Viṃśikāvṛttiḥ (Vvṛ)
vijñaptimātramevedamasadarthāvabhāsanāt /
yadvat taimirikasyāsatkeśoṇḍrakādidarśanaṃ // Vvṛ_1 //
na deśakālaniyamaḥ santānāniyamo na ca /
na ca kṛtyakriyā yuktā vijñaptiryadi nārthataḥ // Vvṛ_2 //
deśādiniyamaḥ siddhaḥ svapnavat pretavatpunaḥ /
santānāniyamaḥ sarvaiḥ pūyanadyādidarśane // Vvṛ_3 //
svapnopaghātavatkṛtyakriyā narakavatpunaḥ /
sarvaṃ narakapālādidarśane taiśca bādhane // Vvṛ_4 //
tiraścāṃ sambhavaḥ svarge yathā ca narake tathā /
na pretānāṃ yatastajjaṃ duḥkhaṃ nānubhavanti te // Vvṛ_5 //
yadi tatkarmabhistatra bhūtānāṃ sambhavastathā
iṣyate pariṇāmaśca kiṃ vijñānasya neṣyate // Vvṛ_6 //
karmaṇo vāsanānyatra phalamanyatra kalpyate /
tatraiva neṣyate yatra vāsanā kiṃ nu kāraṇaṃ // Vvṛ_7 //
rūpādyāyatanāstitvaṃ tadvineyajanaṃ prati /
abhiprāyavaśāduktamupapādukasattvavat // Vvṛ_8 //
nāstīha satva ātmā vā dharmāstvete sahetukāḥ
yataḥ svabījādvijñaptiryadābhāsā pravartate /
dvividhāyatanatvena te tasyā munirabravīt // Vvṛ_9 //
tathā pudgalanairātmyapraveśo hi anyathā punaḥ /
deśanā dharmanairātmyapraveśaḥ kalpitātmanā // Vvṛ_10 //
na tadekaṃ na cānekaṃ viṣayaḥ paramāṇuśaḥ /
na ca te saṃhatā yasmātparamāṇurna sidhyati // Vvṛ_11 //
ṣaṭkena yugapadyogātparamāṇoḥ ṣaḍaṃśatā /
ṣaṇṇāṃ samānadeśatvātpiṇḍaḥ syādaṇumātrakaḥ // Vvṛ_12 //
paramāṇorasaṃyoge tatsaṅghāte 'sti kasya saḥ /
na cānavayavatvena tatsaṃyogād na sidhyati // Vvṛ_13 //
dibhāgabhedo yasyāsti tasyaikatvaṃ na yujyate /
chāyāvṛtī kathaṃ vā anyo na piṇḍaścenna tasya te // Vvṛ_14 //
ekatve na krameṇetiryugapanna grahāgrahau /
vicchinnānekavṛttiśca sūkṣmānīkṣā ca no bhavet // Vvṛ_15 //
pratyakṣabuddhiḥ svapnādau yathā sa ca yadā tadā /
na so 'rtho dṛśyate tasya pratyakṣatvaṃ kathaṃ mataṃ // Vvṛ_16 //
uktaṃ yathā tadābhāsā vijñaptiḥ smaraṇaṃ tataḥ /
svapnadṛgviṣayābhāvaṃ nāprabuddho 'vagacchati // Vvṛ_17 //
anyonyādhipatitvena vijñaptiniyamo mithaḥ /
middhenopahataṃ cittaṃ svapne tenāsamaṃ phalaṃ // Vvṛ_18 //
maraṇaṃ paravijñaptiviśeṣādvikriyā yathā /
smṛtilopādikānyeṣāṃ piśācādimanovaśāt // Vvṛ_19 //
kathaṃ vā daṇḍakāraṇyaśūnyatvamṛṣikopataḥ /
manodaṇḍo mahāvadyaḥ kathaṃ vā tena sidhyati // Vvṛ_20 //
paracittavidāṃ jñānamayathārthaṃ kathaṃ yathā
svacittajñānam ajñānādyathā buddhasya gocaraḥ // Vvṛ_21 //
vijñaptimātratāsiddhiḥ svaśaktisadṛśī mayā /
kṛteyaṃ sarvathā sā tu na cintyā buddhagocaraḥ // Vvṛ_22 //
viṃśatikā vijñaptimātratāsiddhiḥ / kṛtiriyamācāryavasubandhoḥ /