Yogayātrā

yasminn udayati vikasati kamalam ivāstaṃ prayāti saṃkucati/

sacarācaraṃ tribhuvanaṃ sa jayati kiraṇālayaḥ savitā//

yakṣeśamedhena vijitya dhātrīm ity evam abhyudyamino nṛpasya/

vinighnato vighnakarān na pāpaṃ kriyāt krameṇaiva paśūn makheṣu//

utsāhamantraprabhuśaktiyukto dhīmān vinītendriyabhṛtyavargaḥ/

prajānurakto dhṛtimān sahiṣṇur vṛddhopasevī vijigīṣur iṣṭaḥ//

sāmvatsaras tasya vinītaveṣo dhīmān svatantrāṅgapaṭuḥ kulīnaḥ/

dakṣaḥ pragalbho 'vikalo vinītas tādṛg vidhastasya purohito 'pi//

tasya daivanarakārasametāṃ varṇayanti kavayaḥ phalasiddhim/

tatra kecid avadhūya nṛkāraṃ daivam eva phaladāyakam āhuḥ//

labdhavyāny eva labhyate gantavyāny eva gacchati/

prāptavyāny eva prāproti duḥkhāni ca sukhāni ca//

utthānāc ced bhavet siddhir na kaścit prāpnuyāt phalam/

ahorātraṃ viceṣṭanto dṛśyante vṛttikarśitāḥ//

vihaṅga iva vadho hi(syāt) nipatyāryamanīśvaraḥ/

vidhānavihito 'deśyo nānyeṣāṃ nātmanaḥ prabhuḥ//

tasmād daivaṃ pradhānaṃ hi na kuryāt karma mānuṣam/

niśceṣṭam api loke 'smin bhajate bhuktir uttamā//

āghātadurjayanayaṃ paribhūya daivam ātmābhimānacapalāḥ pracaranti ye 'rīn/

teṣāṃ cirād api kṛtāntamahāpaśūnāṃ hastagrahaṃ na samupaiti jitāpi lakṣmī//

tathā pare nāpeksyaiva daivaṃ dairyāvalambinaḥ/

pratyekṣinaḥ kriyāsiddhau kevalaṃ jagur udyamam//

utthānahīno rājā hi buddhimān api sarvadā/

pradharṣanīyaḥ śatrūṇāṃ bhujaṅga iva nirviṣaḥ//

utthānadhīraḥ puruṣo vāgdhīrān adhitiṣṭhati/

utthānadhīraṃ vāgdhīrā ramayanta upāsyante//

vidhānagaṇanājaḍaḥ puruṣakārasuptādaro
manorathapariśramair na paricumbati śrīmukham/
parākramaviniścitaikasunayo hi sadyaḥ śrutaṃ
harir madasuvāsitaṃ pibati kuṃjarāśruṃ madhu//

kṛṣivṛṣṭisamānugā dṛśyante phalasiddhayaḥ/

asminn arthe śṛṇu ślokān dvipāyanamukhodgatān//

na vinā mānuṣaṃ daivaṃ daivaṃ vā mānuṣaṃ vinā/

naikaṃ nirvartayaty artham ekāraṇirivānalam//

siddhyante sarva ārambhāḥ saṃyogāt karmaṇo 'rddhyoḥ/

daivāt purusakārāc ca na tv ekasmāt kathājcana//

anuśāsti naraṃ daivam ihāsyety anuśāsakaḥ/

iha nāsya bhaviṣyāmi kutaḥ phalamanīhitam//

yatnena sampadya manuṣyakāraṃ yatnāvakāśe puruṣo niruddhaḥ/

pratīkṣate daivamataṃ dvitīyas tam āpado nātmakṛtāḥ spṛśanti//

sattvārjitaṃ karmaphalaṃ sukhena vipakṣyate rājasamudyame[na]/

kṛcchreṇa śeṣaṃ mahatā yato 'to bhājyāni mṛgyāṇi nṛbhir nṛkāraiḥ//E20

chap.2 tithiguṇa

yātrākālam ataḥ paraṃ munimatāny ālokya saṃkhyāpayā-
(mya)bhyuddhuṣya pṛthūktam akṣaragurau sampannnam īśaṃ bhuvaḥ/
jñāte janmani tasya yānasamayaṃ vāṃchanti horāvidas
tv ajñāte 'py aphaleṣu nākṣaram iva prāhātra ratnāvalim//

vidite horārāśau sthānabalaparigrahe grahāṇāṃ ca/

āyuṣi ca parijñāte śubham aśubhaṃ vā phalaṃ vācyam//

anye vadanty avidite (tva)pi janmakāle
yogyaḥ prayāṇasamayo manujeśvarāṇām/
praśnodayodbhavaphal(ānvita)siddhibhāgyas
tattvārthavinniga(da)ti sma vaco vaśiṣṭhaḥ//

apṛcchataḥ pṛcchato vā yiyāsor yasya kasya cit/

horākendratrikoṇebhyas tasya vindyāc chubhāśubham//

daivajñasya hi daivena sadasatphalavāṃchataḥ/

avaśo gocaraṃ martyaḥ sarvaḥ samupanīyate//

aśrauṣīc ca purā viṣṇor jñānārthaṃ samupasthitaḥ/

vacanaṃ lokanāthasya niḥsṛtaṃ mukhapaṅkajāt//

yat sāraṃ pṛcchataḥ puṃso graharā(śyā)śritaṃ phalam/

tatsāraṃ tasya janma syād ya(dya)py anyagṛhe bhavet//

budhvā śāstraṃ yathānyāyaṃ balābalavidhānataḥ/

yathoktaṃ jātake sarvaṃ tathaivātrāpi cintayet//

tasmān nṛpaḥ kusumaratnaphalāgrahastaḥ
prātaḥ praṇamya ravaye haridiṅmukhasthaḥ/
horāṅgaśāstrakuśalān hitakāriṇaś ca
saṃhṛtya daivagaṇakān sakṛd eva pṛccheta//

atha nṛpatisamīpe daivavit pṛṣṭamātrah
phalam udyanimittais tarkayec chāstradṛṣṭyā/
sad iti sadasi vācyaṃ yady api syād asat tat
sphuṭam pai kathanīyaṃ bhūbhuje mantriṇe vā//

sumadhuraphalapuṣpakṣīravṛkṣāvṛtāyāṃ
caraṇagatisukhāyāṃ gośakṛtpeyavatyām/
salilakusumavatyāṃ snānino bhadramūrdhvaṃ
grahabhagaṇagatijñaḥ prādiśet pṛcchakasya//

stanacaraṇatalauṣṭhāṅguṣṭhahastoparāṅgaṃ
śravaṇavadananāsāguhyarandhrāṇi bhūpaḥ/
spṛśati yadi karāgrair gaṇḍakaṭyaṃsakaṃ vā
pravadati śubhaśabdaṃ vāhinī śāsti śatrūn//

udayam udayapaṃ vā janmabhaṃ janmapaṃ vā
tad upacayagṛhaṃ vā vīkṣya lagne yiyāsoḥ/
vinihatam aripakṣaṃ viddhi śatror idaṃ vā
yadi hibukasametaṃ pṛcchato 'stasthitaṃ vā//

pārṣṇigrāhaḥ pṛṣṭhato bhāskarasya prāg yātavyastigmaraśmeś ca yānaḥ/

ākrandārkāt saptame yaḥ sthitaś ca tattulyāste śaktitaś cintayīyāḥ//

jīvajñārkasitāparaiḥ sutasuhṛdduścitkalagnāyagaiḥ
siddhārtho 'rigaṇān vijitya na cirāt praṣṭā sametyālayam/
lagne vā kujamandayoḥ sutagate jīve ravau karmage
lābhe karmaṇi vā sitendusutayoḥ praṣṭur jayo niścitaḥ//

tasminn eva bhaved yoge yadi śukro 'ṣṭam āśritaḥ/

praṣṭāram udyamād eva hataśaktir viśasty ariḥ//

gurvarkaśaśibhiḥ siddhir lagnāridaśamasthitaiḥ/

tadval lagnārirandhrasthairjīvaśukradivākaraiḥ//

sacivāptir gurāvāye karmaṇy asitavakrayoḥ/

caturthe jñe 'ṣṭame candre jāyāsthe ca site jayaḥ//

karmaṇy āre ravāvāye tṛtīyasthe 'rkanandane/

candre ṣaṣṭhe vilagnasthaiḥ śeṣaiḥ praṣṭurdhruvo jayaḥ//

sahaje 'rkārkibhūputraiḥ saumyair lagnagatair jayaḥ/

gurau vā lagnage pāpair lābhe karmaṇi vā sthitaiḥ//

māheyama(nda)yoḥ ṣaṣṭhe lagne guruśaśāṅkayoḥ/

sitacandrajayor ante jayaḥ karmaṇi tīkṣṇagau//

ity yogāḥ śubhāḥ proktāḥ praśnakāle jayāśritāḥ/

aśubhās tu bhavanty atra tān pravakṣyāmy ataḥ param//

yuddhe bhaṅgo yamendvārair navamātmajalagnagaiḥ/

śaśāṅkayamayor lagne mṛtyur bhūsutadṛṣṭayoḥ//

savakre nidhane mande mṛtyur lagne divākare/

candre 'smin tryāyamṛtyusthe sasūrye vā vaded vadham//

vakrajñaśaśibhir dyūne praṣṭur nāśo 'pi gacchataḥ/

kṣunmārāśatruvṛddhiś ca lagne māheyaśukrayoḥ//

candrāvanījayor mūrtau ṣaṣṭhe śaśijaśukrayoḥ/

nidhanasthe sahasrāṃśau vijñeyo mantriṇo vadhaḥ//

tanayasya vadhaḥ praṣṭuḥ pāpair udayaputragaiḥ/

sacandre rudhire lagne bhaṅgaḥ sūryātmajekṣite//

dyūnanaidhanage candre lagnaṃ yāte divākare/

viparyaye vā yātasya trāsabhaṅgavadhāgamaḥ//

dvitrikendrasthitaiḥ pāpaiḥ saumyaiś ca balavarjitaiḥ/

aṣṭamasthe niśānāthe praṣṭur bandhavadhātyayāḥ//

kujacandramasor dyūne svabhedo 'rkabudhodaye/

tadvan mandārayor yuddhe bhaṅgaḥ saumyārkayos tathā//

sarvais tu navame rājā hanti mantripurohitān/

yoge 'sminn udaye candre sutasthapatideśikān//

arkārkasutayor lagne dṛṣṭayoḥ kṣitisūnunā/

candre 'ste vibalaiḥ saumyaiḥ praṣṭuḥ senāpater vadhaḥ//

vidhane vakrayamayoścandre 'ste lagnage ravau/

jñe tṛtīye ca vikramya samantrī hanyate nṛpaḥ//

mūrghodayaṃ śubhasuhṛdyutavīkṣitaṃ vā
lagnaṃ śubhāś ca balinaḥ śubhavargalagne/
siddhipradaṃ bhavati neṣṭam ato 'nyathā taj
janmaprayāṇaphalayuktibhir anyad udyam//

nidhanahibukahorāsaptamārtheṣu pāpā
na śubhaphalakarāḥ syuḥ pṛcchatāṃ mānavānām/
daśamabhavanayukteṣv eṣu saumyāḥ praśastāḥ
sadasad idam aśeṣaṃ yānakāle 'pi cintyam//E35

chap.3 titiguṇa

nandā bhadrā vijayāś cātha riktāḥ pūrṇāś caitāḥ phalam evaṃ vidadhyuḥ/

neṣṭā madhyā pravarāś ceti śukle kṛṇṇe cintyās tithayas tāḥ pratīpāḥ//

sarvāḥ śastās tithayaḥ śuklapakṣe hitvā tryṃśaṃ bahule 'ntyaṃ ca kaiścit/

ṣaṣṭhyaṣṭamyor vasulabdhāpi yātā dvādaśyāṃ vā nāśam āśu prayāti//

pratipadi phalam eke pañcadaśyāṃ ca neṣṭaṃ jagur idam iti tajjñair yāpyam evāvadhāryam/

kim api kim api nūnaṃ taiḥ samīkṣyoktam etat samavacanavighāte yuktatā kena cintyā//E3

chap.4 nakṣatrabala

diśi diśi bahulādyāḥ saptakāḥ prākpravṛttāḥ
pavanadahanadiksthas tiryag atyugradaṇḍaḥ/
surapatir api kṛcchraṃ yāti taṃ laṃghayitvā
nanu bhavati virodho dikṣu daṇḍaikagāsu//

prāgdvārikair analadiṅ na virodham eti śeṣāḥ pradakṣiṇagatāḥ vidiśaḥ prakalpyāḥ/

ullaṃghya daṇḍam api kāmam iyān narendraḥ śūlaṃ vihāya yadi diṅmukhalagnaśuddhiḥ//

jyeṣṭhāyāṃ puruhūtadiṅmukhagataḥ prāpto balir bandhanaṃ
yāmyām ājapade muraś calitavān yāto murārer vaśam/
rohiṇyāṃ namuciḥ pratīcy abhigataḥ pūrtiṃ gato vajriṇā
saumyām aryamadaivate ca gatavān mṛtyor vaśaṃ śambaraḥ//

puṣyo 'tha hastaḥ śravaṇaḥ śraviṣṭhā prācyādimukhyāny udag aśviyuk ca/

naiśākaraṃ tvāṣṭram athānurādhā pauṣṇaṃ ca madhyāni tathāhur eke//

sarvadvārikasaṃjñitāni gurubhaṃ hastāśvimaitrāṇi ca
śreṣṭhāny aindavapauṣṇaviṣṇuvasubhāny ādyaiḥ sahāṣṭau sadā/
raudrājāhiyamānilānalamaghāśāktāgnibhir ninditaṃ
yānaṃ tvaṣṭranilāntare 'gniyamayoḥ pitryoraje cāntare//

sve sve karmaṇi pūjitāni munibhiḥ śuddhāni sarvāṇy api
tyaktvārkodayam ānale 'riviṣayaṃ yātrā dighakṣoḥ śubhā/
rohiṇyāṃ triṣu cottareṣu vijayo yātur viśākhāsu ca
tyaktvā vāsarapūrvabhāgam avadad gargo 'dhirājyārthinaḥ//

mūlendūragaśaṅkareṣv arivadhe yāyād dinārdhaṃ vinā
bhṛtyarthaṃ pavanāśvisūryagurubheṣv ahno 'parārdhaṃ vinā/
rātryādau tu na pauṣṇamaitraśaśibhatvāṣṭreṣu vāṃchan dyutiṃ
rātrer madhyam apāsya pūrvabharaṇīpitryeṣu hantuṃ parāḥ//

