahutaraṃ puṇyaṃ prasavatīti bāhulyenoktam / ataḥ subhūteścodyam / abhisaṃskāro vikalpaḥ / tadvatpuṇyābhisaṃskāropi / tasmādvahutaraṃ puṇyamiti bahutaro vikalpa uktaḥ syāditi / uttaraṃ bhagavānāha sopītyādinā prasavatyantena / idānīmiti bhāvanāmārgakāle / yathālakṣaṇamasattvācchūnyaḥ / ajñātārthe kapratyayaḥ / bālairajñātaḥ śūnyaka ityeva / evameva ākhyāti prakhyātīti ākhyaḥ / anākhye ākhyā bhavati ākhyāyate lohitāderākṛtigaṇatvāt kyaṣ / prakhyātītyarthaḥ / evamuttareṣvapi draṣṭavyam / asvāmikatvād riktaḥ / agrāhyatvāt tucchaḥ / grāhakābhāvatvād asaraḥ / evamiti śūnyatādibhiḥ / śeṣaṃ subodham / iti bahutaraṃpuṇyaṃprasavacodyaparihārau //

subhūtirāhetyādi / utkarṣopi viśeṣaḥ / chedopi nānākaraṇam / tayorvyavacchedārthamubhayorupādānam / pramāṇānītyaudāryaparicchedāḥ / saṃkhyayāpīti gaṇanayāpi na kṣapayituṃ kṣayaṃ netum / syābhdagavannityādi sugamam / adhikaṃ vacanaṃ adhivacanaṃ mukhyaṃ vācakamityarthaḥ / akṣayā apīti (RSt_121) ākāśavat / aprameyātāpītyākāśasyeva / akṣayāprameyaśūnyatānimittādīnāṃ abhilāpāḥ śabdāḥ / nanu śabdā api vicatrāḥ kathamekārthe vyavacchedyabhedyaleśāditi bhāvaḥ / ata evāha deśanābhinirhāra eṣa iti / deśyate 'nayeti deśanā karuṇā tasyābhinirhāro niḥṣyandaḥ sa cāsau nirdeśaśca / atra śāstram-

'na kṣamā' iti na yuktāḥ / ityasaṃkhyeyādinirdeśe codyaparihārāḥ //

subhūtihāha / āścaryamityādyapi tu khalvityataḥ prāk / avāggocaratvād anabhilāpyāḥ / pāramitārthasyeti śūnyatālakṣaṇasya / atra śāstram-

ityanabhilāpyasya hānivṛddhyabhāvaḥ //

kathaṃ tarhi bodhirityata āha / api tu khalvityādyāparivartasamāpteḥ / sa dānaṃ dadattānmanasikārāṃstāṃścittotpāniti yairdānaṃ dadāti / tāni ca kuśalamūlānīti yāni taiscittotpādaiḥ saṃprayuktāni / yathā bodhisthā pariṇāmayatīti / anyathā na sā pariṇāmanā bodhaye syāt / evamuttarāsvapi draṣṭavyam //

yathānuttarā samyaksambodhirityuktam / ataḥ pṛcchati / atha khalvityādinā / bhagavānāha tathataiṣā subhūte 'nuttarā samyaksambodhirityādi / abhīkṣṇamiti punaḥ punaḥ / bahulamiti prabandhane / evaṃ khalvityādinopasaṃhāraḥ / atra śāstram-

[116] yathā bodhistathaivāsāviṣṭasyāthaisya sādhakaḥ /

'asau' iti 'sopi' iti bhāvanāmārgaḥ //

śūnyatāpradhānaḥ parivartaḥ śūnyatāparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāmaṣṭādaśaḥ parivartaḥ //

19. gaṅgadevābhaginīparivarto nāmekonaviṃśatitamaḥ /

atha khalvityādi prāgevamuktāt / na pūrveṇa cittena bodhirna ca paścimena tayorasamavadhānāditi codyam //

evamukta ityādi prāgevamuktāt / iyatā dīpadṛṣṭāntena parihāraḥ / atra śāstram-

[117] pūrveṇa bodhirno yuktā manasā paścimena vā /

iti codyam /

dīpadṛṣṭāntayogena

bodhiriti vartate / anena parihāraḥ //

atha śāstram-

yā bodhiriti vartate / kevalāyā bodhestathataiva lakṣaṇamuktamaṣṭādaśe / saparicchadāyāstu bodherlakṣaṇamaṣṭavidhaṃ gāmbhīryam / tatkathamaṣṭadhā?

'advayaṃ ca upāyakauśalyaṃ ca; iti samāhāradvandvaḥ / ata evamukta ityādinā prāgevamuktādgāmbhīrya subhūtiḥ prastauti / anyatra tebhya iti vinā tebhyaḥ / evamukte bhagavānityādinā parijayaṃ karotītyetadantenāṣṭavidhaṃ gāmbhīryamāha / yaccittamiti bhrāntamabhūtaparikalpātmakam / niruddhamiti santānakṣayāt kṣīṇam / no hīti naivetyarthaḥ / bhrāntikāraṇasya dvayābhiniveśasya kṣayāditi bhāvaḥ / ityutpādagāmbhīryam //

yaccittamutpannamiti abhrāntam / bhrāntikṣayāccittādhīnatvācca cittotpatteriti bhāvaḥ / nirodhadharmi bhagavanniti pratikṣaṇamiti bhāvaḥ / nirotsyata iti santānanirodheneti bhāvaḥ / no hīdamiti svarasata utpatteḥ praṇidhānādibhiśca saviśeṣamakṣayīkṛtatvāditi bhāvaḥ / (RSt_123) yaccittamanutpannarmityutpādagāmbhīrye yaduktam yanna nirodhadharmītyanantarameva yaduktaṃ yannirodhadharmītyasmiṃsteṣāṃ punaruktatā syāt / yaccittamiti yaccittasantānaḥ / anutpādānirodhadharmītyanādinidhanam yo dharma iti nirvāṇākhyaḥ / nirodhoniruddham / tatsvabhāvo 'syeti svabhāvaniruddhaḥ / dharmateti śūnyatā / iti nirodhagāmbhīryam /

tathaiva sthāsyatīti yāvadākāśam / mā kuṭasthā bhūditi tathatāvat / no hīdamiti pravāhanityatvāditi bhāvaḥ / gambhīrā tathateti samyagjñānādapi sūkṣmatvāditayatāgāmbhīryam //

tathatāyāṃ cittamiti tadveditvāttasyā ādheyam / no hīdamiti jñānābhdede vedyatvāyogāt / cittaṃ tathatetyekalakṣaṇāditi bhāvaḥ / anyattathatāyā ilikṣaṇabhedādeva / no hīdamiti lakṣaṇabhedepi tādātmyāt / tadevamagrāhyatvepi vedyā tathateti jñeyagāmbhīryam //

samanupaśyasi tvamiti cittarūpam / no hītyagrāhyatvāt / tadeva grāhyamapi cittaṃ vettīti jñānagāmbhīryam //

gambhīre caratīti prajñāpāramitārthe / samudācārā ālambananimittāni / pravartante na bhavanti / na samudācaranti na prakhyāntīti caryāgāmbhīryam //

nimitte caratīti dvayanimitte 'dvayanimitte vā / no hīti na dvayanimitte nādvayanimitte / nimittamiti dvayādvayanimittam / avibhāvitamaprahīṇam / no hīti nāprahīṇam / prahīṇamevetyarthaḥ / ityadvayagāmbhīryam //

api nviti kinnu / nimittaṃ vibhāvitaṃ bhavatītyapratipūrṇeṣu sarvabuddhadharmeṣu iti bhāvaḥ / subhūtiruttaramāha / na sa bhagavannityadinā / ihaiveti / asminneva janmani / kuta ityāha / sa cedityādi / śrāvako bhavaediti na samyaksambuddhaḥ / etattadityādinopasaṃhāraḥ / yallakṣaṇaṃ yannimittamiti yaddharmanimittaṃ yacca dharmatānimittaṃ tatsarvaṃ jānāti / parijayamabhyāsamātraṃ karoti / ityupāyakauśalagāmbhīryam //

tatrāṣṭamaṃ gāmbhīryaṃ viprakṛṣṭam / bodhe śeṣāṇi sannikṛṣṭānītyuktavidhaṃ gāmbhīryam / uktaśca 'śaikṣau'vaivartiko gaṇaḥ' //

'samatā bhavaśāntyoḥ' vaktavyā / ataḥ śāstram-

[119] svapnopamatvāddharmāṇāṃ bhavaśāntyorakalpanā /

eṣa saṃsāra etannirvāṇamiti bhedakalpanā / saṃsāranirvāṇayoḥ samatājñānaṃ bhāvanāmārge / svapnopamānsarvadharmān paśyatastayorbhedakānupalambhāt / nanvabhūtaparikalpaḥ saṃsāraḥ sa ca bhrāntimātraṃ bhrāntikṣayastu nirvāṇam / kadā tayoḥ samatājñānam? bhāvanāmārge saṃmukhībhūte sarvadharmanairātmyasaṃvedanāditi cet / darśanamārgepyetadastīti bhāvanāmārgasya ko 'tiśayaḥ? tasmāttato vyutthitasya samatājñānaṃ grāhyam / taccāyuktam / vyutthitasya hi jñānaṃ bhrāntaṃ svapnopamatvāt svapnaḥ / bhāvanāmārgastu samyagjñānaṃ divasopamatvāddivasaḥ / tatra kadā yuktaṃ syāt? yadi daivasikādabhyāsātiśayāt, svapneti prajñāpāramitā vivardheta / ataḥ sūtre 'tha khalvityādinā vivardhata ityetadantena praśnaḥ / subhūtirāhetyādinā bhāvitavyontenottaram / avikalpa iti / vikalpo viśeṣaḥ / avikalpo nirviśeṣaḥ / prajñāpāramitābhyāsata iti bhāvanāmārgābhyāsataḥ / iti saṃsāranirvāṇasamatā //

śāriputra āhetyādi / iha svapnaśabdena svapna evocyate / kṣayasaṃjñeti kṣayo nirvāṇaṃ tasya saṃjñā udgrahaḥ / bhutārthakalpanaṃ kalpaḥ / vitathakalpanaṃ vikalpaḥ / evameveti / ākāśavattathāgatavadvā / cittaṃ cetanā buddhirvikalpaḥ ityeko 'rthaḥ / viviktānīti niḥsvabhāvāni / viplutā hi buddhiravidyamānameva nimittīkṛtyārambaṇī karoti / cetanāpītyādi sugamam / kāyasākṣīti kāya āśrayaḥ / tatparāvṛttyā kāyena sākṣātkārī kāyasākṣī enamarthamityetaccodyaṃ visarjayiṣyatīti parihariṣyati / ajito maitreya iti paryāyau / yo dharmo visarjayediti maitreyaḥ / visarjayitavya iti praśnaḥ / yena dharmeṇeti vācā / yasya dharmasyeti śāriputrasya / utpitsuḥ trāsa uttrāsaḥ / saṃbhūtastrāsaḥ santrāsaḥ / tasya pravāhaḥ santrāsāpattiḥ / balādhānaṃ bhāvanā balavāsanā / atra śāstram-

iti saṃsāranirvāṇasamatāyāṃ codyaparihārāḥ //

'kṛtiśuddhiranuttarā' vaktavyā / ataḥ śāstram-

ekadā yatraika eva buddho jāyate tadbuddhakṣetram / tasya śuddhatā pariśuddhiḥ / sā kuto bhavati? 'sattvalokasya' dṛśyate 'yāśuddhiḥ' vyāḍakāntārāditā / tasyāḥ svabuddhakṣetrapariśuddhādupasaṃhārāt / mama buddhakṣetre sarvathaivaṃ mā bhūditi / eṣā vistareṇa mahatyoruktā / iha tu saṃkṣepataḥ / punaraparamityādinā atha khalu tatretyataḥ prāk / uttrāsādiniṣedha ukto vaktavyaśca tadapekṣayā punaraparaśabdāḥ / durgatā bhūmiḥ kāntāram / vyāḍaiḥ kāntāraṃ vyāḍakāntāram pānīyavarjitakāntāraṃ pānīyakāntāram / yadicecchabdo yadyarthe / divyopabhogetyādi / samabuddhakṣetrasattvā iti vartate / rudhirādyāhāravyudāsāya caitaduktam / sarvasvaparityāga eva kuśalam / yadeteṣāṃ loka iti bhājanaloke sukhasamaṅgilaḥ / sukhaṃ samarpitamāhitameṣāmiti sukhasamarpitāḥ / sarvata iti sarvatra / vyādhikāntāraṃ rogopasargaḥ / iyatīti cittakṣaṇaparimāṇā / apūrveti bhāvinī / yadutākoṭīriti nahi niraṃśasya kṣaṇasya koṭirasti / yā setyarthā(tyapūrvā) bhut / apūrvā koṭīryatrābhisaṃbhotsye / iti buddhakṣetrapariśuddhiḥ //

atha khalvityādyāparivartāntāt / anena yattasyāṃ deśanāyāṃ saṃvṛttaṃ tadāha / asaktāni alagnāni / antarikṣe vihāyasīti kevala evākāśe / pariniṣpattiriva pariniṣpattirvaśībhāvaḥ / pramāṇabaddhaḥ pramāṇaniyataḥ / asātakāntārāṇi duṣkāntārāṇi / śeṣaṃ subodham //

gaṅgadevābhaginyā lakṣitaḥ parivartastatparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāmekonaviṃśatitamaḥ parivartaḥ //

20. upāyakauśalyamīmāṃsāparivarto nāma viṃśatitamaḥ /

kṣetrapariśuddhiruktā / upāyakauśalaṃ vaktavyam / ataḥ śāstram-

asya hyupāyakauśalasya 'viṣayaḥ' sūtre prathamaṃ vaktavyaḥ / tataḥ'prayogaḥ' prathamābhyāsaḥ / tato daśa prabhedāḥ sā (śā)travātikramādayaḥ / 'nimittapraṇidhikṛtau' tābhyāmiti tathoktau nimittakṛtaḥ praṇidhikṛtaśca /

atha khalvityādi / atrādau bhūtakoṭimityetadantena viṣaya uktaḥ / śūnyatāsamādhinaivānimittāpraṇihitayorbodhipakṣādīnāṃ copalakṣaṇāt / śūnyatāyāmiti śūnyatāsamādhau / santatiḥ pravāhaḥ / kathaṃ pratyavekṣamāṇa ityāha rūpaṃ śunyamitīti / tāmiti śūnyatām / dharmatāmiti dharmaprakṛtim / dharmatayeti dharmasāratayā / bhūtakoṭiriti śūnyataiva kaivalyaṃ gatā bhūtakoṭiḥ / ityupāyakauśalasya viṣayaḥ //

evamukta ityādi tadyathāpītyataḥ prāk / asamāhita eveti sākṣātkartavyatayānadhyavasita eva / atrāntarā iti yāvadbuddhadharmā asya na paripakvāḥ / evamityuktena krameṇa / ārūḍha upārjitāḥ / śeṣa subodham / ityupāyakauśalasya prayogaḥ //

tadyathāpītyādi tadyathāpītyataḥ prāk / śūro nirbhīḥ / vīryamutsāhaḥ / pratiṣṭhānaṃ sthairyam / pratibhānamabhyūhaḥ / pratipattiranuṣṭhānam / yasminkālādau yadyuktaṃ tajjñānāt kālādijñaḥ / gatiḥ kāyavākcittakarmaṇyatā / tāṃ gataḥ prāptaḥ / praharaṇāvaraṇaṃ kavacādi / smṛtiḥ smaraṇam / matirabhyūhaḥ / gatirjñānam / dhṛtirdhāraṇam / nītirnītijñānam / viśāradaḥ paṇḍitaḥ iti śatrava eva 'śātravā' antarāyāḥ / teṣāmatikramaścaturbhirapramāṇairiti prathamamupāyakauśalam //

tadyathāpītyādi tadyathāpītyataḥ prāk / caratīti gacchati / na ca bhūmau patatīti pātapratiṣedhaḥ sthitiḥ / na ca kañcinniśrityeti pratiṣṭhāpratiṣedhaḥ / niśrityetyāspadīkṛtya / viharatīti tiṣṭhati / na ca tatrāpīti viharaṇepi niśritaḥ / patatyaparipūrṇairiti / atra na patatīti na pratitiṣṭhatītyarthaḥ / pratiṣṭhāvirahādapratiṣṭha upāyaḥ //

tadyathāpītyādi prāgevamuktāta / vārayediti / ākāśa eva sthāpayet / patanaṃ na dadyāditi patituṃ na dadyāt / uddharva kṣiptasya sa(śa)rasyeva śarāntaraiściramapātāya ya āvedhastadvadābuddhadharmaparipākama(kaṃ) sākṣātkaraṇāya cittasya cittāntarairya āvedhaḥ / tadanatikrameṇa vṛttiryathāvedhamupāyaḥ //

evamukta ityādi prāk punaraparāt / carati śamathena / viharati vipaśyanayā / samādhisamāpattirubhābhyām / mameti mayā / abhinirharatīti niṣpādayati / samādhiścāsau vimokṣaśca muktidvāratvāt / cittotpādaścittābhinirhāraḥ / anenāyaṃ duṣkarakārakaḥ / eṣa ca sarvaśrāvakapratyekabuddhairasādhāraṇatvādasādhāraṇa upāyaḥ //

punaraparādi prāk punaraparāt / sattva ātmā puruṣaḥ / indriyāṇi pañca śraddhādīni / balānyapi pañcaiva / bodhyaṅgāni sapta / mārgo 'ṣṭāṅgaḥ / sattvadṛṣṭiḥ saktiḥ / tatprahāṇāya sattvānāmabhisambuddhaḥ / sattvān deśayiṣyāmīti sañcintya śūnyatādisamāpattirasaktiḥ / tadyogādasakta upāyaḥ //

punaraparādi prākpunaraparāt / dharmasaṃjñā skandhadhātvādisaṃjñā / sa upalambhaḥ / tatprahāṇāyetyādi pūrvavat / evaṃ śūnyatādisamāpattiranupalambhaḥ / tadyogādanupalambha upāyaḥ //

punaraparādi punaraparātprāk / strī pumān rūpaṃ śabda iti nimittasaṃjñā / tatprahāṇāyetyādi pūrvavat / evamanimittasamāpattirānimittam / tadyogādānimitta upāyaḥ //

punaraparādi yo hītyataḥ prāk / devaḥ śakraścakravarttī syāmityādirbhavabhogābhilāṣaḥ praṇihitam / tasya mūlaṃ viparyāsāḥ / tasmāccaturviparyāsaprahāṇāyetyādi pūrvavat / evamapraṇihitasamādhirapraṇihitam tadyogādapraṇihita upāyaḥ //

yo hi kaścidityādi naitat sthānaṃ vidyata iti yāvat / anupalambhādīnāmupāyā vimokṣamukhatrayaṃ viṣaya uktaḥ / sāṃpratameṣāmanabhisaṃskārādikamadhikaṃ viṣayamamoghatāṃ ca bravīti / anabhisaṃskāre patediti hīnabodhau / traidhātukeneti saṃsāreṇa //

evaṃ hītyādi subhūtirāhetyataḥ prāk / samyaksambodhikāmena bodhisattvena vijño bodhisattvaḥ praṣṭavyaḥ / samyaksambodhaye kiṃ bhāvayeyaṃ kathaṃ ca bhāvayeyamiti / sa cedācakṣīta śūnyatādikameva bhāvaya tacca parijayaṃ mātuḥ sākṣātkārṣīḥ / tatropāyaḥ sarvasattvāparityāgacittādiriti / etattasyākhyāturavaivartikatve liṅgam / tasmāttasya liṅgamasminniti talliṅga upāyaḥ //

subhūtirāhetyādi sacetpunarityataḥ prāk / bahavo bodhāya caranti teṣvalpakāste ya evaṃ visarjayanti / vyākṛtāste 'vaivarttikatve 'saṃhāryāḥ (RSt_128) sadevamānuṣāsureṇa lokena / yataste 'lpakā ato 'lpapramāṇā ityapramāṇa upāyaḥ //

tadevaṃ navamasya paścārddhāt prabhṛti viṃśatitamasya pūrvārddhaṃ yāvadekādaśaparivartāḥ sarvākārābhisaṃbodhiḥ //

ita ūddharvaṃ mūrddhābhisamayo vaktavyaḥ / tasyoddeśaḥ pūrvamuktaḥ ślokadvayena ṣaḍakṣarādhikena-

[125] mūrdhābhisamayaḥ

tasyāṣṭau vastūni / 'liṅgavivṛddhiḥ nirūḍhiścittasaṃsthitiḥ' / dṛṅmārge vipakṣapratipakṣāḥ bhāvanāmārge vipakṣapratipakṣā ānantaryasamādhivipratipattayaśceti /

tatra liṅgamadhikṛtya śāstram-

'mūrdhaprāptasya' iti prakarṣaprāptasya / 'yogasya' iti trisarvajñatāprayogasya / sa cetpunarityādi veditavyā / svapnāntaragatopi svapnopamān sarvadharmān paśyati na ca sākṣātkarotīti prathamaṃ liṅgam //

punaraparādi veditavyāntam / svapnāntaragatopi śrāvakabhūmau pratyekabuddhabhūmau traidhātuke ca spṛhāṃ na karotīti dvitīyam //

punaraparādi veditavyāntam / svapnāntaragato mahatyāṃ pariṣadyubhayasaṅghaparivṛtaṃ tathāgatamātmānaṃ paśyatīti tṛtīyam //

punaraparādi veditavyāntaram / svapnāntaragato vaihāyasamabhyudgamya sattvebhyo dharma deśayati vyāmagataṃ cātmānaṃ saṃjānīte / bhikṣūṃśca nirmitīta ye lokadhātvantareṣu buddhakṛtyaṃ kurvantīti caturtham //

punaraparādi veditavyāntam / svapnāntaragatopyātmanaḥ pareṣāṃ vā vadhabandhanaśiraśchedādīn dṛṣṭvā nottrasyati / vibuddhasya caivaṃ bhavati svapnopamaṃ sarva traidhātukaṃ mayā cābhisaṃbudhyaivaṃ dharmo deśayitavya iti pañcamam //

punaraparādi veditavyāntam / svapnāntaragatasya nairayikādīn sattvān dṛṣṭvā evaṃ bhavati / tathā kariṣyāmi yathā me 'bhisambuddhasya buddhakṣetre trayo 'pāyāḥ sarvathā na bhaviṣyantīti ṣaṣṭham //

punaraparādi punaraparāt prāk / svapnāntaragato yadi grāmadāhādau vartamāne prativibuddha evaṃ samanvāharet / yathā mayā svapne 'vaivartikaliṅgānyātmani dṛṣṭāni tena satyenāyaṃ grāmadāhādiḥ śāmyatviti / sa cecchāmyati tatsaptamaṃ liṅgam //

punaraparādi āparivartasamāpteḥ / yadi kaścitsattvo 'manuṣyeṇa gṛhīto 'dhiṣṭhitaḥ āviṣṭo vā antaḥpraveśāt / tatra bodhisattvaḥ satyādhiṣṭhānaṃ kuryāt / yadyahaṃ vyākṛtaḥ pūrvabuddhairanuttarāyāṃ bodhau yadi ca me pariśuddho 'dhyāśayastāmabhisamboddhaṃ yathā ca nāsti buddhānāṃ kiñcidajñātam / anena satyenāyamamanuṣyo 'pakrāmatviti sa cettasmāt satyādhiṣṭhānāt apakrāmati tadaṣṭamaṃ liṅgam //

upāyakauśalyānāṃ mīmāṃsā parijñānaṃ tadarthaḥ parivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ viṃśatitamaḥ parivartaḥ //

21. mārakarmaparivarto nāmaikaviṃśatitamaḥ /

tatra khalvityādi / ayamekaviṃśatitamaḥ parivarto mārakarmaṇām / kasteṣāṃ prastāvaḥ? navayānasaṃprasthitasya bodhisattvasya satyādhiṣṭhānaphalasampādanādinā mithyāmānotpādanāya bahudhā mārāḥ / parākramata ityayameṣāṃ prastāvaḥ / (RSt_130) tatretyanantarokte satyādhiṣṭhāne / autsukyamiti prāptāvasarasya karmaṇaḥ karaṇārtha mutsāhaḥ / balamutsāhaśaktiḥ / tejaḥ prabhāvaśaktiḥ / kathaṃ tejovattaramiti yāvat / tasau matvartha iti bhatvāspadatvaṃ nāstīti bhatvena na bhavitavyam / tadyathā āyuṣmān sarasvān iti / evaṃ tarhi dīptyarthā[d]dravateḥ śatrantāt tarap / tejasā dīptataraṃ tejovattaramiti / autsukyamiti / ātmani bahumānam / āvamaṃsyata ityādi / avamāno 'nādaraḥ / uccagghānamantarhāsaḥ / ullāpanaṃ manasānyatkaraṇam / kutsanaṃ doṣadarśitā / taṃsanaṃ doṣavāditā / sambodhāvitīti / itiśabdo hetau / mānaṃ janayiṣyatītyādi / atra saśabdasya sarvatretyarthaḥ / jananamutpādanam / vadhaṃnaṃ puraḥsarīkaraṇam / stambhanaṃ sthirīkaraṇam / bṛṃhaṇa paripuṣṭiḥ / utpādanamaccairnayanam / mānenetyādi / anyebhyo 'dhikatvena cittasyonnatiḥ sāmānyena mānaḥ sa pūrvamuktaḥ / iha tu tadviśeṣā ucyante / yā tasya hīnādunnatiḥ sa mānaḥ / yādṛśādeva so 'timānaḥ / yo punaḥ prakṛṣṭāt sa mānātimānaḥ / aprāpte 'vaivartikatve prāptaṃ mayeti so 'bhimānaḥ / yā punarabhūtairavaivartikaguṇairguṇavānasmīti sa mithyāmānaḥ / tathā rūpāniti mahābhūtān bodhisattvān dṛṣṭaveti pareṇa sambandhaḥ / śeṣaṃ teṣāmeva viśeṣaṇam / bhajiṣyata ityatra bhajeriṭpratiṣedho bhavati saṃjñāpūrvakasya vidheranityatvāt / tadeva mārabandhanamiti mānam /

punaraparamityādi / nāmāpadeśaḥ saṃjñākathanam / mṛduko mṛdvindriyaḥ / āraṇyakatvādayo dhutaguṇāḥ / grāmādvahiḥ krośātparamaraṇyam / tatraiva sthānāt āraṇyakaḥ / piṇḍapātasyaiva bhojanāt piṇḍapātikaḥ / pāṃsukūlasyeva prāvaraṇāt pāṃsukūlikaḥ / madhyānhasyopānta eva bhojanāt khalu paścābhdaktikaḥ / ekāsana eva bhuṅkte ekāsanikaḥ / sakṛdāstīrṇe nityaṃ śayanāt yāthāsaṃstarikaḥ / tricīvarādadhikatyāgāt traicīvarikaḥ / śmaśānasamīpa eva sthānāt śmāśānikaḥ / vṛkṣamūla eva sthānāt vṛkṣamūlikaḥ / niṣadyayā rātrinayanān naiṣadyikaḥ / acchanno 'vakāśo 'bhyavakāśaḥ / tatraiva sthānāt ābhyavakāśikaḥ / aurṇakaśānakādereva prāvaraṇāt nāmantikaḥ / alpaiṣaṇāt alpecchaḥ / tāvataiva santoṣāt santuṣṭaḥ / ekākitvāt praviviktaḥ / dṛṣṭe dharme tasminneva janmani bhavo dṛṣṭadhārmikaḥ / tena ādekṣyati vyapadekṣyati / kathamityāha pūrvamapītyādi / yacchabdastasmādarthe / adhiṣṭhānamāviṣkaraṇam / dhutaguṇaiḥ saṃlekhaḥ karṣaṇaṃ dhanulekhanavat / manyāṃ karotīti ṇic / yac manyanā māna ityarthaḥ / śeṣaṃ subodhaṃ dhutaguṇāḥ saṃvidyanta iti yāvat /

tasya khalvityādi / nāmādhiṣṭhāneneti kimatra nāma? avinivartanīyaśabdastadguṇaśabdaśca / stambhābhibhūta iti stambho guruṣvagauravam / katamannāmadheyamityata āha / yadevetyādi / teneti bodhisattvena / anuvartitamityanuvicintitam / asyaiva nirdeśa uttarābhyām / anuvitarkitaṃ kiṃ me nāma bhavediti / anuvicāritamidaṃ me nāma bhavediti / vyākariṣyatītyāyākhyāsyati māraḥ / anuvartitamākāṅikṣatam / sametīti saṃvadati / kiṃ kena saṃvadatītyata āha nāmnā nāmeti / tataḥ kimityāha vyākṛta ityādi / saṃdhāvya saṃsṛtyeti tāsu tāsu durgatiṣūtpadya / yadi ceti cakāraḥ samuccayārthaḥ sūkṣmasūkṣmāṇīti durlakṣyāṇi /

araṇyaṃ ca yathoktam / vanaprasthaṃ ca giriguhā ca śmaśānaṃ ca palālapuñjaśceti dvandvaḥ / ādiśabdādvṛkṣamūlādi / āraṇyakānītyaraṇye bhavāni / ata eva prāntāni vijanapadānīti vijanasthānāni / viviktāni śūnyāni / vivikto rahitaḥ grāmasyāntaḥ samīpamekadeśo vā / manasikāraviveka iti manasikārebhyo vivekaḥ / mṛdunā abhiniveśena niśritaḥ / madhyena ālīnaḥ / adhimātreṇa adhyavasitaḥ / tenaivātmotkarṣaṇāt adhyavasāyamāpannaḥ / saṃkīrṇo gṛhipravrajitaiḥ / ākīrṇaḥ pravrajitaireva bodhisattvacaṇḍālaḥ tairasaṃvāsyatvāt / bodhisattvadūṣī svadoṣeṇa teṣāṃ dūṣaṇāt / bodhisattvapratirūpako dehasāmyāt / bodhisattvaprativarṇiko nāmasāmyāt / bodhisattvakāraṇḍavakaḥ haṃseṣviva teṣvakṛṣṇeṣu kṛṣṇatvāt / cauraḥ śramaṇaveṣeṇa dharmagrahaṇāt / cauro bodhisattvānāmasammatatvāt / cauraḥ sadevakasya lokasya mithyādakṣiṇīyatvāt / tajjātīya ityādinā tāvadvaśasya sabhdirasevyatāṃ vistareṇāha / sthāma balam / anāryāḥ pāpāḥ / udvignaṃ bhītam / tatrāpi tāvaditi tādṛśepi / maṃtrāyamāṇenetyādinā maitryādicatuṣṭayaviṣayabhedānāha / evaṃ cetyādinā praṇidhānam / ayamapīti / yasya khalu punarityādikaḥ sarvaḥ / abhijñāyeti / atyutka[ṭaḥ] parākramaḥ puruṣakāraḥ / idamapītyādinā paścimamārakarmopasaṃhāraḥ //

mārakarmaṇāmabhidhāyakaḥ parivartastathoktaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāmekaviṃśatitamaḥ parivartaḥ //