niśāntabhāge triṣu vaiṣṇavādyeṣv iyād dhanārthī na punarvasau ca/

niṣedhayanty ambupasaṃjñakasya madhyāhnam eke saniśāntabhāgam//

yatheṣṭavelāgamanaṃ praśastaṃ hastaindavopendrasurejyabheṣu/

kṛtvā prayāṇaṃ śravaṇe śriyo 'rthī viśen na jātuḥ kṣitipaḥ svasīmni//

saumye gatvādhyuṣya raudre 'ditīśe saṃprasthātā bādhate śatrusaṃghān/

maitre gatvā pauruhūte samuṣya? mūle yāyāc chatrunāśāya bhūpaḥ//

haste gatvā svāticitre samuṣya śakrāgnyṛkṣe prasthito bādhate 'rīn/

tiṣye pauṣṇe vāsave caikarātraṃ sīmni sthitvā bhūtim āpnoti yātā//

ṛkṣe pāpaiḥ saṃyute 'ntaḥ prakopo lakṣmībhraṃśo rāhuṇārkeṇa rogaḥ/

ketūlkābhyāṃ pīḍite deśanāśaḥ kleśaḥ saure soṣṇaraśmyātmaje ca//

diṅm(ārga)dhūpapariveśavikampapāṃsuyukteṣv athānayagadaśramarogapīḍāḥ/

bhinne graheṇa vaśatām upayāti śatroḥ sandhyārātre 'śanihate 'javighāta uktaḥ//

janmādi karma tato dṛśan na(va)maṃ saṃghātikaṃ coḍubhāgam/

samudayam (ā)dyād daśa(maṃ) bhramavināśasaṃjñaṃ ca trayorviṃśam//

ādyāt tu paṃcaviṃśaṃ mānasametaṃ naraḥ ṣaḍṛkṣaḥ syāt/

mānavanakṣatro nṛpatir ādyāt tad evābhiṣekarkṣam//

nāmānurūpam eṣāṃ sadasatphalam iṣṭapāpaguṇadoṣaiḥ/

janmarkṣādiviśuddhau yātā śatrūn jayaty acirāt//

janmabhakarmādhānoditās tu sampadvipatkarāḥ kṣemāḥ/

pratyarisādhakavaināśikāḥ syur mitrātimitre ca//

mitrātimitrasādhakasampadaḥ kṣemeṣu karmabhe yathā/

prāpnoti nāvaśeṣeṣv abhiṣekapurastād yātas tu//

sitasiddhārthakaśālipriyaṅgumadayantikāmbubhiḥ puṣye/

snātvā yāyāt prācīṃ saumye sahasramaṇitoyaiḥ//

gośṛṅgāpyanadīgirivalmīkataḍāgamṛtsamāyuktaiḥ/

toyaiḥ snātvā nṛpatir yāyād yāmyāṃ diśaṃ haste//

saridabhyākulamṛḍbhiḥ snātvā (ca)caitre prāgdiśaṃ yāyāt/

śravaṇe tu nadīsaṅgamamṛtsalilaiḥ paccimām eva//

madhubhadradārusahitaiḥ snātvā toyair udak śraviṣṭhāsu/

gogajaviṣāṇakośair madhughṛtapūrṇair udak pauṣṇe//

udag vai vaiśvadeve snātvā madhupūthikāpūrtasalilaiḥ/

naksatradevamantraiś cāgniṃ hutvā jayaṃ labhate//

akṣatamāṣāḥ khinnās tilasahitās taṇḍulā dadhi ca gavyam/

vṛṣabhapiśitaṃ mṛgasya ca pañcānām āśvinādīnām//

rudhiravilāyanapāyasabhujaṅgamāṃsāni śāṅkarādīnām/

pitrye tilaudanaṃ ṣaṣṭikānnam ṛkṣadvaye parataḥ//

prāśyāḥ priyaṅgucitrāṇḍajāḥ phalaṃ yāvakaṃ kulatthāś ca/

madhusarpiṣī ca hastān mūlāny ambūni saktavo mūlāt//

śravaṇādīnām adyāc chāliṃ śākaṃ biḍālamāṃsaṃ ca/

ājyaṃ yatheṣṭamāṃsaṃ ca saktavo māṣasaṃyuktāḥ//

prāśyādi ghṛtaṃ tilaudanaṃ matsyāḥ kṣīram iti pradakṣiṇam/

adyān nṛpatir yathādiśaṃ nakṣatrābhihitaṃ ca siddhaye//

asvādu cyutakacamakṣikānuviddhaṃ durgandhi kṣayakṛd abhūri yac ca dagdham/

susvinnaṃ mudu ruciraṃ manonukūlaṃ svādvannaṃ bahu vijayāya yānakāle//

guṇavati tithāv ṛkṣe 'niṣṭe divā gamanaṃ hitaṃ
niśi ca bhagane śastaṃ yānaṃ tithau guṇavarjite/
bhatithigaditān doṣān prāpnoty ataḥ pratilomago
guṇam api tayoḥ samyag yātur jagāda bhṛgur muniḥ//E30

chap.5 vāraphala

udaranayanarogaśvāpadāraṇyavādhāḥ savitṛdivasayātāpyaśnute 'rthakṣayaṃ ca/

anilakaphajarogān śaktimānānnahāniṃ salilajanitapīḍāṃ cāhni yātā himāṃśoḥ//

jvalanavadhaviṣāsṛkpittaruk śatrupīḍām avanijadinayātā vādhyate śatrusaṃghaiḥ/

ahani savitṛsūnor dainyam āpnoti gacchan svajanadhanaviyogaṃ mṛtyubandhāmayāṃś ca//

budhadivasagato 'rīn bādhate mantraśaktyā sravaṇasukhakathāptiṃ śilpimitrāgamāṃś ca/

kṣitidhanajayaratnastrīpratāpapramodān atibalam acireṇa svīkaroty ahni sūreḥ//

pravarayuvatiśayyāvastragandhānnapānasmarasukhadhanaratrāny ahni bhuṃkte sitasya/

anupacayagato 'haḥ śastam apy apraśastaṃ śubham upacayasaṃsthaḥ pāpasaṃjño vidhatte//E4

chap.6 muhūrta

garavaṇijaviṣṭiparivarjitāni karaṇāni yātur iṣṭāni/

garam api kaiś cic chastaṃ vaṇijaṃ ca vaṇikkriyāsv eva/

śivabhujagamitrapitṛvasujalaviśvaviriñcipaṅkajaprabhavāḥ/

indrāgnīndraniśācaravaruṇāryamayonayaś cāhni//

rudrājāhirbudhnyāḥ pūṣā dasrāntakāgnidhātāraḥ/

indvaditiguruhariravitvaṣṭranilākhyāḥ kṣaṇā rātrau//

ahnaḥ pañcadaśāṃśo rātreś caivaṃ muhūrta iti saṃjñā//

sa ca vijñeyas tajjñaiś chāyāyantrāmbubhir yuktyā//

nakṣatravat kṣaṇānaṃ parighādi tadīśvaraiḥ samaṃ cintyaṃ/

phalam api tad eva dṛṣṭaṃ gargādyais tatra ca ślokāḥ//

ahorātraṃ ca sampūrṇaṃ candranakṣatrayojitam/

tannakṣatramuhūrtāś ca samakarmaguṇāḥ smṛtāḥ//

aṣṭame 'rdhadivase same śubho yo viriñcavibhusaṃjñitaḥ kṣaṇaḥ/

tena yānam apahāya dakṣiṇāṃ sarvadikṣv abhijitā praśasyate//E7

chap.7 candrabala

satya āha gatikarmakalpahā janmagas tu himaguryiyāsataḥ/

tatra dehanavate 'vajāyate tena karmasu na sādhakaḥ smṛtaḥ//

tac ca tasya bahubhir viśodhitaṃ lagnam eva sutarāṃ yatas tanuḥ/

tulyadehanavatāṃ prapadya kiṃ sodayodayam uvāca śobhanam//

aṣṭavargapariśodhitaḥ śaśī śreṣṭhatāṃ samanuvartate yadā/

janmago 'pi hi tadā praśasyate yo 'ṣṭavargaśubhadaḥ sa śobhanaḥ//

saptamāyadaśaṣaṭtrijanmago neṣṭado dvinidhanopagair grahaiḥ/

bandhuriḥphanavapañcamasthitaiś ceṣṭado yadi vilomaveśmagaḥ//

yasya gocaraphalapramāṇatā tasya vedhaphalam iṣyate na vā/

prāyaśo na bahusaṃmataṃ tv idaṃ sthūlamārgaphalado hi gocaraḥ//

yasyotsṛjaty uḍupatiḥ puruṣo 'pasavyaṃ janmarkṣam āpadam upaiti sa bhūmipālaḥ/

yāyī tathetaragṛhopagate sitādau yāyītareś varajayo bahule kṣayaś ca//

horārāśāv upacayagṛhe janmabhe vā yiyāsor hānir hānāv uḍugaṇapatau vṛddhir āpūryamāṇe/

pakṣasy ādāv apacayagṛhe hānir āpūryamāṇe vṛddhis tūktā hrasati himagau kṛṣṇapakṣādisaṃsthe//

upacayagṛhayuktaḥ savyagaḥ śuklapakṣe śubham abhilaṣamāṇaḥ saumyamadhyasthito vā/

sakhivaśigṛhayuktaḥ kārakarkṣe 'pi cendur jayasukhaphaladātā tatprahartāny athātaḥ//

prakṣīṇe 'pya anupacayasthite 'pe yāyād viśrabdhaṃ yadi sakhivaśyakārakarkṣe/

naivaṃ ced udayagṛhāt svajanmabhād vā sampūrṇe 'py upacayage 'pi na prayāyāt//

bhṛgusutabudhabhinne ruk sureḍyena mṛtyur bhayam asitakujābhyāṃ ketunā strīpraṇāśaḥ/

apaṭukiraṇakāntau gacchataḥ śatruvṛddhiḥ savikṛtapariveṣe netranāśaḥ śaśāṅke//E10

chap.8 lagnabala

dvipadavaśagāḥ sarve siṃhaṃ vihāya catuṣpadāḥ salilanilayābharkṣāvaśyāḥ sarīsṛpajātayaḥ/

mṛgapativaśe tiṣṭhanty ete vihāya sarīsṛpān na kathitagṛheṣūhyaṃ vaśyaṃ janavyavahārataḥ//

sthalajalajasarīsṛpāḥ svakānāṃ balam abhivīkṣya vidheyatāṃ bhajante/

viṣamagṛhavaśe samā dyusaṃsthā niśi viṣamā vaśavartinaḥ samānām//

śīrṣodaye samabhivāṃchitakāryasiddhiḥ pṛṣṭhodaye viphalatāṃ balavidravaś ca/

yātavyadiṅmukhagatasya sukhena siddhir vyarthaśramo bhavati dikpratilomalagen//

śastaṃ divā dinabale niśi naktavīrye rāśau viparyayabale gamanaṃ na śastam/

indvarkalagnasahiteṣu gamaścarādyeṣv anyasvakobhayamahīprativṛddhidātā//

mīnodaye pravasataḥ kuṭilaḥ sadoṣo mārge bhavaty akṛtakāryanivartanam ca/

anyāṃśakeṣv api jhaṣe phalam etad eva mīnāṃśakeṣu ca pararkṣasamāśriteṣu//

ripunidhane ripunidhanaṃ ripuṣaṣṭhe lagnage vadho yātuḥ/

satyānuśāsanam idaṃ vāsiṣṭhe nāyam ekāntaḥ//

śatroḥ prasūtisamaye yadi nidhanaṃ saṃyutaṃ grahaiḥ pāpaiḥ/

saumyayutaṃ vā ṣaṣṭhaṃ sadasatphalatā tatas tābhyām//

kleśād vinā phalam arikṣayam arthasiddhiṃ prāpnoti lagnasahite pravasan svalagne/

arthakṣayaṃ śramamanarthamato dvitīye kalyāṇasaukhyavibhavāgamam āhur eke//

bhṛtyārthavāhanasahāyajayās tṛtīye bandhārthanāśabhayasainyavadhāś caturthe/

mantropajāpavipadātmajabhe 'rivṛddhiḥ ṣaṣṭhe 'rivittabaladīptijayāgamāś ca//

dyūne 'dhvavāhanavipatkṣudatiśramārtir bandho vadhaḥ paribhavo nidhane rujaś ca/

dharme 'rthanāśagadakāryavipadbhayāni kāryaṃ vinā balabhayaṃ daśame kṣayaś ca//

kecid vadanty upacayopagṛhītam etat tasmāc chubhaṃ daśamabhe gamanaṃ vilagen/

arthāptidīptiśubhasiddhijayāś ca lābhe ripphe chalaṃ vyaaybhaye vijite 'pi bhedaḥ//

rogāj janmagṛhodaye sutavadho 'siddhiś ca tatpañcame
dyūne kleśam avāpya janmabhavanāt prāpnoti paścāt sukham/
mārgād eva nivartanaṃ navamabhe meṣūraṇe 'rthāgamaḥ
śeṣarkṣeṣu yathaiva lagnabhavanāt tadvat phalaṃ janmataḥ//

kṣuttṛṣṇārtimārganāśo 'kṣirogaḥ kleśāvāptis tigmagoḥ prāgvilagne/

śastā cāndre devatārthaṃ svadeśe kauje pittavyālaśastrāgnipīḍā//

baudhe tuṣṭir vāṃchitāptir yaśaś ca jaive 'thāptiḥ sthānamānārināśāḥ/

strīratnāptiḥ kāryasiddhiś ca śaukre mānde bandhavyādhinīcāvamānāḥ//

saumyo 'pi janmani na yaḥ śubhapuṣṭidātā sthānaṃ na tasya śubhadaṃ vrajato vilagen/

pāpo 'pi yaḥ śubhaphalaṃ prakaroti puṃsāṃ sthānaṃ vilagnagatam iṣṭam uśanti tasya//

avidheyaṃ bhavanaṃ yat svajanmalagnarkṣayoḥ prayātṛṇām/

apy anukūlaṃ lagnaṃ dhanakṣayāyāsadaṃ bhavati//

sakhivaśyatām upete svajanmalagnarkṣayor vilagnarkṣe/

apacayakare 'pi yātur jayadhanamānāgamāḥ kṣipram//

kecid vadanti yasmin graho niraṃśaṃ karoti tallagnam/

bhavanaṃ yātur aniṣṭaṃ bhayaśokodvegadaṃ yasmād//

vṛṣavṛścikakarkaṭair nṛṇām anukūlair api lagnam āśritaiḥ/

gamanaṃ pravadnay aśobhanaṃ munayo 'nyarkṣasamāśritair api//

veśirvilagnopagato yiyāsor vināpi yatnāt kurute phalāptim/

gauyānam iṣṭaṃ jalarāśilagne tad aṃśake cānyagṛhodaye 'pi//E20

chap.9 lagnabheda

ūrdhvā tiryag vānatā syāc ca horā muktā krāntā nāgatārkā krameṇa/

ity etāḥ syur jīvaśarmopadeśe jñeyo rāśir brahmaṣaṇḍasya pakṣe//

ūrdhvā syād yā ṣaṭcarādyeṣu horā bhūyo bhūyo maṇḍale kaiścid uktā/

rāśau rāśau prāgvilagnopayātaiḥ drekkāṇais tu prāha horāṃ vasiṣṭhaḥ//

sarvaṃ pramāṇaṃ municoditatvāt kiṃ tv atra yojyaṃ dalam eva horā/

yasmin sahasrāṃśuravasthito 'rdhe tiryaṅmukhī sā gaṇaye tato 'nyāḥ//

dhatte vāṃchitakāryam ūrdhvavadanā kleśād vinā lagnagā
kleśāyāsaparikṣayāṃś ca kurute tiryaṅmukhī gacchataḥ/
sainyabhraṃśam adhomukhī prakurute kṛcchrād gṛhe cāgamaṃ
srvāḥ puṣṭaphalapradāḥ svapatinā dṛṣṭā na pāpagrahaiḥ//

grahadivasaphalaṃ yad eva yātur tad akhilam eva karoti tasya horā/

himasalilasṛjo vināha kaścid yuvatisamāśrayaratnadeti cāndrī//

drekkāṇākāraceṣṭāguṇasadṛśaphalaṃ yojayed vṛddhihetor
drekkāṇe saumyarūpe kusumaphalayute ratnabhāṇḍānvite ca/
saumyair dṛṣṭe jayaḥ syāt praharaṇasahite pāpadṛṣṭe ca bhaṅgaḥ
sāgnau dāho 'tha bandhaḥ sabhujaganigale pāśayukte ca yātuḥ//

nṛpabhūrtir lagnagate drekkāṇe mantriṇo dvitīye ca/

vaidyapurohitasāmbatsarās tṛtīye pare bhṛtyāḥ//

sthānaparākramacintā vyāpāraparākramau camūpabalam/

abhyavahāryaṃ śayanāsane ca tatpaṃcasu kramaśaḥ//

yānāsanaśayyāvāhanāni daśame 'pare 'nnapānāni/

vāhanayodhāḥ paratas trayodaśe bhavati yuvarājā//

jñeyaṃ balaṃ prayātur mantrasya viniścayaś ca tatparatah/

tarataḥ pañcadaśādye drekkāṇacatuṣṭaye ripavaḥ//

ekonaviṃśake sainikāmbuśayane dhanāni parato 'rthāḥ/

parato 'sya daṇḍanetā saimyasyopadravaḥ prarataḥ//

senācchidraṃ tasmāt senānetā bhavec caturviṃśe/

sainyārogyaṃ sainyaṃ catuṣpadaṃ ca kramāt tritaye//

kāryaṃ kośaḥ phalasiddhayas traye bhūmipās traye parataḥ/

dharmakriyātha yodhārcanaṃ ca yātrāsamāptiś ca//

ity udayādyā bhāvā drekkāṇair ye mayā samuddiṣṭāḥ/

sadasatphalam ādeśyaṃ sadasadyutavīkṣaṇāt teṣām//

navabhāge tigmāṃśorvāhananāśo vilagnasaṃprāpte/

kṛcchrāt svagṛhāgamanaṃ pratāpamṛdutā ca candrāṃśe//

kauje 'gnibhayaṃ baudhe mitraprāptir dhanāgamo jaive/

bhogavivṛddhiḥ śaukre bhṛtyavināśo ravisutāṃśe//

yad udayati phalaṃ grahe pradiṣṭaṃ janayati tasya navāṃśako vlagne/

subhabhavananavāṃśe sahāyo ripubalabhāgam upaiti yātur atra//

yat proktaṃ rāśy udaye dvādaśabhāge 'pi tat phalaṃ vācyam/

yac ca navāṃśakavihitaṃ triṃśāṃśasyodaye tat syāt//E18

chap.10 grahasthānabala

santāpaśokagadavighnakṛd udgame 'rkaḥ kalyāṇamānabalahārdiharo dvitīye/

hemānnavidrumamaṇikṣitidas tṛtīye vairāgyabandhukalahāratidaś caturthe//

putrāpadaṃ sutagṛhe 'dhvani cārthasiddhiṃ ṣaṣṭhe 'bhivāṃchitaphalāptim arikṣayaṃ ca/

dyūne kalatrakalahaṃ dhanasaṃkṣayaṃ ca mṛtyuṃ karoti nidhane savitā rujaṃ ca//

dharmaṃ hinasti navame savitārthadaś ca hatvā viyatyaviditaṃ śramakarmadātā/

ratnāgamaṃ subahu lābhagataḥ karoti kṛtvā vyayaṃ vyayagataḥ kurute 'rtham alpam//

lagne śaśī kalahaśokakaro na pūrṇaḥ strīvājiratnasuhṛdātmajadaḥ kuṭumbe/

duścikyago yuvatiratnadhanapradātā bandhvāptidaḥ suhṛdi tatkṣayadaś ca kṛṣṇe//

arthapradas tanayagaḥ sutaśokakṛc ca mitrāritāṃ prakurute na sukhaṃ ca ṣaṣṭhe/

aste 'rthabhūyuvatido 'rthavināśado 'ṇuś candro 'ṣṭame nidhanaśokakaraḥ prayātuḥ//

pratyeti cāśu navame kurute ca kāryaṃ kṣīṇe kṣayo viyati vṛddhirato 'nyathāsthe/

aiśvaryasaukhyadhanalābham upaite lābhe kleśakṣayavyayabhayāni ca riṣphayāte//

lagne viṣāgnirudhirāgamaśastrabādhā bhindyād balaṃ dhanagato 'rthakaraś ca paścāt/

duścikyago yuvatiratnadhanāmbarāptiṃ bandhukṣayāribhayado hibuke mahījaḥ//

putāpadaṃ kṣitisutaḥ kurute sutasthaḥ śatrupraṇāśam acirād arigaḥ karoti/

arthakṣayāratigadārdanamastasaṃstho bandhārthahānigadamṛtyubhayāni mṛtyau//

dharmaṃ na sādhayati dharmagato mahījaḥ śasto 'mbare na śubhadaḥ kathito 'pariś ca/

lābhe 'rthasiddhivibhavāgamadaḥ prayātur vittakṣayaṃ bahu karoti gataś ca riṣphe//

lagne kīrtisukhārthabuddhivijayān prāpnoti vittaṃ dhane
sotkaṇṭhaṃ sa virāgameti sahaje kāmān labhetākhilān/
pātāle śayanānnapānavibhavān putrāgamaṃ pañcame
ṣaṣṭhe yāty aribādhyatāṃ śaśisute kleśaś ca yātur bhavet//

jāyāsthe pravarāṅganāmbaradhanaprāptir budhe 'rkācyute
kecit kleśam uśanti naidhanagate śaṃsanti kecic chubham/
dharme dharmavivṛddhir ambaragate siddhir bhaved īpsitā
vidyārthāptir ayatnataś ca parato riṣphe ca vācyo vyayaḥ//

kīrtir lagne 'rthāthasiddhir dvitīye duścikyasthe kṣucchramārtiḥ surejye/

pātālasthe dharmatatvābhimānā kāryaṃ sidhyaty ātmajasthe 'py asādhyam//

ṣaṣṭhe jīve śatrurāyāti vaśyaṃ kecit prāhur vaśyatāṃ yāti śatroḥ/

vindanty aste 'riṣṭayoṣāyaśāṃsi mṛtyau prāṇān hanty athānye jagur na//

putrotpattir dharmasiddhiś ca dharme jīve karmaṇy arthasiddhir yaśaś ca/

lābhe kāryaṃ vāñchitaṃ yāti siddhiḥ riṣphe prāpte kliśyate 'nekaduḥkhaiḥ//

veśyārthāmbaramālyabhojanasukhaprāptir vilagne bhṛgau
lābho 'rthe sahaje na sīdati gataḥ prāpnoti śreṣṭhāṃ śrutim/
pātāle suhṛdāgamaḥ sutagṛḥ sthānārthamānāgamaḥ
ṣaṣṭhe śatruparābhavāratiśucaṃ sthāne 'nyathā tajjaguḥ//

dattvā strīdhanam astagaḥ svaviṣayavyucchittido bhārgavaḥ
kāryaṃ sādhayate 'ṣṭame 'tha navame kṣipraṃ karotīpsitam/
yātuḥ karmagataḥ prabhūtadhanado lābhe jayārthaprado
vyarthaṃ dvādaśago vyayaṃ prakurute śasto 'parair dvādaśe//

bandhaṃ vadhaṃ cārkasute vilagne dhane arthahāniṃ labhate śubhaṃ ca/

śatror balaṃ hanti gatas tṛtīye caturthago bandhubhayaṃ parebhyaḥ//

nārthasya siddhiḥ sutage 'rkaputre ripūn ripusthe sṛjayaty ayatnāt/

utsāhabhaṅgo 'kṣirujaś ca dāre viṣāgniśastrādivadho 'ṣṭamasthe//

dharme na dharmaṃ labhate sukhañ ca yānāvṛtiṃ karmaphalaṃ ca svasthe/

ekādaśasthe jayavittalābhān mande 'ntyage nārtham upaiti yātā//

prāyo jaguḥ sahajaśatrudaśāyasaṃsthāḥ
pāpāḥ śubhāḥ savitṛjaṃ parihṛtya khastham/
sarvatragāḥ śubhaphalaṃ janayanti saumyās
tyaktvāstasaṃsthamamarāriguruṃ jigīṣoḥ//

kecit prāhur arivyayāstasahajasthānāni hitvā bhṛguḥ
śreṣṭhaś candrasuto 'ntyadharmasahajadyūnasthito netaraḥ/
candro lābhasutārthadharmasahajavyomasthitaḥ pūjito
jīvaḥ sarvagato maṇitthakathito neṣṭo 'ntyaṣaṭstryāśritaḥ//

ekīyapakṣe 'pi hi kaiścid ukto bhṛguḥ śubho 'ntyātmajalābhavarjam/

candrastriṣaṣṭhāyadaśāstasaṃstho budho 'stalagnāyasuhṛdvyayasthaḥ//E22

chap.11 utsargāpavāda

saumyāsaumyeṣv etal lagnādstheṣu yat phalaṃ proktam/

tatsamakālagatānāṃ phalavaiṣamyād anekāntam//

horāvido jagur idaṃ sutāv abalo daśādhipāriś ca/

aśubhaphaladaś cāsāmpratam udaye saumyo 'pi neṣṭaphalaḥ//

sāmprataṃ śubhadaḥ sutau balanvito yo daśādhi(pa)mitraṃ ca/

pāpo 'piśubhaphalaḥ syāc chalokaḥ śāstroditaś cātra//

saumyo 'py atīvacirabhāviphalo na yojyaḥ
pāpo 'py asāmprataphalo ripunirjitaś ca/
pākādhipo ''tmasadanāṣṭakavargaśuddhaḥ
avalpo 'phalaś ca dinabhāṃśavidhis tathā syāt//

saumyaṃ daśādhipaṃ lagnasaṃsthamicchanti kecid ācāryāḥ/

pāpāṃ copacayasthaṃ na vilagne tatra ca ślokau//

saumyagraheṣu lagneṣu śubham ekāntaniścitam/

papagrahodaye yātur asaṃśayam aśobhanam//

tasmāt krūraṃ daśānāthaṃ yātur vīryaguṇānvitam/

kuryād upacayarkṣeṣu na vilagne kathaṃcana//

tac ca viruddhaṃ teṣāṃ katham anyadaśāsu dāsyate svaphalam/

evaṃ phalasya nāśo vrajati sarvasya phalali(lī)psoḥ//

tasmān naikānto 'yaṃ jātakam avalokya nirdiśet sadasat/

ślokau vṛttaṃ bhedaṃ prāha maṇittho vasiṣṭhaś ca//

rakṣakā vardhakāś caiva ye syur janmani nāyakāḥ/

tān pāpān api niḥśaṅko yātrālagneṣu yojayet//

śubhāśubhaphalā yogā jātake ye 'py udāhṛtāḥ/

tān sarvān avalokyaiva prayāṇeṣv api yojayet//

horāgataḥ svabhavane yadi sūryaputro meṣopago 'vanisutaḥ svagṛhe śaśāṅkaḥ/

śukras tulādharagato mithune budhaś ca siṃhe ravir yadi ca pārthivajanma vidyāt//

janmasamaye śaśāṅkodayopacayasaṃsthitā grahāḥ kecit/

te sarve nānākhyā krūrāḥ saumyaiḥ samāścintyāḥ//

yo yasya daśamagṛhagaḥ sa tasya vaśyas tu bhavati niyamena/

yaś cātha paṇapharasthaḥ sa bhavati rakṣopagas tadvat//

upacayagṛhopayātāḥ prasparaṃ kīrtits tu tānasamāḥ/

ādau prakīrṇakādhyāye coditāḥ kārakāś ca//

janmeśvaralagnapayor yaḥ śatrur lagnagaḥ sa saumyo 'pi/

kurute dehavipattiṃ krūro 'pi śubhaṃ tayor mitram//

bhaven na yaḥ kārakatānasaṃjñaḥ svajanmalagnādhipayoḥ śubho 'pi/

karoti lagnopagataḥ sa yātur bhayaṃ vināśaṃ ca bahuprakāram//

papo 'pe lagnopagato narāṇāṃ śubhapradaḥ kārakatānasaṃjñaḥ/

tasmāt praytnād idm eva cintyaṃ yiyāsatāṃ kārakatānayātam//

eko 'pi vakropagato narāṇāṃ śubho 'śubho vāpi catuṣṭayasthaḥ/

vargo 'pi vāsyodayago vināśaṃ bahuprakāraṃ kurute 'dhvagānām//

svasutasthāne sūryaḥ strījanaratnapramodado lagne/

avaśeṣasthānagato vadhabandhodvegadaḥ kṣipram//

uḍupatir udayaṃ prāptaḥ sarvasthānopagaḥ prayātṛṇām/

kurute ripupravṛddhiṃ dīptivināśaṃ vighātaṃ ca//

sthāne 'rkasutasya kujo lagnastho ripuvināśajayadātā/

śeṣasthānopagataḥ kṣitisuto ratnārthanāśakaraḥ//

raviśaśibhaumasthāneṣv anarthado lagnagaḥ śaśāṅkasutaḥ/

bhṛgusutagurumandānām abhiṣekajayārthadīptikaraḥ//

jīvo bhṛgucandramasoḥ sthāne dhanayodhanāśakaḥ proktaḥ/

tatpariśeṣasthāneṣv avanisuhṛdvittaṃjayadātā//

saumyasthāne śukro balahānikaro 'rthado 'rihantā ca/

sthāne pariśeṣāṇām anilajvaraśatrukopakaraḥ//

arkasthāne mando lagnasthaḥ prītisaukhyalābhakaraḥ/

neṣṭo 'nyasthānasthaḥ pratāpabalamānahānikaraḥ//

savitṛtanayaḥ svasthānastho dhanāṅgavināśakṛt
tuhimakiraṇaḥ strīratnāptiṃ nareśvaratāṃ raviḥ/
avanitanayaḥ sainyakṣobhaṃ priyaśravaṇaṃ budhaḥ
suragururatho bhogaprāptiṃ karoti jayaṃ sitaḥ//