22. kalyāṇamitraparivarto nāma dvāviṃśatitamaḥ /

atha khalvityādinā āsu khalu punarityataḥ prāk / prajñāpāramitaiveti prādhānyādavadhāraṇam / yathā ca saikā tayā sahitāḥ ṣaṭ / ata āha / sarvā eva cetyādi / kuta ityāha / ṣaḍevetyādi / tā eva niṣṭhāṃ gatāḥ śāstā yaḥ paramaṃ phalam / tataḥ pūrvānta eva mārgaḥ / āloko lokottaraṃ jñānaṃ pramuditāyāṃ sopi tā eva / ulkā prayatnavāhī mārgo vimalādibhūmiṣu ṣaṭsu sopi tā eva / avabhāso divasālokaḥ / sa cāyatnavāhī mārgo 'calādiṣu bhūmiṣu sopi tā eva / ataśca tā eva trīṇi ratnāni / tasmāttā eva śaraṇaṃ yāvat dīpaḥ / padārthaḥ pūrvavat / tā eva mātā dhāraṇātpoṣaṇācca / tā eva pitā bijādhānāt / jñānāyeti darśanāya / bodhāyeti bhāvanāmārgāya / taktasya hetoriti kutaḥ prajñāpāramitaiva yathoktaguṇā netarā ityarthaḥ / atra hītyādinā parihāraḥ / traiyadhvikabuddhānāṃ ca sarvajñatā tatprasūtaivetyākhyātumāha / yepītyādi / nirjātā niṣpannā / antargatā iti yathāyogamantarbhūtāḥ / buddhajñānādipadāni pūrvameva vyākhyātāni / sarvabhūtānāṃ upakāribhūto bhavatīti sambandhaḥ / kadetyāha yadetyādi / iti kalyāṇamitrasevā navamaṃ liṅgam //

āsu khalvityādi subhūtirāhetyataḥ prāk / yasmāt iyameva praṇāyikā tasmāt aparapraṇeyatā ityādi / tasmādaparapraṇeyatā daśamaṃ liṅgam //

subhūtirāhetyādi / saṃkleśo vyavadānaṃ ca prajñāyata iti yāvat / asaṅgalakṣaṇetyanupalambhalakṣaṇā / sarvadharmasvalakṣaṇānāṃ tasyāmanupalambhāt / tathā rūpādayopi śūnyatvādviviktatvāt / yadityādinā codyaṃ na codyaṃ na hītyarthaḥ / udagraho nimittasya abhiniveśo vastutvena grāhaḥ / tadevamasaṅgalakṣaṇā bhagavatī dharmāśca / tathāpyasti saṃkleśo 'sti vyavadānamityekādaśamaṃ liṅgam //

subhūtirāhetyādi sa cetpunarityataḥ prāk / anavamardanīya ityasaṃhāryaḥ / anenāpīti sarvadharmeṣvavivikteṣvityādinā anavamardanīyatvalābho dvādaśaṃ liṅgam // ityuktāni liṅgāni //

vivṛddhirvaktavyā / ataḥ śāstram-

ṣoḍaśaprakārā vivṛddhiruktā sūtre / kiṃ kṛtvā? 'upamāṃ kṛtvā' / kīdṛśīm? jambūdvīpe ye janāḥ sattvāsteṣāmiyattayā sūtroktena māhātmyena manuṣyabhāvacittotpādalakṣaṇena yā buddhapūjā tayā yacchubhaṃ puṇyaṃ tadādiryasyā upamāyāḥ, tām / ādiśabdaṃ (bdāt?) labdhara (?)kāri(?)mahāmaṇiratnādiparigrahaḥ / buddhabhūmirbahubhiḥ prakārairuktā vināpyupamām //

tatrādyā sa cetpunarityādinā tadyathāpītyataḥ prāk / yāvajjīvamiti yāvadāyuḥ / taddānamiti yadbuddhebhyo sarvasattvebhyaḥ / manasikāraiḥ viharatīti vivṛddhisaṃgṛhītaiḥ / sthāpayitveti tyaktvā / tatteṣāṃ sthāpanaṃ kasya hetoḥ? vadhyagatāniveti vadhyasthānagatānivā(va) / virāgayata ityaprāptavataḥ / itiprajñāpāramitāpratisaṃyuktairmanasikārai rātriṃdivānāṃ nayanāt prathamā vivṛddhiḥ //

tadyathāpītyādi na ca parihīyata iti yāvat / prajñāpāramiteti tāvadanveṣṭavyeti sambandhaḥ / kīdṛśena? avirahitasarvajñatācittena / avirahitātpūrvaṃ manasikāraśabdaḥ kvacit paṭhyate / sā vānyā veti pustakabhedāt / prajñāpāramitāpratisaṃyuktairmanasikāraiḥ kṣaṇamapyavirahād dvitīyā vivṛddhiḥ //

subhūtirāhetyādi netatsthānaṃ vidyata iti yāvat anutpattikeṣu dharmeṣu kṣāntipratilambhādvyākaraṇalābha iti tṛtīyā //

subhūtirāhetyādyā parivartāntāt / vyākaraṇe 'bhisambodhe ca nirmānatvāccaturthī //

kalyāṇamitrādiḥ parivarto kalyāṇamitraparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ dvāviṃśatitamaḥ parivartaḥ //

23. śakraparivarto nāma trayoviṃśatitamaḥ /

tena khalu punarityādi evaṃ śikṣamāṇaṃ cetyataḥ prāk / sadevamānuṣāsuraṃ lokaṃ sarvaśrāvakapratyekabuddhayānikānanupāyakuśalāṃśca bodhisattvo 'bhibhavati / teṣāṃ cānabhibhūto bhavatīti pañcamī vivṛddhiḥ //

evaṃ śikṣamāṇaṃ cetyādi āparivartāntāt / catvāro lokapālāḥ śakrastadanye ca devāstamupasaṃkramiṣyantītyādibhiranuśaṃsaiḥ ṣaṣṭhī //

śakreṇoktaḥ parivartaḥ śakraparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ trayoviṃśatitamaḥ parivartaḥ //

24. abhimānaparivarto nāma catarśititamaḥ /

atha khalvityādi kathaṃ cānandetyataḥ prāk / ālīno bhavatīti anulagno bhavati / kathamityāha / eṣa ityādi yāvatparipūrayiṣyatīti / na hyevamityādi / yathānyasūtreṣu tathāgatabhāṣitaṃ yujyamānaṃ evamatra nāstītyarthaḥ / gādhaḥ pratiṣṭhā / āsvādo ruciḥ / nāmagotragrahaṇaṃ dhutaguṇakīrtanaṃ ca pūrvavat / utsadā upacitāḥ kāyā rāśayaḥ iti saptamī vivṛddhiḥ //

kathaṃ cetyādyā pavirtāntāt sarvaṃ subodham / ityaṣṭamī vivṛddhiḥ //

yoyamavinivartanīyo 'bhimāno bodhisattvasya bavhanarthahetustadupalakṣitaḥ parivarto 'bhimānaparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ caturviśatitamaḥ parivartaḥ //

25. śikṣāparivarto nāma pañcaviṃśatitamaḥ /

atha khalvityādi pāraṃ gacchatīti yāvat / kva śikṣamāṇaḥ sarvajñatāyāṃ śikṣata iti praśnaḥ / kṣaye 'nutpāde 'nirodhe 'jātau'bhāve (RSt_135) viveke virāge ākāśe dharmadhātau nirvāṇe śikṣamāṇa ityuttaram / atropapattiḥ / yā hi tathāgatasya tathatā yayāsau tathāgataḥ na sā kṣīyate 'kṣayatvāt [a?] kṣayasya / na ca sā utpadyate va nirudhyate vā jāyate vā bhavati vā vibhavati vā vivicyate vā rajyate vā ākāśībhavati vā dharmībhavatīti vā nirvāti vā / evaṃ śikṣamāṇaḥ prajñāpāramitāyāṃ śikṣata ityanena mārgamāha //

buddhabhūmau śikṣata ityanena phalamāha / amṛtadhāturmokṣadhātuḥ / nāthakāmā iti nāthatvakāmāḥ / abhyudgatatetyutkṛṣṭatā / śakunīn dhnanti śākunikāḥ / niṣādā mṛtapā(? mṛgayavaḥ) / dhīvarāḥ kaivartāḥ / urabhrā meṣāḥ / tān dhnantīti aurabhrikāḥ / andho 'cakṣuḥ / badhiro 'śrotraḥ / kāṇa ekākṣaḥ / kuṇṭho vakrabāhuḥ / kubjo bhagnapṛṣṭhaḥ / kuṇiḥ karavikalaḥ / laḍgaḥ saṃhatajānuḥ / khañjo vikalagatiḥ / jaḍo niṣpratibhaḥ / lolo 'sthirapadaḥ / lallo 'karmaṇyajivhaḥ / kalla uccaiḥ śabdaśrāvī / hīnāṅgo ninditāṅgaḥ / vikalāṅga ūnāṅgaḥ / vikṛtāṅgo manuṣyavisadṛśāṅgaḥ / nigacchatīti niṣpādayati / tāmanuprāpnotīti balādipariśuddhim / jānamiṣyāmaḥ paśyayiṣyāma iti / śatrantātkarotyarthe ṇic / ṭilopaḥ / śeṣaṃ subodhaṃ yāvat pāraṃ gacchanti / iti navamī vivṛddhiḥ //

tadyathāpītyādi punaraparātprāk / suvarṇajātarūpādayaḥ gobalīvardanyāyena / ūṣarāḥ sakṣāramṛttikāḥ / ujjaṅgalā ucca(?)nirjalāḥ / tṛṇaṃ vīraṇādi / khāṇḍaḥ su(śu)ṣkatarukīlakaḥ / kaṇṭakādhānaḥ kaṇṭakīmadanādirvividhāste yeṣu / śeṣaṃ subodham / iti daśamī //

punaraparādi punaraparātprāk / cakravartirājyaṃ saṃvartate 'smāditi tat saṃvartanīyam / ityekādaśī //

punaraparādi punaraparātprāk / śakraḥ saṃvartate 'smāditi tatsaṃvartanīyam / iti dvādaśī //

punaraparādi punaraparātprāk / brahmā saṃvartate 'smāditi tatsaṃvartanīyam / iti trayodaśī //

punaraparādi jīvitendriyavākyātprāk / kuśalasasyaprarohavirodhino rāgadveṣamohāḥ khilāḥ / vicikitsā satyaratneṣu vimatiḥ / īrṣyā parasampattau vyāroṣaḥ / śeṣāḥ ṣaṭ pāramitāvipakṣāḥ / śeṣaṃ subodham / iti caturdaśī //

tadyathāpītyādi sa cetpunarityataḥ prāk / ajñāna iti prajñāpāramitāvipakṣe / puṇyāgraḥ puṇyairagraḥ / tadeva darśayitumāha tatkimityādi / buddhaviṣayo buddhadharmasākalyam / vaśavartī vṛṣabhiḥ / tabhdāvastattā / vikrīḍitaṃ ṛddhiprātihāryeṇa / siṃhanādanadanamanuśāsanīprātihāryeṇa / buddhānāṃ sampattirubhayāryasaṃghaiścaryam / vyavacārayati parijñānāt / na ca prativahati teṣvanavasthānāt / śeṣaṃ subodham / iti pañcadaśī //

sa cetpunarityādyāparivartāntāt / atha tāmapi na sañjānīte / kathamityāha iyaṃ setyādi vāśabdāntam / evamapītyebhireva tribhirākāraiḥ / sa cedevaṃ caratīti tathaivāsaṃjānannasamanupaśyan / iti ṣoḍaśī vivṛddhiḥ //

śikṣāyā vācakaḥ parivartaḥ śikṣāparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ pañcaśiṃtitamaḥ parivartaḥ //

26. māyopamaparivarto nāma ṣaḍviṃśatitamaḥ /

uktā vivṛddhiḥ / nirūḍhirvaktavyā / ataḥ śāstram-

tribhiḥ sarvajñatvaiḥ saṃgṛhītā dharmāḥ 'trisarvajñatvadharmāḥ' / tāraṇamocanāśvāsanaparinirvāpaṇāni 'sattvārthāḥ' / ataḥ sūtre 'tha khalvityādi viharantīti yāvat / carannapīti kva caran? vivṛddhau / kiṃ caran? dānādīn / cittaṃ krāmatīti gacchatīti prasīdatītyarthaḥ / cittamutpāditamityaho batāhamenāmadhigaccheyamiti / uhyamānāniti hriyamānān / same yukte nirdoṣe / pārime tīra iti nirvāṇe / samṛdhyantāṃ teṣāmiti cittotpādā iti pareṇa sambandhaḥ / abhīpsitāḥ prītikaratvāt / paricintitāḥ punaḥpunarutpādanāt / parigṛhītā aparityāgayogena / buddhadharmāṇāmiti buddhaḥ sarvajñaḥ / tasya dharmāṇāmityayamuddeśaḥ /

tasya nirdeśastribhiḥ sarvajñatvaiḥ sarvajñabhāvaiḥ yataḥ sa sarvajño bhavati sarvajñatā ca svayambhūṃtvaṃ ca, asaṃhāryatā ca / tatra sarvākārasarvadharmasamyagjñānamiha sarvajñatā / svayameva cittādeva bhavantyasya dharmā iti svayaṃbhūḥ / sarvadharmavaśavartītyarthaḥ / tasya dharmāḥ svayaṃbhūtvena ye saṃgṛhītāḥ / nāsya saṃhāramastīti asaṃhāryaḥ / (RSt_137) savāsanasarvāvaraṇanirmukta ityarthaḥ / tasya dharmā ye 'saṃhāryatvena saṃgṛhītāsteṣāṃ sarveṣāṃ paripūraṇāya bhavantviti iyatā paripūriruktā //

sattvārthāparityāgamāha / na me bhagavannityādinā / imairiti sautro nirdeśaḥ / ato bhisa ais bhavati / ido 'nādeśaśca na bhavati / imairityuktam / katamairityāha / kimitītyādi / kimitiśabdasya kathaṃ nāmetyarthaḥ iti nirūḍhiḥ //

cittasya saṃsthitiḥ / sā vaktavyā / samādhirityarthaḥ / ataḥ śāstram-

sūtre puṇyabahutvena samādhirukto na sākṣāt / katham? caturdvipakaśca lokadhātuḥ sāhasraśca dvisāhasrakaśca trisāhasrakaśca tairupamāḥ kṛtvā / katamena granthena? yasteṣāṃ bhagavannityādinā abhinirhṛtāni bhagavantītyetadantena / teṣāmiti sarveṣām / tāniti pratirūpān / dharmatā dharmasamūhaḥ svabhāvo vā / palāgreṇeti palapramāṇena pramāṇaṃ grahītuṃ iyanti palānīti / atha kiṃ kasyātropamānam? puṇyaparimāṇasya jambūdvīpādiparimāṇam / śāstra upacāraḥ kṛtaḥ / nanvanumodanāmātrasyaitatpuṇyaparimāṇaṃ na samādheḥ? anumodanāpuṇyānumodanena puṇyabahutvenetyabhiprāyādadoṣaḥ /

anumodanāyāḥ paripūraṇārthaṃ tāmakurvatāṃ ca nindārthamāha / evamityādi / mārādhiṣṭhitā iti māreṇa mahāpāpena nirutsāhīkṛtāḥ / na śṛṇvanti śabdataḥ / na jānantyarthataḥ / na paśyantyādarataḥ / na samanvāharantīti nābhimukhīkurvanti / mārapakṣe bhavāḥ mārapākṣikāḥ / tadvadeva mahataḥ sattvārthasya vighātakaraṇāt / mārabhavanebhyaścyutā iti / mārā eva atyantaṃ tatsādharmyāt / abhinirhṛtā iti niṣpāditāḥ / kairityāha / yairityādi / yeṣāmityādi ca /

evamukta ityādinā anumoditavyāntena śakrapraśaṃsā /

yarityādinā yairapītyataḥ prāk / mahāyānaprasthitānāṃ anumodanānuśaṃsāḥ /

yairapītyādinā prathamacittotpādikānāmapi na kevalamanumoditāni svasantāne cāvaropitānyabhinirhṛtāni ca bhavanti / anumodya cāvaśyaṃ pariṇāmanā kartavyā / yathā ca te kartavye tathānumodanāpariṇāmanāparivartādveditavyam / yathoktaṃ mahatyobhagavatyoḥ- 'tāni kuśalamūlāni anumodyānuttarāyāṃ (RSt_138) samyaksambodhau pariṇāmayitavyāni / tathā ca pariṇāmayitavyāni yathā na cittaṃ citte carati na cānyatra cittāt" ityādi / tadevamanumodanāsahagataṃ kuśalamūlamasya samādherālambanaṃ samyaksambodhau pariṇāmanamākāraḥ / cittasaṃsthitiḥ svabhāvaḥ / kva saṃsthitiḥ? na citte grāhakalakṣaṇena na vānyatreti na sarvadharmeṣu / kiṃ tarhi? sarvadharmatathatāyāmadvayāyāmiti cittasaṃsthitiḥ //

darśanaheyā vikalpāḥ sapratipakṣā vaktavyāḥ / tānadhikṛtya śāstram-

dvau tāvadvikalpau 'grāhyau' grāhyasya vikalpanāt / kathaṃ 'vikalpau'? yatastayorātmā na yathāviṣayaṃ vitathaḥ kalpo vikalpa iti kṛtvā / tau punaḥ kasminviṣaye? pravṛttipakṣe ca / 'pratyekaṃ' ityubhayorapi pakṣayoḥ / 'navātmakau' navaprabhedau //

aparau dvau 'vikalpau grāhakau' grāhakasya vikalpanāt / kathaṃ dvau? yathākramaṃ dravyasataḥ prajñaptisataśca sattvasya vikalpanāt / tatra prathamaṃ pṛthagjanānāṃ dvitīyamāryāṇām / tāvapi 'pratyekaṃ navātmakau' / kathaṃ tau grāhakavikalpau? asata eva grāhakasya kalpanāt / vitatho hi kalpo vikalpaḥ / etadevāha-

'grāhakabhāvena' iti grāhakasattvarūpeṇa / 'tayoḥ' iti grāhakavikalpayoḥ //

catvāropyamī vikalpā viṣayabhedena pratyekaṃ navavidhāḥ / ata ādyamadhikṛtya śāstram-

'kartṛtatkāritrakriyāphale ' iti kartari tatkāritrakriyāphale cetyarthaḥ / svabhāvādinavakaṃ pravṛttipakṣaḥ / bodhisattvopādeyatvāt / tadadhiṣṭhāna eṣa vikalpaḥ / tasmātprathamaḥ / ataḥ prathamaṃ vikalpamadhikṛtya sūtre navavākyāni /

tatrādyamadhikṛtya sūtram / subhutirāha / kathaṃ ca bhagavan māyopamamityādi tadyathāpityataḥ prāk / māyākāranirmitaṃ gajādikaṃ māyā / tadvadanyadapi yat khyāti nehāsti tat māyopamam / ta thā ca cittam / grāhakalakṣaṇatvāt grāhakasya cāsattvāt / na hyasati grāhye grāhakaṃ yuktam / grāhyābhāvaḥ kathamiti cet / yadi jñānenārthaḥ prakāśyeta syādgrāhyatvam / na ca prakāśyeta / aprakāśasya prakāśyavirodhāt / athārthaḥ prakāśātmaiva / kiṃ tasya jñānena? tasmānmāyopamaṃ cittaṃ tadasat kathamabhisaṃbudhyata iti praśnaḥ / uttaraṃ tatkimityādinā / no hīdaṃ no dīdamityasattvāditi bhāvaḥ / anyatretyanyam / taṃ dharmamityātmānam / no hīdamiti tasyātyantamasattvāditi bhāvaḥ /

etadeva sphuṭīkartumāha / nāhamityādi / astīti nāstīti vā nirdeśaṃ nopaiti / asato 'vijñātarūpasya vidhipratiṣedhābhyāmasambandhāditi bhāvaḥ / yopi dharma ityādi sugamam / tasmāttarhītyādi / tarhiśabdo 'kṣamāyām / tasmāditi grāhakalakṣaṇatvāt / grāhakatvasya vāyogāt / atyantagrahaṇena caitadāha / yatheyaṃ svena lakṣaṇena grāhakatvena śūnya tathā sarvaiḥ saṃprayogibhiḥ, teṣāmapi grāhakalakṣaṇatvāt / ālambanabhūtaiśca sarvadharmaiḥ, ālambanasya grāhyalakṣaṇatvāt / dharmāṇāṃ ca yathāyogaṃ grāhyagrāhakalakṣaṇatvāt / kathaṃ punargrāhakau na staḥ? abhede grāhyagrāhakatvāyogāt, aṅgulyagravat / bhede jaḍasya paratopi prakāśāyogāt / ajaḍasya svayameva prakāśāt / nāsau bhāvayitavyaḥ / na punaḥpunarbuddhau niveśyaḥ kharaviṣāṇavat / nāpyasāvityādi / kasyaciddharmasyeti samyaksambodhyādeḥ / āvāhaka āhārakaḥ / nirvāhako niṣpādakaḥ / asato 'kiñcitkaratvāt / pratītyasamutpāda eṣa enaṃ prāpya bodhisattvaḥ saṃbudhyata iti cedāha / kathaṃ cetyādi / na hyasat prāpyata iti bhāvaḥ / anuttarāpītyādi / atyantaviviktā prajñāpāramitāvat / kathaṃ bhavatīti naiva bhavati / atyantāsatoḥ sādhyasādhanatvāyogāditi bhāvaḥ /

evamukta ityādi / yata eva ata eveti / hetvanurūpatvātphalasyetyarthaḥ / sa cedityādinā hetuṃ paripūrayati / yadi hi saṃjānīte tadā vikalpaḥ syāt na prajñāpāramitā / evamityādinopasaṃhāraḥ / nāpyabhisaṃbudhyata ityabhisaṃbodheravikalpanāditi bhāvaḥ / abhisabudhyate cetyādi / parikalpitena hi rūpeṇa trayamidaṃ nāsti tacchūnyena tu vijñaptirūpeṇāstīti bhāvaḥ / tathāpi saṃvṛttireṣāṃ yathā (RSt_140) pratibhāsasamatvāt / śūnyatā tu paramārthaḥ / gambhīre 'rthe caratīti yato 'sminnarthe na śakyate 'nyaiścaritum / duṣkarakāraka iti / yataḥ sa bhagavān sākṣātkartuṃ śaktopi na sākṣātkaroti sattvāvekṣayā / bhāṣitasyārthamiti ābhiprāyikamartham / duṣkaramanyeṣāṃ sukaraṃ bodhisattvasyeti bhāvaḥ / kutaḥ sukaram? upāyakuśalatvāt / sa copāyaḥ prajñāpāramitaiva / atastamevāha tathāhītyādinā / ya iti bodhisattvaḥ / ya iti gambhīro 'rthaḥ / yeneti prajñāpāramitākhyena / athāsyāṃ prajñāpāramitāyāṃ carataḥ sā caryā kiyatā bhavatītyata āha / sa cedityādi / na saṃsīdatīti na bhajyate / ayamuddeśaḥ / asya nirdeśaḥ ṣoḍhā / nāvalīyata iti nāsyāṃ madhyapremā / na saṃlīyata iti nāsyāṃ mṛdupremā / na vipṛṣṭhībhavatīti nāpremā / nottrasyatīti naināṃ tyaktukāmaḥ / na saṃtrasyatīti na tyajati / na saṃtrāsamāpadyata iti na prabandhena tyajati / tadevaṃ ṣaḍvidhabhaṅgapratiṣedhādetadgamyate yosyāmabhimukhībhūtāyāmatyantaṃ prīyate so 'syāṃ caratīti / aparamāha sa cedityādinā / aparamāha / āsannetyādinā / aparamāha dūrīkṛtetyādinā / iha svabhāvādayo navārthāḥ / pravṛttipakṣe bodhisattvairupādeyatvāt / teṣu vikalpaḥ sammoho 'samyagjñānam / tatrādyaḥ svabhāvavikalpaḥ / svabhāvaḥ svābhiprāyaḥ / ahamanuttarāṃ samyaksambodhimadhigaccheyaṃ tanmārgeṇeti / bodhicittamityarthaḥ / tasmin vikalpaḥ / ākāro bodheḥ prajñāpāramitāyāśca śūnyatāyāṃ yadajñānamasamāhitajñānaṃ ca / samāhitajñāne ca tisro manyanā / ahaṃ carāmi āsannā me mahābodhirahaṃ vā dūre hīnabodheḥ syāmiti / asya pratipakṣaḥ kathaṃ bhagavanmāyopamaṃ cittamityata ārabhya tadyathāpītyataḥ prāk / iti svabhāvavikalpaḥ //

tadyathāpītyādi / āsannā me mahābodhirdūre hīnabodhī yatohaṃ buddhagotra iti sammohaḥ / asya pratipakṣaḥ / ākāśasamatvādgotrasya tadvadavikalpā prajñāpāramiteti gotravikalpaḥ //

tadyathāpītyādi / asti me pratipattisamudāgamaḥ / tata āsannā me mahābodhirdūre hīnabodhī iti saṃmohaḥ / tasya pratipakṣaḥ samudāgamasya māyāpuruṣopamatvādavikalpā prajñāpāramiteti pratipatsamudāgamavikalpaḥ //

tadyathāpītyādi / pratibhāsaḥ pratibimbaḥ / jñānapratibhāsasya pratibhāsatvenaiva yad jñānaṃ na tvālambanasya ca / seha jñānasyālambanā bhrāntiḥ / sā mama jātā / tata āsannā me mahābodhirdūre hīnabodhī iti saṃmohaḥ / tasya pratipakṣaḥ pratibimbavadavikalpā prajñāpāramiteti ālambanābhrāntivikalpaḥ //

tadyathāpītyādi / pratipakṣo hantā vipakṣo hantavya iti saṃmohaḥ / asya pratipakṣo yathā tathāgatasya priyāpriyau na stastadvadavikalpāyāṃ prajñāpāramitāyāṃ caratopīti pratipakṣavipakṣavikalpaḥ //

yathaiva hītyādi abhūtakalpanāt kalpaḥ / tasya vigamakalpanādvikalpaḥ / tau prahīṇau yathā tathāgatasya tadvadavikalpāyāṃ prajñāpāramitāyāṃ caratopi / tatra kalpavigamo vikalpaḥ svādhigamasaṃmohaḥ / tasya pratipakṣaḥ kalpavikalpaprahīṇā prajñāpāramiteti svādhigamavikalpaḥ //

tadyathāpītyādi / prajñāpāramitāmahaṃ bhāvayāmi / tata āsannā me mahābodhirdūre hīnabodhī iti kartari sammohaḥ / tasya pratipakṣaḥ / kartustathāgatanirmitopamatattadvadeva kartari nirvikalpā prajñāpāramiteti kartari vikalpaḥ //

tadyathāpītyādi / sa ca tathāgatanirmito yadarthaṃ nirmitastacca kṛtyaṃ karoti / na ca tāṃ kriyāṃ vikalpayati / tadvadbodhisattvaḥ prajñāpāramitāṃ bhāvayati na ca vikalpayatīti pratipakṣaḥ / bodhivikalpanaṃ kriyāphalavikalpaḥ //

tadyathāpītyādi [ā parivartā]ntāt / śilpinā yadartha dāruyantramayaḥ pumānkṛtaḥ sa tadartha karoti na vikalpayati / tadvadbodhisattvo bodhaye, na (tāṃ) bodhiṃ prāpsyati na ca tāṃ vikalpayatīti pratipakṣaḥ / bodhivikalpanaṃ kriyāphalavikalpaḥ //

māyopamacittopalakṣitaḥ parivarto māyopamaparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ ṣaḍiṃvaśatitamaḥ parivartaḥ //