yo 'staṃ yāty udayaṃ vā dakṣiṇamārgasthitaḥ sahastrāṃśoḥ/

kurute grahaḥ salagne yodhadhanāṅgakṣayaṃ yātuḥ//

tigmakarasyottarato darśanam āyāti yo graho 'staṃ vā/

madhye tu vā sa lagne yātuḥ kusumāmbarāśanadaḥ//

niyatagatidyutivarṇapramāṇavaikṛtyam ucyate vikṛtiḥ/

vikṛtistho galnagato na śubhaḥ śubhadaḥ svabhavanasthaḥ//

yāmye tamo jñaḥ śravaṇe ravis tu jāto viśākhāsu sitaś ca puṣye/

pauṣṇapyabhāgyoragakṛttikāsu mandāravāgīśaśiravīndujanmā//

trividhotpātābhihataṃ balavad grahapīḍitaṃ ca yasyarkṣaṃ/

yātrāyāṃ lagnagataḥ sa varjanīyo 'nukūlo 'pi//

pākeśvarādhimitre tadvarge vā vilagnage yātuḥ/

svayam arir upaiti vaśyaṃ praṇataśirāḥ sārvabhaumo 'pi//

pakeśvarārilagne varge vā tasya bhūpatir gacchan/

vinihataśūranarāśvaḥ śatror āyāti vaśyatvam/

mūrtyarthayodhavāhanamantryarimārganaidhanamanāṃsi/

karmāgamavyayāścodayādayaḥ kīrtitā bhāvāḥ//

yātrāphalaṃ caturthe jāmitre śatravaḥ pramādaś ca/

śubhapāpagrahayogāc chubhāśubhaṃ nirdiśed eṣām//

satyācāryasya mate vibalaḥ śastaḥ śaśī prayāṇeṣu/

digvīryonaḥ kevalam induḥ śasta iti jagur anye//

yad eva yasyodayasaṃsthitasya phalaṃ prayāṇe sadasat pradiṣṭam/

tad eva tasyākhilam ahni yātur grahasya varge ca vilagnasaṃsthe//E38

chap.12 miśraka

vyasanaṃ prāpno(ti) mahad vyatipāte nirgato 'thavā mṛtyum/

vaidhṛtigamane 'py evaṃ tryahnaspṛśi samupadiśānty eva//

nāvamarātre yāyād doṣas tatrādhimāsake vyasanam/

ṛtvayanayugasyāptau na vijayakāṅkṣī nṛpaḥ pravaset//

svarkṣeśadaśādhipayor mitrodāsīnaśatrubhāṃśabhavāḥ/

tatpākabhujaś coktā vijigīṣor mitramadhyaripavaḥ//

riktāniṣṭadaśo 'rir niyamād vijigīṣuṇā samucchedyaḥ/

avarohidaśaḥ pīḍyaḥ karṣayitavyas tathārohī//

na sadṛśadaśo 'bhiyojyaḥ sandhānaṃ tena bhūpater vyāsam/

aśubhaiṣyāsannadaśaḥ śubhaiṣyapākena sandadhyāt//

śreyān viparyaye vigrahas tathārohiṇy aśubhaiṣyadaśaḥ/

āsīta yadā śatruḥ śubhaiṣyapāke vidūrasthaḥ//

ārohiśubhaiṣyadaśaḥ pākapatau balayute ca bhūpālaḥ/

yāyāt tadviparītaṃ dvaidhībhāvaṃ tu miśradaśaḥ//

riktopahatadaśāyāṃ janmodayanāthaśatrupāke ca/

svadaśeśakārakadaśaḥ saṃśrayaṇīyo narādhipatiḥ//

upacayakartur vrajed diśaṃ balavati kaṇṭakage ca dikpatau/

manasāpi na digbalānvite digadhipatau ca lalāṭasaṃsthite//

janmodayapau balānvitāv upacayakaṇṭakagau śubhapradau/

krūrāv api nityam eva tau saumyair eva samāv udāhṛtau//

svadaśādhipajanmalagnapāḥ sandhyārkopagatā na śobhanāḥ/

parihṛtya sitārkanandanau madhyās tigmakarād viniḥsṛtāḥ//

parasparaṃ saurikujau ravīndū trikoṇagau bhārgavalohitau ca/

phalaṃ yad uktaṃ tad aśeṣam eva vināśya paścāt svadiśaṃ nayantām//

ripudivaso yasya bhavet saumyo 'pi sa lagnago na śubhadātā/

pāpo 'pīṣṭaṃ janayati mitraṃ svadine vilagnasthaḥ//

balinaḥ kaṇṭakasaṃsthā varṣādhipamāsadivasahoreśāḥ/

dviguṇaśubhāśubhaphaladā parataḥ parato grahā yātuḥ//

yātrājasiṃhaturagopagate variṣṭhā madhyā śanaiścarabudhośanasāṃ gṛheṣu/

bhānau kulīrajhaṣavṛścikage 'tidīrghā śastas tu devalamate 'dhvani pṛṣṭhato 'rkaḥ//

sakalaphaladadaśāḍhyake pravarā madhyāṣṭavargasaṃśuddhau/

nyūnaphalā tātkālikavilagnatithidivasakaraṇādyaiḥ//

uttamaphalā yātrā trikoṇatuṅgopaca(ye)ṣu saumyeṣu/

madhyā svamitrabhavanopageṣu nīcāribheṣv adhamā//

madhyādhamādhamottamasamamadhyādhodhamottamotkṛṣṭā/

madhyottamā ca ṣaṣṭhā yātrā yātrāvidāmiṣṭā//

digvargavilomage hate sandhyākaropagate vidīdhitau/

śukre pravasan narer vaśaṃ yāti budhe ca vilomasaṃsthite//

anulo(ma)gate śaśāṅkaje śukre caivam api vyavasthite/

yāyād aviśaṅkito 'paraiḥ kathito 'pyāṅgiraso yathendujaḥ//

ākrandasārī dinamadhyago 'rkaḥ pauraḥ purastād aparatra yāyī/

ākranda indur gurumandasaumyāḥ paurāḥ smṛtā yāyina ity ato 'nye//

yāyigrahair vīryajayopapannaiḥ ke 'riprayāṇaṃ pravadanti dhanyam/

satyaṃ tathā kiṃ tu viśeṣam āhus te bhūpateḥ satphaladā jigīṣoḥ//

dṛṣṭe sāmnāṃ karmaniṣṭaṃ surārau vaitālīyaṃ pādadambhau ca hitvā/

śasto rāhus tryāyakarmopayāto yātavyaś cāsannatāgaś ca ketuḥ//

sāmnāṃ śukrabṛhaspatī dinakaro vakraś ca daṇḍeśvarau
bhedasyendujarāhuketuravijā dānasya naktamcaraḥ/
ārkādāṭavikaṃ yamā(d) bhṛtabalaṃ(syu)r bhārgav(āc chreṇikaṃ)
jñān mantraṃ ripudeśamaulabalapālak(ābhaume)nduvāgīśvarāḥ//

yato 'pa(pa)nnadivasakaroḍunāthayos tato vrajed ripunadhanāya pārthiva/

athāyanena yugapad ekasaṃsthayor dyunaktayo raviśaśinor vrajet tadā//E25

chap.13 dehaspandana

dakṣiṇapārśvaspandanam abhidhāsye tatphalakṣayo vāme/

pṛthivīlābhaḥ śirasi sthānavivṛddhir lalāṭe syāt/

bhrūnāsikāntare priyasamāgamo bhṛtyalabdhir akṣiṇos tu/

dṛkparyante 'rthāptiḥ pūrve jñeyātra cotkaṇṭhā//

yoṣitsaukhyaṃ gaṇḍe dṛkcaramādhaś ca saṅgare vijayaḥ/

śravaṇe ca hitaśravaṇaṃ nāsāyāṃ prītisaukhyaṃ ca//

adharottarauṣṭhayoḥ priyasamāgamavijayau gale ca bhogāptiḥ/

aṃse bhogavivṛddhir vāhāviṣṭena saṃyogaḥ//

haste 'rthāptiḥ pṛṣṭhe parājayo vakṣasi smṛto vijayaḥ/

prītyutpattiḥ pārśve stane tv apūrvā viṣayalabdhiḥ//

kaṭyāṃ balapramodaḥ sthānabhraṃśaḥ prakīrtito nābhau/

haste kośavivṛddhiḥ kleśo hṛdaye 'rthaparyantaḥ//

vāhanalābhaḥ sphigyāyurvṛṣaṇe yoṣidāgamaḥ śiśne/

muṣke tanayotpattir vastāv antaḥpurābhyudayaḥ//

pṛṣṭhata ūrvor doṣaḥ purataś calane tu śacivahitalabdhiḥ/

pracalati ca jānusandhāv arisandhānaṃ balavad uktam//

deśaikadeśanāśo jaṃghāyāṃ sthānalabdhiraṃdhry upari/

adhvāgamanam alābhaṃ caraṇatale spandamāne tu//

vraṇapiṭakatilakalāṃchanamaśakādāyas tv eva nirdiṣṭāḥ (syuḥ)/

kaṇḍūyanaṃ narapater dakṣiṇapāṇau jayāyaiti//E10

chap.14 cittaśuddhir

pṛṣṭavyo daivavidā viśrabdham upahvare narādhipatiḥ/

ripunidhanapraṇidhānaṃ prati bhavataḥ kiṃ manaḥ kurute//

brūyāt sa cen mama manaḥ protsahate harṣayet tataś caivam/

cittānukūlatā siddhilakṣaṇaṃ tatra ca ślokāḥ//

śubhāśubhāni sarvāṇi nimittāni syur ekataḥ/

ekataś ca manaśśuddhis tad dhi śuddhaṃ jayāvaham//

kiyac ciraṃ na labhyeta nimittaṃ gamanānugam/

na tv eva tu mano 'narthaṃ cireṇāpy anumanyate//

nimittānucaraṃ sūkṣmaṃ dehendriyamahattaram/

tejo hy etac charīrasthaṃ trikālaphaladaṃ nṛṇām//

prīyate na mano 'narthair nāsiddhāv abhinandati/

tasmāt sarvātmanā yātur anumeyaṃ sadā manaḥ//E6

chap.15 guhyakānuṣṭhāna

yātrārvāk saptāhād guhyakasāhāyakaṃ tryahaṃ pūrvam/

tryaham atha vijayasnānaṃ gṛhayajñaṃ saptame divase//

pakvāmamāṃsadadhiphalakusumāsavapāyasapratisarobhiḥ/

mūlakabhakṣair gandhair guggulumukhyais tathā dhūpaiḥ//

sāṃvatsarasacivapurohitāptapuruṣāyudhīyaparicāraḥ/

yāyān nagaracatuṣpatham abhuktavastrottarīyāṅgaḥ//

ardhaniśāyām udayati saumye vakre 'thavā tadaṃśe vā/

dadyād baliṃ daśasv apy āśāsu purohitaḥ kramaśaḥ//

āvartayet purodhāḥ kṛtāñjalis tatra rudrasāvitrīm/

kūṣmāṇḍamahārauhiṇakuberahṛdayāny ataḥ prapaṭhet//

dvāratrikacatuṣkādripuraniṣkuṭavāsinaḥ/

mahāpathanadītīraguhāgāhvaravasinaḥ//

viśvarūpā mahāsattvā mahātmano mahāvratāḥ/

prathamāḥ pratigṛhnīdhvam upahāraṃ namo 'stu vaḥ//

suputrāmātyabhṛtyo 'yaṃ sadāraś caiva pārthivaḥ/

rakṣṇīyo hite cāsya prayatadhvaṃ samāhitāḥ//

evam uktvā tatas tv arghyaṃ pramathebhyaḥ pradāpayet/

sāvitryāḥ sthaṇḍile tasmin sūtastūpahared balim//

yamendravaruṇārtheśaviṣṇupāvakaśūlinām/

yakṣarakṣaḥpiśācānām asurāṇāṃ tathāiva ca//

ye syur bhūtagaṇās tebhyo namo 'stv ity anuyāntu ca/

sannaddhāḥ svaiḥ praharaṇair arisenāvadhā ināḥ//

camūsametā anuyāntu pṛṣṭhato vicitramālyābharanā madotkaṭāḥ/

vicitravastrā jaṭilāḥ kirīṭinaḥ karālalambodarakubjavāmanāḥ//

nivṛttayātraḥ punar apy ahaṃ hi vo vijitya śatrūn bhavatāṃ prasādataḥ/

ato viśiṣṭaṃ bahuvittam uttamaṃ baliṃ kariṣye vidhinopapāditam//

anarcitā ye nṛpatiṃ savāhanaṃ vināśayanti kṣapayanti vā camūn/

supūjitāḥ siddhikarā bhavanti te pravādhakāḥ śatrugaṇasya cāhave//

kṣaṇaṣaṣṭhibhāgamātraṃ prayato nṛpatir visarjayet pramathān/

daivajñapurodhobhyām āveditamaṅgalo yāyāt//E15

chap.16 svapna

dukūlamuktāmaṇibhṛn narendraḥ samantridaivajñapurohito 'taḥ/

svadevatāgāram anupraviśya niveśayet tatra digīśvarārcām//

abhyarcya mantrais tu purohitas tān adhaś ca tasyāṃ bhuvi saṃskṛtāyām/

darbhais tu kṛtvāstaram akṣatais ca kiret samantāt sitasarṣapaiś ca//

brāhmīṃ sadūrvām atha nāgapuṣpīṃ kṛtvopadhānaṃ śirasi kṣitīśaḥ/

pūrṇān ghaṭān puṣpaphalābhidhānān āśāsu kuryāc caturaḥ krameṇa//

yaj jāgrato dūram upaiti daivam āvartya mantrāṃ kramaśas trir etam/

laghv ekabhug dakṣiṇapārśvaśāyī svapnaṃ parīkṣeta yathopadeśam//

namaḥ śambho trinetrāya rudrāya paramātmane/

vāmanāya virūpāya svapnādhipataye namaḥ//

bhagavan deva deveśa sūlabhṛd vṛṣavāhana/

iṣṭāniṣṭe mamācakṣva svapne suptasya śāśvatam//

ekavastre kuśāstīrṇe suptaḥ prayatamānasaḥ/

niśānte paśyati svapnaṃ śubhaṃ vā yadi vā 'śubham//

gataiṣyajātyantarasattvasaṅgaiḥ svapne 'py anūke gatije ca nityam/

yātuḥ prakopād anilātmakasya nagādrituṅgāmbaralaṅghanāni//

pittādhike kāñcanaratnamālyadivākarāgniprabhṛtīni paśyet/

śleṣmādhikaś cendubhaśubhrapuṣpasaritsarombhodhivilaṅghanāni//

jaghanyamadhyaprathame niśāṃśe prāvṛccharanmādhavasaṃjñate ca/

kāle marutpittakaphaprakopāt sādhāraṇaḥ syāt phalasannipātaḥ//

daśāsu coktaṃ grahapākajātaṃ cintā tu dṛṣā tu yathā tathaiva/

bībhatsasattvābhibhavo 'bhicāro vighnodbhavo guhyakajaḥ pradiṣṭaḥ//

anūkacintāgrahadoṣadṛṣṭāny atītakarṃāṇi ca niṣphalāni/

dyudṛṣṭapūrvāḥ kathitāś ca tadvad anyatra loke kathitā viśeṣāḥ//

pratyakṣavad bhavati yaḥ sphuratīva cāntaḥ
svapnasya tasya niyamāt sadasatphalāptiḥ/
svapnāḥ śubhāśubhakṛtāḥ phaladā narāṇām
uddeśamātram iha tān anuvarṇayāmi//

svāṅgaprajvalanaṃ paropagamanaṃ śakradhvajāliṅganaṃ
diksaṃvṛttanarendrakanyakatanor vikṣepaṇaṃ dikṣu ca//
bandho vā nigale grasec ca dahanaṃ nānāśirobāhutā
chatraṃ vā dvirado 'bhiṣicya bibhṛyād divyo 'thavā brāhmaṇaḥ//

uḍupadinakṛdgośṛṅgāgrasrutāmbvabhiṣecanaṃ
yadi ca mahiṣīsiṃhīvyāghrīgavāṃ sukhadohanaḥ/
jaṭharanisṛtaiś cāntrair grāmadrumādiniveṣṭanaṃ
viśati yadi vā suśliṣṭāṅgī tanuṃ pravarāṅganā//

manujahṛdayamūrdhnāṃ bhakṣaṇaṃ vā svadeha-
bhujagaturagasiṃhebhājamāṃsādanāni/
tṛṇatarukusumāmbhaḥprodgamo vā svanābhau
kṣititanuparivartonmūlane vādhirājyam//

dinakaraśaśitārābhakṣaṇasparśaṇāni
daraṇam api ca mūrdhnaḥ sapta pañca tridhā vā/
vṛṣabhagṛhanagendrāśvebhasiṃhādhiroho
grasanam udadhibhūmyoś cādhirājyapradāni//

vipularaṇavimardadyūtavādaiś ca jitvā
paśumṛgamanujānāṃ labdhir agryāsanaṃ vā/
viḍaśanaparilepo 'gamyanārīgamo vā
svamaraṇaśikhilābhaḥ sasyasandarśanaṃ ca//

sitasurabhimanojñālepamālyāmbarāṇāṃ
dvijasuragururājñāṃ darśanāny āsiṣaṃ ca/
maṇirajatasuvarṇāmbhojapātreṣu bhuṅkte
yadi dadhiparamānnaṃ śoṇite majjane vā//

sitaturagarathadhvajātapatravyajanasarojamaṇidvipendralābhāḥ/

abhaya jaya ca bhuṃkṣva ceti śabdāḥ pariṇatarājyaphalapradāḥ pradiṣṭāḥ//

pūrvajanmasu cābhyastā sattvarūpā gatis tadā/

(tada)nūkam iti proktam iha paścāt karoti yat//

mudrādiṣu yajñanīviṣu strīsaṃjñādiṣu cāṅganāptir uktā/

labdhe śayane 'tha darpaṇe bhṛṅārādiṣu codbhavaḥ (suta)sya//

kāminyāṃ dhanalabdhir ambutaraṇe śokasya nāśo bhaved
dharṣo roditaśocitādiṣu tathā dāhe vivṛddhir matā/
gośṛṅgidvijadevatāpitṛsuhṛdbhūpāś ca śaṃsanti yat
svapne tan niyamād bhavaty avitathaṃ neṣṭaṃ śubhaṃ vā phalam//

gobheranyatra gotre tṛṇatarukusumaprodbhavaḥ snehapānaṃ
krīḍāyānopabhogaḥ kharakapikarabhavyālarūpaiś ca sattvaiḥ/
kāyasyālepanaṃ vā kaluṣamalamaṣīgomayasnehapaṅkair
dṛgjihvādantabāhuprapatanam athavānarthaśokapradāni//

gītotkrīḍitabhūṣitaprahasitapr(āmoditā)khelitāni
arkendudhvajatārakānipatanaṃ strotovahāyā gamaḥ/
rajjucchedacitāprapātajananīgātrapraveśas tathā
svapne kāṃsyavicūrṇanaṃ ca śirasaḥ kleśāmayānarthadāḥ//

śmaśrukeśanakhadairghyakalpanā vānarīvikṛtanāryupāsanam/

raktavastramanujāṅgamardanaṃ rogamṛtyubhayaśokatāpadam//

sthalamṛgapaśukīṭānūpavaryandhajānāṃ
plavanamudakarāśau syād vivāhotsavo vā/
sarasijajatubhāṇḍakrīḍanaṃ nartanaṃ vā
malinavivasanatvaṃ cāśu rogapradāni//

svadravyanāśaḥ suhṛdāṃ viyogaśchedaś ca pāṇyoḥ kamalāpahāraḥ/

prāsādaveśmādriśirovatārāḥ svapneṣu neṣṭā iti saṃpradiṣṭāḥ//

mitrasyāptiḥ syādvikośāsilābhe vaśyaṃ gacched bhūpateḥ śāsanāptau/

sarpe karṇau nāsikāṃ vā praviṣṭe tacchedaḥ syād veṣṭane cāśu bandhaḥ//

ādye varṣād vatsarārdhād dvitīye yāme pāko varṣapādāt tṛtīye/

māsāt pākaḥ śarvarīpaścimāṃśe sadyaḥ pāko govisarge ca dṛṣṭe//

dṛṣṭvā svapnaṃ śobhanaṃ neha supyāt paścād dṛṣṭo yaḥ sa pākaṃ vidhatte/

śaṃsediṣṭaṃ tatra sādhudvijebhyas te tvāśibhiḥ pūjayeyur narendram//

bhūyaḥ prasvapanaṃ na cāsya kathanaṃ gaṅgābhiṣeko japaḥ
śāntiḥ svastyayanaṃ niṣevaṇam api prātargavāśvatthayoḥ/
viprebhyaś ca tilānnapānakusumaiḥ pūjā yathāśaktitaḥ
puṇyaṃ bhāratakīrtanaṃ ca kathitaṃ duḥsvapnavicchittaye//E32

chap.17 vijayasnāna

kṣīraikatarunagārṇavatūlanadīsaṅgamāḥ saraḥ śoṣyam/

gosthānapaṭusurālayarucirāḥ snānapradeśāḥ syuḥ//

samagambhīrānūṣaraśāḍvalabhūmau pradakṣiṇajalāyām/

kāṣṭhāraśmipramitaṃ vāstu likhet sarvato bhadram//

sarvair dhānyais tilamudgamāṣacaṇakātasīpariśliṣṭam/

acchinnāgrair darbhaiḥ kuśaiḥ sa(mastā)t paristīrṇam//

rajatamaṇihemagarbhaiḥ sakṣīrapravālasitasūtrai(ś ca)/

kalaśaiḥ kālamūlaiś ca śobhitadvāraṃ (tanmadhye)//

tanmadhye brāhmī brahmā sāma dūrvāgraśaṃkhapuṣpāḥ syuḥ/

diṅmukham aratnituṅgaṃ sthāpyaṃ pīnaṃ sapraveṣṭam//

tasya grahānulomaṃ kālaṃ kecij jagur niṣeveta/

purogha ....... ṣāṣṭikayavapāyasāhāram//

abhimatadevakṛtamanāḥ pūrvadvāreṇa pārthivaḥ praviśet/

bhadrāsanaṃ pradakṣiṇam adhyāsitvātha tasya vidhiḥ//

priyaṅgusiddharthakanāgadānagorocanākṣair ghṛtaiḥ sametaiḥ/

prāg ātmarakṣā praticakrapūtaiḥ snānonmukhasyāvanipasya kāryā//

śvetasya babhror athavā vṛṣasya carmāstare vyāghramṛgendrayor vā/

tatsthasya kuryān manujeśvarasya jayābhiṣekaṃ vidhivat purodhāḥ//

kramān mahīrūpyasuvarṇakumbhaiḥ kṣīrasya dadhno haviṣaś ca pūrṇaiḥ/

snāyāc ca toyaiḥ saha saptamṛdbhiḥ paścāc ca sarvauṣadhigandhatoyaiḥ//

parijapya mahārauhiṇakuṣmāṇḍakuverahṛdayarudragaṇaiḥ//

abhiṣecayen narendraṃ purohito 'smin samṛdhdyā ca//

dvātriṃśatiṃ ṣoḍaśa vāthavāṣṭau ghaṭapramāṇaṃ munibhiḥ pradiṣṭam/

snātas tv alaṅkāram apāsya pūrvaṃ navaṃ vidadhyād dvijamantrapūrtam//

māgaghabandisuhṛddvijasūtair abhimatavākkṛtamaṅgalakuśalaḥ/

carmasu copaviśed abhiṣiktaḥ pṛṣatagajendraviḍālavṛkāṇām//

gṛhītadhūpāmbaramālyagandhas trir bhrāmayitvopari cauṣadhīṃś ca/

vāme 'sya pārśve 'grata āsthito vā pratīpapātaṃ juhuyād dhutāśam//

gorocanāhemaphalāni sarpirbrāhmīṃ sadūrvāṃ sitasarṣapāṃś ca/

āsevya sarvāṇi yathopadeśaṃ bhaktyā dvijān svasti ca vācayitvā//

saumyena yāyāt phalapuṣpapāṇir dvāreṇa paśyen na ca pauruhūtam/

prāg uddhared dakṣiṇapādam evaṃ kurvan nṛpaḥ sarvaripūn praśāsti//E16

chap.18 grahayajña

grahayajñam ato vakṣye tatra nimittāni lakṣayed vedyām/[cited in bs 43.14]

bhaṅgo mānonāyāṃ digbhraṣṭāyām asiddhiś ca//

nagarapurohitadevīsenāpatipārthivakṣayaṃ kurute/[cited in bs 43.14]

prāgdakṣiṇāparottaramadhyamabhāgeṣu yā vikalā//

tatrārcā tāmramayī savituḥ pālāśikā susruksamidhaḥ/

ā kṛṣṇeti ca mantro raktā gandhāḥ sahāguraṇāḥ//

māṣātasītilāṃś cārkasamudgacaṇakān vihāya bhojyavidhiḥ/

vakulārkāgastyapalāśaśallakīkusumapūjā ca//

aṣṭaśatasaṃmitebhyo viprebhyo dakṣiṇāhitāgnibhyaḥ/

deyā vṛṣakanakamahī sahasrakiraṇaṃ (sa)muddiśya// (sūryaḥ)

nyagrodhāt sruksamidhaḥ sphaṭikād arcā ca śitagoḥ kāryā/

śaileyakanakhavarjyā gandhāḥ kusumāni ca sitāni//

godhūmaśāliyāvaravaṇḍagopayaḥ pūrvam aśanam atha mantraḥ/

āpyāyasveti bhavec cāturvedāya dadyāc ca//

maṇimuktākṣaumahiraṇyasaṃyutāṃ śvetatulyavatsāṅgām/

rajataśaphaviṣāṇāṃ kṣīriṇīṃ ca tu himāṃśum uddiśya//(candraḥ)

raktakaravīrasamidho raktā gandhāś ca candanāt pratimā/

mantraś cāgnir mūrdhety aśanaṃ guḍaṣaṣṭikaprāyam//

tāmrakanakapravālaurṇikāni deyāni dakṣiṇā cāsya/

uddiśya dharātanayaṃ chandogebhyo vratasthebhyaḥ//maṃ(galaḥ)

mantraś codbūdhyasvetyādi pratimā ca yuktilohamayī/

sruksamidhaś ca madhūkād atha vā cāndrer apāmārgāt//

yuktiprāyā gandhāḥ kālīyakakuṅkumapriyaṃgvādyāḥ/

kusumāni mālatīvakulatilakamadayantikādīni//

bhojyaṃ masuratilaśālimudgacaṇakādi dakṣiṇā svacchaś ca/

sarajatamaṇir vratibhyaś cāndrer ātharvaṇebhyaś ca//bu(dhaḥ)

aśvatthyarjunasamidhaḥ kanakārcā tv agnivarjitā gandhāḥ/

pītakusumāni ca guror bhojyaṃ tilamudgacaṇakāni//

bahvṛgbhya ekavarṇaṃ madhyamavayasaṃ turaṅgamaṃ dadyāt/

śṛṅgīsuvarṇayuktaṃ bṛhaspateś ceti guror mantraḥ//bṛ(haspatiḥ)

rajatārcā madanīyā gandhāḥ kusumāni citrasurabhīṇi/

panasodumbarasamidho bhojyaṃ vṛṣyaṃ ca bhṛgusūnoḥ//

annāt parisrutādyo mantraḥ strīkarkaśās tv alaṅkārāḥ/

adhvaryubhyo deyā dvātriṃśadbhyaḥ tadarhebhyaḥ//śu(kraḥ)