27. sāraparivarto nāma saptaviṃśatitamaḥ /

māyopamaparivartasyānte prathamo grāhyavikalpa uktaḥ / itare trayo vikalpā iha sāraparivarte vaktavyāḥ / tatra dvitīyaṃ grāhyavikalpamadhikṛtya śāstram /

adhigamanyūnatādau doṣe bodhisattvapraheye[']bhāvānnivṛttipakṣādhiṣṭhāno navavidhaśca śrāvakādīnāṃ manobhavastairaheyatvāt / etānāha atha khalvityādinātha khalu bhagavānityataḥ prāk / tatra śāriputra ekamāha / tataḥ subhūtirekaṃ tato devaputrāstrīn / punaḥ subhūtiścaturaḥ / ihāpi pratipakṣāḥ paṭhyante / tadviparyayeṇa vikalpā gamyante / sāre batāyamiti bataśabdo harṣe / utkṛṣṭaṃ phalaṃ samyaksaṃbodhiḥ / so 'nusāraḥ / tannimittaṃ bodhisattvaścarati / katama ityāha / ya ityādi / prajñāpāramitā cātra ubhayanairātmyajñānamucyate / tasyāṃ carataḥ saṃsāre nātyantamudvego nirvāṇe nātyantamutkaṇṭhā / ubhayoranupalambhatvāt / tatoyamanuttarāṃ samyaksambodhimadhigacchediti pratipakṣaḥ / anyathā tu saṃsāre vā patetpañcabhiḥ pāramitābhiḥ / nirvāṇe vā pudgalanairātmyajñānāt / ata eva ca vinā prajñāpāramitayā bodhisattvo bodhisattvākhyāṃ na labhate / tadyathā samyagabhiṣiktopi cakravartinaḥ putraścakravartiśabdaṃ vinā saptabhī ratnairityadhigamanyūnatāvikalpaḥ //

saraṇaṃ sāraḥ / karma dharmaḥ / gamyatā sudharṣaṇatetyarthaḥ / viparyayādasāro durddharṣaṇatā / ataḥ pāramitānāṃ durddharṣaṇatve sa carati yaścarati prajñāpāramitāyām / sā hi tāsāṃ parigrahasamarthā / tadyathā strīṇāṃ sadhūrtake nagaramārge śasrapāṇipuruṣa iti pratipakṣaḥ / anyathā sudharṣaṇāḥ syuriti parigrahābhāvavikalpaḥ //

etadabhavaditi namaskartavyā ityādyatha khalvityataḥ prāk / namaskartavyāsta iti kutaḥ? pratipattisākalyādaparādhīnatvāduddeśānivṛtteśca / ata evāhuḥ yairityādi / sarvamabhinirhṛtānīti pratipattitaḥ pañcabhiḥ pāramitābhiḥ / ihetyubhayanairātmyavedinyām / ata eva gambhīrāyāmiti pratipakṣaḥ / tasyāmacaratāṃ pratipattivaikalyaṃ syāt / tataste mārādibhiḥ suyodhanāḥ syuḥ / akṣatakavacā iva yodhāḥ pratiyodhairiti pratipattivaikalyavikalpaḥ //

tathetyādi / ye ceti vartate / tatheti prajñāpāramitāpradhānāsu pāramitāsu caranta iti hetau śatṛpratyayaḥ / tathā caraṇādityarthaḥ / tataḥ kimityāha / bhūtakoṭirityādi / yathā hi cakravartī pradhānaṃ mahāprabhāvatvāt, kodrārātīḥ (? koṭṭarājānaḥ) (RSt_143) tadanuvartinastathaiva prajñāpāramitā pradhānaṃ tayā saṃsāranirvāṇayoranupalambhāt / yathā te pāramitābhiḥ saṃsāre na pātyante tathā pudgalanairātmyajñānavaśena bhūtakoṭiṃ na sākṣātkurvanti / yadi tu prajñāpāramitā pradhānaṃ na syāt tadā hīnabodhiṃ bhūtakoṭiṃ sākṣātkuryureveti parapratyayagāmitvavikalpaḥ //

anenāpītyādi / aneneti vakṣyamāṇena / tamevāhurya ityādinā na sākṣātkurvantīti / kutaḥ? uddeśaḥ samyaksaṃbodhau litsā / kutastasmādanivṛttiḥ? yato na tāvatprajñāpāramitā tato nivartate tadarthameva tasyāṃ caraṇāt / nāpītarāḥ / tadanupraviṣṭānāṃ tāsāmapyanivṛtteḥ / tadyathā sarvāḥ kunadyo mahānadīmanupraviśya samudrameva gacchanti na nivartata ityuddeśanivṛttikalpaḥ //

navāpyete vikalpā mahatyorbhagavatyo svārthasampattimadhikṛtya yojitāḥ / ataḥ prādeśikatvanānātvavikalpau yathā tayoruktau tathā tāvad brūmaḥ / pāramitāpañcakaṃ vāmahastavat / ṣaṣṭhī dakṣiṇahastavat / ubhābhyāṃ sarvakṛtyeṣu vyāpārasiddheriti pratipakṣaḥ / yadi tu dakṣiṇahastaprāyā ṣaṣṭhī na syāttadā prādeśikaḥ syādvyāpāra iti prādeśikavikalpaḥ //

yathā hi nānārasāḥ kunadīmahānadyo mahāsamudramanupraviśyaikarasā bhavanti tathā nānārasāḥ pañca pāramitāḥ ṣaṣṭhīmanupraviśyaikarasā bhavantīti pratipakṣaḥ / nānārasāḥ tathaiva tāḥ samyaksambodhāvapīti nānātvavikalpaḥ / asyāṃ tu bhagavatyāṃ parārthasannāhamadhikṛtya dvāvimau vikalpau subhūtirāhetyādinā / atha khalvityādinā tatra sannahyanta ityanena duṣkaratvaṃ darśitamanantānāṃ sattvānāmarthasya kartumaśakyatvāt / tathāpyevameva sannāhaḥ kartavya īdṛśīṃ mahāśayatāmantareṇa svaparārthayoḥ kartumaśakyatvāditi pratipakṣaḥ / sarvasattvānāmarthasya kenacidakaraṇādātmavineyānāmarthāya sannāhaḥ kartavya iti prādeśikatvavikalpaḥ //

nānātvavikalpapratipakṣaḥ samatā / tāmeva vivakṣuḥ paramaduṣkaratvamāha te cetyādinā / vainayikā iti vinayārhāḥ sattvāḥ / tathāpi kasya duṣkaratetyata āha / evaṃ cetyādi / dṛṣṭāntena dṛḍhīkartumāha / ākāśamityādi / tatkasya hetoriti kutaḥ sādharmyādityarthaḥ / ata uttaraṃ ākāśetyādi / anenetyupasaṃhāraḥ / punadrdṛḍhīkartumāha / ākāśenetyādi / ākāśopamaiḥ sattvairityarthaḥ / kuto vivāda ityāha / ayaṃ cetyādi veditavyāntam / caśabdo hetau / vivādaḥ kalahaḥ / sattvānayaṃ vinetukāmaste cāsattvātpariharantīti kalahaḥ / vainayiketyādi / yathā ca vineyā na santi tathā vinayitāpi / tata ubhayāsattayā sutarāṃ paramaduṣkaratā / evamiyaṃ bodhisattvena sarvasattvātmasamatā draṣṭavyā yataḥ śaknuyāt (RSt_144) svaparārthau kartum / sa punarasyāṃ caran kathaṃ jñeya ityāha / sa cedityādi / na saṃsīdatīti na khidyate sutarāṃ prīyata ityarthaḥ / tatkasya hetoriti / mattasya prajñāpāramitāyāṃ caraṇaṃ kasya hetornaiva kasyacit / dharmanairātmyādarśanāditi bhāvaḥ / ata uttaraṃ sattvaviviktatayetyādi / evamityādinā draṣṭavyāntenopasaṃhāraḥ / viviktatā hi sarvadharmāṇāṃ samateti vistareṇa pratipakṣaḥ / nānā sattvā nānā dharmāstato nāstyekarasā prajñāpāramiteti nānātvavikalpaḥ //

evaṃ devaputrā ityādi / eva bhāṣyamāṇāyāmiti / evamidānīṃ mayā deśyamānāyāṃ sarvadharmaviviktatāyāmiti caryākāle deśyamānāyāṃ bodhisattvo na saṃsīdatīti sambandhaḥ / na saṃsīdatīti sthānaprasthānayorna muhyati / kena gantavyaṃ kva vā sthātavyamiti / tayaiva sarvadharmasamatāsaṃvedinyā prajñāpāramitayorasaṃmohāt / tathāhi / yena bodhistena gantavyaṃ bodhau sthātavyam / te ca gatisthitī tasyā eva svādhī ne hetuphalāvasthe / tato yena sā gacchati yatra vā tiṣṭhati tatpariṇāmitā api pañca pāramitāstenaiva gacchanti tatraiva tiṣṭhanti / tadyathā cakravartinaścakraratnaṃ yena gacchati yatra vā tiṣṭhati sarvo balakāyastenaiva gacchati tatraiva tiṣṭhatīti pratipakṣaḥ / avijñāḥ pañcapāramitāḥ ṣaṣṭhī nirābhāsā / tataḥ sthānaprasthānayoraniścayaḥ sthānaprasthānaṃ(na)sammohavikalpaḥ //

yata ityādi na saṃsīdatīti prasāditametat / yataśca na saṃsīdati tato gamyate carati prajñāpāramitāyāṃ pūrvameveti śeṣaḥ / anyathā kuto na saṃsīdet / tadyathā cakravartinaścakraratnamagrato gacchati paścādbalakāya iti pratipakṣaḥ / udāraviṣayatvātpañcapāramitāḥ prāk pravartante / sūkṣmaviṣayatvāt pṛṣṭhataḥ ṣaṣṭhīti pṛṣṭhato gamanavikalpaḥ //

ityukto dvitīyo grāhyavikalpo navavidhaḥ //

prathamaṃ grāhakavikalpamadhikṛtya śāstram-

dravyasannātmā 'prathamo grāhakaḥ' / sa cāsti prajñāpāramitāvat / sā hi kiñcidgṛṇhāti kiñcinmuñcatīti grahaṇamokṣaṇavikalpaḥ / sāpi na gṛṇhāti na muñcatīti pratipakṣaḥ //

gṛhyanta eva dharmāsteṣāṃ manasikārāditi manasikāravikalpaḥ / na sa dharmānmanasikarotīti pratipakṣaḥ //

manasikarotyeva dharmāstraidhātuke śleṣāditi traidhātukaśleṣavikalpaḥ / nāsau traidhātuke śliṣyatīti pratipakṣaḥ //

traidhātuke sthitaḥ kathaṃ tatra na śliṣyatīti sthānavikalpaḥ / nāsau kvacittiṣṭhatīti pratipakṣaḥ //

satyabhiniveśe kathaṃ na tiṣṭhatīti abhiniveśavikalpaḥ / nāsau kiñcidabhiniviśata iti pratipakṣaḥ //

asti bodhisattvasya dharmavastūnāṃ prajñaptiḥ / dānapāramitā śīlapāramitā yāvat sarvākārajñateti sarvavastuprajñaptivikalpaḥ / sāpyasya nāstīti pratipakṣaḥ //

śa(sa)kta eva samyaksambodhau tāmabhisambudhyate / anyathā vaimukhyāditi śa(sa)ktivikalpaḥ / aśa(sa)ktāḥ sarvadharmā aparigṛhītāḥ / na cāśa(sa)ktaḥ kiñcidabhisambudhyate / sa cedevaṃ carati carati prajñāpāramitāyāmiti pratipakṣaḥ //

dānapāramitāśūnyā śīlapāramitāśūnyetyevamādi pratipakṣavikalpaḥ / sopi bodhisattvasya nāstīti pratipakṣaḥ //

sarvākāraiḥ sarvadharmāṇāmanupalambhe yathecchagamanaṃ tasya kṣatiḥ / sā bodhisattvasyāstīti yathecchagamanavyāghātavikalpaḥ / sopi tasya nāstīti pratipakṣaḥ /

amī nava prabhedā mahatyorbhagavatyoruktāḥ / asyāṃ tu sāmānyena dravyasadgrāhakavikalpaṃ sapratipakṣamāha / atha khalvityādinā nāpītyataḥ prāk / jānanneveti na hi bhagavataḥ kiñcidajñātamasti / bodhisattvo mahāsattva iti lokaprasiddhito dravyasatpudgalarūpaḥ sa kena kāraṇena na saṃsīdatīti dravyasadgrāhakavikalpaḥ / tasya pratipakṣo 'nupalambhaḥ / tamevāha / viviktatvādityādinā / asattvādityarthaḥ / sa hi svayamasat kutaḥ saṃsīdatīti /

dvitīyaṃ grāhakavikalpamadhikṛtya śāstram-

ete nava vikalpāḥ pṛthagjanānāṃ prathamasyaiva bhāvānna teṣāṃ dharmāḥ / tairapraheyatvāt / teṣāṃ pratipakṣaḥ ṣaṣṭhī yathā sūtram / yathā sārathiraśvānāṃ sanmārgeṇa yathoddeśaṃ netā tathā ṣaṣṭhī pañcānāmiti pratipakṣaḥ / ṣaṣṭhyabhāvānniyanturabhāvādyathoddeśāniryāṇavikalpaḥ /

sarvākārajñatāmārgo bodhisattvānāṃ mārgaḥ / hīnabodhimārgasteṣāmamārgaḥ / tayoravadhāraṇaṃ ṣaṣṭhyaiveti saiva pratipakṣaḥ / tadabhāve mārgāmārgāvadhāraṇavikalpaḥ /

naiṣā kasyaciddharmasyotpādikā nirodhikā vā dharmatāṃ pramāṇīkṛtyeti pratipakṣaḥ / utpādikā buddhadharmāṇāṃ nirodhikā tadāvaraṇānāmityutpādanirodhavikalpaḥ /

sarvadharmā na saṃyuktā na visaṃyukta iti pratipakṣaḥ / saṃyuktā visaṃyuktā veti saṃyogaviyogavikalpaḥ /

rupādau yāvatsarvākārajñatāyāṃ na sthāsyatīti yogaḥ karaṇīyaḥ / sarvadharmāṇāṃ kvacidapyasthitatvāditi pratipakṣaḥ / rūpe yāvatsarvākārajñatāyāṃ sthāsyatīti sthānavikalpaḥ //

yathā hi phalakāmo bījamavaropya samyak savardhya yāvatphalāni paripācya bhakṣayati / evaṃ mahābodhikāmaḥ pāramitāsu śikṣitvā tābhiḥ sattvānanugṛhya saṃsārānmocayatīti pratipakṣaḥ / bodhau cittamutpādya sattvānupekṣata iti gotravipraṇāśavikalpaḥ //

prārthito 'rthaḥ prārthanā / sarvadharmavaśavartitāmanuprāptukāmena ṣaṣṭhyāṃ śikṣitavyamiti pratipakṣaḥ / tacca śikṣamāṇe sā na syāditi prārthanābhāvavikalpaḥ //

ṣaṣṭhī hetuḥ sarvadharmāṇāṃ samudra iva sarvaratnānāṃ tayā paribhāvitā hi śukladharmā buddhadharmā bhavantīti pratipakṣaḥ / ṣaṣṭhyabhāve heturna syāditi hetvabhāvavikalpaḥ //

prajñāpāramitāyāṃ carantaṃ traiyadhvikā buddhāḥ samanvāharanti / na ca rūpādito yāvanna sarvākārajñatātaḥ / api tu yatra na rūpādi yāvadyatra na sarvākārajñatā tathā samanvāharantīti pratipakṣaḥ / rūpādito yāvatsarvākārajñatātaḥ samanvāharantīti pratyarthikadharmopalambhavikalpaḥ //

etepi na va prabhedāḥ mahatyorbhagavatyoruktāḥ / asyāṃ tu sāmānyenaiva prajñaptisaṃgrāhakavikalpaṃ sapratipakṣamāha / nāpītyādinā api tu khalvityataḥ prāk / kaściddharma iti ātmaprajñaptiviṣayaḥ skandhādiḥ / na saṃsīdatīti svayamasattvāt / ata evāha / tatkasyetyādi / kaściddharma iti skandhādi cittaṃ vā / (RSt_147) sopītyādi / yena dharmeṇeti cittena yo dharma iti bodhisattvaḥ / evametadityādirabhyupagamaḥ / iyatā pratipakṣa uktaḥ /

mā bhūd dravyasatsattvaḥ / ahaṃkāraviṣayaḥ skandhādiśvattaṃ vā bodhisattva iti prajñaptisaṃgrāhakavikalpaścaturthaḥ //

evaṃ bhagavatā caturvidhāvikalpapratipakṣabhūtā bhagavatī vistareṇa deśitā / bodhisattvastu tasyāṃ caran yathā jñeyastadāha / api tu khalvityādi / bhāṣyamāṇe granthataḥ / deśyamāne arthataḥ / nirdeśyamāne nirviśeṣaṃ kathanāt / upadiśyamāne rahasyakathanāt / na saṃsīdati na mandībhavati / na viṣīdati khedāt / na viṣādamāpadyate santatakhedāt / nāvalīyate cittanamanāt / na saṃlīyate santataṃ tannamanāt / vipṛṣṭhaṃ vaimukhyāt / bhagnapṛṣṭhaṃ punarasāṃmukhyāt / nottrasyati trāsonmukhatvāt / na saṃtrasyati samyak trāsāt / nainamāpadyate sātatyena / tadā veditavyaṃ caratyasyāṃ prajñāpāramitāyāmiti / asyāmacarataḥ saṃsīdanādīnāmavaśyaṃbhāvāt /

subhūtirāhetyādinā pāramitāntena subhūterabhyupagamaḥ / evamityādinā / asyāṃ carato 'nuśaṃsātiśayānāha / anugṛṇhanti viśeṣādhānataḥ / samanvāharanti smaraṇataḥ / tepi tasya buddhā bhagavanto dharma deśayantīti sambandhaḥ / kīdṛśā ityāha / bhikṣusaṃghetyādi / kīdṛśasyetyāha / prajñāpāramitāyāṃ carata ityādi / nāma cetyādi / nāma saṃjñā / gotraṃ gārgyādi / balaṃ kāyabalaṃ buddhibalaṃ ca / varṇaḥ pariśiṣṭā guṇāḥ / rūpaṃ varṇasaṃsthāne / etāni parikīrtayamānāḥ prakarṣeṇa prakarṣarūpam / udānamiti guṇaharṣobhdavāṃ gāthāṃ udānayantyudāharanti / kasya guṇā ityāha tasyetyādi / tadyathāpītyādinā dṛṣṭāntamāha / evamevetyādinā dārṣṭāntikam / kiṃ sarveṣāmityādinā praśnaḥ / uttaraṃ no hīdamityādinā / sarvasaṃgāḥ sarve 'bhūtopalambhāḥ / santi bhagavannityādinā punaḥ praśnaḥ / uttaraṃ santītyādinā / ime ta ityādinopasaṃhāraḥ / aparānapyāha yepītyādinā / imepītyādinopasaṃhāraḥ /

punaraparamityādinā avinivartanīyānāṃ vaśitā tasyāḥ prāptiḥ / tāmavakrāntāḥ praviṣṭāḥ / buddhairnāmādiparikīrtanasyānuśaṃsamāha / yeṣāṃ khalvityādinā punaraparamityādi / kathamadhimokṣyantītyāha / evametadityādi / teṣāṃ ceti na kevalamakṣobhyasya keṣāmityāha / ye cetyādi teṣāṃ ceti / akṣobhya-tabdodhisattvānām / evamityādinā śravaṇānuśaṃsamupasaṃhṛtya tathātvapratipattyādīnāmanuśaṃsotkarṣamāha / evamanuśaṃsātiśayeṣūkteṣu prakṛtāyāḥ prajñāpāramitāyā viśeṣanirdeśa āparivartāntābhdaviṣyati / taṃ (RSt_148) prastotuṃ subhūtirāha yadā bhagavannityādi / tathatāvinirmukta iti / tathatāmātrasyeva prakhyānāt / parikalpitasya nānāvidhasyāpratibhāsanāt / na kaściddharma upalabhyate / tadā koyamityādi sugamam / tathataiva tāvannopalabhyata iti tasyā agrāhyatvāt / yaḥ sthāsyatīti bodhisattvaḥ /

sajjatīti vihanyata ityarthaḥ / ārabhyeti adhikṛtya / dharmavādīti yuktivādī / dharmasyeti buddhanirvāṇasya / anudharmamanukūlaṃ mārgaḥ / vyākurvan ācakṣāṇaḥ / vyākaromyācakṣe / sarvadharmāṇāṃ viviktaṃ vivekaḥ śūnyatā / tasminvihāraḥ samādhiḥ sarvadharmāṇāṃ anupalambhaḥ / tasminvihāraḥ yaḥ khalu punarityādinā subhūtervihārādvodhisattvavihārasyortṣa darśayati / upapattimāha / tathāgatavihāraṃ hītyādinā / carataḥ samādhiniṣpattaye / viharato niṣpannena samādhinā / śeṣaṃ subodham / durbodhaṃ tu prāgeva vyākhyātam //

sārādiḥ parivartaḥ sāraparivarttaḥ /

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ saptaviṃśatitamaḥ parivartaḥ //

28. avakīrṇakusumaparivarto nāmāṣṭāviṃśatitamaḥ /

māyopamasāraparivartābhyāṃ darśanaheyā vikalpā uktāḥ / darśanamārgādeśca prajñāpāramitāvihārasyāvaśyakaṃ bodhiprāpakatvamuktam / tatastasya tathābhāve kāraṇatrayamanena parivartena prathamaṃ vakṣyati paścādvodhilakṣaṇam / ataḥ kāraṇatrayamadhikṛtya śāstram-

tasyā bodheryathoktāt prajñāpāramitāvihārādavaśyaṃ prāptiḥ 'tatprāptiḥ' / tasyā 'anantaro ' 'vinābhāvī 'hetuḥ' jñāpakastrividha uktaḥ sūtre / 'bodhau sandarśanā' vyākaraṇaṃ yad 'anyeṣāṃ' sa prathamo hetuḥ / bhāvināṃ bodhihetorāryānandāya 'parīndanā' dvītīyo hetuḥ / 'puṇyābāhulyalakṣaṇaḥ' tṛtīyaḥ / ataḥ sūtram // atha khalvityādi avakīrṇakusumanāmāno vyākartavyāḥ / tato devaiḥ puṣpamānītaṃ vyākartavyairavakīrṇaṃ tato raśmīnāṃ niścārapraveśau / ānandapṛṣṭena (RSt_149) bhagavatā teṣāṃ vyākaraṇam / tatteṣāṃ vyākaraṇamanyasminviśiṣṭe lokadhātāvitilakṣyate lokadhātoranirdeśāt / āyuḥsaddharmaśitikālayoścayatatvāt / tadanu tasmāttarhītyādinā upasaṃhāro vihartavyāntaḥ / iti prakṛtena vihāreṇa bodhiprāpteḥ prathamaṃ kāraṇam //

tato ye hītyādinā samyaksambuddhānāmityetadantena prajñāpāramitācāriṇāṃ guṇānāha / tato ye caināmityādinā veditavyāntena yepyenāṃ śrutvā na pratikṣipanti teṣāṃ guṇamāha / atra pratikrośaṇaṃ mānasī nindā / prativahanaṃ manasā tyāgaḥ / pratikopanaṃ tasmai kopaḥ / pratisaṃharaṇaṃ guptau sthāpanam / pratiṣedhanaṃ niḥsāratākhyāpanam / pratikṣepo 'sabhdūtabādhakābhidhānam / tadavyavasāyaḥ saptamaḥ / tataḥ kiñcāpītyādinā caritavatetyetadantena hīnayānāpatane kāraṇadvayamāha / praṇidhānādināvisaṃvāditāṃ kṛtajñatāṃ ceti / tadevaṃ ye hi kecidityādinā vistareṇopodghātaṃ kṛtvā tasmāttarhītyādinā parīndanāmāha / parīndanā samarpaṇā saivānubandhinī anuparīndanā / akṣarasannipātāditi / akṣarasannipāto vyañjanakāyaḥ / tamadhikṛtyeti lyap lope pañcamī / kimarthamityāha / udgrahaṇāyetyādi / kathaṃ parīndanetyata āha / yatheyaṃ nāntarddhīyeteti / yatheyamantarhitā na syāttathā tvayā karaṇīyamityarthaḥ / ata ūrdhvaṃ sa cedityādinā āhāriketyetadantena dvitīyamupodghātaṃ kṛtvā tasmāttarhītyādinā dvitīyā parīndanā / atra punareveti paścāt / nāśayeriti hārayeḥ / śīghramananuśa(sa)raṇāt utsṛje / smartumaśakyatvāt vismareḥ / aparāddhaḥ kṛtāparādhaḥ / ārādhanamārāgaṇaṃ ca toṣaṇam / mātā bījadhā[ra]nā(ṇā)t / jananī bījapṛṣṭeḥ / janayitrī utpādanāt / tata urdhvaṃ udgrahītavyeyamityādinā tādṛśī prajñāpāramitā sadevakasya lokasya śāstetyetadantenopoddhātaṃ kṛtvā tasmāttarhītyādinānuśā nītyetadantena tṛtīyā parīndanā /

atra suniruktā supaṭhitā dharmakāyateti prajñāpāramitaiva dharmaḥ kāya eṣāṃ tattaditi vakṣyamāṇena kartavyādinā sambadhyate / tatra kartavyamupasthānādi dātavyaṃ puṣpādi samanvāhartavyaṃ deśanādi / kalyāṇata iti puṇyakāmatayā / sparśavihārata iti tenaiva sukhībhāvāt / guṇavattayeti kalyāṇādinā / bhāṣeye(yami)ti vadeyam / kalpaṃ vā yāvattato vā upari yadi vistara iṣṭaḥ syāt / kintarhi saṃkṣepeṇānanda bhāṣaye(bhāṣe) / yādṛśa ityādi / tato yopi kaścidityādinā samyaksambodhirityetadantenopodghātaṃ kṛtvā caturthī parindanāmāha / tamāttarhītyādinā nāntardhīyetyetadantena / (RSt_150) caturthakamiti vaktavye dvitīyakamityuktam / u(anu)ktānāmuktasāmānyenaikīkaraṇāt / paridadāmi parindāmi samarpayāmītyeko 'rthaḥ / evaṃ caturākārā parindanā dvitīyaṃ kāraṇam //

tata eṣā hyānandetyādinopādghātaṃ kṛtvā sa cet tvamityādi naitatsthānaṃ vidyata iti yāvat / atra adhvaparyantaḥ kṣaṇaḥ / viṃśaṃ kṣaṇaśataṃ tatkṣaṇaḥ / tatkṣaṇāḥ ṣaṣṭirlavaḥ / lavāstriṃśanmuhūrtaḥ / nālikā ghaṭikā / iti puṇyabahutvaṃ tṛtīyaṃ kāraṇam //

tato 'tha khalu bhagavānityādinā akṣobhyasya bhagavataḥ sabuddhakṣetrasya sapariṣadaḥ sandarśanamantardhāyanaṃ ca dṛṣṭāntaḥ / atra sāgaropamatvamativistīrṇatvāt / gambhīratvaṃ dhyānasampadā / akṣobhyatvaṃ prajñāsampadā / dārṣṭāntike yojayitumāha / evamānanda sarvadharmā ityādi / sarvadharmā hītyādinā yuktimāha / na kāryasamarthā iti pratijñāntaram / nirīhakā hītyādinā yuktimāha / evaṃ caranta ityādinānuśaṃsāmāha / mahābodhiśabdāt prāk / asaṅgatāmiti nirupala[mbha]tām / apratihatajñānatāṃ vā / pramāṇaṃ vaipulyaniyamaḥ / kṣayaḥ kālaniyamaḥ / paryantaḥ saṃkhyāniyamaḥ / pramāṇabaddheti pramāṇaparicchinnā / aprameyatvādityanupalambhāt / kṣayo 'pacayaḥ / parikṣayo 'bhāvaḥ / ākāśākṣayatvāditi ākāśavadakṣayatvāt / kuta ityāha sarvadharmānutpādata iti / anutpannā sarvadharmāḥ / atasteṣāmanupalambhalakṣaṇā prajñāpāramitāpyākāśavadakṣayeti / abhinirhartavyeti pratyakṣīkartavyā / rūpādīnāmakṣayatveneti teṣāmanutpādataḥ / evamavidyādīnām / iyaṃ seti yā skandhādīnāmavidyādīnāṃ cākṣayatvena / antadvayamutpattivināśau madhyamutpannasya sthitiḥ / āveṇiko 'nyairasādhāraṇaḥ / na ca kiñciddharmamiti skandhaiḥ saṃgṛhītam / kutaḥ? pratītyotpādadarśanāt / nityamityanādinidhanam / dhruvamiti sthiram / śāśvatamityanidhanam / kārakaṃ vedakaṃ veti / īhaturgṛhītuścābhāvāt / ita uttaro granthaḥ subodhaḥ samyaksambodhariti yāvat / iyatā kṣayānutpādajñānalakṣaṇā bodhirucyate / atra śāstram-

malāḥ kleśavikalpāḥ / teṣāṃ 'kṣayānutpādayoḥ' ye 'jñāne ' sā bodhiḥ / 'te ' ca jñāne teṣāṃ 'kṣayābhāvādanutpādācca yathākramaṃ' veditavye / kṣayasyātyantamasattayā jñānaṃ kṣayajñānam / anutpādasyo(syānu)tpattikatvena jñānamanutpādajñānamiti bhāvaḥ / (RSt_151) atha bodherlakṣaṇāntarasambhavepi kimarthamidaṃ lakṣaṇamuktam? darśanamārgeṇa kṣīṇānāṃ vikalpānāmakṣayato 'nutpādataśca vyavalokanārtham / tadevāha-

vikalpānāṃ prakṛtistathatā / na kadācittasyāḥ kṣaya utpādo vā / jātireva 'jātaṃ' prakāraḥ / tato na kaścidvikalpaprakāro darśanamārgeṇa kṣīṇa utpādaṃ vā tyājita iti //

anye tvāhuḥ-

te hi śasyante- santi skandhāḥ santi catvāri satyāni / tatra saṃkṣepataḥ kleśaduḥkhayoḥ kṣayaḥ punaranutpādaśca prāpyate / tatoḥ prāptayorye jñāne te kṣayānutpādajñāne / prādhānyena tathāgatānāṃ tu jñeyāvaraṇamapi kṣīyate teṣāmakliṣṭasyāpyajñānasya kṣayāditi / tannirāsāya śāstram-