śālaśamīsruksamidhaḥ śanno devīti bhāskarer mantraḥ/

lohārcā śaileyakamustakaśuktyutkaṭā gandhāḥ//

girikarṇikātasīspandanāṃjanādīni kṛṣṇapuṣpāṇi/

aśanāni kṛṣṇatilamāṣacaṇakaniṣpāvamukhyāni//

preṣyām atītavayasāṃ trapvaṃjanasīsakṛṣṇalohayutām/

dadyād uddiśyārkiṃ vṛṣalīpativṛddhamūrkhebhyaḥ//śa(niḥ)

vaibhītasruksamidho rāhor home 'thavā bhaved dūrvā/

mantraś ca kayā naścitrapūrvako 'rcā ca nāgamayī//

uddiśya saiṃhikeyaṃ mahiṣaṃ pratipādayet suvṛddhebhyaḥ/

viprebhya iti yad anyat tat sarvaṃ sūryaputrasamam//(rāhuḥ)

ketoḥ kāṃsyapratimā ketuṃ kṛṇvann na ketave mantraḥ/

āraṇyakusumapūjā sruksamidhaḥ khadirakuśamayyaḥ//

māṃsaudanam ananaṃ 1brahmabandhuvargasya dakṣiṇā deyā/

praharaṇaphalgudravyāṇi caivaṃ ketuṃ samuddiśya//(ketuḥ)E24

chap.19 agnilakṣaṇa

kṛtvaivaṃ grahapūjām ṛcā tataś cāgniliṅgayā juhuyāt/

ślokāṃś cāsminn arthe kāśyapamunicoditān vakṣye//

tato 'pratirathaṃ kṛtsnaṃ yātrāliṅgaṃ ca yad bhavet/

āyuṣyam abhayaṃ caiva sarvaṃ caivāparājitam//

śarmavarmagaṇaṃ caiva tathā svastyayanaṃ gaṇam/

etān pañcagaṇān hutvā saṃsthāpyāgniṃ yathāvidhi//

bhūta bhūteti ca gaṇaṃ yatte candras tathaiva ca/

aindro gaṇas tathā cāndro mantrāśīḥsūktam eva ca//

bhūyo bhūyas tathā jvālāṃ saṃspṛśyātha purohitaḥ/

spṛśec ca nṛpatiṃ mantrair uccair brūyāt punaḥ punaḥ//

cakṣurdaḥ prāṇadaś cāpi varcodaś ca bhava prabho/

anādhṛṣyatamaś cāsi yathā tvaṃ havyavāhana//

śātravāṇāṃ tathā rājāpy anādhṛṣyo bhavaty ayam/

hūyamāne nimittāni vakṣyāmy aham ataḥ param//

kampotkāsavijṛmbhaṇapracalanasvedāśrupātakṣudho-
dgārādyaṃ ca purodhasaḥ smṛtivipac cāniṣṭam anyac chubham/
ājyaṃ keśapipīlikāmalayutaṃ sattvāvalīḍhaṃ ca yat
tan neṣṭaṃ śubham anyathopakaraṇaṃ dravyāṇy anūnāni ca//

utthāya svayam ujjvalārcir analaḥ svāhāvasāne havir
bhukte dehasukhaḥ pradakṣiṇagatiḥ snigdho mahān saṃhataḥ/
nirdhūmaḥ surabhiḥ sphuliṅgarahito yātrānulomo mṛdur
muktendīvarakāñcanadyutidharo yātur jayaṃ śaṃsati//

iṣṭadravyaghaṭātapatraturagaśrīvṛkṣaśailākṛtir
bheryabdodadhidundubhībhaśakaṭasnigdhasvanaḥ pūjitaḥ/
neṣṭaḥ proktaviparyayo hutavahaḥ snigdho 'nyathāpīṣṭadaḥ
savye 'ṅge nṛpatiṃ dahann atihitaḥ śeṣaṃ ca lokād vadet//E10

chap.20 prasthānika

vrajed digīśaṃ hṛdaye niveśya yathendra mainryām aparāś ca tadvat/

suśuklamālyāmbarabhṛn narendro visarjayed dakṣiṇapādam ādau//

sitātapatro maṇiratnaśobhaḥ pradhūyamānaiḥ sitacāmaraiś ca/

jayasvanāpūritarājamārgo dvijendramantrābhivivṛddhatejāḥ//

kanyāṇanāmasacivāptajanāyudhīyadaivajñaviprajanakaṃcukimadhyasaṃsthaḥ/

dvātriṃśataṃ samupagamya padāni bhūmau prāgādi nāgarathavājinraiḥ prayāyāt//E3

chap.21 gajalakṣaṇeṅgita

mā bhūt prasaṅgād ativistaro 'tra gajāśvapuṃlakṣaṇadarśaneṣu/

nimittamātraṃ kathayāmy ato 'haṃ prayāṇakālopayikaṃ nṛpāṇām//

tāmrauṣṭhatāluvadanāḥ kalaviṅkanetrāḥ snigdhonnatāgradaśanāḥ pṛthulāyatāsyāḥ/

cāponnatāyatanigūḍhanimagnavaṃśās tanvekaromacitakūrmasamānakumbhāḥ//

vistīrṇakarṇahanunābhilalāṭaguhyāḥ kūrmonnatair\footnote{Bṣ 66.7b kūrmonnata-} dvinavaviṃśatibhir nakhaiś ca/

rekhātrayopacitavṛttakarāḥ sajalāmbhodaninādavṛṃhiṇaḥ\footnote{Bṣ 66.7d dhanyāḥ sugandhimadapuṣkaramārutāś ca}/

dīrghāṅguliraktapuṣkarāḥ sajalāmbhodaninādavṛṃhiḥaḥ/

bṛhadāyatavṛttakaṃdharā dhanyā bhūmipater matāṅgajāḥ\footnote{Bṣ 66.8d mataṅgajāḥ}//

nirmadābhyadhikahīnanakhāṅgān kubjavāmanakameṣaviṣāṇām/

dṛśyakośaphalapuṣkarahīnān śyāvanīlaśavalasitatālūn//

svalpavaktraruhamatkuṇakhaṇḍān hastinīṃ ca gajalakṣaṇayuktām/

garbhiṇīṃ ca nṛpatiḥ paradeśaṃ prāpayed ativirūpaphalās te//

dantamūlapariṇāhadīrghatāṃ dviḥ pramucya parato 'sya kalpayet/

śyāvāpūtimalaraktadarśanaṃ pāpasattvasadṛśaṃ ca pāpadam//

pārthivopakaraṇākṛtiṃ yadā cihnam udvahati kalpite rade/

śrījayārthabalavṛddhayas tadā snigdhaśuklarucirāś ca śobhanāḥ//

dakṣiṇe śubham atīva śobhanaṃ pāpam apy ativirūpam anyataḥ/

yāpyatā bhavati tadviparyaye vistaro 'nyamunibhiḥ prakīrtitaḥ//

mūlamadhyadaśanāgrasaṃsthitā devadaityamanujāḥ kramāt tataḥ/

sphītamadhyaparipelavaṃ phalaṃ śīghramadhyacirakālasambhavam//

dantabhaṅgaphalam atra dakṣiṇe bhūpadeśabalavidravapradam/

vāmataḥ sutapurohitebhayān hanti sāṭavikadāranāyakān//

ādiśed ubhayabhaṅgadarśanāt pārthivasya sakalaṃ kulakṣayam/

saumyalagnatithibhādibhiḥ śubhaṃ vardhate 'śubham ato 'nyathā bhavet//

kṣīravṛkṣaphalapuṣpapādapeṣv āpagātaṭavighaṭṭanena\footnote{Bṣ 93.11béġvighaṭṭitena} vā/

vāmamadhyaradabhaṅgakhaṇḍane śatrunāśakṛd ato 'nyathāparam//

skhalitagatir akasmāt trastakarṇo 'tidīnaḥ śvasiti mṛdu sudīrghaṃ nyastahastaḥ pṛthivyām/

drutamukulitadṛṣṭiḥ svapnaśīlo vilomo bhayakṛd ahitabhakṣī naikaśo 'sṛcchakṛtkṛt//

valmīkasthāṇugulmakṣupatarumathanaḥ svecchayā dṛṣṭadṛṣṭir
yāyād yātrānulomaṃ tvaritapadagatir vaktram unnāmya coccaiḥ/
kakṣāsannāhakāle janayati ca muhuḥ śīkaraṃ vṛṃhitaṃ vā
tatkālaṃ vā madāptir jayakṛd atha radaṃ veṣṭayan dakṣiṇaṃ ca//E15

chap.22 vājilakṣaṇeṅgita

āvartasattvadyutivarṇajātiyānasvarāṅgādiguṇopapannāḥ/

saṃkṣepato 'śvā vijayāya rājñām āvartaleśopanayo yato 'yam//

aśrupātahanugaṇḍahṛdgalaprothaśaṅkhakaṭivastijānuṣu/

muṣkanābhikakude tathā gude savyakukṣicaraneṣu cāśubhāḥ//

ye prapānagalakarṇasaṃsthitāḥ pṛṣṭhamadhyanayanoparisthitāḥ/

oṣṭhavaṅkri\footnote{Bṣ 65.céġsakthi}bhujakukṣipārśvagās te lalāṭasahitāḥ suśobhanāḥ//

vālāvakiraṇaheṣitadhūmajvālādi codyame lakṣyam/

turagāṇām atrāryāḥ prakīrtitā viṣṇuguptakṛtāḥ//

tatrotsargeṇāsanapaścimabhāgāśraye jvalanam eṣām/

neṣṭam itaratra śastam vāmetarapārśvayos tadvat//

samam anyat padakesarapuccheṣu jvalanadahanakaṇadhūmāḥ/

rāṣṭrabhayarogasambhramasapatnacakrāpamardakarāḥ//

prākphalatulyaṃ pṛṣṭhe jaghane vāleṣu caiva nirdiṣṭam/

antaḥpuraprakopo meḍhrajvalane sadhūme vā//

nityaṃ ca bālakiraṇe dāhajvālāsphuliṅgakaṇadhūmāḥ/

skandhāsanāṃsadeśe vadhāya bandhāya ca raṇeṣu//

vakṣokṣilalāṭabhujeṣv aśvānāṃ heṣatāṃ ca vadanebhyaḥ/

jvālotpattir jayadā dhūmotpattiḥ svāmino 'bhāvāya//

nāsāpuṭāśrupātaprothaśirolocaneṣu rajanīṣu/

vijayāya prajvalanaṃ tāmrāsitaharitaśavalānām//

vijayāya sarvaidaiva hi suśuklaśukavarṇayor jvalanam eṣu/

evaṃ ca yathāsambhavam anyeṣv api vāhaneṣu phalam//

iṣṭāniṣṭavyaṃjakam ataḥ paraṃ heṣitaṃ samavadhāryam/

tac ca prasāritācalaśirodharodbhūtam iṣṭaphalam//

grāsāntarvaktrāṇām uccaiḥ snigdhānunādi gambhīram/

dvijapūrṇabhājaneṣṭadravyasraggandhasuramūlaiḥ//

khalinānnapānavarmasvāmyupakaraṇābhinanditā caiṣām/

sarvārthasiddhaye syād dakṣiṇapārśvaṃ vilokayatām//

sandhyāsu dīptadiṅmukhasambhramagāḍhapranaṣṭanidrāś ca/

heṣanto bhayajananā vadhabandhaparājayakarāś ca//

vakrīkṛtavāladhayo dakṣiṇapārśvānuśāyino neṣṭāḥ/

vāmacaraṇaiḥ kṣititalaṃ ghnanto jñeyāḥ pravāsāya//

sajṛmbhaṇaṃ pṛṣṭhavidhūnanaṃ ca vālaprakāras tv asakṛl lilikṣoḥ/

pādena pādākalanaṃ prasaṅgaḥ senāsamudyogadṛśāṃ hayānām//

nidrānirodhālasanīlanetrāḥ pradhyānaśūnyasmṛtayo dineṣu/

niśāsu cānyonyavirodhanaṣṭanidrās turaṅgā na śivāya bhartuḥ//

jaṃghe liṃhannavraṇaromapaṅke pādau ca saṃhṛṣṭatanur jayāya/

viparyayaḥ paścimayoḥ prayatnāt svayaṃ tu yātrābhimukho niyamya//

muhurmuhur mūtraśakṛt karoti na tāḍyāmāno 'py anulomayāyī/

akāryabhīto 'śruvilocanaś ca śivaṃ na bhartus turago vidhatte//

ārohati kṣitipatau vinayopapanno yātrānugo 'nyaturagaṃ pratiheṣitaś ca/

vaktreṇa vā spṛśati dakṣiṇam ātmapārśvaṃ yo 'śvaḥ sa bhartur acirāt pratanoti lakṣmīm//E21

chap.23 śakunaśubhāśubha

anyajanmāntarakṛtaṃ puṃsāṃ karma\footnote{Bṣ 85.5b karma puṃsāṃ} śubhāśubham/

yat tasya śukunaḥ pākaṃ nivedayati gacchatām//

grāmyāraṇyāmbubhūvyomadyuniśobhayacāriṇaḥ/

rutayātekṣitokteṣu grāhyaḥ puṃstrīnapuṃsakāḥ/

pṛthagjāty anavasthānād eṣāṃ vyaktir na labhyate\footnote{Bṣ 85.7d lakṣyate}/

sāmānyalakṣaṇoddśe ślokāv ṛṣikṛtāv imau//

pīnonnatavikṛṣṭāṅgāḥ\footnote{Bṣ 85.8a -aṅgāḥ} pṛthugrīvāḥ savakṣasaḥ\footnote{Bṣ 85.8b sthiravikramāḥ}/