'nāma' śabdo 'marṣe / 'atra vismīyate mayā' iti vipakṣapratipakṣayorayogāditi bhāvaḥ / 'ataḥ' kāraṇāt 'nāpaneyaṃ kiñcit' pudgalasya dharmāṇāṃ ca svayamabhāvāt / 'prakṣeptavyaṃ na kiñcanaṃ' pudgaladharmanairātmyayoranādinidhanatvāt / kiṃ tarhi? tadubhayaṃ 'bhūtaṃ' bhūtatvena 'draṣṭavyam' / yato bhūtaṃ pudgalanairātmyaṃ dṛṣṭvā kleśāvaraṇādvimucyate / bhūtaṃ dharmanairātmyaṃ dṛṣṭvā jñeyāvaraṇād 'vimucyate ' / tasmādabhūtānāṃ pudgaladharmāṇāṃ dṛṣṭirvipakṣaḥ / teṣāṃ nairātmyadarśanaṃ pratipakṣaḥ / ubhayostu nairātmyayorbhūtatvaṃ mahārathaiḥ kṣuṇṇam / tata iha nocyate //

tasmāttarhītyādi / kṣayānutpādalakṣaṇā bodhisatasyā avaśyalabhyatā kāraṇatrayaṃ ca prasaṅgādāgatam / prākṛtaṃ tu māyopamasāraparivarte nirdiṣṭaṃ darśanaheyānāṃ vikalpānāṃ prahāṇam / ato yasmāddarśanamārgeṇa darśanaheyānāṃ vikalpānāṃ prahāṇaṃ tasmāddhetoḥ / tarhīti darśanakāle prajñāpāramitāyāṃ darśanamārgātmikāyāṃ caritavyam //

tatkasya hetoriti / hetumukhena darśanamārgasya lakṣaṇapraśnaḥ / prajñāpāramitāyāmiti / atratye darśanamārge dhyānapāramitetyatra cārtho gamyate / tenānuktasamuccayaḥ / prajñāpāramitā ceti / kuta ityāha / prajñāpāramitāyāṃ hītyādi / bhāvanāparipūriṃ ṣaṭpāramitā gacchantīti sambandhaḥ / sarvā iti pratyekaṃ samagrāḥ satyaḥ / ekaikayā ṣaṇṇāmapi saṃgrahāditi bhāvaḥ / ataśca ṣaḍeva pāramitāṣaṭkā darśanamārgaḥ / saṃkṣiptā ceyaṃ bhagavatī / ato lakṣaṇamātramasyāmuktam / yathā tvekaikayā sarvasaṃgrahastadvistareṇa mahatyorbhagavatyoruktam / atra śāstram-

ekaikameva ekaikaśaḥ svārtha śas / tasya bhāva ekaikasya / avyayatvāddhi lopaḥ / tena 'ekaikasyaiva dānādau' iti dānādiṣu / 'teṣāṃ' dānādīnāṃ 'mithaḥ' anyonyaṃ 'yaḥ saṅgrahaḥ' / so 'smin mūrdhābhisamaye darśanamārgaḥ / sa ca 'ekakṣaṇīkaḥ' na tu ṣoḍaśakṣaṇāḥ(ṇaḥ) / sa ca kṣāntyā 'saṃgṛhītaḥ' na punaraṣṭābhiḥ kṣāntibhiraṣṭābhirjñānaiḥ / iti mūrdhābhisamaye darśanamārgaḥ //

tato bhāvanāmārgaḥ / tamāha / sarvāṇi cetyādinā / upāyau ca kauśalyaṃ ceti upatyakauśalyāni / tatra niśrayatvādupāyau siṃhavijṛmbhitāvaskandhakau samādhī / kauśalyaṃ pratītyasamutpādasyānulomaṃ ca vyavalokanam- "avidyāpratyayāḥ saṃskārāḥ saṃskārapratyayaṃ vijñānaṃ yāvajjātipratyayā jarāmaraṇaśokaparidevaduḥkhadaurmanasyopāyāsāḥ sambhavantītyanulomam / avidyānirodhātsaṃskāranirodhaḥ / saṃskāranirodhādvijñānanirodho yāvajjātinirodhājjarāmaraṇaśokaparidevaduḥkhadaurmanasyopāyāsā nirudhyante" iti pratilomam /

tatra siṃhavijṛmbhitaḥ samādhiḥ / tadyathā- "prathamaṃ dhyānaṃ samāpadyate / dvitīyaṃ tṛtīyaṃ caturtham / ākāśānantyāyatanaṃ vijñānānantyāyatanaṃ ākiñcanyāyatanaṃ naivasaṃjñānāsaṃjñāyatanaṃ nirodhasamāpattiṃ ca samāpadyate / nirodhasamāpattervyutthito naivasaṃjñānasaṃjñāyatanaṃ samāpadyate / tata ākiñcanyāyatanaṃ vijñānānantyāyatanaṃ ākāśānantyāyatanaṃ caturthaṃ dhyānaṃ tṛtīyaṃ dvitīyaṃ prathamaṃ dhyānaṃ samāpadyata" iti /

avaskandakasamādhiḥ / tadyathā- "prathamaṃ dhyānaṃ samāpadyate dvitīyaṃ tṛtīyaṃ caturtham / ākāśānantyāyatanaṃ vijñānānantyāyatanaṃ ākiñcanyāyatanaṃ naivasaṃjñānāsaṃjñāyatanaṃ (RSt_153) nirodhasamāpattiṃ ca / tato vyutthāya prathamaṃ dhyānam / tato nirodham / tato dvitiyaṃ dhyānam / tato nirodham / tatastṛtīyaṃ dhyānam / tato nirodham / tataścaturtha dhyānam / tato nirodham / tata ākāśānantyāyatanam / tato nirodham / tato vijñānānantyāyatanam / tato nirodham / tata ākiñcanyāyatanam / tato nirodham / naivasaṃjñānāsaṃjñāyatanam / tato nirodham / tato 'samāhitacitte patati / tato nirodhaṃ samāpadyate / tato 'samāhite citte tiṣṭhati / tato naivasaṃjñānāsaṃjñāyatanam / tato 'samāhite / tata ākiñcanyāyatanam / tato 'samāhite / tato vijñānānantyāyatanam / tato 'samāhite / tata ākāśānantyāyatanam / tato 'samāhite / tataścaturthaṃ dhyānam / tato 'samāhite / tatastṛtīyam / tato 'samāhite / tato dvitīyam / tato 'samāhite / tataḥ prathamam / tato 'samāhite citte tiṣṭhati" iti /

tatra prathamāyāṃ gatau nava sthānāni / dvitīyāyāṃ saptadaśa / āgamane 'ṣṭādaśa / atra śāstram-

siṃhavijṛmbhito yathā sūtrameva / avaskandastu gahanam / tena tasya lakṣaṇamāha / 'avaskandasamāpattiḥ' bhavati / kathamityāha / 'nava samāpattīrdvidhā gatvā' paścād 'āgamya' / ādau kathaṃ gatvetyata āha 'ānirodham' iti / nirodhasamāpattimante kṛtvā / itarā aṣṭau krameṇa prāgityarthaḥ / punaḥ kathaṃ gatvetyata āha 'ekadvitricatuṣpañcaṣaṭsaptāṣṭavyatikramāt' / 'sanirodhāḥ' kṛtvā / kāḥ? itarā aṣṭau 'samāpattīḥ' / kāmāvacaraṃ ca 'asamāhitaṃ' cittaṃ 'avadhīkṛtya' / ante gantavyaṃ kṛtvetyarthaḥ / paścāt kathamāgatyetyata āha 'atulyagā' iti / atulyagā satī / asamāhitādasamāhitaḥ / samāhitācca samāhitamagacchantītyarthaḥ / ihāpi 'kāmāptamavadhīkṛtya vijñānamasamāhitaṃ' iti sambadhyate / (RSt_154) teneyasamāhitāccittātprabhṛtyāgacchati / antepyasamāhita eva citte gatvā tiṣṭhati / iti mūrdhābhisamaye bhāvanāmārgaḥ //

sarvāṇi copāyakauśalyāni paripūriṃ gacchantītyuktam / kathaṃ ca teṣāṃ bhāvanāparipūribhavet / yadi bhāvanāheyāścatvāro vikalpanavakāḥ kṣīyeran / teṣāṃ ca pratipakṣā eva mahatyorbhagavatyoḥ paṭhyante / te tu sāmarthyādgamyante / vayamapi tameva pāṭhamabhisaṃkṣipya tān vakṣyāmaḥ / tatrādyaṃ vikalpanavakamadhikṛtya śāstram-

[152] eko grāhyavikalpo 'yaṃ prayogākāragocaraḥ /

'ekaḥ' iti prathamaḥ / 'prayogākāragocaraḥ' iti prajñāpāramitāprayogaviśeṣaḥ viṣayaḥ / 'vistare ' 'saṃkṣepe ' ceti paṭhitavyam / vṛttānurodhāt tvanyathā paṭhitam / vistare sammoho vistaravikalpaḥ / tasya pratipakṣaḥ / bahuṣu sthāneṣu bodhisattvena śikṣitavyaṃ dānādiṣu yāvadvaleṣu vaiśāradyeṣviti //

saṃkṣepe sammohaḥ saṃkṣepavikalpaḥ / tasya pratipakṣaḥ na ca kvacan śikṣitavyamiti / bahunāmapi teṣāṃ na ca kvacaneti śūnyataikarasatvāt / sambuddhaiḥ'sānāthyena' yaḥ parigrahaḥ / tadabhāve vikalpaḥ kalpanā / tasya pratipakṣaḥ / yaḥ prajñāpāramitāyāṃ śikṣitvā dānapāramitāṃ yāvatsarvākārajñatāmanuprāpsyati / tenaivaṃ jñātavyaṃ- daśadiksarvabuddhaiḥ sānāthyenāhaṃ parigṛhītaḥ svasyāṃ mātari teṣāṃ kṛtajñatayeti //

'guṇābhāvo ' 'nuśaṃsābhāvaḥ / prayogadarśanabhāvānākālabhāvitatvāt 'traikālikaḥ' / tasmiṃstrayo vikalpāstrisraḥ kalpanāḥ / teṣāṃ pratipakṣāḥ / anuśaṃsān vistareṇoktvā yathāha- 'itīme 'nuśaṃsāḥ prajñāpāramitāyāṃ carataḥ prajñāpāramitāmabhinirharataḥ prajñāpāramitāṃ bhāvayataḥ /" iti yathākramaṃ prayogadarśanabhāvanāmārgakālikaguṇābhāve trayo vikalpāḥ /

'śreyasaḥ pathi' iti nirvāṇamārge / prayogādibhedāt trividhā sammohāstrayo vikalpāḥ / teṣāṃ pratipakṣā yathākramaṃ- "rūpavedanādīnāṃ śāntavaśikatucchāsārakatayā tasyāṃ caritavyam / (RSt_155) ākāśaśūnyatābhinirhāratayābhinirhartavyā / ākāśaśūnyatā bhāvanayeyaṃ bhāvayitavyā" iti / iti trayaḥ prayogādibodhimārgasaṃmohavikalpāḥ //

ityukto navavidhaḥ prathamo grāhyavikalpaḥ //

dvitīyaṃ vikalpanavakamadhikṛtya śāstram-

dvitīyo grāhyavikalpaścittacaittānāṃ yā pravṛttistadviṣayaḥ / kiyacciraṃ carannasyāṃ cīrṇo bhavatīti praśnaḥ / uttaram / prathamacittotpādamupādāyeti cittotpādavikalpaḥ //

yāvabdodhimaṇḍala manasikaroti / kathamiyaṃ caritavyābhinirhartavyā bhāvayitavyeti / ābodhimaṇḍā manasikāravikalpaḥ //

hīnayānamanasikārāṇāṃ cāvakāśaṃ na dadātīti hīnayānayormanasikāravikalpau //

sarvākārajñatā mānasikārāvipraṇāśa eva cāsyāṃ caryā / tathā caritavyaṃ yathā cittacaitasikā na pravartanta iti saṃbodhyamanasikāravikalpaḥ //

kiṃ bhāvayan sarvākārajñatāmanuprāpsyati neti bhāvanāvikalpaḥ //

abhāvayaṃstāmanuprāpsyati neti [a]bhāvanāvikalpaḥ //

neti bhāvayannābhāvayannanuprāpsyati / neti naiva bhāvanānābhāvanāvikalpaḥ //

tatkathaṃ tāmanuprāpsyati yathā tathatā bhūtakoṭīrdharmadhāturityayathātvavikalpaḥ //

iti dvitīyo grāhyavikalpaḥ //

tṛtīyaṃ vikalpanavakamadhikṛtya śāstram-

aprajñapanīyāḥ sattvāḥ anupalambhāditi sattvaprajñaptivikalpaḥ //

aprajñapanīyāḥ sarvadharmā iti dharmaprajñaptivikalpaḥ //

alakṣaṇaśūnyān sarvadharmān paśyatītyaśūnyatvavikalpaḥ //

dharmāśca dharmānupalambhaśca yaścābhyāṃ carati sopi nopalabhyata iti śaktivikalpaḥ //

dharmāṇāṃ pravicayaḥ kartavyaḥ / sa cānupalambhayogeneti pravicayātmako vikalpaḥ //

na ca vastunaḥ kṛte so 'syāṃ carati / yato 'kṛtāvikṛtānabhisaṃskṛtā sarvadharmā iti vastūddeśavikalpaḥ //

yadyapyakṛtāvikṛtānabhisaṃskṛtāḥ sarvadharmāstathāpi yathā kaścittathāgatanirmito 'bhisaṃbudhya dharmacakraṃ pravartya tribhiryānaiḥ sattvān parimocayati lokavyavahāreṇa na paramārthena tathaiva ca tathāgatopīti yānatrayavikalpaḥ //

yadyapi tathāgato nirmitānna viśiṣyate tathāpi dakṣiṇāpariśuddhiḥ / yathā hi tathāgate pratiṣṭhāpitā dakṣiṇā ānirupadhiśeṣānnirvāṇānna kṣīyate tathāḥ nirmitepi / tathā tathāgatāyākāśe puṣpāṇi kṣipatastathā namo buddhāyeti bruvato manasi kurvato vā saṃjñāṃ ca pramāṇīkṛtya yā hi dharmatā tathāgatasya saiva vinirmitasyāpīti dakṣiṇāpariśuddhivikalpaḥ //

caryā pāramitādiḥ / tasyā vikopanaṃ bhedanam / kutaḥ? dharmatātaḥ / dānapāramitāyā yāvat prajñāpāramitāyā vā / evaṃ yāvatsarvadharmāṇāṃ dharmateti / kathaṃ tarhi bhagavatā dharmā vikopitāḥ? nāmanirmitā hi te dharmā nirdiṣṭā dharmāṇāṃ sūcanāya / kathaṃ paro 'vatarediti / na tu dharmāṇāṃ dharmatā vikopiteti caryāvikopanavikalpaḥ //

caturthaṃ vikalpanavakamadhikṛtya śāstram

yairākārairliṅgairnimittairdharmāḥ sūcyante tāni tathāgatenānubuddhāni / tenocyate tathāgatasya sarvākārajñateti sarvākārajñatāsammohavikalpaḥ //

yau ca śrāvakapratyekabuddhamārgau ye ca bodhimārgāste sarve bodhisattvena paripūrayitavyāḥ / taiśca mārgakaraṇīyaṃ kartavyam / na ca bhūtakoṭiḥ sākṣātkartavyāparipūrya praṇidhānamaparimucya sattvānapariśodhya buddhakṣetraṃ tenocyate bodhisattvasya mārgajñateti mārgajñatāsammohavikalpaḥ //

etāvadeva sarvaṃ yadādhyātmikabāhyā dharmāḥ / te ca śrāvakapratyekabuddhānāṃ sarvajñateti sarvajñatāsammohavikalpaḥ //

sarvadharmāṇāṃ pāraṃ nirvāṇaṃ gatā sarvārthā vā gatānayeti prajñāpāramitā / sarvadharmāṇāṃ vā pāraṃ paramo 'rtho 'bhinnaṃ tattvaṃ so 'syāṃ tathāgatairduṣṭaḥ / api cāsyāṃ tathatā bhūtakoṭirdharmadhāturantargatastenocyate prajñāpāramiteti śāntimārgasammohavikalpaḥ //

neyaṃ tathatādibhiḥ saṃyuktā na visaṃyuktā / tathāhīyamarūpānidarśanāpratighā, ekalakṣaṇā yadutālakṣaṇātvāditi tathatādisaṃyogaviyogavikalpaḥ //

neyaṃ kaiścidācchettuṃ(?) śakyate / tasmādasādhāraṇīkṛtya samatvasammohavikalpaḥ //

asyāṃ caratā duḥkhasamudayanirodhamārgādyartheṣu caritavyamiti duḥkhādisammohavikalpaḥ //

rāgādayo nārtho nānartha iti prakṛtisammohavikalpaḥ //

yathā na dvayo nādvayo dharma upalabhyate tathā nadvayaṃ nādvayaṃ dharmamanuprāpnotīti dvayābhāvasammohavikalpaḥ //

ityuktāḥ ṣaṭtriṃśabhdāvanāheyāḥ vikalpāḥ //

evaṃ tāvabhdavatu doṣāṇāṃ kṣayo guṇānāṃ punaḥ kathamudaya ityata āha-

prakṛtisiddhā guṇāḥ kevalamākrāntā [a]guṇairāśān cireṇa / doṣakṣayāt praśatā (? prakaṭā?) i(e)va taṃ bodhisattvaṃ bhajante sarvadoṣaprahāṇaśālinam / 'abhisāraḥ' saṃdohaḥ / śeṣaṃ gatārtham //

tasyetyādi vivarjayiṣyatīni yāvat / iti bhāvanāmārgasyānuśaṃsaḥ //

ānantaryasamādhirvaktavyaḥ / tamadhikṛtya śāstram-

antarayituṃ śakto 'ntaryaḥ / na tathā anantaryaḥ svārtha'ṇ / ānantaryaḥ samādhiḥ sa uktaḥ sūtre / kathamānantaryaḥ? yathā 'buddhatvāpteranantaraḥ' / avyavahitau hetuḥ kathamuktaḥ? 'puṇyabahutvena' / tadapi kathamuktam? śubhaṃ puṇyaṃ tadevopamā / tāṃ kṛtvā / kathaṃ tacchubham? trisāhasrajanaṃ trisāhasralokadhātavīryā(yā)n sattvān 'pratiṣṭhāpya' / kva? 'śiṣyakhaḍgādhigamasampadi bodhisattvaniyāme ca / ' śiṣyāḥ śrāvakāḥ khaḍgāḥ pratyekabuddhāsteṣām / arthādgamyate bodhisattvasya ca prāṅniyāmāvakrānteradhigamasampattau bodhisattvaniyāme ca / kva punarevamuktaṃ puṇyabahutvam? mahatyorbhagavatyo / asyāṃ kathamuktam? aupalambhikabodhisattvoyāṃ (ttvasya) gaṃgānadīvālukopamakalpakṛtāddānamayātpuṇyādenaṃ samādhimantaśo 'cchaṭāsaṃghātamātramapi samāpadyamānasya bahutarapuṇyatvena / etatkārikāyāṃ kathamuktam? vināpi tena cārthagateścakārasyānuktasamuccayārthatvāt / 'sarvākārajñatā ca tat' iti / tacca buddhatvaṃ sarvākārajñatālakṣaṇam //

[164] ālambanamabhāvosyāḥ (sya) smṛtiścādhipatirmataḥ / ākāraḥ śāntatā cā [tra]

ānantaryasamādheḥ 'ālambanamabhāvaḥ' sarvadharmāṇāṃ smṛtiradhipatipratyayaḥ / 'ākāraḥ śāntatā' sarvadharmākārāstagamaḥ / 'atra' sarvākārajñatāyām-

vādināṃ jalpaiśca jalpaiśca prahṛtya yuddhaṃ vṛttaṃ 'jalpājalpi' / yathā daṇḍādaṇḍi / ataḥ sūtram / sarvopāyakauśalyāni parigrahītukāmenetyādi / (RSt_159) upeyata ityupāyaḥ sarvākārajñatā / tasmiṃ kauśalyāni vipratipattīnāmapohanāni / tāni labdhukāmena prajñāpāramitāyāmiti / ānantaryasamādhilakṣaṇāyām / caritavyaṃ prayogato nirhārataśca / nirhṛtya bhāvayitavyā / bhāvitāyāṃ tasyāmanantarameva sarvākārajñatālābhe sarvavipratipattīnāṃ kṣayāditi bhāvaḥ / abhinirharatīti yathālambanaṃ yathādhipati yathākāraṃ ca saṃmukhīkaroti / abhinirhartavyā iti svarasavāhinaḥ kartavyāḥ / atyayeneti / atyayo 'vadhiḥ / abhavyaścetyādinā tathāgatasamanvāhṛtasyānuśaṃsamāha nantvānantaryasamādhisamāpannasya / na hi tasya bhūyo durgatiḥ sugatirvā / anantarameva bodhiprāptaiḥ / śeṣaṃ sugamamāparivartasamāpteḥ /

vipratipattīradhikṛtya śāstram-

'ṣoḍhā daśa' ceti ṣaṭdaśa ca ṣoḍaśetyarthaḥ / kutaḥ ṣoḍaśa? yatastāḥ ṣoḍaśasvartheṣu ālambanopapattyādiṣu / kathaṃ tarhi 'sarvākārajñatādhārāḥ' ālambanādistāsāṃ viṣayaḥ? viṣayasambandhāttu sarvākārajñatāyāṃ viṣayatvopacāraḥ / tadyathā rājaputre 'parāddho rājanyaparāddho bhavati / vipratipattayopi prāyeṇa pratipakṣapāṭhādunnetavyāḥ /

tatrādyā vipratipattiḥ / yadi sarvākārajñatāyā abhāva ālambanaṃ sa tarhi katamaḥ? yadi dharmāṇāṃ parikalpitaḥ svabhāvastadevaṃ bhrāntiḥ syādvālavijñānavat / atha paratantraḥ sa kathamabhāvaḥ? atra parihāraḥ / yasya svabhāvo nāsti so 'bhāvaḥ / nāsti sāṃyogikaḥ svabhāvo dharmāṇāṃ svayamabhāvāt / api ca tathatā svabhāvo dharmāṇāṃ sā cābhāva ityālambanopapattau vipratipattiḥ //

yadyabhāvāḥ sarvadharmāḥ kenopāyakauśalyenādikarmiko dānādiṣu carati? deyadāyakadānādīnāmabhāvasvabhāvāvadhāraṇameva tasyopāyakauśalyamiti tatsvabhāvāvadhāraṇe vipratipattiḥ //

dṛṣṭasatyasya tarhi kimupāyakauśalyam? sa āryeṇa cakṣuṣā dharmān vyavalokayan bhāvamapi paratantraṃ svabhāvaṃ nopalabhate / saṃyogikena svabhāvena parikalpitena vā tasyāpyabhāvāt / kiṃ punarabhāvaṃ parikalpitaṃ svabhāvaṃ, tasyātyantamasattvāt / sa dānādau caran deyadāyakadānādīn pratyekamabhāva iti saṃjānīte / bhāvābhāvānupalambhe kathamabhāvaṃ saṃjānīte? saṃvṛtyā na tu paramārthena / iha dānādayaḥ sarve mārgaprakārāḥ sarvākārāḥ / teṣu jñātā(to) bhāvābhāvānupalambhaḥ / tato jñānaṃ koṭiṣvabhāvasaṃjñeti sarvākārajñatājñāne vipratipattiḥ //

yā saṃvṛtiḥ sa eva paramārthaḥ / eta ekaiva tayostathatā / api tu skandheṣu bhāvasaṃjñināṃ tatparihārārthamabhāva iti saṃvṛtyā nirdiśyate 'bhāvasaṃjñināṃ bhāva iti / paramārthato na bhāva upalabhyate nāpyabhāva iti satyadvaye vipratipattiḥ //

prayogaścaryā / kathaṃ caryā? śūnyāḥ sarvadharmā iti / sarvāsu ca śūnyatāsu dānādau ca sarva trakoṭitrayānupalambheneti prayoge vipratipattiḥ //

buddha iti karmaṇi niṣṭhā / tato jñātaḥ sarvo buddhaḥ syāt / atha buddhavāniti buddhaḥ kena kartari ktaḥ? sarvaśca cetano buddhaḥ syāt / atrottaram / bhūtārtha iti buddhaḥ / bhūtā nya(ya)sya dharmā abhisaṃbuddhā iti vā / bhūto asyārthaḥ pratividdha iti vā / abhisaṃbuddhā yathāvat sarvadharmā asyeti vā / caturṣvapi pakṣeṣu bahuvrīhau kṛte nairuktavidhiḥ kartavyaḥ / bhūtārtha ityartho jñeyaḥ / tatsambandhādvodhaḥ / samāsārthaḥ- bhūtamevārtho yasya bodhasya sa buddhaḥ / anyeṣāmavaśyaṃ kvacidbhrānteḥ / bhūtārthaḥ kathaṃ buddhaḥ? bhūtasya bubhdāvo arthasya sattvaṃ iti bhāvaḥ / bhūtā asya dharmā abhisambuddhā iti bhūtāḥ / bhūtairarthaiḥ puruṣasya sambandho jñānakṛta eva / iha tu prakarṣagaterabhisambodhaḥ kṛta iti pradarśanārthamabhisambuddhagrahaṇam / asyeti samāsārthaḥ / samāsastu dvayoreva padayoḥ / tatra bhutaśabdasya bubhdāvo dhramasya dvitīyākṣaralopaḥ / bhūto 'syārthaḥ pratividdha iti / pratividdhaḥ pratyakṣārthaḥ / tripado bahuvrīhiḥ / ddhaśabdātpūrvasya śabdasya curādeśaḥ / abhisambuddhā yathāvatsarvadharmā asyeti / matibuddhipūjārthebhyaśceti vartamāne ktaḥ / ktasya ca vartamāna iti (RSt_161) kartari ṣaṣṭhī / atrādyasya padasya buśabdaḥ / atha dvitīyasya takāraḥ / tṛtīyasya dhaśabda iti buddharatne vipratipattiḥ //

atha dharmaratnaṃ katamat? bodhiḥ / sarvadharmotkṛṣṭatvāt / tatra yadi dharmatā dharmātpṛthageva gaṇyate, 'dvayamidaṃ dharmadharmatāsaṃgrahāt' iti vacanāt, tadā tāthāgataṃ jñānaṃ bodhiḥ / iṇajādibhya iti budherbhāva iṇa / atha dharmatāpi dharmādharmaprakṛtitvāt / tadāsyaiva dharmaratnaṃ bhūtakoṭitvāt tattvaśikharatvādityarthaḥ / tadā ca karmaṇi budheriṇa / ubhayathāpi buddhistāthāgate jñāne pravartate prakarṣagateḥ / tatra dharmatāpakṣamadhikṛtyāha / "bodhiḥ śūnyatā tathatā bhūtakoṭirdharmatā dharmadhātuḥ" iti / tatra śūnyatā lakṣaṇataḥ / tathatā nirvikāratvāt / bhūtakoṭistattvaśikharatvāt / dharmatā dharmaprakṛtitvāt / dharmadhāturāryadharmāṇāṃ hetutvāt / punarāha / "nāmadheyamātrametat bodhiriti" iti / itiśabdo bhinnakramaḥ / nāmadheyamātrametaditi yo 'rthaḥ so 'rtho bodhirityarthaḥ / nāmadheyānāmarthaśūnyatā bodhiriti yāvat / punarāha / "abhedārtho bodhyarthaḥ" iti / sarvajñajñānatathatāmātraprakhyānāt / jñānapakṣamadhikṛtyāha / "bodhistathatāvitathatānanyatathatānanyathābhāvo bodheḥ" iti / tatra bodhestathateti bodhasya tathatā / tathaiva bodharūpeṇaiva bhāvo nālīkena rūpeṇa / avitathatetyabhrāntatā / ananyatathateti bodhādanyo 'līkastasya tathatā bodharūpatā / asatā tena rūpeṇa bodhasyaiva prakhyānāt / tadviraho 'nanyatathatā / ananyathībhāva iti / bodhasya prakṛtiḥ svenātmanā prakāśaḥ / tasyānyathībhāvo 'līkenātmanā prakāśaḥ / tadviraho 'nanyathībhāvaḥ / sarvavibhramaviveko jñānasya bodhirityarthaḥ / punarāha / "nāmanimittamātrametadvodhiriti" iti / itiśabdo bhinnakramaḥ / nāmanimittamātrametaditi yo bodhaḥ sā bodhirityarthaḥ / prayoga eṣa bodherbodhiṃ sūcayati / na tvayaṃ bodhiravikalpatvāttasyāḥ / tatra nāmetyarūpiṇaḥ skandhāḥ / teṣāmalīko 'rthasadṛśa ākāro nimittam / punarāha / "buddhānāṃ bodhastasmadvodhiḥ" iti / prakarṣagateriti bhāvaḥ / punarāha "buddhairabhisambuddhā tasmādvodhiḥ" iti / arthaḥ pradhānamasminvacane na śabdaḥ / buddhānāmadhigatastasmādvodhirityarthaḥ / ṣaṣṭhīsamāse kṛte pūrvapadasya bobhāvaḥ / uttarapadasya dhiśabdaḥ śeṣaḥ / umāśabdavanniyoga iti dharmaratne vipratipattiḥ //

saṃhatatvāt saṃghaḥ / abhedyo 'cchedya ityarthaḥ / kasmādabhedyaḥ / kena vā / samyaksambodherabhedyaḥ / sadevakena samārakena lokena hīnabodherāhārakairdharmairakuśalaiśceti saṃgharatne vipratipattiḥ //

'sopāye samaye muneḥ iti kārikāpāṭhe upāyakauśalamupāya uktaḥ / viṣayeṇa viṣayiṇo nirdeśāt / abhisamayaḥ samayaḥ ityuktaḥ / ayo bodhaḥ / sa(saṃ)śabdaḥ saṃmukhārthaḥ / mithyājñānamajñānameveti bhāvaḥ / muneriti bhāvapradhānam / buddhatvasyetyarthaḥ / upāyakauśalyaṃ bodherabhisamayaṃ ceti samudāyārthaḥ / "avirahitasarvajñatācitto dānādiṣu carati koṭītrayānupalambhena / na ca dānādīnāṃ vipākamātmani spṛhayati / kintu sarvasattvaparimocanāya samyaksambodhau pariṇāmayati" ityādikamupāyakauśalyaṃ vistareṇetyupāyakauśalye vipratipattiḥ //

astyabhisamayo niḥprapañcetyatra na bhāvo nābhāva ityabhisamaye vipratipattiḥ //

sūtre prapañcaśabdaḥ paṭhyate / śāstre viparyāsaśabdaḥ / ubhayorekārthatvāt / rūpaṃ nityamanityaṃ rūpaṃ sukhaṃ duḥkhaṃ rūpamātmānātmetyādayo viparyāsasyātibahavaḥ / saṃkṣepato yāvānvikalpaḥ sa sarvaḥ prapañcaḥ / aprapañcānna prapañcayatīti pratipakṣaḥ / aprapañco dharmadhāturnirvikalpatvāt / tanna prapañcayatīti na vikalpayatīti viparyāse vipratipattiḥ //

iha bodhisattvena durgatimārgā jñātavyāḥ sahetuphalaistebhyaśca sattvā nivārayitavyāḥ / evaṃ narakinannaragaruḍagandharvādimārgāḥ / evaṃ cāturmahārājikānāṃ trāyastriṃśānāṃ yāvannaivasaṃjñānāsaṃjñāyatanānām / evaṃ śrotaāpannamārgo yāvadarhanmārgaḥ pratyekabuddhamārgo bodhisattvamārgo buddhamārgaśca jñātavyaḥ sahetuḥ saphalaḥ / ye ca yasmin pale vyavasthāpanīyāstāṃsteṣu vyavasthāpayati yāvabudddhatve / svayaṃ tu hīnayānabhūmīḥ sarvā (rva?) jñānena cātikramya bodhisattvayānamavakrāmatīti mārge vipratipattiḥ //

iha sarva evāryapudgalāḥ kleśopakleśaiḥ kāmarūpārūpyadhātubhirbodhipakṣaiḥ pāramitādibhistatphalaiśca sarvāryadharmerna saṃyuktvā na visaṃyuktvā arūpiṇo 'nidarśanā ekalakṣaṇā yadutālakṣaṇāḥ / ya evaṃ na jānanti tān prati saṃvṛsyā nirdiśyate bodhipakṣā dharmā bodherāhārakā bodhyāvaraṇānāmapahārakā iti vipakṣapratipakṣayorvipratipattiḥ //

vistareṇa bhagavatā dharmāṇāṃ lakṣaṇaṃ deśitaṃ sattvānāmavatāraṇāya saṃvṛtyā paramārthatastena lakṣaṇe śikṣitavyaṃ nālakṣaṇe / yataḥ sthita evaiṣa nityaṃ lakṣaṇadhāturiti lakṣaṇe vipratipattiḥ //

yadyalakṣaṇāḥ pāramitādayo dharmāḥ kathamalakṣaṇānāṃ teṣāṃ bhāvanā bhavati? "nāsti subhūte 'bhāvasvabhāveṣu dharmeṣu bhāvasaṃjñinaḥ prajñāpāramitā bhāvanāviparyāsāt / api tu sarvāsāṃ dharmasaṃjñānāṃ bhāvanāvibhāvane prajñāpāramitā / evaṃ yāvannāsti bhāvasaṃjñino dānapāramitā bhāvanā / eṣohamasmai idaṃ dadāmītyevaṃ saṃjñinaḥ / " evaṃ bodhipakṣādiṣu vaktavyam / dṛṣṭasatyāstu dharmāṇāṃ kevalamabhāvasvabhāvatāṃ bhāvayanti na bhāvasaṃjñayā nānyabhāvasaṃjñayā / saṃjñā hi prapañcaḥ prajñāpāramitā tu niḥprapañceti bhāvanāyāṃ vipratipattiḥ /

avakīrṇakusumanāmāno bodhisattvā iha parivarte bodhau vyākṛtāḥ / atastairupalakṣitaḥ parivartastatparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāmaṣṭaviṃśatitamaḥ parivartaḥ //

29. anugamaparivarto nāmaikonatriṃśattamaḥ /

anupūrvābhisamaya idānīṃ vaktavyaḥ / tamadhikṛtya śāstram-

'anupūrvikriyā' anupūrvaśikṣā anupūrvapratipadyā pūrvamuddiṣṭā saṃprati nirdeṣṭavyā / sā 'matā' iṣṭā / kathamityāha / dānenetyādi / 'dānena' iti dānapāramitayā / 'prajñayā yāvad' iti prajñāpāramitayā / yāvadgrahaṇācchīlapāramitayā kṣāntipāramitayā vīryapāramitayā dhyānapāramitayā ca / 'buddhādau smṛtibhiśca' iti buddhādiviṣayābhiranusmṛtibhiḥ / cakāro bhinnakramaḥ / 'dharmābhāvasvabhāvena' ceti bhāvapradhāno nirdeśaḥ / dharmāṇāmabhāvasvabhāvatvena cetyarthaḥ / 'iti' evaṃ 'sā matā' /

ataḥ sūtraṃ punaraparamityādi / evamiti vakṣyamāṇena vākyatrayeṇa / prajñāpāramitetyunupūrvakriyā / anugantavyeti veditavyā / kathamityāha / sarvadharmāsaṅgataḥ prajñāpāramitānugantavyā / sarvadharmāsambhedataḥ prajñāpāramitānugantavyā / sarvadharmāsambhavataḥ prajñāpāramitānugantavyeti / tatrādau sarvadharmāḥ (RSt_164) ṣaṭpāramitāḥ / tāsāmeva bodhimārgatvāt / dharmaśabdasya ceha mārgavācitvāt / sarvadharmāṇāmasaṅgatā niḥsaṅgatā nirvighnatā / bodhisattvairanukramakaraṇīyeṣu prathamacittotpādādiṣu sattvaparimocanānteṣu tayā(thā?)sānugantavyā / tadyathā- "prathamacittotpādamupādāya dānapāramitāyāṃ carannātmanā ca dānaṃ dadāti parāṃśca dānapāramitāyāṃ pratiṣṭhāpayati dānasya ca varṇa bhāṣate / ye cānye dānapāramitāyāṃ caranti teṣāṃ ca varṇavādī bhavati samanujñaḥ / sa tena dānena mahāntaṃ bhogaskandha pratilabhya dānaṃ dadāti vigatamatsareṇa cittena annaṃ pānaṃ vastraṃ vilepanaṃ śayanamupāśrayamanyadvā pariṣkāropakaraṇaṃ dadāti tadarthinām / sa tena dānena sattvān śīle samādhau prajñāyāṃ vimuktau vimuktijñānadarśane ca pratiṣṭhāpayati / sa taireva śīlādiskandhaiḥ samanvāgataḥ śrāvakādibhūmimatikrāmati bodhisattvāniyāmamavakrāmati buddhakṣetraṃ pariśodhayati sattvān paripācayati sarvākārajñatāmanuprāpnoti dharmacakraṃ pravartayati / sattvāṃstriṣu yāneṣu pratiṣṭhāpya saṃsārātpratimocayati / evaṃ khalu dānenānupūrvakriyā / tāṃ ca sarvānnopalabhate / tathā hyasyāḥ svabhāvo nāsti / yasya ca svabhāvo nāsti so 'bhāva iti dānapāramitayānupūrvakriyā / evaṃ śīlādibhirapi" iti ṣaḍbhiḥ pāramitābhiḥ ṣaḍanupūrvakriyāḥ //

sarvadharmāsambhedataḥ prajñāpāramitānugantavyeti / sarvadharmāḥ ṣaḍanusmṛtayaḥ / tāḥ kathaṃ dharmāḥ? cittadhāraṇāt / api ca puṇyamapi loke dharma ucyate / tāśca bhāvanāmayaṃ puṇyam / sarvadharmāṇāmasaṃbhedato 'bhinnatā samatā / abhāvasvabhāvatvāt / tayānugantavyeti pūrvavat / tathāhi- "bodhisattvaḥ prathamacittotpādamupādāya sarvākārajñatāpratisaṃyuktairmanasikārairabhāvasvabhāvānsarvadharmānadhimucya ṣaḍanusmṛtīrbhāvayati / tāḥ svayaṃ ca bhāvayati parāṃśca tāsu pratiṣṭhāpayati tāsāṃ ca varṇa bhāṣate / ye cānye tāsu caranti teṣāṃ varṇavādi bhavati samanujñaḥ / sa tāstathā bhāvayannabhāvasvabhāvayogena saptatriṃśataṃ(taḥ) bodhipakṣān yāvatsarvākārajñatāṃ paripurayati / so 'bhāvasvabhāvenaiva sarvadharmānabhisaṃbudhya dharmacakraṃ pravartya yāvatsarvasattvān parimocayati / tatra buddhaṃ bhagavantaṃ na rūpādiskandhairna lakṣaṇānuvyañjanairna śīlādiskandhairna daśabalavaiśāradyapratisaṃvibhdirna mahākaruṇayā na mahāmaitryā nāṣṭādaśabhirāveṇikairnāpi pratītyasamutpādato mānasikaroti / tatkutaḥ? abhāvasvabhāvatvātteṣāmityanusmṛtiramanasikāro buddhānusmṛtiḥ /

sa prajñāpāramitāyāṃ caranna kuśalā[ku]śalān dharmān manasikaroti / teṣāmabhāvasvabhāvatvādityamanasikāro dharmānusmṛtiḥ /

yosau bhagavataḥ srāvakasaṃghaścatvāraḥ puruṣayugā aṣṭau mahāpuruṣapudgalāḥ svabhāvastasya nāsti / yasya dharmasya svabhāvo nāsti so 'bhāva ityamanasikāro saṃghānusmṛtiḥ /

tena prajñāpāramitāyāṃ caratākhaṇḍe 'cchidre 'kalmāṣe 'parāmṛṣṭe bhujiṣye vijñapraśaste samādhisaṃvartanīye śīle sthitvā tacchīlamabhāvasvabhāvato manasikartavyamityamanasikāro śīlānusmṛtiḥ /

sa prajñāpāramitāyāṃ carannāmiṣaṃ vā aṅgapratyaṅgāni vā tyajan sarvaṃ tadabhāvasvabhāvato manasikarotītyamanasikāro yo(tyā)gānusmṛtiḥ /

ye te devāḥ śrotaāpannāścāturmahārājakāyikeṣu yāvatparanirmitavaśavartiṣu deveṣūpapannāste sarve 'bhāvasvabhāvā ityanusmṛtiramanasikāro devatānusmṛtiḥ /"

iti ṣaḍbhiranusmṛtibhiḥ ṣaḍanupūrvakriyāḥ //

sarvadharmāsambhavataḥ prajñāpāramitānugantavyeti / svalakṣaṇadhāraṇāt dharmāḥ / skandhā dhātava āyatanāni bodhipakṣāḥ pāramitā yāvatsarvākārajñateti sarvadharmāḥ / teṣāmasaṃbhavata ityasaṃbhavajñānato 'nupūrvakriyā veditavyā / asaṃbhavo 'bhāvasvabhāvatā / tathā hi- "teṣāṃ nāsti svabhāvaḥ / yasya svabhāvo nāsti so 'svabhāvaḥ / sa prajñāpāramitāyāṃ caran prathamacittotpādamupādāya sarvadharmāṇāmabhāvasvabhāvatāmadhimucya catvāri smṛtyupasthānāni catvāri samyakprahāṇāni yāvatsarvākārajñatāṃ bhāvayati / so 'bhāvasvabhāvān sarvadharmānabhisaṃbudhya dharmacakraṃ pravartayati / tribhiśca yānaiḥ sattvān saṃsārātparimocayati" iti dharmāṇāmabhāvasvabhāvatayā trayodaśyānupūrvakriyāḥ //

ita ūrdhvaṃ codyāni svayamūhyāni parihārāstu vaktavyāḥ / yadyabhāvasvabhāvāḥ pāramitā bhāvyante tadā tabhdāvanā niṣphalā turagaviṣāṇabhāvanāvaditi codyam / parihāramāha / sarvadharmā nirvikārasamā itītyādi / nirvikāro dharmadhātustena samāḥ sarvadharmā nābhāvamātreṇa / dharmadhātuścālambyamāna āryadharmāṇāṃ heturbhavati / ata eva dharmadhāturitucyate / tatkuto vaiphalyam?

nanu pratyātmavedya ātmā vijñaptiśca / ataḥ sati grāhake grāhyamapyastīti na yuktaḥ sarvadharmāṇāmabhāva iti codyam / parihāramāha / sarvadharmāṇāmamanātmavijñaptitaḥ prajñānubodhanata ityādi / anātmavijñaptita ityātmavilakṣaṇatvādanātmākāreṇa grāhyagrāhakavaidhuryādavijñaptyākāreṇa ca / (RSt_166) prajñānubodhanata iti pramāṇena pratīteḥ / ātmā hi nityaikarūpo jñātā na ca skandhādaya ithambhūtāḥ / tasmādanātmatvena siddhāḥ / grāhyagrāhakavaidhuryācca / ata eva ca vijñaptyākāreṇāpi siddhāḥ / grāhakalakṣaṇatvāttasyāḥ / grāhakābhāvādgrāhyamapi nāstīti siddhaḥ sarvadharmāṇāmabhāvaḥ /

rūpādiśabdairyebhilapyante ta eva rūpādayaḥ / asti ca loke taisteṣāmabhilāpaḥ / śrotṝṇāṃ vyavahāraḥ saṃvādaśca / tatkuto 'bhāvaḥ sarvadharmāṇāmiti codyam / parihāramāha / nāmamātreṇetyādinā / arthaśūnyaṃ nāma nāmamātram / tena te sarvadharmā abhilapyante / na hi buddhyākāra eṣāmartho bāhyatvena prati [ya]te, bāhye ca pravṛtteḥ / nāpi bāhya evārthaḥ, asatyapi bāhye śabdādarthagateḥ / buddhireva bāhyarūpeṇa śabdārtha iti cet / na caitasyā artho rūpaṃ, atyantabhedāt / abhede vā na visaṃvādaḥ syāt / buddhimantaścārthavantā bhaveyuḥ / tasmādarthābhāvānnāmamātreṇa vyavahāramātreṇābhilapyante / vyavahārastāvadastīti cedāha / vyavahāraścetyādi / na kvacidityarthābhāvat / na kutaściditi vācakābhāvāt / nāpi kaściditi na vāciko na ca kāyiko nāpi mānasaḥ / vācyavācakayorabhāvāt / sarvadharmā ityādinopasaṃhāraḥ / avyavahārā avyāhārā iti teṣu tayorabhāvāt / ata eva cāvyāhṛtāḥ /

nanu rūpādīnāṃ pramāṇavattvāt tacchūnyatā api pramāṇavatya iti tadālambanā prajñāpāramitā pramāṇavatī syāt / na ceṣyata iti codyam / parihāramāha / sarvadharmāṇāṃ apramāṇata iti / apramāṇatvāt / tathā hi sarvadharmāṇāṃ nāsti pramāṇamabhāvalakṣaṇatvāt / ākāśasyeva rūpābhāvalakṣaṇasya, tatastacchūnyatānāmapi nāsti pramāṇamavacchedakābhāvāt / tataḥ prajñāpāramitāyā apyālambanābhedāt /

yadi tarhi rūpādayo na santi kaitya(kimiti) nīlādayaḥ prakhyānti / dharmanimittānyetāni na dharmavastūni / ekānekasvabhāvavirahāt, aprakāśātmanaḥ prakāśāyogācca / dharmanimittāni tu dharmabhrāntīnāmākārāḥ / tā hi prakāśarūpatvāt prakāśamānāstairasabhdirapi rūpaiḥ prakhyānti / asatkhyātilakṣaṇatvāda bhrāntīnām / yadyeva, na siddhayati prajñāpāramitā / sā khalvabhrāntā sākārā tu buddhirbhrāntaiva / na ca nirākārā buddhiḥ svapnepyanubhūyata iti codyam / parihāramāha / sarvadharmānimittata ityādinā / sarvadharmeṣvānimittaṃ nimittāstamayājjñānasya nirābhāsatā nirākāratā / tataḥ prajñāpāramitā veditavyā / ākāraparivarjanādārūpyasamāpattivaditi bhāvaḥ /

nanvayaṃ vikalpanimittānāṃ parivarjanāddharmadhātoḥ samyaṅmanasikāro na punaḥ prajñāpāramiteti codyam / parihāramāha sarvadharmanirvedhata ityādi / (RSt_167) nirvedhaśabdenātra prativedha uktaḥ / sarvadharmāṇāṃ pariniṣpannena rūpeṇa prativedho jñānasākṣātkriyā sa teṣāṃ nirvedhaḥ / tata iti tena lakṣaṇena prajñāpāramitā ityarthaḥ / pūrvatra hetau tṛtīyā / tadantāttam / tathā hi tasyaiva samyaṅmanasikārasya śrutacintābhāvanānvayādanābhogato 'nabhisaṃskārataḥ sarvadharmatathatāyā niṣprapañcajñānamutpadyate / sa tasyāḥ prativedhaḥ / atha ko 'rthaḥ prajñāpāramitā(ta)yā śuddhiḥ? naitadyuktam / tathā hi / kastayā śuddhyati? nātmā tasyāniṣṭeḥ, na cittaṃ pratikṣaṇabhedāt / atha cittasantānaḥ / sopyaśuddhaḥ śuddho vā prakṛtyā bhavet / pūrvasmin pakṣe na tasya śuddhiraṅgārasyeva ghṛṣyamāna(ṇa)sya / dvitīyapakṣe vaiyarthyam / atha cittadharmatā tayā śuddhyati / tadapyayuktaṃ nirvikāratvāttasyā iti codyam / parihāramāha / sarvadharmaprakṛtipariśuddhita ityādi / sarvadharmāṇāṃ prakṛtistasyāḥ pariśuddhistatastena prayojanena prajñāpāramitānugantavyā / anuṣṭhātavyetyarthaḥ //

nanūktaṃ tadapyayuktaṃ nirvikāratvāttasyā iti / uktametatkintu na yuktam / hetoranaikāntikatvāt / sā hi prakṛtyaiva pariśuddhā atanmayatvāt, āgantukenāvaraṇamalairmalinīkriyate nabha ivātra tamastuhinādibhiḥ / paścātprajñāpāramitayaiva teṣāṃ nirāsāddhiśuddhayati pavanādibhirabhrādimocanādiva nabhaḥ /

nanu prajñāpāramitāpi bhagavataiva deśitā / deśanā ca sanimittameva jñānamutpādayati / tataḥ prajñāpāramitāpi nirmimittā na yukteti codyam / parihāramāha / sarvadharmāvacanata ityādinā / sarvadharmāṇāmavacanāt / vācāsvarūpamaprakāśya kevalaṃ sūcanāt / paramārthadarśanāya prajñāpāramitānugantavyā /

nanu keyaṃ viśuddhiḥ? klaiśapakṣa (kṣaya) iti cet / punarbhavaḥ syādeva / atha hetukṣayājjanmāpi kṣīyate tadā pariśiṣṭā saṃskārā yāvadāyuravasthāya svayameva nirudhyante / iti śrāvakabodhireva syānnānuttarā samyaksambodhiḥ / satyāṃ vā viśeṣo vaktavya iti codyam / parihāramāha tribhirvākyaiḥ / sarvadharmāṇāmanirodhata iti / anāśravāṇāṃ dharmāṇāmakṣayāt prajñāpāramitānugantavyā / kathamanirodhaḥ? prahāṇasamatayā / nirdeśatvena prahāṇādaviśeṣāt / sarvadharmāṇāmiti sāṃkleśikānāṃ sarvadharmāṇāṃ nirvāṇaprāptitaḥ prajñāpāramitānugantavyā / yathā teṣāṃ tathatā tathaiva ta iti jñānaṃ tathatāsamatā / tayā kathaṃ tathatāsamatetyāha / sarvadharmā ityādi / nāgacchantyanāgatādadhvanaḥ, na gacchantyatītamadhvānaṃ, yata āgantavyaṃ yatra ca gantavyaṃ tayorasattvāt / yataśca ajānānāḥ svasaṃvinmātre 'dhvanāmajñānāt / jñānapūrvakatvācca gatyāgamanayoḥ / tasmāt ajātā atyantājātita iti //

iyatā bodhisattvānāṃ svārthasampat prasādhitā / astu nāmaiṣāṃ svārthasampatsvārthasya loke prakṛtyaiva priyatvāttadartha duṣkarasyāpi vyavasāyāt / (RSt_168) parārthastu duṣkaratvānāmānantyāt paratvādvipratipattiḥ bahulatvāditi codyam / parihāramāha ātmetyādinā / ātmā para iti yo ca bheda [:] tasyādarśanātsarvasattvānāmātmasamatādarśanādityarthaḥ / tathā coktamāryavimalakīrtinirdeśe "sumerusamāṃ satkāyadṛṣṭimutpādya bodhicittamutpādyate / tataḥ sarvadharmā virohanti" iti /

ita ūrdhvaṃ duṣkarasaṃjñāpratipakṣeṇa yathā yathā pravekṣaṇīyaṃ tadāha samudraśabdādarvāk / tatrādau sattvānāmarhattvadiṣu duṣkara saṃjñānirāsārthamāha / sarvadharmāḥ sattvavyahāraviṣayāḥ / āryārhantaḥ yataḥ prakṛtipariśuddha / dharmatāmātratvāt / bhārānāropaṇatayeti niḥsvabhāvatvāt bhāvasya / sattvavinayāya daśadigbuddhakṣetragamanena duṣkarasaṃjñānirāsāyāha / sarvadharmāṇāṃ adeśāpradeśata iti / adeśatvācca prakṛtisvabhāvata iti / rūpādīnāṃ pratistasyāḥ svabhāvataḥ / na hi tasyādeśo 'patanadharmatvāt / nāpi pradeśo niraṃśatvādākāśavat / saṃsārasukhe dustyajasaṃjñānirāsāyāha / sarvadharmāṇāṃ sāṃsārikāṇāṃ nirodhe prahalādanatvaṃ sukhasaṃjñotpādanatvaṃ tataḥ prajñāpāramitānugantavyā /

itiśabdaḥ śrāvakavinayanasamāptyarthaḥ / bodhisattvavinayanamadhikṛtyāha / aratyaviratita iti / ratiratyantamutkaṇṭhā nirvāṇe / tadabhāvo bodhisattvānāṃ aratiḥ / viratiratyantamudvegaḥ saṃsāre / tadabhāvo bodhisattvānāmarati / tābhyāṃ prajñāpāramitā / iti saṃsāranirvāṇāpratiṣṭhānāya pratyavekṣā / araktāviraktatayetyādinā vairāgyāya pratyavekṣā / sarvadharmā aśa(sa)ktā ityanabhiniviṣṭāḥ / saṅgāsaṅgā saṅgatatpratipakṣau / tadvigatāstayoranupalambhāditi vikalpaprahāṇāya pratyavekṣā / sarvadharmāḥ sarvamārgāḥ saptābhisamayāḥ / ta eva bodhiḥ / bodhiprāpakatvāt / ata evāha / bodhiḥ / buddhajñānāvabodhanatayeti / avabodhana prāpaṇa iti bodhiḥ / sulabhāvabodhanāya pratyavekṣā / sarvadharmāsvalakṣaṇadhāraṇāt / te śūnyānimittāpraṇihitā vijñānamātratvenārthavirahāt sarvanimittāstamayāt / bhrāntiśarīre traidhātukapraṇidhānābhāvācca yathākramam / iti mārgasaṃkṣepaḥ /

yadi vimokṣamukhānyapi teṣāṃ mārgastadā tāni bhāvayanto hīnabodhau pateyuḥ / ityata āha / sarvatyādi / sarvadharmāḥ sarvabodhisattvamārgāḥ / bhaiṣajyamiti hīnayānaspṛhāmahāvyādhiharāḥ / kuta ityāha / maitrīpūrvaṅgamatayeti / yato maitrī teṣāṃ puraḥsarī / api ca / sarvacaturbhirapramāṇaiḥ saha viharaṇāt matrīvihāriṇaḥ / brahmabhūtā iti brahmaṇā tulyāḥ / tadvadeva doṣānutpādanādityuddeśaḥ / sarvadoṣānutpādanata iti nirdeśaḥ / sarvadoṣā maitryādīnāṃ vipakṣo yathākramaṃ vyāpādo vihiṃsā aratiḥ pratighānunayau ca / apraṇihitata iti nirvānotkaṇṭhāvirahāt / apratihatita iti saṃsāre atyantānudvegāt / iti trayodaśavidho 'pūrvābhisamayaḥ sānuṣaṅgaḥ //

ekakṣaṇābhisamayo vaktavyāḥ /

iti yaḥ pūrvamuddiṣṭaḥ sa kathaṃ caturvidhaḥ? sarvānāśravadharmaikacittakṣaṇābhisamayaḥ / vipākajasarvasāśravānāśravadharmaikacittakṣaṇābhisamayaḥ / alakṣaṇasarvadharmaikacittakṣaṇābhisamayaḥ / advayasarvadharmaikacittakṣaṇābhisamayaśceti //

tatra prathamamadhikṛtya śāstram-

prajñāpāramitāyāṃ carato bodhisattvasya 'ekaikenāpi dānādinā' cittakṣaṇena pravṛttena 'sarveṣāṃ' anāśravāṇāṃ dharmāṇāṃ 'saṅgrahāt' ākṣepāt 'ekṣaṇāvabodhaḥ' ekacittakṣaṇābhisamayaḥ / 'ayaṃ' iti prathamaḥ / tathā hi 'yathaikāpi pari(da)kā' 'puruṣapreritā sarvamaraghaṭaṃ(ṭṭaṃ) sakṛccalayati' tathaikapadamapi dānādicittaṃ prayuktaṃ sarvamanāśravadharmasandohaṃ sakṛdevākarṣayatītyarthaḥ / ataḥ sūtraṃ samudrāparyantatayā prajñāpāramitāparyantatānugantavyeti / atra prajñāpāramitā parigṛhītatvāt, sarvākārajñatā manasikārāvirahitatvācca / gambhīrodāra ekaiko dānādicittakṣaṇaḥ (RSt_170) prajñāpāramitetyucyate / tasyāparyantatā anāśravadharmākarṣakatvam / teṣāmanyonyasambandhasya cirapariśīlitatvāt sānugantavyā veditavyā / kathamityāha / samudrāparyantatayeti / gambhīrodārasya samudrasyāparyantatā sakṛdaparyantanimnagājalākarṣakatvam / tāsāṃ parasparasaṃsargāt / tayā samudrāparyantatayā upamayā / tadvadityarthaḥ / iti sarvānāśravadharmaikacittakṣaṇābhisamayaḥ //

dvitīyamadhikṛtya śāstram-

vipākajo dharmo vipākadharmastabhdāvastattāsāṃ 'avasthā' asyā iti yathoktā prajñāpāramitā / 'sarvaśuklamayī' iti sarve kuśalā dharmāḥ sāśravā anāśravāḥ / ye purvamanena niḥsvabhāvatayā bhāvitāste paścādvipākajāḥ / ataḥ prakṛtyaiva teṣāṃ naiḥsvābhāvyasaṃvedinī / tasmātsarvaśuklamayī / īdṛśī sā yadā 'jātā' sampannā 'tadā' 'jñānaṃ' cittaṃ 'ekakṣaṇe ' teṣu sarveṣvanābhogena / anāśraveṣu sarveṣu sābhogaḥ prathamaḥ / ayaṃ tu dvitīyaḥ sāśravānāśravanirābhogaśca / ataḥ sūtram / gaganāparyantatayā prajñāpāramitāparyantatānugantavyeti / prajñāpāramitāyāḥ vipākadharmatāvasthā sarvaśuklamayī ca / ata evāparyantatā / teṣu sarveṣu bhāvābhāvaikarasā / nirābhogaśca vipākajatvāt / tasyā aparyantatā veditavyā / kathamityāha / gaganāparyantatayā dṛṣṭānteneti / gaganamākāśam / tacca rūpidravyābhāvaikarasamaparyantaṃ nirābhogaṃ ca parispandābhāvāt / ata ubhayorapi aparyantatā sadṛśīti vipākajasarvaśukladharmaikacittakṣaṇābhisamayo dvitīyaḥ //

tṛtīyamadhikṛtya śāstram-

'svapnopameṣu dhāvadgandharvanagaropameṣu" iti mahatyorbhagavatyoḥ paṭhyate / śāstre tvekameva padaṃ sarveṣāmekārthatvāt / sa punarartho vicitrairapi lakṣaṇaiḥ pratibhāsamānānāmeṣāṃ yathālakṣaṇamasattvādalakṣaṇatā / tato māyopamatvādalakṣaṇeṣu sarvadharmeṣu 'sthitvā' ṣaṭpāramitāḥ paripūrayan 'sarvadharmāṇāmalakṣaṇatvamekakakṣaṇenaiva 'vindati' jānāti / dhātūnāmekārthatvena vindaterjñānavṛtteḥ / etadāha / meruvicitrayā prajñāpāramitāvicitratānugantavyeti / māyopameṣu (RSt_171) sarvadharmeṣvalakṣaṇatvena yadekarasaṃ jñānaṃ seha prajñāpāramitā / atastasyā ekarasatvepi māyopamaiḥ sarvadharmapratibhāsairyā vicitratā sā meruvicitratayā dṛṣṭāntena veditavyā / yathā hyākāśasya nīrūpatvādasatī meruṇā vicitratāvabhāti / merupārśvānāṃ caturvarṇānāṃ dikṣu tatsarvavarṇatayā prakhyānāt / tathā tasyā ityalakṣaṇasarvadharmaikacittakṣaṇābhisamayastṛtīyaḥ //

caturthamadhikṛtya śāstram-

'snanaṃ taddarśinaṃ caiva' iti kudyoge kathaṃ dvitīyā? kartavyo 'tra yatnaḥ / athavā / anīkṣiteti tṛn paṭhitavyaḥ / tṛtīye sarvadharmāṇāṃ svapnamāyopamairākārairvicitraḥ pratibhāsaḥ / caturthe tu teṣāmastamayāccharanmadhyānhagaganasamo vigatasamastaviplavaḥ / tatra svapnadṛśyaṃ narakacittaraṅgādisvapnaḥ / taddarśī ātmaiva tayorastamayāt / yastau vikṛte(tau) 'yogena' [a]bhedena so 'dvayaṃ' grāhyagrāhakaśūnyaṃ 'dharmāṇāṃ tattva' paramārthaṃ 'ekakṣaṇenaiva paśyati' / enamāha / rūpāparyantatayetyādinā / iha caturtha ekakṣaṇābhisamayaḥ / prajñāpāramitā tasyā aparyantatā / sarvadharmaparamārthasya kevalasya kevalavimalanabhonibhasya tena saṃvedanāt / sā veditavyā / kathamityāha / rūpādīnāmaparyantayeti / kathaṃ teṣāmaparyantatā? dvayapratibhāsāstamayāt / yāvatkhalu dvayaṃ tāvatparyantaḥ parimitatvāt /

nanu rūpatadgrāhakayorastamayenāpi paryantatā? ka āha rūpasyaiveti? kintarhi? rūpasya yāvadvijñānasya / nanu tathāpi grāhakasyāstamayo nokta iti cet / na tasyāpi skandhaireva saṃgrahāt / aprakāśātmano grāhakatvāyogāditi sarvadharmādvayatattvaikacittakṣaṇābhisamayaścaturthaḥ //

ekakṣaṇābhisamayaḥ saptamo 'bhisamayaḥ //

aṣṭamo 'bhisamayo dharmakāyaḥ / tasya catvāri vastūni / trayaḥ kāyāḥ kāritraṃ ca / tathāhi pūrvamuddeśaḥ kṛtaḥ-

iti // dharmo mārgaḥ / sa ceha prakarṣagateḥ prakaraṇācca saptābhisamayalakṣaṇo gṛhyate / dharmalabhyaḥ kāyo 'dharmakāyaḥ' / kāyaḥ śarīram / trīṇi śarīrāṇi buddhānāṃ trayaḥ kāyāḥ / uktaṃ hi mahatyorbhagavatyoḥ- "sarvākārapariśuddhānāmanāśravāṇāṃ sarvadharmāṇāṃ yā prakṛtiḥ sa tathāgato 'rhansamyaksambuddho veditavyaḥ // punaraparaṃ teṣāmeva dharmāṇāmadhigamādanuttarāṃ samyaksambodhimabhisambudhya dvātriṃśatā lakṣaṇairaśītyānuvyañjanairalaṅkṛtakāyastathāgato 'rhansamyaksambuddho bodhisattvānāṃ paramaṃ mahāyānadharmamanuttararatiprītiprāmodyasukhopabhogāya deśayati // punaraparaṃ teṣāmeva sarvadharmāṇāmadhigamādanuttarāṃ samyaksambodhimabhisambudhya tathāgato 'rhansamyaksambuddho daśasu dikṣvanantāparyanteṣu lokadhātuṣu sarvakālaṃ nānānirmāṇameghena sarvasattvānāmarthaṃ karoti" iti // uktaṃ ca sūtrālaṃkāre-

iti /

tasmāt tribhireva kāyaiḥ kāritreṇa ca paricchedena caturdhā dharmakāya uktaḥ /

tatra svabhāvaḥ prakṛtiḥ / svabhāva eva 'svābhāvikaḥ' / vinayādibhyaṣṭhagiti svārthe ṭhak / athavā tasminneva svabhāve bhavo viśuddhaḥ paraḥ prakarṣaḥ svābhāvikaḥ kāyaḥ / sambhogāya prabhavatīti 'sāmbhogikaḥ' / nirmāṇa nirmitiḥ / tena nirvṛttaḥ kāyo 'nairmāṇikaḥ' /

tatra svābhāvikamadhikṛtya śāstram-

teṣāṃ prakṛtidharmatā dharmadhātuḥ / nanu na dharmadhātustathāgato 'tiprasaṅgāt / kiṃ tarhi? dharmadhātuviśuddhiḥ / tathā coktamārya buddhabhūmisūtre- "pañcabhirākāraiḥ susamuditabuddhabhūmeḥ saṅgraho veditavyaḥ / katamaiḥ pañcabhiḥ? dharmadhātuviśuddhayā ādarśajñānena samatājñānena pratyavekṣaṇājñānena kṛtyānuṣṭhānajñānena ca" iti /

dharmadhātuviśuddhiḥ suviśuddho dharmadhātuḥ / suviśuddhānāṃ dharmāṇāṃ dharmateti nārthabhedaḥ kaścit / ataḥ sūtram / sūryaraśmimaṇḍalāparyantāvabhāsanatayā prajñāpāramitāparyantāvabhāsanatānugantavyeti / sarva eva trāsādidoṣarahitāḥ sphāṭikāḥ śuddhāḥ / tatra candrasūryābhyāmanye śrāvakapratyekabuddhānāṃ vimuktikāyasyopamāḥ / sūryācandramasāvapi śuddhasphāṭikau / tayoretadadhikaṃ yattau daśadigvyāpiraśmijālaṃ janayataḥ / tatastāvanantajñeyaviṣayamanantaṃ jñānamutpādayato buddhānāṃ vimuktikāyasyopamāne / ata evāsau dharmakāya ityabhidhīyate / anantadharmāśrayatvāt / tadiha dharmadhātuviśuddhijamanantaṃ jñānaṃ prajñāpāramitā / tasyā aparyantajñeyāvabhāsanatā veditavyā sūryaraśmimaṇḍalāparyantāvabhāsanatayā dṛṣṭāntena / tathā hi buddhadharmāṇāṃ suviśuddho dharmadhātuḥ sūryavat / tajjā prajñā prajñapāramitā sūryaraśmiṇḍalavat / tayā yadaparyantāvabhāsanaṃ tadraviraśmimaṇḍalenāparyantāvabhāsanavat / tadanena buddhānāṃ suviśuddho dharmadhātuḥ svābhāvikaḥ kāyastasya ca sarvatra jñeye jñānavaśitā darśitā /

tasyaiva sattvārthavaśitāṃ vyāpinityatvaṃ cādhikṛtya śāstram-

'saḥ' iti svābhāvikaḥ kāyaḥ / 'prathate ' nirmāṇaprathanāt / tadā tadeti gamyate 'yadā yadā' iti vacanāt / tasya hitasya karaṇāyetyarthādgamyate / tasmāttadā tadaivetyata āha / 'varṣatyapi' ityādi / 'iti' ityādi / 'kāritravaipulyaṃ' sarvabhavyeṣu kāritram / tasyaiva' iti kāritrasya / iti svābhāvikaḥ kāyaḥ //

sāmbhogikasya kāyasya bahuvaktavyam / tatra sambhogamadhikṛtyāha / sarvaśabdāparyantatayā prajñāpāramitāpayantatānugantavyeti / śāsturdeśayataḥ śrṛṇvatāṃ ca bodhisattvānāṃ yaḥ paramamahāyānadharmasaṃbodhaḥ sā prajñāpāramitā / sa eva sambhogaḥ sambhogakāraṇatvāt / yaḥ punastajjānāṃ mṛdumadhyādhimātrasaumanasyalakṣaṇānāṃ ratiprītiprāmodyānāṃ sukhasya cānubhavaḥ sa mukhyaḥ sambhogaḥ / tasyāḥ prajñāpāramitāyā aparyantatā veditavyā / kathamityāha / sarvaśabdāpayantatayeti / (RSt_174) hetau tṛtīyā / yatastayoḥ sambodhayoryathākramamaparyantā deśanāḥ śabdajanyā janakāśca te kathaṃ sarve? nānā vineyānurūpaiḥ sarvairākāraiḥ prathanāt / kathamaparyantāḥ? anidhanena tena kāyena deśanāyā niravadhikatvāt / tāthāgatasyāpi sambodhasyāparyantatā / kuta ityāha / savabuddhadharmasamudāgamāparyantatayā prajñāpāramitāparyantatā / yathoktaḥ śāstureva mahāyānadharmasambodha iha prajñāpāramitā / tasyā aparyantatā / tatkāraṇasya sarvabuddhadharmāṇāṃ samudāgamasyāparyantatayetyarthaḥ / te punardharmā mahatyobhagavatyoḥ paṭhyante / saptatriṃśabdodhipakṣyā dharmāḥ / aṣṭau vimokṣāḥ / navānupūrvavihārasamāpattayaḥ / daśa kṛtsnāyatanāni / aṣṭavabhibhvāyatanāni / araṇā samādhiḥ / praṇidhijñānam / catasraḥ pratisamvidaḥ / sarvākārāścatasraḥ pariśuddhayaḥ / daśa vaśitāḥ / daśa balāni / catvāri vaiśāradyāni / trīṇyarakṣyāṇi / trīṇi smṛtyupasthānāni / asaṃmoṣadharmatā / vāsanāsamudghātaḥ / mahākaruṇā / aṣṭādaśāveṇikāḥ buddhadharmāḥ / sarvākārajñatā ceti // ataḥ śāstram-

bodhipakṣyāścāpramāṇānīti dvandvaḥ / 'anupūrvaśa' iti / anupūrva pareṇa saṃbadhyate / 'arakṣaṇa' ityakaraṇīyarakṣaṇam / arakṣyamityarthaḥ / tat trividham / 'dharmakāya' iti / anāśravo buddhānāṃ dharmarāśiḥ / yathāvasaramasmābhirbahavo vyākhyātāḥ / śeṣāniha vyācakṣīmahi / 'aṣṭau vimokṣā' iti / rūpī rūpāṇi paśyati suvarṇadurvarṇāni nīlapītalohitāvadātānīti prathamo vimokṣaḥ / adhyātmamarūpasaṃjñī rūpāṇi paśyati pūrvavaditi (RSt_175) dvitīyaḥ / śubhaṃ vimokṣaṃ kāyena sākṣātkṛtvopasampadya viharatīti tṛtīyaḥ / ākāśānantyāyatanādivimokṣāścatvāraḥ / saṃjñāveditanirodho 'ṣṭamaḥ /