svalpagambhīravirutāḥ pumāṃsaḥ sthiravikramāḥ//

tanugrīvaśironāsāḥ\footnote{Bṣ 85.9a tanūraskaśirogrīvāḥ} sūkṣmāsyapadavikramāḥ/

prasanna\footnote{Bṣ 85.9c prasakta-}mṛdubhāṣiṇyaḥ striyo 'to 'nyaṃ napuṃsakam//

grāmyāraṇyapracārādyaṃ lokād evopalakṣayet/

saṃvikṣipsur ahaṃ vacmi yātrāmātraprayojanam//

pathyātmānaṃ nṛpaṃ sainye pure coddiśya devatām/

sārthe prdhānaṃ sāmye tu\footnote{Bṣ 85.11d syāj} jātividyāvayodhikam//

muktaprāptaiṣyasūryāsu\footnote{Bṣ 85.12a -arkāsu} phalaṃ dikṣu tathāvidham/

aṅgāradīptadhūminyas tāś ca śāntās tato 'parāḥ//

tatpañcamadiśāṃ tulyaṃ phalaṃ\footnote{Bṣ 85.13b śubhaṃ} traikālyam ādiśet/

pariśeṣadiśor vācyaṃ yathāsannaṃ śubhāśubham//

śīghram āsannanimnasthaiś cirād unnatadūragaiḥ/

sthānavṛdhyupaghātāś ca tadvad brūyāt phalaṃ budhaḥ\footnote{Bṣ 85.14d punaḥ}//

kṣaṇatithyuḍuvātārkair daivadīpto yathottaram/

kriyādīpto gatisthānabhāvasvaraviceṣṭitaiḥ//

daśadhaivaṃ praśānto 'pi saumyas tṛṇaphalāśanaḥ/

māṃsāmedhyāśano raudro vimiśro 'nnāśanaḥ smṛtaḥ//

harmyaprāsādamāṅgalya\footnote{Bṣ 85.17a -maṅgalya-}manojñasthānasaṃsthitāḥ/

śreṣṭhā madhurasakṣīraphalapuṣpadrumeṣu ca//

svakāle giritoyasthā balino dyuniśācarāḥ/

klīvastrīpuruṣāś caiva balinaḥ syur yathottaram//

javajātibalasthānaharṣasattvair balānvitāḥ\footnote{Bṣ 85.19b svarānvitāḥ}/

svabhūmāv anulomāś ca tadūnāḥ syur vivarjitāḥ//

ka(ms.ku)kkuṭebhacirillyaś\footnote{Bṣ -pirilyaś} ca śikhivañjulacchikkarāḥ/

balinaḥ siṃhanādāś ca kūṭapūrī ca pūrvataḥ//

kroṣṭukolūkahārītakākakokarkṣapiṅgalāḥ/

kapotaruditākrandra(ms.ākranda)krūraśabdāś ca yāmyataḥ//

gośaśakrauñcalomāśahaṃsotkrośakapiñjalāḥ/

viḍālotsavavāditragītahāsāś ca vāruṇāḥ//

śatapatrakuraṅgākhumṛgaikaśaphakokilāḥ/

cāṣaśalyakapuṇyāhaghaṇṭāśaṃkharavā udak//

na grāmyo 'raṇyago grāhyo nāraṇyo grāmasaṃsthitaḥ/

divācaro na śarvaryāṃ na ca naktaṃcaro divā//

dvandvarogārditatrastakalahāmiṣakāṃkṣiṇaḥ/

āpagāntaritā mattā na grāhyāḥ śakunāḥ kvacit//

rohitāśvājavāleyakuraṅgoṣṭramṛgāḥ śaśāḥ/

niṣphalāḥ śiśire jñeyā vasnate kākakokilau//

na tu bhrādrapade grāhyāḥ sūkarāś ca\footnote{Bṣ 85.27b sva} vṛkādaya/

śarady abjādagokrauñcāḥ śrāvaṇe hasticātakau//

vyāghrarkṣavānaradvīpimahiṣāḥ savileśayāḥ/

hemante niṣphalā jñeyā bālāḥ sarve vimānuṣāḥ//

aindrānaladiśor madhye tribhāgeṣu vyavasthitāḥ/

kośādhyakṣānalājīvitapoyuktāḥ pradakṣiṇam//

śilpī bhikṣur vivastrā strī yāmyānaladigantare/

parataś cāpi mātaṅgagopadharmasamāśrayāḥ//

nairṛtīvāruṇīmadhye pramadāḥ sūtitaskarāḥ/

śāktikaḥ\footnote{Bṣ 85.31c śauṇḍikaḥ} śākunir hiṃsro vāyavīpaścimāntare//

viṣaghātakagosvāmikuhakajñās tataḥ param/

dhanavānīkṣaṇīkaś ca mālākāras tataḥ param\footnote{Bṣ 85.23d paraṃ tataḥ}//

vaiṣṇavaś carakaś caiva vājinām rakṣaṇe rataḥ/

evaṃ dvātriṃśato bhedāḥ pūrvadigbhiḥ sahoditāḥ//

rājā kumāro netā ca dūtaḥ śreṣṭhī caro dvijaḥ/

gajādhyakṣaś ca pūrvādyāḥ kṣatriyādyāś caturdiśaḥ//

gacchatas tiṣṭhato vāpi diśi yasyāṃ vyavasthitaḥ/

virauti śakuno vācyas taddigjena samāgamaḥ//

bhinnabhairavadīnārtaparuṣākṣamajarjarāḥ/

svarā neṣṭāḥ śubhāḥ śāntā hṛṣṭaprakṛtipūritāḥ//

śivāśyāmāralāchucchupiṅgalāgṛhagodhikāḥ/

sūkarī parapuṣṭā ca punnāmānaś vāmatah//

strīsaṃjñā bhāsabhaṣakakapiśrīkarṇacchitkarāḥ/

śikhiśrīkaṇṭhapippīkāruruśyenāś ca dakṣiṇā//

kṣveḍāsphoṭitapuṇyāhagītaśaṃkhāmbuniḥsvanāḥ/

satūryādhvayanāḥ puṃvat strīvad anyā giraḥ śubhāḥ//

grāmyau madhyamaṣaḍjau tu gāndhāraś ceti śobhanāḥ/

ṣaḍjaumadhyamagāndhārā ṛṣabhaś ca svarā hitāḥ//

rutakīrtanadṛṣṭeṣu bhāradvājājabarhiṇaḥ/

dhanyau nakulacāṣau ca saraṭaḥ pāpado 'grataḥ//

jāhakāhiśaśakroḍagodhānāṃ kīrtanaṃ śubham/

rutasaṃdarśanaṃ neṣṭaṃ pratīpaṃ vānararkṣayoḥ//

ojāḥ pradakṣiṇaṃ śastā mṛgāḥ sanakulāṇḍajāḥ/

cāṣaṃ sanakulaṃ vāmaṃ bhṛgur āhāparāhnataḥ//

chitkaraḥ\footnote{Bṣ 85.44a chikkaraḥ} kūṭapūrī ca pirilī(?) cāhni dakṣiṇāḥ/

apasavyaṃ sadā śastā daṃṣṭriṇaḥ savileśayāḥ//

śreṣṭhe hayasite prācyāṃ śavamāṃse ca dakṣiṇe/

kandakādadhinī paścād udag gā viprasādhavaḥ//

jālaśvacaraṇau neṣṭau prāg yāmye śastraghātakau/

paścād āsavaṣaṇḍau ca khalāsanahalāny udak//

karmasaṅgamayuddheṣu praveśe naṣṭamārgane/

yānavyatyastagā grāhyā viśeṣaś cātra kathyate\footnote{Bṣ 85.47d vakṣyate}//

divā prasthānavad grāhyāḥ kuraṅgaruruvānarāḥ/

ahnas tu prathame bhāge cāṣavañjulakukkuṭāh//

paścime śarvarībhāge naptṛkokūkapiṅgalāh/

sarva eva viparyasthā grāhyāḥ sārtheṣu yoṣitām//

nṛpasandarśane grāhyāḥ praveśe 'pi prayāṇavat/

giryaraṇyapraveśeṣu nadīnāṃ cāvagāhane//

vāmadakṣiṇagau śastau yau tu tāv agrapṛṣṭhagau/

krīyādīptau vināśāya yātuḥ praighasaṃjñitau//

tāv eva tu yathābhāgaṃ praśāntarutaceṣṭitau/

śakunau śakunadvārasaṃjñitāv arthasiddhaye//

kecit tu śakunadvāram icchanty ubhayataḥ sthitaiḥ/

śakunair ekajātīyaiḥ śāntaceṣṭāvirāvibhiḥ//

visarjayati yady eka ekaś ca pratiṣedhati/

sa virodho 'śubho yātur grāhyo vā balavattaraḥ//

pūrvaṃ prāveśiko bhūtvā punaḥ prāsthāniko bhavet/

sukhena siddhim ācaṣṭe praveśe tadviparyayāt//

visṛjya śakunaḥ pūrvaṃ sa eva niruṇaddhi cet/

prāha yātur arer mṛtyuṃ samaraṃ\footnote{Bṣ 85.56d ḍamaraṃ} rogam eva ca//

apasavyās tu śakunā dīptā bhayanivedinaḥ/

ārambhe śakuno dīpto vṛṣānte\footnote{Bṣ 85.57d varṣāntas} tadbhayaṃkaraḥ//

tithivāyuarkabhasthānaceṣṭādīptā yathākramam/

dhanasainyabalāṅgeṣṭakarmaṇāṃ syur bhayaṃkarāḥ//

jīmūtadhvanidīpteṣu bhayaṃ bhavati mārutāt/

ubhayoḥ sandhyayor dīptāḥ śastrodbhavabhayaṃkarāḥ//

citākeśakapāleṣu mṛtyubandhavadhapradāḥ/

kaṇṭakīkāṣṭhabhasmasthāḥ kalahāyāsaduḥkhadāḥ//

aprasiddhiṃ bhayaṃ vāpi niḥsārāśmavyavasthitāh/

kurvanti śakunā dīptāḥ śāntā yāpyaphalās tu te//

āsiddhisiddhidau\footnote{Bṣ 85.62a asiddhisiddhidau, āsiddhisiddhidauéīéġôṅé“éK‍h̲éóéṝéīüCBṣéḵÅ]éŚéŌôṅé—üB} jñeyau nirhārāhārakāriṇau/

sthānāt krośan\footnote{Bṣ 85.62c ruvan} vrajed yātrāṃ śaṃsate tv anyathāgamam//

kalahaḥ svaradīpteṣu sthānadīpteṣu vigrahaḥ/

uccam ādau dhvaniṃ\footnote{Bṣ 85.63c svaraṃ} kṛtvā nīcaṃ paścāc ca doṣakṛt//

ekasthāne ruvan dīptaḥ saptāhād grāmanāśakṛt\footnote{Bṣ grāmaghātakaḥ}/

puradeśanṛpāṇāṃ ca ṛtvardhāyanavatsarāt//

sarve durbhikṣakartāraḥ svajātipiśitāśanāḥ/

sarpamūṣikamārjārapṛthuromavivarjitāḥ//

parayoniṣu gacchanto maithunam deśanāśanāḥ/

anyatra veśarotpatter nṛṇāṃ vājātimaithunāt//

bandhaghātavadhāni\footnote{Bṣ 85.67a -bhayāni} syuḥ pādorumastakābhigaiḥ\footnote{Bṣ 85.67b pādorūmastakāntigaiḥ}/

apsasyapiśitānnaādair vargamoṣakṣatagrahāḥ//

iṣṭaṃ vā gorasānnaṃ vā bhāradvājasya darśane/

cāṣasya pūrṇavaktrasya mahān lābhaḥ pradakṣiṇe//

vāmadakṣiṇagaḥ śreṣṭhaḥ purastāc ca kapiṃjalaḥ/

tittiriḥ pṛṣṭhataḥ śreṣṭhaḥ sarvatrānyatra garhitaḥ//

anulomo vṛṣo nardan dhanyo gaur mahiṣas tathā/

gamanapratiṣedhāya kharaḥ pratyurasi sthitaḥ//

ulūkī vāmataḥ kṣemyā dakṣiṇena ca kokilā/

śarkariś ca (?) mayūraś ca śasyate dakṣiṇe sadā//

vṛkāḥ śṛgālāḥ śārdūlā viḍālā gardabhāḥ śunaḥ/

vāmato 'rthakarā jjeyāḥ kuraṅgā dakṣiṇena ca//

riktakumbo 'nukūlaś ca śasto 'mbhorthī yiyāsataḥ/

cauryavidyāvaṇigvittam udyatānāṃ viśeṣataḥ//E69

chap.24 śivāruta

pṛṣṭhataḥ pūjitā śāntā śivā māṃsāsthivarjitā/

krūraśabdātidīptā ca krūrakarmaṇi pūjitā//

pūrvodīcyoḥ śivā śastā śāntā sarvatra pūjitā/

dhūmitābhimukhī hanti svaradīptā digīśvarān//

[rājā kumāro netā ca dūtaḥ śreṣṭhī caro dvijaḥ/

gajādhyakṣaś ca pūrvādyāḥ kṣatriyādyāś caturdiśam//]

sarvadikṣv aśubhā dīptā viśeṣeṇāhnyaśobhanā/

pure sainye 'pasavyā ca kaṣṭā pūrvonmukhā śivā//

yāhīty agnibhayaṃ śāsti ṭāṭeti mṛticoditā\footnote{Bṣ 89.6b mṛtavedikā}/

dhigdhik duṣkṛtam ācaKṣe sajvālā deśanāśinī//

naiva dāruṇatām eke svajvālāyāḥ\footnote{Bṣ 89.7b sajvālāyāḥ} pracakṣate/

arkādyanalavat tasyā vaktrāj jvālā svabhāvataḥ\footnote{Bṣ 89.7d vaktraṃ lālāsvabhāvataḥ}//

anyapratirutā yāmyā sā bandahavadhaśaṃsinī/\footnote{Bṣ 89.8b sodbandhamṛtaśaṃsinī}