āvaraṇādvimucyanta ebhiriti vimokṣāḥ / tatra trayo nirmāṇāvaraṇavimokṣāḥ / śeṣāḥ śāntavihārasamāpattyāvaraṇavimokṣāḥ / trayo rūpiṇaḥ / pañcārūpiṇaḥ / paramapraśānto 'ṣṭamaḥ / rūpīti ātmani rūpasaṃjñī / paśyatīti adhimokṣanirmitāni manasā paśyati / adhyātmamarūpasaṃjñī / ātmani nāmasaṃjñī / śubho vimokṣaḥ / śubhāśubhāni rūpāṇi nirmāya teṣvekatarasaṃjñālābhāt / yathākramamābhogaprātikūlyaprahāṇāya / saṃjñāveditānirodho 'sthāvarāṇāṃ cittacaitasikānāṃ kliṣṭamanaḥsaṃgṛhītānāṃ ca nirodhaḥ prāg vyutthānāt //

aṣṭāvabhibhvāyatanāni / ālambanābhibhavanādabhibhūtāni āyatanāni cittasthitayo 'bhibhvāyatanānyaṣṭau / tatra prathamādvimokṣāt dve abhinirhriyete / dvitāyādapi dve / tṛtīyāccatvāri / adhyātmaṃ rūpasaṃjñī bahirdhā rūpāṇi paśyati parīttāni suvarṇadurvarṇāni hīnapraṇītāni / tāni khalu rūpāṇyabhibhūya jānāti, abhibhūya paśyati, tathā saṃjñī ca bhavatīti prathamam / adhyātmaṃ rūpasaṃjñī bahirdhā rūpāṇi paśyatyadhimātrāṇi suvarṇadurvarṇāni yāvattathāsaṃjñī ca bhavatīti dvitīyam / adhyātmamarūpasaṃjñī ca bahirdhā rūpāṇi paśyati parīttānītyādi tṛtīyam / adhyātmamarūpasaṃjñī bahirdhā rūpāṇi paśyatyadhimātrāṇītyādi caturtham / tṛtīyādvimokṣāccatvāryabhinirhriyante / adhyātmamarūpasaṃjñī bahirdhā rūpāṇī paśyati nīlāni nīlavarṇāni nīlanidarśanāni nīlanirbhāsāni / tadyathā umakāpuṣpaṃ sampannaṃ vārāṇaseyakaṃ vastraṃ nīlaṃ nīlavarṇaṃ nīlanidarśanaṃ nilanirbhāsam / tāni ca rūpāṇyabhibhūya jānāti, abhibhūya paśyati, tathāsaṃjñī ca bhavatīti pañcamam / evaṃ pītānītyādi / tadyathā karṇikārapuṣpamityadikaṃ ṣaṣṭham / evaṃ lohitānityādi / tadyathā bandhujīvapuṣpamityādi saptamam / evamavadātānītyādi / tadyathā uṣasi tārakārūpamityādi cāṣṭamam //

tatra parīttāni sattvasakhyātāni svalpapramāṇatvāt / suvarṇadurvarṇāni śubhāśubhatvāt / hīnapraṇītāni bhaumadivyatvāt / tāni vimokṣairadhimucyābhibhvāyatanairabhibhavati / punaḥ punarantarddhāpya darśanāt / abhibhūya jānāti śamathena paśyati vipaśyanayā tathāsaṃjñī bhavati nirabhimānatvāt / adhimātrāṇīti / asattvasaṃkhyātāni gṛhavimānaparvatādīni mahāpramāṇatvāt / nīlānīti uddeśaḥ / śeṣairnirdeśaḥ / nīlavarṇānīti svābhāvikena varṇena / nīlanidarśanānīti sāṃyogikena varṇena / nīlanirbhāsānīti / ubhayathāpi bhāsvaratvāt / umakātaśī(sī?) / karṇikāraḥ prasiddhaḥ / bandhujīvo bandhūkaḥ / uṣā rātrerantaḥ //

'kṛtsnaṃ' daśavidhātmakaṃ' iti / abhibhvāyatanairabhibhūya pṛthivyādīnāṃ kṛtsnaṃ samantādibhiḥ sapharaṇātkṛtsnānyucyante / kadācittānyevāyatanānīti kṛtsnāyatanānyucyante / kadācittu pṛthivyādibhirviśiṣya nirdiśyante / pṛthivīkṛtsnaṃ apkṛtsnaṃ tejaḥkṛtsnaṃ vāyuḥkṛtsnaṃ nīlakṛtsnaṃ pītakṛtsnaṃ lohitakṛtsnaṃ avadātakṛtsnaṃ ākāśānantyāyatanakṛtsnaṃ vijñānānantyāyatanakṛtsnaṃ ceti //

'sarvākārāścatasraḥ pariśuddhaya' iti / āśrayapariśuddhirālambanapariśuddhiścittapariśuddhirjñānapariśuddhiśca /

tatra savāsanānāṃ sarvakleśapakṣāṇāṃ daurbalyānāmāśrayādatyantoparamaḥ svasyacātmabhāvasya yathecchamādānasthānacyavaneṣu vaśavartitā sarvākārā āśrayapariśuddhiḥ / sarvālambanānāṃ nirmāṇapariṇāmasaṃprakhyāneṣu vaśavartitā sarvākārā ālambanapariśuddhiḥ / pūrvavatsarvacittadauṣṭhulyāpagamaścitte ca sarvākārakuśalamūlopacayaḥ sarvākārāṃ cittapariśuddhiḥ / pūrvavatsarvāvidyāpakṣadauṣṭhulyāpagamaḥ sarvajñeyajñāne ca vaśavartitā sarvākārā jñānapariśuddhiḥ //

'vaśitā daśa' iti / daśa vaśitāḥ / ayurvaśitā yathecchamāyuṣasthāpanāt tyajanācca / cittavaśitā yathecchadhyānādisamāpatteḥ / pariṣkāravaśitā yathecchamupakaraṇapratyupasthānāt / karmavaśitā yathecchaṃ kāyavākkarmasiddheḥ / upapattivaśitā sarvopapattyāyataneṣu yathecchamupapatteḥ / ṛddhivaśitā yathecchamabhijñāḥ / praṇidhānavaśitā sarvapraṇidhānasamṛddheḥ / adhimuktivaśitā yadyathādhimucyate tattathaiva bhavati / jñānavaśitā yadeva jñātumicchati tadeva jānāti / dharmavaśitā sūtrādidharmavyavasthāneṣu kauśalam //

'trīṇyarakṣyāṇi' iti / pariśuddhakāyasamudācārastathāgato nāsti tasyāpariśuddhakāyasamudācāratā yāṃ tathāgataḥ praticchādayitavyāṃ manyeta kaccitpare na jānīyurityetatprathamamarakṣyam evaṃ vākkarma dvitīyam / evaṃ manaḥkarma tṛtīyam //

'trīṇi smṛtyupasthānāni' yathāpāṭham- "tathāgatasya dharma deśayata ekatyāḥ śuśrūṣante / śrotramavadadhati / ājñācittamupasthāpayanti pratipadyante dharmasyānudharmam / na tena tathāgatasya nandī bhavati na saumanasyaṃ na cetasa utplāvitatvam / apare na śuśrūṣante / na śrotramavadadhatītyādi / na tena tathāgatasyāghāto nākṣāntirnāpratyayaḥ na cetaso 'nabhirāddhiḥ / ekatyāḥ śuśrūṣante / ekatyā na suśrūṣante / na tena tathāgatasya dvayaṃ bhavati nandī āghātaśca / sarvatropekṣako viharati smṛtimāna samprajānan" iti //

'asammoṣadharmatā' sattvārthakriyākālānatikramādbuddhānām / ata evaiṣā lakṣaṇavidhānatopapannā bhavati //

'vāsanāsamuddhāta' iti / prahīṇakleśasyāpi yadaprahīṇakleśasyeva ceṣṭitaṃ sā kleśavāsanā / sāpi tathāgatasyāstaṅgateti samudghātakleśavāsanaḥ sa bhagavānucyate //

'mahākaruṇā' hitāśayatā / yayā bhagavānsarvakālaṃ ṣaṭkṛtvo lokaṃ vyavalokayati "ko hīyata ko varddhata" ityādi //

'sarvākārajñatā' iti sarvadharmāṇāṃ svabhāvaviśeṣalakṣaṇaprabhedaparyantajñānamityarthaḥ //

raṇaṃ vivādakalahādi / iha tu raṇahetuḥ kleśo raṇaḥ / tamālambya raṇamutpādayatīti / yaṃ samādhiṃ samāpadyate, yato vyutthāya grāmādau praviṣṭaṃ tamālambya tatratyānāṃ raṇaṃ notpadyate sā 'araṇā' / sā śrāvakasyāpi bhavati buddhasyāpi / tayoḥ kāritraviśeṣaḥ / tamadhikṛtya śāstram-

śrāvakīyāraṇā kleśahetordarśanasya parihāritā / na sākṣātkleśasya / saugatī tu parakīyakleśasrotasa ucchedāya na darśanasyetyarthaḥ //

idaṃ jānīyāmiti praṇidhāya dhyānaṃ samāpannasya lokavṛttāntādau yajjñānamutpadyate tat 'praṇidhijñānaṃ' śrāvakāṇām /

tathāgatamadhikṛtya śāstram-

'anābhogaṃ' nirvikalpatvāt / 'anāsaṅgaṃ' nirapekṣatvāt / 'avyāghātaṃ' sarvatrāpratihatatvāt / 'sadā sthitaṃ' ityasamāhite cetasi sthitatvāt / sarvapraśnān chedayatīti 'sarvapraśnāpanut' /

sa ca sambhogakāyaḥ pariśuddhe svabuddhakṣetre jāyate yāvadākāśasthitiravatiṣṭhate / tatkuto buddhakṣetram? prādhānyena tasyaiva tatropapatteḥ /

lujyate pralujyateti lokaḥ / prajātaṃ bhājanaṃ ca / tasmāt dvidhā lokadhātuḥ sattvaloko bhājanalokaśca / tatra sattvalokapariśuddhimadhikṛtyāha / sarvasattvadhātupuṇyajñānasambhārāparyantatayā prajñāpāramitāpayantatānugatavyeti / yayā bhagavataḥ prajñayā paripācitāḥ sattvāstatra yāvadākāśamutpadyante / utpannāśca yayā bodhaye pariprācyante / seha prajñāpāramitā / tasyā aparyantatānugantavyā / kathamityāha / sarvetyādi / ye kecittatra sattvā utpadyante / sarve te labdhāryabhūmayo bodhisattvāḥ / te sarve / sarvaḥ sattvadhātuḥ sattvarāśiḥ / tasya puṇyajñānasambhāraḥ / tayoraparyantatayā / pṛthivīdhātvaparyantatayā prajñāpāramitāparyantatānugantavyā / evamabdhātutejodhātuvāyudhātvākāśadhātuvijñānadhātvaparyantatayā prajñāpāramitāparyantatānugantavyeti / tathā hi bhājanalokastatra karatalasamaṃ bhūtalam / prāsādodyānavāpīkalpadrumādiparikaraśca sattvāvāsaḥ paramojjvalasaptaratnamayo 'nekalokadhātvantarasphuraṇamahāraśmipramokṣa upariṣṭhācca gaganamanurūpasanirbhāsaṃ ṣaḍdhātukāśca sattvāḥ / "ṣaḍdhāturayaṃ bhikṣo puruṣaḥ" iti vacanāt / atasteṣāmapi kāyaḥ kāntimān prabhāmaṇḍalībhūmyanurūpavarṇasaṃskāraḥ / tatrābhogaparibhogāśca sattvānāṃ sarvadevalokaprativiśiṣṭāḥ / yeṣāmupabhoga ekāntasukha ekāntānavadya ekāntavaśavartī ca / īdṛśī ṣaḍdhātupariśuddhiraparyantā niravadhikatvādativiśālatvācca / atastasyā aparyantayā tatkāraṇabhūtāyā bhagavataḥ prajñāyā aparyantatānugantavyā / tatra cotpannā bodhisattvā anantān lokadhātūn gatvā tatratyānāṃ sattvānāmakuśalaṃ(la)sañcayān hantadhyā(vyā?)na(n) tatpratipakṣāṃśca kuśalasañcayān prajānanti / teṣāmapramāṇatayā tatparicchedikāyāsteṣāṃ prajñāyā apramāṇatā veditavyetyetadāha / kuśalākuśaladhamasañcayāpramāṇatayā prajñāpāramitāpramāṇatā veditavyeti / yāvantaśca te bodhisattvāsteṣāṃ kuśaladharmotpādanāya dharma deśayanti sa sarvaḥ sarvadharmasañcayaḥ / tasyāpramāṇatayā tadvyavasthāpikāyāsteṣāṃ prajñāyā apramāṇatā veditavyetyetadāha / sarvadharmasañcayāpramāṇatayā prajñapāramitāpramāṇatā veditavyeti //

sarvadharmasamādhyaparyantatayā prajñāpāramitāparyantatānugantavyeti / dharmā dhāraṇyaḥ samādhayaścittasthitayaḥ / dharmāśca samādhayaśca sarve ca te dharmasamādhayaśca / teṣāmaparyantatā / tatpratilambhitā tallābhitā yā tatra bodhisattvānāṃ tayā tajjanikāyā bhagavataḥ prajñayā aparyantatā veditavyetyarthaḥ /

sarvabuddharmāparyantatayā prajñāpāramitāparyantatānugantavyeti / tatra buddhaḥ sambhogakāyaḥ / tasya sarve dharmāḥ sarvabuddhadharmāḥ / dvātriṃśanmahāpuruṣalakṣaṇānyaśīti (RSt_179) cānuvyañjanāni / teṣāmaparyantatā aparicchedyatā / kenāparicchedyatā? tulayā / tathāgatādanyasya tādṛśānāmabhāvāt / tayā bhagavataḥ prajñāyāstādṛśyevāparyantatā veditavyā / katamasyāḥ prajñāyāḥ? yayā teṣāṃ samagrāṇi kāraṇāni samyak parijñāya samyaganuṣṭhitāni / ataḥ śāstram-

caturthena pādena sambhogikatve kāraṇamāha /

tatrādau pañcabhirindravajrābhirlakṣaṇānyāha /

kramaḥ pādaḥ cakrāṅkau hastau cāsyeti 'cakrāṅkahastakramaḥ' / supratiṣṭhitatvāt kūrmāviva pādāvasyeti 'kūrmāpādaḥ' / sa cāsau sa ceti samāsaḥ / jālāvanaddhāṅgalī pāṇī ca pādau cāsyeti 'jālāvanaddhāṅgalipāṇipādaḥ' / 'karau sapādau taruṇau mṛdū ca' asyeti pareṇa sambandhaḥ / 'samucchrayaiḥ saptabhirāśrayo 'sya' / lakṣaṇe tṛtīyā / āśrayaḥ kāyaḥ saptabhirucchayairlakṣitaḥ kāyo 'syetyarthaḥ / etena pañcalakṣaṇānyuktāni / cakrāṅkitapāṇipādatā supratiṣṭhitapādatā jālapāṇipādatā mṛdutaruṇahastapādatā saptocchrayatā ceti /

dīrghāṅgulitvaṃ ca āyatapārṣṇiśceti samāhāradvandvaḥ / 'gātraṃ prājyaṃ ṛju' iti bṛhadṛjugātram / ucchaṅkhapādaścāsau 'ūrdhvaromā' ca / uccaiḥ sunigūḍhajānugulphatvāducchaṅkhapāda iti sūtram / ataśca utkarṣanigūḍhārtha ucchabdaḥ / jānugulphāsthivācī śaṅkhaśabdaḥ / urū mūlādadhaśca sarva pāda iti gamyate / vastau guhyaṃ vastuguhyam / kośāvadhānamuttama vastiguhyamasyeti tathoktaḥ / anenāṣṭau lakṣaṇāni / dīrghāṅgulitā / āyatapārṣṇitā / bṛhadujugātratā / ucchaṅkhapādatā / ūrdhvāṅgaromatā / aiṇeyajaṅghatā / paṭūrubāhutā / kośāvahitavastiguhyatā ceti /

hareriva pūrvakāyo 'syeti 'haripūrvakāyaḥ' / 'vṛttau' iti susaṃvṛttau / suśliṣṭaparimaṇḍalagrīvatvāt / asaṃyoraṃtaraṃ uttarāṃsamuraḥ / tadupacitamasyeti 'citāntarāṃsaḥ' / anena saptalakṣaṇāni / suvarṇavarṇatā / ślakṣaṇacchavitā / ekaikapradakṣiṇāvartaromatā / ūrṇāṅkitamukhatā / siṃhapūrvakāyatā / susaṃvṛtaskandhatā / citāntarāṃsatā ceti /

'hīno rasaḥ khyāti rasottamo 'sya nyagrodhavanmaṇḍalatulyamūrtiḥ / Note: RSt_181 uṣṇīṣamūrdhā pṛthucārujivho brahmasvaraḥ siṃhahanuḥ suśuklāḥ //

anena ślokadvayena dvādaśalakṣaṇānyuktāni / rasarasajñatā / nyagrodhaparimaṇḍalatā / uṣṇīṣaśiraskatā / pṛthutanujivhatā / brahmasvaratā / siṃhahanutā / suśukladantatā / samadantatā / aviraladantatā / samacatvāriṃśaddantatā abhinīlanetratā / gopakṣmanetratā ceti / daśaparimāṇamasyāḥ saṃhateriti 'daśikā' / tāścatasraḥ / catvāriṃśadityarthaḥ / govṛṣau gobalīvardau / athavā 'govṛṣaḥ' puṅgavaḥ / sarvaikatvena 'dvāṃtriśadetāni hi lakṣaṇāni' / eṣāṃ vyākhyānaṃ ca hetuśca pūrvanimittatā ca dharmadāna (?) sūtre /

atra

ayaṃ sāmbhogikaḥ kāyaḥ / kasya punaḥ ko heturityāha /

tatra gurūṇāmanugamanapratyudgamānābhyāṃ dharmaśravaṇamālyopahāracaityānupānaprabhṛtiṣu ca paricāradānāccakrāṅkahastapādatā / dṛḍhasamādānatvāt supratiṣṭhitapādatā / saṃgrahavastūnāmāsevanājjālahastapādatā / praṇītānnapānādidānānmṛdutaruṇahastapādatā (RSt_182) saptocchadatā ca / 'vadhyamokṣāḥ' iti bahuvacanāmādyartham / vadhyamokṣaṇājjīvitānugrahakaraṇāt / prāṇātipātavirateścāsevanāddīrghāṅgulitā āyatapārṣṇitā bṛhadṛjugātratā ca / kuśaladharmasamādānasya vivardhanāducchaṃkhapādatā / ūrdhvāṅgiromatā ca / 'ityādika' evamādikaḥ / 'yathāsūtraṃ' iti yathā paṭhiṣyati dharmadāne / mahāpuruṣakāratvāt mahāpuruṣāstathāgatā mahābodhisattvāśca / teṣāṃ dyotakāni mahāpuruṣalakṣaṇāni dvātriṃśat / teṣāmeva śobhākaraṇādaśītyanuvyañjanāni / tānyadhikṛtya dvādaśaślokāḥ-

anenāṣṭāvanuvyañjanānyuktāni / tāmranakhatā snigdhanakhatā tuṅganakhatā ca / vṛttāṅgulitā citāṅgulitā anupūrvāṅgulitā ca gūḍhaśiratā nirgranthiśiratā ceti /

[197] muṣṭānupūrvate

iti ṣaḍakṣarādhikena ślokena dvādaśa / gūḍhagulphatā / aviṣamapādatā / siṃhavikrāntagāmitā / haṃsavikrāntagāmitā / vṛṣabhavikrāntagāmitā / pradakṣiṇāvataṃgāmitā / cārūgāmitā / avakragātratā / vṛttagātratā / mṛṣṭagātratā anupūrvagātratā ceti //

iti ṣaḍiṃvaśatyākṣaraiḥ pañcānuvyañjanāni / śucigātratā mṛdugātratā viśuddhagātratā paripūrṇavyañjanatā cārupṛthumaṇḍalagātratā ceti /

anena ṣaṭ / samakramatā viśuddhanetratā sukumāragātratā utsadagātratā susaṃhatanagātratā ceti //

[200] dakṣiṇāvartatā nābheḥ samantāddarśanīyatā /

anena sārdhaślokena nava / suvibhaktāṅgapratyaṅgatā vitimiraśuddhālokatā mṛṣṭakukṣitā abhagnakukṣitā akṣāmakukṣitā gambhīranābhitā dakṣiṇāvartanābhitā samantaprāsādikatā ceti //

bimbānāṃ pratibimbodayo 'sminniti tathoktamāsyaṃ mukhamasyeti 'bimbapratibimbodayāsyaḥ' / anena sārdhaślokenāṣṭau / śucisamācāratā vyapagatatilakagātratā tūlasadṛśasukumārapāṇitā snigdhapāṇilekhatā gambhīrapāṇilekhatā āyatapāṇilekhatā nātyāyatavadanatā bimbapratibimbadarśanavadanatā ceti /

[203]anupūrvodagatāstuṅgā nāsikā paramaṃ śuciḥ // 8-28 //

'paramaṃ' atyantam / anena sārdhaślokena dvādaśa / mṛdujivhatā tanujivhatā raktajivhatā ca / gajagarjitajīmutaghoṣatā / madhuracārumañjusvaratā vṛttadaṃṣṭratā tīkṣṇadaṃṣṭratā śukladaṃṣṭratā samadaṃṣṭratā anupūrvadaṃṣṭratā tuṅganāsikatā śucināsikatā ceti //

[205] lalāṭamaparimlānaṃ pṛthu pūrnottamāṅgatā /

samarome iti striyāṃ ḍāp / anena ślokadvayena trayodaśa / viśālanayanatā citapakṣmatā sitasitakamaladalanayanatā āyatabhrūtā ślakṣṇabhrūtā snigdhabhrūtā samaromabhrūtā pīnāyatabhujatā samakarṇatā anupahatakarṇatā supariṇāmitalalāṭatā pṛthulalāṭatā paripūrṇottamāṅgatā ceti //

anena sārdhaślaukena sapta / bhramarasadṛśakeśatā citakeśatā ślakṣṇakeśatā asaṃluḍitakeśatā aparuṣakeśatā śrīvatsasvastikanandyāvartalalitapāṇipādatā ceti //

sarvaikatvena buddhānāmaśītiranuvyañjanāni //

iti sāmbhogikaḥ kāyaḥ //

nairmāṇikaṃ kāyamadhikṛtya śāstram-

[208] tathā karmāpyanucchinnamasyā saṃsāramiṣyate /

ataḥ sūtram / sarvadharmāparyantatayā prajñāpāramitāparyantatānugantavyeti / yāvantaḥ sthalajalāntarikṣacarāṇāṃ sthāvarajaṅgamānāṃ sattvānāṃ kāyavāksaṃgṛhītā dharmāḥ sattvānāṃ vinayanāya bhagavatā ananteṣu lokadhātuṣu nirmitāḥ te sarvadharmāsteṣāmaparyantatayā bhagavataḥ prajñāyā aparyantatā veditavyā / katamasyāḥ te nirmitāḥ? śūnyatāparyantatayā prajñāpāramitāparyantatānugantavyeti / yathā tathāgatena nirmitāḥ kāyā anantāstathā teṣāṃ śūnyatāpyanantā / kena śūnyatā? svādhīnaiścicaitasikairmāyāpuruṣavat / atastasyāpi aparyantatayāparyantateti pūrvavat / yathā teṣāṃ kāyavācau nirmite tathā cittacaitasikā api kinna nirmīyante? tadupādānābhāvāt, apūrvasattvāprādurbhāvācca / nanu cittacaitasikanirmāṇamapīṣyate buddhānāṃ /

"kāyavākcittanirmāṇaprayogopāyakarmakaḥ /"

iti vacanāt / satyamiṣyate / kintu satyupādāne devatādhiṣṭhānena svapnadarśanavat / vācā vāgarthanni(rthani)vedanavacca / ata āha / cittacaritāparyantatayā prajñāpāramitāparyantatānugantavyeti / teṣāṃ ca sattvānāṃ yathā deśitaṃ dharmamālambya prātipakṣikāḥ kuśalā dharmā utpadyante / taiśca teṣāṃ vikṣepakā akuśalā dharmāḥ prahīyante / ata āha / kuśalākuśaladharmāparimāṇatayā prajñāpāramitāparimāṇatānugantavyeti /

atha ye nirmitāste kathaṃ bhagavataḥ kāyāḥ? bhagavatā nirmitatvāditi cet / māyākāranirmitā gajādayastarhi māyākārasya kāyāḥ syuḥ, svakāyatvenādhiṣṭhāya tena nirmāṇāt / svakāyavacca gamanavyāhārādiṣu duṣkareṣu vyāpa[ā]raṇāttepi kāyā ityayaṃ bhagavato nairmāṇikaḥ kāyaḥ /

uktāstrayaḥ kāyāḥ / kāritramidānīṃ vaktavyam / tatsamāsata āha / siṃhanādanadanatayā prajñāpāramitānugantavyeti / mṛgāṇāmuttamaḥ siṃhaḥ / tatsādharmyāt puruṣottamāḥ puruṣasiṃhā ityucyante / iha tu prakarṣagaterdevamanuṣyādisarvapuruṣottamastathāgataḥ siṃha ityucyate / tasya dharmaḥ sarvāśāparipūraṇatayā sarvaparapravādimṛgabhīṣaṇatayā ca siṃhanāda ityucyate / siṃhadhvajavat / tasya nadano deśakaḥ / tabhdāvastattā / tayā bhagavataḥ prajñā gantavyā pāragamanāt pāramitā veditavyetyarthaḥ / sa punaḥ siṃhanādanadanaḥ saptaviṃśatividhasya kāritradeśanā / sā vistareṇa mahatyorbhagavatyordraṣṭavyā / tāmadhikṛtya śāstram-

bhagavāṃstānvigrahānnirmimīte ye nārakāṇāṃ narakāgninirvāpaṇena dharmadeśanayā ca tathā tiraścāṃ svamāṃsarudhirādidānena tathā pretānāmannapānādidānena dharmadeśanayā ca cittamabhipra sādya tena cābhiprasādena svagatibhyaścyutānāṃ devamanuṣyeṣūpapādayanti / devānapi hīnayānādhimuktikān dharmadeśanayābhiprasādya manuṣyeṣūpapannān yāvacchrāvakabodhau pratyekabodhau ca pratiṣṭhāpayiṣyantīti gatipraśamanakarma //

ye ca manuṣyān bāhyādhyātmikeṣvāmiṣadāneṣu laukikalokotareṣu ca dharmadāneṣu, arthacaryāyāṃ samānārthatāyāṃ ca śikṣayantīti saṅgrahavastuniveśanakarma //

saṃkleśaḥ kleśāvaraṇaṃ jñeyāvaraṇaṃ ca / vyavadānaṃ tayorastamayaḥ / sa ca pudgaladharmanairātmyajñānāditi saṃvṛtiḥ / paramārthastu [na] dharmadhātoranyadastīti saṃkleśavyavadānajñānaniveśanakarma //

yathā hi māyākāro vicitrāṇi vastūni yāvabhdakṣyabhojyāni nirmāya lokaṃ toṣayati / sa ca loko na jānāti sarvametadadravyakamiti / yaśca prajñāpāramitāyāṃ carati na sa dharmadhātuvyatiriktaṃ kiñcitpaśyati na sattvaṃ nāpi sattvaprajñaptiṃ dharmāṇāmapi nairātmyāditi sattvārthayāthātmyaniveśanakarma //

sa ātmanā ca dānaṃ dadāti parāṃśca dāne niyojayati dānasya ca varṇaṃ bhāṣate / ye cānye dānaṃ dadati teṣā ca varṇavādī bhavati samanujñaḥ / evamātmanā ca śīlaṃ rakṣatītyādi vācyamiti ṣaṭpāramitāniveśanakarma //

ātmanā ca daśakuśalān karmapathān samādāya vartate / ātmanā ca pañcaśikṣāpadāni yāvadātmanā ca dvātriṃśanmahāpuruṣalakṣaṇāśītyanuvyañjanāni niṣpādayatīti vācyamiti buddhamārganiveśanakarma //

iha bodhisattvaḥ sattvānāṃ pāramitādīn sarvadharmān deśayati / teṣāṃ koṭitrayasya phalasya ca prakṛtiśūnyatāṃ deśayati / te tathā bhāvayanto viśeṣamadhigacchanti / (RSt_187) tataste bhūyasyā mātrayā prakṛtiśūnyatāṃ bhāvayanti yāvadanuttarāṃ samyaksambodhimadhigacchantīti prakṛtiśūnyatāniveśanakarma //

prakṛtiśūnyāḥ sarvadharmāḥ na cānyā prakṛtiśūnyatā anye dharmāḥ / kiṃ tarhi? prakṛtiśūnyataiva dharmāḥ / ta eva prakṛtiśūnyatetyadvayadharmaniveśanakarma //

na samyaksambodhau bhagavatā kaściddharma upalabdhaḥ / yatpunarabhisambudhya dharmā deśitāḥ skandhadhātvādayo vā yāvatsarvākārajñatā vā tatsarvaṃ lokavyavahāreṇeti sāṅketikajñānaniveśanakarma //

yadi pāramitādiṣu sarvadharmeṣu śikṣate tathāpi samyaksambodhaye na śaknoti / yadi punasteṣveva carati teṣāṃ ca koṭitrayaṃ phalaṃ ca nopalabhate / tadā samyaksambodhaye śaknotītyupalambhaniveśanakarma //

yadyapi bodhisattvaḥ prajñāpāramitāyāṃ caran sattvaṃ sattvaprajñaptiṃ ca nopalabhate tathāpi saṃvṛtyā paśyati sattvān vastūpalambhena saṃkliṣyamānān / sa tāṃstatprahāṇāya triṣu yāneṣu paripācayatīti sattvaparipākaniveśanakarma //

sa evamupaparīkṣate / śūnyāḥ sarvadharmāḥ / na ca śūnyatā śūnyatāmabhiniviśate / tasmātsarvadharmeṣvanabhiniviṣṭena bhavitavyam / dānādiṣu caritavyam / na ca teṣu tatphaleṣu vā gantavyamiti sarvābhiniveśaprahāṇaniveśanakarma //

na mārgeṇa bodhiḥ prāpyate nāmārgeṇa / yato bodhi eva mārgaḥ mārga eva bodhiḥ / bodhisattva eva tarhi buddhaḥ syāditi cet / yadā sarvabuddhadharmān paripūrya vajropamasamādhau sthitvā bodhisattva ekakṣaṇasamāyuktayā prajñayā samyaksambodhimadhigacchati tadā sa eva tathāgataḥ sarvadarśī sarvajña iti nirdiśyata iti bodhiprāptiniveśanakarma //

sa ātmanaḥ pareṣāṃ ca daśākuśalasaṃgṛhītāni dauḥśīlyāni ṣaṭpāramitāvipakṣāṃśca hīnayānaphalānāṃ ca pañcānāṃ sākṣātkriyāspṛhayoravakāśaṃ, skandhadhātvādisāśravānāśravasarvadharmasaṃjñādauṣṭhulyāni ca nivārya svayaṃ ca pāramitādiṣu sarvakuśaladharmeṣu pratiṣṭhito bhavati parānapi pratiṣṭhāpayati / tacca kuśalamūlaṃ sarvasattvasādhāraṇakṛtvā ātmanaḥ samyaksambodhau ca sarvākārāyāṃ ca svabuddhakṣetrapariśuddhau pariṇāmayati / praṇidhānāni ca buddhakṣetrapariśuddhaye yathā sūtraṃ karotīti buddhakṣetrapariśuddhiniveśanakarma //

prathamacittotpādika eva bodhisattvaḥ samyaksambodhau niyato bhavati / niyatasya kathamapāyeṣūpapattiriti cet / yaḥ samyaksambodhau cittamutpādya ṣaṭsu pāramitāsu caturṣu vāpramāṇeṣu carati daśa cākuśalān dharmān prahāya tiṣṭhati / (RSt_188) aṣṭau tasyākṣaṇā na sambhavanti kiṃ punarapāyopapattiḥ / kathaṃ tarhi tiryagyonau jātakāni? tāni sāśravānāśravasarvakuśaladharmasamanvāgatasya sattvārthā(rtha) vaśitayā saṃcintyopapattayo na ca tiryagduḥkhavedanāḥ / tadyathā tathāgataḥ paramavaśitvalābhātsarvalokadhātuṣu yugapadanantānātmabhāvān parārthāya nirmimīta iti samyaksambodhiniyataniveśanakarma //

sa hi prajñāpāramitāyāṃ sthitvā daśasu dikṣu gaṅgānadīvālukopameṣu sattvānāmartha karoti na ca lipyate / tathā hi yaḥ spṛśet, yena spṛśet, yaṃ ca spṛśet, trīnimāndharmānasau nopalabhate śūnyatāyāṃ ca sthitaḥ sarvaśukladharmeṣu sthito bhavati / tayaiva teṣāṃ saṅgrāt / tathāhi sarvadharmāḥ sarvadharmaiḥ śūnyāḥ / tataḥ śūnyatāyāmantarbhūtā ityaprameyasattvārthaniveśanakarma //

sa evaṃ nirūpayati / ye te daśasu dikṣu gaṅgānadīvālukopamā lokadhātavo ye ca teṣu tathāgatāḥ sarve te svabhāvena śūnyāḥ kevalaṃ nāmasaṅketena prajñapyate / sāpi prajñaptiḥ svabhāvena śūnyā / yadi tu kasyacicchūnyatā na syāt prādeśikī syāt / yatastu na pradeśikī tataḥ sarvadharmāḥ sarvadharmaśūnyā iti / sa evaṃ prajñāpāramitāyāṃ sthitvā ṣaḍabhijñā abhinirharati / yāsu sthitvā daśadiksarvatathāgatānupasaṃkrāmati paryupāste tebhyaśca dharma śṛṇoti teṣu ca kuśalamūlānyavaropayatyanabhiniviṣṭaḥ / na hi śūnyatāṃ śūnyatāyāmabhiniviśate / sa divyena cakṣuṣā daśadiglokadhātuṣu sattvān dṛṣṭvā sadyo 'bhijñayā tatra gatvā tebhyo dharmaṃ deśayati / divyena śrotradhātunā daśadiksarvabuddhānāṃ dharmadeśanāṃ śrutvodgṛhya sattvebhyo deśayati / cetaḥparyāyajñānena sattvānāṃ cittāni viditvā yathācittamebhyo dharma deśayati / so 'nekavidhaṃ pūrvanivāsamātmanaḥ pareṣāṃ cānusmarati / pūrvatathāgatadeśitāṃśca dharmānanusmṛtyatadvineyebhyaḥ sattvebhyo deśayati / sa āśravakṣayajñānena sattvānāmanurūpaṃ dharmaṃ deśayati / sa tābhirabhijñābhiryaṃ yamevākāṃkṣatyātmabhāvaṃ sattvānāmarthāya pratigrahītuṃ taṃ tameva pratigṛṇhāti / na ca tatra sukhaduḥkhānunayapratighairūpalipyata iti daśadigbuddhopāsanādiniveśanakarma //

kāni punarbodhisattvasya bodhyaṅgāni? ṣaṭpāramitāścatvāri dhyānāni yāvadāveṇikā buddhadharmāḥ / yadi teṣu carati koṭitrayaṃ ca teṣāṃ nopalabhate / yadi cātmanaḥ samyaksambodhaye sarvasattvānāṃ cāgratāyai tān samyakpariṇāmayati / yadyamī bodhisattvadharmāḥ katame tarhi buddhadharmāḥ? eta eva / yadyobhaḥ sarvākārajñatāmabhisambudhyate prahīṇasarvavāsanānusandhiśca bhavati, ekakṣaṇasamāyuktayā ca prajñayā sarvabuddhadharmānabhisambudhyate / na caivaṃ bodhisattva iti bodhyaṅganiveśanakarma //

yadyapi svalakṣaṇaśūnyāḥ sarvadharmāstathāpyasti karma, asti teṣāṃ phalam / na hi sattvāḥ svalakṣaṇaśūnyān dharmān jānanti / ajānantaḥ pudgalaṃ dharmāṃśca kalpayantaḥ karmābhisaṃskurvanti sucaritaṃ duścaritaṃ vā / duścaritena triṣvapāyeṣu patanti / sucaritairdevamanuṣyeṣūpapadyante / kecitpunaḥ pudgalanairātmyaṃ parijñāya sugatidurgatīḥ prahāya nirvāṇamadhigacchanti / bodhisattvāḥ pāramitādīn kuśalān dharmānparipūrayantaḥ krameṇa daśabhūmīnadhigamyaikakṣaṇasamāyuktayā prajñāyā sarvadharmānabhisambudhya buddhā bhagavanto bhavantīti karmaphalasambandhāvipraṇāśananiveśanakarma //

na bodhisattvaḥ satyaiḥ satyajñānairvā nirvāti / kintarhi? catuḥsatyasamatayā / yā teṣāṃ samatā tathatā niḥsvabhāvatā sā na kaściddharmamupalabhate satyaparyāpannamanyaṃ vā / tataḥ sarvadharmāḥ śūnyā iti paśyanniyāyamamavakramya gotrabhūmau sthito bhavati dhyānānyutpādayatyapramāṇānyārūpyasamāpattīśca / sa iha śamathabhūmau sthitvā duḥkhaṃ parijānāti samudayaṃ prajahāti nirodhaṃ sākṣātkaroti mārgaṃ bhāvayati / na ca satyārambaṇaṃ cittamutpādayati / kevalaṃ bodhinimnena cittena svalakṣaṇaśūnyānsarvadharmān paśyati / so 'nayā vipaśyanayā sarvadharmaśūnyatāṃ paśyati / upāyakauśalyena ca dharmaṃ deśayatīti catuḥsatyadarśananiveśanakarma //

"maitreya āha / yadi bhagavannabhāvasvabhāvāḥ sarvadharmā kathaṃ bodhisattvena rūpādau śikṣitavyaṃ yāvadbuddhadharmeṣu? bhagavānāha / nāmamātratayā / āha / saṃskāranimittena vastunā avastukaṃ nāmakathanaṃ nāmamātram / saṃskāro vikalpaḥ / tasya nimittaṃ viṣayaḥ / yatraivaṃ bhavati / idaṃ rūpamiyaṃ vedanā yāvadamī buddhadharmā iti bhāvaḥ // bhagavānāha // āgantukametannāmadheyamatra prakṣiptam / idaṃ rūpaṃ yāvadamī buddhadharmā iti / nāmābhedena nāmā ca (? nāmyartha)pratīteḥ / tasmādalīkaḥ śabdārtho vyavahāramātraṃ na vastu // āha // vyavahāramātratāpi rūpasya svabhāva eveti / rūpasvabhāva upalabdha eva bhavati / bhagavānāha / na rūpasya svabhāva eveti / rūpasvabhāva upalabdha eva bhavati / bhagavānāha / na tasyotpādanirodhau tato na sa svabhāvaḥ // āha // kiṃ punarbhagavan sarvaśaḥ svalakṣaṇena na santyeva rūpādayo yāvadbuddhadharmāḥ? bhagavānāha / santi lokasaṅketavyavahārato na nu paramārthataḥ // āha // yathāhaṃ bhagavato bhāṣitasyārthamājānāmi / anabhilāpya eṣa dhātuḥ paramārthataḥ / sacetsaskāranimittaṃ vastu sa evānabhilāpyo dhāturiti vyāhatametat //

bhagavānāha // yadāte 'nabhilāpye dhātau prajñāpracāro bhavatyupalabhase / tadā saṃskāranimittaṃ vastu / āha / nohīti // bhagavānāha // ata eva na tattasmādanyannāpyananyata / adyanyat kutastadā vinaṣṭam / athānanyat kuto nopalabhyate / api ca / yadyasau saṃskāranimittādanyaḥ syādapīdānī sarvabālapṛthagjanāḥ parinirvāyuḥ samyaksambodhiṃ (RSt_190) cābhisambudhyeran / athānanyaḥ syādapīdānīṃ tadapi nimittaṃ nopalabhyeta // āha // anabhilāpyadhātūpanibaddhe prajñāpracāre vartamāne yadi saṃskāranimittaṃ nopalabhyate tatkimasannopalabhyate sadvā? bhagavānāha / yadi vikalpato grahaṇameti na vikalpeṣvapagateṣu tadā parikalpamātraṃ taditi na tasya sattvamasattvaṃ vā / āha / katibhirākārairbhagavan dharmāṇāṃ prajñaptiḥ? tribhirmaitreya / yaduta parikalpitaṃ rūpaṃ vikalpitaṃ rūpaṃ dharmatā rūpam / yāvatparikalpitā buddhadharmāḥ / vikalpitā buddhadharmāḥ / dharmatā buddhadharmā iti / tatra yā saṃskāranimitte vastuni rūpamiti nāmasaṅketavyavahāraṃ niśritya rūpasvabhāvatayā parikalpanā tatparikalpitaṃ rūpam / yattasya saṃskāranimittasya vikalpamātratāyāmavasthānaṃ tadvikalpitaṃ rūpam / yā punastena parikalpitena rūpeṇa tasya vikalpitarūpasya nityakālaṃ niḥsvabhāvatā nairātmyaṃ tathatā bhūtakoṭistaddharmatārūpam / evaṃ yāvatparikalpitavikalpitadharmatākhyā buddhadharmāḥ / tatra parikalpitaṃ rūpamadravyam / vikalpitaṃ sadravyaṃ vikalpitasadravyatayā, na svatantravṛttitaḥ / dharmatārūpaṃ naivādravyaṃ na sadravyaṃ dharmatāprabhāvitam / evaṃ yāvadbuddhadharmāḥ / āha / yaduktaṃ bhagavatā / advayasyaiṣā gaṇanā kṛtā yaduta rūpamiti yāvadbuddhadharmā iti tatkatham? bhagavānāha / yatkalpitaṃ rūpaṃ na tadrūpaṃ niḥsvabhāvatvāt / na cārūpaṃ vyavahārataḥ / yadvikalpitaṃ rūpaṃ na tadrūpaṃ svatantravṛttitaḥ / na cārūpaṃ vikalpitarūpatvāt / yaddharmatārūpaṃ na tadrūpaṃ rūpavivekatvāt / na cārūpaṃ rūpaparamārthatvāt / tasmādadvayasyaiṣā gaṇanā rūpamiti yāvadbuddhadharmā iti // āha // evamantadvayaṃ prahāya madhyamāpratipadaṃ pratipannasya rūpe yāvadbuddhadharmeṣu kathaṃ lakṣaṇaparijñā lakṣaṇaprahāṇa lakṣaṇasākṣātkriyā lakṣaṇabhāvanā ca? bhagavānāha // rūpasya yanna parijñānaṃ nāparijñānaṃ tadevāsya parijñānam / evaṃ yāvadyā bhāvanā nābhāvanā saiva bhāvanā / evaṃ yāvadbuddhadharmāṇām // āha // evaṃ parijñādisamanvāgatasya bodhisattvasya katamannirvāṇam? bhagavānāha / gambhīrameṣāṃ nirvāṇaṃ yato na tannirvāṇaṃ nānirvāṇam / tatkatham? yataḥ parānārabhya saṃsārāparityāga eṣāṃ na nirvāṇam / ātmānamārabhya nirvāṇāparityāga eṣāṃ nirvāṇam / ekātyāga itaratyāgādayukta ubhayoratyāga iti cet / ubhayoravikalpanādubhābhyāṃ nodvijate / tato yukta ubhayoratyāgaḥ / sa tarhi saṃsarati nirvāti ceti na yuktam? yadvodhisattvasya cittavaśitāprāptasyopāyakauśalyena saṃsārasaṃdarśanaṃ so 'sya saṃsārāparityāgaḥ / yā śūnyatā yā cānupalambhapratiṣṭhānatā so 'sya nirvāṇāparityāgaḥ // āha // avikalpanāyāḥ samastaṃ lakṣaṇaṃ katamat? bhagavānāha / ye ca rūpādayaḥ sarvadharmāḥ / yā ca teṣāṃ śūnyatā / yā ca teṣāṃ tasyāśca bhāvābhāvādvayatā / yā cāprapañcanā / (RSt_191) idamavikalpanāyāḥ samastaṃ lakṣaṇam // āha // kinnu bhagavan sarveṣāṃ śrāvakāṇāmekāntena nirvāṇapratiṣṭhā bhavati? bhagavānāha / nānādhātuke loke nānābhūtāḥ sattvā nānāgotraprakṛutayaḥ / asti sā gotrajātiryā ādita eva praṇītaṃ viśeṣaṃ prārthayate / tamevādhigacchati / asti yā hīnaṃ viśeṣaṃ prārthayate / tamevādhigacchati / tenaiva santuṣyati / sa śamaikāyanaḥ śrāvakaḥ / asti yo hīnaṃ viśeṣa prārthayate / tamevādhigacchati na ca tāvatā santuṣyati / uttaripraṇītaṃ viśeṣaṃ prārthayate / sa bodhipariṇatikaḥ śrāvakaḥ / so 'rhattva prāpya cireṇa samyaksambodhiṃ prāpnoti / tasya tatprāptaye yā upapattayo na tāḥ karmakleśavaśena / api tvacintyāṃ nirvāṇapāragāminīmarhato 'pyupapattiṃ prajñapayāmi yā prathamā gotrajātiḥ sā bodhisattvānām // āha // āścaryaṃ bhagavan yāvadudārāśayā bodhisattvā māhātmyāśayāśca // bhagavānāha // yadamī śakratvalokapālatvacakravartitvādibhiḥ sarvalokasampattibhiranarthino 'nuttarāyāṃ bodhau kuśalaṃ pariṇāmayanti / tāsu ca niḥsaṅgatā niravagrahatā ca / iyameṣānudārāśayatā / yatpunastadaśa(sa)ktisukhamanavagrahasukhaṃ nirvṛtisukhaṃ ca tatsarva sarvasattvasādhāraṇamicchanto 'nuttarāyāṃ bodhau kuśalamūlaṃ pariṇāmayanti saṃsārāparityāgatayā / iyameṣāṃ māhātmyāśayatā // āha // āścaryādbhūtā bhagavan bodhisattvadharmāḥ / tān prāptukāmairanuttarāyāṃ samyaksambodhau cittamutpādayitavyam / ita ūrdhvam // subhūtirāha // abhāvasvabhāveṣu sarvadharmeṣu kathaṃ karmaphalavyavastheti // bhagavānāha // dharmāṇāmabhāvasvabhāvamajānantaḥ sattvā viparyāsasamutthitairvikalpaiḥ karmāṇi kṛtvā yathākarmaphalāni prāpnuvanti / " tatra catvāro viparyāsāḥ pudlanairātmyavipakṣaḥ / bhāveṣvabhiniveśo dharmanairātmyavipakṣaḥ / atra ca maitreyapraśnottarairvahavo viparyāsā nirastāḥ / subhūtipraśnottaraiḥ katicit / iti viparyāsaprahāṇaniveśanakarma //

viparyāsena sattvāḥ karmābhisaṃskurvanti / tataḥ saṃkliśyante ca lokavyavahāreṇa na paramārthataḥ / na hi kiñcidvastvasti vālāgrakoṭīnikṣepamātrakamapi yatra sthitvā karma kuryuḥ / tadyathā svapnamāyādiṣviti viparyāsanirvastukatājñānaniveśanakarma //

yā sarvadharmāṇāṃ samatā tathatā bhūtakoṭistanirvāṇam / tacca lokavyavahāreṇa vyavahriyate na paramārthato 'nabhilāpyatvāditi vyavadānaniveśanakarma //

yadyapi svapnamāyopamāḥ sarvadharmā nirvastukāstathāpi tadajānantaḥ sattvā vastvabhiniveśena karmāṇi kṛtvā sugatidurgati gacchanti / atasteṣāṃ viparyāsaprahāṇāya bodhisattvo bodhau cittamutpādya saṃsāre carati / yāvadabhisambudhya sattvān parimocayatīti vyavadānasambhāraniveśanakarma //

"bhagavānāha // na dvayenābhisamayo nādvayena ! eṣa evātrābhisamayo yatra na dvayaṃ nādvayam // tatkasya hetoḥ? prapañco eṣa yo 'yameṣāmabhisamayaḥ / na ca dharmasamatāyāṃ prapañcosti / niṣprapañcā dharmasamatā / saiva sarvadharmāḥ / saiva sarvapṛthagjanāryapudgalāḥ / saiva buddharatnaṃ saṃgharatnaṃ ca / samatā hi dharmatā / na ca dharmatāyā nānātvamasti // subhūtirāha / kiṃ dharmatā saṃskṛtā kiṃ asaṃskṛtā // bhagavānāha // na saṃskṛtā nāsaṃskṛtā / yaśca saṃskṛto dhāturyaścāsaṃskṛta ubhāvetau na saṃyuktau na visaṃyuktau na rūpiṇau anidarśanāvapratighāvekalakṣaṇau yadutālakṣaṇau" iti saṃskṛtāsaṃskṛtāvyatibhedena jñānaniveśanakarma //

"bhagavānāha // sarvadharmāḥ subhūte svabhāvena śūnyāḥ / te na śrāvakairna pratyekabuddhairna tathāgataiḥ kṛtāḥ / yā ca svabhāvaśūnyatā tannirvāṇaṃ" iti nirvāṇaniveśanakarma //

kāritrasyaiva vyāpitvaṃ darśayitumāha / sarvadharmākopyatayā prajñāpāramitākopyatānugantavyeti / kāritramācāraḥ / ācāro dharmaḥ / "nyāyo hi sācāro dharmaḥ svabhāvaśca dharmākhyaḥ" iti vacanāt / sarvo dharmaḥ saptaviṃśatividhaṃ kāritram / tasyākopyatā avadhyatā / daśadiksarvalokadhātusthiteṣu sarvasattveṣu sarvairākāraiḥ yathā bhājanamavicchedena yāvadākāśaṃ pravṛttiḥ / tayā tajjanikayā bhagavataḥ prajñāpāramitāyā akopyatā tādṛśyeva veditavyā / ityuktaṃ dharmakāyasya kāritram //

samudrāparyantatāvākyādibhirakopyatāvākyaparyantaiḥ prajñāpāramitāyā ye viśeṣā uktāsteṣāṃ pāramārthikaṃ jñānamānupūrvyā darśayitukāmaḥ pṛcchati tatkasya hetoriti / ekakṣaṇābhisamayadharmakāyasambandhibhiranugamavākyairyaduktaṃ tatsarvaṃ kasya hetoḥ kena kāraṇenetyarthaḥ / rūpaṃ hītyādikamuttaram / iha samudro 'paryantaḥ śūnyatāmātratvāt / tasyāśca pramāṇābhāt / evaṃ rūpādayopi pañcaskandhāḥ samudrasamāḥ / tadvatprajñāpāramitāpi / tathā hi ye ca rūpādayo yā ca teṣāṃ śūnyatā yā ca prajñāpāramitā sarva ete na saṃyuktā na visaṃyuktā arūpiṇo 'nidarśanā ekalakṣaṇā yadutālakṣaṇā iti bhāvaḥ / evaṃ gaganasamatādayopi jñātavyāḥ / yāvadanupalabdhiriti / akliṣṭamajñānam / evaṃ hītyādi / evaṃ hīti / yathaite 'ṣṭāvabhisamayāḥ saparicchadā nirdiṣṭastathaivetyarthaḥ / anugantavyeti anusartavyā / tataḥ kiṃ karaṇīyamityāha yadetyādi / anugamiṣyatīti vyañjanakāyena śroṣyati / (RSt_193) vyavacārayiṣyatītyarthaśarīreṇa jñāsyati / avatariṣyatīti śraddhāsyati / avabhotsyata iti prajñāsyati / cintayiṣyatīti catasṛbhirvicāraṇāyuktibhiścintayiṣyati vicārayiṣyati / evamevaitannānyatheti / yāni punaḥ sthānāni cintayan bālaḥ śaktikṣayāt khinna unmādyet mūrcchet maraṇaṃ vā nigacchet tāni sthānānyacintyāni teṣu tulayiṣyati / yathaitāni bhagavatā paramayogīśvareṇa dṛṣṭāni tathaiva nirdiṣṭāni / asmākametānyacintā(ntyā)ni tarkāgocaratvāditi upaparīkṣiṣyata iti / etāvataiva sarvasaṃśayānāṃ chedanādavadhārayiṣyatyevamevaitaditi / evamatīva cchinneṣu saṃśayeṣu bhavanāyā adhikāraḥ / ata āha / bhāvayiṣyatīti / caturvidhā bhāvanā / śamatho vipaśyanā śamathavipaśyane śamathavipaśyanābhiratiśca / kīdṛśairmanasikārairityāha / sarvamāyetyādi / ahamiti mameti rūpamiti vedanetyevamādikaḥ sarvābhiniveśaḥ sarvamanyanā / manyāśabdāṇṇijantādyac manyanā / sarvaparapravādibhirmārādibhiḥ kleśaiśca yāḥ kampanāḥ tāḥ sarveñjanāḥ / tadā nāsya durlabhetyādi / sarvaguṇānāmiti bodhisattvaguṇānām / buddhakṣetrasyeti guṇānāṃ paripūririti vartate / śeṣaṃ sugamam //

sūtrasyārtho 'ṣṭavabhisamayāḥ śāstre prathamamuddiṣṭāḥ / ta iyatā vistareṇa nirdiṣṭāḥ / punaḥ śāstram-

athavā ṣaḍarthāḥ sūtrasya / sarvākārajñatā mārgajñatā sarvajñatā ceti trayametallakṣaṇaṃ prajñāpāramitāyāḥ / yatastrividhaiva sā / caturthaḥ sarvākārābhisambodhiḥ / so 'syāṃ prayogaḥ / caryetyarthaḥ / pañcamo mūrdhābhisamayaḥ / so 'syāṃ prayogaprakarṣaḥ / ṣaṣṭho 'nupūrvābhisamayaḥ so 'syāṃ prayogānukramaḥ / anupūrvaprayoga ityarthaḥ / saptama ekakṣaṇābhisamayaḥ / so 'syāṃ prayoganiṣṭhāḥ / aṣṭamo dharmakāyaḥ / so 'syāṃ vipākaḥ / pradhānaphalamityarthaḥ / punaḥ śāstram-

athavā trayorthāḥ sutrasya / hetuḥ prayogaḥ phalaṃ ca / tatra trividhaḥ prayogaviṣayo hetuḥ / sarvākārajñatā mārgajñatā sarvajñatā ca / catvāro 'rthāḥ prayogaḥ prayogasāmānyāt / sarvākārābhisambodho mūrdhābhisamayo 'nupūrvābhisamaya ekakṣaṇābhisambodhaśceti / (RSt_194) phalaṃ dharmakāyaḥ karma ca / vināpi tenārthagateḥ / arthasaṃgrahaḥ sakalasūtrārthasya saṃkṣepaḥ / tatra prathamo 'ṣṭadhā / dvitīyaḥ ṣoḍhā / tṛtīyastredhā //

anugamasya vācakaḥ parivarto 'nugamaparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyā ekonatriṃśattamaḥ parivartaḥ //