vāruṇyābhirutā\footnote{Bṣ 89.8c anurutā} saiva saṃsate salile mṛtim//

akṣobhyaśravaṇaṃ ceṣṭaṃ dhanaprāptiḥ priyāgamaḥ/

kṣobhāt pradhānabhedaś ca vāhanānām asampadaḥ\footnote{Bṣ 89.9d ca sampadaḥ}/

phalam ā saptamād etad agrāhyaṃ parato rute/

yāmyāyāṃ tadviparyastaṃ phalaṃ ṣaṭpañcamād rute\footnote{Bṣ 89.10d ṛte}//

yā romāṃcaṃ manuṣyāṇāṃ śakṛnmūtraṃ ca vājinām/

rāvāt trāsaṃ ca janayet sā śivā na śivapradā//

maunaṃ gatā pratirute naradviradavājibhiḥ/

yā śivā sā śivaṃ sainye pure vā saṃprayacchati//E11

chap.25 vāyaseṅgita

śasto nīḍas tu vaiśākhe padape nirupadrave/

deśotthānaṃ tu valmīkacaityadhānyagṛhādiṣu//

kākānāṃ śrāvaṇe dvitricatuḥśāvāḥ śubhāvahāḥ/

gairikaśvetacitrāś ca varṇāś caurāgnimṛtyudāḥ//

aṇḍāvakiraṇe dhvāṃkṣā durbhikṣamarakāv ubhau/

śāvānāṃ vikalatve vā niḥśāvatve kṛtāthavā//

hared upanayed vāpi yad dravyaṃ vāyaso 'grataḥ/

tan nāśalabdhau vijñeyau hemapīte vinirdiśet//

raktadravyaṃ pradagdhaṃ vā nyasan gehe 'gnidaḥ smṛtaḥ/

tṛṇabhasmāsthikeśāṃś ca śayane svāmimṛtyudaḥ//

purasainyopari vyomni vyākulair anilād bhayam/

savyamaṇḍalagaiḥ svārtham apasavyaiḥ parodbhavam//

akāryasahitair bhedo rodhaś cakrākṛtisthitaiḥ/

vargataś cābhighātaḥ syād ripuvṛddhiś ca nirbhayaiḥ//

upānacchatrayānāṅgaśastracchāyāvakuṭṭane/

mṛtyuṃ tatsvāmino brūyāt pūjā syāt tatprapūjane//

kāṣṭharajjvasthiniḥsārakeśakaṇṭakabhṛd ruvan/

vyālāhivyādhiśastrāgnitaskarebhyo bhayaṅkaraḥ//

yuddhaṃ senāṅgasaṃstheṣu moṣakṛt svāvalekhane/

caran niśi vināśāya durbhikṣaṃ dhānyamoṣakṛt//

vāmapārśvasthitaḥ śreṣṭho dakṣiṇād vāpi vāmagaḥ/

dhvāṃkṣaḥ pārśvadvayenāpi śasto yātrānulomagaḥ//

yātuḥ karṇasamo dhvāṃkṣaḥ kṣemyo nārthaprasādakaḥ/

vāmādakṣiṇago neṣṭo vā samānaḥ pratīpagaḥ//

viruvan cāgrataḥ pakṣe dhūnvan dhvāṃkṣo bhayapradaḥ/

pratyurasy upasarpan ca saṃsparśan ca tathā bhavet//

ekapādo calatpakṣaḥ kāko 'vaskandakheṭakaḥ/

vadhabandhakaro vāśan kharasūkarapṛṣṭhagaḥ//

paṅkadigdhaśarīrasya varāhasyoparisthitaḥ/

vāyasaḥ śasyate yātus tūṣṇībhūto ruvann api//

kṣīravṛkṣājamahiṣīgosthito gorasapradaḥ/

annadaḥ parṇavicchedī pānado jalakuṭṭanāt//E16

chap.26 śveṅgita

nṛhayātapavāraṇebhaśastradhvajadehān avamūtrayan jayāya/

sabhayo vicaran vinā nimittaṃ na śubhaś cābhimukho bhaṣan likhan gām//

uccair bhaṣaṇaṃ samāgatānāṃ dīnaṃ vābhirutaṃ raviṃ nirīkṣya/

saṃgharadanajṛmbhaṇe ca neṣṭe prasthāneṣu tathā vidhūnanaṃ ca//

pūrṇāsyatvaṃ ghrāyakatvaṃ ca yātuḥ prādakṣiṇyaṃ maithunaṃ cānulomam/

yātrākāle sārameyasya śastaṃ padbhyāṃ mūrdhanaḥ svasya kaṇḍūyanaṃ ca//E3

chap.27 maṅgalāmaṅgala

siddhārthakādarśapayoṃjanāni baddhaikapaścāmiṣapūrṇakumbhāḥ/

uṣṇīṣabhṛṅgāranṛvarddhamānapuṃyānavīṇātapavāraṇāni/

dadhimadhughṛtarocanākumāryo dhvajakanakāmbujabhadrapīṭhaśaṃkhāḥ/

sitavṛṣakusumāmbarāṇi mīnā dvijagaṇakāptajanāś ca cāruveṣāḥ//

jvalitaśikhiphalākṣatekṣubhakṣyā dviradamṛdaṅkuśacāmarāyudhāni/

marakatakuruvindapadmarāgasphaṭikamaṇipramukhāś ca ratnabhedāḥ//

svayam atha racitāny ayatnato vā yadi kathitāni bhavanti maṅgalāni/

sa jayati sakalāṃ tato dharitrīṃ grahaṇadṛgālabhanaśrutair upāsya//

kārpāsauṣadhakṛṣṇadhānyalavaṇaklīvāsthitailāvasāḥ
paṅkāṅgāraguḍāhicarmaśakṛtaḥ kleśāya savyādhitāḥ/
vātonmattajaḍendhanaṃ tṛṇatuṣakṣutkṣāmatakrārayo
muṇḍābhyaktavimuktakeśapatitāḥ kāṣāyinaś cāśubhāḥ//

paṭupaṭahamṛdaṅgaśaṃkhabherīpaṇavaravaṃ sapatākatoraṇāgram/

pracurakusumatoyaśāntareṇuṃ surabhisuveṣajanaṃ vrajec ca mārgam//E6

chap.28 dhvajātapatrādiśakuna

dhvajātapatrāyudhasannipātaḥ kṣitau prayāṇe yadi mānavānām/

uttiṣṭhato vāmbaram eti saṅgaṃ patec ca vā tannṛpateḥ kṣayāya/

dadrupratiśyāmavicarcikāḥ syuḥ karṇākṣirogā piṭakodbhavo vā/

prāyo bale netari vā nṛpe vā jānīta rājño bhayakāraṇaṃ tat//

uttānaśayyāsanavātasarganiṣṭhyūtadurdarśanakāsitāni/

neṣṭāni śabdāś ca tathaiva yātur āgacchatiṣṭhapraviśasthirādyāḥ//

kāryam tu mūlaśakune 'nyataraje tadahni vidyāt phalaṃ niyatam evam ime vicintyāḥ/

prārambhayānasamaye tu tathā praveśe grāhyaṃ kṣutam na śubhadaṃ kvacid apy uśanti//

krośād ūrdhvaṃ śakunavirutaṃ niṣphalaṃ prāhur eke
tatrāniṣṭe prathamaśukune mānayet paṃca ṣaḍ vā/
prāṇāyāmān nṛpatir aśubhe ṣoḍaśaivaṃ dvitīye
pratyāgacchet svabhavanam ato yady aniṣṭas tṛtīyaḥ//

cakre varāhamihiraḥ śakunopadeśam uddeśato munimatāny avalokya samyak/

yad granthavistarabhayād avijānato vā noktaṃ tad anyakathitād api cintanīyam//E6

chap.29 niveśa

snigdhā sthirā surabhigulmalatā sugandhā śastā pradakṣiṇajalā ca nivāsabhūmiḥ/

neṣṭā viparyayaguṇā kacaśarkarāsthivalmīkakaṇṭakavibhītakasaṅkulā ca//

gatvālayaṃ suragurudvijasādhumitratīrthetihāsajayapuṇyakathāsu tiṣṭhet/

hatvā paśuṃ ripugṛhākṛtam udyame ca prāsyātha vānnamayam asya vidhāya rūpam//

ekatrādhyuṣitasyātrigautamacyavanā jaguḥ/

yātrāṃ tripañcasaptāhāt punarbhadreṇa yojayet//

tac cāyuktam iti prāhur horāśāstravido janāḥ/

vāṃchitārthaphalāvāptau yātrā parisamāpyate//E4

chap.30 abhiyojya

akṣepaśīlaḥ paruṣābhidhāyī viraktabhṛtyaḥ paradāragāmī/

lubdho 'sahāyo vyasanī kṛtaghnaḥ sthitiprabhettā karaśīrṇarāṣṭraḥ//

visrambhahā krodhavaśo nṛśaṃsaḥ kṣudraḥ pramādī na bahuśrutaś ca/

divyāntarikṣakṣitijair vikārair nipīḍito yaḥ sa tu daivahīnaḥ//

ato viparyastaguṇena rājñā tādṛgvidho 'ristv abhiyuktamātraḥ/

tarur ghunair jagdha ivāttavīryo mahān api kṣipram upaiti bhaṅgam//E3

chap.31 senāvātavṛṣṭyulkābhūgarjitasandhyā

vidviṣṭapravaranarapratāpahīnā niḥśaucā mṛtavaravāraṇāś ca yodhāḥ/

sotpātaprakṛtiviparyayānuyātā śokārtā ripuvaśam āśu yāti senā//

saṃgrāme vayam amaradvijaprasādāj jyoṣyāmo ripubalam āśv asaṃśayena/

yasyaivaṃ bhavati bale janapravādaḥ so 'lpo 'pi pracurabalaṃ ripuṃ nihanti//

protkṣiptakṣupapāṃśupatravihagacchatradhvajāgrāntakṛd
durgandhiḥ karidānaśeṣajanakaḥ sāvarttaloṣṭotkaraḥ/
yātur vāyur aniṣṭadaḥ śubhakaro yātrānulomodyamaḥ
prahlādī surabhipradakṣiṇagatiḥ svāduś ca siddhipradaḥ//

pṛthughanam anulomaṃ snigdham ambhodavṛndaṃ tarunaganagareṣṭadravyasatvānukāri/

jayadam ubhayapārśvādhiṣṭhitaṃ pṛṣṭhato vā na śubhakaram ato 'nyad yānakāle nṛbhartuḥ//

ninditasattvapiśācavicitrāḥ piśitamṛgākṛtayaḥ paruṣāś ca/

vajramucaḥ kṣatajāśmamuco vā balabhayam āśu janāḥ kathayanti//

bhṛśaṃ kṣaranto rudhirāruṇā vā saśakracāpā khararūkṣanādāḥ/

raṇopayojyākṛticitrarūpā raṇāya dṛṣṭā gagane 'mbuvāhāḥ//

saptāhāntarbalabhayakarī vṛṣṭir anyartujātā
kecid yātrām asitajaladaiḥ protthitāṃ pūjayanti/
citrābhrāyāṃ balapativadho ruk ca pītāmbudāyāṃ
kṣc coṣṇāyāṃ bhavati na cirād ambudāyāṃ vināśaḥ//

vāhanāni savyago hanti yoṣito 'nyathā/

paṃjarākṛtisthitaḥ sarvato baleśvaram//

cāpam aindram anulomam akhaṇḍaṃ projjvalaṃ bahulam āyatam iṣṭam/

sphūrjanaṃ salilakumbhaniṣekaṃ kṣobhitārṇavasamaṃ vijayāya//

tanvī pralambā vijayāya dīrghā taḍid ghanasphūrjathuvarjitā ca/

śastāśaniś cāpy asamīpajātaḥ pradakṣiṇenāpsyati pātaśabdaḥ//

lagne 'rkendū nighnatī śasti paurān ulkā hanyād yātupaurān grahāś ca/

yātuḥ śastā sambhṛtā vā dhruvarkṣe neṣṭāto 'nyā dhūminī śyāvaraktā//

hanyān nṛpapaurarāṣṭrikān bhṛtyāmbhoruhataskarān dvijāṃś ca/

velā kramaśo dināditaḥ kāṣṭhāyāṃ ca sa yatra bhūsvanaś ca//

śastā śāntadvijamṛgaghuṣṭā sandhyā snigdhā mṛduṣavanā ca/

pāṃśudhvastā janapadanāśaṃ dhatte rūkṣā rudhiranibhā vā//E13

chap.32 utpāta

pariveṣo 'rkaśaśinoḥ śatrupakṣagrahaiḥ saha/

snigdho 'khaṇḍaś ca jayadaḥ pāpado bahumaṇḍalaḥ//

pratilomo 'tibahulo neṣṭa iṣṭaḥ pradakṣiṇaḥ/

nīhāraḥ pāṃśupātaś ca hitaḥ snigdhaḥ pradakṣiṇaḥ//

gandharvanagaraṃ hanti prākprabhṛty avanīśvaram/

baleśaṃ yuvarājaṃ ca purohitam iti kramāt//

sitādyaṃ brāhmaṇādīṃś ca vidikṣu varṇasaṅkarān/

pradakṣiṇaṃ tu yātrāyāṃ jayadaṃ neṣṭam anyathā//

diśāṃ dāho 'tha jayadaḥ pradakṣiṇa upāgataḥ/

śvabhronnate vadho rājño jayāya vyatyayena ca//

ghṛtāmbupayasāṃ srāve cyute vṛkṣāc ca tatkṣayaḥ/

taile ca nāśo mukhyānāṃ rakte śastrakṛtaṃ bhayam//

madyena tu mitho bhedo rugbhayaṃ dadhinisrave/

kusumāt kusumotpattau paracakrāgamaṃ vadet//

bahutoye 'tisaṃśoṣaḥ kūpe 'sṛkpūrtivisravaḥ/

rājño 'bdārdhād vadhaṃ kuryuḥ sroto 'lpatve parāgamaḥ//

vṛṣṭividyutsvanair vyabhre carasthiraviparyaye/

dinolkāyāṃ ca pīḍyante janā bhūpatibhiḥ saha//

saptāhaṃ santatāny ato vṛṣṭir hanyān narādhipam/

anagnijvalane puṃsāṃ vyādhir āśv eva jāyate//

pīḍā rāṣṭrasya ṣaṇmāsād uṣṇaśītaviparyaye/

māse 'ṣṭame nṛpasyānto nināde paśupakṣiṇām//

nagarāraṇyasattvānām araṇyapurasevane/

rāṣṭrapīḍādhike varṣe mukhyalokasya ca kṣayaḥ//

stambhopalakusūlārcāpīṭhaśayyāpasarpaṇe/

gadane cāpi deśasya nāśaṃ māsatrayād vadet//

gonāgāśvavadho 'bdārdhe vyatyayo vā nṛpāntakṛt/

deśanāśas tathā strīṇāṃ khagāhipaśusambhave//

dhānyarasamadyabhojanaphalapuṣpasnehamāṃsavastrāṇām/

sikatārajorasātmakasaśarkarāṅgāravarṣeṣu//

sutapatnī kṣudrājñā nṛpadeśacamūpamaraṇasaṃkleśāḥ/

bhedo 'pado 'tha mantrivyādhivināśabhūpakrodhāḥ//

niśi suracāpaṃ sitavarṇādyaṃ janayati pīḍāṃ dvijapūrvāṇām/

bhavati ca yasyāṃ diśi taddiśyaṃ narapatimukhyaṃ na cirād dhanyāt//

mṛgapaśurāsabhavājigajānāṃ viyataravo na cirād bhayadātā/

vibudhapatidhvajatoraṇapātaḥ phalam idam eva karoti nṛpāṇām//E18

chap.1 daivapuruṣakāra