30. sadāpraruditaparivarto nāma triṃśattamaḥ /

aṣṭābhirabhisamayairbhagavatī nirdiṣṭā / sā yathā veditavyā tannoktam / atastabhdagavān vica(va)kṣurāha punaraparamityādinā / paryeṣṭavyeti icchateḥ prayogaḥ / paryeṣitā paryeṣamāṇeneti / eṣṛ ityasya bhauvādikasya prayogaḥ / kāyaklamathādimanasikārāṇāṃ pratiṣedho vīryātiśayārthaḥ / mā ca kvacidityādinā vikṣepapratiṣedhaḥ / mā praṇidhā iti mā niveśaya / kvacita ityuddeśaḥ / adhyātmaṃ bahirdhā veti nirdeśaḥ / adhiśabdo 'dhikaraṇārthaḥ / tato vitarkyārthe 'vyayībhāvaḥ / ana ityac samāsāntaḥ ṭilopaḥ / bahirdheti bahirityarthaḥ / mā gā iti sambandhaḥ / māṅi luṅ, iṇo gā luṅi, gātisthetyādinā sico luk / na māṅyoga ityaḍāgamapratiṣedhaḥ / vāmena dakṣiṇeneti pārśveneti bhāvaḥ / pūrveṇetyādinā diśāṃ nirdeśaḥ / anuvidiśamiti vidiśām / anuśabdo vīpsāyām / vidiśi vidiśītyanuvidiśam / avyayībhāve śaratprabhṛtibhya ityac samāsāntaḥ / tathā ca kulaputretyādinā atattvamanasikārāṇāṃ pratiṣedhaḥ / nātmato na satkāyata iti / sīdatīti sat / rāśitvātkāyaḥ / anityo rūpādirāśiḥ satkāya ityucyate / satkāye pudgalaḥ prajñapyate / ataśca nātmato na satkāyataścalasīti / na dravyasatā pudgalarūpeṇa nāpi prajñaptisatā / ubhayoranupalambhādityarthaḥ / na rūpataścetyādi / nāpi rūpādibhiḥ skandhaiḥ / dharmāṇāmapyanupalabdheriti bhāvaḥ / ataścalatīti ebhiścalati / eṣāṃ samāropeṇa vitiṣṭhat iti nivartate / śeṣaṃ sugamam /

vaiśabdo 'vadhāraṇe / evamevetyarthaḥ / ālokamiti mokṣamārgasya deśanām / samudānetukāma iti / ātmani samyagutpādayitukāmaḥ / adhimuktimiti / evamevaitadityavadhāraṇam / kva? sarvadharmeṣu / kīdṛśeṣu? śūnyānimittāpraṇihiteṣu / yathāpratibhāsamarthābhāvācchūnyeṣu / tasya ca pratibhāsasya bhrāntinimittasya prakṛtinirodhādanimitteṣu / (RSt_195) ataśca bhrāntimātratayā dṛṣṭe traidhātuke praṇidhānābhāvādapraṇihiteṣu / śūnyatāśabdaḥ kvacitpaṭhyate / tatra svārthe tal / nimittaparivarjitenetyuddeśaḥ / bhrāntinimittayorvastvabhiniveśastadiha nimittam / tatparivarjitena bhāvaparivarjitena sattvadṛṣṭiparivarjitena ceti nirdeśaḥ / bhāvo dharmadṛṣṭi sattvadṛṣṭirātmadṛṣṭiḥ / tābhyāṃ parivarjitenetyarthaḥ / yānītyādi / yāni dharma deśayantīti sambandhaḥ / śūnyānimittāpraṇihitāḥ pūrvavat / niḥsvabhāvasya notpādo na jātirna nirodhaḥ / yasya notpādanirodhau so 'bhāvaḥ / tasmād anutpādā ajātā anirodhā abhāvāḥ sarvadharmā ityevaṃ yāni dharmaṃ deśayanti tāni kalyāṇamitrāṇi / arthādgamyate tadviparītaṃ dharma yāni deśayanti tāni pāpamitrāṇi / pratipadyamāno anutiṣṭhan / kṛtajña śrutajñānāt / kṛtavedī śrutaphalajñānāt / paritulayamāneneti cintayatā / lokāmiṣaṃ annapānavastrādi / tena pratisaṃyuktā tadabhilāṣiṇī / anubaddhavyo 'nugantavyaḥ / asti hīti / asti khalvetat / sevitumityādeḥ padatrayasya paribhoktumityarthaḥ / abhibhūyeti nirdoṣīkṛtya / sattvavinayeneti sattvānāṃ cittarakṣārtham / parigrahamupādāyeti parigrahārtham / saṅgastṛṣṇā / ārambaṇamupalambhaḥ / bhūtanaya paramārthaprabhedaḥ / saṃkleśābhāvād asaṃkleśāḥ / vyavadānābhāvād avyavadānāḥ / niḥsattvādipadaiḥ pudgalanairātmyamāha / māyopamādipadairdharmanairātmyam / prativāṇiḥ prativacanam / aniviṇṇamakhinnam /

anuśāsanī upadeśaḥ / auṇādiko 'nirdharaṇīvat / rudan aśrupātena / krandan dīnasvaraiḥ / śocan utkaṇṭhamānaḥ / paridevamāno vilapan anubaddha iti samanvitaḥ / kvacillyapaḥ pāṭhaḥ / tasyāpi pūrvādikkarma / anuparikṣiptā pariveṣṭitā / parikhāḥ khātayaḥ / ṛddhā dhanasampattyā / sphītā gṛhodyānādiśobhayā / kṣemā nirupadravatvāt / subhikṣā sulabhānnapānatvāt / ākīrṇo vistīrṇaḥ / bahu nānāvidho janaḥ parivāro yeṣāṃ te tathā / tādṛśā manuṣyā yasyāṃ sā tathā / antarasyāntare āpaṇaḥ krayavikrayasthānam / tasmin vithīśatāni / taiḥ pañcabhiḥ nirviddhā niḥśeṣaṃ viddhā / vithīnāmā prakārāntamubhayato gamanāt / ālekhyena vicitrāṇi ca tāni citrāṇi cādbhūtatvāt / sadṛśāni ca purānurūpatvāt / taiḥ anutpīḍamasaṃbādhaṃ janayugyayānānāṃ saṃkramasthānāni saṃbhūya gamanasthānāni vistīrṇarathyāḥ / teṣāṃ sthāpitāni sthāpanāni / bhāve ktaḥ / taiḥ sumāpitā suracitā / tatra janaḥ padikādilokāḥ / (RSt_196) yugyāni vāhanāni / yānāni rathāḥ / anantaratvātparasparatulyatvācca samasamaiḥ / khoḍakaśīrṣāṇi kramaśīrṣāṇi / upodgatānīti prākārādativistīrṇāt kiñcinnirgatyodgatāni / pramāṇavantīti pṛthūni tuṅgāni ca / nānāvicitrarityanyathānyathā vicitraiḥ / sarvataśca khoḍakavṛkṣānnirgatā vṛkṣāntaram / yathābhavati tathāvasaktam / sarvamasyāmastīti sarvāvanī / kiṅkiṇījāleneti catuṣprākārakhoḍakavṛkṣāvasaktamaṇisūtracatuṣṭayāvavaddhānekamaṇisūtravalambinā / valguḥ / śrotrasukhatvāt / rañjanīyo manoharatvāt / pañcāṅgāni vīṇāvaṃśādīni / gandharvā gāyanāḥ / krīḍanti śrotreṇa, ramante manasā, paricārayanti kāyavākparispandaiḥ / parikhāḥ khātayaḥ / anusārivārivāhinya iti vātādyanusāriṇā jalapravāheṇa yuktāḥ / padmaṃ raktakamalam / puṇḍarīkaṃ sitapadmam / abhijātābhijātariti praṇītapraṇītaiḥ / sugandhaśabdaḥ surabhiparyāyaḥ / tatpuṣkariṇīnāmityudyānapuṣkariṇīnāṃ pramāṇam / samantāditi sarvapārśveṣu / krośaḥ krośa iti vīpsā / nīlādipadāni prāgvyākhyātāni / upanikūjitā buddhanetrī prajñāpāramitā / tasyā citrīkāraḥ paraḥ prasādaḥ / tenānugataṃ sugatebhyaḥ śrutacittaṃ yeṣāṃ te tathā / teṣāṃ madhye śrṛṅgāṭakasyeti sambandhaḥ / samantāditi pratipārśvam / gṛhaparibhoga iti gṛhasya pariveṣṭaḥ / kimarthamityāha / upabhogaribhogāyeti / upabhogaḥ phalapuṣpādīnām / paribhogaḥ sākalyena bhogo vanavihārādinā / vivaraṃ sandhiḥ / tasminnantaraṃ avakāśaḥ / samarpitaḥ saṅgamitaḥ / tairavakāśaguṇaiḥ / sarvendriyāṇāmanugrahaḥ samanvaṅgaḥ / tadyogāt samanvaṅgī krīḍati vācā / ramate manasā / paricārayati kāyena / tāvatkālamiti parimitakālam / tata iti krīḍādikālādūrdhvam / trikālamiti prāṇhamadhyānhāparānheṣu / āsanasya viśeṣaṇaṃ suvarṇapādakamityādi / ardhakrośamuccastveneti yāvat / tūlikayā vā āstīrṇaṃ goṇikayā vā garbholikācīnāṃśukapratyāstaraṇam / upari sā asyeti uparigarbholikama / kāśikavastraṃ vārāṇaseyakaṃ divyaṃ vā / tat pratyāstaraṇamasyeti tathoktam / samaṃ yathā bhavati na viṣamaṃ tathā dhārayanti pramāṇavabhdiḥ stambhaiḥ / sahitāḥ samagrāḥ / niratāḥ sāvadhānāḥ / kathamityāha / kimayaṃ saṃsthita iti / kuta ityāha / susaṃsthitetyādi / muktāvicitritaṃ paryanteṣu hārārddhahārāṇāṃ pralambanāt, madhye ca sthūlamuktākalāpasya / abhyavakiranti purastāt / prakaranti triṣu pārśveṣu / saṃpravikiranti punaścaturṣvapi (RSt_197) pārśveṣu / dharmāśayaviśuddhyeti dharme yā teṣāṃ śraddhācchandayoḥ śuddhiḥ / dharmāya gauravaṃ kalyāṇamitratvāt / sanniśrayatā bhājanatā / śraddhārhe yā śraddhadhānatā tayā / vinipāto durgatigamanam / aviṣṭitaṃ avicchinnam / tuṣṭa iti prītaḥ / udagra iti tayā prītyā unnatapūrvakāyaḥ / tadekatānatvāt āttamanaskaḥ / prīterutkarṣāt pramuditaḥ / prītisahagataḥ prasādaḥ prītisaumanasyam / tajjātamasyeti tathoktaḥ / tasya śrṛṇoti smeti sambandhavivakṣayāpādāne ṣaṣṭhī /

sarvadharmeṣvaniśritasaṃjñāmiti / yathaitarhi me dharmodgatadeśanayā pratibhāsaḥ sanidhā(dā)namanāśritaḥ / evaṃ hetuniyamamanāśritāḥ sarvadharmā ityenāṃ saṃjñāmatyantasamāhitām / asyāḥ saṃjñāyāḥ prabhāvātkimabhūdityāha / tasyetyādi / samādhaya eva mukhāni mahopāyatvāt / sarvadharmāṇāṃ svabhāvāḥ svalakṣaṇāni / teṣāṃ vyavalokano draṣṭā / teṣāṃ anupalabdhirasattāniścayaḥ / sarvadharmāṇāṃ nirnānātvaṃ samatā svalakṣaṇānāmabhāvāt / tadālambanaḥ samādhistathoktaḥ / sā ca samatā tathatā / tayā nirvikārānsarvadharmān paśyatīti sarvadhamanirvikāradarśī / evaṃ yāvatsarvatathāgatadarśī samādhirveditavyaḥ / eṣu samādhiṣviti krameṇa sarveṣu sthitaḥ san / daśadiśo 'sminniti daśadiglokaḥ sarvalokadhātava ityarthaḥ / tatra buddhān bhagavato 'prameyāsaṃkhyeyān paśyati sma / naikasmin kāle 'nekastathāgata ekasyaiva sarvasattvārthakriyāsu śakteriti cet / nityameka eva buddhastasyaivānantamāyuradhiṣṭhātuṃ śakteriti kinneṣyate? hetubalādanyepi bhavantīti cet / hetubalādeva tarhi yugapadananteṣu lokadhātuṣvanantāstathāgatā jāyanta iti ko virodhaḥ? yathā buddhau cakravartinau sakṛdekatra caturdvīpake lokadhātau notpadyete niḥsapatnakarmakāritvāt tathā tathāgatau trisāhasre lokadhātāviti mahārathaiḥ kṣuṇṇametat /

gatiṃ gatā iti / gatirapratidyātaḥ / tāṃ prāptāḥ / śikṣāpita iti śikṣāṃ prāpitaḥ / tatkṛtamiti / yadeva tena purva kṛtam / dhārayitavyaṃ cetasi na vismartavyam / celaṃ vastram / tasya uṇḍukaḥ śiraśāṭaka ityarthaḥ / utkaṇṭhā śokaḥ / paritasanaṃ duḥkhāsikā / kāṣṭhāgatā prītiḥ prema / guṇavatsu cetaso 'kāluṣyaṃ prasādaḥ / tadguṇeṣu vismayaḥ citrīkāraḥ / arbhyahaṇaṃ gauravam / katamaṃ śabdamityata āha / ghoṣamityādi / katamaṃ bhoṣamiṃtyāha / kaḥ pureṣeṇetyādi / atikrāmayiṣyatīti mitāṃ hrasvo na bhavati / "vā cittavirāge" (RSt_198) ityato vāśabdānuvṛttervyavasthitavibhāṣā / vijñānācca / atiśabdaścātra apaśabdārthe vartate / ataḥ pañcamī yuktā bhavati / yannuśabdastasmādarthe / paryutthāpayāmāseti vyagrīkṛtavān / yatheti yataḥ / asthimajjayāśceti / majjanśabdasya liṅgavyatyayena striyāṃ ḍāp sīmāvat / kalyacitta iti tenaiva harṣeṇa karmaṇyacittaḥ / tataśca dviguṇībhūtaharṣatvāt pramuditacittaḥ / guṇajātiḥ manuṣyasāmānyo guṇaḥ / viśeṣastu manuṣyātikrānto guṇaḥ / kṣamante ceti svayaṃ kartavyatayāpi rocanāt / viṣayiteti śaktiḥ /

viditābhiprāya āha / alpotsuka ityādi / utsuka autsukyam / yattat kṣaṇaṃ lavamapi tat / tanmuhūrtamapi tat / trayāṇāmupādānaṃ tu śrotṛṇāṃ śraddhabhedāt / niṣpratibhāna ityuddeśaḥ / sadāpraruditasyetyādinirdeśaḥ / uttara iti uttaranimiuttam / apratipadyamāno 'labhamānaḥ / daddhvamiti dad dāne / vādyaprakṛtayo vādyaprakārāḥ / prabhūtāḥ prakārabāhulyāt / vipulāḥ pratiprakāramānantyāt / bhogā arthāḥ / sarvalokaviśiṣṭā iti sarvalokātikrāntāḥ /

upariṣṭānmūrdhna iti upari śirasaḥ / prātiṣṭhata iti praśabdaḥ praterarthe / vihāyasītyantarikṣe / prāñco 'ñjalayaḥ prāñjalayaḥ / sphuṭa iti prāptaḥ / sahadarśanāditi darśanātkāraṇāddarśanena sahaivaityarthaḥ //

sadāpraruditopalakṣitaḥ parivartastatparivartaḥ // āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāṃ triśattamaḥ parivartaḥ //

31. dharmodgataparivarto nāmaikatriśattamaḥ /

evamukta ityādi / na khalvityādi pratijñā / acalitā hi tathateti hetuḥ / tathāgatānāṃ kimāgatamiti cedāha / yā cetyādi / evamuttarepi hetavaḥ sasamarthanā veditavyāḥ / sarve caite hetavaḥ śūnyatāparyāyā nimittabhedāttu bhedaḥ / ākāśadhāturākāśasādharmyāttathataiva / nanu dvātriṃśanmahāpuruṣalakṣaṇāśītyanuvyañjanavirājitavigrahastathāgato na punastathatādaya ityata āha / na hi kulaputrānyatretyādi / tathataiva suviśuddhā tathāgata iti bhāvaḥ / sa hi teṣāṃ svābhāvikaḥ kāya iti nyāyaḥ / evaṃ tathatāditathāgatayorabhedamuktvātyantābhedaṃ darśayitumāha / yā cetyādi / eṣāmeva dharmāṇāmiti tathatādīnāṃ tathateti parikalpitarūpaśūnyatā / yā ca sarvadharmāṇāmiti skandhadhātvādīnāṃ yā ca tathāgatasya / ekaivetyādiruddeśaḥ / punarekaivetyādi nirdeśaḥ / hetumāha / yadutāsattvāditi / adravyatvānna (RSt_199) punaryathālakṣaṇamabhāvāditi bhāvaḥ / punastathāgatānāmagatigatyorabhāvaṃ yathākalpanamasattvāt / bhāvakalpanā tu saṃjñāviparyāsāditi dṛṣṭāntaiḥ pratipādayitumāha / tadyathāpītyādi / madhyānhakālasamaya iti / madhyānhaścāsau kālaśca / tasya samayaḥ / āgamanaṃ yathā ca grāmaṃ praviṣṭa iti viśaterarthasya gativiśeṣatvāt kartari ktaḥ / tathehāpi tathāgatam abhiniviṣṭā iti / dharmākāyā iti dharmatākāyāḥ / hastikāyasyetyādau kāyaḥ samūhaḥ / pariniṣpattiriti bhūtatvam / muṣāvādastatsādharmyān vañcaka ityarthaḥ / ata evāha abhūta iti / amoghaṃ dāyakasya mahāphalahetutvāt / ata eva dakṣiṇīyāḥ /

prabhāvyante upalabhyante / kāyapariniṣpattiḥ caramabhavasaṃgṛhītā / nāpi kvacidgacchatīti parinirvāṇakāle / na kvacidastīti parinirvāya yatra gacchati / hetarūpādānakāraṇaṃ pratyayāḥ sahakāriṇaḥ / tatra śabdasyopādānaṃ śabdaparamāṇava ityeke / vāyuparamāṇava ityapare / tatra upadhānī tantrīveṣṭanaṃ cakulikā / upavāṇyo apradhānatantrayaḥ / ādyantayoḥ na śabdo niścaratīti vacanaṃ madhye sarvatra sambandhanārtham / nirhetukāśabdāt svārthe 'ṇa nairhetukī /

saṃkṣobhitāni saṃpracalitāni / jihmībhūtāni naṣṭacchāyāni / utsṛjanti smeti muñcanti sma / vihāyasamiti ākāśam / svakena kāyena dharmodgatamabhicchādayati smeti tasyāgrataḥ sarvakāyena bhūmau patati smetyarthaḥ / kiyantaṃ kālamityata āha saptavarṣāṇīti / avakrāmaṇaṃ praveśanam / yadvayamiti yadā vayam / anuvartamānā ityanukurvatyaḥ / divyamityākāśabhavam / cittasyānyathātva pṛthivīsekavaimukhyam / iti pratisaṃkhyāyeti evaṃ nirūpya sarvāṇi tānīti dārikāśatāni / tāni tānīti śastraviśeṣaṇam / avatāramavakāśaḥ / adhyatiṣṭhadityakarot / gandhamityatra adhyatiṣṭhaditi cakāreṇānukṛṣyate / parīṣṭiḥ paryeṣaṇā /

kīdṛśī tatrāryasya dharmodgatasya dharmadeśanābhūdityata āha / tatreyaṃ dharmodgatasyetyādi sugamam / yadutaśabdaḥ sāmānyenoddiṣṭasya viśeṣaṃ dyotayati / ebhistriṃśatā ākārairityarthaḥ / ata evāsyāḥ śrutabalenotpannā / (RSt_200) ebhireva triṃśatākāraiḥ sadāpraruditasya bodhisattvasyotpannāstriṃśatsamādhayaḥ paṭhiṣyante / prajñāpāramitāyāḥ samatā sarvadharmeṣu / kutaḥ? sarvadharmasamatayā / sā hi dharmadhātvālambanā / sa ca samānaḥ sarvadharmeṣu / prajñāpāramitāyā viviktatā / kutaḥ? sarvadharmaviviktatayā / yataḥ sarvadharmāḥ svalakṣaṇairviviktāḥ / ataḥ sāpi viviktā svalakṣaṇapratibhāsaiḥ / sā kadācidasmādvivekāccalatīti cedāha / prajñāpāramitāyā acalanatā / kutaḥ? sarvadharmācalanatayā / yataḥ sarvadharmā na vivekāccalanti / tataḥ sāpi na vivekāccalati / mananāccalatīti cedāha / prajñāpāramitāyā amananatā / kutaḥ? sarvadharmāmananatayā / amananā hi sarvadharmāḥ / na te kiñcinmanyante niḥsvabhāvatvāt / tataḥ sāpyamananā / kimasau kenāpi stambhitā yato na calatīti cedāha / prajñāpāramitāyā astambhitatā / kutaḥ? sarvadharmāstambhitatayā / na hi vivekāccalanti sarvadharmāḥ kenāpi stambhitāḥ / kiṃ tarhi? prakṛtyaiva viveke sthirāstataḥ prajñāpāramitāpi sthirā / ādau samatāmātramuktaṃ naikarasatā / tāmapyāha / prajñāpāramitāyā ekarasatā sarvadharmeṣu / kutaḥ? sarvadharmāṇāmekarasatayā tathataikarasā hi sarvadharmāḥ svalakṣaṇānāmabhāvāt / tadvatprajñāpāramitāpi svalakṣaṇānāmapratibhāsāt / prajñāpāramitāyā aparyantatā / kutaḥ? sarvadharmāṇāmaparyantatayā / tathā hi dvau paryantau pūrvā ca koṭiraparā ca / tau ca na staḥ sarvadharmāṇām / atītānagatayorasattvāt / tasmādaparyantāḥ sarvadharmāḥ / tadvatprajñāpāramitāpi / prajñāpāramitāyā anutpādatā / kutaḥ? sarvadharmānutpādatayā / tathāhi niḥsvabhāvāḥ sarvadharmāḥ / tasmānnotpadyante kharaviṣāṇavat / tasmādanutpādāḥ / tadvatprajñāpāramitāpi / anirodhā prajñāpāramitā / kutaḥ? sarvadharmāṇāmanirodhatayā / na hyamī nirudhyante 'sattvāt kharaviṣāṇavat / tadvatprajñāpāramitāpi / prajñāpāramitāyā aparyantatā / kenopamānena? gaganāparyantatayā / tathāhi gaganasya nāsti paryanto daśasu dikṣu triṣu cādhveṣu / evaṃ prajñāpāramitāyāḥ / [yā] daśadiktraiyadhvikā sarvadharmatathatāmātraprathanāt / samudrāparyantatayā prajñāpāramitāparyantateti / yathā hyākāśasya nāstyantastathaiva daśadiglokadhātūnāṃ kimpunarananteṣu lokadhātuṣu samudrāṇām / tataḥ siddhā samudrāparyantatā / tadvatprajñāpāramitāyāḥ / tathā hi yā teṣāṃ samudrāṇāṃ tathatā yā ca sarvadharmāṇāṃ yā ca prajñāpāramitāyāḥ, ekaivaiṣā tathatā / tathatālambanā ca prajñāpāramitā / tasmātsamudrāparyantatayā prajñāpāramitāparyantateti siddham /

nanu svapnopamatayāpi jñānaṃ prajñāpāramitā gaganopamatayāpi / tatra pūrvā vicitrapratibhāsā uttarā nirābhāsā / kathamanayorekārthatetyata āha / meruvicitratayā prajñāpāramitāvicitrateti / yathā hyekarasamākāśaṃ prakṛtyā tathāpi (RSt_201) merupārśvānāṃ vicitrāṇāmādhipatyāttadvadeva vicitraṃ khyāti / evamekarasaiva tathatā na vicitrā / tathatālambanā ca prajñāpāramitā / yastu svapnopamādijñāne vicitrapratibhāsaḥ so 'bhūtaparikalpadharmaḥ / tasmātsvapnopamamāyopamādijñānaṃ saṃvṛtiḥ / nirābhāse yā ca parimārthike jñāne sattvanāmavatāraṇāya nirdiśyate, nirābhāsapṛṣṭhabhāvī cāvikalpoyaṃ tadanubhūtaniścayārthaḥ / tasmātsiddhamidaṃ meruvicitratayā prajñāpāramitāvicitrateti /

nanu saiva nirābhāsā prajñāpāramitā svayamanubhūyamānaṃ paramārthamitthaṃ niścinoti niḥsvabhāvāḥ sarvadharmā iti / tatkathamasau nirvikalpetyata āha / gaganākalpanatayā prajñāpāramitākalpanateti / prajñāpāramitāyā yākalpanatā na sā kiñcidvikalpayati vikalpapāragatatvāt / tadyathā gaganaṃ na kiñcidvikalpayati jaḍatvāt / ajaḍā prajñāpāramitā kinna vikalpayatīti cet / uktamatra / vikalpaśca bhrāntirabhrāntā ca sā / tasmānna vikalpayatīti siddham /

rūpāparyantatayā prajñāpāramitāparyantateti / yathā hyākāśamaparyantaṃ tathārūpaskandhopi / yatrānyadrūpaṃ nāsti tatrāvaśyaṃ tamaḥ prakāśo vāsti / tadvattadīyatathatāpratibhāsinī prajñāpāramitāpyaparyantatā / yathaiva samudrāparyantatayā prajñāpāramitāparyantatāsmābhirvyākhyātā tathaiva sattvānāmānantyāt vedanāparyantatayāpi saṃskāraparyantatayāpi vijñānāparyantatayāpi pṛthivīdhātvaparyantatayāpi apdhātvaparyantatayāpi tejodhātvaparyantatayāpi vāyudhātvaparyantatayāpi ākāśadhātvaparyantatayāpi vijñānadhātvaparyantatayāpi vyākhyātavyā / atha yā vijñānaskandhāparyantatayā yā ca vijñānadhātvaparyantatayā tayoḥ ko viśeṣaḥ? skandhadhātuśabdābhyāṃ prayogakṛtaḥ /

vajropamadharmasamatayā prajñāpāramitāsamateti / cittadhāraṇāddharmaḥ samādhiḥ / tasya yā sarvadharmeṣu samatā tayomānena prajñāpāramitāyāḥ samatā sarvadharmeṣu sarvadharmāsambhedanatayā prajñāpāramitāsambhedanateti sarvadharmāṇāmasambhedo abhedaḥ / bhedakānāṃ svalakṣaṇānāmabhāvāt / tadvatprajñāpāramitāyā api na bhedaḥ / samvedyamānenaiva rūpeṇa teṣāṃ tasyāmabhāvāt / sarvadharmānupalabdhitayā prajñāpāramitānupalabdhiteti / sarvadharmā na kiñcidupalabhante / rūpasya jaḍatvāt / śeṣāṇāmapyātmani paratra vā grāhakatvāyogāt / nāpyupalabhyante grāhakābhāvāt / tadvatprajñāpāramitāpi nopalabhate nāpyupalabhyate / tasmātteṣāṃ tasyāścānupalabdhitā / sarvadharmāvibhāvanāsamatayā prajñāpāramitāvibhāvanāsamateti / vibhāvanāṃ parebhyo (RSt_202) vācā deśanā / sā sarvadharmāṇāṃ na vidyate tasmādavibhāvanayā samatā teṣām / tadvatsarvālambaneṣu prajñāpāramitāyā avibhāvanāsamatā / sarvadharmaniśceṣṭatayā prajñāpāramitāniśceṣṭateti / ceṣṭā īhāvyāpāraḥ / avyāpāraḥ sarvadharmāḥ / kathaṃ tarhi kaścitkutaścidutpadyate? idaṃpratyayamātreṇa / asmin satīdaṃ bhavati, asati na bhavatītyetāvatā hetuphalabhāvaḥ / tasmādamī niśceṣṭāḥ tadvatprajñāpāramitāpi / sarvadharmācintyatayāpi prajñāpāramitācintyateti / yathā hi dharmāḥ parebhyo na deśyante nirviṣayatvādvācaḥ / tathā svayamapi na cintyante na nirūpyante vāgvikalpayorekārthatvāt / tadvatprajñāpāramitāpyacintyā / veditavyetyante yat paṭhyate tatsarvadharmasamatādivākyeṣu sarveṣu sambadhyate 'ntardīpakatvāt /

atha khalvityādi / atheti deśanāparisamāptau / tathā niṣaṇṇasvaṃveti śrutāsanādanutthitasya / athetyuddeśaḥ / kṛtaḥ / tasyaiva nirdeśaḥ tasyāṃ velāyāmiti / yenaiva krameṇa yairevākāraiḥ prajñāpāramitā deśitā tenaiva krameṇa tairevākāraistriṃśatsamādhaya utpannā iti samudāyārthaḥ / tatra sarvadharmasamatādyākāratvātsamādhayastathā vyapadiśyante / kathamamī ākārāḥ? ebhi prakārairvastujñānāt / yathoktam-

vastujñānaprakārāṇāmākāra iti lakṣaṇam /

iti / kiṃ tarhyālambanam? tadeva vastu yathāsvam / athavā sarvadharmasamatādirevālambanam / tadālambanatvātsamādhayastathoktāḥ / vastūnyadhiṣṭhāni / ākāro yathāsvaṃ nirnimittatādiḥ / evaṃ pramukhānīti triṃśatsamādhipramukhāni / kathameṣāṃ pramukhatvam? ebhiravaśeṣāṇāmākṣepāt / śatasahasrāṇīti lakṣāṇi //

dharmodgatena lakṣitaḥ parivartastatparivartaḥ //

āryāṣṭasāhasrikāyāḥ prajñāpāramitāyāḥ sāratamānāmni pañjikāyāṃ ratnākaraśāntiviracitāyāmekatriṃśattamaḥ parivartaḥ //

32. parīnandanāparivarto nāma dvātriṃśattamaḥ /

sahapratilabdhānāmityādi / anena labdhānāṃ samādhīnāṃ tatkālajamanuśaṃsamāha / ata eva sahaśabdaḥ samānakālatārthaḥ / pratilabdhānāmiti (RSt_203) pratilabdheṣu satsu / ebhireva nayeriti yathoktavastubhiraṣṭābhirabhisamayaiḥ / ebhireva nāmabhiriti sarvākārajñatādibhiḥ / sarvāsu ca jātiṣu na jātu buddhavirahito 'bhūdityuddeśaḥ / asya nirdeśa uttaro granthaḥ svapnāntaragatopīti yāvat /

tatra khalvityādirupodghātaḥ parīndanāyāḥ / tadanenāpi paryāyeṇaiti sadāpraruditavṛttāntenāpi / tasmāttarhītyādinā anuśāsanīśabdaparyantena prathamā parīndanā / atra ca tathāgatādhiṣṭhāneneti vacanaṃ kimartham? mahārthatvābhdagavatī bavhantarāyā ca vinā buddhādhiṣṭhānena likhitumapi [na] śakyeti pradarśanārtham / iyamasmākamanuśāsanītīyamasmākaṃ parīndanā / yathā asyāḥ śravaṇādikaṃ na vicchidyate tathā tvayā kartavyamityarthaḥ / tatkasya hetoriti / tatparīndanaṃ kena prayojanenetyarthaḥ / ata āha / atra hītyādi /

tatkathamityādinā dvītīyaparīndanāyā upodghātaḥ / asmin mama samucchaya iti mama śarīre / tathataditi / etatpremādikam / etenopādghātena dve parīndane / yata āha dvirapi trirapīti / parīndāmīti samarpayāmi / anuparīndamītyānukūlyaṃ samarpayāmi / kathaṃ parīndanetyata āha yatheyamityādi / anyaḥ puruṣa ityabhaktaḥ / kasmādasyāmetāvadgauravamityata āha / yāvadityādi bahuvidhāśca pūjābhiriti yāvat /

bhagavatyāḥ parisamāptimudyotayan saṅgītikāra āha / idamavocadityādi / idamiti prajñāpāramitāsūtram / avocaditi bhāṣitavān / bhagavāniti śāstā / parārtharasikāstathāgatāḥ / parārtha ca parārthakriyā bhagavatyā deśanā / tata āha / āttamanā iti / niruttaradharmadeśanayā prītaḥ sannityarthaḥ / śrotāraḥ kimukurvannityāha / bhagavato bhāṣitamabhyanandanniti / abhipūrvo nandiḥ sakarmakaḥ / sa kadācidabhilāṣe vartate / kadācitprītau / yadā prītau tadā tadālambanamevāsya karma bhavati / tatpunaḥ karma bhagavato bhāṣitam / eṣaiva deśanā / ke punaste śrotāra ityāha / te cetyādi / lokaḥ sattvasamūhaḥ / sa ca śrotṝṇāṃ rājagṛhasya ca prakṛtatvānmanuṣyasamūha eva kevalo gamyeta / tathā mā bhūditi viśeṣaṇaṃ kriyate / sadevamānuṣāsuragandharvaśceti / te ca bodhisattvādayaḥ sadevādiśca loka iti samuccayaḥ //

parīndanābhidhāyī parivartaḥ parīndanāparivartaḥ //